@#/ /'phags pa'i gnas brtan chen po rab 'byor gyi rtogs pa brjod
pa tshangs pa'i sgra dbyangs zhes bya ba bzhugs so/ /

@001a @##/ /na mo gu ru manydzu g+ho ShA ya/ thugs rje'i rgya mtsho
rlabs phreng g.yo ba'i mu tig gsar pa'i gru char gyis/ /mtha'
med 'khor bar dug gsum 'bras bu'i tsha bas

mnar ba'i 'byung po'i tshogs/ /'dod dgu sbyin pa'i dpag bsam
rkang 'thung grib bsil ji bzhin gdung sel ba/ /srid zhi'i klu
dbang mtha' dag dpal gnas shAkya seng ge rgyal gyur

cig /dpal rkang mgur gyi rgyud mang las/ /'di skad thos so gang
gi che/ /sngon gyi rnam 'dren mchog rnams la/ /bya ba byas pa'i
gdengs ka can/ /gzhon nu mkha' 'gro'i dbang po yis/ /lcags

kyus drangs nas lhun po'i nges/ /myang byed lam du zhugs pa'i
tshe/ /bu ram shing pa'i tshangs dbyangs las/ /'khrungs pa gur kum
phang phung la/ /'khu ldan de yi bsod nams bzhin/ /

@002a @#/ /mthong bas yid kyi ganggA'i rgyun/ /rab drangs dbu
ba'i 'dzum dkar bcas/ /dus kyi rgya mtshor chu bo bzhin/ /de nas
rol pa gsum gnas la/ /phrag dog byed pa'i mnyan

yod du/ /'byor pa rmugs 'dzin la 'gran pa/ /gnyis skyes 'byor pa
zhes bya ba'i/ /dga' ma'i mngal gyi pad tshal du/ /klu gzhon las
'ongs bung bas rtsen/ /nam zhig indra nI la yi/ /

chu 'dzin rum las ston zla bzhin/ /mngal gyi 'dab ma las grol
ba'i/ /gzhon nu'i kunda rnam par rgod/ /dka' bzlog las ni gzhon
nu bzhin/ /da ni 'jig rten chos bzhin du/ /btsas

ston me tog sil ma bkram/ /sbrang rtsi mar dang 'o ma yis/
/rdzing gi padma ltar bskyed de/ /'byor ldan 'byor pas bskrun
pa'i phyir/ /rab 'byor zhes pa'i rgyal rnga brdungs/ /skyes thob
rkyen gyis bskul

ba yis/ /rnam dpyod mu men ka la sha/ rang rigs rig gnas ga bur
gyi/ /thigs pa bzung bas skal bzang byas/ /'on kyang srid pa'i
phun tshogs kyi/ /padma'i mal stan 'jam po yang/ /lcags

@002b bsregs tsher ma rnon po yis/ /bltams pa'i khri stan ltar
mthong nas/ /mrgad ljon pa'i chal khrigs shing/ /me tog 'bras
bu'i g.yur gyis dud/ /skyed mos tshal 'dra'i bsti gnas su/
/drang srong rnams kyi nang du song/

der yang skye gnas sngon ma yi/ /bag chags tsandan dris bsgos
pas/ /khro ba'i rlung zas can nye zhing/ /zhe sdang gnag pa'i
smag rum 'thibs/ /de tshe 'jig tshogs lta ba yi/ /sra brtan brag
ri lnga phrag bzhi/ /ye shes rdo rjes

bcom pa yi/ /der gnas lags bris brtser ldan pas/ /gnyis skyes
las byung drang srong de/ /rdzu 'phrul gyis drangs lha dang
mi'i/ /ston pa'i zhabs kyi drung du bzhag /'jig rten kun gyi
legs spyad tshogs/ /ma lus gser

sbyangs btso ma yi/ /lhun por bgyis pas tshangs dbyangs gyi/
/sgra brgya dal gyis rgod 'dra ba/ /mthong bas de yi yid kyi
mkha'/ /rab dga'i dbyar skyes sngon po yi/ /lha rjes bla bres
yongs su khebs/ /ston pa'i ljags yangs

dbyangs can ma'i/ /rgyud mang tshur shog mdangs snyan gyis/ /skad
cig de la drang srong de/ /bsnyen par rdzogs pa'i bka' drin
bstsal/ /nyi ma'i gnyen gyi zhal bzang nor bu'i dga' tshal ngogs/
/mchu sgros byu ru'i 'dab phreng rnam

par g.yo ba'i nang/ /tshems kyi zla shel ze'u 'bru dkar po rgod
pa'i gseb/ /sngon med legs bshad ro 'dzin dga' ston rdul mang
ldan/ /de yis dga' ldan longs spyod cing/ /goms pa'i yan lag
brgyad ldan chus/ /

@003a @#/ /nyon mongs sgrib pa sa bon bcas/ /rnam dag dgra bcom
mngon sum byas/ /de tshe de yi mngon shes gyis/ /rang gi sngon
rabs brtag pa na/ /zhe sdang khro bo'i mun 'thibs pas/ /rgya
mtshor gnas

pa'i tshul mthong nas/ /dgra bcom gzhan las ches lhag par/ /sgo
gsum dang ba'i mtsho nang du/ /rnyog ma'i bag chags phra mo yang/
/rgyun bcad de phyir bcom ldan gyis/ /nga yi nyan thos nyon
mongs dang/ /bral ba'i

rgyu skar bya ba'i nang/ /pa wa sangs ni rab 'byor zhes/
/bsngags pa'i rnga bo che yi sgra/ /srid pa gsum gyi khongs las
brgal/ /yon tan cha shas rgyas pa yi/ /smra ba'i zla ba rab
'byor gyi/ /cho 'phrul gsum gyi bsil 'od brgyas/  

srid 'dir phan bde'i gos dkar byin/ /rang sngon rlung zas can
phreng gi /skyed byed gdon gyis yid phyung bas/ 'phags mchog de
yis 'gro mang gi /yid dbang nor gyi blo gros mar/ /'chi med dga'
ba'i tshal bzhin du/ /

byams pa'i me tog ci yang bskrun/ /ri dbang bya rgod phung po'i
rir/ /thams cad mkhyen pa padmo'i gnyen/ /zhing brgya 'od kyis
'gengs mdzad de/ /dus gsum rgyal ba'i yum gsung tshe/ /sher phyin
zab mo 'doms pa

la; ;spobs par byos ces ston pa yis/ /bgyes pa'i me tog char
ltar phab/ /rgya mtsho che las rin chen bzhin/ /sher phyin zab
mo'i de nyid don/ /gnas brtan rab 'byor sarga yi/ /chu gter che
las btsal bya

@003b zhes/ /shes rab can mchog dbyangs kyis bsngags/ /rdo rje'i
thog mtshungs ra dang mchu sder rab 'bar zhing/ /dus mtha'i rlung
ltar mi bzad gshog pa'i shugs stobs kyis/ /rgya mtsho'i gos can
ri rab dang bcas

'dar byed pa'i/ /mkha' lding dbang po de bzhin nor bu'i gdengs
ka can/ /'jig dus sprin bzhin gdug pa'i kha rlangs cher g.yo
zhing/ /mi bzad mthong dang reg pa'i dug gi zhags pa yis/ /mkha'
'gro'i tshogs rnams

cig car myos shing brgyal byed pa/ /brgya phrag lngar sprul rang
rigs de dag grangs ldan pa/ /mthar byed mngon sum 'ongs 'dra'i
zlos gar gyi/ /skye ba 'dzin pa'i thabs mkhas gru bo ches/
/mtha' med sdug bsngal glong 'khor mi

bzad pa'i/ /chu sprin 'byung gnas che las pha rol bsgral/ /de
bzhin bgrang pa'i mtha' bral ba/ /mi dang 'chi ba med pa'i
tshogs/ /dge legs gdong lnga pas bteg pa'i/ /nor bu'i khri stan
yangs par bkod/ /'di ltar bskrun

pa'i rnam dkar ston zla'i steng/ /ji snyed 'phros pas 'gro ba
mtha' dag gi /yid kyi rmongs mun ma lus drung phyung ste/ /rnam
grol kunda'i tshal rab rgyas byed shog /de ltar lha bcas ston pa
mchog de yi/ /gsung rab 'dod pa 'jo

ba'i bang mdzod las/ /ston pa gnyis pa ltar bsngags nyan thos
mchog /'dri zhing lan ldon zla bral 'byor pa'i sras/ /gang de'i
rtogs brjod tshangs pa'i sgra dbyangs 'di/ /shangs mdo ri bo dge
'phel gdan sa pa/ /yongs

@004a @#/ /rdzogs bstan 'dzin sangs rgyas dpal bzang sogs/ /dam
pa mang pos snga phyir bskul ba'i ngor/ /ris med bstan la dad
pa'i spong ba pa/ /shAkya'i dge slong blo bzang chos rgyan
gyis/ /snye mo

gzhis ka rnam rgyal rab brtan gyi/ /yang rtse gzhal yas khang du
mgyogs par sbyar/ /phyi mo'i snang brnyan zla shel gyi/ /byang
bu'i ngos su 'god pa po/ /rnam dpyod yangs pa shAkya'i sras/
/blo bzang dar rgyas ces bya'o//