@1a @#/ /maNDal gyi 'khrid yig bsod nams kyi chu gter zhes bya ba bzhugs so/ @1b @#/ /na mo gu ru manydzu g+ho ShA ya/ mtshan dpes mdzes sku gur kum lhun po'i zla/ /drug cu'i gsung dbayngs snyan 'gyur rna ba'i spyid/ /mkhyen brtse'i thugs gsang mtha' bral nam mkha'i chu/ /'jam mgon bla ma'i zhabs pad spyi bor mchod/ /phan bde'i rin chen 'byung gnas bsod nams kyi/ /mtsho chen gang las 'phel ba'i thabs kyi phul/ / maNDal bshad 'khrid chab klung rnam bzhi'i rgyun/ /gang blo'i ma dros chu yi gter las spro/ /de yang maNDal gyi mdo dang 'dus pa'i rtsa rgyud sogs las gsal bar bshad cing/ tshogs gsag pa maNDal gyi 'khrid ces 'phags bod kyi mkhas grub rnams la rlung ltar grags shing phyag bzhes su mdazad pa de nyid 'chad pa la/ phyi nang gsang ba de kho na nyid kyi maNDal @2a @#/ /te bzhi dang/ phyi'i maNDal la yang tshom bu bdun ma dgu ma nyer gsum ma so bdun ma sogs dang/ phyi ma la'ang gzhung gi tshig ris dang 'bul tshul gyi phyag rgyun sna tshogs shig 'dug kyang/ 'dir chos spyod skal bzang mgrin rgan du 'byung ba'i tshom bu so bdun ma bla ma'i man ngag bzhin du brjod na/ rgyu rab rin po che gser dngul sogs/ 'bring 'khar bar gsangs sogs/ tha ma rdo shing sa sogs las byas pa/ /kha dog dang dbyibs dza ltar rigs pa/ che chung khru gang gi tshad tsam sogs kyi maNDal dang/ rab gser dngul byur ru mu man sogs rin po che/ 'bring sman sna dang dri bzang gi phye ma/ tha ma 'bru gtsang dang dung mgron bu sogs kyi tshom bu sta gon byas la/ maNDal gyi nang dang logs la ba byung lnga dang/ stong [@#steng] dang tshom bu la dri bzang dang bdud rtsi lngas byugs/ de nas lag pa g- yon pas maNDal bzung/ g.yas pa'i lag ngar gyis byi dor legs par byas te tshom bu nas cung zad bkrams la/ oM badzra @2b b+hU mi AH hUM/ dbang chen gser gyi sa gzhi/ zhes brjod/ de yang 'go'i oM dang mgug gi AH hUM ni rdo rje gsum gyi sa bon/ badzra ni rdo rje/ b+hU mi ni sa gzhi ste/ sngags lugs ltar na/ rdo rje gsum dbyer mi phyed pa'i bde stong gi ye shes sa dkyil sogs kyi rnam pa can du shar bar mos nas byin gyis rlab pa'o/ /de'i tshe maNDal gyi go sar rlung gi dkyil 'khor sngon po dpangs su dpag tshad sa ya gcig dang drug 'bum/ rgyar dpag tshad grangs med yod pa/ de'i steng du chu'i dkyil 'khor dkar po dpangs su dpag tshad brgyad 'bum yod pa/ de'i steng du dbang chen gser gyi sa gzhi dpangs su dpag tshad sum 'bum nyi khri yod pa/ chu sa'i dkyil 'khor gnyis ka'i rgyar dpag tshad sa ya gcig dang nyis 'bum sum stong bzhi brgya lnga bcu yod pa/ dkyil 'khor gsum ga dbyibs zlum po rda thad la bzhag pa lta bu zhig lam gyis grub par bsam/ de nas maNDal gyi sde dge mtha' skor du mu 'phreng bzhag pa'i nang ngos su tshom bus g- yas skor du bskor la/ oM badzra re khe AH hUM/ phyi lcags ri khor yug gis bskor ba'i/ zhes brjod/ de'i sngags don gzhan rnams gong ltar dang/ re khe ni/ khor yug gam mu khyud de/ bde stong gi ye shes lcags ri'i rnam par byas nas byin gyis rlob pa @3a @#/ /yin pas/ dbang chen gser gyi sa gzhi'i steng gi mtha' skor du rgyu lcags las grub pa'i ri bo dpangs zheng du dpag tshad sum brgya bcu gnyis dang rgyang grags bzhi re yod pas zlum por bskor ba'i nang thams cad dpangs su dpag tshad brgyad khri yod pa'i chos khengs par bsam/ de nas dbus su tshom bu bkod la/ dbus su ri'i rgyal po ri rab/ ces brjod cig dbang chen gser gyi sa gzhi'i dbus kyi rol mtsho dang po'i dkyil nas ri rgyal lhun po rgyu shar dngul/ lho baiDUrya/ nub padma rA ga /byang gser las grub pa/ dbyibs gru bzhi/ dpangs zheng du dpag tshad brgyad khri re yod pa/ de'i sked pa man chad du bang rim bzhi yod pa'i mtha' skor du/ dwang ba sil yang 'jam drir zhim/ /mgrin pa la phan ltor mi gnod/ /ces pa ltar gyi yan lag brgayd dang ldan pa'i rol ba'i mtsho bdun dang/ gnya' shing 'dzin dang gshol mda' 'dzin/ seng ldeng can dang lta na sdug /rta rna dang ni rnam 'dud dang/ /mu khyud 'dzin te gser ri bdun/ /zhes pa ltar gyi gser gyi ri bdun gyis spel te gru bzhir bskor ba/ ri rab kyi steng gi phyogs mtshams bzhir lcog brgyad dang dbus su grong khyer lta na sdug dang/ de'i yang dbus su rnam par rgyal ba'i @3b khang bzang sogs sum cu rtsa gsum gyi lha gnas dang/ bang rim bzhi dang gser ri bdun la rgyal chen bzhi ris kyi lha gans snod bcud kyi khyad par sna tshogs dang bcas pa zhig lam gyis grub par bsam/ /de nas dbus kyi tshom bu de'i mdun 'bul yul la bstan pa'i phyogs la shar du byas pa'i shar du tshom bu bkod la/ shar lus 'phags pa/ zhes brjod cing/ gser ri phyi ma mu khyud 'dzin dang lcags ri'i bar du phyi rga mtsho chen pos gang ba'i dkyil nas gling bzhi gling phran brgyad thon pa'i tshul du yod pas/ 'dzam bu gling la ltos pa'i ri rab kyi shar na yod cing/ de'i mi rnams 'dzam bu gling pa las lus nyis 'gyur gyis 'phags pas na shar lus 'phags pa ste/ kha dog dkar po/ dbyibs zla gam 'dra ba'i ngos gzhan gsum la dpag tshad stong phrag gnyis re dang/ lcags ri phyogs kyi ngos la dpag tshad sum brgya lnga bcu yod pa zhig bsam/ /de nas lhor tshom bu bkod la/ lho 'dzam bu gling/ zhes brjod cing/ ri rab kyi lho na yod cing/ der skyes pa'i shing 'jam bu'i 'bras bu mtshor lungs pa'i sgras 'dzam bu zhes sgrog pa dang/ mtha' mtshos bskor bas na lho 'dzam bu glong ste/ kha dog sngon po/ dbyibs shing rta 'dra ba'i ngos gzhan gsum la dpag tshad stong phrag gnyis re dang/ lcags ri phyogs kyi ngos la dpag tshad gsum dang rgyang grags bzhi yod ap zhig bsam/ @04a @#/ /de nas nub tu tshom bu bkod la/ nub ba lang spyod/ ces brjod cing/ ri rab kyi nub na yod cing/ ba lang la longs spyod kyi gtso bor byed pas na nub ba lang spyod de/ kha dog gser po/ dbyibs zlum po mtha' skor la dpag tshad bdun stong dang rgyang grags bzhi yod pa zhig bsam/ de nas byang du tshom bu bkod la/ byang sgra mi snyan/ zhes brjod cing/ ri rab kyi byang na yod cing/ 'chi ba'i tshe zhag bdun gyi gong du sgra mi snyan pa thos pas na byang sgra mi snyan te/ kha dog ser po/ dbyibs gru bzhi/ ngos re la dpag tshad nyis stong re yod pa zhig bsam/ de nas shar gling kha phyi la bltas pa'i g.yas g.yon du tshom bu re bkod la/ lus dang lus 'phags/ zhes dang/ lho gling gi g.yas g.yon du tshom bu re bkod la/ rnga yab dang rnga yab gzhan/ zhes dang/ nub gling gi g.yas g.yon du tshom bu re bkod la/ g.yo ldan dang lam mchog 'gro/ zhes dang/ byang gling gi g.yas g.yon du tshom bu re bkod la/ sgra mi snyan dang sgra mi snyan gyi zla/ zhes brjod cing/ gling rang rang dang mdog dbyibs mtshungs shing rgya khyon chung ba re bsam/ de nas shar gyi nang du tshom bu bkod la/ rin po che'i ri bo zhes brjod cing/ shar gling du padma rA ga /indra nI la/ baiDUrya/ ma-rgad/ rdo rje pha lam/ mu tig /byu ru sogs rin po che sna tshogs kyi ri bo rgya che zhing/ dpangs mtho ba sogs snod bcud kyi khyad par sna tshogs yod @04b par bsam/ de nas lho'i nang du tshom bu bkod la/ dpag bsam gyi shing/ zhes brjod cing/ lho gling du rtsa ba gseg sdong po dngul/ yal ga baiDUrla/ lo ma shel/ 'dab ma spug /me tog mu tig dmar po/ 'bras bu rdo'i snying po ste/ rin po che sna bdun las grub pa/ rgyan gos yo byad sogs 'dod rgu thams cad yid bzhin du 'byung ba'i dpag bsam gyi shing sogs snod bcud kyi khyad par sna tshogs yod par bsam/ de nas nub kyi nang du tshom bu bkod la/ 'dod 'jo'i ba/ zhes brjod cing/ nub gling du/ rwa co rdo rje pha lam dang rmig pa indra nI la dang rdam dpag bsam gyi ljon pa las grub pa 'dra ba/ zhog dang lkog shal phun sum tshogs pa/ kha dog dmar ser gur kum gyi lhun po 'gro shes pa lta bur bzugs bzang zhing lta na sdug pa/ 'o ma dang nor 'bru sogs ci 'dod thams cad 'dzad med du 'byung ba'i 'dod 'jo'i ba sogs snod bcud kyi khyad par sna tshogs yod pa re bsam/ de nas byang gi nang du tshom bu bkod la/ ma rmos pa'i lo tog /ces brjod cing/ byang gling du/ ma rmos ma btab par skye ba'i 'bras sa lu'i lo tog yangs shing rgya che ba/ rtsa ba sor bzhi pa/ shun pa dang phub ma med pa/ nang brdas pa nub mi mngon cing nub brdas ? pa nang mi mngon pa/ kha dog dang ro bcud phun sum tshogs pa dang ldan pa sogs snod bcud kyi khyad par sna tshogs yod par bsam/ de nas yang shar gyi nang du tshom bu bkod la/ 'khor lo rin po che/ zhes brjod cing/ shar gyi bar snang du @05a @#/ /rgyu 'dzam bu chu bo'i gser las grub pa/ dbyibs lte ba rtsibs stong mu khyud dang ldan pa/ rgyar dpag tshad lnga brgya yod pa/ nyi ma ltar 'od zer 'phro zhing mdzes pa/ nam mkhar 'phags te dpag tshad 'bum gyi lam nyin gcig la bgrod nus pa/ 'khor los sgyur ba'i rgyal po dpung tshogs yan lag bzhi dang bcas pa nam mkha'i lam las gling bzhi dang rgyal chen bzhi'i gnas su bkri bar nus pa'i 'khor lo rin po che dpag tu med pa bsam/ de nas lho'i nang du tshom bu bkod la/ nor bu rin po che/ zhes brjod cing/ lho'i bar snang du/ rgyu baiDUrya sngon po las grub pa/ dbyibs zur brgyad dang ldan pa/ 'od zer kha dog lnga 'phro ba sa dpag tshad brgya'i bar du nyi ma bzhin du gsal bar byed pa/ 'od des tsha ba'i dus su bsil ba dang grang ba'i dus su dro bar byed pa/ dpag tshad brgya tshun chad du rims nad dang dus min gyi 'chi ba mi 'byung ba/ yid la bsam pa thams cad 'bad med du 'byung bar nus pa'i nor bu rin po che dpag tu med pa bsam/ de nas nub kyi nang du tshom bu bkod la/ btsun mo rin po che/ zhes brjod cing/ nub kyi bar snang du gzugs mdzes shing yid du 'ong la lta na sdug pa/ lus las ga pur dang kha nas utpa la'i dri zhim 'byung ba/ mchog tu gyur pa'i bde ba ster ba'i reg bya phun sum tshogs pa dang ldan pa/ gang du gnas pa'i gling de'i skye bo rnams kyi lus kyi bkres skom @05b dang yid kyi mya ngan sal bar nus pa/ skyes pa gzhan sems pa/ ser sna/ mi rigs par chags pa/ mi rigs pa'i gnas la dga' ba/ khyim thab kyi srog gcod 'dod pa ste bud med kyi skyon lnga dang bral zhing/ bsam pa mthun pa/ bu mang po btsa' ba/ rigs mthun pa/ srid mtho ba/ bud med gzhan la phrag dog med pa/ tshig cal col mi smra ba/ log lta med pa/ khyim thab med kyang 'dod yon gyi dbang du mi 'gro ba ste yon tan brgyad dang ldan pa'i btsun mo rin po che dpag tu med pa bsam/ de nas byang gi nang du tshom bu bkod la/ blon po rin po che/ zhes brjod cing/ skabs 'di'i blon po dang/ mdo sde dran pa nyer gzhag sogs nas bshad pa'i khyim bdag gnyis don 'dri ba mngon par 'byung ba'i mdo'i dgongs pa yin pas/ byang gi bar snang du/ 'byu dang rin po ches bang mdzod dang sa phyogs thams cad 'geng bar nus pa'i 'byor ba che zhing brtan pa/ g.yo sgyu dang gnod 'tshe med par byams brtses skyong bas skye bo thams cad yid dga' bar 'gyur ba/ chos srid kyi bya ba bsgrub pa la yid gzhungs shing dpag tshad brgya tshun chad mthong ba'i lha'i mig dang ldan pa'i blon po rin po che dpag tu med pa bsam/ de nas shar lhor tshom bu bkod la/ glang po rin po che/ zhes brjod cing/ shar lho'i bar snang du rkang lag bzhi/ sna/ rlig pa/ mjug ma ste yan lag bdun sa la gnas pa/ gangs ri ltar dkar zhing che la mche ba drug dang @06a @#/ /ldan pa/ glang po phal pa stong gi stobs dang ldan zhing nyin gcig la 'dzam gling lan gsum bskor nus pa/ zhon pa po'i bsam pa shes pas cang shes shing skud pas kyang 'khrid rung ba/ srog chags la mi gnod cing zhon pa po'i lus mi 'khrug pa'i phyir dal gyis 'gro ba/ chu dang skam dang bar snang ste gnas gsum du g.yul 'gyed nus pas pha rol dgra sde las rgyal bar byed pa'i glang po rin po che dpag tu med pa bsam/ de nas lho nub tu tshom bu bkod la/ rta mchog rin po che/ zhes brjod cing/ lho nub kyi bar snang du/ kha dog dkar zhing dbyibs dang bongs tshod phun sum tshogs pa/ lha'i nor bu'i sga srab sogs rgyan dang ri mo du mas mdzes pa/ nyin gcig la 'dzam gling lan gsum bskor kyang ngal dub med pa/ lus la nad sogs kyi skyon med cing gzi brjid dang ldan pa'i rta mchog rin po che dpag tu med pa bsam/ de nas nub byang du tshom bu bkod la/ dmag dpon rin po che/ zhes brjod cing/ nub byang gi bar snang du skye bo gzhan la mi 'tshe zhing chos ma yin pa'i spyod pa thams cad spongs ba/ yang dag pa'i tha snyad gdags su rung ba'i las sgrub pa la sems skyo ba dang lus ngal ba med pa/ ma smas kyang rgyal po'i bsam pa shes nas de dang mthun pa de sgrub pa/ glang po dang rta dang shing rta dang rkang thang ste dpung tshogs yan lag bzhi dgra'i phyogs su 'gro ba @06b dang/ sgar phab ste gnas pa dang/ rang yul du ldog pa'i drag po g.yul gyi bya ba thams cad la mkhas shing byang ba'i dmag dpon rin po che dpag tu med pa bsam/ de nas byang shar du tshom bu bkod la/ gter chen po'i bum pa/ zhes brjod cing/ byang shar gyi bar snang du/ rgyu gser las grub pa la rin po che sna tshogs kyis spras pa/ dbyibs lto ba che ba/ mgrin pa ring ba/ mchu 'phyang ba/ zhabs zhum pa/ dpag bsam gyi shing gis kha brgyan cing lha rdzas kyi gos kyis mgul pa bcings pa/ nang 'dod rgu'i gter gyis gang ba'i bum pa dpag tu med pa bsam/ de nas yang shar gyi nang du tshom bu bkod la/ sgeg mo/ zhes brjod cing/ shar gyi bar snang du sgeg mo dkar mo phyag gnyis kyis khro bo'i khu tshur gyis rdo rje rtse lnga pa re re dgu g.yas g.yon du snyems pa'i tshul gyis 'dzin cing/ mgo g.yon du cung zad dad cing 'gying pa dpag tu med pa bsam/ de nas lho'i nang du tshom bu bkod 'phreng ba ma/ zhes brjod cing/ lha'i bar snang du 'phreng ba ma ser mo phyag gnyis kyis khro bo'i khu tshur gyis rdo rje rin po che'i 'phreng ba dpung pa'i thad ? du phyar nas mchod yu rnams la dbang bskur bar mdzad pa dpag tu med pa bsam/ de nas nub kyi nang du tshom bu bkod la/ glu ma/ zhes brjod cing/ nub kyi bar snang du glu ma dmar skya phyag gnyis rdo rjes mtshan pa'i pi wang ser po brdung pa la brtson pa dpag tu med pa bsam/ de nas byang gi nang du tshom bu @07a @#/ /bkod la/ gar ma/ zhes brjod cing/ byang gi bar snang du gar ma zhal dang zhabs gnyis dkar po/ mgul dang ro stod dmar skya/ sked pa dang phyag gnyis sngo skya/ brla gnyis ser skya/ lhag ma sngo ba'i sna tshogs mdog /phyag gnyis kyis rdo rje rtse gsum pa gnyis g.yas spyi bo dang/ g.yon dkur bsnams nas gar sna tshogs bsgyur ba dpag tu med pa bsam/ de nas shar lho'i nang du tshom bu bkod la/ me tog ma/ zhes brjod cing/ shar lho'i bar snang du me tog ma ser mo/ g.yon rdo rjes mtshan pa'i me tog gi snod 'dzin cing/ g.yas me tog gi char 'bebs pa dpag tu med pa bsam/ de nas lho nub kyi nang du tshom bu bkod la/ bdug spos ma/ zhes brjod cing/ lho nub kyi bar snang du bdug spos ma dkar mo g.yas rdo rjes mtshan pa'i spos snod bsnams nas mchod yul rnams tshim par mdzad cing/ g.yon khro bo'i khu tshur gyis sdigs mdzub bsgreng ba dpag tu med pa bsam/ de nas nub byang gi nang du tshom bu bkod la/ snang gsal ma/ zhes brjod cing/ nub byang gi bar snang du snang gsal ma dmar skya/ g.yas rdo rje'i khu tshur gyis mar me'i sdong bu phrag pa g.yon par bsnams te mchod par mdzad cing/ g.yon thugs kar khu tshur mdzad pa dpag tu med pa bsam/ de nas byang shar phyi nang du tshom bu bkod la/ dri chab ma/ zhes brjod cing/ byang shar gyi bar snang du dri chab @07b ma sna tshogs mdog g.yon rdo rjes mtshan pa'i dri'i dung chos thugs kar bsnams shing/ g.yas kyis dpung ba'i thad nas dri byug tshul gyis mchod par mdzad pa dpag tu med pa bsam/ rnal 'byor rgyud kyi skor dang chos rgyal 'phags pa'i maNDal ltar na me tog ma dang bdug spos ma gnyis go rim 'phyugs pa 'dra bas brtag gi/ de nas yang shar gyi nang du tshom bu bkod la/ nyi ma/ zhes brjod cing/ shar gyi bar snang du nyi ma'i dkyil 'khor rgyu me shel las grub pa/ dbyibs zlum pa/ rgyar dpag tshad lnga bcu rtsa gcig dang dpangs su dpag tshad phyed dang drug dang gcig gi bco brgyad cha gcig yod pa/ tsha ba'i 'od zer gyis gling gi mun pa phra rags thams cad sel ba/ steng du gser gyi rwa ba dang/ rin po che'i them skas dang/ pha gu dang/ glu gar dang rol mo rtse ba'i lha'i bu bu mo sogs snod bcud kyi khyad par sna tshogs dang bcas pa dpag tu med pa bsam/ de nas nub kyi nang du tshom bu bkod la/ zla ba/ zhes brjod cing/ nub kyi bar snang du zla ba'i dkyil 'khor rgyu chu shel lam grub pa/ dbyibs zlum po/ rgyar dpag tshad lnga bcu dang dpangs su dpag tshad phyed dang drug dang gcig gi bco brgyad cha gcig yod pa/ bsil ba'i 'od zer gyis gling gi mun pa rags pa sel ba/ steng du gser gyi rwa ba dang/ rin po che'i them skas dang/ pha gu dang/ glu gar dang rol mo rtse ba'i lha'i bu bu mo sogs snod bcud kyi @08a @#/ /khyad par sna tshogs dang bcas pa dpag tu med pa bsam/ de nas lho'i nang du tshom bu bkod la/ rin po che'i gdugs/ zhes brjod cing/ lho'i bar snang du lha rdzas las grub pa'i gdugs dkar po nor bu'i yu ba dang gser gyi rtsibs stong dang indra nI la'i tog dang mu tig gi chun 'phyang gis mdzes pa dpag tu med pa bsam/ de nas byang gi nang du tshom bu bkod la/ phyogs las rnam par rgyal ba'i rgyal mtshan/ zhes brjod cing/ byang gi bar snang du rin po che'i yu ba'i rtser zla phyed rin chen rdo rje'i tog gis mdzes shing/ lha rdzas las grub pa'i dar bzang po'i lce brtsegs gsum gshibs la snyan pa'i sgra 'byin pa'i gser gyi dril chung du ma dang/ nya spu skyis/ chu srin ma ka ra/ seng ge rkang pa brgyad pa ste srog chags gsum gyi mtshan ma yod pa'i rgyal mtshan dpag tu med pa bsam/ de yang tshom bu rnams sna ma snga ma'i nang du phyi ma phyi ma 'god cing/ bsgom don la rin chen bdun dang gter bum lcags ri nas mu khyud 'dzin ri'i bar gyi mtsho gling gi steng dang/ sgeg sogs lha mo brgyad ri mtsho bar ma drug gi steng dang/ nyi zla gdugs rgyal mtshan bzhi gnya' shing 'dzin ri dang rol mtsho dang po'i steng gi bar snang khyud pa'i tshul du yod par mos pa yin zhes rje b+hi lung pa chen po'i gsung ngo/ /de nas maNDal de lag pa gnyis kas snying ga'i thad du gus @08b pas 'bul tshul du bzung la/ dbus su lha dang mi'i dpal 'byor phun sum tshogs pa ma tshang ba med pa 'di dag /drin can rtsa ba dang brgyud par bcas pa'i dpal ldan bla ma dam pa rnams dang/ mnyam med shAkya'i rgyal po'i lha tshogs 'khor dang bcas pa rnams la dbul bar bgyi'o/ /thugs rjes 'gro ba'i don du bzhes su gsol/ bzhes nas byin gyis brlab tu gsol/ zhes brjod cing/ ri rab kyi steng gi dbus su yang lha mi'i dpal 'byor phun tshogs thams cad tshang bar mos pa sogs/ mdor na mchod yul re re'i mdun du rang dang sems can thams cad kyi lus re re sprul pa rnams kyis/ ngo bo rang gzhan gyi lus longs spyod dus gsum gyi dge rtsa yin pa la rnam pa bshad ma thag pa'i snod bcud kyi bkod pa rnams la ma dag pa'i snang zhen bkag ste/ dag pa rab 'byams kyi zhing khams su mos pa re re thogs shing/ de lta bu'i snod bcud kyi bkod pa re re las kyang 'od zer gyi sner rang 'dra'i bkod pa nyi zer gyi rdul phran bzhin du 'phro ba dang/ sprul gzhi dang sprul pa de dag gi rdul phra rab re re'i go sar yang rang 'dra'i bkod pa grangs med pa sprul te/ ched du bya ba sems can gyi don du sangs rgyas thob pa'i phyir/ zhing gi mthar thug bla ma lha tshogs rnams la/ bsam pa'i khyad par dad gus spro shugs chen pos phul bas/ bla ma lha tshogs rnams kyis kyang gdul bya @09a @#/ /tshogs rdzogs pa la dgongs nas dgyes bzhin du bdag gir mdzad cing/ sku'i cha las bdud rtsi 'od zer spras pa rnams kyis rang gzhan gyi sdig sgrib nad gdon sbyangs nas/ tshe bsod yon tan rgyas shing gsang gsum gyi byin rlabs zhugs pa'i mos pa byas na/ dmigs pa 'char bde la gnad mang po 'du ba zhig 'ong bas tshig myog gi spros pa dor nas gzhung so so'i don gnad tshol zhing sems pa la 'bad par bya'o// smras pa/ bsod nams chen po'i gting mtha' mi mngon zhing/ /mngon mtho nges legs rin chen 'byung ba'i gnas/ /rgyal sras spyod pa'i chu glung 'du ba'i gzhi/ /maNDal rgya mtsho'i ngang tshul 'dzin pa 'di/ / mdo rgyud bstan bcos kun gyi dgongs pa'i gnad/ /mkhas grub gong ma rnams kyis bsngags bya'i yul/ /mar me mdzad dang 'jam dpal snying po'i srol/ /'di 'dra'i nyams len shes pa skal pa bzang/ /tshul 'di bskrun pa'i rnam dkar bsil ba'i rir/ /'od stong ldan pa'i zer gyis 'khyud 'dra des/ /srid zhi'i mtha' bral myang 'das mchog gi grong/ /bgrod nas yid can ma lus 'dren gyur cig /(ces maNDal gyi 'khrid yig bsod nams kyi chu gter zhes bya ba 'di ni snga mo nas rgyal sras thogs med bzang po'i snang brnyan gyi rim gro ba chos dpal tshe ring lags kyis maNDal tshom bu so bdun ma'i khrid yig dgos zhes bskul ba dang/ dus phyis sdom brtson nyams len gyi gnang la @09b gzhol ba zhabs drung blo bzang chos 'phel lags nas tshom bu nyer gsum ma'i khrid yig gsal zhing 'khyer bde ba zhig dgos zhes nan chen pos bskul ba'i bzhed pa cig car du bsgrub pa'i phyir/ mngon pa mdzod rtsa 'grel dang maNDal gyi 'khrid yig mang du mthong zhing/ bla ma'i zhal gyi man ngag du ma thos pa rnams kyi don gyi snying po phyogs gcig tu bsdus te/ shAkya'i dge slong d+harma b+ha dras 'bru mang gi lo'i nag zla'i yar tshes bzang po la bzhad dngul chu'i ri phug tu sbyar ba'o// //)