@#/ /byang chub lam gyi sgron ma'i rnam bshad phul byung bzhad
pa'i dga' ston zhes bya ba bzhugs/ /

@001a @##/ /na mo gu ru manydzu g+ho ShA ya/ bde gshegs kun gyi
sku gsum ye shes lnga/ /gcig tu bsdus pa nyi ma'i gnyen gyi
gtso/ /zla med ston pa shAkya'i rgyal po dang/ /mi

pham 'jam pa'i dbyangs la gus phyag 'tshal/ /bde gshegs lam bzang
drang nges shing rta che/ /rnam dpyod gser gyi tha gus 'dren
mdzad pa/ /klu sgrub thogs med mgon po

zhi ba lha/ /sras dang bcas pa'i zhabs la snying nas 'dud/ /lnga
brgya'i gtsug rgyan dpal ldan mar me mdzad/ /rgyal ba gnyis pa
blo bzang grags pa'i dpal/ /sangs rgyas ye

shes skyabs gsum kun gyi dngos/ /rtsa rgyud bla ma rnams la gus
btud nas/ /rgyal ba'i gsung rab kun gyi gnad bsdus pa/ /shing
rta chen po gnyis kyi bzhed pa'i phul/ /mar me

@002a @#/ /mdzad pa'i thugs kyi bcud phyungs pa/ /byang chub lam
gyi sgron ma bshad par bya/ ! /de la 'dir sa gsum gyi sgron me
gcig pu thub pa'i gsung rab thams cad kyi bcud

bsdus pa/ shing rta chen po gnyis kyi zab rgyas kyi lam srol/
brgyud pa'i chu bo gsum 'dres kyi man ngag mngon mtho nges legs
kyi lam chen/ mdo dang dgongs 'grel mtha' dag gi lde mig /

rgya bod kyi mkhas grub thams cad kyi gshegs bshu la/ skyes bu
gsum gyis nyams su blang bya ma tshang ba med pa ston pa'i gzhung
byang chub lam gyi sgron ma ni gang bshad par bya ba'i chos so/
/de

la dpal nA lentra'i mkhas pa rnams dag pa gsum gyi sgo nas chos
'chad par bzhed kyang/ phyis bri kA ma la shI la'i mkhas pa
rnams ni/ chos rtsom pa po'i che ba/ chos kyi che ba/ de la nyan
bshad

ji ltar bya ba'i tshul gsum sngon du gal che bar bzhed pa ltar
rje thams cad mkhyen pas kyang lam gyi rim pa 'chad par mdzad pa
bzhin/ ! /'di 'chad pa la bzhi/ chos rtsom pa po'i

@002b che ba/ chos kyi che ba/ chos la nyan bshad bya tshul/
gdams pa dngos kyi don no/ /dang po ni/ gzhung 'di mdzad pa po
ni/ bskal pa bzang po'i byang chub sems dpa' paNTi ta chen po
dI paM ka ra shrI dznyA na/ mtshan gzhan dpal

ldan a ti sha zhes grags pa ste/ de'i che ba la brjod tshul mang
yang/ bdag cag gi rje thams cad mkhyen pa'i bzhed pa ltar na
gsum/ rigs phun sum tshogs par skye ba bzhes pa/ rten de la yon
tan brnyes

pa/ brnyes nas bstan pa la bya ba mdzad pa'o/ /dang po ni byang
chub sems dpa' zhi ba 'tsho yang 'khrungs pa'i rgyud/ rgya gar pa
rnams sa hor zhes zer/ bod rnams za hor zhes zer ba'i rgyal rigs
chen por sku

'khrungs pa yin te/ lotstsha bas/ rigs kyi nang nas mchog gyur
pa/ /khyod ni rgyal po'i rigs su 'khrungs/ /dregs pas myos pa
thams cad kyang/ /zhabs kyi padmar spyi bos gtugs/ zhes 'byung
ba ltar ro/ /

! /gnyis pa la gnyis/ mang du mkhyen pa lung gi yon tan brnyes
tshul/ tshul bzhin bsgrubs pa rtogs pa'i yon tan brnyes tshul lo/
/dang po ni thun mong ba rig pa'i gnas lnga dang/ brtag pa'i
bstan

bcos dang/ lugs kyi bstan bcos mang po dang/ nyan thos sde
bzhi'i sde snod gsum dang/ thun mong ba bye brag bshad pa dang/
theg pa chen po'i sde snod gsum dang/ rgyud sde bzhi dang/ sems
tsam dang

@003a @#/ /dbu ma'i grub pa'i mtha' thams cad la legs par sbyangs
shing/ mkhas par mkhyen pa yin te/ bstod pa las/ theg pa gsum
dang sde snod gsum/ /khyod ni mkhas pa chen po yin/ /khyod ni

mkhas pa mang po yis/ /bdar la bdar ba'i skyes bu yin/ zhes
gsungs pa'i phyir/ ! /gnyis pa ni rgyal ba'i lung gi bstan pa
mtha' dag sde snod gsum du 'du bas/ rtogs pa'i bstan pa yang

bslab pa gsum du 'du'o/ /de la tshul khrims kyi bslab pa dang
ldan pa ni/ so thar dang/ byang sems dang/ rig pa 'dzin pa'i
sdom pa legs par nos nas/ nyes pas nam yang ma gos pa'i tshul
khrims

kyis yang dag par bsngams pa yin te/ bstod pa las/ dran dang
shes bzhin ldan pa yis/ /tshul bzhin ma yin yid mi mdzad/ ces
gsungs pa'i phyir/ ting nge 'dzin gyi bslab pa dang ldan pa ni/
thun

mong ba zhi gnas dang/ thun mong ma yin pa bskyed rim gyi ting
nge 'dzin shin tu brtan pa mnga' ba yin te/ bstod par/ gsang
sngags theg pa'i gzhung ltar na/ /bskyed pa'i rim pa brtan par
nges/ zhes

gsungs pa'i phyir/ shes rab la yang/ thun mong ba stong nyid
rtogs pa'i lhag mthong dang/ thun mong ma yin pa rdzogs rim gyi
ting nge 'dzin khyad par can mnga' ba yin te/ bstod pa las/
khyod ni stong nyid rnal

@003b 'byor pa/ /dri med rdo rje'i thugs dang ldan/ zhes pa ltar
ro/ ! /bstan pa la bya ba mdzad pa la rgya bod gnyis las/ dang
po ni rdo rje gdan byang chub chen po'i pho brang du mu stegs
kyi smra ba ngan pa lan gsum du chos kyis pham par

mdzad nas sangs rgyas kyi bstan pa bzung zhing/ jo bo rang nyid
phal chen sde pa yin kyang/ phyogs ris med par sde pa bco brgyad
po sogs de dus kyi sangs rgyas pa kun gyis tshad mar byas nas
lung len pa dang gtsug gi rgyan du 'dzin

te/ bstod pa las/ byang chub chen po'i pho brang du/ thams cad
'dus shing tshogs pa na/ /rang dang gzhan gyi sde pa yi/ /grub
mtha' ngan pa'i rgol ba kun/ /seng ge'i nga ro'i sgra skad kyis/
/thams cad kyi ni klad pa 'gems/

zhes dang/ ma ga d+ha yi yul gyi ni/ /gnas gzhi ma lus thams cad
kyi/ /ston pa'i 'khor ni bzhi po yi/ /kun gyi gtsug gi nor bur
gyur/ ces gsungs pa ltar ro/ ! /gnyis pa ni/ bod du phebs nas
zab pa dang rgya che

ba'i chos kyi 'khor lo mtha' yas pa bskor zhing gzhung byang
chub lam gyi sgron ma mdzad pa la sogs pa'i sgo nas rgyal ba'i
bstan pa'i srol nub pa rnams gsar du btsugs/ srol cung zad yod
pa rnams gsal bar mdzad/

ma rtogs pa dang log par rtog pa dang/ the tshom gyi dri mas
spags pa rnams bsal te/ bstan pa rin po che gzhi nas nyin mor
mdzad pas/ kun kyang mngon mtho dang nges legs kyi lam ma nor ba
la dngos dang brgyud pas

@004a @#/ /'khrid par mdzad pa yin te/ bstod pa las/ jo bo bod du
ma byon na/ /thams cad long ba bzhin du gyur/ /mkhyen pa rgyas
pa khyod byon pas/ /bod du ye shes nyi ma shar/ zhes gsungs pa
ltar yin la/

rgyas par gzhan du shes par bya'o/ ! /gnyis pa chos kyi che ba
ni/ lag sor ba'i zhal nas/ 'di bstan bcos 'phrul gyi lde mig bya
ba yin/ 'phrul gyi lde mig gcig gis sgo lcags thams cad byed pa
zhig yong/

de bzhin du lam sgron 'di bshA ma zhig shes na/ sde snod ma
lus pa go nas 'ong ba yin gsung zhing/ dge bshes lo tsA ba'i
zhal nas kyang/ 'di shes rab kyi pha rol tu phyin pa'i sgrub
thabs yin gsungs te/ de yang

shes rab kyi pha rol tu phyin pa'i don la brgyad dang/ drug
dang/ gsum du ston pa las/ 'dir/ yul ni rnam pa gsum po rgyu/
/sbyor ba bzhi yi bdag nyid dang/ /chos sku 'phrin las 'bras bu
ni/ /don bsdus gzhan te rnam

pa gsum/ zhes gsungs pa ltar mngon rtogs gsum du bsdus pa'i lugs
yin te/ 'di la rten gyi gang zag /shes par bya ba'i yul/ shes
nas 'jug pa'i yul/ nyams su blang pa'i thabs/ nyams su blangs
pa'i

'bras bu dang lnga'o/ /dang po ni/ sangs rgyas rnams la lhag par
byas/ zhes sogs kyis ston/ gnyis pa ni/ gzhung lam snying po'i
sher phyin gsum/ lam la mngon par rtogs pa brgyad/ snying po'i
don spros pa dang bral ba'o/ /

@004b ! /gsum pa ni/ kun mkhyen gsum mo/ /bzhi pa ni sbyor ba
bzhi'o/ /lnga pa ni chos sku 'phrin las dang bcas pa'o/ /byang
chub lam gyi sgron ma zhes pa'i mtshan don yang/ byang chub ni
'bras bu phun sum tshogs pa ste rnam mkhyen

no/ /lam ni rgyu phun sum tshogs pa lam shes te/ de yang sbyor ba
bzhis bsdus pa'o/ /rgyu 'bras gnyis ka phun sum tshogs pa ni gzhi
shes te/ de yang dpe'i sgo nas sgron ma zhes mi gsal ba gsal bar
byed pas mtshan

de ltar btags pa lags zhes gsungs/ bu to ba'i zhal nas/ ci yang
srid shog byang gnyis po zhig sde snod thams cad kyi 'grel par
song bas/ kho bo'ang rgas khar ston pa gcig tu gyur te song
gsung/ stabs ka ba'i zhal

nas kyang/ lam sgron yig klog bag re byas pas/ da gzhung thams
cad gdams ngag tu go ba zhig byung gsung/ de ltar na jo bos
mdzad pa'i bstan bcos mang du yod kyang rtsa ba lta bu yongs su
rdzogs pa ni lam sgron yin te/

mdo sngags gnyis ka'i gnad bsdus pas/ brjod bya yongs su rdzogs
pa dang/ sems 'dul ba'i rim pa gtso bor ston pas lag tu blang
bde ba dang/ shing rta chen po gnyis kyi lugs la mkhas pa'i bla
ma gnyis kyi

gdams pas brgyan pas lugs gzhan las khyad par 'phags pa yin pa'i
phyir/ gzhung lam gyi sgron ma 'di chos can/ che ba khyad par
can dang ldan pa yin te/ ji skad du/ 'dzam gling mkhas pa yongs
kyi gtsug gi rgyan/ /

@005a @#/ /snyan pa'i ba dan 'gro na lhang nge ba/ /klu sgrub
thogs med gnyis las rim bzhin du/ /legs brgyud byang chub lam
gyi rim pa ni/ /skye dgu'i 'dod don ma lus skong bas na/ /gdams
pa rin chen dbang gi

rgyal po ste/ /gzhung bzang stong gi chu bo 'du ba'i phyir/
/dpal ldan legs par bshad pa'i rgya mtsho'ang yin/ /bstan pa
thams cad 'gal med rtogs pa dang/ /gsung rab ma lus gdams par
'char ba dang/

rgyal ba'i dgongs pa bde blag rnyed pa dang/ /nyes spyod chen
po'i g.yang sa las kyang srung/ /de phyir rgya bod mkhas pa'i
skye bo ni/ /skal ldan du mas bsten pa'i gdams pa mchog /skyes
bu gsum gyi lam gyi

rim pa yis/ /yid rab mi 'phrog dpyod ldan su zhig yod/ ces
gsungs pa'i phyir/ gsum pa che ba gnyis dang ldan pa'i chos la
nyan bshad ji ltar bya ba'i tshul ni/ bdag cag gi rje thams cad
mkhyen pas/

lam gyi rim par nyan pa'i tshul/ bshad pa'i tshul/ mjug tu thun
mong du ji ltar bya ba'i tshul gsungs pa ltar shes par bya'o/ !
/bzhi pa gdams pa dngos kyi don la bzhi/ mtshan gyi don/ 'gyur
gyi phyag /

gzhung gi don/ mjug gi don no/ /dang po ni/ rgya gar skad du/ bo
d+hi pa tha pra dI pa/ bod skad du/ byang chub lam gyi sgron ma
zhes bya la/ de yang bo d+hi ni byang chub/ pa tha ni lam/ pra
dI pa ni sgron ma zhes par bsgyur ro/ /mtshan

@005b bshad na/ bstan bcos 'di chos can/ byang chub lam gyi
sgron ma zhes bya ste/ spangs rtogs kyi bdag nyid can gyi sangs
rgyas kyi ye shes ni byang chub dang/ der bgrod pa'i sa bcu'am
lam lnga'i rang bzhin gsal bar byed

cing/ de dag la ma rtogs pa dang log par rtog pa dang/ the tshom
gyi mun pa ma lus pa sel bar byed pa'i bstan bcos yin pas de
ltar brjod pa'i phyir/ sangs rgyas kyi ye shes chos can/ byang
chub ces bya ste/ sgrib gnyis ma lus

pa byang zhing/ ji lta ji snyed kyi chos thams cad ma lus pa
chub pa'i phyir/ ston pa rin po che'i zhal nas/ 'o skol gyi skad
la byang grub tu 'ong gsung/ sa bcu'am lam lnga chos can/ lam
zhes bya ste/ byang chub chen por bgrod

byed kyi gshegs bshul yin pa'i phyir/ don ni dus gsum gyi sangs
rgyas thams cad kyi bgrod pa gcig pa'i lam gsal bar byed pa zhes
bya ba'i tha tshig ste/ jo bo'i zhal nas/ chos thams cad don la
mtshan du

gsol ba lags zhes gsungs pa ltar ro/ /bstan bcos bsgyur ba'i
thog mar rgya skad smos pa la chos can/ dgos pa gsum yod de/
chos khungs btsun par shes pa/ lo paN rgyal blon rnams la byas
shes drin gzo

skye ba/ saM skr-i ta'i skad lobs skyen zhing/ de la bag chags
gzhag pa'i ched yin pa'i phyir/ gnyis pa 'gyur phyag ni/ byang
chub sems dpa' 'jam dpal gzhon nur gyur pa la phyag 'tshal lo/
/zhes pa'o/ /lo tsA ba

@006a @#/ /dge slong dge ba'i blo gros kyis/ 'di ltar rje btsun
'jam dpal la 'gyur phyag mdzad pa chos can/ dgos pa yod de/
bstan bcos 'di mngon par shes pa dang/ 'gyur mthar phyin pa'i
ched yin pa'i

phyir/ 'o na 'di mngon par ji ltar 'ong snyam na/ nges par 'ong
ste/ mngon pa'i brjod bya'i gtso bo zag bcas zag med kyi shes
rab gnyis 'dis gtso bor ston pa'i phyir te/ 'jig rten pa'i mtho
ris lha mi thob pa'i thabs

dang/ de las 'das pa'i theg pa gsum dang/ theg chen gnyis ka
ston pas mngon par shin tu 'ong/ 'di mngon par 'ong par sgreng
ba min pas ma go gsung ngo/ /rnam pa gcig tu bstan bcos 'di
rgyal ba'i bka' mtha' dag

gi dgongs 'grel yin pas/ mngon pa kho na min yang/ rma dge ba'i
blo gros de/ lo chen gyi dngos slob yin la/ lo chen gyis 'gyur
kun la lhag pa'i lha 'jam dbyangs la phyag mdzad pa bzhin du bla
ma'i rnam thar

bskyangs zhes bya'o/ ! /gsum pa gzhung gi don la gsum/ mchod par
brjod cing/ bshad par dam bca' ba/ gzhung dngos bshad pa/ rgyu
gang la brten nas brtsams pa'o/ /dang po ni/ dus gsum rgyal ba

thams cad dag dang de'i chos dang/ /dge 'dun rnams la gus pa
chen pos phyag byas te/ /slob ma bzang po byang chub 'od kyis
bskul gyur pas/ /byang chub lam gyi sgron ma rab tu gsal bar
bya/ zhes gsungs so/ /

@006b pu to ba'i zhal nas/ rkang pa dang po gnyis kyis thun mong
ba'i skyabs gnas bstan zhing phyi ma gnyis kyis bstan bcos
'byung ba'i rgyu gleng bslangs pa bstan lags zhes gsungs/ des na
bstan bcos rtsom pa'i thog

mar gang la phyag bya ba'i yul gzhag tu yod de/ phyogs bcu dus
gsum gyi rgyal ba ste sangs rgyas thams cad dag dang/ de'i chos
te dus gsum gyi sangs rgyas de rnams kyis gsungs pa'i chos ni
gsung rab

lung gi tshogs dang/ de nyams su len pa sgrub pa'i chos dang/ de
mngon du gyur pa rtogs pa'i chos dang/ dge 'dun zhugs gnas
brgyad dang/ rang sangs rgyas dang/ byang chub sems dpa'i sa la
gnas pa rnams yin pa'i

phyir/ sangs rgyas la yon tan mtha' yas pa'i sgo nas bstod tshul
yod kyang/ 'dir rgyal ba zhes spangs pa'i sgo nas dngos su bstod
pas/ rtogs pa'ang mtshon pa yin te/ spangs rtogs phan tshun mi
'khrul ba'i phyir

ro/ /sangs rgyas bcom ldan 'das rnams la rgyal ba zhes bya ste/
rgyu sdig pa'i chos bcom zhing/ sdig 'bras bdud kyi g.yul las
kyang rgyal ba yin pa'i phyir te/ mdo las/ nga ni sdig pa'i chos
las rgyal/ /de bas

nyer 'gro nga rgyal yin/ zhes dang/ g.yul las rnam par rgyal ba
bzhengs su gsol/ zhes gsungs pa'i phyir/ 'dis thun mong ba'i
skyabs gnas bstan pa ltar na/ rgyu zag med lam gyi bden pa dang/
'bras bu 'gog

@007a @#/ /bden gtso bor byas pa'i myang 'das chos su byed dgos
te/ thub dbang gi ni sku gsum dang/ /mya ngan 'das dang gang zag
brgyad/ ces 'byung pas so/ /zhugs gnas brgyad sogs la dge 'dun

zhes bya ste/ skyabs gnas dang/ dge ba la shes nas dad pa thob
pas/ de la 'dun zhing dbye bar mi nus pa'i phyir te/ sangs rgyas
chos dang dge 'dun ni/ /bdud rnams bye ba brgya yis kyang/ /gang
phyir dbye bar mi nus pas/ /

de phyir dge 'dun zhes brjod do/ /zhes gsungs pa'i phyir/ de
ltar na dus gsum gyi sangs rgyas dang/ dus gsum gyi chos 'gog
lam gnyis dang/ dus gsum gyi 'phags pa'i gang zag thams cad la
phyag 'tshal lo/ /

zhes pa'o/ /rten gang gis na/ lha bla ma byang chub 'od kyis/
rgya gar nas paNDi ta mang du spyan drangs pa rnams kyi nang
nas/ 'di nyid kho na thugs rje mkhyen rab snying stobs phul du
byung bar mthong nas a ti sha zhes mtshan

gsol ba nges so/ /tshul ji ltar na skyabs gnas kyi yon tan mthong
ba'i thugs kyis drangs pa'i lus ngag gi gus pa chen pos so/
/bdag nyid chen po 'di la rgya gar na'ang paNDi ta dad pa can
bya bar grags/ bod du dgung

lo bdun cu zin nas kyang byin pa 'dar hril hril phyag mdzad pas/
gzhan gyis bltas pas mig sprid pa'am/ khams ldog pa tsam 'ong/
jo bo lta bu 'o skol gzhon pas kyang mi 'ong gsung bar gda'/ de
ltar phyag mdzad

@007b pa la dgos pa yod de/ bgegs kyi bar chad zhi nas rtsom pa
mthar phyin pa dang/ ya rabs dam pa'i spyod pa dang mthun pa
dang/ 'o skol rjes 'jug rnams la lag len du bslab pa'i ched du
yin pa'i phyir/ te zhes pa lhag ma

'dren pas/ de ltar phyag byas te ci bya zhe na/ bya ba khyad par
can byed pa yin te/ bla na med pa'i byang chub kyi lam kun tu
snang bar byed pa'i sgron ma lta bu'i bstan bcos rab tu gsal bar
bya ba ste spor ba yin pa'i phyir/

de ltar bstan pa'i sgron me 'di bshad par dam bca' mdzad pa chos
can/ dgos pa yod de/ rtsom pa mthar phyin par mdzad pa'i ched
yin pa'i phyir/ ji ltar rtsom pa'i rgyu dang rkyen yang gzhag tu
yod de/ rgyu ni 'og tu

mdo sogs chos las bshad mthong nas/ zhes pas 'chad par 'gyur la/
rkyen ni/ de yang bla ma mnyes pa dang/ bod thams cad kyi bstan
pa'i bdag por bzhugs pas slob ma bzang po zhes pu to pa bzhed
la/

rang 'grel las/ slob ma bzang po zhes bya ba ni theg pa chen
po'i snod yin pas so/ /zhes gsungs pa ltar chos rgyal byang chub
sems dpa'i rigs su 'khrungs shing/ rten dge slong dkon mchog la
mi phyed pa'i dad

pa can/ mdo rgyud la shes rab kyi spyan yangs pa/ jo bo dka' ba
du mas spyan drangs te/ thugs la bab pa'i dngos po mtha' dag gis
mnyes par mdzad pa'i rang gi slob ma bzang po lha bla ma byang
chub 'od kyis bod du

@008a @#/ /bstan pa la 'dra mi 'dra'i bab col mang po byung bas
da bstan pa spyi la ci phan cig dgos tshul snyan du gsol/ lo
rgyus chen mo ltar na/ theg pa thun mong ba'i dri ba gnyis/ pha
rol tu phyin pa'i dri ba gnyis

sngags kyi dri ba gsum ste dri ba bdun mdzad nas/ theg pa chen
po ma lus pa'i don tshig nyung la don 'dus pa bla ma nyid kyis ji
ltar sku nyams su bzhes pa'i bstan bcos zhig mdzad par zhu zhes
bskul bar gyur

pas/ jo bos kyang bstan pa spyi la phan pa'i ched du/ mtho lding
du bstan bcos 'di mdzad pa yin te/ byang chub 'od kyis bskul
gyur pas/ zhes pa'i rang 'grel du/ 'od ? kyi yul 'di na sangs
rgyas kyi bstan pa theg pa

chen po'i lam 'di la log par rtog pa'i gang zag bla ma dge ba'i
bshes gnyen gyis yongs su ma zin pa dag rtsod cing zab pa dang
rgya che ba'i don la rang gi rtog pas dpyod cing so so nas mi
mthun pa mang du mchis pas

de dag gi the tshom bsal du gsol/ zhes bdag la yang nas yang du
bskul bar gyur pas/ de'i don bdag gis mdo la sogs pa'i rjes su
'brangs nas/ byang chub lam gyi sgron ma rab tu gsal bar bya'o/
/zhes

gsungs pa'i phyir/ lam yig tu dri ba bdun zhes pa las 'di dang
'di zhes mi gsal la/ stod du jo bo phebs skabs/ khu rngog sogs
drug gis thabs shes ya bral gyis sangs rgya'am mi rgya/ byang
sdom gyi rten du so thar dgos

@008b sam mi dgos/ rdo rje slob dpon gyi dbang ma thob par rgyud
'chad du rung ngam mi rung/ dbang gong ma gnyis tshangs par spyod
pas blang du rung ngam mi rung/ dbang ma thob par gsang sngags
nyams su blang du rung ngam mi rung bya ba

lnga zhus pas/ ngo bo'i zhal nas/ khyed rnams thugs tshod mi
gda'/ de rnams las mang ba/ lha btsun pas zhus nas lam sgron na
bdog gsung/ de ltar na phar phyin gyi dri ba gnyis/ sngags kyi
dri ba gsum po 'di lnga dang

'grig la/ theg pa thun mong gi dri ba gnyis ci yin rtsad gcod/
nag tshos mdzad zer ba'i lam sgron gyi 'grel pa bshad pa'i rgyan
bya ba zhig na/ dri ba bdun 'di ltar theg chen gyi lam rten gyi
gang zag ji lta bu/ so skye'i

rten la byang chub kyi sems skye mi skye/ so thar gyi sdom pa
byang sdom gyi rten du dgos mi dgos/ so thar gyi sdom ldan gyis
byang sdom blangs na gnas 'gyur ram gnyis ka dang ldan/ tshogs
gnyis gsog pa la thabs

shes zung 'brel du dgos sam mi dgos/ dbu sems gnyis yang dag
pa'i don du gang gzung/ theg chen gsang sngags kyi sgor zhugs na
ji ltar bya zhes pa'i lan gzhung dang rim gyis sbyar/ dge bshes
ston pa/ pu to ba/

sha ra ba yab sras kyi gsung bgros dang/ bshad pa gang du'ang
dri ba bdun dang/ lan 'debs tshul sogs ma byung yang/ gzhung gi
bshad pa zhi ba cing/ las dang po pas nyams su len tshul phul du
byung bar ni mchis so/ /de

@009a @#/ /yang dge bshes lo tsA ba gnyis kyis bshad nyan mdzad
kyang deng sang rgyun chad/ 'di'i 'phrin las rgyas par byed pa
po ni/ 'brom ston pa ste/ khong gis jo bo la/ slob ma gzhan
rnams la chos gzhan

dang gzhan gnang/ kho bo la lam gyi rim pa 'di gnang ba ci lags
zhus pas/ 'di khyod min pa gzhan la gtad sa ma rnyed pa yin
gsung zhing/ dge bshes ston pa rang la 'di kun gyi 'dra mi 'dra
zhus pa na/ nga rtsom pa po

dngos kyi slob ma yin gsung ba dang/ yang 'di la 'grel pa cig
bdog na zhus tsa na/ 'di'i 'grel pa dang yin snyam gsung ba lags
skad/ de'i phyir dge bshes ston pa nas brgyud pa rnams rang
'grel yod pa mi bzhed cing

pu to skor ba'ang rang 'grel gyi bshad pa mi mdzad la/ lo tsA
ba'i rjes 'brang rnams rang 'grel nag tsho'i sbas chos su bzhed
do/ /shar ? ba'i lam sgron gyi gsung bgros su rang 'grel gyi
bshad pa ma mdzad kyang/

khong gi lam rim du/ jo bos mdzad pa'i lam sgron gyi 'grel pa
las zhes lung drangs pas rang 'grel gtan mi bzhed pa ma yin no/
/rgyal ba tsong kha pa chen po ni/ 'di la jo bo rang nyid kyis/
dka' 'grel

zhig mdzad pa la/ gzhan gyis cung zad bsnan pa 'dra gsung ngo/
/mdor na jo bo rjes gzhung 'di la brten nas dus gsum gyi sangs
rgyas thams cad kyi dgongs pa gsal bar mdzad/ dge bshes ston pas
srol

@009b btod/ sku mched gsum gyis dar zhing rgyas par mdzad de/ da
lta'i bar du ma nub pa yin/ 'di la long bas glang mjug ma shor
ba cig bya bo zhes gsungs/ 'o na/ rab tu gsal bar bya'o/ /zhes
jo bos zhal bzhes ma

ches sam ji ltar gsal bar nus zhe na/ jo bo rje lha cig chos
can/ thub pa'i dgongs pa gsal bar byed pa'i gzhung rtsom par nus
te/ de lta bu'i rgyu phun sum tshogs pa bla ma brgyud pa'i man
ngag dang ldan pa/ yi dam

lha'i zhal gzigs pa/ rig pa'i gnas lnga la mkhas pa gsum ga
tshang ba yin pa'i phyir te/ be'u bum sngon po las/ de ltar bla
ma'i man ngag mnga' zhing/ /thugs dam lha yi zhal yang gzigs la/
/rig pa'i gnas

lnga kun la mkhas pas/ /byang chub lam ni gsal bar mdzad nus
zhes gsungs pa'i phyir/ tshigs su bcad pa phyed phyi ma gnyis
kyis bstan bcos 'di'i dgos pa sogs chos bzhi yang bstan pa yin
te/ byang

chub lam zhes pa dang gsal bar bya/ zhes sogs kyis nyid dgos
dang/ dgos pa dang/ brjod bya rnams dngos su bstan nas/ 'grel pa
shugs la bstan pa'i phyir ro/ ! /gnyis pa gzhung dngos bshad pa
la gnyis

skyes bu gsum gyi rnam gzhag mdor bstan pa dang/ skyes bu gsum
gyi lam gyi mtshan nyid so sor bshad pa'o/ /dang po ni/ chung ngu
'bring dang mchog gyur pas/ /skyes bu gsum du shes par bya/ /de
dag mtshan nyid rab gsal

@010a @#/ /ba'i/ /so so'i dbye bas bri bar bya/ zhes gsungs so/
/de yang gong du/ byang chub lam gyi sgron ma rab tu gsal bar
bya/ zhes bshad na/ byang chub kyi lam de ji lta bu zhe na/
spyir skyes bu zhes pa sems

can yin no cog la 'jug kyang/ 'dir skyes bu'i skad dod pu ru
Sha/ don byed pa'am nus pa la 'jug pas/ 'jig rten phyi ma phan
chad kyi don bsgrub pa'i nus pa dang ldan pas skyes bu zhes bya
zhing phyi ma phan chad kyi blang

dor dpyod pa'i yid shas che bas mi zhes kyang bya'i/ tshe 'di pa
tsam don du gnyer ba la 'dir bstan mi'am skyes bu zhes mi bya
ste/ de ltar yang be'u bum las/ phyi mar ngan song 'jigs pas
sdig spong/ /'khor ba'i skyon

dran thar pa 'dod pas/ /bden bzhi'i tshul gyis bslab pa gsum 'jug
/theg dman 'jigs pas byang chub sems sbyong/ /de lta bu ni mi yi
spyod pa/ /gzhan du na ni ci zhig mi yin/ zhes gsungs pa ltar
ro/ /de lta

bu'i skyes bu gsum gyi lam ni gsum nyid du shes par bya ste/ bla
med byang chub tu bgrod pa'i lam de la chung ngu mngon mtho'i
lam dang/ 'bring nges legs thun mong ba'i lam dang/ mchog tu
gyur pa sangs rgyas

nyid kyi lam gsum yod pa'i phyir/ skyes bu gsum gyi lam de yang
rab tu gsal ba ste go shin tu sla bar bri bar bya ba yin te/ lam
de dag kyang rang gi ngo bo mtshon par byed pa'i mtshan nyid kyi
sgo nas dang/ so so'i dbye

@010b bas te lam gsum gyi ngo bo dang khyad par ston tshul mi
'dra ba'i sgo nas bri bar bya ba yin pa'i phyir/ ! /gnyis pa
skyes bu gsum gyi lam gyi mtshan nyid so sor bshad pa la gsum/
skyes bu chung ngu'i mtshan nyid bstan pa/

skyes bu 'bring gi mtshan nyid bstan pa/ skyes bu chen po'i mtshan
nyid bstan pa'o/ /dang po ni/ gang zhig thabs ni gang dag gis/
/'khor ba'i bde ba tsam dag la/ /rang nyid don du gnyer byed pa/
/skyes bu de ni tha mar shes/

zhes gsungs/ shes pa chos can/ 'dir bstan skyes bu chung ngu'i
rnam gzhag yod de/ tshe 'di la cung zad kyang ma chags shing/
phyi ma phan chad sgrub nus kyi skyes bu gang zhig /'khor los
bsgyur ba'i mthar thug pa'i

mi'i bde ba dang/ brgya byin dang/ dga' rab dbang phyug sogs
'dod pa'i bde ba dang/ tshangs pa sogs gzugs gzugs med kyi 'khor
ba'i bde ba tsam dag la dmigs nas/ thabs ni las 'bras la yid
ches

pa'i dad pa sngon du song ba'i mi dge ba bcu spong gi tshul
khrims dang/ zag bcas kyi bsam gtan bzhi dang/ gzugs med pa'i
snyoms 'jug sogs lha'i theg pa dang tshangs pa'i theg pa zhes
bshad pa gang dag gis

ched du bya ba gang zag rang nyid kyis thob pa'i don du gnyer
bar byed pa gang dag yin pa/ de ni 'dir bstan skyes bu tha mar
shes par bya ba yin pa'i phyir/ 'di yang dam pa'i chos la zhugs
pas 'dir bstan skyes bu ni

@011a @#/ /yin la/ srid pa don du gnyer zhing/ gzhan don la rgyab
kyis phyogs pas/ 'bring dang chen po las dman pa'i phyir/ de
yang rkang pa dang pos sbyor ba'i khyad par/ gnyis pas 'bras
bu'i khyad par/

gsum pas kun slong ngam bsam pa'i khyad par/ bzhi pas khyad par
gyi gzhi bstan to/ /de yang mngon mtho tsam don du gnyer bas/
de'i thabs ma nor ba la zhugs pa ni/ 'dir bstan skyes bu chung
ngu'i mtshan nyid

yin la/ spyir ni skyes bu chung ngu la tshe 'di don gnyer tsam
yang yod kyang/ 'dir ni mngon mtho'i thabs ma nor ba la zhugs pa
dgos pa'i phyir/ 'dir bstan skyes bu chung ngu la gcig nyid las
dbye ba gzhan mi byed do/

skyes bu gsum gyi lam mtha' dag gi rtsa ba bshes gnyen bsten
tshul yin te/ bla ma mnyes par byas na/ dal 'byor la snying po
len 'dod skye zhing/ dal ba'i rten la snying po len 'dod dam
chos sgrub 'dod kyi blo ma

skyes par skyes bu gsum gyi lam gang yang nyams su len pa mi
'ong bas/ bshes gnyen bsten pa dang dal 'byor gyi chos skor
gnyis/ gsum ga'i sngon 'gro yin no/ /de'i phyir bstan bcos 'dir
'og tu/ bla

ma rnams kyis bstan pa yi/ zhes dang/ sdom pa 'bogs bzod snying
rje ldan/ zhes sogs gsungs kyang/ 'khrid nyams su len pa na/ 'di
nas bstan pa ltar bshes gnyen bsten tshul sogs go rims nges can

@011b du bya'o/ /'dir bstan skyes bu chung ngu'i lam gyi dngos
gzhi la/ dmigs skor bzhi yod de/ mi rtag pa/ ngan song gsum gyi
nyes dmigs/ skyabs 'gro/ las 'bras bsams nas mi dge bcu spong gi
tshul khrims la bslab

pa'o; ;de yang skyes bu chung ngu'i bsam pa skye ba la/ dmigs pa
dang po gnyis dang/ sbyor ba sgrub pa la phyi ma gnyis su nges
pa'i phyir te/ be'u bum sngon po las/ dal 'byor rnyed dka' 'chi
ba rjes dran/ /lan gcig bsams pas

chos kyi mgo gzug /de ltar bsams pas chos kun skye 'gyur/ zhes
gsungs pa'i phyir/ ! /gnyis pa skyes bu 'bring gi mtshan nyid
ston pa ni/ srid pa'i bde la rgyab phyogs shing/ /sdig pa'i las
las ldog bdag nyid/ /

gang zhig rang zhi tsam don gnyer/ /skyes bu de ni 'bring zhes
bya/ zhes pa'o/ /shes bya chos can/ 'dir bstan skyes bu 'bring
gi rnam gzhag yod de/ mnar med nas srid rtse'i bar gyi 'khor ba
mtha' dag gi sdug bsngal rgyu

mtshan du ma'i sgo nas bsams pas 'khor los bsgyur ba dang/ tshangs
pa dang/ brgya byin gyi bde ba la'ang rmi lam du yang 'dod pa
med pas/ srid pa'i bde ba la rgyab kyis phyogs shing zhen pa log
pa bsam pa'i khyad par/

bsam pa des kun nas bslangs nas sgo gsum sdig pa mi dge ba'i las
las ldog pa'i bdag nyid can gyi so thar ris bdun gang rung gi
brtul zhugs la yang dag par gnas pa sbyor ba'i khyad par/ bsam
sbyor de gnyis

@012a @#/ /dang ldan pas rang nyid sdug kun nye bar zhi ba'i
myang 'das tsam don du gnyer ba 'bras bu'i khyad par te/ rten
gyi gang zag gang zhig khyad par de gsum dang ldan pa de la ni
skyes bu 'bring zhes brjod par

bya ba yin pa'i phyir te/ 'di ni dam chos ma nor bar sgrub pa la
zhugs pas 'dir bstan skyes bu yin zhing/ srid pa mtha' dag las
yid log pas chung ngu las khyad par 'phags/ mgo la sems can khur
chen khyer

ba yi; ;sems dpa' mchog ni dal gyis 'gro mi mdzes/ zhes pa ltar
'gro ba'i don gyi khur 'khur ba'i lhag bsam dang mi ldan pas
skyes bu chen po las dman pa'i phyir/ de ltar na rkang pa gsum
gyis bsam pa

dang; sbyor ba dang/ 'bras bu dang/ bzhi pas khyad par gyi gzhi
bstan to/ /sha ra ba'i gsung bgros las/ sdig pa'i las las zhes
pa/ mi dge ba kho na la mi zer gyi/ mngon mtho 'grub pa'i zag pa
dang bcas pa'i las

rnams kyang yin te/ 'khor ba 'grub pa'i kun 'byung las dang nyon
mongs thams cad 'dis bsdus gsung/ ldog bdag nyid ces pas kyang/
gnyen po bslab pa gsum ga bstan/ zhes gsung ngo/ /skyes bu chung

'bring gnyis ka dang thun mong ba'i lam rgyud ldan gyi theg chen
gyi gang zag shin tu mang bas/ 'dir ni gtso bor rang don du thar
pa sgrub pa'i thabs ma nor ba la zhugs pa ni/ 'dir dngos su
bstan pa'i skyes bu 'bring

@012b gi mtshan nyid/ 'di la theg pa'i sgo nas dbye na/ nyan thos
kyi theg pa la zhugs pa dang/ rang sangs rgyas kyi theg pa la
zhugs pa gnyis/ bsgom bya'i sgo nas dbye na/ 'phags pa'i bden
bzhi bsgom pa dang/ rten

'brel yan lag bcu gnyis lugs 'byung lugs bzlog tu bsgom pa
gnyis/ yang 'dir dngos bstan gyi skyes bu 'bring la nang tshan
gyi sgo nas dbye na/ chung 'bring che gsum du yod de/ rang don
du thar pa don

gnyer gyi bsam pas/ dge bcu'i tshul khrims la slob pa ni/ skyes
bu 'bring gi chung ngu dang/ bsam pa de dang ldan pas 'phags
pa'i bden bzhi bsgom pa ni/ 'bring gi 'bring dang/ bsam pa de
dang ldan pa gang zhig /

gnyis stong gi bdag med bsgom pa ni 'bring gi chen po yin no/
/jo bo chen po mgon po klu sgrub dang/ dpal ldan zla ba'i rjes
su 'brang bas/ de ltar na bsgom bya bdag med gsum gyi sgo nas
kyang gsum du yod de/ rang rgya thub pa'i

rdzas yod kyis stong tsam gyi bdag med dang/ rdul phran cha med
bsags pa'i phyi rol don gyis stong pa'i gzung ba chos kyi bdag
med dang/ gang zag dang/ chos rtog pas btags tsam las/ rang
bzhin gyis grub pas

stong pa'i bdag med phra mo rtogs shing bsgom pa'i theg pa dman
pa'i gang zag gsum gzhag dgos pa'i phyir ro/ /skyes bu 'bring gi
lam dngos gzhi ni/ srid pa'i bde la rgyab phyogs shing/ zhes pas
sdug bden

@013a @#/ /dang; sdig pa'i las las/ zhes pas/ kun 'byung dang/
rang zhi tsam don gnyer/ zhes pas/ 'gog bden dang/ ldog bdag
nyid/ ces pas/ lam bden bstan/ zhes sha ra ba gsung pa ltar/

'phags pa'i bden bzhi'i lam ni/ thar 'dod rnams kyi bsgom bya'i
gtso bo dang/ skyes bu 'bring gi lam gyi gzhung shing yin te/
rten 'brel yan lag bcu gnyis kyang de nyid du 'dus pa'i phyir/
de yang thar pa

don gnyer gyis gtan la dbab bya kun byang gnyis su nges te/ dang
po la rgyu 'ching byed kun 'byung bden pa dang/ 'bras bu bcings
pa sdug bden gnyis su nges/ phyi ma la thob bya 'gog bden dang/
thob byed

lam bden gnyis su nges pa'i phyir/ go rims yang sdug bden thog
mar gsungs pa ltar/ thar 'dod kyis dang por/ sdug bsngal brgyad
dang/ drug dang/ gsum la sogs pas 'khor ba spyi dang/ so so'i
nyes

pa legs par bsams te/ thar 'dod kyi blo bcos min bskyed dgos te/
be'u bum sngon po las/ 'khor ba khang pa me 'bar bzhin nam/
/btson dong mi bzad chud pa'i mi'am/ /rgya mtsho'i klong 'khyil
nang du tshud

pa'am/ /'brog dgon mi bzad 'khyams bzhin bsams la/ zhes gsungs
pa'i phyir ro/ /'khor ba'i sdug bsngal bsams pas yid skyo ba na/
'khor ba 'di ci'i rgyu can yin snyam du bsams pas/ nyon

@013b mongs pa dang zag bcas kyi las las 'khor ba 'grub par
mthong nas/ kun 'byung spong 'dod skye bas/ de'i 'og tu kun
'byung bstan pa ltar/ kun 'byung 'khor ba'i 'jug rim bsgom par
bya ste/ be'u bum las/ bdag

cag 'khor bar yun rings rtag 'khyams/ /de yi rgyu rtsa rang gi
nyon mongs/ /de yi gtso bo ma rig pa ste/ /de yis yan lag bcu
gnyis bskyed pas/ /rtag tu 'khor ba rgyun mi 'chad 'gyur/ zhes
gsungs pa ltar

ro;; ! //kun 'byung gi gtso bo ma rig pa ni/ yul gyi gnas tshul
la phyin ci log tu zhugs pa'i blo yin pas/ spong nus su shes pa
na/ 'gog pa mngon du bya nus su mthong bas/ dus gsum par 'gog

bden bstan pa ltar sems te/ be'u bum las/ 'khor ba'i khang chen
'di la sgo mang/ /gang nas byung kyang phyir ni 'thon te/ zhes
bshad pa'i phyir/ 'gog pa mngon du byed pa'ang/ lam la rag las
par mthong bas/ lam

bden dus bzhi par ston te/ be'u bum las/ thabs tshul kun gyis ma
rig bzlog bya/ /zlog byed rgyu ni bslab pa gsum yin/ zhes gsungs
pa'i phyir/ de skad du rje btsun byams pas kyang/ nad ni shes
bya nad kyi rgyu

ni spang bar bya/ /bde gnas thob bya sman ni bsten par bya ba
ltar/ /sdug bsngal rgyu dang de 'gog pa dang de yi lam/ /shes
bya spang bya rig par bya zhing bsten par bya/ zhes gsungs pa'i
phyir/ ! /gsum pa skyes bu chen po'i

@014a @#/ /mtshan nyid bstan pa la gnyis/ mdor bstan pa dang/
rgyas par bshad pa'o/ /dang po ni/ rang rgyud gtogs pa'i sdug
bsngal gyis/ /gang zhig gzhan gyi sdug bsngal kun/ /yang dag zad
par

kun nas 'dod/ /skyes bu de ni mchog yin no/ /zhes gsungs/ shes
bya chos can/ 'dir dngos su bstan pa'i skyes bu chen po'i rnam
gzhag gzhag tu yod de/ skyes bu chung 'bring gi lam la blo legs
par

sbyangs shing 'byongs pa'i gang zag gang zhig rang rgyud du
gtogs pa'i ste rang nyid 'khor ba'i sdug bsngal gyis thog mtha'
bar gsum du gdungs pa ltar du/ srid mtshor 'khyams pa'i ma gyur
sems can gzhan

thams cad kyang/ de dang 'dra ba srid pa'i sdug bsngal kun gyi
me 'bar bas bsregs pa la mi bzod pa'i snying rjes kun nas
bslangs te/ gzhan gyi sdug bsngal thams cad dang/ de'i rgyu
sgrib gnyis bag chags

dang bcas pa kun yang dag par te slar bzlog pa med par kun nas
zad par 'dod pa'i gzhan don don gnyer gyi 'dod pa dang mtshungs
ldan gyi/ thob bya byang chub la don du gnyer ba'i sems rin po
che dang/ des kun nas

bslangs pa'i rgyal sras kyi spyod pa ci rigs la gnas pa de ni
'dir dngos su bstan pa'i skyes bu mchog yin pa'i phyir ro/ /de
yang gtso bor theg chen sgrub pa'i thabs ma nor ba la zhugs pa
ni/ 'dir dngos su

@014b bstan pa'i skyes bu chen po'i mtshan nyid yin no/ /'dir
bstan skyes bu chen po la/ lta ba'i sgo nas dbye na; dbu sems
gnyis/ theg pa'i sgo nas dbye na/ mdo sngags gnyis/ lam myur bul
gyi sgo nas dbye na phyugs

kyi shing rtas bgrod pa sogs lnga yod do/ /skyes bu chen po'i
lam gyi rnam gzhag ni/ rnam snang mngon byang las kyang gsang ba
pa'i bdag po thams cad mkhyen pa'i ye shes de ni/ snying rje'i
rtsa ba las byung ba yin/ byang

chub kyi sems kyi rgyu las byung ba yin/ thabs kyis mthar phyin
pa yin no/ /zhes theg chen gyi lam tshang zhing ma nor ba ni/
snying rje chen po dang/ byang chub kyi sems dang/ sbyin pa la
sogs pa'i thabs gsum du 'dus par gsungs shing

don 'di nyid/ mkhas pa'i dbang po ka ma la shI las sgom rim
gsum du gtan la phab bo/ /dpal ldan zla ba'i zhabs kyis ni/ rin
chen 'phreng ba las/ bdag nyid dang ni 'jig rten 'dis/ /bla med
byang chub thob 'dod na/ /de'i

rtsa ba byang chub sems/ /ri dbang rgyal po ltar brtan dang/
/phyogs mthas gtugs pa'i snying rje dang/ /gnyis la mi rten ye
shes lags/ zhes gsungs pa'i rjes su 'brangs nas/ snying rje dang
gnyis su med par rtogs pa'i shes

rab dang/ byang chub kyi sems gsum gyis/ byang chub sems dpa'i
lam thams cad bsdus par bzhed de/ snying rje'i sems dang gnyis
su med blo dang/ /byang chub sems ni rgyal sras rnams kyi rgyu/
zhes gsungs pa'i phyir/

@015a @#/ /dbu ma snying po las kyang/ byang chub sems ni mi
gtong dang/ /thub pa'i brtul zhugs yang dag bsten/ /de nyid shes
pa tshol ba ni/ /don kun sgrub pa'i spyod pa yin/ zhes gsungs la/
dbu

ma rgyan du'ang/ byang chub kyi sems dang/ byang chub sems dpa'i
brtul zhugs dang/ de kho na nyid kyi lta ba gsum du 'dus par
bstan te/ de nyid las/ yang dag dad pa'i rjes 'brang ba/ /rdzogs
pa'i byang chub

sems bskyed nas/ /thub pa'i brtul zhugs blangs byas te/ /de nyid
yang dag shes tshol brtson/ zhes bshad pa'i phyir/ slob dpon chen
po zhi ba lhas/ bslab btus su/ dal 'byor don che rnyed par dka'
ba

bsams nas snying po len 'dod bskyed spyir dad pa lhag par theg
chen gyi yon tan bsams pa'i dad pa bskyed de/ smon sems dang/
'jug sdom bzung/ lus longs spyod dge rtsa gsum btang ba dang/
bsrung

ba dang dag pa dang spel ba'i tshul gsungs pa 'dis/ spyod pa phar
phyin drug bsdus pa yin te/ be'u bum sngon po las/ go cha drug
drug sum cu drug dang/ /btang bsrung dag spel bzhi ni don gcig
/ces gsungs

pa'i phyir/ yang na sbyor ba byang chub tu sems bskyed pa/ dngos
gzhi phar phyin drug la slob pa/ rjes byang chub tu bsngo ba
gsum gyis theg chen gyi nyams len bsdus pa yin te/ be'u bum
sngon po las/ dge bshes

@015b ston pa'i zhal nas 'di gsung/ /sbyor ba byang chub sems
kyis 'phangs pa/ /dngos gzhi pha rol phyin pa drug ldan/ /zin
rjes mjug tu byang chub bsngo ba/ /pha rol phyin tshul sbyor kun
der 'du/ zhes gsungs pa

ltar ro/ /lam gyi sgron ma 'dir ni/ theg chen gyi lam thams cad
theg chen gyi mjug sgo sems bskyed du bstan pa/ sems de ji ltar
bskyed tshul/ sems bskyed nas spyod pa la slob tshul/ bslab pa'i
'bras bu ngos

bzung ba dang bzhi bstan pa las/ dang po ni/ rang rgyud gtogs
pa'i sdug bsngal gyis zhes sogs rkang pa bzhi dang/ sems can dam
pa byang chub mchog /ces pa rkang pa gnyis kyis bstan/ ! /gnyis
pa ni/ rdzogs

sangs bris sku la sogs dang/ zhes sogs smon sems cho gas len
tshul bslab bya dang bcas pa ston pa'i gzhung rnams kyis bstan/
spyod pa la slob pa la 'jug sdom 'dzin dges bas/ de len tshul/
'jug

sems bdag nyid sdom pa ma gtogs pa/ zhes sogs kyis bstan/ !
/gsum pa ni/ rgyal sras kyi spyod pa thams cad rgyal tshab dam
pas/ bslab gsum dbang du mdzad nas ni/ /rgyal bas pha rol phyin
pa drug /yang

dag bshad de dang po gsum/ /tha ma gnyis kyis rnam pa gnyis/
/gcig ni gsum char la yang gtogs/ /zhes gsungs pa ltar/ thun
mong ma yin pa'i bslab pa gsum du bsdus pa las/ nyes spyod sgom
pa/ dge

@016a @#/ /ba chos sdud/ sems can don byed kyi tshul khrims gsum
la bslab tshul ni/ rang gi lus ngag yid ni rnam dag rgyu/ zhes
sogs kyis bstan/ ting nge 'dzin la bslab tshul ni/ bsod nams ye

shes rang bzhin gyi/ zhes sogs kyis bstan/ shes rab kyi bslab pa
la slob tshul ni/ shes rab pha rol phyin sbyor dang/ zhes sogs
kyis bstan/ ! /bzhi pa ni/ de ltar de nyid bsgoms byas na/ zhes
sogs

kyis bstan to/ ! /gnyis pa skyes bu chen po'i lam rgyas par
bshad pa la gnyis/ pha rol tu phyin pa'i lam rgyas par bshad pa
dang/ sngags la 'jug pa'i tshul phyogs tsam bstan pa'o/ /dang po
la gnyis/

lam gyi rnam gzhag bshad pa dang/ 'bras bu'i rnam gzhag bshad
pa'o/ /dang po la gnyis/ bshad par dam bca' ba dang/ lam yang
dag pa nyid bshad pa'o/ /dang po ni/ gang zhig gzhan gyi sdug
bsngal

kun/ /yang dag zad par kun nas 'dod/ ces bshad na/ skyes bu chen
pos gzhan gyi sdug bsngal ji ltar zad par byed snyam na/ gzhan
don phun tshogs bsgrub pa la thabs bla na med pa'i byang chub
thob dgos pas/

gzhan don du byang chub bsgrub pa'i thabs bla ma dam pa'i man
ngag ston par bzhed nas/ sems can dam pa byang chub mchog /'dod
par gyur pa de dag la/ /bla ma rnams kyis bstan pa yi/ /yang dag
thabs ni bshad

@016b par bya/ zhes gsungs/ 'di la bshad par bya'o zhes drang/
gang na bla na med pa'i byang chub bsgrub pa'i thabs ni'o/ /gang
la na/ sems can dam pa byang chub mchog gi go 'phang 'dod par
gyur pa de dag la'o/ /'dir sems

can ni skyes bu dang/ dam pa ni mchog gam chen po yin pas/ skyes
bu chen po zhes sngar bshad pa de yin no/ /sha ra ba'i zhal nas/
sems can dam pa zhes pa rigs sad cing lhag pa'i bsam pa dag pa
dang ldan pa yin

gsung ngo/ /byang chub mchog /'dod par gyur pa/ zhes pas byang
chub don gnyer dang/ gong gi /gang zhig gzhan gyi sdug bsngal
kun/ /yang dag zad par kun nas 'dod/ ces pas gzhan don don gnyer
bstan te/ de ltar

na rgyan las gsungs pa'i sems bskyed mtshan nyid yongs rdzogs de
bstan pas/ gzhung 'di dag gis theg chen gyi 'jug sgo yang bstan
pa yin no/ /tshul ji ltar na lung rigs dang ldan pas yang dag par
ro/ /jo

bo gnas lnga rig pa'i paN chen yin pas shes rab kyi rtsal gyis
'chad dam zhe na/ gser gling pa la sogs pa'i bla ma rnams kyis
bstan pa'i gsung gi rjes su 'brangs nas 'chad kyis/ rang bzor ni
ma yin no/ /

pu to ba'i zhal nas/ jo bo'i gsung 'di rang cag la man ngag tu
gnang ba yin te/ rang la bde skyid dam yon tan che skyes chung
skyes thams cad bla ma'i bka' drin du go na/ bla ma'i byin rlabs
kyang gdod 'jug /yon

@017a @#/ /tan yang gong 'phel du 'gro gsungs te/ be'u bum las/
bla ma rnams kyis bstan pa'i skabs su/ /'di yang man ngag rang
gi rgyud la/ /yon tan ci skyes bla ma'i byin rlabs/ /de ltar
rtag dran byin gyis

rlabs 'jug /ces gsungs so/ /pu to ba gzhung 'di bla ma'i bka'
drin rjes su dran pa la sbyor ba mdzad pa la brten nas/ dge
bshes sha ra ba 'dir bla ma'i bsten tshul rgyas par gsung ngo/
/mdor na/ sems can dam

pa zhes pa rkang pa gnyis kyis chos 'di gang la bshad pa'i snod
ngos bzung/ bla ma rnams kyis bstan pa yi/ zhes pa gnyis kyis/
bdud rtsi lta bu'i chos ngos bzung/ de yang yang dag thabs ni
zhes pas brjod bya dang/

bshad par bya zhes pas dgos pa dang/ bla ma rnams kyis bstan pa
yi/ zhes pas rjod byed kyi khyad par dang/ byang chub mchog ces
pas nying dgos bstan te/ byang chub lam gyi sgron ma rab tu gsal
bar bya/ zhes pa rgyas

par bshad pa'o/ /'o na byang chub lam gyi sgron ma rab tu gsal
bar bya/ zhes pa dang/ de dag mtshan nyid rab gsal ba'i/ /so so'i
dbye bas bri bar bya/ zhes pa dang/ 'dir yang dag thabs ni bshad
par bya/ zhes pa

rnams bzlos par 'gyur ro zhe na/ skyon med de/ byang chub lam
gyi sgron ma rab tu gsal bar bya/ zhes pa gzhung spyi'i rtsom
par dam bca' dang/ /so so'i dbye bas bri bar bya/ zhes pa skyes
bu gsum gyi dbye ba so sor

@017b 'chad ces pa dang/ yang dag thabs ni bstan par bya/ zhes
pas/ theg pa chen po'i rigs can la bla med byang chub bsgrub
pa'i thabs ma nor bar 'chad ces ston tshul tha dad pa'i phyir/
des na sems can dam pa zhes

sogs sho lo ka 'di gzhung 'og ma rnams kyi mdor bstan du'ang
bzung ngo/ /de ltar na skabs 'dir theg pa chen po'i sems skyed
kyi mtshan nyid dbye ba/ ji ltar sbyang ba'i rim pa rnams shing
rta chen po gsum gyi

bzhed pa bzhin rgyu 'bras man ngag bdun dang/ bdag gzhan mnyam
brje'i sgo nas nyams su len tshul byang chub lam gyi rim par
gsungs pa ji lta ba bzhin blangs nas byang chub kyi sems rin po
che bsgom pa la/

skyes bu'i rtsal ci yod kyis 'bad dgos te jo bo chen po 'da'
ba'i tshe/ ston pa la/ dman chad rgya gar gser 'dod la chos ma
nyan/ rgyud sde bzhi dkrugs shing 'chad du 'ong/ dge bshes mdo
sde la gyis/ sems

bzang po gyis gsung/ ston pa 'da' ba'i tshe yang/ ston pa'i dbu
pu to ba'i pang du bzhag pas/ spyan chab dbu skra'i gseb tu song
ba mkhyen nas/ khyod mya ngan bya mi dgos/ sems bzang po gyis/
tshe 'di nyid la khyad

par can du 'gyur gyis gsung/ jo bo legs kyis sems bzang po bya
ba ci la zer lags zhus pas/ hur mdzad nas 'o na byang chub kyi
sems la zer lags mod/ ces lan gnyis gsungs pas/ pu to ba'i zhal
nas/

@018a @#/ /de'i dus su nga'i snying la phur pa thebs pa 'dra ba
cig byung gsung/ glang ri thang pa'i zhal nas kyang phan 'dogs
pas kyang/ gnod pa skyel ba la gus pa cig byung na/ byang chub
kyi sems brtan po

byung ba yin/ rgyal ma dgug pham long/ steng du ma 'gro/ 'og tu
sdod/ byang chub sems dpa' bya ba khas nyen zhi tshe bsgrub dgos
pa yin gsung zhing/ lum pa ba'i zhal nas kyang/ 'o skol bskyed
rim dang rdzogs

rim la man ngag tu byed de/ jo bo'i gdams ngag gi mthil phyung
ba/ byams snying rje byang chub kyi sems sgom pa yin gsung/ bdag
cag gi rje thams cad mkhyen pa'i zhal snga nas kyang/ sems
bskyed theg mchog

lam gyi gzhung shing ste/ /rlabs chen spyod pa rnams kyi gzhi
dang rten/ /tshogs gnyis kun la gser 'gyur rtsi lta bu/ /rab
'byams dge tshogs sdud pa'i bsod nams gter/ /de ltar shes nas
rgyal sras

dpa' bo rnams/ /rin chen sems mchog thugs dam mthil du 'dzin/
/rnal 'byor ngas kyang nyams len de ltar byas/ /thar 'dod khyed
kyang de bzhin bskyang 'tshal lo/ /zhes gsungs pa'i phyir ro/ !
/gnyis pa

thabs yang dag pa bshad pa la gnyis/ smon pa bslab bya dang bcas
pa dang/ 'jug pa bslab bya dang bcas pa'o/ /dang po la gsum/
sbyor ba dngos gzhi/ mjug bslab bya la slob tshul lo/ /dang po la
gsuM/

@018b tshogs gsog pa/ skyabs 'gro khyad par can bya ba/ sems gsum
la blo sbyang ba'o/ /dang po ni/ yang dag thabs ni bshad par
bya/ zhes bshad na rdzogs byang bsgrub pa'i thabs gang zhe na/
thabs ni gnyis te/ bsam

pa phun tshogs dang/ sbyor ba phun tshogs so/ /bsam pa ni sems
bskyed pa yin la/ de ni bsod nams bsags pa las 'byung bar bstan
pa'i phyir/ rdzogs sangs bris sku la sogs dang/ /mchod rten dam
chos

mngon phyogs nas/ /me tog bdug spos dngos po dag /ci 'byor pa
yis mchod par bya/ /kun bzang spyod las gsungs pa yi/ /mchod pa
rnam pa bdun dag kyang/ zhes gsungs/ 'dir bstan mchod pa ji ltar
bya ba

dang/ gang gi mdun du bya ba yang gzhag tu yod de/ rdzogs pa'i
sangs rgyas shAkya thub pa'i ri mor bris pa'i sku dang/ la sogs
pa 'bur du brkos pa dang/ lugs su blug pa dang/ lder tsho sogs
sku'i rten dang/ ring

bsil gyi snying po can gyi mchod rten thugs kyi rten dang/ gsung
rab yan lag bcu gnyis sogs dam pa'i chos kyi pu ti gsung gi rten
rnams mngon du phyogs pa ste mngon sum du bzhugs pa'i mdun du
mchod

pa bya ba yin pa'i phyir/ sha ra ba nas/ zhes pas phyag 'tshal
ba'ang bstan pa yin gsung/ dngos po gang gis mchod pa yang yod
de/ me tog dang/ bdug spos dang/ mar me dang/ dri dang/ zhal zas
te nyer spyod kyi

@019a @#/ /dngos po dag gis mchod pa yin pa'i phyir/ rang gang
'bul 'dod pa tsam gyis mchod dam zhe na/ ci 'byor pa yis mchod
par bya ba ste lag na ci yod gtong dgos te/ jo bo'i zhal nas/
'bras

dkar mo khal gcig bdog /yo btang/ byang chub kyi sems bzang po
mchi/ yo ma btang/ byang chub kyi sems bzang po bzang po mi mchi
gsung skad/ de dag ni rdzas bshams pas mngon sum du mchod pa yin

no/ /pu to ba'i zhal nas kyang/ mchod pa ni grogs po snying
zhogs zhogs pa/ tshig pa za tsag tsag pa shom dgos pa yin no/
/gsung bsher gdam mdzad/ sla chos byas na nga la brnyas sa mchos
la brnyas gsung/

sha ra ba bla ma dang dkon mchog gnyis la mchod pa bzang mnyam
dgos gsung/ lag song ba/ bla ma la drag tu dgos gsung bar gda'/
yid kyis mchod pa'i tshul yang yod de/ kun tu bzang po'i spyod
pa'i smon

lam las gsungs pa'i phyag 'tshal ba/ mchod 'bul/ sdig bshags/ yi
rangs/ bskul ba/ gsol gdab/ bsngo ba ste/ mchod pa rnam pa bdun
po dag bya ba yin pa'i phyir/ bdun po de dag la mchod pa zhes

pa ste/ mchod pa'i don mchod yul mnyes par byed pa yin la/ bdun
po des kyang yul khyad par can rnams dgyes par 'gyur ba'i phyir/
bdun po de yang/ theg chen la grags kyis/ dman pa'i sde snod du
ni/

@019b dang por phyag 'tshal ba/ bar du mdo 'don pa/ tha mar bsngo
ba ste rgyun chags gsum bya ba tsam las ma bshad do/ gnyis pa
skyabs 'gro khyad par can bya ba ni/ snying po nges par bsdu ba
las/ theg chen rigs yod

skyes bu des/ /'gro ba skyabs med skyabs pa'i phyir/ /skyabs su
'gro ba sngon 'gro bas/ /smon pa'i sems ni bskyed par bya/ zhes
gsungs pa ltar sems bskyed pa ni/ skyabs su 'gro ba thun mong ma
yin pa sngon du 'gro dgos

par bstan pa'i phyir/ byang chub snying po'i mthar thug par/ /mi
ldog pa yi sems dag gis/ /dkon mchog gsum la rab dad cing/ /pus
mo'i lha nga sar btsugs nas/ /thal mo sbyar ba byas nas ni/
/dang por skyabs 'gro

lan gsum bya/ zhes gsungs/ dus ji srid du skyabs su 'gro bar bya
ba'i tshul yod de/ thun mong ba ni ji srid 'tsho'i bar yin la/
'dir ni byang chub snying po'i mthar thug pa ste/ chos kyi sku
mngon du ma byas kyi bar du yin pa'i

phyir/ byas chub snying po ni gnyis te/ gnas byang chub snying
po dang/ rtogs pa byang chub snying po'o/ /dang po la gnyis te/
rdo rje gdan lta bu sprul sku'i dang/ 'og min stug po bkod pa
lta bu longs sku'i gnas byang chub kyi snying po'o/

! /gnyis pa ni bla na med pa'i ye shes chos kyi sku'o zhes bu
ston thams cad mkhyen pa gsung pa ltar ro/ /kun slong ji lta bus
yul gang la bsam pa ci 'dra ba dang/ spyod lam ci 'dra bas
skyabs su 'gro ba'i tshul yod

@020a @#/ /de/ rgyu'i dus kyi kun slong byang chub snying po'i
bar du/ sems can thams cad la dmigs pa'i snying rje chen pos
dkon mchog gsum skyabs su 'dzin pa las nam yang mi ldog pa'i
sems

shin tu brtan pa dag gis/ yul sangs rgyas dang chos dang thun
mong ma yin pa'i dge 'dun byang sems 'phags pa phyir mi ldog
pa'i dge 'dun te/ dkon mchog gsum la/ bsam pa so so'i yon tan
thos pa

na/ rab tu dang ba'i dad pa shugs drag po skyed spro ba dang
ldan pa byas/ lus kyi kun spyod rkang pa gnyis kyi pus mo'i lha
nga sa la btsugs nas sam/ tsog pur 'dug kyang rung/ bla gos
phrag pa gcig tu gzar/ lag

pa gnyis thal mo sbyar ba'i spyod lam byas nas skyabs su 'gro ba
yin pa'i phyir/ gnas skabs gang gi tshe/ lan du skyabs su 'gro ba
yang yod de/ smon pa sems bskyed kyi cho ga byed pa'i dang por
skyabs 'gro'i

dngos gzhi'i cho ga lan gsum mam brjod pa gsum du bya ste/ gsum
pa'i tshe skyabs 'gro'i sdom pa thob pa yin pa'i phyir/ sha ra
ba'i zhal nas/ nyan thos la skyabs su mi 'gro ba de/ byin rlabs
chung ba ma

yin gyis/ lam mi mthun pa grogs por 'thur mi btub pa dang 'dra
ba yin gsung/ de yang mdo sde rgyan las/ 'tshe ba dag ni thams
cad dang/ /ngan song dang ni thabs min dang/ /'jig tshogs theg pa
dman dag las/ /

@020b skyob phyir skyabs kyi dam pa'o/ /zhes tshe 'di'i 'tshe ba
dang/ phyi ma'i ngan song dang/ thabs min pa lam log par zhugs
pa las skyob pa'i phyir/ skyabs su 'gro ba skyes bu chung ngu'i
skyabs 'gro dang/ 'jig tshogs zag

bcas kyi phung po'ang byed kyi rang bzhin can gyi 'khor ba'i
sdug bsngal las rang nyid thar pa'i phyir du skyabs su 'gro ba
skyes bu 'bring gi skyabs 'gro dang/ theg dman la 'jigs nas sems
can thams cad 'khor ba'i

'jigs pa las skyob pa'i phyir du thun mong ma yin pa'i dkon
mchog gsum la skyabs su 'gro ba theg chen gyi skyabs 'gror
gsungs so/ /'o na skyabs 'gro khyad par can dang/ smon pa la
khyad par yod dam med ce na/

skyabs 'gro khyad par can ni sems can sdug bsngal las skyob pa'i
ched du sangs rgyas thob 'dod pas/ smon pa dang ngo bo la khyad
par med/ cho ga mi 'dra ba yin zhes ka ma pa bzhed/ pu to ba ni
de gnyis kyi khyad par/

smon pa ni sems can gyi don du sangs rgyas thob par 'dod cing/
sangs rgyas thob nas sems can sgrol ba tshong dpon rang stobs
kyis skyel ma byed pa dang 'dra/ skyabs 'gro khyad par can ni/
sems can sdug bsngal

las sgrol bar 'dod pas de'i nus pa mnga' ba dkon mchog gsum la
zhus nas tshong dpon las drag po gzhan la brten nas skyel ma byed
pa lta bu yin gsung/ 'di la'ang mdo sde rgyan las/ 'di ni de
dngos

@021a @#/ /'dod pas khas len de yang snying brtse las rig bya/
zhes sangs rgyas 'dod pas skyabs su khas len pa'ang gsungs pas/
mang du gzigs pa'i mkhas pa rnams kyis dpyad par mdzod

cig /'dir skyabs su 'gro ba'i rgyu dang/ yul dang/ ngo bo dang/
bslab bya dang/ phan yon rnams ni lam gyi rim pa dag las shes
par bya'o/ ! /gsum

pa sems gsum la blo sbyang ba ni/ sems bskyed pa'i dngos gzhi
cho ga'i sngon du'ang blo sbyang dgos pa bstan pa'i phyir/ de
nas sems can thams cad la/ /byams pa'i sems ni sngon 'gro bas/
/ngan song

gsum dang skye sogs dang/ /'chi 'pho sogs kyis sdug bsngal ba'i/
/'gro ba ma lus la bltas te/ /sdug bsngal gyis ni sdug bsngal
ba/ /sdug bsngal sdug bsngal rgyu mtshan las/ /'gro ba thar par
'dod pa yis/ /

zhes pa dang po gnyis kyis byams pa/ de nas gsum gyis snying
rje'i dmigs pa/ de nas gsum gyis snying rje'i rnam pa bstan
cing/ byang chub kyi sems sbyong tshul yang don gyis bstan to/
/shes bya chos can/ tshogs

gsog sngon du song ba'i skyabs 'gro khyad par can gyi cho ga
byas zin pa de nas de nas ci zhig bya ba yang yod de/ ma gyur
sems can thams cad la dmigs pa'i byams pa'i sems ni sngon du
'gro bas te sngon du btang

@021b nas snying rje bsgom par bya ba yin pa'i phyir/ sha ra
pa'i gsung bgros las/ byis pa'i sems ni dmigs pa sems can thams
cad la dmigs nas/ rgyu mtshan drin dran pa'i sgo nas rnam pa
snying du sdug cing gces pa'i blo

thun mong min pa cig bsgom pa'o/ /zhes pa ltar na yid 'ong gi
byams par snang bas rgyu 'bras bdun gyi nang tshan gyis snying
rje'i rgyur nges par sngon du 'gro dgos pa nyid do/ /bde ba dang
'phrad 'dod kyi byams pa chen po snying rje'i rgyur

nges par sngon du 'gro mi dgos kyang/ gzhung 'dis bstan par byed
dgos shing/ 'dir nges par bsgom yang dgos so/ /glang ri thang
pas/ spyan snga la kho bo mi tshe hril gyis byams pa kho na bsgom
par zhu byas pas/ spyan snga

dbu zha phud nas/ jo bo cha byad bzang gsung dbu dung dung mdzad
zer/ spyan sngas smyug rum pa la/ nan ltar na pha rol po 'joms
pa la byams pa tsam pa med/ de bas na byams pa bya ba 'di ming
thos pa tsam gyis snying sangs sangs

'dug gsung/ yang glang thang pa'i zhal nas/ 'gro ba rigs drug
gar skye cha med/ gar skyes kyang sems can la phan 'dogs pa 'di
mi brjed dam gsung ste/ de 'dra zhig dgos pa lags/ de ltar sems
can thams cad la

mar shes drin dran drin gzo'i sgo nas snying du sdug cing gces
pa'i blo dung dung ba byung na/ snying rje bsgom ste/ dmigs pa
ngan song gsum na sdug bsngal drag cing rgyun ring ba ci yod pa
dang/ mi'i skye ba dang sogs khongs nas rga nad 'chi

@022a @#/ /ba phrad bral ma rnyed pa dang/ mdor na nyer len gyi
phung po sdug bsngal bar gyur pa dang/ 'dod lha'i 'chi 'pho ba
dang/ 'og tu ltung ba'i sdug bsngal dang/ sogs khongs nas khams
gong ma'i sdug

bsngal te ting nge 'dzin gyis myos nas chos kyi blo med cing
gnas pa la rang dbang ma thob pa'i sdug bsngal te/ mdor na sdug
bsngal gsum gyis ci rigs par sdug bsngal ba'i 'gro ba ma lus pa
la thugs

rje'i spyan gyis bltas te ngan song gsum gyi sdug bsngal gyis ni
sdug bsngal ba dang/ 'dod lha dang mi'i 'gyur ba'i sdug bsngal
dang/ khams gong ma'i 'du byed kyi sdug bsngal dang/ rgyu mtshan
kun 'byung las dang

nyon mongs pa ste/ rom po'i gsung bgros las/ sdug bsngal bskyed
pa'i rtsa ba'i rgyu las yin la/ tshan de'i rkyen nyon mongs pa'i
gsung pa ltar 'gro ba mtha' dag la dmigs nas sdug bsngal dang
kun 'byung ma

lus pa las thar par 'dod pa'i snying rje dang/ des drangs pa'i
byang chub thob 'dod kyi blo yang sbyang bar bya dgos pa'i phyir
te/ mdo las/ byang chub sems dpas chos mang po la bslab par mi
bya'i/ chos gcig la bslab

par bya ste/ gang zhe na snying rje chen po'o/ /zhes dang/ yang
gang la mgo mchis pa de la 'tsho ba mchis so/ /gang la snying rje
chen po mchis pa de la rdzogs pa'i sangs rgyas mchis so/ /zhes
gsungs shing/ theg pa chen po'i

@022b rgyu lam 'bras gsum mthar phyin pa snying rje la rag las
par yang zla ba'i zhabs kyis gsungs pas 'di bsgom pa la nan tan
snying por mdzod cig /gnyis pa dngos gzhi ni/ ldog pa med par
dam bca' ba'i/ /byang chub

sems ni bskyed par bya/ zhes pa ste/ byams pa dang snying rje'i
dmigs rnam legs par sbyangs nas bla na med pa'i byang chub kyi
sems rin po che ni bskyed par bya'o/ /tshul ji ltar na/ ldog pa
med par dam 'cha' ba'i sgo

nas so/ /spyir smon sems skye ba cho ga la mi ltos kyang/ sems
rin po che 'di las dus nam yang mi ldog cing/ byang chub ma thob
bar du skad cig kyang mi btang ba'i sems kyis smon sems cho gas
blangs nas/ 'og nas

'byung ba'i bslab bya lnga po la nges par slob dgos la/ sems can
gyi don du byang chub thob 'dod kyi blo tsam cho ga'i sgo nas
bskyed na ni/ bslab bya lnga la ma bslabs kyang nyes par mi
'gyur zhes rje thams cad mkhyen pas

lam rim du gsungs so/ /'on kyang gzhung don gtso bo ni snga ma
ltar yin te/ 'og de ma thag bslab bya la slob par bstan pa'i
phyir ro/ /smon sems cho gas len tshul dngos ni/ lam rim rgyas pa
dang/ snar thang pa'i

lam mchog rtsa 'grel na phyag len zhib bshad dang bcas par yod
pas shes par bya zhing/ 'dir gzhung 'chad pa'i sa khong mi lus
pa'i phyir dkyus tsam bri'o/ /de yang thog mar dkon mchog dang
bla ma

@023a @#/ /la ci 'byor ba'i mchod pa dang yon phul/ yan lag bdun
pa rgyas par byas te tshogs bsags nas gsol ba btab pa ni ji ltar
sngon gyi de bzhin gshegs pa dgra bcom pa yang dag

par rdzogs pa'i sangs rgyas rnams dang/ byang chub sems dpa' sa
chen po la bzhugs pa rnams kyis/ dang por bla na med pa yang dag
par rdzogs pa'i byang chub tu thugs bskyed pa de bzhin du/ bdag
ming

'di zhes bgyi pa'ang slob dpon gyis/ bla na med pa yang dag par
rdzogs pa'i byang chub tu sems bskyed du gsol/ zhes lan gsum
gyis gsol ba gdab bo/ /de nas skyabs 'gro khyad par can bya ste/
slob

dpon dgongs su gsol/ bdag ming 'di zhes bgyi ba dus 'di nas
bzung ste/ ji srid byang chub snying po la mchis kyi bar du
rkang gnyis rnams kyi mchog sangs rgyas bcom ldan 'das rnams la
skyabs

su mchi'o/ /dgongs gsol sogs sngar ltar la/ chos rnams kyi mchog
zhi ba 'dod chags dang bral ba'i chos rnams la skyabs su mchi'o/
/tshogs rnams kyi mchog 'phags pa byang chub sems dpa'

phyir mi ldog pa'i dge 'dun rnams la skyabs su mchi'o/ /zhes lan
gsum brjod do/ /slob dpon gyis skyabs 'gro'i bslab bya bshad/
slar yang bzang spyod dam/ spyod 'jug nas 'byung ba'i mchod pa

@023b sogs yan lag bdun pa 'bul/ bla ma la ston pa'i 'du shes
dang/ sems can thams cad la byams snying rje'i 'du shes/ rang la
rmi lam dang/ sgyu ma lta bu'i 'du shes nye bar bzhug nas byang
chub kyi sems

gzung ba ni/ phyogs bcu na bzhugs pa'i sangs rgyas dang byang
chub sems dpa' thams cad bdag la dgongs su gsol/ slob dpon bdag
la dgongs su gsol/ bdag ming 'di zhes bgyi bas skye ba 'di dang

skye ba gzhan dang gzhan dag tu sbyin pa'i rang bzhin dang/ tshul
khrims kyi rang bzhin dang/ bsgoms pa'i rang bzhin gyi dge ba'i
rtsa ba bdag gis bgyis pa dang/ bgyid du stsal ba dang/ bgyid pa
la rjes su yi rang ba'i dge

ba'i rtsa ba des/ ji ltar sngon gyi de bzhin gshegs pa dgra bcom
pa yang dag par rdzogs pa'i sangs rgyas rnams dang/ sa chen po
la rab tu bzhugs pa'i byang chub sems dpa' chen po rnams kyis/
bla na

med pa yang dag par rdzogs pa'i byang chub tu thugs bskyed par
mdzad pa de bzhin du/ bdag ming 'di zhes bgyi bas/ dus 'di nas
bzung ste/ ji srid byang chub snying po la mchis kyi bar du/ bla
na med pa yang dag par

rdzogs pa'i byang chub tu sems bskyed par bgyi'o/ /sems can ma
bsgral ba rnams bsgral bar bgyi'o/ /ma grol ba rnams dgrol bar
bgyi'o/ /dbugs ma phyin pa rnams dbugs dbyung bar bgyi'o/ /yongs
su mya

@024a @#/ /ngan las ma 'das pa rnams yongs su mya ngan las 'da'
bar bgyi'o/ /zhes lan gsum brjod do/ slob dpon ma rnyed na/ rten
gyi drung du phyag mchod phul te/ slob dpon zhes pa'i tshig bzhag
/

cho ga gzhan rnams sngar bzhin bya ba'ang cho ga las bshad do/
/ma bsgral ba bsgral ba sogs kyi dam bca' bzhi po'i don la dge
bshes chen po sha ra ba'i gsung las/ nyan thos kyi dbang du byas
te 'bras

bu bzhi dang sbyar na/ rgyun zhugs thob na/ 'jig rten thams cad
las brgal ba dang/ phyir 'ong thob na 'dod nyon phal cher las
grol ba dang/ phyir mi 'ong thob na/ 'dod nyon thams cad spangs
pas dbugs phyin

pa dang/ dgra bcom thob na mya ngan khams gsum pa'i nyon mongs
thams cad las 'das pa'o/ /theg chen gyi dbang du byas na/ sa
dang po thob pa na 'jig rten las brgal/ bdun pa thob pa na/
mtshan ma'i 'ching

ba las grol/ dag pa sa gsum thob pa na mtshan ma med cing lhun
gyis grub pa'i dbugs phyin/ sangs rgyas pa na mya ngan gyi gnas
su gyur pa'i spang bya thams cad las 'das pa'o gsung/ mchims
thams

cad mkhyen pa ni/ bden bzhi dang sbyor ba mdzad de/ sdug bsngal
gyi chu bo las ma brgal ba bsgrol ba dang/ kun 'byung gi 'ching
ba las ma grol ba dgrol ba dang/ bdag lhas dbugs ma phyung ba
lam gyi bden

@024b pas dbugs dbyung ba dang/ rnam rtog gi mya ngan las ma
'das pa 'gog pa'i bden pas mya ngan las 'da' bar mdzad ces
gsungs te legs par bshad pa'o/ ! /gsum pa mjug bslab bya dang
bcas pa la

lnga las/ dang po phan yon dran pa la bslab pa ni/ de ltar smon
pa'i sems dag ni/ /bskyed pa'i yon tan gang yin pa/ /de ni sdong
po bkod pa yi/ /mdo las byams pas rab tu bshad/ ces gsungs pas/
don ni/

rab tu bshad do/ /gang na/ sngar bshad pa de ltar byang chub
smon pa'i sems dag ni/ cho gas bskyed pa'i yon tan nam/ phan yon
gang yin pa de ni'o/ /gang las na/ de yi phan yon dpag tu med pa
dag /byams mgon

blo dang ldan pas nor bzangs bshad/ ces gsungs pa ltar/ 'phags
pa sdong po bkod pa'i mdo las/ rje btsun byams pas bshad de/ de
las rigs kyi bu byang chub kyi sems ni sangs rgyas kyi chos
thams cad kyis sa bon

lta bu'o/ /'gro ba thams cad kyi chos dkar po rnam par 'phel bar
byed pa'i zhing lta bu'o/ /zhes sogs dpe gnyis brgya lhag tsam
gyi sgo nas gsungs la/ bslab btus su dpe bcu drug drangs so/
/sha ra ba'i zhal

nas/ phan yon de dag kyang bsdu na bzhir 'dus te/ sa bon lta bu
dang/ zhing lta bus rang don dang/ gzhan don gyi yon tan dang/
byang chub kyi sems ni/ mdud thung lta bu'o zhes pas mi mthun
phyogs 'joms pa dang/ rin

@025a @#/ /po che thams cad sdug pa'i nor bu lta bu'o/ /zhes pas
'dod don grub pa'i yon tan bstan gsung/ mdor na 'bras bu sangs
rgyas kyi yon tan tshad med cing bsam gyis mi khyab pa thams cad
kyang

'di'i yon tan te/ 'di gtso bo'i rgyur gyur pa'i phyir/ zhes gro
lung pa chen po gsung ngo/ ! /gnyis pa byang chub kyi sems
sbyong ba la slob pa ni/ de yis mdo klog pa'am bla ma las mnyan
te/ /rdzogs pa'i byang chub

sems kyi yon tan mtha' med pa/ /rnam par shes par byas la de
gnas rgyu mtshan du/ /de ltar yang dang yang du sems ni bskyed
par bya/ zhes so/ /de ltar byang chub kyi sems ni bskyed par bya
ba yin te/ gang gis

na/ smon sems cho gas blangs pa'i byang sems de yis/ rdzogs pa'i
byang chub la dmigs pa'i smon sems kyi yon tan mtha' med cing
bsam gyis mi khyab pa/ sdong po bkod pa la sogs pa'i mdo rnams

dang/ byang sa sogs bstan bcos rang nyid kyis klog pa'am/ yang
na bla ma las legs par mnyan te/ rnam par te mtha' chod par shes
par byas nas/ dgos pa sems re rang rgyud la gnas shing mi nyams
par

'phel ba'i rgyu mtshan te rgyu rkyen du yang dang yang du ste tha
na'ang nyin lan gsum mtshan lan gsum du bskyed par bya ba yin
pa'i phyir/ kha gcig de nas zhes 'don pa ni dpe ma dag pa'o/
/rang 'grel gyi rtsa ba'i

@025b 'gyur du'ang/ da gnas nyin mtshan du/ de ltar yang dang
yang du/ zhes 'byung ngo/ /sngar bshad pa'i cho ga ma grub na/
sangs rgyas chos dang tshogs kyi mchog rnams la/ /byang chub bar
du bdag ni skyabs su mchi/ /bdag gis

sbyin sogs bgyis pa 'di dag gis/ /'gro la phan phyir sangs rgyas
'grub par shog /ces jo bo nyid kyi gzhung las 'byung ba de ltar
bya'o/ /'o na/ byang chub sems kyi yon tan mtha' med pa/ zhes
gsungs na/ de gang las

bshad ce na/ de'i lan bstan pa'i phyir/ dpa' sbyin gyis zhus mdo
dag las/ /'di yi bsod nams rab bstan pa/ /gang tshe tshigs bcad
gsum tsam du/ /mdor bsdus pas ni 'dir bri bya/ /byang chub sems
kyi bsod nams

gang/ /de la gal te gzugs mchis na/ /nam mkha'i khams ni kun
bkang ste/ /de ni de bas lhag par 'gyur/ /ganggA'i bye ma'i
grangs snyed kyi/ /sangs rgyas zhing rnams mi gang gis/ /rin
chen dag gis kun bkang ste/ 'jig rten

mgon la phul ba bas/ /gang gis thal mo sbyar bgyis te/ /byang
chub tu ni sems btud na/ /mchod pa 'di ni khyad par 'phags/ /de
la mtha' ni ma mchis so/ zhes so/ /byang chub kyi sems 'di'i
bsod nams sam phan

yon rgya cher rab tu bstan par bya ba gang yin pa de khyim bdag
dpa' sbyin gyis zhus pa'i mdo sde dag las/ tshigs bcad gsum tsam
mdor bsdus nas gsungs pa de ni gzhung 'dir yang bri bar bya'o/
/zhes 'tshams sbyar

@026a @#/ /ro/ /'o na mdo las 'byung ba'i phan yon ji lta bu zhe
na/ 'dir bstan byang chub kyi sems kyi phan yon rgya shin tu
chen po dang ldan pa yin te/ byang chub kyi sems kyi bsod nams
gang yin pa de/

gzugs su ma grub mod/ gal te de la gzugs shig mchis na/ phyogs
bcu'i nam mkha'i khams ni kun tu bkang ste byur bur gtams na/
phan yon de ni nam mkha'i khams de bas kyang lhag pa te/ nam

mkhar mi shong ba yin pa'i phyir/ 'dis rgya che ba dang/ phyi ma
gnyis kyis tshad bzung du med pas mtha' ma mchis pa bstan to/
/gzhan yang/ byang chub kyi sems la bsod nams kyi mtha' ni ma
mchis so ste/

tshad bzung du med pa'i bsod nams yod de/ snod kyi khyad par chu
bo ganggA'i 'gram gyi bye ma'i grangs sam/ ganggA'i chu rdul
du phye ba'i bye ma ji snyed pa de snyed kyi sangs rgyas kyi
zhing rnams rten dad pa dang ldan pa'i mi

gang gis mchod rdzas kyi khyad par lha'i rin po che dbang gi
rgyal po dag gis kun tu byur bur bkang ste/ yul khyad par can
'jig rten gyi mgon po sangs rgyas bcom ldan 'das la 'bul ba phul
ba bas/ theg chen

gyi rten gyi gang zag gang gis/ dkon mchog gam bla ma'i drung du
dad pas thal mo sbyar ba bgyis te/ bla na med pa'i byang chub tu
sems btud pa bskyed na/ byang chub kyi sems bskyed pa'i mchod pa
'di ni khyad par

@026b du 'phags pa yin pa'i phyir ro/ ! /gsum pa tshogs gnyis
bsag pa la bslab pa ni/ byang chub smon pa'i sems dag bskyed nas
ni/ /'bad pa mang pos kun tu spel bya zhing/ zhes gsungs/ pu to
ba'i zhal

nas/ tshogs gnyis la 'bad pa 'dis zin du rung gsungs/ phan yon
dran pa dang dus drug tu sbyang ba gnyis kyi sgo nas/ byang chub
smon pa'i sems dag bskyed par byas nas ni/ dkon mchog la mchod
pa/ dge 'dun

gyi bsnyen bkur/ 'byung po'i gtor ma/ 'phongs pa la sbyin pa
sogs bsod nams dang ye shes kyi tshogs gnyis gsog pa la 'bad pa
mang pos/ sems de kun tu spel bar bya dgos te/ tshogs kyi gtam
las/

bdag gis de ring bsod nams dang/ /ye shes tshogs ni gang zhig
gis/ /gzhan la phan pa gang bya zhes/ /byang chub sems dpas yang
yang bsam/ zhes gsungs pa'i phyir/ zhing zhes pa 'og ma sdud
pa'i tshig go /

! /bzhi pa sems can blos mi spang pa la bslab pa ni/ 'di ni skye
ba gzhan du'ang dran don du zhes pa'i 'ang gi sgras bstan par
zhang rom bzhed do/ /'ang gi sgras tshe 'dir sems bskyed mi nyams
pa'i rgyu la bslab par

bstan cing/ sems can blos spong gis sems bskyed gtong bas so
snyam du dgongs pas shin tu legs zhes dam pa kha cig 'chad do/ !
/lnga pa nag chos bzhi spang zhing/ dkar chos bzhi bsten pa la
slob

@027a @#/ /tshul ni/ 'di ni skye ba gzhan du'ang dran don du/ /ji
skad bshad pa'i bslab pa yongs su bsrung/ zhes gsungs/ 'dir
bstan smon sems cho gas bzung ba 'di la ni sngar bshad pa'i
bslab bya

bzhi'i sgo nas tshe 'dir mi nyams pa'i rgyu la bslab pa de tsam
gyis chog gam zhe na/ mi chog ste/ skye ba phyi ma gzhan du'ang
sems de mi brjed cing dran par bya ba'i don du/ 'od srung kyis
zhus pa'i mdo las/ ji skad bshad

pa'i bslab pa bzhi tshan gnyis po yongs su bsrung ba dang bsten
par bya ba yin pa'i phyir/ dri ba gnyis pa so skye'i rten la
byang chub kyi sems gsar du skye'am mi skye'i lan/ 'grel par
gsal bar ma bshad kyang/ nag

chos bzhi dang/ sems can blos spong gis smon sems nyams par
'gyur pa'i rten ni so skye kho nar nges pas/ de'i rten la smon
sems skye ba yod ces don gyis grub bo/ /gnyis pa 'jug pa bslab
bya dang bcas pa bshad pa

la gsum/ mtshams sbyar te 'jug sdom blang bar bstan pa/ 'jug sdom
ji ltar blang ba'i tshul/ sdom pa blangs nas bslab bya la bslab
par bstan pa'o/ /dang po ni/ sngar bshad pa ltar byang chub tu
sems bskyed

kyang rgyal sras kyi spyod pa la ma bslabs na 'tshang rgya mi
srid cing/ byang sdom ma bzung na/ sbyin sogs la bslabs kyang
rgyal sras kyi spyod par mi 'gyur pas/ spyod pa'i rten sdom pa
gzung dgos par bstan pa'i

@027b phyir/ 'jug sems bdag nyid sdom pa ma gtogs pa/ /yang dag
smon pa 'phel bar 'gyur ma yin/ /rdzogs pa'i byang chub sdom pa
spel 'dod pas/ /de phyir 'bad pas 'di ni nges par blang/ zhes
gsungs so/ /smon sems

brtan zhing cho gas gzung ba des/ 'jug pa'i sdom pa 'di ni sgyid
lug pa dang zhum pa med par 'bad pa drag pos nges par blang bar
bya ste/ dgos pa 'bras bu'i ming gis rgyu la btags pa rdzogs
pa'i byang chub la dmigs

pa'i sdom pa'i ming can smon pa'i sems de spel zhing mthar phyin
par 'dod pas blang dgos pa'i phyir/ smon sems spel ba 'jug sdom
la rag las pa yang yin te/ 'jug pa'i sems kyi bdag nyid sdom pa
bzung ba

ma gtogs par smon pa'i sems yang dag pa mchog tu 'phel bar 'gyur
ba ma yin pa de'i phyir snying po nges par bsdu ba las kyang/
lhag pa'i bsam pa dang ldan pas/ /'jug pa'i sems ni bskyed byas
pas/ /sngar

gyi smon pa'i sems de nyid/ /rgya cher rab tu 'phel bar 'gyur/
zhes gsungs pa'i phyir/ gzhung 'di la brten nas sngon gyi dge
bshes yung ba pa sogs smon pa sdom par bzhed kyang/ gzhan phal
cher sdom pa'i sgras

btags pa yin te/ jo bo rang nyid kyis/ sems bskyed sngon du song
ba yis/ /byang chub sems dpa'i sdom pa blang/ zhes sems bskyed
dang sdom pa so sor gsungs pa'i phyir gsung ngo/ ! /gnyis pa
'jug sdom

@028a @#/ /ji ltar len pa'i tshul la gsum/ len pa'i rten/ blang
ba'i yul/ len pa'i cho ga'o/ /dang po ni/ so sor thar pa ris
bdun gyi/ /rtag tu sdom gzhan ldan pa la/ /byang chub sems dpa'i
sdom pa yi/ /

skal pa yod kyis gzhan du min/ zhes gsungs so/ /'di ni slob dpon
byang chub bzang po'i sdom pa nyi shu pa'i 'grel par/ so sor
thar pa'i sdom pa ni/ byang chub sems dpa'i sdom pa'i yan lag tu
'gyur pa

yin te/ phyogs gcig nyid du rig par bya'o/ /de'i phyir so sor
thar pa'i sdom pa gzhan dang ldan pa 'dis/ byang chub sems dpa'i
sdom pa yang dag par len pa'i snod du gyur pa la bslab pa'i
tshigs 'di yang

sbyin par bya ba'i don to/ /'di la srog gcod pa la sogs pa las
ldog pa'i cho ga gzhan nyid ni ma yin zhing/ de rnams kyang ldog
pa ma yin pa ni byang chub sems dpa'i sdom pa yang dag par len
pa'i

snod du gyur pa'ang yod pa ma yin no/ /zhes gsungs pa'i don
bsdus pa rang 'grel las bshad do/ /yongs rdzogs dge bsnyen yan
nas dge slong gi sdom pa'i bar so sor thar pa ris bdun dngos
sam/ de

dang thun mong pa'i rang bzhin gyi kha na ma tho ba spong ba
rtag tu ste ji srid 'tsho ba'i sdom pa byang sems kyi sdom pa la
ltos te/ gzhan dang ldan pa dag la byang chub sems dpa'i sdom pa
skye ba'i skal ba yod kyis de

@028b las gzhan du byang sdom phun sum tshogs pa skye ba ma yin
te/ byang sdom ni dngos dang brgyud pas gzhan la phan 'dogs par
nus pa gang zhig /de la gzhan gnod gzhi bcas las ldog pa cig
dgos pa'i phyir

te/ rang 'grel las/ da ni tshul khrims kyi sdom pa'i rten khyad
par can 'dod nas/ zhes sogs gsungs pa'i phyir/ 'o na bsnyen gnas
rten du mi ston pa ci zhe na/ de'i rgyu mtshan yod de/ dus thung
ba dang/ sdig pa dang

'dod pa gnyis ka las dben pa ma yin pas/ byang sdom gyi rten du
mi rung ba'i phyir/ gal te so thar gyi sdom pa ni tshe 'phos pas
gtong bas/ 'di'i rten du ji ltar rung snyam na/ rnal 'byor pa
chen po'i zhal nas/ rgan

po long ba'i rten dbyug pas byed cing/ phyis nas dbyug pa mi
'gyel ba rgan pos mgo nas bzung bas byed pa ltar/ dang por skye
ba'i rten so thar gyis byed la/ de nas gzhan gnod gzhi bcas las
log pa de byang

chub snying po'i bar mi 'chor bar byang sdom gyis byed ces gsung
ngo/ /'di la brten nas sngon dus su sdom pa rten can pa dang
rten med pa'i tha snyad byed pa byung zhing/ nag tsho'i lugs kyi
dri ba gsum pa'i lan yang

gzhung 'dis bstan pa yin no/ /rten gyi khyad par ston pa la/ so
sor thar pa ris bdun du/ /de bzhin gshegs pas gsungs pa las/
/tshangs spyod dpal ni mchog yin te/ /dge slong sdom pa dag tu
bzhed/ ces

@029a @#/ /so/ /so thar ris bdun ci rigs la gnas pa'i rten la
bzang ngan gyi khyad par yod dam med ce na/ 'dul ba'i sde snod
las/ so sor thar pa ris bdun du/ /de bzhin gshegs pas gsungs pa
la/ /

khyim pa'i sdom pa las/ rab byung phyogs kyi sdom pa mchog dang/
tshangs par spyod par rab byung phyogs kyi sdom pa'i nang nas
kyang dpal lam phun sum tshogs pa ni/ bsnyan par rdzogs pa dge
slong gi sdom pa dag yin

te/ /de ni rgyal ba'i bstan pa la zhugs la yongs su rdzogs pa
yin pa'i phyir ro/ /des na dge slong gi sdom pa ni/ byang sdom
gyi rten mchog tu bzhed de/ zla ba sgron me las/ dge slong dngos
po mchog tu bya ba yis/ /

byang chub dam pa mchog la sems bskyed cig /ces dang/ gsum las
dge slong mchog yin 'bring/ zhes sogs dang/ sangs rgyas bstan pa
rin chen sgron/ /'bar ba'i snod ni dka' thub can/ /ngur smrig

'dzin pa shAkya'i sras/ /dge slong rnams ni yin phyir ro/ /zhes
gsungs pa'i phyir/ 'o na so thar gyi sdom ldan gyis byang sdom
bzung ba'i tshe gnas 'gyur ram/ gnyis ldan gang yin zhe na/ jo bo
sdom pa yar ldan

bya ba gnyis ldan du bzhed ces sne'u zur pa'i bstan rim las
bshad/ nag tsho'i 'grel par yang de gnyis kyi sdom pa gcig gam
tha dad ce na/ gcig pa'ang yin/ tha dad pa'ang yin te/ 'di ltar
sdom pa'i

@029b tshul khrims bya ba la sogs pa gzhan na med kyi so sor thar
pa ris bdun po gang la gnas pa nyid sdom pa'i tshul khrims yin
pas na gcig pa'ang yin no/ /tha dad pa'ang yin te/ so sor thar
pa rdzas su 'dod

pa dang/ gzhan la gnod pa byed pa las log nas/ gnod pa mi byed
pa dang/ byang sems kyi sdom pa rdzas su mi 'dod pa dang/ gzhan
la phan pa nyid sgrub pas tha dad pa'ang yin zhes bya'o gsungs/
des ni dri ba bzhi

ba'i lan gdab par yang bzhed do/ ! /gnyis pa gang las blang ba'i
yul ni/ sdom pa'i cho ga la mkhas dang/ /bdag nyid gang zhig
sdom la gnas/ /sdom pa 'bogs bzod snying rje ldan/ /bla ma bzang

por shes par bya/ zhes pa ste/ 'di byang chub sems dpa'i sa dag
gi /zhes pa'i 'og na yod kyang sngar blangs pa ni 'chad bde ba'i
dbang du byas so/ /'o na sdom pa blang pa'i yul bla ma ji lta bu
zhig ce na/ byang

sdom 'bogs pa'i bla ma bzang po yon tan phun sum tshogs pa bzhi
ldan zhig /'dir bstan bla ma bzang po'i mtshan nyid du shes par
bya dgos te/ sdom pa'i cho ga ni yang dag par len pa dang/ mi
nyams par

bsrung ba dang/ nyams na phyir bcos pa'i thabs yin pas/ de dag
la mkhas pa'i shes rab phun sum tshogs pa dang/ bdag nyid gang
zhig byang chub sems dpa'i tshul khrims phun sum tshogs pa dang/
byang

@030a @#/ /sdom 'bogs par bzod pa'i nus pa'am spobs pa phun sum
tshogs pa dang/ snying rjer ldan pa'i bsam pa phun sum tshogs pa
dang ldan pa yin pa'i phyir/ bzhi po'i nang nas kyang snga ma
gnyis

gtso che bar zhang rom dang lag sor ba gnyis bzhed pa ltar legs
te/ spyod 'jug las kyang/ rtag par dge ba'i bshes gnyen ni/
/theg chen don la mkhas pa dang/ /byang chub sems dpa'i brtul
zhugs mchog /

ces gsungs pa'i phyir/ ! /gsum pa ji ltar len pa'i cho ga la
gnyis/ bla ma yod pa'i cho ga dang/ bla ma med pa'i cho ga'o/
/dang po ni/ byang chub sems dpa'i sa dag gi /tshul khrims le'u
gsungs chog yis/ /

yang dag mtshan nyid ldan pa yi/ /bla ma bzang las sdom pa blang/
zhes gsungs/ 'dir rang 'grel las/ slob dpon thogs med dang/ rje
btsun zhi ba lha'i lugs bshad ces mtshams sbyar nas/ 'og tu/ bdag
ni

lugs de gnyis ka'i rje su 'brang bas na/ bla ma las blang ba'i
cho ga ni tshul khrims kyi le'u la brten cing bkod la/ bla ma med
pa'i cho ga ni/ bslab pa kun las btus la brten cing bkod pa'o/
/zhes gsungs

pa ltar/ jo bo la shing rta chen po gsum gyi gdams pa mnga' ba
las 'jug sdom gyi skabs 'dir/ thogs med dang zhi ba lha'i lugs
gnyis la brten par mdzad pa yin no/ /des na shing rta chen po
gnyis kyi cho ga'i

@030b khyad par 'ga' zhig mi 'dra ba tsam ma gtogs don la khyad
par med cing/ lugs de gnyis la dbu ma lugs dang/ sems tsam lugs
kyi tha snyad byas nas/ len yul cho ga rtsa ltung mi mthun par
smra ba ni ma brtags pa chen

po'o/ /zhes gsungs pa ni legs par gsungs pa'o/ /de la blang zhes
pa bshad gzhi'o/ /gang na 'jug pa'i sdom pa'o/ /gang las blang
na yang dag pa'i mtshan nyid phun sum tshogs pa dang ldan pa de
bla ma bzang por shes par

byas te de las so/ /cho ga gang la brten nas blang na/ 'phags pa
thogs med kyis mdzad pa'i byang chub sems dpa'i sa'i nang tshan
dag gi tshul khrims kyi le'ur gsungs pa'i cho ga yis so/ /'di la
sbyor dngos rjes

gsum las gsol gdab dang/ spro ba bskyed pa dang/ tshogs bsag pa
dang/ bskul ma gdab pa dang/ bsam pa khyad par can bskyed pa
dang/ bar chad thun mong ba dri ba dang/ bslab pa mdor bsdus
brjod pa dang bdun ni

sbyor ba dang/ phyogs bcu dus gsum gyi rgyal ba sras dang bcas
pa'i bslab pa lan gsum gyi bar du khas len pa ni dngos gzhi
dang/ mkhyen gsol/ ye shes kyis gzigs pa 'jug pa'i phan yon
dang/ sdom pa

mnos pa gya tshom du mi bsgrags pa dang/ bslab pa mdor bsdus
brjod pa dang/ gtang rag gi mchod pa dang lnga ni mjug gi cho
ga'o/ /'di dag zhib par/ jo bo'i sdom pa'i cho ga dang tshul
khrims le'u'i rnam bshad las

@031a @#/ /shes par bya'o/ ! /gnyis pa bla ma med pa'i cho ga ni/
de la 'bad pas 'di 'dra ba'i/ /gal te bla ma ma rnyed na/ /de
las gzhan sdom nod pa yi/ /cho ga yang dag bshad par bya/ zhes
pas spyir

bshad par dam bca' ba'o/ /mtshan nyid dang ldan pa'i bla ma de
'dra ba la sdom pa blang bar gsungs pa ltar 'bad pa chen pos
btsal yang/ yul dus kyi dbang gis 'di 'dra ba'i gal te bla ma
gtan ma rnyed na ji ltar bya

zhe na/ bla ma yod pa de las gzhan dmigs bsal rang nyid kyis
blang ba'i tshul yod de/ bla ma med pa'i sdom pa nod pa'i cho ga
lung las gsungs pa bzhin 'dir yang/ yang dag par bshad par bya
ba yin pa'i phyir

ro/ /'o na bla ma med pa'i cho ga lung gang las bshad ce na/ de
la sngon tshe 'jam pa'i dpal/ /amba rA dzar gyur pa yis/ /ji
ltar byang chub thugs bskyed pa/ /'jam dpal gyi ni sangs rgyas
zhing/ /rgyan gyi mdo las

bshad pa ltar/ /de bzhin 'dir ni rab gsal bri/ zhes bye brag tu
bshad par dam bca' ba'o/ /de la bla ma med pa'i cho ga bshad par
bya ste/ sngon bskal pa dpag tu med pa'i dus kyi tshe/ 'jam pa'i
dpal du

gyur pa ni/ 'khor los bsgyur ba'i rgyal po amba rA dza ste/
rgyal po nam mkha' zhes bya bar gyur pa yis/ de bzhin gshegs pa
'brug sgra'i dbyangs kyi rgyal po zhes bya ba'i drung du ji ltar
bla na med pa'i byang chub

@031b tu thugs bskyed pa'i tshul 'jam dpal gyi sangs rgyas kyi
zhing gi rgyan nam/ bkod pa ston pa'i mdo las bshad pa ltar de
kho na bzhin du/ gzhung 'dir ni rab tu gsal bar bri ba yin pa'i
phyir/ mdo de las

'byung ba'i sems bskyed dang/ sdom pa bzung tshul dngos ston pa
la/ mgon po rnams kyi spyan snga ru/ /rdzogs pa'i byang chub
sems bskyed cing/ /'gro ba thams cad mgron du gnyer/ /de dag
'khor ba las sgrol lo/ /

gnod sems khro ba'i sems nyid dang/ /ser sna dang ni phrag dog
nyid/ /deng nas bzung ste byang chub dang/ /thob kyi bar du mi
bya'o/ /tshangs par spyod pa spyad bya zhing/ /sdig dang 'dod pa
spang bar bya/ /tshul khrims sdom

pa la dga' bas/ /sangs rgyas rjes su bslab par bya/ /bdag nyid
myur ba'i tshul gyis ni/ /byang chub thob par mi spro zhing/
/sems can gcig gi rgyu yis ni/ /phyi ma'i mu mthar gnas par
bgyi/ /tshad med bsam

gyis mi khyab pa'i/ /zhing dag rnam par sbyang bar bya/ /ming
nas bzung ba byas pa dang/ /phyogs bcu dag tu rnam par gnas/
/bdag gi lus dang ngag gi las/ /thams cad du ni dag par bya/
/yid kyi las kyang dag bya ste/ /

mi dge'i las rnams mi bya'o/ /zhes so/ /dkon mchog la yan lag
bdun pa byas te/ 'jam dpal rgyal po nam mkhar gyur pas sems
bskyed pa'i tshigs bcad 'di dag gis sdom pa bzung bar bya ste/
bslab

@032a @#/ /btus las/ dge ba'i bshes gnyen la gsol ba btab ste/
de'i tshig gi rjes su brjod pa'am yang na bdag nyid kyis brjod
pas/ slob dpon dgongs su gsol/ bdag ming 'di

zhes bgyi ba zhes smos la/ ji ltar 'phags pa 'jam dpal gyi sangs
rgyas kyi zhing gi yon tan bkod pa'i mdo las/ bcom ldan 'das
'phags pa 'jam dpal gyi sngon gyi tshe'i rtogs pa brjod pa las
spyod

pa dang ldan pas byang chub tu sems bskyed pa de bzhin du sems
bskyed par bya'o zhes gsungs so/ /bsdus pa la dga' na 'di nyid
lan gsum brjod de byang sdom blang bar bya zhing/ 'di'i rjes su/
mgon po

rnams kyi spyan snga ru/ zhes pa nas/ mi dge'i las rnams mi
bya'o/ /zhes pa'i bar btags te lan gsum brjod pas/ cho ga rgyas
pa'i lag len lugs so/ /bslab btus su bla ma yod med gnyis ka la
sbyar

yang/ 'dir bla ma med pa'i lugs la brten par mdzad do/ /de yang
sems bskyed pa dang/ sdom pa yang dag par blang ba gnyis las/
sems bskyed pa ni/ mgon po sangs rgyas byang sems rnams kyi
spyan snga ru/

bla na med pa yang dag par rdzogs pa'i byang chub tu sems bskyed
do/ /ched du bya ba gang gi don du na/ nam mkha'i mthas gtugs
pa'i 'gro ba thams cad mgron du gnyer ba ste de'i don du'o/
/dngos po ci 'dra zhig

@032b la mgron du gnyer na/ 'gro ba de dag 'khor ba las ma rgal
ba sgrol ba dang/ ma grol ba dgrol ba dang/ dbugs ma phyin pa
dbugs dbyung ba dang/ yongs su mya ngan las ma 'das pa/ yongs su
mya ngan las

'das pa la 'god cing/ mgron du gnyer ba'o/ /'dis 'jug pa'i sbyor
ba dang/ smon pa'i dngos gzhi bstan zhes sha ra ba bzhed do/
/byang sdom blang ba'am/ 'jug pa'i dam bca' ba la gsum las/ dang
po

sdom pa'i tshul khrims khas len pa ni/ kun nas mnar sems pa'i
rgyu dgu gang rung la brten nas/ zhe sdang gis gsod 'dod la sogs
pa'i gnod sems dang/ gzhan la 'phral du sems 'khrug pa'i khro
ba'i

sems nyid dang yo byad gzhan gtang mi nus pa'i ser sna dang/
gzhan gyi phun tshogs la mi bzod pa'i phrag dog nyid de bzhi po
de dag sdom pa blangs pa'i nyin deng nas bzung ste bla med byang
chub ma thob pa de srid

kyi bar du mi bya'o/ /'dis dus kyi khyad par yang bstan to/
/dbang po gnyis sbyor gyi 'khrig pa spangs te/ tshangs par spyod
pa spyad par bya zhing/ sdig pa'i las dang de'i rgyu 'dod pa'i
yul la chags pa rnams spang bar bya'o/ /de dag

spangs pa'i tshul khrims kyi sdom pa la dga' bas sangs rgyas
rnams kyi spyod pa dam pa la legs par rjes su bslab par bya'o/ !
/gnyis pa sems can don byed kyi tshul khrims khas len pa ni bdag
nyid myur

@033a @#/ /zhing rings pa'i tshul lam sems kyis ni byang chub thob
par mi spro bar/ sems can gcig gi don bya ba'i rgyu yis ni/ phyi
ma'i mu mtha' ni mtha' med pa nyid de/ 'khor ba ji srid bar gnas

par bgyi'o/ ! /gsum pa dge ba chos sdud kyi tshul khrims khas len
pa ni/ de ltar gnas nas ci byed snyam na/ grangs tshad med cing
yon tan bsam gyis mi khyab pa dang ldan pa'i sangs rgyas kyi
zhing dag

gi ngam grog dang tsher ma sogs skyon rnams rnam par sbyang bar
bya zhing/ 'gro ba rnams kyis bdag gi ming thos te/ bzung ba
dang/ mthong thos dran reg gis kyang sems can rnams la phan
gdags par 'dod pas

phyogs bcu thams cad kyi zhing dag tu bdag gi ming grags shing
rnam par 'dzin par gnas par byed pas sems can gyi 'jig rten yang
sbyang bar bya'o/ /de ltar na snga ma snod dang/ phyi ma bcud
sbyang ba'o/ /las dang

po pas nyes spyod sdom pa'i tshul khrims nyid la gces spras su
byed dgos pa'i phyir/ slar yang bzlos te ston pa ni/ bdag gi lus
dang ngag gi las rnam pa thams cad du ltung bas dag par bya
zhing yid kyi las

kyang ltung bas dag par bya ste/ mdor na sgo gsum gyi mi dge
ba'i las rnam pa thams cad byang chub kyi bar du nam yang mi
bya'o/ /kha cig 'di snga ma'i don bsdur 'chad do/ ! /gsum pa
sdom pa blangs nas bslab bya

@033b la slob par bstan pa la gsum/ tshul khrims kyi bslab pa la
slob tshul/ sems kyi bslab pa la slob tshul/ shes rab kyi bslab pa
la slob tshul lo/ /dang po la gnyis/ dngos dang/ de'i che ba'o/
/dang po ni/ gong du

lus ngag yid gsum dag dgos par bstan pa la/ 'o na dag byed kyi
rgyu gang zhe na/ de'i lan bstan pa'i phyir/ rang gi lus ngag
sems ni rnam dag rgyu/ /'jug sems bdag nyid sdom pa la gnas pas/
/tshul khrims

bslab pa gsum la legs bslabs na/ /tshul khrims bslab pa gsum la
gus cher 'gyur/ zhes gsungs so/ /'dis tshul khrims la bslabs pas/
de nyid la gus pa 'phel te tshul khrims rgyas 'gyur du

bstan/ gzhung phyi mas tshul khrims rgyas na rdzogs byang gi rgyu
tshogs myur du rdzogs par bstan gsung ngo/ /de yang bslab ces pa
bshad pa'i gzhi'o/ /gang la na/ tshul khrims kyi bslab pa gsum po
la'o/ /

gang gis ni/ 'jug pa'i sems kyi bdag nyid kyi sdom pa la gnas
pa'i byang sems des ? so/ /dgos pa ci'i phyir slob na/ byang
sems rang gi lus ngag sems gsum ni ltung bas rnam par dag cing
sems can

la mchog tu phan pa'i rgyur slob bo/ /ji ltar slob na/ legs par
te tshul dang mthun par slob bo/ /de ltar bslabs pas cir 'gyur
zhe na/ de gsum la 'bad pas legs par bslabs na/ goms stobs kyis
phyis nas

@034a @#/ /sngar bshad pa'i tshul khrims kyi bslab pa gsum la gces
spras su 'dzin pa'i gus pa je cher 'gyur ro/ /de la legs pa zhes
bya ba'i sgra ni/ dag pa dang/ phyir mi ldog pa dang/ yongs

su rdzogs pa gsum la 'jug pas/ sdom pa'i tshul khrims la bslabs
pas skyes bu gzugs legs pa bzhin du dag par 'gyur/ sems can don
byed kyi tshul khrims la bslabs pas ni/ rdzogs byang las

phyir mi ldog cing mi nyams pas rims nad yongs su byang ba bzhin
du 'gyur/ dge ba chos sdud kyi tshul khrims la bslabs pas ni/ bum
pa legs par gang ba bzhin du 'gyur ro/ /byang chub sems dpa'
sems

dpa' chen po zhes pa'i sgra don yang gsum po de las 'gyur ba yin
te/ sdom pa'i tshul khrims kyis skyon thams cad byang/ dge ba
chos sdud kyis yon tan mtha' dag chub/ sems can don byed kyis
sems

dpa' chen por 'gyur ba'i phyir/ zhes gsung ngo/ ! /gnyis pa che
ba ni/ de bas rnam dag rdzogs byang chub/ /sems pa'i sdom pa'i
sdom dag ni/ /'bad par byas pas rdzogs byang chub/ /tshogs ni
yongs su

rdzogs par 'gyur/ zhes gsungs/ tshul khrims gsum la bslabs pas
lus ngag yid gsum dag par 'gyur ba de bas na/ spang bya rnam par
dag cing gnyen po'i phyogs yongs su rdzogs pa ni 'bras bu

@034b byang chub yin la/ de nyid gzhan don du thob byar dmigs
pa'i byang chub sems dpa' rnams kyis sdom pa'i tshul khrims gtso
bor gyur pa'i tshul khrims gsum gyi sdom pa rnam par dag cing
bsrung ba la ni/ dran pa dang

shes bzhin dang gus pa chen pos nan tan gyis 'bad par byas pas
bla na med pa'i rdzogs pa'i byang chub kyi rgyu bsod nams dang
ye shes kyi tshogs gnyis ni yongs su rdzogs par 'gyur ba yin no/
! /gnyis

pa sems kyi bslab pa la slob tshul la gnyis/ mngon shes 'byung
ba'i rgyu'i phyir zhi gnas la bslab pa dang/ zhi gnas la ji ltar
bslab pa'i tshul dngos so/ /dang po ni/ bsod nams ye shes rang
bzhin gyi/ /

tshogs ni yongs su rdzogs pa yi/ /rgyu ni sangs rgyas thams cad
dag /mngon shes bskyed pa nyid du bzhed/ /ji ltar 'dab gshog ma
rdzogs pa'i/ /bya ni mkha' la 'phur mi nus/ /de bzhin mngon shes
stobs bral

bas/ /sems can don byed nus ma yin/ /mngon shes ldan pa'i nyin
mtshan gyi/ /bsod nams dag ni gang yin de/ /mngon shes dag dang
bral gyur la/ /skye ba brgyar yang yod ma yin/ /myur du rdzogs
pa'i byang chub

tshogs/ /yongs su rdzogs par 'dod gyur pa/ /des ni 'bad pas mngon
shes dag /'grub par 'gyur gyis le los min/ zhes gsungs/ tshigs
bcad dang pos/ rang don du tshogs gnyis rdzogs pa mngon shes la

@035a @#/ /rag las pa dang/ tshigs bcad gnyis pas gzhan don rnam
dag bsgrub pa mngon shes la rag las pa dang/ tshigs bcad gsum pas
bsod nams rgya chen po sdud pa mngon shes la rag las pa

dang/ tshigs bcad bzhi pas myur du 'tshang rgya ba'ang/ mngon shes
la rag las pas mngon shes bskyed dgos par bstan zhes sha ra ba
gsung/ 'o na/ tshogs ni yongs su rdzogs par 'gyur/ zhes bshad na/

tshogs gnyis gsog pa'i thabs bzang po gang zhe na/ bsod nams dang
ye shes kyi rang bzhin gyi tshogs gnyis po yongs su rdzogs pa'i
rgyu khyad par can ni/ dus gsum gyi sangs rgyas thams cad kyis/
mngon

par shes pa drug bskyed pa nyid du bzhed de/ rgyan du mngon shes
drug la gdams pa'i dgos pa grub cing/ de nyid man ngag tu mdzad
pa yin pa'i phyir te/ yum las/ rab 'byor dper na bya 'dab ma med
pas

ni nam mkha' la 'phur mi nus so/ /de bzhin du byang chub sems
dpas kyang mngon par shes pa la ma brten par sems can rnams la
chos bstan par mi nus te/ lam gol par zhugs pa'i sems can

rnams lam du gzung bar mi nus so/ /zhes pa'i don nye bar bzung
nas/ dpe ji ltar 'dab gshog ma skyes pa'i bya ni nam mkha' la
'phur bar mi nus pa de bzhin du mngon par shes pa'i stobs dang
bral bas skal

@035b pa dang 'tshams par sems can gyi don rgya chen po byed par
nus pa ma yin no/ /de yang rdzu 'phrul gyi mngon shes kyis/
sangs rgyas kyi zhing dang/ gdul bya gang na yod pa'i zhing du
'gro/ gzhan sems shes pas

khams dang bsam pa ji bzhin du rtogs/ lha'i rna bas de dag gi
skad rig /sngon gnas shes pas sngon gyi rgyu rtogs/ lha'i mig
gis ma 'ongs par cir 'gyur rig /zag zad kyis byang grol gyi lam
ston pas theg pa

gsum la 'dun pa dang/ smin pa dang grol bar byed pa yin no/
/mngon shes med ring sems can gyi don gzhan dngos su bya dka'
bas/ sems can gyi phan bde/ sangs rgyas kyi bstan pa/ dge 'dun
gyi sde/ de 'dul

ba 'dzin pa la rag las pas/ 'dul ba 'dzin pa ci yod bya gsung/
jo bos/ ston pa la khyod kyis dge 'dun gyi sde zhig gyis zhes
nan chen mdzad pa thugs la bzhag nas ra sgreng btab gsung ste/
be'u bum sngon

po las/ lha cig de gsung da ltar 'gro don/ /dngos su mi nus gong
gi dpe bzhin/ /ci nas byed 'dod sangs rgyas bstan pa/ /'jig rten
yun rings ci gnas bya ste/ /de yang dge 'dun sde la rag las/
/nus pa

yod na de nas thabs bya/ /nus med rab rgyud ji ltar khas blangs/
/sems can don du mi nyams bsrung zhing/ zhes gsungs pa'i phyir/
tshogs myur du rdzogs pa yang mngon shes la rag las te/ rten
byang sems mnyam

@036a @#/ /po la'ang mngon par shes pa dang ldan pa yis/ nyin
mtshan phrugs gcig la spyad pa'i bsod nams kyi tshogs dag bsags pa
gang yin pa de ni/ mngon par shes pa dag dang bral bar gyur

pa la skye ba brgyar yang yod pa min pa'i phyir/ 'dis ni/ ye
shes kyi tshogs kyang mtshon no/ /rgyu des na myur du sangs rgyas
ba'i rgyur mngon shes 'grub phyir brtson 'grus brtsam dgos te/
dus myur du rdzogs pa'i byang chub

kyi rgyu tshogs gnyis yongs su rdzogs par 'dod par gyur pa des ni
de'i thabs mngon shes bskyed dgos la/ de yang brtson 'grus shugs
drag gis/ de'i rgyu la 'bad pa cher byas pas mngon shes drug po
dag

'grub par 'gyur gyis/ le lo can gyis min pas brtson 'grus rtsom
dgos pa'i phyir ro/ /'o na/ des ni 'bad pas mngon shes dag /ces
bshad na/ gang la 'bad pas mngon shes 'grub ce na/ zhi gnas grub

pa ma yin pas/ /mngon shes 'byung bar mi 'gyur la/ /de phyir zhi
gnas bsgrub pa'i phyir/ /yang dang yang du 'bad par bya/ zhes
gsungs/ skyes stobs dang/ rdzas sngags la brten pa'i mngon shes
phra mo dang/

skye ba dran pa tsam la nges pa med kyang/ bsgoms stobs las
byung ba'i mngon shes khyad par can ni/ shin sbyangs rnam dag
gis zin pa'i zhi gnas grub pa ma yin pas/ mngon par shes pa rgya
chen po 'byung

@036b bar mi 'gyur la ste ma yin te/ dngos ma thob par mngon
shes min/ zhes dang/ bsam gtan bzhi pa shin tu dag thob nas/ /mi
rtog ye shes yongs su bzung ba dang/ /ji ltar rnam gnas yid la
byed pa las/ /

mthu grub pa yi dam pa thob par 'gyur/ zhes gsungs pa'i phyir/
rgyu mtshan de'i phyir/ zhi gnas bsgrub par bya ba'i phyir du/
sems gnas pa'i thabs dgu la yang dang yang du 'bad par byed dgos
te/ dpal

ldan dpa' bos/ rgyun mi 'chad pa'i rnal 'byor gyis/ /bsam gtan
sgrub la brtson par bya/ /yang dang yang zhing ngal bso ba/
/gtsubs pas me phyin mi 'gyur te/ /rnal 'byor tshul la'ang de
bzhin du/ /khyad par

ma thob btang mi bya/ zhes gsungs pa'i phyir/ ! /gnyis pa zhi
gnas la bslab tshul dngos la gsum/ zhi gnas kyi tshogs bsten pa/
zhi gnas ji ltar sgom pa'i tshul/ bsgoms pa'i phan yon

no/ /dang po ni/ yang dang yang du 'bad par bya/ zhes bshad na
brtson 'grus gcig pus zhi gnas 'grub pa ma zhe na/ zhi gnas kyi
tshogs bsten pa gal che bar bstan pa'i phyir/ zhi gnas yan lag
rnams

nyams pas/ /rab tu 'bad de bsgoms byas kyang/ /lo ni stong phrag
dag gis kyang/ /ting 'dzin 'grub par mi 'gyur ro/ /de phyir ting
'dzin tshogs le'u las/ /gsungs pa'i yan lag la legs gnas/ zhes
so/ /

@037a @#/ /ston pa'i zhal nas rang cag man ngag kho nas lan bar
ma 'dod pa/ tshogs la gnas pa med pas lan pa yin gsung/ pu bar ma
'dod pa/ tshogs la gnas pa med pas lan pa yin gsung/ pu to ba'i
zhal nas kyang/

rang cag ting nge 'dzin gyi tshogs la nan tan ma byas pas ting
nge 'dzin skyer ma btub pa la/ man ngag gis lan snyam zhing man
ngag kho na btsal bas tshangs par spyod pa phyag rgya ma bsten
pa'i man ngag dang 'phrad cing

'ong ba yin gsung/ des na zhi gnas kyi yan lag rgyu tshogs rnam
par nyams pas ni brtson 'grus drag pos rab tu 'bad de lo ni
stong phrag dag gi bar du bsgoms par byas kyang/ zhi gnas kyi
ting nge

'dzin 'grub par mi 'gyur ro/ /de ltar yan lag nyams na zhi gnas
mi 'grub pa de'i phyir/ yan lag rnams la legs par gnas shing
bsgrubs nas ting nge 'dzin bskyed par bya'o/ /'o na ting nge
'dzin

gyi tshogs kyi le'u las gsungs pa'i yan lag gang zhe na/ 'grel
par slob dpon byang chub bzang po'i ting nge 'dzin gyi tshogs kyi
le'u las gsungs pa'i/ spang bar bya ba dang/ sngon du 'gro ba
dang/ ldog par

bya ba dang/ gdung ba bcad pa dang/ yid 'byung bar bya ba dang/
yon tan rjes su dran pa dang/ brtson par bya ba dang/ zung du
'brel bar bya ba dang/ gnas pa'i thabs kyi yan lag ces bya ba
rnams la bzhed de/ lotstsha

@037b ba dge ba'i blo gros chos 'di sgyur mkhan dang/ jo bo rang
las dngos su gsan pa yin pas/ nyan sa'i de dang/ 'jig rten dbang
phyug gi sgrub thabs kyi mgo'i de dang/ byang chub bzang po'i de
dang/ mdo sde ting nge 'dzin gyi

tshogs kyi le'u la sogs pa thams cad yin par byas 'dug ces sha ra
ba gsung/ bdag gi rje thams cad mkhyen pa ni zhi lhag gi ting
nge 'dzin snying thag pa nas bsgrub par 'dod pa rnams kyis/ zhi
gnas kyi yan

lag gi tshogs nyan sa nas gsungs pa'i bcu gsum la sogs pa la 'bad
pa shin tu gal che'o/ /zhes gsungs shing/ de dang mthun par
zhang rom gyi zhal nas kyang/ bcu gsum po thams cad kyang dgos
mod

kyi/ gtso bo'i yan lag ni tshul khrims rnam par dag pa dang/ 'dod
pa chung ba dang/ chog shes pa dang/ dben par gnas pa bzhi cis
kyang dgos zhes gsung ngo/ ! /gnyis pa zhi gnas ji ltar sgom
pa'i

tshul ni/ dmigs pa gang rung gcig dag la/ /yid ni dge la gzhag
par bya/ zhes gsungs/ sngar bshad pa ltar zhi gnas kyi tshogs la
gnas pa des/ dmigs pa gang yang rung ba ni/ rde'u shing bu lta
bu ma yin gyi/

rgyal bas gsungs pa'i khyab pa'i dmigs pa dang/ dpyad pa rnam
sbyong gi dang/ mkhas pa'i dang/ nyon mongs rnam sbyong gi dmigs
pa bzhi po las gang yang rung ba'o/ /gcig dag la zhes pa ni/ de
dag las dang por

@038a @#/ /dmigs pa gcig kho na bzung ba'i dbang du byas pa ste/
dpa' bos/ dmigs pa gcig la brtan tshul du/ /yid kyi bsam pa brtan
par bya/ /dmigs pa mang po brgyud pa las/ /yid ni nyon mongs

'khrug par 'gyur/ zhes gsungs pa'i phyir/ de la sems 'dzin tshul
yang yod de/ bsgom bya'i dmigs pa gang yin pa de la sgom byed
kyi yid ni dge ba ste/ gzhan du mi g.yeng bar rtse gcig tu
gzhag par bya ba

yin pa'i phyir/ ! /gsum pa bsgoms pa'i phan yon ni/ rnal 'byor
zhi gnas grub gyur na/ /mngon shes dag kyang 'grub par 'gyur/
zhes gsungs/ sngar bshad pa ltar ting nge 'dzin la chu bo'i
rgyun bzhin

brtson pa'i rnal 'byor pas zhi gnas grub par gyur pa na/ de
sbyangs pa las mngon par shes pa rnams 'grub par 'gyur te/ don
gnyis la brtson par byed do/ /sha ra ba'i gsung bgros las/ mngon
shes su ma zad mi

rtog pa'i ye shes kyang skye bas dag kyang zhes gsungs so/ /zhes
'byung ba ni shin tu legs te/ jo bos/ mngon shes mthu dang ldan
bya dang/ /zag med lam ni bskyed pa'i phyir/ /dang por zhi gnas
bskyed par bya/ zhes

gsungs pa'i phyir ro/ ! /gsum pa shes rab kyi bslab pa la slob
pa'i tshul la gnyis/ thabs shes zung 'brel gyi 'thad pa bstan
pa'i sgo nas lhag mthong la bslab par bstan pa/ lhag mthong la
ji

@038b ltar bslab pa'i tshul lo/ /dang po la gsum/ lhag mthong
shes rab la slob dgos pa'i rgyu mtshan/ thabs shes zung 'brel la
slob dgos pa'i rgyu mtshan/ zung du 'brel ba'i lam dngos bshad
pa'o/ /dang po ni/

shes rab pha rol phyin sbyor dang/ /bral bas sgrib pa zad mi
'gyur/ /de phyir nyon mongs shes bya yi/ /sgrib pa ma lus spang
ba'i phyir/ /shes rab pha rol phyin rnal 'byor/ /rtag tu thabs
bcas bsgom par bya/ zhes gsungs

so/ /'o na zhi gnas dang/ des drangs pa'i mngon shes bskyed pa
tsam gyis chog gam snyam na/ slob dpon tsandra go mis/ bsam gtan
nags mes yang dang yang du ni/ /nyes pa'i tshang tshing mang po
bsregs byas kyang/ /bdag

lta'i rtsa ba brtan po ma phyung na/ /char gyis brlan bzhin mdun
nas rab tu bskyed/ ces gsungs pa ltar/ 'jig rten pa'i bsam gtan
gyis nyon mongs mngon 'gyur mnan yang/ de kho na nyid rtogs pa'i
shes

rab kyi pha rol tu phyin pa'i sbyor ba ste/ rnal 'byor dang bral
bas sgrib pa gnyis po gang gi'ang sa bon zad par mi 'gyur pa
de'i phyir/ chags sogs nyon mongs dang gnyis snang 'khrul pa'i
bag chags shes bya'i sgrib pa ma

lus pa spang ba'i phyir de nyid rtogs pa'i shes rab kyi pha rol
tu phyin pa sbyin sogs thabs dang bcas pa'i rnal 'byor dus rtag
tu bsgom par bya ste/ zhi ba lhas/ nyon mongs shes bya'i sgrib
pa yi/ /mun pa'i gnyen po stong pa nyid//

@039a @#/ /myur du thams cad mkhyen 'dod pas/ /de ni ci ste sgom
mi byed/ ces gsungs pa'i phyir/ de la rkang pa snga ma gnyis
kyis de kho na nyid rtogs pa'i shes rab dang bral na nyon mongs
ci yang spong mi

nus pas nyan rang la'ang/ stong nyid phra mo rtogs pa yod par
bstan/ rkang pa phyi ma bzhis theg pa che chung lta bas mi 'byed
pas/ theg pa chen pos bgrod pa rnams kyis thabs rgya chen pos
zin pa'i shes rab la slob

dgos par bstan to/ ! /gnyis pa thabs shes zung 'brel la slob
dgos pa'i rgyu mtshan ni/ rtag tu thabs bcas bsgom par bya/ zhes
gsungs na/ de'i rgyu mtshan ci yin zhe na/ de'i lan ston pa la/
thabs

dang bral ba'i shes rab dang/ /shes rab bral ba'i thabs kyis
kyang/ /gang phyir 'ching ba zhes gsungs pa/ /de bas gnyis ka
spang mi bya/ zhes gsungs te/ rdzogs byang don gnyer gyi gang
zag gis thabs shes

gnyis ka spang zhing dor bar mi bya bar zung 'brel la bslab dgos
te/ rgyu mtshan gang gi phyir na/ bcom ldan 'das kyis dri ma med
par grags pas bstan pa'i mdo las/ thabs dang bral ba'i shes rab
ni 'ching

ba'o/ /shes rab dang bral ba'i thabs ni 'ching ba'o/ /zhes
gsungs pa de bas na de'i phyir/ de ltar na gzhung 'dis/ nag
tsho'i lugs kyi dri ba lnga pa'i lan btab bo/ ! /gsum pa zung du
'brel ba'i lam nyid bshad

@039b pa la gnyis/ mdor bstan pa dang/ rgyas par bshad pa'o/
/dang po ni/ thabs shes zung 'brel du bsgom par bya na/ de so
so'i ngo bo gang zhe na/ de'i lan bstan pa'i phyir/ shes rab
gang dang thabs gang zhes/ /the tshom dag

ni spang ba'i phyir/ /thabs rnams dang ni shes rab kyi/ /yang
dag dbye ba gsal bar bya/ zhes gsungs te/ gsal bar bya zhes
bshad gzhir drang/ gang na thabs rnams dang shes rab kyi mtshan
nyid 'dres pa lta bur snang

ba de/ yang dag pa ste phyin ci ma log par so so'i dbye ba'am
khyad par ma 'dres pa nyid du'o/ /dgos pa gang gi don du na/
shes rab ni gang yin/ thabs ni gang yin zhes ma rtogs pa dang
log par rtog pa dang/ the tshom

du gyur pa dag ni spang ba'i phyir du'o/ /pu to ba'i zhal nas/
byang chub lam gyi sgron ma'i dbu zhabs kyi don la yi ge nyung
la gal che ba 'di na mar gyi 'di yin gsung skad/ ! /gnyis pa
rgyas par bshad pa la

gsum/ thabs ngos gzung ba/ de goms pa'i dgos pa/ shes rab ngos
gzung ba'o/ /dang po ni/ shes rab pha rol phyin spangs pa'i/
/sbyin pa'i pha rol phyin la sogs/ /rgyal ba rnams kyis thabs su
bshad/

ces gsungs/ 'dir thabs ji ltar yin pa yang gzhag tu yod de/ shes
rab kyi pha rol tu phyin pa spangs pa ste/ logs su bkar nas shes
rab las gzhan byang chub kyi sems kyis zin pa'i sbyin pa'i pha
rol tu phyin pa

@040a @#/ /dang/ la sogs pa ste/ phar phyin lhag ma bzhi la sogs
pa dkar po dge ba'i chos rnams thams cad dus gsum gyi rgyal ba
rnams kyis thabs su bshad pa'i phyir/ ! /gnyis pa ni/ thabs goms

dbang gis bdag nyid kyis/ /gang zhig shes rab rnam bsgoms pa/
/des ni byang chub myur du thob/ /bdag med gcig pu bsgoms pas
min/ zhes gsungs te/ mi rtag pa dang las 'bras nas brtsams te
sbyin pa la sogs

pa'i thabs rnams goms pa brtan par byas pa'i dbang gis byang
sems bdag nyid kyis phyi nang gi dngos po gang yang rung ba zhig
la dmigs nas mtshan mar 'dzin pa'i dmigs gtad gcod pa'i shes rab
rnam

par bsgoms pa de ni sgrib pa spong ba'i nus pa shin tu che bas
bla na med pa'i byang chub myur du thob kyis thabs khyad du bsad
nas bdag med gcig pu bsgoms pas ni bla med byang chub 'grub nus
pa ma yin te/ nyi

tshe ba las nyi tshe dang/ /mtha' dag ba las mtha' dag pa'i/
/'bras bu 'grub par gsungs pa'i phyir/ /shes ldan su zhig phyogs
res tshim/ zhes 'byung ba ltar yin pa'i phyir/ ! /gsum pa shes
rab ngos

gzung ba ni/ phung po khams dang skye mched rnams/ /skye ba med
par rtogs gyur pa'i/ /rang bzhin stong nyid shes pa ni/ /shes
rab ces ni yongs su bshad/ ces gsungs te/ rkang pa dang pos shes
rab kyi dmigs

@040b pa dang/ rkang pa gnyis pas rnam pa bstan la/ tha ma gnyis
kyis shes rab ngos gzung ba'o/ /phung po lnga dang/ khams bco
brgyad dang/ skye mched bcu gnyis te/ chos sum cu rtsa lnga po
de rnams ni chos can nam dmigs pa'o//

de rnams kyi steng du nges bya'i chos sam rnam pa ni/ rang bzhin
gyis skye ba med par rtogs shing shes par bya ba yin te/ 'khor
bar 'khyams pa'i rgyu'i gtso bo ni ji ltar snang ba'i dngos po
'di dag la/ bden par zhen pa nyid yin la/

bden par zhen pa rnams las kyang rang bzhin gyis skye bar 'dzin
pa nyid dngos 'dzin gzhan gyi rten yin pas de ldog dgos/ de la
rang bzhin gyis skye ba med par rtogs dgos pa'i phyir/ de ltar
skye ba med par rtogs par

gyur pas chos thams cad rang bzhin gyis stong pa nyid du shes pa
ni/ thabs shes gnyis kyi nang nas shes rab ces ni yongs su bshad
la/ shes rab kyi bslab pa'i gtso bo yang de yin no/ /sha ra ba'i
zhal nas kyang/ rig

pas dpyad pas cir yang ma grub par rtogs ce na/ sngar yod pa cig
med de song snyam du sgom pa min gyi/ gzod ma nas stong pa yin
pas rang bzhin gyis med pa la/ rang bzhin gyis med par rtogs pa
yin zhes/ rang

bzhin stong nyid shes pa ni/ zhes pa'i don yin gsung ste shin tu
legs so/ /de ltar theg pa chen po'i lam gyi rang bzhin ni rgyan
las/ shes pas srid la mi gnas shing/ /snying rjes zhi la mi gnas
dang/ zhes pa

@041a @#/ /dang/ rgyud bla ma las kyang/ bdag sred ma lus shes
rab kyis bcad de/ zhes sogs gsungs pa ltar thabs dang shes rab
gnyis yin la/ de gnyis kyi grangs nges/ go rims/ ngo bo gsum/

lam gyi sgron mas gsal bar bstan to/ /ji ltar na/ shes bya chos
can/ theg pa chen po'i lam la thabs dang shes rab gnyis su
grangs nges te/ de la de gnyis su dbyer yod/ de la de gnyis las
grangs mang mi

dgos shing/ nyung na mi 'du ba yin pa'i phyir/ dang po ni/ de
phyir nyon mongs shes bya yi/ zhes sogs sho lo ka gcig gis bstan
te/ gzhung 'dis/ thabs dang shes rab gnyis yun ring du goms pas
sgrib gnyis

'joms nus su bstan pa'i phyir/ rtags gnyis pa ni/ thabs dang
bral ba'i shes rab dang/ zhes pa sho lo ka gcig gis bstan te/
thabs shes ya bral gyis sa dang po tsam yang mi thob pa'i phyir/
go rims nges

pa ni/ thabs goms dbang gis bdag nyid kyis/ zhes pa/ sho lo ka
gcig gis bstan te/ thabs goms sngon du btang nas shes rab sgom
par gsungs shing/ don 'di ni phar phyin drug la slob pa'i go
rims

kyis kyang grub cing/ spyod 'jug las kyang/ yan lag 'di dag
thams cad ni/ /thub pas shes rab don du gsungs/ zhes gsungs pa'i
dgongs pa'ang yin no/ /'on kyang yang dag shes 'tshol sngon btang

@041b nas/ zhes sogs dmigs bsal 'ga' zhig ni mchis so/ /ngo bo
nges pa ni/ shes rab pha rol phyin spangs pa'i/ zhes sogs dang/
phung po khams dang skye mched rnams/ zhes sogs tshigs bcad snga
phyi gnyis kyis

bstan/ de gnyis ji ltar nyams su blang snyam na/ dpal ldan gros
lam mchog tu/ thabs dang shes rab gnyis po de yang/ /goms pa lta
bur dang por res 'jog /bya gshog lta bur brten nas zung 'jug /de
la goms

par gyur na 'tshang rgya/ zhes bshad pa ltar slob bo/ ! /gnyis pa
lhag mthong la ji ltar slob pa'i tshul la gnyis/ rgyas bshad
dang/ mjug bsdu ba'o/ /dang po la gsum/ lhag mthong gi tshogs
bstan pa/ lhag

mthong sgom pa'i tshul/ bsgoms pa'i 'bras bu'o/ /dang po ni/ sgom
rim bar pa las/ lhag mthong gi tshogs gang zhe na/ skyes bu dam
pa la brten pa dang/ mang du thos pa yongs su btsal ba dang/
tshul bzhin sems

pa'o/ /zhes lhag mthong gi tshogs gsum gsungs la/ mdo sde dgongs
'grel las lhag mthong ni thos pa dang bsam pa las byung ba'i lta
ba rnam par dag pa'i rgyu las byung ba yin no/ /zhes gnyis su
bsdus nas

gsungs so/ /de bzhin du 'dir yang lhag mthong gi tshogs bsten pa
la gnyis/ rig pa la brten pa bsam byung gi shes rab dang/ lung
la brten pa thos byung gi shes rab bo/ /dang po la gsum/ 'bras
bu la dpyod

@042a @#/ /pa yod med skye 'gog gi gtan tshigs/ rgyu la dpyod pa
rdo rje gzegs ma'i gtan tshigs/ ngo bo la dpyod pa gcig du bral
gyi gtan tshigs so/ /dang po ni/ yod pa skye bar rigs min te/
/med

pa'ang nam mkha'i me tog bzhin/ /nyes pa gnyis kar thal 'gyur
phyir/ /gnyis ka dag kyang 'byung ba min/ zhes so/ /gong du rang
bzhin gyis skye ba med par rtogs pa'i blo shes rab tu bstan pa
la/ dngos smra

ba rnams na re/ de mi 'thad de/ dngos po rnams rang bzhin gyis
skye ba dang 'jig pa mngon sum du grub pa'i phyir/ zhe na/ 'o
na/ myu gu rang bzhin gyis skye na/ rgyu'i dus na yod pa'am/ med
pa'am/ gnyis ka'am/

gnyis ka ma yin pa zhig rang bzhin gyis skye bar brtag grang/
dang po ltar na/ myu gu chos can/ rgyu'i dus su yod pa skye ba
rigs pa ma yin te/ yod pa grub zin pas skye ba dgos pa med pa'i
phyir dang/ grub zin

slar yang skye na skye ba thug med du 'gyur ba'i phyir/ gnyis pa
ltar na/ rgyu'i dus su med pa'ang rang bzhin gyis skye ba rigs
pa ma yin te/ bye ba brgya phrag rgyu yis kyang/ /dngos po med
pa sgyur du med/ ces gsungs pa

ltar rgyu nus pa ji ltar che yang/ rang bzhin gyis grub pa'i myu
gu bskyed mi nus pa'i phyir/ dper na nam mkha'i me tog bzhin no/
/rgyu'i dus su med na/ spyir med mi dgos kyang/ rang bzhin gyis
grub pa zhig rgyu'i

@042b dus su med na rnam pa thams cad du med dgos te/ sngon
byung da lta med ces pa/ /des na chad par thal bar 'gyur/ zhes
pas bstan pa'i rigs pa'o/ ! /gsum pa ni/ rgyu'i dus su yod pa
dang med pa gnyis ka dag

kyang/ rang bzhin gyis 'byung ba rigs pa ma yin te/ de la ni
sngar bshad pa'i nyes pa gnyis kar thal bar 'gyur ba'i phyir ro/
/bzhi pa ltar na yang mi 'thad de/ rgyu'i dus su yod pa'ang ma
yin med pa'ang ma yin pa'i

dngos po de 'dra mi srid pa'i phyir/ de ltar na myu gu chos can/
rang bzhin gyis skye ba med de/ yod pa dang med pa dang/ gnyis
ka dang/ gnyis ka ma yin pa rang bzhin gyis mi skye ba'i phyir/
zhes pas shes rab kyi yul

skye med rigs pas sgrub pa yin te/ lang gshegs las/ blo gros
chen po rang gi sems snang ba'i dngos po med pa dang/ yod pa
dang/ med pa las skye ba med pa'i phyir/ dngos po thams cad ni
ma skyes pa ste/ zhes pa dang/

stong nyid bdun cu pa las kyang/ /yod pa yod phyir skye ma yin/
/med pa med phyir skye ma yin/ /chos mi mthun phyir gnyis chos
min/ /skye ba med phyir gnas 'gag med/ ces pa dang/ 'jug pa las
kyang/ yod na skye byed

ci dgos med la'ang des ni ci zhig bya/ /gnyis nyid la des ci bya
gnyis dang bral la'ang des ci bya/ zhes 'byung ba ltar mdo dang
bstan bcos rnams na rigs pa 'di shin tu mang ngo/ ! /gnyis pa
ni/ dngos po

@043a @#/ /rang las mi skye zhing/ /gzhan dang gnyis ka las kyang
min/ /rgyu med las min de yi phyir/ /ngo bo nyid kyis rang bzhin
med/ ces gsungs te/ 'di ni rtsa ba shes rab las/ bdag las ma yin
gzhan

las min/ /gnyis las ma yin rgyu med min/ /dngos po gang dang
gang na yang/ /skye ba nam yang yod ma yin/ zhes pa dang/ zla
ba'i zhabs kyis/ de nyid de las 'byung min gzhan dag las lta ga
la zhig /zhes sogs

rtsa 'grel gyis bstan pa'i don snying por dril ba yin no/ /'on
kyang 'di dag gi don 'chad pa na/ 'jug pa'i rang 'grel du/ 'dir
ma yin zhes bya ba ni yod pa nyid kyi sgrub byed rang las skye
ba dang sbrel gyi yod pa dang

ni ma yin te/ de dgag pa don gyis 'grub pa'i phyir/ zhes phyed
snga mas gtan tshig dang/ phyed phyi mas dam bca' bstan pa lta
bur mi sbyor bar bzhi gas mtha' bzhi'i skye ba 'gog pa'i dam
bca' tsam zhig yongs su bstan/

mtha' bzhi'i skye ba rigs pas khegs pa na/ rang bzhin gyis skye
ba med pa don gyis 'grub par bstan pas/ rdo rje gzegs ma'i gtan
tshigs kyang don gyis bstan pa 'grel pa'i dgongs pa yin kyang/
'dir ni/ gang gi

phyir na bdag dang gzhan dang gnyis ka las skye dang/ /rgyu la
ma ltos yod pa min pas dngos rnams rang bzhin bral/ zhes pas
gtan tshigs dngos su bstan pa ltar/ 'dir yang rkang pa phyi mas
dam bca' dang/

@043b dngos po zhes pas chos can dang/ gzhung lhag mas gtan
tshigs bstan pa yin no/ /de ltar na/ phyi nang gi dngos po rnams
chos can/ rang las mi skye ste/ de ltar skye na skye ba don med
dang/ thug med du 'gyur ba'i phyir/

gzhan yang/ rgyu dang 'bras bu gcig nyid ni/ /bskyed bya skyed
byed gcig tu 'gyur/ zhes pa'i gnod byed kyang 'jug pa'i phyir
ro/ /ngo bo nyid kyis gzhan las kyang mi skye ste/ ngo bo nyid
kyis gzhan yin na/ phan gdags

bya 'dogs byed 'brel med du 'gyur/ de ltar na thams cad las
thams cad skye bar 'gyur ba'i phyir dang/ rgyu dang 'bras bu
gzhan nyid na/ /rgyu dang rgyu min mtshungs par 'gyur/ zhes pa'i
rigs pas gnod pa'i phyir/

'di ni gcig du bral gyi rigs pa'i snying po can yang yin te/
bdag skye 'gog pas rang bzhin gyi gcig dang/ gzhan skye 'gog pas
rang bzhin gyi tha dad yin pa 'gog pa'i phyir/ bdag gzhan gnyis
ka las kyang skye ba

ma yin te/ bdag gzhan re re ba las skye ba khegs pa'i phyir/
rgyu med las kyang skye ba ma yin te/ de ltar na 'jig rten pa
rnams 'bras bu ston thog 'byung phyir zhing las la 'bad pa'ang
dgos pa med pa'i phyir dang/ rgyu

med gzhan la mi ltos phyir/ /rtag tu yod pa'am med par 'gyur/
zhes pa'i gnod byed thog tu 'bab pa'i phyir/ de ltar mtha' bzhi
las skye ba mi 'thad pa de'i phyir/ dngos po rnams ngo bo nyid
kyis rang bzhin med do/ ! /

@044a @#/ /gsum pa ni/ yang na chos rnams thams cad dag /gcig
dang du mas rnam dpyad na/ /ngo bo nyid ni mi dmigs pas/ /rang
bzhin med pa nyid du nges/ zhes pa'o/ /'di ni lang gshegs las/
ji

ltar me long las ni gzugs/ /gcig dang gzhan pa nyid spangs pa/
zhes sogs dang/ dbu ma rtsa ba'i mchod brjod du/ tha dad don min
don gcig min/ zhes pa dang/ dbu ma rgyan las/ bdag dang gzhan
smra'i dngos

'di dag /yang dag tu ni gcig pa dang/ /du ma'i rang bzhin bral
ba'i phyir/ /rang bzhin med de gzugs brnyan bzhin/ zhes pa rnams
kyis bstan pa'i rigs pa bkod pa'o/ /rigs pa'i rnam grangs gzhan
bstan

pa'i phyir/ sngar bshad pa las yang na phyi nang gi dngos po
rnams thams cad dag ni chos can/ rang bzhin gyis med pa nyid du
nges te/ rang bzhin gyis grub pa'i gcig dang/ de ltar grub pa'i
du ma gang du

grub ces rnam par dpyad na/ yul steng nas grub pa'i ngo bo nyid
ni rdul tsam yang mi dmigs pas te mi dmigs pa'i phyir/ dper na
me long nang gi gzugs brnyan bzhin no/ /phyogs chos sgrub pa ni/
de chos

can/ rang bzhin gyis grub pa'i gcig tu med de/ cha bcas yin pa'i
phyir/ de chos can/ de ltar grub pa'i du mar med de/ de ltar
grub pa'i gcig rigs pas khegs pa'i phyir/ khyab sgrub ni/ rang
bzhin

@044b gyis grub na/ de ltar grub pa'i gcig dang/ de ltar grub
pa'i du ma gang rung du grub pas khyab ste/ gcig dang du ma
dngos 'gal min pas/ yod na gcig dang du ma gang rung du yod dgos
pa'i phyir te/ dbu ma rgyan las/

gcig dang du ma ma gtogs par/ /rnam pa gzhan dang ldan pa yi/
/dngos po mi rung 'di gnyis na/ /phan tshun spangs te gnas phyir
ro/ /zhes gsungs pa'i phyir ro/ ! /gnyis pa lung la brten pa
thos byung gi shes

rab ni/ stong nyid bdun cu'i rigs pa dang/ /dbu ma rtsa ba sogs
las kyang/ /dngos po rnams kyi rang bzhin ni/ /stong pa nyid du
grub bshad pa/ /gang phyir gzhung ni mangs 'gyur bas/ /de phyir
'dir ni ma spros la/ /grub pa'i grub

mtha' tsam zhig tu/ /bsgom pa'i don du rab tu bshad/ ces gsungs
te/ rkang pa dang po bzhis stong nyid nges don gyi lung rgya
chen po las shes dgos pa dang/ rkang pa phyi ma bzhis 'dir
gzhung nyung du 'god pa'i rgyu

mtshan bstan to/ /des na blo gros dang ldan pa rnams kyis stong
nyid zab mo la nges pa yang dag par dang ba'i phyir/ stong nyid
nges don gyi lung gis bsgrub pa mdo kun las btus pa dang/ rigs
pas bsgrub pa stong nyid bdun

cu pa'i gzhung las 'byung ba'i rigs pa dang/ stong nyid zab mo
rigs pa'i rnam grangs mtha' yas pa'i sgo nas gtan la 'bebs pa
dbu ma rtsa ba dang/ sogs pa rigs tshogs lhag ma rnams dang/
'phags pa lha dang legs

@045a @#/ /ldan gyi gzhung rnams dang/ lhag par 'phags pa'i
dgongs pa 'grel ba'i mchog sangs rgyas bskyangs dang/ zla ba'i
zhabs dang/ zhi ba lha'i gzhung rnams dang/ mdor na rgyal ba'i
yum

sogs mdo sde zab mo dag gis dngos po rnams gdod ma nas rang
bzhin gyis stong pa nyid du grub par bshad pa la/ rgya cher blta
bar bya zhing/ lta ba'i phu thag chod par bya'o/ /'o na lung
dang rigs pa rgya chen po de dag

'dir mi 'god pa ci zhe na/ rgyu mtshan yod de/ gang gi phyir 'dir
de dag bkod na gzhung ni mangs par 'gyur bas/ rgyu mtshan de'i
phyir/ 'dir ni de dag ma spros la/ cung zad bstan pa ni lung
rigs kyis grub pa'i grub mtha' tsam

zhig /bdag med pa bsgom pa'i don du rab tu bshad pa yin pa'i
phyir/ stong nyid bdun cu'i rigs pa dang/ zhes pa'i rang 'grel
las kyang/ 'dis ni rten cing 'brel par 'byung ba'i gtan tshigs
bstan te/ zhes pa dang/ snying

po nges par bsdu ba las kyang/ rten cing 'brel 'byung la sogs
pa'i/ /rigs pa gang la goms pa yis/ /dngos por 'dzin pa'i gdon
chen po/ /ma lus par ni ldog par bya/ zhes dang/ be'u bum sngon
po las kyang/

rtag dang chad sogs lta ngan sel ba/ /rten cing 'brel 'byung
bsgoms pas yin te/ zhes rigs pa'i rgyal po rten 'brel la bsngags
shing bstan to/ /de ltar na gang zag dang phung po chos can/
rang bzhin gyis med

@045b de/ rten cing 'brel par 'byung ba yin pa'i phyir/ don 'di
ni ma dros pas zhus pa las/ gang zhig rkyen las skyes pa de ma
skyes/ /de la skye ba'i rang bzhin yod ma yin/ /rkyen la rag las
gang de stong par bshad/ /gang zhig stong

nyid shes te bag yod yin/ zhes pa dang/ gang rnams rten cing
'brel bar 'byung/ /de rnams ngo bo cung zad med/ ces pa dang/
dbu ma las kyang/ rten cing 'byung ba gang yin pa/ /de ni ngo bo
nyid kyi zhi/ zhes dang/ gang la

brten te gang 'byung ba/ zhes sogs kyis bstan to/ ! /gnyis pa
lhag mthong sgom tshul ni/ de bas chos rnams ma lus pa'i/ /rang
bzhin dag ni mi dmigs pas/ /bdag med pa ni sgom gang nyid/ /de
nyid shes rab sgom

pa yin/ zhes gsungs so/ /phung khams skye mched kyis bsdus pa'i
chos thams cad bden med du gtan la phab pa de bas na/ gang zag
dang/ phung sogs chos rnams ma lus pa'i thun mong ma yin pa'i
rang bzhin dag ni

yod na/ rig pas btsal ba'i tshe rnyed dgos pa las rdul tsam yang
mi dmigs pas na/ gang zag dang chos la ngo bos grub pa'i bdag
med pa nyid do/ /ces rig pas dpyad cing bsgom pa de nyid shes
rab kyi pha rol tu phyin pa

bsgom pa yin te/ sgom rim par pa las shes rab kyis dngos po
mtha' dag gi ngo bo nyid la so sor brtags nas gang gi phyir/ mi
dmigs par bsam gtan byed pa de'i phyir/ shes rab mchog gi bsam
gtan pa/ zhes

@046a @#/ /bya ste; zhes gsungs pa'i phyir/ 'o na/ de ltar rtogs
mkhan gyi shes rab de nyid la 'dzin pa ji ltar spong zhe na/
de'i lan bstan pa'i phyir/ shes rab kyis ni chos rnams kun/
/gang

gi rang bzhin ma mthong bzhin/ /shes rab de nyid rig dpyad pa/
/rnam rtog med par de bsgom bya/ zhes so/ /so sor rtog pa'i shes
rab kyis ni gang zag dang chos rnams kun gyi gang gi yang rang
bzhin

btsal bas ma mthong ba bzhin du/ shes rab de nyid kyang rig pas
dpyad pa na rang bzhin gyis med de/ bden pa'i gcig dang bden
pa'i du ma dang bral ba'i phyir ro/ /de ltar rig pas rnam par
dpyad de/ yul yul can skye med

du rtags pa gang yin pa de nyid rnam par rtog pa med par te/
rnam par mi rtog pa'i ye shes kyi rgyar nges par bsgom par bya
ba yin te/ ting nge 'dzin rgyal po las/ gal te chos la bdag med
so sor brtags/ /so sor de brtags

gal te sgom byed pa/ /de ni mya ngan 'das thob 'bras bu'i rgyu/
zhes gsungs pa'i phyir/ ! /gsum pa lhag mthong bsgoms pa'i 'bras
bu la gnyis/ dngos kyi don dang/ de nyid lung gis bsgrub pa'o/
/dang po ni/ rnam

rtog las byung srid pa 'di/ /rnam par rtog pa'i bdag nyid de/
/de phyir ma lus rtog spangs pa/ /mya ngan 'das pa mchog yin no/
/zhes gsungs/ shar ba'i zhal nas/ gzhung 'dis lhag mthong bsgoms
pas srid

@046b pa'i rtsa ba drung nas phyung ba'i phan yon bstan pa yin
te/ de yang rnam rtog las byung zhes pas/ kun 'byung spang bya
dang/ srid pa ni/ rnam par rtog pa'i bdag nyid de/ zhes pas/
sdug bsngal shes byar bstan/ rkang pa gsum pas lam

bsten par bya ba dang/ bzhi pas/ 'gog pa thob byar bstan/ zhes
gsungs pa'i dgongs pa ltar byas na/ kun 'byung las dang nyon
mongs pa 'di chos can/ thar 'dod kyis spang bar bya ba yin
zhing/ spong nus pa yang

yin te/ dngos po bden par 'dzin pa'i rnam rtog ma rig pa las
byung ba yin pa'i phyir te/ stong nyid bdun cu pa las/ rgyu dang
rkyen las skyes dngos rnams/ /yang dag par ni rtogs pa gang/ /de
ni ston pas ma rig gsungs//

de las yan lag bcu gnyis 'byung/ zhes gsungs pa'i phyir/ srid pa
khams gsum gyi 'khor ba 'di chos can/ thar pa don gnyer rnams
kyis bden med du shes par bya ba yin te/ rnam par rtog pas sgro
btags

pa'i bdag nyid can yin pa'i phyir te/ sna tshogs yid dga' me tog
kha bye zhing/ /gser gyi khang mchog 'bar ba yid 'ong ba/ /'di
na de la'ang byed po 'ga' med de/ /de dag rtog pa'i dbang gis
bzhag pa yin/ /rtog pa'i

dbang gis 'jig rten rnam brtags te/ zhes gsungs pa'i phyir/ bdag
med pa'i don la so sor rtog pa'i shes rab chos can/ thar 'dod
rnams kyis bstan par bya ba yin te/ dngos por 'dzin pa'i rtog pa
ma lus pa rtsa ba

@047a @#/ /nas spangs pa ni thar pa yin la/ khyod dngos 'dzin de
dngos su 'joms byed yin pa de'i phyir/ rnam par rtog pa ma lus
par spangs pa'i 'gog pa chos can/ thar pa don gnyer rnams kyis
mngon

du bya ba yin te/ mya ngan las 'das pa mchog gam chen po yin
pa'i phyir/ dbu ma las/ ma rig 'gag par 'gyur ba ni/ /shes pas
de nyid bsgoms pas so/ /zhes dang/ brgya pa las kyang/ yul la
bdag med

mthong na ni/ /srid pa'i sa bon 'gag par 'gyur/ zhes dang/ 'jug
pa las kyang/ de'i phyir bdag dang bdag gis stong blta ba/ /rnal
'byor pa de rnam par grol bar 'gyur/ zhes gsungs pa'i phyir/
mdor na

srid pa 'khor ba 'di thams cad bden 'dzin gyi rnam rtog las
byung bas de'i rtsa ba can dang/ rnam par rtog pas rnam par
bzhag pa'i bdag nyid de/ de'i phyir rtsa ba rnam par rtog pa bag
chags dang bcas pa ma lus

par spangs pa ni/ thar pa'i mchog mi gnas pa'i mya ngan las 'das
pa thob pa rang gzhan gyi don thams cad 'grub pa yin no/ !
/gnyis pa de nyid lung gis bsgrub pa ni/ de ltar yang bcom ldan
'das

kyis; rnam rtog ma rig chen po ste/ /'khor ba'i rgya mtshor ltung
bar byed/ /rtog med ting 'dzin la gnas na/ /nam mkha' bzhin du
rtog med gsal/ zhes gsungs so/ /rnam par mi rtog pa la 'jug pa'i

@047b gzungs las kyang/ dam chos 'di la rgyal ba'i sras/ /rnam
par mi rtog bsams gyur na/ /rnam rtog bgrod dka' rnams 'das te/
/rim gyis mi rtog thob par 'gyur/ zhes gsungs so/ /zhes mdo
rgyud gnyis kyi lung

gis bsgrub par mdzad do/ /'o na 'khor ba rnam rtog las byung ba
dang/ bdag med bsgoms pas rnam rtog sa bon dang bcas pa spong
nus pa'i khungs ji ltar zhe na/ sngar bshad pa de ltar bcom ldan
'das kyis sambu Ta'i

rgyud las/ shes bya chos can/ dngos por 'dzin pa'i rnam par rtog
pa 'di ni srid pa'i rtsa bar gyur pa'i ma rig pa chen po yin te/
'khor ba'i rgya mtsho gting mtha' med par ltung bar byed pa po
yin pa'i phyir/

byed pa po la chen po'i sgra 'jug pa yang yin te/ 'chi med mdzod
las/ chen po mchog dang tshad med dang/ /mkhas brtson spro ba'i
las bdag nyid/ /mchog tu rmad byung byed pa po/ /chen po zhes ni
bshad pa

yin; zhes bshad pa'i phyir/ de ltar rnam rtog las byung srid pa
ni/ zhes pa rkang pa gnyis kyi don lung gis bsgrubs nas/ de
phyir ma lus rtog spangs pa/ zhes pa phyi ma gnyis lung gis
bsgrub pa ni/

bden 'dzin gyi rnam rtog gi gnyen por/ bdag med pa'i don rig pas
dpyad de/ nges pa rnyed pa'i tshe dpyad mthar rtog pa med pa ste
rnam par mi rtog pa'i ting nge 'dzin la gnas shing goms par byas
pas/ goms

@048a @#/ /pa rab kyi mthar phyin pa na/ ston dus kyi sprin dang
bral ba'i nam mkha' bzhin du rtog pa med pa'i sems kyi chos nyid
gsal bar mngon sum du mthong ste/ gnyis snang gi rtog pa bag

chags dang bcas pa 'joms par byed do/ /zhes kha sbyor gyi rgyud
las gsungs pa'i phyir/ 'di ni rigs pa'i dbang phyug gis/ de
phyir yang dag yang dag min/ zhes sogs gsungs pa'i rigs pa dang
mtshungs

so; ;zab mo stong pa nyid la rtse gcig tu mnyam par bzhag na/
rnam rtog gi spros pa ldog pa'i khungs gzhan yang rnam par mi
rtog pa la 'jug pa'i gzungs las kyang/ don 'di bka' stsal to/
/ji ltar zhe na/

'di ltar gsungs te/ theg pa chen po'i dam pa'i chos zab mo 'di
la thos bsam gyi shes rab sngon du 'gro ba'i rgyal ba'i sras
pos/ mtshan mar 'dzin pa'i yid la byed pa'i 'gal ba mi mthun
phyogs/ rnam par

mi rtog pa bsams shing bsgoms par gyur na/ mtshan ma la spyod
pa'i rnam par rtog pa'i dra ba bgrod par dka' ba las rnam par
'das te/ rim gyis rnam par mi rtog pa'i ye shes thob par 'gyur
ro/ /

zhes gsungs pa'i phyir/ ! /gnyis pa mjug bsdu ba ni/ lung dang
rigs pa dag gis ni/ /chos rnams thams cad skye med pa'i/ /rang
bzhin med par nges byas nas/ /rnam par rtog med bsgom par bya/
zhes

@048b gsungs/ nges don gyi lung dang dri ma med pa'i rigs pa'i
tshogs dag gis ni/ gang zag dang phung po sogs kyis bsdus pa'i
chos rnams thams cad bden pa'i skye ba'am skye ba'i rang bzhin
med par nges shing sgro 'dogs

chod par byas nas yin lugs kyi don la mtshan ma'i rnam par rtog
pa med par rtse gcig tu bsgom par bya ste/ thos pa'i rjes 'jug
sgrub pa snying por bya/ /skye ba'i rdzong las tshegs chung thar
bar 'gyur/ zhes gsungs pa'i phyir ro/

! /gnyis pa 'bras bu'i chos bshad pa ni/ de ltar de nyid bsgom
byas na/ /rim gyis drod sogs thob byas nas/ /rab dga' la sogs
thob 'gyur te/ /sangs rgyas byang chub yun mi ring/ zhes gsungs/
de ltar skyabs

'gro thun mong ba nas bzung ste/ skyes bu chung 'bring gi lam la
blo sbyangs/ smon 'jug gi sems gnyis bskyed de/ thabs rgya chen
pos zin pa'i sgo nas/ zhi gnas dang/ lhag mthong gis de kho na
nyid bsgoms par byas

na ste byas pa la dgos pa yod de/ tshogs lam chung 'bring chen po
legs par bgrod de/ rim gyis drod la sogs pa nges par 'byed pa'i
cha dang mthun pa bzhi thob par byas nas/ 'jig rten las 'das
pa'i ye shes

kyis; dang po sa rab tu dga' ba dang/ la sogs pas bsdus pa sa
gnyis pa nas/ bcu pa'i rdo rje lta bu'i ting nge 'dzin gyi bar
gyi gnas skabs kyi 'bras bu thob par 'gyur la/ de las mthar thug
gi 'bras bu sangs

@049a @#/ /rgyas kyi byang chub chen po sku gsum ye shes lnga
ldan gyi go 'phang yang yun mi ring bar myur du thob nas skal ba
dang ldan pa'i 'gro ba mtha' yas pa smin cing grol bar byed pa'i
'phrin las

lhun gyis grub pa dang/ rgyun mi 'chad pa 'khor ba ji srid du
'byung ba yin pa'i phyir te/ de bzhin 'khor ba ji srid bar/ /las
ni rgyun mi 'chad par 'dod/ ces gsungs pa'i phyir ro/ ! /gnyis
pa sngags la

'jug pa'i tshul phyogs tsam bstan pa la gsum/ rdo rje theg pa la
'jug pas dbang thob dgos par bstan pa/ rten gyi khyad par gyis
dbang gong ma gnyis byar rung ba dang mi rung ba'i tshul/ dbang
gong ma gnyis

ma thob na rgyud nyan bshad sogs byar rung mi rung dpyad pa'o/
/dang po la gsum/ rten gyi gang zag dang/ de la smin byed kyi
dbang bskur ba dang/ dbang bskur ba'i che ba bstan pa'o/ /dang
po ni/ sngags mthu nyid

las grub pa yi/ /zhi dang rgyas sogs las rnams kyis/ /bum pa
bzang grub la sogs pa/ /grub chen brgyad sogs stobs kyis kyang/
/bde ba yis ni byang chub tshogs/ /yongs su rdzogs par 'dod

pa dang/ /bya ba spyod sogs rgyud gsungs pa'i/ /gal te gsang
sngags spyod 'dod na/ zhes gsungs/ gtsang du jo bo phebs dus/
khu rdog sogs mi drug gis dri ba lnga zhus pa'i phyi ma gsum
sngags kyi dri ba yin

@049b te; rdo rje slob dpon gyi dbang ma thob par rgyud 'chad du
rung ngam mi rung bya ba dang/ tshangs par spyod pas dbang gong
ma gnyis blang du rung ngam mi rung bya ba dang/ dbang bskur ma
byas par gsang sngags nyams su blang rung

ngam mi rung bya ba'o/ /dri ba dang po'i lan ni/ rgyud kun nyan
dang 'chad pa dang/ zhes sogs dang/ gnyis pa'i lan ni/ dang po'i
sangs rgyas rgyud chen las/ zhes sogs dang/ gsum pa'i lan ni/
bya ba spyod sogs rgyud gsungs

pa'i; zhes sogs kyis bstan pa yin no/ /de yang phar phyin theg
pa'i lugs kyi/ phyin drug bsdu bzhi'i nyams len gyis rang bzhin
gyi don yongs su rdzogs par 'gyur ba bzhin du/ rdo rje theg pa'i
lam gyis bgrod pa'i

rten ji ltar dgos pa yang gzhag tu yod de/ sngags bzlas pa'i
mthu nyid las grub par 'gyur ba'i zhi ba dang/ rgyas pa dang/
dbang dang/ mngon spyod kyi 'phrin las bzhi dang/ 'dod dgu
'byung ba'i bum pa bzang po grub

pa dang/ grub pa chen po brgyad la brten nas lam bde ba dang/
myur ba yis ni rang gis byang chub chen po'i tshogs yongs su
rdzogs shing/ gzhan don thams cad bsgrub par 'dod pas/ bya ba
dang spyod pa sogs rgyud sde

bzhi las gsungs pa'i gsang sngags kyi spyod pa rnam par dag par
nyams su blang bar 'dod pa'i rten can dgos pa'i phyir/ ! /gnyis
pa ni/ de tshe slob dpon dbang bskur phyir/ /bsnyen bkur rin chen
sogs sbyin

@050a @#/ /dang; ;bka' bsgrub la sogs thams cad kyis/ /bla ma dam
pa mnyes par bya/ /bla ma mnyes par gyur pa yis/ /yongs rdzogs
slob dpon dbang bskur bas/ zhes gsungs/ de yang rdo rje theg
pa'i

lam du 'jug par 'dod pa'i slob ma la mthun mong bas rgyud
sbyangs nas rgyud sde bzhi po ci rigs pa'i sgo nas gsang sngags
la 'jug par 'dod pa de'i tshe/ mtshan nyid dang ldan pa'i bla ma
dam pa mnyes par bya dgos te/

dgos pa gang gi don du na/ rdo rje slob dpon gyi dbang bskur
thob phyir yin pa'i phyir/ 'dis dbang gong ma gsum yang mtshon
no/ /tshul ji ltar mnyes par byed tshul yang yod de/ bkur sti
rnyed pa dag dang rim gro dang/ /

bsgrub pa'i sgo nas bshes gnyen bsten par bya/ zhes pa ltar lus
ngag gis bsnyen bkur ba dang/ rin po che dang/ bgo ba dang/ bza'
btung dang/ bran la sogs pa ji ltar bzhed pa bzhin gyi yo byad
sbyin pa

dang; bka' stsal dang du blangs nas tshul bzhin du bsgrub pa la
sogs pa sgo gsum gyi dngos po thams cad kyis mnyes par bya ba
yin pa'i phyir/ bla ma mnyes par byas nas ji ltar bya ba yang
yod de/ de ltar bla ma

mnyes par gyur pa yis/ slob mas dbang don du gsol ba btab nas/
mtha' rten rjes gnang dang bcas pa yongs su rdzogs pa'i rdo rje
slob dpon gyi dbang bskur bas/ bdag nyid gsang sngags kyi snod
rung du bya

@050b ba yin pa'i phyir/ ! /gsum pa dbang bskur ba'i che ba ni/
sdig kun rnam dag bdag nyid ni/ /dngos grub bsgrub pa'i skal
ldan 'gyur/ zhes so/ /gong du bshad pa ltar/ dbang bzhi rdzogs
par bskur ba la dgos pa yod

de; sgo gsum gyi sdig sgrib bag chags dang bcas pa rnam par dag
cing/ slob ma bdag nyid ni dngos grub chung 'bring chen po gsum
bsgrub pa'i skal ba dang ldan par 'gyur ba'i phyir ro/ ! /gnyis
pa rten gyi khyad par gyis

dbang gong ma gnyis byar rung ba dang mi rung ba'i tshul ni/ dang
po'i sangs rgyas rgyud chen las/ /rab tu 'bad pas bkag pa'i
phyir/ /gsang ba shes rab dbang bskur ba/ /tshangs par spyod pas
blang mi bya/ /gal te dbang bskur

de 'dzin na/ /tshangs spyod dka' thub la gnas pas/ /bkag pa spyad
par gyur pa'i phyir/ /dka' thub sdom pa de nyams te/ /brtul
zhugs can de pham pa yi/ /ltung ba dag ni 'byung 'gyur zhing/
/de ni ngan song nges ltung bas/ /

grub pa nam yang yod ma yin/ zhes gsungs/ 'o na dbang bskur pa
de dag dngos grub 'dod pa'i gang zag thams cad kyis/ dngos dbang
du blang ba yin nam zhe na/ ma yin zhes dmigs bsal ston pa ni/
shes

bya chos can/ tshangs par spyod pa'i dge bsnyen dang/ rab byung
sde lnga gang rung gi tshul khrims la gnas pa'i slob dpon gyis/
gsang ba'i dbang gzhan la bskur ba dang/ slob ma la shes rab ye
shes kyis dbang bsku

@051a @#/ /ba dang ni/ rang nyid kyis dngos su blang bar mi bya
ste/ tshul de lta bu ni/ dang po'i sangs rgyas dus kyi 'khor lo'i
rtsa ba'i rgyud chen mo las/ bcom ldan 'das kyis rab tu 'bad pas
bkag pa'i phyir/

'o na skyon ci zhig gzigs nas dbang de gnyis tshangs par spyod pa
la bkag ce na/ tshangs par spyod pa'i dka' thub la gnas pa'i dge
bsnyen dang/ rab byung sde lnga po gang rung gis/ gal te dbang
bskur ba gnyis po

de dag dngos su 'dzin cing blangs na/ ston pas bkag pa spyad par
gyur pa yin pa'i phyir/ tshangs spyod kyi dka' thub dang/ rab tu
byung ba'i sdom pa de nyams te/ tshul khrims kyi brtul zhugs can
de dag pham pa dang/

pham pa dang 'dra ba'i rtsa ba'i ltung ba dag ni 'byung bar
'gyur ba yin pa'i phyir dang/ ltung bas nyams pa'i gang zag de
ni ngan song gsum du nges par ltung bas na dngos grub 'grub pa
nam yang yod pa ma yin

pa'i phyir te/ jo bo nyid kyis/ gsang ba dang shes rab ye shes
kyi dbang ni tshangs par spyod pa grol ba'i lam pas mi bskur
zhing slob mas kyang mi blang ngo/ /de ni tshangs par spyod pa
zad par byed pa dang/ sangs rgyas kyi

bstan pa nub par byed pas sems can dmyal bar slob dpon de dang
slob ma gnyis ka the tshom med par 'gro bar 'gyur ro/ /zhes dang/
rang 'grel las kyang/ kha cig gsang sngags kyi rgyud chen po dag
gi dgongs

@051b pa mi shes/ bla ma dam pas kyang ma zin cing/ sdig pa'i
bshes gnyen la brten pas/ gsang sngags kyi tshul mi shes pas/
dgongs pa can gyi bka' la brten nas 'di skad du/ bdag cag ni
gsang sngags pa'o/ /zhes spyod

pa thams cad la bag yangs su byed cing/ phyag rgya chen po'i
dngos grub kyang myur du thob par 'gyur ro zhes sgrogs shing
gnas pa de dag ni ngan 'gror 'gro bar 'gyur ro zhes sogs rgya
cher gsungs so/ /gsum pa dbang

gong ma gnyis ma thob na/ rgyud nyan bshad sogs byar rung mi
rung gi dogs pa spang ba ni/ rgyud kun nyan dang 'chad pa dang/
/sbyin sreg mchod sbyin sogs byed pa/ /slob dpon dbang bskur
brnyes gyur cing/ /de nyid rig la nyes pa

med/ ces gsungs/ gal te tshangs par spyod pas dbang de gnyis
dngos su blang du mi rung na gsang sngags spyod pa'i skal ba med
par 'gyur ro zhe na/ skyon med de/ slob dpon gyi dbang bskur ba
rjes 'brang dang bcas pa brnyes pa ste

thob par gyur cing/ de kho na nyid bcu rig pa la ste rig pa'i
gang zag gis/ bya ba la sogs pa'i rgyud kun la slob mas nyan pa
dang/ slob dpon gyis 'chad pa dang/ thun mong du gnyis kas sbyin
sreg dang/ mchod sbyin dang/ sogs

pas rab gnas dbang bskur 'phrin las bzhi dang/ grub pa rnam pa
brgyad sgrub par byed pa la nyes pa med pa'i phyir/ ! /gsum pa
rgyu gang la brten nas brtsams pa ni/ gnas brtan mar me mdzad
dpal gyis/ /

@052a @#/ /mdo sogs chos las bshad mthong bas/ /byang chub 'od
kyis gsol btab nas/ /byang chub lam bshad mdor bsdus byas/ zhes
so/ /de la rkang pa dang pos byed pa po/ bzhi pas las

su 'du bya ba/ gnyis pas nang gi rkyen shes rab phun sum tshogs
pa/ gsum pas gzhan rkyen snying rje chen po bstan bcos rtsom
pa'i rgyur bstan te/ /sde pa bco brgyad po mtha' dag gi gtsug gi
nor bu/ bsnyen par rdzogs

nas sdom rgyun rnam dag bar ma chad du lo sum cu lhag bzhes pas
gnas brtan chen po mar me mdzad dpal ye shes zhes bya bas/ gangs
ri'i khrod kyi skal ldan rnams rjes su bzung ba'i phyir du/ las
dang po

pa'i sa nas byang chub mchog gi bar du/ bgrod pa'i theg pa chen
po'i lam rnam par bshad pa yin no/ /rgyu gang la brten nas bshad
pa yang gzhag tu yod de/ mdo dang/ sogs khongs nas rgyud dang/
bstan bcos man ngag

gi chos rnams las bshad pa ji lta ba bzhin mthong bas te mthong
ba'i shes rab dang/ bod yul gyi bstan pa'i khur bzhes pa'i lha
rigs dge slong byang chub 'od kyis/ bstan pa spyi khyab kyi don
du theg pa chen po'i shing

rtar gyur pa'i gzhung zhig cis kyang gnang dgos zhes gsol ba
btab pa'i rgyu las bshad pa yin pa'i phyir/ tshul ji ltar byas pa
yang gzhag tu yod de/ tshe 'di yun thung shes bya'i rnam pa mang/
/tshe yi tshad kyang ji tsam

@052b mi shes pas/ /ngang pas chu las 'o ma len pa ltar/ /rang
gi 'dod pa dang du blang na legs/ zhes gsungs pa ltar/ dgag
bsgrub kyi spros pa rgya chen po dor nas thams cad mkhyen pa don
gnyer gyi nyams len ma tshang ba med

pa bsgrub pa'i cha rkyen du gyur pa tsam zhig tshig mdor bsdus te
byas pa yin pa'i phyir/ ! /bzhi pa mjug gi don la gnyis/ gang
gis mdzad pa dang/ sus bsgyur ba'o/ /dang po ni/ byang chub lam
gyi sgron ma lnga brgya pa

rnams kyi gtsug gi nor bu slob dpon mkhas pa chen po dpal mar me
mdzad ye shes kyis/ skal ldan gyi gdul bya bgrang ba las 'das
pa'i don du thugs brtse ba chen pos mdzad pa rdzogs so// //gnyis

pa ni/ rgya gar gyi mkhan po dI paM kA ra shrI dznyA na
dang/ bod kyi lotstsha ba 'jig rten gyi mig /dge slong dge ba'i
blo gros kyis rgya skad las bod skad du bsgyur zhing tshig don
gyi zhu chen bgyis nas 'chad nyan mdzad pa'o/ /'di'i

rang 'grel ni dge bshes gung thang pas zhus shing bsgyur te/ nag
tsho bdag nyid gcig pu ma gtogs pa/ /jo bo'i slob ma gzhan la yod
re skan/ /zhes nag tsho bdag nyid kyis sbas chos su mdzad do/
/'on kyang 'di'i

'phrin las ches cher rgyas par byed pa po ni/ dge bshes ston pa
la sogs te/ khong gis sku mched gsum la sogs pa'i slob ma'i
tshogs la 'doms par mdzad/ dge bshes pu to bas/ lo paN gnyis kyi
gsung la

@053a @#/ /gces spras su mdzad de/ tshogs su thun brgyad brgyad du
gsungs/ de nas sha ra ba chen pos 'di'i 'phrin las rgyas par
mdzad de/ da lta'i bar du bstan pa'i sgron me dang 'gro ba'i mig
tu gyur pa 'di

yin no// //smras pa phul byung mkhyen brtse'i dkyil 'khor las
'ongs pa/ /rnam 'grel tshig don rdzogs pa'i gzi 'od can/ /slar
yang rang gzhung pad tshal 'byed pa'i phyir/ /thub bstan mkha'
dbyings

rgyan du shar ba bzhin/ /bde gshegs kun gyi bgrod pa gcig pa'i
lam/ /shing rta chen po gnyis kyi bzhed pa'i phul/ /brgyud pa'i
chu bo gsum 'dres gdams pa'i mchog /gang 'di'i snyan grags dbyar
skyes

bzhad pa'i sgras/ /'gro kun gtam gzhan gleng ba'i go skabs
phrogs/ /rab dkar gangs ris bskor kyang kun rmongs kyi/ /smag
rum mi bzad 'thibs pa'i byang phyogs 'dir/ /rjod byed tshig gi
lang tsho ches phra yang//

brjod bya'i 'od dkar rdzogs pa'i zla tshes 'di/ /shar ba tsam
gyis sdug bsngal tsha gdung dang/ /rmongs pa'i mun nag ma lus cig
car bsal/ /byang phyogs yangs pa'i nor gyi blo gros mar/ /thub
bstan yongs rdzogs

mdzes pa'i gos dkar sbyin/ /drang srong chen po thub pa'i rnam
thar la/ /kun nas brten pa'i mkhas grub bye ba brgyas/ /'dzam
gling mngon par brgyan pa'i byed po'ang/ /byang chub lam gyi
sgron ma 'di nyid do/ /de phyir tsha grang

@053b gsheg gtub bkres skom sogs/ /'jigs rung ngan 'gro'i
g.yangs sa las grol te/ /bde 'gro lha mi'i skyed tshal bsten
'dod na/ /phul byung gzhung bzang 'di la bsten pa'i rigs/ /las
nyon chu gter sdug bsngal rba

glong can/ /mtha' med 'khor ba'i rgya mtsho las brgal te/ /rnam
grol nor bu'i gling du'ang 'gro 'dod na/ /phul byung gzhung
bzang 'di la bsten pa'i rigs/ /skye rga na 'chi med pa bde chen
gyi/ /dbyings la rtag rol 'gro la mchog

stsol ba'i/ /thams cad mkhyen pa'i grong du 'jug 'dod na/ /phul
byung gzhung bzang 'di la bsten pa'i rigs/ /tshe 'di bar snang
glog ltar myur 'gro zhing/ /'jig rten pha rol bshul rings nyams
nga na/ /grogs dag

bag med sbun pa ma 'phyar bar/ /phul byung gzhung bzang 'di la
bsten pa'i rigs/ /bde 'dod sdug bsngal bsgrub pa'i khyi phag gi
/spyod tshul spangs te bka' gdams dge ba'i bshes/ /dam pa rnams
kyi rnam thar

skyong 'dod na/ /phul byung gzhung bzang 'di la bsten pa'i rigs/
/de phyir tshul 'di legs par bshad pa las/ /thob pa'i rnam dkar
dge ba ci mchis pa/ /ma lus rang gzhan don rnams bsgrub pa'i
phyir/ /bla med byang chub

dam pa thob phyir bsngo/ /bdag kyang tshe rabs kun tu bka' gdams
kyi/ /bshad sgrub bstan pa 'dzin cing spel ba la/ /sku mched
gsum gyi mdzad pa rnam thar kun/ /gcig tu bsdus nas ji bzhin
spyod par shog /ces bya

@054a @#/ /chub lam gyi sgron ma'i rnam bshad phul byung bzhad
pa'i dga' ston zhes bya ba 'di ni/ yongs kyi dge ba'i bshes
gnyen sangs rgyas bkra shis pas nan tan du bgyis te bskul ba'i
ngor mang du

thos pa'i dge slong blo bzang chos kyi rgyal mtshan dpal bzang
pos nyid kyi rang 'grel dang/ nag tsho'i 'grel pa dang/ ston pa
rin po che dang/ pu to ba'i gsung bgros gzhan mang po dang/
khyad par dge bshes dol pa'i

be'u bum sngon po dang/ sha ra ba'i lam rim dang/ snar thang
ba'i lam mchog dang/ gzhan yang bka' gdams kyi bstan rim mang po
zhig la'ang brten cing/ khyad par snyigs dus kyi rgyal ba gnyis
pa'i legs par

bshad pa la gzhi bgyis te/ bdag cag gi ston pa mngon par byang
chub pa'i zla tshes khyad par can la/ chos grwa chen po bkra shis
lhun po'i gzims khang du grub par g.yar khral du stsal ba dge
legs 'phel// //

! oM swa sti/ phan bde'i 'byung gnas rgyal bstan yongs 'du'i
ljon/ /rab rgyas 'gro kun thar mchog 'bras bzang la/ /spyod
phyir bkra shis lhun grub chos grwa cher/ /chos sbyin 'dzad med
dal 'gro'i rgyun 'di spel/ /

sarba dza ga taM// //