@#/ /bla ma dam pa rnams la phyag 'tshal lo/ /rje blo gros sbas pa'i gsung gi bdud rtsi dran pa bzhi ldan gyi snying po nyams su len pa'i tshul ni/ dang por sems ma yengs par dkon mchog gsum la skyabs 'gro rtse gcig tu byas pa'i rjes su 'di ltar bsam par bya ste/ de yang/ yang dag par rdzogs pa'i sangs rgyas shAkya thub pa la sogs pa'i sangs rgyas thams cad kyis mgrin gcig tu/ sems can thams cad kyis bdag gi ma byas par gsungs pa de ni mi 'khrul ba'i gsung tshad ma yin la/ des na sems can thams cad kyis ma nam byas res kyis/ tshe 'di'i ma bzhin du drin gyis bskyangs pa'i drin can sha stag yin pas/ de'i drin lan du ma nam mkha'i mtha' dang mnyam pa'i sems can thams cad nye ring chags sdang dang bral ba'i btang snyoms chen po la gnas par gyur cig /sdug bsngal dang sdug bsngal gyi rgyu dang bral bar gyur cig /bde ba dang bde ba'i rgyu thams cad dang phrad par gyur cig /sdug bsngal med pa'i bde ba chen po la dus rtag tu gnas par gyur cig /de lta bu'i bde ba la gnas par bya ba'i phyir du bdag gis sems can thams cad kyi don du rdzogs pa'i sangs @220b rgyas myur du thob par bya'o/ /de lta bu'i sans rgyas myur du thob pa'i phyir du lam zab mo'i rim pa nyams su len pa la 'jug par bya'o snyam du bsam mo/ /'di ni sems can thams cad mar dran tshul lo/ ! /de nas rang tha mal du gnas pa'i spyi bor sna tshogs padma dang zla ba'i steng du/ drin can rtsa ba'i bla ma de nyid sku mdog dmar ser zhal gcig phyag gnyis kyis ral gri dang glegs bam 'dzin pa/ rje btsun 'jam pa'i dbyangs kyi rnam pa can du bsgom/ de'i spyi bor pad zla'i steng du paN chen ye shes rtse mo rje btsun 'jam dbyangs kyi rnam pa can/ de'i spyi bor pad zla'i steng du 'dul 'dzin blo gros sbas pa rje btsun 'jam dbyangs kyi rnam pa can/ de'i spyi bor pad zla'i steng du rje btsun shes rab seng ge 'jam pa'i dbyangs kyi rnam pa can/ de'i spyi bor pad zla'i gdan la/ rje btsun blo bzang grags pa 'jam pa'i dbyangs kyi rnam pa can/ de'i spyi bor pad zla'i gdan la rje btsun 'jam pa'i dbyangs nyid sku mdog dmar ser zhal gcig phyag gnyis pa/ g.yas ral gri 'phyar zhing/ g.yon glegs bam thugs kar 'dzin pa/ dbu skra ral pa'i thor tshugs can/ dar gyi na bza' gsol ba/ rin po che'i rgyan gyis brgyan pa/ zhabs gnyis rdo rje'i skyil krung gis bzhugs pa/ de'i spyi bor pad zla'i gdan la rgyal ba rdo rje 'chang sku mdog sngon po zhal gcig phyag gnyis kyis rdo rje dang dril bu thug @221a @#/ /kar 'dzin pa/ dbu skra ral pa'i thor tshugs can/ dar gyi na bza' gsol ba/ rin po che sna tshogs pas brgyan cing/ rdo rje'i skyil mo krung gis bzhugs pa'i bla ma sangs rgyas de rnams kyi mtha' skor la/ rtsa brgyud kyi bla ma rnams dang/ de'i mtha' skor la phyogs bcu'i sangs rgyas rnams dang/ de'i mtha' skor la byang chub sems dpa' rnams dang/ de'i mtha' skor la nyan rang dgra bcom pa rnams dang/ de'i mtha' skor la bstan bsrung ye shes pa'i tshogs dang bcas pa thams cad bzhugs par bsam mo/ /rgyal ba rdo rje 'chang gi spyi bor oM dkar po/ mgrin par AH dmar po/ thugs kar hUM sngon po/ thugs ka'i hUM dang/ de thams cad kyi sku las 'od zer 'phros pas/ rtsa brgyud kyi bla ma sangs rgyas byang sems la sogs pa thams cad spyan drangs nas spyi bo na bzhugs pa'i rtsa brgyud kyi bla ma sogs thams cad la thim pas/ gnyis su med par gyur par bsam/ de nas/ sangs rgyas thams cad 'dus pa'i sku/ zhes sogs dang/ ston pa bla med sangs rgyas rin po che/ zhes sogs dang bcas phyag bya/ de nas/ maNDal rgyas bsdus gang rigs 'bul/ de nas/ dngos bshams yid sprul mchod pa ma lus 'bul/ zhes sogs yan lag bdun pa bya'o/ /de nas rang gi spyi bo na bzhugs pa de rnams la lus ngag yid gsum gus 'dud dang bcas pas/ @221b mkhyen pas srid pa'i 'ching ba mthar mdzad cing/ zhes pa nas/ rgyal ba rdo rje 'chang la gsol ba 'debs/ ces pa'i bar brjod/ dmigs pa ni/ rang gi spyi bor mtho brtsegs su bzhugs pa'i rtsa brgyud kyi bla ma sangs rgyas byang sems sogs dang/ khyad par/ rgyal ba rdo rje 'chang gi sku'i cha las bdud rtsi 'od zer dang bcas pa byung ba rang gi spyi bo la sogs pa'i lus kyi cha la thim pas/ sdig sgrib dang nang gi don thams cad sbyangs/ lus bdud rtsis gang/ sangs rgyas byang sems sogs dang/ khyad par rgyal ba rdo rje 'chang gi byin rlabs zhugs pas/ tshe dang bsod nams dang lung rtogs kyi yon tan thams cad 'phel zhing rgyas par bsam mo/ /de nas/ rab 'byams zhing gi zhes pa nas/ mgon po 'jam pa'i dbyangs la gsol ba 'debs/ ces pa'i bar dang/ de nas/ rje btsun tsong kha pa'i gsol 'debs/ rje shes rab seng ge'i gsol 'debs/ rje blo gros sbas pa'i gsol 'debs/ paN chen ye shes rtse mo'i gsol 'debs/ rang gi rtsa ba'i bla ma'i gsol 'debs rnams bya'o/ /de yang gsol ba 'debs ces pa'i skabs su dmigs pa gzhan rnams sngar bzhin dang/ khyad par/ bla ma gang dang gang yin pa de'i byin rlabs zhugs par bsam mo/ /de nas mtha' nas rim pa bzhin du/ chos skyong nyan rang rnams byang sems dang/ byang sems rnams sangs rgyas dang/ sangs rgyas rnams rtsa @222a @#/ /brgyud kyi bla ma dang/ rtsa brgyud kyi bla ma rnams rdo rje 'chang la thim par bsam mo/ /de nas/ 'jig rten 'jig rten 'das pa'i dge legs kyi/ zhes pa nas/ 'phags mchog klu sgrub yab sras dgongs pa dag /ji bzhin khong du chud par byin gyis rlobs/ ces pa'i bar brjod nas de dang de'i rtogs pa rang rgyud la skyes bar bsam mo/ /de nas rdo rje 'chang 'jam dbyangs la thim/ de nas rim bzhin du gcig la gcig thim/ de rnams rtsa ba'i bla ma la thim pas/ rtsa ba'i bla ma de nyid skyabs gsum kun 'dus kyi ngo bor gyur par bsam/ de nas/ dge 'dis mtshon nas dus gsum dang 'brel ba'i/ zhes sogs smon lam yang gdab bo/ /'di ni bla ma sangs rgyas su dran tshul lo/ ! /de nas bla ma rang la thim pas/ rang gi lus ngag yid gsum dang/ bla ma'i sku gsung thugs dbyer med du gyur pas/ rang nyid padma dang zla ba'i gdan la rje btsun 'jam pa'i dbyangs sku mdog dmar ser 'od kyi rang bzhin can/ ral gri dang glegs bam 'dzin pa/ rdo rje'i skyil krung gis bzhugs par bsam mo/ /'di ni rang lus lha skur dran tshul lo/ / ! gang snang rang bzhin gyis med par dran pa bsgom pa'i tshul la/ gang zag gi bdag med bsgom tshul dang/ chos kyi bdag med bsgom tshul lo/ /dang po la/ zhi gnas bsgom tshul dang/ lhag mthong bsgom tshul @222b lo/ /de yang stong nyid la dmigs pa'i zhi gnas bsgom pa'i sngon du rigs pa'i dpyad pa byed kyang/ dngos gzhi bsgom pa'i gnas skabs su dpyad sgom mi byed par 'jog sgom kho na bya'o/ /rigs pas dpyad sgom byed tshul ni/ dper na/ mtho yor bden grub tu 'dzin pa'i shes pa la/ mtho yor bden par grub par snang yang/ mtho yor kho rang gi ngos nas bden par grub pa cung zad kyang med pas/ mtho yor bden par grub pa cung zad kyang med de/ skyes bu'i rtsol bas rdo dang so phag sogs du ma brtsigs pa'i rkyen tshogs pa la brten nas/ mtho yor zhes byung ba yin no/ /de yang yin te/ rkyen ma tshogs gong du mtho yor du grub pa med la/ de nyid so sor bshig pa'i rjes su yang mtho yor du grub pa med/ da lta rkyen tshogs pa'i tshe yang/ rdo dang so phag sogs rig nas mtho yor yin min dpyad pa'i tshe na/ mtho yor yin pa cung zad kyang med pas na/ mtho yor kho rang gi ngos nas mtho yor du grub pa cung zad tsam yang med pa yin no/ /dpe de bzhin du/ ngar 'dzin lhan skyes la nga kho rang gi ngos nas bden grub tu snang yang/ nga zhes pa zhig kho rang gi ngos nas bden par grub pa cung zad tsam yang med pas/ nga bden par grub pa cung zad kyang med de/ nga de rgyu rkyen tshogs pa la brten nas byung ba yin pas so/ /rgyu rkyen tshogs pa la brten nas ji ltar 'byung snyam na/ rang gi phung po 'di la brten nas nga'o snyam pa 'byung/ phung po 'di la ma brten pa'i nga cung zad @223a @#/ /tsam yang med pas so/ /phung po 'di yang rgyu rkyen tshogs pa la brten nas blo bur du byung ba yin te/ dang por rgyu rkyen ma tshogs gong du phung po zhes pa mi 'byung/ mthar phung po zhig pa'i tshe na yang/ phung po zhes pa mi 'byung/ da ltar ba'i phung po 'di re re nas dpyad de/ phung po yin min brtags pa na/ phung por grub pa cung zad tsam yang med pas na/ nga gang las byung ba'i gzhi phung por grub pa cung zad tsam yang med pas/ nga zhes pa 'di kho rang gi nges nas bden par grub pa cung zad tsam zhig med par thag chod pa'i nges shes skyes pa na/ de'i steng du rtse gcig tu bzhag par bya'o/ /de yang/ nga zhes pa 'di ming rkyang tsam du snang tshul ltar byung yang/ nga zhes pa de yod med don la dpyad pa na/ snang tshul ltar med snyam du bsgom/ de'i tshe dpyad sgom sogs mi byed par 'jog sgom kho na bya'o/ /de yang stong nyid nges pa'i dmigs rten shin tu gsal ba'i gsal cha'i ngar dam spring nge ba dang/ stong nyid la dmigs rten ma gtogs/ khyad chos gnyis dang ldan pas bskyang bar bya'o/ /de yang/ khyad chos dang pos bying ba sel/ khyad chos gnyis pas rgod pa sel lo/ /'o na/ bying rgod gang zhe na/ dmigs pa la bzhag pa'i tshe/ dmigs pa la dmigs pa'i 'dzin stangs mi gsal ba ni bying ba yin/ rgod pa gang zhe na/ sems dmigs pa la mi gnas par dmigs pa las sems 'phro @223b ba ni/ rgod pa yin no/ /de gnyis gang gis sel zhe na/ dmigs pa la dmigs pa'i 'dzin stangs grims par byas te bsgoms pas bying rgod gnyis ka sel lo/ /'on kyang bying ba yang yang 'ong ba la ni/ de'i gnyen por dkon mchog gi yon tan sems pa dang/ nyi zla sogs kyi snang ba yid la byas te bsgom/ rgod pa yang yang 'ong ba la ni/ de'i gnyen por/ 'chi ba mi rtag pa/ 'khor ba'i nyes dmigs sogs bsgoms nas bying rgod sangs ba dang/ slar yang dmigs pa la rtse gcig tu bzhag nas bsgom par bya'o/ /des na dmigs rten ma brjed pa'i dran 'dun du re ba yod na bying rgod gnyis ka sel bas/ dmigs rten ma brjed par dran du re ba'i skyong tshul gal che'o/ /de ltar stong nyid la dmigs pa'i zhi gnas bsgoms pas/ zhi gnas rjes mthun pa dang/ zhi gnas mtshan nyid pa rgyud la skye bar 'gyur ro/ /gnyis pa lhag mthong bsgom tshul la nga bden med du bsgom tshul/ nga yi ba bden med du bsgom tshul lo/ /dang po ni/ lhag mthong bsgom pa'i sngon du yang rigs pa'i dpyad pa bya la/ dngos gzhi bsgom pa'i skabs su yang rigs pa'i dpyad pa bya'o/ /dang po bsgom pa'i sngon du rigs pa'i dpyad pa byed pa'i tshul ni/ dper na mtho yor bden 'dzin gyi shes pa la/ mtho yor bden grub tu snang yang/ zhes pa nas/ nga snang tshul ltar cung zad kyang grub pa med/ @224a @#/ /ces pa'i bar rnams sngar bshad pa ltar 'dir yang bsgom par bya'o/ /de yang/ nga zhes bya ba de kho rang gi ngos nas yul steng nas grub tshul cung zad tsam yang mi 'dug snyam pa'i nges shes de la gnas bzhin pa'i ngang nas shes pa'i cha shas phra mo zhig gis/ slar yang rang bzhin med pa'i tshul gyis dpyad sgom phra mo yang yang bya'o/ /de lta bu'i mnyam gzhag las langs pa'i rjes thob tu kun rdzob snang ba'i cha ci shar yang/ mnyam gzhag tu bden med de/ des rtsis zin pa'i ngang nas/ 'di rnams med bzhin du snang ba'i snang ba sgyu ma lta bu yin snyam du bsam par bya'o/ /gnyis pa ni/ nga kho rang gi ngos nas yul steng nas grub pa cung zad tsam yang med pas/ phung po mig rna sogs nga yi ba rnams kyang yul steng nas grub pa med pa'i tshul rnams bsgom par bya'o/ /gnyis pa chos kyi bdag med bsgom tshul ni/ bsgom pa'i sngon du yang rigs pa'i dpyad pa bya/ dngos gzhi bsgom pa'i skabs su yang rigs pa'i dpyad pa bya/ bsgom pa'i sngon du rigs pas dpyad pa byed tshul ni/ mtho yor bden grub bam/ bden 'dzin gyi shes pa la mtho yor bden grub tu snang yang zhes sogs sngar ltar dpyad pa'i mthar/ dpe de bzhin du rang gi phung po bden grub tu snang ba'i shes pa la/ phung po bden med du mi snang bar/ phung po bden grub tu @224b snang yang/ phung po bden grub tu med de/ phung po rgyu dang rkyen la bltos nas skyes pa'i phyir/ phung po rgyu dang rkyen la brten nas skyes pas/ phung po rgyu dang rkyen la bltos par grub/ phung po rgyu rkyen la bltos pas/ phung po rang tshugs ma thub/ phung po rang tshugs ma thub pas/ phung po yul kho rang gi ngos nas yul steng nas grub pa cung zad tsam yang med par nges pa thag chod pa'i nges shes nam mkha' lta bu'i stong nyid kyi ngang du sngar ltar bzhag par bya'o/ /de lta bu'i mnyam gzhag la gnas bzhin pa'i ngang nas slar yang shes pa'i cha shas phra mo zhig gis phung sogs yul steng nas ma grub pa'i tshul yang yang bsgom par bya'o/ / de lta bu'i mnyam gzhag las langs pa'i rjes thob sgyu ma lta bu'i rnal 'byor yang bsgom par bya'o/ /gzhan yang/ nga dang nga yir 'dzin pa la sogs pa'i chos thams cad bden par yod med kyi rigs pas dpyad pa'i rjes su/ de rnams thams cad bden par med pa'i mnyam gzhag nam mkha' lta bu'i stong nyid dang/ de las langs pa na/ rjes thob sgyu ma lta bu'i rnal 'byor yang yang bsgom par bya'o/ /'di ni rje 'dul ba 'dzin pa blo gros sbas pas gsungs pa'i dran pa bzhi ldan gyi snying po tsam zhig brjod pa'o/ /zhes pa 'di yang dka' bcu pa dpal 'byor rab rgyas kyis gsol ba btab pa la brten nas/ chos @225a @#/ /smra ba'i btsun pa blo bzang chos kyi rgyal mtshan gyis smras pa'o// //