@#/ /A dyA ta dzny' na sya sU tra TI ka b+hI ta bi d+ha ma tya lya ti nA ma bi ha ra// @#/ /'phags pa 'da' ga ye shes kyi mdo 'grel 'jigs sel skyes ma zhes bya ba bzhugs/ / @001a @##/ /swa sti pra dzA b+hyaH mtshan dpe'i ri dwags mtshan mas mdzes/ /drug cu'i bsil zer phyogs bcur 'phro/ /mkhyen brtse'i cha shas rdzogs ldan pa/ /ston mchog shAkya seng ger 'dud/ /de yi zhal gyi sprin klong nas/ /bsgrags pa'i zab rgyas gdams pa'i rnga/ /thos pa'i ban rgan gtsug phud can/ /rnam bshad gar gyi rtsed 'jo bgyid/ /gzigs mor mdzod cig snying bral gyi/ /bya byed rin la ma zhen pa'i/ /phyogs lhung ling thog gis stongs shing/ /rnam dpyod 'dren byed gsal ldan dag /de yang 'dir 'phags pa 'da' ga ye shes kyi mdo don 'chad pa la bzhi/ mtshan gyi don/ 'gyur gyi phyag /gzhung gi don/ mjug gi don no/ /dang po mtshan gyi don ni/ rgya gar skad du/ Arya A ta dznyA na nA ma mhA ya na sU tra/ @002a @#/ /bod skad du/ 'phags pa 'da' ga ye shes zhes bya ba theg pa chen po'i mdo/ zhes pa ste/ rgya gar na skad rigs bzhi las legs sbyar gyi skad du yod pa/ bod skad du bsgyur na/ Arya ni 'phags pa/ A ta ni 'da' ga /dznya na ni ye shes/ nA ma ni zhes bya ba/ mhA ya na ni theg pa chen po/ sU tra ni mdo ste/ gtso bor 'phags pa'i gang zag gi nyams len yin pas 'phags pa/ gtso bor 'tshi gar dgos pas 'da' ga /de nyid rtogs pa'i ye shes brjod bya'i gtso bor ston pas ye shes zhes bya bar mtshan thogs shing/ snying rje sems bskyed sogs ston pas theg pa chen po/ don gyi gnad tshig nyung dus ston pas mdo'o/ /gnyis pa 'gyur gyi phyag ni/ sangs rgyas dang byang chub sems dpa' thams cad @002b la phyag 'tshal lo/ /zhes pa ste/ tshig don sla zhing/ 'di ting nge 'dzin gyi bslab pa ston pa'i mdo sde'i sde snod du gtogs pas sngon gyi bkas bcad dang mthun par lo tsA bas 'gyur phyag mdzad pa'o/ / gsum pa gzhung gi don la gnyis/ gleng gzhi'i don bshad pa dang/ mdo dngos kyi don bshad pa'o/ /dang po gleng gzhi'i don bshad pa ni/ 'di skad bdag gis thos pa dus gcig na/ bcom ldan 'das 'og min lha'i rgyal po'i khang bzang na bzhugs te/ 'khor thams cad la chos ston pa dang/ zhes pa ste/ 'og nas 'byung ba'i chos phun sum tshogs pa 'di skad ces sdud pa po phun sum tshogs pa kun dga' bo'am phyag na rdo rje bdag gis/ brgyud nas min par dngos su thos pa'i dus phun sum tshogs pa gcig gi tshen/ ston pa phun sum tshogs pa bdud bzhi bcom zhing skal ba drug dang ldan la srid zhi'i mtha' las 'das pa de nyid/ gnas phun sum tshogs pa gtsang ris kyi 'og min las grong las dgon pa'i tshul du 'phags pa stug pa bkod pa'i 'og min lha'i rgyal po dbang phyug chen po'i khang bzang na bzhugs te/ 'khor phun sum tshogs pa sa la gnas pa'i byang chub sems dpa' thams cad de 'ba' zhig la chos ston pa dang ste tshe na'o/ /gnyis pa @003a @#/ /mdo dngos kyi don la gsum/ nam mkha'i snying pos dri pa zhus pa/ bcom ldan 'das kyis lan gsungs pa/ 'khor rnams kyis 'dzin par dam bcas pa'o/ /dang po nam mkha'i snying pos dri ba zhus pa ni/ byang chub sems dpa' nam mkha'i snying pos bcom ldan 'das la phyag 'tshal nas 'di skad ces gsol to/ /bcom ldan 'das byang chub sems dpa' nam 'chi ga ma'i sems ji ltar blta bar bgyi zhes pa ste/ gzhan don du byang chub thob par sems shing rgyal sras kyi spyod pa la dpa' ba/ nam mkha' lta bu'i chos nyid rtogs pa'i ye shes dang ldan pa'i nam mkha'i snying pos bcom ldan 'das la sgo gsum gus pas phyag btsal nas tshig 'di skad ces snyan la gsol to/ /tshig ji ltar zhe na/ kye bcom ldan 'das zhes bos nas/ byang chub sems dpa' dus nam zhig 'chi ga ma'i tshe rang gi sems ji ltar blta bar bgyi/ /zhes spyir bsdus nas zhus pa'o/ /gnyis pa bcom ldan 'das kyis lan gsungs pa la gsum/ mdor bstan pa/ rgyas par bshad pa/ don bsdu ba'o/ /dang po mdor bstan pa ni/ de nas bcom ldan 'das kyis bka' bstsal pa/ nam mkha'i snying po/ byang chub sems dpa' nam 'chi ba'i tshe/ 'da' ga ye shes bsgom par bya'o/ /zhes pa ste/ de nas bcom ldan 'das kyis @003b lan du bka' bstsal pa ni/ nam mkha'i snying po zhes bos nas/ byang chub sems dpa' dus nam zhig 'chi ga ma'i dus la bab pa'i tshe/ 'da' ga ma'i ye shes bsgom par bya'o/ /zhes ming gi sgo nas bsdus te bstan to/ /de yang 'da' ga ye shes ni/ mya ngan las 'das pa la khad nye bar byed pa'i ye shes sam/ yang na 'chi ga la bsgom pa'i ye shes so/ /phyi ma la'ang/ klu sgrub kyis/ de bas skyes pa kho na nas/ / 'chi bdag kha na gnas pa yin/ /zhes gsungs pa ltar/ skyes tsam nas 'chi ga mar byas pa zhig dang/ yang mdzod 'grel du drangs pa las/ las kyis 'khor bar lci gang dang/ nye ba gang dang goms pa gang/ /zhes sogs gsungs pa ltar/ las lci ba dang/ 'chi gar nye ba dang/ goms pa che ba dang/ sngar byas pa rnams rim pas smin pas/ 'chi gar dge sems stobs ldan gal shin tu che ba'i gnad kyis yin par gsungs so/ /gnyis pa rgyas par bshad pa la bzhi/ dngos po med pa'i 'du shes bsgom pa/ snying rje chen po'i 'du shes bsgom pa/ ci la yang ma chags pa'i 'du shes bsgom pa/ sangs rgyas gzhan las mi 'tshol ba'i 'du shes bsgom pa'o/ /dang po dngos po med pa'i 'du shes bsgom pa ni/ de la 'da' ga ye shes ni/ chos thams cad rang bzhin gyis rnam par dag pas na/ dngos po @004a @#/ /med pa'i 'du shes rab tu bsgom par bya'o/ /zhes pa ste/ de la bsgom par bya ba'i 'da' ga ye shes ni/ 'dus byas dang 'dus ma byas kyi chos thams cad rang rang gi gdags gzhi la brten nas rtog pas btags pa tsam ma gtogs rang bzhin gyis grub pas rnam par dag pa ste rang bzhin gyis ma grub pas na/ don dam par bden par grub pa'i dngos po rdul tsam yang med pa'i 'du shes rab tu bsgom par bya'o/ /zhes so/ /gnyis pa snying rje chen po'i 'du shes bsgom pa ni/ chos thams cad byang chub kyi sems su 'dus pas na/ snying rje chen po'i 'du shes rab tu bsgoM par bya'o/ /zhes pa ste/ don dam du bden par grub pa med kyang/ ma brtags ma dpyad pa'i tha snyad tsam du bya byed kyi rnam gzhag thams cad 'thad pas na/ theg chen gyi chos thams cad kyi rtsa ba sems can gyi don du sangs rgyas thob par 'dod pa'i byang chub kyi sems su 'dus pa yin pa'i phyir na/ sems de 'bad pa chen pos bskyed dgos la/ de yang lhag bsam 'dren nus kyi snying rje chen po las 'byung bas/ mar shes drin dran drin gzo gsum sngon du btang nas/ sems can thams cad sdug bsngal rgyu bcas dang bral bar 'dod pa'i snying rje chen po'i 'du shes bsgom par @004b bya'o/ /zhes so/ /gsum pa ci la yang ma chags pa'i 'du shes bsgom pa ni/ chos thams cad rang bzhan gyis ma dmigs shing 'od gsal bas na/ dngos po ci la yang ma chags pa'i 'du shes rab tu bsgom par bya'o/ /zhes pa ste/ don dam par rang gi sems kyis mtshon pa'i chos thams cad rang bzhin gyis mi dmigs shing 'od gsal ba ste stong pa nyid yin pa dang/ kun rdzob tu 'dus byas thams cad skad cig gis 'jig pas mi rtag pa dang/ zag bcas thams cad sdug bsngal skyed ba'i rang bzhin can yin pas na/ gnas lus longs spyod sogs zag bcas kyi dngos po ci la yang ma chags pa'i nges 'byung skyo shas kyi 'du shes rab tu bsgom par bya'o/ /zhes so/ /'od gsal ba la sems gsal rig gi cha la 'od gsal du bzhag pa dang/ bden stong gi cha la 'od gsal du bzhag pa gnyis yod kyang 'dir phyi ma yin gsungs/ bzhi pa sangs rgyas gzhan las mi 'tshol ba'i 'du shes bsgom pa ni/ sems rtogs na sangs rgyas yin pas na/ sangs rgyas gzhan du ni btsal ba'i 'du shes rab tu bsgom par bya'o/ /zhes pa ste/ de ltar nges 'byung snying rje sems bskyed sogs thabs dang/ sems kyi rang bzhin bden stong mngon sum du rtogs @005a @#/ /pa'i shes rab zung 'brel du bsgoms pas sgrib gnyis las grol ba na sangs rgyas kyi ye shes chos sku 'thob pa yin pas na/ sangs rgyas rang las rgyud gzhan du mi btsal bar/ rang gi sems rgyud kyi dri ma sbyang ba'i phyir du thabs shes zung 'brel gyi lam la slob pa'i 'du shes rab tu spro bas bsgom par bya'o/ /zhes so/ /de yang sems can thams cad kyi rgyud la/ nges legs kyi 'phrin las 'jug rung gi cha dang/ sems kyi chos nyid kyi cha dang/ sku gsum gyi nyer len sa bon gyi cha ste gsum yod cing/ de gsum ga la bde gshegs snying po'i sgra 'jug par gsungs/ gsum pa don bsdu pa ni/ bcom ldan 'das kyis tshigs su bcad de bka' bstsal pa/ chos rnams rang bzhin rnam dag pas/ /dngos po med pa'i 'du shes bsgom/ /byang chub sems dang rab ldan pas/ /snying rje chen po'i 'du shes bsgom/ /rang bzhin mi dmigs 'od gsal bas/ /dngos po ci la'ang mi chags bsgom/ /sems ni sangs rgyas 'byung ba'i rgyu/ /sangs rgyas gzhan du ma 'tshol cig /ces pa ste/ de ltar bcom ldan 'das kyis 'da' ga ye shes tshig lhug tu rgyas par gsungs nas slar yang mdor bsdus @005b tshigs su bcad de bka' bstsal ba ni/ don dam par 'khor 'das kyi chos rnams rang bzhin gyis rnam par dag pa yin pas na/ bden grub kyi dngos po rdul tsam yang med pa'i 'du shes bsgo bar bya'o/ /sangs rgyas thob pa la byang chub kyi sems dang rab tu ldan dgos pas na/ de'i rtsa ba sems can thams cad sdug bsngal las sgrol 'dod kyi snying rje chen po'i 'du shes bsgom par bya'o/ /chos thams cad rigs pas dpyad na rang bzhin gyis grub pa cung zad kyang ma dmigs pa'i 'od gsal ba stong pa nyid yin pas na/ rmi lam gyi rta glang lta bu'i zag bcas kyi dngos po ci la'ang ma chags pa'i 'du shes bsgom par bya'o/ /rang gi sems ni 'bras bu sangs rgyas gang las 'byung ba'i rgyu yin pas na/ 'bras bu sangs rgyas 'byung ba'i rgyu rang gi sems las gzhan du ma 'tshol cig /ces so/ /gsum pa 'khor rnams kyis 'dzin par dam bcas pa ni/ bcom ldan 'das kyis de skad ces bka' bstsal ba dang/ byang chub sems dpa' nam mkha'i snying po la sogs pa'i 'khor thams cad rab tu dga' ste/ bcom ldan 'das kyis gsungs pa la mngon par bstod do/ /zhes pa ste/ bcom ldan 'das kyis sngar bshad pa de @006a @#/ /skad ces tshig lhug pa dang bcad pa'i sgo nas bka' bstsal pa dang/ byang chub sems dpa' nam mkha'i snying po la sogs pa'i 'khor phun sum tshogs pa thams cad dri ba zhus pa'i lan gsung rab kyi snying po bsdus nas bstan pas the tshom chod cing rab tu dga' ste/ bcom ldan 'das kyis ji ltar gsungs pa la mngon par bstod pa ste/ bshad sgrub kyi sgo nas 'dzin par dam 'cha'o/ /zhes pa'o/ /bzhi pa mjug gi don ni/ 'phags pa 'da' ga ye shes zhes bya ba theg pa chen po'i mdo rdzogs so/ /zhes pa ste/ don gong du bstan zin cing 'gyur byang gsal bar mi snang ngo/ /smras pa/ rgyal bas gsungs pa'i mdo yi don/ /'phags bod mkhas pas bkral ba bzhin/ /rgyas bsdus 'tsham zhing go sla bar/ /dge byed chu zla'i yar tshes la/ /dben gnas dngul chu'i ri phug tu/ /na tshod mtho yang blo dma' ba'i/ /dge slong d+harma'i ming can gyis/ /dkar 'jam shog bu'i ngos su bris/ /dge bas 'jig rten pha rol tu/ /skyes chen 'degs pa'i dus kyi tshe/ /thabs shes lam bzang mngon gyur te/ /mkha' spyod zhing du phyin gyur cig /mang ga laM// //