@#/ /slob dpon a b+haH yA ka ra'i rtogs pa brjod pa tshangs
pa'i dbyangs snyan zhes bya ba bzhugs so/ /

@001a @##/ /na mo gu ru manydzu g+ho ShA ya/ tshogs gnyis mtshan
dpe'i ri mo yongs smin 'ja' tshon gar gyi rol pa bzhin/ /zag
med lhan skyes bde ba'i ros gang nu 'bur

zung gi 'jo sgeg gis/ /dpa' bo'i brtan pa cig car 'phrog cing
rab dge'i spu long rgyas byed pa/ /rje btsun phyag zung
padmo'i skung pas bdag cag mgul pa mdzes par mdzod/ /gang gi

yon tan lha lam dbus/ /nor bu'i 'od brgyas sa gsum gyi/ /mun
sel a b+hya ka ra yi/ /rtogs brjod tshangs pa'i dbyangs snyan
sgrog /dge bcu'i ri dwags mtshan ma yis/ /

mdzes ldan 'phags yul zla shel gyi/ /me long 'char ba'i phyogs
dag tu/ /bram ze'i rigs kyi sa bon las/ /rgyal sras paNDa ri
ka yi/ /myu gu lang tsho'i 'dab ma brgya/ /dang por

@002a @#/ /rgod tshe rig gnas lngar/ /'jug pa'i me tog g.yur za
ldem/ /de yi rmi lam a ma yi/ /rkang pas 'thung ba'i grib
bsil la/ /rmi lam bskrun pas khebs pa'i

tshe; ;yid 'ong mdzes ldan gzhon nu ma/ /mngon sum bzhin du
mngon du gyur/ /khyod ci 'dod pa'i 'bras bu gang/ /lan du kho
mo gdol pa mo/ /khyod dang yid srubs rtse dga' 'bras/ /rigs
kyis dregs

pa'i khyi'u des/ /bdud rtsi'i mchog dang rnag khrag dag /'dres
mar rigs min ji bzhin du/ /dman pa'i rigs dang nye ba yang/
/mi snyan rna ba'i tsher ma zhes/ /bzlog tshe khyod kyis sngon
rabs 'gar/ /

nga nyid mnyes par byas phyir 'ongs/ /'dod bral gzhan du song
chog gi /gal te nga yi tshig 'dzin na/ /rang yul ma bstan ma ga
d+ha'i/ /rgya mtsho'i ngogs zhugs sangs rgyas kyi/ /bstan pa'i
gru

gzings legs bzung ste/ /thos bsam nor bu'i gling songs ces/
/mgrin pa'i dril chung bsil nas song/ /song tshe gzhon nu de yi
yid/ /som nyi'i 'ching bas dam bcings pa/ /grub pa'i mtshon
gyis

@002b bral ba bzhin/ /'degs 'jog gom pa'i gur kum gyi/
/dbyangs yig sa la 'dri bzhin du/ /snyigs dus kun mkhyen gnyis
pa zhes/ /snyan grags gsar pa'i ga bur gyis/ /sa gsum ma lus
dkar byas pa/ /rin

chen 'byung gnas zhi ba yi/ /zhabs sen nor bu'i 'od 'bar ba/
/rin chen gtsug rgyan gzhan bzhin bsten/ /mtha' yas yon tan
kun gyi gzhi/ /rgyal ba'i bstan pa'i sgor zhugs nas/ /rim
bzhin gnas brtan

a b+hya yA/ /ka ra zhes bya sgra brgya rgod/ /rnam mang rig
gnas mang rgyud kyi/ /gdangs can pho brang nyams dga' bar/
/rnam dpyod brtson pa'i grur zhugs te/ /phun tshogs nor gyi bu
la spyod/ /nam zhig rnam gnon ngang

tshul du/ /thos bsam gser gyi rtsibs stong can/ /mgal me bzhin
du bskor ba na/ /tsandan dmar po spangs 'dra ba'i/ /rakta
'dzag pa'i ba glang sha/ /khyer ba'i bshan pa mo zhig dang/
/slang nas nu ldan smin pa'i gzugs/

'phral du gzhon nu mar bsgyur ba'i/ /rba rlabs g.yo zhing
byung ba yang/ /bde gshegs bslab pa'i ra ba las/ /'da' bar
dka' ba'i chu lon gyis/ /yang dang yang du bzlog par byas/
/'on kyang de dag ci 'dra zhes/ /

the tshom dpyod thag la 'jug pa/ /rang dang slob dpon gyis gsol
ba'i/ /zla shel las 'ongs zab rgyas kyi/ /bdud rtsi'i 'od dkar
'dzag pa yis/ /rnam dpyod drang srong snod 'gengs shing/ /sgo
glegs gsum gyi rgyas

@003a @#/ /bsdams pa'i/ /bsam gtan khang bur bsgrub pa'i dus/
/slob dpon chen po shanti pa'i/ /mngag gzhug ma ste slob dpon
gyis/ /nyid dang ga Na tsa kra'i gyis/ /mngags ces tshogs kyi
yo byad gyur/ /bdag nyid chen

po dge slong gi /brtul zhugs brtan pas sngon chad kyang/ /ma
byas mi byed bla ma yang/ /mdzad pa mthong ba'i yul 'das ces/
/smras tshe sngon chad de lta na'ang/ /deng 'dir gyis ces smra
ba yang/ /dang du ma blangs bu mo song/ /

bltas tshe sgo gsum nang ngos nas/ /bcings pa'i rgya las ma
'das pa/ /mthong bas yid mkhar the tshom gyi/ /'ja' tshon dra
bas mngon par khebs/ /skya rengs dkar po'i bya ma rta/ /sngon
du btang nas 'od gzi'i dag /

shing rta zhon nas shar phyogs kyi/ /sa 'dzin rgyan du 'khod
pa'i tshe/ /bla ma'i zhabs kyi chu skyes la/ /btud nas de yi
tshul gsol bas/ /lan du de 'dra'i g.yog mos dben/ /rgyal yum
rje btsun rnal 'byor ma'i/ /

bka' bzhin bsgrubs na lhan skyes kyi/ /ye shes mngon du 'gyur
zhig na/ /zag med bdud rtsi'i ak+Sha ha/ /ro mchog 'dzin pa'i
steng lhung ba/ /lud pa lu bas phyir bsal ba/ /de bzhin spangs
pa kye ma smad/ /sngon las ngan

pa'i 'bras yin gsungs/ /de thos de yi yid kyi mkha'/ /dga'
ba'i nyi 'od kyis stongs shing/ /mya ngan mun pas gtibs pa
bzhin/ /yi dam bde ba'i zas rnyed pas/ /bza' dang btung bas ci
bya zhes/ /zhag drug bar du smyung bar

@003b gnas/ /lnga pa'i mtha' yi rmi lam du/ /dus gsum rgyal
ba'i yum byon nas/ /bu gcig ltogs nyal ma byed longs/ /rgyud
sde mang po'i don shes kyang/ /dman pa'i rnam rtog dag gis
bcings/ /tshe rabs mang por bu khyod

kyis; ;bsnyen sgrub mchod pas kho mi mnyes/ /der ni lan gsum
'ongs byas kyang/ /bka' bcag tshe 'dir mchog gi gegs/ /de ni
mdo rgyud 'o ma'i mtsho/ /rnam dpyod srub shing gis bsrubs pa/
/rtsi bcung snying po lta bu yi/ /

bstan bcos mang du rtsoms shig dang/ /sngon gyi ngan pa'i las
zad nas/ /bar dor mchog gi dngos grub 'thob/ /lan du mthar
thugs ma d+hi'i/ /sgron me gsal bar mi ldan pas/ /dgongs 'grel
'ong zer 'bum spros kyang/ /

gzhan phan snang ba ji ltar 'byung/ /rgyal yum mgur gyi pad
mtsho'i dbus/ /nga yi a d+hi ShThi ta yis/ /dar zhing bstan
dang 'gro gnyen zhes/ /bung ba'i dbyangs snyan ci yang
bsgrags/ /de nas btsun mo'i bka' bzhin du/ /blo gros

yongs 'du sa brtol las/ /mdo rgyud 'grel pa bsgrub pa'i thabs/
/dbang chog rjes gnang la sogs pa'i/ /ngo mtshar me tog 'bum
phrag bskrun/ /shing stan tsan gyi sa skyong bas/ /indra u
li'i gnas gzhi yi/ /skyed tshal

phul bar paNDi ta'i/ /bya ba rnam gsum gyis 'da' ba'i/ /indra
sa rar bsgrub pa yi/ /ting 'dzin sgo brgya legs phye bas/ /yi
dam mang po'i zhal skyin rnams/ /'dren byed bdud rtsi lta bur
gyur/ /tsa ra sid+ha'i grong khyer du/ /

@004a @#/ /rigs ngan gdol pa'i rgyal po ni/ /grub mtha'i ngan
pa'i dug chu yis/ /myos pas gcig lhag brgya phrag mi/ /phyugs
su bsgyur ba'i mchod sbyin phyir/ /btson rar bsngams pa'i nyam
pa'i sgras/ /

bdag nyid chen po'i thugs rje ni/ /bskul bas sems kyi tsher mar
gyur/ /de la yang yang bde sdug gi /snang brnyan ci yang 'char
ba yi/ /las 'bras me long gsal bstan pas/ /de ltar bden na 'di
dag gi /lcing mnyam sa le

sbram stsol na/ /mchod sbyin rgyu rnams 'grol zhes smras/ /de
tshe gnas brtan chen po des/ /nyam thag phongs pa kun gyi
gnyen/ /bslu med dkon mchog gsum po la/ /de rnams phyir du
gsol ba'i mthus/ /'jigs rung dug

gi kha rlangs ni/ /dus mtha'i chu 'dzin ltar 'khrigs pa'i/
/gser 'od 'khyug pa'i brang 'gro zhig /yul der myul zhing a
long ltar/ /bskor nas 'jigs med 'byung gnas kyi/ /sku la
'khril nas gdengs kar byas/ /

de mthong gdol pa'i rgyal po yis/ /skrag pas gsang bya'i mi
rnams kun/ /bdag nyid chen po la phul nas/ /gdug pa'i sems can
btang bar gsol/ /slob dpon gyis kyang dug gi sbrul/ /nags su
bskrad cing mchod

sbyin rgyu/ /phal cher dam pa'i lam la bkod/ /su kha wa rNa'i
grong khyer du/ /sbyin pa'i 'bras bral skye bo'i tshogs/ /brtse
bas thugs dam rgyud bskul te/ /drang srong snod nas nam mkha'i
mdzod/ /phye bzhin 'dod dgu'i

@004b char pa phab/ /dza ya na ga ra zhes pa'i/ /grong khyer
la k+Sha nyi ma ni/ /'bar ba'i sgra can gyis za ba/ /bden pa'i
chab kyis bsil mdzad cing/ /de bzhin thags kyis 'tsho ba'i
bu'i/ /gzugs 'dzin 'bar byed rgyas nyams dang/ /

gdug pa'i sbrul gyis reg pa yi/ /lnga bar bgrong pa'ang bden
pas gsos/ /yul de'i bdag po nyi ma'i bu'i/ /gzhan dbang song
ba'i btsun mo yis/ /phul ba indra bi ha ra'i/ /bsti gnas sar
pa'i dga' tshal du/ /ngur smrig sbrang rtsi

'dzin pa'i tshal/ /mdo rgyud bshad sgrub ge sar rgod/ /yid 'ong
dge ba'i ldum rar ni/ /lta ltangs zhags pas chom kun bcings/
/bsil ba tshal gyi dud khrod du/ /bu gcig shi ba slar yang
bslangs/ /der ni rgyal ba kun gyi yum/ /rje

btsun shes rab gsal byed mas/ /dbugs dbyung mchog tu bsngags
par mdzad/ /bkri ma la ri bzhugs pa'i tshe/ /tra raShka yi dmag
tshogs kyi/ /ser bas dpal ldan na landra'i/ /'bras bu 'joms par
phyogs pa'i tshe/ /mchod

gtor men po'i tshogs bshams te/ /zan gyi 'dab ldan 'phrul 'khor
ni/ /rab 'jigs nam mkha'i lding gyur te/ /kla kla'i tshog rnams
pha mthar bskad/ /rnam mang lung gi lus rgyas shing/ /rigs
pa'i mche sder mi bzang pas/ /mu

stegs glang chen myos pa yi/ /snying la 'jigs pa ci yang byin/
/mdo dang rgyud sde'i shlo ka/ /'bum phrag brgyad kyi rin chen
gyis/ /thugs kyi bang mdzod yongs bkang nas/ /mtha' dag 'gro
la mchog stsol mdzad/ /bcom ldan

@005a @#/ /he ru ka zung dang/ /rdo rje btsun mo la sogs pa/
/lha dang bsrung ma'i tshogs rnams kyis/ /byin rlabs me tog
char ltar phab/ /de ltar slob dpon chen po a b+ha yA'i/ /rnam
thar rin chen 'byung ba'i

gnas 'dra las/ /rnam par dpyod pa'i gser gyi thur ma yis/
/phra mo'i chu thigs tsam zhig deng 'dir blangs/ /tshul 'dir
yang dag pa dang ltar snang gi /mi mthun gtam gyi sbyor ba
rnam mang po/ /legs par brtags nas yid

brtan thub pa rnams/ /ji bzhin bkod mod 'on kyang byis pa'i
blos/ /nangs par gyur tshe mkhas pa'i tshogs rnams dang/ /bla ma
lha dang bsrung ma'i tshogs la bshags/ /nongs pa rgyu dang bcas
pa drung phyung nas/ /thun mong

mchog gi dngos grub stsal du gsol/ /de las byung ba'i dge
tshogs 'gro ba kun/ /nyam thag 'khor ba'i rgya mtsho chen po
las/ /rings pa'i tshul gyis bsgral bar bya ba'i phyir/ /mchog
gsum ngo bo kun mkhyen thob phyir

bsngo;; //zhes slob dpon chen po a b+ha yA ka ra'i rtogs pa
brjod pa tshangs pa'i dbyangs snyan zhes bya ba 'di yang/ dge
ba'i bshes gnyen sde snod 'dzin pa du mas bskrul ba la brten
nas/ rgyal khams pa shAkya'i

dge slong blo bzang chos kyi rgyal mtshan gyis/ rdo rje phreng
ba'i lo rgyus 'dra min mang po zhig 'dug pa rnams la legs par
brtags/ lo tstsha ba nam mkha' smon lam phreng bskor la gsan pa
che bar 'dug pas/ cung zad

@005b khungs btsun par mthong ba dang/ zhang lo grub pa dpal
gnas brtan chen po a b+ha yA'i dngos slob legs spyod 'byung
gnas kyi dngos kyi slob mar 'dug pas/ khong gis mdzad pa'i
rnam thar phal cher mthun par snang

bas yid brtan rung ba ltar/ lcags sbrul zla ba lnga pa'i yar
ngo'i tshes brgyad/ nyi ma me bzhi'i 'grub sbyor thog lhan lhun
rab kyi gzhis kar sbyar ba'i yi ge pa ni dge tshul blo bzang
dar rgyas so// mangga laM//