@#/ /na mo Arya mai trI ya/ ston pa bla na med pa'i rgyal srid 
la/ /chos kyi 'khor lo 'dod dgur dbang bsgyur ba'i/ /rgyal tshab 
dam pa byams mgon chos kyi rje/ /tshad med thugs rje'i dbang 
gis gnas 'dir gshegs/ /mdun gyi nam

mkhar seng ge'i khri steng du/ /padma nyi zla brtsegs pa'i
gdan khri la/ /nor bu'i 'od chags zhabs sen mdzes bkod de/ /ji
srid dran pa de srid bzhugs su gsol/ /nyam thag 'khor ba'i
'jigs pas nyen pa la/ /khyod

@045a @#/ /las lhag pa'i skyabs gzhan ma mchis pas/ /re sa
gzhan na med pa'i gdung shugs kyis/ /ji srid byang chub snying
por skyabs su mchi/ /khyod kyi sku gsung thugs dang 'phrin las
kyi/ /ngo mtshar

yon tan rgya mtshos yid drangs nas/ /gdung ba'i dbyangs kyi nga
ros gsol 'debs shing/ /lag pad spyi bor zum pa'i phyag bgyi'o/
/lhan skyes bde stong nam mkha'i rol pa las/ /sna tshogs mchod
pa'i sprin

gyi phreng ba can/ /kun bzang mchod pa'i tshogs dang lhan cig
tu/ /zag med dgyes pa bskyed phyir khyed la 'bul/ /bdag cag ma
rig nyon mongs dbang gyur pas/ /rmi lam bzhin du nongs pa'i
tshogs rnams gang/ /

bgyis dang bgyid stsal yi rang gang bgyis pa/ /dmigs med rang
bzhin dag pa'i dbyings su bshags/ /dam pa'i don du spros pa
kun bral yang/ /kun rtog pir gyi rtse mos logs bris pa'i/
/rmad byung ri mo bkra

ba'i rnam dkar la/ /zhen med spro dang dga' ba ci yang bgyi/
/'gro kun ma rig gnyid las sad byed pa/ /brag ca'i dbyangs
bzhin zab rgyas legs bshad smra/ /rgyun mi 'chad phyir srid
mtha'i bar du yang/ /mya ngan mi

'da' rtag par bzhugs su gsol/ /ston pa 'jig rten sgron ma mnal
gyur cing/ /bstan 'dzin sde snod 'dzin pa phal cher zad/ /thub
bstan nyes bshad dri mas sbags gyur na/ /tshul 'di gzigs sam
byams

@045b mgon thugs rje can/ /nyam thag 'gro 'di'i phan bde ma
lus pa/ /rgyal ba'i bstan pa nyid la rag las shing/ /de nyid
'dzin pa'i rgyal tshab gzhan med na/ /byams mgon bstan pa rgyas
par mdzad du gsol/ /mi bzad

'khor ba'i 'brog dgon 'jigs rung 'dir/ /gti mug mun pa 'thug
pos phyogs rnams bslad/ /zhe sdang dus mtha'i me bzhin rab tu
'bar/ /'dod chags khrag gi char pas kun nas gsher/ /skye rga
na 'chi'i zhags pas

dam du bcings/ /kyi hud bzod dka'i sdug bsngal drag pos
gdungs/ /kye ma 'di 'dra'i nyam thag gnas gyur pa/ /byams mgon
thugs rje chen pos mi dgongs sam/ /khyod ni ye shes gzigs pa
thogs med cing/ /ring

nas gsan pa'i lha snyan sgrib med pas/ /snying nas skyabs su
song ba 'di dgongs la/ /bdag cag mgon med 'gro ba mtha' dag gi
/mi 'dod sdug bsngal ma lus 'byung ba'i sgo/ /nyon mongs dug
gsum dgra 'di tshar

bcad nas/ /'jigs pa'i skul ma mdzod cig mi pham mgon/ /las
ngan mi dge'i rlung gis rgyab nas ded/ /'jigs rung gshin rje'i
skyes bus mdun nas bsus/ /thar med ngan 'gro'i g.yang sar
mngon phyogs na/ /

dga' ldan gnas su drongs shig ma pham mgon/ /bdag cag thog med
srid pa'i rgya mtsho cher/ /las dang nyon mongs rba rlabs drag
pos g.yengs/ /sdug bsngal chu srin mang pos rtag gtses na/
/thar pa'i gling du sgrol 

@046a @#/ /zhig ma pham mgon/ /khyad par ring nas 'grogs pa'i lus
sems gnyis/ /phan tshun 'bral bar mngon du phyogs pa'i tshe/ /gnad
gcod sdug bsngal drag pos ma gos par/ /thar pa'i lam sna

drongs shig ma pham mgon/ /dga' ldan gnas nas khyod kyi phyag
g.yas ni/ /gser gyi ljon pa brkyangs 'dra spyi bor bzhag /ma
'jigs nga yis dga' ldan gnas 'dren zhes/ /mngon sum dbugs 'byin
gnang ba thob

par shog /rnam shes skyes bu phyi mar 'gro ba'i tshe/ /mi dge'i
'khrul snang 'jigs skrag dang bral nas/ /ma pham thugs rje'i pho
nyas lam drangs te/ /thogs med dga' ldan gnas su skye bar shog
/de tshe zhing gi 'dren pa

khyod dang ni/ /'jam dpal snying po'i zhal bzang mngon gyur nas/
/gsung gi bdud rtsi ngoms med bsten pa'i mthus/ /rgyal ba'i dam
chos ma lus 'dzin par shog /nam zhig rdo rje gdan du mgon po
khyod/ /rgyal ba'i

mdzad pas rnam par rol ba'i tshe/ /'khor gyi thog ma nyid du bdag
gyur nas/ /rang rgyud smin grol gzhan don mthar phyin shog /ces
pa 'di mkhas grub kun gyi gtsug rgyan dam pa/ chos kyi rje bkra
shis rin chen gyi

zhal snga nas kyi bka' stsal dang du blangs nas/ blo bzang chos
kyi rgyal mtshan gyis dben sa chos kyi pho brang gi gtsug lag
khang du sbyar ba dge legs 'phel// //