@00 @#/ /thar pa don du gnyer ba'i ri khrod pa rnams la khrims su
bca'i ba sku gsum gzhal med khang du 'dzeg pa baiDUrya'i them
skas zhes bya ba bzhugs so/ /

@001a @##/ /oM bde legs su gyur cig /srid pa'i phun tshogs rmi lam
dga' ston dang/ /'di snang chos brgyad smyon pa'i zlos gar ltar/
/gzigs nas rgyal bas bsngags

pa'i lam bzang dag /rtse gcig bsgrub la brtson rnams rgyal gyur
cig /'phags sras bye bas gus bsten pa/ /sku gsum gzhal med nyams
dga' bar/ /'dzeg pa'i bca' khrims

baiDUrya'i/ /them skas bzang po 'di na ko/ /de la 'dir 'khor
ba'i ngang tshul lcags khang me 'bar ba ltar mthong nas/ dben
pa'i ri sul du drang srong gi spyod tshul gyis bzhugs pa rnams

kyis ji ltar bya ba'i rim pa ni/ so thar byang sems rig 'dzin
gsum gyi sdom pa rnam par dag pa blangs te/ nyes pas ma gos par
blang dor tshul bzhin du byed pa las lhag pa ma

@002a @#/ /mchis mod/ 'on kyang nyams len de ltar byed pa'i mthun
'gyur 'ga' zhig khrims su bca' ba ni/ de yang 'o skol gyis/
rnyed par dka' ba'i dal 'byor gyi mi lus

thob; mjal dka' ba rgyal ba'i bstan pa rin po che dang mjal/ dge
ba'i bshes gnyen gyis zin/ kun byang gi nyes dmigs dang phan yon
rig nas/ rang yul/ nye du; dgon gnas/ grogs

mched dang bcas pa dor nas/ dben pa bsten par dam bca' ba yin
pas/ srog la bab kyang dam bca' mthar thon byed dgos te/ 'phags
mchog klu sgrub kyis/ dam pa khas 'che mang

po mi byed cing/ /gal te dka' ba khas ni blangs gyur na/ /rdo la
ri mo bris pa ji bzhin du/ /shi yang gzhan du byed pa med par
'gyur/ ces dang/ mgon po zhi ba lhas kyang/ dang po 'byor ba

brtags nas ni/ /brtsam mam yang na mi brtsam bya'i/ /ma brtsams
pa ni mchog yin gyi/ /brtsams nas ldog par mi bya'o/ /zhes
gsungs pa ltar ro/ /de ltar dam bca' mthar phyin par

@002b byas pa'i rkyen gyis shi na'ang 'gyod par mi bya ste/ ji
skad du/ ri khrod 'di ru 'chi nus na/ /rnal 'byor bsam pa rdzogs
pa yin/ zhes pa ltar/ blo phugs chos la gtad/ chos phugs sprang
la gtad/ sprang

phugs shi la gtad pa zhig dgos/ ri khrod du 'dug nas ni chos
brgyad kyis kun nas bslangs pa'i rnam g.yengs dang 'du 'dzi la
dgra bo'i gtso bor lta/ tha na le lo dang/ snyoms las kyis sgo
gsum

rang dgar 'dug na'ang/ kye ma bdag dge ba la brtson par mi byed
na/ dben par sdod pa'i ri dwags dang gcan gzan rnams dang khyad
par ci yod/ ri khrod bsten pa don med do snyam du sems dgos te/
mkhas

grub thams cad mkhyen pas/ rang yul nye du longs spyod kun bor
nas/ /rtse gcig dam chos sgrub par dam bcas te/ /gzhan gyi yul
du rnam g.yengs 'du 'dzi yis/ /dal 'byor don med byed pa smyon
pa

yin/ zhes gsungs pa ltar ro/ /de bzhin du bying rmugs dang 'dres
pa'i yid byed bkag pa'i bsam gtan bsgom pa la gcig dril byed pa
dang/ bzang 'dod dang/ grags 'dod dang/ 'gran 'dod kyis ri

la gnas bcas te/ 'dod zhen gyi 'khri ba mchod pas/ yang grong
chog rgyu ba sogs byed pa ni shin tu mi rung ste/ chos rje sa
paN gyis/ dam pa'i gdams pas sbos pa mchod par/ /zhi gnas bying
po zhig la sems

@003a @#/ /bzung nas/ /gti mug mun pa yang yang spel byed pa/
/phyi ba chang du nyal ba'i sgom chen yin/ /dad dang 'dun pas
sems rgyud ma thul bar/ /'gran 'dod dben pa'i ri la gnas bcas
te/ /

'dod yon dgos dgu rtag tu yid byed pa/ /gcan gzan ri la nyal
ba'i sgom chen yin/ /thar pa'i lam stor nyes pa kun spel nas/
/bzang 'dod ri brag gnas pas dus 'das te/ /de rjes yon bdag pho

mo'i grong chog mkhan/ /wa 'dra lung stong 'grim pa'i sgom chen
yin/ /chos brgyad 'dod pa rtswa yi me bzhin 'bar/ /kha phyir kun
tu rgyu ba'i brtson 'grus can/ /log pa'i 'tsho bas rtag tu 'tsho
byed pa/ /khyi rkun

grong mtha' nyul ba'i sgom chen yin/ /rgyal po ngan pa'i tshul
'dzin ngur smrig can/ /chags sdang mtshon sbyor du ma'i 'khor
gyis bskor/ /mi dge'i 'phrin las phyogs bcur spel byed pa/ /ngan
song

gnas gsum spel ba'i sgom chen yin/ /zhes sgom chen tha ma'i
mtshan nyid gsungs pa de dag gis rang rgyud la cung zad kyang ma
gos par byed pa gnad du che/ dben par 'dug nas ni/ /tshe 'di'i
rnyed

bkur grags pa sogs skad cig kyang don du mi gnyer bar/ 'phags
pa'i rigs bzhi la gnas bcas te/ gsog rum mngon mtshan can gyi
rtsol sgrub sogs gtan mi byed pa zhig dgos te/

@003b mdo las/ /lto 'grangs tsam gyi bsod snyoms ni/ /slangs nas
sang gir mi byed pa/ /de lta bu ni dge sbyong yin/ zhes gsungs
shing/ glegs bam rin po cher yang/ 'phral la zas 'tshol bya dang
'dra/ /kag ste langs pas gzhi

rdzogs pa/ /zhes gsungs pa 'dra ba zhig bya 'tshal/ de bzhin du/
mgon po zhi ba lhas kyang/ lhung bzed la sogs nyi tshe dang/ /kun
la mi mkho'i gos 'chang zhing/ /lus 'di sba ba ma byas kyang/
/'jigs med gnas par nam zhig

'gyur/ /ces gsungs pa ltar bya/ de lta bu'i tshul gyis chos gtso
bor byas na/ bdag cag gi ston pa thugs rje can de'i sngon gyi
smon lam gyis 'o brgyal mi dgos te/ khyim pa'i skye bo thams cad
dag /sen mo'i steng du zhing rmod kyang/ /

nga yi rab tu byung ba rnams/ /'tsho bas 'phongs par mi 'gyur ro/
/zhes gsungs shing/ kha rag sgom chung pas kyang/ so nam ma byas
yo byad ma bsags kyang/ /sgom chen 'khyags sam ltogs nas shi ba
dag /sngon chad mthong zhing thos

pa ma byung ste/ /ma 'ongs pa na'ang 'byung bar mi 'gyur ro/
/zhes gsungs pa'i phyir ro/ /de'i phyir dbul po nges pa bzhin du
'dod pa chung zhing chog shes kyi bdud rtsis 'tsho ba zhig dgos
te/ mgon po klu'i zhal snga nas kyis/ nor rnams kun

gyi nang na chog shes pa/ /rab mchog lags par lha mi'i ston pas
gsungs/ /kun tu chog shes mdzod cig chog mkhyen na/ /nor mi bdog
kyang yang dag 'byor ba lags/ /zhes gsungs pas so/ /de lta bu'i
bsam sbyor skye ba dang/

@004a @#/ /brtan pa dang/ mthar phyin pa la ni/ slob dpon dpa'
bos/ lha dbang dag dang 'khor los sgyur ba yi/ /'byor pa dam pa
phun sum tshogs pa la'ang/ /'dod pa'i rang bzhin mi gtsang ba
bzhin du/ /yid la

'dod pa til tsam med par shog /lcags kyi khang pa 'bar ba 'dra
ba yi/ /srid par rgyu la nam yang dga' ma gyur/ ces pa dang/ rje
thams cad mkhyen pas kyang/ bde med sdug bsngal brgya yis gtsos
pa yi/ /srid pa'i phun

tshogs yid la dran tsam gyis/ /lcags khang 'bar ba'i nang du chud
pa bzhin/ /yid la 'dod pa til tsam med par shog /ces gsungs pa
dang 'dra ba'i bsam pa skyes pa zhig dgos/ de 'dra ba'i bsam pa
sgrub pa la ni/ ji skad du/  

dal ba'i rten 'di yid bzhin nor las lhag /'di 'dra rnyed pa da
res tsam zhig yin/ /rnyed dka' 'jig sla nam mkha'i glog dang
'dra/ /tshul 'di bsams nas 'jig rten bya ba kun/ /sbun pa 'phyar
ba bzhin du rtogs gyur nas/ /nyin

mtshan kun tu snying po len pa dgos/ zhes gsungs pa ltar/ dal
'byor don che/ rnyed dka'/ 'chi ba mi rtag pa/ ngan 'gro'i sdug
bsngal/ las 'bras la yid ches kyi dad pas lcag yang yang 'debs
pa zhig ma byung na/ tshe 'di'i snang ba

shugs drag /'khri mkhas pas/ dge sbyor ci 'dra zhig byed lo byas
kyang gnad du mi 'gro zhing sgrub pa mthar mi thon pas/ bzhi
brgya bar/ mkhas pa rnams la mtho ris kyang/ /dmyal ba dang
mtshungs 'jigs bskyed 'gyur/ gsungs pa lta bu'i

@004b bsam pa ci skye bya/ chags sdang ngan pa'i sprin gyis
bsgribs na phan bde'i nyi ma mi 'char bas/ rang gces 'dzin la
dgrar bltas te/ rang rgyud kyi tha rgod 'dul ba la gcig dril du
byed dgos te/ rgyal sras rin po ches/ 'dul rgyu'i

dgra med bskyang rgyu'i gnyen med cing/ /phar ltos dpon med tshur
ltos g.yog med pa'i/ /dben pa'i gnas su rang sems mi 'dul na/
/khyod la bya rgyu ci 'dug ma Ni ba/ zhes gsungs pa'i don bzhin
byed/ de yang dben par bdag nyid

gcig pur skye bo gzhan gyis mi shes snyam du bag med pa'i spyod
pa byed pa lta zhog /lung ma bstan gyi ngang du'ang/ sgo gsum
gang rung gnas na/ rang gis rang la khrel bdas te/ kye ma lha
dang bla ma ye shes kyi gzigs pa sgrib

med mnga' ba rnams kyi mdun du khyod kha 'dra yong ba snyam du
bsams te/ spyod 'jug tu/ sangs rgyas byang chub sems dpa' rnams/
/kun tu thogs med gzigs par ldan/ /de dag thams cad spyan snga
na/ /rtag par bdag ni

gnas so zhes/ /de ltar bsams nas ngo tsha dang/ /'jigs dang gus
ldan de bzhin mnos/ /des na sangs rgyas rjes dran pa'ang/ /de la
yang dang yang du 'byung/ zhes gsungs pa'i phyir ro/ /yang;
mtshan dang lta spyod mtshungs pa'i

grogs tshangs pa mtshungs par spyod pa sder longs pa yod na ni/
phan tshun chags sdang 'gran sems spangs te/ so so'i dge sbyor
gtso bo la mi gnod pa'i ngos nas/ lung dang sgrub pa bstan pa'i
rtsa ba yin pas/ gzhi gsum gyi

@005a @#/ /rnam gzhag las mi g.yel ba'i ngang nas/ spyi'i chos
mthun gyi bya ba rnams kyang spyi khrims bzhin bsgrub dgos/
spyir gyi sems can thams cad la ston pa'i 'du shes bskyed cing/
khyad par tshangs pa mtshungs

par spyod pa nang phan tshun du khros pa'i nyes pa shin tu che
bar bslab btus su mdo drangs pa las gsungs pas/ dge ba'i bshes
gnyen du bsams te dag snang sbyong/ ri khrod mthun pa'i grogs
dang bcas pa'i gnas der dge sbyor

'phel na/ 'pho skyas mang po dge sbyor gyi sar yin pas gzhi
bzung/ yang dge sbyor mi 'phel na/ po to bas/ nyi zla bzhin du
kun tu rgyu bya/ zhes gsungs pa bzhin/ sgo gsum dge ba gang
'phel gyi dben pa nas dben par chags

pa med par rgyu/ 'gro 'chag nyal 'dug sogs spyod lam thams cad
du sgo gsum sdom pa gsum gyi bcas mtshams las skad cig kyang mi
'gal ba'i dam pa'i rnam thar bskyed phyir/ gnad rnams tshang ba'i
thun drug dang/

thun bzhi'i rnal 'byor la brtson pa bsten 'tshal/ de dag gi skabs
kha ton/ bzlas brjod/ dpyad 'jog gi bsam gtan ci byed kyang/
sems rgya yongs su gtan nas ma song ba zhig cis kyang gal che
ste/ spyod 'jug las/

bzlas brjod dang ni dka' thub sogs/ /yun ring dus su spyad byas
kyang/ /sems gzhan g.yengs pas byas pa ni/ /de nyid rig pas don
med gsungs/ zhes pa dang/ sems kyi glang po yan btang bas/ /mnar
med gnod pa byed

@005b pa ltar/ /glang chen ma dul myos pa yis/ /'di na de 'dra'i
gnod mi byed/ ces gsungs pa ltar ro/ /sems gzhan du yengs mi
yengs kyang dran shes gnyis/ de'i nang nas kyang dran pa la rag
las te/ mgon po klu sgrub kyis/ dbang phyug

lus gtogs dran pa bde gshegs kyis/ /bgrod pa gcig pa'i kham du
nye bar bstan/ /de ni bsgrims nas mngon par bsrung bgyi ste/
/dran pa nyams pas chos kun 'jig par 'gyur/ ces dang/ spyod 'jug
las kyang/ kun nas

dran pa'i thag pa yis/ /sems kyi glang chen dam btags na/ /'jigs
pa thams cad med 'gyur zhing/ /dge ba thams cad lag tu 'ong/
zhes gsungs so/ /de lta bu'i dran pa brjed ming du byung na shes
bzhin 'bad med du yong ste/

de nyid las/ gang tshe dran pa yid sgo nas/ /bsrung ba'i don du
gnas gyur pa/ /de tshe shes bzhin 'ong 'gyur te/ zhes so/ /de
'dra'i shes bzhin gong 'phel du byed tshul yang/ lus dang sems
kyi gnas skabs la/ /yang dang yang du brtag

bya ba/ /de de kho na mdor na ni/ /shes bzhin bsrung ba'i mtshan
nyid do/ /zhes gsungs pa ltar ro/ /de yang dben par bsgrub pa
lhur byed pa de'i tshe ni/ theg pa chen po mdo sngags kyi chos
zab mo ci 'dra zhig nyams su len rgyu yod na'ang/

sgrub pa po bdag nyid theg chen par tshud pa zhig ma byung na/
thams cad mkhyen pa thob pa'i skabs med cing/ de bzhin du nges
'byung dang/ bdag med rtogs pa thun mong ma yin pa'i lta ba med
na/ thar pa tsam yang mi thob pas/ dmigs

@006a @#/ /pa ltar snang zhig la tshe dril ba ma yin par/ lam gyi
gnad 'dus pa'i nyams len la 'bad par 'tshal lo/ /de yang snying
po dril na/ bdag med la bdag tu bzung ba la brten pa'i sgyu mas
rmongs par byas

pas smyon pa'i spyod pa byed pa lta bu'i las bsags/ de'i dbang
gis khams gsum gyi brtson khang chen por 'du byed kyi rang bzhin
gyi sdug bsngal gyi phung po 'bras dang zug rngu lta bu mgal
me'i 'khor lo dang mtshungs pa rgyun chad

med par 'khor ba la/ skyugs nad can gyis zas mthong ba 'dra ba'i
blo bskyed/ de rjes jo bo chen pos/ rang rgyud rtogs pa'i sdug
bsngal gyis/ /gang zhig gzhan gyi sdug bsngal kun/ /yang dag zad
par kun nas 'dod/ /skyes bu de ni mchog yin

no/ zhes gsungs pa bzhin/ rang dang 'dra bar sdug bsngal gyis
mnar ba'i 'gro ba thams cad drin can gyi mar shes pa'i sgo nas/
bdag gces 'dzin la dgrar bltas te/ sems can thams cad la nye
ring med par gces par 'dzin

pa'i bsam sbyor la snying thag pa nas gnas pa zhig bya ste/ de
ltar yang spyod 'jug las/ 'jig rten bde ba ji snyed pa/ /de kun
gzhan bde 'dod las byung/ /'jig rten sdug bsngal ji snyed pa/
/de kun rang bde 'dod las byung/ /mang du

bshad lta ci zhig dgos/ /byis pa rang gi don byed dang/ /thub pa
gzhan gyi don mdzad pa/ /'di gnyis kyi ni khyad par ltos/ /bdag
bde gzhan gyi sdug bsngal dag /yang dag brje ba ma byas na/
/sangs rgyas nyid du mi 'grub cing/ /'khor ba

@006b na yang bde ba med/ ces gsungs pa ltar/ rang gces 'dzin la
dgrar bltas/ gzhan gces 'dzin phun tshogs thams cad kyi 'byung
gnas su shes par byas te/ bdag gzhan mnyam brje'i sgo nas byang
chub kyi sems la

bsten goms nan tan du byed/ de'i ngang nas/ nyes pa thams cad
kyi rtsa ba bdag tu 'dzin pa yin te/ bzhi brgya par/ lus la lus
dbang ji bzhin du/ /gti mug kun la gnas 'gyur te/ /de phyir nyon
mongs thams cad

kyang/ /gti mug bcom pas bcom par 'gyur/ ces gsungs shing/ gti
mug gi gnyen po bdag med pa'i don la/ /don 'gyur gyi the tshom
skyes kyang/ thar pa'i bag chags 'jog par de nyid las/ /bsod
nams chung

ngus chos 'di la/ /the tshom za ba'ang yod mi srid/ /the tshom za
ba tsam zhig gis/ /srid pa hrul por byed par 'gyur/ ces gsungs
pas/ bdag med rtogs pa'i phyag rgya chen po mnyam gzhag nam
mkha' lta bu la mnyam

par 'jog cing/ bdag tu 'dzin pa'i blos ji ltar bzung ba'i yul
bdag gam nga'am skyes bu zhes bya ba de/ bdag tu 'dzin pa'i blo
des bzung ba ltar grub par rang gi ngang gis 'char ba zhig grog
sbur tshun chad kyi rgyud

la'ang yod pas/ de nges par byas la/ de 'dra'i bdag de bdag tu
'dzin pa'i blo lhan skyes de la ji ltar snang/ blo des ji ltar
bzung/ rang gi lus sems gnyis re re ba'am/ lus sems gnyis tshogs
pa'i steng du bzung

@007a @#/ /ngam/ de dag las gzhan du bzung/ gal te lus sems gnyis
sam/ phung po lnga'i steng du bzung zhing/ bzung ba ltar yod na
ni/ yod phyin gcig dang du ma gang rung las mi 'da' bas/ phung
po lnga 'am/

lus sems gnyis dang/ gcig dang tha dad dang/ de dag las gzhan du
yod dam snyam du btsal ba na/ ci yang mi rnyed pa zhig 'ong bas/
de ka'i ngang du mnyam par 'jog dgos te/ 'phags mchog klu sgrub
kyis/ /ji ltar chu

shing yan lag dag /ma lus bcas te bshig byas na/ /ci yang med
ltar skyes bu yang/ /khams bcas bshig na de dang 'dra/ /chos
rnams thams cad bdag med ces/ /de phyir sangs rgyas rnams kyis
gsungs/ zhes dang/

zhi ba lhas kyang/ ji ltar chu shing sdong po dag /cha shas phye
na 'ga' med pa/ /de bzhin rnam par dpyad pa yis/ /btsal na bdag
kyang yang dag min/ ces gsungs so/ /yang na; 'jug par rnam bdun
gyi rigs pa shing rta

la sbyar ba 'di ltar bsgyur te/ bdag ni phung po rnams las gzhan
'dod min/ /gzhan min ma yin de ldan ma yin zhing/ /phung po la
min phung po dag der min/ /'dus pa tsam min dbyibs min ji bzhin
no/ /zhes gsungs

pa ltar rtse gcig tu sgom/ mnyam gzhag de las langs nas ni/ /'di
ni de nyid du 'am 'jig rten du/ /rnam pa bdun gyis 'grub 'gyur
min mod kyi/ /rnam dpyad med par 'jig rten nyid las 'dir/ /rang
gi yan

@007b lag brten nas 'dogs pa yin zhes gsungs pa ltar/ ma brtags
nyams dga' ba/ sgyu ma/ chu zla/ gzugs brnyan lta bu snang yang
bden pas stong ba'i rgyal sras kyi spyod pa la bslab cing/ de
'dra ba'i nyams len las ma

g.yos pa'i ngang nas bskyed rdzogs zab mo'i rnal 'byor bzlas
brjod sogs la brtson par byed pa ni dal 'byor la snying po len
pa'i thabs bla na med pa yin no/ /'di 'dra ba'i dben par spyod
pa'i rnal 'byor pa de ni/ nam

phugs bde ba nas bde bar 'gro bas gtan gyi mdun ma grub pa lta
ci smos/ gnas skabs su yang lha yi dbang pos kyang rnyed par
dka' ba/ rtag tu bde zhing skyid pa'i mgo tshugs pa yin te/ mgon
po zhi ba lhas/ khang stong

shing drung phug dag tu/ /gang du ji srid 'dod gnas shing/
/yongs 'dzin bsrung ba'i sdug bsngal spangs/ /ltos pa med par
bag yang spyod/ /rang dbang spyod cing chags med la/ /gang dang
yang ni 'brel med pa/ /chog shes bde sbyong

gang yin pa/ /dbang pos kyang ni de rnyed dka'/ zhes gsungs pa
ltar ro/ ! /bslab pa 'dod pa'i dge slong dag /dben pa dag kyang
thob par shog /g.yeng ba thams cad spangs nas ni/ /sems ni las
rung bsgom par

shog /rnam g.yeng med pa'i dben gnas su/ /chos brgyad 'ching
bas ma bcings par/ /chog shes bdud rtsis 'tsho ba yi/ /spyod tshul
de la glo ba dga'/ /kye ma tshe 'di yun thung zhing/ /'dod yon
lan tshwa'i chu dang 'dra/ /pha

@008a @#/ /rol g.yang sas ya nga bas/ /snyoms las le lo spangs
na legs/ /'khor ba'i mya ngam thang chen las/ /sgrol ba'i ded
dpon phal cher thal/ /bdag cag mgon med phyir lus na/ /phyi
bzhin

bsnyegs dang grogs po dag /rang yul gzhi dgon longs spyod sogs/
/dor nas dben par dam bcas te/ /rnyed bkur 'du 'dzi'i rjes
'brang na/ /glang chen khrus dang cis mi mtshungs/ /de phyir dben
pa'i gnas 'dug nas/ /

sdom pa gsum gyis rgyud bsdams te/ /mdo rgyud gnad kyi nyams len
la/ /g.yel med brtson pa bsten par 'tshal/ /'di ltar bskrun pa'i
dge ba yang/ /mkha' mnyam 'gro ba ma lus pa/ /sdug bsngal rgya
mtsho las sgrol phyir/ /

bla med byang chub chen por bsngo/ zhes pa 'di ni/ dge slong ri
khrod pa rnams kyi bca' yig cig cis kyang dgos shes chos rje don
grub rin chen gyis snga phyir nan cher bskul ba la brten nas/
shAkya'i dge slong spong ba pa blo

bzang chos kyi rgyal mtshan gyis/ ra sa ra mo cher sbyar ba 'di/
brtse ba'i bslab bya yang yin/ phan pa'i gdams ngag kyang yin/
'chi ba'i kha chems kyang yin pas/ tshul bzhin nyams su len par
mdzod//

// ! //swa sti/ par 'di'ang blo bzang dar rgyas kyis/ /grogs
po'i sgrib pa sbyang phyir bsgrubs/ /dge bas tshe rabs thams cad
du/ /'bral med chos la spyod gyur cig /phun tshogs lha mi'i rten
brgyud nas/ /dus

@008b gsum rgyal ba sras bcas kyi/ /lung rtogs dam chos kun
bzung ste/ /'gro rnams sgrol ba'i mchog gyur cig /ces rgyal ba
thams cad kyi mkhyen brtse gcig tu bsdus pa/ lnga brgya pa rnams
kyi gtsug gi nor bu/ snyigs

ma'i dus 'dir rgyal ba'i bstan pa la rgyal ba nyid dang mtshungs
pa/ lhar bcas 'gro ba ma lus pa'i skyabs mgon dam pa/ thams cad
mkhyen pa blo bzang chos kyi rgyal mtshan dpal bzang po'i zhal
snga nas kyis/ thar pa

don gnyer rnams la/ bslab bya khrims su bca' ba'i gdams pa zab
mo'i bka' drin stsal ba 'di nyid kyang/ phyogs dus kun tu dar
zhing rgyas te/ bstan pa rin po che bshad sgrub gnyis kyi sgo
nas 'phel rgyas yun ring du

gnas par bya ba'i phyir/ shar dwags po'i yul gyi grum mda' dgon
dge ldan chos gling du lhag bsam dag pas par du bsgrubs shing/
yig brkos mkhas pa dpon phyag tshe ring gnyis kyis bgyis so/
/'dir 'bad dge

des bdag sogs 'gro ba kun/ /blo bzang rgyal ba'i rgyal tshab chos
kyi rjes/ /dgyes bzhin rjes su 'dzin pa nyid thob ste/ /sku gsum
rgyal mtshan mthon por reg gyur cig /mangga laM// //@#/ /oM
swasti/ phan bde'i

'byung gnas rgyal bstan yongs 'du'i ljon/ /rab rgyas 'gro kun
thar mchog 'bras bzang la/ /spyod phyir bkra shis lhun grub chos
grwa cher/ /chos sbyin 'dzad med dal 'gro'i rgyun 'di spel//
//sarba dza ga taM// //