@#/ /rigs ldan grags pa'i rtogs pa brjod pa dri med 'od dkar
'khyil ba'i zla ba zhes bya ba bzhugs so//

@001a @##/ /na mo gu ru manydzu g+hoShA ya/ dus gsum rnam 'dren
thams cad kyis/ /bsngags bya kun gyis bsngags pa yi/ /ye shes
lnga ldan me tog gis/ /thod

mdzes 'jam dpal dpa' bos skyongs/ /gang gi phun tshogs dpal 'byor
gyis/ /rol pa gsum gnas pham byed cing/ /kun gzigs zhing la
'gran bzod pa/ /shamb+ha la zhes bya

'byung/ /khor yug ke la sha yi ri/ /shel dkar mchod rten brtsegs
'dra ba'i/ /gzi byin ma bzod cha shas can/ /gling bzhi myul ba'i
zol gyis bros/ /sked skabs mdongs

ldan gzhon nu yi/ /mgrin pa'i spu ltar yid 'ong ba'i/ /spang
ljongs me tog sna tshogs pas/ /rnam bkra 'ja' tshon bkram pa
bzhin/ /de 'og nags tshal bu mo mdzes ldan ma/ /

@002a @#/ /sngo ljang gos gyon g.yu yi spu long rgyas/ /me tog
sna rgyan 'bras bu'i mgo lcogs can/ /mrgad lag mnyen lo ma'i
lhab lhub 'dzin/ /nor gyi 'dab ma 'od zer rtse dga'

rgod pa yi/ /sna tshogs tshon ris stong 'bar nor bu'i ba gam can/
/drug lhag bcu phrag dgu yi grangs ldan grong dag gi /mu tig
tshom bu rgyu skar do shal mdzes pa bzhin/ /de dbus phyi rol mu
khyud kyi/ /

snang brnyan shar bzhin gnyis pas mdzes/ /lte bar rnam par rgyal
ba yi/ /khang bzang la 'gran ka lA pa/ /rin chen tog mdzes nor
bu yi/ /ba gam nyi zla bye ba brgya'o/ /'od zer spro la mngon
dga'

ba'i/ /pho brang shin tu yangs pa yod/ /der ni 'gro ba'i bla ma
yis/ /lo 'di nas ni drug brgya'i los/ /drang srong rnams ni smin
don du/ /'jam dbyangs mi bdag grags pa ni/ /shamb+ha la

zhes bya bar 'byung/ /de yi lha mo sgrol ma che/ /sras ni pad
'dzin 'jig rten dbang/ /zhes pa ji bzhin lha lam gyi/ /snying po
mi dbang tshul 'dzin pa'i/ /lha yi dbang ldan de nyid la/

@002b lhan cig skyes dga'i mchog ster ba/ /sna tshogs yum ni
btsun mo'i mchog /de gnyis 'jam pa'i rdo rje ni/ /sras kyi zol
gyis skal bzang byas/ /na tshod gsar pa'i zla tshes de/ /lang
tsho'i cha shas rgyas pa'i

tshe/ /dam chos ston pa'i seng ge'i khri/ /shar gyi sa 'dzin
rtser 'khod de/ /rgyud rgyal stong phrag bcu gnyis pa/ /zla
bzang rgyas 'grol dang sbyar te/ /ston pa'i legs bshad 'od dkar
gyis/ /sa gsum

phan bde'i snang bas bkang/ /nam zhig rgyal bas lung bstan
bzhin/ /nyi ma'i shing rta la sogs pa/ /'bras bu smin pa'i dga'
tshal ltar/ /ye shes me long ngos su shar/ /de nas rin chen brgya
las

grub pa'i ye shes rang bzhin dang po'i sangs rgyas pho brang
che'i/ /dbang phyogs sgo yi nor bu'i khams dbus gser gyi myu gu
rnam par bkra ba'i seng ge'i khrir/ /'jam pa'i rdo rje'i zhabs
sen mdzes bkod

phyed lhag bye ba gsum gyi grangs ldan drang srong la/ /thams
cad mkhyen pa'i go 'phang thob byed de yi tshig nyon zla ba phyi
ma'i nag nya la/ /dpal ldan rdo rje theg pa yi/ /skyed tshal
nyams dgar khyed rnams 'jug /

rang rigs kun spyod grub pa'i mtha'/ /gsal bar myur du ston ces
bstsal/ /de tshe 'ga' zhig thod par za/ /kha cig chang 'thung ba
glang dang/ /ma he'i sha za gzhan dag ni/ /ma dang srin mo chung
mar byed/ /lha dang

@003a @#/ /pha mes tshim byas na/ /sha zos skyon gyi chu yod min/
/gang zhig gdug la gdug spyod pa/ /de la skyon ni ma mthong ngo/
/zhes sogs gdug pa'i drang srong gi /tshig dag gces 'dzin de
bzhin

gzhan/ /sngags btab ral gris bsang ba'i sha/ /bza' sogs 'gal ba
sna tshogs pa/ /mthong nas de dag 'dzin mar 'gyel/ /de tshe mi
dbang zhal gyi bar nang ljags kyi bung ba'i khor ba'i sgras/
/sna tshogs tshon

brgyas rnam par phye ba'i 'od zer rtse dags yongs su bskor/
/snyoms 'jug zag med dga' bas dgyes pa lha dang lha mo'i tshogs
kyis gang/ /thar pa chen po'i grong khyer mchog 'dir khyed cag
gzhug cing dbang bskur

sbyin/ /de bzhin rdo rje'i rigs ldan pa'i/ /bza' dang btung ba
bag ma len/ /brtul zhugs spyod pa thams cad kyang/ /rigs gcig
nyid du khyod kyis gyis/ /gal te rgya 'di las 'god na/ /de yi
bka' rtags gtsug

rgyan ltar/ /bsten las gzhan pa'i yul du song/ /de skad drang
srong rnams kyi mgor/ /gnam lcags thog dang mtshungs pa bab/ /de
nas de dag gdung ba yis/ /lhan cig 'dus te dben par mol/ /bsam
pa gcig

po'i shel gyi skyogs/ /bdag cag rang rigs grub pa'i mtha'/ /sa
le sbram gyi snying po 'di/ /bsregs bcad brdar yang gzhan du ci/
/rgyal po'i bka' yang 'da' dka' bas/ /de phyir 'phags yul 'gro
zhes pa'i/ /sbrang

@003b rtsi'i chang gis legs bkang ste/ /mi dbang snyan gyi ro
'dzin du/ /nyi ma'i shing rtas legs par gsol/ /de tshe chos kyi
rgyal po yis/ /song zhig myur du song zhes bstsal/ /de nas gser
gyi sgo nga las/ /'khrungs pa'i drang srong tshogs de

dag /bu dang mchis 'brang mngag gzhug bcas/ /rkang gnyis bskyod
pa'i ras 'jag gi /'dab gshog g.yo ba'i gar byed cing/ ma la ya
yi skyed tshal nas/ /nyi ma bcu gnyis par song ste/ /rkang 'thung
'khrigs pa'i tshal du zhugs/ /de nas

mi dbang grags pa yis/ /dgag dgos gzigs pas drang srong tshogs/
/lha bcas myos shing rmongs byed pa'i/ /ting 'dzin sgo brgya
mngon par phye/ /de'i mthus tshal der gnas pa yi/ /ri khrod mi
min tshogs rnams kyis/ /myos pa'i

drang srong tshogs bcings te/ /nor bu'i khyams der zhabs drung
du/ /bzhag tshe de dag yid kyi mkha'/ /myos shing rmongs pa'i mun
sangs te/ /'di 'dra ci zhes ngo mtshar ba'i/ /nyi 'od snang bas
kun tu khyab/ /de nas blon po rgya mtsho yi/ /

blo gros zhes byas mtshams sbyar gyi/ /'od dkar thur mas tshangs
sras rnams/ /bsod nams kun da'i tshal 'dzum zhing/ /bstan bcos
kun gyi pusta ka/ nyi ma'i shing rta la brgyud de/ /rin chen
gser gyi maNDal bcas/ /srid gsum

bla ma mi dbang gis/ /rnam par rol der 'di skad gsol/ /gang gi
'bras bus ri rab kyang/ /thal bar sreg byed mtshams med lnga/
/dag byed dang po'i sangs rgyas kyi/ /dbang dang rgyud kyi rgyal
po gsungs/ /de tshe mi yi dbang po de/ /lhag

@004a @#/ /par dgyes pa'i 'dzum zhal las/ /legs so zhes bya'i
bdud rtsi skyugs/ /zhal bzhes ji bzhin nag nya yi/ /rgyu skar
rgyal po rgyas pa'i dus/ /nyi ma'i shing rta la sogs pa'i/
/drang srong bye ba phyed dang

bzhi/ /yul chen dgu bcu rtsa drug gi /rigs bzhi'i 'gro ba ma lus
pa/ /dkyil 'khor chen po'i nang bcug ste/ /rdo rje'i rigs su
nges par mdzad/ /slar yang dus dang shes rab che/ /'grib phyir
rgyang rgyal rgyas pa las

bsdu bar gsol ba btab pa'i phyir/ /brang 'dzin tshigs bcad sum cu
ni/ /lhag pa'i phyogs brgya le'u lngas/ /dpal ldan rgyud dag
rdzogs par ni/ /smra ba'i rgyal pos legs par bstan/ /sa ga'i nya
la nyi ma sogs/ /tshangs

pa'i sras po de rnams kyis/ /shes dang shes bya gcig pa yi/
/zung 'jug go 'phang mngon du byas/ /nam zhig rang sras 'jig
rten dbang phyug pad dkar 'dzin/ /seng ge'i khrir bkod dang po'i
sangs rgyas ston pa dang/ /

bsdus pa'i rgyud la rgyas 'grel byos ces bka' stsal te/ /bde
ba'i go 'phang longs spyod rdzogs pa'i gnas su gshegs/ /tshul 'di
dam pa du mas bskul ba'i ngor/ /rgyas 'grel dri med 'od las
gsungs pa bzhin/ /

mang du thos pa'i dge slong spong ba pa/ /blo bzang chos kyi
rgyal mtshan zhes bya bas/ /mkhas grub chen po khyung po rnal
'byor pa'i/ /'khrungs gnas snye mo ra mang 'dab chags pa/ /lhun
po dpal 'bar zhes pa'i rdzong du sbyar/ /

@004b 'dis mtshon rnam dkar ji snyed bskrun pa'i mthus/ /pha mar
gyur pa'i 'gro ba ma lus pa/ /grub pa'i gnas mchog shamb+ha lar
skyes nas/ /mi 'gyur bde ba che la spyod par shog /phyi mo'i sug
bris thur ma yis/ thog mar

len par byed pa po/ /shAkya'i dge tshul rnam dpyod can/ /blo
bzang bstan 'dzin ces bya'o// //