@#/ /rje btsun bla ma dam pa sangs rgyas ye shes la bstod 
pa dngos grub kyi 'byung gnas ces bya ba/ sangs rgyas kun 
gyis bsngags pa'i zab mo'i lam/ /ji bzhin

gzigs pa'i ye shes mi dman zhing/ /gzhan la 'doms pa'i blo gros
dpal mnga' ba/ /bla med dge ba'i bshes la phyag 'tshal lo/ /lha
bcas 'gro ba'i 'dren pa shAkya'i tog /zhing 'dir rmad byung
mdzad

@003b pas rol pa'i tshe/ /rlabs chen byang chub mchog tu thugs
bskyed nas/ /mkhas dang grub pa'i tshul 'dzin khyod phyag 'tshal/
/blo bzang bstan pa rin chen rgya mtsho las/ /dri med blo gros
yangs pa'i ded dpon gyis/ /rim gnyis

yid bzhin nor bu'i dpal blangs nas/ /bstan pa'i rgyal mtshan
'dzin pa khyod phyag 'tshal/ /gzhon nu nyid nas rnam dag nges
'byung gis/ /srid 'byor 'dod pas brtas pa'i sems spangs nas/
/dran dang shes bzhin bag

yod mthu ldan pa/ /ngur smrig 'dzin pa'i dbang po khyod phyag
'tshal/ /tshe rabs du mar legs par sbyangs pa'i mthus/ /dpal ldan
mdo rgyud kun gyi de nyid don/ /thos pa'i mod la ji bzhin mngon
gyur pa/ /'jam dbyangs bla

ma'i zhabs la phyag 'tshal lo/ /rdo rje 'chang dbang blo bzang
don grub zhabs/ /gang de'i snyan pa'i sgra dbyangs cher g.yo
ba/ /rna ba'i dbang por lhung ba'i mtshams sbyor gyis/ /zhabs
rdul spyi bos reg pa khyod phyag 'tshal/

mgon de'i zhal gyi padmo las 'ongs pa'i/ /khon med snying po'i
legs bshad bdud rtsi yis/ /khyod thugs rnyog bral dag pa'i bum
bzang ni/ /ma lus legs par gtams pa khyod phyag 'tshal/ /bu ram
shing pas mi

pham mgon la bzhin/ /gnyis med gsung pa'i ring lugs bla na med/
/dam chos rgyal srid skyong bar dbang bskur ba'i/ /kun mkhyen
chos kyi rgyal po khyod phyag 'tshal/ /byams dang snying rje lhag
bsam rnam dag las/ /byang

@004a @#/ /chub sems gnyis cha shas yongs su rdzogs/ /rgyal sras
spyod pa'i 'od dkar gyis mdzes pa'i/ /yon tan bdud rtsi'i 'byung
gnas khyod phyag 'tshal/ /rnam dag rang bzhin rtogs pa'i mnyam
gzhag

dang/ /gang snang 'khor lor 'ching ba'i rnal 'byor dang/ /'gyur
med bde stong rdo rje'i thugs mnga' ba'i/ /zung 'jug rdo rje
'dzin pa khyod phyag 'tshal/ /lhan skyes bde chen mdzes ldan sgyu
ma'i skus/ /rnam rol khyab bdag

dpal ldan dang po'i mgon/ /'gro la brtse bas bskyod pa'i zlos
gar gyis/ /bshes gnyen tshul bzung mgon po khyod phyag 'tshal/
/rgyal ba'i mthu stobs kun dngos gshin rje'i gshed/ /zla zhal
dwangs ba'i chu nang

gzugs brnyan bzhin/ /snyigs dus gdug pa yongs la khros pa'i gar/
/ston mdzad mthu stobs dbang po khyod phyag 'tshal/ /shes bya'i
dkyil 'khor ma lus bde ba cher/ /dbyer med gcig tu 'doms pa sdom

pa'i mchog /gang gi thugs kyi ye shes gcig pu nyid/ /dpal ldan
bde ba'i mgon po khyod phyag 'tshal/ /rab 'byams rgyal ba'i 'khor
lo kun gyi srog /mi bskyod rdo rje brtse ba'i sgyu 'phrul ni/
/ngur smrig 'dzin pa'i

rol pa la brten nas/ /gsang ba'i dga' ston 'gyed pa khyod phyag
'tshal/ /grangs med brtse ldan rnams kyi thugs rje ni/ /gcig tu
bsdus pa dgyes mdzad rdo rje yi/ /dmigs med snying rje'i rang
bzhin las 'khrungs

@004b pa/ /rmad byung thugs rje'i gter chen khyod phyag 'tshal/
/don gnyis lhun gyis grub pa'i ston pa mchog /bden gnyis zung du
'jug pa dam pa'i chos/ /rig grol gnyis ldan 'phags tshogs dge
'dun te/ /bskyabs gsum

kun 'dus khyod la phyag 'tshal lo/ /deng nas bzung ste tshe rabs
thams cad du/ /mgon po khyod kyis brtse bas rjes bzung nas/
/gdams dang rjes su bstan pa'i gnas rnams la/ /blang dor tshul
bzhin byed par byin gyis

rlobs/ /'di nang phun tshogs rmi lam dga' ston dang/ /srid 'byor
mnar med rtsub reg ltar mthong nas/ /'gro kun don du byang chub
sems bskyed de/ /phyin drug spyod pas 'da' bar byin gyis rlobs/
/rdo rje 'dzin pa'i ded

dpon la brten nas/ /zab yangs rgyud sde'i rgya mtshor rab zhugs
te/ /rnam dag zung 'jug yid bzhin nor bu de/ /mthong chos nyid
la grub par byin gyis rlobs/ ces pa 'di ni rje btsun bla ma dam
pa de nyid kyi bka' drin

gyis 'tsho ba btsun pa blo bzang chos kyi rgyal mtshan gyis dben
dgon gyi gtsug lag khang du dad pas sbyar ba'o//