@#/ /na mo Arya mai trI ya/ chos

@046b rnams kun gyi gdod ma'i rang bzhin mkha' dbyings mdzes
ma'i lang tsho la/ /gsal bar 'khyud gang sgyu 'phrul dra ba'i
'ja' tshon gar gyi ri mo bzhin/ /brgyad khri bzhi stong dbyar
skyes rnga gsangs rgyun mi 'chad par sgrog

mdzad pa/ /yid srubs bdag po'i g.yul las ma pham byams brtse'i
chu 'dzin g.yo der 'dud/ /grangs med bskal par tshogs gnyis
kunda'i tshal/ /brtson pa'i bsil zer bye bas byugs pa las/ /sku
gsum ze'u 'bru

dkar po cher rgod pa'i/ /zhabs skyes 'dab phreng bdag gi spyi
bor chings/ /gser sbyangs btso ma'i ri la dbang po'i gzhus/
/mngon par klubs pa'i mdzes sdug la chags pa/ /rgyu skar do shal
'phyang ba lta bu'i sku/ /mthong

bas yid 'phrog khyod la phyag 'tshal lo/ /rgyal ba kun gyi mkhyen
brtse nam mkha'i mdzod/ /yid bzhin nor bu ji bzhin mi rtog
kyang/ /ngo mtshar sgyu 'phrul dra ba'i rol mo mkhan/ /stobs bcu
mnga' ba khyod la phyag

'tshal lo/ /dam chos 'khor los bsgyur ba'i mu ku Ta/ /dpal dang
bkra shis mtshan pa'i phyag zung gis/ /gang gi ral pa'i rgyan du
ngal bsos pa'i/ /rgyal tshab dam pa'i zhabs la phyag 'tshal lo/
/de ltar bstod pa'i

gnam bskos ganggA'i rgyun/ /dus gsum dge tshogs rgyun dang ltan
cig tu/ /kun mkhyen ye shes rgya mtshor zhugs gyur nas/ /skal
bzang gdengs can nyer 'tsho'i dpal gyur cig /ces pa 'di ni yul
byang phyogs kyi rgyud du

@047a @#/ /byung ba'i dge slong chos kyi rgyal mtshan gyis/ ma
pham mdun sa khro bu dga' ldan gtsug lag khang/ mkhas mang 'du
ba'i bsti gnas su thogs med du sbyar ba'o// //