@#/ /na mo gu ru manydzu g+ho ShA ya/ gang la

brten na bslu ba med pa'i skyabs/ /mchog gsum ngo bo rje btsun
bla ma'i zhabs/ /gus pas bsten nas dad ldan slob ma la/ /brtse
ba'i sems kyis snying gtam 'di skad smra/ /rnyed dka' dal 'byor
mi lus thob

@280b dus 'dir/ /gtan gyi 'dun ma byang chub ma bsgrubs na/ /bde
'gror skyes kyang dud 'gro mngon sum nyid/ /rang gis rang nyid
bslus par gdon mi za/ /rgan gzhon bar ma'i nges pa ma mchis par/
/yang yang glo bur 'chi

ba mthong na yang/ /rtag 'dzin rnam g.yeng le los dus 'da' ba/
/don snying nang nas rul bar the tshom med/ /tsher ma'i sdug
bsngal tsam yang mi bzod kyang/ /bslab khrims tshul bzhin mi
srung g.yo sgyu can/ /ngan song

sdug bsngal 'bar ba'i mes bsregs tshe/ /'gyod kyang bya thabs med
do grogs po dag /srid pa'i phun tshogs ji ltar thob gyur kyang/
/mnog chung nyes mang brgya phrag 'byung ba'i gnas/ /dug dang
'dres pa'i kha zas

bzang po la/ /shes dang ldan pa su zhig dga' bar sems/ /skye rga
na 'chi sdug bsngal rba glong can/ /gting zab 'jigs rung 'khor
ba'i rgya mtsho che/ /sgrol ba'i gru rdzings bslab gsum rin chen
las/ /lhag pa gzhan

med tshul bzhin nyams len 'tshal/ /thog med dus kyi drin can pha
ma la/ /byams dang snying rjes drangs pa'i sems bskyed nas/ /dus
gsum rgyal sras spyod pa'i rjes zhugs na/ /dal 'byor mi lus thob
pa'i

dgos pa yin/ /mos gus 'bral med bla ma'i rnal 'byor dang/ /ci
snang sgyu ma lha sku'i nyams len dang/ /stong nyid snying rje'i
snying po'i rnal 'byor la/ /nyin mtshan kun tu g.yel ba med pa
gces/ /bdag tu 'dzin

@281a @#/ /pa'i dug chus yid myos pas/ /ming rkyang chos kun bden
par snang zhing zhen/ /snang zhen de ltar grub pa lha lam gyi/
/padmo lta bur rnam dpyod mig gis ltos/ /tshogs drug yul du snang
ba ci shar

yang; ;dgag sgrub mi bya snang ba'i tshul la blta/ /snang tshul
brtags pas gnas tshul rjen par 'char/ /shar ba'i ngang du rtse
gcig mnyam par zhog /dben par 'dug kyang bag yangs spyod pa
dang/ /lung ma bstan

gyi bya bas 'da' byed na/ /mi med dgon pa'i ri dwags rnam thar
bzhin/ /des na g.yeng med bag yod legs par bsten/ /blo dang
ldan la mang du smos ci dgos/ /phan pa'i gdams ngag bsdus pa 'di
yin te/ /rang

gi sgo gsum bya ba ci byed kyang/ /rtag tu thub pa'i gsung dang
mthun par gyis/ /chos rnams bden med rkyen gyis bsgyur ba'i
phyir/ /rang gzhan dus gsum dge tshogs ma lus pa/ /'khor gsum
yongs su dag

pa'i rgyas btab ste/ /ma rnams don du byang chub chen por sngos/
/tshul 'di ri khrod 'dzin pa'i ston sgom gyis/ /bskul bar gyur
tshe mang thos spong ba pa/ /blo bzang chos kyi rgyal mtshan zhes
bya bas/ /shAkya'i rgyal po'i

mdun sar dge bar smras// //