@#/ /gzugs kyi chung mtha' dang dus kyi thung mtha' sogs las
brtsams pa'i dri lan rje nyid kyis mdzad pa bzhugs so/ /

@001a @#/ /sasti pra dza b+hyaH 'jig rten gsum na sangs rgyas
gnyis pa zhes/ /gang gi mchan gyis rna ba'i lam mdzes pa/ /dbyig
gnyen nyin byed gsung gi 'od zer tshogs/ /da dung gdul bya'i
gling na

gsal gyur cig /kun mkhyen de yis dpag tshad lo dang ni/ /de dag
brjod pa'i tha snyad mtshon pa'i slad/ /gzugs ming dus mtha' rdul
yig skad cig dang/ /drug tshan nyi shu'i skad cig gsungs pa dang/
/nyin byed

dbang po byang du phyogs pa yi/ /dbyar zla gnyis pa'i tha ma'i
chos dgu dang/ /dbyar 'bring nya la rgyu skar gang byung dang/
/gzhan yang nyin mtshan thog mtha' gang yin zhes/ /gsung rab
dgongs don rags dang phra ba

rnams/ /rnam dag rigs pa'i rjes 'brangs phra ba'i blos/ /ma
'dres 'byed par nus pa'i spobs pa can/ /gang des dris pa'i don
rnams 'di ltar khums/ /gzugs kyi chung mthar bzhag pa'i phra
rdul ni/ /shar la

sogs pa'i cha dang bral ba ste/ /de yang ji srid phyogs kyi cha
yod pa/ /de srid chung mthar bzhag tu mi rung phyir/ /dus mtha'i
skad cig rgyu tshogs du ma yis/ /'bras bu bskyed pa'i yun dang se
gol gcig /rdzogs

@002a @#/ /pa'i dus la re lngar byas pa yi/ /cha gcig dang ni
rdul gcig go 'phos dang/ /mnyam pa'i shed kyis bal nyag gcig
gcod pa'i/ /yun la bshad pa'i rnam grangs mang yod kyang/ /mdor
na de las

thung ba byar med pa'i/ /dus gcig mtshon par bzhed nas de dag
gsungs/ /ming mtha' yi ger bzhag pa'i dpe brjod la/ /rang gi
'grel par ba lang bzhin no gsungs/ /'di ni yi ge du ma tshogs
pa'i phyir/ /

don 'di da dung kho bo dbyod pa'i skabs/ /drug tshan nyi shu'i
skad cig tshogs pa ni/ /de yi skad cig ces pa'i tha snyad btags/
/dus mtha'i skad cig brgya dang nyi shu'i ming/ /'di ni dus
mtha' rtogs na the tshom

bral/ /dbyar zla gnyis pa'i tha ma'i tshes dgu dang/ /de bzhin
dgun zla bzhi pa'i tshes dgu la/ /dbyar dgun nyi ma ldog par
gsungs pa'i dus/ /ston dpyid ra ba'i dkar tshes dgu la yin/ /zla
ba de gnyis nyi ma gang

log pa'i/ /zla ba de nyid yin par mang po 'dod/ /'on kyang mdzod
kyi dgongs pa khrums dang khra'i/ /zla ba yin par rgya dper
snang ngo zhes/ /bdag gi bla ma nam mkha' bzang po bzhed/ /de
lta na ni dbyar 'bring nya yi dus/ /chu

stod zla ba yin par shes par 'gyur/ /tshul de mdo rtsa'i rgya dpe
las kyang gsungs/ /gdags gzhag mdzod dang nyi ma'i snying po
dang/ /me tog phreng rgyud mdo rtsa lo dri ba/ /'grel chen sogs
nas

@002b gsungs pa'i dus tshogs kyi/ /rnam gzhag rgyas par gzhan du
spro bar 'dod/ /de phyir 'dir ni sa bon tsam zhig bstan/ /'di
dang deng sang nyi ma'i ldog dus gnyis/ /ches cher mi mthun gyur
ba mthong nas ni/ /rngams de su na 'byin byed rnams re

zhig bzhag /nyin gyi dang po skya rengs dang po dang/ /tha ma
nyi ma nub pa'i mtha' la bshad/ /de yis mtshan gyi thog mtha'
dpag par nus/ /'di las gzhan du'ang gsungs mod dgongs pa'i
dbang/ /kun rdzob bden par 'dod pa'i rigs pa

rnams/ /bdag gis phra rdul yin zhes smras pa med/ /sde pa gnyis
kyi grub mtha' gzhir byas la/ /dbang po'i shes pas phra rdul
mthong zhes smras/ /rnam shes lnga yis bsags la dmigs so zhes/
/gsungs pa 'di la 'khrul nas mi mkhas

pa'i/ /skye bo du ma mgrin gcig byas nas ni/ /dbang po'i yul na
phra rdul med do lo/ /gzigs zan lugs 'di 'thad par ma mthong
nas/ /rdul gyi rags pa brtsam tshul dbu tshad dang/ /phyi rol don
grub mngon pa'i sde snod nas/ /gsungs pa rnams kyi

don bzhin bdag gis smras/ /don smra gnyis kyis rags pa rtsom
pa'i tshe/ /reg na phra rdul nyams par gyur mthong nas/ /bskor ba
par bcas bar med ma gtogs pa/ /reg pa med par 'dab sbyor gnas
par 'dod/ /de che yan lag can gzhan mi

skye zhing/ /gcig la gcig thim gyur pa'ang ma yin la/ /phra rdul
rang bzhin 'dor ba'ang ma yin te/ /'on kyang rdul rnams 'dus pa
tsam du zad/ /de lta na ni phra rdul du ma dag /mngon sum mthong
zhing phra rdul gtan ma mthong/ /zhes smra de la rig

@003a @#/ /pa'i gtam gyis ci/ /da dung yi ge'i phyi mo bslab par
rigs/ /dbang po'i shes pas phra rdul sil bu dag /mthong mod rjes
kyi nges pas rags par bzung/ /dus mtha'i skad cig bzung yang
dpyad shes kyis/ /de la

rjes 'gro'i rgyun rnams nges pa bzhin/ /gal te rnam pa gtod pa'i
nus med pas/ /phra rdul dbang po'i yul du mi rung na/ /rnam pa
ma gtad ces pa brtag par bya/ /shes la snang ba'i rnam pa rdul
phran bzhin/ /sil bu nyid du mi snang zhes

smra na/ /so so'i dus mtha'i skad cig re re yang/ /rang 'dra'i
rnam pa gtad pa med 'gyur bas/ /dbang po'i yul du smra ba ngal
sos shig /rigs pa mkhyen pa khyed la 'di lta bu'i/ /log rtog
phal cher med par kho bo sems/ /phra ba'i

gnas la dpyad pa ma rdzogs pa'i/ /blo gros gzhon nu 'ga' zhig
'dod pa mthong/ /de phyir 'dir ni rang 'dod zur tsam bstan/ /'di
la brten nas slar yang 'dod pa rnams/ /yongs su rdzogs pa'i rab
tu byed pa zhig /grub par bgyis nas

gzigs su 'bul ba lags/ /tshul 'di mang thos blo bzang grags pa
yis/ /chos 'khor chen po dpal gyi lha sa ru/ /mkhas pa chen po
gzhon nu blo ldan gyi/ /gsung gis bris pa'i lan du sbyar ba yin/
/sarba mngga laM// //