@#/ /dri ba lhag bsam rab dkar gyi dris lan blo bzang bzhad pa'i
sgra dbyangs zhes bya ba bzhugs so/ /

@001a @##/ /na mo gu ru manydzu g+ho ShA ya/ sangs rgyas kun gyi
ye shes ni/ /ngur smrig gar gyis rol pa la/ /blo bzang rigs
brgya'i khyab bdag ces/ /snyan par grags

pa'i dpal der 'dud/ /mgon des brtse bas zab mo'i gnad/ /dri ba'i
zol gyis 'doms pa'i don/ /ji ltar bzod pa'i rnam dpyod kyis/
/gus pas thal mo sbyar te gsol/

! /rgyal bas chos phung brgyad khri dang/ /bzhi stong gsungs
pa'i dgongs gtad ni/ /sangs rgyas gnyis pa klu sgrub kyis/ /dang
por mngon par mtho ba'i chos/ /phyis ni nges par

legs 'byung ba/ /gang phyir mngon par mtho thob pas/ /rim gyis
nges par legs pa 'ong/ /zhes pa'i don du bdag gis khums/ !
/shing bzo mkhas pa'i 'phrul 'degs

@002a @#/ /'dra'i/ /thar 'dod shugs drag bskyed pa'i thabs/
/rgyal tshab dam pas gsungs pa bzhin/ /thams cad mkhyen pa rang
nyid kyi'ang/ /sdug bden nyes dmigs ma

bsams na/ /thar 'dod ji bzhin mi skye gsungs/ /'khor ba'i nyes
brgya sems pa'i tshul/ /mang yang sdug bsngal sdug bsngal gyis/
/'jigs nas thar 'dod phyugs la'ang yod/ /zag

bcas tshor ba bde ba las/ /yid 'byung phyi rol pa la'ang mchis/
/des na 'du byed rang bzhin gyi/ /zag bcas nyer len phung po
'di/ /sdug bsngal 'grub dang grub pa'i snod/ /nad dang 'bras

dang zug rngu ltar/ /dmigs nas bsgoms na byings g.yo lags/ !
/bdag cag srid las thar ba'i thabs/ /dam pa bcar gyis nges bzung
na/ /rgyal bas gsungs pa gcig chog gi /

'chang thub lhag pa'i bslab gsum lags/ ! /'khor bar skye ba'i
rtsa ba ni/ /lus can kun gyi rang rgyud kyi/ /nga dang nga yi
bar dmigs nas/ /rtog pas btags tsam ma yin pa/ /ltos med

@002b grub par 'dzin pa yi/ /bdag 'dzin lhan skyes rnam gnyis
te/ /nyon mongs can gyi ma rig pa'o/ /de ltar rgyal ba'i yum las
kyang/ /nga dang nga yir 'dzin pa yis/ /lus can 'khor bar 'khor
zhes gsungs/ /

stong nyid bdun cu pa las kyang/ /rgyu dang rkyen las skyes
dngos rnams/ /yang dag nyid du rtog pa gang/ /de ni ston pas ma
rig gsungs/ /de las yan lag bcu gnyis 'byung/ /zhes dang rin
chen phreng ba las/ /

ji srid phung por 'dzin yod pa/ /de srid de la ngar 'dzin yod/
/ngar 'dzin yod na yang las te/ /las las kyang ni skye ba yin/
/zhes dang zla ba'i zhabs kyis kyang/ /nyon mongs skyon rnams ma
lus pa/ /'jig

tshogs lta las byung zhes gsungs/ /bdag 'dzin gnyis kyi dmigs pa
la/ /khyad par yod kyang 'dzin stangs dag /mi mthun med phyir
srid rtsa ni/ /gnyis su thal ba'i skyon dang bral/ ! /rten 'brel
yan

lag bcu gnyis kyi/ /'khor tshul 'phags mchog klu sgrub kyis/ /lam
gsum thog mtha' dbus med pa/ /'khor ba'i dkyil 'khor mgal me yi/
/dkyil 'khor lta bu phan tshun gyi/ /rgyu can 'di ni 'khor

bar 'gyur/ /gsungs bzhin ngal bso med par 'khor/ /grangs nges
yan lag bcu gnyis su/ /dbyer yod de las mang mi dgos/ /nyung na
mi 'du'i skyon dang bral/ /go rims 'phen byed 'phangs pa dang/ /

@003a @#/ /'grub byed grub pa'i sgo nas des/ /'phen byed yan lag
gang zhe na/ /ma rig 'du byed rnam shes kyis/ /'phangs pa'i yan
lag ming gzugs dang/ /skye mched drug dang reg tshor ro/ /mngon

par 'grub pa'i yan lag ni/ /sred len srid pa'o grub pa yi/ /yan
lag skye ba rga shi gnyis/ /'phags mchog klu sgrub zhal snga
nas/ /dang po brgyad pa dgu nyon mongs/ /gnyis pa bcu pa las yin
te/ /

lhag ma bdun ni sdug bsngal yin/ /zhes gsungs rgyu 'bras 'gro
tshul ni/ /nyon mongs gsum las las gnyis dang/ /de las sdug
bsngal bdun 'byung zhing/ /bdun las slar yang rang 'bras kyi/ /

nyon mongs gsum 'byung rdza mkhan gyi/ /'khor lo 'khor 'dra de
srid du/ /gsum po dag las gnyis 'byung ste/ /gnyis las bdun
'byung bdun las kyang/ /gsum 'byung srid pa'i 'khor lo ste/
/nyid ni yang dang

yang du 'khor/ /zhes gsungs de yang ngan 'gro yi/ /yan lag bcu
gnyis 'jug zlog gis/ /sems pa skyes bu chung ngu'i skor/ /bde
'gro'i yan lag bcu gnyis kyis/ /zlog 'jug sems pa 'bring zhes

bya; ;de ltar rang nyams la dpags nas/ /ma gyur sems can thams
cad kyang/ /rten 'brel bcu gnyis sgo nas ni/ /'khor ba'i rgya
mtshor 'khyams pa la/ /byams dang snying rje byang chub sems/
/bskyed

@003b nas rgyal sras spyod pa la/ /slob pa skyes bu chen po
lags/ ! /nges don byang chub sems gnyis las/ /rdzogs pa'i sangs
rgyas 'grub pa yi/ /thun mong ma yin nyer len rgyu/ /kun rdzob
byang chub sems lags

te; ;gang phyir mgon po zhi ba lhas/ /de ring sangs rgyas rigs
su skyes/ /sangs rgyas sras su da gyur to/ /zhes sogs lung dang
rigs pas grub/ ! /srid las 'don thabs gtso bo ni/ /bdag med
rtogs pa'i shes

rab ste/ /srid rtsa bdag 'dzin lhan skyes phyir/ /'phags pa lhas
kyang 'di skad gsungs/ /yul la bdag med mthong na ni/ /srid pa'i
sa bon 'gags par 'gyur/ ! /sgo rtsa'i khyi sogs sems can rnams/
/mar shes sgom

tshul rnam 'grel las/ /skye ba yongs su len pa na/ /zhes sogs rig
pa'i thog ma'i mtha'/ /thug med sgrub pa'i lung rigs kyi/ /thabs
mkhas 'phrul gyis sgom zhes gsol/ ! /bdag gzhan brje bar gsungs

pa'i don/ /bdag nyid gzhan dang gzhan bdag tu/ /bsgom pa ma lags
spyod 'jug las/ /bdag nyid skyon bcas gzhan la yang/ /yon tan
rgya mtshor shes byas nas/ /bdag 'dzin yongs su dor ba dang/
/gzhan

blang ba ni bsgom par bya/ /zhes dang gzhan yang de nyid las/
/'jig rten bde ba ji snyed pa/ /de kun gzhan bde 'dod las byung/
/'jig rten sdug bsngal ji snyed pa/ /de kun rang bde 'dod las
byung/ /mang du bshad lta ci

@004a @#/ /dgos te/ /byis pa rang gi don byed dang/ /thub pa
gzhan gyi don mdzad pa/ /'di gnyis kyi ni khyad par ltos/
/gsungs bzhin rang nyid gces 'dzin 'di/ /rgud pa kun gyi 'byung
gnas dang/ /gzhan

rnams gces 'dzin yon tan gyi/ /'byung gnas mchog tu shes byas
te/ /rang nyid gces par 'dzin pa dang/ /gzhan rnams yal bar 'dor
ba'i blo/ /go sa brjes nas bsgoms pa'i mthar/ /rang don yal

bar dor nas ni/ /gzhan don 'ba' zhig bsgrub pa'i phyir/ /rdzogs
pa'i byang chub sems bskyed pa/ /bdag gzhan brje ba'i sgom tshul
yin/ ! /thun dngos dmigs pa bsgoms byas nas/ /thun mtshams

su yang dngos gzhi yi/ /dmigs pa'i grangs dang go rims sogs/
/dran shes rgya yis 'debs pa dang/ /sgom don rgyud la skye ba'i
phyir/ /tshogs gsog sgrib sbyong rgyab rten gyi/ /gsung rab blta
zhing bsams

byas na/ /dngos gzhi'i bogs 'don mchog yin zhes/ /mgon po khyod
kyis legs par bsngags/ ! /spyod lam thams cad dge sbyor du/
/'khyer bar byed pa'i thabs mkhas mchog /'gro 'chag nyal 'dug
thams

cad du/ /dran shes bag yod dang ldan pas/ /mtha' dag yon tan kun
gyi gzhi/ /sdom gsum mig bzhin skyong ba'i ngos/ /dbang po'i sgo
sdom zas tshod rig /mi nyal rnal 'byor la brtson cing/ /nyal tshe
ji ltar bya ba

@004b sogs/ /byams mgon sras po thogs med kyis/ /gsungs pa lags
shes thal mo sbyor/ ! /thun gyi grangs ni thun bzhi 'am/ /nyin
dang mtshan mo lan gsum zhes/ /thun drug ces kyang rgyud las
gsungs/ /thun tshad

gdul bya'i bla rigs kyis/ /gcig tu nges pa ma mchis te/ /mkhas
mchog padma'i ngang tshul gyis/ /ji srid nus pa de srid gsungs/
/'on kyang snga phyi'i dam pa rnams/ /dang po'i las can skyes bu
yis/ /thun chung grangs

mang dge bar bzhed/ ! /skyon med ting 'dzin sgrub pa yis/ /lus
gnad bdun dang ldan pa gces/ ! /grangs kyi sgrong tshul rnam pa
mang/ /dmigs pa rlung gnad rtsol ba'i grangs/ /gdul bya'i khams
dang bsam pa

dang; ;ting 'dzin dbye bas mtha' yas so/ ! /sgom rnams kun gyi
dang po'i mgo /rgya gar skad mtshungs rang rgyud la/ /legs par
brtag pa yin no zhes/ /zla med bla ma mchog de bzhed/ ! /ding
sang sgrib

gnyis las grol ba'i/ /sgom chen gang yin de dag la/ /mnyam rjes
'dres pa yod ces pa/ /bden par mchis so mnyam gzhag las/ /skad
cig g.yo ba med pa'i ngang/ /cho 'phrul gsum gyis gdul bya la/
/'bad rtsol med

par 'doms mdzad pa/ /mnyam rjes 'dres lugs de ltar lags/ ! /bla
ma gang du bsgom pa'i gnas/ /mdun dang spyi gtsug snying gi
dkyil/ /rang rang mos pa bzhin rung ste/ /a b+hi d+ha na'i rgyud
las kyang/ /drin dang ldan pa'i bla

@005a @#/ /ma de/ /lag pa'i mthil lam snying gi dkyil/ /lus kyi
cha shas gar bsgoms kyang/ /sangs rgyas stong gi byin rlabs
kyang/ /gang zag de yis sdud par byed/ /ces gsungs bla ma'i
grangs dang ni/ /

rnal 'byor dngos gzhi bsgom tshul dang/ /rdo rje 'chang dang
dbyer med du/ /blta dang 'od zer spro bsdu sogs/ /ji ltar byed
pa'i rim pa rnams/ /gangs ri'i khrod kyi zas gtsang sras/ /thams
cad mkhyen pa rang nyid

kyi; ;zhal las 'ongs pa'i snyan brgyud rnams/ /yi ge logs su
bris pa bzhin/ ! /dal 'byor bsams pas rten 'di la/ /snying po
len 'dod skye ba yin/ /mi rtag bsgoms pas phyi bshol 'gog ! /

dam chos sgrub la khom pas dal/ /mthun rkyen bcu ldan 'byor pa
lags/ ! /dal 'byor chos rnams rang rgyud la/ /bsams nas don ldan
bya'o snyam/ /de yang rten 'dir de las kyang/ /de lta bya zhes
rgyud steng

bsgom/ ! /mi rtag bsgom tshul grangs mang yang/ /rtsa ba gsum
dang rgyu mtshan dgu/ /thag bcad rnam gsum sgo nas ni/ /sgom zhes
nyid kyis gsungs min nam/ /de dag nang nas 'khul che ba'i/
/rgyal bas gsungs

pa dmigs pa'i mchog /nam 'chi nges med sems pa ste/ /'chi ba'i
'du shes mchog ces gsungs/ /ngan song gsum gyi sdug bsngal la/
/snying nas 'jigs pa ma skyes na/ /skyabs 'gro yang dag mi srid
ces/ /

@005b bdag nyid chen pos zhal 'ches pa'i/ /bka' las 'gong bar mi
nus te/ /gang la 'dir skyo yod min pa/ /de la zhi gus ga la yod/
/ces gsungs lung gi don gyis grub/ ! /tshig gi skyabs 'gro las
gzhan du/ /skyabs

bya'i 'jigs pas yid skrag nas/ /bla ma dkon mchog gsum po yi/
/yon tan khyad par shes pa dang/ /khas blangs gzhan du mi smra
bas/ /skrag pa'i 'jigs chen skyob pa yi/ /nus mthu yod par yid
ches nas/ /skyabs

la re ltos 'cha' ba yi/ /sems pa skyabs 'gro'i gtso bo lags/
/skyabs yul bla ma dkon mchog gsum/ /yid ngor sgom tshe lam rim
gyi/ /tshogs zhing skabs kyi man ngag gi /zhal shes bzhin zhes
gus pas gsol/ /

! /da lta'i sku gsung thugs rten rnams/ /dkon mchog gsum po
dngos min kyang/ /'di rnams la brten dkon mchog gsum/ /dran pa'i
yul du 'gyur ba dang/ /lha bcas ston pa mchog de yis/ /mdo rgyud
rgya

mtshor dkon mchog gi /rten gsum bzheng tshul bzhengs pa la/ /gus
bla bkur sti byas pa yis/ /dkon mchog gsum po dngos nyid la/
/bya ba byas par gsungs pa'i phyir/ /mchog gsum dngos ltar gus
pa lags/ ! /

bslu med dkon mchog gsum po dngos/ /grub mtha'i dbang gis sna
tshogs kyang/ /thub dbang gi ni sku gsum dang/ /mya ngan 'das
dang gang zag brgyad/ /ces dang rje btsun ma pham pas/ /rgyu
'bras kun rdzob don dam dang/

@006a @#/ /gnas skabs mthar thug skyabs rnams kyi/ /khyad par
rgyud blar gsungs bzhin 'dod/ ! /skyabs 'gro'i ngo bo i thi ba/
/bdag nyid lhag par 'jigs pa dang/ /dkon mchog skyob pa'i nus
ldan

du; ;shes las byung ba'i skyabs 'gro la/ /thams cad mkhyen pa
khyod nyid bzhed/ /'di lta'i go ba ma rnyed par/ /skyabs 'gro ba
zhes khas len pa/ /sreg 'tshed mi nus me dang mtshungs/ /zhes pa'i
bka' stsal don dang ldan/

! /sdig pa bshags par byed pa la/ /stobs bzhi gtso bo de'i nang
nas/ /gnyen po kun tu spyod pa mchog ! /dge sdig stobs ldan
'dres ma ru/ /spyod pa'i dge bas sdig pa yi/ /rnam smin 'byin
par mi byed dang/ /de

bzhin de las zlog pa dang/ /gnyis ka mgo mnyam gnyis ka yi/
/'bras bu 'byin par mi byed dang/ /sngon bsags sdig pa bshags pa
yi/ /dge ba phyis 'byung khong khro yis/ /bcom pas bshags zin
sdig pa yi/ /

'bras bu slar yang ldog pa dang/ /khong khros bcoms pa'i gang
zag gis/ /dge ba ci byas sdig pa yis/ /'bras bu mi srid byas pa
dang/ gang zag 'di dang khong khro'i sems/ /skad cig yan chad
skyes pa yi/ /skyes bus dge

ba gang byas kyang/ /don med song bar khas mi len/ /de bzhin dge
dang sdig pa dag /stobs ldan de yis stobs chung ba'i/ /rnam smin
'byin pa thag bsrings pa/ /bcoms pa'i don du mi 'dod lags/ /dge
sdig 'dres  

@006b mar spyad pa yang/ /gegs byed dag dang ma 'phrad na/ /las
rnams so sor nges pa'i phyir/ /'bras bu 'dres mar so sor myong/
/cha mnyam 'bras bu smin tshul yang/ /las kyis 'khor bar lci gang
dang/ /nye ba gang dang

goms pa gang/ /sngon byas gang yin de dag las/ /sngon ma sngon
ma rnam smin 'gyur/ /zhes gsungs ji bzhin 'bras bu 'byin/ /'on
kyang dge sdig stobs che ba/ /'dra 'dres spyad pa de yi tshe/
/phan tshun 'joms pa'ang srid

pa ste; ;skabs der byang chub sems dpa' la/ /khro dang log lta
mi bzad skyes/ /de tshe dge rtsa ci rigs 'joms/ /de ltar mgon po
zhi ba lhas/ /bskal pa stong du bsags pa yi/ /sbyin dang bde
gshegs mchod la sogs/ /

legs spyad gang yin de kun kyang/ /khong khro gcig gis 'joms
zhes gsungs/ /de bzhin dus der stong pa nyid/ /goms nas mngon
sum rtogs gyur na/ /sdig pa'i sa bon dag kyang 'byin/ /rdo rje
snying po rgyan las kyang/ /rnal

'byor gcig gcig shes byas nas/ /dben par song ste rab 'bad na/
/sdig dag tshe 'dir sangs rgyas 'grub/ /chos bdag med pa rab
bsgoms na/ /thams cad mkhyen pa khong du chud/ /ces gsungs dge
sdig phan tshun du/ /gnod

bya gnod byed gsungs pa yang/ /'di 'dra'i tshul la dgongs pa yin/
/phan tshun bcom par gsungs pa yang/ /zab mo'i lam gyis ma gtogs
par/ /sa bon 'byin pa ma yin kyang/ /da gzod rkyen dang phrad na
yang/ /

@007a @#/ /'bras bu 'byin pa bcom pa yin/ /de ltar spyod phyogs
dri ba yi/ /dbyangs can lha mo'i phyag gnyis su/ /dris lan yid
'ong baiDUrya'i/ /tam bu ra 'di kho bos phul/ ! /da ni lta sgom
las brtsams pa'i/ /

dri ba'i thog mar 'di skad ces/ /bying rmugs gnyis po gcig gam
gzhan/ /mi gcig khyad par gang gis 'byed/ /mnyam par gzhag dus
bying ba ni/ /phra rags skye tshul ji ltar 'ong/ /'di gnyis mi
skye'i gnyen po gang/ /

zhes gsungs lan du 'di ltar gsol/ /byings rmugs gnyis po tha dad
de/ /thogs med zhabs kyis nyan thos sar/ /de gnyis so sor gsungs
phyir dang/ /sgom rim las kyang rmugs pa yis/ /bying ba bskyed
par gsungs pa

dang; ;bying ba dwangs gsal tsam yod kyang/ /ngar med dmigs pa
lhod pa yi/ /lung ma bstan nam dge ba ni/ /ci yang rung ba'i
shes pa yin/ /rmugs pa lus sems rab lci zhing/ /las su mi rung
bar byed pa/ /gti mug

char gtogs mi dge ba/ /bsgribs la lung ma bstan du gsungs/ !
/ting 'dzin g.yo med bskyangs pa'i tshe/ /cung zad dmigs pa'i
ngar shor na/ /bying ba phra mos zin pa yin/ /ngar med dangs cha
yod pa na/ /bying ba

'bring gis slebs pa yin/ /dangs pa'ang med na bying ba che/ !
/de dag spong ba'i gnyen po yi/ /gtso bo dran dang shes bzhin
gnyis/ /de'i yang gtso bo dran pa yin/ ! /dran shes so so'i ngos
'dzin yang/ /dran pa dmigs

@007b rten sems gtad pa'i/ /rnam pa thun re yid byed pa/ /khyad
par gsum ldan sems byung yin/ /shes bzhin mnyam par bzhag pa'i
ngang/ /bying rgod byung dang ma byung ba/ /zur gyis blta ba'i
sems byung ni/ /bya ra ba dang mtshungs pa ste/ /g.yeng

med dran pa'i 'bras bu lags/ ! /yengs dang ma yengs pa yi don/
/dmigs rten gang la dmigs pa'i sems/ /dran shes rgya las ma grol
bar/ /g.yo med rtse gcig gnas pa la/ /'dir bstan ma yengs pa
zhes brjod/ /

cig shos de yis rtogs par nus/ ! /yid ni 'phro dang mi 'phro
ba'ang/ /dran shes lam nas bsrangs ba'i tshe/ /sngar dang khyad
par med snyam sems/ ! /bde gsal mi rtog ces grags kyang/ /bde ba
ting 'dzin mtha' dag

gi; yan lag 'byung ba ma yin kyang/ /zhi gnas lhag mthong mtshan
nyid pa/ /shin sbyangs bde bas zin pa yin/ /gsal ba dmigs rten
gsal ba dang/ /mi rtog dmigs rten la dmigs nas/ /de las gzhan du
mi

rtog pa'o/ /dmigs bcas dmigs med ces pa yang/ /dmigs rten dbye
ba'i khyad par gyis/ /don dam dmigs pa med pa dang/ /kun rdzob
dmigs bcas shes kyang brjod/ /des na kun rdzob bden pa la/
/dmigs

pa'i zhi lhag gnyis ka yang/ /dmigs bcas sgom du 'dod pa yin/
/don dam dmigs med ces pa yang/ /bden 'dzin dmigs gtad rdul tsam
yang/ /med phyir de skad ces bya ste/ /'phags pa 'da' ka ye shes

@008a @#/ /las; ;chos rnams rang bzhin 'od gsal bas/ /dmigs med
'du shes bsgom gsungs kyi/ /dmigs pa gtan nas med pa min/ /'di
las 'phros pa'i don rnams ni/ /dmigs rten med par

tsom 'jog tu/ /'phro ba bkag nas bsgom pa de/ /zhi lhag zung
'brel stong nyid dang/ /phyag chen sor sdud rnal 'byor sogs/
/sgom par 'dod la khas blangs sogs/ /'gal ba'i gnod byed ston pa
yin/ /rgyal

ba'i gsung rab mtha' dag dang/ /dgongs 'brel mkhas grub gzhung
lugs don/ /'dor ba bdag cag rmi lam du/ /mi 'dod phyir na man
ngag tu/ /grags pa rnams kyang gsung rab dang/ /mthun na legs
kyi mi mthun

tshe; ;'dor spus gdams ngag rnams la 'bab/ /des na sgom la dpyad
'jog gnyis/ /byed cing byed pa'i rgyu mtshan yang/ /thar pa 'dod
pas zhi gnas dang/ /lhag mthong nges par bsgrub dgos phyir/ /so
sor rtog pa'i

shes rab kyis/ /yang yang dpyad cing sgom pa dang/ /ting nge
'dzin gyi dgrar gyur pa'i/ /'phro rgod gcig par mi 'gyur lags/
/ji ltar mkhas pa tsam gyis kyang/ /lung dang rigs pas dpyod pa
mang/ /de 'dra ji tsam mang nas

kyang/ /'phro rgod mang phyir mkhas pa las/ /blun po rtogs pa
skye myur zhes/ /thos bsam sgom pa'i gegs byed pa/ /dam chos
spong ba'i rnam thar lags/ ! /'ga' zhig nges don sgom pa'i tshe/
/'phro rgod gegs

@008b yin mi dpyod par/ /'jog sgom bya zhes smras pa yang/
/dpyad sgom 'phro rgod bzung ba'i skyon/ /'phro rgod mi gcig
rgod pa ni/ /'dod chags char gtogs ma zhi bar/ /kun las btus su
gsungs pa yin/ /'phro bde

las rgya che ste/ /zhe sdang sogs kyi 'phro ba'ang yod/ /gnyis
kas 'jog sgom ma zad kyi/ /dpyad sgom la yang bar du gcod/ /zhi
gnas sgom dang mi gcig ste/ /sgom la zhi gnas kyis ma khyab/ !
/bdag cag 'jog

sgom byed pa'i tshe/ /dmigs rten la ni sems btags nas/ /rtse gcig
'jog par 'dod pa lags/ /gzhan dag dmigs pa gang la yang/ /'di
'jog mi dgos rang gi sems/ /'phro ba bkag nas tsen ne 'jog /de

ltar 'jog pas 'jog sgom zer/ /dmigs pa 'khyer rgyu gang yang
med/ /sems de hed de ba de la/ /'jog pa phyag rgya chen po dang/
/snyan nas snyan brgyud yin pa sogs/ /'dod pa brjod de thugs
brtse bas/ /lung rigs

lam nas drangs pa yis/ /brgal zhing dpyad par mdzad rnams la/
/thams cad mkhyen pa de de bzhin/ /gsal ba las gzhan kun mkhyen
kyang/ /lan gyis dbul na bdag ltas ci/ /ji snyed chos rnams ma
lus pa/ /bden pa'i

rang bzhin dang bral ba/ /sgom rgyu'i zab mo stong nyid yin/
/sbyin pa'i 'khor gsum bden med du/ /rtogs pa'i shes rab kyis
zin pa'i/ /sbyin pa 'khor gsum yongs dag lags/ /'di yang gang
du'ang ma grub pa/ /sems

@009a @#/ /kyi rgyu ba bsdus tsam de/ /phyag chen sgom par bzhed
rnams la/ /brtse ba'i zol gyis dris pa yin/ ! /gang zag rang
nyid bden grub tu/ /med pa'i rgyu mtshan rang rgyud kyi/ /ngar
'dzin lhan skyes 'dzin stangs

yul; ;rang dbang bdag tu snang ba 'di/ /snang bzhin grub na bden
grub yin/ /de ltar grub pa gtan nas med/ /de bzhin kun la sbyor
lags kyi/ /mos mnos tsam la mi 'dod lags/ /bden med cir yang ma
grub

kyang; ;cir yang ma grub bden med kyi/ /don du 'dod pa ma lags
so/ /gzhan yang bden par ma 'dzin dang/ /bden med nyid du 'dzin
pa la/ /khyad par yod de gnyis min gyi/ /phung gsum 'dzin pa
mang phyir ro/ /mdor

na bum pa snam bu sogs/ /bden nam bden pa min snyam du/ /the
tshom blos kyang bden grub dang/ /bden med gang du'ang 'dzin ma
lags/ ! /sems ni kha dog dbyigs sogs su/ /ma mthong sems mthong
'dod

pa dang/ /de nyid kha dog dbyibs sogs su/ /ma grub sems ma grub
pa dang/ /de ltar mthong bas sems kyi ni/ /chos nyid mthong bar
ngo sprod pa/ /gsum po rigs dang mi rigs pa/ /brtse bas gsal bar
bstan pa'i

phyir; ;'dir 'bad ngal bas ci zhig bya/ / ! /sems kyi ngo bo
skad cig ma/ /blta tshul 'phags pa klu sgrub kyi/ /man ngag gzugs
nas rnam mkhyen bar/ /chos kun snang ba ci shar yang/ /nges don
lung rigs la byang

@009b bas; ;mtha' bzhi yod med skye 'gog dang/ /rnam lnga rnam
bdun rten 'brel dang/ /gcig dang du bral la sogs pa'i/ /rigs pas
rang bzhin med pa bsgom/ /yang na sbyangs dang ma sbyangs pa/
/gnyis kas cha dang cha ca

dang;/ /gdags gzhi btags chos rtog pa dang/ /snang tshul dang
gnas tshul la/ /so sor brtags nas bden dngos dang/ /bral ba'i
ba'i rang bzhin sangs rgyas nas/ /dmyal ba'i bar du sbyar nas
bsgom/ /sgom

'jog byas pas bdag 'dzin gyi/ /zhen yul 'gog par mi nus lags/
/rnam rtog rim gyis skyes pa la/ /bltas pas rang yal song ba la/
/chos sku'i rang zhal mthong ba dang/ /chos kun rang bzhin stong
pa nyid/ /

rtogs par 'dod na kun du 'khrul/ /'on kyang de ltar sgom pa de/
/soms gnas bsgrub pa'i thabs su dge ! /sems kyi skad cig snga
phyi la/ /blta ba'ang 'dus byas skad cig gis/ /'jig phyir mi
rtag sems pa

dang; ;mthun gyi stong nyid sgom pa min/ /bye mdo gnyis kyi 'dod
pa ltar/ /rtag gcig rang dbang can dang ni/ /rang rkya thub pa'i
rdzas yod kyi/ /bdag 'gog tshul dang 'dra ba lags/ ! /lung du
nyan thos 'ga' zhig gis/ /

stong nyid mngon sum rtogs pa'i tshe/ /sems kyi chos nyid mngon
sum du/ /rtogs phyir rang bzhin rnam dag gi /chos su mthong bar
gsungs pa dang/ /chos dbyings bstod par sa dang por/ /mthong
spang dri bral chos kyi sku/ /

@010a @#/ /mthong bar gsungs kyi stong nyid la/ /chos skur gsungs
pa'i gsung rab med/ /'dus byas chos sku rgyud ldan gyi/ /sems
can nam mkha'i padmo dngos/ /'on kyang sems kyi chos nyid de/
/dri ma dag pa'i

gnas skabs su/ /rang bzhin rnam dag chos kyi skur/ /'gyur bas
gtags te sman smros/ ! /don dam so sor dpyod pa yi/ /shes rab
kyis ni blta tshul ni/ /sngon du song ba ma yin pa/ /blo gzhan
gang gis bltas na yang/ /

chos sku thob pa lta ci smos/ /stong nyid rtogs pa'ang srid ma
lags/ ! /don dam dpyod pa'i rig shes kyis/ /bltas na rnam rtog
gnas lugs sam/ /ngo bo'am gshis de rnyed pa de/ /stong pa nyid
dam bde gshegs

kyi; ;snying po lags shes gus pas gsol/ /mdor na klu sgrub lugs
bzangs kyi/ /lta dang 'gal ba'i lta ba de/ /phun tshogs yon tan
brgya ldan zhes/ /ci 'dras ji tsam brjod na yang/ /thams cad
mkhyen pa lta zhog gi /thar

pa tsam yang mi thob ces/ /mgon po khyod kyis bka' stsal pa/
/zla ba'i zhabs kyi bzhed pa bzhin/ /legs par gsungs shes thal
mo sbyor/ ! /des na klu sgrub bzhed pa bzhin/ /mtha' dag chos
rnams ma lus pa'i/ /

rang bzhin rdul tsam med pa dang/ /ming rkyang btags yod tsam
zhig gi /rten 'brel bslu ba med pa'i tshul/ /mi 'gal 'du ba'i
nges rnyed nas/ /'khrul med thabs shes lam bgrod de/ /sku gnyis
mngon du 'gyur bar mdzod/

@010b ! /de ltar rje btsun bla ma yi/ /thugs rje'i rgya mtsho
cher g.yos te/ /dri ba'i zol gyis zab mo'i gnad/ /'doms pa'i mu
tig gru char phab/ /byang phyogs nor gyi blo gros ma/ /thub
bstan rdzogs pa'i du gu la'i/ /stod g.yogs

mchog gis brgyan pa ni/ /zla shel zhun mas byugs pa bzhin/ /rin
chen 'byung gnas ltar zab cing/ /sa 'dzin dbang po ltar brling
pa'i/ /bka' 'dis mkhas rlom mtha' dag gi /rnam dpyod the tshom
dpyad thag 'dzin/ /phyogs

lhung dug chus rab myos shing/ /blo gros mun par skyabs bcas
pa'i/ /dam par bsnyems pa phal cher gyi/ /snyingla rno ba'i tsher
ma nyid/ ! /rgyal ba khyu mchog drang po'i lam/ /gshegs pa'i
bshul nas bgrod rnams kyang/ /

mad po mos pas yan lag mchog /'dud kyang dris lan phra mo'i
'ben/ /'bigs byed sgro ldan dag gis dben/ /phal cher rigs pa'i
dbang phyug gis/ /thabs byung de rgyu lkog gyur pa/ /de 'chad
dka' zhes gsungs pa bzhin/ /

de phyir zab don gser sbyangs kyi/ /dri tshig mched sdong cher
'phags pa/ /mdzes byed dris lan rgyan bzang po/ /chos kyi rgyal
mtshan dad pas phul/ /'on kyang bdag blo nyams chung zhing/
/sbyangs stobs phra bas nongs mchis na/ /

dbang gyur mkhas pa'i tshogs spyi dang/ /rje btsun bla ma'i drung
du bshags/ /gang yid dang ba'i mtsho nang du/ /lhag bsam rab dkar
dri lan gyi/ /gza' skar snang ba bkra ba yang/ /rang dbang ma
yin bla ma'i drin/ /spyi gtsug

@011a @#/ /dam pa la 'dud pas/ /rna bar thos pa'i rgyun lam
byang/ /snying gi bum bzang legs bshad kyis/ /go skabs yangs pa
bcom 'di mtshar/ /'di bzhin rmad byung bkod mdzes su/ /shAkya'i
tog dang

'jam dbyangs bzhin/ /'di lta'i zab mo'i gnad rnams la/ /dri
zhing gsol ba'i re ba mchis/ /'dis mtshon rnam dkar phung po ci
mchis pa/ /tshe rabs kun tu yab rje bla ma des/ /bdag cag 'bral
med dgyes

bzhin rjes bzung ste/ /bka' bzhin khyod mnyes kho na sgrub gyur
cig /de yi mthu las lung rtogs dam chos kun/ /rgyal ba'i dgongs
pa ji bzhin legs bzung ste/ /mkha' mnyam 'gro 'di bdag nyid gcig
pu yis/ /

sgrol ba'i ded dpon mchog tu bdag gyur cig /ces lhag bsam rab
dkar gyi dris lan blo bzang bzhad pa'i sgra dbyangs zhes bya ba
'di nyid/ srid pa'i dga' ston chu shing gi snying po ltar mthong
nas/ dben pa'i ri khrod du thams

cad mkhyen pa sgrub pa la rtse gcig tu brtson pa/ kong po dge
slong blo bzang rgya mtsho dang/ mnga' ris dka' bcu pa dge slong
brtson 'grus rgyal mtshan dang/ dge slong blo bzang phun tshogs
rnams kyis/ bka' 'di'i don khong du

chud na nyams len gyi gnad mang po la khyad par che bas/ lan
zhig cis kyang bgyi ba dgos shes nan cher bskul ba la brten nas/
rje thams cad mkhyen pa rang nyid kyi gsung rab rnams la 'dris
par byas ngos/ dgongs

@011b pa yang dag par brtags te/ tshig gi spros pa dor nas snying
por dril yang lung rigs kyi lam nas drangs te spros na/ lhag par
rgyas par yang 'gyur ba'i tshul du yab rje dam pa de nyid la
sgrub pa'i mchod par dmigs te/

mdo rgyud dam pa'i man ngag 'dzin pa'i spong ba pa blo bzang
chos kyi rgyal mtshan gyis chos grwa chen po bkra shis lhun po
dpal gyi sde chen phyogs thams cad las rnam par rgyal ba'i gtsug
lag khang du sug bris su bgyis

pa'o; ;'dis kyang bstan pa rin po che phyogs dus thams cad du
dar zhing rgyas la yun ring du gnas par gyur cig / //! oM swa
sti/ phan bde'i 'byung gnas rgyal bstan yongs 'du'i  

ljon/ /rab rgyas 'gro kun thar mchog 'bras bzang la/ /spyod
phyir bkra shis lhun grub chos grwa cher/ /chos sbyin 'dzad med
dal 'gro'i rgyun 'di spel/ /sarba dza ga taM// //