@00 @#/ /byang chub sems dpa' sems dpa' chen po zhi ba'i lha'i
rtogs pa brjod pa padma dkar po'i phreng ba byin rlabs kyi dri
bsung 'phro byed ces bya ba bzhugs so/ /

@001a @##/ /byang chub sems dpa' sems dpa' chen po zhi ba'i lha'i
rtogs pa brjod pa padma dkar po'i phreng ba byin rlabs kyi dri
bsung 'phro byed ces bya ba/ sangs rgyas dang byang chub

sems dpa' thams cad la phyag 'tshal lo/ /ma lus sangs rgyas kun
gyi ye shes ni/ /srid 'dir brtse bas bskyod pa'i zlos gar las/
/blo bzang grags pa'i ba dan mdzes pa'i zhabs/ /

rten byed padmo'i phreng ba spyi bor 'dzin/ /yid 'ong 'char ba'i
tshon ris la 'khu zla ba dmar ba'i 'dzum 'od can/ /tshogs gnyis
rdul mang cha shas yongs rdzogs mtshan dpe 'od brgya'i

dra bas 'khyud/ /rmongs pa'i tsha gdung ma lus sel byed thugs
rje'i bsil zer phyogs bcur 'gyed/ /blo gros ku mud bzhad pa'i
dpal ster ngag gi dbang por phyag bgyid do/ /mkhyen

@002a @#/ /brtse'i chu gter gting mtha' mi mngon zhing/ /yon tan
rin chen du mas yongs su gang/ /rmad byung 'phrin las rlabs
phreng g.yo ba can/ /rgyal sras rgya mtsho che rnams rgyal gyur

cig /gang gi yon tan padmo'i mtshor/ /bdag yid bung ba song gyur
pas/ /snyan ngag mgrin pa'i rnga gsangs stong/ /sgrog la su zhig
btang snyoms 'dzin/ /bung ba bung ba gzhon nu'i thabs mkhas
kyis/ /chu srin

chu yi 'byung gnas 'dren byed pa/ /de bzhin de bzhin gshegs pa'i
sras chen 'di/ /bsngags kyang bsngags pa'i yul las 'das na yang/
/thog med dus nas byung rgyal smra ba yis/ /ngag ni don

dang bcas las rnam par gol/ /da ni ro 'dzin snying po blang ba'i
phyir/ /rtogs brjod pad dkar phreng ba spel bar bya/ /gang yang
snyed pa dang bkur sti dang grags pa sogs rtsa ltar dor te/
gzhan gyi don tshul

bzhin du bsgrubs na yongs su rtog pa med par 'dod dgu thams cad
rtsol ba med par sbyin pa bla na med pa'i byang chub kyi nor bu
rin po che yang rnyed par dka' ba min na/ tshor ba gdung ba'i
rnam pa can

@002b phyir bcos pa/ mngon par mtho ba'i bde ba tsam lta ci
smos/ de'i phyir bdag la phan par 'dod pa'i skye bo rnams kyis
yang dag pa'i bde ba'i dpal la dus rtag tu 'jug par bya ba'i
phyir/ bla na med pa'i byang chub las slar

ldog pa med pa'i go cha bgo ba dang/ skye bo phal po ches rjes
su yi rang ba tsam yang bya dka' ba'i gsal mchog rnams kyi spyod
pa la slob pa dang/ gzhan gyi don la brtson pas rang gi don yal
bar 'dor ba'i rgyal

sras rnams kyi rnam par thar pa la yang blta bar bya'o/ /de yang
'di ltar/ rmad du byung ba'i thugs rje chen po ni dal 'gro'i
phung po'i 'jing ltar zab/ shes bya mtha' dag la khyab pa'i
mkhyen pa ni lha'i lam ltar mtha'

yas/ sems can thams cad la ni rgyu med par bdag nyid kyi bu
bzhin du byams/ thub pa'i bstan pa la ni rgyal sras dam pa zhi
ba'i lha zhes/ mi'i seng gi ltar snyan pa'i grags pa phyogs kyi
pha mthar 'gro ba de nyid kyi rmad du

byung ba'i mdzad pa rgya mtsho lta bu las/ zegs ma tsam zhig
mchog tu dad pa'i rnga yab kyi rtse mos blangs te snyan ngag gi
snyim pas mchod par bya'o/ /rgyal sras gsar pa'i zla tshes ches
phra yang/ /lha bcas bde 'byung gtsug tu

bsten par 'os/ /de'i phyir gang gi yon tan cha shas tsam/ /mgrin
pa'i rgyud mang lam du mtshon byed pa/ /de las byung ba'i gnam
bskos khor yug gi /sa 'dzin khongs su yangs pa min no zhes/ /nyi
ma'i gnyen gyi ljags

@003a @#/ /yangs pad tshal dbus/ /lung mang bung ba'i dbyangs kyis
legs par bsgrags/ /de'i slad rnam dpyod ku sha'i phon/ /gang gi
yon tan rgya mtsho la/ /rig pa las byung ngo mtshar gyi/ /chu thig
blangs te

gar bgyid do/ /lhag bsam dag pa'i sprin gseb nas/ /dam pa rnams
kyi mdzad pa yi/ /dbyar skyes rnga gsangs bsgrags pa la/ /rab
dga' mi rgyas mdongs ldan su/ /de yang 'di skad thos te/ bskal
pa bzang po'i

sangs rgyas stong gis chos kyi 'khor lo bskor ba'i bsti gnas dam
pa/ rdo rje'i gdan gyi nub phyogs na dge ba bcu'i yon tan gyis
ched du brgyan pa lta bu'i yul 'khor mo bzang po zhes bya bar/
sngon gyi lha'i lha dam

pa du ma la bsod nams kyi sa bon yongs su bskrun pa/ mchog tu
dkar ba kha ba'i dum bu 'khrigs pa lta bu'i rigs dang ldan pa'i
lha mi'i dbang phyug shing sA la chen po lta bu/ yab rgyal po
dge ba'i go cha zhes bya ba dang/ yum

ni rdo rje rnal 'byor ma'i sprul par grags pa zhig ste/ gnyis
ka'ang rang bzhin gyis dbang po rnams ni yongs su dul/ ya rabs
kyi spyod tshul du gu la'i gos ni gyon/ ngo tsha'i ska rags khrel
yod nor bu'i za ra tshags 'phyang bas ni

dkris/ /dad pa'i lang tsho gtong ba'i rgyan gyis mchog tu mdzes
pa zhig go /rab rmongs pha rol mtshon gyi g.yul bzlog pa'i/ /dge
ba'i go cha don mthun rigs kyi ni/ /thig le gang gis 'dzin pa'i
dpal mo mchog /byang chub

@003b sems dpa'i ma ma mdzes sdug ma/ /don kun grub pas sgyu
'phrul bzhin/ /rmad byung snying stobs rab rdzogs pa'i/ /phun
tshogs rgyal ba'i myu gu yis/ /de yi mngal ni skal bzang byas/
/skye rga na 'chi'i tshang tshing 'khrigs pa ma

lus pa/ /bdag med ye shes byin za 'bar bas bcom gyur kyang/
/bdag bzhin gzhan la rnam par blta ba'i rlung shugs kyis/ /kun
nas drangs pas yum gyi lhums su de yid khyer/ /de ltar zla ba'i
grangs yongs su rdzogs pa

na/ rgyal bu don thams cad grub pas/ lha mo chen mo sgyu 'phrul
la ji lta ba bzhin du/ yum la tshor ba gdung ba'i reg pas gos pa
med par/ khye'u gzugs byad shin tu mdzes shing blta bas ngoms pa
med pa mgo zlum zhing rgyas

pa/ dpral ba'i dbyes zla ba ltar che ba zhig 'khrungs par gyur
to/ /min ma 'dul byed gzhu yi sgyu 'phrul gyis/ /mdzes ldan zla
ba'i bzhin can ri dwags mig /gser gyi rdul mang brtsegs pa'i
ljon pa zhig /mi rnams ya

mtshan mtshon slad bskrun pa snyam/ /ji ltar 'dam las skyes pa'i
ka ma la/ /mi gtsang 'dam gyi dri ma spangs pa bzhin/ /mngal gyi
chu 'dzin lto ba las 'ongs kyang/ /de yi 'ching ba'i rgya las
rnam par grol/ /mi bzad snyigs

ma mtsho ltar bdo ba'i mthus/ /bu ram shing pa nyin mo'i dbang
phyug kyang/ /dus kyi nub ri'i rtse mor gos dmar bzung/ /de'i
tshe sras bcas phyogs bcu'i rgyal ba yi/ /mkhyen brtse'i chu shel
rdzogs pa las 'khrungs pa'i/ /rgyal

@004a @#/ /sras dpa' bo smra ba'i zla ba zhig /'phags yul shar
ri'i rtse mor mngon 'phags te/ /thub bstan kunda'i tshal la ngal
bso byin/ /de nas btsas pa'i cho ga rnams rgyas par byas te/
mtshan yang zhi ba'i

go cha zhes brtags so/ /de de ltar gdugs re re 'das pa na'ang/
yar ngo'i zla ba ltar gzi mdangs ni je che je cher gyur/ byis pa
nas pha ma dang rgan rabs rnams la ni bsnyen bkur bar byed/
mnga' ris kyi skye bo rnams ni

bdag gi bu bzhin du skyong/ le lo med cing rang bzhin gyis yid
gzhungs pas rgyal srid skyong ba dang rjes su mthun pa'i rig
pa'i gnas bco brgyad rtogs pa'i blo rgya chen por gyur to/ /de
la dam pa'i rjes 'gro blo yi

dbyig /dbyar gyi dpal mo dar la bab pa'i dus/ /rgya mtsho chu
bo'i rgyun gyis gang ba ltar/ /phan tshun 'gran pa bzhin du 'phel
bar gyur/ /mtha' dag shes bya'i chu gter cher/ /rnam dpyod gru
yis legs zhugs te/ /

le lo'i dgra yis bskyod pa las/ /pha rol son par cis mi 'gyur/
/de lta bu'i gzhon nu de skyed cher bsrings te/ lo lnga drug
tsam lon pa'i tshe/ grub pa thob pa'i rnal 'byor pa sbas pa'i
brtul zhugs spyod pa zhig dang

mjal te/ 'jam dpal rnon po bsgrub pa'i thabs zhus nas/ nyin
mtshan kun tu g.yeng ba'i go skabs sgom bzlas dang/ mchod bstod
sogs la brtson pa'i bya bas phrogs pas/ ring po ma lon par 'jig
rten gyi

@004b mdzes pa gcig tu bsdus pa lta bu'i rje btsun 'jam pa'i
dbyangs kyi zhal bzang mngon par dga' ba'i ri dwags/ gzhon nu
de'i lta byed rnam par g.yo ba'i sgro ldan gyis bzung bar gyur
to/ /grub pa'i man ngag padmo'i

'byung gnas kyi/ /sbyor bas 'jam dbyangs zhal bzang padmo'i
tshal/ /rnam par phye ba'i mdzes pa la chags pa/ /gzhon nu rkang
drug ldan pa mgon dang bcas/ /brtse bas srid gnas srid pa'i nyes
pa spangs/ /rigs kyis

mtho yang mtho ba'i rlom pa med/ /shes rab gsal yang gsal mchog
gzhan la gus/ /'di lta'i rgyal sras rgyal ba'i gdung 'tsho ba
yin/ /yon tan de dang de dag gi /dkyil 'khor yongs su rdzogs pa
ni/ /yid 'ong lang tsho'i mdangs

bkra ba/ /rgyan gyis brgyan pa bzhin du gyur/ /de rim gyis nar
son par ni gyur/ rlugn gi lhag pa'i lha gang yin pa'i yi dam gyi
lha'i zhal ni mthong/ 'jungs pa la dga' ba'i 'dris pa yongs su
dor zhing/ rang bzhin bzang bas

nang mi'i 'khor rgya chen po dag dang/ mnga' 'og gi skye bo
rnams kyi spyi bos bsten cing/ tshe rabs kun tu kunda lta bu'i
las rnam par bsags pa'i 'bras bu phun sum tshogs pa'i dpal la bde
bar spyod pa las/ re zhig gi

tshe/ bsags pa kun gyi mtha' 'dzad cing/ /mthon po'i mtha' ni
dma' ba yin/ /zhes pa dang/ kye ma 'dus byas rnams mi rtag /skye
zhing 'jig pa'i chos can yin/ /zhes gsungs pa ltar dus kyi pho
nyas brda' sprod pa med par

@005a @#/ /yab rgyal po 'jig rten 'di las pha rol tu song bar
gyur to/ /bsags pa'i longs spyod spyod pa'i mthu med par/ /gnyen
dang nor rdzas sogs la chags bzhin du/ /'jigs rung bar do'i
'phrang der 'gro dgos na/ /

sems dang ldan pa su zhig bde bar 'dug /de nas blon 'bangs thams
cad kyis sems dpa' chen po de nyid rgyal tshab tu 'byon par gsol
ba na/ /bdag nyid chen po de skye ba dpag tu med pa'i snga rol
nas rab tu byung ba la goms

pas/ khyim na gnas pa ni bya ba ngan pas brel zhing nye bar zhi
ba dang 'gal ba/ sdug bsngal mang po'i 'bem du gyur cing chog mi
shes pa/ bag med pa'i gnas su gyur par ni rig /rab tu byung ba
ni nyes pa de dag las gzhan du gyur

cing/ dge ba'i chos byang chub kyi phyogs rnams dang rjes su
mthun par ni shes/ 'dus byas rnams ni shin tu mtho ba'i sa 'dzin
gyi rtse mo nas lhung ba'i 'bab chu drag po ltar sdod pa'i go
skabs med par mthong nas/ de'i tshe yid la bsam

pa 'di lta bu skyes par nges so/ /'dod dgu'i 'byor pa chu yi chu
sbur bzhin/ /lang tsho'i dpal yang ston ka'i sprin tshogs bzhin/
/'tsho ba'i tshe ni glog phreng bro gar bzhin/ /gnas pa mi brtan
rgya mtsho'i rlabs phreng bzhin/ /'jigs rung skye

rga na 'chi'i zhags pa yis/ /'gro ba 'di lta bur ni bcings gyur
te/ /mthu chen dgag par mi nus yod bzhin du/ /dogs pa tsam yang
mi sems dga' zhing spyod/ /dpyid dus me tog gzhon nu mdangs
mdzes pas/ /kun gyi yid dang mig

@005b la dpal ster yang/ /dbyar dus de la su zhig dga' bar sems/
/de bzhin dbyar dus skyes pa'i me tog kyang/ /snyan pa'i sgra
'byin bung ba'i khyu 'khrigs shing/ /mdzes pa'i 'dab stong rgod
pa'i 'dzum ston kyang/ /nam zhig stan du gyur

pa'i dus kyi tshe/ /ba mo'i reg pas thams cad mog por byed/ /de
bzhin 'gro ba'i rgyud na g.yo ba la/ /blo dang ldan pa su zhig
dga' bar sems/ /bsags pa kun kyang mtha' na 'dzad pa ste/ /de
bzhin 'dus pa'i mtha' ni 'bral ba nyid/ /

dar ba'i mtha' yang rgyud pas bsnyegs pa la/ /skad cig 'jigs pa
lhod pa kye ma mtshar/ /de ltar de yis 'dod pa'i dpal/ /rlung gis
bskyod pa'i lo ma'i rtser/ /greng ba'i chu thigs ltar mthong
nas/ /'dod la chags pa rign du dor/ /de

ltar des 'dus byas kyi ngang tshul g.yo ba'i tshul rtogs shing/
dben pa'i gnas ni dge ba dang rjes su mthun pa'i bde ba du ma'i
'byung khungs su gyur pa dang/ khyim na gnas pa tshul khrims kyi
gnyen por shes pas dga' bar ma gyur to/ /

de ltar dga' bar ma gyur kyang/ thog ma med pa nas gzhan gyi
ngo bsrung ba la goms pas bzlog par ma nus pas zhal gyis bzhes te/
nang par kun gyi gtsug rgyan du mnga' gsol ba'i do nub gzhon nu
de'i rmi lam du/ sang rang

gi zhabs sen nar bu'i lan tshar gyis mdzes par byed rgyu'i khri
de la/ rje btsun 'jam pa'i dbyangs bzhugs pa'i zhal nas/ su gcig
'di ni nga yi stan yin te/ /nga ni khyod kyi dge ba'i bshes
gnyen yin/ /nga dang khyod gnyis stan

@006a @#/ /gcig la 'dug pa/ /'di ni rnam pa kun tu rigs ma yin/
/zhes gsungs par gsal nas gnyid sad pa na/ rgyal srid kyi dpal
la longs spyod mi rigs par shes te/ de ma thag bdag nyid gcig
pur dpal nA

lendra'i lam du zhugs nas song ngo/ /nyi gzhon 'char ka'i mdangs
'dzin 'jam pa'i dbyangs/ /yid 'ong sku yis mig la bdud rtsi
bskrun/ /the tshom spangs pa'i gsung gis lung yang bstan/ /de'i
tshe rgyal sras mkha' lding dbang

po de/ /phun tshogs kun dga' bskyed pa'i rgyal po'i dpal/ /dug
can lag 'gro gnas pa'i tshang tshing ltar/ /legs par mthong bas
rtsa bzhin dor byas te/ /zhi ba'i gnas mchog sa 'dzin ngogs su
song/ /gang gi don du gnyis skyes

rnams/ /'bad pa bsgrub byed rgyal srid kyi/ /dpal de lag na 'dug
bzhin du/ /yongs su 'dor ba e ma mtshar/ /de nas bdag nyid che
de de nyid la/ /dwangs ba'i chu gter rlabs kyis bskyod pa lta'i/
/thugs kyi bya lam dga'

bde'i chu khur can/ /mtha' dbus spros pa med par kun tu khebs/
/byang chub sems dpa' sems dpa' chen po zhi ba'i lha'i rtogs pa
brjod pa padma dkar po'i phreng ba byin rlabs kyi dri bsung
'phro byed ces bya ba las/ khyim na gnas

pa'i skabs kyi rtogs pa brjod pa ste 'dab ma dang po'o// //zla
zhal ri dwags mig can mdzes pa'i sku/ /mnyen lcug 'khri shing
dal bus bskyod pa ltar/ /ldem ldem gar gyis rol pa'i 'jam pa'i
dbyangs/ /da dung ngag

@006b la spobs pa'i mchog sbyin stsol/ /de nas dpal ldan nA
lendrar phebs te/ rgyal ba'i ring lugs pa chen po/ rtsod pa'i
dus 'dir thams cad mkhyen pa ltar/ paNDi ta lnga brgya'i gtsug
na rgyal mtshan gyi rtse mor baiDUrya bzhin mdzes

pa'i mkhan po rgyal ba'i lha las tshigs snga ma dge tshul gyi sdom
pa mnos te/ legs par gsungs pa'i chos 'dul ba la rab tu byung
nas mtshan yang zhi ba'i lha zhes gsol to/ /tsandan yal ga ji
bzhin mnyen pa'i thugs/ /bung pa

lta bur spong ba'i sems kyis rtsen/ /shing bal ltar 'jam sku yi
lhun po ni/ /dmar ser bla gos mtshams sprin gzhon nus 'khyud/
/rin chen do shal nor bu'i rna cha yis/ /rab rmongs byis pa'i
tshogs rnams spras pa ltar/ /ngo tsha

dran dang shes bzhin bag yod pas/ /bdag nyid chen po de ni yongs
su brgyan/ /gang gi dul ba'i dpal gyis bcu phrag bcu'i/ /lo dag
yongs su brgal bar tshangs spyod kyi/ /brtul zhugs rnam par bsten
pa'i drang srong yang/ /

sar pa'i dge sbyong gnas la rab tu bkod/ /de tshe thub dbang
gnyis pa zhig /'og min gnas nas byon pa bzhin/ /legs bris bcas
pa'i 'jig rten 'di'i/ /yon gnas bla na med par gyur/ /tshul
khrims ma la ya dag gi /

dri bzhon gsar pa'i dga' ston gyis/ /phyogs kyi bu mo'i dri
'dzin la/ /bdud rtsi'i mchog kyang de yis byin/ /de ltar rab tu
byung nas phyi rol gyi g.yeng ba'i dgra sde ma lus bdug can
nyon mongs pa'i dpung dang lhan cig pham

@007a @#/ /par mdzad cing/ ched du rje btsun 'jam pa'i dbyangs
kyi gsung gi bdud rtsi ngoms pa med par gsol ba dang/ gsol ba
dag kyang rtse gcig tu dril nas yang dag par 'jog pa dang/ phyi
rabs kyi gdul

bya gzhan dag la ma bu gcig po la yid kun tu brtse ba lta bu'i
thugs rje chen pos bskul nas/ yang dag pa'i bstan bcos rtsom pa
sogs rnam pa thams cad du mkhas pa'i bya bas dus 'da' bar mdzad
kyang/ dam pa ma

yin pa'i skye bo rnams kyi ched dor zas kyi 'tsho ba bsten pa
dang/ gyi nar 'dug pa dang/ 'chag pa ma gtogs ma mdzad cing/
phal mo ches ma rig pas/ b+hu su ku 'du shes gsum pa zhes grags
so/ /de'i tshe mngon par shes

pa'i lta byed dang bral ba 'ga' zhig gis/ phyi'i kun tu spyod pa
de dag la dpags te/ dam pa'i chos 'dul ba la rab tu byung ba
rnams kyis las su bya ba ni 'khor lo gsum gyi rol par gnas pa
sha stag yin pa la/ 'di ni gang

dang yang mi ldan pa zhig ste/ de bas na dad pas byin pa la
longs yongs su spyad par mi btub pas na gzhan du bskrad par
bya'o/ /de yang mdo 'don res byas pas don de nyid 'grub par
'gyur ro snyam nas/ bdag nyid chen po de

la mdo 'don par gsol bas/ de lta bu bdag gis ji ltar nus ces/
zhal gyis ma bzhes pas/ slar yang nan tur bskyed de gsol bas/ de
ltar na bgyi'o zhes zhal gyis bzhes so/ /de nas dpal ldan nA
lendra'i

@007b dge 'dun thams cad 'dus pa'i dbus su/ nyams sad par bya
ba'i phyir/ 'jigs bral gdong lngas bteg pa'i khri mthon po
bshams nas/ de la ji ltar 'dzeg pa dag kyang mi shes so snyam
na/ phyag gis cung zad mnan

nas steng du thogs pa med par gshegs pas/ sems dpa' chen po de
la zhe 'bras su blta ba rnams kyang sems shin tu the tshom du
gyur to/ /de nas bdag nyid chen po des 'dzum zer gsal bar phyung
ste/ mdo sngon chad grags

pa zhig 'don nam/ ma grags pa zhig 'don zhes dge 'dun rnams la
bka' stsal pa ni 'di ltar/ kho bo'i blo gros dbyar skyes khang
bzang las/ /legs bshad sar pa'i chu char spros pa yis/ /thub
bstan rtsi bcud rgyas par

bya'am ci/ /'on te sngon grags legs bshad dga' ston 'gyed/ /ces
gsungs pa na/ sngon ma grags pa zhig gsung bar zhus pas/ bzhin
gyi mdangs gsal por phyung nas/ lha'i rnga ltar rna bar 'ong
zhing yid du 'bab

pa/ rgyal ba rnams kyi rnam pa thams cad pa'i dbyangs kyi rjes
su 'gro ba'i gsung gi shel skyogs bzang pos/ 'dus pa rgya mtsho'i
tshogs kyi rnam par dpyad pa'i ro 'dzin gyi dbus su/ byang chub
sems dpa'i spyod pa la

'jug pa'i legs bshad kyi ro bcud phun sum tshogs pa'i btung ba
stsal bas/ dpag tu med pa'i gdul bya bla na med pa'i byang chub
tu rigs nges pa'i bde bas khyab par mdzad do/ /de yang shes rab
le'u'i/ gang tshe dngos dang dngos

@008a @#/ /med dag /ces pa nas rdzu 'phrul gyis nam mkha' la
'phags te/ mthar sku mi mngon par bsngo ba'i le'u bton nas
gshegs so/ /kun 'dus mthon po'i khri la mgon po de/ /zhum phyir
dam chos ston par

gsol ba na/ /gang gi zhabs sen gsar pa'i zla ris ni/ /mtho yangs
shar ri'i rtse mor mngon par 'dzegs/ /lhun po lta bur mtho ba'i
spobs pa dang/ /rgya mtsho lta bur zab pa'i mkhyen pa yis/ /don
zab sdeb legs sngon med

gaNDi'i dbyangs/ /ma lus rna rgyan bzhin du mdzes par gyur/
/gser gyi 'dab brgya rgod pa'i zhal bzang ngogs/ /dung ltar dkar
ba'i tshems kyi ze'u 'bru'i gseb/ /zab gsal sbrang rtsi rgyas
pa'i dus ston gyis/ /blo gsal bung

ba'i tshogs la phan bde bsgrubs/ /de tshe lha yi lam bzang nas/
/ga bur dri bzang gis bsgos pa'i/ /yid 'ong chu skyes gzhon nu
rnams/ /phan tshun rtse zhing rnam par lding/ /de nas bdag nyid
che de de ma thag /je mtho je mthor

rdzu 'phrul gshog rlabs kyis/ /mkha' dang mkhyen pa 'gran par
chas pa na/ /'dis ni bdag gi pha mtha' ston no zhes/ /mkha'
dbyings mdzes ma za 'og phag tu bros/ /de ltar bdag nyid chen po
des rdzu 'phrul chen po mngon

par 'du byed pa de ltar bstan pa dang/ 'dus pa'i tshogs rnams las
gang dag sdang bar sems pa dag ni lhag par 'gyod cing/ mchi mas
mgrin 'gags te 'dzer 'dzer po'i cho nge 'don/ gzhan thams cad
dad pas yi

@008b rang nas dang bas thal mo snying gar sbyor bar byed do/
/de'i shul du rna ba'i mngon par shes pa dang/ mi brjed pa'i
gzungs la dbang 'byor pa'i paNDi ta rnams kyis gzhung bsdus pa
na/ kha che ba rnams kyis le'u dgu pa'i

bdag nyid shlo ka bdun brgya yod par bzung zhing/ yul dbus pa
rnams kyis le'u bcu pa'i bdag nyid shlo ka stong yod par bzung
bas ma mthun pa dang/ bslab pa kun las btus pa yang/ /nges par
yang dang yang

du blta/ /yang na re zhig mdor bsdus pa'i/ /mdo rnams kun las
btus pa blta/ /zhes gsungs pa'i bstan bcos gnyis po'ang ji ltar
yin ma rig pas the tshom du gyur pa na/ dus nam zhig gi tshe mchod
rten dpal yon can

zhes bya ba na bzhugs pa thos te/ /dge slong gnyis spyan 'dren
du btang bas/ gzhung gi tshad yul dbus pa rnams kyis bsdus pa
ltar yin/ bslab pa kun las btus pa dang/ mdo kun las btus pa
gnyis po kho bo'i spong khang gi gdung gseb

na paNDi ta 'i yi ge phra mos bris nas yod ces de dag gi bshad
pa dang bsgrub pa'i bka' yang gnang ngo/ /gser mdog rlon ldan
phyogs su myul ba ltar/ /mdzes pa'i sku ni lha yi lam na mdzes/
/dri za'i rgyud mang sgra la 'gran bzod pa'i/ /snyan pa'i

gsung ni legs bshad rtse dags 'khyud/ /de'i tshe 'dzin ma'i ngos
su gur kum gyi/ /dog pa bkod 'dra'i 'dus pa rgya mtsho'i tshogs/
/pad dkar dra bas khebs pa'i chu yi gter/ /ring nas mig lam gyur
pa'i ngang pa bzhin/ /gang

@009a @#/ /gi mdzad pa'i snang ba cha tsam zhig /dang ba'i yid
ngor shar bar gyur ma thag /mig gi bu gar mchi ma'i chu thigs
g.yo/ /lag pa'i padmo snying gar 'dzum par byed/ /'bras bzang
khur gyis non pa'i ljon

pa bzhin/ /gtsug gi cod pan sa la dud par byed/ /ma lus yid kyis
dad pa'i spu long 'dzin/ /dag pa'i sems ni rangs pa'i zhags pas
bcings/ /slar yang yid gnyis mun pa stug po rnams/ /brtse ba'i
'od tshogs

'dus pa'i sgron me yis/ /bsal zhing legs par bshad pa'i 'od dkar
gyis/ /thub bstan kunda'i tshal rab rgyas par mdzad/ byang chub
sems dpa' sems dpa' chen po zhi ba'i lha'i rtogs pa brjod pa pad
ma

dkar po'i phreng ba byin rlabs kyi dri bsung 'phro byed ces bya
ba las/ khyim nas khyim med par rab tu byung nas/ thub pa'i
bstan pa la bya ba ji ltar mdzad pa'i rtogs pa brjod pa ste/
'dab ma gnyis pa'o// //

rgan las thos dang bdag skyes sbrang rtsi'i bu/ /khrung khrung
'joms sogs ches cher rlom rnams kyi/ /ral pa'i nags nang zhabs
sen rtag 'god pa/ /rje btsun 'jam pa'i dbyangs kyis dge legs
mdzod/ /de nas bdag

nyid chen po de shar phyogs logs su song ste/ rtsod pa chen po
byed pa zhig gi 'thab zla byas nas/ rdzu 'phrul gyis zhi bar
mdzad de/ yang dag pa'i bde ba la bkod nas/ slar yang bdag nyid
kyis gdul bar bya ba'i

@009b 'gro ba gang na 'dug mngon par shes pa'i blta bas brtags
so/ /kun rtog rtog pa'i dri ma dang bral ba'i/ /spros zhi zhi
ba'i yid kyi me long dbyings/ /yongs dag dag dang nyes spyod
'gro ba'i tshogs/ /ma lus lus pa med par

yongs su gsal/ /de ltar gzigs pa na/ yul ma ga d+ha'i nub phyogs
ha cang mi ring ba zhig na/ ya mtshan can gyi lta ba log pa 'dzin
pa lnga brgya tsam gnas shing/ de lta bu'i lta ba bzung bas ngan
'gro'i sgo ni dbye ba ltar byas

mngon par mtho ba dang/ nges par legs pa'i lam las ni ring du
gol/ dam pa'i bshes gnyen dang bral bas legs nyes so sor 'byed
pa'i blo gros kyi mig ni ldongs/ de dag kho nar ma zad gzu bor
gnas pa du ma'ang

sdig grogs kyi brang 'gros bcings nas nyam nga ba'i g.yang du
lhung bar gzigs nas/ shin tu snying brtse bar gyur te/ de las
ldog pa'i thabs bsams so/ /bgrang yas dus nas legs sbyang lhur
blangs phun tshogs

rwa bas bskor ba'i dbus/ /dus kyi ba mo'i mdangs lha'i lhag bsam
na chung mdzes ma'i lus smin zhing/ /rin chen 'od tshogs mdzes
par 'khu ldan byams pa'i me tog thod kyis sgeg /margad zhum ma'i
lang tshor 'gran

byed brtse ba'i lag mnyen phyogs bcur g.yo/ /'gro 'di'i bla na
med pa'i yon gnas de/ /skye bo ngan 'gro'i lam 'jug gsir bu yis/
/yid kyi padmo lan brgyar bskyod pa ni/ /ngo mtshar dri yis
phyogs kun yongs su

@010a @#/ /'gengs/ /chu yi lcid kyis non pa'i bsil byed 'phel/
/sprin gyi sgra dbyangs ma bsgrags mi ldog bzhin/ /kun gyi 'dod
dgu sbyin pa'i bsam 'phel dbang/ /phongs pa re ba'i 'bras bu cis
mi

stsol/ /de nas bdag nyid chen po des bsams pa/ da ni nges par
dus la bab pa snyam nas/ rang gi lus mthu dang stobs kyi skal ba
dman pa rid rid po zhig tu sprul nas/ zla bas 'phel las rgyan
'dzin dang/ /rgyan

'dzin las kyang sprin gyi bcud/ /de las chu bo'i rgyun ji bzhin/
/de ni rim gyis song bar gyur/ /de ltar mthar gyis song song
ste/ lta ba ngan pa 'dzin pa de dag gi 'khor du bsdad nas/ de
rnams kyis de ltar bsgo ba bzhin/

mnyan zhing gus pa ltar byas pas/ de rnams kyi yid du 'thad par
gyur nas/ bzhin 'dzum zhing mig bgrad de legs so legs so zhes
brjod par byed do/ /de nas bdag nyid chen po de'i mthu phun sum
tshogs pa dang/

log par smra ba de dag gi yang sngon gyi las dang smon lam rnam
par dag pa'i mthu las/ dus nam zhig gi tshe zhag bdun gyi bar du
bu yug chen po byung nas/ bza' ba dang btung bas 'ongs pas nyon
mongs par gyur te/ dper

na mde'u dug can gyi mda' gnad du phog pa dag /'di lta bu'i zug
rngu 'byin pa'i sman pa zhig na ma rnyed par 'gyur snyam pa las
gzhan du yid la byed pa med pa de bzhin du/ zas dang skom yid la
sams shing/ ngag

@010b tu'ang/ kye bdag cag 'di lta bu'i bkres skom gyi sdug
bsngal las skyob par nus pa'i bza' btung tshol bar nus pa su yod/
de lta bu'i nus pa dang ldan pa yod na ji ltar yin yang rung
dpon du bkur zhing/ bka' spyi bos len no/ /

zhes thams cad mgrin gcig tu brjod par byed do/ /de ltar brjod
pa na bdag nyid chen po des/ da ni bdag gi don legs par grub bo
snyam nas byams pa dang snying rjes/ grang ba la 'dzem pa dang
tsham tshom med par 'bras chen

lhung bzed gang tsam gyi bsod snyoms bslangs shing/ ting nge
'dzin gyis mang por byin gyis brlabs te byin pas/ de rnams tshim
zhing bde bar mdzad de/ sngar gyi lta ba ngan pa de rnams tshul
dang mi mthun par gtan tshigs du ma'i sgo nas

sun phyung ste/ yang dag pa'i lta ba la chud par mdzad do/ /dge
ba rnams ni dma' ba'i tshul bzung nas/ /'gran bral mthon po'i
rtse mor chos srid thob/ /khengs dang dregs pa'i chang gis rab
myos pa'i/ /skye bo phal pa de dang nye ba

min/ /'di ltar/ rin chen rdul brtsegs ji bzhin mdzes pa'i sku/
/lha yi rnga chen lta bur 'doms pa'i gsung/ /mtha' bral rgya
mtsho'i 'jing ltar zab pa'i thugs/ /'gro mang dbus na yon tan
tshogs kyis mtho/ /lam ngan kunda'i

gnyen gyi zhags pa yis/ /yongs su bsdams pa'i yid can 'dab stong
can/ /nyin mo'i dbang phyug 'di yi nu zho yis/ /bskyangs bas
thal mo rang 'byung sa la lhung/ /byams pa'i thugs kyis kun tu
rgyu rnams la/ /gang tshe dge

@011a @#/ /ba'i snang ba mtshon byas pa'i/ /bdud rtsi bas kyang
dkar ba'i grags pa'i tshogs/ /gzur gnas kun gyi rna ba'i rgyan du
'chad/ /de'i tshe rgyal sras dpa' bo chen po de/ /lung rtogs 'dod
dgu 'byung bas bltams pa

yi/ /thugs kyi chu gter dga' ba'i rlabs phreng gis/ /mtha' dbus
kun tu rnam pa khebs par gyur/ de ltar rang nyid ji ltar 'dod
cing yid la gcags pa'i gnas ni 'bras bu dang bcas par gyur/
khengs pa dang dregs pa'i skyon thams

cad ni nag phyogs kyi zla ba ltar bri/ nags kyi dgon par gnas
shing na tshod yongs su yol ba'i drang srong ltar dul ba'i pha
rol tu ni son/ mthong ba dang/ thos pa dang/ dran reg gis kyang
gzhan yid thar pa la 'khul bar nus

pa'i rgyal sras chen po de/ yid kyi mkha' ni kun tu rtog pa yi/
/sgrib byed spros pa'i chu 'dzin stug po rnams/ /chu la chu ltar
dbyings su thim pa yis/ /ting 'dzin dbang sngon mdangs bzang ci
yang 'dzin/ /slar yang/ sgyur ma lta bu'i

brtan g.yo kun/ /sgyu ma lta bur thugs chud pas/ /sgyu ma lta
bu'i rnam rol gyis/ /sgyu ma lta bur 'gro ba sgrol/ /de lta bu'i
ral pas dgon pa'i gnas rnams rgyu rgyu zhing song ba las/ re
zhig gi tshe/ sems can rnams yid

srubs bdag po gnyen dang bcas pas rgyud bslad pas/ mi srun pa'i
las 'ga' zhig spyad pa'i 'bras bu mngon par grub ste/ mu ge chen
pos 'gro ba du ma nyam nga bar gyur cing/ khyad par sngon sbyin
pa'i bya ba la rgyab kyis

@011b phyogs pas/ shin tu dbul ba slong ba 'ba' zhig la brten
nas tshe 'di rdzogs par byed pa'i sprang po stong tsam/ mu ge des
gzhan gyis 'tsho ba cung zad kyang sbyor bar byed pa ma byung
bas/ 'chi bdag mngon sum du 'ongs pa bzhin du

'gum pa la ni phyogs/ bkres pa dang skom pas yongs su gzir bas
lus ni skya bo seng seng por gyur/ skad kyi gdangs nyams pas
'dar zhing 'di skad ces/ kye ma bdag cag rnams skyob par byed
pa'i snying rje dang ldan pa su yod/ dus la

bab bo/ kyi hud kyi hud ces shugs nar 'byin pa bdag nyid chen po
des gsan pas/ lus la lcags gzer btab pa bzhin gyur pa ni 'di
ltar/ phongs pa rnams kyis mya ngan shugs 'byin pa'i/ /byin zas
yid kyi bud shing bsregs pa na/ /

'thor byed shugs kyis rang dbang phrogs pa yi/ /'dab ma lta bur
de yid rab tu g.yos/ /de nas bdag nyid chen po des/ phongs pa
rnams la byams pas bsgos pa'i blta ba dang ldan pas/ dbugs
phyung ba dang/ de rnams yid

gsos pa snyam byed cing/ 'di skad du/ phyogs rnams dag ni thams
cad du/ /brgya phrag ngal ba rab bsten nas/ /yang dag gtong ba
btsal bas kyang/ /nam mkha'i padmo bzhin du gyur/ /da ni bdag
cag rnams/ nyin mo'i dbang phyug

zer gyis phye ba yi/ /gur kum mdangs sam 'char ga'i thun mtshams
kyi/ /stod g.yogs gsar pa'i dpal yang 'phrog byed pa'i/ /dpa'
bo khyod nyid mthong bar gyur ma thag /bdag cag mgon dang
bcas par gyur snyam sems/ /

@012a @#/ /ces des mtshon pa'i sems dpa' chen po de'i yon tan
brjod cing/ re ba'i mtshan ma gsal bar byed pa na/ bdag nyid chen
po des myur du kha zas bsod pa dpag tu med pa'i sta gon byas te/
dkar mnyen

padma'i rtsa ba lta bu'i phyag gis de rnams la bstsal bas/ lus
zungs yongs su rdzogs par bskyed cing/ dam pa'i chos kyi bdud
rtsi'i ros kyang rab tu tshim par mdzad pas/ phongs pa de dag
kyang yid shin tu rangs te/ grong dang grong

khyer dang yul ljongs rnams myul zhing/ slob dpon de'i bka' drin
bsams te/ e ma ho shin tu rmad du byung zhing ngo mtshar ro/
/zhes smras nas/ phyogs dang phyogs mtshams rnams su'ang don de
dran no/ /'khri shing lcug phran lta bur

mnyen pa'i phyag /bdog pa ma lus gtong ba'i rgyan gyis spud/
/kun la khro ba spangs pa'i thugs rje ni/ /dbul ba rnams la dpag
bsam ljon pa bzhin/ /de yi gtong ba las thon grags pa'i tshogs/
/rgya mtsho'i gos can mtha' gru yongs

su brgal/ /'od gzi bdag po'i mdun sar cha shas can/ /ri dwags
rgyal po'i drung na ri dwags bzhin/ /zhing 'dir ston pa'i bstan
la mgon khyod las/ /mchog tu gyur pa'i sems dpa' ga la zhig
/byang chub sems dpa' sems

dpa' chen po zhi ba'i lha'i rtogs pa brjod pa padma dkar po'i
phreng ba byin rlabs kyi dri bsung 'phro byed ces bya ba las/
'thab rtsod dang lta ba ngan pa bzlog pa dang/ phongs pa rnams
gtong ba'i phyag gis dbugs phyung ba'i rtogs pa brjod pa

@012b ste 'dab ma gsum pa'o// //yid 'phrog kur kum gzhon nu'i sa
'dzin rtse/ /indra nI la'i sprin gyis g.yogs pa bzhin/ /dmar
ser mthon mthing ral pa'i zur phud can/ /rje btsun mkhyen pa'i
gter gyis ring du skyongs/ /de

nas bdag nyid chen po de/ de lta bu'i rgyal ba'i sras kyi bya
dka' ba'i spyad pa spyod pa'i ngang nas shar phyogs su song ste/
a ri bi sha na zhes bya ba'i rgyal po'i pho brang gi nye logs
kyi bzhi mdo rnams myul zhing bzhugs pa na/ ma tsa

la'i gnod pa zhes bya ba 'tsho ba ma phyid pas gzhan gyi rdzas
'joms pa la dga' zhing snying rje med pa/ drag shul can/ rtsub
pa/ mi srun pa/ yul gzhan nas kyang de dang tshul mtshungs pa du
ma 'dus pa las/ grangs kyang shin tu mang ba

dag /rgyal po de'i 'byor pa la bltas nas 'ongs pa ni/ tsha bas
nyen pa'i ba glang gi khyu tshogs bsil ba'i mtshor chas pa bzhin
du gyur to/ /sos kyi dus su nam mkha'i nor bu yi/ /gdung bas
nyen pa'i nags tshal lag ldan rnams/ /

steng nas chu skyes bla bre g.yogs pa yi/ /dwangs ba'i mtsho yis
mgon du gnyer ba bzhin/ /de rnams 'dus pa dang mi'i bdag po de
bzhin gnags te/ 'di ltar/ gnod byed 'di rnams 'byor pa kun gyis
mgu bar byas na ni/ sa'i

bdag po'i dpal yang chu shing gi snying po lta bur 'gyur la/ gal
te gzhan du bgyis na ni gnod byed 'di dag gis lus dang sems
gnyis po phan tshun phra mas rnam par 'byed par gdon mi za ba
zhig go snyam nas smre sngags

@013a @#/ /'don pa na/ sems dpa' chen po de rgyal po la thugs
brtse bas de dag bsrung bar zhal gyis bzhes te sku bsrung mdzad
do/ /g.yo med rdo rje lta bu'i thugs mnga' zhing/ /byams pa'i
mgo skyes shes bya'i

mkha' lam khyab/ /snying rje'i mig rtsa dmar po rab tu 'khrug
/phas rgol gnyis 'thung 'joms pa'i sbar khyim can/ /rten 'byung
rigs tshul nga ros srid pa gsum/ /g.yo ba'i chu nang zla ba'i
gzugs ji bzhin/ /kun kyang

'gros pa lta bur rtsom pa na/ /gang zhig de la 'tsho ba'i rgol ba
ngan/ /me tog mda' can dpung dang lhan cig par/ /mi bzad rdo
rje'i gnam lcags 'bar ba yis/ /rdul tshogs sa 'dzin spo la ji
bzhin du/ /skad cig nyid

la mtha' dag phye mar byas/ /de ltar mthu tshad med pas gnod byed
de rnams zil gyis mnan nas/ skye dgu thams cad dang/ khyad par
sa'i bdag po 'bangs dang bcas pa rnams bde bar byas te/ rang
nyid la'ang bkur sti

chen po thob pa na/ dam pa 'di nyid la rje btsun gyi phyag char
bcangs pa'i shing gi ral gri zhig ma gtogs/ rang bzhin gyi mtshon
gyi rigs dang bral ba/ phrag dog gi zug rngus sems gzu bor mi
gnas pa'i grogs

kyis mthong bar gyur to/ /zhe sdang bzhin ras snying rje'i
mdangs dang bral/ /khro ba'i mtshon gyis bzod pa'i ljon pa
dbyung/ /yid kyi 'dzin ma phrag dog tsher mas bltams/ /'di dag
skye bo ngan pa kun gyi gnas/ /ngan pa de

@013b lta bus ma bzod par rgyal po la 'di ni skyes bu g.yo can
lags te/ mtshon cha yang shing gi ral gri zhig las med pa'i
phyir/ lha nyid kyi sku bsrung bar mi nus pas brtag 'tshal lo/
/zhes gsol bas/ rgyal po de rab tu

khros te bdag nyid chen po de la mtshon cha ji lta bu 'dug brtag
pa'i phyir/ gzhan rnams la'ang snyad btags te/ mtshon cha rim
gyis phyung ngo/ /sems dpa' chen po des bdag gi ral gri phyung
na lha nyid la ngan par 'gyur

ro zhes go bar byas na yang/ phra mas spyos pas/ ngan yang
bla'i/ phyungs shig zer ro/ /dbyen gyi gnam lcags ser ba bab
gyur na/ /mdza' ba'i me tog gzhon nu lhag mar 'gyur/ /de lta
na'ang dge ba'i skyes bu rnams/ /nyes pa byas

pa sems la goms mi 'gyur/ /'o na lha'i spyan gcig khob la/ gcig
gis gzigs su gsol gsungs nas ral gri phyung bas/ de'i 'od zer
gyis blta bar brtsams pa'i mig de 'bras bzang smin pa'i mgrin pa
grang reg gi dbyug

pas bsnun pa bzhin du/ rang dbang med par 'dzin ma'i mthil du
lhung ngo/ /de nas 'khor dang bcas pa skrag cing/ 'di ni mthu
dang ldan pa'i dpa' bo zhig ste/ da ni bzod pa dang skyabs dam
par gsol nas bka' 'bangs su

'chi bar bgyi'o snyam du bsam nas smras pa/ lhag bsam rtsa ba
rab brtan mkhyen pa'i yal ga rab tu rgyas/ /brtse ba 'dab
brgya'i phreng 'khrigs mdzad pa'i grib bsil phyogs su 'bab/
/mthu stobs 'bras bus brjid cing rigs

@014a @#/ /drug 'dod lha'i nyer 'tsho ru/ /legs 'khrungs 'dod dgu
spyi dang rnam grol bdud rtsi'i dpal rab ster/ /legs tshogs nam
mkha'i grong du gnas bcas shing/ /chos kun yongs su gzigs pa'i
mig

stong ldan/ /phyir rgol lha min 'joms pa'i rdo rje can/ /mtho
ris mgon po khyod kyis bzod pa'i rigs/ /ces bzod par gsol nas
skyabs su gsol ba dang/ rgyal po de yang dge ba'i chos kyi snod
du rung bar mkhyen nas/ phan pa'i gdams

ngag gis yang dag par tshim par mdzad do/ /dmigs med kun la
snyoms pa'i dbyar skyes phreng/ /legs bshad chu char zegs ma'i
ral pa yis/ /mi dbang rgya mtsho'i gos can dge legs kyi/ /rin
chen myu gu

mtha' dag rgyas par mdzad/ /yon tan bcud kyis bltams pa'i 'dab
brgya pa/ /de dang nye ba'i shes ldan bung ba la/ /ched du bsgos
pa med par yon tan gyi/ /sbrang rtsi'i dog pa lag pa dag la
dgong/ /de nas yang sems

dpa' chen po de 'gro ba du ma rjes su bzung ba'i phyir rings ba
ltar chas te 'byon par brtsams pa na/ mi'i bdag po des bsod nams
kyi zhing du bzhugs par lan cig lan gnyis lan gsum gyi bar du
gsol yang/

rgya mtshor 'jug pa'i ganggA'i rgyun ni sus kyang slar bzlog pa
med pa bzhin du ma gnang nas/ dpal gyi ri'i lho phyogs kyi ngos
su zhabs kyi thig le bden par gsal bar bkod nas/ utstshu sma'i
spyod pa zhes bya ba sku gcer

@014b bu sprang po'i cha byad can/ khrung ma pho ba'i tshigs ma
tsam gyi 'tsho ba la brten cing/ rig pa brtul zhugs kyi spyad pa
spyod cing gnas pa na/ kha ta bi ha ra'i rgyal po'i phran mo ka
tsa ma hAs khrung ma'i bya ba byas te/ chu pho ba'i zegs ma

'thor ba slob dpon chen po de'i zhabs la phog pa/ lcags bsregs
la bran pa ltar khol zhing 'bar ba mthong/ de'i tshe rgyal po de
la mu stegs byed kyi ston pa shang kar de wa zhes bya bas nang
pa'i paNDi ta dang rtsod cing rdzu 'phrul 'gran par

byas te/ de yang ji ltar pham pa de/ rgyal ba de'i bstan pa la
'jug cing chos dang gtsug lag khang sogs kyang bsreg par byed
pas/ khyod kyis gnang bar mdzad cing drang por bzhugs su gsol/
zhes gsol ba ltar/ rgyal pos

pho nya bkye ste dge 'dun rnams bsdus nas don de bsnyad pa na/
sus kyang khas len ma nus pas/ rgyal po de/ skyon bral andra
rnyil gyi bsti gnas su/ gnyis med gsung ba'i lugs bzang ga bur
gyi nyal 'gro'i phung po mu stegs

ha la'i phye mas rnyog par gor ma chag go snyam nas/ yid kyi
skyes bu mya ngan gyi khang bur zhugs pa ni/ lha bu lang tsho
gsar pa 'dod dgu'i 'byor bas kun dga' bskyed pa'i skyed tshal
nas/ dus kyi srin pa'i myang byed kyi lam du

'jug pa'i mtshan ma mngon du gyur pa'i dka' thub la 'gran pa
bzhin du gnas pa na/ sngar bdag nyid chen po'i rdzu 'phrul gyi
cha shas rdul phran gyi gos tsam dag pa'i mig yul du gyur pa'i
bran mo des/ zhib mor ston pa'i ngag gis

@015a @#/ /gsol nas/ de yi nus pa ma lags sam zhus pa dang/ de
lta bu'i rnal 'byor pa de gang na 'dug kyang spyan drongs shig
ces pho brang 'khor gyi mi rnams la bsgo'o/ /de ltar bsgo ba
dang/ skye bo du

ma slob dpon chen po de btsal ba'i phyir phyogs dang phyogs
mtshams rnams su song song ba las/ shing sdong po zhig gi drung
du mjal nas/ rgyu mtshan rnams zhus pas/ de lta bu kho bos nus
kyi/ khyed rang rnams chu ka

la sha gang/ me/ ka shi'i ras zung rnams sta gon gyis shig /ces
bka' stsal to/ /bka' stsal pa ltar dgos pa'i yo byad rnams ni
sbyar/ skye bo'i tshogs 'dus pa'i khrod du gdan khri tshad med par
bshams

pa'i dbus su ni rgyal po/ g.yas g.yon du ni sems dpa' chen po
dang/ mu stegs kyi ston pa rnams 'khod nas rtsod pas/ bdag nyid
chen po'i lung dang rigs pa'i mthu phul du byung bas/ phyir rgol
ba de nyid kyi spobs

pa lan brgyar phye mar brlag go /'gran 'dod rnyog pa'i chu gter
che las byung/ /'brel bral ngag gi me tog 'thor ba na/ /gang gi
lung dang rigs pa'i ba mo yis/ /reg pas sgra yi lhag ma tsam du
gyur/ /rlabs chen smon lam

rta bdun shugs kyis drangs/ /rgyal sras spyod pa lhun po'i ngos
na mdzes/ /ngo mtshar mdzad pa'i 'od zer 'bum phrag 'gyed/ /rigs
pa'i nyin byed dbang po shar ba'i tshe/ /rab rmongs rgyu skar
dbus na gsal/ /phrag dog

@015b ri dwags mtshan mas brgyan/ /lus med bdag po gser mig ldan/
/mgu ba bsgrub pa'i bran g.yog de/ /gtan tshigs ldan pa'i lam
las rnam par gol/ /gzhan la smod pa'i ngag tshig mda' rgyang
'phen/ /rang nyid 'dod pa'i

lam las lkog gyur kyang/ /gcam bu'i ngag gis spyi bo'i gtsug tu
bsten/ /shin tu dpa' ba'i rab 'bar mtshon cha la/ /nyam chung
dbyug pas 'gran pa las kyang mtshar/ /slar yang mu stegs byed de
chog ma shes par rdzu 'phrul

'gran par chas te/ bar snang la dbang phyug chen po'i dkyil
'khor bris nas shar sgo tsam zin pa na/ slob dpon chen po des
zad par rlung gi ting nge 'dzin la snyoms par zhugs par gyur to/
/mnyam par bzhag ma thag tu

'tshub ma chen po byung nas/ dkyil 'khor dang bcas pa'i mu stegs
byed dang rgyal po btsun mo dang bcas pa rnams ni 'tshub mas gos
ched du bshams pa ltar gyur cing khyer/ shing ljon pa rnams ni
phan tshun 'thab pa ltar

'khrugs/ ri bo rnams ni bser bu'i shugs ma bzod par nyal ba
bzhin du nyal bar gyur to/ /dus kyi 'thor byed drag po 'ongs pa
ltar/ /'ur 'ur 'jigs pa'i sgra chen sgrog byed cing/ /myul ba'i
lag pa g.yo ba'i gar byed

pas/ /dngos kun stong pa'i dbyings su 'dren nam snyam/ /yang na
'khor yug sa 'dzin khong seng nas/ /grangs med rdul mang dpa'
ba'i dmag tshogs ni/ /phyi rol dkyil 'khor nam mkhar gnas pa
rnams/ /

@016a @#/ /skyengs par byed la ched du byas pa bzhin/ /rdzu
'phrul mngon par 'du byed pa de ltar bstan nas/ /thugs rje chen
pos smin mtshams nas 'od zer spros te/ rgyal po btsun mo dang
bcas pa la lam

bstan nas mdun du bkug ste/ lus gos dang bral ba rdul gyis
g.yogs nas 'dug pa chus bkrus te/ ras gsar pa g.yogs/ me la
bsros nas bde bar mdzad pas/ bdag nyid chen po'i mdzad pa la yi
rangs

te utpa la'i wa ba ltar bzhin 'dzum zhing a la la zhes brjod
par byed do/ /de nas yul de dang de'i nye logs na yod pa'i mu
stegs byed kyi lha khang rnams dang/ ngan pa'i chos rnams dang/
dbang phyug chen po

la sogs pa'i gzugs brnyan lugs ma dang/ ras bris la sogs pa
rnams la 'jig dus kyi me'i bskal pa mngon sum du 'ongs ba ltar
ni byas/ de dang de'i srol 'dzin pa'i gtso bo dang/ rjes su
spyod pa'i log lta

can mang po sngar rang nyid spyod pa'i brtul zhugs dor nas/ skra
dang kha spu ring po ni bregs/ gos kha dog legs par bsgyur ba'i
ngur smrig ni bgos/ dam pa'i chos 'dul ba la rab tu byung zhing/
dul ba dang sdom pa'i dpal

la yang dag par gnas par mdzad do/ /byams dang brtse ba'i mche
sder mi bzad pas/ /sdug bsngal zla ba'i 'byung gnas gzir byed
cing/ /thabs dang shes rab 'dab ma'i shugs bskyod pas/ /rnam
grol lha yi gnas la

@016b dbang bskur ba'i/ /rgyal sras mkha' lding kun gyi dbang po
khyod/ /mthong ba lta zhog sgra yi pho nya ba/ /rna ba'i drung
du bsnyegs pa tsam zhig gis/ /chu srin rgyal mtshan gdengs ka can
gyi tshogs/ /bzod glags med pa'i mya ngan me lce

yis/ /yid kyi bud shing bsregs pas spa bkong gyur/ /de lta bas
na khyim na gnas pa ni tshul khrims kyi gnyen por gyur cing/ sdug
bsngal mang po'i 'byung khungs su gyur pa'i phyir/ bdag bde bar
'dod pa rnams kyis ni yongs

su btang ngo/ /zhes khyim gyi nyes pa stan pa la yang brjod par
bya'o/ /dgon pa zhi ba rnams su dam pa'i chos legs par bsgrub
nus kyi/ khyim na de las phyir phyogs so zhes rab tu dben pa'i
gtam bya ba la yang brjod par bya'o/ /

byang chub sems dpa'i spyod pa ni shin tu bya dka' zhing rmad du
byung ba'i phyir/ de la phyogs pa'i sems can rnams la brnyes par
mi bya'o/ /zhes byang chub sems dpa' rnams kyis yon tan bsngags
pa la yang brjod par bya'o/ /

skyes bu dam pa rnams dang phrad na ji ltar yin yang rung/ dge
bar 'gyur bas bdag nyid legs par 'dod pa rnams kyis ni skye bo
dam pa btsal bar bya'o/ /zhes skyes bu dam pa'i yon tan bsngags
pa la yang brjod par bya'o/ /snying

rje chen po dang ldan pa rnams kyis gzhan sdug bsngal gyis
gdungs ba mthong ba na/ lus srog la yang phangs pa med par bdog
pa thams cad yongs su gtong ngo zhes gtong ba la dpa' ba rnams
gzengs bstod pa dang/

@017a @#/ /snying rje chen po'i yon tan bsngags pa la yang brjod
par bya'o/ /de ltar skyes bu dam pa rnams kyis dka' ba du mas
dam pa'i chos btsal zhing yongs su bsgrubs pa'i phyir/ rim gro
bskyed de

chos nyan pa la yang brjod par bya'o/ /byang chub sems dpa' sems
dpa' chen po zhi ba'i lha'i rtogs pa brjod pa padma dkar po'i
phreng ba byin rlabs kyi dri bsung 'phro byed ces bya ba las/
rgyal po dang/ mu stegs byed

rnams btul ba'i rtogs pa brjod pa ste/ 'dab ma bzhi pa'o//
//gang zhig rgyal ba'i sras kyi mdzad pa gang/ /kun gyi ded dpon
mkhas pas bsngags pa kun/ /tshul bzhin dgongs pa ma nor

gsal ba'i tshul/ /rgyan mang sdeb legs tshig gis rnam par brgyan/
/lhag bsam rnam dag dag pa'i snyim pa chen po yis/ /mdzad pa rab
bkra bkra ba'i me tog gzhon nu ni/ /dkar ba'i padma ma lus dga'
bskyed

mgrin skyes kyi/ /srad bu'i lam du du ma'i mngon brjod ze'u
'brus phyug /chos dang mthun pa'i ro yis kun nas bltams/ /byin
rlabs dri bsung bzang po'i ngang dang ldan/ /spel legs sarga'i
'dab ma phyogs bzhir

mdzes/ /rtogs brjod padma dkar po'i phreng ba 'di/ /'gran dang
grags 'dod bser bu yis/ /rang dbang phral bas lhung ba min/ /yan
lag drug bcu'i phun tshogs kyi/ /'bras bzang bskrun phyir 'di
bsgrubs so/ /

@017b rnam thar gsar pa'i chu ris bkra ba'i sprin phreng las/
/ya mtshan bzhad pa'i sgra dbyangs rna bar 'ongs pa na/ /dang bas
mgrin bteg dbyangs can sor mos mchod pa yi/ /snyan brjid 'gran
zla ca co'i glu dbyangs 'di bsgrags so/ /

mkhas rnams zla shel yid 'ong me long ngos/ /don zab sdeb legs
tshon gyis bsgos pa yi/ /rtogs brjod rma bya'i lus kyi me tog
'di'i/ /ngo mtshar snang brnyan 'dzin par cis mi byed/ /rmongs
pa'i rab rib zug rngu las/ /ring

du gyur pa'i shes rab kyi/ /mig dang ldan pa'i gzhon nu dag /ci
dgar snyan tshig sgrog par gyis/ /tshul 'dir 'bad las byung ba'i
bsod nams gang/ /gang zhig mchog tu dkar ba zla 'dra kun/ /kun
tu bsdoms pa de

yis 'gro ba kun/ /kun mkhyen rdzogs pa'i sangs rgyas myur thob
shog /bdag kyang deng nas skye ba thams cad du/ /rin chen byang
chub sems dang mi 'bral zhing/ /rlabs chen kun tu bzang po'i
spyod pa la/ /brten nas

'gro ba 'dren pa'i dpal gyur cig /gnas skabs su yang mgon po zhi
ba'i lha'i/ /dri med rnam thar ji bzhin legs bzung nas/ /bstan
dang 'gro ba'i don mchog bsgrub pa la/ /mgon po 'jam pa'i
dbyangs dang mtshungs

par shog /ces byang chub sems dpa' sems dpa' chen po zhi ba'i
lha'i rtogs pa brjod pa padma dkar po'i phreng ba byin rlabs kyi
dri bsung 'phro byed ces bya ba 'di ni/ rje btsun dam pa de nyid
kyi rnam par thar pa mthong bas/

@018a @#/ /dang ba'i dad pa chen pos nye bar bskul te/ shAkya'i
btsun pa blo bzang chos kyi rgyal mtshan zhes bya bas/ na tshod lo
bcu drug lon pa'i tshe/ grub pa'i gnas mchog dben sa chos kyi pho
brang gi

gtsug lag khang du bdag nyid kyis sug bris su bgyis pa'o//
//'dis kyang rgyal ba'i bstan pa spyi dang/ khyad par theg pa
mchog gi bstan pa dar zhing rgyas la yun ring du gnas par gyur
cig / //