! rje bu ston gyi bla ma'i rnal 'byor bzhugs/ @#/ /na mo gu ru ratna
sidd+ha ye/ 'dir rang gi rtsa ba'i bla ma dang bu ston thams cad
mkhyen pa dbyer med kyi bla ma'i rnal 'byor nyams su len

tshul ni/ skyabs yul dang rgyu gsal brtab ste/ bla ma sangs rgyas
chos dang dge 'dun la/ /byang chub bar du snying nas skyabs su
mchi/ /mar gyur 'gro kun sgrib gnyis 'ching ba las/ /bsgral
phyir smon 'jug sems

mchog bskyed par bgyi/ /lan gsum/ mdun gyi nam mkhar mchod sprin
rgya mtsho'i dbus/ /rin chen seng khri sna tshogs pad zla'i steng/
/bka' drin gsum ldan rtsa ba'i bla ma dang/ /dbyer med kun
mkhyen bu ston rin

chen grub/ /sku mdog dkar dmar dgyes pa'i 'dzum zhal can/ /phyag
gnyis chos ston phyag rgya'i mtheb mdzub kyis/ /utpal yu ba
bzung ba'i ze'u 'bru'i rtser/ /thabs mchog rdo rje shes rab dril
bus mtshan//

mtshams sprin mdangs ldan rnam gsum chos gos dang/ /gser mdog paN
zhwas mdzes shing 'ja' gur dbus/ /zhabs gnyis mi phyed rdo rje'i
skyil krung gis/ /bzhugs pa'i spyi mgrin thugs kar oM AH

@15a @#/ /hUM; ;dkar dmar mthing gas mtshan pa'i 'od zer gyis/
/rang bzhin gnas nas bla ma yi dam dang/ /mchog gsum srung mar
bcas pa spyan drangs thim/ /dbyer med skyabs

gnas kun 'dus ngo bor gyur/ /ces tshogs zhing gsal btab la/ rin
chen mchos gsum 'dus pa'i ngo bo nyid/ /mchog mthun dngos grub
'byung ba'i sgo gcig pu/ /rtsa ba'i bla ma bu ston chos kyi
rjer/ /

lus ngag yid gsum gus pas phyag 'tshal lo/ /chu gnyis nyer spyod
rol mo 'dod yon sogs/ /phyi nang gsang ba de nyid mchod tshogs
'bul/ /sdom gsum bcas pa'i mtshams las 'das pa

sogs/ /sngon bsags sdig ltung 'gyod sdom sems kyis bshags/ /rang
gzhan rnam dkar 'bras bur bcas pa la/ /'gyod dang phrag dog
spangs te yi rangs shing/ /nyid thugs mkhyen dang brtse

ba'i sprin klong nas/ /'gro la zab rgyas chos kyi char chen
phobs/ /yid can stobs bcu'i dpal la ma bkod par/ /gzugs sku
'gyur med rdo rje ltar brtan gsol/ /gzhi gsum dge tshogs mkha'

mnyam ma rgan ched/ /zung 'jug rdo rje 'chang dbang thob phyir
bsngo/ /zhes yan lag bdun pa dang/ de nas maNDal phul la/ mdo
rgyud tshig don mtha' dag thugs su chud/ /bde gshegs bstan pa

@15b mi nub rgyal mtshan 'dzin/ /snyigs dus rgyal ba gnyis pa rin
chen grub/ /bu ston chos rje'i zhabs la gsol ba 'debs/ /rang
gzhan smin cing grol bar byin gyis rlobs/ /mchog dang mthun mong
dngos grub stsal du

gsol/ /zhes pas mtshon bstod tshogs gsol 'debs kyi rim pa ji ltar
rigs pas gsol ba btab rjes/ bla ma'i spyi mgrin thugs ka'i 'bru
gsum nas/ /bdud rtsi 'od zer dkar dmar mthing gsum byung

rang gi spyi mgrin snying gar thim pa yis/ /smin byed dbang bzhi
byin rlabs tshul du thob/ /sgo gsum sdig sgrib bag chags ma lus
sbyangs/ /gsang gsum rdo rje 'grub ba'i nus pa rnyed/ /bskyed
rdzogs lam

bzang bsgom la dbang bar byas/ /'bras bu sku bzhi 'grub pa'i sa
bon bzhag /ces dbang bzhi blang/ de nas/ bla ma yi dam mchog
gsum kun 'dus sku/ /kun mkhyen bu ston rin chen grub pa yi/
/zhabs

sen zla tshes bdag snying ku mu da'i/ /ze'u 'brur nam yang 'gyur
med gnas gyur cig /dge 'dis srid la nges 'byung skyo shas dang/
/'gro la byams dang snying rje byang chub sems/ /chos kun snang
stong zung

'brel yang dag lta/ /rim gnyis lam gyi bgrod pa mthar phyin shog
/byin rlabs bdud rtsi'i char 'bebs bla ma dang/ /mchog mthun
dngos grub stsol ba'i yi dam lha/ /'phrin las kun sgrub mkha'
'gro

@16a @#/ /chos skyong gi /bkra shis dge mtshan rgya mtshos skyong
gyur cig /ces rang gi rtsa ba'i bla ma dang bu ston thams cad
mkhyen pa dbyer med kyi bla ma'i rnal 'byor mdor bsdus 'di lta
bu zhig

dgos zhes/ lung rtogs bstan pa'i gsal byed dam pa zha lu sprul
pa'i sku blo gsal bstan skyong gi gsung gis bskul ma mdzad dor
chos rje thams cad mkhyen pa la snying nas dad pa'i ban gzugs

d+harma b+ha dras sbyar ba sarba dza ga taM//