@#/ /swasti/ rab 'byams lha yi

lam kun yongs gang ba'i/ /'phags mchog thugs rje chen po'i lha
yi tshogs/ /me tog char 'bebs bkra shis gdangs snyan sgrog /mtha'
dag bgegs dpung 'joms pa'i 'phrin las kyis/ /khyod la 'dod

dgu'i mchog stsol mdzad pa 'di/ /shes par gyis la rab dga' skyed
cig dang/ /shis brjod phreng ba bdag gis bsgrag par bya/ /dus
gsum bde gshegs kun gyi thugs rje la/ /spyan ras gzigs dbang

zhes byar mtshan gsol nas/ /yid bzhin nor ltar 'dod dgu'i char
'bebs pa'i/ /bslu med skyabs kyi dam pa la phyag 'tshal/ /'phags
pas rjes bzung dge slong dpal mo dang/ /zla ba gzhon nu ye shes

bzang po dang/ /be nya pa dang zla ba rgyal mtshan sogs/ /dngos
dang brgyud pa'i bla ma mchog rnams la/ /dge mtshan ji snyed
mchis pa'i bkra shis des/ /khyed kyi mi shis mtshan ma kun zad
cing/ /bde legs

yar ngo'i zla ltar 'phel gyur nas/ /phun tshogs dpal la rol pa'i
bkra shis shog /bde gshegs snang ba mtha' yas pad dkar 'dzin/
/rnam par snang mdzad rin chen 'byung ba'i gnas/ /mi bskyod mgon

@311b po don yod grub pa sogs/ /thugs rje chen po'i dkyil 'khor
lha tshogs la/ /dge mtshan ji snyed mchis pa'i bkra shis des/
/khyed kyi mi shis mtshan ma kun zad cing/ /bde legs yar ngo'i
zla ltar 'phel gyur

nas; ;phun tshogs dpal la rol pa'i bkra shis shog /thub pa'i legs
bshad kun gyi rab dang phul/ /dpal ldan bya rgyud padma'i rigs
kyi gtso/ /thugs rje'i spyan stong mnga' ba'i rgyud rgyal la/
/dge

mtshan ji snyed mchis pa'i bkra shis des/ /khyed kyi mi shis
mtshan ma kun zad cing/ /bde legs yar ngo'i zla ltar 'phel gyur
nas/ /phun tshogs dpal la rol pa'i bkra shis shog /zhing rnams
kun na

zab mo'i lam mchog 'dir/ /thos bsam bsgom pas 'jug pa thams cad
dang/ /dang ba'i sems kyis phyag na padmo yi/ /gzungs sngags
mtshan tsam 'dzin pa thams cad la/ /dge mtshan ji snyed

mchis pa'i bkra shis des/ /khyed kyi mi shis mtshan ma kun zad
cing/ /bde legs yar ngo'i zla ltar 'phel gyur nas/ /phun tshogs
dpal la rol pa'i bkra shis shog /rin chen brgya las grub pa'i

gzhal yas khang/ /'ja' tshon ltar bkra 'chi med lam ltar yangs/
/sna tshogs rgyan gyis mdzes pa'i pho brang la/ /dge mtshan ji
snyed mchis pa'i bkra shis des/ /khyed kyi mi shis mtshan ma kun

@312a @#/ /zad cing/ /bde legs yar ngo'i zla ltar 'phel gyur nas/
/phun tshogs dpal la rol pa'i bkra shis shog /ces pa 'di yang ri
khrod 'dzin pa'i dge ba'i bshes gnyen dge slong dka' 

bcu pa rnam rgyal lhun grub kyis bskul ba la brten nas/
shAkya'i btsun pa blo bzang chos kyi rgyal mtshan gyis sbyar
ba'o// //