@#/ /blo sbyong don bdun ma'i yang snying theg chen lam gyi lde mig ces bya ba bzhugs so// // @01a @##/ /na mo gu ru manydzu g+ho ShA ya/ 'dir blo sbyong don bdun ma'i yang snying nyams su len tshul la gnyis/ thun gyi ngo bo la ji ltar bya tshul las thun mtshams su ji ltar bya tshul lo/ / dang po la gsum/ sngon 'gro sbyor ba'i chos drug bshad pa/ dngos gzhi don tshan bdun bshad pa/ mjug gsol 'debs bzlas pa bsngo smon bshad pa'o/ /dang po ni/ gnas khang byi dor byas la sku gsung thugs rten dgram pa dang/ mchod pa g.yo med par btsal la bkod pa mdzes par bsham pa gnyis sngon du btang nas/ /stan bde ba la lus gnad dang ldan par 'khod de/ ga re/ bdag gis dal 'byor lan cig thob pa'i skabs 'dir 'khor ba'i gnas la ma chags par ma rgan sems can thams cad 'khor ba'i gnas na sdug bsngal gsum gyis nyam thag pa @02a @#/ /'di rnams myur du 'khor ba'i btson ra 'di las bsgral ba'i phyir rdzogs pa'i sangs rgyas kyi go 'phang rin po che ci nas kyang thob par bya'o snyam pa'i dge sems khyad par can gyi ngang nas/ mdun gyi nam mkhar rin po che'i khri'i steng du bla ma thub pa'i dbang po dngos brgyud kyi bla ma yi dam sangs rgyas byang sems nyan rang dpa' bo mkha' 'gro chos skyong srung ma'i tshogs dang bcas pa bzhugs par gyur/ ces skyabs yul dang/ rang dang rang gi mtha' skor na gnas pa'i pham sems can thams cad 'khor ba dang ngan song gi sdug bsngal la 'jigs shing skrag nas res dkon mchog gsum las gzhan na med pas dus 'di nas byang chub ma thob kyi bar du skyid rung sdug rung dus dang gnas skabs cir gyur kyang dkon mchog rin po che rnam pa gsum mkhyen no/ zhes rgyu gsal btab ste/ rtsa brgyud bla ma yi dam lha tshogs dang/ /rdzogs sangs rgyas dang dam chos dge 'dun tshogs/ /dkon mchog gsum la snying nas skyabs su mchi/ /bdag rgyud smin cing grol par byin gyis rlobs/ zhes lan gsum gyi mthar/ dkon mchog gsum las bdud rtsi'i rgyun babs/ rang gzhan sems can thams cad la thim pas las ngan sdig sgrib thams cad sbyangs/ dkon mchog gi byin rlabs sems la zhugs nas tshe @02b dang bsod nams lung rtogs kyi yon tan thams cad rgyas par gyur/ ces skyabs 'gro dang/ mar gyur sems can thams cad bsgral ba'i phyir/ /myur ba myur bar rdzogs byang bsgrub par bya/ /de yi phyir du theg chen blo sbyong gi /gdam pa zab mo nyams su blang bar bya/ zhes lan gsum gyis sems bskyed bya'o/ /de nas/ mdun gyi nam mkhar 'ong 'bar nor bu'i khrir/ /sna tshogs pad nyi zla ba'i dkyil 'khor steng/ /bka' drin mnyam med rtsa ba'i bla ma dang/ /dbyer med ston pa thub pa'i dbang po la/ /brgyud pa gsum ldan bla ma'i tshogs rnams dang/ /yi dam sangs rgyas byang sems nyan rang dang/ /dpa' bo mkha' 'gro bstan srung rgya mtshos bskor/ /phyogs bcu'i zhing nas rang 'dra'i ye shes pa/ /spyan drangs thims pas dbyer med gcig tu bzhugs/ zhes tshogs zhing gsal btab la/ 'dren pa mnyam med ston pa bcom ldan 'das/ /lam bzang gsal mdzad dngos brgyud bla ma dang/ /slu med mchog gsum phyag 'os thams cad la/ /sgo gsum gus pa chen pos phyag 'tshal lo/ /chu gnyis nyer spyod rol mo 'dod yon sogs/ /dngos bshams yid kyis sprul pa ci yod dang/ /khyad par bdag lus bran du 'bul lags na/ /thugs rje che mgon tshogs kyis bzhes su gsol/ /bdag sems dug gsum gdon gyi dbang gyur pas/ /sgo gsum sgo nas nyes spyod ci mchis pa/ /thugs rje che ldan @03a @#/ /rnams kyi spyan sngar bshags/ /bdag gi sdig sgrib dag par mdzad du gsol/ /rang gzhan rnam dkar dge ba ci yod dang/ /khyad par bdag pas gzhan gces mdzad pa yi/ /rgyal sras rnams kyi rlabs chen mdzad pa la/ /bsam pa thag pas rjes su yi rang ngo/ /ma rig mun 'thoms srid mtsho nyam nga ru/ /'khyams shing sdug bsngal mgon med bdag cag la/ /phan bde'i lam bzang yun du 'doms pa'i phyir/ 'dren pa mchog rnams bskal brgyar bzhugs su gsol/ /dus gsum rnam dkar dge ba ci mchis pa/ /nyam thag 'gro ba 'di kun bsgral ba'i phyir/ /rgyal sras spyod pa rgya mtshor legs bslabs te/ /bla med rdzogs byang myur du thob phyir bsngo/ zhes yan lag bdun pa 'bul lo/ /de nas maNDal phul te/ dpal ldan rtsa ba'i bla ma rin po che/ /bdag gi spyi bor pad zla'i steng bzhugs la/ /bka' drin chen po'i sgo nas rjes bzung ste/ /sku gsung thugs kyi dngos grub stsal du gsol/ /ston pa thub pa'i dbang po byams 'jam dbyangs/ /klu sgrub thogs med rgyal sras zhi ba lha/ /a ti sha sogs brgyud pa'i bla ma la/ /gsol ba 'debs so bdag rgyud byin gyis rlobs/ /rgyal ba'i sras po thogs med bzang po dpal/ /gzhon nu blo gros rje btsun tsong kha pa/ /yab sras brgyud par bcas pa thams cad la/ /gsol ba 'debs so X/ rgyal dang rgyal @03b sras kun gyis ma thul ba'i/ /dmu rgod bdag cag theg mchog lam bzang la/ /'khrid mdzad zla med drin can bla ma la/ /gsol ba 'debs X/ rtsa brgyud bla ma yi dam lha tshogs dang/ /skyabs kyi mchog gsum dpa' bo mkha' 'gro ma/ /mthu ldan bka' srung rgya mtshor bcas pa la/ /gsol ba X/ skye ba kun tu yang dag bla ma dang/ /'bral med chos kyi dpal la longs spyod cing/ /sa dang lam gyi yon tan rab rdzogs nas/ rdo rje 'chang gi go 'phang myur thob shog /ces gsol ba btab rjes/ de ltar gsol ba btab pas tshogs zhing rnams/ /spyi bo'i bla mar thim pa yongs gyur las/ /rang gi spyi bor par dkar zla ba'i steng/ /rtsa ba'i bla ma mgon po spyan ras gzigs/ /sku mdog dkar po zhal gcig phyag bzhi pa/ /dang po'i phyag gnyis thugs kar thal mo sbyar/ /g.yas pas shel phreng g.yon pas pad dkar 'dzin/ /rin chen rgyan dang dar gyi na bzas klubs/ /skyabs gsum ma lus 'dus pa'i bdag nyid du/ /rdo rje skyil krung tshul gyis bzhugs par gyur/ ces gsal btab la/ dus gsum skyabs gnas kun 'dus kyi ngo bo bla ma rin po che la gsol ba 'debs so/ /phyin ci log gi blo sna mtha' dag 'gag pa dang/ phyin ci ma log pa'i blo sna mtha' dag bde blag tu skye ba dang/ rkyen phyi nang gi bar chad thams cad nye bar zhi bar byin gyis brlab tu gsol/ zhes phur @04a @#/ /tshugs gsol 'debs lan mang du bya'o/ /gnyis pa dngos gzhi don tshan bdun bshad pa la gnyis/ don tshan bdun bshad pa dngos dang/ che ba dang khung swo bshad pa'o/ /dang po la bdun/ sngon 'gro rten gyi chos bstan pa/ dngos gzhi byang chub kyi sems sbyang ba/ rkyen ngan byang chub kyi lam du bsgyur ba/ tshe gcig gi nyams len dril nas bstan pa/ blo 'byongs pa'i tshad bstad bstan pa/ blo sbyong gi dam tshig bshad pa/ blo sbyong gi bslab bya bshad pa'o/ /dang po ni/ dang po sngon 'gro dag la bslab/ ces pa ltar ro/ /gnyis pa dngos gzhi byang chub kyi sems sbyang ba la gnyis/ don dam byang chub kyi sems sbyang ba dang/ kun rdzob byang chub kyi sems sbyang ba'o/ / dang po ni/ chos rnams rmi lam lta bur bsam/ ma skyes rig pa'i gshis la dpyad/ /gnyen po nyid kyang rang sar grol/ lam gyi ngo bo kun gzhi'i ngang la bzhag /thun mtshams sgyu ma'i skyes bur bya/ zhes pa ltar ro/ / gnyis pa kun rdzob byang chub kyi sems sbyang ba ni/ /gtong len gnyis po spel mar sbyang/ /de gnyis rlung la bskyod par bya/ /yul gsum dug gsum dge rtsa gsum/ /spyod lam kun tu tshig gis sbyang/ /len pa'i go rim rang nas brtsam/ zhes pa ltar ro/ /gsum pa rkyen ngan byang chub kyi lam du bsgyur ba ni/ snod bcud sdig pas gang ba'i tshe/ /rkyen ngan byang chub lam du bsgyur/ /le lan thams cad gcig la bda'/ /kun la bka' drin che @04b bar bsgom/ 'khrul snang sku bzhir lta ba yi/ /stong nyid srung ba bla na med/ /sbyor ba bzhi ldan thabs kyi mchog /'phral la gang thug bsgom du sbyar/ zhes pa ltar ro/ /bzhi pa tshe gcig gi nyams len dril nas bstan pa ni/ man ngag snying po mdor bsdus pa/ stobs lnga dag dang sbyar bar bya/ /theg chen 'pho ba'i gdam ngag ni/ stobs lnga nyid yin spyod lam gces/ zhes pa ltar ro/ /lnga pa blo 'byongs ba'i tshad bstan pa ni/ chos kun dgos pa gcig tu 'dus/ /dbang po gnyis kyi gtso bo gzung/ /yid bde 'ba' zhig rgyun du bstan/ /yengs kyang thub na 'byongs pa yin/ zhes pa ltar ro/ /drug pa blo sbyong gi dam tshig bshad pa ni/ /spyi don gsum la rtag tu bslab/ 'dun pa bsgyur la rang sor bzhag /yan lag nyams pa brjod mi bya/ /gzhan phyogs gang yang mi bsam mo/ /nyon mongs gang che sngon la sbyang/ /'bras bu re ba thams cad spang/ dug can gyi zas spang/ gzhung bzang po ma bsten/ bshags ngan ma rgod/ 'phrang ma sgug /gnad la mi dbab/ mdzo khal glang la mi 'byo/ lto log mi bya/ mgyogs kyi rtse ma gtong/ lha bdud du mi dbab/ skyid kyi yan lag tu sdug ma 'tshol/ zhes pa ltar ro/ /bdun pa blo sbyong gi bslab bya bshad pa ni/ rnal 'byor thams cad gcig gis bya/ /log gnon thams cad gcig gis bya/ /thog mtha' gnyis la bya ba gnyis/ /gnyis po gang byung bzod par bya/ /gnyis po srog dang bsdos la bsrung/ /dka' ba @05a @#/ /gsum la bslab par bya/ /rgyu yi gtso bo rnam gsum blang/ /nyams pa med pa rnam gsum bsgom/ /'bral med gsum dang ldan par bya/ /yul la phyogs med dag tu skyang/ /khyab dang gting 'byongs kun la gces/ /bkol ba rnams la rtag tu bsgom/ /rkyen gzhan dag la bltos mi bya/ /da res gtso bo nyams su blang/ go log mi bya/ res 'jog mi bya/ dol chod du sbyar/ rtog dpyod gnyis kyis thar bar bya/ yus ma bsgom/ ko long ma sdom/ yung tsam pa mi bya/ 'or che ma 'dod/ ces pa ltar ro/ /gnyis pa che ba dang khungs sogs bshad pa ni/ snyigs ma lnga po bdo ba 'di/ /byang chub lam du bsgyur ba yin/ /man ngag bdud rtsi'i snying po 'di gser gling pa nas brgyud pa yin/ /sngon sbyangs las kyi 'phro sad pas/ /rang gi mos pa mang ba'i rgyus/ /sdug bsngal gtam ngan khyad bsad nas/ /bdag 'dzin 'dul ba'i gdam ngag zhus/ /nga ni shi yang mi 'gyod do/ zhes pa ltar ro/ /gsum pa mjug gsol 'debs bzlas pa bsngo smon bshad pa ni/ dus gsum skyabs gnas kun 'dus kyi ngo bo bla ma rin po che la gsol ba 'debs so/ zhes lan mang du gsol ba btab pas/ bla ma spyan ras gzigs kyi sku'i cha las rang 'dra gnyis pa re chad nas rang gzhan sems can thams cad la thims pas spyan ras gzigs kyi skur lam gyis gyur pa'i thugs kar zla ba'i dkyil 'khor gyi steng du hrIH dkar po'i mthar yi @05b ge drug pa'i sngags phreng gis bskor bar gyur par bsam nas/ ma Ni ci mang bgrangs pa'i mthar/ /rnam dkar dge ba 'di yis myur du bdag /bla ma thugs rje chen po 'grub gyur nas/ /mar gyur 'gro ba gcig kyang ma lus pa/ /'phags mchog de yis la 'god par shog /ston pa thub pa'i dbang po'i rnam thar ltar/ /rang don yal bar dor nas gzhan don du/ /rlabs chen rgyal sras spyod la slob pa la/ /skad cig tsam yang zhum pa med par shog /bdag la snying nas dad pa byed pa 'am/ khro ba'i sems kyis mi snyan brjod kyang rung/ /bzang ngan 'brel ba thogs pa ma lus pa/ /thams cad byang chub lam la 'god par shog /bde gshegs chos kyi sku mnga' sras bcas kyi/ /thugs rje nus pa dpag tu med pa dang/ /rten cing 'brel byung bslu ba med pa'i mthus/ /bdag gi smon pa'i gnas 'di 'grub gyur cig /blo bzang rdo rje 'chang chen tsong kha pa'i/ /snyan brgyud man ngag snying po mthar thug pa/ /zab lam bla ma lha yi rnal 'byor gyis/ /don gnyis lhun gyis 'grub pa'i bkra shis shog /ces bsngo smon shis brjod bya'o/ /gnyis pa thun mtshams su ji ltar bya tshul ni/ thun mtshams sgyu ma'i skyes bur bya/ zhes dang/ yul gsum dug gsum dge rtsa gsum/ /spyod lam kun tu tshig gis sbyang/ zhes dang/ rnal 'byor thams cad gcig gis bya/ zhes pa ltar ro/ (zhes blo sbyong don bdun ma'i yang snying theg chen lam gyi lde mig ces bya ba 'di ni rje bla ma'i gdan sa dben gnas bde chen du dge slong d+harma b+ha dras lan 'dod kyis sbyar ba'i yi ge pa ni btik+Shu su d+hI badzra ro//