[@##the following text has incomplete sections/ which are on order] @001a @#/ /grangs kyi mngon brjod kyi rnam bshad bzhugs/ / @001b /na mo gu ru manydzu g+ho ShA ya/ bla ma yi dam mchog gsum kun 'dus sku/ /'jam pa'i dbyagns dang dbyangs can lha mo la/ /sgo gsum gus pas phyag 'tshal skyabs su mchi/ /'chad rtsod rtsom pa'i dngos grub stsal tu gso/ /mang nyung dngos po rtsi byed grangs kyi gnas/ /gzhan grags ming gi zol gyis yongs gab pa /gsal byed grangs kyi mngon brjod rgya mtshan bcas/ /mdor bsdus chig gis 'chad la rna ba blogs/ /de yang baiDU rya dkar po las; gcig gi ming gi mngon brjod la/ grangs kyi mngon brjod mtha' klas kyang/ /rtsis la nye mkho bi bong dang/ /zla ba gzugs dang 'od dkar can/ / @002a @#/ /bse ru rnams ni gcig gi ming/ zhes pa ste/ rim pa ltar zla ba'i khang bzang la ri bong gi gzugs brnyan gcig yod pa dang/ gzugs kyi phung po gcig tu nges pa dang/ 'od dkar can te zla ba gcig las med pa dang/ ri dwags bse ru la rwa gcig las mi skye ba'i rgyu mtshan gyis yin no// ! yang gnyis kyi ming la/ 'khrig bgrod mtshe ma thabs shes dang/ /lag mig zung rnams gnyis kyi ming/ zhes pa ste/ 'khrig pa spyod pa la pho mo gnyis dgos pa dang; lo gcig la nyi ma lho bgrod dang byang bgrod gnyis yod pa dang/ dus gcig tu phru gu gnyis mnyam du skyes pa la mtshe mar grags pa dang/ thabs dang shes rab gnyis su ngas pa dang /lag pa dang/ mig la g.yas g.yon gnyis re yod pa dang/ zung du 'brel ba la ya gyal gnyis dgos pa'i rgyu mtshan gyis @002b yin no/ ! yang gsum gyi ming la/ 'jig rten tsha ba rtse mo me/ /yon tan srid pa gsum gyi ming/ zhes pa ste/ sa 'og/ sa steng/ sa bla gsum la 'jig rten gsum zer ba dang/ lag skya; pi pi ling/ pho ba ri lu gsum la tsha ba gsum zer ba dang/ tri shu la la rtse mo gsum yod pa dang/ lho phyogs rta gdong gi me dang/ khyim gyi nyi ma dang/ bsreg bya za ba'i me ste me gsum yod pa dang/ rngu dang/ mun pa dang/ snying stobs kyi yon tan gsum yod pa dang/ sa gsum la ming gzhan srid pa gsum yang zer ba'i rgyu mtshan gyis yin no// ( yang bzhi'i ming la/ rgya mtsho chu bo rig byed dang/ /bdud dang sde pa chu gter bzhi/ zhes pa ste/ ri rab kyi mdangs 'phog lug dang; das brjod dang/ srid pa srung dang/ snyan dang gas te rig byed bzhi yod pa dang/ lha'i bu dang/ nyon mongs pa dang/ 'chi bdag dang/ phung po ste bdud bzhi @003a @#/ /yod pa dang/ gnas brtan pa dang/ thams cad yod smra ba dang/ mang pos bkur ba dang/ phal chen pa ste rtsa ba'i sde pa bzhi yod pa dang/ rgya mtsho la ming gzhan chu gter yang zer ba'i rgyu mtshan gyis yin no// ' yang lnga'i ming la/ 'dod yon nyer spyod dbang po dang/ /mnga' dang 'byung ba lnga yi ming/ zhes pa ste/ gzugs dang/ sgra dang/ dri dang/ ro dang/ reg bya ste 'dod yon lnga yod pa dang/ me tog dang/ bdug spos dang/ mar me dang/ dri chab dang/ zhal zas te nyer spyod lnga yod pa dang/ mig dang rna ba dang/ sna dang/ lce dang/ lus te dbang po lnga yod pa dang/ bdud dga' rab dbang phyug la myos byed dang/ sred byed dang/ rmongs byed dag sken byed dang/ 'ching byed de mnga' lnga yod pa dang/ sa dang/ chu dang/ me dang/ rlung dang/ nam mkha' ste 'byung ba lnga yod pa'i rgyu mtshan gyis yin no ' yang drug gi ming la/ ro dus mtshams dang bro ba dang/ rgyan dang bzang po drug tu grags/ zhes pa ste/ mngar ba dang/ skyur ba dang/ kha ba dang/ bska ba dang/ tsha ba dang/ lan tshwa ba ste rtsa ba'i ro drug yong pa dang/ dpyid dang/ so ga dang @003b dbyar dang/ ston dang/ dgun stod dang/ dgun smad de dus dang/ dus mtshams drug re yod pa dang/ /ro la ming gzhan bro ba lang zer ba dang/ /klu sgrub dang/ Arya de ba dang/ thogs med dang/ dbyig gnyen dang; phyogs glang dang/ chos grags te 'dzam gling mdzas pa'i rgyan drug yod pa dang/ rdza' ti dang/ sug smel dang/ ka ko la dang/ cu gang dang/ li shi dang/ gur kum ste bzang po drug yod pa'i rgyu mtshan gyis yin no// ' yang bdun gyi ming la/ rin chen sa 'dzin thub pa dang/ /ri bo drang srong gza' rta bdun/ zhes pa ste/ 'khor lo dang/ nor bu dang/ btsun mo dang/ /blon po dang/ glang po dang/ lta mchog dang/ /dmag dpon te rgyal srid rin po che sna bdun yod pa dang/ gnya' shin 'dzin dang/ gshol mnga' 'dzin dang/ seng ldeng can dang/ rta rna dang/ lha na sdug ra dang/ rnam 'dud dang/ mu khyud can te gser gyi sa 'dzin bdun yod pa dang/ rnam gzigs dang/ gtsug tor can dang/ thams cad skyob dang/ 'khor ba 'jig dang/ gsor thub dang/ 'od srungs dang/ shAkya thub pa ste thub pa bdun yod pa dang/ sa 'dzin dang ri don gcig ming gi rnam grangs yin pa dang/ 'od zer can dang/ nyi ma dang/ rgyun shes dang/ 'od yangs dang/ lha min 'joms dang/ mchod sbyin can dang/ @004a @#/ /gnas 'jog ste skar ma rme bdun la gnas pa'i drang srong bdun yod pa dang/ nyi ma dang/ zla ba dang/ mig dmar dang/ lhag pa dang/ phur bu dang/ pa sangs dang/ spen pa/ ste res gza' bdun yod pa dang/ rlung dang yid mgyogs mdog lnga pa/ /de bzhin thig le can dang ni/ /nges brjod shin tu rgyal mtshan dang/ /ri 'joms rnams ni nyi ma'i rta/ zhes pa ltar/ nyi ma 'dren byed kyi rlung gi rta bdun yod pa'i rgyu mtshan gyis yin no// ' yang brgyad kyi ming la/ bkra shis lha klu nor gdengs can/ /nye sras lto 'gro brgyad kyi ming/ zhes pa ste/ gdug dang; gser nya dang/ bum pa dang/ padma dang/ dung dang/ dpal be'u dang/ rgyal mtshan dang/ 'khor lo ste bkra shis pa'i rtags brgyad yod pa dang/ tshangs pa dang/ b+hr-i ng+gi ri ti dang/ drag po dang/ dbang phyug dang/ smin drug dang/ tshogs bdag dang/ legs ldan nag po dang/ bi tri sa tra ste lha chen brgyad yod pa dang/ mtha' yas dang/ 'jog po dang/ stobs rgyu dang/ rigs ldan dang/ nor rgyas bu dang/ dung skyong dang/ padma dang/ chu lha ste klu chen brgyad yod pa dang/ chu dang/ brtan pa dang/ zla ba 'dzin byed dang/ rlung dang/ me dang/ nam langs dang/ @005a @#/ /las; mi nyid dbus skyes dbang po tshang/ /las mtha' ma log gnas la dang/ /sangs rgyas byon dang dam chos ston/ /bstan pa gnas dang de rjes 'jug /gzhan phyir snying ni brtse ba'o/ /zhes gsungs pa ltar/ 'byor pa bcu yod pa dang/ phyogs bzhi dang/ mtshams bzhi/ steng 'og gnyis te phyogs bcu yong pa dang/ nya dang/ rus sbal dang/ phag rgod dang/ mi yi seng ge dang/ mi'u thung dang/ mi sdug pa dang/ nag po dang/ dga' byed rA ma Na dang/ rgyas pa rA ma Na dang/ sangs rgyas ki trI tsi ste khyab 'jug la 'jug pa bcu yod pa dang/ gnas dang gnas min las kyi rnam smin dang/ /mos pa 'jig rten khams dang dbang po'i rim/ /kun 'gro'i lam dang kun byang sngon gyi gnas/ /'chi 'pho skye dang/ zag zang mkhyen stobs bcu/ zhes smras pa ltar sangs rgyas la stobs bcu yod pa dang/ rkang pa la sor mo bcu dang lag pa la sor mo bcu yod pa'i rgyu mtshan gyis yin no// ' yang bcu gcig gi ming la/ bde byed bde 'byung dbang phyug drag /byed pa bcu gcig ming yin la/ zhes pa ste/ bde byed dang/ bde 'byung dang/ drag po rnams ni lha dbang phyug chen po'i ming yin la @005b de la grangs bcu gcig yod pa ni/ 'dod 'jo las/ ma skyes rkang gcig 'phol dang bstod/ /drag po dang ni brtson 'grus ldan/ /'phrog byed da nas bde 'byung dang/ /spyan gsum gzhan las rgyal bdag/ dbang ldan dang ni sa gsum pa/ /drag po bcu gcig shes par bya/ zhes gsungs pa ltar dang/ bai dkar nyid las/ gdab pa byis pa rig pa can/ /ti la brdung khyim skyes tshong piShTi// shangku ni dang rkang bzhi klu/ /mi sdug /ces gsungs pa ltar byed pa bcu gcig yod pa'i rgyu mtshan gyis yin no// ' yang bcu gnyis kyi ming la/ nyi ma rten 'brel khyim bcu gnyis/ zhes pa ste 'dod 'jo las/ dbang po byed po lam pa dang/ /char 'bab bstong byed sngon min dang/ /mig gzugs khyab 'jug 'od can dang/ /chu bdag bshes gnyen nyid kyang ngo/ /zhes gsungs pa ltar nyi ma la khyim gyi bdag po bcu gnyis yod pa dang/ bai dkar las/ ma rig 'du byed rnam par shes/ /ming gzugs skye mched reg pa dang/ /tshor ba sred pa len pa dang/ /srid pa skye ba rga shi'o/ zhes gsungs pa ltar rten 'brel bcu gnyis yod pa dang/ yang; lug glang 'khrig pa karka Ta// seng+ge bu mo srad sdig gzhu/ /chu srin bum pa nya rnams so/ /zhes gsungs pa ltar/ nyi khyim bcu gnyis yod pa'i @006a @#/ /rgyu mtshan gyis yin no// ' yang bcu gsum gyi ming la/ 'dod pa lus med myos byed dang/ /gdugs rim sna tshogs bcu gsum grangs/ zhes pa ste; glog gi 'od can ma dang/ thig le mchag ma dang/ pad dkar ma dang/ lag bzang ma dang/ dga' ba'i shing rta ma dang/ rab tu myos byed ma dang/ me nA ka dang/ skra 'dres ma dang/ legs rgyan ma dang/ munya skyes ma dang/ a la bu ShA dang/ chu shing bral can ma dang/ sked legs ma ste lha'i smad 'tshong ma bcu gsum yod la/ de dag 'dod pa'i rgyu yin pa dang/ lus med bdag po ste bdud kyi cho 'phrul yin pa dang/ 'dod pas myos par byed pa'i rgyu mtshan gyis de dag bcu gsum kyi brdar bzhag pa dang/ mchod rten la gdugs rim pa bcu gsum yod pa dang/ 'dod pa dang/ dus dang/ gang ba la sogs pa sna tshogs kyi lha la bcu gsum yod pa'i rgyu mtshan kyis yin no// ' yang bcu bzhi'i ming la/ srid yid ma nu shed bu rnams/ /bcu bzhi'i ming du mkhas rnams smra/ zhes pa ste/ 'dod gzugs kyis phye bas lha la brgyad dang/ skye gnas kyis phye bas dud 'gro la bzhi dang/ mi dang/ dmyal ba ste srid pa bcu bzhi yod pa dus @006b 'khor las bshad pa dang/ de 'dra'i sems can nam yid can ris bcu bzhi yod pa dang/ ma nu dang shed bu ni mi la 'jug pas/ rgyal rigs la rkang thang dang/ rta pa dang/ glang chen dang/ shing rta pa bzhi dang/ bram ze'i rigs la/ nags gnas dang/ khyim gnas dang/ dka' thub pa gsum dang/ rje rigs la yig mkhan dang/ tshod pa dang/ sman pa gsum dang/ dmangs rigs la/ sa gzhi rmo ba dang/ ba lang skyong ba dang/ 'jim las pa dang/ khyim gnas pa bzhi ste mi rigs bcu bzhi yod pa'i dbang gis yin no// ' yang bco lnga'i ming la; tshes dang nyin zhag bco ldar grags/ zhes pa ste/ rags par zla ba'i phyogs rer tshes zhag dang nyin zhag gnyis ka bco lda re yod pa'i rgyu mtshan gyis yon no// ' yang bcu drug gi ming la/ mi bdag rgyal po bcu drug la/ zhes pa ste/ ang+ga dang/ ma ga d+ha dang/ ko sa la dang/ kA shi ka dang/ br-i dzi dang/ ma la dang/ punta dang/ sreg pa dang/ kA ma dang/ a banti dang/ ku ru dang/ lnga len dang/ pat dang/ dpal sde dang/ ya ba na dang/ ka mpo ste yul chen bcu drug po de'i mi bdag gam/ rgyal po bcu drug yong pa'i rgyu mtshan gyis yin no// ' yang bco brgyad kyi @007a @#/ /ming la/ nyes skyon khams rnams bco brgyad ming/ zhes pa ste/ gzugs mi sdug pa dang/ skra byi ba dang/ dpral ba chung ba dang/ mdog ser skya dang/ mig ser ba dang smin mtshams ma 'byar ba dang/ sna leb pa dang/ so sto ba dang/ dig pa dang/ mig zlum pa dang/ mig chung ba dang/ phyi nang du sgur ba dang/ lto ba che ba dang/ dpung pa dang rje dar thung ba dang/ spu can dang/ lag pa dang rkang pa mi mnyam pa dang/ tshigs sbom pa dang/ kha dang lus las dri ngan pa 'byung ba ste lus la mi sdug pa'i nyes pa'am skyon bco brgyad can yod pa dang/ mig rna sna lce lus yid kyi rnam par shes pa'i khams sogs brten pa rnam shes kyi khams drug/ rten dbang po'i khams drug/ dmigs pa yul gyi khams drug ste/ khams bco brgyad yod pa'i rgyu mtshan gyis yin no// ' yang nyer bzhi'i ming la/ rgyal ba yul ni nyer bzhir brjod/ ces pa ste/ mdo langkar gshegs pa las gsungs pa'i rgyal ba ste sangs rgyas nyer bzhi yod pa dang; bde mchog sogs nas bshad pa'i phyi nang gi yul nyer bzhi re yod pa'i rgyu mtshan gyis yin no// ' yang nyer lnga'i ming la/ de nyid nyi shu rtsa lnga ste/ zhes pa ste/ rna ba dang/ pags @007b pa dang/ mig dang/ kha dang/ sna dang/ lag pa dang/ rkang pa dang/ 'phongs dang/ 'doms dang/ ngag dang/ yid dang/ sgra dang/ reg dang/ gzugs dang/ ro dang/ dri dang/ nam mkha' dang/ sa dang/ chu dang/ me dang/ rlung dang/ gtso bo dang/ chen po dang/ nga rgyal dang/ skyes bu ste de rnams la mu stigs grangs can pa rnams de nyid nyer lnga zhes zer ba'i rgyu mtshan gyis yin no/ / ' yang; 'khor lo skar ma nyer bdun ming/ zhes pa ste/ rgyu skar gyi longs spyod mtshungs pa'i 'khor lo nyer bdun yod pa dang/ longs spyod kyi dbang gis gro bzhin dang gyi bzhin gnyis gcig tu byas na rgyu skar yang nyer bdun yod pa'i rgyu mtshan gyis yin no// ' yang sum cu so gnyis kyi ming la/ so dang gnyis skyes sum cu gnyis/ zhes pa ste/ mi phal pa la mtha' 'gram rdzogs na so so gnyis 'byung ba dang/ gnyis skyes kyang de'i ming gi rnam grangs yin pa'i rgyu mtshan gyis yin no/ /stong pa nam mkha' rnams ni thig/ ces pa ni/ gnas 'dzin thig le'i gzugs kyi ming brda yin no/ /grangs kyi ming gi mdon brjod 'di/ /rdo rje'i tshig don sbas tshul du/ /brjod par rjes grub btags pa'i phyir/ /tshad du bzung bar mi nus kyang/ /grags che nyer @008a @#/ /mkho de tsam mo/ /zhes pa ni/ grangs kyi ming mngon par brjod pa 'di nyid kyang/ dpal dang po'i sangs rgyas kyi rgyud du rdo rje'i tshig gis don spas pa'i tshul du brjod par rjes grub bi btags ming yin pa'i phyir mtha' 'di tsam du zad ces tshad du bzung bar mi nus kyang thams cad la spyi khyab tu grags che zhing rgyud don 'chad pa la nye bar mkho ba de tsam yin no zhes pa'o// zhes grangs kyi mngon brjod kyi don rnam par bshad pa 'di yang blo gsal gzhon nu cho brtan bkra shis lags nas bskul dor dge slong dbang phyug chos bzang gis bris pa'o/