@#/ /na mo gu ru manydzu g+ho ShA ya/ /rmad byung yon
tan

ji snyed pa/ /ma lus gang gi legs bsdus te/ /skyon kun 'gro la
bskrad pa bzhin/ /shAkya seng ge la btud nas/ /bde gshegs gsung
rab las byung ba/ /legs bshad rin chen phreng spel te/ /lha mi'i
dbang phyug

mgul rgyan du/ /do shal bzhin du bdag gis 'bul/ /mu stegs ngan
pa'i bram ze rnams/ /rgyal po'i spyod tshul gzhan smra yang/
/mnyam med bdag gi ston pa des/ /rgyal srid chos bzhin bskyang
bar gsungs/ /

'phags pa'i yul dang gangs can du/ /byon pa'i chos rgyal de dag
gi /gtsug lag gnyis kyi tshul gzigs na/ /'di dang phyi ma kun tu
dge /nye ring med pa'i bka' khrims kyis/ /nyid kyi sras la ji
lta bar/ /'bangs rnams

@286b bde bar bskyangs lags na/ /kun gyis khyod nyid lha bzhin
bkur/ /snyigs dus skye bo ma rungs pa/ /chags sdang che zhing
phra ma mkhas/ /de'i phyir bzang ngan ji ltar yang/ /zhu 'phrin
kun la brtag dpyad 'tshal/ /blo chung

khro skyen 'gyur ldog che/ /gang dran khar 'byin cal col smra/
/bya byed mang zhing mthar mi phyin/ /'di dag byis pa'i chos
lugs lags/ /g.yo med drang po'i rang bzhin can/ /dpa' zhing
shin tu dul bar gnas/ /khong

yangs zab pas rgya mtsho dang/ /brtan pas ri rab lta bur mdzod/
/ngan g.yo gnod 'tshe'i sems dang ni/ /mi btsun ngag dang rdzun
spangs te/ /snying la 'bab cing bden pa dang/ /'jam po'i bka'
lung snyan po stsol/ /ha cang

chang la sred pa dang/ /'dod zhen chen po mi bya ste/ /chang
dang 'dod la sred pa'i rgyus/ /phung krol chen po bskyed par
gsungs/ /srog 'phrog mngar ba'i btsan dug dang/ /nad sel kha
ba'i sman bzhin du/ /gnod pa'i ngag

'jam phan pa yi/ /rtsub pa'i tshig kyang de bzhin dgongs/ /lha
sras gtso bo gang spyod pa/ /'khor rnams de yi rjes 'jug pas/
/khyod ni log pa'i lam zhugs na/ /'bangs rnams ji ltar 'gyur ba
dgongs/ /de'i phyir

ya rabs spyod tshul gyis/ /phal pa'i spyod pa rgyang bsrings te/
/mthon po'i rigs su 'khrungs rnams kyi/ /rgyan du bdag nyid
'gyur bar mdzod/ /mna' dang dam tshig sdom pa las/ /nam yang 'da'
bar mi rung ste/ /de  

@287a @#/ /bzhin ngo tsha khrel yod ldan/ /gzhung bzang byas shes
che ba dgos/ /rgyal ba'i bka' dang dam pa'i gsung/ /rig gnas
bstan bcos mang po la/ /mkhyen pa'i spyan gyis gzigs lags

na; ;legs bshad mang po de las 'byung/ /dkon mchog gsum dang bla
ma ni/ /gtan gyi skyabs dang grogs yin pas/ /rtag tu mchod dang
bkur sti dang/ /bka' bzhin bsgrub pas mnyes par mdzod/ /de

bzhin yab dang yum la yang/ /gus pas bsnyen cing bkur bar gyis/
/'di dag phan gnod chung ngus kyang/ /'bras bu shin tu che ba
'byung/ /til 'bru tsam gyi sa bon gyis/ /nam mkhar mi shong n+ya
gro d+ha/ /de bzhin

dge sdig chung ngu la'ang/ /brnyas par mi bya blang dor 'tshal/
/dus bzang spyi dang bye brag la/ /gso sbyong yan lag brgyad pa
ni/ /bzhes shing gzhan yang bgyid 'jug ste/ /mtho ris 'gro ba'i
bde lam lags/ /

srid pa'i lam du rgyu ba'i tshe/ /gtong ba nor gyi mchog yin pas/
/phongs dang dag pa'i zhing rnams la/ /kun tu sbyin par dgyes
par mdzod/ /khro dang zhe sdang las 'jigs pa/ /'di na gnod pa'i
dgra gzhan

med; ;de bas bzod pa'i go cha la/ /brten na mdzes shing dpa' ba
lags/ /stobs kyis dregs pa'i zhabs 'bring ba/ /'dus nas nyams
dga' rtsed mo'i phyir/ /dgos med sdig pa bgyid srid pas/ /nyes
dmigs

@287b gzigs la bzlog par mdzod/ /bya ba gang dang gang la yang/
/skyon dang yon tan gzigs mdzod la/ /'dres ma'ang bya bar mi
rigs na/ /skyon shas che na bzlog par rigs/ /yon tan ldan pa'i
mi rnams ni/ /bsten cing kun nas

dgyes par mdzod/ /skyon gyi gong bu'i skye bo de/ /rgyang
bsrings snying rje'i yul du dgongs/ /mnga' ris gang na gnas pa
yi/ /bya dang ri dwags nya la sogs/ /mgon med bdag po med pa
rnams/ /snying rjer 'os sam mi

'os gzigs/ /nges na gzhan la mi gnod par/ /rtswa chus 'tsho ba
'di rnams la/ /mi 'jigs skyabs dag stsol ba dang/ /chom rkun
rnams kyang sdigs par mdzod/ /bag med snang ba 'brid mkhas
shing/ /rgyal

po'i bya ba g.yeng che bas/ /nyin re bzhin du thugs dam rnams/
/chag med bcad rgya nyid du mdzod/ /phan par smra ba ches dkon
zhing/ /de bas de la nyan dkon kyang/ /brtse bas mi yi dbang
phyug la/ /spyi brtol bskyed

nas gdams pa lags/ /thub pa'i gsung rab las byung ba'i/ /gtam
'dis 'gro ba ma lus pa/ /rgud pa kun las bsgral byas te/ /thams
cad mkhyen pa thob par shog /ces pa 'di ni rigs rus phun sum
tshogs

shing; dad pa dang rnam dpyod sogs dam pas bsngags pa'i yon tan
dang ldan pas skyong mi'i dbang po sde pa sog po rdo rjes nan
gyis bskul ba la brten nas/ chos smra ba'i dge slong sde snod
gsum pa blo bzang chos kyi

@288a @#/ /rgyal mtshan gyis thon dga' ldan rdzong du smras pa'o//
//