@001a @#/ /dbu ma rin chen 'phreng ba'i snying po'i don gsal bar byed pa bzhugs so/ / @001b @##/ /rje btsun bla ma rnams la phyag 'tshal lo/ /snying rje'i rtsa ba rab brtan blo gros grib bsil lhag bsam bzang po'i ra bar gnas/ /mtha' yas grags pa'i gzi ldan dam chos yan lag rgyas pa'i me tog dpal yon can/ /'phrin las bzang po'i 'bras bu mchog des gdul bya'i re ba mtha' dag rdzogs mdzad pa/ /dpal ldan bla ma dpag bsam dang mtshungs mkhas pa'i mkhas bde la rtag tu 'dud/ /chos kun 'gro 'ong med par gzigs kyang go 'phang mchog der gdul bya'i lam ni sa ler mkhyen/ /spros kun zhi ba'i ngang du bzhugs kyang thugs rje'i sdros pas gdul bya'i mun pa sel mdzad cing/ /gsung rab rgya mtsho'i snying po mtha' dag gzigs kyang snying po'i don ni gcig pu kho nar mkhyen/ /klu sgrub ces ni sa stengs 'di na sgrib med rab grags sangs rgyas gnyis pa de la 'dud/ /de yi bzhed gzhung rab dkar dri med cing/ /gtam du bya ba kun gyi mchog gyur pa/ /dam pa'i bka' yis ring nas bskul gyur pas/ /cung zad 'byed la bdag blo spro ba skyes/ /de yang bdag gi dge ba'i bshes gnyen gcig tu bde bar gshegs pa'i bstan pa la gces spras su mdzad pa bshad pa dang bsgrub pa yongs su rdzogs pa'i yon tan gyi tshogs kyis gong nas gong du gyur pa 'gro ba mgon med pa rnams lhag par yang thugs rje'i yul du mdzad pa dag las 'di ltar rjes su @002a @#/ /thos te/ 'o skol dal ba'i rten bzang po thob pa'i dus 'dir 'jig rten pa'i rgan po rnams kyi lugs las ches khyad zhugs pa'i 'jig rten phyi ma phan chad kyi don khyad par can ma bsgrubs na/ blo dud 'gro las cher ma sbags pa yin pas shin tu rnyed par dka' ba'i dal 'byor gyi rten la snying po legs par lon pa dgos la/ de yang rgyal bsras dang bcas pa'i dam pa rnams kyis gsungs pa'i gzhung che ba rnams gdams ngag tu shar nas de'i don rtse gcig tu bsgrub pas nyams su len pa las mchog tu gyur pa'i rgyal ba dgyes pa'i mchod pa gzhan mang gsung pas/ de la 'dir/ mngon par mtho ba dang/ nges par legs pa'i go 'phang mchog tu bgrod pa'i lam gsal bar byed par dbu ma rin po che'i phreng ba ni gang bshad par bya ba'i chos yin la/ de la gnyis bshad pa'i sngon 'gro dang/ bshad pa dngos la 'jug pa'o/ /dang po la gnyis/ bstan bcos mdzad pa po'i che ba dang/ des mdzad pa'i bstan bcos kyi rnam gzhag go /dang po ni/ rje btsun 'phags pa klu sgrub ces bya ba/ 'phags pa lang kar gshegs pa dang/ sprin chen po'i mdo dang/ rnga bo che'i mdo dang/ 'jam dpal gyi rtsa ba'i rtog pa sogs nas/ ston pa mya ngan las 'das pa'i rjes su bstan pa 'dzin par lung bstan cing khyad par du lang gshegs sogs @002b nas thub pa'i bstan pa yongs su rdzogs pa rgyas par mdzad nas/ sa rab tu dga' ba bsgrubs te/ bde ba can du 'gro bar lung bstan cing/ sgron gsal las/ slob dpon klu sgrub kyis rnal 'byor bla med kyi lam gyis sku ched nyid la rdo rje 'chang gi go 'phang thob par gsungs so/ /sngar bshad pa'i lung bstan pa rnams ni/ pha rol tu phyin pa'i theg pa dang/ thun mong ba gsungs pa yin pas/ 'gal bar mi bsam mo/ /gnyis pa ni/ slob dpon klu sgrub kyis sbyor ba brgya ba la sogs pa rig pa'i gnas thun mong ba'i bstan bcos mang po mdzad cing/ nang rig pa la yang/ sngags dang pha rol tu phyin pa la brten pa mang du mdzad do/ /zab mo dbu ma'i lam/ ston pa'i mdo sde rnams nges pa'i don du sgrub pa dang/ mthar thug theg pa gcig tu bsgrub pa sogs lam gyi rnam gzhag du ma rgyas par ston pa mdo kun las btus pa mdzad la/ zab mo dbu ma'i lam rigs pas bsgrub pa ni/ rtsa ba shes rab/ rigs pa drug bcu pa/ rtsod zlog /stong nyid bdun cu pa/ zhib mo rnam 'thag rnams dang/ bstan bcos 'di la sogs pa rnams su gtan la phab la/ tha snyad grub pa ni/ dbu ma rgyan gyi 'grel par/ tshigs bcad kha yang drangs pa tsam ma gtogs bod du tshang ma 'gyur ro/ /bstod pa 'ga' zhig las kyang/ stong nyid bstan mdo kyang/ rigs pas bsgrub pa de tsam du mi mang la/ rigs pa'i tshogs ston pa'i bstan bcos de dag kyang bsdu na/ rten 'byung gi de kho na nyid gtso bor ston pa dang/ mtha' bral rtogs pa'i lam gyis 'khor ba las grol ba gtso bor ston pa gnyis su 'du'o/ /dang po la/ dngos por smra ba @003a @#/ /rnams kyis btags pa'i bsgrub bya gang zag dang phung po rang bzhin gyis grub pa 'gog pa rtsa ba shes rab yin la/ de'i sgrub byed tshad ma sogs zhib mo ltar snang ba/ rtog ge'i tshig don bcu drug 'gog pa ni/ zhib mo rnam 'thag go /rtsod zlog dang/ stong nyid bdun cu pa gnyis ni/ rtsa ba shes rab la 'phros pa'i yan lag tsam yin gyi/ dbu ma'i lus yongs su rdzogs pa ston pa'i bstan bcos rang skye ba ma yin la/ dang po ni/ gal te dngos po thams cad kyi zhes sogs rang bzhin gyis stong pa la/ dgag sgrub la sogs pa'i bya byed mi 'thad par rtsod pa yin la/ de ni rtsa ba shes rab kyi le'u dang po'i/ dngos po rnams kyi rang bzhin ni/ zhes pa'i tshigs bcad la 'phros pa'i lhag ma'o/ /gnyis pa ni/ rab byed bdun pa'i rmi lam ji bzhin sgyu ma bzhin/ zhes sogs la 'phros pa'i lhag ma yin te/ skye 'jig gnas gsum rang bzhin gyis grub pa bkag pa na/ lung las de dag gsungs pa mi 'thad do/ /zhes rgol ba'i lan du mdzad pa yin na/ / mtha' bral rtogs pa'i lam gyis 'khor ba las grol ba gtso bor ston pa la/ rigs pa drug cu pa ni/ dgra bcom pa'i 'bras bu thob pa la yang/ rten 'byung rang bzhin gyis stong pa rtogs dgos pa dang/ rgyu mtshan de nyid theg pa dman pa'i sde snod las kyang/ bdag med gnyis phra mo gsal bar gsungs pa dang/ phung po rang bzhin gyis stong pa dngos su ma rtogs nas myang 'das mngon du byas pa mi 'thad par bstan pa las brtsams nas/ yod mtha' dang med mtha' dgag pa rgyas par mdzad @003b do/ /'di ni bstan bcos gzhan gnyis ltar/ dbu ma rtsa ba shes rab kyi 'phros don tsam ma yin pa'i/ bstan bcos lus yongs su rdzogs pa'o/ /bstan bcos 'dir ni/ mngon mtho rgyu 'bras kyang rgyas par bstan mod kyi/ gtso bo ni theg pa che chung gang ga la du zhugs nas thar pa thob par byed kyang/ gang zag dang phung po rang bzhin gyis stong pa rtogs dgos pa rgyas par gtan la phab pa'o/ /gtan la 'bengs pa'i gtso bo'i dbang du byas pa yin gyi gzhan du na rtsa ba shes rab kyis kyang/ theg pa chen po'i lam gyi rim pa rgyas par ston par dbu ma la 'jug pa nas sgrubs pa'i phyir ro/ gnyis pa bshad pa dngos la 'jug pa la bzhin mtshan gyi don dang/ 'gyur gyi phyag dang/ gzhung gi don dang/ mjug gi don to/ /dang po ni/ rgya gar gyi skad du rA dzA ne bod kyi skad du rgyal po pa ri ka thA ni gtam bya ba/ rat-na ni rin po che ma la ni phreng ba'o/ /kha cig gis/ 'di rgyal po spyi la gdams pa dang/ bshes sbring rgyal po bde spyod bzang po la gdams par 'dod la/ kha cig 'di yang/ lho phyogs kyi rgyal po shing sa la zhon zhes bya ba la gdams par 'chad la/ 'grel pa las 'di yang rgyal po bde spyod la gdams par mdzad de/ /gnyis pa ni/ sangs rgyas zhes so/ /gsum pa la gsum/ bshad pa la 'jug pa'i bya ba/ bshad pa nyid nye bar dgod pa/ bshad pa mthar phyin pa'i bya ba'o/ /dang po la gnyis/ mchod par brjod pa dang/ bshad par dam bca' ba'o/ /dang po la gsum/ dgos pa'i don dang/ bsdus pa'i don dang/ tshig gi don to/ /dang po ni/ rang gi don phun sum tshogs par 'gyur ba dang/ gzhan gyi don phun sum @004a @#/ /tshogs par 'gyur ba'o/ /rang don ni yul khyad par can la/ dang pas kun nas bslangs nas bstod pa byas nas/ bstan bcos rtsom pa'i bar chad zhi ba sogs gnas skabs dang mthar thug gi dgos pa thams cad 'grub pa'o/ /gzhan don ni de'i rjes su zhugs pas nyan pa sogs mthar phyin par 'gyur ba ste/ rgyas par dbye na brgyad do/ /gnyis pa la bstod pa dang/ phyag 'tshal ba'o/ /bstod pa la rang don phun tshogs dang/ gzhan don phun tshogs so/ /dang po la spangs pa dang/ rtogs pa gnyis/ rim pa bzhin rkang pa dang po gnyis kyis bstan to/ /gzhan don ni rkang pa gsum pas bstan la thams cad mkhyen zhes pas rtogs pa phun tshogs gnyis bsdus pa'am/ yon tan de dag dang ldan pas gzhan las khyad zhugs pa'i ston pa phun tshogs ston pa'o/ /gnyis pa ni/ rkang pa bzhi pa'i phyed phyi mas so/ /don bsdus na sangs rgyas dkon mchog dang de'i thugs rgyud kyi chos dkon mchog dang/ de tshul bzhin du sgrub pa'i dge 'dun dkon mchog kyang/ skyabs 'gro'i yul du byas nas de la dang bas skyabs su 'gro ba ni bshad sgrub kun gyi rtsa bar shes par bya'o/ /gsum pa ni/ klu sgrub bdag phyag 'tshal lo/ /gang la na ji lta ba dang ji snyed pa ma lus pa thugs su chud pa'i thams cad mkhyen pa la'o/ /de yang spangs pa'i khyad par gang zag dang phung po rang bzhin gyis grub par 'dzin pa'i nyon mongs pa'i sgrib pa dang/ gnyis snang 'khrul pa'i bag chags dang bcas pa shes sgrib kyi nyes pa kun las phyis mi skye ba'i tshul gyis rnam par grol @004b zhing rtogs pa'i khyad par nyan thos sogs dang thun mong ba dang thun mong ma yin pa stobs la sogs pa'i yon tan kun gyis mdzes shing sprud pas brgyan pa po'o/ /gzhan don phun tshogs ni/ thugs rjes kun nas bslangs nas sems can thams cad nyes ba'i rigs mtha' dag las skyob cing legs pa'i rigs mtha' dag la 'god pas sems can kun gyi gnyen gcig pa zla med pa de la phyag 'tshal lo/ /ston pa gzhan ni sems can la gnod par zhugs pa ste/ legs ldan nag po drag po dbang phyug gi grong khyer sum brtsegs bsregs pa dang/ khyab 'jug gis dmag sde chen po bco brgyad bcom pa dang/ gcer bu pas srog chags phra mo reg pa tsam gyis 'jig pas nam mkha' gang bar smra zhing/ slob ma gnas nas phyir 'byung ba'i tshe/ /bslab pa 'bul du 'jug pa dang/ drang srong kha cig rgyal po dbung gi tshogs yan lag bzhi pa dang bcas pad mod pa'i mes bsreg pa sogs las khyad par du byed pa'o/ /gnyis pa la gnyis/ dngos dang/ snod la chos 'chad pa'i rgyu mtshan no/ /dang po ni/ dgos 'brel rnam par bzhag pa dang/ tshig don gnyis kyis rig par bya ba'o/ /dang po ni/ mngon par mtho ba dang/ nges par legs pa rgyu dang 'bras bur bcas pa ni brjod bya dang/ bstan bcos 'di la brten nas/ don de dag rtogs pa ni dgos pa dang/ 'di yi don rtogs pa de nyid goms pa la brten nas/ thob pa'i nges legs ni nyid dgos dang/ de dag snga ma snga ma med na phyi ma phyi ma mi 'byung ba ni 'brel pa'o/ /gnyis pa ni/ phyag 'tshal nas ci zhig byed ce na/ rang gi 'khor dang/ yul zil gyis mnan nas mchog tu spa @005a @#/ /bas rgyal po zhes bos nas/ khyod la yongs su dag cing thog mtha' bar gsum du dge ba dang/ 'khor ba dang ngan song du mi ltung bar 'dzin pas gcig tu dge ba'i chos bshad de dgos pa ni/ chos 'grub par bya ba'i phyir ro/ /chos ni dge ba bcu la sogs pa dang/ spros bral rtogs pa'i shes rab dang/ de gnyis kyi 'bras bu lha mi'i ga 'phang dang/ byang chub gsum yin la/ 'dir ni rgyu gnyis la chos zhes bya ste/ de gnyis 'bras bu dang bcas pa 'grub par bya ba'i phyir ro/ /gnyis pa ni/ rgyal po la ci'i phyir 'chad snyam na/ 'phags pa dam pa rnams kyis bsten par bya bas/ dam pa'i chos kyi snod de la ni bshad na/ chos 'grub par 'gyur la/ khyod kyang chos kyi snod yin te/ des na 'chad ces pa'o/ /gnyis pa bshad pa nyid nye bar dgod pa la bzhi/ mngon mtho dang nges legs rgyu 'bras spyir bstan pa dang/ bla na med pa'i byang chub kyi rgyu tshogs gnyis la bslab par gdams pa dang/ rgyal po'i spyod tshul kha na ma tho ba med pa la bslab par gdams pa dang/ thar pa myur du thob par 'dod pa'i byang chub sems dpas kyang rab tu 'byung bar gdams pa'o/ /dang po la gnyis/ mngon mtho nges legs kyi rgyu 'bras so sor bshad pa dang/ de gnyis spel mar bshad pa'o/ /dang po la gnyis/ bshad pa'i skabs dgod pa dang/ bshad pa dngos so/ /dang po la bzhi/ chos gnyis kyi go rims dang/ rgyu 'bras ngos bzung ba dang/ rgyu gnyis kyi gtso phal gyi khyad par dang/ snod ldan gyi gdul bya'i mtshan nyid bshad @005b pa'o/ /dang po ni/ dang por mngon par mtho ba'i rgyu'i chos bcu drug bshad nas/ de ji lta ba bzhin du nyams su blangs pa'i phyis ni nges par legs pa 'byung ba'i lam gyi dmigs pa stong pa nyid bshad par bya ste/ gang gi phyir na mngon par mtho ba'i go 'phang skye ba rgyud mar thob nas rim gyis nges par legs pa 'ong dgos pa'i phyir/ mngon mtho gcig nas gcig tu brgyud pa ma gtogs/ ngan 'gro'i rten la thar pa thob mi nus pa'i phyir dang/ thog mar sla ba'i gdams pa dang/ rjes su bstan pa thob nas rgyud smin pa la stong pa nyid zab mo'i don bshad par bya ba yin gyi gzhan du ma yin te/ stong pa nyid kyi don log par bzung nas/ las 'bras la skur ba 'debs pa dang/ stong pa nyid spangs na ngan 'gror 'gro ba'i nyes dmigs gsungs pa'i phyir te/ 'di nyid las kyang spong bas ma rung bdag nyid can/ /mnar med par ni spyi'u tshugs 'gro/ zhes 'chad par 'gyur ro/ /gal te stong pa nyid ston dgos pa byung na yang/ las 'bras kyi nges pa la cung zad kyang mi gnod pa'i go ba bskyed la bshad par bya zhes gsungs so/ /gnyis pa ni/ de la mngon mtho ni bde ba ste/ /lha dang mi'i rgyud kyis bsdus pa'i bde ba dang/ btang snyoms ci rigs pa yin la/ nges par legs pa ni bdag med rtogs pa'i shes rab kyis sdug kun spangs pa'i bral ba thar par 'dod do/ /slar mi ldeg pa'i chos can gyi bral ba yin pas/ nges par legs pa zhes bya'o/ /'bras bu gnyis po de'i sgrub pa mdor bsdu na las 'bras dang/ bden pa dang dkon mchog sogs la dad pa dang stong pa nyid rtogs pa'i @006a @#/ /shes rab bo/ /mdor na zhes pa ni rgyu'i gtso bo bsdus pa yin la/ mdor bsdu ba snga ma ni/ 'bras bu'i grangs nges so/ /gsum pa ni/ dad pa sngon 'gro ma ltar bskyed pa ste/ zhes dang/ dad pa'i rtsa ba rab brtan bya/ /zhes gsungs pa ltar/ dad pa chos kun gyi rtsa ba yin pas/ dad pa can yin pa nyid kyi phyir/ mngon mtho'i rgyu'i chos dge bcu la sogs pa sgrud pa la brten par byed la/ stong nyid zab mo rtogs rung gi shes rab dang ldan pa'i phyir/ gnas lugs kyi don yang dag par rig par byed do/ /de gnyis gtso bo gang yin zhe na/ 'di gnyis gtso bo stong nyid rtags pa'i shes rab ste des srid pa las dngos su grol bar byed pa'i phyir ro/ /shes rab 'di yi sngon 'gro las 'bras la yid ches pa sogs kyi dad pa yin te/ de sngon du ma song bar shes rab kyis nyon mongs 'joms nus pa mi srid pa'i phyir ro/ /bzhi pa ni/ chos kyi snod du rung ba'i dad pa can yang gang zhig yin la shes rab can yang gang zhig yin zhe na/ sha la chags pas srog gcod pa sogs la 'jug cing chos 'dor pa ni chags pa dang/ 'dun pas chos las 'da' ba dang/ kun nas mnar sems sogs kyis srog gcod pa lta bu ni zhe sdang gi chos las 'dod pa dang/ rgyal po'i chad pa la sogs kyi 'jigs pas chos las 'da' ba dang/ pha ma la sogs kyi ched du srog gcod pa sogs nyes med du bzung nas chos 'dor ba 'di rmongs pas chos las 'da' ba yin la/ 'gro ba bzhi'i sgo nas chos las 'da' ba las ldog nas gdul bya gang zhig 'dun pa dang zhe sdang dang 'jigs pa dang rmongs pas chos las mi 'da' zhing las 'bras sogs la yid ches pa de ni dad pa can zhes bya la/ de nyid thar par dgri rung bas nges par legs pa'i snod @006b mchog tu gyur pa yin la gang zag gang zhig lus ngag yid kyi las dge mi dge lung ma bstan thams cad legs par yongs su brtags shing dbyad de/ mi dge ba dang lung du ma bstan pa spangs nas dge ba byed la de yang bla na med pa'i byang chub tu yongs su bsngos nas sems can gyi don sgrub pa ni/ bdag dang gzhan la phan pa yin la de shes nas blang dor tshul bzhin du rtag tu byed pa de mkhas pa shes rab can zhes bya'i blang dor la log par zhugs pa'i gnas lnga rig pa yang skabs 'dir mkhas pa zhes mi bya'o/ /don bsdus na skyes bu gsum gyi lam gyi rim pa legs par shes nas tshul bzhin du nyams su len pa ni dad pa can dang shes rab can zhes bya'o/ /gnyis pa bshad pa dngos la gnyis/ mngon mtho rgyu 'bras bshad pa dang/ nges legs rgyu 'bras bshad pa'o/ /dang po la gnyis/ rgyas par bshad pa dang/ don bsdu ba'o/ /dang po la gsum/ mngon mtho'i chos bshad pa dang/ ji ltar nyams su blang ba'i tshul dang/ nyams su blangs pa'i 'bras bu'o/ /dang po la bzhi/ mngon mtho'i chos bcu drug bshad pa dang/ chos 'di pa las gzhan la de dag med par bstan pa dang/ chos de dag la log par zhugs pa'i 'bras bu dang/ dge mi dge'i rgyu 'bras so sor bshad pa'o/ /dang po la gsum gang las ldog pa'i chos bcu gsum dang/ 'jug pa'i chos gsum dang don bsdu ba'o/ /dang po la gnyis/ mi dge bcu las ldog pa dang/ kha na ma tho ba gzhan las ldog pa'o/ /dang po ni/ srog chags mi gsod pa dang/ gzhan gyis bzung ba'i rdzas rku ba spong ba dang/ gzhan @007a @#/ /gyi chung ma spong ba dang/ gsum ni lus kyi las mi dge ba las ldog pa yin la/ log pa mi bden pa 'du shes bsgyur nas smra ba dang/ dbyen gyis gzhan 'byed pa'i tshig smra ba phra mo dang/ gzhan gyi zhe gcod pa'i tshig brlang? po smra ba tshig rtsub pa nyid dang/ ma 'brel ba byung rgyal du smra ba'i ngag kyal ba yang dag par bsdom pa ni ngag gi las lam mi dge ba las ldog pa yin la/ gzhan gyi rnyed pa bdag gis thob na ci ma rung snyam pa'i chags pa dang gzhan la kun nas mnar sems pa'i gnod sems dang/ las 'bras la skur ba 'debs pa'i med pa yid kyi lta ba yid kyi mi dge ba gsum dang bcas pa yongs su spong ba'i las lam 'di dag las lam dkar po bcu ste/ ldog pa dag ni nag po yin no/ /'di dag ni gzhi dang bsam pa dang sbyor ba dang mthar thug sogs kyi rnam gzhag dang/ dge ba'i las lam bcu nyams su len pa'i tshul rgyas par ni/ rje rin po che blo bzang grags pa'i dpal bzang po'i zhal snga nas mdzad pa'i pha rol tu phyin pa'i theg pa'i lam gyi rim pa las shes par bya'o/ /gnyis pa ni/ ci chos de kho nar zad dam zhe na/ lus sems rang dbang med par byed pa'i chang mi 'thung ba dang/ khyim pa rnams kyi bre dang srang la sogs pa'i bya ba la g.yo byad spangs ba dang/ rab tu byung ba'i log 'tsho lnga spangs pa'i 'tshe ba bzang po dang/ lus ngag gi mtho 'tshams pa sogs ni rnam par 'tshe ba yin la/ dbyug pa brdeg pa sogs spangs pa'i rnam par mi 'tshe ba dang/ gsum yang gang las ldog pa'i chos so/ /log @007b pa'i 'tsho ba lnga la/ tshul 'chos ni rnyed pa don du gnyer bas kun nas bslangs nas gzhan gyis bdag la bsnyen bskur byas na ci ma rung/ bdag gi de dag bsgrub par bya'o snyam nas spyod tshul legs par 'chos pa'o/ /kha bsag ni/ bsam pa de lta bus kun nas bslangs nas ba? bo/ thag ring po nas khyod kyi thad du 'ongs so kho bo 'dir gnas pa yar khyod kyis don yin no/ /khyed ci nga'i pha dang 'dra bas nga la sbyin par bya la/ nged kyis kyang khyed la sbyin no zhes ngor bstod pa'i kun tu smra ba'o/ /gzhogs slongs ni/ gzhan gyi las 'di lta bu byas nas rnyed pa de thob na ci ma rung snyam pas/ de'i don du las byed cing/ khyed kyi lhung bzed 'di ni mdzes so/ /kho bos kyang 'di lta bu rnyed na gtsang bar bya na/ sbyin pa po'ang rnyed par dka' 'o zhes rdzas la rkam pa las smra ba'o/ /thob kyis 'jal ba ni rnyed pa la sred pa'i bsam pas gzhan la 'di skad ces khyed kyi pha dang ma la sogs pa la yang sbyin par bya ba su zhig la sbyin par bya ba yin/ khyed kyi khyim du dgra bcom bzhugs shing/ lhan cig gtam smra bar 'gyur ba ni khyed rnyed pa dang ldan no zhes smra/ pha rol pos 'di ni dgra bcom pa yin no snyam du sems na ci ma rung snyam pas smra ba'o/ /rnyed pas rnyed pa 'tshol ba ni/ bdag la rgyal po sogs kha cig gis lhung bzed byin pa ma blangs so 'di ni bdag la rgyal po che ge zhig gis byin pa'o zhes smra zhing/ 'di ni sbyin par bya ba'i yul khyad 'phags pa'o snyam du sems na ci ma rung snyam pas smra ba'o/ /gnyis pa ni/ sbyin par bya ba'i yul rnams la rang gi lag gis 'bul ba la sogs pa'i gus sbyin dang/ mkhan po dang/ yon tan @008a @#/ /gyis lhag pa gzhan yang mchod pa ni/ mchod 'os mchod pa dang/ byams pas mtshon pa'i tshad med pa bzhi ste/ 'jug pa'i chos so/ /gus sbyin la yang chos dang zang zing dang mi 'jigs pa'i sbyin pa rnams so/ /gsum pa ni/ mdor na mngon mtho'i rgyu'i chos ni bcu drug po de yin no/ /gnyis pa la gsum/ lam gol bar zhugs pas rang gzhan la gnod pa dang/ gol bar 'gro ba'i gang zag dang/ gol bar zhugs pa'i nyes dmigs so/ /dang po ni/ dka' thub kyis lus gdung ba la sogs pa yang lam du 'dod pa min nam zhe na/ zas gcod pa dang/ me lnga bsten pa la sogs pa lus gdung bar byed pa 'ba' zhig las thar pa mi thob par ma zad/ mngon mtho ster ba'i chos kyang med de/ 'di ltar de yis ni gzhan la gnod pa spong ba med cing gzhan la phan 'dogs pa yang yod pa ma yin la rang nyid ngan 'gro'i rgyu la zhugs pa'i phyir ro/ /gnyis pa ni/ sbyin pa dang tshul khrims dang/ bzod pa ches gsal ba sbyin pa gsum dang/ spong ba bdun gyi mtshan nyid kyi tshul khrims dang/ bzod pa gsum la sogs pa dam pa'i chos kyi lam po che la gang ma gus shing lus gdung ba ni dud 'gro ngam grog la sogs pa'i lam ngan pa nas 'gro ba de'i rjes su dud 'gro gzhan rnams kyang 'gro ba ltar/ gnag gi lam lta bu'i lam gol bdag nas 'gro ba de rang dang de'i rjes 'jug gzhan rnams kyang bslus par 'gyur ba'o/ /'dir chos gsum bstan pa ni/ gong gi chos bcu drug kun bsdus pa yin no/ /gsum pa ni/ mu stegs can chos kyi lam lam gus shing @008b lam log par 'gro ba ni/ 'brog dgon pa rtswa dang shing la sogs pa'i nags ltug po ches rgyu bar dka' ba rnams su dud 'gro lam gol bar 'jug pa ltar/ 'khor ba'i 'brog dgan pa ni dmyal ba la sogs pa'i sdug bsngal mi bzad pa mtha' yas pas gang zhing/ 'jig pa'i tshogs la lta ba la sogs pa'i lta ba ngan pa'i thibs por lhung ba lam dam pa la sems pa dang bral ba'i skye ba'i shing can du 'dod chags la sogs pa'i nyon mongs pa sprul gdug pas 'khyud pa'i lus gdung bar byed pa sogs ni 'khor bar shin tu yun ring por 'gyur pas bdag legs su 'dod pa rnams kyis dam pa'i ba shes la brten nas lam rnal mar ming btags pa phyin ci log gi lam la ma zhen pa ches cher bya'o/ /gsum pa la gsum/ mi dge ba'i rgyu mthun gyi 'bras bu tshe thung ba sogs su 'gyur ba dang rnam smin gyi 'bras bu ngan 'gror 'gro ba dang/ dge ba'i las kyi 'bras bu de las ldog ste 'byung ba'o/ /dang po ni/ gsod pa yis ni skye ba gzhan la rgyu mthun gyi 'bras bu tshe thung bar 'gyur la/ mtshon la sogs pas gzhan la rnam par 'tshe bas phyi ma'i lus la gnod pa mang ba dang/ rku ba yis ni longs spyod 'phrongs shing mi brtan pa dad gzhan dang thun mong bar 'gyur ba sogs so/ /byi po byed pas chung ma rang gis dbang byar med pa'i dgra dang bcas pa dang/ rdzun du smra bas skur ba 'debs pa mang ba ste/ phra ma yis ni rang gi mdza' ba shes dad 'byed pa dang/ tshig rtsub po nyid kyis sgra mi snyan pa thos pa dang/ byung rgyal du smra ba'i ma 'brel ba yis rang gi tshig mi btsun @009a @#/ /zhing/ tshig tshad mar bzung bar mi 'os la ma nges pa'i spobs pa can du 'gyur ba dang/ brnab sems kyim 'dod bya'i dngos po yid la re ba 'joms shing mi thob pa dang/ gnod sems kyis 'jigs pa sbyin par mdo las bshad do/ /log par lta bas phyi ma la lta ba ngan pa nyid dang g.yo sgyu mang ba sogs su 'gyur ro/ /bla ma rnams kyis myong ba rgyu mthun dang/ byed pa rgyu mthun gnyis su byas nas tshe thung ba sogs snga ma dang/ gsod 'dod mang ba sogs phyi mar byas so/ /bdag po'i 'bras bu phyi rol yul la smin pa sogs rgyas par ni pha rol tu phyin pa'i lam gyi rim pa las shes par bya'o/ /chang 'thung ba yis ni blo 'khrul pa shes pa rang bzhin du mi gnas par 'gyur ba ste/ gus par mi sbyin zhing/ sbyin pa mi gtong la/ ma byin pa len pas? dbul ba nyid do/ /sbyin pa ma btang pa'i 'bras bu ston pa yin gyi/ ma byin par len pa'i 'bras bu ni bshad zin no/ /log par 'tsho bas bslus pa thob par 'gyur ba ste/ khengs pa yis ni rigs ngan nyid dang/ gzhan gyi phun sum tshogs pa la sems khong nas 'khrug pa'i phrag dog gis ni gzi brjed chung ba nyid dang/ khro bas mdog mi sdug pa la sogs pa'i kha dog ngan pa nyid thob par 'gyur zhing/ khro bas blang dor gyi gnas shes pa'i mkhas pa la ma 'dris pas ni blun pa nyid thob par 'gyur te/ blang dor gyi gnas mi shes pa'i rmongs pa nyid du 'gyur bas so/ /gnyis pa ni/ mi dge ba de rnams kyi 'bras bu rgyu mthun pa tsam du zad dam zhe na/ ma yin te/ mi dge ba'i las lam 'di kun gyis dang por mi @009b nyid la ni/ rnam smin gyi 'bras bu dmyal ba dang/ dud 'gro dang/ yi dwags kyis bsdus pa'i ngan 'gro'o/ /mdo sde sa bcu pa las/ chen pas/ dmyal ba dang/ 'bring gis dud 'gro dang/ chung ngus yi dwags su smin par bshad pa ni/ dud 'gro las yi dwags shes pa gsal bas thar sla ba la dgongs par bzhed do/ /gsum pa ni/ mi dge ba zhes bya ba de dag gi rnam smin sngar bsgrags pa gang yin pa nga las gzhan du/ dge ba'i las lam dag ni thams cad la rnam smin gyi 'bras bu de ni bzlog ste/ 'byung la/ rgyu mthun dang bdag pa'i 'bras bu yang de las ldog ste 'byung bar shes par bya'o/ /mdor na las nges pa dang/ 'phel che ba dang/ ma byas pa dang mi 'phrad pa dang/ byas pa chud mi za ba bzhir bsdus nas 'di dag gi don bsam par bya'o/ /bzhi pa ni/ 'dod chags dang zhe sdang dang/ gti mug des bskyed pa'i lus ngag gi las ni mi dge ba'o dang gi sgra phyi mas dug gsum ngo bo nyid kyis mi dge bar 'gyur bar ma zad/ des bskyed pa'i las kyang mi dge bar 'gyur bas sdud pa'o/ /ma chags pa dang zhe sdang med pa dang gti mug med pa'i dge ba'i rtsa ba ngo bo nyid kyis dge bar 'gyur bar ma zad/ des bskyed pa'i lus ngag gi las de yang dge ba yin par shes par bya'o/ /las mi dge ba las ni bde 'gro dang ngan 'gro'i sdug bsngal kun/ byung la de bzhin du rnam smin gyi 'bras bu ngan 'gro thams cad do/ /dge ba'i las las rnam smin gyi 'bras bu bde 'og thams cad dang/ 'dzam bu gling la sogs pa'i bye brag gam yang dang yang du skye ba'i bye brag gis skye ba kun tu bde ba dag 'byung @010a @#/ /bas las 'bras legs par bsams la ngan 'gro'i rgyu 'gag pa dang/ bde 'gro'i rgyu sgrub pa la 'bad par bya'o/ /gnyis pa ji ltar nyams su blang ba'i tshul ni/ da ltar las 'bras bsams nas/ yid dang lus dang ngag gi ni mi dge ba kun las ldog par bya zhing/ dge ba la rtag tu 'jug par bya'o/ /sngar bshad pa'i 'jug ldog gi chos bcu drug shes nas ldog par bya ba'i chos rnams kyi kun slong tsam nas bsdom pa 'di ni sgo gsum gyi chos rnam pa gsum du bshad do/ /gsum pa nyams su blangs pa'i 'bras bu ni/ sngar bshad pa'i chos 'dis dmyal ba dang yi dwags dang dud 'gro dag las rnam par grol zhing 'dod pa'i lha dang mi'i nang dag tu tshor ba sim pa'i rnam pa can gyi bde ba'i dpal phun sum tshogs pa dang/ mi'i nang du 'khor bsgyur la sogs pa'i rgyal rigs rgyas pa 'thob par 'gyur la/ der ma zad rgyu snyoms 'jug gi bsam gtan bzhi dang/ tshad med bzhi dang/ gzugs med bzhi sgoms pas ni tshangs pa la sogs pa'i bde ba myong bar byed do/ /yang na bsam gtan sogs chos bcu drug sgoms pa'i 'bras bu'i ngo bor bshad do/ /gnyis pa don bsdu ba ni/ de ltar sngar bshad pa'i ldog par bya ba'i chos bcu gsum las log cing/ 'jug par bya ba'i chos gsum la zhugs pa'i mngon mtho'i rgyu chos bcu drug po 'di dang de'i 'bras bu mdor bsdus nas bshad pa'o/ /gnyis pa nges legs rgyu 'bras bshad pa la gnyis/ mdo las ji ltar gsungs pa'i tshul dang/ de la rgyal pos kyang bslab par gdams pa'o/ /dang po la gsum/ rgyal bas gsungs @010b pa'i tshul mdor bstan pa dang/ de'i don rgyas par bshad pa dang/ don bsdu ba'o/ /dang po la gsum/ ji lta bu gsungs pa dang/ mkhas rmongs zab mo'i don la skrag pa skyed mi skyed kyi khyad par dang/ skrag pa de yang bdag 'dzin las byung bar ston pas gsungs pa'o/ /dang po ni/ nges par legs pa'i chos bdag med rtogs pa'i shes rab kyi dmigs pa gang zag dang chos kyi bdag med pa dag kyang tha mal skye bo gzhan dang tha snyad pa'i shes pas rtogs par dka' bas phra zhing/ gzhan gyis gting dpag par dka' bas zab par mkhas pa dag la snang ba dang/ byis pa thos pa dang mi ldan pa la skrag pa byed par rgyal bas gsungs pa rten 'brel zab mo'i de kho na nyid ni/ gang zhig rtogs na thar pa thob par byed pa la nges legs kyi chos so/ /gnyis pa ni/ stong pa nyid kyi don la byis pa skrag pa dang/ mkhas pa mi skrag pa'i tshul ji lta bu zhe na/ stong pa nyid kyi don bstan pa na/ byis pa mi mkhas pa kha cig de lta na/ bdag da lta yod pa ma yin par 'gyur zhing/ phyis skye ba gzhan du yang yod par mi 'gyur la/ bdag gi ba phung po yod pa min zhing/ phyis kyang yod par mi 'gyur zhes/ bdag dang bdag gi bcad dogs nas byis pa dag ni de ltar skrag la/ de kho na nyid legs par khong du chud pa'i mkhas pa la ni rang bzhin gyis stong pa yin pa nyid kyis 'khor ba spong ba dang/ thar pa thob pa mthong ngo snyam du skrag pa zad par 'gyur ro/ /gsum pa ni/ nye bar len pa'i phung po lnga dang/ 'byung ba bzhi dang bcas pa'i chos dgu la btags pa'i skye rgyu so so skye bo 'di ni ma lus pa nga dang/ nga yir 'dzin pa las byung ba dang/ @011a @#/ /nga yir 'dzin pa dang ldan pa'i skye rgul phan pa mtha' gcig tu gsungs pa'i rgyal bas stong pa nyid kyi don la skrag pa bdag dang bdag gir 'dzin pa'i dbang gis byung ba dang/ byis pa 'khor ba las grol ba'i ched du stong pa nyid gsungs so/ /gnyis pa rgyas bshad la gsum/ nga dang nga yir 'dzin pa rdzun par bsgrub pa dang/ bcings thar rang bzhin gyis dgag pa dang/ chos kun rtag chad kyi mtha' dang bral bar bstan pa'o/ /dang po la bzhi/ dngos dang/ de spangs pas thar pa 'thob par bstan pa dang/ de nyid gzugs brnyan gyi dpas bshad pa dang/ stong nyid rtogs pa thar pa'i rgyur bstan pa'o/ /dang po ni/ tha snyad du nga dang nga yi ba yod kyang dam pa'i don du bdag yod bdag gi yod ces pa'i 'dzin pa 'di ni log cing 'khrul pa dang rdzun pa yin te/ gang gi phyir na nga dang nga yi ba rang bzhin gyis grub na 'phags pa'i mnyam gzhag gis gzigs dgos pa la yang dag pa ji lta ba mngon sum du yongs su shes pas de'i gzigs pa'i nga rang dang nga yi ba gnyis mi 'byung ba'i phyir ro/ /de nyid sgrub pa ni/ ngar 'dzin las byung ba'i phung po rnams chos can/ rdzun pa yin te/ ngar 'dzin de ni don du ste don dam par ma grub pa'i rdzun pa'i phyir/ khyab ste/ 'bras bu gang gi sa bon rdzun pa de'i 'bras bu skye ba bden pa ga la zhig ste mi srid pa'i phyir te/ rgyu rdzun pa la 'bras bu bden pa skyed pa'i nus pa med pa'i phyir ro/ /gnyis pa ni/ phung po de ltar mi bden par mthong nas nga dang nga yi ba rang bzhin gyis grub par 'dzin pa'i nga dang ngar 'dzin pa dag spong bar 'gyur la de @011b spangs nas ni phyis ni sdug bsngal gyi phung po 'byung bar mi 'gyur zhing/ sdug kun spangs pa'i thar pa thob par 'gyur ro/ /'di dag gis kyang thar pa thob pa la gang zag dang phung po bden med du rtogs dgos par bstan pas/ bdag med gnyis phra mo nyan rang 'phags pas kyang rtogs pa gsal bar bstan to/ /gsum pa la gnyis/ gang zag dang phung po bden med du rtogs pas sdug kun ldog pa'i rjes 'gro'i dpe don dang/ ldog pa'i dpe don to/ /dang po ni/ ji ltar me long la brten nas su de'i ngang du rang gi bzhin gyi gzugs brnyan snang mod kyi gzugs brnyan de ni yang dag nyid du na snang ba ltar grub pa cung zad kyang yod pa ma yin/ /de bzhin du phung po rnams la brten nas ngar 'dzin pa ni dmigs par 'gyur yang rang gi byad bzhin gyi gzugs brnyan rdzun pa bzhin du yang dag nyid du gang zag dang phung po rang bzhin gyis grub pa de 'ga' 'ang med do/ don bsdus na/ me long gi nang gi byad bzhin gyi gzugs brnyan bzhin gyi cha de? dang der snang yang de dang der grub pa cung zad kyang med pa de bzhin du gang zag dang phung po'i cha 'di rang bzhin gyis grub par snang la/ gzhan mi snang zhes byar med par cha thams cad kyis thams cad du rang bzhin gyis grub par snang yang rang bzhin gyis grub pa'i cha cung zad kyang med par gzugs brnyan gyi dpe la brten nas khong du chud par bya ba yin yang/ gzugs brnyan snang ba ltar ma grub pa ni/ rgan po brda byang gi tha snyad pa'i mngon sum tshad mas kyang rtogs nus la/ de rtogs pa snga ma kha cig gis rigs shes rags pa zhig cu 'dod pa ni mi 'thad par shes par bya'o/ /gnyis pa ni/ ji ltar me @012a @#/ /long las brten par de'i nang du/ rang gi bzhin gyi gzugs brnyan mi snang ba ltar phung po rnams lam brten par ngar 'dzin pa yang de dang 'dra bas phung po rang bzhin med par rtogs pa la brten nas bdag dang bdag gir 'dzin pa ldog par shes par bya'o/ /dpe don de dag bshad pa ni/ gang zag dang phung po chos can/ rang bzhin gyis grub pas stong ste/ rten 'brel yin pa'i phyir/ dper na gzugs brnyan bzhin zhes pa'i rten 'brel gyi gtan tshigs bshad pa yin no/ /bzhi pa ni/ 'phags pa kun dga' bo yis ni sngar bshad pa/ de lta bu'i don stong pa nyid mngon sum du rtogs pa'i mthong lam thob nas chos rnams la chos kyi mig rdul med cing dri ma dang bral ba gzhan gyi dring la mi 'jog ston pa'i bstan pa las gzhan gyis mi bkri ba/ the tshom las brgal ba/ so ma nyi las brgal ba/ thob nas bdag nyid kyis dge slong rnams la yang dang yang du bzlas te smras pas/ dge slong gzhan gyis kyang thar pa thob par lung las gsungs pas stong nyid rtogs pa'i shes rab ni thar pa'i thabs bla na med pa'o/ /gnyis pa la bzhi/ 'khor bar 'jug pa'i rim pa dang/ 'khor ba las ldog pa'i rim pa dang/ stong nyid rtogs pa'i phan yon dang/ thar pa'i rang bzhin bshad pa'o/ /dang po la gnyis/ 'khor ba'i rtsa ba ngos bzung ba dang/ de la brten nas 'khor ba'i dpe'o/ /dang po ni/ ji srid phung po rang bzhin gyis grub par 'dzin pa yod cing de'i zhan yul rigs pas sun ma phung ba yod pa de srid de las 'jigs tshogs la lta bas @012b bsdus pa'i ngar 'dzin nyid cung zad kyang ma nyams par yod la/ mngon gyur tsam yang ma nyams pa'i ngar 'dzin de 'dra ba yod na yang 'khor bar 'phen byed kyi las gsog ste/ de las yang ni srid par skye ba yin pas gang zag dang/ phung po rang bzhin gyis grub par 'dzin pa nyid 'khor ba'i rtsa ba yin pas/ 'khor ba las grol ba la de gnyis bden stong du rtogs dgos par bstan pas/ nyan rang dgra bcom pas kyang stong pa nyid kyi don rtogs par bsan pa yin te/ phung po bden 'dzin ma zad pa de srid du 'jig lta mi 'dzad par gsungs la/ 'jig lta ma zad pa'i dgra bcom pa yod par rang sde mkhas pa gzhan yang mi bzhed pas/ mgon po klu sgrub kyi gzhung 'dis nyan rang dgra bcom pas kyang bden 'dzin zad par spangs pa ches gsal bar bstan pa yin la/ 'og ma rnams su yang don de nyid yang dang yang du gsal bar mdzad do/ /sngon chos 'di las phyi rol tu gyur pa'i lta ba la yun ring du goms par byas pa'i mthus/ mgon po klu sgrub kyi gzhung phyin ci ma log par 'grel ba'i slob dpon gzhan gyi bzhed pa 'gog pa'i zol gyis klu sgrub kyi gzhung 'di dag 'gog pa ni/ stong pa nyid kyi don dang zhe 'gras pa yin pas/ bdag legs su 'dod pa rnams kyis mchil ma'i thal pa bzhin du rgyang ring du dor bar bya'o/ /ma rig pa 'di ba 'khor ba 'dir ngan pa ci zhig ma byas de lta bu yang gnas rnyed par byas pa'i phyir ro/ /gnyis pa ni/ nyon mongs pa dang las dang skye ba'i kun nas nyon mongs pa'i rten 'drel lam gsum po las thar pa'i lam lam 'bad na/ thog ma med par ma zad mtha' dang dbus nges par @013a @#/ /zin pa med pa/ nyon mongs las las dang de las sdug bsngal skye zhing/ de las kyang de'i rigs 'dra dang/ nyon mongs sogs skye ba'i phyir/ phar skye tshur skye byed pas 'khor ba'i dkyil 'khor mgal me'i 'khor lo lta bu phan tshun gyi rgyu can 'di ni 'khor bar 'gyur ro/ /'khor ba'i rtsa ba ngos bzung la dge ba'i rtsa ba mtha' dag de 'gog pa'i thabs su gyur pa la bslab par bya'o/ /'di dag rgyas par shes 'dod na/ rje rin po che nyid kyis mdzad par dbu ma la 'jug pa'i rnam bshad chen mo las shes par bya'o/ /gnyis pa ni/ rten 'brel de ni rang dang gzhan dang rang bzhan gnyis ka dang dus gsum nyid du'ang rang bzhin gyis ma skyes pa'i phyir/ rang bzhin gyis skye ba med la/ don de khong du chud cing goms par byas pas/ 'jig ltas bsdus pa'i ngar 'dzin pa ni zad par 'gyur la/ de nas las dang skye ba yang zad par 'gyur ro/ /de ltar 'khor ba'i rgyu 'bras skye ba dang/ rgyu 'bras de dag zad pa nyid mthong nas dngos po'i de kho na nyid khong du chud pa rnams ni/ 'jig rten la yang dag par grub pa nyid du yod pa dang/ cung zad kyang med pa nyid du mi sems so/ /de yang rten 'brel rtag chad kyi mtha' dang bral bar khong du chud pa'i phyir ro/ /gsum pa ni/ gang zhig rtogs nas sdug bsngal thams cad zad pa'i phan yon can gyi chos rten 'byung spros pa'i mtha' dang bral ba 'di thos nas blun po de kho na nyid kyi don la/ rtog dpyod med pa mkhas pa mi 'jigs pa'i gnas la sdang ba dag gnas lugs yongs su ma shes pa'i phyir skrag go /yang na rtog med @013b pa de kho na nyid la mkhas pa'i khyad par du bshad par bya'o/ /bzhi pa la bzhi/ phung po lhag med kyi gnas skabs na bden 'dzin zad pa la 'jigs par mi rigs pa dang/ bden 'dzin mtha' dag zad pa thar par bstan pa dang/ log lta dang yang dag pa'i lta ba'i khyad par dang/ lhag bcas kyi dus na yang bden 'dzin zad pa thar par bstan pa'o/ /dang po ni/ skrag pa'i gnas min par ma grub ste/ stong nyid de bdag dang bdag gi bya'i? yul bkag pa yin la/ des rgyus 'jig pa skye zhing/ thar pa thab nas phung po cung zad kyang med na/ de nyid 'jigs pa'i gnas yin no zhe na/ nyan thos sde pa khyod kyang phung po lhag med kyi myang 'das la zag bcas kyi phung po 'di dag kun med par 'dod par gyur na de la khyod ci'i phyir mi 'jigs de la mi 'jigs na skabs 'dir lhag med kyi gnas skabs na/ nyon mongs gsum po de med par bshad pa la khyod ni ci ste 'jigs par byed des na stong pa nyid la yang skrag par mi rigs so/ /gnyis pa la gsum/ dngos med rang bzhin gyis grub pa thar par mi 'thad/ thar pa dngos por me 'thad/ dngos kyi don to/ /dang po ni/ sdug bsngal zad pa'i thar pa rang bzhin gyis grub pas kho bo cag mi 'jigs so zhe na/ thar pa la gang zag gi bdag med cing phung po rang bzhin gyis grub pa yang med pas gal te thar pa bdag mtha' dag bkag pa de 'dra 'dod la/ bdag dang phung po rang bzhin gyis grub pa bsal ba la 'dir ni khyod ko ste khyod ni cis mi dga' dga' bar rigs te/ thar pa'i gnas skabs na phung po med par 'dod pa'i phyir ro/ /gnyis pa ni/ phung po bkag pa'i @014a @#/ /thar pa de nyid dngos po yin no zhe na/ mya ngan las 'das pa de rang bzhin gyis grub pa'i dngos po ga la yin te ma yin par thal/ dngos po med pa yang rang bzhin gyis grub pa yod pa min pa'i phyir/ rtsa shes las/ gal te stong min cung zad yod/ /stong pa cung zad yod par 'gyur/ /mi stong cung zad yod min la/ stong pa yod par ga la 'gyur/ /zhes pa ltar ro/ /gsum pa ni/ dngos po dang dngos po med pa rang bzhin gyis grub par 'dzin pa zad pa mya ngan las 'das par shes par bya'o/ /gsum pa ni/ mya ngan 'das pa yang rang bzhin gyis med na/ med par lta ba la brten par 'gyur ro zhe na/ ma yin te/ mdor na bden pa dang dkon mchog dang las dang 'bras bu'i 'brel pa sogs med do snyam pa ni/ med par lta ba nyid yin la/ las dang las kyi 'bras bu med ces pa skur ba 'debs pa'i mi dge ba'i las ni rgyu'i dus su bsod nams ma yin pa'i las zhes bya la/ des 'bras bu ngan 'gro skyed pa'i byed pas na/ ngan song ba zhes bya la/ de ni log par lta ba zhes mdo las bshad do/ /mdor na las 'bras yod par yid ches pa'i lta ba ni yod par lta ba nyid ces bya la/ las kyi 'bras bu yod ces par lta ba'i 'dod pa'i dge ba'i las ni/ bsod nams kyis las dang 'bras bu bde 'gror rgyu mthun pa sogs kyis 'bras bu bskyed pa de ni yang dag pa'i lta ba zhes mdo las bshad do/ /des na las 'bras yod pa ni tha snyad tsam du yin gyi rang bzhin gyis grub pa min no/ /de ltar lta na rtag pa'i lta ba can du 'gyur bas so/ /bzhi pa ni/ phung po @014b lhag med kyi gnas skabs na bden 'dzin log par ma zad/ lhag bcas kyi gnas skabs na yang med de/ gnas lugs kyi don shes pas med lta dang yod lta zhi ba'i phyir/ dge mi dge'i las sdig pa dang bsod nams las 'das pa de yis ngan song dang/ bde 'gro las gang zag de ni thar par dam pa rgyal bas bshad do/ /lhag bcas kyi gnas skabs na yang bden 'dzin mtha' dag zad pa'i stobs kyis yang srid phyi mar nying mtshams sbyor ba'i skye ba zad pa de nyid thar par mdo las gsungs pa'o/ /gsum pa chos kun rtag chad kyi mtha' dang bral bar bstan pa la bzhi/ rgyas par bshad pa dang/ de la chad par thal ba'i nyes pa med pa dang/ mtha' bral sangs rgyas kyi thun mong ma yin pa'i khyad chos su bstan pa dang/ dngos po rang bzhin gyis grub pa dgag pa'o/ /dang po la bzhi/ rgyu 'bras rang bzhin gyis grub pa dgag pa dang/ grags pa dang 'gal ba spang ba dang/ gnyis med kyi don rtogs pas grol ba dang/ shes byed kyi dpe bshad pa'o/ /dang po la gnyis/ /rgyu 'bras yod med kyi mtha' dang bral ba dang/ rang bzhin gyis grub pa dgag pa'o/ /dang po ni/ kho bo cag dbu ma pa 'khor ba rgyu 'bras med pa nyid du lta ba las 'das pa yin te/ sdug bsngal skye ba bdag 'dzin gyi rgyu dang bcas pa tshad mas mthong bas so/ /rang bzhin gyis yod pa nyid du'ang khas mi len te/ sdug bsngal 'gog pa lam bden gyi rgyu dang bcas pa tshad mas mthong bas so/ /gnyis pa ni/ don du ste rang bzhin gyis grub pa'i rgyu med de/ 'bras bu bas sngar skyes pa dang @015a @#/ /lhan cig skyes pa dang byis skyes pa gang yang don dam par rgyu ma yin pa'i phyir/ rang bzhin gyis grub pa'i 'bras bu skye ba'ang rtags dang yang dag nyid du na ste tha snyad pa'i tshad ma dang don dam pa'i tshad ma gnyis ka la rab tu ma grags pa'i phyir/ gnyis pa ni/ rgyu 'bras rang bzhin gyis grub pa bkag na rkyen 'di ba tsam yang bkag pas 'jig rten gyi grags pa dang 'gal lo zhe na/ mi 'gal te/ rgyu 'bras ni tha snyad du phan tshun ltos nas rnam par bzhag pa tsam yin gyi rang gi ngo bos grub par cung zad kyang med de/ ma rigs pa 'di yod pas na 'du byed 'di 'byung ste/ dper na ring po yod pas thung ngu bzhin/ zhes bdun pa'i sgra dang/ ma rig pa 'di skyes pas na 'du byed 'di skye ste/ dper na mar me 'byung ba'i 'od bzhi no/ / zhes lnga pa'i sgra gnyis kyi rten 'brel brten nas btags pa dang brtan nas skyes pa nyid kyis rang gi ngo bos ma grub par bstan to/ /rang gi ngo bo las yod pa min te/ ring po yod na thud du nyid 'byung la/ /thung ngu yod na ring po nyid 'byung bas phan tshun ltos pa'i phyir ro/ /mar me 'byung ba med pa'i phyir ram med na de'i 'od kyang 'byung ba med pa bzhin/ rgyu 'bras rtag par yang mi 'gyur ro/ /gsum pa ni/ kho bo cag rgyu 'bras med pa nyid du khas mi len zhing med pa'i lta ba can ma yin te/ de ltar rgyu las 'bras bu skye ba tha snyad pa'i tshad mas mthong zhing sa bon las myu gu skye ba ltar/ 'jig rten 'di na ji bzhin du rgyu 'bras rtog pa'i spros pa las byung bar khas blangs pas te/ rtog pas btags pa dang/ tha snyad kyi dbang gis bzhag pa tsam gyi rgyu @015b 'bras yod par kho bo cag kas len pa'i phyir ro/ /yod par lta ba can nyid du yang mi 'gyur te/ rgyu 'bras don dam par grub pa 'gog pa yin gyi rtog pa'i spros pa las ma byung ba yang dag par grub pa ji bzhin nyid du gyur pa khas len na yod lta can nyid du 'gyur na yang/ de ltar khas mi len pa'i phyir/ nges na mtha' gnyis la mi brten pa mtha' bral khong du chud pa grol bar 'gyur ro/ /bzhi pa la gsum/ /dngos po'i de kho na nyid rtogs pa dang ma rtogs pa'i dpe dang/ phung po rang bzhin gyis grub pa dgag pa dang/ / yod med du lta ba ma spangs na 'khor ba las mi grol ba'o/ /dang po ni/ smig rgyu gal te chu yin na de dang nye ba rnams kyis cis mi mthong mthong dgos te/ thag ring nas ni mthong ba'i gzugs de dang nye ba rnams kyis gsal bar mthong ba'i phyir ro/ /dpe de bzhin du/ ji ltar so so skye bo de kho na nyid kyi rtogs pa la ring ba rnams kyis ni 'jig rten 'di ni yang dag par grub par mthong la thag nye ba'i gzugs mthong ba de ltar de kho na nyid de dang nye ba'i 'phags pa rnams kyis dngos po rang bzhin gyis grub na mthong dgos pa las mi mthong ba'i phyir/ 'phags pa'i mnyam gzhag gi gzigs pa'i ngor skyes pa bud med sogs mtshan ma cung zad kyang med de/ thag nye bar phyin pa'i mig rgyu bzhin no/ /gnyis pa ni/ ji ltar smig rgyu chu 'dra ba chu min pa don du ste brtags na chu ama yin pa de bzhin du phung po de dag chos can/ don du rang bzhin gyis grub pa yin te/ rang bzhin gyis grub pa'i bdag 'dra bar snang yang bdag min pa'i phyir/ gsum pa ni/ smig rgyu la ni 'di chu'o zhes bsams te der ni song ba las gal te chu sngar yod pa de med pa zhes @016a @#/ /'dzin pa de ni blun pa nyid do/ /der chu snga nas med pa'i phyir te/ de bzhin du snang la rang bzhin med pa smig rgyu lta bu'i 'jig rten nyer len gyi phung po rang bzhin gyis yod ces 'am sngar rang bzhin gyis yod pa phyis med pa zhes 'dzin pa de ni rmongs pa ste/ de kho na nyid kyi don la rmongs pa yod na 'khor ba las mi grol lo/ /gnyis pa de la chad par thal ba'i nyes pas la gsum/ thar pa thob pa la gnyis med rtogs dgos par bstan pa dang/ mtha' bral rtogs pa yod med kyi lta ba can du thal ba 'phang ba dang/ spros bral khong du chud pa la chad pa'i nyes pa med pa'o/ /dang po ni/ las 'bras la skur ba 'debs pa'i med pa ba ni/ de'i dbang gis ngan 'gror 'gro la las 'bras la yid ches pa'i 'jig rten pa'i yang dag pa'i lta ba can gyi yod pa ba ni/ de'i dbang gis bde 'gror 'gro bas lta ba de tsam las med na/ ngan 'gror ma lhung yang 'khor bar 'khor ba tsam du zad la/ mthar lta gnyis la mi brten pa'i 'phags pa chos can/ thar par 'gyur te/ gnas lugs kyi don yang dag pa ji lta ba bzhin mngon sum du yongs su shes pa'i phyir/ gnyis pa ni/ gnas lugs kyi don yang dag pa ji lta ba bzhin yongs su shes pas rang bzhin gyis yod par mi 'dod pa de'i phyir med pa par 'gyur na yod pa par yang ci'i phyir mi 'gyur bar thal/ las 'bras med par rang mi 'dod pa'i phyir/ ngo bo nyid med par smra ba khyed kyis gal te rang bzhin gyis yod pa sun byung bas don gyis 'di ni med pa bar bslan par bya'o zhe na/ 'o na de bzhin du dbu ma pa yod pa par yang ci'i phyir mi bslan bslan rigs @016b par thal/ rgyu 'bras med pa sun phyung pas so/ /de dag ni mgo mtshungs kyis dgag pa'o/ /gsum pa ni/ dbu ma pa de dag ji ltar med pa bar bshad de med pa bar mi rigs par thal/ dbu ma pa gang dag don gyis las 'bras med pa nyid du dam mi 'cha' zhing tshig gis mi smra ba'i phyir/ khas mi len yang spyod pas nyams su len ce na/ lus kyi nyes spyod mtha' dag las log pa'i phyir lus kyis kyang med pa ba dang mthun par mi spyod la gal te rnyed bkur nyams dgos pas mi spyod par zad kyi sems la las 'bras med snyam pa yod do zhe na/ las 'bras med snyam pa'i sems kyang med pa yin te/ bla na med pa'i byang chub thob pa'i ched du de'i lam la brten pas las 'bras phyin ci ma log par rtogs pa'i phyir/ 'di ni dbu ma pas chos thams cad rang bzhin gyis stong par bstan pa la nyan thos sde pa kha cig /'di ni las 'bras la skur ba 'debs pa'i med pa bar spyi bo nas dbang bskur ba yin no/ /zhes 'dod pa dgag pa'i ched du mdzad do/ /gsum pa mtha' bral sangs rgyas kyi thun mong ma yin pa'i khyad chos su bstan pa ni/ sangs rgyas rnams kyi ni bstan pa 'chi med bdud rtsi'i go 'phang mya ngan las 'das pa ster ba'i lam gyi dmigs pa yod med las 'das pa spros pa'i mtha' thams cad dang bral ba zab mo zhes bshad pa de nyid sangs rgyas kyi chos kyi khud pa thun mong ma yin pa yin par shes par gyis shig /'di las gzhan la thun mong min pa'i chos 'di med pa de'i phyir de yang rang sde kha cig dang gzhan sde phal cher gang zag rdzas su yod par smra ba dang/ @017a @#/ /rdzas yod kyi phung por smra ba yi 'jig rten pa de dag spras bral zab mo smra ba med pa'i phyir dang/ drang srong ser skya shes bya thams cad nyi shu rtsa lnga 'chang bar smra bas de'i rjes su 'breng ba'i grangs can pa dang/ dbang phyug chen po'i sprul par btags nas 'ug pa pa'i slob mar khas len pas 'ug phrug pa rigs pa can pa dang bye brag pa shes bya thams cad tshig don drug tu 'dus par smra ba dang/ gos med gcer bu pa gzung 'dzin gnyis stong gi shes pa rtag dngos su khas len pa dang bcas pa rnams la gal te gang zhig rang bzhin gyis yod pa las 'das pa dang/ dngos med rang bzhin gyis grub pa cung zad kyang med pa las 'das brten 'byung spros pa'i mtha' dang bral ba smra na dris dang cung zad kyang smra mi nus pas bdag legs su 'dod pa rnams kyis dbu ma pa'i gzhung lugs kyi don du brtags nas yod pa yang ma yin med pa yang ma yin zhes pa'i mun sprul gyi tshig dang/ yang don dam pa'i bden pa rtag dngos khas len pa dang/ 'dus byas rang bzhin gyis grub pa sogs khas mi blang bar bden 'dzin gyi dmigs gtad byas rdul phran tsam yang med par khong du chud cing/ rgyu mtshan de nyid kyis 'khor 'das kyi rnam gzhag rang lugs la nges par khas blang dgos pa'i gnyis tshogs la mkhas par bya'o/ /bzhi pa dngos po rang bzhin gyis grub pa dgag pa la bzhi/ 'gro 'ong rang bzhin gyis grub pa dgag pa dang/ 'dus byas kyi mtshan nyid skye 'jig gnas gsum rang bzhin gyis grub pa dgag pa dang/ zhar la gzhan sde'i 'dod pa dgag pa dang/ skad cig ma rang bzhin gyis @017b grub pa dgag pa'o/ /dang po ni/ 'jig rten phung po ni chos can/ de 'dra don du ste rang bzhin gyis ci yod med par thal/ rang bzhin gyi yod na dus gsum du gnas dgos pa la zhig gnas gshed du 'gro ba med cing/ skye ba'i tshe gshed nas 'ong ba med cing skyas nas kyang de'i rjes su skad cig kyang mi gnas pa dus gsum du gnas pa las 'das pa'i bdag nyid yin pa'i phyir/ dam smos pa ni tha snyad du yod par ston pa'o/ /'jig rten 'khor ba dang mya ngan las 'das pa don du rang bzhin gyis stong mi stong gi khyad par ji lta bu yang yod pa ma yin par thal/ gang gi phyir na/ gnyis ka'ang yang dag tu 'gre ba dang 'ong ba dang gnas pa med pa de'i phyir/ rgyas par ni rtsa ba shes rab kyi 'gro 'ong brtag pa'i rab byed las shes par bya'o/ /gnyis pa ni/ skye ba dang ni gnas pa dang 'gag pa don du rang bzhin gyis grub pa ga la zhig ste med par thal/ rang bzhin gyis gnas pa med pa'i phyir na/ skye ba dang 'gag pa'ang yang dag nyid du grub pa rigs pa min pa'i phyir/ gsum pa la gnyis/ bye brag pas rdul phran rtag par 'dod pa dgag pa dang/ khyab 'jug pa skyes bu rtag par 'dod pa dgag pa'o/ /dang po ni/ bye brag pa na re/ dngos po thams cad skye 'jig byed par khas len pa de la nyes pa der 'gyur ba yin gyi kho bo cag ni rdul phran rang bzhin gyis rtag par khas len pas nyes pa med do zhe na/ dngos po rnams la gnas skabs 'gyur ba yod dam med/ dang po ltar na/ rdul phran ji ltar skad cig ma ma yin pa'i rtag dngos yin te min par thal/ gal te gnas skabs rtag tu 'gyur na ni ste @018a @#/ /'gyur ba'i phyir/ gal te gnas skabs 'gyur ba med na ni don du rang bzhin gyis byes pa las gzhon nu dang/ de las rgyas pa sogs gzhan nyid du ga la 'gyur te mi 'gyur bar thal/ gnas skabs kyang rtag pa ther zug pa'i phyir/ nyes pa des 'jigs pas dngos po rang bzhin gyis skad cig mar yod do zhe na/ rdul phran rtag la gnas skabs kha cig mi rtag par khas len pa ltar phyogs gcig 'ang ni ste cha gcig zad pas 'gyur bar 'dod dam/ cha thams cad kyis thams cad du zad pas skad cig mar 'gyur gang na de rnam pa gnyis ka'ang rigs pa dang ldan pa min par thal/ dngos po rnams la phyed gyor la sogs su 'gyur ba dang/ phyed sngar gyi de nyid gnas pa'i mi 'dra ba dmigs dgos na de 'dra'i mi 'dra ba nyid mi dmigs pa'i phyir/ /gnyis pa ni/ khyab 'jug pa na re/ kho bo cag gi khyab 'jug ni thog mtha' med pa'i skyes bu rtag pa rnying pa nyin pas rang bzhin dang gnas skabs la brtags pa'i nyes pa de dag med do zhe na/ khyab 'jug dngos po yin na/ skad cig ma yin dgos la/ skad cig ma yin na rang grub pa'i dus gnyis par ril med pa'i phyir/ snga dus na yod pa'i dngos po de nyid phyi dus su gnas pa'i rnying pa 'ga' yang lta ga la zhig yed de med par thal/ gal te brten pa'i dngos po yin pa'i phyir skad cig ma min na'ang snga dus na gnas pa'i dngos po phyis kyang gnas pa'i rnying pa 'ga' yang lta ga la zhig dngos po rnying pa la 'gyur bas khyab pa'i phyir ro/ /bzhi pa la bzhi/ skad cig @018b la cha bcas kyis khyab pa bstan pa dang/ tsha bcas rang bzhin gyis grub pa dgag pa dang/ gcig dang du bral gyi gtan tshigs kyis dngos po rang bzhin gyis grub pa dgag pa dang/ 'jig rten mtha' ldan du mi bzung ba'i rgyu mtshan no/ /dang po ni/ skad cig ma skyes la ma 'gags pa de nyid dus gnyis par mi sdod pas mi rtag pa yin la/ de nyid skad cig gcig rang bzhin gyis gnas pa yin no zhe na/ ji ltar skad cig ma de la rang gi cha shas su gyur pa'i phyi mtha' khas len dgos la phyi mtha' yod pa de bzhin du thog ma dang dbus yod par brtag cing khas lan dgos te/ cha med kyi dngos po mi srid pa'i phyir ro/ /de ltar sned bcud kyi 'jig rten chos can/ skad gcig cig rang bzhin gyis gnas pa min par thal rang gi cha shas su gyur pa'i skad cig gsum gyi bdag nyid yin pa'i phyir/ gnyis pa ni/ thog mtha' dbus gsum so sor rang bzhin gyis gnas so zhe na/ skad cig ma de'i thog ma dang dbus dang tha ma yang chos can/ rang bzhan gar las kyang rang bzhin gyis gnas par skye ba ma yin te/ skad cig bzhin du cha yod med brtag cing bsam pa byas na thog ma dang dbus dang tha ma nyid gsum gyi cha dang bcas pa'i phyir ro/ /'di dag gis ni khyab byed dngos po cha med bkag nas rang bzhin gyis grub pa 'gog pa yin no/ /gsum pa ni/ gzugs can gyi dngos po chos can/ gcig pu nyid du bden pa min te/ phyogs tha dad dang bcas pa'i phyir/ rtags ma grub pa'i skyon med de/ gzugs can phyogs med pa ni 'ga' yang med pa'i phyir ro/ / @019a @#/ /du mar bden no zhe na/ du mar bden pa ma yin te/ bden grub kyi gcig med pa'i phyir/ khyab ste gcig med par ni du ma med pa'i phyir ro/ /gzugs can gyis mtshon nas chos kun la gcig dang du bral gyi gtan tshigs gyis bden grub 'gog pa yin no/ /gzugs can bden stong rang bzhin gyis yod do zhe na/ gzugs can rang bzhin gyis yod pa med par gzugs can rang bzhin gyis med pa'ang rang bzhin gyis grub pa med de/ rten mngan brten pa med pa'i phyir te/ spyod 'jug las/ dpyad bya rnam par dpyad byas nas/ /rnam gcod la ni rten yod min/ /zhes gsungs pa ltar ro/ /dngos po rang ni zhig pa'am ni tho bas bcom pa la sogs pa'i gnyen po yis rang bzhin gyis yod pa nyid med par 'gyur grang na dngos po rang bzhin gyis yod pa 'jig pa'am de 'joms pa'i gnyen por ji ltar 'gyur ste mi 'gyur bar thal/ rang bzhin gyis yod pa srid pa ma yin pa'i phyir/ des na mya ngan las 'das pa thob pa yis 'jig rten 'khor ba don du snger rang bzhin gyis yod pa gsar du 'grib par mi 'gyur bar thal/ rang bzhin gyis yang ma myong ba de'i phyir/ bzhi pa ni/ 'khor ba dang mya ngan las 'das pa gang yang rang bzhin gyis ma grub pas lta ba ngan pa drug cu rtsa gnyis mtha' bcu bzhir bsdus nas ston pa la gzhan gyi sde ba 'ga' zhig gis bdag dang 'jig rten mtha' dang ldan nam zhes zhus pa na rgyal ba cang mi gsung bar bzhugs pa yin la/ gang gi phyir na/ khyad gzhi med pa'i khyad chos lung ston pa mi rung zhing/ bdag med pa @019b ba dang phung po rang bzhin gyis grub pas stong pa bstan pa'i snod du mi rung bar gzigs nas lung ma bstan pa yin la/ de ltar zab mo'i chos snod min gyi 'gro ba la mi gsung ba de nyid kyi phyir nam mkhas pa rnams kyis gsung bya dang gsung bya min pa mtha' dag mngon sum du gzigs pa'i kun mkhyen thub pa thams cad mkhyen par shes kyi mi mkhyen pas ma yin te/ gzhan du dngos po'i de kho na nyid rgyas par gsungs pa'i phyir ro/ /gsum pa don bsdu ba la gsum/ zab mo rgyal bas gsungs pa dang/ de la skrag pa'i nyes dmigs dang/ rgyal pos kyang zab mo'i don rtogs par gdams pa'o/ /dang po ni/ de ltar nges par legs pa'i chos rtogs par dka' ba zab mo mtha' gang du yang yongs su 'dzin byar med cing/ rten rang bzhin gyis grub pa'i gnas med pa gang zhig rtogs nas goms par byas pa las/ theg pa gsum ga'i 'bras bu thob pa'i zab mo ni rdzogs pa'i sangs rgyas thams cad gzigs pa rnams kyis ting nge 'dzin rgyal po'i mdo la sogs pa rnams las gsungs par shes par bya'o/ /gnyis pa ni/ mtshan 'dzin gyis ji ltar zhen pa'i gnas med pa'i chos 'dis skrag pa'i skye bo thog ma med pa nas bdag tu mngon par zhen pa'i mthus rang bzhin gyis grub pa'i gnas la mngon par dga' zhing rang bzhin gyis yod pa dang/ sngar yod med par 'dzin pa las ma 'das pa'i mi mkhas pa rnams ni phyin ci log tu bzung nas phung bar 'gyur te 'jigs par rigs pa min pa'i gnas la 'jigs pa de dag ni kha cig /rang bzhin gyis stong pa gnas lugs kyi don du bstan pa na/ skur ba 'debs shing @020a @#/ /spong bar byed la/ spongs nas ngan 'gror 'gro ba dang/ kha cig de la mos kyang don byed nus pa ni dngos po 'gag pa de'i don du go nas las 'bras la skur ba 'debs shing/ chos gang yang yod med gang du yang bzung bar bya ba min no zhes de skad smra zhing gzhan la de ltar sgrog par byed pas 'og nas 'chad pa ltar rang yang 'phung la gzhan yang 'phung la gzhan yang 'phung bar byed do/ /slob dpon zhi ba 'tshos dbu ma rgyan gyi 'grel par gsungs pa ltar/ bya gsod pa dang ri dwags gsod pa sogs ni rang gzhan la phan pa chung ngu'i srog chags rnag can grangs yod pa zhig gsod par zad kyi stong pa nyid spong bar byed pa ni/ sems can thams cad kyi ma rig pa'i mun pa sel ba'i sgron me chos kyi sku'i rgyu la gnod pa byas pa yin pas bdag legs su 'dod pa rnams kyis gnas 'di la gzab par bya'o/ /gsum pa ni/ rgyal po zhes bos nas rang bzhin gyi ga la de dag gis ci nas kyang mi 'phung ba stong pa rten 'byung gi don du khong du chud nas/ rten 'brel la skur ba btab na/ /ngan 'gror 'gro ba dang/ rten 'brel rang lugs la khas len dgos pa nyid kyis rang bzhin gyis grub pas stong pa khas blang dgos pa dang/ rang bzhin gyis grub pa la gyur 'bras cung zad kyang bzhag sa med par khong du chud nas bden pa gnyis ming tsam brda tsam du khong du chud pa de ltar gyis shig ces gdams so/ /gnyis pa rgyal pos kyang zab mo'i don la bslab par gdams pa la gnyis/ skabs dgod pa dang/ bdag med gnyis bshad pa'o/ /dang po ni/ rgyal po zhes bos nas khyod la 'jig rten 'das kyi tshul lugs @020b mtha' gnyis la mi brten pa'i yang dag pa des don gyi mdo sde las gsungs pa ji lta ba bzhin du rigs pa dang lung gi dbang gis bshad par bya'o/ /ci'i don du zho na/ rgyal po khyod ni mi phung par bgyi ba'i slad du'o/ /'khor ba'i rgyur gyur pa'i sdig dang bsod nams bya ba las 'das pa'i zab mo gsung rab las bkrol ba'i don dang ldan pa mu stegs gzhan dang rang gi yang sde pa gnas med la 'jigs pas ma myangs pa'o/ /don de khyed la bshad par bya'o zhes pa'o/ /gnyis pa la gnyis/ gang zag gi bdag med bshad pa dang/ chos kyis bdag med bshad pa'o/ /dang po la gnyis/ bsdus te bstan pa dang/ tshig don so sor bstan pa'o/ /dang po ni/ gang zag ni ming gi tha snyad kyi dbang gis bzhag pa tsam yin gyi/ rang gi ngo bos grub pa cung zad kyang med de/ rigs pa drug cu pa las/ 'jig rten ma rig rkyen can du/ /gang phyir rdzogs pa'i sangs rgyas gsung/ /de yi phyir na 'jig rten 'di/ /rnam rtog yin zhes cis mi 'thad/ ces gsungs pa'i don te/ 'jig rten nyer len gyi phung po lta po 'di nyon mongs can gyi ma rig pa des dngos po rang gi ngo bos grub par zhen pa'i dbang gis las bsags de las sdug bsngal 'grub pa yin la/ des ji ltar btags pa ltar du ma grub par khong du chud pa na gang zag dang phung po khas mi len du mi rung la/ de yang ma rig pa'i 'dzin stangs bkag pa'i rjes su ming gi tha snyad kyi dbang gis bzhag pa'i rtog pas btags pa tsam du khong du chud par 'gyur ba yin no/ /rnal 'byor spyod pa bzhi brgya pa las kyang/ rtog pa med par 'dod chags @021a @#/ /la/ /sogs la yod nyid yod min la/ /yang dag don dang rtog pa zhas/ /blo dang ldan pa su zhig 'dzin/ /ces gsungs shing/ de'i 'grel pa las kyang/ rtog pa yod pa kho nas yod pa nyid dang/ rtog pa med par yod pa nyid med pa de dag ni gor ma chag par thag pa bsdogs pa la btags pa'i sprul ltar rang gi ngo bos ma grub par nges so/ /zhes gsungs te/ yang dag don ni rang gi ngo bos grub pa'o/ /rtog pa ni de la ltos te skye ba'o/ /'grel pa der chags sogs rnams thag pa la sprul du btags pa ltar gsungs pa ni mtshon pa tsam ste/ chos gzhan thams cad kyang thag pa la sprul du btags pa ltar rtog pas bzhag par 'chad pa'o/ /de la khra bo'i mdog dang 'khyil lugs sprul dang 'dra zhing/ yul mi gsal bar snang ba na thag pa la 'di sprul lo snyam pa 'byung ngo/ /de'i tshe thag pa la thag pa'i tshogs pa dang cha shas sprul gyi mtshan gzhir 'jog rgyu cung zad kyang med pas/ de'i sprul ni rtog pas rtags pa tsam mo/ /de bzhin du phung po la brten nas nga'o snyam pa 'byung ba na/ phung po'i steng nas snga phyi'i rgyun gyi tshogs pa dang/ dus gcig pa'i tshogs pa dang/ de'i cha shas nga'i mtshan gzhir 'jig rgyu cung zad kyang med do/ /de'i phyir rang phung po'i cha dang cha can las ngo bo tha dad pa'i de'i gzhir 'dzin rgyu yang cung zad kyang med pas/ nga de ni rtog pas phung po la brten nas bzhag pa tsam yin gyi rang gi ngo bos grub pa med do/ /gnyis pa la gnyis/ khams drug gang zag tu mi rung ba dang/ dpyad pa lnga'i sgo nas @021b gang zag rang bzhin gyis grub pa dgag pa'o/ /dang po ni/ skyes bu gang zag ni khams drug 'dus pa la brten nas btags pa tsam yin gyi/ khams drug re re ba dang 'dus pa dang de las ngo bo tha dad pa gang yang skyes bur mi rung ste/ sa min nu min pa dang/ me min rlung min nam mkha' min rnam shes ma yin zhes pa rnams kyis khams drug re re ba gang zag min par bstan la/ kun min na zhes pas khams drug 'dus pa gang zag ma yin pa dang/ de las gzhan na skyes bu gang zhes de dag las ngo bo tha dad pa gang zag tu mi rung bar bstan to/ /skyes bu chos can/ yang dag par grub pa min te khams drug 'dus pa la brten nas btags pa'i phyir/ /gang zag ji lta ba de bzhin du khams ni re re'ang chos can/ yang dag nyid du grub pa min te/ cha du ma 'dus pa la brten nas btags pa'i phyir/ gnyis pa ni/ gzhan yang btsal na bdag phung po las rnam lngar med de/ phung po dang gang zag gi bdag gcig yin te/ bdag mi rtag par thal ba dang/ du mar thal ba dang/ skye ba dran pa mi 'thad pa sogs kyi nyes par 'gyur ro/ /bdag der phung po de 'khar gzhong la rgya shug ltar brten pa min la/ phung po de la bdag de de ltar brten pa min te/ dmigs rung mi dmigs pa'i phyir ro/ /phung po de med par bdag yan gar bar dmigs pa yang min te/ phung po med pa'i mtshan nyid can du dmigs par thal ba'i phyir ro/ /bdag dang phung po me shing ltar 'dres te de nyid dang gzhan nyid brjod du med pa min te/ dngos po la de nyid dang gzhan gang rung gis khyab pa'i phyir ro/ /bdag ni ji ltar rang bzhin gyis yod do med par @022a @#/ /thal/ dpyad na rnam pa lngar med pa de'i phyir/ gnyis pa la gnyis/ gzugs phung rang bzhin gyis grub pa dgag pa dang/ phung po lngag? ma rnams la sbyar ba'o/ /dang po la bzhi/ rten 'byung ba rang bzhin gyis grub pa dgag pa dang/ brten pa 'byung 'gyur rang bzhin gyis grub pa dgag pa dang/ chos gzhan la sbyar ba dang/ nam mkha' rang bzhin gyis grub pa dgag pa'o/ /dang po la bzhi/ gcig dang du ma'i rang bzhin du ma grub pa dang/ des na 'byung ba rang bzhin gyis med pa dang/ 'dus pa rang bzhin gyis ma grub pa dang/ sgrub byed dgag pa'o/ /dang po ni/ 'byung ba gsum sa dang gcig min te/ sa la gsum gyi mtshan nyid tshang bar thal ba dang/ mtshan nyid 'tshol bar thal ba'i phyir ro/ /sa 'di la 'byung ba gsum brten pa min zhing gsum po de la 'di brten pa min la/ gsum po de med par sa gnas pa yang min no/ /'byung ba rnams kyang chos can/ bdag bzhin rdzun par thal/ chu la sogs pa re re'ang de bzhin du rnam pa bzhir dbyang na mi rnyed pa yin pa de'i phyir/ gnyis pa ni/ des na 'byung ba rnams rang bzhin gyis med de/ re re'ang ngo bo nyid du grub pa med pa'i phyir te/ sa chu me dang rlung rnams ni gang zhig gsum med par re re med la/ gcig med par yang gsum med pa'i phyir ro/ /gsum pa la gsum/ ltos na 'dus pa rang bzhin gyis grub pa 'gal ba dang/ de'i lan dgag pa dang rtsod pa spong ba'o/ /dang po ni/ 'byung ba rnams so sor rang bzhin gyis yod pa min te/ gal te gsum med par re re med la me lta bu gcig med par @022b yang gzhan gsum med pa'i phyir/ ci ltar 'dus pa rang bzhin gyis grub pa skyed par 'gyur te mi 'gyur bar thal so so rang gi ngo bos med pa'i phyir/ gnyis pa ni/ so so rang gi ngo bos yod pas 'dus pa rang bzhin gyi yod do zhe na/ 'byung ba gsum gyi bdag nyid can gyi bud shing med par me ci ste med yod par thal/ 'on te bzhi po so so rang gi ngo bos yod pa'i phyir/ de bzhin g.yo dang thogs pa dang smin pa med par chu cis med ces pa dang/ thogs smin bsdus pa dag med par rlung yod par thal ba dang/ g.yo smin sdud pa dag med par sa yod par thal/ ltos med du rang gi ngo bo yod pa'i phyir/ gsum pa ni/ gal te me kho na shing med par mi 'byung bar grags pas ltos pa yin gyi/ gzhan gsum ltos med du rang gi ngo bos yod do zhe na/ 'on te me 'di gzhan gsum la ma ltos par bdag nyid med na/ ji ltar khyod kyi 'byung ba gsum gzhan la ltos pa med par rang gi ngo bos yod pa min par thal/ gzhan gsum po rten cing 'byung ba dang chos mi mthun pa 'di rung ba'ang min pa'i phyir te/ gzhan la ltos pa'i phyir/ bzhi pa ni/ gal te 'byung ba rnams phan tshun ltos kyang rang gi ngo bos yod do zhe na/ 'byung ba de dag ni ji lta bur na phan tshun ltos nas yod pa mi 'thad par thal/ so so rang bzhin gyis yod pa'i phyir/ gal te rang gi ngo bos med na de dag ji ltar phan tshun ltos nas rang gi ngo bos yod pa mi 'thad par thal/ so so rang gi ngo bos yod pa min pa'i phyir/ gzhi gang nas lta bu zhig yod pa der lhag ma gsum po yang rang gi ngo bos yod de de'i mtshan nyid yod pa'i phyir ce @023a @#/ /na/ gal te so sor rang med kyi gang na gcig yod pa'i yul dang lhag ma rnams yod na/ 'byung ba bzhi rang bzhin 'dres pa la yod dam/ ma 'dres pa la yod/ phyi ma mi 'thad de/ ma 'dres pa rnams yul gcig na gnas pa med pa'i phyir/ snga ma mi 'thad de/ 'dres pa so so rang gi ngo bos yod pa? min pa'i phyir/ so so'i rang gi mtshan nyid rang gi ngo bos ga la yod med par thal/ 'byung ba rnams so so rang med pa'i phyir/ 'dres kyang shas che chung yod pas mtshan nyid shas che chung dmigs pa'i phyir ci na/ 'dus pa'i tshe mtshan nyid shas che chung 'ong/ rang gi dngos po grub pa med par thal/ ltos med du so so rang med pa'i phyir/ 'o na chos mngon pa'i mdo las 'byung ba so so'i mtshan nyid bshad pa dang 'gal lo zhe na/ mi 'gal te/ 'byung ba rnams kyi mtshan nyid dag ni kun rdzob tu yod pa ming tsam brda tsam la dgongs nas bshad kyi rang gi ngo bos yod par mi bzhed pa'i phyir/ gnyis pa ni/ kha dog dri ro reg pa gang yin pa de dag kyang rang bzhin gyis med par thal/ de dag la yang 'byung ba rang bzhin gyis grub pa 'gog pa'i tshul 'di sbyar bar bya ba yin pa'i phyir/ gzugs gsum reg min 'di la min/ /zhes sogs sbyar bar bya'o/ /gsum pa la gnyis/ dngos dang/ rang bzhin gyis stong pa'i shes byed do/ /dang po ni/ mig dang rnam shes dang gzugs rnams dang ma rig pa dang/ las dang skye ba gsum dang byed po dang las dang bya ba dang/ gcig la sogs pa'i grangs dang/ phan tshun phrad pa'i ldan pa dang/ rgyu @023b 'bras dang dus dang ni dbyibs kyis bsdus pa thung ngu dang ring po dang/ sogs pas gru bzhi dang zlum po zhes bya ba dang/ dngos po dang don byed nus pa la sogs pa'i ming dang ming tsan rnams kyang 'byung ba brtags na bdag bzhin rdzun par grub pa de bzhin no/ /gnyis pa la bzhi/ chos mun rang bzhin gyis stong pa'i don bstan pa dang/ bshad pa dang/ sgrub byed dgod pa dang/ chad ltar thal ba'i skyon med pa'o/ /dang po ni/ sa dang chu dang me dang rlung dang ring thung phra dang sbom nyid dang dge mi dge lung ma bstan sogs nyid ni chos can/ rang bzhin gyis grub pa med de/ de yod na 'phags pa'i mnyam gzhag gis gzigs dgos pa gang zhig /rnam shes su ste de'i gzigs ngor 'gag par 'gyur zhes thub pas gsungs pa'i phyir ro/ /gnyis pa ni/ mi rtog pa'i rnam shes so sor rang gis rig par bya ba/ gzhan la 'di'o zhes pa bstan tu med pa shes bya mtha' yas pa'i gnas lugs la dbang bsgyur bas kun tu bdag po de la ni chos can/ sa dang chu dang med dang ni rlung gis khyod kyi gzigs ngor gnas thob par 'gyur ba min par thal/ cung zad kyang ma gzigs pa'i phyir ro/ 'phags pa'i mnyam gzhag gi gzigs ngo 'dir ni ring ba dang thung ba dang gra ba dang skom pa dang dge dang mi dge dang 'dir ni ming dang gzugs dag kyang ma lus par ni 'gag par 'gyur bas rang bzhin gyis stong ste/ rang bzhin gyis grub na gnas lugs kyi don du 'gyur bas/ mnyam gzhag gis gzigs dgos pa'i phyir ro/ /gsum pa ni/ mi rtog ye shes kyis 'dus byas rnams bshig pas de'i tshe 'gag pa @024a @#/ /yin nam zhe na/ min te/ gdod nas grub pa'i rang bzhin gyis skye ba med pa'i don gang zhig sngar nas yod kyang rab rib can gyi skra shad ltar ma rig pas sgribs nas ma shes pa'i phyir/ so so skye bo rnams kyis ma mthong ba yin gyi stong nyid rtogs pa'i 'phags pa'i rnam shes la sngon chad byung ba rten 'byung rang bzhin gyis stong pa de kun ni gnas lugs kyi don de mngon sum du shes pa'i phyir na rnam shes su ste 'phags pa'i mnyam gzhag gi gzigs ngor phyis ni de ltar 'gag par 'gyur bas/ sngar nas rang bzhin gyis stong pa la/ phyis de ltar gzigs pa yin gyi/ sngar rang bzhin gyis yod pa phyis rang bzhin med par gzigs pa min te/ de ltar na mnyam gzhag dngos po'i 'jig byed du 'gyur gyi/ gnas lugs kyi don gzigs par mi 'gyur bas so/ /'gro ba'i chos shes bya dang shes pa 'di kun chos can/ sgom byung gi rnam shes me'i bud shing gi yin par 'dod de/ ma lus pa bsregs pa'i phyir ro/ /gnas lugs kyi don de dag ji lta ba bzhin rab tu 'byed pa'i 'od dang ldan pas bsregs na gnyis snang ma lus pa zhi bar 'gyur ba yin no/ /bzhi pa ni/ de lta na khyed kyis thams cad med par khas blangs pa'i phyir khyed med pa par 'gyur ro zhe na/ mi 'gyur te/ nyon mongs can gyis mi shes pas ni sngon rang bzhin gyis ma grub bzhin du/ rang bzhin gyis grub par btags pa yin la/ phyis ni rang bzhin gyis stong pa gtan la phab nas de nyid nges pa dang dngos po'i gnas lugs rtogs pa yin gyi/ dngos po la cung zad @024b kyang skur ba btab pa'i skyon med do/ /'o na dngos po rang bzhin gyis grub pa bkag pa de nyid rang bzhin gyis yod par 'gyur ro zhe na/ gang gi tshe dngos po rang bzhin gyis grub pa mi rnyed pa de'i tshe dngos med rang bzhin gyis grub par ga la 'gyur te/ rten med pa'i brten pa mi srid pa'i phyir ro/ /bzhi pa nam mkha' rang bzhin gyis grub pa dgag pa ni/ gal te 'dus ma byas kyi nam mkha' rang bzhin gyis grub bo zhe na/ nam mkha' yang ni ming tsam yin gyi rang bzhin gyis med par thal/ dgag bya thogs bcas kyi gzugs kyi dngos po ming tsam du zad pa'i phyir/ thogs bcas kyi gzugs rang bzhin gyis yod do zhe na/ gzugs rang bzhin gyis grub pa lta ga la yod de med par thal/ 'byung ba rang bzhin gyis grub pa med pa'i phyir/ ming tsam nyid kyang rang bzhin gyis grub pa med de/ ming can rang bzhin gyis grub pa med pa de'i phyir/ gnyis pa phung po lhag ma rnams la sbyar ba ni/ tshor ba'i phung po dang 'du shes dang 'du byed dang rnam shes kyi phung po yang 'byung ba lta bu dang bdag bzhin du ni rang bzhin gyis stong par bsam par bya ste/ rang bzhin gyis grub pa la sngar bshad kyi gcig dang du bral la sogs pa'i rigs pas gnod pa'i phyir ro/ /de'i phyir gang zag bzhin du khams drug kyang bdag med do/ /le'u'i mtshan bstan pa ni/ rgyal po la gtam bya ba rin po che'i phreng ba las/ mngon par mtho ba dang nges par legs pa rgyu 'bras so sor bstan pa ste le'u dang po'i 'grel pa'o// //gnyis pa mngon mtho nges legs rgyu 'bras spel mar bshad pa la gsum/ nges legs rgyu 'bras dang/ mngon mtho rgyu 'bras dang/ yang nges @025a @#/ /legs rgyu 'bras bshad pa'o/ /dang po la gnyis/ mthar 'dzin gyi lta ba dgag pa dang/ zab mo rtogs par dka' ba'i tshul lo/ /dang po la gsum/ dpe gzhan gyis bshad zin dran par byed pa dang/ dgag pa dngos dang/ des na mtha' bzhir lung ma bstan pa'o/ /dang po ni/ ji ltar chu shing gi sdong po'i yan lag dag ma lus pa dang bcas te snying po yod med brtag pa'i ched du bshig par byas na snying po ci yang med pa ltar skyes bu khams drug dang bcas pa cha dang char phye nas bshig na de dang 'dra bar rang bzhin gyis grub pa'i snying po rdul tsam yang med do/ /mdo las/ ji ltar chu shing rlon pa'i sdong po la/ snying po 'dod mis rim pas bshig byas kyang/ /phyi dang nang na snying po yod min ltar/ /chos rnams thams cad de ltar shes par gyis/ /zhes gsungs pa ltar ro/ /gnyis pa la gsum/ bdag dang bdag med rang bzhin gyis ma grub pa dang/ dngos por yod med rang bzhin gyis ma grub pa dang/ 'khor ba'i phyir mtha' lung ma bstan pa mi 'thad pa'i rtsod pa spang ba'o/ /dang po ni/ gang zag dang khams drug po da kun bdag med par rgyal po khyod la gtan la phab pa rgyu mtshan dang bcas pa yin te/ chos rnams thams cad bdag med ces rgyal ba rnams kyis gsungs pa de'i phyir/ yang na dngos po rang bzhin med pa de'i phyir/ rgyu mtshan des dngos med kyang rang bzhin med ces pa'o/ /sku gsung thugs mi mthun phyogs la gdams pa mthar thug /thub pa chen pos bdag dang bdag med rang bzhin gyis grub @025b pa bzlog par mdzad pa'i rgyu mtshan yod de/ bdag dang bdag med rang bzhin gyis grub par lta ba dag phyin ci log yin pa de'i phyir/ der thal/ spang bshad bde ba de ltar bdag dang bdag med pa yang dag par grub pa ji lta ba bzhin du dmigs su med pa'i phyir ro/ /gnyis pa la gnyis/ dngos dang mtha' bzhir lung ma bstan pa'i rgyu mtshan no/ /dang po ni/ mthong ba dang thos pa sogs yul drug thub pa yin bden par grub pa min pa dang/ rdzun pa ye med min par gsungs pa'i rgyu mtshan yod de/ /de ni gnyig don du ste yang dag par grub pa min pa'i phyir ro/ /bden par yod pa bkag nas gtan med dang/ yang na med pa rang bzhin gyis grub par 'gyur te/ bden par yod med dngos 'gal yin pa'i phyir ce na/ bden par yod med de ni gnyi ga don du rang bzhin gyis grub pa min te/ dngos po rang bzhin gyis grub pa'i phyogs las 'gal zla mi mthun phyogs dngos med rang bzhin gyis grub par 'gyur dgos na dngos po rang bzhin gyis ma grub pa'i phyir ro/ des na yod ces pa dang med ces pa yang dag tu grub par thub pa zhal gyis mi bzhes pa'i rgyu mtshan yod de/ sngar bshad pa'i rigs pa de lta bus dam pa'i don du na 'jig rten 'di ni bden rdzun rang bzhin gyis grub pa las 'das pa de nyid kyi phyir/ gnyis pa ni/ bdag dang 'jig rten de ni kun mkhyen gyis mtha' yod pa dang mtha' med pa dang/ gnyis ka dang gnyis ka ma yin zhes lung/ ji skad bstan te lung mi ston pa'i rgyu mtshan yod de/ bdag dang 'jig rten gang zhig de ltar rnam pa kun tu rang bzhin gyis yod pa min pa'i phyir/ gsum pa la gnyis/ rtsod pa dang lan no/ /dang po ni/ 'khor ba'i @026a @#/ /gyi mtha' lung ston par mi mdzad pa mi rigs te/ sangs rgyas grangs med pa sngar bshegs pa dang de bzhin du ma 'ongs pa na byon par 'gyur ba dang/ de ltar bzhugs pas sems can rnams ni sangs rgyas re res kyang bya ba 'gyur ni de las kyang chos mang ba thar pa la 'god par mdzad la/ de las sems can mya ngan las 'da' ba'i ched du dus gsum du gnas pa dgongs nas sems can mya ngan las 'da' bar mdzad la/ /sngar med kyi sems can skye ba mi srid pas/ sems can 'phel ba ni med la/ bsod nams? zad pa dus gsum du gnas pa ni sems can gyi 'jig rten 'phel ba'i rgyu min pas/ thams cad mkhyen pa ji ltar sems can gyi sngon mtha' dang phyi mtha' lung ma bstan par mdzad sngar du ma zad cing 'phel ba cung zad kyang med pa'i phyir ro zhe na/ gnyis pa lan la gsum/ 'khor ba la skye 'gag rang bzhin gyis ma grub pa'i dpe dang/ 'gro 'ong rang bzhin gyis ma grub pa'i dpe dang/ ming du btags pa tsam du zad pa'o/ /dang po la gnyis/ snod min la gsang ba zab mor bstan pa dang/ dngos so/ /dang po ni/ dngos po bden grub la zhen pa de kho na nyid la skur ba 'debs pa'i snod min gyi gdul byas mtha' bcu bzhir bsdus nas/ dris kyang lung ston par mi rigs te snod min gyi so so'i skye bo la gsang ba gang yin pa/ de ni zab mo'i chos yin la/ de yang gang yin zhe na 'jig rten snang la rang bzhin med pa sgyu ma lta bu nyid yin la/ de ni sangs rgyas kyi bstan pa'i snying po bdud rtsi yin gyi dmigs pa'i gdon gyis zin pa rnams kyis/ btags pa rnams @026b ni ma yin no/ /gnyis pa ni/ ji ltar sgyu ma'i glang po ya skye ba dang 'jig pa nyid snang yang de la don gyi yang dag tu skye ba dang 'jig pa nyid med pa ltar de bzhin du rang bzhin gyis grub par snang yang des stong pa sgyu ma dang 'dra ba'i 'jig rten la skye ba dang 'jig pa nyid snang yang dam pa'i don du skye ba dang 'jig pa nyid ni yod pa ma yin no/ /de yang sgyu ma'i ltad mo ba mig slad pa rnams kyis ni sgyu ma'i rta dang glang po sogs yul gyi go sa gnon pa'i rta glang du zhen pa ltar/ de kho na nyid khong du ma chud pa'i so so skye bo rnams kyis dngos po rang bzhin gyis grub pa bzhin par byed pa yin gyi rang bzhin gyis stong ngo snyam du mi sems so/ /sgyu ma mkhan rang nyid la rta glang du snang yang der ma grub par rtogs pa ltar/ de kho na nyid rtogs pa'i so so skye bo dang/ 'phags pa rnams kyis dngos po mtha' dag rang bzhin gyis grub par snang yang/ des stong par rtogs pa sa bdun pa man chad pa rnams la/ bden 'dzin mngon 'gyur ba 'byung yang/ sa brgyad pa thob nas de yang 'byung ba mi srid do/ /sgyu ma'i rdzas dang sngags kyis ma bslad pa'i gang zag la rgyu ma'i rta glang gi snang ba tsam yang mi 'byung ba bzhin du/ 'phags pa slob pa'i mnyam gzhag gi gzigs pa'i ngor dngos po kun rdzob pa'i snang ba mtha' dag log par shes par bya'o/ /gnyis pa ni/ ji ltar sgyu ma'i glang po ni gang nas kyang ma 'ongs gang yang mi 'gro yang glang po rang bzhin pa 'gro 'ong byed par 'dzin pa ni/ sngags la sogs pas sems rmongs pa tsam du zad pa san yang dag nyid du gnas pa cung zad kyang med par khong du chud par bya'o/ / @027a @#/ /gsum pa ni/ chos gang zhig sngar yod dam med par 'gyur ba'i 'jig rten don du ste rang bzhin gyis ci zhig yod de med par thal sngar bshad pa'i rigs pa de ltar ming gi tha snyad du gdags pa tsam ma gtogs par dus gsum du skye 'gag byed pa las 'das pa'i bdag nyid yin pa'i phyir ro/ /gsum pa des na mtha' bzhir lung ma bstan pa ni/ sangs rgyas kyis ni/ mtha' bzhi las 'das pa'i rgyu mtshan 'di las/ mtha' bzhir lung ma bstan pa yin gyi/ rgyu mtshan gzhan yod pa'i phyir/ lung ma bstan pa ma yin pas 'jig rten mtha' yod dang mtha' med dang/ gnyis dang gnyis min rnam pa bzhi lung ma bstan pa 'di mdzad do/ /mtha' yod ni/ rgyang phan 'dod pa ltar tshe 'dir zad kyi phyi mar mi 'jug pa dang/ mtha' med ni grangs can 'dod pa ltar/ tshe 'di'i bdag de nyid phyi mar 'jug pa dang/ mtha' yod med gnyis ka ni/ gcer bu pa kha cig 'dod pa ltar/ gnas skabs mtha' dang ldan la rang bzhin mtha' dang mi ldan pa dang/ gnyi ga ma yin pa ni gnas ma du'i sde pa kha cig 'dod pa ltar/ gang zag ya gyal gang du yang brjod du med par 'dod pa ltar ro/ /gnyis pa zab mo rtogs par dka' ba'i tshul la gsum/ zab mo rtog par dka' ba'i rgyu mtshan dang/ thub pas snod min la zab mo mi gsung ba'i rgyu mtshan dang/ rgyu mtshan de nyid bshad pa'o/ /dang po ni/ snod min gyis chos rtogs par dka' ba nges par legs pa'i gnas dam pa'i chos mtshan 'dzin gyi dmigs gtad bya ba'i gnas med par rtogs par dka' bas phra rab dang so so @027b skye bos rtags la brten nas rtogs dgos pas mngon sum min pa zab mo de ka ste de ni ji ltar bur sems la go sla zhing bde blag tu 'jug par 'gyur te/ re shig lus ni mi gtsang ba nyid kyis gang zhig mi gtsang ba rgyun du 'jags pa gzugs can yin pas rags shing mngon sum gyi spyod yul ba yin pas rtogs par sla ba dang/ dus rtag tu mi gtsang bar snang ba'ang gang gi tshe mi gtsang bar sems la gnas pa min pa de'i tshe ste de'i phyir ro/ /re shig rags pa yang rtogs par mi nus na phra ba rtogs pa lta ci smos zhes pa'o/ /gshes gnyen po to ba'i gsung sgros las byung ba ltar/ mi ro lung skyed pa ltar byed pa la/ g.yo 'gul cung zad kyang med par stong pa nyid blo'i yul du bde tsam yod zer ba ni yang na blo rtsings pa yin/ yang na rdzun smra ba yin gsung pa ltar ro/ / gnyis pa ni/ zab gzhi spros bral 'od gsal 'dus ma byas/ bdud rtsi lta bu ches 'di bdag gis snyed/ /su la bstan kyang go bar mi 'gyur bas/ /des na mi smra nags su gnas par bya/ /zhes thud pa sangs rgyas nas gdul bya 'ga' zhig gi ngor zhag zhe dgur chos bstan pa las log par gyur te/ spras pa'i mtha' thams cad dang bral ba'i chos 'di zab pa'i phyir gdul bya'i skye bo yis shes par dka' ba thugs su chud de rgyu mtshan des na'o/ /gsum pa la gsum/ zab mo log par bzung ba'i nyes dmigs dang/ bzung legs nyes kyi phan yon dang nyes dmigs kyi dpe bshad pa dang/ zab mo rtogs pa la bag dang ldan par gdams pa'o/ /dang po ni/ rtogs slan bstan yang ci zhig dgos/ rtogs par dka' ba nyid kyis yang dang yang du bstan @028a @#/ /par rigs so snyam na/ stong nyid go ba'i rigs dang mi ldan pa la bsten par bya ba ma yin te/ rigs dang mi ldan pa'i mi mkhas pa dang/ mkhas par rlom pa phung pa'i nyes dmigs yod pa'i phyir ro/ /mi mkhas pa 'phung tshul ni/ stong pa nyid bstan pa na/ ci yang med pa'i don du bzung ste/ chos 'di log par shes shing go bar 'gyur na mi mkhas pa rnams ni dal 'byor dang thar pa gnyi ga las nyams pas chud kyang za ste/ 'di ltar med par lta ba yi/ /dbang gis mi gtsang ba ngan 'gro der ni bying par 'gyur bas gnas 'di la gzab par bya'o/ /mkhas par rlom pa 'phung pa'i tshul ni/ gzhan yang ci yang med pa'i don du 'dzin pa'am rang bzhin gyis stong pa bstan pa na/ de 'dra ba stong nyid rnal ma min gyi/ las 'bras la skur ba 'debs pa'i lta ba yin zhes stong pa nyid kyi don de ni log par bzung ba drang don la nges don du 'dzin pa'i blun po mkhas pa'i nga rgyal can yang stong pa nyid spong bas sems ma rung ba'i bdag nyid can gang la yod pa de ni mnar med par ni spyi'u tshugs su 'gro ba'o/ /des na stong pa nyid kyi mos pa skye ba dka' na yang/ btang snyoms su bzhag par bya'i skur ba gdab par mi bya'o/ /gnyis pa ni/ ji ltar kha zas tshod ma zin pa dang/ mi 'phrod pa za ba'i bza' nyas pas shi la thug pa'i 'phung ba dag tu 'gyur ba dang/ kha zas bzang po bza' legs pas che 'phel ba dang nad med pa dang stobs dang ldan pa dang lus sems bde bar 'gyur ba ltar de bzhin du stong nyid log par bzung ba des 'phung ba dag ni thob par 'gyur zhing/ stong pa rten 'byung @028b gi don du khong du chud nas stong pa nyid kyis las 'bras la lhag par yang gus pa'i legs par shes pas mngon mtho'i bde ba dang byang chub bla na med pa 'thob par 'gyur ro/ /gsum pa ni/ log par bzung ba nyes dmigs che zhing legs par shes na phan yon che ba de'i phyir tu stong nyid/ 'di la spong ba dang med pa'i lta ba nyid sangs nas ni yang dag pa'i don shes pa la nan tan mchog 'bad pa chen po mdzod cig /ces gdams te/ skyes bu'i don kun sgrub pa'i phyir tu'o/ /gnyis pa mngon mtho rgyu 'bras la gnyis/ skabs dgod/ dngos kyi don to/ /dang po la gnyis/ stong nyid ma rtogs pas 'khor bar 'khor ba dang/ de ma rtogs pa de srid mngon mtho la 'bad par gdams pa'o/ /dang po ni/ stong pa nyid kyi chos 'di yongs su ma shes na gang zag de la rang gi mtshan nyid kyis grub pa'i ngar 'dzin pa ni rjes su 'jug pa de las dge ba dang mi dge ba'i las gsog la/ de las skye ba bzang po dang ngan par 'gyur ro/ /gnyis pa ni/ bdag 'dzin gyi dbang gis 'khor bar 'khor ba de'i phyir/ ji srid ngar 'dzin pa sel ba'i chos ni mi shes pa de srid sbyin pa dang tshul khrims dang bzod pa'i chos kyis bsdus pa'i mngon mtho'i chos bcu drug la gus pa mdzod ces gdams pa'o/ /gnyis pa la gsum/ mngon mtho'i rgyu sgrub pa dang/ ngan 'gro'i rgyu spang ba dang/ chos min spangs nas chos sgrub pa'i don bsdu ba'o/ /dang po la gnyis/ mngon mtho'i rgyu la bslab pa spyir bstan pa dang/ rgyu khyad par can la bslab pa'o/ /dang po la gsum/ phan yon lnga ldan gyi rgyu la bslab pa dang/ spyir dam pa'i lugs la bslab @029a @#/ /pa dang/ dam pa ma yin pa'i lugs spang ba'o/ /dang po ni/ lus dang ngag dang yid kyi las rnams byed pa'i sngon du bsam pa dge ba'i chos btang zhing bar du yang chos dang ldan pa dang/ tha mar yang chos ldan du sgrub pa'i sa bdag ni tshe 'di dang gzhan du gnod par mi 'gyur te/ chos kyis 'jig rten 'dir grags pa snyan pa dang/ sdig pa ma byas pas 'gyod pa med pa'i phyir yid bde ba dang/ mi min gyi 'tshe ba med pas 'dir 'jigs pa med pa dang 'chi gar ngan 'gro'i 'jigs pa med pa dang/ 'jig rten gzhan du bde 'gro'i bde ba rgyas pa'o/ /phan yon lnga yod pa de bas rtag tu chos bsten mdzod ces gdams so/ /gnyis pa ni/ mngon mtho'i chos ni rgyal po rnams kyi'ang lugs kyi dam pa ste chos kyis 'jig rten dbang du bsdus nas 'jig rten pa dga' bar 'gyur la 'jig rten dga' bar gyur pas kyang rang dang gzhan tshe 'di dang gzhan la bslus par mi 'gyur bas lugs dam pa la brten par bya'o/ /gsum pa la gsum/ lugs kyi bstan bcos ngan pa la brten par mi rigs pa dang/ de la smad pa dang/ chos kyi lugs khyad par du 'phags pa'o/ /dang po ni/ rgyal po'i lugs ngan pa dang 'tshe ba chos su smra ba sogs chos min pas ni lugs kyi bstan bcos ngan pa 'dod pa gang yin pa de yis 'jig rten mi dga' bar 'gyur la/ 'jig rten ma dga' ba nyid kyi phyir/ 'di dang gzhan du mi dga' bar 'gyur bas/ lugs ngan pa spang bar bya'o/ /gnyis pa ni/ skyes @029b bu'i 'dod don sgrub byed du med pa'i lugs ngan pa rig pa'i rjes su zhugs pas ngan 'gro'i lam 'byed pa kho nar zad pas gzhan bslu ba lhur len pa ngan 'gro mi bzad pa skyed pa shes rab 'chal ba rnams kyis ni ji ltar skyes bu'i don gyi rig pa byas te/ skyes bu la gnod pa'i phyin ci log 'ga' zhig byas pa'i phyir ro/ /lugs ngan pa'i rjes su 'brang ba'i rgyal po'i lugs ni/ pha rol bslu ba lhur len pa 'ba' zhig tu zad pas skyes bu'i don du ji ltar lugs dang ldan pa yin te min par thal/ lugs ngan pa des ni tshe rabs stong phrag tu bdag nyid kho na bslus par 'gyur ba'i phyir ro/ /gsum pa ni/ gal te dgra la gnod pa byas na yang skyon rnams btang ste yon tan bsten zhig/ des ni khyod kyi bya bas rang la phan pa thob la/ chos byas pa la gzhan 'dun pas dgra bo yang ni mi dga' bar 'gyur med kyi rang la kha na mtho ba cung zad kyang med do/ /gnyis pa mngon mtho'i rgyu khyad par can la bslab pa la gsum/ bsdu ba bzhi la bslab pa dang/ bden pa smra ba sogs bzhi la bslab pa dang/ dge ba 'phel ba'i rgyu grogs khyad par can la bsten pa'o/ /dang po ni/ sbyin pa gsum la sogs pa'i sbyin pas 'khor du bsdu ba dang/ de la mngon mtho nges legs la brtsams pa'i gtam snyan par smra ba dang/ don spyod pa gzhan la phan don nyams su len tu 'jug pa dang/ don gcig spyod pas te gzhan bkod pa ltar rang nyid nyams su len pa ste/ don mthun no/ /tshig 'di ltar na/ phyi ma gnyis go bsnor ba ltar ro/ /bsdu ba bzhi @030a @#/ /po de dag rnams kyis gnas skabs 'jig rten dang phugs kyis chos kyang bsdu ba nyid du mdzod cig ces gdams so/ /gnyis pa la gnyis/ so sor bstan pa dang/ bsdus te bstan pa'o/ /dang po la bzhi/ bden pa dang/ gtong ba dang/ nye bar zhi ba dang/ shes rab bzang po la bslab pa'o/ /dang po ni/ bden pa 'ba' zhig smra ba la 'bad par byas te/ rgyal po dag la nyes pa gzhan mang po yod kyang ji lta bur bden pa smra ba gcig pu yod na skye ba 'di nyid la yang khas blangs par yid brtan pa'i gnas so zhes yid ches brten pa skyed pa'i 'bras bu dang ldan pa dang/ de bzhin du de la rdzun smra ba ni yid mi ches par byed pa'i mchog yin pa'i phyir ro/ /gzhan bslu ba med pa dang ldan pa'i tshig smra ba ni bden pa smra ba ste/ sems pas don dang mi ldan pa'i 'du shes bsgyur ba don du rdzun min pa min no/ /gzhan la gcig tu phan pa bden pa smra ba yin la/ mi phan pa'i phyir na cig shos don la gnas pa ltar snang yang bden pa smra ba min pas/ gzhan la phan pa'i tshig 'ba' zhig smra bar bya'o/ /gnyis pa ni/ ji ltar rgyal po'i nyes pa mang po dag yod kyang/ gtong bod che ba'i sbyin pa chos gsal ba zhig gis mi mngon par byed cing/ sbed pa ltar de bzhin 'jungs pa'ang skyon des de dag gi yon tan bdog pa thams cad 'joms pas/ ser sna spangs nas sbyin pa la 'bad par bya'o/ /gsum pa ni/ rgod bag sogs spangs nas dbang po yang dag par bsdams pa'i nye bar zhi ba dang/ bsam @030b pa dpag par dka' bas zab pa'i phyir gzhan mchog tu gus pa byed par 'gyur la/ gus pas bsnyen par dka' bas gzi brjod dang ldan la/ dka' yang brtson pa de bas nye bar zhi ba bsten zhig pa'o/ /bzhi pa ni/ blang dor 'byed pa'i shes rab dang ldan pas gzhan gyis blo mi 'phrogs pa dang/ gzhan gyi dring la mi 'jog cing bsam pa brtan pa dang/ sdig pa'i grogs pos bslubs mi tshugs pas de'i 'bras bus rgyal po ste de bas shes rab lhur blang bar mdzod cig ces gdams so/ /gnyis pa ni/ bden pa dang gtong pa dang/ nye bar zhi ba dang shes rab dang chos bzhi po bzang zhing brgyan pa'i mi dbang ni chos bzang po rnam pa bzhi lta bur lha mi rnams kyis bstod par 'gyur bas chos bzhi dang ldan par mdzod cig ces gdams pa'o/ /gsum pa la gsum/ grogs khyad par can gyi mtshan nyid dang/ de'i rjes su 'jug par rigs pa dang/ 'chi ba mi rtag pa rgyun du sgom pa'o/ /dang po ni/ chos 'phel ba'i rgyu grogs mtshan nyid bzhi ldan dang 'grogs par bya ste/ de yang rgyal po la ngor dga' dor nas legs pa 'ba' zhig smra bas phabs par smra zhing 'dod pa chung zhing chog shes la bsam pa dag par 'gyur ba dang/ chos dang 'jig rten gyi bya ba la mkhas pa'i shes rab dang ldan pa dang/ khro ba shas chung zhing gzhan la phan bde 'dod pa'i snying rjes brgyan pa bzhi po'i mi mthun phyogs kyi dri ma med pa dang lhan cig 'grogs na rtag tu yang shes rab dang ni chos kyang 'phel bar 'gyur ro/ /gnyis pa ni/ mi snyan yang phan par smra ba'i ngag la mnyan par bya ste/ gzhan la phan par smra ba dkon pa ste de la nyan par byed pa de bas @031a @#/ /kyang shin tu dkon la gnyis po de dgongs kyang mi snyan yang phan par shes nas/ phan pa'i rjes su byed pa dkon pa de lta bas na rgyal po byed kyis gzhan gyi ngag mi snyan yang phan par mkhyen nas de'i don myur du dbyad cing nyams su blang bar mdzod cig /dper na/ nad gso ba'i don du bdag la byams pa gzhan gyis byin pa'i mi bzod pa'i dring ba'i sman yang 'thung ba bzhin no/ /gsum pa ni/ srog dang nad med pa ni rtag tu dgra sdang ba du mas bskor zhing 'joms byed mang bas rang dang rgyal srid dag mi rtag pa nyid du shes par byas nas dus rtag tu dgongs te 'chi ba rjes dran yang dang yang du bsams pa de las yang dag pa'i brtson 'grus dang ldan par chos las gcig tu nan tan mdzod cig ces gdams so/ /gnyis pa ngan 'gro'i rgyu spang ba la gnyis/ mdor bstan pa dang/ rgyas par bshad pa'o/ /dang po ni/ gdon mi za bar 'chi bar 'gyur zhing shi nas sdig pas bde 'gror rdzogs byed dang/ ngan 'gror 'phen byed dang/ rdzogs byed gnyi ga'i sgo nas sdug bsngal ba gzigs te 'phral du bde ba ltar snang na yang sdig pa bgyi bar mi rigs so/ /bden pa po'i le'u las/ rgyal po khyod ni srog gcod ma mdzad cig /skye bo kun la srog ni shin tu phangs/ /de bas yun ring tshe bsrings su 'dod pas/ /yid kyis dgu la'ang srog gcod mi bsam mo/ /zhes sogs gsungs pa ltar ro/ /shugs la 'phral du cung zad sdug kyang phugs su phan pa'i dge ba bya bar bstan to/ /bya ba 'ga' zhig byas pas la lar te tshe 'dir 'jigs pa med par mthong zhing phyi ma'i dus 'gar 'jigs pa mthong bar 'gyur ba yin na/ gal te @031b gcig la ste 'jigs pa ma mthong ba la spyod yid brten na 'jigs pa mthong na gcig la khyod ko ste khyod ni cis mi 'jigs te 'jigs par rigs so/ /gnyis pa la bzhi/ chang la chags pa dgag /rgyan po la dgag pa dang/ bud med la chags pa dang/ lings dgag pa'o/ /dang po ni/ chang gis 'jig rten 'dir dang po 'thung ba'i dus rang nas gzhan gyis brnyas par 'gyur zhing dgos pa'i don yal ba dang/ nor yang zad par 'gyur ba dang/ bag med pa'i rmongs pas bya ba min pa byed pas 'di phyi'i nyes dmigs bzhi yod pa de bas chang ni rtag tu spongs shig /gnyis pa ni/ rgyan po 'gyed pa la dga' ba la nyes dmigs dgu yod pa de bas rtag tu rgyan po spang bar mdzod cig /nyes dmigs dgu gang zhe na/ gzhan gyi nor la chags pa dang/ rgyan byed pa'i dus na thob bam mi thob snyam du yid mi bde bas mi dga' ba dang zhe sdang dang/ g.yo sgyu dang/ rgod pa'i gnas dang/ rdzun dang rgyal ba dang/ tshig tsub smra ba'i rgyu dgu gsungs so/ /gsum pa la gsum/ bud med kyi lus gtsang ba spyir dgag pa dang/ so sor dgag pa dang/ mi gtsang bsgoms pa'i 'bras bu'o/ /dang po ni/ bud med la chags pa ni mi gtsang bzhin du gzugs gtsang ba sems pa las byung ba yin gyi/ bud med kyi lus la don du mi gtsang ba cung zad kyang yod pa ma yin pas chags par mi rigs so/ /gnyis pa la gsum/ bud med kyi yan lag mdzes pa dgag pa dang/ lus yan lag can mdzes pa dgag pa dang/ bud med la chags pa bde ba'i rgyu yin pa dgag pa'o/ /dang po la bzhi/ mi gtsang ba'i rang bzhin 'ga' zhig yin pas @032a @#/ /chags par mi rigs pa dang/ de'i dpe dang/ bud med la chags na chags bral gyi gnas med par 'gyur ba dang/ mi gtsang yang blun phos dga' ba'i rgyur btags pa'o/ /dang po ni/ kha ni kha chu rul ba dang so skyag mi gtsang ba'i snod yin te chags par mi rigs so/ /sna ni rnag dang bsnabs dang sna chu'i snod yin la/ mig ni mig rgyu mig gi dri ma dang/ mchi ma'i snod lto'i khong ni bshad gci dang glo ba dang mchin pa'i snod yin par rmongs pas bud med mi gtsang bar ma mthong bas de'i lus la chags par byed par zad do/ /gnyis pa ni/ mi shes pa 'ga' zhig mi gtsang bas gang ba'i bum pa phyi rol rin po che la sogs pa'i rgyan gyis spras pa la chags pa ltar 'jig rten pa bud med kyi rang bzhin mi shes pa rmongs pa yis bud med rnams la chags pa'ang de bzhin no/ /gsum pa ni/ lus kyi yul shin tu dri nga ba chags bral gyi rgyu ni mthar thug pa gang yin pa de la'ang 'jig rten ches chags na yul gang la thabs gang gis 'dod chags dang bral bar bkri chags pa dang bral ba'i gnas med par 'gyur bas so/ /bzhi pa ni/ ji ltar te dper na/ bshad gci bcer ba la chags pa dang/ ngan skyugs dag la phag rab tu chags pa ltar de bzhin du bshad gci bcer ba la 'dod ldan ngan skyugs la chags pa'i phag dang 'dra ba'i skyes ba rnams bud med la rab tu chags pa lus kyi nang srin bu'i grong khyer mi gtsang ba 'byung ba'i bu ga dod pa gang yin pa bud med de ni skye bo blun po yis dga' ba'i rgyu'i don @032b du nye bar brtags nas blo phyin ci log gis bud med la chags par zad do/ /gnyis pa la bzhi/ bud med kyi lus la chags pa spyir dgag pa dang/ kha dog dang dbyibs la chags pa dgag pa dang/ des na bud med kyi lus la chags par mi rigs pa dang/ bud med la bstod pa'i gang zag smad pa'o/ /dang po ni/ khyod bdag nyid kyis bud med kyi bshad gci sogs so sor mi gtsang bar mthong nas ni mi gtsang ba de 'dus pa'i lus la ji lta bur yid du 'ong ba nyid du 'gyur/ rgyu dang ngo bo dman pa ni khrag dang khu ba 'dres pa'i sa bon mi gtsang ba'i snying pos skyed pa mi gtsang ba'i gzugs su shes bzhin du 'di la 'dod pa dang ldan pa gang gis chags mi gtsang ba'i phung po mi gtsang ba de'i rlan gyis brlan pa'i pags pas g.yogs par gang nyal ba de ni bud med dang lto ba sprad de nyal bar zad pas bud med dang nyal ba ni mi gtsang ba dang lto ba sprad de nyal ba'o/ /gnyis pa la gsum/ bud med kyi kha dog dang dbyibs la chags pa spyir dgag pa dang/ gzugs mdzes pa la chags pa dgag pa dang/ bud med kyi lus dang 'dra bar rang gi lus kyang mi gtsang bar bsam pa'o/ /dang po ni/ bud med gzugs bzang ba dang gzugs ngan nam rgan nam yang na gzhon yang rung bud med kyi gzugs kun mi gtsang na khyod chags pa khyad par gang la skye ste/ chags pa'i gzhi med pa'i phyir ro/ /gnyis pa la gnyis/ chags par mi rigs pa dang/ smad par rigs pa'o/ /dang po ni/ gal te mi gtsang ba'i gong bu kha dog bzang zhing shin tu gsar la dbyibs legs kyang de la chags par mi 'os pa ltar bud med kyi gzugs @033a @#/ /la'ang dpe ste dus rtag tu de bzhin du chags par mi 'os so/ /khong rul pa phyi rol pags pas g.yogs pa ro myangs 'di yi rang bzhin ni mi gtsang ba shin tu mi bzad par snang bzhin du ji lta bur na mthong bar ma gyur pags pa 'di yang mi gtsang ste ral ga bzhin du lags na/ 'dug pa min gyis mi gtsang ba'i rang bzhin du gnas pa'i phyir ro/ /phyir dor ba'i mi gtsang ba'i phung po'i pags pa ltar ji lta bur na gtsang mar 'gyur te mi gtsang ba bzhin no/ /gnyis pa ni/ mi gtsang bas gang ba'i bum pa ni phyi rol bkra yang smad par bya ba yin pa ltar mi gtsang ba'i rang bzhin gyi lus mi gtsang bas gang ba cis mi smad smad par rigs kyi chags par mi rigs so/ /gal te khyod ni phyir dor ba'i mi gtsang ba la smod pa dang/ dri dang phreng ba dang bza' btung ni gtsang ma'ang mi gtsang bar byed pa gang yin pa'i lus ni ci'i phyir mi smad smad par rigs kyi bstod par mi rigs so/ /gsum pa ni/ ji ltar rang gzhan dag gi phyi rol gyi mi gtsang ba smad par bya ba ltar de bzhin du rang dang gzhan dag gi mi gtsang ba gzugs ko ste gzugs ni cis mi smad khyad par cung zad kyang med pa'i phyir ro/ /gsum pa ni/ lus mi gtsang ba yin pa de bas na phyi dang nang gi nyid la ste gzhan dang rang gi lus la 'dod chags dang 'bral bar rigs pa min nam rma dgu dag nas 'dzag pa can gyi mi gtsang ba bdag nyid kyis nyin re bzhin du mngon sum du 'khru bar byed kyang lus mi gtsang bar mi rtogs na rgyal po khyod la mi sdug pa sgom pa'i thabs bshad pas ci zhig phan zhes mi gtsang bar mi rtogs par mi rigs zhes gdams pa'o/ / @033b bzhi pa ni/ gang ngag mi gtsang ba'i bud med kyi lus 'di la chags nas rtogs/ chos kyis bstod pa'i snyan dngags pad-ma dang zla ba dang ud-pal la sogs dang 'dra ba'i tshig sbyor byed pa ni e ma'o gzu lums ni ngo tsha med pa dang/ e ma'o blun pa ni mi shes pas kun nas bslang ba'o/ /e ma'o mkhas pa'i skye bos khrol du rung la mi shes mun pas sgribs pa'i sems can 'di ni phal cher yang bud med la chags pa'i 'dod pa'i don du slob dpon dang/ slob ma dang/ mdza' shes sogs dang rtsod pa 'byung ba ni mi gtsang ba'i don du khyi rnams rtsod pa bzhin no/ /gsum pa bud med la chags pa bde ba'i rgyu yin pa dgag pa ni/ mdza'? can g.yan pa phrugs na cung zad phan pa'i bde bar 'gyur ba ltar snang yang phrugs pa'i bde ba de bas g.yan pa med na bde ba de bzhin du 'jig rten yul la la don gnyer gyi 'dod pa dang ldan pa 'dod pa la longs spyod pas bde ba ltar snang yang 'dod pa med pa de bas kyang bde bas 'dod pa la chags pa dang bral ba la 'bad par bya'o/ /gsum pa mi gtsang ba sgoms pa'i 'bras bu ni/ gal te de ltar lus mi gtsang ba'i rang bzhin brtags na khyod thog ma nas 'dod chags dang bral ba ma grub kyang 'on kyang je chung je chung du song nas 'dod chags srabs pa yis bud med la chags par mi 'gyur ro/ /bzhi pa lings dgag pa la gsum/ srog gcod spang ba dang/ gzhan la skrag pa skyed pa dang spang ba dang/ dga' ba skyed pa bsten pa'o/ / dang po ni/ rang nyid tshe rabs gzhan du srog gcod kyi rgyu mthun dang rnam smin gyi 'bras bu tshe thung ba dang/ 'jigs pa med pa dang sdug bsngal che ba dang/ dmyal ba'i rgyu ni mi zad pa ri dwags la lings yin te de lta bas na rtag tu gsod med brten par mdzad @034a @#/ /cig /gnyis pa ni/ yan lag thams cad mi gtsang bas bskus pa'i sprul gdug pa kha nas kyang dug 'dzag pa gzhan la gnod pa dang/ 'tshe ba ltar gang zag gang la brten nas lus can skrag par 'gyur ba der ngan pa yin pas rnam pa thams cad du spang bar bya'o/ /gsum pa ni/ char sprin chen po langs pa na zhing pa rnams ni dga' ba skye ba ji lta bar rgyal po la sogs pa gang la brten nas lus can rnams dga' bar 'gyur ba der spyod pa bzang po chos kyi spyod pa yan pas rnam pa thams cad du bsten par bya'o/ /gsum pa chos min spangs nas chos sgrub pa'i don bsdu ba ni/ sngar mang du bshad pa de bas na rang gzhan la gnod pa'i chos min spang bar bya ste dus rtag tu g.yol ba med par rang gzhan la phan pa'i chos bsten par mdzod cig ces blang dor gyi gnas mdor bsdus nas gdams pa'o/ /gsum pa yang nges legs rgyu 'bras bshad pa la bzhi/ bla na med pa'i byang chub kyi rgyu'i gtso bo gsum du bsdus nas de la bslab pa dang/ sangs rgyas kyi mtshan so gnyis 'grub pa'i rgyu la bslab pa dang/ dpe byad kyi rgyu 'bras 'dir rgyas par ma smos pa'i rgyu mtshan dang/ sangs rgyas dang 'khor los bsgyur ba'i rgyal po'i mtshan dpe'i khyad par ro/ /dang po ni/ rgyal po bdag nyid dang ni 'jig rten 'khor bar gnas pa'i sems can 'dis bla na med pa'i byang chub thob 'dod na bla na med pa'i byang chub de'i rtsa ba sems can thams cad kyi don du bla na med pa'i byang chub thob par 'dod pa'i kun rdzob pa'i byang chub kyi sems rkyen bzhi dang/ rgyu bzhi dang/ stobs bzhis sgrub pa'i ri dbang rgyal @034b po ltar brtan pa dang de'i rgyu'i gtso bo phyogs mthas gtugs pa'i sems can la dmigs nas sdug bsngal dang bral 'dod kyi snying rje dang/ mtha' gnyis la mi brten pa mtha' bral rtogs pa'i ye shes lags pas rgyu'i gtso bo gsum la bslab par bya'o/ / slob dpon zla ba grags pas/ dbu ma la 'jug pa las rgyas par gtan la phab cing/ tshig gsal du/ de la zhal 'phangs nas bsdus te bstan pa ni/ dgos 'brel gyi thad du/ dbu ma la 'jug pa las bstan pa'i tshul gyis sems pa skyed pa dang po gnyis su med pa'i ye shes kyis brgyan pa/ snying rje chen po sngon du 'gro ba/ /de bzhin gshegs pa'i ye shes 'byung ba'i rgyur gyur pa thog mar mdzad nas/ mthar shes rab kyi pha rol tu phyin pa'i tshul phyin ci ma log pa thugs su chud par gyur pa/ slob dpon klu sgrub kyis gzhan khong du chud par bya ba'i phyir snying rjes bstan bcos mdzad ces mgon po klu sgrub kyi thog ma tshogs sbyor gyi skabs su rgyu gsum thugs su chud pa mdzad nas/ mthar sa dang po'i tshe/ shes rab kyi pha rol tu phyin pa'i tshul stong pa nyid kyi don mngon sum du rtogs par gsungs pa ltar/ bla na med pa'i byang chub kyi rgyu'i gtso bo bsdus nas bstan pa'o/ /'di dag thog mar rgyud la skyed pa dang/ skyes nas nyams su len pa'i tshul la rnams ni rgyas par shes 'dod na/ rje rin po che nyid kyis mdzad pa'i spyod pa spyi la bslab pa dang/ phar phyin tha ma gnyis la bslab pa las shes par bya'o/ /gnyis pa la gnyis/ nyan par skul ba dang/ bshad pa dngos so/ /dang po ni/ rgyal po chen po zhes bos nas skyes bu @035a @#/ /chen po nyid kyi mtshan sum cu rtsa gnyis kyis ji ltar khyod kyi sku brgyan par 'gyur ba mtshan gyi rgyu dang/ 'bras bu mtshan dang/ rgyu 'bras kyi 'brel pa de dag lta bu gsan par mdzod cig ces gdams so/ /gnyis pa ni/ sku gdung gi snying po can dang/ sangs rgyas kyis byin gyis brlabs pa dang/ dkar po'i chos rnams bsags phyir dang/ /sdig pa'i las rnams spangs pa'i phyir/ /sangs rgyas bcom ldan 'das nyid la/ /mchod rten zhes kyang mngon par brjod/ ces 'byung ba ltar sangs rgyas dngos la gsungs pa'i mchod rten dang/ gzhan yang mchod bya pha ma dang mkhan po dang/ slob dpon dang nad pa sogs dang 'phags pa'i dge 'dun dang/ rgan rabs rnams ni legs par bkur bas gzhan gyis zil gyis mi non pa'i gzi brjid kyi dpal dang ldan pa phyag zhabs kyi mthil rtsibs stong lte ba mu khyud rdzogs pa'i 'khor lo yi/ /rtags kyis mtshan pa'i 'khor los bsgyur bar 'gyur la/ rgyal po khyed kyis chos la rtag par ni ji ltar khas blangs pa'i yi dam yang dag par blang ba brtan par mdzod cig /des ni rkang mthil sa la mnyam par 'bag pas shin tu zhabs gnas pa'i byang chub sems dpar 'gyur ba lags pas de la bslab par bya'o/ /sbyin pa dang snyan pa'i tshig dang ni phan pa dang don gcig spyod pa yis sdu ba bzhis dpal ldan phyag sor dang ba'i rgyal po ltar dra ba yis 'grel pa'i phyag ris can du 'gyur ba dang/ gzhan las bza' ba dang ni btud pa mchog rab tu mang po byin pa yis dpal @035b ldan phyag dang zhabs gnyen zhing 'jam la gzhon sha che ba dang/ sku che zhing phyag zhabs kyi rgyab bzhi dang phrag pa'i phyogs thal gong gnyis dang/ ltag pa'i phyogs bdun yang shas khengs pas mtho bar 'gyur ba dang/ gzhan la 'tshe ba med pa dang/ bsad par 'dod pa thar bar bya bas/ lta na sdug pa'i sku mdzes pa dang/ ya yo med pas drang zhing che ba dang tshe rang ba dang/ sor mo ring ba dang/ zhabs kyi bzhi cha phyir 'phags pas rting pa yangs pa dag tu 'gyur ba dang/ yang dag par blangs pa'i chos kyi tshig don rnams spel bas dpal ldan mdog bzang zhing zhabs kyi long bu mi mngon pa dang ba spu gyen du re re nas g.yas su phyogs par mtshan par 'gyur ba dang/ shes bya'i gnas rig pa dang bzo la sogs pa'i las rang gus slob pa'i dus su gus par len pa dang/ gzhan la yang de ltar sbyin pas khyod byin gyis phra zhing rims kyis bzhol bas ri dwags e n+ya ya'i byin pa dang/ dran pa bzang bas yid rno ba dang/ rnam dpyod kyi shes rab chen por 'gyur ba dang/ rang gi nor bdog pa gzhan gyis bslangs par gyur na myur du btang ba'i yi dam bcas pa'i/ brtul zhugs kyis phyag rgyas shing ring ba dang/ sku'i zo mdog bde ba dang/ 'jig rten gyi rnam par 'dren pa nyid du 'gyur ba dang/ gnyen bshes phan tshun bya ba dag yang dag par sdums pa byas pa yis glang po che dang rta cang shes ltar dpal ldan 'doms kyi sba ba ni sgrubs su nub pa'i dam par 'gyur ba dang/ khang bzang dang ni gting? bdag bde zhing bzang rab tu phyin pas gser ni btsom dri ma med pa byi dor legs par byas pa shin tu @036a @#/ /'jam pa'i 'dog 'dra bar 'gyur ba dang/ rgyal srid la sogs pa'i bla na med pa'i dbang byin zhing/ rigs par bla ma'i bka' bzhin du rjes su 'jug pas dpal ldan pa spu'i khung bu re re nas gnyis la sogs par mi skye bar ba spu nyag re dang/ zhal gyi slin mtshams mdzod pus brgyan par 'gyur ba dang/ thos pa'i dus su snyan zhing bsams pa'i dus dga' ba smras pa dang/ gzhan gyis legs par smras pa dang mthun par byas pas khyod ni dpung mgo zlum pa dang/ ro stod rgyas shing 'phel ga che ba seng-ge 'dra bar 'gyur ba dang/ nad pa rnams la rim gro dang nad g.yog la sogs pa byas te/ gsos pas dbung mgo phan tshun gyi bar shas khengs pa thal gong rgyas pa dang/ 'phral 'khrul med par brtan pas bdag nyid rnal du gnas pa dang nad pa la sman byin pas zas ro bro ba'i mchog tu 'gyur ba dang/ chos dang mthun pa'i bya ba la thogs drangs zhing gtso bo byas pas khyod kyi gtsug tor legs par gnas pa dang/ sku shing n+ya gro ta ltar 'dom dang yan man du mnyam pas chu zheng gab pa dag tu 'gyur ba dang/ gzhan la tshig bden la 'jam pa dag yun ring po'i dus su brjod pa yis mi'i dbang po khyed kyi/ ljags yangs shing gsung tshangs pa yi ni dbyangs dang ldan par 'gyur ba dang/ ji skad bshad pa'i bden pa'i tshig mkhyen par bgyis nas yun ring po'i dus su brjod pa yis 'gram pa seng-ge'i lta bu dang/ dpal ldan gzhan gyis thub par dka' bar 'gyur ba dang/ sems can gzhan la lhag par gus pa dang/ bkur sti dag gang la gang 'os @036b pa ji ltar rigs pas rjes su 'jug pas tshegs ni shin tu dkar ba dang/ spa bas mdog ldan dang mtho dman med pas mnyam pa'i tshems su 'gyur ba dang/ tshig bden pa dang phra ma med pa'i tshig ni yun ring po goms pa yis dpal ldan tshems ni bla 'og nyi shu nyi shu yod pas bzhi bcu tham pa dang/ tshems kyi bar ma ded pas mnyam par thags kyang bzang bar 'gyur ba dang/ chags pa dang sdang ba dang rmongs pa med cing bde ba dang ldan 'dod kyi byams par sems can la bltas pa yis spyan ni 'od dang ldan pa'i bkrag can dang/ mthon mthing la brdzi ma gang cing ma 'des la gzhol bas brdzi ma pa'i lta bur 'gyur ro/ /don bsdu ba ni/ de ltar mdor na mtshan gyi rgyur bcas pa'i sum cu rtsa gnyis po de dag ni skyes bu seng ge chen po'i mtshan rnams legs par mkhyen par mdzod/ de'i rgyu sgrub pa la gus par bya la rgyu sgrub pa'i tshe yang rgyu 'bras kyi 'brel pa dang/ 'bras bu'i khyad par la smon lam dri ma med pas mtshams sbyar bar bya ba yin no/ /gsum pa ni/ dpe byad bzang po brgyad cu ni thun mong gi rgyu sems can bde ba dang ldan 'dod kyi byams pa'i rgyu mthun las byung ba yin la/ so sor nges pa'i rgyu gzhung ni mangs dogs pa yis rgyal po khyod la rgyas par ma bshad do/ /thun mong gi rgyu la 'bad par mdzod cig ces don gyis bstan to/ /bzhi pa la gsum/ 'bras bu'i khyad par dang/ rgyu'i khyad par dang/ dpe bshad pa'o/ /dang po ni/ sangs rgyas dang 'khor los bsgyur ba'i mtshan dang dpe byad la khyad par ci yod ce na/ 'khor los bsgyur ba thams cad la mtshan dpe 'di dag 'o la spyi tsam yod par 'dod mod gyi @037a @#/ /sangs rgyas rnams kyi dang khyad par shin tu che ste/ mi mthun phyogs kyi dri ma med pas dag pa dang yid du 'ong bas mdzas pa dang sgrib byed med cing cha thams cad kyis thams cad du yongs su rdzogs pas gsal ba ni sangs rgyas rnams kyi char yang mi phod do/ /gnyis pa ni/ de gnyis kyi rgyu ches khyad par zhugs pa yin te/ 'khor los bsgyur ba'i mtshan dang ni dpe byad bzang po gang dag cig yod pa de dag thub pa'i dbang po la sems dang ba'i rgyu'i yan lag gcig las kyang byung bar bshad pa yin la/ 'khor bsgyur gyi mtshan dpe rdzogs pa'i rgyu de dag bskal pa bye ba brgya phrag ni gcig tu bsags pa'i dge bas kyang sangs rgyas kyi ba spu'i khung bu gcig kyang rdzogs par skyed par nus pa min no/ /gsum pa ni/ nyi ma rnams kyis 'jig rten na nyin mor byed pa'i 'od byed pa dang/ srin bu me khyer rnams dang bag tsam 'dra ba ltar sangs rgyas rnams kyi mtshan yang ni 'khor los bsgyur ba rnams dang 'dra ba ni dpe de ltar ro/ /le'u'i mtshan ni/ /rgyal po la gtam bya ba rin po che'i 'phreng ba las/ mngon mtho nges legs rgyu 'bras spel mar bstan pa zhes bya ba ste le'u gnyis pa'i 'grel pa'o// //gnyis pa bla na med pa'i byang chub kyi rgyu tshogs gnyis la bslab par gdams pa la drug /tshogs su 'gyur ba'i tshul dang/ 'bras bu gang gi tshogs yin pa dang/ tshogs gnyis gsog pa la skyid lug mi bya bar gdams pa dang/ tshogs gnyis kyi ngo bo dang/ tshogs gnyis kyi yan lag dang/ tshogs gsog pa la @037b phan yon 'byung ba'i tshul lo/ /dang po la bzhi/ rgyal po la nyan par skul ba dang/ bsod nams kyi tshogs mtha' yas pa'i tshul dang/ ye shes kyi tshogs mtha' yas pa'i tshul dang/ de gnyis kyi 'bras bu mtha' yas pa'o/ /dang po ni/ rgyu'i gtso bo'i dbang du byas nas gsum du bshad kyi/ bla na med pa'i byang chub kyi rgyu mtha' dag tshogs gnyis su 'dus pas 'dir de 'chad pa'o/ /lus ngag gi las de lta bu dang ldan na/ sangs rgyas kyi go 'phang thob nas mtshan de lta bu can du 'gyur ro zhes bshad kyi/ bsod nams ji tsam gyis de dag tu 'gyur bar ni ma bshad pas/ de 'chad pa ni/ /bsod nams bsam gyis mi khyab pa las ji ltar sangs rgyas kyi mtshan 'byung ba sngar ma bshad pas rgyal po chen po zhes pos nas gson zhig ces bskul ba'o/ /de yang theg pa chen po'i lung chen po las gsung pa de bzhin du bshad par bya'o/ /gnyis pa la gnyis/ dngos dang/ tshad med kyang gdul bya'i sems ngor tshad dang ldan par bstan pa'o/ /dang po la lnga/ rang rgyal sogs kyi bsod nams bcur bsgyur ba'i tshod kyis thub pa'i ba spu'i bu ga gcig 'grub pa dang/ ba spu'i bu ga thams cad 'grub pa'i bsod nams brgya 'gyur gyis dpe byad gcig 'grub pa dang/ dpe byad thams cad skyed pa'i bsod nams brgya 'gyur gyis mtshan gcig 'gyur ba dang/ mtshan thams cad skyed pa'i bsod nams stong 'gyur gyis mdzod spu 'grub pa dang/ de skyed pa'i bsod nams stong phrag brgyar bsgyur bas gtsug tor 'grub pa'o/ /dang po ni/ 'jig rten khams kun na bzhugs pa'i rang sangs rgyas kun rgyu gang las byung ba @038a @#/ /dang/ theg pa dman pa'i 'phags pa slob pa bdun dang mi slob pa rgyu gang las byung ba dang 'jig rten pa ma lus kun gyi bde 'gro skyed pa'i bsod nams 'jig rten dpag tu med pa bzhin du dpag med gang yin pa de bcur sgres par gyur pa yis/ sangs rgyas kyi ba spu'i bu ga gcig 'grub ste sangs rgyas kyi ba spu'i bu ga ni thams cad bsod nams de dang 'dra bas 'byung bas so/ /gnyis pa ni/ ba spu'i bu ga thams cad ni skyed par byed pa'i bsod nams gang yin pa de dag brgyar ni bsgyur ba yis dpe byad bzang po gcig tu bzhed la/ bsod nams de snyed de snyed kyi rgyal po zhes pos nas/ dpe byad bzang po ni ci'i mthar phyin te ji lta bur dpe byad brgyad cu'i bar du 'byung bar 'gyur ro/ /gsum pa ni/ dpe byad bzang po brgyad cu'i dag 'grub pa'i bsod nams kyi tshogs gang yin pa de dag brgya ni bsgyur ba yis skyes bu chen po'i mtshan gcig go /bzhi pa ni/ mtshan sum cu rtsa gnyis 'grub pa'i rgyu bsod nams rgya chen po gang yin pa de dag stong du bsgyur ba yis zla ba nya 'dra'i mdzod spu'o/ /lnga pa ni/ mdzod spu 'grub pa'i ni bsod nams de dag stong phrag brgyar ni bsdoms pa yis spyi gtsug ltar ni mi snang ba skyob pa'i gtsug tor skyed par byed do/ /gnyis pa ni/ de ltar sangs rgyas kyi yon tan 'grub pa'i bsod nams tshad med kyang ji ltar 'jig rten pa'i bsod nams phyogs bcur sgres pa ma lus pa brjod pa ltar sangs rgyas kyi yon tan chad bzung bar mi nus kyang gdul bya'i bsam ngor gdul bya gzhug pa'i ched du tshad dang ldan par bag @038b tsam brjod pa'o/ /gsum pa ni/ gang gi tshe sangs rgyas kyi gzugs sku yi rgyu yang de ltar 'jig rten mtha' yas pa bzhin du gzhal du med pa de'i tshe chos sku'i rgyu lta la la zhig ci ltar gzhal du yod mtha' yas pa'i phyir ro/ /bzhi pa ni/ shing n+ya gro ta'i sa bon phra mo las/ sdong po yal 'dab rgyas pa'i grib ma la rgyal po dpung gi tshogs yan lag bzhi dang bcas pa shong zhing char yang skyob par byed pa skye ba bzhin du 'bras bu thams cad kyi ni rgyu chung ngu yang 'bras bu rgya chan po skyed par 'gyur na sangs rgyas kyi rgyu ni dpag med la 'bras bu dpag tu yod pa bsam thag bcad de/ 'di tsam zhig tu zad do zhes bsam par mi nus pa'i phyir ro/ /gnyis pa ni/ 'bras bu gang gi rgyu'i tshogs yin zhe na/ sangs rgyas rnams kyi gzugs kyi sku ni tshogs gnyis bshad pa 'di bsod nams kyi tshogs las 'byung ba ste chos kyi sku ni mdor bsdus na rgyal po zhes bos nas ye shes kyi tshogs las 'khrungs pa de lta bas na tshogs 'di gnyis 'bras bu sangs rgyas nyid ni 'thob pa'i rgyu yin pas sangs rgyas myur du thob par 'dod pas rgyu de lta bus 'grub par 'gyur bas/ mdor na bsod nams dang ye shes kyi tshogs 'di ni rtag tu bsten par mdzod cig ces gdams te/ tshigs bcad dang pos 'bras bu gang gi rgyu tshogs yin pa dang/ gnyis pas tshogs de gnyis bsten par gdams pa'o; ;rigs pa drug cu pa'i bsngo ba'i skabs su/ bstan bcos kyi lus mdor bsdus nas bstan pa ltar shes par bya ste/ phung po dang gang zag chos can/ rang bzhin gyis stong ste/ rten 'brel yin pa'i phyir/ ces pa'i sbyor ba skor gcig po de'i @039a @#/ /phyogs chos rtogs pa'i tshad ma de nyid yang dang yang du goms par byas zhing de'i gsal ba'i dbye ba rten 'brel rgyu 'bras mtha' yas pa'i mdor len phyin ci ma log pa lam gyi gnas skabs su goms par byas pa las bsod nams kyi tshogs su 'gyur zhing/ rtags de'i bsgrub bya rtogs pa'i tshad ma de'i 'bras bu ye shes kyi tshogs kyi thabs su 'gyur ba yin no/ /thabs kyi cha rgya chen po de dag gis brgyan nas bsgrub bya rtogs pa'i tshad ma de'i rgyun lam dus su goms par byas pa las/ ye shes kyi tshogs su 'gyur zhing tshogs de gnyis kyi 'bras bu gzugs sku dam pa dang/ chos sku dam pa gnyis su 'gyur ba yin no/ /gzhi lta ba gtan la 'bebs pa'i tshe bden pa gnyis tsha reg dang grang reg ltar ma song bar zung 'jug tu ma shes na lam gyi tshogs gnyis dang/ 'bras bu sku gnyis kyi rnam gzhag legs par mi shes pas bden pa gnyis kyi rnam dbye la mkhas par bya'o/ /kun rdzob rang lugs la tshad mas grub pa'i rnam gzhag legs par ma shes na gzugs sku gnyis sangs rgyas rang rgyud kyis ma bsdus pa'i gdul bya'i gzhan snang la bzhag dgos pa sogs grub mtha' ngan pa rnams 'byung ba yin no/ /'di dag rnam gzhag rgyas par theg pa chen po rgyud bla ma'i bstan bcos kyi rnam bshad na gtan la phab yod pas der lta bar bya'o/ /gsum pa la gsum/ mdor bstan pa dang/ rgyas par bshad pa dang/ don bsdu ba'o/ /dang po ni/ sangs rgyas bsgrub pa la tshogs mtha' yas pa de tsam bsag dgos na sus nus snyam du zhum par @039b mi bya ste/ bla na med pa'i byang chub sgrub pa'i bsod nams kyi tshogs ni gsog pa 'di la bgyid lug par mi bya'o/ /lus sems kyi sdug bsngal mtha' yas pa nyams su myong mi dgos par tshogs bde blad tu gsog nus pa'i rigs pa dang ni lung dpyad pa gsum gyis dag pa'i des pa brtan po skyed pa rdo rje gcod pa la sogs pa tshogs gsog pa'i gang zag dbugs 'byin par byed pa'i rgyu mtshan 'di yis tshogs gsog pa la brod pa chen po rnyed par 'gyur ba'i phyir ro/ /gnyis pa la gnyis/ bsod nams kyi tshogs la sgyid lugs mi bya bar gdams pa dang/ tshogs gnyis gsog pa la sgyid lug mi bya bar gdams pa'o/ /dang po la gsum/ byang chub tu sems bskyed pa'i bsod nams mtha' yas pa dang/ rgyu des sangs rgyas thob sla ba dang/ dpag med bzhi ldan gyi rgyu mtshan gyis sangs rgyas theb sla ba'o/ /dang po ni/ steng 'og la sogs pa'i phyogs rnams kun tu nam mkha' dang sa dang chu dang me dang rlung rnams ji ltar mtha' yas pa de bzhin du sdug bsngal can gyi sems can mtha' yas par 'dod la sems can mtha' yas pa de dag ni byang chub sems dpa' snying brtse bas kun nas bslang nas sdug bsngal dag las drangs par byas te sangs rgyas nyid la dgod par nges so/ /gnyis pa ni/ dam bcas pa'i byang chub sems dpa' de ltar sems bskyed brtan par gnas pa de ni mi nyal ba'am nyal yang rung dam bca' de nyid yang dag par blangs pa nas bzung ste/ dge ba la yid mi gtod pa'i bag med par 'gyur kyang sems can rnams mtha' yas pa'i phyir na sems can mtha' yas pa @040a @#/ /bzhin du bsod nams mtha' yas pa dus rtag par gsog par 'gyur bas rgyu mtha' yas pa des na sangs rgyas nyid mtha' yas pa 'thob mi dka' bar shes par bya'o/ /spyod 'jug las/ 'gro bar 'dod dang 'gro ba yi/ /bye brag ji ltar shes pa ltar/ /de bzhin mkhas pas 'di gnyis kyi/ /bye brag rims bzhin shes par bya/ /zhes gsungs pa ltar/ smon pa dang 'jug pa'i bdag nyid can gyi/ byang chub kyi sems rnam pa gnyis kyi bsod nams mtha' yas pas 'bras bu mtha' yas pa bde blag tu 'grub par 'gyur ba'o/ /gsum pa ni byang chub sems dpa' tshogs mtha' yas pa gsog pa des ko des ni byang chub dpag med kyang dpag tu med pa rnam bzhi yi tshogs kyis ring por mi thogs par ji lta bur na thob par mi 'gyur te thob par 'gyur bar thal/ byang chub sems dpa' gang zhig dpag med kyi dus su 'khor bar gnas pa lus can dpag tu med pa sdug bsngal las sgrol ba'i don du byang chub yon tan dpag tu med pas brgyan pa 'dod cing tshogs gnyis kyis bsdus pa'i dge ba dpag tu med pa byad pa'i phyir ro/ /gnyis pa la lnga/ tshogs gnyis kyis lus sems kyi sdug bsngal sel ba spyir bstan pa dang/ bsod nams kyis lus kyi sdug bsngal sel ba dang/ ye shes kyis yid kyi sdug bsngal sel ba dang/ tshogs gsog pa la skye bo'i rgyu med pa dang/ snying rje chen po'i nus mthu bstan pa'o/ /dang po ni/ sangs rgyas kyi rgyu tshogs gnyis gsog pa la sgyid lug par mi bya ste/ bsod nams kyi tshogs mtha' yas zhes pa dang ye shes kyi tshogs tmha' @040b yas zhes pa des lus dang sems kyi sdug bsngal dag myur ba nyid du sel bar byed pa'i phyir/ /'khor ba'i rgyu sgrub pa nyid la sgyed lug par rigs te/ des rang la sdug bsngal mthar yas pa skyed pa'i phyir ro/ /gnyis pa ni/ tshogs gsog pa la lus kyi sdug bsngal mtha' yas pa nyams su myong dgos snyam du sgyid lug par mi bya ste/ sdig pa byas pas ngan 'gror lus kyi ni sdug bsngal bkred skom dang tsha grang la sogs sdug bsngal ma lus pa 'byung la byang chub sems dpa' des sdig pa ma byas shed tshogs gsog pa'i bsod nams kyis srid pa gzhan bde ba 'ba' zhig 'byung gi lus kyi sdug bsngal cung zad kyang de med do/ /gsum pa ni/ tshogs gsog pa la yid kyi sdug bsngal du ma 'byung snyam du sgyid lug par mi bya ste/ yod med kyi mthar lta zhing gnas lugs kyi don la rmongs pas yid kyi sdug bsngal ni chags yul don du gnyer ba dang/ sdang ba'i yul mnon pa dang/ rgyal po dang gdon la sogs pa'i 'jigs pa dang/ gzhan gyi rdzas thob tu re ba'i 'dod pa la sogs dpag tu med pa 'byung la/ byang chub sems dpa' tshogs gsog pa des chos thams cad kyi rtsa ba dang gzhi dang rten rang bzhin gyis stong pa'i gnas lugs kyi don rtogs pa'i shes pa yis/ /yid kyi sdug bsngal de ni myur ba nyid du spong ba'i phyir ro/ / bzhi pa ni/ byang chub sems dpa' gal te 'jig rten mthas gtugs par 'jig rten 'dren yang cis te skyo ste skyo ba ma yin te/ de la lus sems kyi sdug bsngal mi 'byung ba gang zhig /lus dang yid kyi sdug bsngal gyis de ltar shin tu ma smras @041a @#/ /shing ma gnod par skyo ba'i rgyu med pa'i phyir ro/ /lus sems kyi sdug bsngal bas gzir ba la dus thung ngu yang bzod dka' na yun ring pos gzir ba la/ smos ci dgos byang chub sems dpa' lus sems kyi sdug bsngal med cing bde bas brgyan pa la mtha' yas pa'i dus kyang ci zhig gnod 'dod pa 'ba' zhig yin gyi mi 'dod pa cung zad kyang med pas/ gdon mi za bar tshogs gnyis gsog pa la 'bad par rigs kyi sgyid lug par mi bya'o/ /lnga pa ni/ 'o na byang chub sems dpa' de la yid kyi gdung ba cung zad kyang med dam zhe na/ rang don gyi sdug bsngal cung zad kyang med de/ de la lus kyi sdug bsngal med la yid kyi sdug bsngal ga la yod cung zad kyang med pa'i phyir ro/ /'on kyang byang chub sems dpa' de ni snying rjes 'jig rten gyi sdug bsngal dang ma bral bas/ thugs gdungs la de yang dge ba khyad par can nyid yin gyi mi 'dod pa'i don min no/ /snying rje de nyid kyis ni byang chub sems dpa' 'khor bar yun ring po gnas pa yin no/ /gsum pa don bsdu ba ni/ rgyu mtshan de bas sangs rgyas thob pa la dus ring po thogs zhes blo dang ldan pas sgyid lug par mi bya ste/ sgyid mi lug cing nyes pa zad cing yon tan thob pa'i don du ni tshogs gnyis gsog pa 'di la rtag tu 'bad par bya'o/ /bzhi pa tshogs gnyis kyi ngo bo la gsum/ bsod nams kyi 'gal zla spang zhing ngo bo bsten par gdams pa dang/ dug gsum dang de las log pa'i 'bras bu dang/ tshogs gnyis dngos so/ /dang po ni/ 'dod chags dang zhe sdang dang/ gti mug dag /sdug bsngal du ma'i 'byung khungs kyi nyes par mkhyen @041b nas yongs su spongs shig /ma chags pa dang/ mi sdang ba dang/ gti mug med pa'i dge ba'i rtsa ba yon tan ma lus pa'i 'byung khungs su mkhyen nas gus par bsten zhig pa'o/ /gnyis pa ni/ rdzas la chags pas yi dwags kyi 'gro bar 'gro la zhe sdang gis ni dmyal bar 'phen zhing/ rmongs pas bde 'gro yang 'phen mod kyi/ phal cher dud 'gror 'gyur ro/ /de las ldog pas dge rtsa gsum gyis lha dang mi nyid do/ /gsum pa ni/ dug gsum gyi skyon spangs nas dge ba'i rtsa ba gsum gyi yon tan 'dzin pa ni mngon par mtho ba'i chos yin la/ de nyid byang chub kyi sems kyis kun nas bslang bas bsod nams kyi tshogs su 'gyur ba'o/ /gnas lugs kyi don shes pas bden par 'dzin pa yongs su zad par byed par thabs ni nges par legs pa'i chos ye shes kyi tshogs so/ /lnga pa tshogs gnyis kyi yan lag la gnyis/ mdor bstan pa dang/ rgyas par bshad pa'o/ /dang po la gnyis/ bsod nams kyi tshogs kyi yan lag dang/ ye shes kyi tshogs kyi yan lag go/ /dang po la gsum/ mchad yul sgrub pa dang/ de la mchod pa dang/ mchod yul min pa mchod pa dgag pa'o/ /dang po la gnyis/ gsar du bsgrub pa dang/ grub zin mchod pa'o/ /dang po ni/ rgyal po khyod kyis dge 'dun gyi gtsug lag khang dag gus pa'i tshul du rgyu bzang la yangs pas shin tu rgya chen po dang/ deng dge 'dun bzhugs pa'i gnas ma la dang/ de'i gnyer byad pa sogs rgya chen dang/ phyug pa bza' btung khyad par can dang bcas pa sgrub par mdzod cig /der bzhugs pa'i rgyu rin po che las byas pa'i sangs rgyas kyi sku gzugs dang sangs rgyas kyi mchod rten dang sna tshogs pa'i @042a @#/ /rin po che kun las bgyis pa'i sangs rgyas kyi sku gzugs dbyibs mdzes shing legs par bris pa pad-ma la bzhugs pa dag kyang bgyid du rtsol zhig /gnyis pa ni/ snga na bzhugs pa'i dam chos glegs bam dang/ dge slong gi dge 'dun dag bza' btung dang bgo ba dang/ dgra med pa la sogs pa'i nan tan kun gyis bskyang bar mdzod cig /gnyis pa ni/ gser gyi tog dang rin chen dra ba dag nyid kyis mchod rten rnams la thogs/ gser dang dngul gyi rgyu las byas pa'i me tog dang rdo rje rin po che dang/ byu ru dang mu tig dang nor bu an d+ha rnyil dang bai-DU-rya dang/ thon kha chen pos mchod rten mchod pa dang/ dam pa'i chos smra ba la mchod pa ni/ na bza' la sogs pa'i rnyed pa dang/ stan stob pa la sogs pa'i bkur sti dang ldan pa mchod nas dga' bar 'gyur ba rnams bgyi zhing mthun par 'gyur ba'i sngar bshad pa'i chos drug gis gus par bsten par mdzod ces gdams so/ /dpe kha cig las/ chos ni nges par bsten par mdzod ces 'byung ngo/ /chos nyan pa'i tshe/ bla mar rim gro dang gus par nyan pa dang/ zhabs 'bring la sogs pa'i dgos pa la yongs su dpyad pa dang bsnyun 'dri ba'i mdong gsol dang rang la chos ston pa ma yin pa'i byang chub sems dpa' rnams la yang rtag tu gus par mchod par mdzod/ / gsum pa ni/ mu stegs can gzhan la gus pa yi mchod pa dang phyag kyang mi bgyi ste skyon dang yon tan mi shes pa rnams rgyal pos de la gus par byas pa na/ gzhan dag kyang 'di bzang po'o zhes dge legs nyams par byed pa'i skyon dang bcas @042b pa'i gang zag la chags par gyur pa gda' ba'i phyir ro/ /bshes gnyen du ming btags pa'i chos log par ston pa ni rnam pa thams cad du spang bar bya'o/ /gnyis pa ni/ thub pa'i dbang po'i gsung dang des bdag rkyen byes nas byung ba'i bstan bcos rnam dag gi gzhung rnams bri ba dang glegs bam shog bu ni sbyin par mdzod/ da yang snag tsha dag dang smyu gu dag sngon du 'gro ba dag go /yul du yi ge'i grwa gang du klog pa dang/ bris dang/ rtsis la sogs slob pa'i slob dpon 'tshol ba'i bya ba khang bzang dag dang zhing rtsal ba yis 'di rtsam gyis 'tsho ba'i tshad dang/ brtan por gnas pa'i nges pa ni rang dang gzhan gyi ye shes kyi tshogs spel ba'i slad du mdzod cig ces pa'o/ /gnyis pa rgyas bshad la gnyis/ bsod nams kyi tshogs kyi yan lag dag ye shes kyi tshogs kyi yan lag go/ /dang po la bzhi/ rang gi rdzas dngos su byin pa'i tshogs dang/ de las gzhan pa'i sbyin pa dang/ bdog pa kun gtad pa dang/ don du gnyer ba'i khyad par la ltos pa'i sbyin pa'o/ /dang po la bcu bzhi yod pa ni/ rgyas pa dang byis pa nad pa yi sems can gyi nad la sogs pa'i sdug bsngal bsal ba'i slad du rang gi yul du sman pa dang skra la sogs pa'i 'breg mkhan dag rang nyid dbang ba'i zhing gis brtan par 'jog tu rtsol/ gnyis pa ni/ grong dang lam gyi mdor 'gron po sdod pa'i 'gron gnas dang/ grong khyer gyi dbus su ne'u seng ge gzhi la mtha' skor zhing me tog dang shing la sogs pa bcugs pa'i kun dga' dang/ mtsho la sogs pa'i nang ngogs phan tshun rdo la sogs pas bcad nas par du lam byed pa'i chu lon dang rdzing dang 'gron po'i dus nas gros byed pa'i mdun khang @043a @#/ /dang/ chu ra dag dang/ mal dang/ zas dang rtsa dang shing ldan pa de 'dra legs par shes pa'i shes rab bzang po dag bgyid du rtsol/ gsum pa ni/ grong dang gtsug lag khang dag dang grong khyer kun tu mdun khang dang/ bzhi pa ni/ chu dkon pa'i lam rnams thams cad du chur dag ni bgyid du rtsol/ lnga pa ni/ nad pa dang/ mgon med pa dang/ sdug bsngal gyis nyams thag pa dang/ rigs dman pa dang dbul po ngan pa dag snying rjes rtag tu yongs bzung zhing de dag gso phyir sbyor bas gus par bstan par mdzod/ drug pa ni/ dgun dro ba dang dbyar bsil bag tu gyur pa'i dus su 'byung ba'i zas skom dang btsa' ba dang/ 'bras bu dang shing tog dang dge slong dang/ slong ba'i skye ba la ma rtsal bar du rgyal po rang nyid kyis gsol ma rigs pa'o/ /bdun pa ni/ lha ma med cing chad pa sogs kyi nyen pa la lha ma dang gdugs dang chu tshags dang tsher ma dbyung ba'i cha ste lag cha dang/ khab skud dang ni bsil g.yab dag chur yi ni gnas su bzhag par mdzod cig /brgyad pa ni/ 'gron po nad pa'i ched du 'bras bu gsum dang tsha ba gsum dang/ mar dang sbrang rtsi dang mig sman dang dug sel ba chur re bzhag par bgyi zhing/ bzlas pa tsam gyis nad zhi ba'i grub pa'i sngags dang nad 'di'i gnyen po 'di'o zhes pa'i sman kyang yi ger bri bar mod cig /dgu pa ni/ 'gron po'i ched du lus dang rkang pa dang/ mgor bsku ba'i 'bru mar dang bal dang byis pa sdod pa'i khri'u dang skyo ma dang chu len pa'i bum pa dang/ sha la @043b sogs pa 'tshad pa'i zangs dang shing gsheg pa'i dgra sta sogs chur dag tu rtsol zhig /bcu pa ni/ til dang 'bras dang 'bru dang zas dang bur snum dang ldan pa'i chur chung du bsil grib dag tu rung ba'i chus bkad pas gyid du rtsol ba dang/ bcu gcig pa ni/ grog sbur gyi tshang gi sgo dag tu zas dang chu dang bu ram dang 'bru'i phung po rtag par ni thugs brtan zhing du la las mi 'da' ba'i mi rnams bgyid du rtsol zhig /yang na/ thugs brtan pa rgyal po la 'bod pa'o/ /bcu gnyis pa ni/ gshos gsol ba'i sngon dang 'og dag tu yi dwags 'phrog ma sogs dang khyi dang grag sbur dang ba la sogs la ci bde bar rtag tu zas dag rtsol bar mdzod cig /bcu gsum pa ni/ rgyal po la sogs pas gtses pa dang ni lo nyas byung ba dang/ gnod pa dang ni yams nad byung ba dang/ dgras bcom pas pham par gyur pa'i yul du 'jig rtan la zas la sogs pas rjes su bzung ba rgya chen po mdzod cig ces pa'o/ /bcu bzhi pa ni/ zhing pa sa bon dang/ rmon pa sogs med pa'i nyams thag par gyur pa rnams la sa bon dang/ zas kyis rjes su bzung zhig pa'o/ /gnyis pa la dgu yod pa'i dang po ni/ rgyal po snga mas btsan thabs su khral phab pa ni/ nan gyi dpya khral yin la de med par btang ba dang/ gnyis pa ni/ thog gi shes rnams kyang ni skyung ba dang/ gsum pa ni/ dbul po tshur chags pas nyen pa las yongs su skyab ba dang/ bzhi pa ni/ rgyal po gsar pas byas pa'i sho gam btang ba dang/ lnga pa ni/ ha cang ches pa'i sho gam dbri ba dang/ drug pa ni/ tshor ba yul gzhan nas 'ongs pa'i tshe nor la rgyas 'debs pa dang/ chod ba de dag sgo na sdod pa yi zhu ba dus su mi gter ba'i nyon mongs @044a @#/ /pa las kyang bzlog par mdzod/ bdun pa ni/ rang gi yul dang yul gzhan gyi chom rkun rnams kyang zhi bar mdzod cig pa'o/ /brgyad pa ni/ dkon mod mnyam pa'i dus su yang ha cang rin che ba 'debs su ma gzhug pa dbyig gi spogs ni mnyam pa dang rin thang tshungs na/ rigs par bgyid du rtsol/ dgu pa ni/ khyed la mang du bshad pas ci zhig bya blon pos zhu ba ci dang ci gsol ba gnas par mdzad nas 'jig rten la gnod pa yang zhu ba srid pas de'i bsam pa nyid kyis kun tu mkhyen par mdzad nas dge zhing bzang ba 'jig rten la smon pa gang yin pa de dang de kun rtag tu mdzod pa dag la phan pa ci dang ci bya zhes/ ji ltar khyod la gus pa yod pa de bzhin du gzhan la phan pa ci dang ci bya zhes khyod ni gus par mdzod ces gdams so/ /gsum pa bdog pa kun btang ba ni/ gzhan gyis bdag gir ma bzung ba'i sa dang chu dang mi dang rlung dang/ sman dang nags kyi shing bzhin du rgyal po bdag nyid kyi lus dang longs spyod gtan du ma grub na yang/ yud tsam zhig tu yang gzhan gyis 'dod rgur spyad pa nyid du mdzod/ gom pa bdun pa'i dus su yang sbyor bas ma grub kyang/ bdog pa kun gtong ba'i sems 'tshang ba'i byang chub sems dpa' rnams la bsod nams nam mkha' 'dra ba dpag med skye bas de ltar mdzad par rigs so/ /bzhi pa la gsum/ mi'i bye brag don du gnyer ba la sbyin pa dang/ bdog pa kun don du gnyer pa la sbyin pa dang/ chos dang mthun pa'i sbyin pa'o/ /dang po ni/ bu mo gzugs mdzes pa rin po che la sogs pa'i rgyan gyis lags par brgyan pa de don du gnyer ba rnams la rtsal na des ni dam pa'i chos @044b yongs su 'dzin pa'i tshig don gyi gzungs ni so sor thob par 'gyur ro/ /de sbyin du mi rung ngam snyam na rgyan rnams kun dang ldan pa'i bu mo stong phrag brgyad cu dag de la dgos pa yo byad kun dang lhan cig thub pa yis ni sngon grags pa mtha' yas su gyur pa'i tshe rtsal to/ /gnyis pa ni/ grangs sna tshogs pa dang/ rnam par bkra zhing so so'i dri ma dang bral bas 'od gsal ba'i 'go ba dag dang rgyan rnams dang dri dang phrang ba dang/ bza' btung la sogs pa'i longs spyod dag slong ba rnams la brtse bas rtsel zhig ces gdams so/ /gsum pa ni/ gang zag gang la tshes don gang chos nyan pa'i mthun rkyen med na de med pas shin tu nyams thag par 'gyur ba de de'i mod la mthun rkyen ni rtsal na de las sbyin mchog gzhan ma mchis so/ /gang nyan pa'i chos de yang sbyin par 'gyur ba'i phyir ro/ /byang chub sems dpas gzhan la dug byin par mi rigs so snyam na/ nad la sogs pa gang la dug ni phan par 'gyur ba de la dug kyang sbyin par bgyi ste/ kha zas mchog yin kyang mi phan na de la de ni sbyin par mi bgyi zhing sbrul? gyis zin pa la ji lta bur sor mo bcad pa phan par bshad pa de bzhin thub pas gzhan la phan pa yin na 'phral mi bde ba yang bya bar gsungs pa'i phyir ro/ /gnyis pa ye shes kyi tshogs kyi yan lag la nyer lnga yod pa'i dang po ni/ dam pa'i chos nang rig pa'i bstan bcos dang chos smra ba la nyid kyis na bza' dang zas la sogs pa'i bkur sti mchog dang ni bcas par mdzod/ gnyis pa ni/ khengs pa sdangs? te/ gus par bcas te chos nyan zhing bstod pa dang/ gsum pa ni/ glegs bam la sogs pa'i chos kyi sbyin pa @045a @#/ /dag kyang mngod cig pa'o/ /bzhi pa ni/ gzhan la gnod pa dang/ phan gnod med pa'i 'jig rten pa'i gtam la dga' bar ma mdzad cig ste/ chos kyi bar chad du 'gyur ba'i phyir ro/ /lnga pa ni/ 'khor ba las 'das pa'i thabs la sogs pa 'jig rten las 'das pa'i gtam la dgyes par mdzod/ drug pa ni/ bdag la thos bsam bsgom gsum gyi yon tan bskyed par 'dod pa ji lta ba de bzhin du gzhan la yang yon tan bskyed par mdzod cig pa'o/ /bdun pa ni/ sngar gsan pa'i chos kyis mi ngoms shing ltag par yang don du gnyer ba'o/ /brgyad pa ni/ thos pa'i don bsdus nas bzung ba dang/ dgu pa ni/ rnam par dbye ba dang/ bcu pa ni/ bla ma dag la yon dbul bsags rtag tu gus par mdzad du gsol zhig pa'o/ /bcu gcig pa ni/ 'jig rten rgyang pan sogs kyi bstan bcos mi gdon te/ ye shes kyi tshogs kyi bar chad du 'gyur ba'i phyir ro/ /bcu gnyis pa ni/ rtsod pa lhur blang ba'i don gyi nga rgyal spang ba dang/ bcu gsum pa ni/ rang gi yon tan mi sngags shing mi sgrog pa dang/ bcu bzhi pa ni/ dgra la'ang yon tan brjod par mdzod cig pa'o/ /bco lnga pa ni/ rtsod pa'i tshe gnad pa dbab par mi bgyi zhing/ bcu drug pa ngan sems kyis ni nyes pa gleng bar mi bgyi ba dang/ gzhan rnams kyi nyes pa'o/ /bcu bdun pa bdag nyid kyi 'khrul ba so sor brtag par bya ba dang/ bco brgyad pa nyes pa gang gis gzhan dag la mkhas pas bya ba smad par 'os pa ni de ni rang gis yongs su spangs zhing nus pas gzhan yang bzlog par mdzod cig pa'o/ /bcu dgu pa/ gzhan gyis gnod pa bgyis pa las @045b sngon gyis las kyis 'bras bur dgongs la de la khro ba mi bgyi ste/ khros na phyi mar yang sdug bsngal gyi rgyur 'gyur bas sdug bsngal yang 'byung bar mi 'gyur bar rang gi nyes pa de ni med par bgyi'o/ /nyi shu pa ni/ sbyin pa btang ba'i lan la re ba ma mchis par gzhan dag la ni phan par mdzod cig pa'o/ /nyer gcig pa gzhan gyis rang la sdug bsngal skyed pa'i tshe sdug bsngal rang gcig bus brnags pa bgyi zhing bde ba yi rgyu zas la sogs pa slong ba dang lhan cig dpyad par bya'o/ /nyer gnyis pa cung zad tsam gyis khengs pa dang zhum pa lta ci smos/ lha'i phun sum tshogs pas kyang khengs pa nyid du mi bgyi zhing yi dwags bzhin du dbul ba yis rgud pas kyang ni zhum par mi bgyi'o/ /nyer gsum pa gzhan don du 'gyur ba'i bden pa smras pa gang gis rang 'chi ba'i rgyal srid nyams par 'gyur na'ang de rang gi don la rtag tu brjod cing de las gzhan du mi bden pa dang/ gzhan la mi phan pa ni gson zhing rgyal srid thob kyang smra bar mi bgyi'o/ /nyer bzhi pa/ ji skad gsungs pa de bzhin du khas blangs pa dang mthun par mdzad pa'i/ brtul zhugs rtag tu brtan par mdzod cig /de ltar byas pa des na dpal ldan rgyal po khyod/ sa steng du tshad ma yi ni dam par 'gyur bas dam bca' brtan par mdzod cig pa'o/ /nyer lnga pa ni/ mang du smos ci dgos rgyal pa khyod ni rtag tu blang dor gyi gnas thams cad la ssngon du bya bar rung mi rung legs par brtags te mdzod pa dang yang dag pa ji lta ba bzhin du blang dor gyi don gzigs pas gzhan la dri ma dgos pas gzhan gyi dring mi 'jog par mdzod cig pa'o/ /drug pa tshogs gsog pa po la phan yon 'byung ba'i chul la gnyis @046a @#/ /thun mong gi yon tan lnga 'byung ba dang/ khyad par gyi yon tan nyer lnga 'byung ba'o/ /dang po la lnga'i dang po ni/ chos byas pa la rgyal srid bde ba dang/ gnyis pa ni/ sangs rgyas kyi bstan pa la bya ba 'di dang 'di gyas so zhes/ phyogs rnams kun tu snyan pa'i grags pa yi bla re rgya chen po 'byung bar 'gyur zhing ngo/ /gsum pa ni chos ldan la 'khor 'du ba chos nyid yin pas blon po rnams kyang kun tu 'dud par 'gyur ba'o/ /myur du chos sgrub par bskul ba ni/ rang gi lus la gnas pa la sogs pa 'chi ba'i rkyen du ma gyur pa med pas 'chi ba'i rkyen ni mang ba ste gson pa'i rkyen nyung bad? cig yin la/ mdza' bos bslus pa dang gnas khang brdib pa dang kha zas ma zhu ba sogs gos na rkyen du 'dod pa de dag nyid ni 'chi ba'i yang rkyen du ma gyur pa med pa de bas rtag tu chos mdzod cig 'di ltar rtag tu chos mdzad na 'jig rten kun dang bdag nyid la rang bzhin gnyis kas chos byas pas nyams bde ba ste yid bde zhing tshim par 'gyur ba gang lags pa de nyid re shig ltog mo ni bzang po dang des chog pa lags pas de ltar mdzod cig /bzhi pa ni/ phar gnod byas na gnyid mi 'ong zhing gal te sad na yang mi bde bas phar gnod ma byas pas dgra'i 'jigs pa med pa'i phyir/ chos kyi bde bar gnyid log cing bde bar sad pa dag tu 'gyur ro/ /lnga pa ni/ bsam pa dag pa'i nang gi bdag nyid kyi skyon med pas rmi lam dag kyang bde ba mthong bas chos la 'bad pa bya'o/ /gnyis pa khyad par gyi yon tan nyer lnga 'byung ba'i dang po ni/ pha ma la zas gos @046b la sogs pa'i sri zhu gtso bor lhur len pa dang rigs kyi gtso bo la rim gro dang rang gis longs spyod legs spyad kha na ma tho ba med pa'i zas la sogs pa spyad pa dang/ bzod pa bsgom pa dang sbyin pa gtong ba dang tshig 'jam pa dang/ gzhan 'byed pa'i phra ma med pa dang/ bden pa'i brtul zhugs dang brgyad po tshe gcig po 'di'i ring la byas pa des 'bras bu lha'i dbang po nyid thob nas da dung yang lha dbang bgyid pa de bas na de 'dra'i chos bsten par mdzod cig pa'o/ /gnyis pa ni/ sbyin par bya ba'i dngos po med na bsod nams kyi tshogs su mi 'gyur ram snyam na/ ches lhag par 'gyur ba'i dpe ston pa ni/ 'bras bu thug gi phru ba bra bcu lhag btsar btub pa sum brgya btsos pa de la tshod ma'i sna grangs kyang drug cu dang ldan pa'i rji'u tshos sum brgya'i kha zas dag nyin re dus gsum du byin pas kyang sems can bde ba dang ldan 'dod kyi byams pa yud tsam dang thang gcig gi bsod nams dag ni char mi phed do/ /byams pa sgom pa'i yon tan nam/ 'thong ches tshe 'di la yang lha mi byams par 'gyur ba dang/ mi ma yin pa de dag kyang ni bsrung ba dang yid bde ba dang lus kyi bde ba mang ba dang dug dang mtshon gyis gnod pa med pa dang 'bad pa med par 'dod bya'i don thob pa dang/ phyi ma la tshongs pa'i 'jig rten du skye bar 'gyur te/ gal te srid pa las grol bar ma gyur kyang byams pa sgoms pa'i chos rnam pa brgyad 'thob bo/ /gsum pa ni/ sems can rnams ni byang chub tu sems bskyed du bcug cing/ de yang mi nyams shing brtan pa'i thabs byas na ri dbang rgyal po ltar brtan @047a @#/ /pa'i byang chub kyi sems ni rang nyid kyis 'di dang phyi mar rtag tu 'thob pa'o/ /bzhi pa ni/ tshogs kyi nang nas kyang dad pas mi khom par 'gro bar mi 'gyur ba dang/ lnga pa ni/ tshul khrims kyis lha mi'i 'gro ba bzang po 'thob pa'o/ /drug pa ni/ stong pa nyid rtogs pa la goms pa yis yon tan gyi mi mthun phyogs 'grib pas dge ba dag la mi nyams pa'i bag yod 'thob pa dang/ bdun pa ni/ chos nyan pa la sogs pa'i rgyus g.yo med pa las dran pa dang ldan pa 'thob pa ni yid gzhungs thob pa'o/ /brgyad pa ni/ chos la sems par byed pa'i blo gros shes rab chen po 'thob pa dang/ dgu pa ni/ dam pa'i chos dang chos smra ba la bkur sti byed pas chos kyi don rtogs pa dang ldan pa dang/ bcu pa ni/ thos pa'i chos bsrungs pas shes rab can du 'gyur ba'o/ /bcu gcig pa ni/ chos nyan pa dang chos kyi sbyin pa dag byed pa'i tshe dpe mkhyud la sogs pa'i skyon gyi sgrib pa med par byas pa yis sangs rgyas rnams dang 'grogs pa nyid 'thob par 'gyur zhing gzhan yang 'dod pa'i don myur du thob par 'gyur ro/ /bcu gnyis pa ni/ 'dod yon la ma chags pas ni chos kyi don grub ste/ bcu gsum pa ni/ ser sna med pas longs spyod 'phel ba dang/ bcu bzhi pa ni/ nga rgyal med pas kun gyis bkur ba'i gtso bor 'gyur ro/ /bco lnga pa ni/ stong pa nyid kyi chos la bzod pas mi brjed pa'i gzungs 'thob bo/ /bcu drug pa ni/ bu ram dang zhun mar dang sbrang rtsi dang til mar dang lan tshwa la sogs snying po lnga rnams byin pa dang dgra la sogs pas @047b 'jigs pa la skyel ma la sogs mi 'jigs pa byin pa yis bdud rnams kun gyis mi tshugs shing stobs po che'i mchog tu 'gyur ro/ /bcu bdun pa ni/ mchod rten la mar me'i 'phreng ba dang mun pas nyan pa'i mun pa dag tu sgron me dang mar me'i ched du 'bru mar sbyin pa yis lha'i mig ni thob par 'gyur ro/ /bco brgyad pa ni/ mchod rten mchod par de'i cha rkyen du rol mo dang dril bu dag ni phul ba dang dung dang rnga ni rab phul bas lha'i rna ba'i mngon shes 'thob par 'gyur ro/ /bcu dgu pa ni/ gzhan gyis 'khrul pa nyes pa byas pa mi gleng zhing zhar ba zhes sogs yan lag nyams pa rnams mi brjod cing gzhan gyi sems ni rjes su bsrungs pas na gzhan gyi sems ni shes pa'i mngon shes 'thob pa'o/ /nyi shu pa ni/ gzhan la lham dang bzhon pa sbyin pa dang/ 'gro mi nus pa'i nyams chung phrag pas 'khyer ba sogs bkur ba byas pa dang bzhon pas bla ma bkur ba yis mkhas pas gcig tu 'gyur zhing mang por 'gyur ba la sogs pa shes pa'i rdzu 'phrul gyi mngon shes thob par 'gyur ro/ /nyer gcig pa ni/ chos kyi ched du dka' ba bzod cing gtsug lag khang byed pa dang/ de bzhin du chos kyi gzhung dang don dag mi brjed par byed cing dran pa dang lan sogs la re ba med pa'i chos kyi sbyin pa dri ma med pas rang dang gzhan gyi sngon gyi tshe rabs dran pa'i mngon par shes pa 'thob par 'gyur ro/ /nyer gnyis pa ni/ dngos po rnams don dam par ngo bo nyid med par yang dag pa ji lta ba bzhin du yongs su shes pas mngon shes drug pa nyon sgrib zad pa'i bral ba dang/ de'i rnam grol @048a @#/ /lam sogs mngon sum du shes pa'i zag pa kun zad pa'i mchog ni 'thob par 'gyur ro/ /nyer gsum pa ni/ sems can thams cad grol ba'i phyir tu de bzhin nyid shes pa'i shes rab mnyam ldan pa/ ye shes kyi tshogs snying rjes brlan pa ste stong pa nyid rtogs pa'i shes rab snying rje'i snying po can bsgoms pa yis sbyin sogs yon tan thams cad ma tshang ba med pas rnam pa'i mchog kun dang ldan pa'i rgyal bar 'gyur ro/ /nyer bzhi pa ni/ smon lam 'bum phrag grangs med pa bcu la sogs smon lam sna tshogs dag pa yis rang gang du sangs rgya ba'i sangs rgyas kyi zhing ni dag par 'gyur ro/ /nyer lnga pa ni/ thub pa'i dbang po la rin chen phul ba yis mtha' yas pa'i 'od ni rnam par 'phro ba 'thob par 'gyur ro/ /don bsdu ba ni/ de bas na de ltar las 'bras dag sngar bshad pa ltar tshogs 'di byas pas 'bras bu 'di 'byung ba'i rgyu 'bras mthun par mkhyen par mdzad nas rang la phan pa'i dgos pa'i don du ni 'gro la phan pa rtag tu mdzod cig dang/ de nyid rgyal po khyod la phan pa lags pa'o/ /mtshan don ni/ /rgyal po la gtam bya ba rin po che'i phreng ba las byang chub kyi tshogs bsdus pa zhes bya ste/ le'u gsum pa'i 'grel pa'o// //gsum pa rgyal po'i spyod tshul kha na ma tho ba med pa la bslab par gdams pa la bzhi/ 'grel dgod pa dang/ rgyas par bshad pa dang/ don bsdu ba dang/ rgyal po'i kun spyod khyad par can la slong mi nus na rab byung bya bar gdams pa'o/ /dang po la gsum/ rgyal po'i @048b ngor smod mi nus shing phal cher bsted pas legs bshad gsan rigs pa dang/ phan pa'i tshig nyan par ston pas gsungs pa bzhin bslab par bstan pa dang/ rang gzhan la phan pa'i tshig nyan par skul ba dngos so/ /dang po ni/ rgyal po ni chos min rigs pa min pa spyod kyang blon po dang 'bangs la sogs pa rgyal po'i rjes su 'tsho ba phal cher ngor bstod par byed kyi smad par byed mi nus te/ gang gi phyir na bzod dam mi bzod pa shes par dka' bas so/ /ngor bstod pas 'khrul rgyu byas nas phan mi phan shes dka' bas re shig gzhan su yang rung ba la'ang mi snyan pa'i tshig snyad pas te dan la rigs pa yin yang brjod dka' nas chen po'i dbang phug mnga' ba'i rgyal po khyed la dge slong bdag lta bus ji zhig smos/ 'on kyang de ltar glengs pa la khyod kyis dgyes pa mdzad pa'i slad dang 'gro ba la yang brtse ba'i slad du khyod la mi snyan yang don la sman pa yin pas bdag lta bu gcig pu ste bor ste shin tu gsol to/ /gnyis pa ni/ rgyal po khyod la de skad brjod par rigs te/ gzhan la gcig tu phan pa bden pa dang/ rnam par 'jam pa dang/ don dang ldan pa dang/ slob ma dang mthun pa'am 'gal ba med pa'i 'phrod pa ni brtse bas kun nas blangs nas phan pa'i dus su slob ma la brjod par bya zhes bcom ldan 'das gsung pa ji lta bas na'o/ /gsum pa ni/ brtan pa zhes rgyal po la bod pa dang/ brtson 'grus dang ting nge 'dzin dang ldan pa'i shes rab ni brtan pa yin la de'i khyad par khro ba med pa'i bden pa'i tshig ni bsgrags pa na dus dang mthun pa'i 'khrus @049a @#/ /byad bzang po'i chu bzhin du mnyan par 'os shing yongs su len par bgyi rigs pa'o/ /rgyal po khyed la bdag gis tshe 'di dang ni tshe rabs gzhan du bstod par rigs brjod par bgyi ba mkhyen par mdzod la de bdag nyid dang gzhan la sman par 'gyur ba de mdzod cig pa'o/ /yang na 'dir sman pa srid brtan pa dang/ gzhan du sman pa chos 'phel ba'o/ /gnyis pa la gsum/ rgyal po'i tshul lugs dang/ chos mi nyams shing 'grub pa la bslab pa dang/ thor pa thob cing theg pa chen po'i sde snod mi spong ba la bslab pa'o/ /dang po la lnga/ sbyin gtong spel ba dang/ gtsug lag khang bzung ba dang/ sngar yod kyi nar ma'i zas la sogs pa bskyang ba dang/ don du mi gnyer ba yang rjes su bzung ba dang/ dpon sna bsko ba'i tshul lo/ /dang po ni/ zas gos sogs slong ba la sngon chad skye ba snga mar sbyin pa bgyis pas da lta rgyal po'i 'byor ba la sogs pa'i sbyin pa'i 'bras bu'i don brnyes par gyur nas/ da yang slong ba po la mi sbyin na snga ma'i sbyin pa dang slong ba po sogs la byas pa mi bzod pa dang/ longs spyod la chags pa yis phyi nas 'byor ba'i don rnams thob par mi 'gyur bas sbyin pa mdzad rigs te/ da lta 'jig rten 'di na rang gi lam rgyags 'khyer ba'i las byed pa'i bla mi bla med na lam rgyags 'khyer mi btub pa la rang la zas gos sogs slong ba dman pa dag rang gi sbyin pa'i 'bras bu longs spyod dag 'khyer ba'i ched du ma rlan par yang phyi ma'i tshe 'di la 'dir byin pa'i rdzas de las rgya 'gyur 'khyer ba bskyed dang/ @049b bcas pa ster ba'i slong ba po la dga' rigs shing sbyin pa la lhag par spro ba mdzad pa rigs so/ /gnyis pa la gsum/ bsam sbyor rgya che ba la bslab pa dang/ chos bzhi pos rab sgrub pa dang/ khyad par can sgrub pa'o/ /dang po ni/ dus rtag tu gzhan la phan pa'i thugs rgya chen po dang sbyor ba'i sgo nas mdzad pa rgya chen po la dgyes par mdzod cig ste rgyu'i dus na rgya chen po'i las las 'bras bu ni thams cad rgya chen po 'byung bar 'gyur bas so/ /gnyis pa ni/ rgyal po rang las dman pa rnams kyis ni blor mi shong zhing yid la'ang bsam par ma gyur pa'i chos bzhi mdzod cig /de yang dkon mchog gsum gyi rten khyad par can bzhengs pas rang la phyogs bcur snyan pa'i grags pa dang/ mdzes pa'i dpal dang ldan par mdzod cig pa'o/ /gsum pa ni/ rgyal po rang dang mnyam pa dang rang bas dman pa ba las de byas kyang ba spu mi ldang ba gtam ngan byung ba shi na'ang snyan par mi 'gyur bas rgyal pos re ni ma byas kyang bla'o/ /gtsug lag khang la sogs pa rgya rab tu che ba'i phyir rgya chen po rnams mthong nas rang dang mnyam pa'i rgyal po gzhan las nga lhag go snyam pa'i snyems pa dang bral ba dang/ rang dang mnyam pa gzhan la spro ba skyed cing ste rgyal pos de lta bu bya'o snyam pa'o/ /rgyal po rang las dman pa rnams 'di lta bu ga la 'grub snyam du spro ba 'dzoms par byed pa rgyal po'i nor bdog pa thams cad gtugs te zad kyi bar du mdzod cig pa'o/ /yang na rgya chen rnams zhes pa rang las stobs che ba'i rgyal par rgyal 'joms pa la bshad do/ /long yod mi bya bar myur du sgrub par @050a @#/ /bya ste/ /khyod ni bdog pa kun bor nas dbang med bshed gshegs 'tshal ba yin la chos kyi slad du spyod pa kun khyod kyi mdun du rang la phan pa'i ched du 'dod pa nyid yin gyi/ nor zas shul du bzhag kyang mi dbang snga ma'i bdog pa kun rgyal po gsar ba yi ni dbang du gyur na rgyal po snga ma'i chos pad pa'am snyan pa'i grags pa dag tu 'gyur ram ci cung zad kyang mi 'gyur la/ rang nyid kyis sbyin pa btang bas nor spyad pa yis 'di la bsrud mi dgos pas bde la byin pas gzhan du bde bar 'gyur ro/ /rang gis ma spyad pa dang gzhan la ma byin pas mes tshig pa sogs kyis chud zos pas sdug bsngal 'ba' zhig yin gyi gang la bde ba'i rgyur mi 'gyur ro/ /'chi khar bya snyam na khrel med pa'i rjes ngan can rnams kyis rgyal po khyod la gces par mi rtsi zhing/ rgyal po gsar ba'i de? bsrungs pas rang la byams par 'dod pa rnams kyis ni 'chi khar khyod dbang med par byas pas sbyin pa mi spyod pa de las da lta rang dbang yod pa rnal na gnas pa'i dus su myur du ni bdog pa kun gyi chos bzhi mdzod cig /lo phyi ma dang yang phyi ma sogs la bya'o snyam na khyed 'chi bdag rkyen gyi nang na gnas pa rlung dmar gyi nang na 'dug pa'i mar me bzhin myur du 'chi bas 'joms pas lod yod mi bya'o/ /gsum pa la gsum/ spyir bstan pa dang/ gnyer ba bsko ba dang/ snyoms par bskyed pa'o/ /dang po ni/ sngon gyi rgyal pos chos kyi gzhi lha khang la sogs pa gzhan bgyis pa gang dag lags pa de dag kyang mchod pa la sogs pa ji ltar yod pa sngar lugs @050b bzhin du chun ma zos par bskyad par mdzod cig pa'o/ /gnyis pa ni/ gnyer pa gcug lag khang der gnas pa 'tshe ba med pa dang/ dge ba spyod cing sdom pa sna gcig gi brtul zhugs la gnas pa dang/ snga nas gnas pa dang/ glo bur du 'ongs pa la byams pa dang/ bden par smra ba dang/ bya bas mi skyo ba'i bzod pa dang/ 'thab dkrel ma mchis pa dang/ dge ba la rtag tu brtson pa'i chos brgyad ldan gnyer du bskos la spyod du rtsol zhig /gsum pa ni/ long pa dang nad pa dang dman pa dang mgon med cing sdug phongs pa dang/ yan lag nyams pa de dag kyang ni zas dang/ skom la sogs pa dgag pa med par snyoms par 'thob par mdzod cig /bzhi pa ni/ de dag lta bu chos ldan khyed la zas la sogs pa don du mi gnyer ba dang/ rgyal po gzhan gyi yul du gnas pa rnams la'ang nus pa ci yod kyi rjes su bzung bar bgyi ba dag gnas gzhan du skyal ba sogs ci rigs par ni rab tu mdzod cig /lnga pa la bzhi/ chos dpon bsko ba dang/ bka' la gtogs pa dang/ dmag dpon dang nor gyi gnyer la sogs pa bsko ba'o/ /dang po ni/ gtsug lag khang la sogs pa'i chos kyi gzhi ni thams cad du chos 'khor gyi sna bo ni le lo med pas mi g.yel ba dang/ nor dang 'khor la sogs pa la mi gzan pa dang bya ba la mkhas shing chos mthun pa tha na cha rkyen ba glang yan chad de dag rnams la mi gnod pa dpon du bskos shig pa'o/ /gnyis pa ni/ 'jig rten gyi lugs shes pa rgyal po gzhan dang bstun pa dang/ de la nor cung zad ster pa dang srid sde gcod pa dang 'gyed pa la mkhas pa sogs @051a @#/ /dang/ chos min pa mi byed pas chos dang ldan la rgyal po la 'jigs shing snying nye ba dang/ rang 'dod kyi dri ma med pas gtsang zhing 'khor 'bangs la snying nye ba dang/ khong mi sdang ba dang/ rigs bzang ba dang/ ngang tshu la phun sum tshogs pa dang ldan pa dang byams sdang shes pa'i byas pa bzo ba'i blon po chos dgu ldan bskos shig pa'o/ /gsum pa ni/ gtong phod che zhing longs spyod la ma chags pa dang dpa' ba dang 'jam zhing rgyal po la snying nye ba dang/ rgyal po'i nor ran/ ra spyod pa dang/ gzhan gyis blo mi 'phrogs pa'i brtan pa dang/ chang mi 'thung ba'i rtag tu bag ni yod pa dang chos dang ldan pa'i dmag dpon bskos shig pa'o/ /bzhi pa ni/ chos kyi ngang tshul ni khyim pa yin yang ngang tshul 'jam pa dang/ rang 'dod med pas gtsang la bya ba la bzo ba dang/ don shes pa skabs su babs pa'i bya ba shes pa dang rgyal po'i gtsug lag la mkhas pa dang bya ba'i go rims la mkhas pa tshul ldan dang snyoms shing rgyal po la snying nye ba'i ngang 'jam pa dang rgan rabs rnams ni nor gyi gnyer la sogs pa'i sna bor bskos shig pa'o/ /bskos nas bzhag pa tsam gyis mi chog pas zla re zhing de dag las rgyal po nyid kyi 'du ba dang/ 'god pa kun gson te/ ji ltar byas pa gsan nas chos kyi gzhi sogs kyi don kun 'god che na ba cung zad sdom du gzhug /'dus che na da dung snon pa dang/ gnas 'dir 'di tsam phul zhig ces sogs nyid kyi bka' rtsol zhig /rgyu mtshan ni khyod kyis rgyal srid chos kyi don du yin pa'i phyir dang/ che 'di'i grags pa'i don @051b dang/ 'dod yon gyi slad du ma lags na rgyal srid de ni shin tu 'bras phur bcas la/ de las gzhan du grags pa la sogs pa'i don du 'gyur na don ma mchis pa ngan 'gro'i 'bras bu can du 'gyur bas so/ /gnyis pa mi nyams shing 'grub par bslab pa la gnyis/ chos sngar yod mi nyams pa la bslab pa dang/ sngar med 'grub pa la bslab pa'o/ /dang po la gnyis/ 'brel dgod pa dang/ dngos kyi don to/ /dang po ni/ de ltar rgyal srid chos ldan du byas na gzhan tshar gcod pa la sogs pa rgyal po'i lugs dang 'gal la/ rgyal srid kyi ched du gzhan gsod pa sogs byas na chos nyams par 'gyur bas de gnyis mi 'gal bar bya mi nus so snyam na/ min te/ mi dbang zhes pos nas da lta 'jig rten na phal cher phan tshun gcig gis gcig ma rungs pa byed cing/ ltar 'thud pas rgyal srid nyams par byed pa yin la/ ji ltar khyod kyi rgyal srid dang chos su 'gyur ba mi 'gal ba de ni gson zhig cas skul ba'o/ /gnyis pa la bzhi/ dbang byed khyad par can bsdu ba dang/ rang nyid brtsa ba dang ldan par bya ba dang/ btson btang zhing btson gyi tshe yang bde bar bya ba dang/ las rung du bya mi nus na yul nas bskrad pa'o/ /dang po ni/ dbang byed khyad par can min pa bskos na chad pa bcad 'os la mi gcod 'os min pa la bcad pas nyams par 'gyur bas rigs pa dang mi rigs pa shes pa'i shes pas rgan zhing rigs ngan na snying la dran pa lhag mi 'jog pas rigs bzang ba dang/ 'jig rten gyi lugs rigs pa shes la sdig la 'dzems pa dang/ @052a @#/ /dbang byed rnams nang gshin pa dang/ khrims kyi bya ba de byas pas dgos pa khyad par can mthong bar gyur pa mang po rtag tu khyod kyi srog la dbang byed la bskos shig /gnyis pa la gsum/ brtse bas bzung bar bya ba dang/ sdig byed pa la khyad par du snying rje bya ba dang/ de'i 'thad pa'o/ /dang po ni/ dbang byed rnams kyis nor gyi chad pa dang btson du bzung ba dang brdeg pa la sogs ji ltar rigs pa byed na yang rigs pa'ang khyod kyis mi bgyi ste/ rgyud snying rjes brlan par bgyis nas ni zhus na gtong ba sogs rtag tu rjes su bzung bar mdzod cig /gnyis pa ni/ mtshams med sogs mi bzad sdig pa byed pa yi lus can dag ni thams cad la'ang rgyal po khyod kyis rtag par yang snying rjes phan sems kho na skyed par bya yi yal bar 'dor ba'am/ gnod pa'i sems rnams thams cad du mi bya'o/ /gsum pa ni/ mtshams med sogs mi bzad pa'i sdig can pha ma sogs gsod par byed pa la khyad par du yang snying rje bgyi bar rigs te/ chos kyi bdag nyid nyams pa de dag ni rgyal sras bdag nyid chen po'i snying rje'i gnas phul du byung ba yin pa'i phyir ro/ /rnal 'byor spyod pa bzhi brgya pa las/ ji ltar ma ni khyad par du/ /nad thebs bu la gdung 'gyur ba/ /de bzhin byang chub sems dpa'i brtse/ / dam pa min la khyad par du'o/ /zhes bshad pa ltar ro/ /gsum pa la gnyis/ brtson btang ba dang/ btson gyi tshe yang bde bar bya ba'o/ /dang po ni/ nyin gcig bzhin nam zhag lnga zhing nyams chung stobs zhan pa la sogs pa'i btson rnams btang bar @052b mdzod lhag ma nyams stobs che ba rnams ci rigs par 'gal yang mi 'grol ba rgyun du bzhag snyam pa med par mdzod cig ste/ khyod ni btson gang la btang sems med pa de las sdom pa min pa skye bas sdom min ji srid yod pa de srid bsnyen gnas kyi sdom pa yang gnas pa mi srid la sdom pa min pa de las ni rgyun mi chad par dngos su srog gcod sogs mi byed pa'i che yang ngan song gi rgyu sdig pa nar mar gsog par 'gyur ba'i phyir ro/ /gnyis pa ni/ btson ni ji srid ma btang pa de'i bar du'ang skra la sogs pa'i 'dreg mkhan dang 'khrus dang bza' ba dang btung ba dang nad la phan pa'i sman dang ldan pas bde bar bgyi'o/ /sdug bsngal skyed pa'i byed du bzung ba min nam/ bde bar byed na ci'i phyir 'dzin snyam na mi rigs pa byed pa snod rung du med pa bu dag la pha mas snod du rung ba bya 'dod pas char gcod pa ltar snying rje yis ni kun nas bslang nas tshar bcad par bya yi zhes sdang ma yin la/ nor 'dod pa'i phyir tu tshar bcad bya ba min no/ /bzhi pa ni/ gzhan la rab sdang zhes dang can rgyal po'am gzhan gsod par bgyid pa'i btson du bzung ba btang nas srog gcod la sogs pa'i ngan spyod phyis byed mi byed brtags te legs par bgyis nas mi byed na btang snyoms su bzhag la/ da dung sngar gyi de las ldog mi nus na mi bsad cing gnod pa gzhan yang mi bgyi bar yul nas bskrad pa dag tu mdzod cig pa'o/ /gnyis pa chos sngar med 'grub pa la bslab pa la gnyis/ chos sgrub pa dang/ chos min dgag pa'o/ /dang po la gnyis/ bya ma rta khyad par can bya @053a @#/ /ba dang/ de'i dpe'o/ /dang po ni/ rang dbang yod par bya ba'i ched du/ rgyal pos btang bar mi shes pa'i rta nyul ba 'gyogs pa btang nas rtog tu gzhug cing/ yul kun yang bya ma rta'i spyan gyis gzigs la rtag tu bag yod dang dran pa dang ldan par chos dang mthun pa'i don mdzod cig ste/ gzhan bya ba min pa byed pa spong zhing/ bag yod ldan pa la dgongs pa'i don mdzod ces pa'o/ /yon tan gyi gnas dge slong la sogs pa la bdag nyid kyis zas gos sogs rab tu sbyin pa dang bkur sti dang rim gro dag rgya che ba rang dang/ rjes su mthun pa sbyor zhing yon tan de tsam mi che ba'i lhag ma rnams la'ang sbyin pa ci rigs par bgyi'o/ /gnyis pa ni/ rgyal po ljon shing bzod pa'i bsil grib can bkur sti'i me tog rgyas par gyur cing rab tu sbyin pa'i 'bras bu rgya che ba dang/ ldan pa la rmangs kyi bya rnams brten par 'gyur bas so/ /'o na rgyal po bzod pa dang ldan pa gcig pu bya'am zhe na rgyal po gtong ba'i ngang tshul can yin yang nyes pa mi bzod pa'i bsar dang ldan na cung zad khro yang dga' bar 'gyur te/ dper na sug smel dngan? le sham rtsub pa'i ste bag chags pa'i sha kharI? la du bzhin du myangs na zhim pa ltar nad 'jam la phyi rtsub bag dang ldan par ro/ /sngar bshad pa de ltar rigs pas dpyad na ni khyod kyi rgyal srid 'god pa dang nyams par mi 'gyur la rigs pa min par mi 'gyur zhing chos min ma yin pa chos su 'gyur bas de ltar bslab par bya'o/ /gnyis pa ni/ rgyal po khyed kyis rgyal srid 'jig rten pha rol las @053b bsnams te ma byon la/ de yang pha rol tu bsnams par mi 'gyur zhing chos kyis brnyes pas rgyal srid de'i slad du chos min khyod kyis bgyi mi rigs so/ /de yang dgos cha nyo ba'i 'tshog bcas kyi zong ni legs na bde ba skyed la nyes na sdug bsngal skyed pas/ rgyal srid chos kyis ma bzung na rgyal srid kyis phyi ma la 'bras bu sdug bsngal ba'i tshogs bcas brgyud pa dag ci nas 'grub par mi 'gyur bar rgyal po khyed de ltar nan tan mdzod/ 'tshog bcas kyi thong ni da lta'i rgyal srid kyis phyi ma phan chad gcig nas gcig tu brgyud pa'i 'tshog bcas brgyud pa dag ci nas rjes par 'gyur ba de lta bur ni rgyal po khyed kyis nan tan mdzod cig pa ste/ da lta'i rgyal srid 'di ma 'ongs pa'i skye ba du ma'i sdug bsngal nyo ba'i zong du ma song bar/ skye ba du ma'i rgyal srid nyo ba'i rin du 'gyur bar mdzod cig ces pa'o/ /gsum pa thar pa thob cing theg pa chen po'i sde snod mi spong ba la bslab pa la gnyis/ thar pa'i lam la bslab pa dang/ theg chen gyi sde snod spong ba dgag pa'o/ /dang po la gnyis/ srid pa'i yul tshor ba bde sdug rang bzhin gyis grub pa dgag pa deng/ theg pa che chung gnyis kas stong nyid phra mo rtogs pa mtshungs par bstan pa'o/ /dang po la gsum/ tshor ba bde ba rang mtshan pa dgag pa dang/ sdug bsngal rang bzhin gyis grub pa dgag pa dang/ bkag pa'i 'bras bu'o/ /dang po la gsum/ 'brel dgod pa dang/ bstan pa dang/ bshad pa'o/ /dang po ni/ rgyal po khyod gling bzhi pa'i sa thob kyang 'khor los bsgyur ba'i bde ba ni lus kyi tshor ba bde ba dag dang sems kyi bde ba dang 'di gnyis kho @054a @#/ /nar zad par 'dod la zab mod cir 'gyur zha na/ lus kyi tshor ba bde ba ni sdug bsngal phyir ni bcos pa tsam ste/ sdug bsngal cung zad shugs chung ngu song ba'i gnas skabs kyi tshor ba sim pa de la bde ba rang mtshan par zhen pa yin gyi sdug bsngal phyir bcos kyi bde ba tsam ma rtogs 'jig rten na sdug bsngal rang mtshan pa yod kyang bde ba rang mtshan pa cung zad kyang med do/ /de'i rang mtshan ni/ rtags kyi dgag byar gyur pa'i rang mtshan min gyi/ sdug bsngal phyir bcos pa tsam la bzhag par zad de/ kha dog sngon po ser po dang bsgrigs kyang sngon po'i blo skye yi ser po'i blo mi skye ba ltar/ tshor ba sdug bsngal ni bde ba shugs chung ba'i gnas skabs la bzhag mi dgos par sdug bsngal gyi blo skye zhing/ tshor ba sdug bsngal yod la ring po la ltos nas thung ngu'i blo skye ba ltar sdug bsngal shugs chung ba'i gnas skabs kyis cung zad sim par snang ba la bde ba'i blo skyes par zad do/ /yang tshor ba bde ba tha snyad du med do zhes skur ba gdab par mi bya'o/ /rgyas par ni rnal 'byor spyod pa bzhi brgya ba las shes par bya'o/ /tha snyad du sems kyi bde ba ni 'du shes kyi rang bzhin te rtog pas bde ba rang mtshan par byas pa kho nar zad kyi rtog pas btags pa'i sdug bsngal rang mtshan pa yod kyang bde ba rang mtshan pa med par shes par bya'o/ /gnyis pa ni/ 'jig rten tshor ba bde ba'i bdog pa kun sdug bsngal phyir ni bcos tsam dang rtog pas btags pa tsam nyid yin pa de'i phyir bde ba de ni don du bde ba rang mtshan pa'i don @054b med do/ /gsum pa la gnyis/ bde ba rang mtshan pa'i sgrub byed dgag pa dang/ ngo bo dgag pa'o/ /dang po la gnyis/ yid kyi bde ba rang mtshan pa'i sgrub byed dgag pa dang/ lus kyi bde ba rang mtshan pa'i sgrub byed dgag pa'o/ /dang po ni/ yid kyi bde ba rang mtshan pa yod de/ de skyed pa'i rgyu dbang phyug dag yod pa'i phyir ce na/ min te/ bde ba skyed pa'i rgyur 'dod pa de dag ngo bo nyid kyis bde ba'i rgyur med de/ rjes su 'gro ldog mtshang ba'i phyir ro/ /de yang gling dang yul dang gnas dang khyim dang/ khyogs dang stan dang gos rnams dang mal cha dang bza' btung dang/ glang po dang rta dang bud med bcu gsum po rnams longs spyad bya re re zad pa gang gi tshe gang yang rung ba la longs spyod pas bde'o snyam pa'i sems 'byung ba de'i tshe de yis bde zhes rlom par grags la/ gcig longs spyod cing bde'o snyam pa'i blo 'byung ba de'i tshe lhag ma yid la mi byed pas de'i tshe lhag ma rnams don du rang mtshan pa'i bde ba'i rgyur don med pa nyid de/ bcu gsum po ngo bo nyid kyis bde ba'i rgyu yin na/ longs ma spyad cing ma dran pa'i che yang/ bde ba skye bar rigs na/ de med pa'i phyir dang yul gcig la longs spyod pa'i tshe lhag ma rnams la longs spyod pa med pa'i phyir/ de dag yod pa tsam gyis bde ba'i rgyur mi rigs so/ /gnyis pa la gnyis/ yul lnga bsdus pa de'i sgrub byed yin pa dgag pa dang/ re re bsgrub byed yin pa dgag pa'o/ /dang po ni/ yul lnga'i bde ba dus gcig tu myong ste/ zlos gar mkhan gyi gzugs dang gling bu'i sgra dang/ a ka ru'i dri dang/ sbrang rti'i ro dang/ gos @055a @#/ /reg bya dbang po lngas nyams su myong ngo zhe na/ mig la sogs pa'i dbang po lngas yul lnga 'dzin pa'i tshe de'i bde ba lnga dus gcig tu med de/ gang gi phyir na/ rtog pas ma bzung na bde bar mi shes pa gang zhig /yul lnga dang bde ba lnga la dus gcig tu rtog par mi byed pa de'i phyir gang gi che gzugs la sogs pa yul ni gang dang gang dbang po gang gis shes par gyur pa de'i tshe dbang po lhag mas yul lhag ma 'dzin pa dang de la skyes pa'i bde ba med de/ gang gi phyir na de'i tshe yul lhag ma rnams bde ba'i don du med pa nyid kyi phyir ro/ /der thal dbang po yis ni yul dmigs par gyur pa rang dus na gnas pa'i yul gyi rnam pa la yid kyis dmigs nas rtog pa na bde'o snyam du rlom par byed pa yin la rgyud gcig la rtog pa du ma cig car mi skye ba'i phyir ro/ /gnyis pa la gnyis/ dngos dang/ sgrub byed dgag pa'o/ /dang po ni/ 'jig rten 'di ni mig lta bu'i dbang po gcig gis ni gzugs lta bu'i don gcig shes pa gang yin pa de yang gzugs kyi don med par mig dbang gi don med la gzugs kyi don yang mig dbang de med par don med pas phan tshun ltos pa'i phyir/ ngo bo nyid kyis med na de med pas lus kyi bde ba rang mtshan pa med do/ /gnyis pa la gsum/ rnam shes rang bzhin gyis grub pa dgag pa dang/ yul rang bzhin gyis grub pa dgag pa dang/ dbang po rang bzhin gyis grub pa dgag pa'o/ /dang po ni/ yul dang dbang po rang gi ngo bo nyid yod de/ de'i 'bras bu rnam @055b shes yod pa'i phyir ro zhe na/ ji ltar pha dang ma dag la brten nas bu ni 'byung bar bshad pa de bzhin du mig dang gzugs la brten nas rnam par shes pa 'byung bar bshad pas rnam par shes pa rang bzhin gyis med de/ mig dang gzugs la ltos pa'i phyir ro/ /dper na pha ma dang bu bzhin zhes pa'i rten 'brel gyi gtan tshigs so/ /tshigs bcad 'di slob dpon zla ba grags pas tshig gsal du drangs pa la sgron gsal gyi bshad pa byed pa mang po dag rtsa she'i rtsa tshig tu 'khrul 'dug pas/ de lta na rtsa she'i tshigs bcad bzhi brgya dang zhe dgur/ rgya gar mkhas pa kha cig gis mdzad pa dang yang 'gal ba'i phyir ro/ /gnyis pa ni/ rnam shes rang bzhin gyis yod de de'i yul yod pa'i phyir ro zhe na/ yul ni 'das pa dang ma 'ongs pa rnams rnam shes dang bcas pa 'gags pa dang ma thob pa'i phyir/ 'das ma 'ongs de gnyis las ni ma 'das pas rang bzhin gyis med pa da ltar ba 'di 'das ma 'ongs kyi dus na med na de gnyis la mi ltos par thal/ ltos pa'i phyir/ de gnyis kyi dus na yod par thal/ 'dod na da ltar ba 'das ma 'ongs gnyis las tha dad du grub pa med pa'i phyir dbang por bcas pa don med la gang da lta'i yang don med pas rnam shes rang bzhin gyis grub pa med do/ /rnam shes da ltar ba yul da ltar ba 'dzin pas dbang po dang don gnyis rang bzhin gyis yod ce na/ ji ltar mig ni 'khrul ba yis mgal me'i 'khor lo 'dzin par bye pa de bzhin dbang po rnams kyis ni da lta'i yul dag 'dzin par byed pa yin gyi/ dbang po dang yul dang rnam par shes pa gang yang rang @056a @#/ /bzhin gyis grub pa med de/ blo 'khrul ba la snang ba tsam du zad pa'i phyir ro/ /gsum pa la gsum/ 'byung ba rang bzhin gyis grub pa bkag pas dbang don rang bzhin gyis grub pa dgag pa dang/ 'byung ba rang bzhin gyis grub pa dgag pa dang/ des na gzugs rang bzhin gyis ma grub pa'o/ /dang po ni/ dbang don rang bzhin gyis yod de/ de'i rgyu 'byung ba yod pa'i phyir ce na/ dbang don 'di dag don du ste rang bzhin gyis don med do/ /dbang po rnams dang dbang don rnams 'byung ba rnams kyi 'bras bu'i rang bzhin du 'dod na 'byung ba bzhi 'dus pa dang so sor rang bzhin gyis grub pa'i don med pas so/ /gnyis pa ni/ 'byung rnams so sor ltos med du tha dad par yod na bud shing med pa'i mer thal bar 'gyur la/ 'dus na so so'i mtshan nyid rang bzhin gyis med par 'gyur te/ ltos pa'i phyir ro/ /'byung ba lhag ma gsum la yang nyes pa de ltar nges so/ /gsum pa ni/ de ltar 'byung ba rnams so so dang 'dus pa rnam pa gnyis su'ang rang bzhin gyis grub pa'i don med pas na 'dus pa nyid kyang rang bzhin gyis grub pa'i don med do/ /'dus pa don med nyid kyi phyir gzugs kyang don du ste rang bzhin gyis grub pa'i don med do/ /de med pas lus kyi bde ba rang mtshan pa'i rgyu yang med do/ /gnyis pa bde ba rang mtshan pa'i ngo bo dgag pa ni/ tshor ba rnam shes dang 'du shes dang 'du byed dang lhan cig tu 'byung bas rang bzhin gyis yod do zhe na/ bde ba'i tshor ba dam pa'i don du rang bzhin gyis grub pa'i don med do/ /rnam shes kyi phung po dang/ @056b tshor ba dang 'du shes dang 'du byed rnams kyang thams cad du 'dus pa rang bzhin gyis ma grub cing so sor yang bdag nyid kyis grub pa'i don med pa'i phyir ro/ /gnyis pa sdug bsngal rang bzhin gyis grub pa dgag pa ni/ phrad par sred pa'i yul bde ba rang mtshan pa de bo dang sgrub byed dang bcas pa bkag nas 'bral bar sred pa'i yul sdug bsngal rang bzhin gyis grub pa 'gog pa yin no/ /ji ltar sdug bsngal phyir bcos tshor ba sdug bsngal cung zad shugs chung ba'i gnas skabs la don du ste rang mtshan pa'i bde ba rang rgyal byed pa de bzhin du bde ba 'joms shing mngon gyur cung zad kyang med pa 'byung ba la rang bzhin gyis grub pa'i sdug bsngal du yang nga rgyal byed par zad kyi rang bzhin gyis thub pa'i sdug bsngal cung zad kyang med de/ bltos chos tsam du zad pa'i phyir ro/ /gsum pa bkag pa'i 'bras bu la gnyis/ stong nyid rtogs pas grol bar bstan pa dang/ stong nyid rtogs pa'i yul can gyi blo ngos bzung ba'o/ /dang po ni/ sngar bshad pa de ltar sred pa yul dang bcas pa ngo bo nyid kyis grub pa med pa'i phyir rang bzhin gyis stong pa'i don goms par byas pa las tshor ba bde ba dang bcas pa'i sred pa dang sdug bsngal bral ba'i sred pa spong la/ sred pa spangs pas las mi gsog cing 'khor ba las grol bar 'gyur ba de'i phyir/ de ltar rten 'byung spros pa'i mtha' thams cad dang bral ba mthong ba las grol bar 'gyur bas/ stong nyid kyi don rtogs pa la 'bad par bya'o/ /gnyis pa ni/ 'ga' yang mthong ba med pa de kho na nyid mthong ba'o/ /zhes btags nas bzhag pa tsam ma yin nam/ ci'i phyir de kho na nyid @057a @#/ /mthong zhes brjod ce na/ 'phags pa'i mnyam gzhag na stong nyid rtogs pa'i ye shes 'dus byas kyis bsdus pa yang ldog par smra ba ni/ ma rig pa log pas rig pa tsam yang ldog par smra ba phyin ci log gi lugs dang/ mu stegs spyod pa pa dri ma zad na sems kyang zad par 'dod pa ltar/ skur 'debs chen por shes par bya'o/ /gnyis pa ni/ 'o na gang gi mthong bar 'gyur zhe na don dam pa'i bden pa mthong ba'i sems kyang don dam pa'i bden par 'gyur ba min gyi tha snyad du ni/ don dam pa'i bden pa la gnyis snang nub pa'i tshul gyis mnyam par bzhag pa'i blo skad cig gis skye 'gag byed pa des don dam pa'i bden pa mthong bar brjod pa ste/ de yang ltos nas bzhag pa tsam yin gyi rang bzhin gyis grub pa med de/ sems byung med par sems mi 'byung zhing sems med par yang sems byung mi 'byung bas/ rang bzhin gyis grub pa'i don med la sems nyid kyis sems mthong ba min te/ sor mo'i rtse mo rang gis rang la mi reg pa'i phyir dang/ sems gnyis/ lhan cig tu 'byung ba'ang mi 'dod do/ /gnyis pa theg pa che chung gnyis ka'i gang zag gis stong nyid phra mo rtogs pa mtshungs par bstan pa la gnyis/ thar pa tsam thob pa la stong nyid phra mo rtogs dgos pa dang/ theg pa che chung gi khyad par ro/ /dang po ni/ de ltar yang dag pa ji lta ba bzhin du 'gro ba rang bzhin gyis grub pa'i don med par shes nas ni rgyu med pa'i me bzhin du srid par skye ba'i rgyu med pa'i phyir/ yang srid par skye ba'i gnas med pas yang srid len @057b pa med par mya ngan las 'das pa thob par 'gyur ba yin no/ /gzhung 'di dag gis ni/ nyan rang la yang stong nyid phra mo rtogs pa yod pa gsal bar bstan la/ mdo las nyan thos kyis la slob par 'dod pas kyang zhes sogs dang/ gang dag bde gshegs nyan thos 'gyur bar bya snyam na/ zhes sogs dang/ theg pa dman pa'i sde snod las/ gzugs ni lbu ba gdos pa 'dra/ zhes sogs mdo yis bstan pa yin no/ /gnyis pa ni/ de ni theg pa chen po'i myang 'das kyi dbang du byas pa'o zhe na/ min te/ de ltor byang chub sems dpas kyang ste nyan thos su ma zad ces pa'o/ /stong nyid mthong nas rdzogs pa'i byang chub nges par thob par 'dod pa'o/ /'o na theg pa che chung khyad par ci zhig yod cing byang chub sems dpa' yang 'khor bar gnas pa'i rgyu med par 'gyur ro zhe na/ skyon med de/ byang chub sems dpa' de ni snying rje 'ba' zhig gis byang chub ma thob kyi bar du sred par nying mtshams sbyor ba yin gyi/ las dang srid pa'i dbang gis skye ba len pa min no/ /gnyis pa theg chen gyi sde snod spong ba dgag pa la gnyis/ rgyas par bshad pa dang/ don bsdu ba'o/ /dang po la bzhi/ theg chen gyi se sdod spong ba mi rigs pa'i rgyu mtshan dang/ theg chen gyi sde snod bkar sgrub pa dang/ theg dman gyi sde snod nas bshad pa theg pa chen po'i lam 'bras rdzogs pa min pa dang/ theg pa gsum bstan pa'i dgos pa'o/ /dang po la gnyis/ theg chen la smad pa'i nyes dmigs dang/ des na sdang bar mi rigs pa'o/ /dang po la gsum/ theg chen la smod pa'i tshul dang/ smod pa'i rgyu dang/ @058a @#/ /smod pa'i nyas dmigs so/ /dang po ni/ de bzhin gshegs pas theg chen gyi sde snod las byang chub sems dpa'i tshogs gnyis rgyas par bstan na theg pa chen po'i lam 'bras rdzogs pa de la kun tu rmongs pa'i nyan thos sde pa rnams rab tu sdang bas rmong bar byed do/ /gnyis pa ni/ rmong ba'i rgyu ni 'di dag yin te/ byang chub sems dpa' rang gi don btang nas gzhan gyi don 'ba' zhig lhur len pa'i yon tan dang/ rang don 'ba' zhig lhur len cing gzhan la gnod pa'i skyon dag mi shes pa'i yon tan la skyon du 'du shes pa'i yang na yon tan la sdang ba zhig theg pa che la smod byed grang rgyu gsum po de dag las gzhan med pa'i phyir ro/ /theg chen la smod pa yon tan la sdang ba ji ltar yin zhe na/ gzhan la gnod pa skyon dang ni gzhan la phan pa yon tan du shes nas theg pa che la smod par byed pa yon tan la sdang zhes brjod rigs te/ theg pa chen po'i sde snod nas gzhan gyi skyon 'gog pa dang yon tan sgrub pa'i thabs yongs su rdzogs pa bstan gyi theg pa dman pa'i sde snod nas cha tsam las ma bstan pa'i phyir ro/ /gsum pa ni/ byang chub sems dpa' rang gi don mi lta ba'i phyir gzhan don la ro gcig tu dga' ba gang yin pa'i yon tan gyi 'byung gnas byang chub sems dpas nyams su blang bya rdzogs pa theg chen te de la sdang ba des sdang ba po rang nyid ngan 'gror bsregs par 'gyur te/ sdig pa'i phul du byung ba bsags pa'i phyir ro/ /stong nyid la dad pa can bzung nyes pas rgyu 'bras @058b med pa'i don du go ba dang cig shos stong pa nyid la sdang ba'i phyir khros pa yis stong pa nyid spong bar byed pa gnyis las/ las 'bras yod pa min par go ba'i stong pa nyid la dad pa can yang ngan 'gror bsregs par mdo las bshad na sdang bas stong pa nyid shes rab kyi pha rol tu phyin pa'i don la phyir phyogs pa bsregs pa smos ci dgos nges par bsregs pas mos pa med du zin na yang stong pa nyid kyi don la skur ba gdab par mi bya'o/ /gnyis pa la lnga/ sdug bsngal chung ngus kyang chen po bsal rigs pa dang/ theg chen gyi spyod pa la sdug bsngal ba cung zad yod kyang gtan gyi sdug bsngal sel phyed de la sdang bar mi rigs pa dang/ bde ba chen po'i don du 'bad rigs kyi chung ngu la chags par mi rigs pa dang/ theg pa chen po la dga' bar rigs pa dang/ don bsdu ba'o/ /dang po ni/ kha cig 'di skad du theg pa chen po la sdang bar rigs te/ mgo gtod pa la sogs pa'i dka' spyad chen po mi bzod pa'i phyir dang/ zab mo rtogs par dka' ba'i phyir ro zhe na/ phral lan tsha skyed pa'i dug gis 'chi ba'i sdug bsngal skyed pa'i dug ni bsal bar bya bar ji ltar sman dpyad las bshad pa bzhin du tshe 'di'i chung ngu'i sdug bsngal gyis kyang ma 'ongs pa'i mi phan pa chen po bsal bar bgyis pa ci zhig 'gal de ltar rigs pa kho na'o/ /gnyis pa ni/ chos sdug bsngal gyi rgyu yin yang sdang bar mi rigs te/ sdug bsngal cung zad kyis gzhan la phan pa rgya chen po sgrub pa'i phyir te/ yid dge bas kun nas bslang nas lus ngag gi las dge bar 'gyur zhing/ @059a @#/ /chos rnams sngon du yid 'gro zhing theg pa chen po'i mdo las yid ni gtso bo zhes grags pas byang chub sems dpa'i dka' spyad kyi sdug bsngal gyis kyang gzhan la phan par 'dod yid kyis phan par byas pa cis mi phan par 'gyur te/ gtar ba dang bsreg pa la sogs pa da lta mi bde'ang phyis rjes su phan par 'gyur ba bya rigs na bdag dang gzhan dag la bde ba dang/ phan pa rgya chen po'i rgyur 'gyur ba'i da lta'i sdug bsngal ba cung zad nyams su lan par rigs pa lta ci zhig smos te chos 'di dus gsum gyi sangs rgyas kyi gnas lugs yin no/ /yang na bzang po'i lugs yin zhes pa'o/ /gsum pa ni/ gal te bde ba chung ngu yongs su btang bas bde ba rgya chen po mthong bar 'gyur na byang chub sems dpa' brtan pas bde ba spangs shing rgya che ba rang dang gzhan gyi rgyud la thar pa'i bde ba 'byung ba gzigs la bde ba chung ngu mgo yod pa'i bde ba tsam btang bar mdzad cig /gal te bde ba chen po'i don du bde ba chung ngu de yang ma bzod na ngas ni nad zhi ba'i don du sman pa dag gis ni mi zhim pa'i sman sogs sbyin par byed pa nyung bar 'gyur na de ni sdang ba rigs pa ma yin pas chung ngu'i don du cha mi btang zhes gsungs pa ltar bya'o/ /gzhan yang sems can dman pa'i dor gnod par 'gyur ba gang yin pa de byang chub sems dpa'i spyod pa byed pa'i dus su la lar mkhas pas phan par mthong bas sdug bsngal cung zad tsam gyi don du bde @059b pa chen po nyams par mi bya'o/ /'o na sdug bsngal gyi rang bzhin yin pas thams cad du yang spang bar bya'o/ /zhes gsungs pa'i lung dang 'gal lo zhe na/ spyir btang la de lta yin mod kyi dmigs kyi bsal na byang chub sems dpa' 'khor bar gnas pa rang gzhan kun la bde ba'i rgyu 'ba' zhig yin no/ /spyir btang ba dang dmigs kyi bsal ba'i gnad bkag dag bstan bcos ni kun la bsngags pas spyir btang dmigs bsal gyi don la mkhas par bya'o/ /bzhi pa ni/ theg pa chen po'i sde snod gang zhig las sems can thams cad sdug bsngal dang bral 'dod kyi snying rje sngon du btang ba'i byang chub sems dpa'i spyod pa yongs su rdzogs pa kun dang/ stong nyid rtog pa'i ye shes dri ma med pa rdzogs par bshad pa las pas? yang shes rab can su zhig nga la smad smod par ma rigs te/ bla na med pa'i byang chub thob pa'i thabs rdzogs par de las bstan gyi theg pa dman pa'i sde snod las ma bstan pa'i phyir/ lnga pa ni/ byang chub sems dpa'i spyod pa shin tu rgya chen po dang gnas lugs kyi don rab tu zab mo la thos pa tsam gyis skrag nas sgyid lug cing bdag nyid sngon yang theg pa chen po'i sde snod la ma sbyangs pas skur ba 'debs par byed pa ni/ bdag dang gzhan gyi dgra phul du byung ba yin la/ de lta bu'i dgra rnams rmongs pa yis da lta 'di na theg pa chen pa la smod par byed do/ /gnyis pa theg pa chen po'i sde snod bkar sgrub pa la gsum/ phar phyin gyi spyod pa bstan pa dang/ byang chub chen po'i lam rdzogs pa @060a @#/ /de las shes dgos pa dang/ sangs rgyas kyi che ba'i bdag nyid de las rdzogs par shes dgos pas bkar sgrub pa'o/ /dang po la gsum/ theg chen gyi sde snod la nyes bshad cung zad kyang med pa dang/ theg pa chen po'i don de las bstan pa dang/ des na sde snod de nyid bkar grub pa'o/ /dang po ni/ theg chen gyi sde snod 'di la nyes bshad kyi tshig ci zhig yod cung zad kyang med par thal/ sbyin dang tshul khrims bzod brtson 'grus bsam gtan shes rab ste spyod pa phar phyin drug dang/ spyod pa'i rten sems bskyed dang/ de'i rgyu snying rje'i bdag nyid rnams theg pa chen po yin la/ de rdzogs par theg pa chen po'i sde snod las sangs rgyas kyis gsungs pa'i phyir ro/ /gnyis pa ni/ lag rjes so so'i dbang du byas nas tshul khrims dang/ sbyin pas mngon mtho'i lus dang longs spyod grub pas/ gnas skabs gzhan gyi don dang brtson 'grus dang bzod pas gnas skabs la ltos nas bdag nyid kyi don grub pa dang bsam gtan dang shes rab gnyis kyis chos yang dag par bsdu ba'i mdo las/ sems mnyam par bzhag na yang dag pa ji lta ba bzhin du shes par 'gyur ro/ /zhes gsungs pa ltar/ thar pa'i rgyu yin pas phar phyin drug po de ni theg pa chen po'i sde snod kyi don ni bsdus pa yin la/ de'i don bzung na theg pa chen po'i don bzung ba dang/ de ston pa'i tshig bzung na theg chen gyi tshig bzung bar 'gyur ba'o/ gsum pa ni/ bdag dang gzhan la phan pa'i rgyu gnas skabs dang/ thar pa'i @060b don mdor bsdus nas theg pa dman pa'i sde snod las sangs rgyas kyi bstan pa de dag ni theg pa chen po'i sde snod las gsungs pa'i pha rol tu phyin pa drug gi khongs na lhag dang bcas pa 'dus nas yod pa de bas na theg pa chen po'i sde snod 'di ni sangs rgyas kyi bka' yan par nges par 'dod par bya'o/ /gnyis pa ni/ bla na med pa'i byang chub kyi lam chen po'i bsod nams dang ye shes kyi tshogs gnyis kyi rang bzhin sangs rgyas kyis byang chub sems dpa'i sde snod gang la bstan pa'i theg pa chen po de tshogs gnyis kyi rang bzhin rgyas par mi shes pas mdo nges pa rnams mi bzod do/ /gsum pa la gsum/ gzugs sku'i rgyu mtha' yas pa theg chen las gsungs pa dang/ theg dman gyi sde snod nas bshad pa'i zad pa shes pa dang/ theg chen gyi sde snod nas bshad pa'i zad skye mi shes pa stong nyid rtogs pa'i don du gcig pa dang/ theg pa chen po'i don ma rtogs na btang snyoms su bzhag par rigs kyi sdang bar ma rigs pa'o/ /dang po ni/ 'bras bu mthar thug pa'i gnas skabs kyi rgyu'i yon tan nam mkha' ltar bsam yas pas 'bras bu rgyal ba'i yon tan bsam yas pa sangs rgyas kyi gsungs pa gang gi phyir sangs rgyas bdag nyid chen pos/ theg chen las bshad pa 'dir bzod par gyis shig pa'o/ /de bsam gyis mi khyab pa ji ltar zhe na/ ston pas shA ri'i bu la sangs rgyas kyi tshul khrims kyi phung po la sogs pa'i mtha' shes sam dris pas/ 'phags pa shwa ra @061a @#/ /dwa ti'i bus sangs rgyas kyi yon tan mtha' yas lta zhog tshul khrims kyi phung po tsam yang ma shes pa des na sangs rgyas bdag nyid chen po de'i yon tan bsam yas par cis mi bzod de lta bu yod pa yid ches par bya la/ rgyu mtha' yas pa sngon du ma song na/ 'bras du mtha' yas pa mi 'byung la sangs rgyas kyi yon tan mtha' yas pa de'i phyir/ de'i rgyu tshogs pa gnyis mtha' yas la de yang rdzogs par theg chen gyi sde snod nyid las bstan pas nges par bkar khas blang bar bya'o/ /gnyis pa ni/ rigs pa drug cu pa'i 'grel par drangs pa'i theg chen gyi sde snod las/ gang sdug bsngal 'di ma lus par spangs pa/ nges par spangs pa byang bar gyur pa/ zad pa 'dod chags dang bral ba/ 'gog pa nye bar zhi ba nub pa/ sdug bsngal gzhan gyis mtshams mi sbyor zhing mi 'byung mi skye ba 'di ni zhi ba/ gya nom pa ste/ 'di lta ste phung po thams cad nges par spangs pa/ sred pa zad pa/ 'dod chags dang bral ba 'gog pa/ mya ngan las 'das pa'o/ /zhes gsungs pa dang/ yang mdo las gang yang skye ba zad do changs par spyod pa bsten no/ /bya ba byas so/ /'di las srid pa gzhan mi shes so/ /zhes gsungs pa'i don sdud pa na/ rigs pa drug cu pa las/ zhig pa shes pa ji lta bu zhes sogs yin la/ de yang theg pa dman pa'i dgra bcom pa thob pa'i tshe bdag gi skye ba zad do snyam pa'i shes pa de rang bzhin gyis skye ba med pa shes pa'i don du ngas par bshad dgos par gsungs te/ gzhan du na mdo snga ma @061b dang 'gal ba'i phyir/ yang srid phye mar nying mtshams sbyor ba'i skye ba zad pa 'ba' zhig la bshad du mi rung ste/ lhag bcas kyi dus na yang skye med kyi don du 'gyur ba la dgongs nas/ gang 'di zhes nye tshigs gsungs pa dang yang srid phyi mar mi skye ba'i dbang du mdzad nas sdug bsngal gzhan gyi zhes pa nas/ mya ngan las 'das pa'o zhes gsungs pa'i phyir ro/ /sdug bsngal 'di zhes pa spyir sgra phye brag la 'jug pas nyon mongs mtha' dag zad cing mi skye ba la dgongs pa'o zhe na/ spyi'i sgra spyi'i don la bshad du mi rung na bye brag la bshad dgos kyang 'dir ni/ spyi'i steng nas bshad pa la 'gal ba cung zad kyang med pa'i phyir ro/ /des na theg pa chen po'i sde snod las rang bzhin gyis skye ba med pa'i 'gog pa bstan pa dang/ gzhan gyi ste nyan thos sde pa khyod rad bkar 'dod pa'i theg pa dman pa'i sde snod las zad pa stong pa nyid bstan pa gnyis zad mi skye don du ni ste rang bzhin gyis zad pa dang mi skye ba'i don du gcig pa dang/ de shes pa zad mi skye shes pa'i don du gcig pas de'i phyir/ theg pa chen po'i sde snod bka' yin pa de'i blo'i yul du bzod par gyis shig /stong nyid ces bya ba la lam gyi dmigs pa dang/ sangs rgyas chen po'i chos sku'i bdag nyid sngar bshad pa de ltar rigs pas rjes su ltas na theg chen gyi sde snod dang cig shos theg dman gyi sde snod las gsungs pa mkhas pa rnams la bka' yin man ces mi mnyam ste mi mnyam pa'i rgyu mtshan med cing mnyam pa'i sgrub byed mtha' yas pa'i phyir ro/ /gsum pa ni/ de bzhin gshegs pas dgongs te gsungs pa rnams @062a @#/ /shes par sla ba min pa de yi phyir theg pa gcig tu zad pa dang mthar thug pa'i theg pa gsum gsungs pas phyi ma dgongs te gsungs pa yin gyi/ snga ma la skur ba gdab par mi bya ste/ don ma rtog na/ btang snyoms su bzhag pa nyid kyis bdag bsrung bar bya ste the tshom mi za bag btang snyoms kyis ni sdig par mi 'gyur la sdang bas sdig par 'gyur la/ dge bar mi 'gyur ba'i phyir ro/ /de bas theg chen la zhe sdang ba bdag legs su 'dod pas bya bar mi rigs pas gnas 'di la gza' bar bya'o/ /gsum pa theg dman gyi sde snod las bshad pa theg pa chen po'i lam 'bras rdzogs pa min pa la gsum/ nyan thos kyi sde snod las byang chub sems dpa'i spyod pa rdzogs par ma gsungs pa dang/ bden bzhi dang phyogs mthun tsam nyams su blangs pas sangs rgyas mi 'grub pa dang/ mkhas pas theg chen gyi sde snod bkar bzung rigs pa'o/ /dang po ni/ nyan thos kyi theg pa ston pa'i theg dman gyi sde snod de las ni byang chub sems dpa'i smon lam dang bsngo ba rlabs po che rnams dang/ snying rje chen po la sogs pa dang/ sa dang sbyin pa sogs pa'i phar phyin gyi spyod pa dang/ tshogs gnyis rlabs po che dang/ byang sems kyi mthu rmad du byung ba so skye dang nyan rang gis bsam gyis mi khyab pa'i theg pa chen po'i sde snod las gsungs kyang theg pa dman pa'i sde snod las spyod pa dang yongs bsro? sogs rgyas par ma bshad pas/ theg dman kyi sde snod nas bshad par nges te de tsam zhig kho na nyams su blangs pas bskal pa grangs med gsum na 'tshang rgya ba'i lam rdzogs par sgom pa'i byang chub sems dpar ga la 'gyur te/ byang chub @062b sems dpa'i lam ma tshang ba'i phyir ro/ /theg pa dman pa'i sde snod las kyang theg pa gsum ga'i lam bshad pas ci'i phyir/ theg chen mtshang zhe na/ theg pa dman pa'i sde snod las theg pa chen po'i lam rdzogs pa sangs rgyas kyis ma bshad de/ nyan thos rnams la re shig ma bstan pa'i phyir ro/ /de yang byang chub sems dpa'i bla na med pa'i byang chub kyi phyir tu byin gyis brlabs pa yin pa'i phyir ro/ /don 'di la rgyal ba las lhag pa'i tshang ma gzhan su yod med pas theg chen gyi sde snod spang bar mi bya'o/ /gnyis pa ni/ 'phags pa'i bden pa bzhi dang phyogs mthun so bdun po tsam bskal pa grangs med gsum du sgoms pas sangs rgyas thob par 'gyur ro zhe na/ theg pa dman pa'i dgra bcom pa las sangs rgyas kyi 'bras bu gang gis lhag ste sangs rgyas lhag pa min par thal/ sangs rgyas gsung gi byin rlabs gang gis nyan thos dgra bcom pa'i 'bras bu thob nus pa'i 'phags pa'i bden pa bzhi'i don mi rtag sogs bcu drug dang byang chub kyi phyogs mthun so bdun po tsam zhig bsgoms pa dang ldan pa yi lam ni nyan thos dang thun mong ba yin la rgyu thun mong ba las 'bras bu thun mong min pa 'byung mi srid pa'i phyir ro/ /gsum pa ni/ byang chub sems dpa' spyod pa rdzogs pa la gnas pa'i don nyan thos kyi mdo las ni bka' ma stsal ba theg pa che las bka' stsal pa/ de'i phyir mkhas pa rnams kyis theg chen gyi sde snod bkar bzung bar bya'o/ /yang na zung zhig pa'o/ /bzhi pa theg pa gsum gsungs pa'i dgos pa @063a @#/ /ni/ gdul bya bkri ba'i rim pa yin te/ brda sprod pa dag ji lta bur dang por yi ge'i phyi mo klog tu 'jug pa ltar de bzhin du sangs rgyas rnams gdul bya la thog ma nyid nas rtogs par dka' ba'i chos mi ston gyi blo yul du ji tsam bzod pa'i chos ston te/ de'i rim pa 'di ltar yin te/ kha cig la ni srog gcod sogs sdig pa las rnam par bzlog pa'i phyir chos ston te de yang gdul bya skyes bu chung ngu'i bsam pa can kha cig bsod nams kyi 'bras bu lha mi'i go 'phang 'grub par bya ba'i phyir ro/ /gdul bya skyes bu 'bring gi bsam pa can kha cig la ni 'khor ba mtha' gcig tu spang bya dang myang 'das blang bya gzung 'dzin rdzas tha dad pa gnyis la brten pa ston la/ gdul bya kha cig la ni gzung 'dzin rdzas tha dad kyis stong pa'i shes pa don dam du grub pa ston pas kha cig la ni gnyis mi brten pa'o/ /gnas lugs zab mo dngos po la bden par zhan pa'i bu 'khrig can 'jigs pa skyed pa stong pa nyid dang/ snying rje'i snying po can ni bla na med pa'i byang chub bsgrub pa dbang po rab tu gyur pa kha cig la stan to/ /don bsdu ba ni/ de ltar mkhas pas theg chen la khong khro ba ni zad par bya zhing rdzogs pa'i byang chub grub par bya ba'i phyir tu lhag par rab tu dad par bya'o/ /theg pa chen po'i mdo sde la rab tu dad cing de las bshad pa nyams su blangs shing spyod pa yis bla na med pa'i byang chub 'thob par 'gyur zhing 'jig rten pa'i bde ba kun kyang zhar la 'grub pas theg pa chen po'i sde snod la lhag par gus par bya zhing de'i don nyams su blangs par bya'o/ / @063b gsum pa don bsdu ba ni/ rgyal srid la gnas pa'i skabs der ni sbyin pa dang dge bsnyen dang bsnyen gnas kyi tshul khrims dang bzod pa'i chos ni khyad par du khyim pas sgrub sla bas khyim pa la bshad pa yin la/ khyad par du zhes pa rab tu byung ba las lhag par ston pa ma yin gyi khyim pas drug gi nang nas de gsum sgrub sla ba yin no/ /phar phyin dang po gsum/ snying rje'i snying po can de bstan par goms par mdzod ces pa'o/ /bzhi pa rgyal po'i kun spyod khyad par can la slob mi nus na rab byung bya bar gdoms pa ni/ 'on te 'jig rten mi bsrun pa'i phyir srog gcod sogs drug po ma byas par chos kyis rgyal srid bgyid dka' na nges na chos kyi ched dang snyan pa'i grags pa'i don du khyod kyis rab tu byung ba 'thob par mdzad par rigs so/ /mtshan don ni/ rgyal po la gtam bya ba rin po che'i phreng ba las/ rgyal po'i tshul bstan pa ste/ le'u bzhi pa'i 'grel pa'o// //thar pa myur du thob par 'dod pas rab tu byung bar gdams pa la gnyis/ khyim pa dang rab tu byung bya'i byang chub sems dpa'i blang dor gyi gnas mdor bstan pa dang/ rgyas par bshad pa'o/ /dang po ni/ rgyal srid btang ba de nas rab tu byung ba yis dang por lhag pa'i tshul khrims kyi bslab pa la rab tu gus par bya la so so thar pa ni 'dul ba mdor bsdus dang lung du ma bu bzhi 'dul ba dang/ bcas pa dang sde snod gsum la mang du thos pa dang nga'i don gtan la dbab pa la bsgrims par byas nas blang bya'i gnas rdzogs par shes par bya'o/ /de nas nyes pa phran tshogs shes nas spang bar bya ba'i gzhi rnams spangs par bya'o/ /de las @064a @#/ /kyang spang bya lnga bcu rtsa bdun bsgrags pa rnams 'bad de nges par rtogs par byas nas spang bar bya'o/ /gnyis pa la gnyis/ skyon spang ba dang/ yon tan blang ba'o/ /dang po la gnyis/ rgyas par bshad pa dang/ don bsnga ba'o/ /dang po la gsum/ khro ba sogs dang po bco lnga bshad pa dang/ tshul chos nas zhe gcig pa mi 'chi ba'i rtog pa'i bar bshad pa dang/ zhe gnyis pa rang gi yon tan sgrog pa sogs bshad pa'o/ /dang po la gnyis/ khro ba sogs bcu bzhi bshad pa dang/ nga rgyal bshad pa'o/ /dang po ni/ khro ba bshad bya dang sems kyi 'khrug pa 'chad byed de/ mdo las bstan pa'i bshad bya bkod nas bstan bcos kyi 'chad pa yin la/ 'og ma rnams la yang de bzhin du shes par bya'o/ / khro ba de dang rjes su 'brel pa khro ba'i rgyun dam du 'dzin pa 'khon du 'dzin pa dang/ 'chab pa gzhan gyis nyes pa glengs na sgyu thabs kyis mi mngon par byed pa'i sdig pa 'chab pa ste tshigs pa ni sdig pa la zhe nas mi gtong ba'o/ /g.yo ni gzhan shin tu bslu ba ste sgyu ni sems rgyud gya gyu ba'o/ /phrag dog ni rnyed bkur la chags pa'i dbang gis rnyed bkur sogs gzhan gyi yon tan la mi bzod pa'i gdung ba'o/ /ser sna ni gtong bas 'jigs pa nyid kyis yo byad dam du 'dzin pa'o/ /ngo tsha med pa dang khrel med pa ni rang dang gzhan la dmigs pa rgyu mtshan du byas pa'i sgo nas nyas spyod la mi 'dzem pa'o/ /khangs pa ni bla ma sogs la 'dud par mi byed pa'o/ /nyes stsol khros pas bslang ba khro gnyer sogs lus ngag gi g.yo ba @064b 'byung ba'o/ /rgyags pa ni longs spyod sogs kyis dregs pa rang gi sems gtugs pa'o/ /bag med pa chags pa la sogs pa'i dbang gis dge ba rnams la mi sbyor zhing zag pa dang bcas pa la sems mi bsrung ba'o/ /gnyis pa ni/ nga rgyal rnam pa bdun yin te de ni rab tu bye ste bshad par bya'o/ /nga rgyal ni lnga bcu rtsa bdun gyi ya gyal gcig tu bgrang bar bya ba yin no/ /de la dang po ni/ de la mngon ngar rlom byed pa dman pas bdag dman zhing mnyam pa dang mnyam mo snyam pa dang/ dman pas bdag lhag pa'ang mnyam snyam pa'i bdag nyid kyi nga rgyal zhes bya'o/ /dman pas dman snyam pa nga rgyal du ji ltar 'gyur snyam na/ dman pa de bas bdag dman yang rung gi snyam du khengs pa'i rnam pa can no/ /gnyis pa ni/ chos gang gis bdag nyid las khyad 'phags pa dang mnyam par rlom pa gang yin pa de lhag pa'i nga rgyal lo/ /gsum pa ni/ khyad par du 'phags pas bdag khyad par 'phags pa rlom ba gang shin tu mtho bas mtho snyam pa nga rgyal las kyang nga rgyal te 'bras kyi steng du phol mig dag 'byung ba bzhin du nyes dmigs lhag par che ba thub yin te/ ngan 'gror nga rgyal gyis 'khrid cing/ /mi'i dga' ston bcom pa dang/ gzhan gyi zan za'i dran dang ni/ /glen dang mi sdug can du 'gyur/ /zhes gsungs pa ltar ro/ /bzhi pa ni/ thams cad kyi gzhi ma nye bar len pa'i phung po zhes bya ba lnga po ngang gis stong pa de dag la rmongs pas nga'o snyam du 'dzin pa gang yin pa de ni nga'o snyam par bshad de nga'o snyam pa'i nga rgyal lo/ /lnga pa ni/ rgyun @065a @#/ /du zhugs la sogs pa'i 'bras bu ma thob pa thob snyam pa gang yin pa de ni mngon pa'i nga rgyal te/ drug pa ni/ sdig las byed pa las ngas bya snyam du bstod pa ni mkhas pas log pa'i nga rgyal du rtogs so/ / bdun pa ni/ bdag gson yang dgos pa med pa nyid do zhes bdag nyid smod pa gang yin pa de dman pa'i nga rgyal zhes bya ste de dag mngon pa'i mdo bdun du bshad pa yin no/ /yang na grangs mdor bsdus pa'i don to/ /gnyis pa la tshul chos sogs ni tshul chos ni rnyed dang bkur sti'i phyir dbang po sdom par byed pa ste 'di dag gi don sngar rgyas par bshad zin to/ /kha bsag ni rnyed dang bkur sti'i phyir tshigs 'jam sngar ni smra ba'o/ /gzhog slongs ni rjas de ni thob par bya ba'i phyir gzhan gyi rdzas la bsngags par byed pa'o/ /thob kyis 'jal ba ni/ rnyed pa'i phyir mngon sum du ser sna che ba sogs gzhan la smod byed pa'o/ /snyed pas rnyed par rnams 'dod pa ni sngar thob pa la bsngags par byed pa'o/ /de lnga grangs re re 'dzin pa'o/ /nyer gcig pa ni/ skyon zlos pa ni/ gzhan gyis 'khrul par 'gyur ba nyes pa gang dang gang byas pa de dang de ni gang zlos pa'o/ /nyer gnyis pa spungs med ni gzhan la mgu bar ma gyur pa nad las gyur pa'i dbang gis yid slong ba'o/ /nyer gsum pa ni/ rgyu snga ma gnyis dang bdag gi yo byad ngan pa la chags pa'i rgyu gsum las byung la de ni/ le lo can gyi yin/ nyer bzhi pa bdag gzhan tha dad kyi 'du shes ni 'du shes gang chags sdang mun gyis sgribs pa'o/ /chags sdang rmongs @065b gsum gang yang yid la mi byed pa gang yin te'am dge mi dge yid la mi byed pa ni/ nyer lnga pa sems la lta ba med par bshad do/ /chos mthun par bya ba rnams la ni le las bkur sti nyams pa gang yin pa de ni nyer drug pa'o/ /bla mar byas pa na bcom ldan 'das kyi tshul dang ldan pas bya ba min te/ de ltar byed pa ni nyer bdun pa skye bo ngan pa yin par 'dod nyer brgyad pa zhen pa ni kun nas dkris pa mngon gyur yin yang chung ngu 'dod pa'i 'dod chags las byung ba'o/ /nyer dgu pa yongs zhen ni gzugs sgra sogs yul lnga la sred pa 'dod pa las byung ba'i kun nas dkris pa che ba rab tu gyur pa ba yin no/ /sum cu pa chags pa ni rang gi rdzas la chags pa'i 'dod bya dang ldan pa'i yid do/ /gzhan gyis rdzas la zhen pa'i brnabs sems ni so gcig pa mi rigs pa'i chags pa zhes bya'o/ /spang bar bya ba bud med la chags nas tshig gis bstod pa'i kun slong ni so gnyis pa chos min pa'i 'dod chags so/ /sdig pa 'dod pa'i gang zag yon tan med bzhin du yon tan dang ldan par ston pa ni so gsum pa tshul 'chos pa'o/ /so bzhi pa 'dod chen ni rdzas la shin tu brkam pa ste chog shes pa'i dpal las 'das pa'o/ /so lnga pa thob 'dod ni bdag nyid ci nas kyang yon tan yang dag pa dang ldan zhes pha rol pos go bar 'dod pa'o/ /so drug pa mi bzod pa ni gzhan gyis gnod pa byed pa dang rang la sdug bsngal byung ba dag kyang mi bzod pa'o/ /so bdun pa chul med pa ni slob dpon dang bla ma'i bya ba rnams la ma gus pa'o/ /so brgyad pa bka' blo bde ba ma yin pa ni/ gang la chos mthun pas rigs par tshig smra ba na nga @066a @#/ /dge yang rung sdig kyang rung zhes sogs kyis ma gus pa'o/ /so dgu pa nye du dang 'brel pa'i rnam rtog ni nye du la byams pa'i chags pa'o/ /bzhi bcu pa de bzhin du yul la srid pa ni/ nge thob pa'i don du yul ngan pa la yang de'i yon tan brjod pa'o/ /de bzhin nyid du zhe gcig pa ni mi 'chi ba'i rtog pa ni gang 'chi ba'i 'jigs pas mi dogs pa'o/ /gsum pa la/ rjes su rnam rig gi rtog pa sogs ni zhe gnyis pa rjes su rnam rig dang ldan pa'i rang gi yon tan gzhan gyis rig par 'dod pa'i rtog pa ni bdag nyid ci nas kyang gzhan dag gis yon tan bdog pa'i rnam pa yis ji ltar byas na bla mar byed par 'gyur snyam pa'o/ /zhe gsum pa gzhan la rjes su chags pa dang ldan pa'i rnam rtog yin pa ni skyes pa'am bud med gzhan dag la chags pa dang/ zhe bzhi pa gnod sems reg pa ni de yis phan pa dang mi phan pa sems pa'o/ /zhe lnga pa mi dga' bas brtan pa med pa'i yid do/ /zhes drug pa 'dod pas brnyogs pa'i yid yin no/ /zhe bdun pa snyoms pa ni dge ba la brtson pa med pa'i lus sgyid lug pa'i don gyi le lo yin no/ /zhe brgyad pa 'gyur ba ni nyon mongs pa'i dbang gis ni lus dang kha ni 'gyur ba'o/ /zhe dgu pa/ zas mi 'dod pa ni bza' drags pas lus mi bde ba yin par bshad do/ /lnga bcu pa sems ni shin tu dma' ba nyid ni 'di sems zhum pa yin pa nyid du bstan to/ /nga gcig pa 'dod pa la 'dun pa ni/ 'dod pa'i yon tan lnga dag la 'dod pa dang/ don du gnyer ba nyid do/ /nga gnyis pa gnod sems @066b ni bdag dang/ bdag gi grogs po dang/ bdag gi dgra'i phyogs la dus gsum du bdag dang bdag gi gnyen la gnod pa byas so byed do byed par 'gyur ro snyam du dogs pa dang bdag gi dgra la phan btags so 'dogs so 'dogs par 'gyur ro snyom du gzhan la gnod par sems pa rgyu dgu las ni byung ba yin no/ /lus sems lci ba'i phyir las bral ba las byed mi 'dod gang yin pa ni nga gsum pa rmugs pa'am brnya ba'o/ /nga bzhi pa gnyid ni gnyid nyid de/ /'jug shes drug yul la 'jug pa rang dbang med par bsdud phyed do/ /nga lnga pa rgod pa ni/ zas kyis rgyags pas lus sems rab tu ma zhi ba'o/ /nga drug pa 'gyod pa ni bya ba ngan par byas pa la 'gyod pa phyis gdung ba las byung ba'o/ /bden pa dang dkon mchog gsum dang las 'bras sogs la blo rnam gnyis ni nga bdun pa the tshom mo/ /lnga bcu rtsa bdun po de dag ni phal cher spang bya'i dbye ba yin la/ kha cig sems byung ngos bzung ba snang ba yang nyes pa'i rgyu dang 'bras bu ngos bzung ba'i ched du snang bas de la brtags te 'bad pas spang bar bya la/ phal cher bshad bya dang 'chad byed gnyis gnyis kyis bstan cing/ bshad bya 'ba' zhig bstan pa yang yod do/ /gnyis pa don bsdu ba ni/ sngar bshad pa'i nyes pa de dag khyim pa'i byang chub sems dpas kyang spang bar bya zhing/ byang chub sems dpa' rab tu byung ba sdom brtson can gyis lhag par yang spang bar bya'o/ /gnyis pa yon tan blang ba la gnyis/ gnas skabs kyi yon tan dang/ mthar thug gi yon tan no/ /dang po la gnyis/ spyir bstan pa dang/ sa bcu'i @067a @#/ /rnam gzhag go /dang po la bzhi/ yon tan gyi ngo bo bsdus te bstan pa dang/ so so'i ngo bo ngos bzung ba dang/ so so'i 'bras bu dang/ thun mong gi 'bras bu'o/ /dang po ni/ byang chub sems dpa' nyes pa de rnams dang bral na yon tan rnams la bde blag tu brten par 'gyur bas/ nyes pa spang zhing yon tan la brten par bya'o/ /de la byang chub sems dpas yon tan mdor bsdus te bsten par bya ba ni gang zhe na sbyin pa dang tshul khrims dang bzod pa dang/ brtson 'grus dang/ bsam gtan dang/ shes rab dang/ snying rje dang/ des kun nas slang ba'i sems bskyed sogs so/ /gnyis pa ni sbyin pa ni/ rang gi nor gzhan la yongs su gtong ba'i sems pa dang des kun nas slang ba'i lus dag gi las so/ /tshul khrims ni gzhan la phan par bya ba'i ched du rang nyid 'ba' zhig don du gnyer pa spangs pa'o/ /bzod pa ni khro ba spangs pa ste chos la nges par sems pa sogs so/ /brtson 'grus ni dge ba'i bya ba la spro ba nyid do/ /bsam gtan ni dge ba la rtse gcig pa bying rgod ro myang gi nyon mongs med pa'o/ /shes rab ni bden pa gnyis dang bzhi la sogs pa'i don gtan la 'bebs pa'o/ /snying rje chen po ni sems can la dmigs nas sdug bsngal dang bral 'dod kyi snying rje gzhan don la ro gcig pa'i blo gros so/ /gsum pa ni/ sbyin pas 'bras bu longs spyod dang tshul khrims kyis bde 'gro'i bde ba dang/ bzod pas mdangs ldan pa dang/ brtson 'grus dge bas gzi brjid dang/ @067b bsam gtan gyis bying rgod la sogs pa'i nyon mongs zhi ba dang/ blo yis srid pa las grol bar byed pa'o/ /snying brtse bas ni rang gzhan don kun sgrub pa'o/ /bzhi pa ni/ yon tan bdun po 'di dag ma lus par cig car slob lam gyi gnas skabs su gom par bas shing pha rol tu phyin pa yis ye shes bsam gyis mi khyab pa'i yul 'jig rten gyi mgon po yang dag par rdzogs pa'i sangs rgyas nyid thob par 'gyur ro/ /gnyis pa la gnyis/ spyi'i don dang/ yan lag gi don to/ /dang po ni; dbu ma la 'jug pa'i 'grel pa las/ byang chub sems dpa' rnams kyi zag pa med pa'i snying rje la sogs pas zin pa nyid char rnam par phye ba na/ sa zhes bya ba'i mang thob ste/ yon tan gyi gnas su gyur pa'i phyir ro/ /zhes pa'i ngo bo dang/ yon tan gang gis zin pa dang/ sa'i ming thob tshul dang/ ming don dang bzhi bstan pa'o/ /dang po ni/ nyon mongs can gyi ma rig pa bden 'dzin dang/ de'i bag chags gang rung gis bslad pa ni/ zag bcas dang bslad pa de dang bral ba'i ye shes ni zag pa med pa yin te/ tshig gsal las/ ma rig pa'i rab rib dang bral ba dag gi ye shes zag pa med pa'i yul gyi rang bzhin la ltos nas ni ma yin no/ /zhes gsungs pa bzhin no/ /de yang sangs rgyas kyi sa ma thob tshun chad du ma rig pa'i bag chags kyis ma bslad pa'i shes pa ni/ 'phags pa rnams kyi mnyam gzhag mi rtog pa'i ye shes min pa med la/ rjes thob tu bag chags kyis bslad pa can du skye'o/ /sa bdun pa'i bar du nyon mongs can gyi ma rig pas bslad @068a @#/ /pa yod la/ sa brgyad pa nas dang dgra bcom pa gnyis la de zang bas des bslad pa med kyi ma rig pa'i bag chags kyi bslad pa ni yod do/ /gnyis pa ni/ snying rje chen po dang yon tan brgya phrag bcu gnyis sogs kyi nus pas zin pa'o/ /gsum pa ni/ yon tan gyi gnas sam rten byed pas sa zhes bsnyad pa'o/ /bzhi pa la de ltar ro/ /rang dga' sogs sa so sor 'jog tshul ni/ bzhi'i sgo nas 'jog pa'i khyad par dang po ni/ sa dang po la yon tan brgya phrag bcu gnyis dang/ sa gnyis pa la stong phrag bcu gnyis sogs yon tan gyi grangs gong nas gong du 'phel ba'o/ /khyad par gnyis pa ni/ sa so so'i skabs kyi dri ma sbyong pa'i stobs dang lam bgrod pa'i stobs gong nas gong du 'phel pa mthu phul du byung ba gong nas gong du thob pa'o/ /khyad par gsum pa ni/ sa dang por sbyin pa'i phar phyin lhag pa dang/ sa gnyis par tshul khrims kyi phar phyin lhag pa sogs phar phyin ltag pa'i khyad par ro/ /khyad par bzhi pa ni/ sa dang por 'dzam bu gling la dbang pa dang gnyis par gling bzhi la dbang ba'i rgyal por skye ba sogs rnam smin gyi skye ba gong nas gong du 'phel ba'o/ /sa de dag kyang/ rjes thob dang bcas pa la zad pa yin gyi/ mnyam gzhag 'ba' zhig tu zad pa ni min no/ /gnyis pa la gsum/ nyan thos kyi sa brgyad yod pa ltar/ byang chub sems dpa'i sa bcu dbye ba dang/ sa bcu so so'i ngo bo yon tan dang bcas pa dang/ don bsdu ba'o/ /dang po ni/ ji ltar nyan thos kyi theg pa la rigs kyis dang/ @068b brgyad pa'i sa dang/ mthong ba'i sa dang/ srabs pa'i sa dang/ 'dod chags dang bral ba'i sa dang/ byas pa rtogs pa'i sa dang/ nyan thos kyi sa dang/ nyan thos kyi sa bdun dang/ rang sangs rgyas kyi sa dang ni brgyad bshad pa de bzhin du theg pa chen po la rgyu'i gnas skabs su byang chub sems dpa'i sa bcu'o/ /gnyis pa la bcu yod pa'i dang po sa dang po ni/ sa de dag las sa dang por sa rab tu dga' ba zhes pa mdo sde sa bcu pa las gsungs pa'i yon tan bdun thob pa dang/ mi mthun phyogs kyi mthong spangs dang bral bas byang chub sems dpa' thun mong min pa'i dga' ba khyad par can byed pa'i phyir dang thar pa thob pa'i gegs kyi gtso bo dang/ 'jig tshogs la lta ba dang/ the tshom dang/ tshul khrims dang brtul zhugs mchog tu 'dzin pa'i kun tu sbyor ba gsum spangs shing nyan thos dang rang sangs rgyas kyi sa las 'das shing/ de ba'i sa kun tu 'od dang rjas su mthun pa'i mthong lam skyes pas de ba'i rigs su skyes pa'i phyir dang/ de'i rtsam par smin pas na ste de'i dbang gis sbyin pa'i pha rol tu phyin pa mchog ste ches lhag par 'gyur te/ sa der sbyin pa'i mi mthun phyogs dang bral bas sbyin pa ches lhag pa de tsam du phar phyin lhag ma rnams mi ldan pas sbyin pa lhag pa zhes bya'o/ /yon tan gyi grangs kyi khyad par 'jig rten khams ni brgya g.yo zhing snang bar byed pa sogs yon tan brgya phrag bcu gnyis so/ /'dzam gling gi dbang phyug chen por 'gyur ba ni rnam smin 'phel ba'i khyad par ro/ /gnyis pa sa gnyis pa dri ma med pa zhes bya ba ni/ / @069a @#/ /rang nyid 'ba' zhig gi ched du thar pa yid la byed pa sdom pa'i phyir/ lus dang ngag dang sems kyi las lam bcu char rmi lam du yang 'chal tshul gyi dri ma med pa'i phyir rang gis tshul khrims de dag gnas pa'i phyir yon tan de'i rnam par smin pas ni de thob pa'i dbang gis tshul khrims kyi phar phyin mchog lhag par 'gyur ro/ /yon tan stong phrag bcu gnyis sogs kyang sbyar bar bya'o/ /rnam smin 'phel ba'i bye brag ni dpal ldan gling bzhi la dbang ba'i rgyal srid rin chen sna bdun gyi bdag po 'gro ba la/ phan pa'i 'khor los bsgyur bar 'gyur ro/ /gsum pas gsum pa ni 'od byed pa zhes bya la/ mnyam gzhag tu shes sgrib kyi bud shing sreg par byed pa'i ye shes kyi me mtshan ma zhi ba'i 'od de 'byung ba de'i stobs kyis rang gi lus dang rjas thob kyi gnas skabs su yang nyi ma 'char kha'i snga rol gyi 'od dmar ser zangs kyi 'od dang 'dra ba 'byung ba'i phyir ro/ /sa der bsam gtan bzhi dang/ gzugs med bzhi dang/ tshad med pa bzhi dang/ mngon par shes pa lnga skyes pa dang 'dod chags dang/ zhe sdang dang gti mug yongs su zad pa'i phyir de'i rnam par smin pas na yon tan de dag gi dbang gis sa der bzod pa ches lhag pa dang brtson 'grus kyang lhag par spyod pa'i phyir dang rnam smin lha'i dbang po chen po mkhas par 'gyur ba ste/ mkhas pa de'i dbang gi 'dod pa'i 'dod chags ldog par byed pa yin no/ /bzhi pa sa bzhi pa 'od 'phro ba can zhes bya ba ni yang dag pa'i ye shes zhi ba'i 'od sa @069b gsum pa las ches lhag pa 'byung ba'i phyir 'od 'phro ba can zhes bya la/ dran pa nyer gzhag la sogs pa sde tshan bdun gyis bsdus pa'i byang chub kyi phyogs mthun ma lus pa so bdun po khyad par du ni sgoms pa'i phyir de'i rnam par smin pas na rab mtha' phral bar gnas pa'i lha'i rgyal por 'gyur ro/ /'jigs tshogs la lta ba rab 'byung ba lhan skyes kyis bsdus pa de rang gi mtshan nyid kyis grub par 'dzin pa'i phra ba dang/ gang zag rang rkya par 'dzin pa'i rags pa rnams kun nas 'joms par byed pa la mkhas pa yin no/ /lnga pa sa lnga pa shin tu sbyang dka' ba ni/ 'jig rten gyi khams thams cad na gnas pa'i lha'i bu'i bdud thams cad kyis kyang pham par byed mi nus na/ de'i bka' nyan pa'i bran la sogs pas lta ci smos pas bdud kun gyis shin tu thub par dka' ba'i phyir sa 'di la shin tu sbyang dka' ba zhes bya'o/ /'phags pa'i bden bzhi phra rags sogs dang/ mdo sde sa bcu pa las de las logs su gsungs pa'i bden pa gnyis la sogs pa shes bya phra mo'i don shes pa la mkhas pa 'byung ba'i phyir de'i rnam par smin pas dga' ldan gyi gnas kyi lha'i rgyal por 'gyur ro/ /sa'i 'bras bu ni phyi nang gi mu stegs byed pa thams cad kyi nyon mongs dang lta ba'i gnas ldog par byed pa'o/ /drug pa sa drug pa mngon du phyogs pa zhes bya ste sangs rgyas kyi chos rten cing 'brel par 'byung ba gzugs brnyan dang 'dra ba sogs la mngon du phyogs pa'i phyir dang chos yang dag par bsdus pa las sems mnyam @070a @#/ /par bzhag na yang dag pa ji lta ba bzhin du shes par 'gyur/ zhes gsungs pa ltar sa lnga par bsam gtan gyi phar phyin rdzogs pa de'i stobs kyi shes rab kyi phar phyin rdzogs pas byang chub sems dpa'i thun mong ma yin pa'i zhi gnas lhag mthong goms pa yis bsam gtan gyi phar phyin de'i mthu la brten nas/ 'dod na stong pa nyid la yun ring po'i bar du mngon sum du mnyam par bzhag nus pa'i 'gog pa thob pas rgyas pa'i phyir de'i rnam par smin pa na rab 'phrul dga'i lha'i dbang por 'gyur ro/ /nyan thos rnams kyi mi phrogs pa dang lhag pa'i nga rgyal can zhi bar byed pa'o/ /bdun pa sa bdun pa ring du song ba ste dus bskal ba grangs med gnyis dang/ sa 'og ma rnams las yon tan gyi grangs ni ring du song ba dang ldan phyir dang sa brgyad pa dang ches nye ba'i rgyu yi phyir/ ring du song ba zhes bya'o/ /sa drug pa man chad las ring du song ba gang gi phyir na skad cig skad cig la ste skad cig re re ba der ni 'gog pa la snyoms par 'jug nus pas so/ /rgyu mtshan de nyid kyis nyan thos dang rang sangs rgyas rnams blo'i stobs kyis kyang zil gyis gnon nus pa'o/ /de'i rnam par smin pas na 'dod pa la dbang bsgyur ba'i sa'i bdag por 'gyur ro/ /'phags pa'i bden pa mngon par rtogs pa shes pa'i slob dpon 'phags pa'i thu bo khu mchog chen por 'gyur ro/ /brgyad pas brgyad pa ni de bzhin du gzhon nu'i sa mi g.yo ba ste bden 'dzin zad par spangs pa bden par mi rtog pa'i phyir mtshan 'dzin @070b kyis mi g.yo ba dang de bzhin du lus dang ni ngag dang sems kyi spyod yul bsam gyis mi khyab pa ldan la de yi rnam par smin pas na stong gi bdag po tshangs par 'gyur ro/ /nyan thos dgra bcom pa dang rang sangs rgyas sogs kyis chos kyi don gtan la 'bebs pa la 'phrogs pa med pa'o/ /dgu pa sa dgu pa ni legs pa'i blo gros zhes bya ba ste rgyal po'i bu rgyal tshab tu dbang bskur la khang pa bzhin du 'od zer chen po'i dbang bskur la khang pa'o/ /gang gi phyir na so sor yang dag par rig pa bzhi rdzogs par thob pas sa 'di la blo gros bzang po zhes bya'o/ /de'i rnam par smin pas na stong gnyis kyi bdag po tshang par 'gyur ro/ /gdul bya'i sems kyi bsam pa dris pa la 'gal ba dang 'khrul ba sogs kyi sgo nas dgra bcom pa sogs kyis 'phrogs pa med pa'o/ /bcu pas bcu pa chos kyi sprin yin te/ char sprin las char chen po 'byung ba ltar 'jig rten gyi dge ba'i lo tog spel ba'i ched du dam pa'i chos kyi char 'bebs pa'i phyir/ chos kyi sprin zhes bya'o/ /sa 'di thob na byang chub sems dpa' de la ting nge 'dzin grangs med pa 'bum phrag bcu ji snyed pa'i tha ma la byang chub sems dpa' ting nge 'dzin thams cad mkhyen pa'i ye shes dang khyad par med par dbang bskur ba dang ldan pa zhes bya ba mngon du 'gyur te/ de mngon du gyur ma thag stong gsum 'bum phrag bcu'i gtos dang mnyam pa'i rin po che chen po'i pad-ma rin po che rnam pa thams cad kyi mchog dang ldan pas @071a @#/ /spras pa zhes bya ba nas rgyas par stong gsum 'bum phrag bcur tshang ba'i rdul phra rab kyi rdul snyed kyi pad-ma'i 'khor dang ldan pa 'byung bar 'gyur te/ byang chub sems dpa'i lus kyang de dang 'tsham zhing de'i rkyen du bab par gnas so/ /des ting nge 'dzin de thob ma thag tu pad-ma de la 'dug par kun tu snang ngo/ /de de la/ 'dug pa dang/ sangs rgyas bcom ldan 'das sangs rgyas kyi kun nas gdan 'dzoms rnams kyi mjod spu nas 'od zer dag phyung nas dbang bskur ba mdzad do zhes sogs byang chub sems dpa' de sangs rgyas kyis 'od zer chen po'i dbang gis dbang bskur ba'i phyir de'i rnam par smin pas na gnas gtsang ma'i lha'i bdag por 'gyur ro/ /bsam yas ye shes ni sangs rgyas kyi ye shes yin la/ de yul du byas nas dbang bskur ba'i yul gyi bdag por dbang phyug chen po mchog yin no/ /gsum pa don bsdu ba ni/ de ltar bshad ma thag pa'i sa bcu po de dag ni byang chub sems dpa'i sa bcur mdo las bsgrags shing brjod do/ /gnyis pa mthar thug gi yon tan la gnyis/ sangs rgyas kyi yon tan re re'ang tshad med par bstan pa dang/ de la yid ches shing mos pa skyed pa'i rgyu'o/ /dang po la gnyis/ sangs rgyas kyi yon tan mtha' yas pa stobs bcu la brten pa dang/ yon tan tshad med pa'i dpe'o/ /dang po ni/ sangs rgyas rnams kyis sngar bshad pa bcu las gzhan de rnam pa kun tu gzhal yas par @071b rgya che ba de ni phyogs mtha' yas kyang bcur 'dus pa ltar stobs bcu dang ldan pa yin pa tsam zhig tu zad par spyir brjod do/ /gnyis pa ni/ sangs rgyas de'i stobs ni gnas dang gnas min pa mkhyen pa'i stobs kyis mtshon pa'i stobs re re yang mtha' yas pa'i 'gro ba kun bzhin du dpag tu med pa'o/ /sangs rgyas rnams kyi yon tan tshad med pa nyid kyis phyogs rnams kun gyi nam mkha' dngas chu me rlung tshad med pa ji 'dra ba de ci zhig tu brjod par bas so/ /gnyis pa la bzhi/ sangs rgyas kyi yon tan tshad med pa de'i rgyu mtshan de yi rgyu phyag la sogs pa bsod nams tshad med pa dang/ phan bya tshad med pa la phan par sman pas rgyu tshad med dang yon tan gyi bsod nams tshad bzung mi nus pa dang/ shes byed dgod pa'o/ /dang po la gsum/ sangs rgyas kyi yon tan tshad med pa'i shes byed dang/ bsod nams tshad med gsog pa'i tshul dang/ yan lag bdun par bsdus te bstan pa'o/ /dang po ni/ sangs rgyas kyi yon tan 'di tsam du zad ces tshad bzung mi nus par thal/ gal te sangs rgyas kyi rgyu ni tshad de tsam du zad par bzung nas tshad med pa nyid du ma mthong na 'bras bu sangs rgyas rnams kyi yon tan tshad med pa de la yid ches par mi 'gyur bas sangs rgyas kyi yon tan de'i rgyu tshad med cing mtha' yas pa'i phyir ro/ /gnyis pa ni/ rgyu bsod nams tshad med pa zhig dgos pas de'i phyir na sangs rgyas kyi sku gzugs dang mchod rten gyi spyan mnga' 'am yang na tshogs kyi zhing khyad par can 'phags pa'i @072a @#/ /pa'i dge 'dun la sogs pa gzhan du'ang rung 'og nas 'chad pa'i tshigs su bcad pa nyi shu 'di nyin gcig yang dus gsum du brjod par bya'o/ /de ltar brjod pas bsod nams mtha' yas pa'i phyir ro/ / de'i 'bras bu sangs rgyas mtha' yas pa'o/ /gsum pa ni/ sangs rgyas dang lung dang rtogs pa'i dam chos/ so so skye bo dang 'phags pa'i dge 'dun dang byang chub sems dpa' rnams la yang sgo gsum rnam pa kun nas btud de skyabs su mchis nas mchod 'os rnams la phyag 'tshal lo/ /rang gi sdig pa ci mchis pa thams cad stobs bzhi tshang ba'i sgo nas sdig pa las ni ldog pa bgyi zhing/ sbyin pa dang tshul khrims dang sgom pa las byung ba'i bsod nams thams cad yongs su bzung bar bgyi'o/ /lus can kun gyi bsod nams dag kun la 'di lta bu'i dge ba yod pa a re legs snyam du rjes su yi rang ngo/ /bdag ni spyi bo la sogs pa'i yan lag lnga btud nas/ thal mo sbyar te mngon par rdzogs par sangs rgyas nas ring du ma len pa chos kyi 'khor lo bskor bar mi mdzad pa de dag la chos kyi 'khor lo bskor ba'i bslad dang mya ngan las 'da' bar bzhed pa rnams ji srid 'gro ba gnas pa'i bar du bzhugs pa'i bslad du rdzogs pa'i sangs rgyas rnams la gsol ba 'debs so/ /gnyis pa ni/ gong du bshad pa de ltar bdag gis bgyis pa'i bsod nams dang de sngar phan chad bdag gis bgyis pa dang da lta phan chad ma bgyis shing ma 'ongs pa na bgyid @072b par 'gyur ba'i bsod nams gang yin pa des ni sems can thams cad kyang bla na med pa'i byang chub la dmigs pa'i sems dang ldan par shog gcig pa'o/ /phan gdags par bya ba'i yul sems can tshad med pa'i phyir/ de la dmigs pa'i bsod nams ji skad bshad pa de tshad med la rgyu bsod nams da tshad med pas/ de'i sangs rgyas kyi yon tan tshad med par yid ches par bya'o/ /'og ma rnams la'ang rgyu mtshan de ltar shes par bya'o/ /sems can thams cad dri med dbang ste zag pa med pa'i dbang po yongs su rdzogs pa dang mi khom brgyad po kun las 'das shing gzhan dbang du ma song bar spyod pa rang dbang yod pa dang/ log 'tsho spangs pa'i 'tsho ba bzang po dang ldan par shog /lus can dag ni thams cad kyang skyes ma thag lag na rin chen nyid dang ldan zhing yo byad thams cad mtha' yas pa dus 'khor ba ji srid du mi zad par shog /bud med thams cad dus kun tu skyes pa mchog nyid du gyur par shog cig pa'o/ /lus can thams cad bdag med rtogs pas mtshon pa'i lhag pa shes rab kyi bslab pa'i rig pa dang tshul khrims kyi rkang par ldan pa nyid du shog /lus can thams cad kha dog bzang po dang ldan pa dang dbyibs legs pa'i gzugs bzang ba dang/ gzi brjid che ba dang/ lta na sdug cing nad med pa dang stobs chen po dang tshe ring po dang/ mdor na mtho ris kyis yon tan bdun dang ldan par shog /lus can thams cad sdug bsngal zhi ba'i thabs la mkhas par gyur te sdug bsngal kun las @073a @#/ /thar pa dang rgyu'i skyabs 'gro dang 'bras bu'i skyabs 'gro byed pa'i sgo nas dkon mchog gsum la gzhol ba dang/ sangs rgyas kyi chos kyi nor stobs bcu cher ldan shog /byams dang snying rje dang dga' ba dang sems can la chags sdang gi rigs su gcod pa'i nyon mongs med pa'i btang snyoms la gnas pa dang/ sbyin dang tshul khrims bzod brtson 'grus bsam gtan shes rab kyis brgyan zhing tshogs gnyis po rnams thams cad yongs su rdzogs te lam gyi skabs su yang mtshan dang dpe byad gsal ba dang nyan thos la sogs pas bsam gyis mi khyab pa sa bcu dag rgyun mi 'chad par sgrod par shog gcig pa'o/ /de ltar rang gis byas pa'i dge ba sogs gzhan don du bsngos nas rang nyid kyang yon tan kun gyis brgyan pa dang/ sems can gyi don du 'gyur bar smon pa ni bdag kyang sngar bshad pa'i yon tan de dag dang 'dir ma bshad cing mdo las bshad pa'i yon tan gzhan kun gyis kyang brgyan pa dang ldan te/ nyes pa kun las grol ba dang sems can kun la mchog tu byams pa dang sems can kun la yid la re ba'i dge ba thams cad rdzogs pa gyid cing ste rdzogs par byed par shog cig /rtag tu lus can thams cad kyi sdug bsngal sel bar bgyid par shog / 'jig rten kun na skye bo gang su dag dgra dang gdon dang ngan 'gro la sogs pa'i 'jigs pas skye ba de bdag gi ming tsam thos pas kyang shin tu 'jigs pa med par shog /bdag ni mthong dang dran pa dang ming tsam thos pas skye bo rnams @073b rab tu dang zhing nyon mongs pas 'khrul pa med par rang bzhin du gnas pa'i rnal ma dang/ rdzogs pa'i byang chub las phyir mi ldog par nges pa dang/ tshe rabs kun tu mi nyams par rjes su 'brang ba'i mngon shes lnga po thob par shog /sems can kun la rnam kun tu dus rtag tu phan pa de bgyid par shog /'jig rten kun na skye bo gang sdig pa byed par 'dod par gyur pa de dag thams cad la gnod pa med par rtag tu cig car ldog gyur cig /sems can thams cad kyi don byed par smon pa ni/ sa dang chu dang mi dang rlung smin dang 'brog dgon pa'i shing bzhin tu rtag tu sems can thams cad kyis rang dbang yod bzhin du rang dgar gzhan gyis dgag tu med par spyad byar shog /sems can rnams la bdag gis dge ba'i bshes gnyen byas nas bdag la srog bzhin phangs pa dang/ bdag la sems can de dag ches phangs par shog /bdag gzhan brje par smon pa ni/ bdag la sems can de dag gi sdig pa smin zhing bdag gi dge ba ma lus pa sems can der smin par shog /gzhan don srid mtha'i bar du byed par bsngo ba ni/ ji srid du sems can 'ga' zhig kyang gang du ma grol ba ste/ sems can gcig 'khor bar lus na'ang de srid du sems can de'i phyir ni/ bla na med pa'i byang chub thob kyang srid par gnas par gyur cig /gsum pa sngar bshad pa'i bsod nams tshad bzung mi nus pa ni/ sngar gong du bshad pa'i yan lag bdun pa dang/ bsngo ba dang smon lam sogs de skad brjod pa'i bsod nams dag gang @074a @#/ /yin pa de la gal te de ni gzugs can gyur cing gzugs yod na gang gla'i bye ma snyed kyi ni 'jig rtan gyi khams su shod par mi 'gyur bas sems can tshad med pa yul du byas pa'i bsod nams kyi tshogs tshad med pas de'i 'bras bu sangs rgyas kyi yon tan tshad med pa yod par yid ches par bya'o/ /bzhi pa shes byed dgod pa ni/ bsod nams de 'dra ba tshad med pa la sgrub byed lung dang rigs pa yod de tshed med pa de ni khyim bdag dpal byin gyis zhus pa dang/ ting nge 'dzin rgyal po dang blo gros mi zad pa'i mdo sogs las bcom ldan 'das kyis gsungs pa'i phyir dang/ shes byed kyi gtan tshigs kyang ni 'di la snang ste sems can gyi khams ni chad med la phan par 'dod pa'i bsod nams tshad med pa de ni sems can tshad med de 'dra'o/ /gzhan du na sems can gcig la phan btags pas bsod nams mi 'byung bar khas len dgos la/ de 'byung na sems can tshad med pa la phan btags pas bsod nams tshad med pa 'byung ba rigs pas grub bo/ /gsum pa bshad pa mthar phyin pa'i bya ba la lnga/ chos la spro ba skyed cing chos bzhi bsten par gdams pa dang/ dge ba'i bshes gnyen la skrag pa'i nyes dmigs/ dge ba shes kyi mtshan nyid dang bcas pa dang/ spyod tshul phun sum tshogs pas 'bras bu mchog 'grub pa dang/ chos 'di rgyal por ma zad gzhan dang yang thun mong ba yin pa dang/ rgyal po la nyan par bskul ba'o/ /dang po la gnyis/ spro ba skyed pa dang/ chos bzhi @074b bsten par gdams pa'o/ /dang po ni/ de ltar klu sgrub bdag gis rgyal po khyod la ni gsung rab rgya mtsho las blangs pa'i snying po mdor bsdus rin po che lta bu'i chos bshad pa gang yin pa de khyod la ji ltar rtag tu sku srog phangs pa bzhin du phangs par mdzod cig /gal te lus phangs kyang chos de tsam du phangs ci dgos snyam na/ gang la chos de phangs par gyur pa de la dgos pa'i don du bdag gi lus phangs pa nyid yin te/ chos mi phangs par byas pa la 'bras bu cung zad yang med pa'i phyir ro/ /skye ba brgyud mar lus phangs pa la lus la phan pa'i rgyu bya dgos na lus la phan pa de ni chos kyis byed par 'gyur ba'i phyir/ lus phangs pa la chos kyang phangs par rigs te/ khyed rang gi sku phangs pa yin na de la phan pa'i gtan du ba dang re shig gi bde ba bya dgos na/ de'i rgyu na sngar bshad pa'i chos bcu drug dang/ zab mo thos pa sogs kyi byed pa'i phyir ro/ /gnyis pa ni/ lus dang bcos phangs par mtshungs pa de bas na chos ni bdag bzhin du gces spras su bsten pa dang/ de yang chos tshul bzhin du sgrub pa la rags las pas chos tshul bzhin du ni sgrub pa dang/ de tshul bzhin sgrub pa shes rab la rag las pas chos tshul bzhin sgrub pa bzhin du shes rab skyed cing de la gus par rigs pa dang shes rab skyed pa dge ba'i bshes gnyen la rag las pa shes rab la gus pa bzhin du mkhas pa gus par bsten la chos bzhi la bslab par bya'o/ /gnyis pa la gnyis/ bshes gnyen ma bsten pa'i nyes dmigs dang/ bshes gnyen gyi mtshan nyid do/ /dang po ni/ rnyed pa dang/ @075a @#/ /bkur sti sogs ched du mi gnyer bas gtsang zhing yang na nyes spyod kyis dben pas gtsang? ba'o slob ma la byams la blo ldan mkhas pa dang/ chos la thogs pa med pa'i sbebs par legs nyes phan par smra ba la slob ma gang zhig bsam pa brtan na bdag ngan par song du dogs par byed pa skrag par 'gyur ba de ni bde legs las nyams par 'gyur bas rang don chud kyang gzon pas dge bshas gus par bsten par bya'o/ /gnyis pa ni/ 'o na dge ba'i bshes gnyen ji lta bu bsten par bya zhe na/ dge ba'i bshes gnyen dag gi mtshan nyid mdor bsdus pa chos bzhi dang ldan pa mkhyen par mdzod cig /ji lta bu zhe na chog shes che brnyed bkur mi 'dod pa dang snying rje che ba dang tshul khrims dang ldan pa dang slob ma'i nyon mongs sel ba'i shes rab can de dag gis ni khyod la gdams pa dang rjes su bstan na khyod kyis mkhyen par gyis la gus par mdzod cig pa'o/ /gsum pa la gnyis/ 'bras bu mchog 'grub pa dang/ spyod tshul khyad par can bya bar gdams pa'o/ /dang po ni/ 'og nas 'chad par 'gyur ba'i tshul lugs 'di ni phun sum tshogs pa 'dis grub pa yi ni mchog sangs rgyas 'thob par 'gyur ro/ /gnyis pa la gsum/ spyod tshul rgyas pa dang/ bsdus pa dang/ shin tu bsdus pa'o/ /dang po ni/ sems can kun la 'jam par smra zhing bde ba'i ngang tshul nges shing bsod nams kyi rgyur 'gyur ba'i tshig smra ba dang/ rnyed dka' ba brjid cing zab par byed pa dang tshul ldan 'khor la rim par chos @075b ston pa dang/ gzhan dman yang khyad du mi bsod pa dang dbang po yul la 'jug pa na nyon mongs kyi dbang du mi 'gyur bar rang dbang dang/ tshig rtsub po ma yin par legs par smra bar 'dod do/ /kho na du 'dzin pa med pa dang/ gtong pa dang ldan pa dang/ brjid bag dang ldan zhing sems zhi ba dang rgod pa med cing 'gyur bag med pa dang/ mtha' mi ring ba bya ba la le lo med pa dang/ gzhan mi slu bas g.yo med pa dang mdzangs shing nges par mdzod cig pa'o/ /dpe kha cig las nges pa zhes 'byung ba ltar na dam bca' lta bu mi 'gyur ba'o/ /gnyis pa ni/ zla ba nya ba bzhin dul zhing mdzangs la nges pa dang/ ston gyi nyi ma bzhin brjid bag ldan pa dang/ rgya mtsho bzhin du gzhan gyis blo mi 'phrogs zhing thugs kyi gting zab pa dang/ ri rab bzhin du yon tan las gzhan du mi 'gyur ba'i brtan par mdzod cig pa'o/ /gsum pa ni/ chags sogs kyi nyes pa kun las rnam par grol zhing dad pa la sogs pa'i yon tan kun gyi brgyan par gyur te/ sems can kun gyis phan bde mtha' dag sgrub pa'i nyer 'tsho dang/ thams cad mkhyen pa nyid du 'gyur bar mdzod cig pa'o/ /bzhi pa ni/ gtam bya ba rin chen phreng ba 'dir bshad pa'i chos 'di rgyal po 'ba' zhig la bstan pa kho nar ma zad cing ma byas kyi rgyal po'i thun mong ma yin pa 'ga' re ma gtogs khyim pa dang rab tu byung ba'i sems can gzhan la ci rigs par phan par 'dod pas bstan pa lags pas gzhan gyis kyang mngon par mtho @076a @#/ /ba dang nges par legs pa'i lam tshul bzhin du sgrub pa la 'grub par bya'o/ /lnga pa la gnyis/ gzhung don rgyun du bsam par rags pa dang/ yon tan blang bar rigs pa'o/ /dang po ni/ rgyal po zhes pos nas mngon par mtho ba dang nges par legs pa ji lta bur sgrub pa'i gtam du bgyi ba 'di gdugs re ra zhing yang bsam pa'i rigs so de yang bdag dang gzhan rnams yang dag par rdzogs pa'i byang chub 'grub par bgyi ba'i slad du'o/ /gnyis pa ni/ dam pa'i chos don du gnyer ba rnams kyis dus rtag tu bya'o/ /gang gi ched du na/ bla na med pa'i byang chub thob pa'i phyir tu'o/ /las su bya ba gang bya na/ spong ba bdun 'khor dang bcas pa'i tshul khrims bsrung ba dang/ lam gyi rtsa ba skye bo bla ma mchog bkur ba dang/ bzod pa dang ldan pa dang/ de bzhin du gzhan gyi phun tshogs la phrag dog med pa dang ser sna dang bral ba dang/ dogs pa med par byas nas lan dang rnam smin la re ba med pa'i gzhan don gyi nor can dang zas gos sogs kyis phongs par gyur pa la phan par byed pa dang/ gang zag mchog slob dpon dang bla ma ma yin yang yongs su bzung ba dang/ gang zag mchog min dor ba dang/ yang na grogs la bshad par bya'o/ /mdor na rgyal ba rnams kyi dam pa'i chos ma lus pa yongs su bzung ba las su rig par bya'o/ /mtshan don ni rgyal po la gtam bya ba rin po che'i phreng ba las/ khyim pa dang rab tu byung ba kun gyis bslab pa bsten pa ste/ le'u lnga pa'i 'grel pa'o// //dpe @076b phal cher la le'u lnga pa'i mtshan bris pa mi snang na yang/ dpe ma dag pa las brgyud par gsal te/ gong ma kun las 'dir bshad pa ltar 'byung bas 'dir yang rigs pa'i phyir dang/ slob dpon 'phags pa bdag nyid chen pos le'u tshan pa re re la sho lo ka brgya brgya mdzad nas sho lo ka lnga brgya pa'i bdag nyid du mdzad cing le'u gong ma rnams la mtshan 'byung zhing lnga pa la mi 'byung ba mi 'thad pa'i phyir ro/ /bstan bcos 'di'i tshig don rnams go sla zhing gsal la rdzogs pa'i tshul du byas la/ mngon mtho dang nges legs kyi lam ji ltar nyams su len tshul rgyas pa dang/ mgon po klu sgrub kyi bzhed pa'i stong pa nyid kyi don rigs pas rgyas par gtan la 'bebs pa'i tshul ni/ rje rin po che blo bzang grags pa'i dpal bzang po'i zhal snga nas mdzad pa'i pha rol tu phyin pa'i lam gyi rim pa dang/ dbu ma rtsa ba shes rab dang/ dbu ma la 'jug pa'i rnam bshad chen mo rnams las shes par bya bas/ gzhung 'dir de dag zhib tu ma spros pa yin no/ /bzhi pa mjug gi don la gnyis/ bstan bcos gang gis mdzad pa dang/ bsgyur byed gang gis bsgyur ba'o/ /dang po ni/ thub pa sangs rgyas bcom ldan 'das kyi mdo sngags kyis bsdus pa'i bstan pa yongs su rdzogs par 'grel par mdo rgyud du ma nas lung bstan pa'i slob dpon bdag nyid chen po mgon po klu sgrub kyis mdzad pa'i rgyal po la gtam bya ba rin po che'i phreng ba'i rnam bshad snying po'i don gsal bar byed pa zhes bya ba rdzogs so// //gnyis pa ni/ rgya gar gyis @077a @#/ /mkhan po paN-Di ta pi-dya ka ra pra b+ha rigs byed 'od zer dang/ zhu chen gyi lo tstsha ba ban-de dpal brtsegs kyis bsgyur cing zhus te 'chad nyan gyis gtan la phab pa'o/ /ded dpon bzang po 'phags pa'i skye bo yi/ / gsung rab rgya mtsho'i gling nas legs sgrubs pa/ /'gro kun dbul ba sal ba'i rin chen mchog /legs bshad gtam 'di'i rnam bshad cung zad byas/ /mtho ris nges par legs pa'i de nyid lam/ /tshul bzhin sems pa'i rigs pas legs mthong nas/ /tshul bzhin sgrub pa la cung zad gzhol gyur pa/ /e ma'o de 'dra'i ngal thob bskal pa bzang/ /thub bstan rgyas pa'i bsam pa mi dman zhing/ /gtong phod stobs dang spro ba'i dpal gyis mdzes/ /sngon goms dad dang rnam spyod ldan pa yis/ /skyes dang bcas te skul ba'i gsung las yin/ 'khor ba'i chu gter nang gnas kun la brtser ldan zhing/ /go 'phang mchog der 'gro ba'i bsam pa lhag par rgyas/ /yang pa'i mig ni dngos po'i de nyid dag la gtad/ /rje btsun bla ma gnyis la gus par phyag 'tshal lo/ /rnam spyod brtson pa'i stobs /kyis 'di byas mod/ /'phags pa'i dgongs pa gting zab dpag par dka'/ /gal te 'di la nongs pa'i tshogs mchis na/ / chos kyi spyan ldan rnams kyis bzod par rigs/ /tshul 'dir 'bad pa'i dge ba ci yod des/ /thogs med brtse bas bskyangs pa'i ma rnams kun/ /dngos 'dzin gdon gyi mun pa kun bsal te/ /yang dag don gyi snang ba rgyas par shog / @077b bdag kyang lugs 'dir nam yang mi 'bral zhing/ /yul la srid pa'i zhags pa kun bcad de/ /srid pa'i ra ba mchongs nas myur du ni/ /'jigs med grong khyer mchog der 'jug par shog /mgon po klu sgrub kyis mdzad pa'i rgyal po la gtam bya ba rin po che'i phreng ba'i rnam bshad snying po'i don gsal bar byed pa zhes bya ba 'di ni/ dam pa'i chos 'dzin pa'i smon lam/ legs par grub pa'i chos rgyal byang chub sems dpa' lha btsun pa byang chub 'od la sogs pa'i/ gdung rgyud dri ma med par 'khrungs pa/ gcig tu bde bar gshegs pa'i bstan pa la mi phyed pa'i dad pa dang ldan zhing/ bstan pa rgyas pa'i khur gyis mi ngal ba/ sbyin pa dang/ spro ba la sogs pa'i mtho ris kyi yon tan du mas mdzes pa/ khri nam mkha'i dbang po phun tshogs lde dpal bzang pos/ gnang sbyin me tog rgya chen po dang bcas te/ rin chen phreng ba 'di snga sor yang dar cha cher ma byung snang bas/ gu ge'i phyogs su yang ci dar byed cing/ de'i phyogs su yang dar rgyas kyi khur 'dzin pa byed dgos pas/ cis kyang TI kka zhig gyis gsung pa'i bka' stsal dang du blangs te/ rgyal ba'i ring lugs pa chen po rten 'byung gi chos rnams chu nang gi zla ba'i gzugs brnyan ltar gzigs shing/ bdag pas gzhan gces pa'i byang chub kyi thugs kyi bskal pa med dman pa rje btsun dam pa red mda' ba ku ma ra ma ti zhes grags pa dang/ snyigs dus kyi thams cad mkhyen pa chen po sde snod gsum dang rgyud sde bzhi'i gnad ma lus pa yongs su rdzogs par gzigs shing bslab pa rin po che rnam @078a @#/ /pa gsum la lhag par yang gces skras su mdzad pa thugs rje dang smon lam gyi dbang gis sku'i bkod pa mi 'dra ba du mas gzhan gyi don lhur len pa/ ! rje rin po che blo bzang grags pa'i dpal bzang po'i zhal snga nas gnyis kyi bka' drin mnos shing khyad par du rje rin po che nyid kyi zhabs rkyi rdul rnyog pa med pa'i ze'u 'bru spyi bos yun ring po'i bar du gus par bsten nas/ gzhung lugs du ma la cung zad 'dres par byas pa/ rigs par smra ba dar ma rin chen gyis 'brog ri bo dge ldan rnam par rgyal ba'i gling du sbyar ba'o/ /yi ge pa ni mdo sngags kyi gzhung du ma la mang du thos pa'i sdom brtson sde snod 'dzin pa gu ge dbong po phyogs las rnam par rgyal ba chos dbang grags pa'i dpal lo/ /'dis kyang mdo sngags kyis bsdus pa'i bstan pa rin po che sgo thams cad nas phyogs thams cad du dar zhing rgyas la yun ring du gnas par gyur cig /dge'o/ /