! drung ram pa dge legs rgyal mtshan gyi dri lan skor/ ! rnam kun
mkhyen brtses 'dor med drung dge legs rgyal mtshan lags su/ stabs
bder 'bul 'bras/ deng sku 'tsho ba zang thang

nas gang ci'i gnas tshul skyabs rten bcas dang/ der gsal gung thang
rin po che'i gsung le tshan gsum bcas gnang 'byor bka' drin mchog tu
che/ 'dir yang gsar 'tshe med par bde bar gnas lags de kha

dri ba rnams kyi lan rim par 'bul ba la// ! dri ba dang por/ lam rim
chen mor tsha grang gi dmyal ba'i gnas tshad sa'i dngos gzhi nas
bshad pa ltar 'di nas dpag tshad sum khri nyis stong gi 'og na

@128b yang sos yod la/ de nas dpag tshad bzhi stong bzhi stong gis
chod pa na gzhan bdun yod do/ /zhes pa la de'i mtshan bur/ skabs 'dir
'di ltar gsungs shing 'og tu 'di nas dpag tshad sum khri nyis stong gi
'og

na chu bur can yod la/ de nas dpag tshad nyis stong nyis stong gis
chod pa na zhes pa nas 'di gnyis thad sor mi 'ong bas gang rung
zhig ma dag gam gsung ba 'dir tsha grang gi gnas dang po gnyis thad
mnyam la gnas

gnyis kyi 'og ma'i mthil mi mnyam pa sogs ji ltar lags/ zhes pa'i lan ni/
gnas tshad de ltar gsungs pa gnyis la ma dag pa'i skyon gang yang
med de grang dmyal ba'i gnas brgyad ni tsha dmyal rnams kyi

thad so byang phyogs dpag tshad khri khrag re'i pha rol na yod par
gsungs shing/ 'di nas dpag tshad sum khri nyis stong gi 'og na tsha
grang gnyis ka'i gnas yang sos dang chu bur can yod pa mtshungs
shing/ de nas

dpag tshad bzhi stong bzhi stong gis chod pa na gnyis ka'i 'og ma'i
gnas kyi mthil rab tsha dang/ padma ltar gas pa chen po'i bar yod pa
mtshungs kyang/ grangs dmyal 'og ma bdun dpag tshad nyis stong nyis

stong gis chod pa na yod par gsungs pa tsha dmyal las srag chung
ba ni/ grang dmyal ba rnams kyi gnas kyi dbyibs ri rtse shin tu mtho
ba/ kha ba bu yug 'tshub cing/ gcod rong zab pa 'khyag pa'i sbubs

@129a @#/ /mun nag gis khebs pa phyogs thams cad nas bu yug dang
bcas pa'i rlung drag po ldang ba sogs grang dmyal ba rnams dpag
tshad nyis stong tsam re yod pa'i ri rtse mthon po'i rtse la

yod pa la dgongs par gsungs so/ /yang sa'i dngos gzhi las gsungs pa
'di dang/ mdzod las/ 'di 'og stong phrag nyi shu na/ nas; de yi steng
na dmyal ba bdun/ zhes gsungs pa gnyis tshad 'jog tshul gyi rnam

gzhag mi mthun pa yin tshul dang/ bshad mdo'i bshad khungs mi 'dra
ba yin 'gro gsung ba sogs las mi 'dra ba'i rgyu mtshan gsal ba gzhan
ma mjal lags na de gnyis bshad khungs mi mthun pa gang

lags zhes pa la/ bdag ni mdo'i bshad khungs ji ltar yod kyang/ de
ltar gcen thogs med kyis sa sder gsungs pa dang/ gcung dbyig
gnyen gyis mdzod du gsungs pa gnyis don dgongs pa gcig yin

te; dbang chen gser gyi sa gzhi'i steng nas ri'i rgyal po ri rab
dpangs su rgya mtsho'i chu mtshams man la dpag tshad brgyad khri yod
cing/ de mtshungs gling bzhi gling phran dang bcas par yang dbang
chen gyi steng ji

ltar nas phung bzhag pa ltar gnas pa'i dpangs tshad ri rab kyi chu
mtshams man dang mtshungs la/ des na gcen gyis 'di nas dpag tshad sum
khri nyis stong gi 'og na yang sos dang/ de nas dpag tshad

@129b bzhi stong bzhi stong gis chod pa na gzhan bdun yod par
gsungs pa'i sa tshad bsdoms mnar med par la dpag tshad drug khri yod
cing/ gcung gis 'di 'og stong phrag nyi shu na/ zhes pa dbang chen
nas yar la dpag

tshad stong phrag nyi shu ste nyi khri na mnar med gnas shing/ de'i
steng lhag ma rab tshal sogs pa bdun yang rim pa bzhin du gnas par
gsungs pas/ dbang chen nas mnar med bar la dpag tshad nyi khri
dang/ de

yan la drug khri yod pa don gyis grub pas de gnyis khul dpag tshad
brgyad khri yod pa dang/ gcen gyis 'di nas mar la dpag tshad drug
khri na mnar med yod par gsungs pa dang/ de nas dbang chen bar
la dpag tshad

nyi khri yod pa don gyis grub pas de gnyis khul dpag tshad brgyad
khri yod pa bcas sku mched gnyis gsung lugs mi 'dra ba tsam ma
gtogs don dgongs pa mthun pa gong bzhin brtsis pas 'grig pa lags/