! //na mo gu ru munydzu g+ho ShA ya/ 'gro ba kun gyi bde dang legs
pa'i dpal/ /

gang zhig skyabs su bzung bas stsol mdzad ma/ /sdug bsngal can
rnams skyob pa'i khur 'khyer ba'i/ /rje btsun sgrol ma de la gus phyag
'tshal/ /gang dag sdug bsngal rgya mtsho cher lhung ba/ /de dang de
dag nga yis bsgral lo zhes/ /rlabs chen dam bca' rjes

su sgrub mdzad pa'i/ /brtse ldan ma de'i zhabs kyi chu skyes ni/ /gang
gis gus pas spyi bos rab mchod pa/ /dal ba'i rten bzang rnyed pa'i
bzhin bzang khyod/ /kho bos phan pa smras pa'i rjes 'brang na/ /mdo
tsam bshad kyi bsam pa thag pas nyon/ /nges par 'ong

zhing myur du 'ong nges pa'i/ /'chi ba'i bsam pa yang yang ma sbyangs
na/ /dge ba'i bsam pa mi skye skyes na yang/ /tshe 'di'i phun tshogs lhur
len tsam du zad/ /de phyir gzhan dag 'chi ba mthong thos rnams/
/yid la soms la bdag la 'di 'dra zhig /myur

du 'ong nges nam yong cha med la/ /de tshe lus dang longs spyod
mdza' bshes rnams/ /kun dang 'bral zhing dge dang sdig pa'i las/ /grib
ma bzhin du rjes su 'brang ba dang/ /sdig pa'i las las rgyun ring
shugs drag pa'i/ /ngan song gsum gyi sdug bsngal

@209a @#/ /'byung ba dang/ /dge ba'i las las bde 'gro brgyud nas ni/
/myur du rgyal ba'i go 'phang 'thob pa'i tshul/ /shes par gyis la nyin re
bzhin du soms/ /de ltar bsams nas skyabs su 'gro la 'bad/ /thub pas
khyim pa'i rten la bsngags pa yi/ /  

gtan khrims lnga la blo dang 'tsham par slob/ /dus mtshams nyi mar
gso sbyong yan lag brgyad/ /legs par blangs nas srung ba shin tu
gces/ /lhag par 'jig rten gnyis su 'phud byed pa'i/ /myos 'gyur 'thung
ba dam pa rnams kyis smad/ /de phyir

bzhin bzang khyod kyis smad pa'i gnas/ /las 'di la ni gtan du log na
legs/ /gang la spyad pas phugs su sdug bsngal na/ /'phral du bde bar
snang yang bsten mi bya/ /dug dang 'dres pa'i kha zas g.yos legs
rnams/ /kun gyis spong bar byed pa

ma mthong ngam/ /nyin re zhing yang dkon mchog mchod pa sogs/
/dge la 'bad cing sngar byas sdig pa bshags/ /slan chad sdom pa je
drag je drag bya/ /gang bsags dge ba sangs rgyas rgyu ru sngos/
/mdor na skye dang 'chi ba'i dus rnams su/ /gcig pu skye

zhing gcig pu 'chi bas na/ /grogs dang nye du la sogs kun gyis bslu/
/slu ba med pa'i mchog ni dam chos yin/ /tshe thung 'di ni glog bzhin
yud tsam pa/ /gang ltar byas kyang phyid kyi gtan bde gcig /sgrub
dus da res yin no legs par soms/ /dal

'byor rin chen stong log ma byed cig /de ltar gdams las bsod nams
gang thob des/ /skyid kyang mi 'tsheng sdug kyang mi phung ba'i/ /tshe
'di'i bun long sgrub pa'i blo logs nas/ /'gro kun chos kyi dga' bas 'tsho
bar shog /'di ni 'gro ba'i

@209b bsod nams zhing/ /sku gzugs 'dri ba'i las la mkhas/ /dpal ldan
zhes byas bskul ba'i ngor/ /dge slong blo bzang grags pas smras/
/zhes dal 'byor gyi rten la snying po len par bskul ba'i tshigs su bcad
pa'o//