@#/ /blo sbyong tshig brgyad ma'i 'khrid yig theg chen dga' ston snying
po bzhugs//

@01b @#/ /na mo gu ra we/ 'dir sems dpa' chen po glang ri thang pa'i blo
sbyong tshig brgyad ma'i don nyams su len tshul la gsum/ sngon 'gro
/dngos gzhi/ mjug go /dang

po ni/ gnas gtsang mar rten mchod bshams par legs par 'khod nas/
phan bde legs tshogs ma lus pa/ /mtshan ldan bla mar rag las pas/ /bsam
sbyor gnyis kyis

legs bsten te/ /mchod pa gsum gyis mnyes par bya/ /don che rnyed
dka'i rten bzang 'di/ /da lta nyid du 'jig pa'ang srid/ /ngan 'gro tsha
grang bkres skom dang/ /glen lkugs

bkol spyod sogs kyis gzir/ /bde 'gro skye rga na 'chi dang/ /'chi 'pho
ltung ba sogs kyis mnar/ /bdag dang rigs drug 'gro ba kun/ /sdug
bsngal mtsho las grol ba'i thabs

@02a @#/ /gzhan du res ma mchis pas/ /slu med bla ma dkon mchog la/
/dpung gnyen mchog tu 'dzin 'dod kyi/ /bsam pa drag pos skyabs su
'gro/ /mchog gsum nam

mkha' gang ba yis/ /bdag sogs mgon skyabs dpung gnyen mdzod/ /bla
ma rnams la skyabs su mchi/ /rdzogs sangs rgyas la skyabs su mchi/
/dam pa'i chos la skyabs su

mchi/ /dge 'dun rnams la skyabs su mchi/ /lan gsum/ /bla ma mchog
gsum dam pa la/ /gus pas phyag 'tshal skyabs su mchi/ /bdag dang mkha'
mnyam 'gro ba'i

rgyud/ /myur du byin gyis brlab tu gsol/ /de ltar gsol ba btab pa yis/
/skyabs yul rnams las 'od zer 'phros/ /bdag dang 'gro ba kun la phog
/sdig ltung sgrib pa

ma lus sbyangs/ /zhes brjod/ /'gro kun bdag gi mar gyur te/ /drin gyis
bskyangs pa sha stag yin/ /sdug bsngal dngos dang 'di rgyu la/ /spyod
cing bde ba'i go skabs bral/ /

@02b 'di rnams sdug bsngal dang bral zhing/ /bde ba mchog la dgod
pa'i phyir/ /rnam 'dren stobs bcu mnga' ba yi/ /go 'phang dam pa myur
du bsgrub/ /de phyir byang chub sems sbyong gi /gdams pa zab mo
nyams su blangs

lan gsum/ mkha' dbyings dbus su pad zla la/ /bla ma sprul sku 'od
dpag med/ /spyan ras gzigs dang mthu chen thob/ /sangs rgyas byang
sems nyan rang dang/ /chos skyong srung ma'i tshogs kyis bskor/
/gnas gsum rdo rje

gsum gyis mtshan/ /hUM yig 'od kyis ye shes pa/ /spyan drangs thim bas
dbyer med gyur/ /grangs mang lus sprul gus phyag 'tshal/ /mchod
rdzas nam mkha' gang ba 'bul/ /thog med nas bsags sdig ltung
bshags/ /rang

gzhan dge la snying nas rangs/ /zab rgyas chos 'khor tshad med skor/
/'khor ba srid du brtan par bzhugs/ /'dis mtshon dge ba ji snyed pa/
/rdzogs byang go 'phang thob phyir bsngo/ /bla ma mchog gsum dam
pa la/ /rtse gcig gus pas

gsol ba 'debs/ /bdag dang mar gyur 'gro kun gyis/ /byang sems 'byongs
bar byin gyis rlobs/ /snying nas gdung shugs drag po yis/ /gsol ba
rtse gcig legs btab pas/ /'khor tshogs thams cad 'od du zhu/ /bla ma

'od dpag med la thim/ /de nyid dgyes bzhin gdan dang bcas/ /rang gi
spyi bor byon nas bzhugs/ /phyag 'tshal mchod cing sdig pa bshags/ /yi
rang bskul zhing bzhugs par gsol/ /dge ba rang gzhan thams cad
kyis/ /kun

@003a @#/ /mkhyen go 'phang thob phyir bsngo/ /kun 'dus bla ma 'od
dpag med/ /rtse gcig gus pas gsol ba 'debs/ /bdag dang mar gyur 'gro
kun gyis/ /byang sems 'byongs par byin gyis rlobs/ /zhes

brjod/ (gnyis pa dngos gzhi la brgyad las/) tshig rkang dang po bdag
gis ni/ /mar gyur sems can thams cad la/ /ci 'dod dngos grub legs
stsol ba'i/ /bsam 'phel yid bzhin nor bu las/ /lhag pa'i don mchog

sangs rgyas kyi/ /go 'phang bsgrub pa'i bsam pa yis/ /rgyun chad med
par dus rtag tu/ /shin tu gces par 'dzin par shog /bla ma 'od dpag med
mgon gyis/ /rang las sems can gzhan dag rnams/ /gces par 'dzin pa'i
blo

rnal ma/ /bcos min skye bar byin gyis rlobs/ /gnyis pa bdag ni gnas
gang du/ /gang zag mchog dman su zhig dang/ /'grogs nas 'gro 'am
'dug pa'i tshe/ /bdag nyid 'grogs yul de kun las/ /shin tu dman

par blta bya zhing/ /sems can gzhan la ngo dga' sogs/ /bcos min bsam
pa thag pa yis/ /gzhan nyid mchog tu 'dzin par shog /bla ma 'od dpag
med mgon gyis/ /rang nyid yal bar 'dor ba dang/ /gzhan la

mchog tu 'dzin pa'i blo/ /bcos min skye bar byin gyis rlobs/ /gsum pa
bdag gis 'gro 'chag sogs/ /spyod lam bya ba'i dus kun tu/ /dran shes
brtan pos rang rgyud la/ /legs par brtags te chags sdang

@003b sogs/ /nyon mongs mngon gyur skyes ma thag /'dis ni bdag
gzhan gnyis ka yang/ /'di phyir ma rung byed pas na/ /btsan thabs
gdod nas bzlog par shog /bla ma 'od dpag med mgon gyis/ /nyon
mongs mngon

gyur skyes ma thag /'bur 'joms gdong bzlog byed pa yi/ /gnyen po skye
bar byin gyis rlobs/ /bzhi pa bdag gis rang bzhin gyi/ /bsam pa ngan
dang mtshams med sogs/ /sdig pa spyod dang sdug bsngal ba/ /drag pos

non sa'i sems can rnams/ /mthong tshe brtse yul rnyed dka' ba/ /rnyed
pas rin chen gter mchog dang/ /'phrad ltar shin tu dga' ba yis/ /gces
par 'dzin pa'i brtse bar shog /bla ma 'od dpag med mgon gyis/ /sems

can spyi dang khyad par du/ /sdig sdug drag pos mnar rnams la/ /shin
tu brtse bar byin gyis rlobs/ /lnga pa gang zhig la bdag gis/ /phan
btags pa'am de min kyang/ /rang la phan pa byed snyam pa'i/ /re ba che
ba 'ga'

zhig gis/ /phyir zhing gnod pa cher byed pa'i/ /shin tu mi rigs byed na
yang/ /dge bskul bshes gnyen dam pa ru/ /bltas te shin tu byams par
shog /bla ma 'od dpag med mgon gyis/ /sems can spyi dang khyad par

du/ /gnod byed rnams la byams pa'i sems/ /shugs drag skye bar byin
gyis rlobs/ /drug pa bdag la gzhan gyis ni/ /phrag dog gis bslangs
gshe ba dang/ /sgro skur brdeg sogs mi rigs pa'i/ /bya ba ci dang ci
byed kyang

@004a @#/ /gyod dang bub kha rang gis blang/ /khe dang rgyal kha
gzhan dag la/ /'bul la 'gyod pa med pa dang/ /spro sems shugs drag
skye bar shog /bla ma 'od dpag med mgon gyis/ /gyong pham rang gis

len pa dang/ /khe rgyal gzhan la 'bul ba'i sems/ /shugs drag skye bar
byin gyis rlobs/ /(bdun pa snying po mdor bsdu na/) /skabs su babs tshe
dngos su 'am/ /gzhan du gtso bor bsam pa yis/ /lus dang longs spyod
dus

gsum dge/ phan bde ma rnams kun la 'bul/ /ma yi gnod pa sdig sgrib
dang/ /sdug bsngal kun kyang stong min la/ /gsang bas bdag la len
par shog /bla ma 'od dpag med mgon gyis/ /bdag gi bde dge gtong

ba dang/ /zhan gyi sdig sdug len pa'i sems/ /bcos min skye bar byin gyis
rlobs/ /rang gi sna bug gnyis nas rlung/ /phyi la 'gro tshe bde dge kun/
/'od zer dkar po'i rnam pa yis/ /rlung dang 'grogs nas phyir song ba/
/ma

rnams kun gyi sna bu gnas/ /zhugs pas ma rnams bde bas tshem/ /nang
du 'jug tshe ma rnams kyi/ /sdig sgrib sdug bsngal ji snyed pa/ /thams
cad 'od zer nag po yi/ /rnam pas ma yi sna bug nas/ /thon nas rang gis
sna bug tu/ /

zhugs te rang la smon par gyur/ /brgyad pa nyams len de dag dang/
/des mtshon kun byang chos kun kyang/ /ngo bos grub pa'i skye 'gag
dang/ /rtag chad 'gro 'ong gcig tho dang/ /mtha' brgyad chos sam
dngos po ru/ /'dzin pa'i rtog

@004b pa'i dri ma yis/ /ma spags mtha' bral dbu ma'i lam/ /rang bzhin
med par mnyam par bzhag /de las langs pa'i rjes thob tu/ /chos kun
rang bzhin med na yang/ /tha snyad tsam du sgyu ma ltar/ /snang
zhing grub par shes pa yis/ /ngo bos

grub pa'i rtag mtha' dang/ /gtan nas med pa'i chad mtha' ru/ /zhen
pa'i 'ching ba las grol te/ /bla med byang chub myur thob shog /bla
ma 'od dpag med mgon gyis/ /chos kun ngo bos stongs pa dang/ /tha
snyad tsam du snang ba'i blo/ /zung

'brel skye bar byin gyis rlobs/ /spyi bo'i bla ma'i gnas gsum las/ /bdud
rtsi 'od zer dpag med babs/ /lus bkrus nad gdon sdig sgrib dang/
/khyad par bdag 'dzin gces 'dzin sbyangs/ /lus gang tshe bsod yon tan

dang/ /khyad par byang chub sems gnyis skyes/ /zhes brjod la bdud
rtsi 'bebs sbyangs dang bcas bsgom par bya'o/ /gsum pa mjug ni/ /bla
ma 'od dpag med mgon gyis/ /bdag gzhan 'gro ba ma lus pas/ /khyod
kyi go 'phang dam pa de/ /

myur du thob par byin gyis rlobs/ /de ltar gdung shugs drag po yis/
/gsol ba btab pas dgyes bzhin du/ /rang la thim pas sgrib gnyis dag
/zung 'jug tshe dpag med du gyur/ /rang gi thugs ka'i hriH yig las/ 'od
zer

'phros te 'gro kun gyi/ /sdig sgrib sbyangs shing tshogs rdzogs te/ /tshe
dpag med ru gyur gzungs bzla/ /oM a mA ra Ni dza'i wa ntI ye swA
hA/ 'di ltar bgyis pa'i dge tshogs kyis/ /bdag dang mar gyur 'gro ba la/
/byang chub

@005a @#/ /sems mchog rin po che/ /ma skyes pa rnams skyes gyur cig
/skyes pa nyams pa med pa dang/ /gong nas gong du 'phel bar shog
/rang rgyud smin byed phyin drug dang/ /gzhan rgyud smin byed
bsdu bzhi sogs/

rlabs chen tshogs gnyis rab rdzogs te/ /kun mkhyen go 'phang myur
thob shog /sku la mtshan dpe'i dpal 'bar zhing/ /gsung dbyangs yan
lag drug cus brgyan/ /thugs ni zab yangs mkhyen brtse'i gter/ /dpal

ldan bla ma'i bkri shog /ces sems dpa' chen po glang ri thang pa'i blo
sbyong tshig brgyad ma'i 'khrid yig theg chen dga' ston snying po
zhes bya ba 'di ni/ ban rgan d+harma b+ha dras rang gi nyams len du
bong bu'i lo tha skar zla

ba'i tshes nyer gnyis la dngul rir sbyar ba'o/ /sarba dza ga taM// //