@#/ /blo sbyong dmar khrid shar rtse chos rje la gnang ba bzhugs
so/ /

@001a @##/ /na mo gu ru manydzu g+ho ShA ya/ 'dir bka' gdams kyi
dge ba'i bshes gnyen dam pa rnams kyi thugs dam gyi mthil/ rgyal
ba'i gsung rab thams cad kyi

snying po gcig tu bsdus pa/ theg pa chen po'i blo sbyong zhes
mtshan yongs su grags pa'i dmar khrid nyams su len par 'dod pas/
skyabs 'gro sems skyed rgyud dang 'dres nges pa

sngon du btang/ thun mong dang thun mong ma yin pa'i dge sems
khyad par can gyi ngang nas/ yid rtse gcig tu 'di ltar gdon cing
bsgom par bya'o/ ! /mdun gyi nam mkhar kun tu

bzang po yi/ /mchod sprin rgya mtshos yongs su bskor ba'i dbus/
/'dab stong padma'i lte bar zla ba'i steng/ /rgyal ba gnyis pa
rje btsun bla ma dang/ /dbyer med lha bcas 'dren pa 'od

@002a @#/ /dpag med/ /sku mdog dmar po zhal gcig phyag gnyis pa/
/ting 'dzin phyag rgya'i dbus na 'chi med kyi/ /bdud rtsis gang
ba'i drang srong snod mchog bsnams/ /gtsug tor

gyis mdzes mtshan dpe'i gzi 'od 'bar/ /li khri'i mdangs ldan chos
gos gsum gyis klubs/ /'od zer stong 'bar 'ja' tshon gur khyim
dbus/ /mi phyed rdo rje'i skyil krung gis bzhugs

pa'i; ;g.yas g.yon pad dkar 'dzin dang mthu chen thob/ /mchog
gsum 'khor tshogs rgya mtshos yongs bskor ba'i/ /sgo gsum rdo rje
gsum mtshan 'od zer gyis/ /bde ba can sogs

rang bzhin gnas mchog nas/ /ye shes pa rnams spyan drangs dbyer
med gyur/ ! /gang gi drin gyis sgrib bral bde ba che/ /sku gsum
mi zad rgyan gyi 'khor lo yang/ /skad cig nyid

la stsol mdzad yid bzhin nor/ /'od dpag med mgon bla ma'i zhabs
la 'dud/ /'jig rten 'dren pa'i gtso bo tshe dpag med/ /dus min
'chi ba ma lus 'joms pa'i dpal/ /mgon

@002b med sdug bsngal gyur pa rnams kyi skyabs/ /sangs rgyas tshe
dpag med la phyag 'tshal lo/ /mchod pa kun 'bul sdig ltung ma lus
bshags/ /dge la yi rang chos 'khor bskor ba'i phyir/ /nam

mkha' ji srid gnas par rtag bzhugs gsol/ /'dis mtshon dge tshogs
byang chub chen por bsngo/ ! /'dren mchog shAkya'i tog dang mi
pham mgon/ /'phags pa thogs med nas bzung sangs

rgyas kyi/ /ye shes ngo bo rtsa brgyud bla ma'i tshogs/ /bka'
drin mnyam med rnams la gsol ba 'debs/ /'di phyi'i bde legs rtsa
ba zla med pa/ /bshes gnyen dam pa tshul bzhin bsten pa ru/
/mthong

nas sgo gsum dngos po thams cad kyis/ /bka' bzhin mnyes pa sgrub
par byin gyis rlobs/ /yang yang rnyed dka' don che'i dal 'byor
'di/ /don med 'jig rten bya bas mi g.yeng bar/ /nyin mtshan

kun tu snying po len pa la/ /brtson pa shugs drag skye bar X/
/tshe 'di mi rtag chu yi chu lbur ltar/ /'chi bar nges shing nam
'chi cha med du/ /bcos min snying nas dran pa'i dgos med blos/
/'dir snang zhen pa

ldog par X/ /'jigs rung ngan 'gro'i g.yangs sas yid skrag nas/
/bslu med dkon mchog gsum la skyabs 'gro zhing/ /dkar gnag las
dang 'bras bu'i tshul rtogs nas/ /sdig spong dge tshogs

@003a @#/ /sgrub par X/ /bde med sdug bsngal bye bas mnar ba yi/
/srid pa'i dga' ston me 'obs ltar mthong nas/ /bslab gsum rnam
dag thar pa'i lam bzang la/ /nyams len snying por

byed par X/ ! /nyon mongs ma rig gdon gyis yid bsgyur bas/ /bdag
med bdag tu snang zhing zhen pa'i yul/ /lung rigs rnon po'i
mtshon gyis srog bcad de/ /bdag med gnas lugs

rtogs par X/ /chos rnams kun gyi rang bzhin gdod ma'i gshis/
/dbyer med kun khyab spros pa'i mtha' bral ba/ /stong nyid zab
mo kun gzhi'i ngang nyid du/ /rtse gcig mnyam par 'jog par X/
/rjes

thob gang shar sgyu ma'i rnal 'byor gyis/ /rang bzhin stong dang
rten 'byung mi 'gal bar/ /phan tshun gcig gis gcig grogs byed pa
yis/ /tshogs gnyis zung du 'brel bar X/ ! /nam mkha'i mtha'

dang mnyam pa'i sems can tshogs/ /re res kyang ni lan cig ma yin
par/ /yang dang yang du bdag gi ma byas zhes/ /nges shes gting
nas skye bar X/ /'di dag rnams kyis bdag gi ma byas tshe/ /gdung
ba

kun bsal mthun pa'i yo byad bsgrubs/ /rang gi srog las bdag cag
gces bzung ba'i/ /drin rnams ji bzhin dran par X/ /mar gyur 'gro
rnams 'khor ba ngan song gi /'jigs rung sdug bsngal drag pos

@003b mnar ba la/ /ba spu g.yo 'gul med pa'i sems spangs nas/
/shugs drag snying brtse skye bar X/ /sdug bsngal phra mo tsam
yang mi 'dod cing/ /bde la nam yang chog shes med par ni/ /bdag
dang 'gro rnams khyad par med

mthong nas/ /bdag gzhan mnyam par rtogs par X/ /sdug bsngal mi
'dod de rgyu sdig la rngams/ /bde ba 'dod kyang dge la dgra ltar
blta/ /srog 'phrog gshed ma bur brdzus lta bu yi/ /rang nyid
gces 'dzin 'jig

par X/ /bsod nams min pa'i las ngan lcags kyu yis/ /'di phyir
gdung ba'i gdon bgegs 'byung po sogs/ /gnod byed thams cad spyan
'dren pho nya ba/ /rang nyid gces 'dzin 'joms par X/ /rang bde
'dod pas

nyon mongs las ngan gyi/ /sna tshogs mtshon cha rnon po brdar byas
te/ /mngon mtho nges legs phan bde'i srog gcod pa'i/ /gces 'dzin
dgra 'di brlag par X/ /mi shes rmongs pa'i skye bo mtha' dag
gis/ /bdag nyid

gces bzung rang bde 'dod pa yis/ /mnar med mes kyang yang yang
bsreg 'gyur ba'i/ /khong skran rtsad nas thon par X/ /khams gsum
mgon po thub pa'i dbang po yis/ /rang don yal bar dor nas gzhan
gyi don/ /

legs par bsgrubs pas go 'phang mchog brnyes pa'i/ /rnam thar
tshul bzhin sgrub par X/ /rang nyid gces 'dzin rgud pa kun gyi
gzhi/ /ma rnams gces 'dzin yon tan 'byung gnas su/ /lung dang
rigs pa'i stobs

@004a @#/ /kyis nges byas nas/ /bdag gzhan mnyam brje nus par X/
! /'gro 'ong rlung gi rta la bskyon nas ni/ /bdag gi bde dang
dus gsum dge tshogs rnams/ /mkha' mnyam ma gyur 'gro la btang ba
yis/ /

zag med bde bas tshim par X/ /drin can ma rgan rnams kyi sdig
sgrib dang/ /byung dang 'byung 'gyur sdug bsngal ci mchis pa/
/snying stobs chen pos bdag gis blangs pa yis/ /'gro kun sdug
bsngal zhi bar X/ ! /mdor

na mar gyur drin can 'gro ba rnams/ /bdag nyid gcig pus gnas
skabs mthar thug gi /bde la 'god cing sdug bsngal rgyu bcas las/
/sgrol ba'i khur chen 'khyer bar X/ /bla med byang chub dam pa
ma thob na/ /sems

can kun don bsgrub pa'i mthu med pas/ /'gro kun don du rdzogs
pa'i sangs rgyas kyi/ /go 'phang myur du thob par X/ /yul gsum
dug gsum dge rtsa rnam pa gsum/ /dus rnams kun tu dran shes tshig
gis sbyang/ /

gtong dang len pa'i go rims nas brtsams te/ /tshul bzhin nyams su
len par X/ ! /yul ngan nad gdon chom rkun dgra sogs kyi/ /mi
'dod sdug bsngal mda' char bab na yang/ /sngon byas

las ngan 'bras bu rang 'khor bar/ /shes nas gtong len spel bar
X/ /snod bcud sdig pa'i 'bras bus yongs gang tshe/ /le lan bda'
zhing kun gyi bka' drin bsam/ /'khrul snang sku bzhir bsgom dang
sbyor bzhi yis/ /

@004b rkyen ngan lam du longs par X/ ! /chos rnams kun gyi
snying po gcig dril ba/ /'phen pa goms pa dkar po sa bon dang/
/rnam par sun 'byin smon lam stobs lnga yi/ /sgrub pa snying por
byed par X/ ! /thub pas

chos phung brgyad khri bzhi stong kun/ /bdag 'dzin 'gong po 'dul
phyir gsungs shes nas/ /thabs shes byang chub sems gnyis nyams
len gyis/ /sku gsum mngon du 'gyur bar byin gyis rlobs/ ! /der
ma son pa'i

tshe rabs thams cad du/ /rin chen byang chub sems dang mi 'bral
zhing/ /blo sbyong dam tshig bslab bya'i rim pa las/ /nam yang
'da' ba med par byin gyis rlobs/ /zhes dal bus brjod cing/ de
dag gi don yid ma yengs

par rtse gcig tu bsam par bya'o/ /rtsa tshig las/ theg chen 'pho
ba'i gdams ngag ni/ /stobs lnga nyid yin spyod lam gces/ zhes
gsungs pa ltar/ lam 'di la brten pa'i 'pho ba nyams su len 'dod
na/ stobs lnga'i

sgo nas nyams su blang ngo/ /de nas mdun gyi tshogs zhing rnams
mtha' nas 'od du zhu ba rim bzhin mgon po 'od dpag med la bstim/
mgon po 'od dpag med de nyid kyang/ badzra sa mA dzaH/ zhes rdo
rje bsdu ba'i sngags rgyas

rang gi spyi gtsug tu spyan drangs te bzhugs su gsol/ /de ltar
spyi bo'i rje bla ma dang dbyer med pa'i mgon po 'od dpag med de
nyid la/ bcom ldan 'das de bzhin gshegs pa dgra bcom pa yang dag
par rdzogs pa'i

@005a @#/ /sangs rgyas 'od dpag tu med pa la phyag 'tshal lo/
/mchod do/ /skyabs su 'chi'o/ zhes dmigs pa dang bcas pas gsol
ba ci mang gdab/ dmigs pa ni/ de ltar gsol ba btab pas bcom

ldan 'das 'od dpag med kyi sku las bdud rtsi'i rgyun bab/ rang
dang sems can thams cad kyi lus sems la zhugs pas/ sdig sgrib
nad gdon bar gcod thams cad sbyangs/ lus dwangs gsal 'od kyi
rang bzhin can du

gyur/ tshe dang bsod nams/ lung rtogs kyi yon tan thams cad 'phel
zhing rgyas/ mthar 'od dpag med las/ 'od dpag med gnyis pa zhig
chad de/ rang la thim pas/ rang nyid kyang 'od dpag med du gyur/
rang 'od

dpag med du gsal ba dang spyi bo'i 'od dpag med gnyis ka'i thugs
kar sngags bkod de/ spro bsdu'i dmigs pa dang bcas pa'i sgo nas/
'chi med rnga sgra'i gzungs sam/ yang na tshe gzungs sam a ma ra
Ni ci mang

bzla bar bya zhing/ blo dang rnam dpyod yangs pa rnams kyis ni/
'di dag gi rgyab rten shes byed khungs dang bcas pa/ rgyal sras
rin po che dang/ sems dpa' chen po gzhon nu rgyal mchog dang/
kho bo'i bla ma mkhas grub

chen po sangs rgyas ye shes zhabs kyis mdzad pa'i blo sbyong gi
khrid yig rnams la yang blta bar bya'o/ /mjug tu de las byung
ba'i dge ba rnams bzang po spyod pa la sogs pa bsngo ba dang
smon lam rnam par dag pa'i

@005b rgyas gdab par bya'o/ /'dis mtshon dus gsum legs spyad dge
ba'i mthus/ /nam mkha'i mthas khyab mar gyur 'gro ba kun/ /ngan
song 'khor ba'i sdug bsngal las grol te/ /thams cad gzigs pa'i
go 'phang myur thob

shog /tshul 'di yang mdo sngags kyi bstan pa yongs su rdzogs pa'i
dge ba'i bshes gnyen/ gdan sa chen po dpal snar thang gi mkhan
chen/ shar rtse chos rje grags pa dpal 'byor pas snga phyir nan
gyis bskul ba la brten

nas/ chos smra ba'i dge slong blo bzang chos kyi rgyal mtshan
gyis/ sa ga zla ba'i dkar tshes bco lnga'i nyin/ bkra shis lhun
po'i gzims chung yid dga' chos 'dzin du yongs su rdzogs par sug
bris su byas pa las/ dang por

'dri ba'i yi ge pa ni/ rnam dpyod phun sum tshogs pa rje drung
blo bzang dbang rgyal lo// //dge'o// //@#/ /oM swasti/ phan
bde'i 'byung gnas rgyal bstan yongs 'du'i ljon/ /rab rgyas 'gro
kun thar mchog 'bras

bzang la/ /spyod phyir bkra shis lhun grub chos grwa cher/ /chos
sbyin 'dzad med dal 'gro'i rgyun 'di spel// //sarba dza ga taM//