@#/ /swa sti/ blo gros padmo yon tan sbrang rtsis bltams/ /grags pa'i me tog phyogs kun rna ba mdzes/ /sangs rgyas las kyang rnam par sangs rgyas pa'i/ /rje btsun bla ma brtse ba'i spyan gyis gzigs/ /thog med @023b dus nas las ngan bsags pa'i mthus/ /ngan song gsum sogs 'jigs rung skyi g.ya' ba'i/ /mi khom gnas su sngon chad gtan yul byas/ /khyod kyi thugs rje'i gzhan dbang kho na las/ /da res rnyed dka'i rten bzang thob na yang/ /tshe 'di'i 'dod chen gdon gyis snying zin pas/ /'di nang 'khri ba chod pa'i brtson 'grus kyis/ /nyin mtshan chos kyis 'da' ba dka' mod na'ang/ /rtag 'dzin tshe 'di'i 'dun ma'i grabs gshom gyis/ /las ngan mi dge'i bya bas dus 'da' ba/ /mig can g.yang la mchong ba lta bu yi/ /khrel med smyon pa bdag la thugs rjes gzigs/ /khyod kyi gsung gi gces pa'i mdzod rnams la/ /thos bsam bsgom pa tshul bzhin bsgrub sems kyang/ /lag len thog tu khel ba mi gda' bas/ /mgon po thugs rje'i lcags kyus skad cig la/ /mi pham chos kyi mdun sar drang du gsol/ /de tshe lung dang rtogs pa'i dam chos kun/ /rgyud la mngon du byas nas 'gro ba kun/ /rgyal ba'i go 'phang mchog la 'god par shog /ces shAkya'i dge slong blo bzang chos kyi rgyal mtshan gyis thogs med du smras pa'o// //