@#/ /bla ma dang yi dam 'jam pa'i dbyangs dbyer ma mchis
pa la phyag 'tshal lo/ /rje btsun 'jam pa'i

dbyangs kyis chos kyi rgyal po tsong kha pa chen po la dngos su
stsal ba'i zab mo dbu ma'i lta ba nyams su len pa'i tshul la
gnyis/ sngon 'gro dang/ dngos gzhi'o/ /dang po skyabs 'gro sems
bskyed tshad med bzhi

bsgom pa sngon du btang/ rang nyid rje btsun 'jam pa'i dbyangs
su gsal ba'i spyi gtsug tu byin rlabs nye brgyud kyi bla ma
rnams mtho brtsegs su bsgoms pa la ye shes pa bcug /bsag sbyang
gi gnad bsdus pa'i

@215a @#/ /yan lag bdun pa phul/ byin rlabs nye brgyud nas 'byung
ba bzhin gsol ba 'debs pa gdung shugs drag pos rgyud dang 'dres
nges pa bya'o/ /gnyis pa ni/ gsung rab tshad ldan

rnams su bshad pa'i rim pa'i dbang du byas na/ thog mar chos kyi
bdag med gtan la phab/ de rjes gang zag gi bdag med gtan la phab
kyang/ bsgom pa'i tshe/ dang por gang zag gi bdag med bsgom/ de

rjes chos kyi bdag med bsgom dgos te/ ting nge 'dzin gyi rgyal
por/ ji ltar khyod kyis bdag gi 'du shes ni/ /shes pa de bzhin
kun la blos sbyar bya/ zhes gsungs pa'i phyir/ des na de la
gnyis/ gang zag

gi bdag med bsgom tshul dang/ chos kyi bdag med bsgom tshul lo/
/dang po ni/ rgyal ba'i gsung rab rnams su rigs pa'i rnam grangs
mtha' yas pa'i sgo nas bdag med gnyis bsgom tshul gsungs kyang/

rje bla mas lam rim che chung du/ gcig du bral gyi sgo nas gtan
la 'bebs par gsungs pa yin te/ de ltar gtan la phab pas las dang
po ba rnams kyi blo yul du 'char sla ba yin pa'i phyir/ de la
gnad bzhi ste/

dgag bya'i snang tshul nges pa'i gnad/ khyab pa nges pa'i gnad/
bden pa'i gcig bral nges pa'i gnad/ bden pa'i du bral nges pa'i
gnad do/ /dang po ni/ dgag bya'i snang tshul nges dgos te/ chos
gang dang gang

@215b yin pa de bden par grub pa'i don spyi blo yul du ma shar
na/ chos de dang de bden par grub pas stongs pa'i don spyi blo
yul du mi 'char ba'i phyir te/ spyod 'jug las/ btags pa'i dngos
la ma reg par/ /de yi dngos med 'dzin

ma yin/ zhes gsungs pa'i phyir/ des na thog mar nga'o snyam du
'dzin pa'i blo la gsum yod de/ ming tsam brda' tsam rtog pas
btags tsam gyis khyad par du byas pa'i nga'o snyam du 'dzin pa'i
blo zhig dang/ rang bzhin gyis

grub pas khyad par du byas pa'i nga'o snyam du 'dzin pa'i blo
zhig dang/ de gnyis gang gis kyang khyad par du ma byas pa'i
nga'o snyam du 'dzin pa'i blo zhig dang gsum yod/ dang po ni/
dbu ma'i lta ba rnyed pa'i gang zag ma gtogs/

gzhan gyi rgyud la mi 'byung/ gnyis pa ni ngar 'dzin lhan skyes
nga'i 'dzin tshul yin zhing/ gsum pa ni so so skye bo tha mal
pa'i rgyud kyi nga 'jog byed kyi tha snyad pa'i tshad ma zhig la
byed/ de'i nang nas ngar 'dzin lhan

skyes kyis nga'i 'dzin tshul gsal bar bshad na/ rang cag rnams
gnyid mthug po log bzhin pa'i gnas skabs tshun chad na/ nga nga
snyam du snying gi dkyil na lhang lhang 'char ba yod cing/ khyad
par du rang gis

nyes pa ma byas pa la/ gzhan gyis khyod kyis nyes pa 'di dang
'di lta bu zhig byas so zhes bsnyon btsugs pa na/ ngas nyes pa
de lta bu ma byas pa la/ 'dis nga la bsnyon 'di lta bu 'dzugs
pa/ nga nga snyam du 'dzin

@216a @#/ /pa snying gi dkyil na lhang lhang 'char ba yod pas/ de
lta bu'i tshe/ ngar 'dzin lhan skyes kyis nga'i 'dzin tshul gsal
bar yod pas/ blo ma mo ngar 'dzin lhan skyes kyi steng du rgyun
chags su bzhag /

blo'i cha shas phra mo zhig gis ngar 'dzin lhan skyes kyis nga
gang du bzung/ tshul ji ltar bzung snyam du brtag par bya'o//
de'i tshe ngar 'dzin lhan skyes kyis nga gang du bzung na/ rang
gi lus sems gnyis sam/

phung po lnga las don gzhan du gyur par min la/ lus sems gnyis
re re ba dang/ gzugs kyi phung po la sogs pa'i phung po lnga re
re ba'i steng du min kyang/ lus sems gnyis tshogs tsam pa'am
phung po lnga

tshogs tsam pa'i spam me ba de'i steng du rtog pas btags tsam min
par/ dang po nyid nas grub grub par bzung ba de/ ngar 'dzin lhan
skyes kyis nga'i 'dzin tshul yin pas/ tshul 'di nyid gzhan gyis
bshad pa'i

tshig spyi tsam min par/ rang rgyud la bkar te rjen cer gyis nges
par byed pa ni/ gnad dang po dgag bya'i snang tshul nges pa'i
gnad do// gnyis pa khyab pa nges pa'i gnad ni tshig gsal las/
bdag tu bzung ba'i yul

de yang phung po'i rang bzhin can nam/ phung po las don gzhan du
gyur grang/ zhes khyab pa nges pa'i gnad gsungs pa 'di nyid rang
rgyud la bkar nas nges par byed pa ste/ nga yang nga'o snyam du
snying gi dkyil nas

@216b 'char ba'i blos bzung ba ltar gyi nga de/ phung po lnga'i
steng du grub na/ phung po lnga'i steng du de dang gcig tu grub
bam/ de'i steng du de dang tha dad du grub/ grub tshul de las
gzhan pa'i phung po lnga'i steng du grub tshul phung gsum

pa gtan nas mi srid par thag chod par nges pa ni/ khyab pa nges
pa'i gnad do// gsum pa ni/ ngar 'dzin lhan skyes kyis bzung ba
ltar gyi nga de phung po lnga'i steng du phung po lnga dang gcig
tu grub bo snyam na/ de ltar ma grub ste/ de lta

grub na bdag khas len pa don med du thal ba dang/ bdag du mar
thal ba dang/ bdag skye 'jig byed par thal ba'i nyes pa rnams su
'gyur ba'i phyir/ dang po ma grub na/ ngar 'dzin lhan skyes kyis
bzung ba ltar gyi nga de

phung po lnga'i steng du phung po lnga dang gcig tu grub na bdag
khas blangs pa don med du thal ba'i skyon yod de/ spyir na
nga'am bdag de phung po lnga'i nye bar len pa po dang/ phung po
lnga po de bdag gi nye bar blang bya yin la/

ngar 'dzin lhan skyes kyis bzung ba ltar gyi nga de phung po
lnga'i steng du phung po lnga dang gcig tu grub na/ de rang
bzhin gyis grub pa'i gcig tu 'gyur/ de ltar na de cha med kyi
gcig tu 'gyur pas/ des na cha med la nye ba

len pa po dang/ nye bar blang bya'i rnam gzhag mi 'thad pa'i
phyir/ de'i phyir na de ltar bzung ba ltar gyi nga de phung po
lnga'i steng du gcig tu ma grub snyam du bsam mo// rtags gnyis
pa ma grub na/ ngar 'dzin lhan skyes

@217a @#/ /kyis bzung ba ltar gyi nga de phung po lnga'i steng du
phung po lnga dang gcig tu grub na/ bdag du mar thal ba'i skyon
yod de/ gang zag gcig la phung po rigs mi 'dra ba lnga yod pa
ltar du/ nga yang rgyud

tha dad pa lngar thal ba dang/ yang na gang zag gcig gi rgyud
kyis bsdus pa'i nga gcig yin pa bzhin du phung po lnga yang gcig
tu thal bar 'gyur ba'i phyir/ des na/ de ltar bzung ba ltar gyi
nga de phung po lnga'i

steng du phung po lnga dang gcig tu ma grub snyam du bsam mo//
rtags gsum pa ma grub na/ ngar 'dzin lhan skyes kyis bzung ba
ltar gyi nga de skye 'jig byed par thal/ de phung po lnga dang
gcig gang zhig /phung

po lnga po de skye 'jig byed pa'i phyir/ 'dod na nga tsam skye
'jig byed pa la nyes pa med kyang/ ngar 'dzin lhan skyes kyis
bzung ba ltar gyi nga de skye 'jig byed na/ de rang bzhin gyis
grub pa'i skye 'jig byed par

song bas/ des na de ltar bzung ba ltar gyi nga de skye 'jig byed
pa'i/ skad cig snga phyi'i cha so so ba de rnams gcig yin nam
tha dad yin/ dang po ltar na tshe snga phyi'i nga dang tshe 'di'i
nga gsum po cha med gcig

yin par thal/ de gsum rang bzhin gyis grub pa'i gcig yin pa'i
phyir/ gnyis pa ltar na/ spyir tha dad tsam la 'brel med tha dad
kyis ma khyab kyang/ de ltar bzung ba ltar gyi nga de skye 'jig
byed pa'i skad

@217b cig snga phyi'i cha so so ba de rnams tha dad yin na/
'brel med tha dad du song bas/ nga de'i tshe de'i dus na rgyal po
nga las nu zhes bya bar gyur to// zhes skye ba dran pa'i rnam
gzhag gsungs pa mi 'thad par thal/ tshe snga phyi'i

nga dang tshe 'di'i nga gsum 'brel med tha dad yin pa'i phyir/
dper na lhas byin gyi rgyud la nga de'i tshe de'i dus na mchod
sbyin du gyur to/ zhes skye ba dran pa mi 'byung ba bzhin no//
gzhan yang/ de ltar bzung ba ltar

gyi nga de skye 'jig byed pa'i skad cig snga phyi'i cha so so ba
de rnams tha dad yin na/ rang bzhin gyis grub pa'i tha dad du
'gyur bas/ de ltar na 'brel med tha dad du 'gyur/ de ltar na las
ma byas pa dang phrad pa dang/

byas pa chud zos pa'i nyes pa rnams su 'gyur ba'i phyir/ des na
de ltar bzung ba ltar gyi nga de phung po lnga'i steng du phung
po lnga dang gcig tu ma grub snyam du bsam mo// bzhi pa ni/ ngar
'dzin lhan skyes kyis bzun

ba ltar gyi nga de phung po lnga'i steng du phung po lnga dang
gcig tu ma grub kyang/ de'i steng du de dang tha dad du grub bo
snyam na/ de ltar bzung ba ltar gyi nga de phung po lnga dang
'brel med don gzhan yin par thal/ de phung po lnga'i

steng du phung po lnga dang rang bzhin gyis grub pa'i tha dad
yin pa'i phyir/ 'dod mi nus te/ gzugs kyi phung po la sogs pa'i
phung po lnga re re nas bsal ba'i 'og tu de 'dra'i nga de bstan
du yod dgos pa las de ltar

@218a @#/ /du med pa'i phyir/ gzhan yang/ nga tsam phung po lnga
'dus byas su mtshon pa'i mtshan nyid ma yin par thal/ nga phung
gnyis 'brel med tha dad yin pa'i phyir/ 'dod na/ de 'dus byas ma
yin par

thal/ 'dod pa'i phyir/ 'dod mi nus te/ nga tsam zhig /skye ba
thams cad du 'jug par gsungs pa'i phyir/ gzhan yang phung po
lnga tshogs tsam pa la brten nas nga'o snyam pa'i blo skye ba mi
'thad par thal/ nga phung gnyis

'brel med tha dad yin pa'i phyir/ des na/ de ltar bzung ba ltar
gyi nga phung po lnga'i steng du phung po lnga dang tha dad du
ma grub snyam du bsam mo/ de ltar gnad bzhis dpyad pa byas pa la
brten nas/ de ltar bzung ba

ltar gyi nga de rdul tsam yang med par nges pa na/ dbu ma'i lta
ba dang por rnyed pa dang/ rig shes rjes dpag gis stong nyid
rtogs pa zhes bya zhing/ de yang tshe rabs snga ma rnams su stong
nyid bsgom pa'i dge rtsa

sman pa zhig yin na/ de lta bu'i stong nyid rtogs pa na dbul pos
gter rnyed lta bu'i dga' spro dpag tu med pa skye bar 'gyur te/
'jug pa las/ so so'i skye bo'i dus na'ang stong pa nyid thos
nas/ /nang du rab tu

dga' ba yang dang yang du 'byung/ zhes gsungs pa'i phyir/ tshe
rabs snga ma nas stong nyid bsgom pa la ma 'dris pa zhig yin na/
skrag pa skye bar 'gyur te/ tshe rabs dpag tu med pa nas ngar
'dzin lhan skyes kyis

@218b bzung ba ltar gyi nga de phung po lnga'i steng du dang po
nas grub grub par bzung ba de bkag pa na skrag pa chen po skye
ba yin pa'i phyir/ de ltar gnad bzhi'i dpyad pa byas pa la brten
nas/ ngar 'dzin lhan skyes kyis bzung ba ltar

gyi nga bkag tsam gyi med dgag de nyid nges pa'i nges shes rgyun
skyong ba ni/ mnyam gzhag nam mkha' lta bu'i lta ba skyong tshul
dang/ mnyam gzhag de las langs nas bltas pa na/ ming tsam brda'

tsam gyis khyad par du byas pa'i phung po lnga'i steng du nga
bsnyon med du 'char zhing/ des mtshon nas 'khor 'das kyis bsdus
pa'i chos thams cad sgyu ma lta bu'i rnam rol tu blta ba ni/
rjes thob sgyu ma lta bu'i rnal

'byor yin no// gnyis pa ni/ shing rta'i yan lag tshogs tsam gyi
steng du rtog pas btags tsam ma yin par/ shing rta 'dzin pa'i
rtog pa la/ gang la yang bltos med kyi shing rta zhig yod par
snang zhing 'dzin pa

de/ shing rta rang bzhin gyis grub pa'i snang tshul dang 'dzin
tshul yin la/ des na de 'dra'i blos bzung ba ltar gyi shing rta
de chos can/ shing rta'i yan lag tshogs tsam gyi steng du ma grub
par thal/ de'i steng du gcig tu

yang ma grub/ de'i steng du du mar yang ma grub pa'i phyir/
khyab ste/ grub na gcig dang du ma gang rung du grub dgos pa'i
phyir snyam du bden med la nges shes 'dren cing/ des mtshon nas
'dus byas dang 'dus ma byas kyi chos

@219a @#/ /thams cad dang/ gzugs nas rnam mkhyen gyi bar gyi chos
thams cad gcig du bral gyi sgo nas bden med du nges par bya
zhing/ de ltar nges par byas pa la brten nas/ rang bzhin gyis

grub pa bkag tsam gyi med dgag de nyid la mnyam par bzhag pa'i
mnyam gzhag nam mkha' lta bu'i rnal 'byor dang/ de las langs
pa'i rjes thob tu 'dus byas 'dus ma byas la sogs pa 'khor 'das
kyi

chos rnams ming rkyang btags yod brdzun pa bden stong sgyu ma
lta bu'i rnam rol du blta ba'i rjes thob sgyu ma'i rnal 'byor
gnyis/ res 'jog tu nyams su blangs pa la brten nas thar pa'i sa
bon brtan par byed cing/

de nyid thabs byang chub kyi sems kyis zin par byas nas zung
'brel du bsgoms pas/ myur du rdzogs pa'i sangs rgyas kyi go
'phang dam pa thob par 'gyur ro// zhes pa sde snod 'dzin pa 'ga'
la zin thun du bshad pa/

slar rang gi mig sngar phab ste dag par bgyis pa 'di yang chos
smra ba'i dge slong blo bzang chos kyi rgyal mtshan gyis sbyar
ba'o// //