@#/ /na mo gu ru sa manta b+ha drA ya/ bslu med bla ma dkon mchog gsum/ /thugs brtse ldan pas legs dgongs nas/ /bdag gi smon pa'i gnas 'di rnams/ /thogs med myur du grub par mdzod/ /deng nas byang chub snying po'i bar/ / ngan song gsum sogs mi khom pa'i/ /gnas su nam yang mi skye zhing/ /dal 'byor rten bzang thob par shog /mtho ris yon tan rnam bdun dang/ /nam yang 'bral ba med pa dang/ /dad dang rnam dpyod snying rtser ldan/ /shes rab phun sum tshogs par shog /skyes tsam nyid nas theg chen gyi/ /rigs sad lus dang srog la yang/ /bltos med dge ba'i bshes gnyen dang/ / dam chos 'tshol la brtson par shog /ji srid srid par rgyu ba na/ /rtag tu gzhon nu rab 'byung zhing/ /shin tu phra ba'i khrims rnams kyang/ /mig 'bras lta bur bsrung bar shog /tshe rabs kun @304b tu mtshan nyid dang/ /ldan pa'i dam pas rjes bzung ste/ /bsam sbyor rnam par dag pa yis/ /bka' bzhin bsgrub pas mnyes byed shog /mgon de'i zhal gyi bum bzang las/ /byung ba'i legs bshad bdud rtsi'i rgyun/ /ngoms pa med par 'thungs pa yis/ /mang thos rgya mtsho'i mthar son shog /so thar byang sems gsang sngags kyi/ /sdom gsum mchog gis rgyud bsdams shing/ / mdo rgyud tshig don kun rtogs nas/ /bsgrub pa snying por byed par shog /lam bzang tshul bzhin bsgrub pa'i tshe/ /phyi nang 'gal rkyen kun bral zhing/ /mthun rkyen bsams pa'i don rnams kun/ / 'bad med lhun gyis grub par shog /dad dang nges 'byung byang chub sems/ /yang dag lta dang rim gnyis lam/ /rgyal ba'i dgongs pa ji lta bar/ /myur du rgyud la skye bar shog /bdag ni mthong thos dran reg dang/ /dad par byed pa thams cad kyang/ /lha dang mi yi rten brgyud nas/ /nges par byang chub mchog thob shog /sems can kun gyi sdug bsngal dang/ /sdig tshogs bdag la smin gyur cing/ /bdag bde dge ba ma lus pa/ /sems can yongs la smin par shog /dam chos tshigs bcad gcig tsam dang/ /sems can re re'i don du yang/ /bskal par @305a @#/ /mnar med gnas dgos kyang/ /zhum med spro bas 'jug par shog /'dod dgu'i dpag bsam ljon pa dang/ /bum bzang yid bzhin nor bu ltar/ /'gro kun ci dang ci 'dod pa'i/ /re ba bdag gis rdzogs byed shog /mdor na phan bde kun gyi gzhi/ /thub dbang bstan pa 'dzin pa la/ /rgyan drug mchog gnyis jo 'brom dang/ /tsong kha pa dang mtshungs par shog /ces 'dod don smon lam du byas pa 'di ni/ dge tshul blo bzang nor bus snga mo nas yang yang bskul zhing/ phyis gnam mtsho phyug mo'i do sogs byang stong gi dben par rgyu ba la spro ba'i yul gtsang stod kyi dge tshul blo bzang bde legs kyis bskul ba la brten nas/ chos smra ba blo bzang chos kyi rgyal mtshan gyis/ 'brog ri bo che dge ldan rnam par rgyal ba'i gling du thogs med du smras pa'o// //