! //na mo gu ru manydzu g+ho ShA ya/ 'dir 'chi
dus su nges par dgos pa/ dpa' bo g.yul du 'jug pa'i go cha'i
grabs byed pa lta bu 'pho ba bsdus pa nyams su len tshul ni/
skyabs 'gro sems bskyed sngon

du btang/ bde ba can nas rtsa ba'i bla ma dang/ /dbyer med 'od
dpag med mgon spyan drangs te/ /bdag gi spyi bor dgyes bzhin
bzhugs par gyur/ /rang lus dbus kyi drang por rtsa dbu ma/ /mda'
smyug tsam zhig mar sna lte 'og

nas/ /yar sna tshangs bug thal gyis zug par bsam/ /snying dbus
rang sems thig le rgya sran tsam/ /dkar 'tsher 'phur zhing 'phar
la khad pa bsgo ma/ /tshe 'di'i gnyen 'khor gnas lus longs spyod
sogs/ /gang la'ang

chags shing zhen pa rab spangs nas/ /spyi bo'i bla ma skyabs
gsum kun 'dus la/ /gus pas skyabs 'gro gsol 'debs yang yang bya/
/bslu med dkon mchog gsum gyi ngo bo nyid/ /ngan song 'jigs las
sgrol ba'i dpa' bo ste/

dag pa'i zhing du 'khrid pa'i ded dpon mchog /mgon po 'od dpag
med la gsol ba 'debs/ /gnad gcod gshin rje'i 'jigs las skyab tu
gsol/ /'jigs rung bar do'i 'phrang las sgral du gsol/ /bzod dka'
ngan

@018a @#/ /'gro'i g.yangs las drang du gsol/ /zhing mchog bde ba
can der 'khrid du gsol/ /re sa gzhan na med do thugs rjes
drongs/ /de ltar gdung shugs drag pos gsol btab pas/ /mgon po'i

thugs ka nas 'ongs 'od zer gyi/ /lcags kyus rang sems thig ler
gsal la btab/ /'og rlung drag tu 'then pa'i gzhu mo la/ /hi ka
gi mda' sbyar bla ma'i thugs kar 'phangs/ /da lta sbyong dus
rnam shes tshangs bug

las/ /mi 'don slar yang snying kha'i dbus su 'jog /rgyal ba'i
dkyil 'khor bzang zhing dga' ba der/ zhes sogs smon lam dag pas
mtshams sbyor bya/ /tshul 'di sdig can btsan thabs 'tshang rgya'i
thabs/ /ma

sgoms 'tshang rgya 'pho ba'i man ngag ces/ /bla med rgyud sde'i
snying po bsdus pa yin/ ces pa 'di yang 'gro ba mang po la phan
pa'i phyir/ btsun pa blo bzang chos kyi rgyal mtshan gyis smras
pa'o// ! //na mo gu ru/

bka' drin mnyam med rtsa ba'i bla ma/ /'bral med snying kha'i
padmor bzhugs shig /rang sems la sogs 'khor 'das chos rnams/
/bden pa'i dngos por rdul tsam med par/ /rtag dang chad pa
spangs pa'i dbyings de/ /

ji bzhin rtogs pa lta ba'i rgyal po/ /rtogs don spros bral zab
mo'i dbyings de/ /bying rgod skyon rnams legs par bsal te/ /dran
dang shes bzhin ganggA'i rgyun bzhin/ /skyong bar byed pa sgom
pa'i rgyal po/ /rjes thob

@018b mnyam gzhag rtsi yis zin pa'i/ /sgyu ma lta bu'i rnal
'byor ngang nas/ /sgo gsum sdig bral dge ba'i lam du/ /ci dgar
'jug pa spyod pa'i rgyal po/ /'di lta'i lta sgom spyod pa'i tshul
'di/ /sgyu mas rmongs pa'i 'gro rnams

kun gyis/ /ji bzhin rtogs par gyur na dga' ba/ /rtogs par gyur
nas grol na skyid pa/ ces pa'ang smras so// ! //na mo gu ru
padma sidd+ha ye/ rang gang mos kyi rtsa ba'i bla ma dang/ dus
gsum mkhyen pa padma

'byung gnas dbyer med du byas nas bla ma'i rnal 'byor bsgom tshul
'khyer bde bar brjod pa ni 'di ltar/ mdun gyi nam mkhar seng
khri pad zla'i steng/ /blo bzang rdo rje 'chang dang dbyer med
pa'i/ /rtsa ba'i bla ma rig 'dzin padma 'byung/ /rnam

dag dge slong rdo rje 'dzin pa'i tshul/ /zhal gcig phyag gnyis
dgyes pa'i 'dzum dang ldan/ /phyag g.yas thugs kar rdo rje
g.yon pa yis/ /mnyam gzhag steng na bdud rtsi'i thod pa dang/
/kha TwAM ga yis mtshan khung mdzes par

brgyan/ /chos gos gsum ldan paN zhu dmar po gsol/ /res 'ga' za
'og ber gyis lhab lhub g.yo/ /mtshan dpe'i rgyan ldan gzi byin
'od stong 'bar/ /grangs med dpa' bo mkha' 'gro'i 'khor dbus su/
/mi phyed

rdo rje'i skyil krung gis bzhugs pa'i/ /gnas gsum yi ge gsum
mtshan hUM 'od kyis/ /padma 'od dang bde ba can sogs nas/ /grub
dbang padma 'byung gnas rtsa brgyud kyi/ /bla ma yi dam mkha'
'gro'i tshogs dang bcas/ /spyan

@019a @#/ /drangs dam tshig pa dang dbyer med gyur/ ces dam tshig
pa dang ye shes pa dbyer med du byas/ skyabs gnas kun 'dus pa'i
bdag nyid du bsams la bsag sbyang gi gnad bsdus pa yan lag bdun

pa 'bul ba ni/ dus gsum sangs rgyas kun gyi thugs rje ni/
/snyigs dus 'gro ba ma lus 'dren pa'i phyir/ /padma las 'khrungs
rnam dag rdo rje 'dzin/ /bslu med skyabs kyi dam par gus phyag
'tshal/ /dngos bshams

yid sprul phyi nang gsang ba yi/ /mchod tshogs kun 'bul sdig
ltung ma lus bshags/ /dge la yi rang chos 'khor bskor phyir du/
/bskal brgyar bzhugs gsol 'dis mtshon dge ba'i tshogs/ /ma gyur
mkha'

mnyam 'gro rnams bsgral phyir du/ /thams cad gzigs pa'i go
'phang thob phyir bsngo/ /zhes yan lag bdun pa phul nas slar
yang/ sangs rgyas chos dang dge 'dun kun gyi gtso/ /grub pa'i
dbang phyug padma 'byung

gnas dang/ /dbyer med drin can rtsa ba'i bla ma la/ /snying nas
gsol ba 'debs so byin gyis rlobs/ /'dzam gling mkhas dang grub
pa kun gyi rgyan/ /mthu stobs dbang phyug snang srid zil gyis
gnon/ /gangs ri'i

khrod 'dir bstan pa'i sgron me spar/ /uryan rin po che la gsol
ba 'debs/ /bde gshegs snang mtha' yas kyi thugs rje las/
/sind+hur rgya mtshor pad sdong las 'khrungs shing/ skal ldan
yongs 'dren srin po'i

@019b kha gnon mdzad/ /uryan rin po che la gsol ba 'debs/ /de
ltar gsol ba btab pa'i bla ma yi/ /sku las 'od zer dkar dmar
mthing kha gsum/ /rim dang cig car byung nas rang nyid kyi/ /sgo
gsum rim dang lhan cig

thims pa las/ /sgrib bzhi dag cing dbang dang sku bzhi thob/
/slar yang sku las gnyis pa zhig byon nas/ /dgyes shing rang la
thim pas bdag nyid kyang/ /padma 'byung gnas sku ru gyur par
bsam/ /de nas rang gi snying

khar sngags phreng bkod pa la 'od zer spro ba dang bsdu ba'i
dmigs pa ma yengs par byas te/ oM AH hUM/ badzra gu ru padma
sidd+hi hUM/ zhes pa ci mang bzla/ mjug tu dge ba 'di yis myur
du bdag /dpal ldan bla ma 'grub

gyur nas/ ces sogs dge ba bsngo zhing smon lam dang bkra shis
kyis brgyan par bya'o/ /smras pa/ blun pos gang ba'i bod yul min
gling 'dir/ /thugs rje'i 'od zer stong gis gsal mdzad pa/ /grub
pa'i dbang

phyug padma 'byung gnas dang/ /rang nyid mos pas bla ma dbyer
med du/ /rtse gcig gsol ba 'debs pa'i nyams len gyi/ /me tog
phreng mdzes mngon par spel ba 'di/ /dge slong blo bzang chos
kyi rgyal mtshan gyi/ /rnam

dpyod sor mo'i rtse yis legs par bskrun/ /'dis mtshon dge ba kun
da ltar/ /dkar ba gang zhig bsags pa des/ /bde ba can gyi zhing
mchog tu/ /'gro kun bde blag 'jug gyur cig /ces pa 'di yang dad
ldan

@020a @#/ /sde pa 'dzun pa lhun grub rgyal pos/ snga mo nas nan
cher gsol ba btab pa la brten nas/ chos smra ba blo bzang chos
kyi rgyal mtshan gyis chos grwa chen po bkra shis lhun po'i gtsug
lag khang du smras

pa'o//