@#/ /na mo gu ru manydzu g+ho ShA ya/ gang gis

nyes kun srid pa'i mtshor bskrad de/ /yon tan ma lus nyid kyis
bsdus pa bzhin/ /lha bcas 'gro ba'i bla ma zas gtsang sras/
/khyod kyi rnam dkar mdzad pas bdag skyongs shig /bslu med bla
ma dkon

mchog gsum/ /phyag 'os kun la phyag 'tshal zhing/ /srid zhi'i
mchod sprin rgya mtsho'i tshogs/ /dngos bshams yid kyis sprul nas
mchod/ /dam pas smad pa'i mi dge'i las/ /ci mchis snying nas

bshags par bgyi/ /rang gzhan rnam dkar dge tshogs la/ /bsam pa
thag pas yi rang ngo/ /shing dbang drung gshegs rgyal rnams la/
/dam chos 'khor lo bskor bar bskul/ /mya ngan 'da' ston

bzhed rnams la/ /grangs med bskal brgyar bzhugs par gsol/ /'dis
mtshon dus gsum dge ba'i tshogs/ /ji snyed ma lus gcig bsdoms te/
/'gro kun srid mtsho las sgrol phyir/ /byang chub chen

@312b por yongs su bsngo/ /'dis mtshon dge bas tshe rabs kun tu
bdag /las nyon dbang gis mi khom brgyad kyi gnas/ /rmi lam du
yang mthong bar mi 'gyur zhing/ /rtag tu dal 'byor tshang ba'i
rten thob shog /

dge ba'i bshes dang chos kyi ched dag tu/ /lus dang srog kyang
lan brgyar 'dor nus shing/ /snying stobs chen pos rgyal ba sras
bcas kyi/ /mdzad pa ma lus yongs bsdoms spyod par shog /'khor
bsgyur

tshangs dbang srid 'byor thob gyur kyang/ /dmyal me 'bar ba'i
nang du chud pa bzhin/ /nges par 'byung blos thar pa bsgrub pa
la/ /mgo la me shor gzhil ltar brtson par shog /nyes mang chu
lon yon tan kun gyi gzhi/ /

thub dbang khrims kyis sgo gsum legs bsdams te/ /phra mo'i bcas
pa'ang srog las gces 'dzin pa'i/ /thub pa'i brtul zhugs mchog
dang 'bral med shog /deng nas rgya che gsal myur zab pa yi/
/skyes

thob shes rab phun tshogs rang gzhan gyi/ /grub mtha' mdo rgyud
rgya mtsho'i pha rol tu/ /phyin pa 'jigs med smra ba'i dbang por
shog /gal te las kyi nying mtshams sbyar ba na/ /gnas lus longs
spyod dge ba'i

grogs po dang/ /'khor dang yo byad tshe dang dam pa'i chos/
/rgyal bas gnang bzhin phun sum tshogs par shog /dam chos spyod
tshe nad gdon dgra la sogs/ /'gal rkyen bar chod ming yang mi
'byung zhing/ /

@313a @#/ /brgya la rkyen ngan gnod pa ci byung yang/ /thabs
mkhas mchog gis lam du bsgyur nus shog /gang la brten na nyes
tshogs kun 'byung zhing/ /phan par bcos nas gtan gyi bde 'phrog
pa/ /mi

dge'i bshes dang sdig pa'i grogs po dang/ /thar pa'i sgo 'gegs
nye du longs spyod sogs/ /kun dang nam yang phrad pa med par
shog /bdag cag grogs med gcig pur 'khyams pa na/ /thugs rje che
ldan

rnams kyis mngon sum du/ /'bral med mgon skyabs dpung gnyen
grogs mdzad nas/ /bde nas bde ba'i lam du 'dren par shog /sdug
bsngal brgya phrag stong gis yongs gtses pa'i/ /'gro ba'i ngang
tshul yid

la dran tsam gyis/ /bu gces 'chi bar mthong ba'i ma bzhin du/
/bcos min byams dang snying rje skye bar shog /brtse ba'i sems
kyis ches cher yid bskyod pas/ /sems can re re'i phyir yang mnar
med pa'i/ /me nang

grangs med bskal par gnas dgos kyang/ /skyo med snying stobs go
cha bgo bar shog /mkha' mnyam 'gro kun bdag gi dgrar langs te/
/bskal pa mang por nyin bzhin srog 'phrog kyang/ /skad cig

tsam yang khro ba'i sems med par/ /snying rje brgya 'gyur du
yang bskyed par shog /'dod chags zhe sdang rmongs pa'i dgra bo
'dis/ /thog med dus nas mnar ba'i khon bzung ste/ /slan chad yid
la cung

@313b zad mi rgyu ba'i/ /dran shes bag yod brtan po bsgrub par
shog /'gro ba kun gyis yang dang yang du bdag /drin gyis legs
par bskyangs pa'i tshul dran nas/ /thabs la mkhas pa'i rol pa sna
tshogs kyis/ /srid

mtha'i bar du phan pa bsgrub par shog /nongs pa med par bdag la
gzhan dag gis/ /khro dang brdeg dang gshe dang mtshang brus
kyang/ /snying nas phan pa bsgrub pa'i bshes gnyen du/ /mthong
nas gus pas gces

par 'dzin par shog /dug gsum chang gis myos rnams mthong ba'i
tshe/ /bu sdug gdon gyis brlams pa mthong ba ltar/ /gang zag mi
khro de yi nyon mongs pa/ /gzhom phyir brtson pa du ma bsten par
shog /bdag

gis drin gyis bskyangs pa'i skye bo 'gas/ /drin gzo med par bdag
gi mgo dang lus/ /sog le rnon pos du mar gshags na yang/ /khro
sems phra mo'ang skye ba med par shog /dpe bral phyi nang yid du
'ong ba'i

dngos/ /byis pa dga' bskyed yul brgya'i dbus gnas kyang/ /gshed
mas bskor ba'i btson rar chud pa bzhin/ /yid la chags sems til
tsam med par shog /bdag med rtogs pa'i shes rab ral

gri yis/ /srid pa'i nyes kun bskyed pa'i dug sdong gi /sa bon
bag chags bcas pa ma lus pa/ /rtsad nas 'byin la mthu dang ldan
par shog /bdag gi dus gsum 'brel ba'i bde dge rnams/ /mkha'

@314a @#/ /mnyam 'gro ba'i rgyud la smin gyur cing/ /'gro ba kun
gyi sdig dang sdug bsngal kun/ /deng 'dir bdag la cig car 'byung
bar shog /bdag cag mthong thos dran reg gyur rnams kyang//

gnas skabs bde 'gro lha mi'i rten brgyud de/ /bdag nyid mngon
par rdzogs par sangs rgyas pa'i/ /thog ma'i 'khor du legs par
'gyur bar shog /phyogs bcu dus gsum bzhugs pa'i mgon po

ni; ;sras dang bcas pa kun gyi smon lam dang/ /spyod dang sku
tshe mdzad pa 'phrin las rnams/ /gcig tu bsdoms nas bdag gis
bsgrub par shog /'di ltar bsgrubs pa'i rnam dkar dge ba'i tshogs/
/ji snyed

thob de mar gyur 'gro ba rnams/ /byang chub mchog la myur du
dgod pa'i phyir/ /thams cad gzigs pa'i go 'phang thob phyir
bsngo/ zhes mchod rdzas phul nas rang gi yid la re ba'i don smon
pa'i tshigs su

bcad pa 'di yang/ shAkya'i btsun pa blo bzang chos kyi rgyal
mtshan gyis/ bkra shis lhun por 'phral du sug bris su bgyis
pa'o// //