@00 @#/ /skye dgu'i bdag mo'i rtogs brjod ngo mtshar 'dab brgya
rgod pa'i padmo zhes bya ba bzhugs so/ /

@001a @##/ /na mo gu ru ratna tra yA ya/ bde gshegs kun gyis
bstod dbyangs kyi/ /rin chen mdzes pa'i me tog tshogs/ /lha lam
'gog pas mngon mchod pa/ /shAkya

seng ge la phyag 'tshal/ /grangs med bskal par legs spyad kyi/
/'bras bu dar ba'i 'o 'dzin gyi/ /mchod yon dam pas zla tshes
'dra'i/ /rgyal ba bskrun mdzad bsngags par 'os/ /

dzambu br-ik+Shas mdzes byas pa'i/ /gling gi lang tsho'i thig le
gang/ /grong khyer ser skya zhes grags pa/ /rol pa gsum gnas
skyed tshal gyi/ /spyi bor gom pa rnam 'jog pa'i/ /grags pa'i

ba dan srid rtser 'phur/ /der ni gser dngul zangs lcags kyi/
/tsa kras dbang byed rigs dag gi /kha ba'i sa 'dzin khrod gnas
pa/ /seng ge'i 'gram zhes bya ba yi/ /dpung pa gtum pos

@002a @#/ /mthar byed kyang/ /lan brgyar pham byed 'dzam gling gi
/gzhu thogs kun gyi cod pan byung/ /de yi snying mtshor rang rigs
la/ /'khor lo'i stobs kyis dbang bsgyur ba'i/ /mi

dbang 'byung bar smon pa yi/ /dbu ba dkar po kun nas 'khrigs/
/de ni zas gtsang zas dkar dang/ /bre bo zas dang bdud rtsi zas/
/gtsang dkar bre bo bdud rtsi mar/ /grags ldan 'chi med gzhon

nu'i tshogs/ /skyengs byed sras dang sras mo yis/ /mdzes pa 'dren
byed stong ldan ni/ /nye dbang tshogs kyis bskor ba bzhin/ /sngon
tshe gnyis skyes ser skya yis/ /sa le sbram gyi ka la sha /las

'ongs btung bya'i pir gyi rtses/ /ri mor bris pa'i grong khyer
gyi/ /indra nI la'i yol go ni/ /shAkya'i rigs kyi 'bras dkar
gyis/ /byur por gtams pa'i lhag 'god pa/ /lha yis bstan pa'i

grong khyer ni/ /mkhar nyal grong khyer lta na sdug /dus kyis sa
la bab 'dra yod/ /der yang shAkya'i rigs dag las/ /legs par
spyad pa rab sad pa/ /sa la gnas pa'i brgya byin byung/ /de yis

@002b bskrun pa'i dga' ba'i tshal/ /gser dngul indra nI la
dang/ /padma rA ga zla shel gyi/ /mdangs ldan me tog thod mdzes
shing/ /mrgad gsar pa'i spu long gis/ /rab mdzes g.yu yi rkang
'thung 'khrigs/ /sbrang rtsi'i 'bras

bu'i dga' ston la/ /dus rnams kun tu mgron gnyer ba'i/ /bza'
shing phreng ba tshar du dngar/ /padma utpal ku mu da/ /puNDa ri
ka'i stod g.yogs kyis/ /mdzes pa'i 'bab chu lhung lhung sgrog
/rma bya gzhon nu gar byed cing/ /ko

li mgrin pa'i dril chen 'khrol/ /mrga ta yi ne'u gsing la/ /me
tog sna tshogs gcal bkram pas/ /kun dga' bskyed pa'i lumbi'i
tshal/ /bdag pos rang gi dga' mar bstsal/ /da las de la btsun mo
ni/ /lumbi ni

zhes rab tu grags/ /ring por ma lon gzhon nu ma/ /des ni ma yi
dngos thob ste/ /'dzam gling 'dren byed dga' ston kun/ /spungs
'dra'i bu mo btsas par gyur/ /de tshe kun gyis 'di 'dra ba'i/
/mdzes sdug byed po'i sgyu ma

yis; ;mngon par sprul pa nyid yin ces/ /lha mo sgyu 'phrul zhes
bya ba/ /ming ni don dang ldan par byas/ /'di las stobs kyi
'khor lo yis/ /bsgyur ba'i mi dbang 'byung 'gyur zhes/ /gnyis
skyes brtag par mkhas pas

bstan/ /slar yang 'jig rten ma lus pa'i/ /mdzes kun gzugs can
bzhin gyur pa'i/ /dpal dang ldan pa'i yid 'ong ma/ /gnyis pa
bsod nams bzhin du byung/ /lang tsho'i padmo gsal ba 'di/ /dpe
zla spangs shing sgyu ma yis/ /

@003a @#/ /ched du lhag par sprul pa bzhin/ /de phyir sgyu ma lha
mdzes sam/ /lha mo sgyu 'phrul chen mo zhes/ /phyogs kun sgra
'dzin rgyan du byas/ /mtshan bzang sum cu rtsa gnyis kyis/ /bkra
ba'i mi mchog yum 'gyur zhes/ /

gdangs snyan rna ba'i bcud len bkye/ /dge mtshan ldan pa'i mched
gnyis po/ /phyi nang thabs la mkhas pa yis/ /rdzing gi sbrang
'dzin ltar bskyang cing/ /yab kyis gzhu brtan sras po la/ /bdag
la bud med rin po che/ /zung mchis

de las ci dgyes pa/ /gzhon nu zas gtsang dgyes pa'i slad/ /bzhes
ces bya ma rta la springs/ /de nas mi dbang seng 'gram gyis/
/gnyis ka'ang gzhon nu la 'os mod/ /dang por sgyu 'phrul chen mo
zhes/ /nu ldan yid 'ong lnga brgya yi/ /

'khor gyis bskor te bag mar blangs/ /de nas re shig shAkya'i
tshogs/ /bde bar spyod pa'i mi mthun phyogs/ /ri brag bsten pa'i
stobs rgyas pa/ /gzhom phyir mi yi bdag po mchog /seng ge'i
'gram la gsol ba'i tshe/ /

lan du mi yi dbang po des/ /kho bo'i lang tsho'i dpag bsam shing/
/rga ba'i gnam lcags kyis bcom pas/ /tshogs la 'tshe ba'i tsha
gdung dag /bcil ba'i grib bsil ci zhig smos/ /'on kyang khyed
kyis dam pa zhig /sbyin na

gzhon nu zas gtsang ma/ /dgra rnams gdul phyir mngags ces
smras/ /de tshe kun gyis rgyal po'i bka'/ /gtsug gi rin chen dag dang
'grogs/ /de nas seng ge 'gram gyi sras/ /yan lag bzhi pa'i dpung
gi tshogs/ /bsrung dang

@003b gzhom pa'i cha bkod pa/ /sbyin sras pham par byed pa yi/
/brgya byin g.yul du zhugs pa bzhin/ /dpung bcas dus mtha'i
sprin nag las/ /mda' mtshon rdo rje'i me char gyis/ /sa 'dzin
phrag gnas bskyab seng tshogs/ /sde

dang bcas pa'i brag ri bsnyil/ /de nas shAkya'i tshogs rnams
kyi/ /dam tshig gser gyi zhags pa yis/ /bcings pa grol ba'i mchog
blangs te/ /slar yang bud med brgya phrag lnga'i/ /'khor gyis
bskor ba'i sgyu 'phrul ma// /

dpal gyi 'byor pas chun mar blangs/ /nam zhig lha mo sgyu 'phrul
che/ /srid zhi kun gyi dge legs kyi/ /gser sbyangs rdul mang
brtsegs pa yi/ /mtshan dpe'i me tog rgyas pa lta'i/ /mi dbang zas
gtsang sras bskrun nas/ /gnam

bskos shel gyi them skas las/ /sum cu rtsa gsum gnas su gshegs/
/de nas btsun mo sgyu 'phrul mas/ /bltams ma thag pa'i rgyal
ba'i sras/ /don kun grub pa'i gzhon nu de/ /sna tshogs thabs kyis
bskyed pa yis/ /rgyal

ba'i yum zhes sgra snyan gyi/ /sil snyan phyogs kyi mdzes mas
dkrol/ /mtha' dag skye bo ma lus pa/ /byams pa'i nu zhos skyong
mdzad pas/ /skye dgu'i bdag mo chen mo zhes/ /gtsang ma'i gnas
kyang ca cor gyur/ /ring po ma lon

sgyu 'phrul ma/ /yid bzhin gyi ni pad mtsho las/ /rgyal sras don
kun grub pa yi/ /rjes 'gro yid 'ong ston pa'i gcung/ /dga' bo'i
puNDa ri ka 'khrungs/ /de nas byang chub sems dpa' ni/ /gzhon
nu'i zol gyis sgyu rtsal dang/ /

@004a @#/ /btsun mo'i 'khor dang nges par 'byung/ /dka' ba spyod
dang bdud dpung 'joms/ /byang chub snying por rim gshegs te/ /mi
zad mkhyen brtse'i rgyan 'dzin las/ /dam chos bdud rtsi'i char
phab ste/ /sa

gsum 'od kyis yongs bkang nas/ /slar yang ser skya'i skyed tshal
du/ /srid na dpe zla dang bral ba/ /yab sras mjal ba'i ngo mtshar
gyis/ /rnam mang gdul bya'i tshogs rnams kun/ /mtha' yas srid
mtsho che las bsgral/ /

de tshe zas gtsang btsun mo'i mchog /'dis mtshon shAkya'i ma
sring dang/ /bu mo'i tshogs rnams thams cad kyis/ /ston pa'i zhal
gyi bum bzang las/ /byung ba'i bdud rtsi ngoms par 'thungs/ /de
nas yongs bgrang 'ga'

zhig na/ /bde bar gshegs pa bcom ldan gyi/ /zhabs skyes nor bu'i
'od chags pas/ /bkra shis ri mo 'dri bzhin du/ /gdul ba'i don du
gzhan du gshegs/ /slar yang dge mtshan 'bum phrag brgya'i/ /'od
'bar ser skya'i

grong khyer gyi/ /n+ya gro d+ha yi skyed tshal gyi/ /gtsug lag
khang chen seng ge'i khrir/ /gser gyi lhun po'i spo bzhin
bzhugs/ /de'i tshe rgyal yum shAkya mo/ /lnga brgya'i 'khor dang
lhan cig tu/ /lhag par dad pa'i zla zer gyis/ /lag pad

snying gar zum byas te/ /gzhal med gtsug rgyan phang pa ru/
/zhabs stegs gser gyi khri blangs te/ /mgrin pa'i dril chung
'khrol ba'i sgras/ /ston pa la ni 'di skad gsol/ /bdag cag bud
med tshogs rnams kyis/ /mthong

@004b ba'i chos la dge sbyong gi /'bras bu gnyis zung 'thob lags
na/ /bstan la rab byung dge slong ma'i/ /dngos por spyod cing
'tsho ba'i bar/ /bcom ldan 'das kyi spyan sngar ni/ /tshangs spyod
spyad par ci gnang zhes/ /lan gsum nan tan

bcas pas gsol/ /de'i tshe rgyal ba kun mkhyen pa'i/ /zhal bzang
bandu dzi ba ka'i/ /ge sar bzhad pa'i dbus gnas pa/ /ljags yangs
bung ba'i rgyud mang sgras/ /go'u ta mi ji srid du/ /khyim nang
dkar ba'i gos gyon la/ /de tsam

'ba' zhig gis tshangs par/ /spyod cig de yis yun ring du/ /phan
bde bskyed ces 'byung ma gnang/ /de nas thub pa bcom ldan 'das/
/phun tshogs rtsibs stong gis mtshan pa'i/ /zhabs zung 'khor lo'i
'degs 'jog gis/ /

na di ka yi yul gshegs te/ /kun ci ka yi gnas bzhugs tshe/ /skye
dgu'i bdag mo 'khor bcas kyang/ /rgyal ba'i zhabs sen reg pa'i
rdul/ /mchog stsol bsam 'phel dbang gi rgyal/ /mthar gyis tshol
zhing phyi bzhin

song; ;skra bregs sbyar ma gyon byas te/ /bcom ldan de bzhin
gshegs pa la/ /bkur sti'i 'thor 'thung gis mchod nas/ /sngon ma
ji bzhin lan gsum du/ /gsol tshe thams cad gzigs pa yis/ /go'u ta
mi skra bregs

shing; ;sbyar ma gyon pa 'ba' zhig gis/ /spyod gsung rab tu
'byung ma gnang/ /de nas de dag sgo khang du/ /'dod pa'i dpag
bsam 'bras bral bas/ /yid kyi bud shing mya ngan gyis/ /sbar
ba'i me chen gzhom pa'i phyir/ /sprin dang bral

@005a @#/ /yang mig mkha' las/ /mchi ma'i char rgyun ci yang bab/
/de tshe shugs ring dud mo yi/ /lcags kyus drangs pa'i kun dga'
bos/ /dris shing ldon pa'i utpal phreng/ /spel mthar dbugs
dbyung kun

dga' bos/ /sa gsum 'gro ba'i bla ma la/ /bud med rab tu 'byung
ba dang/ /bsnyen par rdzogs phyir lan gsum gsol/ /de tshe ston pa
thams cad mkhyen/ /yid 'ong zhal gyi padmo'i ngogs/ /tshems dkar
ze'u 'bru

rgod bzhin du/ /'byung po kun la dpal ster ba'i/ /bdud rtsi
skyugs bzhin 'di skad stsal/ /dam chos snying po 'dul ba la/
/bud med rab tu 'byung ba dang/ /bsnyen par rdzogs par ma gsol
zhig /bud med rab

byung bsnyen rdzogs pa/ /rgyal ba'i nang mdzod dam pa'i chos/
/'dul ba yun ring gnas pa'i dgra /bud med mang zhing skyes pa
nyung/ /der ni chom pos 'joms sla zhing/ /'bras dkar sa lu'i
tshal bzang po/ /

ser ba'i 'khor los 'joms pa dang/ /bu ram zhing la rtswa yis
bzhin/ /bstan pa'i rtsa ba 'dul ba nyid/ /yun ring gnas pa'i
gshed nyid phyir/ /'on kyang ji srid 'tsho ba'i bar/ /dgag cing
mtshams las mi

'da' bar/ /lci ba'i chos brgyad la brten na/ /de nyid rab byung
bsnyen rdzogs ces/ /sangs rgyas bka' yi 'od dkar gyis/ /kun dga'
yid kyi ku mu da/ /rgod cing yum la rjes su bstan/ /de nas de
yis thal sbyar

@005b te; ;ji skad stsal ba'i chos brgyad po/ /yid ngag spyi bos
bsten no zhes/ /khas blangs mod la 'khor dang bcas/ /dge slong
ma yi dngos po thob/ /de dag 'khor lo rnam gnyis la/ /brtson
pa'i thabs shes

gshog pa zung/ /bgrad nas sdug bsngal rgya mtsho che'i/ /pha rol
rin chen gling du song/ /rgyal ba'i yum 'di'i bka' drin las/
/khrims ldan ngur smrig gos 'chang zhing/ /sde snod gsum gyi don
rtogs nas/ /

'chad rtsod rtsom pa'i rnga chen brdung/ /ting 'dzin bde la rtag
rol zhing/ /mngon shes rdzu 'phrul bsam mi khyab/ /srid mtsho che
las bsgral gyur pa'i/ /'phags mas rgya mtsho'i gos can gang/ /nam
zhig thub

pa'i nyi ma de/ /dus kyi nub rir gzhol ba'i tshe/ /ston pas dge
'dun mthun pa yi/ /bsngags pa brjod pa'i don dgongs nas/ /dgra
rnams bcom pa'i dge slong ma/ /lnga brgya'i tshogs dang lhan cig
tu/ /bsams

bzhin sku tshe'i 'du byed btang/ /zag med zhi ba'i dbyings su
gzims/ /skabs der ston pa sangs rgyas kyis/ /de dag phung po ma
nyams par/ /dge slong rnams la bstan mdzad nas/ /ltos shig 'di
rnams bcu phrag

gnyis/ /lhag pa'i brgya phrag lo lon kyang/ /gzhon nu ma yi lang
tshor ldan/ /zhes sogs rgyud gleng bcas pa stsal/ /bkur sti mdzad
nas gdung yang sbyangs/ /khams gsum mgon po rgyal bas kyang/
/gdung la

@006a @#/ /rim gro cher mdzad na/ /lha dang bcas pa'i 'jig rten
gyis/ /mchod par 'os pa smos ci 'tshal/ /de ltar rgyal ba'i yum
gyi mdzad pa yi/ /rtogs brjod 'dab brgya rgod pa'i dpag bsam
'di/ /dge

slong blo bzang chos kyi rgyal mtshan gyis/ /'dul lung ji bzhin
'phags pa'i dbyangs su bsdebs/ /'dis mtshon dus gsum rnam dkar
dge ba'i mthus/ /tshe rabs kun tu rje btsun rnal 'byor mas/
/dgyes

bzhin 'bral med rjes su 'dzin pa dang/ /'gro kun don du sangs
rgyas myur thob shog /ces 'phags ma skye dgu'i bdag mo go'u ta
mi'i rtogs brjod ngo mtshar 'dab brgya rgod pa'i padmo zhes pa
'di yang/ bkra

shis rtse nas chos mdzad ma blo bzang chos 'dzin gyis/ 'phags ma
'di spyir bud med mtha' dag dang sgos su rab byung ma rnams la
mchog tu bka' drin che bar 'dug pas rtogs pa brjod pa zhig dgos
ces

yang yang nan gyis bskul ba la brten nas/ shAkya'i dge slong
blo bzang chos kyi rgyal mtshan gyis bkra shis lhun po'i gzims
khang rgyal mtshan mthon po'i gzims chung bka' gdams pho brang
du sug bris

su byas pa las dge tshul blo bzang dar rgyas kyis bris pa'o// //