[@##the following text has incomplete sections/ which are on order]

@01a @#/ /oM swa sti/ lhag pa'i lha yi ngo bo mchog /dpal ldan
bla ma la btud nas/ /rang la nyams myong med kyang 'dir/ 
/phan pa'i gros 'debs

cung zad bya/ /ka ba lta bur rgyud bsrangs na/ /kun gyi tshad
mar 'dzin pas na/ /kha zhe mi mthun spyod pa rnams/ /spangs
nas dang po'i ngang tshul zungs/ /gdar

sems la bgyis na ni/ /'di phyi gtan du bde bas na/ /nga rgyal
phrag dog 'gran sems sogs/ /sems kyi dri ma 'bad pas sol/ /ca
co'i smra ba sgro skur can//

mi bzad ngan 'gro'i 'bab stegs yin/ /cha med longs gtam mang
pa la/ /dga' bar ma 'dzin gre bar bskyil/ /ja chang zas skom
longs spyod tsam/ /kla klo

@02a @#/ /blun po la yang yod/ /nya lto ba bzhin tshe 'di blos/
/btang nas dal 'byor don yod 'tshal/ /ta la'i shing sdong ltar
gyong pa'i/ /rang rgyud

nyon mongs dug gsum 'di/ /tha rgod zhing rengs rmon bas bzhin/
/'dul la kun tu brtson pa bsten/ /nga gdod bya zhes phyi gshol
gyi/ /le lo'i dbang du sod

gyur na/ /na rga 'chi ba'i pho nya des/ /glo bur khrid na ci
tsug byed/ /pa tra gzhan gyi lad mo dang/ /g.yam la rgyug pa
tsam min par/ /pha rol ngan 'gro'i

g.yang sa la/ /'jigs pas snying nas lha chos mdzod/ /ba mo
lta bur chos dkar ba'i/ /lhag bsam snying stobs chen po yis/
/ma lus 'gro 'di

@02b ngas sgrol zhes/ /dam bca'i khur chen phrag tu longs/
/tsa ra bda' ded ma byas na/ /gces 'dzin gcong nad mi thon
pas/ /tsha grang ngal dub khyad bsad nas/ /bdag

pas gzhan gces bsgom par bya/ /dza lang can gyi bdag 'dzin
'di/ /bdag med lta bas ma bcom na/ /wa kha'i chu bzhin ngan
song du/ /'bab pa nyid las 'os ci yod//

zha ltar bla ma gus bstan nas/ /bsag sbyang gsol shang bsag
pa'i mthar/ /za chad spu ltar rna ba'i blos/ bdag 'dzin zhan
yul grub min brtag /'a 'ur shab shob

tsam min par/ /gting nas bdag med rtogs na ni/ /ya ra ma ra
gzhan med par/ /rtse gcig mnyam par bzhag nas khongs/ /rwa can
zla ba'i dpe bzhin du/ /rjes thob 'khrul

snang ci shar yang/ /la 'ur gnyug ma'i don dran nas/ /sgyu
ma'i rnal 'byor bskyang bar bya/ /sha rus rdos bcas phung po
'di/ /bde stong chos kyi skur sbyangs nas/ /sa las

sha mo rdol ba ltar/ /lhag pa'i lha skur ldang bar bya/ /ha
cang bsgrims dang glong man par/ /dag pa'i snang zhen rgyun
bskyangs nas/ /a 'thas 'khrul pa'i snang zhen 'di/ /

@03a @#/ /mtha' dag drung nas dbyung bar mdzod/ /'di ni dge
slong b+hu su ku/ /dbang phyug chos bzang zhes bya des/ /dge
tshul ye shes chos grags kyi/

'dod pa ji bzhin bris pa yin/ /dge'o// ! (ngag gdams la tshen
bzhugs)/ ! na mo gu ru manydzu g+ho ShA ya/ gur kums 'dzin
dbang po/ /'od stong ze

gyis 'khyud 'dra'i/ /rgyal kun gsung gi mnga' bdag /'jam mgon
mgrin par bzhugs shig /'jig rten 'jig rten 'das pa'i/ /legs
tshogs kun gyi rtsa ba/ /lam ste

dge ba'i bshes gnyen/ /bsam sbyor gnyis kyis sten cig /dal
brgyad 'byor bcu'i lus rten/ /don che rnyed par dka' bas/ /da
lta rten 'brel 'dzom dus/ /nyin bzhin don

ldan mdzod cig /skyes mtha' 'chi bar ma zad/ /nam 'chi nges pa
med pas/ /gnyen lus longs spyod kun la/ /zhen chags 'khri ba
chod cig /'jigs rung ngan song gsum

gyi; ;bzod dka'i sdug bsngal soms la/ /mchog gsum skyabs su
bsten nas/ /las 'bras blang dor mdzod cig /'khor ba'i sdug
bsngal rtsa ba/ /bdag 'dzin lhan

@03b skyes gnyen por/ /bdag med rgyud la bskyed phyir/ /tshul
khrims 'gyod med srungs shig /nyam thag rigs drug 'gro rnams/
/drin can pha ma yin pas/ /byams dang snying rjes drangs pa'i/
/byang chub

sems mchog skyed cig /chos kun gdod nas stongs kyang/ /rten
'brel bslu ba med pas/ thabs shes zung du 'jug pa'i/ /rgyal
sras spyod la slobs shig /shugs drag snying rjes bskyod nas

gzhan don sgrub la rings na/ /dbang thob dam tshig ldan pas/
/bskyed rdzogs rim gnyis sgoms shig /bkor zan drang po bdag
la/ /'di 'dra'i cha rgyas med kyang/ /mtshan ldan bla ma mang
po'i//

zhal nas de skad gsung bar/ /khyed kyang 'thad par
gda' na/ /nyams su bzhes par zhu zhing/ /mi 'thad sngar khyud
da 'jags/ /chu ngan lam rgyug mdzod cig /'dir 'bad legs spyad
phung pos/

stobs bcu'i go 'phang thob nas/ /mkha' mnyam sems can kun la/
/phan bde sgrub par gyur cig /tshul 'di d+harma b+ha drar/ /bla
chung 'phrin gyis bskul nas/ /shing phag rgyal zla'i tshes la/
/dngul

chu'i ri bor bris so/ /sarba mangga laM// ! na mo gu ra we/
gnas byang stong yang mdzod dmar po na/ /snying 'dab brgyad
padma nyi zli'i khar/ /rje dus gsum sangs rgyas mi gzugs

@04a @#/ /can; ;drin 'khor med ngag dbang rdo rjer 'dud/ /bdag
rang rgyud dug lnga gra rgyas shing/ /las ngan pa dgu 'dzoms
sbyong bzhin du/ /mi gzhan la chos bshad gros 'debs

'di; ;mgon khyod thugs khrel ba'i rgyur gda' yang/ /bu dang
ldan blo bzang rdo rje yis/ /'phrin yi ge'i lam nas bskul ba'i
lan/ /tshig sdeb sbyor legs po mi shes kyang/ /don rgyal

ba'i dgongs pa bzhin du brjod/ /chung a ma'i mngal du chags
pa nas/ /dus skad cig ngal bso mi byed par/ /dgra 'chi bdag
drung du snyeg lugs 'di/ /bu sems shig yod na yang yang

sogs/ /tshe 'di snang bde sdug sna tshogs 'di/ /rgyu sngar song
'bras bu yin tshod 'dug /bu bde 'dod sdug bsngal mi 'dod na/
/las dkar nag gnyis la blang dor 'tshal/ /sems

mi rtag dran pa'i kun slong gis/ /khas blangs pa'i dam sdom
gtsang mar srungs/ /tshig kha bshad skal po rna ba tshe/ /don
nyams su len na snod ldan yin/ /gtam 'di bsnyad rnam dkar

dge ba'i mthus/ /ma 'brel thogs kyis mtshon khams gsum 'gro/
/skyabs mtshan ldan bla mas rjes bzung ste/ /chos theg chen sa
lam mthar son shog (/ces pa 'di yang rang gi slob bu

@04b dge slong su d+hI badzras mi rtag pa dang las 'bras las
brtsams pa'i ngag gdams dgos tshul ltar d+harma b+ha dras bris
pas phan thogs par gyur cig /) ! na mo gu ru manydzu g+ho ShA
ya/ blo bzang thub dbang rdo

rje 'chang/ /tsitta'i ze'u 'bru la bkod nus/ /zla ltar dkar
ba'i lhag bsam gyis/ /phul ba'i gdams ngag 'di gsan 'tshal/
/mtshan nyid kun tshang dge ba'i bshes/ /dad cing gus pas

mnyes par mdzod/ /don che rnyed dka'i dal 'byor rten/ /sgrub
la 'bad pas don ldan mdzod/ /nges med glo bur 'chi tshul la/
/yang yang bsam nas 'chi chos mdzod/ /dkar nag las 'bras bde

sdug la/ /dran shes bag yong blang dor mdzod/ /'khor ba'i gnas
lus longs spyod la/ /yid brtan med pas skyo shas mdzod/ /thad
pa'i lam mchog bslab gsum la/ /thos bsam sgom pas 'bad

par mdzod/ /mkha' mnyam 'gro ba'i don gyi phyir/ /byang chub
sems mchog bskyed par mdzod/ /rdzogs byang sgrub byed cha
tshang lam/ /phar phyin drug ldan nyams bzhes mdzod/ /khyad par
gsang

sngags sgor zhugs nas/ /zab lam rim gnyis sgoms par mdzod/
/mdor na 'dul ba'i kun spyod pa/ /gnas nas zab rgyas lam bzang
sgoms/ /nyin bzhin tshogs gsag sgrib sbyong dang/ /

@05a @#/ /rnam dag smon lam gang rgyas thob/ /zas gos gnas mal
gnyen grogs la/ /'dod chung chog shes zhen log skyed/ /rtsa
gzhi chang dang phyi dro'i zas/ /skyid sdug

dal brel kun tu spongs/ /tshong zhing phyugs kyi 'tsho sbyong
sogs/ /khyim pa'i bya ba la ma 'jug /dgra gnyen bar ma'i 'gro
ba kun/ /mdza' min 'khon min tsam du gzhog /bslu med bla ma

dkon mchog la/ /snying gi khongs nas re ltos zhus/ /gong ma'i
mdzad pa rnam thar la/ /yang yang bltas nas yar bskyed thon/
/'chi tshe ji tsam brtags na yang/ /'gyod pa skye dgos med

par mdzod/ /ma Ni bro ba'i sngon pa ltar/ /rang gis mi bsgrub
'doms pa 'di/ /g.yar tsha'i rgyu las ma 'das kyang/ /phan
phyir yin pas dgongs gcags mdzod/ /tshul 'di pir thogs

b+hik+Sha ka /dznyA na shI las bskul ba'i ngor/ /dge slong
d+harma b+ha dra yis/ /sman sdings ri ba'i mgul du bris// ! na
mo gu ru lo ke shA rA ya/ skyabs bslu med bla ma

mchog gsum la/ /blo gdung shugs drag pos gus btud nas/ /sems
mya ngan gyis non a shes la/ /gtam tshig gsum gros 'debs 'di
skad smra/ /mi skyes pa'i tha ma 'chi

@05b ba dang/ /gnyen 'dus pa'i tha ma 'bral ba 'di/ /khyod
gcig pu'i thog tu byung ba min/ /gnas 'khor ba 'di yig shis
lug yin/ /gnyen nye 'brel rnams dang lo brgya'i bar/ /ngas
skad cig mi

'brel 'grogs gyur kyang/ /sems brtse gdung sred zhen je 'phel
las/ /slar tshim rgyu 'dug gam mi 'dug soms/ /sngar skyes pa
nas bzung da lta'i bar/ /gnyen nye 'brel rnams dang 'grogs

pa la; ;dus gtan du phan nges snying po'i mchog /'dug mi 'dug
lta rtog yang dag mdzod/ /rgyu de phyir thabs med bya ba la/
/sems mya ngan byas pas phan pa med/ /phan nges pa'i sdig
spang dge

sgrub pa/ /dus rtag tu 'bad na pho rgod yin/ /'di dge slong
d+harma b+ha dra la/ /'phrin yi ge'i lam nas bskul ba'i ngor/
/yid gsos byed ljon 'dab brang bur bcas/ /gnas dngul chu'i ri
nas phul

ba dge/ ! na mo gu ru manydzu g+hoShA ya/ zla med drin can
rtsa ba'i bla ma dang/ /mnyam med 'dren mchog thub dbang nyi
ma'i gnyen/ /mtshungs med lam ston 'jam mgon blo bzang grags/ /

dbyer med zhabs zung spyi bor gus mchod nas/ /rang nyid phan
pa'i spyod pas dus 'da' bzhin/ /gzhan la 'doms pa g.yar tsha'i
rgyu yin kyang/ /don gnyer chen pos yang yang bskul ba'i tshe/

@06a @#/ /bsam tshod yi ger 'god la sgra 'dzin gtod/ /mun nag
sprin gyi rum du glog 'khyug bzhin/ /dal 'byor rten bzang thob
pa 'di dga' bas/ /na rga 'chi ba'i pho nya ma sgug par/ lus
sems bde dus nyin bzhin snying

po longs/ /mu med zhing khams gzhan du rnyed dka' ba'i/ /'jam
mgon rgyal ba gnyis pa'i thugs kyi bcud/ /tshang la ma nor mdo
dang sngags kyi lam/ /thos bsam sgom pa'i nyams len gnad du
bsnun/ /khyad par dal 'byor

rnyed dka' 'jig sla'i tshul/ /bsam nas tshe 'di'i snang shes zil
mnan te/ /khas blangs dam sdom spyi dang khyad par du/ /so
thar sdom pa'i bcas mtshams 'gyod med spungs/ /a ho srid las
nges par 'byung 'dod blo/ /gzhan

don byang chub thob par 'dod pa'i sems/ /bden gnyis gnas tshul
yang dag lta bu ste/ /'di la lam gyi gtso bo rnam gsum zer/
/'di 'dra rgyud la skye ba lta zhog gi/ /go yul rnam dag rnyed
ba'ang srid mthar snang/ /gcan mdun rtsa ba 'dzugs

par bzhed na ko/ /snying la rus pa bcug nas 'bod cig kye/ /de
yi 'gal rkyen sdig pa'i grogs po ni/ /sbal pa rma can 'dra ba
thabs kyis spongs/ /mthun rkyen dge bar sbyor ba'i bshes dang
gnyen/ /gang yin bsam sbyor gnyis kyis spyi bor mchod

nyi ma re bzhin yang dus drug tu/ /slu med tshogs kyi zhing
rnams gsal btabs nas/ /yan lag bdun pa maNDal bcas phul te/
/cha tshang lam la bag chags gdab par gsung/ /mdor na bde sdug
mtho ngam gang tshe yang/ /rang gi sems la yang dang yang
brtags te/ /nyon mongs 

@06b gnyen po'i stobs kyis spong ba dang/ /dag sems dran pa gso
ba gnad du che/ /tshul 'dir 'bad pa'i rnam dkar dge ba'i mthus/
/mtshan nyid kun tshang dam pas skad cig kyang/ /'bral med thugs
bcud gdams

pas rjes bzung ste/ /ma rnams don du rdzogs byang myur thob shog
/ces shel dkar dga' ldan legs bshad gling pa mkhas mchog blo
bzang rgyal mtshan dang/ lung rigs smra ba sangs rgyas mgon po
zung

nas bslab bya rjes 'dzin gyi smon tshig dang 'brel ba dgos tshul
nan chen gsung pa ltar ban gzugs snyom las pa d+harma b+ha dras
g.yar khul du sbyar ba'o/ ! (/lugs zung gi blang dor 'dzol

med du 'doms pa'i bslab bya rin po che'i do shal zhes bya ba
bzhugs so//) ! oM bde legs su gyur cig /smra ba zla med 'dren
mchog shAkya'i rgyal/ /rgyal sras 'jam pa'i dbyangs dang mi
pham

mgon/ /mgon po klu sgrub thogs med jo 'brom zung/ /zung 'jug
mngon gyur 'jam mgon bla mar 'dud/ /lugs gnyis shes bya'i khyon
dang mnyam song ba'i/ /grangs med rgyal kun mkhyen pa'i chu
klung 'bum

yid 'phrog mtshan dpe'i rgya mtshor legs 'khyil ba/ /ngag dbang
dbyangs can lha mos dge legs stsol/ tshe 'di'i bde sgrub 'jig
rten mi chos dang/ /gtan gyi bde sgrub dam pa'i lha chos gnyis/
/'gal

@07a @#/ /med gcig grogs gcig tu 'char ba'i gtam/ /sgrog la sgra
'dzin gtod dang shes ldan dag /'jig rten mi chos gtsang ma bcu
drug dang/ /dam pa'i lha chos dge ba bcu yi

khrims/ /chos ldan sa spyod mes dbon rnam gsum gyis/ byang
phyogs 'gro la bcas 'di nges par mdzod/ /'di nang dag pa'i 'jigs
'phrog dpon po la'ang/ /gus pas bsnyen bkur rim gro bya dgos

na; ;srid zhi'i 'jigs pa kun sel mchog gsum la/ /phyag mchod
skyabs 'gror dus kun brtson par mdzod/ /dang por las 'bras spang
blang shes pa dang/ /bar du nan tan nyams su len pa dang/ /tha

mar sdig sgrib stobs bzhis sbyong ba ni/ /dam chos bsgrub tshul
lags pas 'bad par mdzod/ /khams gsum 'gro kun gnyen du mtshungs
mod kyang/ /tshe 'di'i sgyu lus ster ba'i pha dang ma/ /phan
'dogs

zhing du rgyal bas bsngags pa la/ /yid ches gus pas bkur sti
bsgrub par mdzod/ /stobs 'byor kha drag ldan pa'i skye bo ni/
/mang yang bstan 'gror phan thogs cang ma mchis/ /de phyir lung
rtogs yon

tan mdzod 'dzin pa'i/ /dam pa spyi gtsug rgyan du bstan par
mdzod/ /rigs rus cho 'brang btsun pa'i ya rabs dang/ /na tshod
thos dang bslab pas rgan pa la/ /phu dung bsgrub na bde skyid
'phel 'gyur

@07b zhes; ;mkhas mchog dpa' pos gsungs la yid ches mdzod/ /khyi
dang glo ba phrad pa ji bzhin du/ /rgyus med mi la gsar 'grogs
ma snga bar/ /dbyar dgun 'gyur med lta shing shug pa ltar/
/sngar 'dris

mdza' bshes kun la gzhung ring mdzod/ /thag ring gnyen las khyim
mtshes dgra bo yang/ /dga' zhes gna' bo'i dag las 'byung ba
bzhin/ /yul mi khyim mtshes rang ltos 'khor 'bangs dpe/ /snyoms

chung kun la phan pa gang thogs mdzod/ /mchog gsum dkar phyogs
lha dang rang sems gsum/ /dbang btsugs drang po'i ngang tshul
'dzin pa la/ /sngon byung khyim bdag tshul khrims tshong dpon
gyi//

'gran zlar 'os pa'i yi dam brtan po mdzod/ /dmyal ba'i bud shing
lta bu'i sdig can 'ga'/ /'phral snang zas gos stobs 'byor kha
drag la/ /'gram chu ldang nas de rjes ma 'brang bar/ /ya rabs
dam pa'i

tshogs la mig ltos mdzod/ /zas nor sngon gyi sbyin shugs la rag
pas/ /gsog srung dam yang 'phel ba'i nges pa med/ /de bas 'di
phyi'i bde legs spel bzhed na/ /mchod sbyin gnyis kyi phyogs su

longs spyod mdzod/ /rang la che phra'i phan 'dogs skye bo la/
/lhag dang mnyam sogs rang nus dang bstun pa'i/ /phan lan bgyid
pa'i bsam sbyor ma bsten na/ /khrel med grangs su brtsi bas dogs

@08a @#/ /zon mdzod/ gnas tsal tso la ra ma lug smra dang/ /bre
dang srang la g.yo sgyu byed pa sogs/ /kha zhe ngo lkog bsam
sbyar 'gal ba'i las/ /mtha' dag srog 'phrog dug

bzhin spong bar mdzod/ /'gro kun bde 'dod sdug bsngal ma 'dod
phyir/ /chags sdang bral ba'i btang snyoms chen po'i dang/ /dge
dang bde bar spyod pa 'ga' mthong tshe/ /phrag dog med pa'i

dga' ba bsgom par mdzod/ /g.yo sgyu'i zhags snes chags ldan dam
bcings nas/ /ngan spyod g.yang du skyur bar byed pa yi/ /dug
'dres kham zas lta bu'i bud med kyi/ /spos dbang ma gtod rang

thag gcod par mdzod/ /dman 'bring chen po su la sna yang rung/
/rang gzhan 'phral phugs don la legs gzhigs nas/ /ha cang pher
dang zhum min bden gtam gyis/ /'jam zhing don phigs smra

tshul mkhas par mdzod/ /gting ring 'khor ba'i gcong rong zab mo'i
nang/ /snyigs ma'i tsher rnon skyes pa'i klong tshud phyir/ /phyi
nang gang nas gnod 'tshe ci byung yang/ /theg pa che zhing blo
khog yangs par

mdzod/ /grog sbur nas bzung bsam shes mi yi bar/ /kun gyi gces
pa so so'i srog yin zhing/ /rang la tsher ma zug pa'ang mi bzod
pa'i/ /ngang tshul bsams nas srog gcod sdong bar mdzod//

@08b gzhan gyis yongs su bzung pa'i dngos po dag /mthu dang 'jab
bu'i sgo nas blangs gyur na/ /'phral du gtam ngan rgyal khrims
chad pa phog /phyi ma dbul por 'gyur bas bag zon mdzod/ /'khor

ba'i btson rar 'ching byed lcags sgrog de/ /'dod chags sred pa
yin par shes pas nas/ /bgrod pa yan lag gnas dang dus min du/
/log par g.yem pa 'bad pas spong bar mdzod/ /phyi

mar ro 'dzin thong gshol gyis rmo zhing/ /tshe 'dir dman pa'i
gral du tshud pa dang/ /gzhan gyi 'dod don sgrub la gegs byed
pa'i/ /'du shes bsgyur ba'i brdzun tshig spong bar mdzod/ /sems
can

mthun pa rnams la dbye 'dod dang/ /mi mthun pa la mi 'dum par
'dod nas/ /'byed tshig bden brdzun snyan min gang rung gis/ /smra
ba phra ma lags pas spong bar mdzod/ /rigs lus tshul khrims

kun spyod skyon sgrog sogs/ /pha rol snying la bsnun pa'i tshig
rtsub mes/ /rang gzhan dge rtsa'i ljon shing sreg 'gyur pas/
/rtsub mo'i tshig de gre bar bskyel bar mdzod/ /rgyal blon chom

rkun 'dod pa bud med kyi/ /gtam ? sogs don med cal col sna tshogs
kyis/ /rang gzhan dge sems rtsad nas 'byin byed pa/ /ngag bkyal
lags pas 'di yang spong bar mdzod/ /chags

@09a @#/ /brkam 'chums 'khu zil non sems dang lngas/ /gzhan gyi
nor dang yo byad la sogs pa/ /bdag gir gyur cig snyam du smon pa
ni/ /brnab sems lags pas yang dag spong bar

mdzod/ /zhe sdang mi bzong 'khon 'dzin 'khu ba dang/ /zil non
sems lngas sems can gzhan ngag la/ /gnod cing 'tshe ba'i bsam
ngan 'chad pa ni/ /nyes dmigs lhag par che bas spong bar mdzod/
/rmongs

dang drag shul log par rgyun du zhugs/ /rab tu nyams dang zil
non sems lnga yis/ /las 'bras bden bzhi dkon mchog gsum la sogs/
/med par lta ba'i log lta spong bar mdzod/ /de ltar ji skad
gdams

pa bzhin bsgrubs na/ /tshe 'dir ya rabs mkhas pa'i grwar tshud
cing/ /phyi mar mngon mtho'i rten bzang rim brgyud nas/ /nges
legs grong khyer bgrod par gdon mi za/ /'on te rang nyid sdom
gsum yongs nos

kyang/ /bag med spyod pas nyin mtshan 'da' bzhin du/ /gzhan la
'doms 'di mdze can 'ga' zhig gis/ /mkha' lding dbang po'i sgrub
thabs bsngags dang mtshungs/ /de lta na yang dpyod ldan grogs po
yis

nan tan chen pos yang yang bskul pa'i ngor/ /'khos bral dge
sbyong d+harma b+ha dra yis/ /bzhad ljongs sa 'dzin phug yangs
ngos su sbyar/ /de las 'ongs pa'i rab dkar dge ba'i mthus/ /drin
can mkha' mnyam

@09b 'gro ba mtha' dag la/ /lugs zung blang dor 'dzol med 'doms
pa la/ /rnam mkhyen rgyal ba kun dang mtshungs par shog /(ces
lugs zung gi blang dor 'dzol med du 'doms pa'i bslab bya rin po
che'i do shal zhes bya ba 'di ni/ dpyod ldan

bkra shis chos 'phel lags nas nan chen pos bskul ngor/ dge slong
dbang phyug chos bzang gis sbyar bya'o// ! zhal gdam skor bzhugs
so/) ! na mo gu ra we/ drin can bla ma rnams dang/ /yi dam lha

la btud nas/ /mdo sngags lam gyi nying khu'i/ /kha byang tsam
zhig 'dri'o/ /yon tan bcu ldan bshes gnyen/ /bsam sbyor gnyis
kyis bsten nas/ /'di phyi'i legs tshogs rtsa ba/ /brtan por
'dzugs la 'bad

'tshal/ /ngal brgyad 'byor bcu'i rten 'di/ /don che rnyed par
dka' bas/ /mdo sngags zung du 'brel ba'i/ /nyams len snying po
blang 'tshal/ /nam 'chi nges pa med cing/ /ngan song sdug bsngal
che bas/ /mchog gsum

skyabs su bsten nas/ /sdig spong dag la 'bad 'tshal/ /'khor ba'i
sdug bsngal rtsa ba/ /kun 'byung las nyon gnyen por/ /bslab gsum
rgyud la bskyed nas/ /thar pa'i gnas su bsnyeg 'tshal/ /ma rgan
'gro kun don du/ /

byang chub sems mchog bskyed nas/ /phyin drug bsdu bzhis brgyan
pa'i/ /rgyal sras spyod pa skyed 'tshal/ /rnam ngag dbang bzhi
zhus nas/ /khas blangs che phra kun la/ /'phral phugs khe nyen
brtsis nas/ /blang dor 'dzol

@10a @#/ /med gnang 'tshal/ /rang la lag len med par/ /gzhan la
slob khul byed 'di/ /ban rgan d+harma b+ha dra/ /lag pa dal nas
bris so/ /shu b+haM/ ! na mo gu ra we/ pha khyim dang

longs spyod kun bor nas/ /dben gnas su rdzogs byang sgrub de la/
/ser gzugs kyi dad pa chos rgyus mkhan/ /bdag 'dra yis bslab bya
mi rigs kyang/ /rab dkar gyi shog deb bcu phrag bzhi/ /gsar
phyed brtsi bcud 'phrin

rten bcas/ /gegs sel gyi bslab bya dgos tshul bzhin/ /mdor bsdus
'di thugs su bcang bar 'tshal/ /dal 'byor gyi mi lus thob dus
'dir/ /sdug rus kyis snying po ma blangs na/ /tshig re la ngal re
bso dus der//

'bad 'bad cig byas kyang 'phyis skyon yod/ /dben gnas su sos
ngal bag yangs dang/ /lto 'grangs dang rgyab dros nyams dga'
yang/ /rgyus med kyi bar do'i 'phrang ring der/ /gcig pu ru 'gro
tshe mchi ma bro/ /snang tshul

'di yang yang bsam shes na/ /sgrub pa la nang nas lcag 'debs
'byung/ /tshig gsum gyi gdams pa'i nying khu 'di/ /d+harma yi b+ha
dras phan phyir phul/ (zhes pa 'di mkhas khang dbon tshang la
gdams pa'o/ /shu b+haM/) ! oM swa sti/

mchog gsum spyi bo'i rgyan du mchod/ /gyos sgyug bza' zla lha
bzhin bkur/ /ngan slong byams dang snying rjes skyongs/ /'di
gsum phan pa'i bslab bya yin/ /(zhes pa 'di yang lcam tshe ring
bu khrid lags kyi thugs bzhed ltar d+harma

@10b b+ha dras gdams pa'o// //mangga laM)// ! na mo gu ra we/
chos thob bla ma gus pas bsten/ /sdom gsum bslab bya mig bzhin
bsrung/ /byang chub sems gnyis nan tan bsgom/ /rnam dag smon lam
rgya chen thob//

(ces pa 'di lung rtogs chos kyi bang mdzod/ tho yon ye shes don
grub bstan pa'i rgyal mtshan gyi gsung gis bskul ngor/ d+harma b+ha
dras bris/) ! bla ma yi dam mchog gsum srung ma la/ /snying nas
gdung shugs drag pos gsol

ba 'debs/ /dmigs yul tshe 'das 'jigs pa kun las skyobs/ /gtan gyi
btsan sa zin par byin gyis rlobs/ /(zhes pa 'di yang dge sdings
dar rgyas lags pa'i dbon sa'i drung gi zhal 'don du d+harma b+ha
dras bris//) ! oM swa sti/

drang srong sman gyi bla ma'i rgyud don bzhin/ /nang ngos 'phyug
med zin la gnyen po'i sman/ /sla bcos ser sna rnyed bskur grags
'dod tsam/ /ma yin nyam thag nang par snying rje'i blos/ /byin
mthus gang yin nad las

myur grol te/ /rang don chos sku'i go 'phang mngon gyur te/
/gang 'dul mos blor 'tshams pa'i gzugs kyi skus/ /grangs med mar
gyur 'gro ba'i sgo gsum gyi/ /brnag dka'i zug rdu rlung nas
'byin pa la/ /sman pa'i

rgyal po nyid dang mtshungs par shog / ('di bla ma sku skye lags
nas dgos tshul ltar d+harma b+ha dras sbyar ba'o//) ! /na mo
manydzu shri ye/ rab 'byams rgyal ba'i mkhyen brtse nus pa'i
mdzod/ /rigs gsum ngo bo gcig

@11a @#/ /tu bsdus pa'i sku/ /'jam mgon rgyal ba gnyis pa tsong
kha pa'i/ /dmigs med thugs rjes rnam kun khyod la srungs/ /lugs
gnyis lta ba'i 'dren byed mi gsal zhing/ /cung zad shes/

pa'ang lag tu mi len pa/ /bdag 'dra'i bslab byas khyed la phan
dka' yang/ /yang yang bskul phyir gang shes mngor bsdus bshad/
/dgra gnyen bar ma su dang 'grogs kyang rung/ /rang gi sems
rgyud drang po'i lam zhugs

nas/ /lugs gnyis blang dor 'dzol bar ma gyur na/ /gnas skabs
mthar thug 'dod don ngang gis 'grub/ /dkon mchog gsum la dad pas
bsnyen bkur bya/ /ngan slong rnams la snying rjes sbyin pa
gtong/ /rang ltos

'khor dang yul mi khyim mtshes la/ /spyi snyoms phan 'dogs byed
pa gnad du che/ /mtho la phrag dog mi bya gus pas 'dud/ /dma' la
brnyas bcos mi bya byams brtses skyongs/ /mnyam la 'gran sems mi
bya

'grogs bde byed/ /kun dang bstun na rang nyid mtho sar sleb/
/lus kyi srog gcod rku ba log g.yem gsum/ /ngag gi rdzun phra
tshig rtsub ngag bkyal bzhi/ /yid kyi brnab sems gnod sems log
lta gsum//

spangs nas dge bcu sgrub la brtson byas na/ /tshe 'dir nyes med
bde dang ldan 'gyur zhing/ /phyi ma lha dang mi yi rten brgyud
nas/ /thar pa dam pa'i gnas su skyel lo zhes/ /slu med rgyal
ba'i dka' las gsal

[@##data incomplete here]