@#/ /rje btsun bla ma'i rnal 'byor dang/ nang gi khong skran 'don pa'i skyug sman zhes bya ba bzhugs so// // @001a @##/ /na mo gu ru manydzu g+ho ShA ya/ 'dir skal ldan gyi skyes bu rje btsun bla ma'i rnal 'byor la brten nas mchog thun mong gi dngos grub sgrub par 'dod pas/ skyabs 'gro sems bskyed tshad med bzhi bsgom pa sngon du btang ste/ don dran bzhin pa'i ngang nas 'di ltar brjod par bya'o/ /mdun gyi nam mkhar 'od 'bar nor bu'i khri/ /sna tshogs pad nyi zla ba'i dkyil 'khor steng/ /dus gsum rgyal ba'i yab gcig 'jam pa'i dbyangs/ /ngur smrig tshul bzung rgyal ba tsong kha pa/ /sku mdog dkar gsal mdzes pa'i 'dzum zhal ldan/ /chos 'chad phyag gnyis mtshan pa'i ud pal steng/ /shes rab ral gri sher phyin glegs bam bsnams/ /gser mdog paN zhu gsol zhing gur kum gyi/ /mdangs ldan chos gos @002a @#/ /gsum gyis mngon par klub/ /mtshan dpe'i dpal 'bar gzi brjid phung po'i sku/ /rab mdzes 'ja' tshon sna lnga'i gur khyim dbus/ /skyabs gsum ma lus 'dus pa'i bdag nyid can/ /skyil krung tshul gyis bzhugs pa'i gnas gsum du/ /rdo rje gsum mtshan hUM yig 'od zer gyis/ /ma lus dkon mchog gsum gyis yongs bskor ba'i/ /dus gsum sangs rgyas blo bzang grags pa'i dpal/ /spyan drangs bsod nams zhing gi dam par bzhugs/ /dpal ldan rigs brgya'i gtsug rgyan rdo rje 'chang/ /skal bzang zhing gi 'dren pa shAkya'i tog / snyigs dus rgyal ba'i dbang po tsong kha pa/ /dbyer med bla ma mchog la gus phyag 'tshal/ /srid zhi phyi nang gsang ba'i mchod pa'i sprin/ /dngos bshams yid sprul nam mkha' gang ba dang; ;bdag lus longs spyod dus gsum dge tshogs bcas/ /thugs rje che ldan tshogs rnams mnyes phyir 'bul/ /nyon mongs dbang gis sgo gsum sdig pa'i las/ /bgyis dang bgyid brtsal yi @002b rang ci mchis pa/ /gnong zhing 'gyod pas rje btsun bla ma'i drung/ /bshags shing slan chad mi bgyid yang dag sdom/ /rang gzhan rnam dkar phung po ji snyed dang/ /khyad par chos kyi rgyal po tsong kha pa'i/ /sku gsung thugs dang yon tan 'phrin las kyi/ /skyon bral mdzad pa kun la rjes yi rang// /bdag sogs 'gro kun ma rig gnyid slong zhing/ /yang dag lam bzang kun nas gsal mdzad pa/ /sna tshogs gdul bya'i bsam pa ji bzhin du/ /zab rgyas chos kyi 'khor lo skor du gsol/ /mtha' dag phan bde'i pad tshal bzhad pa'i gnyen/ /mgon po khyod dang khyod kyi lugs bzang gi /nyon mo'i dbang phyug 'gro ba'i mun sel du/ /grangs med bskal pa'i bar du bzhugs su gsol/ /'dis mtshon dge bas tshe rabs kun tu bdag /rje btsun bla mas 'bral med rjes bzung ste/ /lung rtogs yon tan rgya mtsho'i mthar phyin nas/ /bla med byang chub dam pa'i rgyu ru bsngo/ / de nas dmigs brtse ma brgya stong sogs dmigs pa dang bcas pa'i sgo nas brjod/ /dus gsum bde gshegs kun gyi ngo bo nyid/ /brgyad khri bzhi stong chos phung 'byung ba'i gnas/ /rab 'byams 'phags tshogs yongs kyi 'dren pa mchog /gsol ba 'debs so rje btsun blo bzang grags/ /mtshan tsam thos pas bar chad kun sel zhing/ /dran pa yis kyang ngan 'gro'i 'jigs las skyob/ /tshul bzhin bsten na dngos grub mchog @003a @#/ /stsol ba'i/ /rje btsun bla ma'i zhabs la gsol ba 'debs/ /rab 'byams rgyal ba kun gyi rdo rje gsum/ /yon tan 'phrin las thams cad gcig bsdus nas/ /ngur smrig 'dzin pa'i gar gyis rnam rol ba/ /rje btsun bla ma'i zhabs la gsol ba 'debs/ /'jam mgon bla ma'i thugs rje'i 'od stong gis/ /bdag blo'i padmo'i ge sar rgyas mdzad de/ /rgya che gsal zhing myur dang zab pa yi/ /shes rab sbrang rtsi'i dga' ston rgyas par mdzod/ / mdo rgyud bstan bcos kun gyi tshig don rnams/ /gzhan dring mi 'jog legs par 'byed pa dang/ /thos bsam sgom dang 'chad rtsod rtsom gsum gyi/ /phun sum tshogs pa'i shes rab bdag la stsol/ /deng nas rang gzhan grub mtha'i pha rol son/ /ji snyed rig pa'i gnas rnams kun la mkhas/ /sgrib gnyis mun stug ma lus 'joms byed pa'i/ /kun mkhyen ye shes snang ba stsal du gsol/ /khyad par 'di snang 'gags tshe dga' ldan du/ /skyes nas mi pham 'jam dpal snying po yi/ /gsung gi bdud rtsi 'bral med longs spyad de/ /rgyal sras spyod pa rgya mtsho mthar phyin shog /ces 'jug pa bde ba'i phyir rje btsun bla ma'i sgrub thabs tshigs bcad du bsgrigs pa 'di yang don gnyer can 'ga' zhig gis bskul ba'i ngor/ skyes tsam nyid nas rje btsun bla ma la mi phyed pa'i dad pa dang ldan pa'i btsun pa blo bzang chos kyi rgyal mtshan gyis/ chos grwa chen po dpal ldan 'bras spungs kyi gzims khang dga' ldan pho brang @003b du sbyar ba'o// ! //na mo gu ru manydzu g+ho ShA ya/ 'jig rten dbang phyug bshes gnyen tshul bzung nas/ /gangs ri'i khrod 'dir bstan pa rgyas mdzad pa/ /bka' drin mnyam med rje btsun thams cad mkhyen/ /'gro ba'i mgon po bla ma'i zhabs la 'dud/ /rjes 'jug dad po rnams la thugs rjes gzigs/ /blo kha chos la phyogs par byin gyis rlobs/ /sngon chad byas pa'i rang gi spyod tshul la/ /mdzub mo nang du bkug nas bsams pa'i tshe/ /seng lpags gyon pa'i wa skyes ji bzhin du/ /chos par brdzus nas chos min byas pas 'gyod/ /chos pa'i gzugs brnyan bdag la thugs rjes gzigs/ /phyin chad chos bzhin sgrub par byin gyis rlobs/ /mkhas grub du ma'i zhabs la gtugs lags kyang/ /sangs rgyas dngos kyi 'du shes ma skyes pas/ /gser dngul khrod du slog hrul drud pa bzhin/ /yon tan bor nas skyon 'dogs byas pas 'gyod/ /skal chad log lta mkhan la thugs rjes gzigs/ /dad gus rtsol med skye bar byin gyis rlobs/ /dal brgyad 'byor bcu'i rten bzang thob lags kyang/ /rnyed dka' don che snying nas ma dran pas/ /rin chen gling nas med zad slar log bzhin/ /don med ngang la mi tshe zad pas 'gyod/ /dal 'byor stong log mkhan la thugs rjes gzigs/ /tshe lhag don ldan byed par byin gyis rlobs/ /skyes mtha' 'chi bar gsungs pa go lags kyang/ /nam 'chi cha med snying nas ma dran pas/ /rang dbang thob pa'i gdengs shig yod pa bzhin/ / @004a @#/ /rnam g.yeng gnyid kyis nyin mtshan 'das pas 'gyed/ /rtag 'dzin phyi bshol mkhan la thugs rjes gzigs/ /long med brtson 'grus rtsom par byin gyis rlobs/ /las 'bras rnam dbye cung zad shes lags kyang/ /yid ches dad pa gting nas ma skyes pas/ /mig can g.yang la mchong ba ji bzhin du/ /shes bzhin las 'bras khyad du bsad pas 'gyod/ /ngo tsha khrel med bdag la thugs rjes gzigs/ /sdig spong dge ba sgrub par byin gyis rlobs/ (/skyes bu chung ngu'i skabs te dang po'o/) /thog med dus nas srid pa'i 'dam du bying/ /las nyon sdug bsngal du mas mnar lags kyang/ /mi gtsang khrod la dga' ba'i sbrang bu bzhin/ /da dung snying nas thar 'dod med pas 'gyod/ /'khor bar gtan 'khyams bdag la thugs rjes gzigs/ /thar pa'i lam sna zin par byin gyis rlobs/ /skra bregs gos bsgyur rab byung byas lags kyang/ /'khor 'das skyon yon snying nas ma bsams pas/ /ser gos gyon pa'i zhing pa ji bzhin du/ /da dung khyim pa'i sems ma spangs pas 'gyod/ /rab byung gzugs brnyan bdag la thugs rjes gzigs/ /nges 'byung rnam dag skye bar byin gyis rlobs/ /mkhan slob spyan sngar bslab sdom blangs lags kyang/ /dran dang shes bzhin bag yod ma bsten pas/ /lcags kyu med pa'i glang chen smyon pa bzhin/ /nyes ltung du ma'i 'dam du bying bas 'gyod/ /btsun pa'i gzugs brnyan bdag la @004b thugs rjes gzigs/ /nyon mongs gnyen po dran par byin gyis rlobs/ /bka' dang bstan bcos man ngag nyan lags kyang/ /don go sems kyi thog tu ma khel bas/ /ri mor bris pa'i chos nyan ji bzhin du/ /sems la yar skyed cung zad med pas 'gyod/ /nyams len 'dres khyer bdag la thugs rjes gzigs/ /gang shes rgyud la sbyor bar byin gyis rlobs/ /gzhan gyi mig sngar phyi tshul bcos lags kyang/ /nang gi g.yo sgyu khram sogs ma spangs pas/ /chu skyar byi la'i spyod pa ji bzhin du/ /zog gis rang gzhan gnyis ka bslus pas 'gyod/ /phyi tshul tshul 'chos mkhan la thugs rjes gzigs/ /nang gi khong skran thon par byin gyis rlobs/ /phyir bcos dag la 'bad lo byas lags kyang/ /'gyod cing sdom sems snying nas ma skyes pas/ /nyi mas gdungs pa'i glang chen 'khrus bzhin du/ /nyes ltung du mas yang yang gos pas 'gyod/ /ngan 'gro'i rgyu sog bdag la thugs rjes gzigs/ /stobs bzhi'i bshags pa byed par byin gyis rlobs/ (skyes bu 'bring gi skabs te gnyis pa'o/) /theg chen chos sgor zhugs lo byas lags kyang/ /'gro drug pha mar snying nas ma dran pas/ /rang don 'ba' zhig sgrub pa'i nyan rang bzhin/ /drin can ma rnams yal bar dor bas 'gyod/ /byang sems gzugs brnyan bdag la thugs rjes gzigs/ /bdag pas gzhan gces 'byongs par byin gyis rlobs/ /zab don lta khrid bsgom lo byas lags kyang/ /dngos 'dzin 'khrul pa'i bag chags tshan ches bas/ / @005a @#/ /mtsho 'khyags thog tu chu rgyun bkram pa bzhin/ /bdag tu 'dzin pa sbram por lus pas 'gyod/ /lta ba kha bshad mkhan la thugs rjes gzigs/ /bdag med gnas lugs rtogs par byin gyis rlobs/ (skyes bu chen po'i skabs te gsum pa'o//) gsang sngags chos sgor zhugs lo byas lags kyang/ /dam tshig srog dang bsdos te ma bsrungs pas/ /'gram rtse zad pa'i khang rul ji bzhin du/ /dngos grub kun gyi sgrub gzhi stor bas 'gyod/ / dmyal ba'i bud shing bdag la thugs rjes gzigs/ /dam tshig tshul bzhin srung bar byin gyis rlobs/ /bskyed rdzogs zab mo sgom lo byas lags kyang/ /mnyam gzhag sems la brtan pa ma thob pas/ /smra mkhan ne tso'i 'don pa ji bzhin du/ /dge sbyor phal cher sgra spyir song bas 'gyod/ /sngags pa'i gzugs brnyan bdag la thugs rjes gzigs/ /nyams len gnad la mkhas par byin gyis rlobs// (gsang sngags la 'jug pa'i skabs te bzhi pa'o;;) gzhan la zab chos 'chad lo byas lags kyang/ /rang gi rgyud la nyams myong ma mchis pas/ /glu mkhan bro pa'i chos bshad ji bzhin du/ /gzhan la phan thogs cung zad med pas 'gyod/ /dred bo chos rgyus mkhan la thugs rjes gzigs/ /thog mar rang rgyud 'dul bar byin gyis rlobs/ /gzhan gyi yar 'dren byed lo byas lags kyang/ /rang gi sems la rang dbang ma thob pas/ /long bas long ba 'khrid pa ji bzhin du/ /rang gzhan gnyis ka phung la @005b gtad pas 'gyod/ /'khos med bzang brdzu mkhan la thugs rjes gzigs/ /bslu med lam sna zin par byin gyis rlobs/ /gzhan phan 'gro don gyi skabs te lnga pa'o/ /chos sgor zhugs nas yun ring lon lags kyang/ /tshe 'di'i khong skran nang nas ma thon pas/ /mar gyi kogs dang chu rdo ji bzhin du/ /da dung rang rgyud rjen par lus pas 'gyod/ /sems dang chos ma 'dres la thugs rjes gzigs/ /tshe 'di blo yis thongs par byin gyis rlobs/ /shin tu 'ju dka'i dad zas gshin zas sogs/ /gdengs med bzhin du 'dzem med spyad lags kyang/ /'jal rgyu med pa'i dbul po'i bu lon bzhin/ /lan chags bu lon khur gyis non pas 'gyod/ /dkor gyi phung po bdag la thugs rjes gzigs/ /dkor sbyongs tshul bzhin byed par byin gyis rlobs/ /mtho mnyam dman pa'i grogs dang 'grogs lags kyang/ /dag pa'i snang ba skad cig ma 'byongs pas/ /phan tshun g.yul du zhugs pa'i dgra bo bzhin/ /phrag dog 'gran sems nga rgyal byas pas 'gyod/ / rgyud ngan rengs pa bdag la thugs rjes gzigs/ /kun la dag snang 'byongs par byin gyis rlobs/ /las ngan dbang gis snyigs ma'i dur 'dir skyes/ /kun dang bstun na dam pa'i chos dang 'gal/ /chos dang bstun na skye bo kun dang 'gal/ / ji ltar byas kyang khon du gyur pas 'gyod/ /'di phyi gnyis med bdag la thugs rjes gzigs/ /ci byas chos su 'gro bar byin gyis rlobs/ /sngon chad bsags pa sdig pa'i las las med/ /phyi ma'i 'gro sa ngan song kho nar nges/ /de phyir @006a @#/ /kha tsam tshig tsam ma yin pa'i/ /snying khong rus pa'i gting nas gnong zhing 'gyod/ /tha chad snying re rje la thugs rjes gzigs/ /ngan 'gro'i skye sgo khegs par byin gyis rlobs/ /snang tshul 'di 'dra gzhan la'ang yod srid na/ /don snying nang nas rul bar the tshom med/ /'chi khar mi 'gyod tsam re ma byung na/ /rang gis rang nyid bslus par gdon mi za/ /bdag dang bdag 'dra'i 'gro la thugs rjes gzigs/ /rang gzhan smin cing grol bar byin gyis rlobs/ /sngon chad snying du gces par bzung ba rnams/ /sbun par song ba da gzod cung zad shes/ /da ni tshe 'di'i mdun ma rlung la bskur/ /nyin mtshan dal med chos la 'bad par smon/ /thugs rjes gzigs shing bla ma yi dam lha/ /gsol btab don rnams 'grub par byin gyis rlobs/ /slar yang skyon gyi khong nad lhag ma rnams phyir phyung nas/ (/gnyen po'i lus zungs gso ba'i skabs te drug pa'o//) zhes bla ma yi dam la gsol ba 'debs pa'i rab tu byed pa/ nang gi khong skran 'don pa'i skyug sman zhes bya ba 'di ni/ btsun pa blo bzang chos kyi rgyal mtshan gyis/ chos grwa chen po lhun grub bde chen gyi gzims chung 'og min chos kyi pho brang du sbyar ba'o// //mangga laM//