@#/ /dge tshul gyi bslab bya'i sdom tshig bzhugs so//

@01a @##/ /na mo mu ni indra ya/ /gang gi bka' bzhin bsgrubs byas
na/ /'di phyi'i don rnams ma lus pa/ /bde blag nyid du stsol
mdzad pa'i/ /thub pa'i dbang po la phyag 'tshal/ /rnyed

dka' dal ba'i rten thob cing/ /rgyal ba'i bstan pa la zhugs nas/
/dge tshul sdom pa thab rnams kyis/ /bsrung ba bsrung ba'i thabs
'ga' zhig /lung las gsungs pa bzhin du bri/ /legs

tshogs rtsa ba zla med pa/ /bla ma mchog la brten byas nas/ /bya
ba thams cad zhu khyed cing/ chos mthun bka' las 'da' mi bya/
/dran dang shes bzhin bag yod dang/ /ngo tsha khrel yod ldan pa

yis/ /bslab la yid ches dad gus bya/ /so thar bcas mtshams ston
pa yi/ /'dul ba'i gzhung la tshul bzhin spyad/ /tshul khrims rnam
par dag pa la/ /phan yon bsam las 'das pa

dang/ /tshul khrims nyams par gyur na ni/ /mnar med 'gro zhing
kun nas phung/ /de phyir phan yon nyes dmigs la/ /nges pa drangs
te yang yang bsam/ /mi mthun phyogs rnams ma shes na/ /bslab

@02a @#/ /pa bsrung tshul mi shes pas/ /rang gis ji ltar khas
blangs las/ /'das pa'i ltung ba 'di lta ste/ /dge slong ltung ba
sde lnga po/ /dge tshul rnams la blangs 'das dang/ /lhung med

phyogs mthun gsum 'gyur te/ /rtsa ba bzhi dang yan lag drug
/nyams pa rnams gsum dang bcas rnams/ /blangs 'das ltung ba bcu
gsum yin/ /'chang gnyis 'bral ba zla 'jog dang/ /dgon pa'i

'bral ba gsog 'jog byed/ /rin chen rag dang me la reg /spangs
zas rko byin len med/ /gsog 'jog za ba nub lhag nyal/ /sa bon
'joms dang 'dun pa bsgyur/ /mi smras 'gro dang ljon shing

'dzeg /rtswa sngon mi gtsang 'dor ba rnams/ /ltung med phyed
dang bco brgyad yin/ /mthun pa kha cig ma gtogs pa/ /rab byung
gso sbyong gzhi dang ni/ /dgag dbye dbyar dang ko lpags dang/
/sman

dang gos dang sras brkyang dang/ /kau shAmb+ha dang las kyi
gzhi/ /dmar ser can dang gang zag dang/ /spo dang gso sbyong
bzhag pa dang/ /gnas mal dang ni rtsad pa dang/ /dge 'dun dbyen
te gzhi bcu

? (de ltar blangs 'das ltung med dang//)

@02b bdun/ /rnam 'byed las gsungs ltung ba rnams/ /phyogs mthun
bsdam bya'i nyes pa ste/ /rtags dang slong dang snod dang ni/
/longs spyod phyar g.yer 'dod pa dang/ /gnod pa dang ni gnas pa
dang/ /ma gus

mi sbyong gzhi bcur 'du/ /slangs 'das ltung ba bcu gsum po/
/dbye na blangs 'das so drug ste/ /mi'am mir chags gsod pa dang/
/srog chags dang bcam chus 'debs dang/ /srog chags dang bcas

chur spyod dang/ /bsam bzhin dud 'gro gsong pa dang/ /rin thang
tshang ba'i nor rku dang/ /mi tshangs par ni spyod pa dang/ /mi
chos bla ma'i rdzun smra dang/ /pham pas skur 'debs gzhi med
dang/ /pham pas bag

tsam skur 'debs dang/ /dge 'dun dbyen ni byed pa dang/ /de
'dra'i rjes su phyogs pa dang/ /bag med spyod pas khyim sun
dang/ /shes bzhin rdzun tshig smra ba dang/ /bshes ngor byas zhes
skur 'debs dang/ /zhal

ta ba la 'phya ba dang/ /zas phyir chos ston zhes smra dang/
/lhag mas dge slong skur 'debs dang/ /khyad gsod tshig gis bslab
spong dang/ /tshod mas 'bras chen 'gebs pa dang/ /myos 'gyur khu
ba chad

'thung dang/ /dag nas glu dbyangs lan pa dang/ /rkang pas bro
gar byed pa dang/ /sna chags rol mo byed pa dang/ /mgul rna sogs
la rgyan 'dogs dang/ /bzhin gyi kha dog tshon sgyur dang/ /spos
dris lus la

@03a @#/ /byug pa dang/ /phreng ba mgo la 'ching ba dang/ /rin
chen khri la 'dug pa dang/ /rin chen stan la 'dug pa dang/
/mthon po'i khri la 'dug pa dang/ /mthon po'i stan la 'dug pa
dang/ /phyi dro kha

zas za ba dang/ /gser dngul bdag gir len pa dang/ /khyim pa'i
rtags spong las nyams dang/ /rab byung rtags blangs las nyams
dang/ /mkhan por gsol btab las nyams so/ /de ltar blangs 'das

so drug gi /nyes pa rnams ni shes byas nas/ /srog gi phyir yang
spang bar bya/ /de las rtsa pa'i ltung ba bzhi/ /gsor mi zung ba
byung na ni/ /ta la'i rtse mo bcad pa ltar/ /sdom pa gtan nas
gtong bar 'gyur

phyi dro'i kha zas la sogs pa'i/ /nyes pa byung ba rnams la ni/
/sngar byas las la 'gyod sems dang/ /phyin chad mi byed sdoms
sems kyis/ /dge slong rnam dag drung 'dug te/ /ltung ba'i ming
rigs brjod nas

ni/ /bshags pa lan gsum snying nas bya/ /blangs 'das so drug gis
bsdus pa'i/ /ltung ba dngos gzhi ma yin pa'i/ /phyogs mthun nyes
pa rnams la ni/ /'gyod dang sdoms sems yang yang bya/ /bslab pa
yongs

su spyod pa ni/ /gso sbyong dbyar gnas dgag dbye ste/ /gzhi gsum
sgo nas rang rgyud sbyong/ /bde bar gnas pa'i rkyen bsten pa/
/zas gos gnas mal sman rnams la/ /'dod zhen chen pos 'tshol ba
dang/

@03b ha cang chog mi shes pa spang/ /dge ba'i sbyor ba lhur len
tshe/ /ser snas longs spyod mi nus pa/ /ngal zhing dub pa'i mtha'
yang spang/ /mdor na mgon po klu sgrub kyis/ /mngon mtho nges
legs ma lus pa'i/ /rtsa ba tshul khrims

yin par gsungs/ /snying nas chos bzhin byed 'dod pa'i/ dge tshul
rnams kyi bslab pa'i gnas/ /ston pa'i 'dul ba'i gzhung lugs
mchog /sum brgya pa dang kA ri ka/ /'jam mgon bla ma yab sras
kyi/ /legs bshad

man ngag tshogs rnams la/ /mkhas pa bsten nas tshul bzhin sbyang/
/thub pa'i bstan la zhugs rnams kyis/ /rang gi nor bu yongs dor
nas/ /mched bu'i gor ma gzugs legs dag /len pa'i ngal ba dor
byos la/ /tshul khrims

nor bu rin chen la/ /gces spras byi dor gyis shig ces/ /kun la
bdag gis phan par sbyang/ /'dir 'bad dge ba'i mthu stobs kyis/
/bdag dang 'gro ba ma lus pa/ /tshul khrims gru chen la brten
nas/ /rnam grol

gling du phyin gyur cig /(ces dge tshul gyi bslab bya'i sdom tshig
'di yang yongs 'dzin paNTi ta chen po'i gsung la gzhi byas/
spyan snga blo gros rgyal mtshan sogs kyi legs bshad kyis kha
bskang te/ rang gi nu bo dge tshul ye shes chos rgyal sogs nas
bskul

dor shAkya'i dge slong d+harma b+ha dras su bris su bgyis pa'o/
/mangga laM)/ / //