@#/ /na mo gu ru manydzu g+ho ShA ya/ zab lam dbu

ma'i lta ba bsgom par 'dod pas/ skyabs 'gro sems bskyed tshad med
bzhi bsgom pa sngon du btang/ bla ma dang 'jam dbyangs dbyer med
du byas te/ yan lag bdun pa phul/ srid pa'i rtsa ba gcod par

@219b nus pa bdag med rtogs pa'i shes rab myur du rgyud la skye
ba'i gsol ba shugs drag la rgyun ring ba btab/ mthar bla ma
dgyes bzhin du rang la thim pas/ rang nyid rje btsun 'jam pa'i
dbyangs snang la rang bzhin

med pa/ nam mkha'i 'ja' tshon lta bur gsal ba la rtse gcig tu
mnyam par 'jog go /de nas rang cag so skye rnams kyi tshogs drug
gi yul du nga sogs 'khor 'das kyi snang ba ci shar yang/ gang la
yang bltos

med du yul kho rang gi ngos nas grub pa ltar snang zhing/ snang
ba ltar yod par 'dzin pa ni/ dgag bya'i snang tshul dang/ 'dzin
tshul yin pas/ de nyid nges par byas nas/ gang shar spyi dang/
khyad par yid kyi yul du

gang snang thams cad cha shas tshogs pa'i rten cing 'brel par
'byung ba yin pa'i rgyu mtshan bsams pas/ snang zhen de dag bden
med du nges tsam de ga'i rgyun dran shes dang ldan pas skyong
bar byed pa gdams pa'i

snying po yin/ de las langs tshe sgyu ma smig rgyu dang/ /mig
'phrul chu nang zla ba'i gzugs brnyan bzhin/ /snang yang bden
par med pa'i tshul rtogs nas/ /sgyu ma lta bu'i rnal 'byor rdzogs
par bya/ /bzang ngan snang ba

gang dang gang shar yang/ /de dang de yi rjes su mi 'brang bar/
/snang yang ngo bos rdul tsam ma grub pa'i/ /zab mo'i dbyings su
rtse gcig mnyam par zhog /ces pa 'di yang chos rje blo bzang
chos 'phel bas/ lta

@220a @#/ /khrid snying por dril bzhag nyams len du cis kyang
dgos ces nan gyis gsol ba btab pa'i ngor/ dbu ma pa blo bzang
chos kyi rgyal mtshan gyis bkod pa'o// //