@#/ /snyan ngag me long gi nang nas gab tshig gi snyan ngag legs su bkol te bshad ba bzhugs// @001 @##/ /na mo gu ru manydzu g+ho ShrA ya/ 'dir snyan ngag me long gi nang nas gab tshig gi snyan ngag logs su bkol te bshad pa la bzhi/ bshad par dam bca' ba/ dgos pa bshad pa/ dngos bshad pa/ mjug don bsdu ba'o/ /dang po ni/ gab tshig dag gi rnam pa yi/ /lugs kyang rab tu bstan par bya/ /gab tshig gi rgyan dag gi rnam pa ste mtshan nyid dang mtshon byed nyid ji ltar sbyor ba'i lugs kyang 'dir rab tu bstan par bya'o/ /gnyis pa dgos pa bshad pa ni/ rtsed mo'i mdun sar bzhad gang dang/ /de shes chags su gsang smra dang/ /pha rol kun tu rmongs byed la/ /gab tshig dag ni nyer mkho ldan/ /rtsed mo'i bya ba rtsom pa'i mdun sar bzhad gad kyi don dang/ gab tshig de nyid shes pa'i mkhas pa dag nang phan tshun du skye bos gang ba'i tshigs su yang gsang dgos pa'i gtam rnams gab tshig gis sma chog pa'i phyir dang/ pha rol po gab tshig mi shes pa rnams kun tu mgo rmongs par byed pa la/ gab tshig gi rgyan 'di dag nye bar mkho zhing dgos pa dang ldan pa'o/ /gsum pa dngos bshad pa la/ legs bshad sgra dbyangs rgya mtsho'i 'jug dogs las/ kun tshogs slu byed rim pa bral/ /rab bcom mthun gzugs rtsub mo'i tshig /grangs dang rab brtags ming du 'dus/ /bsgribs dang mthun sgra rmongs pa dang/ /yongs 'phrog gcig bsgribs gnyis ka @002a @#/ /bsgribs/ /yongs su 'dras dang bcu drug go/ zhes pa ltar bcu drug las/ dang po kun tu tshogs pa la gnyis/ mtshan nyid dang/ dper brjod do/ /dang po mtshan nyid ni/ tshig mtshams sbyar bas don sbas pa/ /kun tu tshogs pa zhes par brjod/ /gab byed supra dang tinga'i mtha' can gyi tshig dag phan tshun mtshams legs par sbyar bas gzugs gzhan du 'gyur te/ gab bya'i brjod don sngas pa de la ni/ /kun tu tshogs pa'i gab tshig ces bya bar mkhas pa rnams kyis brjod do/ /gnyis pa dper brjod ni/ ma yA gor sems kyis ni/ /shes pa med la ci slang khro/ /gnas min du ba 'di yis ni/ /ci byed kun tu mig dmar ma/ / tshig rkang dang po'i gab bya'i don ni/ bdag gi gnod pa'i ro sems kyis/ zhes pa ste/ bdag ces pa'i skad dod/ /asmadra la drug pa'i gcig tshig ngas byin/ dbyagns can sgra mdo las/ ngas kyis ta ba ma ma 'os/ / asmad ngas dang bcas pa ma ma ru bsgyur/ /yusmangra asmad ngag la drug pa/ bzhi pa/ gnyis pa rnams kyis te me/ bamra nau/ bsra nas dag gos ma ma me ru bsgyur/ de'i pha rol tu gnod pa'i skad dod A gsu dang ro'i skad dod ra sa bzhag ste/ e a ya'o dang/ sra ra dag gi rnam bcad do dang/ a las ha ba la'o dang/ u la o'o dang/ dbyangs kyis dman pa pha rol tu yang dag par sbyor ros bsgrubs pas/ ma yA go ra @002b sa zhes 'grub ste/ bud med zhig rang gi bdag po la khro zhing du ba la/ bdag po nges kye kun tu mig dmar ma zhes bod nas/ bdag gi gnod pa'i ro bro ba rang sems kyis shes pa tsam yang med pa la/ rgyu mtshan ci'i slad du khyod khro zhing du bar byed/ gnas ma yin nga la khro zhing du ba 'dis ci zhig byed par 'dod ces pa'o/ /de'i gab byed ni/ bdag gis ba lang ro sems kyis/ /zhes pa ste/ asmrad la gsum pa'i gcig tshig TA byin/ gcig nyid la tad mrad ngag gos/ asmrad mdra du bsgyur/ tyad sogs kyi si sogs la Ti Os/ mdra ma ru bsgyur/ TA di dag la Os ma me ru bsgyur/ me dang TA'i A mtshams sbyar bas/ ma yA bdag gis/ go ba lang/ ra sa ro ste/ bdag gis ba lang gi ro bro ba zhes sogs 'brel med zhig tu go zhing 'khrul du bcug pa'o/ /gnyis pa slu byed la gnyis/ mtshan nyid dang/ dper brjod do/ /dang po ni/ gzhan la grags pa'i sgra dag gis/ /gang du bslu ba slu byed nyid/ /gab bya la sgra de 'jug kyang grags chung bas der go dka' zhing gzhan gab byed la sgra de 'jug pa nyid yongs grags yin pas der go nas 'khrul zhing bslu ba na slu byed kyi gab tshig nyid do/ /gnyis pa dper brjod ni/ /kubdzA bstan pa khyod kyi ni/ /dga' ba ji ltar 'phel gyur pa/ /'chi med bu mor co 'dri ma/ /mi mo spyod pas de lta min/ /'dir gab bya 'dul ba lung las 'byung ba'i rgyal po gtum po rab snang gi btsun mo zhi ba skra can ma'i skye yul grong khyer kA n+ya kub dzA zhes pa'i bud med rnams gzugs byad mchog tu bzang bas de 'dra'i mdzes ma grogs su bsten pa khyod kyi dga' ba ji ltar 'phel ba de @003a @#/ /lta bu ni 'chi med lha'i bu mo bsten pa'i dga' ba la co 'dri ba ste mtshungs pa zhig ste/ mi mo gzhan la longs spyod pas ni de lta bu'i dga' ba thob nus pa min no/ /zhes pa yin kyang/ gab byed ubdza ti drang ba'i bying sal ku smad pa'i don sngon du bzhag nas rjes 'brel phyis pa'i kubdza ni/ 'grel pa 'dod 'jor/ ngan par 'khyog pas kubdzaH sbur bo ste/ zhes pa ltar/ 'khyog po'i sbur bo dang/ bud med kyi rkyen byin pa'i kubdzA ni gnya' ba sbur mo la yongs su grags pas de yis lha mo la co 'dri zhes pa kyal ka byed bar 'khrul nas slu bar byed pa'o/ /gsum pa rim pa bral ba la gnyis mtshan nyid dang/ dper brjod do/ /dang po ni/ sbyor ba shin tu 'khrugs pa yis/ /rmongs byed rim pa bral ba ste/ /gab bya tshig sbyor go rim bsgrigs na don gsal bar ston kyang/ gab byed tshig sbyor gyi go rim shin tu 'khrugs pas don la rmongs par byed pa ni/ rim pa dang bral ba'i gab tshig ces bya'o/ /gnyis pa dper brjod ni/ yu barO byed pad can gyi/ /dang mo tsher ma rtsub po can/ /bzhin la sgra snyan sgrog byed cing/ /lus ni 'dar bar byed cing mchus/ /gab bya dang pa bzhin ras las sgra snyan po sgrog par byed pa dang/ lus g.yo zhing 'dar bar byed cing mchus/ padma can gyi yu ba tsher ma rtsub po can la'o byed do/ /zhes pa yin kyang gab byed tshig snga phyir go rim shin tu dkrugs nas don sbas pa'o/ /bzhi pa rab bcom la gnyis/ mtshan nyid dang/ dper brjod do/ /dang po ni/ gang la don rtogs dka' ba yi/ /tshig 'phreng de ni rab bcom yin/ /sbyor ba gang la don rtogs par dka' ba sgra grags chung ba 'ba' zhig @003b tu sbyar ba'i tshig gi 'phreng bas don de bcom pa lta bur gyur pa ni rab bcom gyi gab tshig ces bya'o/ /gnyis pa dper brjod ni/ bu mo mdzes ma khyod rkang par/ /rkang gdub rgyas pa sgra snyan sgrog /mngon sum nyid du gyur pa 'dir/ /bdag gi srog ni brtan ma yin 'de'i gab bya kyi bu mo zhes bod nas khyod kyi rkang pa mdzes pa dag la rin po che'i rkang gdub rgyas pa sil khrol gyi sgra snyan par sgrogs pa mig dang rna ba'i mngon sum du byung ba'i skabs 'dir/ chags pa drag pos bdag gi srog ni 'jig par nye bas brtan pa ma yin no/ /zhes pa ste/ gab byed rgya skad la kA la dus la mi 'jug pa'i rkang pa la 'jug pa dang/ tsandra zla ba la mi 'jug par mdzes pa la 'jug pa sogs yongs grags min pa'i sgra mang pos brjod don bcom pa ltar yod kyang bod skad la zhig nas go sla bar gyur pas/ spang TIk tu 'di'i dper brjod/ gnas gcig tu nges pa'i bya dka'i bod skad/ hA hA mi sgrog mkha' 'gros mtshan/ /ri 'gro dbang 'khyog ldan ma chags/ /'khyog sgrog gang+gA'i chur 'jug sdig /bya rog 'joms pa mtho ras 'gro/ zhes pa'i dag lta bu rnams gsal bar gsungs pas/ 'di'i don ni/ hA hA ni kye ma zhes mya ngan gyi tshig kha nas mi sgrog pa/ mkha' 'gro nyi mas mtshan pa'i ri rab lhun po'i steng gi lha gnas su'ang snyan pa'i grags pa 'gro ba/ mig gi dbang po 'khyog por lta ba'i zur mig dang ldan pa'i bud med la ma chags pa/ 'khyog por 'gro zhing sgra sgrog pa'i gang+gA'i chu bor khrus la 'jug pa thob pa'i rgyal po khyod sdig pa nag po bya rog dang 'dra ba bcoms zin pas na mtho ris kyi gnas su 'gro bar gdon mi za'o/ /zhes pa'o/ /lnga pa mthun pa'i @004a @#/ /gzugs la gnyis/ mtshan nyid dang/ dper brjod do/ /dang po ni/ btags pa'i don bkod tshig dag gis/ /sdeb pa dag ni mthun pa'i gzugs/ /gab bya brjod don dngos ma smos par de dang gzugs kyi rnam pa mthun pa'i dpe btags pa ba'i don bkod nas/ de dang 'brel ba'i tshig dag gis brjod don sdeb cing sgrib par byed pa ni mthun pa'i gzugs kyi gab tshig ces bya'o/ /gnyis pa dper brjod ni/ gang gi yal ga yal 'dab la/ /me tog snum pa'i dog pa can/ /'khri shing yal 'dab lnga pa ni// skyed mos tshal 'dir bdag gis mthong/ /gab bya bud med la gab byed 'khri shing gi tha snyad btags te brjod pa ste/ de yang gang gi lag pa la yal ga dang/ /sor mo la yal 'dab dang/ sen mo la me tog gi don pa snum pa can dang/ bud med yan lag lnga can la 'khri shing yal 'dab lnga par sgro btags nas/ de 'dra ba skyed mos tshad 'dir bdag gis mthong ngo/ /'di la spang los bsdus brjod yin gsungs yang/ bsdus brjod la mtshungs chos gang rung gis chog la/ 'di la gzugs mthun pa zhig dgos gsung drug pa rtsub mo la gnyis/ mtshan nyid dang/ dper brjod do/ /dang po ni/ mtshan nyid yod tsam nges tshig dang/ /ldan pa'i tshig ni rtsub mo'o/ /brda sprod pa'i gzhung nas bshad pa'i mtshan nyid yod tsam mam/ nges tshig bshad rung tsam dang ldan pa la shin tu mi gsal zhing nyams dang bral la tshig rtsub po can ni rtsub mo'i gab tshig ces bya'o/ /gnyis pa dper brjod ni/ gab bya yongs grags ma yin pa'i sgra'i bsgrub tshul ltar na/ chad ma rnams ni chang khang du/ /so yi 'od kyis ci dkar 'khyams/ /da ni myos par @004b byas de rnams/ /chang gi rdzing bur bying ba bzhin/ /zhes 'byung yang/ gab byed yongs grags tsam la/ lha rnams lha yi khang pa ru/ /so so'i 'od kyis dal bur rgyu/ /dri bzang rdzing bur myos byas pa/ /de rnams nga ni rgan mo bzhin/ /zhes 'byung ste/ gzhung gi rgya dpe'i 'go'i su rAHzhes pa 'di la mtshon na/ yongs grags ma yin pa'i sgra'i bsgrub tshul ka lA bltar na/ chang gi skad dod su rA la de byed do zhes pa'i don la/ byings don la in te ka ri ta'os/ ina'i rkyen byin/ in la rtags yi ge gcig pa ma yin pa'i mtha'i dbyangs dang po can dbyi 'os rtags mtha'i A dang rkyen gyi nra phyis nas sbyar bas su ri grub/ slar yang byed pa po'i don la/ ba tsa sogs rnams las a tsa'os/ atsa'i rkyan sbyar/ kA ri ta'i am iD bi ka ra Na ma yin pa la'os/ ina'i rjes dang rkyen gyi tsa phyis nas sbyar bas su ra grub/ das na su rA ring po bud med rtags can chang la 'jug pa la ina dang atsa'i rkyen byin nas bsgrubs pa dang/ su ra thung du skyes pa'i rtags can lha la 'jug pa gnyis grub gzugs gcig tu byung bas de la rnam dbye dang po'i mang tshig dzas byin nas rjes 'brel phyis te sbyar bas su rAHzhes grub pa 'di/ chang ma rnams ni/ zhes pa dang/ lha rnams zhes gab bya gab byed tha dad du 'gyur lugs de lta bu'o/ /bdun pa grangs la gnyis/ mtshan nyid dang/ dper brjod do/ /dang po ni/ gang du grangs kyis kun rmongs par/ /byed pa grangs nyid ces bya ste/ /tshig sbyor gang du brjod bya'i don de brjod byed yi ge'i grangs kyi sgo nas ston kyang grangs de nyid kyis kun tu rmongs par byed pa la ni grangs kyi gab tshig ces bya'o/ /gnyis pa dper brjod ni/ sna @005a @#/ /ldan dbus gnas gsal byed bzhis/ /yongs su rnam par brgyan pa yi/ /grong khyer 'ga' yod 'ga' zhig na/ /mi bdag yig brgyad ming can yod/ /'dir gab bya ka nytsa pu ri ste grong khyer gsal ldan zhes pa 'ga' yod pa de'i bye brag 'ga' zhig na rgyal po pallA wa ste yal 'dab kyi ming can yod do zhes pa yin la/ gab byed yi ge'i grangs sna ldan nya yig dbus na gnas pa la gsal byed ka tsa pu rI bzhis brgyan pa dang/ grong khyer dang rgyal po gnyis ka'i ming gi gsal byed kyi yi ge ka nya tsa pu rI pa lA wa brgyad yod pa'o/ /grong khyer gyi ming du smos zin pa de slar yang rgyal po'i ming du smos pa ni tshig gi cha nas rmongs su 'jug pa'i ched dang/ don gyi cha nas grong khyer yir skya'i rgyal po zas gtsang zhes brjod pa dang mtshungs pas 'gal ba med do/ /brgyad pa rab brtags la gnyis/ mtshan nyid dang/ dper brjod do/ /dang po ni/ gang du ngag don rnam pa gzhan/ /snang ba de ni rab brtags nyid/ /gang du gab bya brjod par bya ba'i ngag tshig tshogs pa'i don de gab byed kyi rnam pa gzhan du rtog cing snang ba de ni/ rab brtags kyi gab tshig ces bya'o/ /gnyis pa dper brjod ni/ tshig rnams rab tu 'khrul ba dang/ /mgo bo dung cing mig dman pa/ /'dug kyang 'dang ldan bdag la ni/ /rgan mo rjes su mi brtse'am/ /'di'i gab bya dbul po zhig phyug po la nor slong ba'i tshe nyam thag pas tshig 'khrul/ zhum pas mgo bo dud cing mig dman pas lta/ skrag pas lus 'dug kyang 'dar ba'i khyad chos dang ldan pa bdag la phyug po rjes su mi brtsa'am/ zhes pa yin kyang/ gab byed ni @005b 'dong ldan zhig gis chags pas tshig 'khrul/ ngo tshas mgo dud/ zhum pas mig dman/ 'dod pas lus 'dar ba bdag la rgan mo rjes su mi brtse'am/ zhes ku re byed par sgro btags te brjod pa ste br-ingng+hA zhes ba phun tshogs can te phyug po dang rgan mo gnyis ka la 'jug pas so/ /dgu pa ming du 'dus pa la gnyis/ mtshan nyid dang/ dper brjod do/ /dang po ni/ gang du ming la sna tshogs don/ /brtags de ming du 'dus pa nyid/ /gang du gab bya gab byed dag ming mthun mong du gyur pa la/ sna tshogs pa'i don du mar 'khrul yang/ legs par brtags na mthar gab bya'i ming du 'dus shing gzhol ba ni ming du 'dus pa'i gab tshig ces bya ba nyid do/ /gnyis pa dper brjod ni/ mig mi brtan ma sa ldan 'ga'/ /dang por rA dza zhes pa sgrog /sa nA ta na yang ste 'di/ /rgyal po ma yin khyab 'jug min/ /'di'i gab bya ni/ mig mi brtan ma zhes bos nas shing rA dza ta na ste 'phags yul phal skad du k+ShI rI zhes 'bod pa de bsnyad pa yin kyang/ gab byed rgya skad du parthibH zhes pa sa ldan ta sa'i bdag po mi'i rgyal po dang/ sa gsum la dbang ba'i lha khyab 'jug dang /sa la yong pa'i shing sogs gang yin mtha' gcig tu ngos mi zin te 'ga' zhig ces nges med kyi tshig kyang byung bas so/ /de rjes dang por rA dza zhes pa sgrog/ /ces pas kyang ngos ma zin te ming gi dang po rA dza can de mi'i rgyal po yin nam/ shing gi rgyal po yin snyam pa skye bas so /sa na ta na yang te zhes pas kyang ngos mi zinte/ sa nA tan zhes pa rgyun ldan te khyab 'jug gi ming yang yin la/ yang ta na'i gong du dgag tshig a bzhag pa'i/ a tan ni ta na med ces pa dang/ de'i yang gong du dgag tshig na bzhag ste mtshams sbyar ba'i nA ta @006a @#/ /na ni/ dgag pa gnyis kyis rnal mgo bar gsungs pas/ tan med pa min zhes pa dang/ de dag gi gong du bcas pa'i skad dods bzhag pa'i/ sa nA ta na ni/ tan med pa min pa dang bcas pa zhes pa ste/ de yang gong dang sbrel na ming gi dang por rA dza dang mtha' mar tan drang bcas pa'i shing rA dza ta na bstan par yang go bas so/ /de rjes rgyal po ma yin khyab 'jug min/ zhes pas rnam bcad dus ldan mi'i rgyal po dang rgyun ldan lha khyab 'jug gnyis ka min zhes bstan pas /yongs gcod du shing rA dza ta na yin par 'khrul med du ngos zin par 'gyur ro/ /bcu pa bsgribs pa la gnyis/ mtshan nyid dang/ dper brjod do/ /dang po ni/ tshig ni chos mtshungs la reg pas/ /don gzhan sgrib pa bsgribs pa'o/ /rjod byed kyi tshig ni gab bya dang chos mtshungs pa'i gab byed la reg pa ste de nyid ces gsal bar brjod pas/ gab byed las don gzhan pa'i gab bya sgrib par byed pa ni bsgribs pa'i gab tshig ces bya'o/ /gnyis pa dper brjod ni/ rdzas bral mi ni btang byas nas/ /nor ldan rnam can bgrod pa gang/ /sna tshogs kyog brgyas 'jig rten 'gugs/ /gzung dka' smad 'tshong ma yin no/ /gab bya phun sum tshogs pa'i dpal dang/ gab byed smad 'tshong ma gnyis ka la yod pa'i mtshungs chos/ nor rdzas dang bral ba'i dbul po'i mi ni btang zhing dor bar byas nas/ nor dang ldan pa'i mi rnams can du bgrong cing gnas pa gang zhig /sna tshogs pa'i kyog ste thabs tshul brgya phrag gis 'jig rten thams cad 'gugs shing dbang du byed la/ rang dbang du sus kyang gzung dka' ba 'di ni smad 'tshong ma rnams @006b yin no/ /zhes mtshungs chos smad 'tshong ma la sbyar bas bstan bya phun sum tshogs pa'i dpal sgrib par byed pa'o/ /bcu gcig pa mthun pa'i sgra la gnyis/ mtshan nyid dang/ dper brjod do/ /dang po ni/ rnam grangs sgra ni bkod pa yis/ /bsgrubs pa de ni mthun pa'i sgra/ /gab bya'i don de'i dngos ming gsal bar ma brjod par/ de dang ming mthun pa'i sgra'i rnam grangs gzhan bkod nas/ des gab bya'i dngos ming mi gsal ba'i tshul du bsgrubs pa ni mthun pa'i sgra'i gab tshig ces bya'o/ /gnyis pa dper brjod ni/ khyod kyi sa min ming mthun gang/ /rab gyur skra ming can las rgyal/ /de yis ding bdag mchog tu ni/ /sred ldan byed do snyan sgrog ma/ /gab bya ni kye snyan par sgrog ma zhes bos nas khyod kyi mchu sgros kyi dmar ba byu ru'i kha dog las rgyal ba des/ de ring gi dus 'dod ldan bdag gi yid 'dod pa la mchog tu sred pa dang ldan par byed do zhes pa yin kyang/ gab byed d+ha rA ni 'dzin ma ste sa gzhi/ a d+ha rA ni sa min dang mchu gnyis ka la 'jug /yang bA la ni skra dang/ pra ni rab ste/ pra bA la ni rab tu gyur pa'i skra dang byu ru gnyis ka la 'jug/ des nas min dang ming mthun pa ni mchu dang/ rab gyur skra ming can ni byu ru ste khyod kyi mchu byu ru las rgyal ba ni mtshungs chos gcig par ston pa'i mtshungs sgra'o/ /bcu gnyis pa rmongs pa la gnyis/ mtshan nyid dang/ dper brjod do/ /dang po ni/ gang zhig mngon sum don bstan yang/ /rmongs phyir de ni rmongs zhes bya/ /gang zhig mngon sum du gab bya'i don de gsal bar bstan pa ltar snang yang/ ston tshig des 'khrul rgyu byas nas rmongs pa'i phyir/ kun tu rmongs pa'i @007a @#/ /gab tshig ces bya'o/ /gnyis pa dper brjod ni/ 'dod ldan dag ni ma la stan la/ /khro bas phyir bzlog nyal bar gyur/ /chags pas de bzhin nyid nyal te/ /dal bu yis ni kha dag sbyor/ /'di'i gab bya 'dod ldan khyo shug kha slor du nyal nas 'dod pa spyod pa yin kyang/ gab byed mal stan la khro ba pho mo phan tshun khro bar 'phrul/ phyir bzlog dang de bzhin nyil du nyal ba kha sbyor du nyal bar rgyab sprod du nyal bar 'khrul/ chags pas rgyab sprod du ji ltar nyal snyam du dang/ rgyab sprod du nyal na kha ji ltar sbyor snyam du the tshom za ru bcug pa'o/ /bcu gsum pa yangs 'phrog la gnyis/ mtshan nyid dang/ dper brjod do/ /dang po ni/ gang la sbyor 'phreng bdag nyid can/ /de ni yongs su 'phrog ces bya/ /gang la tshig sbyor mang po'i 'phreng ba snga ma snga ma'i don phyi ma phyi mas phrogs pa ltar du gas pa'i bdag nyid can de ni yongs su 'phrog pa'i gab tshig ces bya'o/ /gnyis pa dper brjod ni/ bya rgyal zas skyes dgra yi ni/ /bla ma'i 'od kyis bcom skye bo/ /kha 'joms grogs min 'dzin pa yis/ /khyab pa'i mkha' la mngon par dga'/ /'di'i gab bya nyi 'od kyis tshig pa'i skye bo rnams sprin gyis khyab pa'i namkha' la dga' ba yin kyang/ gab byed bya ni skabs thob kyis mkha' lding/ mkha' lding rgyal nas gang zhig thob pa ni rgya mtsho las thon pa'i bdud rtsi/ bdud rtsi'i kha zas za ba'i gtso bo ni brgya byin/ brgya byin las skyes pa'i bu srid sgrub/ srid sgrub kyi dgra ni kangNNa/ kngNNa'i bla ma'am pa ni nyi ma ste/ nyi ma'i 'od kyis bcoms shing gdungs pa'i skye bo rnams ni/ kha ba 'joms par byed pa ni me/ me'i grogs ma yin pa'i @007b dgra ni chu/ chu 'dzin pa ni sprin te/ sprin gyis khyab pa'i namkha' la mngon par dga'o/ /zhes pa'o/ /'dir brgya byin dang nyi ma'i bu srid sgrub dang kangNNa dgrar gyur tshul sogs rig byed kyi gtan rgyud las rtogs dgos so/ /bcu bzhi pa gcig bsgribs pa la gnyis/ mtshan nyid dang/ dper brjod do/ /dang po ni/ gang du rten ni sbas byas te/ /brten pa gsal ba gcig bsgribs pa'o/ /gang du rten lus lta bu rab tu sbas te/ brten pa yan lag lta bu gsal bar byas pa ni gcig bsgribs pa'i gab tshig ces pa ste/ rten gcig pu sbas pa'i phyir ro/ /gnyis pa dper brjod ni/ nam yang mtshon dang bud med kyi/ /nu ma'i dkyil 'khor la ma reg/ mi ma yin pa 'ga' zhig gi/ lag ni 'bras med min no lo/ /'dir mi ma yin pa 'ga' zhig ces rten dri za gab cing/ lag ni zhes brtan pa lag pa gsal bar brjod pa ste/ de yang lag pa yod pa'i dgos pa'am 'bras bu ni mi 'dod pa'i phyogs sel ba dang/ 'dod pa'i don sgrub pa yin pa la/ mi ma yin pa 'ga' zhig gi lag pa ni/ mtshon cha la reg nas phas rgol gyi dgra bo 'dul ba dang/ bud med kyi nu ma'i dkyil 'khor sogs la reg nas 'dod yon gyi bde ba la spyod pa sogs ci yang ma byas kyang lag pa de ni 'bras bu med pa min no zer lo/ /zhes ma rangs pa'i sgra smos so/ /'di'i skabs kyi mi ma yin pa ni dri za dang/ dri za'i lag pa ni/ shing erNDI ming yin te/ shing 'di'i 'dab ma dbyibs lag pa ltar yod pas 'di'i ming gi rnam grangs su dri za'i lag pa dang/ sor mo lnga pa zhes 'byung zhing/ 'di'i 'bras bu ni sman ngan rog tu grags pa 'di yin par gsungs so/ /bco lnga pa gnyis ka bsgribs pa la gnyis/ @008a @#/ /mtshan nyid dang/ dper brjod do/ /dang po ni/ gang du gnyis ka sbas gyur pa/ /de ni gnyis bsgribs pa'i/ /gang du rtan dang brten pa'i dngos po gnyis ka sbas nas dngos sum brjod pa de ni gnyis ka bsgribs pa'i gab tshig ces bya'o// gnyis pa dper brjod ni/ su zhig gang dang 'grogs pa yi/ /bya ba thams cad nye bar ni/ /thob cing zas kyi dus dag tu/ /gal te mthong na 'dor bar byed/ /'dir gab bya ni brten pa skra ni rten mgo bo dang 'grogs pa'i tshe bkru ba dang bshad pa dang rgyan 'dogs pa sogs gces spras dang byi dor gyi bya ba thams cad nye bar thob kyang/ kha zas kyi nang du ni gal te skra nyag ma gcig mthong na yang kun gyis phyir 'dor bar byed do/ /zhes pa yin kyang/ gab byed ni/ 'di'i rgya dpe la lar/ ke na kaH zhes dang/ kha cig tu/ ke ne shaH zhes 'byung bas/ snga mar ci dang gang dang su rnams la 'jug pa'i kim gnyis bzhag nas rnam dbya TA dang si byin nas bsgrubs pa dang/ yang mgo'i skad ded ka la lhan cig tu 'grogs pa'i don la TA dang/ skra'i skad dod katsa'i tsa phyis nas si byin ta bsgrubs pa gnyis 'dra bar ke na kaH zhes 'grub pa ltar ro/ /phyi mar gab byed dbang phyug tshangs dang 'grogs pa yi/ zhes 'byung ste/ tshangs pa'i skad dod ka la TA dang/ dbang phyug gi skad dod i sha la si byin nas bsgrubs na ke ne shaH zhes 'grub ste/ 'de'i gab bya ni mgo bo dang tshangs pa gnyis ka la 'jug pa'i ka dang dbang phyug gi skad dod i sha mtshams sbyar ba'i ka sha ni skra la'ang 'jug pas so/ /bcu drug pa yongs 'dres la gsum/ mtshan nyid/ /dper brjod/ bshad cing bsdu ba'o/ /dang po ni/ @008b gang la mtshan nyid sna tshogs 'dres/ /de ni yongs su 'dres zhes bya/ /gab tshig gang la sngar bshad pa rnams kyi mtshan nyid sna tshogs 'dres pas gcig kho nar nges bzung byar med pa de ni yongs su 'dras pa zhes bya ba'i gab tsheg go /gnyis pa dper brjod ni// ha ya ga dza b+ha Ta can/ /sde 'di gal te ma rgyal na/ /mA TR-i ka med nged kyi bu/ /'di ni yi ge shes kyang blun/ /'dir gab bya has dro ba/ yas mthar gnas/ gas ka sde/ dzas tsa sde/ b+has pa sde/ Tas Ta sde/ sde'i skad dod se na mtshams sbyor phral ba'i sa bcas pa/ i na yi ge ste/ de'i is dbyangs yig /nas ta sde/ mA tr-i ka phyi mo ste/ mdor na yi ge'i phyi mo gsal byed dbyangs dang bcas pa tsam yang ma rgyal ba ste mi shes na/ nged kyi bu 'di a k+Sha ra ste 'gyur med rtag pa'i rig byed shes kyang blun por 'gyur te/ yi ge mi shes pas bstan bcos dang/ de mi shes pas blang dor mi shes pas so/ /zhes pa yin kyang/ gab byed ha yang rtag ja glang po/ b+ha Ta dpa' po ste dpung bu chung rnams can gyi pha rol gyi dmag dpung sde dang bcas pa 'di las gal te ma rgyal na/ mA tri ka ste ma med nged kyi bu 'di ni/ a k+Sha ra ste yi ge shes kyang blun po yin no/ /zhes par go zhing/ 'on kyang bu yin pa dang ma med pa 'gal/ yi ge shes pa dang blun po yin pa 'gal bas ji ltar yin nam snyam du rmongs par byas pa'o// gsum pa bshad cing bsdu ba ni/ de ni ming du 'dus pa bsres/ /bslus pa yi ni gzungs dang ldan/ /de bzhin du ni gzhan gyi yang/ /'dres pa'i rim pa shes par bya/ /dper brjod ma thag pa de la ni/ phyed snga mar gab tshig dgu pa ming du 'dus pa nyid bsres @009a@#/ /pa yin te/ ha dang la sogs ming gcig la don tha dad du brtags pas so/ /phyi mar gab tshig gnyis pa bslus pa ste slu byed kyi gzugs dang ldan pa yin te/ mA tr-i ka phyi mo yin pa skyed byed kyi ma dang/ a k+Sha ra 'gyur med yin pa yi ger 'khrul nas slu bas so/ /gab tshig 'di la gab tshig dgu pa dang gnyis pa bsres pa de bzhin du gab tshig gzhan bcu gsum po phan tshun 'dres pa'i rim pa yang rigs bsgre shes par bya'o/ /bzhi pa 'jug don bsdu ba ni/ 'di dag gab tshig bcu drug ste/ /sngon gyi slob dpon rnams gyis bstan/ /ji skad bshad pa ltar gyi mtshan nyid dang dper brjod 'di dag ni gab tshig bcu drug ste/ 'di rnams kyi mtshan nyid ni sngon gyi slob dpon rA ma sharmma la sogs pa rnams kyis kyang rgyas par bstan to/ /zhes pa 'di ni spang lo'i gzhung don gsal ba/ rgyal mchog lnga pa'i dbyangs can dgyes glu/ bod mkhas pa'i daNDI'i dgongs rgyan/ bstan 'dzin chos kyi nyi ma'i dbyangs can ngag gi rol mtsho legs bshad nor bu'i 'byung khungs rnams gung bsgrigs te dpyad pa gang zhig bgyis skabs rang blos go tshod brjad par pangs nas dga' ba'i lo khrums stod zla ba'i dkar phyogs bzang bo gsum pa'i nyin dge slong d+harma b+ha dras dngul chu'i ri phug tu sbyar ba'o// sarba dza ga taM// //