@#/ /sems dang sems byung gi ngos 'dzin mdor bsdus te brjod pa
chos mngon rgya mtsho'i yang snying zhes bya ba bzhugs// // 

@01a @##/ /na mo gu ru manydzu g+ho ShA ya/ lhag pa'i lha dang
dbyer med bla ma la/ /gus pas btud nas sems dang sems byung gi
/ngos 'dzin mdor

bsdus tshig gis rab brjod de/ /chos mngon rgya mtsho'i yang snying
bshad par bya/ /yul gyi ngo bo tsam zhig rig pa sems/ /yul de
nyid la dmigs pa gzhir

byas nas/ /byed las la sogs khyad chos gzhan gyi ni/ /ldog pas
yul la 'jug pa sems byung yin/ /sems la mig dang rna ba sna dang
lce/ /lus dang yid kyi

'jug shes rnam drug dang/ /sems byung kun 'gro yul des dge ba
dang/ /rtsa nyon nye nyon gzhan 'gyur drug tu yong/ /kun 'gror
tshor ba 'du shes sems pa dang/

@02a @#/ /reg pa yid la byed dang rnam lnga ste/ /tshor ba las kyi
rnam smin bde sdug dang/ /btang snyoms so sor myong bar byed
pa'o/ /'du shes yul dbang

rnam shes gsum 'dus nas/ /yul gyi spu ris so sor byed pa'o/
/sems pa rang dang mtshungs par ldan pa'i sems/ /yul la dbang med
'jug par byed pa'o/ /

reg pa yul dbang rnam shes gsum 'dus nas/ /yul gsum yongs su
gcod byed tshor ba'i rten/ /yid byed rang dang mtshungs par ldan
pa'i sems/ /dmigs

pa bye brag pa la 'dzin pa'o/ /sems rnams kun la rjes su 'gro
bas na/ /de dag rnams la kun 'gror brjod pa yin/ /yul des la
yang 'dun pa mos pa dang/ /

dran pa ting 'dzin shes rab rnam lnga ste/ /'dun pa bsam pa'i
dngos po la dmigs nas/ /don gnyer brtson 'grus rten du gyur
pa'o/ /mos pa tshad mas nges pa'i

@02b yul rnams la/ /de bzhin 'dzin cing gzhan du mi 'byung ba'o/
/dran pa 'dris pa'i dmigs yul ma brjed cing/ /rnam g.yeng med
par byed pa'i las can no/ /ting 'dzin

btags pa'i dngos por rgyun ldan du/ /'jog pa'i rtse gcig sems te
shes pa'i rten/ /shes rab brtag bya'i dngos po'i skyon yon
rnams/ /so sor 'byed pa som nyi bzlog

las can/ /de dag rnams kyis yul gyi khyad par de/ /bzung nas
'dzin par byed pas yul nges so/ /dge bar dad dang ngo tsha shes
pa dang/ /khrel yod ma chags mi sdang gti

mug med/ /brtson 'grus shin sbyangs bag yod btang snyoms dang/
/rnam par mi 'tsheb dang bcu gcig ste/ /dad pa yid ches dwang
dang 'dod pa gsum/ /gang rung ma dang gnyen

po 'dun pa'i rten/ /ngo tsha shes pa rang nyid rgyu mtshan du/
/byas nas kha na ma thob 'dzem pa'o/ /khrel yod gzhan rnams rgyu
mtshan du byas nas/ /nyes 'dzem gnyis ka nyes spyod sdom

pa'i rten/ /ma chags srid dang srid pa'i ya byad la/ /yid rab
'byung zhing chags pa med pa'o/ /mi sdang zhe sdang skye yul
rnam gsum la/ /gnod pa byed 'dod mnar sems

@03a @#/ /med pa'o/ /gti mug med pa skyes sbyangs las byung ba'i/
/gti mug gnyen po'i sor rtog shes rab bo/ /brtson 'grus dge bar
mngon par spro ba ste/ /de nyid

yongs su rdzogs pa'i las can no/ /shin sbyangs lus sems las su
rung ba ste/ /sgrib pa thams cad sol ba'i las can no/ /bag yod
dug gsum med par brtson 'grus kyis/ /dge

ba sgrub cing zag las srung pa'o/ /btang snyoms sems gnas dgu pa
thob pa'i tshe/ /bying rgod gnyen po'i 'du byed bslang pa'o/ /mi
'tshe zhe sdang med pa'i char gtogs pa/ /brtse sems

mtho mi 'tsham pa'i las can no/ /de rnams kun slong sogs la mi
ltos par/ /grub tsam nyid nas dge bas dge bar brjod/ /rtsa nyon
'dod chags khong khro nga rgyal dang/ /ma rig the tshom

'jig lta mthar lta dang/ /lta ba mchog 'dzin tshul khrims brtul
zhugs ni/ /mchog 'dzin log lta dang bcas rnam bcu ste/ /'dod
chags zag bcas dngos la yid 'ong du/ /

mthong nas don du gnyer bar byed pa'o/ /khong khro yul gsum la
dmigs mi bzod cing/ /gnod pa byed 'dod kun nas mnar sems so/
/nga rgyal phyi nang mtho dma' la dmigs

@03b nas/ /khengs shing mtho ba'i rnam pa can gyi sems/ /ma rig
chos kun gnas lugs la rmongs pa'i/ /mi shes blo ste nyes brgya
'byung ba'i rten/ /the tshom bden par yid gnyis za ba ste/ /dge
ba'i

bar du gcod pa'i las can no/ /'jig lta nyer len phung po la
dmigs nas/ /nga dang nga yir 'dzin blo nyon mongs can/ /mthar
lta bdag la dmigs nas rtag pa'am/ /chad par lta ba'i shes rab
nyon

mongs can/ /lta ba mchog 'dzin lta phung la dmigs nas/ /mchog tu
'dzin pa'i shes rab nyon mongs can/ /tshul brtul mchog 'dzin tshul
khrims brtul zhugs sogs/ /ngan pas grol

bar lta blo nyon mongs can/ /log lta rgyu 'bras skye ba snga
phyi sogs/ /med par lta ba'i shes rab nyon mongs can/ /de rnams
skyos tsam nyid nas sems kyi rgyud/ /rab tu ma zhir byed pas
nyon mongs

yin/ /nye nyon khro ba kho na 'dzin 'chab pa dang/ /'tshig dang
phrag dog ser sna sgyu dang g.yo/ /rgyags dang rnam 'tshe ngo
tsha khrel med dang/ /rmugs dang rgod pa ma rang le lo dang/ /bag
med brjed ngas

shes bzhin ma yin dang/ /rnam g.yeng dang bcas nyi shu tham pa
ste/ /khro ba gnod rgyu nye bar gnas pa na/ /brdeg sogs gnod pa
byed 'dod mnar sems so/ /kho na 'dzin khong khro'i rgyun nyid mi

@04a @#/ /gtong bar/ /gnod dang gnod lan bya bar 'dod pa'o/
/'chab pa gzhan gyis nyes pa glengs pa na/ /rmongs pas nyes pa
sba bar 'dod pa'o/ /'tshig pa gzhan gyis nyes

pa glengs pa na/ /zhe 'gras bsam pas tshig rtsab smra 'dod do/
/phrag dog gzhan gyi phun tshogs mi bzod par/ /rnyed bkur la zhen
sems rgyud 'khrug pa'o/ /ser sna rnyed bkur la zhen yo byad

rnams/ /gtong mi nus pa'i dam du 'dzin pa'o/ /sgyu ni rnyed bkur
la zhen rang nyid la/ /yon tan med kyang yod ltar ston pa'o/
/g.yo ni rnyed bkur la zhen rang nyid kyi/ /nyes pa gzhan la
sla bar 'dod

pa'o/ /rgyags pa zag bcas phun tshogs thob pa la/ /dga' zhing bde
bas sems rgyud khengs pa'o/ /rnam 'tshe 'gro la snying brtse'i
sems med par/ /mtho 'tsham 'dod pa khong khro'i char

gtogs so/ /ngo tsha med pa rang nyid rgyu mtshan du/ /byas nas
nyes par 'dzem pa med pa'o/ /khrel med gang zag gzhan rnams rgyu
mtshan du/ /byas nas nyes par 'dzem pa med pa'o/ /rmugs pa/ /

gti mug char gtogs lus dang sems/ /lci zhing las su rung ba med
pa'o/ /rgod pa sngar myangs 'dod yon la dmigs nas/ /sems phyir
'gro zhing sred pas 'jug pa'o/ /ma dad gti mug

@04b char gtogs le lo'i rten/ /dad pa'i mi mthun phyogs su gyur
pa'o/ /le lo nyal sogs bde la mngon zhen nas/ /dge ba'i phyogs
la spro ba med pa'o/ /bag med nyon mongs nyes tshogs mtha' dag

las/ /sems mi srung bar bag yangs byed pa'o/ /brjed ngas nyon
mongs dmigs pa'i dbang song nas/ /dge ba'i phyogs la sems mi
gsal ba'o/ /shes bzhin min pa sgo gsum spyod pa la/ /

mi shes bzhin du 'jug blo nyon mongs can/ /rnam g.yeng nyon
mongs dbang gis dmigs pa las/ /sems g.yeng 'dod chags 'bul ba'i
bar gcod can/ /de rnams rtsa nyon rnams dang nye ba'am/ /

de yi char gtogs yin pas nye nyon no/ /gzhan 'gyur gnyer dang
'gyod pa rtog pa dang/ /dpyod pa dang bcas rnam pa bzhi yod de/
/gnyid ni dbang shes yul la 'jug pa las/ /rang dbang med

par nang du sdud pa'o/ /'gyod pa sngar byas las la ma 'dod
bzhin/ /yid la bcags pa sems gnas par gcod can/ /rtog pa ming
don ngo bo rags rim tsam/ /kun tu 'tshol ba'i yid kyis

brjod pa'o/ /dpyod pa ming don ngo bo zhib phye nas/ /so sor
rtog pa'i yid kyis brjod pa'o/ /de rnams dge sdig bar ma ci rigs
su/ /'byung bas gzhan 'gyur zhes su brjod pa yin/ /'di

@005a @#/ /dag gzhan gyi thugs la mi 'bab kyang/ /rang gi yid la
goms phyir brtags te bris/ /dge bas mkha' mnyam 'gro la phan
pa'i phyir/ /rnam mkhyen rgyal ba'i go

'phang myur thob shog /ces sems dang sems byung gi ngos 'dzin
mdor bsdus te brjod pa chos mngon rgya mtsho'i yang snying zhes
bya ba 'di yang dge slong d+ha rma b+ha dras bris// //sde dge par
bstan pa dar rgyas kyis

lha bsam rnams dag bsgo nas par du sgrub pa dge 'o/ /srab
manggalaM// //