@00a @#/ /grub pa'i dbang phyug mid la la brten pa'i bla ma'i
rnal 'byor dang rnam thar du ma chud pa'i gsung mgur rnams
bzhugs so/ /

@001a @##/ /swa sti; 'dir rje btsun mid la la brten pa'i bla ma'i
rnal 'byor bsgom par 'dod pas/ skyabs 'gro sems bskyed sngon du
btang nas 'di ltar/ rang mdun me tog 'bras

bus mdzes pa yi/ /nags tshal phreng bas ched du brgyan pa bzhin/
/bya dang ri dwags tshogs rnams bde bar rgyu/ /'ja' tshon spungs
'dra'i yid 'ong brag ri'i rtser/ /rab mdzes khri snyan sa le'i

pags steng du/ /rtsa ba'i bla ma mchog dang dbyer med pa'i/
/dbang phyug brgyad ldan rje btsun mid la ni/ /sku mdog sngo
bsangs zhal gcig phyag gnyis pa/ /phyag g.yas sor mo snyan gyi
rtsa

bar bkod/ /g.yon pa lte 'og ting 'dzin phyag rgya can/ /dgyes
pa'i 'dzum ldan rdo rje'i glu dbyangs len/ /zla zhun 'khyil
'dra'i ras dkar na bza' gsol/ /gzi byin mdangs ldan dpa' bo

@002a @#/ /mkha' 'gro'i dbus/ /skyil krung phyed pas bzhugs pa'i
gnas gsum du/ /yig gsum gyis mtshan hUM yig 'od zer gyis/ /ye
shes pa rnams spyan drangs dbyer med bstim/ /

bslu med skyabs gsum 'dus pa'i bdag nyid gyur/ /lus dang sreg la
mi blta'i snying stobs kyis/ /brgya phrag dka' bas zung 'jug rdo
rje'i sku/ /tshe gcig nyid la bsgrub mdzad mid la rje/ /srid gsum

snyan par grags la phyag 'tshal lo/ /srid dang zhi ba'i phyi nang
gsang ba yi/ /mchod tshogs kun 'bul sdig ltung thams cad bshags/
/dge la yi rang chos 'khor bskor ba dang/ /bskal brgyar bzhugs

gsol dge tshogs byang chen bsngo/ /de nas gdung shugs drag pos
gsol ba btab/ ting nge 'dzin gyi dbang bzhi blang/ mjug tu dge
ba byang chub chen por bsngo zhing shis pas brgyan par bya'o/
zhes

pa 'di yang ri khrod 'dzin pa'i dge slong dka' bcu pa bsod nams
yar 'phel gyis yang yang bskul ba la brten nas/ dge slong blo
bzang chos kyi rgyal mtshan gyis bkra shis lhun po'i gzims khang

@002b du mgyogs par bkod pa'o// ! //na mo gu ru manydzu g+ho ShA
ya/ bka' mdo rgyud ral pa'i khur 'chang zhing/ /chos stong nyid
seng ge'i nga ro yis/ /gdon dngos 'dzin glang po'i klad 'gems
pa/ /rje ma ti

b+ha dra'i zhabs la 'dud/ /ngas sems can khams rnams gnyan du
bltas/ /gnyen de kun gnas tshul bsams pa'i tshe/ /yid dngos 'dzin
chang gis rab myos te/ /las 'bras med sbun pa 'phyar bas ngal/ /

de mthong bas sgyu ma'i 'khrul 'khor la/ /nyams mngon par dga'
zhing snying rje skyes/ /blo ngar 'dzin 'byung pos bslus pa
rnams/ /yongs bden par snang zhing der zhen yang/ /lung rigs pa
sbyangs pa'i

shes rab dang/ /don rnam dpyod mig gis bltas pa'i tshe/ /kho bdag
'dzin 'gong po'i zhen yul de/ /dbyings nam mkha'i padmo ji bzhin
mthong/ /sngon thog ma med nas snying khong du/ /nga bden bden
lta bur

tshul 'chos nas/ /gyod sna dgu 'dren pa'i phung rgan de/ /dus de
ring stong pa'i dbyings su bros/ /yul chos nyid nam mkha' yangs
pa'i glong/ /don so sor rtog pa'i shes rab kyis/ /blo ngar ldan
rig pa'i

mdung bskor byas/ /nang bdag tu 'dzin pa'i dgra bo 'di'i/
/snying dkar nag mtshams su btab cing gzer/ /de'i mthu las ji
snyed chos kun kyang/ /mi gzhan gyis sgro skur ma yin par/
/dbyings rang bzhin dge

@003a @#/ /ba'i rol par thim/ /yid khyag khyug nya mo gser mig
de/ /gting mtha' bral chos dbyings rgya mtshor zhugs/ /nyams ci
yang dga' ba'i rkyal rtsed sbyangs/ /da dngos 'dzin rba la ya mi
nga/ /

sngar 'khor ba'i 'jigs pas yid skrag nas/ /lam bzang po'i thar
pa btsal btsal kyang/ /da 'khor ba'i rang bzhin las gzhan pa'i/
/don mya ngan 'das pa cang ma mthong/ /nga skye med nam mkha'i
rnal 'byor pa/ /

las sdig pa spang du ma byung zhing/ /lam dge ba bsgrub tu ma
mchis pas/ /da 'khor 'das dbyer med ngang du nyal/ /dpal chos
dbyings kun tu bzang po der/ /las dkar nag rdul tsam ma dmigs
kyang/ /lam log

pa'i chad mthar ma lhung ba/ /'di stong nyid zab mo nges pa'i
gnad/ /rjes 'khor 'das snang ba sna tshogs pa/ /bkrag ma 'gags ci
dang ci shar yang/ /kun sgyu ma'i rol pa cher mthong bas/ /nyam
nga ba rtag pa'i g.yang

las grol/ /nga brdzun pa sgyu ma'i rnal 'byor pas/ /phar chos
rnams kun la bltas pa'i tshe/ /khong rang tshugs ma thub rang rang
gi /dngos ngo bo gnyis po gsol bar bstan/ /chos zab mo'i gnad la
som nyis kyang/ /

gzhi srid pa hrul por byed do zhes/ /gtam snyan cing zab pa'i
sgra thos pas/ /da khong nas zhe blo bde mor gnga'/ /lam rten
'byung stong pa'i rang bzhin can/ /'di thar pa'i lam gyi srog
yin zhes/ /bka' mdo rgyud

@003b rgyab rten tshad mas grub/ /da gdams chung kun ji ltar
dgyes dgyes mdzod/ /rje sangs rgyas nas bzung lam gyi mchog /'di
mngon du mdzad pa'i mkhas grub kyi/ /don brgyud ldan bla ma'i
zhabs la gtugs/ /da tshig spyi'i rgyud

'dzin kun ci bder bzhugs/ /ces pa 'di yang skye med nam mkha'i
rnal 'byor pa blo bzang chos kyi rgyal mtshan gyis bden med sprin
gyi rol pa las phyung ba'o// ! //na mo gu ru manydzu g+ho ShA
ya/ rtag chad kyi mtha' bral dbu ma'i

lam/ /sna tshogs su 'char ba rten 'brel sgo/ /zung 'jug tu mkhyen
pa'i spyan yangs po/ /dbu ma pa chen po su ma ti/ /dbyer med kyi
rje btsun dben sa pa/ /gus ldan gyi bu la brtser dgongs la/ /nga
bdag tu 'dzin pa'i dgra bo 'di/ /

rtsa ba nas thon par byin gyis rlobs/ /skra shad dang 'dres
snang kha zas kyis/ /rab rib can skran gyis nyen pa ltar/ /bdag
med la bdag tu bzung byas pas/ /thog med kyi 'khor bar sdug thag
bcad/ /las ngan gyi zhing sa gshin po la/ /

rnam shes kyi sa bon grung po btab/ /sred len gyi chu bos yang
yang brlan/ /ming gzugs kyi myu gu sna tshogs pa/ /rigs drug gi
gnas 'dir rgyun tu skyes/ /rga shi sogs ser ba drag po yi/ /sdug
bsngal gyis dal med rtag tu

mnar/ /byis pa tsho rang sdug rang gis nyo/ /lung rigs kyi lam
nas drangs pa yi/ /bden med du rtogs pa'i rnam dpyod kyis/ /chos
nyid kyi rang zhal bltas pa'i tshe/ /'khor ba dang myang 'das
'ga' med na/ /sdug bsngal gyi ming yang

@004a @#/ /ga la yod/ /bden stong gi nam mkha' yangs pa la/ /rig
shes kyi rgyal po nam 'phang spyod/ /gang shar kun chos skur
khral la la/ /rjes thob tu yul snang ci shar yang/ /gdod ma nas
dben yang der snang ba/ /

rmi lam dang chu nang zla ba'i gzugs/ /sngags rdzas kyis bslad
pa'i sgyu ma bzhin/ /rgyu 'bras kyi rten 'brel bslu med kyang/
/bden dngos kyi shes bya rdul tsam med/ /rang bzhin gyis stongs
pa'i rol pa las/ /dkar gnag gi las

'bras shin tu bkra/ /'khor 'das kyi chos rnams ma lus pa/ /ming
rkyang pa btags yod tsam zhig las/ /don gzhan du grub pa ngas ma
mthong/ /shes rab kyi ral gri rnon po yis/ /bdag 'dzin gyi rtsa
ba gcod pa las/ /nges

don gzhan bsgom rgyu mi gda' bas/ /sdug btsir gyi 'bad rtsol mi
byed par/ /gnas lugs kyi ngang du skyid nyal byed/ /sngar 'dris
kyi grogs po'i mtshang rig pas/ /tshogs drug gi yul snang gang
shar yang/ /rang mtshang

rnams rang gis bstan pas na/ /rtog btags kyi rol par lam lam
shar/ /gang shar gyi ngo bo skyong ba las/ /bden grub la 'gog
rgyu mi 'dug cing/ /bden med la bsgrub rgyu ma mchis pas/ /gtad
med kyi rnal 'byor

a re dga'/ zhes pa 'di ni dbu ma pa chen po'i rnal 'byor pa/
blo bzang chos kyi rgyal mtshan gyis smras pa'o// ! //na mo gu ru
manydzu g+ho ShA ya/ brgyad khri bzhi stong chos kyi nying khu/
/rang bzhin stong pa rten 'byung don

@004b du/ /ji bzhin gzigs pa blo bzang grags pa/ /'bral med spyi
bo'i rgyan du bzhugs shig /chos rnams rang gi ngo bos stongs
phyir/ /rten cing 'brel 'byung de'i phyir stong pa/ /snang stong
zung 'jug dbu ma'i lam 'di/ /e ma

ho bla ma'i drin las deng rnyed/ /ha ha brdzun pa'i rang mtshang
rig pas/ /bden pa gzhan nas rnyed rgyu mi 'dug /rnyed rgyu med
pa'i don 'di rnyed cing/ /mthong rgyu med pa'i ltas mo mthong
bas/ /e ma ho dga' spro'i glu 'di len no/ /

ji snyed shes bya kun la khyab pa/ /chos rnams kun gyi gdod ma'i
gnas lugs/ /spros pa'i mtshan ma kun dang bral yang/ /nam mkha'i
lam las 'ja' tshon bzhin du/ /bzang ngan spros pa sna tshogs snang
ba/ /sgyu ma'i 'phrul

'khor chen por mthong ngo/ /ha ha brdzun pa'i rang mtshang rig
pas/ /bden pa gzhan nas rnyed rgyu mi 'dug /rnyed rgyu med pa'i
don 'di rnyed cing/ /mthong rgyu med pa'i ltas mo mthong bas/
/e ma ho dga' spro'i glu 'di len no/ /

'jigs rung skye rga na 'chi la sogs/ /srid lam 'khyams pas dub
pa'i ngal gso/ /chos nyid de bzhin nyid kyi ngang du/ /rig pa'i
khye'u chung bag yangs skyong zhing/ /slar yang snang stong res
'jog med par/ /snang tsam

nyid nas stong par shes shing/ /stong tsam nyid nas snang bar
'char ba/ /rgya mtsho che dang de yi rlabs bzhin/ /gang shar chos
sku'i rgya yan shes so/ /ha ha brdzun pa'i rang mtshang rig pas/
/bden pa gzhan nas rnyed rgyu mi 'dug /rnyed

@005a @#/ /rgyu med pa'i don 'di rnyed cing/ /mthong rgyu med
pa'i ltas mo mthong bas/ /e ma ho dga' spro'i glu 'di len no/
/bden par snang zhing zhen pa'i gzung yul/ /don la rton pa'i
rigs pas dpyad pas/ /skye

med nam mkha'i padmo lta bur/ /mtshon du med pa'i don zhig rnal
'byor 'di yang/ /grub thob  brgyud pa'i rnam thar yin no/ rgod
bral bar lhug par 'jog pa'i/ /mnyam gzhag nam mkha'i rnal 'byor
'di yang/ /dus gsum

rgyal ba'i dgongs pa yin no/ /ha ha brdzun pa'i rang mtshang rig
pas/ /bden pa gzhan nas rnyed rgyu mi 'dug /rnyed rgyu med pa'i
don 'di rnyed ching/ /mthong rgyu med pa'i ltas mo mthong bas/
/e ma ho dga' spro'i glu 'di len no/ /rjes

su 'khrul snang bden par zhen pa'i/ /nyam thag ma rgan gnas tshul
mthong bas/ /snying rje'i sems dang rang bzhin med rtogs/ /thabs
shes zung du 'brel ba'i nyams len/ /rjes thob sgyu ma'i rnal
'byor 'di yang/ /grub thob

brgyud pa'i rnam thar yin no/ /ha ha brdzun pa'i rang mtshang rig
pas/ /bden pa gzhan nas rnyed rgyu mi 'dug /rnyed rgyu med pa'i
don 'di rnyed cing/ /mthong rgyu med pa'i ltas mo mthong bas/
/e ma ho dga' spro'i glu 'di len no/ /

sangs rgyas gnyis pa klu sgrub zhabs dang/ /pha rgan blo bzang
grags pa'i snyan brgyud/ /zab lam dbu ma'i nyams len 'di yang/
/dus gsum sangs rgyas sras dang bcas pa'i/ /bgrod pa gcig pa'i
lam bzang yin no/ /

@005b ha ha brdzun pa'i rang mtshang rig pas/ /bden pa gzhan nas
rnyed rgyu mi 'dug /rnyed rgyu med pa'i don 'di rnyed cing/
/mthong rgyu med pa'i ltas mo mthong bas/ /e ma ho dga' spro'i
glu 'di len no/ /de skad smra ba 'gal 'du'i phung po/ /

brdzun dang bden pa'i rnal 'byor gzhi mthun/ /ma mthong ma lus
mthong ba'i mig can/ /chos med chos kyi rgyal mtshan nyid yin/
/dge bas sgyu mas rmongs pa'i 'gro 'dis/ /'khor 'das chos kun
brdzun par rtogs te/ /rmi lam

lta bu'i sku gsum thob nas/ /brag cha lta bu'i chos ston gyur
cig /ces pa 'di nyid dbu ma chen po'i rnal 'byor pa blo bzang
chos kyi rgyal mtshan gyis sgyu ma lta bu'i zlos gar gyi rol mo
las byung ba'o// ! //na mo budd+ha dznyA na

badzra d+ha rA ya/ tshul 'chos ngur smrig gi zlum gyon legs par
'dug kyang/ /shes rgyud nyon mongs kyi tha rgod shing ltar rengs
pa'i/ /bdag dang bdag 'dra yi ma rungs 'gro ba rnams la/ /thugs
rjes 'bral med du gzigs shig

lha dang bla ma/ /mdo sngags dam chos kyis bsdus pa'i shes bya'i
gnas kun/ /rnam dpyod me long la gzugs brnyan shar ba bzhin du/
/tshig don ji bzhin 'byed pa'i blo gros kyi zla ba/ /dbyar gyi
chu mtsho ltar mdzod cig gsung gi

dbang phyug /thub dbang bstan pa la ston pa nyid dang mtshungs
pa'i/ /rje btsun bla ma 'di'i bka' drin bsams pa'i tshe na/ /bka'
bzhin bsgrub phyir du lus srog bltos med 'dor la/ /spro bar sems
so pha rgod blo bzang gi grags

@006a @#/ /pa; ;de las 'ongs pa yi zab rgyas chos tshul 'doms
mdzad/ /sangs rgyas ye shes dam chos yar zla ltar 'phel mdzad/
/dge la 'dun pa yi rgyal mtshan nam mkha'i mtshan can/ /dam chos
dpal

'byor gyi rgya mtsho'i gzi 'bar lha dbang/ /blo gros spyan stong
dang ldan pa'i bla ma mchog rnams/ /rdo rje 'dzin pa dang dbyer
med gtsug gi rgyan du/ /nor bu'i 'od chags kyi zhabs sen mdzes
par bsten no/ /'bral med thugs rje

yi spyan gyis rtag par gzigs shig /'khos med gzhan don ltar bcos
nas chos kyi rgyal mtshan/ /tshe 'di'i don gnyer la 'bad kyang
'chi ba'i tshe na/ /skad cig phan pa ru mi 'dug ci drag da ni/
/'chi grabs ran pa ru ma zad

'phyis kyang 'phyis 'dug /'jigs rung 'chi bdag gi mche ba'i
phrag na gnas shing/ /skye ba'i skyel ma 'di phyi thag shin tu
thung la/ /'chi bdag bsu ma kho mi sdod tshur tshur 'ong bas/
/dbang med skyas chen zhig 'degs dgos

myur du 'byung na/ /phan med col chung gi blo rgyas ci rang byed
pa/ /tshe 'di dgun nyi dang 'dra bar bsdad long med cing/ /dam
pa'i skyes bu rnams zhing khams dag par gshegs na/ /tshong grogs
phal mo che 'das pa'i don mthun

bzhin du/ /g.yeng med brtson 'grus cig rtsoms dang chos kyi
rgyal mtshan/ /bdag ni med pa yi sang de nges par 'byung na/
/'phral snang dga' dga' ltar ji ltar bde bar gnas rigs/ /kyi hud
mya ngam gyi thang la dgras

@006b bcom bzhin du/ /rang nyid gcig pu ru 'gro'o grabs yul gyis
dang/ /tshe 'di ri gza' gyi 'bab chu bzhin du 'gro bas/ /'jig
rten phyi ma der grogs po phal cher bsnyegs song/ /bdag kyang
myur ba ru phyi ma'i yul der 'gro

na; ;zla grogs brgyags phye rnams tshags su legs par chud dam/
/mal gyi tha ma la nyal nas tha ma'i gtam smra/ /gos kyi tha ma
zhig gyon nas tha ma'i zas za/ /'khor dang mdza' bshes la hrig
hrig mig gis blta zhing/ /nom nom

lag pa yis gos dang grogs la 'jus nas/ /ngar ngar phyi dbugs kyi
phreng ba chad la khad cing/ /'jigs 'jigs 'dra ba yi gshin rjes
zin pa'i tshe na/ /dam pa'i lha chos las gzhan gyi phan pa 'dug
gam/ /rnam shes

'khyams po de bya sgro rlung khyer bzhin du/ /bar do 'jigs rung
gi mya ngam thang la 'khyams tshe/ /chos dang chos min gyi rgyal
pham de tshe 'byed na/ /sdig spongs dge ba zhig sgrubs dang chos
kyi rgyal mtshan/ /blo gros dpag bsam

gyi ljon pa/ /mi rtag dri gzhon gyis bskul bas/ /bab col tshig
phreng gi me tog /'brel med 'di 'dra zhing mthong ngo/ /zhes
chos smra ba blo bzang chos kyi rgyal mtshan gyis smras pa'o// !
//na mo gu ra we/ dpyid dus

ldum ra ru skyes pa'i yid 'ong padmo gzhon nu/ /dbyigs legs
mdzes ldan gyi me tog ge sar ze'u 'bru rgod cing/ /'dab brgya
blta na ru mtshar ba'i sbrang rtsi'i chang gis myos pas/ /dar dir
snyan pa yi glu len bung ba'i khyu yis

@007a @#/ /bsten kyang/ /nam zla skad cig gis 'gyur ba sus kyang
khegs par mi 'dug /dus tshod nam yer gyi ba mo nyin bzhin char du
babs nas/ /dri zhim gzugs mdzes kyi me tog lang tsho rnyings pa'i
dus su/ /bung

chung 'phur lding gis rtsen yang yid rab chags par mi 'dug /'dab
stong sbrang rtsi dang bral bas lus kyi rtsal stobs nyams shing/
/shes pa chad chod du skyo zhing 'gyod pa'i dus cig 'ong na/
/pad mtsho 'bral med du bsten la sbrang

rtsi doms med du gzhibs dang stag chung gi bung ba/ /blo bzang
dge tshogs kyi 'dun sa chos kyi pho brang dam par/ /rab 'byams
sangs rgyas kyi ye shes ngur smrig zol la brten nas/ /rdzogs
pa'i sangs rgyas las dkon pa'i

mdo rgyud man ngag 'gyod pas/ /skal bzang thar 'dod kyi gdul
bya'i bsod nams dpal du gyur kyang/ /lo zla skad cig gis 'dzad
pa sus kyang bzung bar mi nus/ /nag phyogs bdud rigs kyi dpung
'di ches cher stobs dang

ldan pas/ /rje btsun gzhan snang gi sku yang 'jig tshul bstan
pa'i dus su/ /ban chung kha bshad kyis g.yengs kyang yid rab
chags par mi 'dug /bshes gnyen dmigs bu dang bral bas mya ngam
thang la 'khyams shing/ /

shes pa chad chod du skyo zhing 'gyod pa'i dus cig 'ong na/ /da
lta 'bral med du bsten la legs bshad ngoms med 'thungs dang/
/'khos med bya bral gyi btsun pa blo bzang chos kyi rgyal mtshan/
zhes rang gi yid la 'di lta

@007b bu'i don shar ba'i tshe/ yid skyo ba'i shugs kyis rigs par
smra ba blo bzang chos kyi rgyal mtshan gyis bkra shis lhun po'i
gling du sbyar ba'o// ! //na mo gu ra we/ rje sangs rgyas chos
tshogs kun gyi dngos/ /pha rdo rje 'chang

zhabs pad la 'dud/ /sngar bsags pa'i las ngan bgrang las 'das/
/de ma byang da lta srog 'gags na/ /gnas ngan song gsum du ltung
bar nges/ /da sems cig yod na bsam re ran/ /tshe ji ltar ring
yang lnga bcu'i mthar/ /lar

'jigs chen nad kyis gdungs gyur cing/ /lus longs spyod sogs la
'khren bzhin du/ /rang gcig pur pha rol 'gro ba'i tshe/ /dgra
gshin rje'i pho nya 'jigs 'jigs 'dras/ /yid mi bzad mya ngan
khang bur bcug /dus thog

ma med nas bsags pa yi/ /las ngan pa'i mun pa nag po gtibs/ /mig
hrig hrig phyogs bcur skyabs 'tshol zhing/ /ngag gdung ba'i 'o
dod brgya bos kyang/ /bdag rang gis nyes pa'i 'bras bu la/ /rje
sangs rgyas kyis kyang

ci byar yod/ /khyod 'di 'dra'i 'jigs chen mi dran par/ /tshe 'di
nang sgyu ma'i bslu brid la/ /yid chags shing zhen pas dam pa'i
chos/ /rtse gcig tu mi bsgrub glen re che/ /da phyin chad tshe
'di'i lto gos sogs/ /dpal phun

tshogs kun la phyi phyag tshol/ /bka' mdo rgyud man ngag ma lus
la/ /rang 'gyod pa med pa'i blang dor 'tshal/ /don de ltar smon
no dkon mchog gsum/ /rje khyed la ye shes sgrib med mnga'/ /mi
bdag gi bsam pa ji bzhin

@008a @#/ /gzigs/ /don de'i phyir re ba 'bras ldan mdzod/ /ces pa
'di yang shAkya'i btsun pa blo bzang chos kyi rgyal mtshan gyis
dben dgon gyi gtsug lag khang du smras pa'o// ! //na mo gu ru
manydzu g+ho ShA

ya; dpal bkra shis brtan pa'i khri steng du/ /gser zhun ma
brtsegs pa'i lhun po ltar/ /sku gzi 'od stong 'bar lham me ba/
/khams gsum gyi 'dren mchog shAkya'i gtso/ /de'i dam chos lung
rtogs padmo'i tshal/ /dgung

yar ngo'i zla ltar rgyas mdzad pa'i/ /rje rgyal ba gnyis pa nyin
mor byed/ /pha rje btsun bla ma'i zhabs bsten nas/ /bka' mdo
rgyud bstan bcos las 'ongs pa'i/ /don legs bshad rin chen phreng
mdzes pa/ /khyed skal

bzang skye bo'i mgul rgyan du/ /nga rnam dpyod lag pa'i sor mos
spel/ /zhing phyogs bcu'i sangs rgyas sras bcas kyis/ /mchog
thun mong dngos grub kun gyi gzhi/ /rje mtshan ldan bla mar gsung
lags na/ /rigs khyab

bdag rdo rje 'chang dbang dang/ /rgyud tha dad med par legs
bsgoms te/ /rang sgo gsum bya ba kun gyis kyang/ /dus rtag tu
g.yel med bsten pa dang/ /bka' tshul bzhin bsgrub pa gdams pa'i
phul/ /rten dal 'byor tshang ba'i mi

lus 'di/ /ches rnyed par dka' zhing 'jig par sla/ /dus da res
tsam zhig thob pa 'di/ /da don ldan mdzad na mi legs sam/ /nor
longs spyod sbrang ma'i sbrang rtsi dang/ /lus mi brtan g.yo ba
nam mkha'i 'ja'/ /srog ri gzar 'bab

@008b chu ltar 'gro na/ /tshe 'di la zhen pa smyon pa rang/ /dgra
'chi bdag bdud kyi khar chud pa'i/ /tshe nam mjug 'chad ka'i me
tog ltar/ /lar yud tsam zhig gis rnyings 'gyur na/ /da gtan gyi
'dun ma bsgrub re ran/ /lus

longs spyod gnyen bshes 'khor dbus nas/ /skyabs mgon med bar
do'i 'phrang ring der/ /rang gcig pur dbang med bskyas 'degs
tshe/ /chos ma gtogs phan pa cang 'dug gi /dus thog ma med nas da
lta'i bar/ /las

mi dge bsags pa'i 'bras bu yis/ /gnas ngan 'gro'i sdug bsngal
'jigs rung ba/ /da myong dgos byung na bzod lags sam/ /don de'i
phyir bslu med dkon mchog la/ /snying rus pa'i gting nas skyabs
'gro zhing/ /las

mi dge'i bya ba rgyang bsrings te/ /sgo gsum gyis phyi ma'i nor
skal bskrun/ /spyir 'khor ba'i rgya mtsho gting zab cing/ /las
nyon mongs chu srin na kras gang/ /sgos sdug bsngal gsum gyi rba
klong 'khrug /'di bsams na su zhig

yid mi skrag /lha tshangs dang dbang po la sogs pa/ /dpal 'dod
dgu'i 'byor pa mtha' yas kyang/ /slar mnar med 'bar ba'i mes
bsreg na/ /da srid pa'i bde la yid brtan gang/ /sngar thog ma
med nas lus blangs pa'i/ /sha

rus pa bsags na ri rab tsam/ /khrag chu ser rgya mtsho tsam gong
kyang/ /dus da dung 'khor ba'i gnas 'di la/ /yid mi skyo dga'
ba'i 'du shes can/ /mi bdag snying lcags kyi gar bu'am ci/ /da
sems cig yod na bsam re ran/ /nad

@009a @#/ /skye rga na 'chi'i zhags pa yis/ /ches shin tu bsdams
pa las byung ba'i/ /lar bzod dka'i sdug bsngal bzlog pa'i thabs/
/lam bslab pa gsum la brten par 'tshal/ /dpal dkar chos bung ba
'du

ba'i gnas/ /rgyud tshul khrims padmo rnam dag pa/ /sems g.yo med
ting 'dzin sbrang rtsis gang/ /chos rab tu rnam 'byed shes rab
kyis/ /yul bdag med rtogs pa'i dri bsung can/ /'dis thub bstan
dga' tshal

mdzes byas te/ /las nyon mongs 'dam gyis ma gos par/ /rje dam pa
rnams kyi rjes su slobs/ /ma 'gro drug sems can thams cad kyis/
/bdag lus sems bskyed pa'i pha ma bzhin/ /sngar yang yang drin
gyis

bskyangs gyur na/ /da yal bar 'dor ba cang phod dam/ /don de'i
phyir btang snyoms yangs pa'i mkhar/ /byams snying rje'i chu
'dzin 'bum dkrigs te/ /dpal byang chub sems gnyis char rgyun
gyis/ /lam theg chen rtsi

bcud rgyas par mdzod/ /rang gcig pur 'khor bar rgyu ba'i tshe/
/grogs sbyin pa dang mtshungs gzhan med pas/ /sems chags shing
zhen pa spangs nas kyang/ /khong rgyal sras gtong ba'i rjes su
slobs/ /rten mtho ris thar

pa kun gyi rgyu/ /rgyud tshul khrims dag par gsungs lags na/
/dran shes bzhin bag dang ldan pa yis/ /srog 'dor bar bab kyang
gtong mi 'tshal/ /da rang cag thar pa bsgrub pa la/ /dgra khong
khro dang mtshungs gzhan

@009b med pas/ /dus rtag tu bzod pa'i go bgos te/ /rgyud zhe
sdang dgra bo yul nas phyungs/ /tshe 'di phyi'i yon tan ma lus
gang/ /de brtson 'grus mchog gi rjes 'gro bas/ /yid dge la spro
ba'i mtshon rnon gyis/ /sdig le lo'i

'ching ba rtsad nas chod/ /yid rnam par g.yeng ba'i skye bo de/
/bdud nyon mongs mche ba'i phrag gnas ces/ /mgon thams cad
mkhyen pas gsungs lags pas/ /sems 'khrul med ting nge 'dzin la
sbyor/ /'dir mthong dang

ma mthong chos rnams kyi/ /gzhi rtsa ba shes rab nyid lags pas/
/de tshul bzhin bskyed pa'i thabs rnams kun/ /dus rgyun du g.yel
med bsten par 'tshal/ /don so sor rtog pa'i shes rab kyis/ /nga
la sogs 'khor 'das

chos rnams kun/ /dbyings spros bral nam mkha' lta bu'i ngang/
/don g.yel med bsgom pa e ma mtshar/ /tshul 'di bzhin legs par
nyams blangs na/ /dus 'di nas ring por mi thogs par/ /dgra sgrib
gnyis g.yul las

rgyal gyur te/ /sku gsum gyi go 'phang thob par nges/ /'di dge
slong chos kyi rgyal mtshan gyis/ /bka' mdo rgyud dam pa'i gsung
bzhin du/ /sa g.yang chags bkra shis shangs kyi mdor/ /tshig
thogs pa med par dbyangs su

bsdengs/ /'di'i dge bas mkha' mnyam 'gro ba kun/ /las mi dge'i
sdug bsngal rgyun bcad de/ /lam tshogs gnyis rgya mtsho'i mthar
son nas/ /dpal rgyal ba'i rin chen sku thob shog /ces pa
shAkya'i btsun pa blo bzang chos kyi rgyal

@010a @#/ /mtshan gyis smras pa'o// ! //na mo gu ru/ bka' mdo
rgyud tshig don ma lus pa/ /don gdams pa'i mthil du legs gzigs
nas/ /rgyud skal ldan 'gro la 'doms mdzad pa'i/ /pha blo bzang
grags pa snying nas dran/ /tshe 'di phyi'i legs tshogs kun gyi
gzhi/ /rje mtshan ldan bla mar gsungs lags na/ /khyed sgo gsum
bya ba kun gyis kyang/ /dus rtag tu 'bral med bsten na legs/
/don shin tu che zhing

rnyed dka' ba'i/ /rten dal 'byor tshang ba'i mi lus 'di/ /nga
'jig rten bya bas mi g.yeng par/ /chos tshul bzhin sgrub na don
po yin/ /glog chu bur rtsa rtse'i zil pa bzhin/ /dus skad cig
tsam gyis 'jig pa yi/ /dpe rang

gi steng du legs bzhag nas/ /blo nang du khug la long med soms/
/dus thog ma med nas bsags pa yi/ /las ngan pa'i sdig sgrib ches
lci zhing/ /lar ngan song 'jigs pa bzod dka' bas/ /skyabs bslu
med dkon

mchog rin chen sten/ /las dkar nag ngang tshul phra zhing zhib/
/tshul 'di la zhib mo'i blo gros kyis/ /lar sdig spong dge ba
bsgrub pa la/ /rang 'gyod pa med pa'i blang dor 'tshal/ /spyir
'khor ba'i rgya mtsho gting zab cing/ /sgos

las nyon rba rlabs shugs drag pas/ /gnas gang du skyes kyang dus
mtha' yi/ /me 'bar ba'i rlubs ltar gzigs par mdzod/ /khong rgyal
ba'i gsung gi gces pa'i mdzod/ /lam bslab pa rin chen rnam pa
gsum/ /lar

@010b 'bral med rgyud la bsten pa yis/ /gnas 'khor ba 'di la
phyi phyag tshol/ /ma 'gro drug sems can thams cad la/ /byams
snying rjes brgyan pa'i sems bskyed nas/ /rje rgyal ba'i sras
kyi zab pa dang/ /rgya che ba'i lam la nan tan

gces/ /lar mi srun yid kyi glang chen 'di/ /rje gcig tu dmigs pa
brtan po la/ /dran shes bzhin thag pa dam po yis/ /dus yang yang
chings la zhi gnas sgrubs/ /chos thams cad brten nas btags pa
las/ /rang ngo bos

grub pa med pa'i tshul/ /don ji bzhin rtogs pa'i rnal 'byor gyis/
/kho bdag tu 'dzin pa'i rtsa ba phyungs/ /slar 'khor 'das snang
ba gang shar yang/ /dbyings rang bzhin dag pa'i stong pa nyid/
/mdangs cir yang 'char ba'i

mig 'phrul du/ /dus rgyun du gzigs pa'i nyams len 'tshal/ /'di
chos med chos kyi rgyal mtshan gyis/ /chos tshul bzhin bsgrub pa'i
bskul ma ru/ /brag rgya bo rdo rje'i pho brang du/ /tshig thogs
pa med par dbyangs su

bsgrags/ /ces kyang btsun pa blo bzang chos kyi rgyal mtshan gyis
smras pa'o// ! //na mo gu ru manydzu g+ho ShA ya/ rje sku ba
zhi'i bdag nyid rdo rje 'dzin/ /pha rje btsun bla ma'i zhabs
btud nas/ /khyod mos gus can gyi

slob ma la/ /dge bskul gyi snying gtam 'di skad smra/ /rten dal
'byor tshang ba'i mi lus 'di/ /lar rnyed par dka' zhing 'jig par
sla/ /dus da res lan cig thob pa 'dir/ /don chen gyi snying po
len kyang 'tshal/ /snyigs

@011a @#/ /dus kyi tshe la long med pas/ /phyi bshol gyi le lo ma
mdzad par/ /mthar thug gi bde ba bsgrub pa'i phyir/ /sgo gsum
gyis dge la 'bad par mdzod/ /spyir 'khor ba 'dir bde ba'i skabs
med

cing; ;sgos ngan 'gro'i sdug bsngal bzod dka' bas/ /dkar nag gi
las 'bras blang dor la/ /nyin mtshan du brtson pa sten par mdzod/
/khams gsum gyi sems can ma lus pa/ /drin can gyi pha ma nyid
yin pas/ /

byams pa dang snying rjes kun bslangs pa'i/ /byang chub kyi
mchog tu sems bskyed la/ /zab rgyas kyi rgyal sras spyod pa
sten/ /tshe gcig gis sangs rgyas bsgrub pa'i thabs/ /lam bzang po
rim gnyis rnal 'byor te/ /

don de phyir g.yel med nyams len gyis/ /sku gsum gyi go 'phang
thob par mdzod/ ces kyang btsun pa blo bzang chos kyi rgyal
mtshan gyis/ slob ma dad pa can rnams la dge bskul snying gtam du
smras pa'o// ! //

na mo gu ru/ rje lam sna 'dren pa'i bla ma dang/ /skyabs bslu
med dkon mchog gsum po la/ /rkang rus pa'i khong nas skyabs 'gro
zhing/ /yid gdung shugs drag pos gsol 'debs 'tshal/ /lam gong
ma'i

rtogs pa skye ba la/ /gegs sdig sgrib yin pas sbyang ba'i thabs/
/'dun rnam dag yan lag bdun pa yis/ /dus rgyun du tshogs gsog
sgrib sbyong gces/ /lus tha mal zhen spangs lhar bsgoms nas/
/ngag

@011b grag stong gzungs sngags zab mo bzla/ /don de las gzhan du
mi g.yeng bar/ /yid rtse gcig 'jog pa bsgom pa'i gnad/ /sems mi
rtog ting 'dzin bsgrub pa la/ /gra bying rgod gnyis su che ba
yin/ /rten dmigs pa mi

gsal mi 'phro na/ /gegs bying rmugs 'byung nyen che bas sgrims/
/sems gsal rig tsam du 'dzin pa'am/ /lus lha skur bsgom pa gang
mdzad kyang/ /cher mi gnas 'phro ba'i gegs byung na/ /dgra 'dod
chags zhe sdang

gti mug gsum/ /de gang gi yul la 'phro ba yi/ /don thugs la
dgongs nas gnyen po bsten/ /yang dug gsum mngon gyur gang
rung
las/ /phyogs gzhan pa'i yul la 'phro gyur na/ /yul gang dang
gang la 'phro ba de/ /thugs ma

yengs legs par rig par mdzod/ /sems lha la dmigs pa mi bde na/
/dug gsum gyi rnam rtog yongs dor la/ /thugs gsal zhing rig pa'i
ngo bo de/ /dus rgyun du brjed med dran par mdzod/ ces pa btsun
pa blo bzang

chos kyi rgyal mtshan gyis/ rab 'byams smra ba'i dge slong ri
khrod pa dge 'dun rgyal mtshan la gdams pa'o// ! //na mo gu ru/
bslu med bla ma la btud nas/ /lho phyogs dben pa yi nags na/
/mang thos

yon tan gyis phyug pa'i/ /drang srong rgan po de'i gsung nas/
/bskyas chen pha rol du 'degs dus/ /dgos pa'i zab bsdus kyi
gdams pa/ /gser gyi yang zhun 'dra sbrings ces/ /'phrin yig dri
bzhon gyis bskyod pas/ /rnam

@012a @#/ /dpyod tsandan gyi nags las/ /zab don mA la ya'i dri
bzang/ /sdug bsngal tsha gdung gi bsil byed/ /zla zer spu long
ltar spro'o/ /rgyal bas 'chi dus kyi nyams len/ /ji snyed gsungs
pa yi don rnams

rang rang mos ngo na zab pas/ /de dang de dag gi don dgongs/
/khyad par rang lus dang gnyen 'khor/ /gang la'ang chags zhen
kun dor la/ /zab don bsre 'pho yi man ngag /zhal 'dris gang che
dang mtshams sbyor/ /sgrib

med ye shes kyi spyan ldan/ /bslu med dkon mchog ni gsum la/
/gnad gcod bar do yi 'jigs las/ /skyob phyir snying khong nas
skyabs chol/ /sdig ltung phyir bcos kyis bsal te/ /gong ma'i
sdom pa gnyis

sor chud/ /gsag sbyang gsol 'debs la 'bad cing/ /rnam dag smon
lam gyis kha sgyur/ /'di ltar skye 'chi yi sdug bsngal/ /me 'obs
bzod dka' 'dras mnar ba'i/ /khams gsum 'khor ba yi gnas la/ /

zhe log yang yang rang sgoms shig /rang nyams sdug bsngal la
dpags te/ /mar gyur nyam thag gi 'gro la/ /snying rje bcos min
du bskyed la/ /gtong len spel ma ru skyongs shig /ma dag skye
'chi yi 'phrul 'khor/ /

rtog pas btags tsam las gzhan pa'i/ /grub rgyu rdul tsam yang
med pas/ /ma 'jigs chos nyid ngang skyur zhog /tha mal skye shi
dang bar do/ /bla ma'i man ngag dang ldan la/ /rgyal ba'i sku
gsum du yod pas/ /nyams

@012b dga'i rol pa der skyur zhig /ces pa 'di chos rje rab
'byams pa don grub 'od zer gyis 'chi ga'i gdams pa zab la 'dus
pa zhig dgos ces bskul ba'i ngor/ (dge slong blo bzang chos kyi
rgyal mtshan gyis smras pa'o//) ! //

na mo mahA mu drA ya/ pha bka' drin mnyam med bla ma rje/ /mi
bdag snying padmo'i ze'u 'brur bzhugs/ /rten dal 'byor mi lus
rnyed dka' zhing/ /yun mi ring myur du 'jig pas na/ /rgyud ngang
ring snyoms las khyad bsad

nas/ /da g.yel med bsgrub la brtson par mdzod/ /skyabs bslu med
bla ma dkon mchog la/ /snying rus pa'i gting nas skyabs 'gro
zhing/ /ma khams gsum 'khor ba'i sems can la/ /byams snying rje
byang chub sems

mchog skyed/ /yid gdung sems ldan pa'i mos gus kyis/ /lam zab mo
bla ma'i rnal 'byor sgoms/ /sngon thog ma med nas da lta'i bar/
/sems 'khrul ba'i dbang gis 'khor bar 'khyams/ /da 'khrul pa'i
rang mtshang

rig pa na/ /sems stong nyid rang zhal rjen par mthong/ /chos kun
gyi rang bzhin gdod ma'i gshis/ /don dbyer med sems kyi rdo rje
de/ /blos ma bcos lhug par 'jog pa 'di/ /lam phyag rgya chen
po'i nyams len yin/ /

da bzang ngan snang ba ci shar yang/ /rang sems kyis btags pa'i
ri mo las/ /don logs su grub pa cang med pas/ /dbyings brjod
bral chos dbyings ngang du skyur/ /lus snang stong dbyer med lha
yi sku/ /ngag grag stong rdo

@013a @#/ /rje'i bzlas pa dang/ /sems bde stong phyag rgya chen
po'i ngang/ /dus rtag tu ma yengs mnyam par zhog /rjes mtshan
'dzin dug dang ma 'dres par/ /dpal dge tshogs byang chub chen por
bsngos/ /ces pa 'di ni bya btang

ri khrod 'dzin pa phyag rgya chen po'i rnal 'byor pa dpal 'byor
phun tshogs kyis bskul ba la brten nas mdo rgyud man ngag 'dzin
pa'i spong ba pa blo bzang chos kyi rgyal mtshan gyis sbyar ba
dge legs 'phel// ! //na mo gu ru ratna tra yA ya/

thub dbang rdo rje 'chang dang/ /dbyer med drin can bla ma/
/'bral med spyi bor bzhugs la/ /byin rlabs dngos grub stsol zhig
/yid bzhin nor bu lta bu'i/ /rnyed dka'i dal 'byor rten la/
/gtan gyi 'dun ma bsgrub phyir/ /dben pa'i ri khrod 'grims

shig /snyigs dus skye bo'i tshe 'di/ /rtswa rtse'i zil pa bzhin
du/ /nam 'jig nges pa med pas/ /dben pa'i/ /gnyen bshes grogs
dang dgra bo/ /bar ma'i sems can mang po/ /glo bur 'chi ba soms
la/ /dben pa'i/ /shi nas gar skye nges

med/ /ngan song gsum gyi sdug bsngal/ /bzod pa'i go skabs med
pas/ /dben pa'i/ /las dang nyon mongs dbang gis/ /khams gsum
gang du skyes kyang/ /bde ba'i go skabs med pas/ /dben pa'i/
/'dod yon sgyu ma'i bslu brid/ /don

med bya bas g.yeng zhing/ /phyi mar ngan 'gror 'dren pas/ /dben
pa'i/ /bde 'dod sdug bsngal 'dren byed/ /bdag 'dzin 'ching ba'i
lcags sgrog /gnyen grogs tshong dus 'gron 'dra/ /dben pa'i/ /srid
pa'i phun tshogs mtha' dag /kim

@013b pa'i 'bras dang ral gri'i/ /sor chags sbrang rtsi 'dra
bas/ /dben pa'i/ /dal 'byor dge ba'i bshes gnyen/ /sangs rgyas
bstan dang mjal ba/ /don dang ldan par bya phyir/ /dben pa'i/
/'chi bdag kha nang chud pa'i/ /snyigs dus tshe thung 'di

la/ /gtan gyi bde ba bsgrub phyir/ /dben pa'i/ /las nyon rba
klong 'khrug cing/ /sdug bsngal na kras gang ba'i/ /'khor ba'i
rgya mtsho sgrol phyir/ /dben pa'i/ /thog med dus nas yang yang/
/drin gyis bskyangs pa'i ma rnams/ /thar pa'i bde la

'god phyir/ /dben pa'i/ /skye rga na 'chi med pa'i/ /mthar thug
gtan gyi bde ba/ /sku gsum go 'phang bsgrub phyir/ /dben pa'i/
/dben pa'i ri khrod 'grim zhing/ /'di nang rnam g.yeng spangs
nas/ /sgo gsum dge la sbyar na/ /skyid pa'i nyi ma 'char ro/ /

zhes pa 'di yang rab 'byams smra ba'i ston sgom bstan pa dar
rgyas kyis/ 'di lta bu zhig dgos ces bskul ba la brten nas/
shAkya'i dge slong spong ba pa blo bzang chos kyi rgyal mtshan
gyis bkra shis lhun por smras pa'o// ! //na mo gu ru

mnydzu g+ho ShA ya/ sku dran pas srid zhi'i gdung ba sel/ /mtshan
thos pas ngan 'gro'i 'jigs pa skyob/ /pha rje btsun blo bzang
grags pa'i dpal/ /mi kho bo'i spyi gtsug rgyan du bzhugs/ /rten
dal brgyad 'byor bcu tshang ba'i lus/ /'di phyis nas

rnyed dka' 'jig par sla/ /deng lan cig tsam zhig thob pa 'di/
/da don med ma byed snying po longs/ /tshe 'di nyid ji ltar byas
kyang phyid/ /phyis byang chub dam pa rnyed dka' bas/ /da dgun
nyi tsam gyi tshe mjug 'dir/ /dus gtan gyi 'dun ma sgrub re

@014a @#/ /ran/ /lus longs spyod gnyen dang mdza' bshes sogs/
/dpal phun tshogs 'khor gyis bskor gyur kyang/ /rang gcig pur pha
rol 'gro ba'i tshe/ /su gang gis phan pa cang 'dug gam/ /yar mtho
ris

lha mi'i sar 'gro 'am/ /mar ngan song gsum du gtan 'khyams byed/
/dus da lta rang dbang rang la yod/ /dbang yod dus 'dam ga ma
log dgos/ /nor zas gos sbrang ma'i sbrang rtsi bzhin/ /rang ser
snas bsags kyang

gzhan gyis spyod/ /da gsog na 'phags pa'i nor bdun gsogs/ /dus
rtag tu 'du 'bral med pas bzang/ /tshe 'di phyi'i legs tshogs kun
gyi gzhir/ /rje mtshan ldan bla ma legs bsngags shing/ /mthar
byang chub

bar gyi grogs yin pas/ /sems yengs med bsten pa gdams pa'i phul/
/gnas 'jigs rung 'khor ba'i rgya mtsho 'dir/ /rang gcig pur grogs
med 'khyams pa'i tshe/ /skyabs bslu med dam pa dkon mchog

la/ /snying rus pa'i gting nas skyabs 'gro 'tshal/ /spyir 'khor
ba'i phun tshogs mtha' ngan zhing/ /sgos ngan song sdug bsngal
bzod dka' bas/ /rgyud tshul khrims ting 'dzin gyis sbyangs te/
/dbyings yin lugs

rtogs pa'i rnal 'byor dgos/ /khong nyan rang 'phags pa'i tshogs
rnams kyang/ /thabs rgya chen spyod la rgyab phyogs pas/ /don
mthar thug 'bras bu mngon ma gyur/ /lar de'i phyir byang chub
sems mchog dang/ /des zin

@014b pa'i rgyal sras spyod pa 'tshal/ /'di blo bzang chos kyi
rgyal mtshan la/ /bu mos gus can gyi slob ma yis/ /dus yang nas
yang du bskul ba'i tshe/ /gnas rgyal mtshan mthon po'i rtse mor
bsdebs/ /'dis rtag 'dzin can gyi

skye bo kun/ /chos zab mo'i lam du 'khrul gyur cig /(ces kyang
btsun pa blo bzang chos kyi rgyal mtshan gyis smras pa'o//) !
//na mo gu ru de ba DA ki nI/ /dgung bai DUr+ya ltar dwangs
pa'i dbyings/ /dpal khri gdugs gsal

ba'i nyi ma des/ /yul gling bzhi'i mun pa kun sel yang/ /lar
skyo ba med pa e ma mtshar/ /rje rgyal ba'i thugs rje'i sprin
phung las/ /chos brgyad khri bzhi stong char phab ste/ /yongs
phan bde'i lo 'dab rgyas mdzad kyang/ /

lar rtog pa med pa e ma mtshar/ /ston rtsi tog rgyas pa'i ri
bo'i rtser/ /dbyibs mdangs legs spang rgyan sngon chung des/
/khong tshogs ldan skye bo'i yid 'phrog kyang/ /dus yud tsam zhig
gis mog por 'gyur/ /rten dal

'byor tshang ba'i lus thob nas/ /dpal 'byor pa'i phun tshogs mtha'
yas pas/ /mi tha mal kun gyi yid 'phrog kyang/ /dus ring por mi
thogs 'jig pa'i chos/ /don de'i phyir 'di nang bya ba kun/ /don
snying po med par legs

dgongs nas/ /chos tshul bzhin nyams su blangs gyur na/ /dgra 'chi
bdag sde las rgyal bar 'gyur/ zhes pa 'di dad pa dang gtong ba
sogs kyi yon tan dang ldan pa'i dbon sa rje btsun sangs rgyas
tshe brtan gyis bskul ba la brten nas shangs

@015a @#/ /mdo rgod tshang gi ri khrod dang 'dab chags pa'i ri
bo'i rtse mor/ dbyar gyi lang tsho mngon par rgyas pa'i dga' ston
la spyod pa'i tshe/ blo bzang chos kyi rgyal mtshan gyis smras
pa'o// ! //swa sti/ rten dal

'byor mi lus rin po che/ /'di rnyed par dka' zhing 'jig par sla/
/dus da res tsam zhig thob pa 'di/ /da don ldan mdzad na mi legs
sam/ /spyir 'dus byas kyi chos kyis mi bslu med/ /sgos snyigs
dus kyi tshe la long med

pas/ /'phral don med kyi g.yeng ba rgyang bsrings nas/ /dus
gtan gyi 'dun ma bsgrubs na legs/ /yul tshong 'dus dbus kyi 'gron
khang bzhin/ /lar 'dus pa'i tha ma 'bral ba dang/ /srog ri gzar
'bab chu ltar 'gro bas/ /

tshe phyi ma'i don du dge la 'bungs/ /gnyen longs spyod 'khor
g.yog kun 'dzom yang/ /rang gcig pur pha rol 'gro ba'i tshe/
/las dge sdig gnyis po ma gtogs pa/ /su gang yang phyi bzhin
'brang ba med/ /don de phyir tshe

'dir mi g.yeng bar/ /sgo gsum gyis dge ba'i las bsgrubs na/
/dus gtan gyi 'dun ma'i sna zin pas/ /'di nam yang bsnyel ba med
par mdzod/ ces pa 'di btsun pa blo bzang chos kyi rgyal mtshan
gyis/ thon nas dbon

sa yum kun 'dzin rgyal mo la gdams pa'o// ! //na mo gu ru
manydzu g+ho ShA ya/ sku yid 'phrog mtshan dpe'i dpal 'bar zhing/
/gsung thos pas mi ngoms tshangs pa'i dbyangs/ /thugs zab dang
rgya che che mkhyen brtse'i

@015b gter/ /pha rje btsun bla ma'i zhabs la 'dud/ /rten dal
'byor mi lus rin chen 'di/ /ches rnyed par dka' zhing 'jig sla
bas/ /dus da res lan cig thob pa 'di/ /da don med byed pa smyon
pa yin/ /spyir 'khor ba'i gnas

na bde ba med/ /sgos ngan song sdug bsngal shugs re drag /da
myong na bzod pa'i skabs med pas/ /deng mi skye'i thabs la 'bad
rtsol 'tshal/ /sngar 'dod yon ro la ji tsam spyad/ /de bsams na
snying po ci 'dra 'dug /da rang

gis rang nyid ma bslu bar/ /dus gtan gyi 'dun ma bsgrub re ran/
/lar sdig pa chung ngu byas pas kyang/ /rgyun ring por brnag
dka' sdug bsngal 'byung/ /don de'i phyir srog la bab na yang/
/las sdig pa spong na mkhas pa yin/ /

dus da lta tsher ma'i reg pa yang/ /dbang byung dus bzod par mi
nus na/ /lus gshag gtub btso bsreg la sogs pa/ /da myong dgos
byung na ci 'dra mchi/ /gnyen nye du 'khor g.yog la sogs pa/
/dgra 'chi bdag bdud po'i dbang

du song/ /mi kun la yong ba'i 'jigs chen de/ /da rang la'ang
'ong bas bag zon 'tshal/ /tshe mi rtag g.yo ba bar snang glog
/glog da lta byung ba da lta 'jig /gzugs mdzes kyang nam mkha'i
'ja' tshon bzhin/ /'ja' kha dog legs

kyang myur du 'jig /nor longs spyod sbrang ma'i sbrang rtsi
'dra/ /rang ser snas bsags kyang shul du lus/ /gnyen 'khor
g.yog tshong dus 'gron po bzhin/ /'gron snga dro tshogs kyang
phyi dro 'gyes/ /lus longs spyod phun tshogs

@016a @#/ /thams cad la/ /yid 'khren bzhin grogs med pha rol tu/
/rang gcig pur dbang med 'gro ba'i tshe/ /chos ma gtogs sus kyang
phan pa med/ /lha tshangs dang dbang po la sogs pa/ /slar mnar
med 'bar

ba'i mes bsreg na/ /dpal srid pa'i phun tshogs 'byor rgud la/
/gdeng cung zad tsam yang yod pa min/ /da 'jig rten phyi mar
dgongs lags na/ /rgyud chags sdang dbang du ma song bar/ /yar
bla ma dkon mchog zhabs tog

dang; ;'bangs mgon med rnams la byams brtse dang/ /mar ngan
slong sbyin pas dbugs 'byin zhing/ /rang lus ngag yid kyi dge ba
la/ /dus rgyun du brtson par mdzad lags na/ /de grung po yin no
thugs la zhog /rang

mgon med 'khor bar 'khyam pa'i tshe/ /grogs bslu med lha dang bla
ma dang/ /nor mi bslu sbyin dang tshul khrims te/ /des gang du
phyin kyang bde ba ster/ /tshes brgyad dang bco lnga gnam gang
la/ /khrims yan lag brgyad

pa'i gso sbyong 'tshal/ /'dis bde 'gro lha mi'i rten brgyud nas/
/mthar byang chub chen po'i go 'phang 'thob/ ces pa 'di yang lha
gcig bsod nams dbyangs can dbang mos bskul ba la brten nas/
shAkya'i dge slong blo

bzang chos kyi rgyal mtshan gyis thon dga' ldan rdzong du smras
pa'o// ! //na mo gu ru/ sku mtshan dpe'i gzi brjid dpal 'bar
zhing/ /gsung 'gag med chos kyi sgra dbyangs sgrog /thugs mkhyen
dang brtse ba'i me tog

@016b bkra; ;pha rje btsun bla ma'i zhabs la 'dud/ /dgung mthon
po'i bya rgyal rgod po de/ /gnas 'dir sdod kyi nges pa ma mchis
kyang/ /rang yid dang mthun pa'i sa 'dzin rtser/ /yid bag phebs
rgyu ba rten 'brel gshis/ /mi bdag cag

rgyal khams myul ba la/ /yul 'dir sdod kyi nges pa ma mchis
kyang/ /las smon lam gyis 'brel pas dad ldan sar/ /yid dga' bder
gnas pa rgyu 'bras gshis/ /don de'i phyir rgyal ba sras bcas
kyis/ /mi bdag la legs

par skyabs bcas shing/ /lar mthong thos dran pa'i skye bo 'di'i/
/dus rtag tu mgon dang skyabs mdzod cig /da 'di nas tshe rabs
thams cad du/ /las smon lam bzang pos mtshams sbyar nas/ /khong
bde 'gro lha mi'i rten brgyud

de; ;dpal bla med byang chub thob par shog /ces pa mkhan rin po
che nor bzang rgya mtshos nan gyis bskul ba ltar/ btsun pa blo
bzang chos kyi rgyal mtshan gyis mgyogs par bris pa'o// ! //na mo
gu ru manydzu g+ho ShA ya/

dpal mchog gsum ngo bo bla ma la/ /lus ngag yid dang bas phyag
bgyis te/ /lam thar pa 'dod pa'i skye bo la/ /snying brtse ba'i
sems kyis 'di ltar gdams/ /rten dal 'byor tshang ba'i mi lus 'di/
/phyis rnyed par dka' zhing

'jig sla bas/ /lar gtan gyi 'dun ma bsgrub pa'i phyir/ /dus
rgyun du brtson pa bsten pa'i rigs/ /thabs nges 'byung byang
sems lta ba dang/ /lam rim gnyis zung 'brel rnal 'byor gyis/
/tshe gcig gis byang chub bsgrub

@017a @#/ /pa dang/ /don de ltar bsgrub pa'i dge 'dun sogs/
/zhing gang ma'i bsnyen bkur rang 'dod kyi/ /dug ma 'dres sgo
gsum bran bkol ba/ /tshogs gsog cing sgrib sbyong mchog yin pas/
/g.yel med du

brtson pa brten par 'tshal/ zhes btsun pa blo bzang chos kyi
rgyal mtshan gyis smras pa'o// ! //na mo gu ru/ rje bla ma sangs
rgyas chos tshogs la/ /snying rus pa'i khong nas skyabs 'gro
zhing/ /tshe yud tsam dal 'byor

rnyed dka' bas/ /dus rtag tu sgo gsum dge la 'bungs/ /bka' sde
snod sbyangs pa'i don po mchog /lam bslab gsum rin chen 'bral
med bsten/ /dus rgyun du bya ba ci byed kyang/ /sems bzang pos
byang chub lam du

sgyur; ;chos rten 'byung stong pa'i mtshon rnon gyis/ /dgra bdag
'dzin snying la yang yang snun/ /don snying po gsum gyi gnad
bsdus pa'i/ /lam zab mo skyed rdzogs dbyings su rol/ /des mtshon
pa'i dus gsum dge ba'i

tshogs/ /ma 'gro kun phan bde'i rgyu ru bsngo/ zhes pa 'di yang
yongs su rdzogs pa'i bstan pa'i mnga' bdag chos kyi rje rgyal ba
rin chen pa'i bka' bzhin du de nyid kyi thugs dam bskul mar
btsun pa blo bzang chos kyi

rgyal mtshan gyis sbyar ba'o//  //rje bla ma rnams kyi zhabs la
'dud/ /yang gson dang chos kyi rgya mtsho ba/ /sngar phan chad
ngan 'gror gtan yul byas/ /dus da res dal 'byor rten thob cing/
/rje sangs rgyas

@017b bstan pa'i sgo ru zhugs/ /chos zab mo theg pa'i yang rtse
thob/ /tshe gcig la sangs rgyas bsgrub dus 'dir/ /snying rus pa'i
khong du lcag chug la/ /tshe 'di phyi'i bde la ma zhen par/ /yid
nges 'byung byang sems yang dag lta/ /

lam rim pa gnyis la brtson pa bsten/ /lar rang don 'khri ba ma
zhugs par/ /yul mtha' 'khob mun pa'i smag rum der/ /mgon sangs
rgyas bstan pa'i sgron bzung nas/ /'phral g.yengs kyang dal
thob don po mchog /'dir

khyod la mang du smos ci 'tshal/ /sgo gsum gyi bya ba ci byed
kyang/ /dran shes bzhin bag yod bzang po yis/ /'dor len la
brtson pa bsten kyang 'tshal/ /don de las gzhan pa'i kha chems
dang/ /ngos mjal kyang lab rgyu gzhan

med pas/ /mi kho bos ji skad gdams pa'ang/ /khyed thugs kyi
dkyil du 'jog par mdzod/ /dus 'di nas byang chub snying po'i
bar/ /lar skye 'chi'i 'phreng ring ci brgyud kyang/ /chos dge
ba'i smon lam spyod pa kun/ /lhan cig

tu bsgrubs te 'grogs par smon/ /'di yang rje nyid kyi gsung las
byung ba'o// ! //mgur/ lha dkon mchog gsum gyi ngo bo nyid/ /dus
snyigs ma'i 'gro ba yongs kyi mgon/ /pha rje btsun bla ma'i
zhabs btud

nas; ;yum kun 'dzin rgyal mor 'di skad lo/ /thugs rnam dpyod
yangs pa'i rgya mtsho de/ /mchog thun mong dngos grub kun gyi
gzhi/ /lar dad pa'i bser bus bskyod pa las/ /tshig sdeb legs yi
ge'i sgra dbyangs can/ /pha

@018a @#/ /thams cad mkhyen pa'i zhal gyi sgor/ /ros zag med bde
ba bskyed pa'i snod/ /bcud bzang pos gang dang bdud rtsi'i thum/
/zung rgya ldan phebs pas bdag yid tshims/ /gangs stod kyi seng
ge dkar mo de/ /

ri skyes kyi nor bu bskyang ba'i phyir/ /gangs dkar gyi ri bo
gzhan myul yang/ /rje grub thob gong mas byin brlabs pa'i/
/gangs dkar gyi ti se ga la 'dor/ /dgung khri gdugs gsal ba'i
nyi ma des/ /nub byang shar gyi gling gi

mun bsal phyir/ /rta bdun ldan 'gros kyis mi dal yang/ /mgon
sangs rgyas bstan pa bzhugs pa'i gnas/ /sgos dzambu'i gling 'di
ga la 'dor/ /mi chos med kyi bya bral rgyal khams pa/ /yul
gtsang phyogs bstan

'gro'i don gyi phyir/ /phyogs kun tu dal med myul lags kyang/
/pha blo bzang bstan pa dar ba'i yul/ /sgos thon gyi phyogs de
ga la 'dor/ /don de'i phyir 'khor bcas sku snyoms shing/ /bdag
ban chung 'chi bas ma zin

par; ;chos dal 'byor rgyas pa'i dga' ston la/ /slar myur ba nyid
du spyod par smon/ /yang dus dang gnas skabs thams cad du/
/skyabs bslu med dkon mchog gsum po la/ /snying rus pa'i khong
nas skyabs

'gro zhing/ /las sdig spong dge ba bsgrub pa gces/ /sngar thog
ma med pa'i 'khor ba nas/ /bdag drin gyis bskyangs pa'i ma rgan
rnams/ /da yal bar 'dor ba mi phod pas/ /byams snying rjes
drangs pa'i sems

@018b bskyed 'tshal/ /rten yun ring 'tsho phyir skor ba dang/
/'phral rnam dkar mdzad pa'ang spel bar zhu/ /'dir bsrung ba'i
'khor lo'ang g.yo med bgyid/ /rten sngags mdud bcas te phul ba
dge /zhes pa thon nas yum kun 'dzin

rgyal mo la gdams pa'o// ! //mgur/ spyir 'dus byas rang bzhin
bslu ba'i chos/ /sgos srid pa'i phun tshogs sgyu ma'i gar/ /de'i
nang nas snyigs dus skye 'gro'i tshe/ /rtag mi thub rtswa rtse'i
zil pa bzhin/ /yar thar

pa dam pa ma thob na/ /gnas khams gsum 'khor ba gang song yang/
/skyes phyin chad 'chi bar nges pa 'di/ /mi kun la 'ong ba'i
chos nyid lags/ /khong rdo rje'i sku brnyes rgyal ba yang/ /sku
mi rtag 'jig pa'i tshul ston na/ /dus

snyigs ma'i tshe thung yud tsam 'di/ /sus bzung bar mi nus nam
mkha'i glog /rje kun mkhyen thub pa'i gsung rab las/ /nor bsags
pa'i tha ma mdzad pa dang/ /gnyen 'dus pa'i tha ma 'bral ba
dang/ /mi skyes pa'i tha ma 'chi

bar gsungs/ /don de'i phyir 'chos pa'i thabs med cing/ /yongs
kun la 'bab pa'i gnas gshis la/ /yid mi bde byas kyang phan pa
med/ /da pha rol gshegs la rjes dgongs na/ /skyabs dkon mchog
gsum la thugs

gtod la/ /ma 'gro ba kun gyi don gyi phyir/ /las nag po'i sdig
dang ma 'dres par/ /lam dge ba'i las la brtson par mdzod/ /ces
pa bkra shis rtse nas sku mdun nam mkha' brtan pa la gdams
pa'o// //