! //na
mo gu ru manydzu g+ho ShA ya/ 'dir skal ldan gyi skyes bu rje
btsun bla ma'i rnal 'byor la brten

nas mchog dang thun mong gi dngos grub bsgrub par 'dod pas/
skyabs 'gro sems bskyed tshad med bzhi bsgom pa sngon du btang
ste/ don dran bzhin pa'i sgo nas 'di ltar brjod par bya'o/ /mdun
gyi nam mkhar 'od

@023b 'bar nor bu'i khri/ /sna tshogs padma nyi zla'i dkyil 'khor
steng/ /dus gsum rgyal ba'i yab gcig 'jam pa'i dbyangs/ /ngur
smrig tshul bzung rgyal ba tsong kha pa/ /sku mdog dkar dmar
mdzes pa'i 'dzum zhal ldan/ /chos 'chad

phyag gnyis mtshan pa'i utpal steng/ /shes rab ral gri sher
phyin glegs bam bsnams/ /gser mdog paN zhu gsol zhing gur kum
gyi/ /mdangs ldan chos gos gsum gyis mngon par klubs/ /mtshan
dpe'i dpal 'bar

gzi brjid phung po'i sku/ /rab mdzes 'ja' tshon sna lnga'i gur
khyim dbus/ /skyabs gsum ma lus 'dus pa'i bdag nyid can/ /skyil
krung tshul gyis bzhugs pa'i gnas gsum du/ /rdo rje gsum mtshan
hUM yig 'od zer

gyis; ;ma lus dkon mchog gsum gyis yongs bskor ba'i/ /dus gsum
sangs rgyas blo bzang grags pa'i dpal/ /spyan drangs bsod nams
zhing gi dam par bzhugs/ /dpal ldan rigs brgya'i gtsug na rdo
rje 'chang/ /

bskal bzang zhing gi 'dren pa shAkya'i tog /snyigs dus rgyal
ba'i dbang po tsong kha pa/ /dbyer med bla ma mchog la gus phyag
'tshal/ /srid zhi'i phyi nang gsang ba'i mchod pa'i sprin/ /dngos
bshams yid sprul nam mkha'

gang ba dang/ /bdag lus longs spyod dus gsum dge tshogs bcas/
/thugs rje che ldan tshogs rnams mnyes phyir 'bul/ /nyon mongs
dbang gis sgo gsum sdig pa'i las/ /bgyis dang bgyid stsal yi
rang ci mchis

@024a @#/ /pa; ;gnong zhing 'gyod pas rje btsun bla ma'i drung/
/bshags shing slan chad mi bgyid yang dag sdom/ /rang gzhan
rnam dkar phung po ji snyed dang/ /khyad par chos kyi rgyal po tsong
kha pa'i/ /sku gsung

thugs dang yon tan 'phrin las kyi/ /skyon bral mdzad pa kun la
rjes yi rang/ /bdag sogs 'gro kun ma rig gnyid slong zhing/
/yang dag lam bzang kun nas gsal mdzad pa/ /sna tshogs gdul bya'i
bsams pa ji

bzhin du/ /zab rgyas chos kyi 'khor lo bskor du gsol/ /mtha' dag
phan bde'i pad tshal bzhad pa'i gnyen/ /mgon po khyod dang khyod
kyi lugs bzang gi /nyin mo'i dbang phyug 'gro ba'i mun sel du/
/grangs med bskal

pa'i bar du bzhugs su gsol/ /'dis mtshon dge bas skye ba kun tu
bdag /rje btsun bla mas 'bral med rjes bzung ste/ /lung rtogs
yon tan rgya mtsho'i mthar phyin nas/ /bla med byang chub dam
pa'i rgyu ru bsngo/ /de nas dmigs

brtse ma brgya rtsa sogs dmigs pa dang bcas pa'i sgo nas brjod/
dus gsum bde gshegs kun gyi ngo bo nyid/ /brgyad khri bzhi stong
chos phung 'byung ba'i gnas/ /rab 'byams 'phags tshogs yongs kyi
'dren pa mchog /

rje btsun bla ma'i zhabs la gsol ba 'debs/ /mtshan tsam thos pas
bar chad kun sel zhing/ /dran pa yis kyang ngan 'gro'i 'jigs las
skyob/ /tshul bzhin bsten na dngos grub mchog stsol ba/ /rje
btsun bla ma'i

@024b zhabs la gsol ba 'debs/ /rab 'byams rgyal ba kun gyi rdo
rje gsum/ /yon tan 'phrin las thams cad gcig bsdus nas/ /ngur
smrig 'dzin pa'i gar gyis rnam rol ba/ /rje btsun bla ma'i zhabs
la gsol

ba 'debs/ /'jam mgon bla ma'i thugs rje'i 'od stong gis/ /bdag
blo'i padmo'i ge sar rgyas mdzad de/ /rgya che gsal zhing myur
dang zab pa yi/ /shes rab sbrang rtsi'i dga' ston rgyas par
mdzod/ /mdo rgyud bstan bcos

kun gyi tshig don rnams/ /gzhan dring mi 'jog legs par 'byed pa
dang/ /thos bsam sgom dang 'chad rtsod rtsom gsum gyi/ /phun sum
tshogs pa'i shes rab bdag la stsol/ /deng nas rang gzhan grub
mtha'i pha rol son/ /ji

snyed rig pa'i gnas rnams kun la mkhas/ /sgrib gnyis mun stug ma
lus 'joms byed pa'i/ /kun mkhyen ye shes snang ba stsal du gsol/
/khyad par 'di snang 'gags tshe dga' ldan du/ /skyes nas mi pham
'jam dpal snying

po yis/ /gsung gi bdud rtsi 'bral med longs spyad de/ /rgyal
sras spyod pa rgya mtsho'i mthar phyin shog /ces 'jug pa bde ba'i
phyir rje btsun bla ma'i sgrub thabs tshigs bcad du bsgrigs pa
'di yang don gnyer can 'ga' zhig

gis bskul ba'i ngor/ skyes tsam nyid nas rje btsun bla ma la mi
phyed pa'i dad pa dang ldan pa'i btsun pa blo bzang chos kyi
rgyal mtshan gyis/ chos grwa chen po dpal ldan 'bras spungs kyi
gzims khang gi ba gam du sbyar ba'o/ /

@025a @#/ /na mo gu ru manydzu g+ho ShA ya/ bla ma'i rnal 'byor
sgom par 'dod pas/ skyabs 'gro sems bskyed sngon du btang nas
'di ltar/ mdun gyi nam mkhar kun bzang mchod sprin dbus/ /yid
'phrog seng ges

bteg pa'i rin chen khri/ /padma nyi zla rgyas pa'i dkyil 'khor
steng/ /bka' drin gsum ldan rtsa ba'i bla ma ni/ /rgyal ba gnyis
pa blo bzang grags pa'i dpal/ /ces sogs gang mos kyi bla ma'i
mtshan sbyar bas chog go /

yang na/ blo bzang chos kyi rgyal mtshan 'dzin pa'i dpal/ /rnam
dag dge slong rdo rje 'dzin pa'i tshul/ /dkar dmar mdangs chags
zhi zhing 'dzum pa'i zhal/ /g.yas g.yon phyag ni chos 'chad
mnyam gzhag ste/ /

mtshan dpe'i dpal 'bar gzi brjid phung po'i sku/ /gser mdog paN
zhwa dbu la mdzes par gsol/ /gur kum mdangs ldan chos gos gsum
gyis klubs/ /gzi 'od stong 'bar 'ja' tshon gur khyim nang/ /mi

phyed rdo rje skyil krung gis bzhugs pa'i/ /phung po rnam dag
bde gshegs rigs lnga dngos/ /khams bzhi yum bzhi skye mched rtsa
rgyus tshigs/ /rgyal sras brgyad dang yan lag khro dbang po/ /ba
spu dgra bcom 'od

zer gsang ba pa/ /dran pa tsam gyis dgos 'dod kun 'byung ba/
/skyabs gnas ma lus 'dus pa'i bdag nyid gyur/ /gnas gsum rdo rje
gsum mtshan 'bru gsum dang/ /mtshan dpe'i 'od kyis rang bzhin gnas

@025b rnams nas/ /bla ma mchog la brgyud pa'i bla ma dang/ /dkon
mchog gsum gyis bskor ba spyan drangs te/ /dbyer med bsod nams
zhing gi dam par bzhugs/ /dus gsum sangs rgyas kun gyi ngo bo
nyid/ /brgyad khri bzhi stong

dam chos 'byung ba'i gnas/ /'phags tshogs dge 'dun kun gyi gtso
bo mchog /rje btsun bla ma'i zhabs la phyag 'tshal lo/ /gzhan
yang ci rigs bya/ ston pa bla med sangs rgyas rin po che/ zhes
sogs dang/ ji snyed su dag phyogs

bcu'i 'jig rten na/ zhes pa nas/ bde bar gshegs pa thams cad
bdag gis bstod/ /dngos su bshams dang yid kyis sprul pa dang/
/'jig rten 'jig rten 'das pa las byung ba'i/ /bdud rtsi'i mchod
yon mdzes pa'i me tog

dang; ;dri zhim bdug spos mun sel sgron me'i tshogs/ /bzang po'i
dri chab ro brgya'i zhal zas dang/ /snyan brjid rol mo yid 'ong
'dod yon lnga/ /bdag lus longs spyod dus gsum dge tshogs bcas/
/phyi nang gsang ba'i

mchod sprin rgya mtshos mchod/ /me tog dam pa phreng ba dam pa
dang/ zhes pa nas/ thams cad rdzogs pa'i byang chub phyir
bsngo'o/ zhes yan lag bdun pa phul te/ gdung shugs drag po'i sgo
nas 'di ltar/ tshul khrims dag

cing 'dul ba'i cho ga shes/ /nad par snying brtse 'khor ni dag
pa dang/ /chos dang zang zing phan brtson dus su 'doms/ /gnas
brtan 'dul ba 'dzin la gsol ba 'debs/ /bslab gsum rnam dag yon
tan phung po'i sku/ /gzhan

@026a @#/ /gyi don brtson lung dang rigs pa'i bdag /de nyid rtogs
shing smra mkhas skyo ngal bzod/ /theg mchog dge ba'i bshes la
gsol ba 'debs/ /sgo gsum dul zhing bzod ldan g.yo sgyu med/
/drang

po'i rang bzhin sngags rgyud bstan bcos shes/ /de nyid bcu zad
'bri dang sngags 'chad mkhas/ /brtse ldan rdo rje 'dzin la gsol
ba 'debs/ /sangs rgyas thams cad 'dus sku rdo rje 'chang/ /dkon
mchog gsum

gyi ngo bo phan bde'i zhing/ /bslu med skyabs kyi dam pa zhing
gi phul/ /bka' drin gsum ldan khyed la gsol ba 'debs/ /gzhan
yang bla ma gang dang gang la sbyar ba de dang de'i bstod pa ci
shes pas bstod do/ /de nas/

deng nas bzung ste skye ba kun tu bdag /skyabs mgon dam pa khyod
kyis rjes bzung nas/ /thub pa'i chos tshul ma lus 'doms pa dang/
/bka' bzhin mnyes pa sgrub par byin gyis rlobs/ /shugs drag nges
'byung bcos

min byang chub sems/ /nyes kun drungs nas 'byin pa'i yang dag
lta/ /rim gnyis zung du 'brel ba'i rnal 'byor sogs/ /myur du
rgyud la skye bar byin gyis rlobs/ /mgon khyod gang du mngon par
sangs rgyas pa'i/ /zhing der 'khor

gyi thog mar bdag gyur te/ /khyod mnyes sgrub cing gsung gi bcud
myangs nas/ /byang chub lung bstan thob par byin gyis rlobs/
/gzhan yang bsngo ba dang smon lam ci rigs pa byas te bla ma
rang la thims pas byin

@026b gyis brlabs par bsams la shis pa brjod par bya'o/ /zhes
rang gang la mos pa'i bla ma la sbyar chog pa'i bla ma'i rnal
'byor 'di ni sa skyong mi'i dbang po mgon po dbang gi rgyal pos
yang yang nan gyi bkas bskul ba

la brten nas/ bla ma dam pa rnams kyi bka' 'bangs kyi tha shal
shAkya'i dge slong blo bzang chos kyi rgyal mtshan gyis/ /mdo
rgyud dam pa'i man ngag bzhin du thon dga' ldan rdzong du
g.yar khral du bgyis pa 'di yang 'gro

kun bshes gnyen dam pas 'dzin pa'i rgyur gyur cig /mangga laM/