@263b ! rje thams cad mkhyen pas mdzad pa'i bya dga'i snyan ngag I dbyangs nges bzhugs so)// ! //yang dag lam la rab gnas pa/ /las ngan bag chags thams cad spangs/ /gzhan phan thabs mang rab mnga' ba/ /dag pa sar gnas 'jam dpal dang/ /gzhan yang 'phags pa thams cad la/ /lhag bsam dag pas rab dad nas/ /zab lam man ngag dam pa 'chad/ /lhag par dga' bas mnyan par 'tshal/ /las ngan bag chags bsags pa las/ /mngal dang gzhan yang gnas ngan 'gar/ /rang dbang spangs nas btsal ba dang/ /rnam mang na tshes yang yang mnar/ /rgas pas yan lag nyams dang 'dar/ /rkang lag zha dang mdangs ngan pa/ /thams cad las ngan dbang las lags/ /las ngan chags sdang ma spangs na/ /rang gzhan thams cad las ngan las/ /nam yang thar bar dka' bas na/ /chags sdang spang la 'bad par 'tshal/ /rnam dkar las las thar pa dang/ /las ngan bsags pas gnas ngan 'gar/ /yang yang mnar ba rab bsams nas/ /dkar nag las la gdam ga 'tshal/ /rab gnag las la gang dga' ba/ /las ngan dbang las bsad pa dang/ /bcad dang btags pas rnam par mnar/ /nags tshal yangs pa mtha' yas par/ /bshad lam brdar bas bcad pa dang/ /rab tsha zangs nang nyam nga bar/ /sha dang pags pa zhag rnams zad/ /mkha' la 'dab ma 'bar ba dang/ /rnam mang mda' tshar @264a @#/ /yang yang 'bab/ /rab 'bar tsha ba dang ldan par/ /dpag yas bskal par gnas kyang 'tshal/ /gzhan yang padma ltar gas nas/ /nyam thag par yang gnas pa dag /thams cad las ngan dbang lags pa/ / las ngan spang la 'bad par 'tshal/ /gzhan yang las ngan bsags pa las/ /rta 'am ba glang mngal btsas nas/ /rang dbang rab spangs thag pas btags/ /bsad dang bcad pas nyam thag 'bar/ /la la khal mang bkal bas mnar/ /phan dang dga' ba spangs pa dag /thams cad las ngan dbang lags pas/ /las ngan spang la 'bad par 'chal/ /las ngan dbang las gang zag 'gas/ /yang dag kha zas ma 'tshal bar// thal dang bshang ba za ba 'am/ /kha zas gtan nas ma 'tshal bas/ /nyam thag par yang rnam par gnas/ /la la rkang lag mtha' dag zha/ /sna dang yan lag ma tshang bas/ /gzhan 'gas smad dang brnyas par mdzad/ / la la gcan gcan mngal btsas nas/ /gzhan la sdang bas rnam par gnas/ /la la nya dang phag par gnas/ /'dam bcas gnas na nyal ba dag /thams cad las ngan dbang lags pas/ /las ngan spang la 'bad par 'tshal/ /las ngan dbang las nya pa dang/ /bshan pa dag la rab dga' bas/ /rab gnag las lam mang bsags nas/ /las ngan nyam par rtag par gnas/ /mthar yang thar bar dka' @264b bas na/ /las ngan spang la 'bang par 'tshal/ /dar mar gnas pa rgas pas nyams/ /rnam mang na tshas mdangs bzang yal/ /bsags pa thams cad nam yang 'dzad/ /gnas pa thams cad mthar 'gag pas/ /bsam pa thar pa la gtad nas/ /rnam dkar las la 'bad pa dang/ /chags sdang mtha' dag spangs na 'thad/ /pad ma rA ga 'bar ba dang/ /mrgad khang pa ba dan can/ /chang dang kha zas rab mang bar/ /dga' ma mdangs bzang dang bcas pa/ /dar zab stan la nyal ba dang/ /sa bdag dpal las mthar nyams nas/ /'dam bcas khang pa dag na nyal/ /kha zas yang dag ma 'tshal bas/ /rang dbang dga' ba rab spangs nas/ /nyam thag par yang gnas 'tshal lags// dal 'bab padma gsar gnas pa/ /yal 'dab dang ldan dpag bsam can/ /dga' tshal dag dang lha rnams dang/ /dbang mdzad dpal ldan lha dbang yang/ /lha dbang dpal las mthar nyams nas/ /phag gam ba lang mngal nas btsas/ /kha zas rtswa dang bshang ba za/ /sa dang gnas mal ngan pa 'gar/ /nyam nga bar yang gnas 'tshal lags/ /sngar bshad las ngan rab spangs nas/ /rnam dkar gzhan phan bsam pa dang/ /yang dag lam la rab gnas pas/ /las dang bag chags sdangs pa dang/ /thar lam dag la 'bad na 'thad/ /rab dkar las la gang dga' ba/ /yang dag kha zas rnam mang ldan/ /khang bzang ba dan can la dbang/ /thams cad bka' la rab mnyan pa/ / @265a @#/ /sa la dpal 'bar sa bdag dang/ /bsam gtan rab mnga' 'tshangs dbang yang/ /yang dag par gnas 'phags pa dang/ /gzhal yas khang gnas lha dbang yang/ /rnam dkar las la rag las pas/ /yang dag lam la 'bad na 'thad/ /yal 'dab rab bzang dpag bsam dang/ /gdangs gsal dal 'bab pad gsar can/ /dga' tshal ma la yas khang ba/ /dpag yas dad ldan gnas gtsang na/ /khang bzang rnam dkar ba dan can/ /lta na rab dkar yangs pa dang/ /dar dkar na bza' mal cha stan/ /rnam mang dar zab ratna dang/ /yang dag kha zas dpal la dbang/ /sa dang bar snang mtha' dag na/ /dpag yas bsnags pa dang ldan pa'ang/ /rnam dkar las la rag las pas/ /yang dag lam la 'bad na 'thad/ /zab yangs ganggA pad gsar can/ /pad dkar mdangs bzang 'dab ma 'dab/ /tsandan ma la ya ngad ldan/ /snang ba rab 'bar rnam mang gsal/ /rab bzang ngad ldan tsandan 'bar/ /zhal zas bza' ba lha rdzas mang/ /rdza rnga cha lang skad snyan dang/ /dga' cha mdangs gsal gar nyams can/ /lha rdzas gzhan yang mang ldan pa/ /rab dkar las la rag las pas/ /yang dag lam la 'bad na 'thad/ /rnam dkar las la 'bad na yang/ /mtshan ma dang ldan bsam gtan las/ /zag bcas gnas nas thar bar dka'/ /yang dag lam la @265b gnas pa la/ /zag pa thams cad 'gags pa na/ /mtshan mar lta ba rab spangs nas/ /bka' dang man ngag mnyan par 'tshal/ /yang dag lam la mkhas pa dang/ /gzhan phan bsam pa rab mnga' ba/ /sa dang lam la gnas pa yang/ /gang zag dam pa gzhan bcal nas/ /zab lam yang yang nyan na bzang/ /rnam dag bka' dang 'gal ba rnams/ /gzhan 'gas 'thad par bstan na yang/ /tshad mas rnam par bkag pas na/ /nyan yang rab gzhan ngal bar zad/ /bsam gtan dag la ma 'bad na/ /nyan pa tsam las thar dka' bas/ /rang rang khang pa bas mtha' dang/ /gang bsam nags tshal nyams dga' ba/ /'dab chags skad snyan dang ldan par/ /bsam pa gzhan dag rab btang nas/ /mnyan gzhag lam la 'bad na 'thad/ /bdag lta mtha' dag rnam spangs nas/ /zab lam yang dag lta ba la/ /rnam dag bsam pas 'bad pa na/ /thar pa dam pa rang la gnas/ /yang dag lam la 'bad na yang/ /rang la phan bsam ma spangs na; ;nyan rang dag las ma 'das pas/ /gzhan phan las la 'bad na 'thad/ /gang zag gzhan dag thams cad la/ /pha dang mar yang rab bsams nas/ /rang las gzhan la lhag par yang/ /rnam dkar bsam pa ldan par 'tshal// gzhan phan bsam pas rab 'phangs nas/ /kha zas mal cha gnas khang dang/ /yan lag dag dang dga' ma yang/ /ma phangs gzhan la gtang bar 'tshal/ /la las 'dab ma 'bar ba dang/ /rnam mang mda' char phab na yang/ /bdag dang @266a @#/ /las la rab bsams nas/ /rnam dkar bsam pas gnas par 'tshal/ /thams cad rang la rag las pas/ /rang bsam stag ltar yan pa dag /zab lam ka ba dam pa la/ /bsam gtan thag pas btags na bzang/ /lta ngan rnam par ma bsal na/ /thar lam dag las nyams lags pas/ /rtag chad lta ba rab spangs nas/ /yang dag mtha' la mnyam gzhag 'tshal/ /brtags nas tshad mas bsal ba dang/ /tha snyad snang tsam ma 'gags pas/ /rtag chad mtha' las rab 'das par/ /yang dag lam la mkhas pas bshad/ /yang dag lam la ma 'bad na/ /las ngan bag chags spang dka' bas/ /mtshan ma thams cad rab spangs nas/ /sa lam dag la 'bad par 'tshal/ /bka' rnams gdams par rab shar nas/ /zab lam bsam gtan dag la 'bad/ /mnyam gzhag lam las langs pa dang/ /bka' dang man ngag 'chad par 'tshal/ /gzhan phan mdzad pa bsam las 'das/ /las ngan bag chags mtha' dag spangs/ /zab lam thams cad chang bar mnga'/ /mtshan dang ldan pa gzhan las lhag /rab dang bar dang tha ma la/ /rang rang khams dang bsam pa dang/ /'tsham par lam rnams thams cad 'chad/ /tshangs dang lha dbang bka' la nyan/ /mda' lnga pa rnams rang dbang spangs/ /'phags pa gzhan las mkhas pa dag /yang dag lam la rag las pas/ /las ngan thams cad rab spangs nas/ /yang dag lam la 'bad par 'tshal/ /gzhan @266b phan bsam pas rab 'phangs nas/ /zab lam bag tsam bstan pa la/ /bdag la phan bsam ldan pa rnams/ /dga' dang dad pas nyan na 'thad/ /tha mal nad dang bcas pa yang/ /sman pa dag la rab nyan na/ /chags dang sdang bas na ba dag / bka' las 'da' ba ga la 'thad/ /yan lag zhags pas bsdams pa yang/ /bcad thabs dag la rab 'bad na/ /las ngan zhags pas btab pa dag /dal bar gnas pa ga la 'thad/ /dad ldan spa bas yang dang yang/ /nan mdzad ngag las rab nyan nas/ /snyan ngag gnas rnams mtha' dag la/ /mkhas pas lhag bsam dag pas brtsams/ /zab lam man ngag bshad pa la/ /'gal ba snang na mkhas la bshags/ /rnam dkar las dang gang ldan pas/ /rang gzhan bag chags spang bar 'tshal/ /gzhan 'gas bskal par 'bad na yang/ /brtsam par rab dka' snyan ngag dag /lhag bsam rnam par dag pas brtsams/ /mkhas pa rnams la ya mtshan gnas/ /chags dang sdang bas smad na yang; ;rang rtags gzhan la bstan par zad/ /bdag la 'dar dang nyam nga ba/ /nam yang mnga' ba ga la 'tshal/ /(zhes pa 'di ni bshes gnyen spa ? pas bskul ba'i ngor/) bde bar gshegs pa'i gsung rab phal mo che la blo gros kyi padmo rgyas pa shar tsong kha pa blo bzang grags pa'i dpal gyis sbyar ba'o//)