@#/ /na mo gu ru manydzu g+ho ShA ya/ slob ma la gdams pa lha'i 
rnga bo che'i sgra dbyangs ces bya ba/ bla ma dang lhag pa'i 
lha la phyag 'tshal lo/ /dus gsum bde gshegs thams cad dang/ 
/dbyer med rtsa ba'i bla ma yi/ /zhabs sen rin

chen 'od chags pa/ /snying ga'i padmo'i rgyan du bzhugs/ /lha
bcas 'dren pa shAkya'i tog /rgyal tshab mi pham 'jam pa'i
dbyangs/ /'phags mchog klu sgrub thogs med zhabs/ /'bral med
spyi bo'i gtsug tu bsten/ /

smra ba'i zla ba phul byung zhabs/ /blo bzang rgyal ba gnyis
pa'i rje/ /de sras nas bzung rtsa brgyud kyi/ /bla ma rnams la
gus btud nas/ /dam pa rnams kyi bzhed pa yi/ /legs bshad lha yi
rnga bo che'i/ /sgra brgya dal gyis

@284a @#/ /rgod pa yis/ /mtha' dag bag yod gnas su bkri/ dal dang
'byor pas mdzes pa yi/ /rten 'di shin tu rnyed dka' bas/ /lan
cig tsam zhig thob dus 'dir/ /nyin mtshan kun tu snying po long//

spyir yang tshe 'di yun thung zhing/ /khyad par 'chi bdag dgra bo
de/ /nam 'ong nges pa ma mchis pas/ /phyi bshol med par brtson
'grus rtsoms/ /dge dang mi dge'i las rnams kyi/ /'bras bu so sor
mi slu

bas; ;sdig spong dge ba bsgrub pa la/ /sgo gsum gus pas rtag tu
sgrims/ /rang nyid dam pa'i lam bsrangs te/ /snyigs dus skye bo
sna tshogs pa'i/ /mtshan nyid ji bzhin nges byas la/ /de dang de
mtshungs blang

dor bya/ /mi dge'i bshes dang sdig pa'i grogs/ /nang gi dug gsum
dgra bo 'dis/ /phan pa'i zol gyis nges bslu bas/ /rtag tu bag
dang ldan par bya/ /gti mug mun pa'i smag rum de/ /rten 'brel
yan lag

gnyis lhag bcu/ /lugs 'byung lugs las bzlog pa'i rim/ /ji bzhin
shes pa'i sgron mes sol/ /dge ba'i nags tshal sreg byed pa'i/
/zhe sdang khong khro'i me 'bar ba/ /byams dang snying rje'i chu
'dzin las//

byung ba'i phan bde'i char gyis choms/ /'dod chags chu bo 'khrug
pa'i rgyun/ /bdag dang gang la chags pa'i yul/ /mi rtag mi
gtsang sdug bsngal bar/ /nges pa'i chu lon brtan pos zlog /dang
por shes rab

@284b mtshon rnon gyis/ /rang gzhan lpags pa'i kha phye nas/ /sha
khrag chu rgyus rus pa dang/ /rkang gi bar du brtag par bya/
/rnag khrag khu ba bshang gci dang/ /klad pa sha rus chu rgyus
rkang/ /'dus pa'i mi gtsang rkyal pa la/ /

blo ldan su zhig chags par byed/ /snabs dang mchil ma lud pa
rngul/ /bad mkhris glo mchin rgyu long sogs/ /mi gtsang rdzas
kyis gang ba la/ /rab rmongs byis pa phag ltar chags/ /gtsang
zhing yid 'ong bsod pa'i zas/ /

ro 'dzin lam du drangs tsam gyis/ /btsog cing dri nga myags
'gyur na/ /lus 'di las gzhan bshang khang ci/ /gtsang ba'i sa
yang bshang gci yis/ /cung zad sbags pa'ang btsog 'gyur na/
/bshang gci snag khrag mi gtsang

bas; ;yongs gang mdzod la su zhig chags/ /'di ltar mngon sum
mthong bzhin du/ /da dung 'dod pa'i sems skye na/ /dbugs bral
dur khrod bor ba yi/ /lus kyi phyi nang rang bzhin ltos/ /mdor
na 'dod pa'i dngos po la/ /

chags pa'i sa bon phra mos kyang/ /mnar med khro chu khol ma'i
nang/ /nges par 'tshed pa'i 'bras bu bskrun/ /kim pa'i 'bras
'dra'i 'dod pa yis/ /gsod gcod 'ching dang 'bral ba dang/ /phyi
ma'i ngan 'gro'i sdug bsngal

sogs/ /'dren phyir phung krol chen po byed/ /de bas srid pa'i
phun tshogs kun/ /rmi lam sgyu ma'i dga' ston dang/ /'bar ba'i me
dang g.yang sa ltar/ /skrag pa'i sems kyis thar par snyegs/
/glog dang chu bur lta bu yi//

@285a @#/ /zang zing nor rdzas 'ching ba'i lcags/ /'bral med gtan
du dge ba yi/ /'phags pa'i nor bdun gces par zungs/ /sdug bsngal
gsum gyis mnar ba yi/ /mar gyur 'gro ba'i don gyi phyir/ /byang

chub dam par sems bskyed nas/ /rgyal sras spyod pa'i rjes su
bslab/ /mi srun rlung ltar g.yo ba'i sems/ /rtse gcig dmigs pa
la gtad de/ /dran shes rgya dang ma bral bar/ /g.yo med ting
'dzin brtan po sgrub/ /

chos kun rang bzhin gdod ma'i gshis/ /dbyer med brjod bral stong
pa nyid/ /ji bzhin nges pa'i shes rab kyis/ /dbyings su dbyer
med mnyam par zhog /de las langs pa'i rjes thob tu/ /cir snang
sgyu ma chu zla ltar/ /

snang yang bden pas stongs pa yi/ /snang stong sgyu ma'i rnal
'byor bsgom/ /byang chub sems kyis rtsis zin pa'i/ /stong nyid
zab mo bsgom pa dang/ /shes rab kyis zin byang chub sems/ /bsgom
pa zung du 'brel tshul

yin; ;'di ltar bsgrubs pa'i legs tshogs kyis/ /mtshon pa'i rnam
dkar dge legs gzhi/ /bla ma mchog gis byang chub bar/ /'bral med
'dzin pa'i rgyu ru bsngo/ /tshul 'di dad dang rnam dpyod kyi/
/nor ldan blo

bzang chos 'dzin gyis/ /bskul tshe dge slong rgyal khams pa/
/chos kyi rgyal mtshan zhes byas bkod/ /'dir 'bad legs spyad zla
zer gyis/ /'khyud pa'i gangs ri'i tog 'dra de/ /mkha' mnyam 'gro
ba ma lus pas//

@285b byang chub dam pa thob phyir bsngo/ zhes slob ma la gdams
pa lha'i rnga bo che'i sgra dbyangs ces bya ba 'di yang/ dad pa
dang rnam par dpyod pa sogs phul du byung ba'i yon tan dang ldan
pa/ bkra shis rtse nas chos mdzad ma blo

bzang chos 'dzin gyis nan tan chen pos bskul ba la brten nas/
btsun pa blo bzang chos kyi rgyal mtshan gyis chos grwa chen po
bkra shis lhun po'i gtsug lag khang du sbyar ba'o// //