@#/ /sdig mun sel byed zla ba'i 'od zer zhes bya ba bzhugs/ /

@001a @##/ /na mo gu ru shAkya mu na ye/ dus gsum phyogs bcur
bzhugs pa yi/ /sangs rgyas sras dang bcas rnams la/ /byang chub
snying por mchis kyi bar/ /gus pas

skyabs su mchi bar bgyi/ /bslu med skyabs kyi mchog rnams la/
/thal mo sbyar te gsol ba ni/ /tshe rabs 'di 'am gzhan dag tu/
/nyon mongs dug gsum dbang gyur pas/ /lus

dang ngag dang yid sgo nas/ /mtshams med lnga dang nye pa lnga/
/mi dge'i lam bcu bgyis pa rnams/ /bsam pa thag pas mgon la
bshags/ /dkon mchog gsum dang bla ma dang/ /

pha ma sogs dang gzhan dag la'ang/ /gnod cing 'tshe ba ci bgyis
pa/ /thams cad snying nas bshags par bgyi/ /'jig rung dmyal ba
yi dwags dang/ /dud 'gro mtha' 'khob kla

@002a @#/ /klo dang/ /glen lkugs log lta can sogs su/ /skye 'gyur
las ngan ma lus bshags/ /nor dang lang tsho stobs sogs kyi/ /nga
rgyal dregs pas gzhan dag la/ /brnyas shing

rnam par 'tshe byas pa/ /thams cad kyang ni bshags par bgyi/
/mdor na mngon mtho nges legs dang/ /kun mkhyen yang dag 'grub
pa'i gegs/ /mi shes dbang gis bsags pa rnams/ /

shin tu 'gyod pa'i sems kyis bshags/ /bcas pa dang ni rang bzhin
gyi/ /kha na ma tho sdig pa'i las/ /bgyis dang bgyid bstsal yi
rang ba/ /ci mchis yongs su bshags par bgyi/ /thugs

rje che ldan rgyal rnams dang/ /rgyal sras bdag nyid che rnams
kyis/ /sdig ldan bdag la brtser dgongs la/ /nyes kun dag par
mdzad du gsol/ /sngon chad mi dge bgyis pa la/ /dug 'thungs

bzhin du 'gyod sems kyis/ /slan chad srog gi phyir yang ni/
/skad cig tsam yang mi bgyid do/ /de ltar bshags shing bsdams pa
yi/ /bsod nams bdag gis ci thob pa/ /des ni bdag dang

@002b 'gro ba kun/ /myur du byang chub thob gyur cig /ces/ sdig
mun sel byed zla ba'i 'od zer zhes bya ba 'di yang/ nang so bkra
shis rab brtan gyis/ nan gyis bskul ba la brten nas/ dge slong
blo bzang chos kyi

rgyal mtshan gyis thogs med du bgyis pa dge legs 'phel bar gyur
cig /yi ge pa ni dge tshul blo bzang dbang rgyal lo// //@#/ /oM
bde legs su gyur cig /ston pa mnyam

med shAkya'i rgyal po dang/ /rgyal tshab dam pa mi pham 'jam
pa'i dbyangs/ /shing rta chen po klu sgrub thogs med sogs/ /rtsa
brgyud bla ma rnams la gus phyag 'tshal/ /bdag gis dus gsum bsags
pa'i

dge ba'i mthus/ /sdug bsngal gsum gyis mnar ba'i 'gro ba kun/
/rtag tu lha dang mi yi rten thob nas/ /thar pa'i grong khyer
dam par 'jug gyur cig /'di ltar bskrun pa'i dge tshogs ganggA'i
rgyun/ /

mar gyur bsod nams bye ba'i chu phran dang/ /lhan cig kun mkhyen
chos kyi rgya mtsho cher/ /zhugs nas phan bde 'phel ba'i rgyur
gyur cig /de ma thob pa'i tshe rabs kun tu yang/ /ngan song gnas
su nam yang mi

skye bar/ /dal 'byor rten bzang bslab gsum nor gyis phyug /thams
cad gzigs pa'i go 'phang myur thob shog /sras bcas rgyal ba'i
thugs rje'i byin rlabs dang/ /drang srong grub pa rnams kyi bden

@003a @#/ /tshig dang/ /chos dbyings 'gyur ba med pa'i bden pa
yis/ /rnam dag smon pa'i gnas 'di 'grub par shog / //ces/ smon
pa'i tshig 'di yang nang so bkra shis rab

brtan gyis bskul zhing/ rang nyid kyang spro ba'i 'dun pas dge
slong blo bzang chos kyi rgyal mtshan gyis smras pa'o// // ! oM
swasti/ phan bde'i 'byung gnas rgyal bstan yongs

'du'i ljon/ /rab rgyas 'gro kun thar mchog 'bras bzang la/
/spyod phyir bkra shis lhun grub chos grwa cher/ /chos sbyin
'dzad med dal 'gro'i rgyun 'di spel/ /sarba dza ga taM// //