[@##the following text has incomplete sections/ which are on order] [@##data incomplete here] @53a @#/ /'debs pa bya yi de dang mi mthun pa'i kho na la sogs pa'i thabs gzhan mi bya ba'o/ /lnga pa la brgyad de nang pa'i bstan pa'i sgor chud pa dang/ so thar rigs brgyad dang/ byang sems dang/ /gsang sngags kyi sdom pa gang len yang skyabs su 'gro dgos pas na sdom pa thams cad kyi rten du 'gyur ba dang/ las kyi sgrib pa srabs shing zad par 'gyur ba dang/ skyabs song bsod nams gzugs yod na/ /stong gsum 'di yang snod du chung/ /rgya mtsho chen po chu yi gter/ /phul gyis bcal bas gzhal mi nus/ /zhes bsod nams mtha' yas pa gsog pa dang/ ngan 'gror mi ltung ba dang/ mi dang mi min gyi gnod pas mi tshugs pa dang/ ci bsam thams cad 'grub pa dang/ myur du 'tshang brgya ba ste phan yon de rnams dran te nyin lan gsum dang/ mtshan lan gsum du skyabs 'gro bya'o/ /drug pa ni/ des na dkon mchog ni che ba srog dang chung ba bzhad gad kyi phyir yang mi btang ba'i zhe dam yang yang bya'o/ /gnyis pa bde legs thams cad kyi rtsa ba las 'bras bsam pa ni/ las dkar nag gi rgyu 'bras la ring du bsam nas blang dor tshul bzhin ma byas na/ ngan 'gro'i rgyu mi bzlog pas ngan 'gro la 'jigs kyang 'jigs pa las mi grol bas 'bras dus su sdug bsngal las skyob pa la rgyu dus su yid mi dge ba 'chos dgos pas 'di la gnyis/ las 'bras la yid ches kyi dad pa bskyed pa dang/ de @53b la blang dor tshul bzhin bya ba'o/ /dang po la gnyis/ las 'bras spyir bsam tshul dang/ bye brag tu bsam tshul lo/ /dang po la bzhi las/ dang po las nges pa ni/ rgyal ba'i gsung rab rnams las zhes sogs te/ 'dir rgyal ba'i gsung rab rnams las zhes gsungs pa ni dgongs gzhi khyad par can te/ las rgyu 'bras phra mo rnams ni rgyal ba nyag gcig gis spyod yul yin gyi/ de las gzhan pa'i nyan rang bdag nyid chen po rnams dang sa bcu'i byang sems rnams kyis kyang rang dgar spyod yul ma yin na so so skye bo rnams kyis lta ci smos/ de la sems can dmyal bar skyes pa na rlung bsil bu lus la 'phog pa'i bde ba yan chad sngon rgyu dge ba spyad pa'i 'bras bu dang/ tshor ba gdung ba'i rnam pa can gyi sdug bsngal tha na dgra bcom pa'i rgyud la skyes pa yan chad sngon mi dge ba spyad pa'i 'bras bu yin la/ des na bde sdug gang yin kyang rgyu med pa dang mi mthun pa'i rgyu las byung ba ma yin pas dge sdig spyi las bde sdug spyi dang/ bde sdug sna tshogs rnams kyang dge sdig sna tshogs spyad pa las rgyu 'bras cung zad kyang ma 'chol bar nges pa ni nang pa sangs rgyas pa thams cad kyi yang dag pa'i lta ba zhes dkar chos kun gyi gzhir bsngags pa'o/ /gnyis pa las 'phel che ba ni/ rgyu dge sdig gnyis chung ngu las ma spyad kyang zhes sogs te/ gegs byed ni dper na sa bon rul ba myu gu'i gegs yin pa ltar/ @54a @#/ /dge ba bsags pa la 'gyod pa dang/ log lta sogs skyes pa dang/ sdig pa bsags pa la 'gyod cing bshags pa ni so so'i 'bras bu 'byin pa'i gegs byed dang 'phrad pa yin la/ de lta bu'i gegs byed dang ma 'phrad na nang gi rgyu 'bras kyi 'phel 'dra ba phyi rol gyi rgyu 'bras la med de mnyan yod kyi sprang phrug gnyis kyi gling gzhi la sogs pa dang/ dper na bya nam mkha' la phur ba'i tshe grib ma rjes su 'brang ste mthar sa la babs pa'i tshe rang gi 'og tu hril gyis 'gro ba bzhin no/ /gsum pa las ma byas pa dang mi 'phrad pa ni/ rgyu dge sdig gnyis ma spyad na zhes sogs te/ dper na sa bon med na myu gu skye mi srid pa bzhin/ dge sdig gang yang ma spyad na 'bras bu bde sdug gnyis ka mi 'byung ba'o/ /bzhi pa las byas pa chud mi za ba ni/ rgyu dge sdig gnyis/ spyad pa gegs byed dang ma 'phrad na zhes sogs te/ lus can rnams kyi las rnams ni/ / bskal ba brgyar yang chud mi za/ /tshogs shing dus la babs pa na/ /'bras bu smin pa nyid du 'gyur/ /zhes gsungs pa ltar dper na sa bon brlan dang ma 'phrad na bskal pa'i bar du myu gu mi 'byin yang rkyen dang 'phrad pa na myu gu bskyed pa bzhin no/ /bshes spreng las/ rtag dang mngon par zhen dang gnyen po med/ /yon tan gtso ldan gzhi las byung ba yi/ /dge dang mi dge rnam lnga chen po ste/ /de las dge ba spyod la brtson @54b par gyis/ /zhes gsungs pa ltar/ dus rtag tu byed pa/ mngon zhen drag pos byed pa/ 'joms byed kyi gnyen po med pas byed pa/ yon tan gyi gzhi dkon mchog dang/ phan 'dogs kyi gzhi pha ma mkhan slob ste; lnga po de las byung ba'i dge mi dge rnams ni rnam smin shin tu lci la/ gzhan yang zhing gi sgo nas stobs che ba ni /yul bla ma dang/ pha ma dang/ byang sems dang dge 'dun rnams la phan gnod chung du las ma byas kyang 'bras bu shin tu che/ bsam pa nyon mongs drag po dang byang sems kyis kun nas blangs pa dang/ dngos po bzang po dang mang po dang/ nar mas phan gnod byas pa dang/ rten dge slong pha ma/ dge tshul pha ma/ dge bsnyen pha ma sogs dang/ dus nar ma dang/ nya stong brgyad gsum sogs dang/ dus chen bzhi la sogs par dge sdig gang spyad kyang stobs shin tu che bas de lta bu'i tshul rnams shes par byas te yid ches kyi nges pa brtan po drang bar bya'o/ /gnyis pa bye brag tu bsam pa ni/ legs spyod dang nyes spyod kyi sgo ni gsum du nges shing/ sgo gsum gyi dge sdig tham cad las lam bcur ma 'dus kyang/ de las che long bsdus nas ni/ /dge dang mi dge ci rigs par/ las kyi lam ni bcur gsungs so/ /zhes gsungs pa ltar/ che long dam rags rim kha na ma tho ba'i gzhi che ba rnams bcur bsdus te gsungs shing/ bcu ni @55a @#/ /lus kyi las srog gcod/ ma byin len log g.yem ste gsum/ ngag gis las rdzun/ phra ma; tshig rtsub/ ngag bkyal te bzhi/ yid kyi las brnab sems/ gnod sems/ log lta ste gsum mo; ;de re re la'ang gzhi dang/ bsam pa dang/ sbyor ba dang/ mthar thug ste bzhi bzhi tshang dgos/ de la srog gcod kyi gzhi ni srog dang ldan pa'i sems can mi nas grog bu ra yan chad gang yang rung ba ste rang nyid gsod pa la sbyor ba tshad yang/ mthar thug med pas pha rol po zhes bshad/ bsam pa la gsum las/ 'du shes ni sems can du 'du shes pa ste/ de yang kun slong bye brag pa la dper na lhas byin gsod par brtsam pa na mchod sbyin du nor nas bsad na dngos gzhi med pas 'du shes ma 'khrul ba dgos shing/ gang byung yang gsod snyam pa la ni ma 'khrul ba mi dgos gsung ngo/ /nyon mongs pa ni 'dod chags dang/ zhe sdang dang; gti mug ste dug gsum gang rung ngo/ kun slong gsod par 'dod pa/ sbyor ba rang ngam bskos pa gang rung gis dug mtshon rig sngags sogs gang yang rung ba/ mthar thug de'i rkyen gyis rang gi snga rol du shi na dngos gzhi bskyed do/ /ma byin len la/ gzhi rang mi dbang zhing gzhan gyis bdag tu bzung ba'i rdzas gang yang rung ba/ 'du shes dang nyon mongs sngar bzhin/ kun slong ma gnang yang dbral bar 'dod pa/ sbyor ba @55b rang ngam bskos pas 'phrog pa dang/ brku ba sogs/ mthar thug thob blo skyes ba na dngos gzhi bskyed do/ /log g.yem gyi gzhi ni ma la sogs pa'i nye du dang gzhan gyi bdag tu bzung ba'i chung ma dang/ chos kyi rgyal mtshan rab tu byung ma dang/ rigs kyis srung ba bag mar ma song ba'i pha ma la sogs pas srung ba dang/ rgyal pos srung ba ni chad pa'i khrims bcas ba dang/ gzhan gyi gla byin pa'i sman 'tshong ma rnams ni bgrod bya ma yin pa'o; ;rang gi chung ma lta bu yin kyang kha dang bshad lam sogs lam ma yin pa/ bla ma dang/ pha ma dang/ mchod rten sogs kyi drung sogs gnas ma yin pa/ /zla mtshan 'dzag pa dang/ sbrum ma dang/ bsnyen gnas la gnas pa dang/ nad pa dang/ nyin mo sogs dus ma yin pa'o/ / 'du shes ma 'khrul ba/ de yang log g.yem la 'du shes ma 'khrul ba dgos kyang/ mi tshangs spyod la ni ma 'khrul ba mi dgos so/ /nyon mongs sngar bzhin/ kun slong mi tshangs par spyod par 'dod pa/ sbyor ba de'i don la rtsol ba/ mthar thug dbang po gnyis sprad pa'o/ /brdzun gyi gzhi ni/ pha rol pos don go ba/ 'du shes mthong ba la ma mthong sogs 'du shes bsgyur ba/ nyon mongs dug gsum gang rung/ kun slong 'du shes bsgyur te smra bar 'dod pa/ sbyor ba smra ba'am mi smra ba dang du len pa/ mthar thug yul gyis don go ba'o/ /phra ma'i gzhi ni/ sems can @56a @#/ /mthun pa dang mi mthun pa gnyis yan chad gang yang rung ba/ 'du shes dang nyon mongs sngar bzhin/ kun slong mthun pa dbye 'dod dang mi mthun pa mi bzlums par 'dod pa/ sbyor ba bden mi bden dang snyan mi snyan gang yang rung ba smra ba/ mthar thug don go ba'o/ /tshig rtsub kyi gzhi ni/ mnar sems te zhe sdang skye ba'i gzhir gyur pa/ 'du shes dang nyon mongs sngar bzhin la kun slong ngag rtsub pos smra bar 'dod pa; sbyor ba bden mi bden gang rung gis zhar ba khyod ces pa lta bu'i lus kyi skyon/ gdol ba khyod lta bu rigs kyi skyon dang/ tshul khrims dang kun spyod kyi skyon las brtsams te mi snyan pa smra ba/ mthar thug don go ba'o; ;ngag bkyal gyi gzhi ni/ don med pa/ 'du shes dang nyon mongs sngar bzhin la/ kun slong don dang ma 'brel ba byung rgyal smra bar 'dod pa/ sbyor ba smra bar rtsom pa/ mthar thug smra zin pa ste 'di la yul mi dgos pas sprung dpe klog pa dang/ tshig labs dang/ glu rgyang sogs long gtam sna tshogs smra ba'o/ /brnab sems kyi gzhi ni/ gzhan gyi nor dang yo byed dang/ 'du shes ni de la 'du shes pa/ nyon mongs ni dug gsum gang rung/ kun slong bdag gir bya bar 'dod pa/ sbyor ba bsam pa'i don la rtsol ba byed pa/ mthar thug bdag gir gyur cig snyam pa'o/ /brnab sems rdzogs pa la ni rang gi longs spyod la chags sems dang/ gsog par 'dod pa'i @56b brkam chags gyi sems dang/ gzhan nor bzang po la rtog cing ro myang bas 'chum sems dang/ gzhan gyi yin pa'i nor de bdag gir gyur cig snyam pa'i 'khu sems/ brnab sems des ngo tsha ba dang nyes dmigs mi shes pas zil gyis non pa ste mtshan nyid lnga tshang ba dgos shing/ de lnga po gang rung gcig ma tshang na brnab sems rdzogs par mi 'gyur/ rje dpon de bdag gi bran du gyur na snyam pa dang/ bdag 'dod pa chung ba dang/ dben pa dang; brtson 'grus dang/ thos pa dang/ gtod ba sogs su gzhan gyis shes na snyam pa dang/ bdag la rgyal po dang 'khor rnam bzhi sogs kyis bkur sti byas pa dang/ zas gos la sogs pa thob na snyam pa dang/ phyi ma lha'i 'dod yon la rtse ba dang/ khyab 'jug la sogs pa'i gnas su skye bar gyur cig snyam pa sogs brnab sems rjes mthun par gsungs so/ /gnod sems kyi gzhi ni yid du mi 'ong ba'i 'gro ba dang/ 'du shes dang nyon mongs sngar bzhin la/ kun slong brdeg pa dang gsod pa la sogs pa dang/ de'i longs spyod rgud par 'dod pa/ sbyor bde'i don la rtsol ba/ mthar thug brdeg pa sogs byed par thag bcad pa'o/ /'di la yang gnod byed kyi rgyu la mtshan mar 'dzin pa'i zhe sdang dang/ gnod pa byed pa la mi bzod pa'i sems dang/ tshul min yi byed kyis yang yang khong khro'i rgyu dran pas 'khon 'dzin dang/ brdeg pa dang bsad na ci ma rung @57a @#/ /snyam pa'i 'khu sems dang/ ngo tsha dang nyes dmigs mi shes pas zil gyis non pa'i sems te de lnga tshang na gnod sems mtshan nyid par 'gyur la/ 'dis bdag la gnod pa byas pa'am byed dam snyam nas de la gnod pa'i phyir ji snyed sems pa dang/ gzhan gyi gnyen 'khor longs spyod dge rtsa sogs nyams par smon pa sogs gnod sems tsam po bar 'gyur ro/ /log lta'i gzhi ni/ skye ba snga phyi sogs yod pa la/ 'du shes skur pa 'debs pa'i don la bden par 'du shes pa/ nyon mongs dug gsum gang rung la kun slong skur pa 'debs par 'dod pa/ sbyor ba de'i don la rtsol bas rgyu 'bras dang/ byed pa dang yod pa'i dngos po la skur pa 'debs par brtson pa/ mthar thug skur pa gdab par thag bcad pa'o/ /'di la yang rmongs pa'i sems dang/ drag shul dang log par rgyun du bzhugs pa dang/ rab tu nyams pa dang/ zil gyis non pa'i sems te lnga tshang na rdzogs pa'o/ /de bcu po thams cad kyang dug gsum gyis rtsom par byed la/ srog gcod/ tshig rtsub gnod sems gsum ni zhe sdang gis mthar 'byin/ ma byin len/ log g.yem brnab sems gsum 'dod chags kyis mthar 'byin/ rdzun phra ma ngag bkyal gsum ni dug gsum gyis mthar 'byin/ log lta ni gti mug gis mthar 'byin par byed do/ /de la sems pa ni las yin las kyi lam ma yin/ lus @57b ngag gi bdun ni las kyang yin la las kyi lam yang yin/ yid kyi gsum ni las kyi lam yin la las ma yin no/ de yang lus ngag gi bdun po na snga ma snga ma lci zhing phyi ma phyi ma yang la/ yid kyi gsum ni snga ma snga ma yang shing phyi ma phyi ma lci ba'o/ /de ltar mi dge bcu bsags pa'i 'bras bu ci lta bu myong na/ de yang rnam smin gyi 'bras bu/ rgyu mthun gyi 'bras bu/ dbang ngam bdag po'i 'bras bu ste gsum gsum 'byung ste/ rnam smin gyi 'bras bu ni/ las lam bcu po re re yang dug gsum drag pas spyad na dmyal ba/ 'bring gis yi dwags/ chung ngus dud 'gror skye bar gsungs/ rgyu mthun gyi 'bras bu la gnyis las/ myong ba rgyu mthun ni ngan song nas mir skyes kyang srog gcod kyis tshe thung ba/ ma byin yin gyis dbul ba/ log g.yem gyis chung ma bsrung du ma btub pa/ rdzun gyis skur pa mang ba/ phra mas mdza' bo dang bye ba/ tshig rtsub kyis mi snyan pa thos pa; ngag bkyal gyis tshig mi nyan pa/ brnab sems kyis 'dod chags/ gnod sems kyis zhe sdang/ log ltas rmongs pa shas che bar 'gyur ro/ /byed pa rgyu mthun gyi 'bras bu ni snga ma gang spyad pa de la dga' bar 'gyur ba'o; ;bdag po'i 'bras bu ni/ gang zag des bdag pa'am des dbang bsgyur ba'i yul la 'byung ste/ srog bcod kyis yul khams kyi mdangs nyams shing sman dang 'bras bu sogs stobs chung ba sogs dang/ ma @58a @#/ /byin len gyis lo tog nyung zhing mi smin ba dang skam zhing med par 'gyur ba/ log g.yem gyis bshang lci dang 'dam rdzab dang ljan ljin sogs dri nga zhing mi gtsang ba/ rdzun gyis bslu ba dang 'jig su rung ba'i rgyu dang ldan pa/ phra mas sa phyogs mi snyoms pas bgrod par dka' ba/ tshig rtsub kyis sa phyogs sdong dum dang tsher ma dang rdo ba dang gsag ma dang gyo mo la sogs pa yid du mi 'ong ba/ ngag bkyal gyis ljon shing 'bras bu can la 'bras bu mi chags shing mi smin pa sogs/ brnab sems kyis phun tshogs thams cad lo zla zhag re bzhin nyams par 'gyur ba/ gnod sems kyis yams nad dang dmag 'khrug la sogs pa mi dang mi min gyi 'tshe ba mang ba/ log ltas 'jig rten na yo byed 'byung khungs rnams nub par 'gyur bas so/ /dkar po'i las lam bcu ni mi dge bcu po'i nyes dmigs bsam nas yang dag par sdom pa yin la/ de'i 'bras bu ni dge ba'i las chung ngus mi/ 'bring gis 'dod lha/ chen pos gzugs dang gzugs med khams gong ma gnyas su skye zhing/ rgyu mthun dang dbang 'bras kyang mi dge ba las ldog ste shes par bya'o/ /gzhan yang dge bas bde 'gror 'phen cing mi dge bas ngan 'gror 'phen kyang/ rdzogs byad la nges pa med pa ni bde 'gros skyes kyang tshe thung zhing dbul la nad mang ba sogs mi dge @58b bas rdzogs la/ ngan 'gror yang bde ba cung zad yan chad dge bas rdzogs pa'o/ /lus ngag gi bdun po la byas la ma bsags pa dang/ bsags la ma byas pa dang/ byas shing bsags pa dang/ ma byas shing ma bsags pa ste mu bzhi las/ byas la ma bsags pa ni srog gcod la mtshon na mi mkhas pa dang/ rmi lam dang/ ched du ma byas pa dang/ mi 'dod bzhin du gzhan gyis nan tar byed du bcug pa dang/ lan gcig kho na byas shing des 'gyod sdom drag pos srab mor byas pa sogs/ bsags la ma byas pa ni gsang pa'i phyir rtog cing dpyod la srog ni ma bcad pa/ byas shing bsags pa ni de gnyis ma gtogs pa'i srog bcad pa thams cad/ ma byas shing ma bsags ba ni gsum ga ma bgyis pa/ des na byas la bsags pa ni myong nges kyi las dang/ de las gzhan pa rnams ni myong bar ma nges pa'i las/ myong nges kyi las la dus kyi sgo nas gsum ste/ las de'i 'bras bu tshe 'di la smin pa ni mthong chos la myong 'gyur dang/ tshe phyi ma la myong ba ni skyes nas myong 'gyur dang/ de phan chad kyi tshe rabs phyi ma rnams la myong ba ni lan grangs gzhan la myong 'gyur ro/ /dge sdig gi las mang po rgyud la yod pa la ni las lci ba thog mar smin zhing lci yang mnyam na 'chi khar mngon du gyur pa dang/ de yang 'dra na goms pa shas che ba dang/ de yang 'dra na thog mar byas @59a @#/ /pa de sngon la smin par 'gyur ro/ /de lta bu'i blang dor rnams shes par byas te dge ba bcu la sogs pa'i dge ba phra mo rnams la'ang mi brnyas par ci 'grub bya mi dge ba bcu la sogs pa'i nyes pa phra mo kyang sgo gsum la ma gos pa'i blang dor la 'bad par bya snyam du zhe dam drag po yang yang bya zhing/ de ltar byed nus par gdung shugs drag pos gsol ba btab ste bdud rtsi 'bebs sbyangs sngar bzhin bya la/ de ltar 'bad kyang gnyan po stobs chung ba dang/ nyon mongs stobs che bas brgya lam tsam du mi dge bas gos na nyis ltung dang zhag tu mi 'grogs par stobs bzhi'i sgo nas bshags bsdams la 'bad par bya'o/ gsum pa mjug tu ji ltar bya tshul ni sngar bzhin yin la/ gnyis pa thun mtshams su yang skyes bu chung ngu dang mthun mong ba'i chos bskor lta ba sogs ni sngar bzhin te skyes bu che 'bring gnyis kyang mdor bsdus cha tshang ba zhig 'khrid 'dun yod med/ chung ngu dang mthun mong ba 'di ni lam gyi gzhi yin pas lam rim chen ma'i gnad 'gag rnams mdor bsdus te bshad pa yin pas 'di la myong ba ci skye'i thabs tshul la rtsal ci yod kyis 'bad pa'i sgo nas dal ba'i rten la snying po blang bar bya'o/ /zhes gsungs/ ! gnyis pa skyes bu 'bring dang mthun mong ba'i lam gyi rim pa la blo sbyang ba la gnyis/ thar pa don gnyer gyi blo bskyed pa dang/ thar par 'gro ba'i lam gyi rang bzhin @59b gtan la dbab pa'o/ /dang po la gnyis/ thun gyi ngo bo la ji ltar bya ba dang/ thun mtshams su ji ltar bya ba'i tshul lo/ /dang po la sbyor dngos mjug gsum las/ dang po ni sngar gzhin la bdud rtsi 'bebs sbyangs skabs kyi dmigs skor rnams ni go sla'o/ /gnyis pa dngos gzhi la rgyas par byed na bden pa bzhi'i sgo nas bsam pa nyan thos kyi lam dang/ rten 'brel bcu gnyis kyi sgo nas bsam pa rang rgyal gyi lam gnyis gsungs la; bsdu na sdug bsngal bden pa/ kun 'byung bden pa/ 'gog pa'i bden pa/ lam gyi bden pa ste bden pa bzhir 'du bas na 'dir yang de bzhin du byed kyang bde lam gyi tshig zin la mi gsal ba'i tshul du byung mod/ bden bzhi yang bsdu na nyon mongs phyogs sdug bsngal dang kun 'byung/ rnam byang phyogs 'gog pa dang lam ste gnyis su 'du ba'i phyir ro/ /des na rgyu kun 'byung bden pa ni snga la/ 'bras bu sdug bsngal bden pa 'phyi ba la go rim de ltar mi mdzad pa ni rgyu 'bras kyi go rim dang mi bstun par/ nyams len gyi go rim dang bstun nas gsungs la/ de ltar gsungs pa'i dgos pa ni/ lha mi'i go 'phang thob kyang 'du byed kyi sdug bsngal las ma 'das shing de la bde bar 'dzin pa ni phyin ci log gis bslus pa yin pas yang dag pa'i bde ba med cing slar yang ngan song du lhung bas na mtha' shin tu ngan pa'i phyir 'di ni yang dag pa'i bde ba ma yin gyi sdug bsngal lo/ zhes @60a @#/ /sdug bsngal gyi rnam pa du ma gsungs nas 'khor ba la skyob bskyed cing/ de nas sdug bsngal de ni las dang nyon mongs kyis bskyed pa dang/ las nyon gyi rtsa ba bdag 'dzin du shes pa'i phyir de'i rjes su kun 'byung bden pa gsungs so/ /des na rgyud bla ma las/ nad ni shes bya nad kyi rgyu ni spang bya la/ /bder gnas thob bya sman ni bsten par bya ba ltar/ /sdug bsngal rgyu dang de 'gog pa dang de bzhin lam/ /shes bya spang bya reg par bya zhing bsten par bya/ /zhes nad kyis zin pa la sdug bsngal du ngo ma shes na nad de rgyu gang las byung dang/ de las thar ba'i phyir sman blang ba sogs mi 'byung ba bzhin/ 'khor ba sdug bsngal gyi rang bzhin can yin pa'i nyes dmigs ma mthong na sdug bsngal de las thar ba'i zhi ba la thob 'dod mi 'byung ba'i phyir sdug bsngal gyis mnar tshul thog mar bsam nas skyo ba skyes pa na de las thar 'dod dang de la rgyu ldog dgos par mthong nas kun 'byung gi bden pa bsam dgos so/ 'khor ba gang la zer ngos zin pa zhig dgos te/ rje sman khang pa'i slob ma rgan zhugs zhig don yod mkhas grub pa mjal du phyin pas khyed sman khang pa'i slob ma yin na nga la dka' gnad mang pa 'dri rgyu yod gsungs pa la/ rgan zhugs des bdag la de 'dra'i bka' skyon gnang rin yod pa min/ bdag rang bla ma'i thugs rjes 'khor bar ma 'khyams tsam lags @60b zhus pa la/ phyis rje byams pa rin po ches kho'i 'khor ba de dor ma la byas te dor ma phung pa la 'khor ba las thar bar bzung bas ngos ma zin pa yin zhes gsungs/ des na las nyon gyi dbang gis srid rtse nas mnar med kyi bar yang yang mtho dman du skye ba 'khor bas na 'khor ba zhes so/ /de yang gnas gang du bcing na 'khor bar bcing/ gang bcing na rang gi rnam shes gang gis bcings na las nyon gnyis kyis/ ji ltar bcing na phung po snga ma la chags pa dang phyi ma la 'dun pas nying mtshams sbyar te bcings la/ de las mi grol ba ni bdag med la bdag tu bzung bas lan pa'o/ /des na 'khor ba'i sdug bsngal ni zag bcas kyi las kyis bskyed cig las kyang nyon mongs kyis bskyed la/ nyon mongs thams cad kyi rtsa ba bdag 'dzin yin par ma shes na thar pa ngos mi zin pas de don gnyer gyi blo yang rlom pa tsam mo/ /skyes bu chung 'bring gi rtogs pa rnal ma skye ba la ngan song gi sdug bsngal la snying thag pa nas myong ba thon pa zhig dgos te/ de byung na kun dga' bo'i tsha bo gnyis kyi gleng gzhi ltar mngon mtho'ang mtha' ngan par mthong nas de lam chags pa zhig 'ong la/ kun dga' bo'i tsha bo gnyis kyis dmyal ba mthong bas brtson pa ni 'jigs skyob dang/ lha gnas mthong bas bsrung ba ni legs smon dang/ lung ma mo bklags pas bcom ldan 'das kyis bde 'gro nas ngan 'gror skye ba dang ngan @61a @#/ /'gro nas ngan 'gror skye bas chen po'i rdul dang 'dra ba sogs gsungs pa mthong ba'i rkyen gyis bde 'gro'i gnas kyang mtha' ngan par mthong nas thar ba don gnyer skyes tshun chad nges bar 'byung ba'i tshul khrims rnam dag yin la gleng gzhi rgyas pa ni 'dri bar ma nus so/ /des na 'di la gnyis/ 'khor ba spyi'i sdug bsngal bsam pa dang/ so so'i sdug bsngal bsam pa'o/ /dang po na lam rim chen mor sdug bsngal brgyad bsam pa/ drug bsam pa/ gsum bsam pa rnams rim par gsungs kyang bde lam du 'dir sdug bsngal drug bsam pa bshad nas/ brgyad bsam pa so so'i sdug bsngal gyi skabs dang po bdun mi la sbyar te gsungs pas de bzhin du 'chad pa la/ bdag gi mi dge bcu spong ba dang dge bcu sgrub pa tshul bzhin byung ba'i dbang du byas te ngan 'gro'i sdug bsngal las 'das pa'i bde 'gro'i go 'phang zhig thob kyang sdug bsngal rtsa ba nas spangs pa'i thar pa zhig ma thob na bde 'gro'i lus ci 'dra zhig thob kyang nyon mongs ma spangs pa'i dbang gis bde ba'i skabs skad cig kyang mi 'dug ste/ zhes dam bca' bkod nas mi nag chen gyi dpe gsungs so/ /de lad lta dbyug pas bsnun pa'i sdug bsngal med kyang zhes pa la/ gong du la thigs dang dbyug brdung gnyis gsal ba'i dbang gis/ la thigs dang dbyug pas bsnun pa'i sdug bsngal med @61b kyang zhes 'bru snon ngag tu 'don pa'i lugs kyang snang mod/ de'i don 'dod khams kyi lha mi la la thigs dang 'dra ba'i sdug bsngal med la/ khams gong ma gnyis la tshor ba bde sdug med pa'i phyir la dbyug gnyis ka'i sdug bsngal med ces pa'i don du go bar snang ngo/ /dpe de bzhin du bde 'gro'i go 'phang ci 'dra zhig thob kyang sngar byas kyi las bzang po'i phen pa zad pa na slar yang ngan song du lhung bas sdug bsngal dpag tu med pa myong bas na mtha' shin tu ngan pa'o/ /sdug bsngal drug bsam pa dngos ni/ bsdoms la/ sdug bsngal drug ni nges med ngom mi shes/ /yang yang lus 'dir yang yang nyid mtshams sbyor/ /yang yang mtho dman du gyur grogs med pa'o/ /zhes pa ltar nges pa med pa ni gzhan yang gnas 'khor ba 'dir rgyu las nyon gnyis kyi ngo bo skye ba zhig blangs phyin chad 'bras bu sdug bsngal gyi rang bzhin las ma 'das te/ dgra gnyen du 'gyur ba dang zhes sogs te/ bshes springs las/ pha ni bu nyid ma ni chung ma nyid/ /skye bo dgrar gyur pa dag bshes nyid dang/ /ldog pa nyid du mchi bas de slad du/ /'khor ba dag na nges pa 'ga' ma mchis/ /zhes rang gi tshe snga ma'i pha tshe 'di la bur 'gyur ba dang/ snga ma'i ma chung mar 'gyur ba dang/ dgra mdza' bshes su 'gyur ba dang/ yang de las go ldog ste snga ma'i bu tshe 'di'i phar 'gyur ba sogs @62a @#/ /shin tu ma nges par ma zad/ tshe 'dir yang lo snga ma gcig gis gcig gsod par brtsams pa'i dgra zhig lo phyi ma gnyen gyi dwang mar 'gyur ba sogs nges pa med pa mngon sum gyis grub pa la/ nges pa yod yod 'dra bar bzung ste chags sngang drag pos phan gnod byed pa mang ba ni khyi 'thom thang la 'khyams pa dang 'dra ste khyi 'thom zhig don chen po yod yod 'dra bar phyogs gcig la ldur ldur rgyug pa na mi zhig gis skad chen pos khyod byas na stabs kyis log ste yang phyogs gzhan zhig la sngar ltar rgyug go /des na dgra gnyen la rigs su bcad nas chags sdang skye ba bkag ste 'khor ba'i chos la blo gtad sa gang yang med par bltas la skyo bar bya'o/ /ngo ma mi shes pa ni/ 'khor ba'i bde ba ji tsam spyad kyang zhes sogs te/ re res rgya mtsho bzhi las lhag pa yi/ /'o ma 'thungs te da dung so so yi/ /skye bo'i rjes su 'brang ba'i 'khor ba pas/ /de bas ches mang nyid gcig btung 'tshal lo/ /zhes 'gro ba re re'i lus blangs pa'i 'o ma'i nu zho 'thungs ba rnams ma god par bsags na rgya mtsho chen po bzhi las kyang lhag pa zhig 'thungs pa ste rgya mtsho bzhi ni phyi rgya mtsho chen po la ri rab kyi mdangs 'phog lugs kyis kha dog bzhi'i sgo nas bzhag la/ de rnams la gting mtha' sogs kyi tshad bzhag nus pa dang rang gi skye ba'i ya mtha' la tshad med pa'i phyir rgya mtsho las mang ba zhig 'thungs zin @62b cing; da dung lam la mi slob mar so so skye bo'i rjes su 'brang na de bas ches mang ba zhig btung dgos pa'i don no/ /de zhes pa ni sngar 'thungs pa la go bar mi bya ste sngar 'thungs pa la tshad bzhag tu med la des na rgya mtsho bzhi las mang ba zhig da dung 'thung dgos pa'i don no/ /bde ba la longs spyod pa ni yid tshim pa'i phyir yin pa la srid pa'i bde ba ni ji tsam skyed kyang mi tshim par ma zad chags pa rgyas te 'khor bar ring du 'khyams te bde ba de dag gis cha tsam du yang mi 'gyur ba'i sdug bsngal shin tu mi bzad pa du ma 'dren par byed/ gzhan yang sngon rgyal po 'gu pa li'i spyi bo nas khye'u bzang po zhig 'khrungs pa spyi bo skyes sam nga las nu zhes brtsis mkhan rnams kyis 'khor los bsgyur ba'i rgyal por lung bstan cing/ des mnga' 'bangs rnams kyis zas gos sogs bsgrub pa'i phyir bsod nams sogs la 'bad par gzigs te rgyu mtshan dris pas zas gos sogs 'bad med du 'byung ba'i smon lam btab pas ma smos ma btab pa'i lo tog dang/ rin po che'i char babs pa dang/ shing bzang po'i gos la sogs pa ci 'dod byung bas bsod nams kyi stobs shin tu che bas 'dzam bu gling thams cad la dbang bsgyur/ des ma ngoms par shar lus 'phags po/ des ma ngoms par nub ba lang spyod/ des ma ngoms par byang sgra mi snyan/ de thams cad kyis ma ngoms par rgyal chen bzhi @63a @#/ /rigs kyi lha gnas/ des kyang ma ngoms par sum cu rtsa gsum du phyin te brgya byin gyi stan phyed la 'dug ste de dang mnyam por lo brgya dang so bdun bar du dbang bsgyur/ de nas sangs rgyas 'od srung gi dus su lha ma yin gyi dmag byung ba brgya byin gyis kyang ma bzlog pa de spyi bo skyes kyis bzlog pa na brgya byin dang mthun mong du dbang bskur bas mchims bar ril po 'dod nas brgya byin bsad dgos bsam pa'i ngan sems skyes pa na/ des bsod nams zad de 'dzam bu gling du lhung zhing/ de nas kyang mi ring bar 'jig rten gzhan du gshegs par phyogs pa na blon po dag gis lha gshegs pa'i rgyu dris pas/ 'chi ba'i rgyu ni ngan sems kyis byas par smra ba sogs so/ /yang yang lus 'dor ba ni/ lus bzang po ji tsam thob kyang zhes sogs te lus 'tsho skyong bya ba'i phyir sdig pa sna tshogs shig bsags kyang mthar lus ni nges par 'dor zhing de'i ched du bsags pa'i sdig pa thams cad sems steng du khyer te 'bras bu sdug bsngal mi bzad pa myong la/ gzhan yang re re'i bdag nyid rus pa'i phung po ni/ /lhun po mnyam pa snyed gcig 'das gyur te/ /zhes sems can re re'i lus blangs nas dor ba'i rus pa rnams bsags na ri rab lhun po las kyang mang ba ste/ snyed cig ces pa ni lhun po dang mnyam pa ji snyed cig 'das zhes pa'i don @63b no; ;yang yang nyid mtshams sbyar ba ni/ thog ma med pa nas yang dang yang du nyid mtshams sbyar bas zhes sogs te/ nying zhes pa ni yang zhes pa'i don te/ dgos pa'i yang dgos pa la nyid dgos dang/ lag pa'i yang lag pa la nying lag ces pa ltar sngar 'khor bar skye 'chi'i mtshams sbyar bar ma zad yang mtshams sbyar zhes pa'i don no/ gzhan yang/ ma yi thug mtha' rgya shug tshi gu tsam/ /ri lung bgrangs kyang sa yi sa langs mi 'gyur/ /zhes rang gi rtsa ba'i ma/ de'i ma/ de'i yang ma zhes bgrang ba'i phyir sa chen po 'di rgya shug pa'i tshi gu tsam du byas te bgrangs kyang sa zad nas bgrang mi nus pa'i don no/ /yang yang mtho dman du 'gyur ba ni/ 'khor ba'i phun tshogs ji tsam thob kyang zhes sogs te/ brgya byin 'jig rten mchod 'os gyur nas ni/ /las kyi dbang gis phyir yangs steng lhung/ /'khor los bsgyur ba nyid du gyur nas kyang/ /'khor ba dag tu yang bran nyid du 'gyur/ /zhes dang/ 'dul ba lung las/ mthon po rnams kyi mtha' ltung 'gyur/ /'phrad pa'i mtha' ni 'bral ba ste/ /gson pa'i mtha' ni 'chi ba yin/ /zhes gsungs pa ltar srid pa'i phun tshogs thams cad kyi mtha' rgud pas sdud pa'i phyir mtho sa nas dma' sar 'gro ba'i tshul thams cad bsam la 'khor ba la skyo bar bya'o/ grogs med pa ni/ rang nyid gcig pur grogs med par zhes sogs @64a @#/ /te; spyod 'jug las/ lus 'di gcig po byung ba yang/ /lhan cig skyes pa'i sha rus dag /zhig ste so sor 'gyes 'gyur na/ /mdza' ba gzhan la ci zhig smos/ /skye na gcig pu skye 'gyur zhing/ /'chi na'ang de nyid gcig 'chi ste/ /sdug bsngal skal gzhan mi len na/ /gegs byed mdza' bos ci zhig bya/ /zhes gsungs pa ltar grogs kyi don du sdig pa sna tshogs shig ni bsags la de'i 'bras bu myong ba'i tshe grogs rnams kyi sdug bsngal gyi thob skal ni mi len cing chos byed tshe gegs byed pa'i grogs kyis ci zhig bya zhes so/ /gzhan yang sdug bsngal gsum bsam pa ni/ dper na rma 'bras tsha ba'i steng du chu grang btab pa na re zhig bde ba'i rnam pa lta bu ni 'khor ba pa'i tshor ba bde ba yin pa la slar sngar bas sdug bsngal cher 'gro ba 'gyur ba'i sdug bsngal dam/ rma 'bras de la tsha chu sogs 'gyur byed kyis reg pas sdug bsngal che sa che bar gyur pa ni tshor ba sdug bsngal te/ nam skyes tsam nas lus sems gdung bar byed pa'i phyir sdug bsngal gyi sdug bsngal/ reg pa de gnyis ka dang ma 'phrad pa'i dus kyi rma 'bras rang bzhin gyis tsha ba lta bu ni zag bcas kyi tshor ba btang snyoms pa ste/ gnas ngan len rjes su 'brel bas khyad pa 'du byed kyi sdug bsngal/ de ltar tshor ba bde ba la chags pa rgyas pa dang/ tshor ba sdug bsngal la zhe @64b sdang dang/ btang snyoms la gnas ngan lan gyi lus la mi rtag pa la rtag par 'dzin pa sogs gti mug rgyas par 'gyur la/ de'i tshe tshor ba bde ba la sdug bsngal du bltas te 'dod chags dgag pa dang/ tshor ba sdug bsngal la phung po'i sdug bsngal gyi rgyur bsam nas zhe sdang dgag pa dang/ tshor ba btang snyoms la mi rtag pa sogs su bltas la gti mug dgag par bya ste/ tshor ba gsum dug gsum gyi rgyur mi gtong zhing; de yang sdug bsngal gyi sdug bsngal dang 'gyur ba'i sdug bsngal la 'jigs pa tsam gyis mi chog par 'du byed kyi sdug bsngal la 'jigs dgos te/ de yod na tsho ba'i sdug bsngal da lta med kyang gsar du gsog cing sdug bsngal thams cad la khyab pa dang/ sdug bsngal gzhan gnyis kyi rtsa ba yin pas 'di la snying nas skyo bar byas la rnyed par dka' zhing don che ba'i rten thob dus 'di la 'khor ba'i sdug bsngal mtha' dag spangs pa'i bla ma sangs rgyas kyi go 'phang rin po che thob par bya'o snyam pa'i zhe dam dang bdud rtsi 'bebs sbyangs bya'o/ /gnyis pa 'khor ba so so'i sdug bsngal bsam pa ni/ nyer len gyi phung po zhig grub phyin chad ces sogs te/ nyer len zhes pa 'dun pa dang 'dod chags te de yang 'dod chags dang sred pa don gcig la/ len pa dang don gnyer gyi 'dun pa don gcig go /de la shing las byung ba'i me la @65a @#/ /shing gi me zer ba lta bu rgyu'i sgo nas bzhag pa ni/ tshe snga ma'i dus su mir skye 'gyur gyi las shig bsags/ de'i rjes su 'chi ba la phyogs pa'i tshe lus sems bral gyis dogs pa'i lus la chags ba drag po skye bde sred pa yin cing/ phyi ma mi lus su skye ba e yod snyam pa ni don gnyer gyi 'dun pa'am len pa yin pas de gnyis kyis sngar mir skye 'gyur gyi las bsags pa de la gsos btang ste yang srid phyi ma grub pas na rgyu sred len gyi phung po'am nyer len gyi phung po'o/ /de bzhin du 'bras bu skyed pa'i shing la 'bras bu'i shing zer ba ltar da lta'i phung po 'dis sred len gnyis bskyed par byed pas na nyer len gyi phung po ste 'bras bu skyed pa'i sgo nas bzhag pa'o/ /'di grub phyin chad sdug bsngal gyi rang bzhin las ma 'das te/ ngan song gsum lta smos kyang ci dgos zhes pa la/ 'grel tshul gcig la sngar skyes bu chung ngu'i dus su myang ba tshad thub bsgoms zin pas 'der bskyar ga la dgos zhes dang/ gcig ltar na mngon mtho lha mi'i rten la yang sdug bsngal 'di ltar yod na ngan song gsum la yod pa zer ci dgos zhes pa'i 'gro la tshul gnyis yod/ bde 'gro'i sdug bsngal bsam pa la mi thog mar 'byung ba ni sdug bsngal che rim nas bsam pa yin la/ de la sdug bsngal brgyad bsam pa'i dang po bdun mi la sbyar te bsam pa dang brgyad pa ni mjug tu spyi bsdoms @65b su gsungs so/ /de la skye rga na 'chi bzhi dang/ gnyen sdug pa dang bral ba/ dgra mi sdug pa dang 'phrad pa/ 'dod pa'i dngos po btsal yang ma rnyed cing mi 'dod pa'i dngos po thog tu babs pa ste bdun no/ /'dir bkres skom gyi sdug bsngal ni bza' btung med ba dang/ yo byed kyang spyad longs med pa sogs dang/ 'dod pa'i dngos po 'tshol ba'i phyir lho tshong byang/ byang tshod lho sogs su 'gro ba ste 'di gnyis 'dod pa'i dngos po btsal kyang mi rnyed pa'i khongs su 'du zhing mi 'dod pa'i dngos po thog tu babs pa'ang de'i khongs su sdud pa ni cing zhes pa'i tshig nus kyis bstan pas brgyad 'dren pa'i skabs su de rnams bsdoms pas gcig tu brtsi'o/ /de ltar sdug bsngal brgyad bsam pa la dang po gnyen sdug pa dang bral ba'i sdug bsngal ni/ ches yid du 'ong ba'i gnyen bshes dang bral ba na sems la mya ngan skyed pa dang/ ngag tu smre sngags 'don pas du 'bod sogs byed pa dang/ skra 'bal zhings 'gam pa/ brang brdung ba sogs lus la gnod pa bskyed pa dang/ de'i yon tan dran pas yid gdung ba dang/ de yod na rang la phan pa 'di lta bu yod pa la de dang bral bas phan pa de med par bsam ste longs spyod ma tshang ba'i sdug bsngal ba'o/ /dgra mi sdug pa dang 'phrad pa'i sdug bsngal ni/ dgra dngos sam mi mdza' ba zhig dang 'phrad pa na yid mi bde ba'i nag yo re ba lta bu'i sdug @66a @#/ /bsngal dang/ de dang bral ba na nam langs pa lta bu'i spro ba 'byung ba dang/ dgra des chad pas bcad pa'am gcod du dogs pa'i sdug bsngal dang/ dgra de ma thub na gtam ngan pa 'phog tu dogs pa dang/ des khrims la sbyar te nyams nga bzhin du 'chi dgos pa'i 'jigs pa dang/ dgra dang 'thab rtsod byas te shi nas ngan 'gror song gi dogs pa'i 'jigs pa ste dmag 'thab pa dang kha mchu rtsod pa'i skabs su shi na zhe sdang gis mtshams sbyar bas nges par dmyal bar skye ba'i nyen che'o/ /'dod pa'i dngos po btsal yang ma rnyed cing mi 'dod pa'i dngos po thog tu babs pa'i sdug bsngal ni so nams byas kyang ston thog ma byung/ tshong byas kyang khe spogs ma byung/ thos bsam byas kyang bya ba ma grub pa sogs gang la re ba de 'bad nas btsal yang ma rnyed la/ des sems la gdung ba drag po bskyed pa dang/ ngag nas smre sngags 'don pa sogs kyi sdug bsngal ba'o/ /skye ba'i sdug bsngal bsam pa ni/ mngal mi gtsang rdzas kyi ljan ljin khrod/ /yul gzugs snang mi mthong mun khung du/ /yongs sdug bsngal drag pos rab bcer ba'i/ /zhes rab tu dog cing mun pa nag ba'i gnas skabs su mas bza' btung tsha ba bsten na me dong du tshud pa/ grang ba bsten na 'khyag sbubs su gnas pa/ ltogs na g.yang sar dpyangs pa dang/ 'grangs par bzos nas 'og tu tshud pa lta bu'i @66b sdug bsngal sna tshogs myong zhing/ btsa' ba'i tshe mngal sgo shin tu dog pa la 'jur mig tu drangs pa lta bu dang/ re zhig snam bu shin tu 'jam pa'i stan la bzhag kyang tsher phung gi steng du bzhag pa lta bu sogs kyi sdug bsngal sogs dang/ rga ba'i sdug bsngal bsam pa la/ gzugs bzang po nyams pa ni/ skra mig sman mdog de gang ltar dkar/ /mdangs 'od bkrag can de mun ltar gnag/ lus drang por skyes pa gzhu ltar gug/ yul 'dod la sred bral rga bas non/ zhes pa ltar dang/ dpral ba dras gdan ltar gnyer mas khebs/ 'dug pa'i tshes sgye thag pa chad pa ltar sdig skyar dang bcas shing/ ldang ba'i tshe shing gi rtsa ba 'don pa ltar sug bzhi btsugs te ldad dgos pa ste/ khri gung thang pa'i rgad po'i bstan bcos las/ langs tshe sug bzhi 'dzugs pa 'di/ dud 'gro'i zla mo byed pa min/ /byin pas lus po ma theg pa'i/ /ra zla lag pas byed pa yin/ /zhes pa ltar dang/ smra ba'i tshe ngag ldib cing 'gro tshe gom pa 'khyor ba/ mig gis mi mthong/ rna bas mi thos dran pa mi gsal/ sngar lta bu'i bza' btung mi 'ju/ gos nyung na mi dros la mang na mi theg/ tshe phal cher yol te 'chi ba la phyogs pa sogs kyi sdug bsngal ba'o/ /na ba'i sdug bsngal ni/ lus kyi rang bzhin 'gyur bas sha dang pags pa skam pa sogs dang/ lus kyis chu me rlung gi khams 'khrugs pas gdung ba bskyed cing des sems @67a @#/ /kyang mi bde ba dang/ zas gos spyod lam gang 'dod pa rnams nad la gnod du dogs pas byar med pa dang/ sman dpyad dang bza' btung gtar sreg sogs mi 'dod bzhin du bsten dgos pa dang/ nad mi 'tsho bar mthong nas sdug bsngal drag po bskyed pa'o/ /'chi ba'i sdug bsngal bsam pa ni/ longs spyod sdug pa phun tshogs dang bral ba/ gnyen la sogs pa'i rtsa 'jing sdug pa phun tshogs dang bral ba/ 'khor sdug pa phun sum tshogs pa dang bral ba/ lus sdug pa phun sum tshogs pa dang bral ba/ 'chi ba'i tshe gnad gcod dang yid mi bde ba'i sdug bsngal drag po myong dgos pa'o/ /gzhan yang ngan 'gro'i sdug bsngal cha 'dra re mi la'ang yod de/ tsha grang gi sdug bsngal ni dmyal ba dang cha 'dra/ dbul zhing 'phongs pa ni yi dwags dang cha 'dra/ dbang che bas chung ba la gnod pa sna tshogs byed pa ni dud 'gro dang cha 'dra ba'o/ /lha ma yin gyi sdug bsngal bsam pa ni/ lha ma yin gyi nyer len gyi phung po zhes sogs te/ bshes springs las/ lha min na yang rang bzhin gyis lha yi/ /dpal la sdang phyir yid kyi sdug bsngal che/ /de dag blo dang ldan na'ang 'gro ba yi; ;sgrib pas bden pa mthong ba ma lags so/ /zhes lha ma yin zhes pa ni/ dang po lha dang rigs gcig pa la sdug rtsub shin tu che ba'i phyir lha gnas las bskrad la/ mi sdug rtsub che ba la mi ma yin zer ba @67b ltar sdug rtsub che bas lha min zhes so/ /yang dran pa nyer bzhag las dud 'gror gsungs la/ de ni dbang po gsal yang 'gro ba'i sgrib pa ste rnam smin gyis sgrib pa bcings te bden pa mthong ba'i skal ba med pas so/ / gnas ni rgya mtsho'i chu mtshams man chad ri rab la bang rim bzhi yod pa'i steng rim nas sgra gcan dang/ kar 'phreng dang/ 'gul 'phreng dang/ thags bzang rigs te 'og ma 'og ma mthu stobs dang longs spyod che la; de rnams lha'i dpal 'byor la mi bzod pa'i phrag dog ste/ phrag ces pa ni phan tshun gyi bar yin la de yang po med par dog pa la phrag dog ces pa ste gzhan gyi dpal 'byor blo'i bar ram hrag tu mi tshud pas yid gdung de la brten nas lha dang g.yul 'thab pa na yan lag bcad pa la sogs pa'i lus thog tu 'bab cing yan lag bcad na 'chi'o/ /lha'i sdug bsngal bsam pa la gnyis las rgyal chen bzhi rigs sum cu rtsa gsum/ 'thab bral/ dga' ldan/ 'phrul dga'/ gzhan 'phrul dbang byed de 'dod lha rigs drug ni 'dod yon gyi bde bas g.yeng zhing/ sum cu rtsa gsum pa lha min dang 'thab pa'i tshe yan lag bcad na sdug bsngal ni myong la 'chi bar mi 'gyur/ mgo bcad na 'chi bar yang 'gyur ba dang/ lus bral ba'i sdug bsngal dang/ 'dod lha thams cad la zhag bdun nas 'chi ba na 'chi ltas lnga 'byung ste/ lus kyi kha dog mi sdug gyur pa dang/ /stan la mi @68a @#/ /dga' me tog 'phreng rnying dang/ /gos la dri ma chags dang lus la ni/ /sngon chad med pa'i rdul 'byung zhes bgyi ba/ /mtho ris 'chi 'pho sbron byed lnga bltas lnga/ /zhes lus kyi gzi byin nyams pa/ stan la sdod mi 'dod pa/ me tog gi 'phreng ba rnying pa/ gos la dri ma ste dreg pa chags pa lus la rdul te chu 'byung ba rnams 'chi bltas su rig nas shin tu sdug bsngal zhing lha'i bu mo rnams kyang mi sdod pa gzhan du 'gro la/ phyi thag ring ba 'ga' res rgyang nas me tog 'thor ba tsam las rang gcig pur lus shing/ khyad par skabs gsum pa zhes tshe phyi ma gang du skye 'gyur shes te ngan song sogs kyi sdug bsngal myong 'gyur bsam pas shin tu sdug bsngal la/ de yang mi lo lnga bcu la rgyal chen bzhi rigs pa'i zhag gcig tu byas pa'i lha'i zhag bdun myong dgos/ gzhan yang/ 'od chung khrus chags gos rgyan mi snyan sgrog/ rdzi khrab gcig chags nye ba'i 'chi ba ltas lnga; ;zhes nye bar 'chi ba na/ lus kyi 'od chung du song ba/ khrus byas pa'i chu lus la chags pas sher ba/ gos dang rgyan las myur du 'chi bar 'gyur ro zhes pa'i sgra mi snyan pa 'byung ba/ mig gi rdzi ma krab krab byed pa/ yul gcig la chags pa ni rang gi lus la chags pa ste de lnga nye ba'i 'chi ba ltas so/ /dpa' gong ba'i sdug bsngal ni/ bsod nams chen po'i lha rnams mthong ba'i tshe yo byad pi wang gcig tsam las med pa sogs bsod nams chung ba @68b rnams dpa' gong ba dang/ stobs che bas chung ba gnas gzhan du skrod pa sogs kyi sdug bsngal lo/ /gnyis pa khams gong ma gzugs khams gnas rigs bcu bdun dang/ gzugs med skye mched me bzhi rnams la mngon gyur gyi sdug bsngal de dag med kyang nyon mongs pa'i bag chags sems rgyun la bskos pas gnas pa la rang dbang ma thob pas 'chi bar 'gyu la/ shi nas kyang ngan song du lhung ba'i nyen shin tu che ste/ de yang mu stegs byed rnams ting nge 'dzin thob pa tsam gyis grol bar bzung nas de la 'bad cing de tshe 'phos nas ting nge 'dzin gyi mthus 'du shes med pa sogs kyi lhar skye la slar ting nge 'dzin gyi 'phen pa zad de gnas 'og mar lhung bar shes pa na sngar sgrub pa'i ting nge 'dzin la yid rten mi 'dug snyam du log lta skye zhing/ des sngar yod kyi dge rtsa thams cad bcoms nas ngan 'gror ltung bar 'gyur ro/ /nyer len gyi phung po lnga sdug bsngal ba ni/ mdor na nyer len gyi phung po 'dis zhes sogs te/ 'di la lnga ste tshe phyi ma mngon par 'grub pa'i sdug bsngal ba ni nyer len gyi phung po 'di blangs pa la brten nas skye ba phyi ma phan chad kyi sdug bsngal 'dren pa ste tshe phyi ma bde 'gror skye ba'i las bsags pa ni 'gyur ba'i sdug bsngal 'dren la/ ngan 'gro'i rgyu bsags pas ni sdug bsngal gyi sdug bsngal 'dren pa'o/ /tshe 'dir mngon par grub pa la brten pa'i sdug bsngal ni/ phung @69a @#/ /po grub zin la brten nas na rga la sogs pa sdug bsngal gyi rten du gyur cing sdug bsngal gyi sdug bsngal dang 'gyur ba'i sdug bsngal tshe 'dir mthong chos la smin pa'o/ /sdug bsngal gyi sdug bsngal gyi snod dang/ 'gyur ba'i sdug bsngal kyi snod ni sdug bsngal de gnyis kyi gnas ngan lan rjes su 'brel bde skyed par byed pa ste gong du gsal ba bzhin no/ /nyer len gyi phung po rang grub tsam nas las nyon snga ma'i gzhan dbang du gyur pa'i 'du byed thams cad 'du byed kyi sdug bsngal te 'dus nas bya ba byed pas na 'du byed ces so/ /des na nyer len gyi phung po'i khur ji srid bzung dgos pa de srid du sdug bsngal bar 'gyur bas 'di la nyon mongs kyi gnas ngan len gtan tshogs par med pas 'du byed kyi sdug bsngal ni sdug bsngal thams cad la khyab cing/ sdug bsngal gzhan gnyis kyi rtsa ba yin pas 'di la skyo ba mang du bsgom par gsungs so/ /des na nyer len gyi phung po'i rang bzhin gyi 'khor ba la skyo ba rnal ma zhig snying thag pa nas ma skyes na thar pa don gnyer snying nas mi skye la/ sems can gzhan 'khor bar 'khyams pa la snying rje chen po yang skye sa med pas theg pa che chung gang du 'jug kyang bsam pa 'di shin tu gal che ba dang/ de yang gsung rab dang dgongs 'grel tshad ldan gyi rjes su 'brangs te go ba rnam dag btsal la so sor rtog @69b pa'i dpyad sgom yun ring du byas te blo'i 'gyur ba drag po 'don dgos par gsungs so/ /gsum pa mjug tu bya tshul dang/ gnyis pa thun mtshams su bya tshul rnams sngar bzhin te rtogs sla'o/ /gnyis pa thar par 'gro ba'i lam gyi rang bzhin gtan la dbab pa la gnyis/ thun gyi ngo bo la ji ltar bya ba dang/ thun mtshams su ji ltar bya ba'i tshul lo/ /dang po la sbyor dngos mjug gsum las/ dang po ni sngar bzhin la bdud rtsi 'bebs sbyangs bya tshul rtogs sla'o/ /gnyis pa dngos gzhi ni/ thar pa don gnyer mtshan nyid tshang ba skye ba la rgyu kun 'byung gi sgo nas 'khor bar 'khyams tshul bsam dgos la/ las nyon la kun 'byung zhes brjod pa'i rgyu mtshan 'bras bu sdug bsngal kun 'byung bas na de ltar bya'o/ /des na 'khor bar 'khyams pa'i rgyu ni las dang nyon mongs gnyis yin kyang gtso bo ni nyon mongs yin te/ rnam 'grel las/ srid pa'i sred las rnam brgal ba'i/ /las gzhan 'phen nus ma yin te/ /lhan cig byed pa zad phyir ro/ /zhes srid pa'i sred las brgal ba ni dgra bcom pa yin la/ de'i rgyud la mi dge ba'i las ji snyed yod kyang de la gsos 'debs pa'i lhan cig byed rkyen sred pa med bas 'bras bu 'byin mi nus shing/ nyon mongs yod na sngar bsags kyi las med kyang des gsar du gsog /des na nyon mongs spong ba gal che la/ de @70a @#/ /yang nyon mongs skye tshul dang ngo shes pa la rag las te/ de ma shes na dgra ngo ma shes par mi gseb tu mda' 'phangs pa dang/ nad ngos ma zin par gya tshom du sman gtong ba ltar don log tu 'gro ba'i nyen yod pa'i phyir/ de la lam rim chen mor/ nyon mongs ngos bzung ba/ ji ltar skye ba'i rim pa/ nyon mongs pa'i rgyu/ nyon mongs pa'i nyes dmigs bsam pa ste sa bcad bzhi mdzad pa spros pa che ba'i dbang du mdzad la/ bde lam du nyon mongs skye rim rnams gsal bar bstan nas gzhan rnams rang shugs kyis 'du bas de bzhin du 'khrid pa la 'dir ma rig pa dang 'jig lta gnyis so sor byed pa 'phags pa thogs med sogs kyi lugs dang/ de gnyis gcig tu byed pa 'phags pa klu sgrub sogs kyi lugs gnyis las/ spyod phyogs rgya che ba'i skor rnams 'phags pa thogs med kyi lugs bzhin so sor bzhed pas de ltar na dper na thag pa sdogs pa ste bskyil te bzhag pa la mun pa cung zad babs te cha phyed mi gsal ba'i tshul du mthong ba na sbrul lo snyam pa'i 'jigs pa skye zhing/ de'i tshe thag pa'i gnas lugs mi gsal bar byed pa'i nun pa de ma rig pa dang/ de la brten nas thag pa la sbrul du 'dzin pa'i blo ni 'jig lta yin no/ de la shes pa kho rang gi ngos nas lung ma bstan yin pa la zhes sogs te/ shes pa ni yul rnams kyi @70b bzang ngan thams cad rnam par shes pas na shes pa po ste rang gi rnam shes so/ /rnam shes kyi ngo bo ni dge sdig gang yang min pa'i lung ma bstan te/ dper na rnam bu dkar po tshos dmar ser sdo gsum sogs gang dang 'grogs kyang mthun pa ltar/ rnam shes kyang dge sdig gang dang 'grogs kyang mthun pa'i lung ma bstan yin pa la rnam shes kyi phung po'i gnas lugs mi gsal bar sgrib par byed pa po ma rig pa dang/ des bdag med pa la bdag tu 'khrul nas bdag dang bdag gi bar 'dzin pa'i blo ni 'jig lta'o/ /de ltar bdag med pa la bdag yod par bzung bas bdag grub pa na gzhan grub la/ de grub pas phyi nang gi yul zag bcas kyi dngos po sdug pa yid du 'ong ba la don gnyer gyi 'dun pa'am 'dod chags skye/ nga dang nga yi ba la gnod pa'i gang zag dang/ sdug bsngal dang/ mtshon cha dang/ tsher ma sogs sdug bsngal gyi gnas la dmigs nas zhe sdang skye; de nas 'jig lta la brten te phyi nang gi bzang ngan la dmigs nas kho las nga lhag snyam pa lta bu'i sems mtho ba'i rnam pa can gyi nga rgyal dang/ lta log rnams zhes pa ni/ mthar lta dang/ lta ba mchog 'dzin dang/ tshul khrims dang brtul zhugs mchog 'dzin gsum mo/ de'i mthar 'dzin pa'i lta ba ni 'jig ltas bzung ba'i bdag la dmigs nas rtag pa ther zug tu 'dzin pa'i rtag lta'am/ yang na skye ba snga phyi sogs med pa'i chang @71a @#/ /lta gang rung 'dzin pa'i shes rab nyon mongs can no/ /lta ba mchog 'dzin ni/ 'jig lta/ mthar lta/ log lta gsum gang rung ngam/ de gsum gang las 'byung ba'i phung po la dmigs nas mchog tu 'dzin pa'i shes rab nyon mongs can no/ /tshul khrims dang brtul zhugs mchog 'dzin ni/ mu stegs byed rnams kyi tshul khrims dag rnam grol gyi rgyar bltas te tshul khrims ngan pa de la mchog yin no snyam du bdzin pa dang/ brtul zhugs ni cha byed snga ma de brtul ba ste bsdus nas phyi ma la zhugs pa ste/ sngon mu stegs 'gas ting nge 'dzin bsgoms te tshe snga ma tsam dran pa'i mngon shes thob pa na tshe snga ma khyi'i lus blangs pa shes te/ mi lus 'di tshe snga ma'i snga mar las bzang po bsags pa'i mthus 'phangs pa ma shes bar/ 'di'i snga ma'i khyi lus kyis 'phangs par bzung nas spyod lam phal cher khyi dang mthun par spyod pa de spyod pa'i mchog tu 'dzin pa lta bu'i shes rab nyon mongs can te de rnams kyang bdag la dmigs te skye la/ gong gi nyon mongs de rnams la brten nas de'am bdag rang bzhin gyis grub pa cung zad kyang med do/ / zhes ston pa'i ston pa sangs rgyas la yang dag pa ma yin no snyam du 'dzin pa dang/ sangs rgyas kyis bstan pa'i tshe snga phyi dang las 'bras sogs med par 'dzin pa'i skur 'debs ni shin tu tha chad do/ /bden bzhi @71b dang rgyu 'bras sogs dbang phyug dang/ khyab 'jug la sogs pas byas par 'dzin pa ni sgro 'dogs kyi skur 'debs te snga ma la ltos pa'i cung drag pa ste log lta'o/ /ston pa dang las 'bras dang/ bden bzhi sogs yod dam med/ yin nam yin snyam pa'i nem nur byed pa ni the tshom mo/ /de ltar 'dod chags/ khong khro/ nga rgyal/ ma rig pa/ the tshom/ 'jig tshogs la lta ba/ mthar lta/ lta ba mchog 'dzin/ tshul khrims brtul bzhugs mchog 'dzin/ log lta ste de rnams la rtsa nyon bcu zhes nyon mongs thams cad kyi rtsa ba byed cing de las nye nyon nyi shu dang/ de las kyang nyon mongs brgyad khri bzhi stong 'gyur zhing des las gsog go/ las la yang sems pa'i las dang/ bsam pa'i las dang/ dge ba dang/ lung mi bstan gyi las so/ /dge ba'i las la yang zag bcas dang zag med dang/ zag bcas la yang 'phags pa'i rgyud la yod pa dang/ so skye'i rgyud la yod pa dang/ gzhan yang bsod nams ma yin pa'i las dang/ bsod nams kyi las dang/ mi g.yo ba'i las sogs du ma yod do/ /de la bsod nams ma yin pa'i las ni/ mi dge bcu la sogs pa'i las dang/ bsod nams kyi las ni 'dod khams kyis sa bsdus pa'i dge ba'i las dang/ mi g.yo ba'i las ni gzugs dang gzugs med khams kyi sas bsdus pa'i bsam gzugs brgyad kyi nyer sdogs kyi ting nge @72a @#/ /'dzin gyi las so/ /mi g.yo ba'i las zhes pa ni/ 'dod khams pa rnams kyi las ni dper na 'dod lhar myong ba'i las bsags pa 'ga' zhig gi 'bras bu mi dang dud 'gro sogs kyi rten la myong ba ni g.yo ba dang/ khams gong ma gnyis kyi las ni smon lam sogs kyis g.yo mi nus pas mi g.yo ba'i las so/ /las gsog pa'i tshul la/ 'phags pa rnams kyis dge ba'i las gsag cing bskyed pa dang/ rgyun zhugs dang phyir 'ong gis mi dge ba'i las gsog pa yod kyang/ 'khor bar 'phen byed kyi las ni 'phags pas gsog pa mi srid par gsungs pas bdag 'dzin ma bzlog gi bar du 'khor bar 'phen pa'i las gsog la/ bdag med mngon sum du rtogs pas 'khor bar 'phen pa'i las gsar du mi gsog pas rgyun zhugs dang phyir 'ong gis kyang bdag 'dzin dang du mi lan par mi stobs ldan gyis stobs chung brdung ba bzhin spong bar gsungs pas/ theg chen gyi sbyor lam chos mchog chen po pa man chad so so skye bo rnams kyis 'khor bar 'phen byed kyi las gsog go /des na bdag med mngon sum du ma rtogs kyang 'khor ba'i phun tshogs thams cad la nyes dmigs su bltas te thar pa 'dod pa'i kun nas blangs te dge ba'i las sgrub pa dang/ bdag med pa'i don la tshul bzhin du dpyod pa'i shes rab dang mtshungs ldan gyi dge ba'i las rnams ni @72b kun 'byung rjes mthun par gsungs so/ /de lta bu'i nyon mongs pas 'khor bar 'phen byed kyi las bsags pas 'khor bar mi 'dod bzhin du sdug bsngal sna tshogs myong dgos pa 'di byung 'dug /de ltar sdug bsngal bden pa bsam pas yid 'byung ba na 'gog bden la thob 'dod skom pa chu 'dod pa lta bu dang/ des lam bden bslab pa gsum la slob 'dod kyang 'byung ste sdug bsngal 'di lta bu mi 'dod bzhin du myong ba ni las la thug /las de nyon mongs kyis bsags shing nyon mongs rnams ni gong gi rtsa nyon bcu las byung la/ rtsa nyon bcu po bsdu na/ 'jig lta/ mthar lta/ lta ba mchog 'dzin/ tshul khrims dang brtul zhugs mchog 'dzin/ log lta ste lta ba lnga phyogs gcig tu bsdoms pa dang/ lhag ma lta min lnga so sor bgrangs pa'i rtsa nyon drug tu 'du/ de yang bsdu na dug gsum la 'du ba dang/ de gsum kyang ma rig pa la thug pas sdug bsngal thams cad kyi rtsa ba mthar gtugs na bdag 'dzin ma rig par mthong nas 'di dgra'i gtso bo nyid du nges pa brtan po rnying par bya dgos/ de ltar dgra'i gtso bo bdag 'dzin ma rig pa 'di ni nges par drung nas 'byin dgos kyi des gnod pa byas pa la bzod pa bsgom na bzod pa de yang smad pa'i gnas yin te spyod 'jug las/ bdag gi sems la gnas bzhin du/ /dga' mgur bdag la gnod byed pa/ /de la mi khro bzod pa ni/ /gnas min bzod pa smad pa'i gnas/ / @73a @#/ /gal te lha dang lha min rnams/ /thams cad bdag gi dgrar langs kyang/ /da dag gis kyang mnar med pa'i/ /me nang 'khrid cing 'jug mi nus/ /nyon mongs stobs chen dgra 'dis ni/ /gang dang 'phrad na ri rab kyang/ /thal ba yang ni mi lus pa/ /der bdag skad cig gcig la 'dor/ /zhes gsungs pas 'di 'joms pa la 'bad dgos te de la ma rig pa de bcad na 'khor ba'i sdug bsngal rtsa ba nas spong nus pas sdug bsngal thams cad rtsa ba nas spangs pa'i bla ma sangs rgyas kyi go 'phang thob par bya'o snyam du 'gog bden la thob 'dod dang de'i phyir du rgyu lam bslab pa rin po che gsum la bslab par bya snyam du lam bden la bsten 'dod shugs drag tu bya/ de la bslab pa gsum ni lhag pa tshul khrims/ lhag pa ting nge 'dzin/ lhag pa shes rab kyi bslab pa ste/ lhag pa zhes pa ni mu stegs kyi bslab pa las khyad par 'phags pas na lhag pa dang/ rin po che zhes pa'i skad dong ratna zhes pa ratna rang rigs gtso bo la'o zhes dkon mchog dang/ rin chen dang/ rang rigs kyi gtso bo sogs la 'jug pa las bslab pa 'di rnams byang chub kyi sems kyis kun nas blangs pas na rang rigs kyi bslab pa thams cad kyi gtso bo 'am mchog yin pas rin po che'o/ /de la bslab pa gsum gyi grangs nges la/ spang bya nyon mongs spong ba la ltos pa'i grangs nges ni/ nyon mongs pa sun 'byin pa'i @73b tshul khrims dang/ mngon gyur 'go gnon pas ting nge 'dzin dang/ sa bon drung nas 'byin pas shes rab kyi bslab pa/ sems 'dul ba la ltos pa'i grangs nges ni/ sems rnam par g.yeng ba mi g.yeng bar byed pa'i tshul khrims/ sems mnyam par ma gzhag pa 'jig par byed pa'i ting nge 'dzin/ sems ma grol ba grol bar byed pa'i shes rab kyi bslab pa/ /thob bya 'bras bu la ltos pa'i grangs nges ni/ tshul khrims ma nyams pa'i 'bras bu 'dod khams kyi lha mi thob par byed la nyams pa'i 'bras bu ngan 'gro dang/ khams gong ma gnyis kyi mngon mtho ting nge 'dzin gyi bslab pa'i 'bras bu dang/ nges legs thar pa thob par byed pa ni shes rab kyi bslab pa'i 'bras bu/ go rim nges pa la ltos pa'i grangs nges ni/ snga ma la brten phyi ma skye/ zhes tshul khrims la brten nas ting nge 'dzin dang/ de la brten nas shes rab kyi bslab pa skye/ dman mchog la ltos pa'i grangs nges ni/ sman dang mchog kyang de bzhin no/ /zhes snga ma snga ma dman zhing/ phyi ma phyi ma mchog go/ rags zhing phra ba la ltos pa'i grangs nges ni/ snga ma snga ma rags la phyi ma phyi ma phra ba'o/ /gzhan yang lta ba ni shes rab/ sgom pa ni ting nge 'dzin/ spyod pa ni tshul khrims kyi bslab pa ste/ lta sgom spyod gsum yang de nyid do/ /de lta bu'i bslab pa gsum gyi grangs dang go rim shes par byas te de la slob pa ni gal shin tu @74a @#/ /che ste/ bslab pa gsum la ma bslabs na thar pa thob 'dod smin pa tsam du zad pas 'khor ba las mi thar la/ des nang rang bzhin gyis grub par 'dzin pa 'khor ba'i rtsa ba nga 'don pa la/ de dang 'dzin stang dngos su 'gal ba'i bdag med rtogs pa'i shes rab bskyed dgos/ /shes rab de yang lhang tsam rgyud la skyes pa lta bu'i yun thung ngu zhig gis thog med nas 'dris pa'i bdag 'dzin zlog mi nus pas yun ci 'dod du bdag rang bzhin med pa'i nges shes kyi steng du 'jog nus pa zhig dgos/ de la lhag mthong 'dren nus kyi zhi gnas kyi ting nge 'dzin brtan po sngon du 'gro dgos/ de la sems g.yeng ba rigs pa ma spangs par phra mo spong mi nus pas de'i sngon du tshul khrims kyi bslab pa 'gro dgos so/ /'di nyid 'bring dang mthun mong ba'i lam yin pa'i phyir bslab pa phyi ma gnyis zhi lhag gi skabs su 'byung bas skabs 'dir tshul khrims la slob tshul gsungs la/ tshul khrims ni yon tan thams cad kyi gzhi yin pas na khyad par bsrung na phan yon che zhing zhes sogs tshul khrims kyi bslab pa la dmigs phug pa'i srog gi phyir yang ma btang zhes so; ;yang zhes pa'i yang sgras ni gces pa srog gi phyir yang mi gtong na/ de las gzhan pa'i lus dang longs spyod sogs kyi phyir mi gtong ba lta ci smos zhes so/ /de la tshul phrims bsrungs pa'i pha yon @74b dang ma bsrungs pa'i nyes dmigs bsam pa gal che ste/ la la'i tshul khrims bde ba ste/ /la la'i tshul khrims sdug bsngal yin/ /tshul khrims ldan pa bde ba ste/ /tshul khrims 'chal ba sdug bsngal lo/ /zhes gsungs te zhib par 'dri ma nus/ 'phags pa klu sgrub kyis kyang/ khrims ni rgyu dang mi rgyu'i sa bzhin du/ /yon tan kun gyi gzhi rten lags par gsungs/ /zhes dang/ dpal ldan zla ba grags pas kyang/ so so'i skye bo rnams dang nyan thos dang/ /rang byang chub la bdag nyid des rnams dang/ /rgyal sras rnams kyis nges par legs bstan pa'i/ /mngon mtho'i rgyu ni tshul khrims las gzhan med/ /ces gsungs/ de ltar tshul khrims bsrung ba la nyes ltung 'byung ba'i sgo bzhi yod pas de bzhi bkag na tshul khrims rnam dag 'byung ste/ rtsa ba bzhis ma gos shing yan lag gi ltung bas gos kyang zhag tu mi 'grogs par de 'phral phyir bcos kyis dag par byas pa ni tshul khrims rnam par dag pa yin/ de yang mi shes pa ltung ba 'byung ba'i sgo gcig ste/ de'i gnyen por dge bsnyen pha ma/ dge tshul pha ma/ dge slong pha ma gang yin pa rang rang gi bslab bya'i sdom tshig tsam ma mthar blo 'dzin byas te shes dgos/ ma gus pa ltung ba 'byung ba'i sgo gcig ste/ ston pa sogs la gus pa med na/ /des gsungs pa'i bslab bya sogs chos dang/ de don nyams su len pa'i grogs dge 'dun rnams kyi ji ltar mdzad pa la mi lta bas/ @75a @#/ /de'i gnyen po ston pa sogs la gus par bya dgos/ tshangs pa mtshungs par spyod pa zhes pa ni/ 'jig rten pa'i tshangs pa'i go 'phang dang/ 'jig rten las 'das pa mi gnas pa'i mya ngan las 'das pa'i go 'phang la tshangs par yang gsungs pas 'di phyi ma ste mi gnas pa'i myang 'das kyi tshangs pa thob pa'i rgyu la slob pa'i spyod pa la bya'o/ /bag med pa ltung ba 'byung ba'i sgo gcig ste/ de'i gnyen por blang dor gyi gnas rnams ma brjed pa'i dran pa dang/ sgo gsum legs nyes gang la spyod lta ba'i shes bzhin dang/ rang rgyu mtshan du byas te nyes spyod la 'dzem pa'i ngo tsha dang/ gzhan gyis smad du 'ong snyam du nyes pa la 'dzem pa'i khrel yod bskyed nas bag dang ldan par bya/ bag yod ces pa ni tshig nyung yang don shin tu rgya che ba ste bag yod dang bral na nyes ltung du ma la spyod cing dge ba'i chos la mi 'jug pa'i gzhi chen po yin/ de yang chang ni bag med pa la 'jug pa'i sgo chen po yin pa'i phyir ston pas srog gi phyir yang gnang ba med pas de spong ba bag yod pa'i rtsa ba yin te/ sngon rkun po 'gas bag dang ldan pas khyim zhig la 'bubs rgyab ste nang du sleb pa na chang gi rdza ma rnyed nas skom pa'i dbang gis kha nas bcus te 'thungs pas chang nus pa shin tu che bas gzi ste bag yod las nyams nas/ chad kha nas btsags pa 'di 'dra na/ /zhabs nas btsags na ji ltar 'gyur/ /zhes glu blangs pas bdag @75b pos shes te zin skad/ mdor na 'phags pa ka tye na rgyal po gtum mo rab snang gi mchod gnas su byon pa dang/ g.yang sa chen po'i lam du 'gro ba ltar bya ste 'dir mang du dogs pas ma bris so/ /nyon mongs mang ba ltung ba 'byung ba'i sgo gcig ste/ de la rang rgyud la nyon mongs shas gang che brtags te gang che ba de'i gnyen po 'bad nas bstan dgos pas nyon mongs mang ba ni shas che ba yin la/ nyon mongs skye ba la rgyu drug ste/ rten dang dmigs pa 'du 'dzi bshad pa dang/ /goms pa yid byed nyon mongs skye rgyu drug /ces nyon mongs skye ba'i rten ni nyon mongs pa'i sa bon nam bag la nyal dang/ dmigs pa na 'dod chags sogs skye ba'i yul la dmigs pa/ 'du 'dzi ni grogs ngan pa dang nyon mongs 'phel ba'i gtam sna tshogs byed pa/ bshad pa ni rgyal sbrung la sogs pa'i chos log nyen pa/ goms pa ni sngon nyon mongs dang goms 'dris kyi stobs bskyed pa/ yid byed ni nyon mongs skyes pa na de mi 'gog par tshul bzhin ma yin pa yid la byed pas gsos 'debs pa'o/ /de ltar nyon mongs skye ba'i rgyu rnams ngos zin par byas te nam skye ba na de ma thag 'bad pas spyod dgos te/ nyon mongs goms na gnyen pos bzlog dka' bas; ;dran shes skyes bus gnyen po'i mtshon bzungs te/ /chags sogs nyon mongs dang po skyes ma thag /'bur 'joms byed pa rgyal sras lag len yin/ /zhes gsungs pa ltar nyon mongs chung du skyes ma thag 'bur @76a @#/ /'joms su ma btang na shin tu bzlog dka'/ de la 'dod chags kyi gnyen po ni mi rtag pa bsgrom pa dang phyi dang nang gi yul la dmigs te keng rus rgyus pas sgrel ba la 'jim pas zhal zhal byas pa'am yang na rnam par sngos pa dang/ rnam par rul ba dang/ rnam par 'bus zhig pa sogs mi sdug pa bsgom/ zhe sdang ni 'di phyi gnyis kar sdug bsngal zhing dge rtsa 'jom pas rnam pa thams cad du skabs mi dbye ste/ 'di ma byung na tshe 'dir yang shin tu bde bas de'i gnyen por yid 'ong gi byams pa bsgom/ gti mug gi gnyen por rten 'brel bcu gnyis bsgoms te 'khor ba'i 'jug ldog la mkhas par byas te snang ba stong ba dang/ stong ba rten 'brel du shar te snang bas las 'bras la rmongs pa dang/ stong pas de kho na nyid la rmongs pa'i ma rig pa 'jom par bya/ nga rgyal gyi gnyen por skyes bu sa min chu ma yin/ zhes sogs khams kyi rab dbye bsgoms te sa chu sogs thams cad la nga gang du'ang med pas nga rgyal byed pa'i dmigs yul med par bsam/ rnam rtog shas che na dbugs 'gro 'ong la dmigs pas rlung ni sems kyi bzhon pa ste/ sems zha bo mig ldan dang/ rlung long ba rkang ldan lta bu yin pas rlung gnas pas sems gnas/ de bzhin du nyon mongs gang dang gang skyes kyang de dang de ngo shes par byas te byung ma thag spong/ gal te da dung ma bzlog na maNDa la @76b phul te gsol ba 'debs pa dang/ ldang ba dang sdong pa la sogs pa lus kyi spyod lam sbyar ba dang/ tha na ske gcu gcu byas pas kyang bzlog par gsungs shing/ yang dug gsum rlung 'bung bya ba nyon mongs gang skyes kyang sna bug nas rlung drag tu bus te nyon mongs thams cad sna nas thon par bsam pa yang bya la/ mdor na byang chub lam gyi rim pa 'di nyid dug gsum gyi gnyen por gsungs te/ 'dod chags kyi gnyen por skyes bu chung 'bring gi lam bsgom pa dang/ zhe sdang gi gnyen por chen po'i byang chub kyi sems bsgom pa dang/ gti mug gi gnyen por lhag mthong bsgom pa'o/ /gzhan yang gnyid rmugs dang rgod pa dang/ le lo dang bag med dang/ ngo tsha dang khrel med pa dang/ shes bzhin ma yin pa sogs nye ba'i nyon mongs pa rnams kyang dge ba la bar du gcod pas de'i gnyen po bsten nas 'phral 'phral du mthu je chung du gtong ba la goms par bya yi/ 'di tsam la 'gal yang skyon chung ngo bsam nas bcas pa rnams la bag yangs su 'jug pa ni sdug bsngal 'ba' zhig thob pas tha na'ang nyon mongs pa'i kha mi skyor phyogs mi 'dzin par dgra'i gtso bor bltas/ gnyen po'i phyogs bzung nas nyon mongs sun 'byin pa la 'bad pa zhig med du mi rung ba yin/ de ltar 'bad na shar bas/ spyir legs nyes ci byung yang chos la brten pa de'i nang nas kyang 'dul ba nas ji ltar 'byung ba la brten na sdom pa bskyar du lngab kyang mi dgos pa/ @77a @#/ /zhe gtsang ba/ brtag thub pa/ nyams dga' ba/ mtha' bzang ba yin gsung ba de lta bu 'byung bas rtsa ba bzhis ma gos shing yan lag gi ltung bas gos kyang zhag tu mi 'grogs par 'phral 'phral du bshags bsdams la rang gis brtags na gzhan gyis/ 'phral du bde bas/ phugs su legs pas/ 'bad par bya ba ni tshul khrims rnam par dag pa yin pas de ltar byed nus par gsol ba 'debs pa sogs sngar bzhin bya'o/ /gsum pa mjug tu ji ltar bya ba ni sngar bzhin yin la/ gnyis pa thun mtshams su yang so sor thar pa'i dbang du byas pa'i dge tshul slong sogs kyi bslab bya la blta ba sogs sngar bzhin no/ /zhes gsungs/ !gsum pa skyes bu chen po'i lam la blo sbyong ba ni/ byang chub lam gyi rim pa'i snying po i thi ba ni byang chub kyi sems nyid yin te/ skyes bu chung 'bring gi lam sngon 'gro dang/ byang chub kyi sems dngos gzhi/ spyod pa la slob pa ni de'i bslab bya'o/ /de yang skyes bu 'bring gi skabs su 'khor ba'i nyes dmigs sgo sna tshogs nas yun ring bsam pas/ 'khor ba'i gnas ni me 'bar ba'i rlubs ltar mthong ste de las nges par yid 'byung ba'i bsam pa drag pos bslab pa rin po che gsum la bslabs pas thar pa thob cing/ de yang mngon mtho'i dpal 'byor ltar slar sdug bsngal du 'gyur ba ma yin kyang/ spang rtogs mthar ma phyin pa'i skyon zad pa dang yon tan rdzogs pa phyogs re @77b bar song ste mi shes par dka' ba'i rgyu bzhi sogs rang don mthar ma phyin zhing 'gro ba gzhan gyi don yang nyi tshe ba tsam las mi 'grub pa dang/ mthar sangs rgyas kyis bskul te theg pa chen po la 'jug dgos la/ theg dman la thob byar byas na rang nyid la sdug bsngal med pa'i dbang gis sems can gzhan la snying rje skye dka' zhing thog ma med pa nas drin gyis bskyangs pa'i ma rnams yal bar dor nas rang nyid nyer zhi'i dbyings la gnas na rang nyid khrel med ma rabs kyi spyod par 'gro ba ni/ dper na tshe 'di'i pha ma btson ra'am me 'obs su lhung ba la ji mi snyam par rang nyid khrus kyi rdzing bur dga' dga' ltar gnas na mi rnams kyis khrel med tha shal du brtsi ba bzhin dam pa rnams thugs khrel bar 'gyur bas na theg pa chen por 'jug dgos la/ 'jug pa'i dus kyang dang po nyid nas theg chen la 'jug rigs so/ /theg pa chen pa la 'jug pa la ni nyon mongs pa'i sa bon rtsa ba nas spangs pa yang ma yin la/ nyon mongs pa'i kha 'dzin dang rgyab skyor yang mi bya bar 'go bsnan pa tsam byas na rang nyid srid mtshor lhung bas sdug bsngal ba ltar mar gyur pa'i 'gro ba rnams kyang de dang mtshungs par shes te byams pa dang snying rje skye sla zhing snying rje ni theg chen gyi lam gyi rtsa ba yin pas dang por sems de bskyed pa la gal che ba dang/ bar du sems can grangs mang la spyod pa ngan pa dang/ bslab bya rgya che la bya dka' bas snying rje yang yang dran par @78a @#/ /ma byas na dman par ldog pa dang/ mtha' mar sangs rgyas thob nas nyan rang ltar mi gnas par 'gro ba'i don mdzad pa'ang snying rje la rag las so/ /des na 'di la gnyis/ byang chub tu sems bskyed tshul dang/ sems bskyed nas spyod pa la slob tshul lo/ /dang po la gnyis/ byang chub tu sems bskyed pa dngos dang/ sems bskyed tshogs bzung ba'i tshul lo/ /dang po ni/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o zhes gsungs pa ltar dper na 'jig rten kyi zhing sa dang chu lung ni 'bras dang gro sran sogs kyi sa bon gang dang tshogs kyang de'i myu gu'i rgyu byed pa mthun mongs ba dang/ nas kyi sa bon ni nas kyi myu gu kho na'i rgyu byed pa las gro sran la sogs pa'i myu gu mi 'byung bas mthun mong min pa'i rgyu yin pa ltar/ byang chub kyi sems kyang sangs rgyas kho na'i thun mong min pa'i rgyu yin pas theg chen gyi sgor chud mi chud ni sems 'di kho na yod med kyis byed dgos pas byang chub kyi sems med na stong nyid rtogs pa'i shes rab la sogs pa'i yon tan ci yod kyang theg chen bar mi chud/ de la byang chub kyi sems lhag bsam las byung ba dang/ de snying rje las byung ba dang/ de yid 'ong gi byams pa las byung ba la lugs gnyis ka mi mthun pa med la/ yid 'ong gi byams pa de thabs gang las bskyed pa la bzhed srol gnyis yod de sher phyin gyi @78b mdo sde rin po che'i rjes su 'brangs nas slob dpon chen po zla ba grags pa sogs yid 'ong gi byams pa de drin bzo las byung/ de drin dran pa las byung/ de mar shes pa las byung bas rgyu 'bras bdun gyi sgo nas sems bskyed/ mdo phal po che'i rjes su 'brangs nas rgyal sras zhi ba lha la sogs pa rnams bdag gces 'dzin gyi skyon dang/ gzhan gces 'dzin gyi yon tan shes pa'i sgo nas sems can thams cad gces shing phangs pa'i rnam par bltas te yid 'ong gi byams pa sgrub pas na bdag gzhan mnyam pa rje'i sgo nas sems bskyed par mdzad do/ /des na 'di la gnyis las dang po rgyu 'bras man ngag bdun gyi sgo nas byang chub tu sems bskyed tshul ni/ 'di la rgyu 'bras kyi 'jog tshul mi 'dra ba mang du snang yang/ rgyu kho na yin pa mar shes dang/ 'bras bu kho na yin pa sangs rgyas dang/ rgyu 'bras gnyis ka yin pa drug ste khyon rgyu 'bras brgyad yod par lugs 'di'i bzhed srol yin pas 'di la gnyis/ mthun gyi ngo bo la ji ltar bya ba dang/ thun mtshams su ji ltar bya ba'i tshul lo/ /dang po la sbyor dngos mjug gsum las/ dang po sbyor ba ni/ phur btsugs gsol 'debs kyi bar sngar bzhin la; bdud rtsi 'bebs sbyangs kyi tshig don ni go sla'o/ /gnyis pa dngos gzhi ni/ thog mar sems can thams cad la btang snyoms sgom pa sngon du 'gro dgos te/ de med na byams pa dang snying rje phyogs rigs can du 'gyur @79a @#/ /bas dgra gnyen la chags sdang gi blo dgag dgos pas spyi bor bla ma lha bsgom bzhin pa'i ngang nas/ phan gnod gang yang ma byas shing rang gi ngo shes pa'i mi lta bu'i sems can gcig mdun du gsal bar dmigs nas btang snyom sgom na skye sla/ de la btang snyoms kyi blo ji tsam yod pa de dper byas nas dgra gnyen la chags sdang dgag par bya ste tshig don rnams ni rtsa bar shin tu gsal bas 'chad dgos pa cher mi snang/ bar ma'i sems can ni rang gi mdun drang por kha rang la phyogs par bsgom pa dang/ de'i g.yas kyi cung zad rgyab ngos su yid du 'ong ba dang/ g.yon gyi rgyab ngos su yid du mi 'ong ba bsgom/ yul zag bcas la yid 'ong du mthong ba ni 'dod chags yin pas de 'gog pa'i tshe sngar yang yid du 'ong ba la sred pas ka zhes pa ni tshig nus pa can yin pas skyes bu 'bring gi skabs su 'khor bar 'phen byed kyi las la sred len gyis gsos btab pas 'khor bar 'khyams tshul la nges shes 'drongs na 'dir go phul che bas sled pa des ka 'khor ba'i sdug bsngal mi zad pa myong bar bsam nas sred pa bkag/ yid du mi 'ong ba la gnod pa byed snyam pa med kyang phan mi 'dogs snyam pa yod na ma snyoms pa yin pas de bkag nas mnyam gzhag gi skabs su bar ma'i sems can la 'char ba lta bu'i blo skyes pa ni yid 'gyur gyi myong ba thon pa yin/ de nas @79b yid du 'ong ba'i sems can gyi mdun du ma lta bu'i ches yid du 'ong ba'i gnyen bshes dang/ yid du mi 'ong ba'i sems can de'i mdun du dgra lta bu'i ches yid du mi 'ong ba gsal btab ste bsgom/ de'i tshe pha sha za zhing ma la 'tshog; chung ma khyo yi rus pa 'cha'/ /zhes sogs sngar bshad pa'i dgra gnyen la nges pa med tshul bsam nas gnyen la dmigs nas gang la ni chags par bya/ dgra la dmigs nas gang la ni sdang bar bya zhes sogs bya ste bar ma'i sems can la bsgom pa'i tshe rang nyid smyon pa'i spyod pa lta bu'i phan gnod sna tshogs byed mi rigs par bsam pa dang/ yid du 'ong mi 'ong la bsam pa'i tshe chags sdang gi nyes dmigs dran pa dang/ dgra gnyen gnyis la bsam pa'i tshe nges pa med pa'i tshul bsam nas bsgom/ de nas gnyen gyi mthar yid 'ong gi phyogs dang/ dgra'i mthar yid du mi 'ong ba'i phyogs dang/ bar ma'i mthar phan gnod ma byas pa'i sems can te rigs gsum du bsdus te sems can thams cad la btang snyoms bsgrub par bya'o/ /de nas mar shes nas byang chub kyi sems kyi bar sgom tshul ni/ sdug bsngal dang bral 'dod tsam zhig sems can de'i sdug bsngal yang yang bsam na skye yang blo de skye sla ba dang shugs drag la brtan pa zhig 'ong ba la sems can de yid du 'ong la/ gces shing phangs pa'i blo zhig dgos te ji tsam yid du 'ong zhing gces pa de tsam du de la sdug bsngal byung ba mi @80a @#/ /bzod pa che bas sems can thams cad gnyen du bsgom pa ni yid 'ong skye ba'i ched yin la/ gnyen gyi mthar thug pa ni ma yin pas thog mar mar shes dang/ de nas drin dran pa dang/ drin lan bzo ba bsgom dgos shing/ de gsum ni yid 'ong sgrub pa'i rgyu dang sems can rnams bu gcig pu ltar snying tu sdug par 'dzin pa'i byams pa ni de gsum gyi 'bras bur rang shugs kyis 'ong bas bde ba dang ldan 'dod kyi byams pa dang snying rje la rgyu 'bras kyi nges pa mi snang yang/ yid 'ong gi byams pa dang snying rje la rgyu 'bras kyi nges pa yod do/ /des na sems can thams cad mar shes pa la nges shes 'dren pa na shin tu gal che bas sems can thams cad bdag gi gnyen yin pa'i rgyu mtshan ji ltar yin zhe na/ zhes pa ni btang snyoms kyi skabs su rang gi ngos nas ni sems can thams cad gnyen yin pas zhes pa'i tshig de blangs nas dri ba lta bu dang/ 'khor ba la thog ma med pas zhes sogs ni lan lta bu yin pas ston pas kyang sngon yun ring po 'das pa nas gang du khyod ma skyes pa dang ma song ba dang ma shi ba'i sa phyogs de ni ngas mthong ba dka'o/ /yun ring por 'das pa na sems can gang khyod kyi pha'am ma'am phu nu'am srid mo'am slob dpon nam mkhan po'am bla ma'am bla ma'i gnas lta bur ma gyur pa de ni ngas mthong bar dka'o zhes gsungs shing/ yul phyogs @80b dang sa phyogs 'dir ma skyes bya ba gcig kyang med ces pa yul dang sa yod pa'am thad kyi bar snang stongs nga 'di'i char ma skyes pa med ces pa'i don yin te/ de ltar min na bskal ba gcig la skye ba mi rdzogs pa'i phyir ro/ sems can la grangs med pas sems can thams cad mar shes pa la nges shes gting nas rnyed pa na drin dran pa sogs skye sla yang 'di shin tu dka' bas re zhig sangs rgyas kyi gsung la tshad mar bzung bar bya zhing/ zhing khyad par can la gsol 'debs shugs drag la ring par byas na slar nges pa rnyed par 'gyur ro/ /phan tshun ngo mi shes pa dang tshe snga ma'i ma yin kyang 'das zin pas ma ma yin no snyam pa ni dogs gzhi chung la rtsa bar dogs gcod gsal bas 'dir 'chad mi dgos gsungs/ des na drin bsam pa ni rang nyid tshe 'di'i ma dang chung du nas bral bas byad dbyibs sogs mi dran na rang nyid chung du nas gso skyong byed pa'i a che lta bu'i drin che ba de la dmigs zhing/ de yang na tshod gzhon pa'i rnam pa mi bya bar rgan mo'i rnam pa can nad kyis gdung pas nyam thag pa'i tshul du bsgom na skye sla bar gsungs/ de la thog mar drin che ba ni/ rang nyid mngal nang du yod pa'i snang ba dang bcas te bar do'i gnas skabs su mgon skyabs gang yang med pa de mngal du brtse bas bskyangs te bza' btung dang tsha grang sogs spyod lam mtha' dag bdag la gnod du dogs nas ci nus bsgrubs @81a @#/ /te bskyangs/ bar du drin che ba ni rang nyid ma'i phang du yod pa'i rnam par bsam ste btsas pa'i tshe 'jam pa'i stan la bzhag pa sogs byas te sdug bsngal dang bral 'dod kyi blos brtse ba'i 'dzum gyis bsus bde ba dang ldan 'dod kyi blos dga' ba'i mig gis bltas/ tha mar drin che ba ni gos dang bza' btung sogs la rang longs spyod mi nus pa rnams dang/ yo byad rnams 'bad med du rnyed pa ma yin par sdig sdug gtam ngan rang srog dang bsdos te sha thad thad du btsal nas byin/ za lugs gyon lugs 'gro lugs dang yon tan rang gis shes pa rnams slob cing mi shes pa rnams gzhan la 'tshol ba sogs drin shin tu che bar bsam/ de nas pha la sogs pa'i gnyen gzhan rnams dang sems can thams cad kyi par tshe 'di'i mas drin gyis bskyangs pa la rjes su dpags te bsgom par bya/ de ltar drin dran nas drin bzo bsgom tshul ni; zhes pa mtshams sbyor gyi tshig dang/ drin bzo zhes pa ni drin lan 'jal 'dod kyi blo bskyed pa ste slob springs las/ nye du 'khor ba'i rgya mtsho'i nang du tshud gyur pa/ /klong gi nang du lhung ba lta bur snang bzhin du/ /skye shi 'phos pas ngo ma shes pa de bor nas/ /gal te gcig thar byed na de las khrel bor med/ /ces gsungs pa ltar/ dper na nang tshang mang po yod pa la gzhan thams cad nad kyis zin cing rang nyid nad dang bral ba @81b na de rnams kyi nad g.yog rang la babs pa yin kyang yal bar dor na shin tu mi rigs shing tha chad pa yin pa ltar/ thog ma med pa nas drin gyis bskyangs pa'i ma rnams nyon mongs pa'i gdon drag pos zin nas rang gzhan kun la 'phral phugs su gang gnod tshab che ba de sgrub pa ni smyo ba cis pa yin/ mngon mtho ni mngon par zhes pa nye bsgyur nyi shu'i nang mtshan a b+hi zhes pa mngon par la 'jug pas ngan 'gro las mngon par mtho ba lha mi dang nges legs ni thar pa'i go 'phang ngo/ /yang mngon mtho gzugs sgu dang nges legs chos skur bzhag pa'ang yod de longs spyod dang lus phun sum tshogs pa dang/ zhes sogs ltar longs spyod phun sum tshogs pa/ theg chen gyi chos 'ba' zhig gsung ba sogs so/ /des na las 'bras la rmongs pas ni mngon mtho'i lam lta ba'i mig g.yas pa dang bral la/ de kho na nyid la rmongs pas nges legs kyi mig g.yon pa dang bral ba'o/ /de bzhin du gzugs sku sgrub byed rgya che ba'i lam la lta ba'i mig g.yas pa dang/ chos sku sgrub byed zab mo'i lam blta ba'i mig g.yon pa dang bral ba ste mdor na byang chub lam gyi rim pa la blta ba'i mig med pa'o/ / dge ba'i bshes gnyen gyi long 'khrid ni med ces pa ni sems mdza' ba'i bshes dang lus nye ba'i gnyen zhes bya ste dge ba'i las shig sgrub phyin chang bla ma mdza' bshes yin la bla ma dang yongs 'dzin don gcig @82a @#/ /yin pas rang gi sems nang gi yongs 'dzin dang/ gang zag gzhan la brten pa phyi'i yongs 'dzin yin kyang las dang po pas phyi'i yongs 'dzin la brten dgos shing/ skyes bu chung ngu'i skabs su ngan 'gror ltung ba las 'dzin pas mngon mtho la 'god la/ 'bring gi skabs su 'khor bar ltung ba las bzung nas thar pa la 'god pa dang/ chen po'i skabs su srid zhi gnyis ka las bzung nas thams cad mkhyen pa la 'god pa la de lta bu'i long 'khrid ni med ces so/ /nyes spyod kyis dbyen spyos pa ni ded pa dang/ rdeg 'chos pa ni brdab pa'am 'gyel ba dang/ g.yang kha 'grims pa ni g.yang khar 'gro ba ste mgon skyabs med pa de lta bu yal bar 'dor na bdag nyid khrel shin tu chung bas na/ 'khor bar sdug bsngal dpag tu med pa yod kyang sngar gyi drin bsam pa dang snying rje'i dbang gis drin lan du phan pa'i mthar thug 'khor ba las bsgral nas thar pa la dgod par bya'o snyam pa sogs bya'o/ /de nas byams pa bsgom mtshul ni/ ma lta bu'i yid du gcags pa la dmigs nas/ /zag bcas dang zag med kyi bde bas 'phongs lugs rnams bsam nas 'di la zag med kyi bde ba ga la yod ces sogs bsam te de lta bde bar rlom pa 'di ni 'gyur ba'i sdug bsngal yin/ bde ba 'dod nas lus kyis 'bad 'bad dang sems kyis dung dung ji tsam byas kyang phyi mar ngan song gi sdug bsngal @82b myong ba'i rgyu byed par bsam ste zag bcas dang zag med kyi bde ba sna tshogs yid la byas te de dang ldan na ci ma rung snyam pa byams pa'i 'dun pa tshad med sogs sbyor ba'i skabs bzhin yin no/ /'di'i phan yon ni ting nge 'dzin rgyal po las/ bye ba khrag khrig bkrigs pa'i zhing dag na/ /mchod pa rnam mang dpag med ji snyed pa/ /skyes mchog rnams la de yis rtag mchod pas/ /byams pa'i sems kyi grangs dang char mi phong// ces dang/ rin chen phreng ba las/ rdzi'u tshos sum brgya'i kha zas dag /nyin re dus gsum byin pas kyang/ /byams pa yud tsam thang gcig gi/ /bsod nams dag la char mi phod/ /ces sogs gsungs te/ rdzi'u tshos zhes pa ni mi mang por ston mo bshams pa na snod chung chung zhig tu zas logs su bzo ba ni kha zas gzhan ma las bzang ba byed pa'i don yin cing de 'dra grangs sum brgya tsam du g.yos te nyin re bzhin dus gsum du sbyin par btang ba las byams pa yud tsam thang cig bsgom pa phan yon che ba dang/ gzhan yang lha dang mi rnams rang la byams shing dang gis 'du ba dang srung ba'i mchog tu 'gyur ba sogs mtha' yas so/ /de la myong ba thon nas sems can thams cad kyi bar bsgom par bya ste shes sla'o/ /de nas snying rje bsgom tshul la go rim ni sdug bsngal che rim nas bsam pa dang/ nye rim nas bsam pa sogs mi 'dra ba yod kyang/ 'di ni @83a @#/ /las dang po bar mig mthong lag zin gyi sdug bsngal la bsam na skye sla bas/ mdun du rang gi ma lug tu tshe 'phos pa'i 'du shes kyis yan lag rnams ni bcings/ zhes sogs bsam mo// de nas dge 'dun gyi skor la bag med du spyod pa sogs sdug bsngal mi zad pa'i rgyu sgrub pa rnams ni lhag par snying rje ba'i yul yin te/ spyir dge 'dun na yul shin tu gnyan pa dang de'i nang nas kyang zhal du 'du ba'i dkor ni lhag par lci'o/ /tshul 'chal ni so thar rigs brgyad/ byang sems kyi rtsa ltung bco brgyad/ gsang sngags kyi rtsa ltung bcu bzhi rnams las nyams pa ni phyi ma phyi ma lhag par lci ba yin na'ang/ deng sang ni rjes paN gyis/ des na so sor thar pa ni/ /nyams yang gzugs brnyan tsam zhig snang/ /rdo rje theg pa'i bstan pa la/ /gzugs brnyan tsam yang mi snang ngo/ /zhes gsungs pa ltar so thar gyi rtsa ltung byung ba la gnas nas dbyung ba sogs kyi legs nyes 'byed pa bstan pa'i gzugs brnyan tsam snang la/ byang sems dang sngags sdom la ni rtsa ltung ji snyed byung ba dang/ de dag re re'ang so thar gyi rtsa bzhi'i ltung ba byung ba las ches lci yang/ 'dzem med du spyod cing de dag la chad pas gcod pa sogs kyang mi snang ba 'di'o/ /dam pa'i chos spangs pa ni 'dzam bu gling gi mchod rten thams cad bshig pa las kyang nyes pa lci bar gsungs @83b shing; log lta skad cig ma gcig skyes tsam nas sngon bsags kyi dge rtsa thams cad 'joms pa dang/ sems can la 'tshe zhing zhes sogs kyi skyen skyen po zhes pa ni bya ba de byas pa la pho rgod rgod du byas te ngom ngom byed pa'o; ;de rnams bde ba yod du re nas bya ba ngan pa de rnams spyod pas tshe 'dir bde ba zhig 'ong 'thad kyang bde ba ni mi 'dug snyam pa ste/ des na rtsa bar bya spyod 'di 'dra nA nga hes 'ang gi sgra 'ong rigs kyang yi ge nyams pa 'dra bar gong ma 'ga' bzhed do/ /shi ma thag tu ni ngan song du skye ba la theg tshom med ces pa ni/ nges par skye ba dang shi ma thag ces pa'i nus pas dmyal ba mnar med du skye bar bshad la de ni tshe tshad bar bskal gcig tu bshad pas yun ring la shugs drag pa'i sdugs sngal chen po'o/ /de la myong ba thon pa na ma la sogs pa'i gnyen rnams mdun du gsal bar dmigs nas/ 'di nyid ces pa 'di dag ces par bsgyur te dag mang tshig tu bshad pa ltar byas na legs shing/ 'bad 'bad dung dung ni sngar bzhin la/ dgra gnyen gyi so tshigs zhes pa ni dgra jag 'ong min so byed pa dang/ tshigs ni gnyen gyi don byed pa'o/ /sdug bsngal gnyis ni go sla la des lus sems gdung nas bde ba'i skabs ni cung zad kyang mi 'dug /tshe 'dir yang bya ba ngan pa yin par ngos ma zin par chos 'chad nyan thos bsam sgom gsum sogs tshe 'di don du gnyer nas byas pa thams cad bya ba ngan @84a @#/ /pa yin pas des brel nas dge ba'i blo ma skyes par shi ma thag ngan song du skyes nas zhes pa ni spyi bsdoms su gsungs pas snga ma las cung zad yang bar ston pa yin/ de bzhin du sems can thams cad kyi bar sngar bzhin bsgom pa ni go sla/ snying rje ni byams pa las kyang gal che ba dang gzhan gyis ma shes par skad cig re rer yang bsod nams dpag tu med par gsog pas phan yon yang lhag par che ba yin pas 'bad par bya dgos/ de ltar byams pa dang snying rje la yid 'gyur bas myong ba thon pa na lhag bsam bsgom tshul ni/ sdug bsngal gyis mnar zhing bde bas phongs pa'i sems can sdug bsngal dang bral na snyam pa dang bde ba dang 'phrad na snyam pa tsam gyis mi chog par de'i khur sangs rgyas byang sems gzhan la g.yon bskyur ba ma yin par khur de ring gis blang bar bya'o snyam pa ni khyad par yin pas bsam pa 'di nyan rang rnams la med pas de rnams las snying stobs lhag pas na lhag bsam zer/ sems de 'byung ba ni snying rje la rag las pas bu sdug pa gcig po na ba la ma ji tsam brtse ba de lta bu sems can thams cad la byung na snying rjes 'phul te sdug bsngal sel ba'i khur rang gis len pa la skyo ba med pa zhig 'byung ba ni lhag bsam yin/ sdug bsngal dang bral zhing bde ba la 'god pa'ang gnas skabs 'khor ba'i bde ba ni ma rnams @84b rang gis kyang sngar ji snyed myong yang de dag rtag mi thub pa dang/ zag bcas kyis ni slar yang sdug bsngal du 'gyur bas na/ sgrib gnyis bag chags dang bcas par sangs ba'i yang dag par rdzogs pa'i sangs rgyas kyi go 'phang thob pa zhig bya dgos/ de yang sgrib gnyis bag chags dang bcas pa spangs pa'i zhes pa ni 'khor ba'i sdug bsngal dran nas spang pa phun tshogs la 'god 'dod dang/ yang dag par zhes sogs kyis rnam byang phyogs kyi rgyu 'bras bsam ste rtogs pa phun tshogs la 'god par 'dod pa'o/ /de nas byang chub kyi sems bsgom tshul ni/ spyi bor bla ma lha 'o na khyod la zhes sogs kyis rang la de lta bu'i nus pa yod med dri ba'i tshul du brtags pa na/ lan gyi tshul du da lta ni sems can thams cad lta ci gcig kyang de lta bu'i go 'phang la 'god pa'i nus pa med par ma zad nyan thos dang rang rgyal dgra bcom pa gnyis kyi go 'phang thob kyang sems can gyi don nyi tshe ba ste nyung zad kyi don dang/ de yang thar ba'i bde ba tsam las sangs rgyas kyi go 'phang la 'god pa'i nus pa med/ nus pa su la yod na yang dag par rdzogs pa'i sangs rgyas la yod de sngar skyabs 'gro'i skabs su bshad pa ltar sku'i yon tan mtshan dang dpe byad gsal zhing cha lag rdzogs pa/ gsung gi yon tan 'bad rtsol med par drug cu rtsa bzhi dang ldan pa'i gsung dbyangs legs sbyar gyi skad lta bu gcig @85a @#/ /res kyang rigs drug gi sems can so so'i skad du go bas chos ston par nus pa/ thugs kyi yon tan shes bya ji lta ba stong pa nyid kyi don dang/ ji snyed pa kun rdzob kyi chos thams cad ni lag mthil du skyu ru ra rlon pa bzhag pa ltar phyi nang kun gsal bas sems can thams cad kyi bsam pa dang dbang po dang bag la nyal thams cad mngon sum du gzigs shing sems can thams cad la ma bu gcig pa la brtse ba ltar thugs rje chen po nye ring med par 'jug pas sems can gyi ngos nas las rung du gyur ba yod na sangs rgyas kyis gdul ba'i dus las skad cig ma'i yun tshad kyang mi 'da' bar 'phrin las nyer bdun pa thams cad 'bad rtsol ci yang med par lhun gyis grub cing/ sku gsung thugs kyi + rdzogs pa'i sangs rgyas kho na yin/ sangs rgyas la nus pa yod kyang sems can ma grol bar yod pa ni brag phug kha byang bltas la nyi ma mi 'char ba de nyi ma'i skyon min par brag phug rang gi skyon yin pa ltar gdul bya'i ngos nas bkrir ma rung bas rten 'brel mchugs pa'i phyir/ de ltar sangs rgyas kyi yon tan dran na sangs rgyas la bcos min gyi dad pa bskyed cing/ dad pas 'dun pa'i rten byed par gsungs pas yon tan de lta bu rang la thob 'dod snying khongs nas bskyed la/ gzhan don mthar phyin pa la sangs rgyas thob dgos par ma zad @85b nyan rang gis rang don yang mthar ma phyin pa de'i phyir rang gzhan gnyis ka'i don mthar phyin pa zhig byed na zhes rang don cung zad bsre ba ni theg dman du ldog pa'i nyen chung ba'i gnad yod/ de lta bu'i sangs rgyas kyi go 'phang zhig thob dgos par 'dug pas/ bdag gis ma sems can thams cad kyi don du zhes sogs sems bskyed man ngag 'bras bu lam byed kyi tshul du nyams su len pa gzhung bzhin bya ste tshig don ni go sla'o/ /gsum pa mjug tu ji ltar bya ba dang/ gnyis pa thun mtshams su byams snying rje byang chub kyi sems kyi rnam gzhag ston pa'i gsung rab lta ba sogs ni sngar bzhin no/ /gnyis pa bdag gzhan mnyam brje'i sgo nas byang chub tu sems bskyed tshul ni/ 'dir sbyor ba med par dngos gzhi nas gsungs pa ni blo sbyong gzhir bzhag gi nyams su len pa'i dbang gis yin zhes rje 'bi lung pa chen po gsung bas sbyor ba'i skor rnams blo sbyong ltar byas kyang chog la bde lam ltar byas kyang chog mod/ bde lam ltar byed na mi 'dra ba'i khyad par tshogs zhing gi skabs su gtso bo'i rgyab tu pad zla'i gdan la rje btsun 'jam pa'i dbyangs la zhi ba lha'am blo gros mi zad pa sogs rlabs chen spyod brgyud kyi bla mas bskor ba gsal 'debs shing/ khrus gsol gyi skabs rgya chen spyod brgyud kyi mjug tu/ 'jam pa'i dbyangs dang blo gros mi zad pa/ /e la d+ha ri dpa' bo rdo @86a @#/ /rje dang/ /byang sems rin chen dpal dang gser gling pa/ /rlabs chen spyod brgyud bla mar sku khrus gsol/ /zhes brjod dgos/ /bdag gzhan brje ba 'di ni spyod 'jug las gang zhig bdag dang gzhan rnams ni/ /myur du skyob par 'dod pa des/ /bdag dang gzhan du brje bar bya/ /gsang ba'i dam pa spyod par bya/ /zhes gsungs pa ltar/ 'di nyid shin tu gsung ba'i sgo nas slob ma re gnyis tsam la lkog chos su gnang ba las khyab brdal du ma gnang ba zhi ba lha nas gser gling pa'i bar gong gi khrus gsol du gsol ba bzhin la gser gling pas jo bo rje la gnang zhing jo bos 'brom dang 'brom gyis spyir rgyal sras sku mched gsum dang khyad par bo to pa la gnang/ des bka' gdams kyi bshes gnyen glang ri thang pa dang shar ba la/ des byang sems 'chad kha ba la lkog chos su gnang ba la 'chad kha bas khong rang gi nye gnas gdug pa can zhig la phan par gzigs pa'i rkyen gyis khyab brdal du gnang ba yin/ 'di la dbu ma lugs kyi sems bskyed ces grags shing sa skya pa rnams la'ang snga sor dar rgyas che bar byung zhing rim gyis rgyal sras dngul chu ba chen po la sogs pa nas da lta'i bar du phyag bzhes mnyams bar brgyud pa 'di ni rgyu 'bras bdun las kyang khyad par du 'phags pa'o/ /'di'i sngon 'gro bde lam ltar byed na thub dbang @86b rdo rje 'chang la gsol ba 'debs/ bdag dang ma sems can thams cad kyi + rgyud la zhes sogs lhan thabs ltar byas nas dngos gzhi las bcad kyi dbang du byas na gnyis/ gzhan don don gnyer gyi blo sbyang ba dang/ byang chub don gnyer gyi blo sbyang ba'o/ /dang po la gnyis/ bdag gzhan mnyam pa bsgom tshul dang/ bdag gzhan brje ba bsgom tshul lo/ /dang po la gnyis/ bdag gzhan mnyam pa'i gzhi sgrub pa dang/ bdag gzhan mnyam pa dngos bsgom tshul lo/ /dang po ni/ sngon du sems can thams cad la sems snyoms pa'i btang snyoms dang/ mar shes drin dran drin bzo gsum bsgom pa sngon du btang ste zhes pa nas rang gi mtha' skor du sems can thams cad gsal bar dmigs nas/ zhes pa'i bar ltar chags su btang nas/ sems can thams cad kyi ngos nas bde ba 'dod cing/ zhes pa nas/ sems can thams cad la nye ring chags sdang dang bral ba'i sems snyoms pa'i rtogs pa khyad par can skyes par gyur/ 'o na sems can thams cad bdag gi gnyen yin pa'i rgyu mtshan ji ltar yin zhe na/ zhes pa nas/ da dung yang byed par 'gyur/ des na ma ni ma byas pa'i tshe tshe 'di'i mas ji ltar drin gyis bskyangs pa bzhin du drin gyis bskyangs pas drin shin tu che snyam nga bsam/ 'o na rang gi blo yul du rang gzhan gnyis gang gces par 'dzin zhes sogs bya'o/ /de la sngar rgyu 'bras bdun gyi skabs su gzhan @87a @#/ /sems can thams cad yid du 'ong mi 'ong mnyam pa yin la/ 'dir ni yid du 'ong ba'i sems can gzhan dang rang nyid gnyis gces min mnyam pa yin pas/ drin shin tu che snyam du bsam zhes pa yan chad kyis sems can rnams yid 'ong du sgrub pa yin la/ de nas rang dang yid du 'ong pa'i sems can gnyis gang gces par 'dzin/ gang yal bar 'dor snyam du brtag dgos kyi sngon du gzhan rnams yid 'ong du ma bsgrubs na brtag bya rtag byed med pa'i phyir ro/ /de ltar brtags pa na thog ma med pa nas ha cang 'dris ches pa'i mthus rang gces par 'dzin cing gzhan yal bar 'dor ba'i blo dam dam shugs kyis skye ba ni snga sor dbus nang du shin tu mdza' ba'i za mi pho mo gnyis yod pa'i khyod de nad tshabs chen pos mnar ba la bud med des a jo'i tshab tu nga shin zhes yang yang smra ba la nam zhig chas gog ces pa phyugs kyi chas snod kyi bzo ba zhig bong bu'i mgo la 'khon te nang du zhugs pa na bud med kyi bsam par khyo'i zang bdag yin par bsam ste nad pa ha na yod ces zer skad/ de ltar rang gces 'dzin skyes pa na rang gces par bzung nas gzhan yal bar 'dor mi rigs te rang bde ba 'dod pa bzhin du gzhan yang bde ba 'dod pa dang/ rang sdug bsngal mi 'dod pa bzhin gzhan yang sdug bsngal mi 'dod par mtshungs pa'i phyir ro/ /gnyis @87b pa bdag gzhan mnyam pa dngos bsgom tshul ni/ des na rang gces par 'dzin pa bzhin du gzhan gces par 'dzin dgos te/ gzhan gyis rang gces par bzung na rang dga' ba bzhin du rang gis kyang gzhan gces par bzung na gzhan dga' bar 'gyur zhing/ rgyal ba sras bcas rnams kyang dgyes te tshogs rlabs po che rdzogs pa dang/ ma rnams yid dga' na rang yang dga' bar 'gyur bas so/ /gal te gzhan gyi lus bdag gi lus min pas gzhan gces 'dzin mi skye'o snyam na/ rang gi lus 'di ni pha ma'i khu khrag yin pas gzhan gyi lus kyi cha shas yin kyang sngon goms pa'i stobs kyis rang gi lus yin pa skye ba ltar blo goms na gzhan gyi lus la rang gi lus bzhin du gces 'dzin skye ba pha ri la bltos te tshu ri dang tshul ri la bltos nas pha rir bzhag pa bzhin bltos sa bltos 'jog gis bzhag pa tsam las rang gi ngo bos grub pa med par gsungs/ de bzhin du 'pho ba grong 'jug lta bu yod na rang gi sems ni gzhan gyi lus la 'jug cing/ de'i ring la gzhan zhig gis rang gi lus rnying pa la grong 'jug byas na sngar rang gi lus de phyis gzhan lus dang/ sngar gzhan lus de phyis rang lus su 'jog dgos pa bzhin yin/ yang gzhan la sdug bsngal byung bas bdag la mi gnod pas de sel ba'i phyir mi 'bad de snyam na/ des na rgas pa'i sdug bsngal gyis gzhon pa la mi @88a @#/ /gnod pas rgas pa'i tshe sdug bsngal du dogs nas gzhon pa'i skabs su nor gsog pa sogs don med du 'gyur ba dang/ rkang pa'i sdug bsngal gyis lag pa la mi gnod pas tsher ma zug pa lta bu lag pas mi sel bar yang 'gyur/ des na thog ma med pa nas rang gces 'dzin goms pa'i dbang gis rang gi sdug bsngal mi bzod pa bzhin du gzhan la'ang gces 'dzin goms na de'i sdug bsngal yang mi bzod pa 'byung/ de rnams ni spyod 'jug las/ bdag dang gzhan du mnyam pa ni/ /thog ma nyid du bsgom par bya/ /zhes gsungs pa'i don bde lam nyid du gsal bar gsungs gda' na'ang bde lam gyi 'khrid yig dang zin bris rnams su mnyam brje gnyis kyi dbye ba mi snang ngo/ /gnyis pa bdag gzhan brje ba la gnyis/ bdag gzhan brje ba'i rgyu sgrub pa dang/ bdag gzhan brje ba dngos so/ /dang po la gnyis/ bdag gces 'dzin gyi skyon bsam pa dang/ gzhan gces 'dzin gyi yon tan bsam pa'o/ /dang po ni/ gzhan yang rang nyid phun sum tshogs pa zhig byed par 'dod nas zhes sogs te/ 'khor ba thog ma med pa nas rang gces par bzung pas rang gzhan gyi don gang yang ma grub cing/ ma grub pa tsam du ma zad sdug bsngal sna tshogs shig myong bar 'dug /rgyu mtshan des na rang gces par 'dzin pa ni des mi dge bcu la sogs pa'i las bsags shing/ @88b slar yang sred lan gnyis kyis gsos 'debs pa yang rang gces 'dzin gyis byas pas 'khor ba dang ngan song gi sdug bsngal la sogs pa rgud pa kun gyi gnas su 'dug pas/ rang gces 'dzin ma skyes pa ni tshul min yid byed kyis gsos mi gdab par mi skyed la/ skyes pa rnams ni gnyen po bsten nas spong bar bya'o/ /gnyis pa gzhan gces 'dzin gyi yon tan bsam pa ni/ gzhan gces par 'dzin pa ni zhes sogs/ / 'khor ba las thar ba la shes rab kyi bslab pa dgos pa dang/ de 'ong ba la sngon du ting nge 'dzin gyi bslab pa dang/ de 'ong ba la sngon du tshul khrims gyi bslab pa dgos shing/ tshul khrims ni gzhan gnod gzhi bcas spong dgos pas thar pa thob pa yang sems can la ltos dgos/ thams cad mkhyen pa thob pa la ni spyod 'jug las/ sems can rnams dang rgyal ba las/ /sangs rgyas chos 'grub 'dra ba la/ rgyal la gus byed de bzhin du/ /sems can la min ci yi tshul/ zhes sangs rgyas thob pa phyed sangs rgyas dang phyed sems can la rag kyang rgyal ba la gus pa byed kyang sems can la phan mi 'dogs pa'i khar gnod ci 'khyol byed pa 'di ci yi lugs yin zhes so/ /gzhan yang nyan rang rnams 'bras bu dman pa sems can gyi don cher ma byas pa dang/ sangs rgyas rnams 'bras bu mthar thug brnyes pa sems can gyi don gtso bor mdzad @89a @#/ /pa las byung ba yin/ des na gzhan gces 'dzin ma skyes na dpyad sgom byas te gsar du bskyed cing/ skyes zin rnams ni gong 'phel du bya'o snyam pa dang gsol 'debs sogs bya la/ de ltar rang gzhan gnyis gces 'dzin mnyam pa la 'bad pa du ma byas te/ de byang ba na slar yang 'bad pas brje bsgom dgos kyi ma mnyam pa la brje ba ni 'ong ba'i gzhi med do/ /gnyis pa bdag gzhan brje ba dngos ni/ mdor na thub pa'i dbang pos zhes sogs te/ bla ma mchod pa ltar na 'di la skyon yon gyi don bsdu ba yin la/ skabs 'dir ni brje ba'i khongs su btang yang mi 'gal/ thub pa'i dbang po ni gzhan don kho na mdzad la/ bdag gis rang don kho na byas pas gzhan don gyi ngos nas thub dbang lhag kyang rang don gyi ngos nas bdag lhag pa 'ong 'thad pa la ston pas ni gzhan don gyi zhar la rang don yang mthar phyin/ bdag gis ni gzhan don lta ci rang don yang ma grub 'dug/ des na spyod 'jug las/ bdag bde gzhan gyi sdug bsngal dag/ yang dag brje bar ma byas na/ /sangs rgyas nyid du mi 'grub cing/ /'khor ba na yang bde ba med/ /ces gsungs pa ltar bdag gzhan brje dgos la/ de la ston pas sngon lam dus su ji ltar mdzad pa'i skyes rabs sogs la bltas te spro ba ci 'phel byed dgos te/ sngon bka' gdams kyi bshes gnyen chen po rnams/ bslab spyod lta ba'i tshom/ sa rgyan @89b spyod pa'i tshom/ skyes tshom dad pa'i tshom/ zhes bka' gdams gzhung drug tu grags pa la thugs gnyer mdzad pas bka' gdams gzhung par yang grags so/ /de yang rang gces 'dzin khong na gnas phyin chad gzhan gces 'dzin gsar du ma skye zhing slar rtogs pa dga' rab skyes te gzhan gces 'dzin cung zad skyes kyang rgyun 'thun pa la rang gces 'dzin gyis bar du gcod pas 'thud mi thub par 'dug pas rang gces par bzung nas gzhan yal bar 'dor ba'i blo skad cig kyang mi bskyed snyam pa'i zhe dam yang yang bya zhing/ rang yal bar dor nas gzhan gces par bzung ste gzhan gyi sdug bsngal dang sdig pa thams cad bdag gi rgyud steng du blang zhes pa'i skabs su gzhan sdug bsngal gyis mnar tshul bsam la snying rje bsgom/ bdag gi bde dge thams cad gzhan la btang bas zhes sogs kyi tshe/ gzhan bde bas phongs lugs bsam ste byams pa bsgom/ de dag gi tshe thog mar skye dka' na rang la phyi dro myong 'gyur gyi sdug bsngal dang/ sang dang/ zla ba phyi ma/ lo phyi ma sogs la myong 'gyur gyi sdug bsngal blangs la/ de nas rim gyis gtong len bya/ yang na dmyal ba tsha grang sogs sdug bsngal che rim nas brtsams te sdug bsngal rgyu bcas dang nyan rang sa bcu'i byang sems rnams kyi shes sgrib phra mo tshun chad sogs snod bcud thams cad kyi nyes skyon rnams blang/ bla ma la sangs rgyas @90a @#/ /dngos kyi 'du shes bskyed dgos pas bla ma dang sangs rgyas la len rgyu med la/ phar gtong ba'i tshe skyabs 'gro dnag las 'bras kyi dge rtsa dang zag med kyi bde ba rang la med kyang yod bar mos te ngan song gsum la btang bas bde 'gro thob/ lam bslab pa gsum gyi dge rtsa mngon mtho'i gnas la btang bas thar pa thob/ byang chub kyi sems dang rgyal sras kyi spyod pa'i dge rtsa rnams nyan rang sogs la btang bas sangs rgyas thob par bsam/ mdor na snod bcud thams cad dag pa rab 'byams 'ba' zhig tu bsam la rang gi lus longs spyod dge rtsa thams cad kyang mchod sprin mtha' yas pa'i rnam par sprul te phul bas rgyal ba rnams kyi thugs rgyud la zag med kyi bde stong gsar du 'khrungs pa'i mos pa byas la thog mar bsam pas sbyong zhing cung zad goms pa na gtong len rlung la bskyon bzhin du bya'o/ /de nas 'di ni rang gis bsgoms pa tsam yin gyi dngos su ni rang gzhan sems can thams cad sdug bsngal gyis mnar bzhin pa yin pas na gzhan sems can thams cad sdug bsngal dang bral zhing/ bde ba phun sum tshogs pa dang ldan pa zhig bdag gis bya'o zhes lhag bsam bskyed/ de yang da lta ni bdag la de lta bu'i nus pa mi 'dug /ces sogs kyis byang chub kyi sems bsgom pa la spyi bo'i bla ma las rang 'dra gnyis pa @90b rang la thim pa nas lus longs spyod dge rtsa gtong ba'i bar rnams rgyu 'bras bdun gyi skabs ji lta ba bzhin bya'o/ /'dir ni gtong len byed tshul gyi snying po rnams mdor bsdus tsam las ma spros shing zhib par blo sbyong gi skabs las shes par bya'o gsungs/ gnyis pa sems bskyed chogs bzung tshul ni/ 'di la chos thun gong ma dang ma sbrel na sbyor ba'i chos drug sngar bzhin bya ba dang/ gong ma dang chos thun gcig tu sbrel na/ skyabs gnas kun 'dus/ zhes sogs gsum dang/ bdud rtsi 'bebs sbyang gi dmigs pa lhan thabs bzhin byas la/ dngos gzhi la gnyis/ sdom pa ma thob pa thob par bya ba dang/ thob pa mi nyams par bsrung tshul lo/ / dang po la'ang dbye na gnyis las dang po ni/ lam rim du smon 'jug rim can du gsungs pa ni smon sems len tshul lam rim chen mor gsungs nas/ 'jug sems len tshul byang chub gzhung lam du gsungs pa la zhal 'phang mdzad pa yin/ spyir zhi ba lha'i lugs su smon 'jug cig car du len pa dang/ sems tsam pa'i lugs thogs med nas brgyud pa la rim can du gsungs kyang/ zhi ba lha'i lugs la rim can du bskyed pa'ang yod pa nag po bas mdzad pa'i spyod 'jug gi 'grel bar bshad pa bzhin rgyal sras dngul chu ba chen pos kyang bshad do/ /sngon 'gro'i rim pa spyi dang zhes pa ni sbyor ba'i chos drug dang/ khyad par bshes @91a @#/ /gnyen bsten tshul nas zhes sogs ni/ smon 'jug gi sdom pa 'bogs yul gyi gang zag de byang chub lam gyi rim pa la blo sbyang ba sngon du 'gro dgos zhes pa'i don yin la/ rang nyid gcig pu lta bu sems bskyed len pa la sbyor ba'i chos drug gi tshe yon tan gzhir gyur ma'i dmigs pa nan tan gyis nyams su blangs pas chog gi bshes gnyen bsten tshul nas bde lam gyi tshig yongs rdzogs 'don dgos pa lta bu ma yin no/ /des na ma sems can thams cad kyi don du zhes pas gzhan don don gnyer dang/ myur du yang dag par + thob par bya zhes pas byang chub don gnyer te don gnyer gnyis lnga na de ni smon sems tsam po ba ste de nyid bar ma dge ba yin gyi sdom pa min la/ de'i phyir du + rnams la slob cing zhes pa ni 'jug sems dang/ sems can thams cad kyi + gzung bar bya'o snyam pak ni dam bca' can te/ de lta bu'i ngang nas spyi bo'i bla ma thub pa'i dbang po'i sku'i ba spu'i khung re rer sangs rgyas zhing khams dang bcas pa'am blos ma mchun na sangs rgyas sras dang bcas pa bzhugs par mos te bla ma thub pa'i dbang po'i rjes su zlos par mos nas/ sangs rgyas byang chub sems dpa' kun/ zhes sogs kyis bdag la snyan gtad du gsol/ zhes snyan gsan phab nas/ ji ltar te dper na sngon gyi lam bde ba nas 'bras bu bde bar gshegs @91b pa'i sangs rgyas rnams kyis/ sems can gyi don du sangs rgyas thob par bya'o zhes thugs bskyed pa dang/ thugs bskyed pa ltar byang chub sems dpa'i bslab pa la rim pa bzhin du gnas pa ltar te dpe de bzhin du bdag kyang 'gro la phan don du/ zhes gzhan don don gnyer dang/ byang chub sems ni bskyed par bgyi/ zhes byang chub don gnyer te smon sems chogs bzung/ byang chub sems dpa'i bslab pa la/ /rim pa bzhin du bslab par bgyi/ / zhes lan gsum brjod nas 'jug sdom blangs/ de'i rim pa bzhin du zhes pa ni smon 'jug gi bslab bya la rim par slob pa'i don yin gyi/ snying rje'i bsam pa ma dag par/ /lus ni gtong bar mi bya'o/ /zhes dang/ rdzu 'phrul bsdigs la sogs mi byed/ ces sogs las dang po ba'i skabs su lus gtong ba sogs bya dka' ba'i rigs rnams smon lam gyi yul du byas te re zhig lag tu mi len la/ nus pa thob pa na rim gyis de dag la slob ces pa'o/ /de yang rang nyid la sngar byang sdom ma thob pa yin na gsar du thob pa dang/ thob kyang phyis rtsa ltung sogs kyis nyams pa na nyams pa sor chud pa'i tshul dang/ thob la ma nyams pa ni sngar yod gong 'phel du song ba'i tshul du byang sdom thob pa'i mos pa brtan po bya ste sdom pa gong ma gnyis ni sngar thob la ma nyams par yod kyang yang yang len pa ni gong 'phel du 'gyur bas mchog yin gyi so thar ltar bskyar mi rung ba ma yin no/ / @92a @#/ /sdom pa thob pa nas ma nyams gyi bar du gnyid dang rgyal ba sogs lung ma bstan gyi skabs su'ang dge ba'i rgyun mi 'chad la/ sdom min dang ldan pa ni bshan pa dang dmag mi dang smad 'tshong ma lta bu mi dge ba byed par khas blangs pas lung ma bstan gyi bar thams cad mi dge ba'i rgyun mi 'chad de/ /sems can thams cad kyi don du bdag gis sangs rgyas thob par bya'o snyam pa lta bu cho gas bskyed kyang bslab bya la slob mi dgos shing/ smon sems dam bca' can cho ga'i sgo nas blangs bas ni smon sems kyi bslab bya la slob dgos la/ slar 'jug sdom blang pas smon sems de 'jug sdom du gnas 'gyur bar gsungs shing; 'jug sdom nyams kyang smon sems mi nyams la/ smon sems btang na ni 'jug sdom sngar ma nyams kyang des stong bar 'gyur ro/ /de nas gnyis pa spro ba bskyed pa la gnyis te/ dga' ba bsgom pa dang/ bslab bya la brtson pas bsrung 'dod bskyed pa'o/ /dang po ni/ deng dus bdag tshe 'bras bu yod/ ces sogs te/ deng zhes pa de ring zhes pa bsdus pa yin cing deng dus zhes pa dang deng du zhes pa sna tshogs shig 'dug kyang gnyis ka dag pa yin te du zhes pa ni rnam dbye bdun pa'i bye brag tshe skabs kyi sgra yin pas du la sogs pa la dang mthun zhes nyi ma shar ba'i tshe chos ston zhes pa lta bu'o/ /de la deng dus bdag tshe 'bras bu @92b yod; ;mi yi srid pa legs par thob/ /ces lo tsA bas sgra thang sgyur mdzad pa yin la/ rgya skad du go rim de ltar bde ba yod 'dra mang por skad du don bsgyur byas na go phul che bas de ltar na tshig rkang gnyis po snga phyi bsgyur nas bdag mi'i skye srid blangs pa la don chen po zhig byung bas legs par thob la/ de yang gzhon nu la ma shi bar tshe gnas pa la yang 'bras bu chen po yod pa byas te de ring ste da lta byang chub kyi sems skyes pas ni sangs rgyas kyi rigs su skyes te/ sangs rgyas rnams kyi sras dang/ byang sems rnams kyi spun zlar 'gyur ro zhes pa'o/ /gnyis pa bslab bya la brtson pas bsrung 'dod bskyed pa ni/ de ni bdag gis ci nas kyang/ zhes sogs te; rgya gar 'phags pa'i yul du pha'i las gang byed de la bu 'jug pa ni rigs kyi las yin la/ de dang mthun par bdag gi pha ni ston pa sangs rgyas yin pas de'i rigs dang mthun pa'i las nyes pa'i skyon med cing yon tan du mas brgyan pa sgo gsum bya ba ma yin pa las ldog pa dang dge ba'i las la sbyor bas btsun pa'i rigs 'di la/ sems ma dad ba dang le lo sogs kyi rnyog par mi 'gyur ba de ltar bya'o zhes spro ba bskyed par bya'o/ /gnyis pa thob pa mi nyams par bsrung tshul ni/ spyi bor bla ma lha bsgom bzhin pa'i ngang nas zhes sogs te/ sngar dal 'byor gyi skabs su snying po len pa'i tshul yang bla ma sangs rgyas 'bral med du bste @93a @#/ /nas; des bstan pa'i theg pa mchog gi gdams pa'i snying po nyams su blangs te/ zhes pa'i gdams pa'i snying po yang byang sems kyi bslab bya bsrung ba 'di yin pas byang chub kyi sems yang yang dran pas gsos gdab par bya ste/ theg dman pa ni bdag 'dzin dgra'i gtso bor blta ba dang/ theg chen mdo lugs la bdag gces 'dzin la dgra'i btso bo dang/ sngags kyi skabs su las rlung la dgra'i gtso bor lta dgos pa yin/ des na 'di'i bslab bya la gnyis/ tshe 'dir sems bskyed mi nyams pa'i rgya la bslab pa dang/ skye ba phyi ma rnams su'ang byang chub kyi sems dang mi 'bral ba'i rgyu la bslab pa'o/ /dang po la bzhi las/ dang po byang chub kyi sems kyi phan yon bsam pa ni/ rgyas par sdong po bkod pa las gsungs pa sogs phan yon bshad pa mtha' yas pas de rnams su blta bar bya la/ mdor bsdus te bshad na/ ngan 'gro las ni ldog bgyid cing/ /thar pa'i lam ni rab ston la/ /rga shi med par 'dren bgyid pa'i/ /byang chub sems la phyag 'tshal lo/ /zhes gsungs te/ ngan 'gro las bzlog pa ni/ sdig pa stobs chen shin tu mi zad pa/ /de ni rdzogs pa'i byang chub sems min pa/ /dge gzhan gang gi zil gyis non par 'gyur/ /zhes ngan 'gro'i rgyu sdig pa stobs chen po rnams kyang zad par 'gyur ba dang/ byang chub kyi sems ni ched @93b du bya ba sems can la grangs med pas bsod nams mtha' yas pa dang/ thob bya sangs rgyas gyi yon tan mtha' yas pas bsod nams dpag tu med pa 'byung la bsod nams kyi las bsags pa ni mngon mthor skye la; thar ba'i go 'phang thob pa la bdag 'dzin zlog dgos/ de yang bsag sbyang la ltos pa ni/ sems kyi chos nyid mthong ba yang/ /tshogs gsag sgrib sbyang la ltos pas/ /zhes gsungs shing/ spyod pa dag na blta ba lam gyis 'byung ba bla ma byams pa'i rnal 'byor ba bzhin no/ /rga ba dang shi ba med pa ni sangs rgyas te de yang byang chub kyi sems las 'byung ba ni/ sangs rgyas byang chub sems dpa' las 'khrungs shing/ zhes gsungs pa'i phyir; des na 'dir ma 'dus pa'i phan yon gang yang med pas na de ltar dran par bya'o/ /gnyis pa sems bskyed 'phel ba'i phyir lan drug tu bskyed pa ni/ nyin lan gsum dang mtshan lan gsum ste dus drug tu yan lag bdun pa maNDal dang bcas ba song nas/ yon tan gzhir gyur ma'i rjes su sangs rgyas chos tshogs ma'i tshig rkang dang po gnyis lan gsum brjod pas skyabs 'gro dang/ rjes ma gnyis lan gsum brjod pas sems bskyed pa ni rje rin po ches lan gsum gsum zhes pas bstan to/ /de nas/ byang chub sems mchog rin po che/ zhes sogs phyag len bzhin nam gzhan yang rgyas bsdus sna tshogs snang bas gang rung bya la/ yang sngags kyi thun drug @94a @#/ /bskyangs na de las logs su sems bskyed mi dgos so/ /gsum pa sems can blos mi spang ba la bslab pa ni/ sems can gyi ngos nas byed spyod bzang ngan ci 'dra zhig snang yang bdag gi ngos nas sems can gcig kyang blos mi spong ba ste/ spangs pa'i tshad ni sems can gcig yan chad la dmigs nas 'di'i don ni gtan mi bya'o snyam pa ste ya gyal zhig na tshogs pa 'jig pas sems can spangs par 'gyur ro/ / bzhi ba tshogs gnyis gsog pa la bslab pa ni/ sems bskyed 'phel ba'i phyir du dkon mchog mchod pa dang/ sbyin pa gtong ba sogs bsod nams kyi tshogs dang/ stong nyid sgom pa dang rig pa'i gnas la slob pa sogs ye shes kyi tshogs gsog pa la brtson pa'o/ /gnyis pa skye ba phyi ma rnams su'ang byang chub kyi sems dang mi 'bral ba'i rgyu la slob pa la nyams byed nag chos bzhi spong ba dang/ mi nyams pa'i dkar chos bzhi bsten pa gnyis gsungs kyang/ 'dir go sla ba'i phyir phyogs gcig tu bshad pa ni/ gzhan yang bla ma sogs la ku re dang bzhad gad kyi phyir du yang zhes sogs ste/ yang zhes ba ni ku re'i phyir yang rdzun gyis dbu skor bas nag chos su 'gyur na don gyis byas pa la lta ci smos zhes pa'i don yin pas myur lam du yang med pa nyid legs par ma mthong/ sogs khongs nas mkhan slob dang yon tan dang bslab pa gsum rang @94b las lhag pa'i yon gnas rnams thon dgos/ 'di'i gnyen por dkar chos dang po ni sems can thams cad la don che ba srog dang chung ba bzhad gang kyi phyir yang shes bzhin du rdzun spong ba'o/ /nag chos gnyis pa ni gzhan dge ba byed pa la 'gyod pa bskyed pa ste/ 'di la pha rol dge ba byed pa po 'gyod pa skyes ma skyes gang yin kyang 'dra bas 'gyod pa'i tshig smras pa go ba na nag chos su 'gyur/ 'di'i gnyen po dkar chos bzhi pa ste gzhan dge ba byed pa thams cad theg pa chen por sbyor gang thub byed pa'o/ /nag chos gsum pa ni smon sems skyed pa yan chad theg pa chen por zhugs pa'i gang zag la zhe sdang gis mi snyan par smra ba ste/ ngang tshul ngan pa can zhes pa'am tshul 'chal lo zhes sogs kyi mi snyan pa brjod pas yul gyi don go ban nag chos ste 'di 'byung nye zhing nyes dmigs kyang shin tu che ste dge ba 'dra ba brad brud byed kyang 'phel rtags med par zad rtags mang ba de byang sems dang; grogs la zhe sdang dang brnyas pa byas pas rma phyung bas zad de/ 'di gnyis spang na bslab btus nas gang zag la brten pa'i gnod 'gyur thams cad mi 'ong gsungs shing byang sems ni me dong thal bas g.yogs pa ltar gang du yod cha med pas de'i gnyen por dkar chos gsum pa sems can thams cad la ston pa'i 'du shes bskyed nas don gnas kyi sngags pa phyogs bzhir brjod pa ste yon tan yod thag chod brjod kyi med @95a @#/ /pa la sgro btags kyi brjod pa ma yin la/ de yang nyan pa po skabs su babs pa la brjod kyi phyogs su 'gro dgos pa ma yin no/ /nag chos bzhi pa ni lhag bsam ma yin pa'i g.yo sgyu ste 'di'i lhag bsam ni drang zhing tshad thub pa'i lhag bsam yin la/ de ma yin pa'i bre srang sogs la g.yo sgyu byed pa dang/ rag mar gtong ba la sngon du stong lung du gtong byas nas phyis rag mar khas blangs pa lta bu yin gsungs te/ dper na mi zhig rta nag tu gtong dgos pa la/ dang por khyod bkris lhun por 'gro dgos pa 'dug smras pa na des 'gro long med tshul smras pas 'o na rta nag bar ma song thu med 'dug ces gtong ba lta bu ste/ zhu don byed pa na 'di tsam zhus na don 'di tsam du gnas yong ngam snyam du zhu 'dzud byed pa sogs kyang ngo/ /'di'i gnyen por dkar chos gnyis pa ni sems can thams cad la g.yo sgyu med par drang zhing tshad thub pa'i lhag bsam dag por gnas pa'o/ /de yang rnam pa thams cad du ma yin te/ drang por brjod pas skyon bcas dang/ /'khyog smra yon tan ldan pa'ang srid/ /ces 'ga' zhig gi tshe rang gzhan la gnod pa'i dgag bya yod pa mthong na drang por ma brjod kyang/ thabs la mkhas pa'i spyod pa la/ /g.yo sgyur thub pas ma gsungs so/ /zhes thabs mkhas su gsungs kyi g.yo sgyur ma gsungs so/ /nag po'i chos bzhi'i sogs khongs @95b nas nga rgyal ser sna phrag dog rnams dang/ dkar po'i chos bzhi'i sogs khongs nas gzhan gyi 'byor pa mthong ba na dga' spro bsgom pa ston zhing gzhan yang 'gro 'chag nyal 'dug thams cad du byang chub kyi sems yang yang bsgom pa dang/ dge ba ci byed kyi sngon du byang chub kyi sems bsgom pa sogs yang dang yang du byang chub kyi sems bsgoms pas skye ba gzhan du'ang sems rin po che dang mi 'bral bar gsungs pas gal che'o/ /mdor na bslab bya de'i steng du 'jug sems kyi bslab bya nyes spyod sdom pa'i tshul khrims rtsa ltung bco brgyad dang nyes byas zhe drug /dge ba chos sdud kyi tshul khrims phar phyin drug /sems can don byed kyi tshul khrims bsdu ba'i dngos po bzhi rnams la brtson par bya zhing/ khyad par rtsa ltung rnams la srog bdos byas te tshul bzhin du bsrung bar bya'o snyam du zhe dam drag po dang/ de ltar nus pa'i gsol 'debs sogs kyang gzhung bzhin bya'o/ /gnyis pa sems bskyed nas spyod pa la slob tshul la gnyis/ rgyal ba'i sras kyi spyod pa spyi la slob tshul dang/ khyad par phar phyin tha ma gnyis la slob tshul lo/ /dang po la gnyis/ thun gyi ngo bo la ji ltar bya tshul dang/ thun mtshams su ji ltar bya tshul lo/ /dang po la sbyor dngos mjug gsum las/ dang po sbyor ba ni/ sngar bzhin la bdud rtsi 'bebs sbyang skabs zab pa dang rgya che ba zhes pa ni sngar sbyor chos @96a @#/ /kyi skabs bzhin zab rgyas gnyis kyi lam dang/ de'i snying po dang/ snying po'i yang snying po sngar bshad pa bzhin yin cing/ rgyal sras kyi bslab bya ni phar phyin drug la ma 'dus pa med pas dang po lnga rgya che ba dang tha ma ni zab mo'i lam gyi bslab bya yin zhing/ spyod pa rlabs che chung ni byang chub kyi sems shugs drag zhan la rag las pa'o/ /gnyis pa dngos gzhi la rang rgyud smin byed phar phyin drug dang/ gzhan rgyud smin byed bsdu bzhi'i nyams len gnyis las/ dang po ni/ de yang sngar byang chub tu sems bskyed pas sangs rgyas thob 'dod kyi byang chub tu sems bskyed pa phan yon che yang de sgrub pa'i thabs la sgrub pa snying por ma byas na ston thog 'dod kyang zhing las mi byed pa ltar sangs rgyas thob mi srid la/ thabs la slob pa de yang ma nor zhing cha tshang ba zhig dgos te lam nor pa la ji tsam 'bad kyang 'bras bu mi 'byung ba dper na 'o ma 'dod nas rwa 'then pa bzhin yin/ ma nor kyang cha ma tshang na stobs shin tu chung bas sa bon drung po dang sa dang chu lung sogs mthun rkyen tshang ba dang sad ser sogs 'gal rkyen dang ma bral na lo tog phun sum tshogs pa mi 'byung ba bzhin/ lam phyogs re ba tsam min pa'i cha mtha' dag tshang ba la bslab dgos pas tshang la ma nor ba phar phyin drug yin pas 'di ni byang sems kyi lam gyi gnad mtha' dag bsdus pa'i sdom @96b chen po ste bsdu ba bzhi yang phyin drug tu 'dus so/ /de la grangs nges pa ni byang sems kyi lam ston pa la de las mang mi dgos shing nyung na mi 'dus pas skyon du 'gyur te/ byang chub kyi spyod pa rlabs po che rnams rdzogs pa la tshe rabs/ mang por brgyud dgos la de la rten mtshan nyid yongs su ma rdzogs na lam gyis chod mi 'ong bas gang la spyod pa'i longs spyod/ gang gis spyod pa'i lus/ gang dang lhan cig spyod pa'i grogs/ gang brtsams pa'i las thams cad 'grub pa'i phun sum tshogs pa bzhi ni phar phyin dang po bzhis 'grub la/ de'i steng du nyon mongs pa'i dbang du mi 'gro ba dang/ bya ba rnams phyin ci ma log par 'jug ldog gi gnas shes pa ni phar phyin tha ma gnyis kyis 'grub pas skye ba gzhan du'ang de drug dang ldan pa'i phyir tshe 'dir phar phyin drug bsten pa dang goms pa mang du bya ste rgyu la khyad ji tsam zhugs pa de tsam du 'bras bu la khyad par 'byung ba'i phyir ro/ /rten de lta bus spyod pa la slob pa na byang sems kyi bya ba ni rang dang gzhan gyi don gnyis yin pas don gnyis sgrub pa la ltos pa'i grangs nges ni/ don gnyis gang byed kyang phar phyin drug gis 'grub ste/ sems can don la rab brtson pa; ;gtong dang mi gnod bzod pas byed/ /gnas dang grol ba gzhir bcas pa'i/ /rang don rnam pa thams cad spyod/ /ces gsungs pa ltar/ dang po gsum gyis gzhan don bsgrub pa ni zang zing gis phan btags pas @97a @#/ /sbyin pa dang/ de yang gzhan la gnod pa gzhi dang bcas pa las ma ldog na gnod ba dang bcas pa'i sbyin pas cir yang mi 'gyur bas tshul khrims dang/ de mthar phyin pa la tshur gnod pa byas pa la gcig lan dang gnyis lan mi bya bar tshur gnod la ji mi snyam pa'i bzod pa'i phar phyin dgos so/ rang gi don sgrub pa ni phar phyin tha ma gnyis kyis 'grub ste sems gnas pa rtse gcig tu bsgrub ste dmigs pa la ji ltar 'dod 'dod du gnas pa las su rung ba'i bsam gtan dang/ sems ma grol ba grol bar byed pa'i so sor rtog pa'i shes rab dang/ de gnyis kyang le lo can la mi skye bas mi ngal ba'i brtson 'grus dgos pas de ni don gnyis ka'i gzhi yin la/ grangs nges gzhan yang mang du 'byung ste mdor bsdus de tsam mo/ /go rim nges pa la gsum las/ rgyu 'bras kyi go rim ni/ longs spyod la mi lta ba'i sbyin pa yod na ma chags pa'i rgyu las tshul khrims 'byung/ nyes spyod las sdom pa'i tshul khrims yod na gzhan gnod gzhi bcas spangs pa'i rgyu las bzod pa 'byung/ gnod byed la ji mi snyam pa'i bzod pa yod na dka' ba la mi skyo ba'i rgyu las brtson 'grus 'byung/ dge ba la spro ba'i brtson 'grus yod na nyin mtshan du 'bad pa'i rgyu las bsam gtan 'byung/ sems las su rung ba'i bsam gtan yod na mnyam par bzhag pa'i rgyu las shes @97b rab 'byung ngo/ /gzhan yang dman mchog dang rags phra'i go rim ni snga ma snga ma dman zhing rags la/ phyi ma phyi ma phra zhing mchog go /de ltar grangs dang go rim sogs la nges pa bskyed nas nyams su len pa la spyi bor bla ma lha bsgom bzhin pa'i ngang nas 'di ltar bsam ste/ ma sems can thams cad kyi don du zhes sogs ni sems bskyed pas gtong ba po'i rten gyi gang zag theg pa chen po zhig dgos par ston pa ste 'og ma rnams la'ang shes par bya'o/ /de la sbyin pa'i ngo bo ni gtong ba'i tshe dge ba dang des kun nas blangs pa'i lus ngag gi las so/ /sbyin pa'i phar phyin rdzogs pa ni 'gro ba'i dbul ba sel thub pa la mi ltos kyi lus longs spyod dge rtsa thams cad la ser sna'i 'dzin pa bcoms nas gtong sems kyi rtsal rdzogs pa dang/ btang ba'i 'bras bu rnams kyang sems can la bsngo ba'i blo goms pa rdzogs pa'o/ /de la dbye na chos dang mi 'jigs pa dang zang zing gi sbyin pa gsum yod la/ de'i chos kyi sbyin pa ni byang sems rab byung rnams kyi gtso bor bya ba dang zang zing gi sbyin pa byang sems khyim pas bya ba dang/ mi 'jigs pa'i sbyin pa ni gnyis kas bya ba yin te/ rab tu byung ba zhes pa ni spangs pa'i don yin pas yo byed mang po spangs pa'i phyir zang zing gi sbyin pa la gtso bor mi bya la rang la 'bad med du rnyed na ni zang zing gi sbyin pa yang @98a @#/ /bya dgos la/ byang sems khyim pas ni chos kyi sbyin pa dka' zhing khyim pa nor lhur byed pas zang zing gi sbyin pa la gtso bor bya'o/ /dang po chos kyi sbyin pa ni zas gos la sogs pa'i rnyed pa dang/ khri stan la sogs pa'i bkur sti dang/ snyan pa'i grags pa sogs kyi re ba mi byed cing yul de chos kyis phongs pa dang rang gis ston shes pa dang rang ma gtogs ston pa'i mgon skyabs gzhan med pa dang/ drangs la don du gnyer ba la 'ong ba la nus bzhin tu ma byin na nyes par 'gyur/ bstan bya'i chos ni sangs rgyas kyi gsungs pa'i dam pa'i chos so/ /ci nus su ston pa zhes pa la gnyis te ston pa pos gang shes ci nus su ston pa dang/ nyan pa pos gang nyams su len nus pa dang 'tshams par ston pa'o/ /'on kyang khri steng du sdod pa dang maNDal phul ba sogs kyi ched du bskos pa'i 'chad nyan nges par dgos pa ma yin te/ mdo las gang zhig gser mchog la gnas maNd+ha ra dang lhar bcas gnod sbyin dang/ de dag thams cad thar pa dam pa'i sgor gyur thub pa'i gsung snyan phyir na 'dir gshegs shig /ces brjod la lha glu sogs spyan drangs nas/ lha yi skad dang klu dang gnod sbyin x bdag gis chos bstan to/ zhes brjod la byang chub lam gyi rim pa sgra dag gtsang nges bton te de rnams kyis don go nas sa lam gyi rtogs pa @98b skyes par bsam/ yang gtor ma gtong ba'i tshe sbyin pa gsum ga tshang bas nan tan gyis bya/ mi 'jigs pa'i sbyin pa ni/ sgrol ma 'jigs pa brgyad skyob kyi skabs nas 'byung ba ltar te 'dir ni mi dang mi min dang 'byung ba'i gnod pa gsum du bsdus te gsungs shing der ma 'dus pa ni med la/ rgyal po'i chad pa sogs 'jigs pa las skyob nus pa rnams dngos su dang/ mi nus pa rnams la sku rim dang smon lam 'debs ba sogs bya'o/ /mi ma yin pa'i 'jigs pa ni sha za'i 'jigs pa ste/ steng 'og bar gsum gyi gdon bgegs kyi gnod pa las skyob pa bka' sgo dang srung 'khor bsgom pa sogs kyis skyob pa'o/ /gzhan yang dud 'gro'i 'jigs pa seng ge dang/ glang po dang/ dug sbrul dang/ stag zig dang khyi la sogs pa'i 'jigs pa las skyob pa'o/ /'byung ba'i gnod pa sa chu me rlung gi gnod pa byung ba na chu sgyur byed pa char 'babs pa sogs kyis skyob pa'o/ /gsum pa zang zing gi sbyin pa gtong ba'i yul ni/ dgra gnyen bar ma skyon dang yon tan can/ /mtho mnyam dman pa skyid sdug sbyin zhing bcu/ /zhes pa ltar drag zhan thams cad la ster dgos la/ bye brag tu ni nor gyis dbul ba dang zas gos kyis 'phongs pa'i sems can rnams la gtong la/ chos dang zang zing slong ba bo byung na spyir btang du kun slong sangs rgyas thob pa'i phyir tshogs gsog @99a @#/ /dgos pas sbyin pa btang bar bya snyam pa dgos pa la dmigs pa dang/ bdag gis dang po nas thams cad btang zin pas 'di slong ba po 'dis bdag la bcol ba yin pas re gtod pa'i 'du shes bskyed pa rdzas la gzhan gyi yin pa dngos po la dmigs pa/ sbyin pa'i yul 'di rnams bdag gi sbyin pa'i phar phyin rdzogs par byed pa'i bshes gnyen no snyam pa zhig la dmigs pa'o/ /yul so sor gtong ba'i tshe bsam pa bye brag pa ni mtho ba la phrag dog med pa/ mnyam pa la 'gran sems med pa/ dman pa la nga rgyal med pa dang/ skyid pa la dga' ba tshad med dang/ sdug pa la snying rje tshad med bsgom/ dgra la zhe sdang/ gnyen la 'dod chags/ bar ma la yal bar 'dor ba'i blo spang/ tshul 'chal sogs skyon can la snying rje dang/ yon tan can la dang pa bsgoms nas gtong zhing/ tshe 'dir lan dang 'byor ba yod du re ba dang/ phyi mar lha ma'i bde ba dang/ thar pa'i rnam smin la re ba med pa ste/ mdor na rang don du sangs rgyas kyang mi re bar/ gzhan don kho na'i phyir du sangs rgyas thob pa'i rgyu la re ba chen po dang bcas te gtong ba'o/ /sbyin pa'i dgag bya'i gtso bo ni ser sna yin pas lus longs spyod dge rtsa dang bcas pa'i bdog pa thams cad la rang gir 'dzin pa'i sred pa ldog nas gzhan la gtong ba'i sems yang dang yang du sbyang bar bya zhing/ dngos @99b su ni; zong la tshong pa ji bzhin du/ /sbyin pa la ni bslab par bya/ /zhes pa ltar tshong pa rnams kyis zong ngan pa rnams dang por 'tshong ba bzhin zas nor dman rim nas byin te rim gyis je bzang du gtong ba la goms par bya dgos/ de yang spyir bdog pa thams cad gtong bar gsungs kyang byang sems rab byung gis chos gos gsum mi gtong bar gsungs la/ gzhan yang dus kyi sgo nas gtong mi rung ba ni rab tu byung ba dang bsnyen gnas can la phyi dro'i kha zas ster ba sogs dang/ yul gyi sgo nas mi rung ba ni sdom ldan la chang dang zas mi gtsang bas sbags pa dang/ nad pa la mi 'phrod pa'i zas la sogs pa/ dgos pa'i sgo nas ma rung ba ni ngan sems can la dug dang mtshon cha sogs dang dbang dang drag po'i las sbyor gyi man ngag ston pa dang/ nor gyi 'du shes can la glegs bam ster ba rnams mi rung bar gsungs/ rten gyi sgo nas mi rung ba ni rang nyid glegs bam gyi dgos pa bsgrubs zin pa'ang min la de la ser sna med pa'i tshe shes par 'dod nas glegs bam slong ba la mi sbyin pa lta bu'o/ /las dang po pa'i skabs su lus dngos su mi gtong ba dang/ snying stobs kyis gtong ba'i dus la babs kyang yul gyi don chung du zhig gi ched du rang gi don chen po'i lus rten dang/ mtho mtshams pa dang/ smyo ba la'ang lus mi btang ngo/ /dngos po'i sgo nas mi rung ba ni rang rgyal por gyur pa lta bu las mi dang nang @100a @#/ /mi sogs kha phral te ster ba dang/ pha ma dang/ srog chags dang bcas pa'i zas dang/ rab byung yin na chos gos ster ba sogs so/ /lus gtong ba'i tshe na nad g.yog dang/ /ma gcig labs sgron gyis sku lus skyes pa yongs la sbyin par gtong ba lta bu ni gnas skabs dbang byar gtong ba yin cing/ yan lag gsil nas gtong ba ni mig la sogs pa'i dbang po gtong ba 'o/ /gal te sbyin mi nus na go bar bya ba gsum gyis go bar bya ste/ spyir byang sems kyis bdog pa thams cad gtong dgos pa yin kyang/ bdag ni las dang por blo'i mthu chung zhing dge rtsa ma smin bas mi gtong ba'i sems kyi dbang du gyur te bdag gir 'dzin pa lags pas re zhig sbyin mi nus na khyod rtsig pa ma za zhig /slar sbyin nus par gyur na sems la gzhag go zhes pa lta bu 'jam por smra zhing/ sems kyis ni gtong sems goms par byed dgos pas bdog pa thams cad sems can la btang bar bya la/ des na rang gis zas gos sogs la longs spyod pa'i tshe bya tshul ni/ dper na dpon gyi zas bzos nas de'i las byed pa bzhin/ sems can gyi zas gos sogs longs spyad nas sems can gyi don byed pa'i bsam pa bskyed dgos pas de'i tshul ni rje btsun ngag dbang rdo rje'i phyag bzhes ltar/ snga dro langs ma thag dge slong gi dus dran rten pa'i 'jug lta @100b bur; phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/ bdag byang chub sems dpa' che ge mo zhes bgyi ba'i las longs spyod dge rtsa dang bcas pa sems can thams cad la btang ba las de ring gi gnas skabs su sems can gyi don du zas gos gnas ma la sogs la longs spyad de sems can kho na'i don bsgrub par bya'o zhes brjod cing bsam mo/ /de ltar bsam pa thag pa nas sems can la btang ba'i zas gos gnas mal sogs la spyod pa na gzhan don du spyod pa'i bsam pa brjed nas rang don du sred pas spyod na byang sems kyi bslab bya'i nyes byas nyon mongs can dang/ sred pa med kyang rang don du spyod pa dang sems can gzhan zhig gi phyir chags te spyod na nyon mongs can min pa'i nyes par 'gyur ro/ /gzhan la bsngos pa de dag la gzhan gyi rdzas su 'du shes nas rang gi phyir spyod na ma byin len du 'gyur zhing rin thang tshang na so thar gyi pham par 'gyur zhes bslab btus las gsungs pa la bzhed tshul mi 'dra ba du ma snang yang rje rin po ches mi'i 'gro ba la bsam pa thag pa nas bsngos shing des kyang bsngos pa shes te bdag tu bzung ba'i skabs su gzhan gyi rdzas yin par 'du shes nas rang don du len pa la rin thang tshang na pham pa 'ong ba de la dgongs par gsungs pa ltar ro/ de lta bu'i tshul gyis sbyin pa gsum ni btang srung dge spel bc @101a @#/ /gnyis sam/ dam pa drug ldan du nyams su blang bar bya ste/ sdom la/ rten dang dngos po ched du bya ba dang/ /thabs mkhas bsngo ba rnam dag dam pa drug /ces pa'i rten dam pa ni byang chub kyi sems kyi kun nas blangs te byed pa/ dngos po dam pa ni lam rim chen mor/ spyir sbyin pa'i dngos po ma lus pa spyod pa yin la/ khyad par rnams la 'jug pa na'ang de'i bsam pa mdor bar yong ngo zhes gsungs pa ni cung zad go dka' bas de'i don ni spyir dngos po thams cad gtang bar bya zhing 'on kyang de ring gi skabs su rtsam pa 'di ster snyam pa lta bu'i blo bskyed pa yin/ /ched du bya ba dam pa ni sems can thams cad la 'phral phugs su bde zhing phan pa'i phyir gtong ba/ thabs mkhas dam pa ni las dang po bar sbyin bya sbyin yul sogs rang bzhin med pa'i shes rab kyis zin par bya ba/ bsngo ba dam pa ni/ sbyin pa'i dge ba rdzogs byed du bsngo ba/ rnam dag dam pa ni sgrib pa gnyis dang khyad par ser sna 'gog pa'i phyir gtong ba'o/ /yang sbyin pa la phar phyin drug ldan du byed tshul ni/ rang don mi bskyed pa tshul khrims dang/ slong ba pos log par ba sgrub pa la khro ba 'gog pa bzod pa dang; sbyin pa la spro shugs bskyed pa brtson 'grus dang/ gzhan don la rtse gcig tu dmigs pa ni bsam gtan dang/ sbyin pa'i 'khor gsum mi dmigs par rgyas 'debs pa sbyin pa'i shes rab ste/ de bzhin du phar @101b phyin gzhan rnams la'ang sbyar du yod pas re re'ang drug ldan du byas na stobs shin tu che bar gsungs so/ /gnyis pa tshul khrims kyi phar phyin ni/ tshul khrims la dbye na skyon spong ba/ yon tan bsgrub pa/ gzhan don byed pa'i tshul khrims gsum las dang po ni/ mi dge bcu spong ba dang sogs khongs nas dge bsnyen dge tshul/ dge slong pha ma sogs so thar gyi sdom pa gang khas blangs pa'i mthun mong dang de'i steng du byang sems kyi smon sems kyi bslab bya brgyad dang/ 'jug sdom gyi bslab bya rtsa ltung bco brgyad dang nyes byas zhe drug ste mthun mong min pa'i bslab bya rnams dang 'gal ba'i nyes spyod rnams spong ba/ yon tan sgrub pa ni sbyin pa dngos su smos te sogs khongs nas phar phyin lhag ma lnga bstan la/ tshul khrims la sogs pa'i zhes pa ni phar phyin drug gi nang nas kyang gal che ba tshul khrims dngos su smos te sogs khong nas/ bsam gtan dang shes rab gnyis ston pas bslab pa gsum gal che bar bstan te rje rin po ches kyang/ bsam gtan gal che bas zhi gnas la slob tshul dang/ shes rab gal che bas lhag mthong la slob tshul le'u logs su mdzad la/ tshul khrims ni lhag par du'ang gal che bas byang sa'i tshul khrims le'u'i rnam bshad byang chub gzhung lam logs su mdzad pa yin/ de rnams rang rgyud lam skyes pa gsar du bskyed cing/ skyes zin gong 'phel du byed dgos te rang gi tshul khrims @102a @#/ /ma dag pa dang nyams na ngan 'gror 'gro bas rang gi don yang mi 'grub pas gzhan don ci ste 'grub/ des na gzhan don la brtson pas tshul khrims kyi bsrung sdom la shin tu grim pa dgos la tshul khrims yongs su dag pa'ang 'jug ldog gi gnas rnams ji ltar bcas pa ltar bcas pa ltar lag tu len pa la rag las shing de yang rang ngan song gi sdug bsngal la 'jig pa dang/ lha mi'i phun tshogs la smon pa tsam ma yin par sems can thams cad tshul khrims la 'god pa'i phyir gsrung bar bya'o/ /de nas sems can thams cad kyang tshul khrims la sogs pa'i dge ba rnam par dag pa la sbyang bar bya ste/ de la sems can gyi don bya ba bcu gcig gi sgo nas byas ste sdom la/ grogs bya thabs rmongs phan thogs dang/ /'jigs pas nyen dang mya ngan gzer/ /yo byed kyis phongs gnas 'cha' 'dod/ /blo mthun 'dod dang yang dag zhugs/ /log par zhugs dang rdzu 'phrul gyis/ /gdul byed don byed bcu gcig yin/ /zhes pa ltar te rkang grangs tsam las ma spros shing bsdu bzhi'i sgo nas gzhan don byas kyang chog pas mdor na phar phyin dang po lngas sems can thams cad smin par byed cing/ tha ma shes rab kyis grol bar bya'o/ /gsum pa bzod pa'i nyams len ni/ bzod pa'i ngo bo ni rang gi sems rgyud mi 'khrug pa yin la/ dbye na gnod byed la ji mi snyam pa'i bzod pa/ sdug bsngal dang len gyi bzod pa/ chos la nges par sems @102b pa'i bzod pa te/ spyod 'jug las/ gang zhig bsgribs te khro 'joms pa/ /de ni 'di dang gzhan du bde/ /zhes dang/ 'jug pa las/ gang phyir rgyal sras rnams la khros pa yis/ /sbyin dang khrims byang dge ba bskal ba brgyar/ /bsags pa skad cig gis 'joms de yi phyir/ /mi bzod las gzhan sdig pa yod ma yin/ /zhes gsungs pa ltar dang por phan yon dang nyes dmigs bsam nas nyams su len pa la gnod byed la ji mi snyam pa'i bzod pa ni/ sems can thams cad dgrar langs kyang/ zhes pa ni thams cad dgrar lang pa dngos su 'ong mi srid kyang rtag pa mtha' bzung gi tshig yin pas snying stobs bskyed pa'o/ /khro ba'i sems skad cig kyang mi bskyed par zhes pa skad cig ma la mang du yod kyang 'dir se gol gcig gtog pa'i yun la byas te de tsam yang mi khrol der ma zad gnod lan du phan pa bsgrub pa'i blo bskyed do/ /khro ba dag tshul mdor bsdus brjod pa ni/ dper na grwa sa zhig tu grwa pas chang 'thungs pa na/ de dge bskos kyis shes te rgyug pas brdungs pas lag pa chag pa na dge bskos la khro ba skye la/ de'i tshe dge bskos la rang dbang yod nas brdungs pa'am med bzhin du brdungs snyam na de la rang dbang med de dge bskos rang yang zhe sdang gis bskul zhing/ de bdag gi chang 'thungs pas bskul bas na rtsa ba rang la thug /de yang dngos su gnod pa la khro na rgyug pas dngos su gnod pa @103a @#/ /de la khro ba dang/ brgyud nas gnod pa la khro na dge bskos kyi zhe sdang la khro rigs/ yang dge bskos kyis brdungs pa de de'i rang bzhin yin na me ni tsha ba'i rang bzhin yin pas de la rang gis ma reg par byed dgos kyi reg na tsha ba'i rang bzhin yin pa dang mtshungs/ glo bur du 'byung ba yin na nam mkha' la skyon med kyang bar du sgrib byed kyi sprin zhugs pa de nam mkha'i skyon min pa ltar dge bsko la skyon med kyang de'i rgyud kyi nyon mongs kyis sgrib pas de la khro rigs so/ /de lta bu'i tshul gyis khro ba dgag cing/ de tsam gyis kyang mi chog par gnod lan du phan pa sgrub dgos pas sbyor ba'i sgo nas phan pa sgrub pa shin tu dka' bas de'i rgyur gsag sbyang la 'bad pa dang smon lam bya la/ sems kyis phan sems sgrub pa ni cung zad sla bas nges par bya dgos/ de ltar goms pas gzhan yang de lta bu la bkod nas rang gzhan gyi rgyud la bzod pa'i phar phyin la sogs pa rdzogs par bya/ sdug bsngal dang len gyi bzod pa ni/ zas nor dang gnas mal sogs kyis zhes sogs te/ dang du len lugs ni 'dis sngar gyi las ngan pa'i 'bras bu zad par bsam ste dga' ba bsgom zhing/ sdug bsngal gyi yon tan dran dgos pas sdug bsngal gyi skyo bas nges 'byung la sogs pa skye ste/ skyo bas dregs pa sel bar byed/ /'khor ba pa la snying rje skye/ /sdig la 'dzem zhing dge la dga'// @103b zhes gsungs pa ltar/ sdug bsngal mi 'dod na sdig pa spong dgos pa dang/ bde ba 'dod na tshogs gsog dgos pa shes par byas la sdug bsngal 'di mi 'dod rgyu med snyam pa blang dor gyi gsos 'debs pa dang/ khyad par chos phyir sdug bsngal byung ba la bzod bsran bskyed pa la brten nas thams cad mkhyen pa'i lam la nye bar 'gyur te/ nye lugs kyang lam ma zhugs kyi skabs nas tshogs lam la nye ba dang /de'i skabs kyi chos phyir sdug bsngal la bzod bsran bskyed pas sbyor lam la nye ba dang/ de bzhin du sgom lam nas mi slob lam gyi bar nye bar 'gyur bas na sdug bsngal 'di dag dang du blangs te rang gzhan gyi 'khor ba dang ngan song gi sdug bsngal rgyun bcad par bya/ gsum pa chos la nges par sems pa'i bzod pa ni/ sdom la/ dang ba sngon du bya ba dang/ /'dod pa dang ni blang dor gnyis/ /sgom pa gnyis dang thos bsam brgyad/ /ces pa ltar mos pa'i yul brgyad de/ gzhan yang dkar nag gi las kyi rnam par smin pa ni zhes pa blang dor gyi yul la mos pa gnyis/ /dkon mchog gsum gyi byin rlabs dang zhes pa ni dang pa'i yul/ sangs rgyas dang byang chub sems dpa' bsam gyis mi khyab pa dang/ zhes pa ni 'dod pa'i yul la thob 'dod bskyed pa ste/ mthu bsam gyis mi khyab pa zhes pa'i don sangs rgyas 'di'i mtshan lan gcig brjod na bskal pa khri'i sdig pa 'dag /ces pa lta bu la yid @104a @#/ /ches kyi dad pa bskyed pa/ bla na med pa'i byang chub dang gsung rab yan lag bcu gnyis dang/ zhes pa ni sgom pa'i yul/ byang chub sems dpa'i bslab pa'i gnas/ zhes pa ni thos bsam gyis rjes su sgrub pa'i yul lo/ /des na mos pa'i yul brgyad yod kyang 'dir tshig zin la drug las med pa ni/ bdag med gnyis la mos pa gnyis ma gsal yang don gyis chad pa ni mi sems te rgyal sras kyi spyod pa ni zab rgyas gnyis su 'du bas de'i khongs su tshang ba la dgongs par mngon/ /de rnams la nges pa ma rnyed pa ni ma bzod pa yin la/ yid ches kyi nges pa rnyed nas mos pa ni bzod pa yin pas 'bras bu shin tu che/ de la mos par byas nas bla na med pa'i byang chub thob pa'i phyir du/ zhes sogs ni snying po bsdus pa'i 'do tshig lta bu'o/ /bzhi pa brtson 'grus kyi nyams len ni/ brtson gang dge la spro ba'o/ /zhes dge ba'i bya ba la spro ba'i shugs phyin ci ma log pa brtson 'grus kyi ngo bo yin/ de la dbye na gsum ste go cha'i brtson 'grus ni/ mtshan dpe la sogs pa zhes sogs te/ mtshan so gnyis dang/ dpe byed brgyad cu'i sku'i yon tan/ gsung dbyangs yan lag re bzhi sogs sangs rgyas kyi chos re re bsgrub pa/ sbyin sogs phar phyin drug dang gzhan yang/ byang sems rnams kyi mi slob pa'i/ /dngos de gang yang yod ma yin/ /zhes byang sems kyi bslab bya ni shin tu rgya @104b che bas de rnams re re bsgrub pa'i phyir du dus bskal pa 'bum phrag re re gnas dmyal ba mnar med du gnas nas sangs rgyas kyi go 'phang bsgrub dgos na'ang brtson pa mi 'dor zhing spro ba bskyed na de las yun thung ba la brtson pa mi 'dor ba lta ci smos snyam pa/ dge ba chos sdud kyi brtson 'grus ni phan phyin drug la sogs pa'i zab pa dang rgya che ba'i dge ba'i chos rang gi rgyud la sdud par byed pa/ sems can don byed kyi brtson 'grus ni/ sems can gyi don bya ba bcu gcig gi sgo nas gzhan yang dge ba'i lam la bkod nas bla na med pa'i byang chub thob par byed pa ste/ 'di dag gi 'gal rkyen spang ba ni lo zla zhag re bzhin sang bya gnang bya'i ngang du lus pa phyi bshol gyi le lo dang/ dgra 'dul gnyen skyong dang khe tshong sogs dang gnyid rmugs sogs bya ba dman pa la mngon par chags pa ni bya ba ngan zhen gyi le lo dang/ sems can grangs mang zhing byang sems kyi spyod pa dka' la rgya che ba dang sangs rgyas kyi yon tan mtha' yas pas de 'dra bdag gi ga la nus snyam pa ni zhum pa'i le lo'o/ /de la phyi bshol gyi le lo byung na dal 'byor rnyed dka' dang mi rtag pa dang ngan 'gro'i sdug bsngal dran nas 'gog /bya ba ngan zhen gyi le lo byung na don med kyi rnam g.yeng sogs kyis tshe 'di'i don chen po las nyams shing/ phyi mar sdug bsngal du ma bskyed pa'i tshul bsam ste dgag /zhum pa'i le lo byung na/ bcom ldan @105a @#/ /'das kyis sbrang bu la sogs pas kyang brtson 'grus kyi stobs bskyed na sangs rgyas thob par gsungs na bdag ni dal 'byor gyi lus rten bzang po thob cing blang dor la spyod pa'i blo gros dang ldan pa yin pas brtson pa bskyed na byang chub cis mi thob snyam du gzengs bstod cing dus gsum gyi sangs rgyas rnams kyang sangs rgyas zin zhig de'i tshul ston pa ma yin par bdag lta bu'i mthu chung du zhig gis brtson par mdzad pa je bzang du song ste sangs rgyas 'grub pa yin snyam du bsam la dgag go/ mthun rkyen gyi rgyab dpung bsag pa ni/ dkar nag gi las 'bras spyi dang khyad par byang sems kyi spyod pa rnams kyi phan yon dang; de las 'das pa'i nyes dmigs dran nas yid ches kyi dad pa bskyed cing/ dang pas 'dun pa'i rten byed pas sangs rgyas la thob 'dod bskyed pa ni mos pa'i stobs/ dang po nas gya tshom du mi 'jug par legs par brtags te 'jug cing zhugs nas ni slar ldog par bya mi rigs te dang por dam bcas nas bar du 'dor ba la goms na skye ba gzhan du'ang 'dor bas nyes dmigs che ba dran te rnam mkhyen bsgrub pa gzhan su la'ang mi re bar bdag gcig pus bya ba dang/ bdag gis ni sgrub nus kyi gzhan gyis mi nus so snyam du nga rgyal dang 'dra bar sems kyi dpa' bskyed nas nam yang mi 'dor ba ni brtan pa'i stobs/ de ltar @105b mos pa dang brtan pa'i stobs bskyed nas dang por 'jug pa dang/ zhugs nas kyang 'phro mi gcod par byis pa rtse 'jos g.yeng ba na bza' btung sogs kyang mi dran par dga' bzhin du ngoms pa med par 'jug pa ltar bya ba ni dga' ba'i stobs/ de ltar brtson par byas bas lus sems ngal bar gyur ba na re zhig ngal gsos te slar gsos ma thag brtson par byed pa ni brtson 'grus rtsom pa la mkhas par byed pa dor ba'i stobs so/ de ltar stobs bzhi'i sgo nas brtson pa'i tshe yang dper na dmag 'thab pa la mkhas pas g.yul 'gyed pa'i tshe rang la tshur mtshon cha sogs kyi gnod pa la zur ba dang/ phar dgra bo 'joms pa gnyis ka bsgrub pa la 'bad pa bzhin sgrub pa po yang nyon mongs dang 'thab pa'i tshe nyon mongs pas tshur rang rgyud la rma 'byin pa la zur cing/ phar gnyen po bsten nas nyon mongs 'joms pa la mkhas par bya la g.yul ngor ral gri dang po nas ma shor ba la 'bad pa dang/ gal te shor kyang de ma thag len pa la brtson pa ni dgras bsad dogs kyi 'jigs pa tshig tsam min pa la rag las pa ltar dang por spang blang ma brjed pas dran pa shor dogs byed pa dang/ shor na de ma thag dran pa bsten pa yang dran pa nyams na nyes ltung gis gos pa'i 'bras bu sdug bsngal la 'jigs pa kha tsam min par rgyud la skyes pa la thug pas las 'bras la gdams pa'i mthil du byas nas skyong dgos par gsungs so/ /lnga pa bsam gtan gyi @106a @#/ /nyams len ni/ sems dge ba'i dmigs pa las gzhan du mi g.yeng bar gnas pa'i rtse gcig pa ni bsam gtan gyi ngo bo/ ngo bo'i sgo nas dbye na mthong lams dang po ma thob pa'i so skye'i rgyud kyi bsam gtan ni 'jig rten pa dang/ mthong lam thob pa yan chad 'phags pa'i rgyud kyi bsam gtan ni 'das pa'i bsam gtan/ phyogs kyi sgo nas dbye na zhi gnas kyi phyogs su bsdur rung ba dang/ stong nyid dmigs yul du byas pa'i lhag mthong gi phyogs su bsdur rung ba dang/ dpyad pa rang stobs kyis gnas cha 'dren nus pa'i zung 'brel gyi bsam gtan gsum mo/ /byed las kyi sgo nas dbye na mnyam par gzhag pas lus shin sbyangs kyi dga' bde khyad par can bskyed pa tshe 'dir lus sems bde bar gnas pa'i bsam gtan/ /mngon shes dang rdzu 'phrul dang zad bar dang zil gnon dang khyad par bdag med rtogs pa'i shes rab la sogs pa'i yon tan gyi rten byed pa'i bsam gtan/ mngon shes dang rdzu 'phrul thob pas ni sems can gyi don dpag tu med pa 'grub pas don bya ba bcu gcig gi sgo nas byed pa sems can gyi don byed pa'i bsam gtan sogs mdor na rgyal ba'i sras kyi bsam gtan rnam pa thams cad pa rnams la bslab par bya'o/ /drug pa shes rab kyi nyams len ni/ brtag bya'i dngos po la chos rab tu rnam par 'byed byed ni ngo bo/ /de la dbye na @106b chos rnams kyi gnas lugs sam sdod lugs rig pa ni ji lta ba'am don dam pa'i shes rab/ rig pa'i gnas lnga la mkhas pa ji snyed pa'am kun rdzob kyi shes rab ste bstan pa la mi dad pa rnams tshar bcad pa'i phyir sgra dang gtan tshigs rig pa/ dad pa rnams la phan gdags pa'i phyir bzo dang gso ba rig pa/ rang nyid kun shes par bya ba'i phyir nang rig pa la bslab pa ste/ sems can rnams kyi 'di dang phyi ma'i don bya tshul rtogs pa sogs rgyal ba'i sras kyi shes rab rnam pa thams cad pa la bslab par bya'o/ /de ltar phar phyin drug gis byang sems 'tshang rgya ba thams cad 'di la brten dgos pa dang/ dkar chos thams cad kyi rgya mtsho chen po yin pas nyams len gyi gnad 'gag sdom ba bla na med par gsungs pas 'bad par bya'o/ /gnyis pa gzhan rgyud smin par byed pa bsdu bzhi'i nyams len ni/ sbyin pa'i g.yab mos legs bos te/ zhes ba ltar thog mar sems can rnams dge ba la sbyar ba'i phyir 'khor du sdud pa la de dga' dgos pas de la zang zing byin nas sdud pa ni g.yab mos 'bod pa dang 'dra ba/ tshar bcad rjes 'dzin gyi sgo nas zhes pa ni/ de ltar bsdus nas ma dad pa rnams sgra tshad kyi rigs pas tshar bcad nas rjes su 'dzin pa/ snyan par smra lugs kyang thog mar 'jig rten lugs dang mthun par khams dri ba sogs bag phebs par byas te 'bel gtam gyi tshul du dge ba la bsgyur @107a @#/ /gang thub byed cing phar phyin drug ston pa/ don spyod pa ni ji ltar bstan pa ltar lag len la bkar te nyams su len du 'jug pa/ don mthun pa ni sgrub pa la zhugs pa de mi ldog pa'i phyir bstan pa'i don de nyid gzhan rnams las lhag pa'am/ ma mtha' ma nyams par rang gis nyams su len pa/ smin pa la 'jog tshul yang yang 'dir ni zang zing gis smon nas chos kyis grol bar byed pa 'di rnams kyi skabs su sems can gyi don la dmigs nas byang chub kyi sems dang mi 'bral bar byed pa ni shin tu gal che bas 'go mjug tu sems bskyed pa dang bdud rtsi 'bebs sbyang dmigs skor thams cad la nan tan bya zhing/ bsdu bzhi nyams su len pa la rje 'bi lung pas pan chen blo bzang chos kyi rgyal mtshan lta bu zhig dgos gsungs te khong gis mang 'gyed sogs kyi zang zing legs par stsal bas chos sde bkra shis lhun po zhes skyid pa'i tshad du byed pas der 'du/ / de nas rje rang nyid dang zur bzhi bla ma/ nang dang dpe cha'i dge rgan sogs kyis bslab pas snyan par smras te sngags khang du zhugs pa'i bar mdo sngags kyi gzhung la sbyangs/ de nas sngags khang gi bca' yig tu gsal ba bzhin lo gsum nas ri khrod du thon nas so sor phogs ja tshul dang dge tshul sogs kyi g.yog bskos te don spyod pas bsgom du gzhug/ rje rang nyid kyang gdul bya thams cad las khyad par 'phags par @107b thugs nyams su bstar bas rtogs pa mthar thug mnga' bas don mthun pa'o/ /spyir byang sems kyi spyod pa 'tha' yas kyang sdom che ba ni phar phyin drug dang bsdu bzhi gnyis yin te rang rgyud kyi sangs rgyas kyi rgyu tshogs smon pa la phar phyin drug dang/ gzhan rgyud smin pa ni bsdu bzhis 'grub pa'i phyir ro/ /gsum pa mjug tu ji ltar bya ba ni sngar bzhin dang/ gnyis pa thun mtshams su yang mdo phal po che dang ma mo bslab btus dang ma mo bsdus pa rnams la blta ba sogs sngar bzhin no/ gnyis pa phar phyin tha ma gnyis la bslab tshul la gnyis/ bsam gtan gyi ngo bo zhi gnas la bslab tshul dang/ shes rab kyi ngo bo lhag mthong la bslab tshul lo; ;dang po la gnyis/ thun gyi ngo bo la ji ltar bya ba dang/ thun mtshams su ji ltar bya ba'i tshul lo/ /dang po la sbyor dngos mjug gsum las/ dang po sbyor ba ni/ sngon 'gro'i rim pa spyi dang zhes pa ni sngar bshad pa'i sbyor ba'i chos drug ste bdud rtse 'bebs sbyang gi tshig bsgyur bya tshul yang lhan thabs su gsal ba ltar ro/ /khyad par skyes bu chung 'bring gi bsam pa sbyong ba dang zhes pa ni/ 'di la 'grel tshul gnyis te 'dir nyams su blang bar bya ba'i gtso bo ni theg chen gyi lam yin la/ de la byang chub kyi sems shugs drag la brtan pa zhig dgos shing/ de'i yan lag tu skyes bu chung 'bring gi dngos gzhi'i dmigs pa rgyud dang 'dres @108a @#/ /des skyod dgos pa'i don no/ /yang rnams pa gcig tu ni skyes bu chung 'bring gi lam bsgom pas 'khor ba spyi bye brag gi sdug bsangl la yid 'byung ba drag pos de las thar pa la bdag med rtogs pa'i shes rab dgos pa dang de la sngon du zhi gnas 'gro dgos pas chung 'bring gi lam sgom pa med mi rung yin pas dngos su gsal la/ byang chub kyi sems ni thar pa sgrub pa la phun sum tshogs pa'i yan lag yin pas tshig tu ma gsal te ji ltar yang sbyor chos kyi skabs su yon tan gzhir gyur ma'i sgo nas lam so so'i dmigs skor la nan tan byas pas sngar lam gyi rim pa la myong ba sne zin yod pa la des dgos pa 'grub pa yin/ sa bzang zhing zhes sogs ni zhi gnas kyi rgyu tshogs bsten pa'i tshul ste/ myur du zhi gnas 'grub par 'gyur ba'i rgyu ni nyan sa nas rgyu tshogs bcu gsum gsungs kyang/ slob dpon ka ma la shi la'i sgom rim tha ma nas rgyu tshogs drug gsungs shing/ de la gnad che ba phal cher 'dus pas rje rin po ches kyang drug po gsal bar gsungs pas de la mthun yul mtshan nyid lnga ldan ni/ mdo sde rgyan las/ blo ldan gang du sgrub pa'i yul/ /legs par rnyed dang gnas bzang dang/ /sa bzang ba dang grogs bzang dang/ /rnal 'byor bde ba'i yo byed ldan/ /zhes gsungs pa ltar/ legs par rnyed pa ni zas gos la sogs pa'i yo byed rnams log @108b 'tsho min par chos mthun gyi 'tsho ba rnyed sla ba/ gnas bzang ba ni dgra jag chom rkun dang gcan gzan la sogs pa mi dang mi min gyi 'tshe ba med pa/ sa bzang ba ni chu la sogs pa'i khams mi 'phrod pas nad gsar du mi bskyed pa/ / grogs bzang ba ni lta spyod mthun pa ste/ rgyal mchog lnga pas/ grib ma gnyis pa'i grogs dang lhan gcig tu/ zhes gsungs pa ltar/ dpen na rang gi grib ma ni rang langs na grib ma'ang lang ba dang rang 'gro na grib ma'ang 'gro ba sogs rang ji ltar byed pa ji lta ba bzhin grib mas byed pa ltar grogs kyang lta spyod mthun pa de lta bu zhig dgos te lta ba mthun pa ni las rgyu 'bras la ches cher brtsi ba dang/ spyod pa ni 'dul ba'i kun spyod sogs la tshul bzhin du spyod pa/ rnal 'byor ni zhi lhag gnyis yin la/ bde ba ni de gnyis bsgoms pa la nyin skye bo mang po'i rgyun lugs nyung zhing/ mtshan gcan gzan dang 'byung ba sogs klag cor gyi sgra med pas bsam gtan gyi tsher mas dben pa'o/ /tshul khrims rnam par dag pa la gnas nas zhes pa ni/ so thar dang byang sems kyi bslab bya'i nyes ltung gis ma gos shing/ gal te phra mos gos kyang nyes ltung dang zhag tu mi 'grogs par bshags pas dag pa ste/ 'di ni shin tu gal che ste/ dper na chu rnyog pas gos pa la gza' skar gyi gzugs brnyan mi 'char ba ltar sems rgyud nyon mongs pa'i rnyog pas gos pa la'ang yon tan khyad par can mi skye @109a @#/ /la; ting nge 'dzin gyis nyon mongs phra mo zlog pa la de'i sngon du tshul khrims kyis nyon mongs pa rags pa rnams bzlog dgos pas so/ /skye bo mang po dang 'grogs 'dris ha cang che ba dang/ zhes pa de rnams dang 'grogs pas bya ba mang ba ste/ nyo tshong dang sman dpyad skar rtsis dang zhi gnas kyi dmigs skor ston pa'i gzhung las gzhan pa'i dpe mang po blta ba dang/ yig 'phrin mang pa byed pa sogs sems g.yeng ba'i rgyu rnams spong ba'o/ /'dod pa la 'dun pa'i rnam rtog rags pa rnams spangs te zhes pa ni/ 'dod yon lnga la chags pa'i rnam rtog spong ba ste 'khor ba'i dngos po yid du 'ong mi 'ong thams cad mi rtag par 'jig pa'i chos can te de thams cad dang bdag myur du 'bral bas na gang gi phyir chags zhing sdang ba sogs byed snyam du bsam pa dang/ gtam gsar pa ya mtshan can nam sdug bsngal bskyed pa'i gtam thos pa na dga' ba dang sdug bsngal gyis sems g.yeng bar byed pa'i rgyu spong ba'o/ /'dod pa chung ba ni zas gos gnas mal la sogs pa bzang po dang mang po gsar du byung na snyam pa 'dod pa che ba yin la/ de spong ba ni 'dod ba chung ba'o/ / chog shes pa ni zas gos sogs ngan pa dang nyung du sngar yod pas chog shes pa ste de drug ni ting nge 'dzin gsar du skye ba dang skyes zin mi nyams shing 'phel ba'i rgyu tshogs te/ de'i nang nas kyang tshul khrims @109b dag pa dang/ 'dod pa la nyes dmigs su blta ba dang/ mthun pa'i yul bsten pa gsum ni gtso bo yin par gsungs/ de nas lus gnad 'cha' ba ni stan bde ba la zhes sogs lus kyi kun spyod gsum dang rlung ste bzhi dngos su gsungs nas sogs khongs nas bzhi ston pa ste lus gnad brgyad dang ldan pa ni sngar sbyor chos kyi skabs su bshad pa ji lta ba bzhin 'dir nges par lus gnad bca' dgos/ de ltar sngon 'gro'i rim pa rnams ji lta ba bzhin song nas/ dngos gzhi la zhi gnas sgrub pa'i dmigs rten du ma zhig gsungs kyang/ zhes sogs ni dmigs rten 'tshol ba ste/ spyir rnal 'byor ba'i dmigs pa ni bzhi ste/ khyab pa'i dmigs pa; spyad pa rnam sbyong gi dmigs pa/ mkhas pa'i dmigs pa/ nyon mongs rnam sbyong gi dmigs pa/ dang po khyab pa'i dmigs pa la yang bzhi ste/ rtog bcas kyi gzugs brnyan/ rtog med kyi gzugs brnyan/ dngos po'i mtha' la dmigs pa/ dgos pa yongs su grub pa'o/ /de ltar spyir ting nge 'dzin gyi dmigs rten du ma zhig gsungs kyang ting nge 'dzin yang 'grub cing zhar la dgos pa khyad par can gzhan yang 'grub pa ni dmigs rten 'tshol ba'i thabs la mkhas pa yin pas na/ gtso bor sangs rgyas rjes su dran pas bsod nams kyi tshogs dpag tu med pa gsog pa sa mchog tu 'gyur ba dang/ gsang sngags kyi lam bsgom na lha'i @110a @#/ /rnal 'byor sgom pa'i snod rung du 'gyur ba sogs dgos pa du ma yod pas lha'i sku la dmigs pa legs shing/ de la rang gi mdun du bsgom pa dang/ rang nyid lhar bsgom pa'i lugs gnyis gang byas kyang 'dra bas mdun du bsgoms na spyi bo'i bla ma lha'i thugs ka nas 'od zer sdom gyi ba thag lta bu zhes sogs te/ dmigs rten mthos na rgod pa skye ba dang/ dmas na bying ba skye zhing brnyas par yang 'gyur bas lte ba'i thad tsam du bya ba ni mtho dma' ran pa'o/ /dmigs rten chung bzhin pa la sems 'dril bas ting nge 'dzin skye sla bas rgya sran gyi 'bru tshad tsam du gsungs la/ dang por 'char mi bden mtshon gang ngam sor do dang/ bskum 'khyid gang ngam sor drug gi tshang tsam bya/ yang na spyi bo'i bla ma lha las sku gnyis pa zhig rang la thim pas seng khri pad zla nyi gdan la rang nyid rgyal ba shAkya thub pa zhes sogs mngon rtogs ltar bskyed nas snang la rang bzhin med pa la sems rtse gcig tu dmigs par bya ste/ de yang dang por ston pa'i sku gzugs byon gtsang ba zhig la yang yang blta ba'am yang na bla mas legs par brda sprad pa ltar bsam ste zhal dang spyin la sogs pa'i cha byed rnams nges par byas la bsgom pa'i tshe 'bur sku lta bu'i lder lder po dang/ bris sku lta bu'i leb leb mo'i rnam pa min par snang stong tshogs pa me long gi gzugs @110b brnyan bzhin bsgom par bya/ de'i tshe ser po bsgom pa la dmar ba dang sngo ljad 'char ba lta bu kha dog ma nges pa dang/ bzhugs pa'i rnam pa bsgom 'dod pa la bzhengs pa'i rnam pa 'char ba sogs dbyibs ma nges pa dang; gcig bsgom 'dod pa la du ma 'char ba grangs ma nges pa dang/ chung ba bsgom 'dod pa la che ba'i rnam pa 'char ba ste che chung dmigs rten gyi tshad 'di tsam zhig bya'o snyam pa de las che chung 'char ba ni che chung ma nges pa ste de rnams kyi rjes su mi 'brang bar rtsa ba'i dmigs rten la sems rtse gcig tu dmigs par bya/ dang po nas dang gsal 'od kyi rang bzhin can gyi gsal po rang ma byung yang/ dbu dang phyag gnyis dang sku'i khog dang zhabs gnyis rim pa bzhin lan 'ga' regs la btab la/ sku'i don spyi cha phyed tsam shar ba na de tsam gyis chog shes byas nas de la rtse gcig tu dmigs nas skyong dgos te/ dang po nas cha phra mo rnams kyang ji lta ba bzhin 'char du re ba'i yang yang gsal btab na dmigs pa cung zad gsal du 'gro yang gnas cha'i ting nge 'dzin mi rnyed pas gegs su 'gyur zhing/ cha phyed tsam gsal ba de la sems bzung na ting nge 'dzin myur du rnyed nas gsal cha bde blag tu 'grub par gsungs/ de yang dmigs pa 'di la gtad yod pas thun 'di tsam gyi bar la bying rgod gtan nas ma byung ba zhig byed cing/ de la bsgom rim tha ma las/ de lta bu'i @111a @#/ /rim pa 'dis chu tshod gcig gam/ me la tshe thun phyed dam thun gcig gam ji srid nus pa de srid du 'jug par bya'o zhes gsungs pa ltar/ dang por thu na chung la grangs mang ba byas nas skyong dgos te rje rin po ches kyang nyin rer thun bco brgyad tsam mdzad cing nyin zhag gcig drug bcur bgos pa'i cha gcig la chu tshod gcig dang/ nyin zhag gcig bcu drug tu bgos pa'i cha gcig la mel tshe thun phyed kyi tshad du bshad pa ltar thun tshad ji tsam nus pa de tsam gyi bar la bying rgod gtan nas ma byung ba zhig byed cing/ gal te byung na de ma thag shes par byas nas spong snyam pa'i 'dun pa drag po btang nas sems dmigs rten la gtad pa de yang yang dran tsam dran tsam byas nas skyong ba ni las dang po bas sems gnas sgrub pa'i thabs dam par gsungs te dpe cha skyor byang byed pa dang me gso ba ltar gnad shin tu che/ de nas ting nge 'dzin gyi rnam gzhag bstan pa'i phyir mdor na ting nge 'dzin rnam par dag pa zhig sgrub na/ nyes pa lnga spong 'du byed brgyad/ /bsten pa'i rgyu las 'byung ba'o/ /zhes sogs gsungs te/ mgon po byams pas dbus dang mtha' rnam par 'byed pa las/ der gnas las su rung ba nyid/ /don rnams thams cad 'byor par 'gyur/ /nyes pa lnga spong 'du byed brgyad/ /bsten pa'i rgyu las 'byung ba'o/ /le lo dang ni gdams ngag rnams/ /brjed dang byed @111b dang rgod pa dang/ /'du mi byed dang 'du byed de/ /'di dag nyes pa lngar 'dod do/ /gnas dang de la gnas pa dang/ /rgyu dang 'bras bu nyid du 'o/ /dmigs pa brjed par ma gyur dang/ /bying dang rgong pa rtogs pa dang/ /de spong mngon par 'du byed dang/ /zhi tshe rnal du 'jug pa'o/ /zhes gsungs pa ltar/ gnas ni don gnyer gyi 'dun pa dang/ gnas pa ni brtson 'grus las rung gi ting nge 'dzin skye ba/ dmigs pa brjed par ma gyur pa ni dran pa dang/ bying rgod rtogs pa'i shes bzhin dang/ de spong ba'i 'du byed dang/ bying rgod zhi ba'i tshe 'du mi byed par rnal du 'jug pa'o/ /don gnyer gyi 'dun pa 'ong ba la/ de'i sngon du ting nge 'dzin gyi yon tan mthong ba'i yid ches kyi dang pa dgos te dang bas 'dun pa'i rten byed par gsungs so/ /des na dang por ting nge 'dzin gyi yon tan shes dgos pas/ theg pa che chung gi 'jig rten dang 'jig rten las 'das pa'i yon tan thams cad zhi gnas dang lhag mthong gi 'bras bur gsungs te/ dge ba'i dmigs pa la sems rtse gcig pa yan chad kyi ting nge 'dzin rnams zhi gnas kyi phyogs su 'du ba dang/ ji lta ji snyed kyi don la so sor dpyod pa'i dge ba'i shes rab lhag mthong gi phyogs su 'du bas zhi lhag rjes mthun pa dang dngos gzhi gnyis kyi dbye ba 'byed dgos/ gzhan yang zhi gnas grub na sems la dga' ba dang lus la bde ba rgyas pas mthong chos @112a @#/ /la lus sems bde bar gnas shing yul phyin ci log gong nas gong du bskyed pa'i gnas ngan len zhi nas dge ba la ci 'dod pa kol du btub pas dge sbyor mtha' dag pogs lhag par che zhing rang dbang med par phyin ci log gi yul la g.yeng ba zhi nas nyes spyod nyung ba dang/ nyon mongs mngon gyur 'gog non pa dang/ mngon shes dang rdzu 'phrul sogs thob te rang gzhan gyi don rgya chen po 'grub pa dang/ khyad par zhi gnas la brten nas lhag mthong gi rtogs pa skye bas 'khor ba'i rtsa ba myur du gcod par nus pa sogs yon tan shin tu che la/ de la nges shes 'drongs pa na de lta bu'i ting nge 'dzin thob par 'dod pas don gnyer gyi 'dun pa dang/ de'i phyir 'bad pa'i brtson 'grus rtsom pa dang/ brtson 'grus kyis bskyangs pa'i 'bras bur lus sems dga' bdes drangs pa'i shin sbyangs skye la/ des ni le lo rtsa ba nas bzlog go /theg pa gnyis kyi yon tan bsgrub pa la zhi lhag gnyis ka bsgom dgos pa ni/ dper na mtshan mo logs bris lta ba'i phyir mar me gsal ba dang rlung gi mi g.yo ba gnyis ka dgos kyi/ mar me mi gsal ba'am gsal yang rlung gis bskyod na gzugs brnyan rnams gsal por mi mthong ba ltar zab mo'i don blta ba la'ang de kho na nyid kyi don phyin ci ma log par nges pa'i shes rab dang/ sems dmigs pa la ci 'dod gnas @112b pa'i mi g.yo ba gnyis ka dgos te/ zhi gnas ma grub pa'i sngon du bdag med pa'i don so sor rtog pa'i shes rab kyis dpyad kyang rlung nang gi mar me ltar sems ha cang g.yo bas bdag med pa'i don spyi gsal bar mi 'gyur la/ zhi gnas grub nas dpyad pa na g.yo ba'i skyon med par bdag med kyi don spyi gsal bar 'gyur bas/ de ltar na lhag mthong gi sems mi g.yo ba'i cha de zhi gnas las skye yi de'i yin lugs rtogs pa'i cha zhi gnas las mi skye ste/ dper na mar me gsal ba'i cha sdong bu dang snum sogs las skye yang mar me mi g.yo ba'i cha de yol ba sogs las skye ba bzhin no/ /ting nge 'dzin la brtson pa'i tshe gdams ngag brjed pa nyes pa yin pas/ de'i gnyen por dran pa ste/ dran pa yang gzhan gyis dris pa na shod rgyu yod pa lta bu'i dmigs rten ma brjed pa gcig pus mi chog gi /sems dmigs rten la rtse gcig tu dmigs nas rig pa ngar ldan du byas pa'i gsal zhing nges pa'i nges shes dam spring nge bde'i rgyun ma nyams pa ste/ dran pa gang zhe na 'dris pa'i dngos po la sems kyis brjed pa med pa ste rnam par mi g.yeng ba'i las can no zhes gsungs te yul ni sngar 'dris pa'i dngos po dang 'dzin stangs brjed pa med pa dang byed las gzhan du rnam par mi g.yeng ba ste khyad chos gsum ldan zhig dgos/ ting nge 'dzin la mnyam par gzhag pa'i tshe bying @113a @#/ /rgod gnyis nyes pa yin pas de'i gnyen por shes bzhin te zhes sogs ni/ shes bzhin skye ba la rgyu gnyis te dran pa dang mi mthun phyogs 'byung min brtag pa ste/ dran pa yang yang gso pa dang/ shes bzhin gyis bying rgod gang la song brtags nas yang dran pas dmigs rten gyi steng du bsnan skyin bsgom zhing dran shes gnyis ha cang myur ba'ang skyon du 'gyur bas ji ltar 'tshams par dran pa dang shes bzhin gnyis re mos su byas te skyong ba'o/ 'o na rmugs pa dang bying rgod gnyis kyi khyad par ji lta bu zhe na dmigs rten mi gsal ba'i lus sems lci ba'i rnam pa can ni rmugs pa yin la/ zhes pa rmugs pa ni gti mug gi char gtogs lus lci bas las su mi rung ba dang/ sems lci ba'i rnam pa can las su mi rung ba mi dge ba dang bsgribs la lung ma bstan yin la bying ba ni ma bsgribs la lung ma bstan dang dge sems kyang yod cing sems la mun pa babs pa lta bu'am mi mun par zhugs pa lta bu'am/ mig btsum pa lta bu sems kyis dmigs pa gsal bar mi mthong zhing/ sems dmigs rten las gzhan du mi 'phro yang/ rig pa dwangs pa'i dwangs cha dang dmigs rten gsal ba'i gsal cha med par dran pa'i shugs zhan du song ba ni bying ba rags pa dang yul can gyi sems dwangs cha dang dmigs pa'i yul @113b gsal cha yod kyang dmigs rten nges pa'i nges shes dam sgring nge ba las cung zad zhan du 'gro tshad pa na bying ba phra mo bslebs pa/ ngar cha yod kyang gsal cha med pa ni bying ba 'bring/ bying ba phra mo dang 'bring byung na 'dzin stang dam du btang nas spong/ des ma sel na dkon mchog gsum gyi yon tan dran pa ste sangs rgyas kyi sku'i yon tan gtso bor dran/ des kyang ma sel na nyi zla rgyu skar dang me 'od la sogs pa snang ba'i mtshan ma dang/ khyad par dmig rten gyi lha sku 'od kyi phung po'i dkyil na bzhugs par bsgom pa ni mthun mong min pa'i snang ba'i mtshan ma yid la byed tshul lo/ /da dung byid ba ma sel na gdong pa chus rlan pa dang gos srab tu gtong ba dang/ rlung sems nam mkha' dang bsre ba'i gdams pa bya ste/ pha dam pas/ byid na phags kyis bsang ba yin/ zhes gsungs pa ltar/ rang gi lus 'ja' 'od lta bu'i lte ba'i dbus su rang gi shin tu phra ba'i rlung sems thig le dkar dmar lcog sgong tsam bsam la/ phags; snying gar slebs/ phags; mgrin par slebs/ phags; spyi bo nas rgyangs kyis thon pa rgya je cher yar song nam mkha'i dbyings dang dbyer med du 'dres par bsam zhing/ bying ba bsangs pa na star gyi 'phro la 'jug /sems dmigs rten la g.yo med du mi gnas par cung zad 'phro ba ni rgod pa phra mo yin la/ zhes pa la rgod pa ni sngar myangs pa'i 'dod yon la rjes su chags pa'i sems rnam par ma zhi @114a @#/ /ba yin te/ rgod pa gang zhe na sdug pa'i mtshan ma'i rjes su 'jug pa'i 'dod chags kyi char gtogs pa'i sems rnam par ma zhi ba ste zhi gnas kyi bar du gcod pa'i las can no zhes gsungs pa ltar 'phro ba thams cad rgod pa min pas rgod pa rgya chung/ 'phro ba rgya che bas rgod pa la 'dod chags kyis kun nas blangs pa nges par dgos/ des na 'dod chags kyi yul la 'jug pa ni rgod pa yin pas rgya chung/ zhes sdang sogs nyon mongs gzhan gyi yul la 'jug pa ni rnam g.yeng zhes cung zad rgya che/ dge ba'i yul la'ang 'jug pa ni 'phro ba zhes bya ste dge ba'i sems dang sems byung ci rigs su 'gro bas de bas kyang rgya che ba'o/ /rgod pa phra mo byung na dran shes bsten nas bsgom/ des kyang mi gnas par chags yul rnams la 'phro ba ni rgod pa rags pa yin la/ de'i gnyen por 'chi ba mi rtag pa dang/ ngan song gsum dang 'khor ba'i sdug bsngal bsam ste sems skyo ba'am dma' bar byas te spong/ da dung ma sel na rgod pa btsan thabs su gcod pa'i gdams ngag ni/ dam pas/ 'phro na rtsa ba gcod pa yin; zhes gsungs pa ltar/ steng rlung srog 'dzin dkar po sna bug nas 'jug la lte bar mnan/ 'og rlung thur sel ser po 'then nas thig le lcog sgong tsam la dmigs nas rlung kha sbyar ci thub 'dzin/ mi thub pa na sna nas btang la slar yang bzung/ yang na rang nyid lha sku'i dmigs rten @114b gsal bzhin pa'i ngang nas steng rlung bzung ba yang yang bya ba ni sngags kyi bya rgyud kyi srog rtsol sdom pa'i dmigs pa yin pas de ltar byas kyang tshog la/ rgod pa chod nas sngar gyi 'phro la 'jug /bying rgod gnyis nyes pa gcig tu brtsi ba ni gnyis ka shes bzhin gcig gis rig pa'i phyir gcig tu brtsis pa'o/ /de ltar dmigs ten la gsal cha'i ngar zin pa la bying bas bar du gcod la/ rtse gcig pa'i mi rtog bsgrub pa la rgod pas bar du gcod pas bying rgod gnyis ting nge 'dzin rnam dag 'grub pa la gegs kyi gtso bor 'ong ba'i rgyu mtshan de ltar yin pas bying rgod phra rags rnams legs par ngos zin par byas te 'gog par byed pa'i thabs la 'bad par bya/ bying rgod gnyis byung ba'i tshe 'du mi byed pa nyes pa yin pas de'i gnyen por zhes sogs ni/ bying rgod gnyis byung ba shes bzhin gyis rig kyang mi spong ba ni nyes pa yin pas de'i gnyen por bying rgod gang byung yang byung ma thag 'thad pas spong ba'i 'du byed bsten pa'o/ /de yang dmigs rten la ches cher bsgrims pa'i rig pa ngar ldan du byas na gsal cha yod kyang/ rgod pa shes che bas ka dam chus bkang nas mnan pa ltar phar 'gyur tshul 'gyur byed pas gnas cha rnyed dka' la/ cher ma bsgrims par glod na gnas cha yod kyang bying ba shas che zhing gsal cha rnyed dka' bas shad mi snyoms pa ni slob dpon tsaNDa go mis/ brtson pa bsten na rgod pa skye 'gyur @115a @#/ /zhing; ;de spang na ni zhum pa skye bar 'gyur/ /'di yi rigs par mnyam 'jug rnyed dka' na/ /bdag gi sems dkrugs pas ni ci zhig bgyi/ /zhes gsungs/ des na rang nyams la dpags te rig pa 'phang 'di tsam zhig /ces pa nas skyon med 'grub kyi zhes pa'i bar ni skyong tshul gsal zhing shin tu legs pa'o/ /de dag gi tshe dbu ma snying po las/ sems kyi glang po log 'gro ba/ /dmigs pa'i ka ba brtan po la; ;dran pa'i thag pas nyer bcings nas/ /shes bzhin lcags kyus ram dbang bya/ /zhes gsungs pa ltar dper na glang po che ma dul ba ka ba'am sdong po la btags te glang rdzis ji ltar bslab pa ltar byed na legs kyi; mi byed na lcags kyu rnon pos yang yang cher bcad nas 'dul ba ltar/ sems kyi glang po ma dul ba'ang dmigs rten gyi ka ba brtan po la dran pa'i thag pas legs par brtags te de la mi sdod na shes bzhin gyi lcags kyus rim bzhin du dbang du bya ba'o/ /de ltar bskyangs pas sems gnas dgu pa'i gnas su yang na bying ba dang yang na rgod par 'gyur ba'i bying rgod phra mo yang chod nas mi mnyam pa med par sems ting nge 'dzin la rgyun chags su 'jug pa'i tshe bying rgod kyi zon byed pa'i rtsol ba'am 'du byed pa nyes pa yin pas/ de'i gnyen por sngar bshad pa'i bying rgod kyi gnyen po 'du mi byed par btang snyoms su glod nas @115b 'jog pa'o/ /glod ces pa ni shes bzhin mi byed pa yin gyi dran pa'i ngar cha gtod pa ma yin zhing/ glod pa'i dus kyang bying rgod phra mo chod pa'i dus 'dir glod pa yin gyi gzhan lugs ltar sems gnas gnyis pa la sogs pa'i skabs su glod pa yang min pa ni rje rin po che'i thun mong min pa'i bzhed srol rmad du byung ba'o/ /de lta bu'i tshul gyi legs par bskyangs pas sems gnas dang po 'jog pa ni dmigs rten gsal byung ba na de la sems 'jog pa/ /gnyis pa rgyun du 'jog pa ni dang por gtad pa de yang yang dran pas rgyun cung zad 'thud nus pas rgyun du 'jog pa/ gsum pa blan te 'jog pa ni brjed nges kyi g.yeng ba na de ma thag dmigs rten la blan pa'o/ /bzhi pa nye bar 'jog pa ni rgya che ba las yang yang bsdus te phra bar byas nas gong nas gong du 'jog pa/ lnga pa dul bar byed pa ni ting nge 'dzin gyi yon tan bsam nas dga' bar byed pa/ drug pa zhi bar byed pa ni rnam g.yeng gi skyon mthong nas ting nge 'dzin la mi dga' ba zhi bar byed pa/ bdun pa rnam par zhi bar bye pa ni chags sems dang yid mi bde dang gnyid rmugs la sogs pa dang du mi len par zhi bar byed pa/ brgyad pa rtse gcig tu byed pa ni bying rgod kyis bar chad med par rgyun chags par ting nge 'dzin gyi rgyun la 'jog pa/ dgu pa mnyam par 'jog pa ni rgyun du byed pa goms pas lhun grub tu 'jug pas sems mnyam par gyur pa'i 'du @116a @#/ /byed btang snyoms te sems gnas pa dgu rim gyis thob par 'gyur la/ de yang sems gnas dgu po stobs drug dang yid byed bzhis 'grub cing/ nyams lnga 'char bar yang gsungs pa'i stobs drug gis 'grub lugs ni/ sems gnas dang po ni thos pa'i stobs kyis 'grub pa ste gdams ngag thos nas dmigs pa la gtad pa tsam mo/ /sems gnas gnyis pa ni bsam pa'i stobs kyis 'grub ste dmigs pa la gtad pa de yang yang bsams nas bskyangs pas rgyun cung zad 'thud nus pa'o/ /sems gnas gsum pa dang bzhi pa ni dran pa'i stobs kyis 'grub ste dmigs pa las gzhan du g.yeng ba na sngar gyi dmigs rten dran nas g.yeng ba sdud pa dang/ dang po nas dran pa'i shugs bskyed de mi g.yeng bar byed pas sems gnas lnga pa dang drug pa gnyis shes bzhin gyi stobs kyis 'grub ste/ 'phro ba'i nyes dmigs shes bzhin gyis rig nas 'phror mi ster ba/ sems gnas bdun pa dang brgyad pa gnyis brtson 'grus kyi stobs kyis 'grub ste rnam rtog dang nye nyon phra mo byung ba'ang rtsol bas spangs te dang du mi len pas bying rgod sogs kyis ting nge 'dzin la bar gcod mi nus pas rgyun chags su skye ba'i ting nge 'dzin 'grub/ sems gnas dgu pa ni yongs su 'dris ba'i stobs kyis 'grub ste/ de ltar goms pa ches pa'i stobs kyis 'bad rtsol med par dang gis 'jug pa'i ting nge @116b 'dzin 'grub pa'i phyir/ des na sems gnas brgyad pa dang dgu pa gnyis la bying rgod sogs kyi bar du mi gcod pas ting nge 'dzin la rgyun chags su 'jug pa 'dra yang/ brgyad pa'i skabs su dran shes bar ma chad du bsten dgos pas 'du byed pa'am rtsol bcas dang/ dgu pa la ni dang por dmigs pa la gtod pa'i dran pas lan gcig bzhag na de nas dran shes na re rgyun ldan du ma bsten yang ting nge 'dzin de'i 'phro mi chad par rgyun chags su 'jug pas 'du mi byed pa'am rtsol med kyi ting nge 'dzin zhes bya'o/ /yid byed bzhi ni sems gnas dang po dang gnyis pa la ni 'bad pa chen pos bsgrim dgos pas bsgrims te 'jug pa'i yid byed ces bya/ sems gnas gsum pa nas bdun pa'i bar lnga la bying rgod kyi bar du bcad nas thun ring po skyong mi nus pas skabs su chad cing 'jug pa'i yid byed ces bya/ sems gnas brgyad pa la ni bying rgod kyi bar gcod med pas rgyud gcig tu byed pa zhes kyang bya ste skabs su chad pa med par 'jug pa'i yid byed ces bya/ sems gnas dgu pa la ni rtsol ba bsten mi dgos pas lhun gyis grub pa'am rtsol ba med par 'jug pa'i yid byed ces bya'o/ /nyes pa lnga ni sems gnas dang po'i skabs su rnam rtog ri gzar gyi rbab dang 'dra bar gcig rjes su gcig 'byung ba rgyun bar las rtog pa mang du song ba lta bu 'byung ste rnam rtog ngos zin pa'i nyams/ sems gnas gnyis @117a @#/ /pa'i skabs su cong rong zab mo'i 'bab chu chung du ltar res rnam rtog zhi zhing res mthol gyis skye bas rnam rtog ngal gso ba lta bu'i nyams/ sems gnas gsum pa nas bdun pa'i bar lnga la lung pa phu gsum gyi rdzing chu ltar 'gal rkyen med pa'i tshe na gnas la rkyen byung ba'i tshe mi gnas pas rnam rtog gis bar du gcod cing slar yang gnyen po bsten pas g.yeng ba bzlog pa ni rnam rtog thang chad pa'i nyams te skabs skabs su mi gnas pa'o/ /sems gnas brgyad pa'i skabs su rgyu mtsho'i khar rlabs cung zad yod kyang gting mi g.yo ba ltar rtog pa ci byung yang gnyen po dran 'dzin cung zad bsten pas rang mal du zhi ste ting nge 'dzin g.yo mi nus pas rnam rtog mngon par 'du byed pa zhes pa'i nyams/ sems gnas dgu pa'i tshe na rgya mtsho rlabs dang bral ba ltar rkyen ci byung yang gnyen po bsten pa'i 'bad rtsol la ma ltos par ting nge 'dzin la gnas pas rnam rtog mngon par 'du mi byed pa'i nyams 'byung bar gsungs/ de lta bu'i tshul gyis legs par bskyangs pa na sems gnas pa dgu bying rgod phra mo dang bral bar thun ring du gnas pa dang/ dran shes rgyun ldan du bsten pa'i rtsol ba la mi ltos par lhun gyis grub cing sems shin tu brtan pa'i mi rtog pa dang rig pa ngar ldan gyi gsal cha thob kyang zhi gnas rjes mthun pa yin gyi zhi gnas @117b dngos thob pa ni ma yin te/ ting nge 'dzin de ni 'dod khams kyi sas bsdus pa yin pas 'dod sems rtse gcig pa zhes mnyam par ma bzhag pa'i sa'o/ /zhi gnas dngos gzhi 'grub pa la ni shin sbyangs thob pa sngon du 'gro dgos te/ de yang shin sbyangs zhes pa ni dge ba'i bya ba la ci 'dod du bkol du mi rung ba'i lus dang sems kyi gnas ngan lan dang bral nas shin tu las su rung ba ste/ lus lci ba la sogs pa'i las su mi rung ba dang/ bral nas lus ldang ba yang ba ni lus las su rung ba dang/ sems dge ba'i dmigs pa la gtong pa la dga' mgur 'jug tu mi rung ba dang bral nas dmigs pal thogs med du 'jug pa ni sems las su rung ba ste mdor na dge ba'i bya ba la/ 'jug pa na ma cher snang gis lus sems 'jug par dka' bas lus sems las su mi rung ba log nas lus sems shin tu bkol bde ba'o/ /shin sbyang skye ba'i rim pa na thog mar sems shin sbyang/ de nas lus shin sbyang/ de nas lus shin sbyang gi bde ba/ de nas sems shin sbyang gi bde ba rnams skye ba yin te las rung gi shin sbyang phra mo sems gnas gnyis pa'i skabs tsam nas 'byung yang rig dka' la/ shin sbyang rags pa brtag sla ba ni dgu pa'i skabs 'dir 'byung ste klad pa lci bem pa bde ba'i rnam pa can skra zhar ma thag sbar mo bkab pa lta bu byung ba na shin sbyang skye ba'i snga ltas yin pas de byung ba na @118a @#/ /sems kyi gnas ngan len dang bral nas nyon mogs spong ba la dga' ba'i bar gcod byed pa'i gnyen po sems shin sbyang skye/ de nas sems shin sbyang skyes pa de'i mthus las rung gi rlung lus kyi cha thams cad la khyab par gyur cing des lus kyi gnas ngan len dang bral nas lus shing ba la ltar yang bas las su mi rung ba'i gnyen po lus shin sbyang skye/ de ltar lus shin sbyang thog mar skyes pa ni rlung gi mthus lus la bde ba'i nyams chen po'i dbang shes 'khor gyi tshor ba bde ba skyes te lus shin sbyang gi bde ba skye/ des de ma thag rkyen byas pa la brten nas yid shes 'khor gyi tshor ba bde ba skyes te sems dga' yal yal ba'i nyams phul du byung ba 'byung bar gsungs te de'i tshe yang zhi gnas cung zad ma thob la/ sems dga' bas g.yeng ba lta bu de cung zad chung du song nas sems dmigs pa la lhan ne gnas pa de'i tshe na bsam gtan dang po'i nyer bsdogs kyi ting nge 'dzin thob pa dang dus mnyam du zhi gnas dngos gzhi 'grub ste mnyam par gzhag pa'i sa pa'i yid byed chung shos thob pa yin no/ /sems dga' yal ba de chung du song bas shin sbyang zad pa ma yin te dper na gtam snyan thos ma thag sems la dga' ba chen po skye bslar dga' ba de chung du 'gro yang/ gtang snyan mi bden pa ma yin pa dang 'dra zhing de @118b lta bu'i ting nge 'dzin thob pa na rje rin po ches/ bzhag na g.yo med ri yi dbang bo bzhin/ /gtang na dge ba'i dmigs pa kun la 'jug/ ces gsuns pa ltar byams pa dang snying rje la sogs pa gang gi steng du mi dpyod par 'jog pa'i tshe ci 'dod du gnas shing/ gang dang gang la dpyad sgom byed pa na yur ba bde mo la chu 'dren pa ltar gang du khrid pa de las gzhan du mi 'phro bas bogs lhag par che ba'o/ /yon tan khyad par can dang ldan pa'i ting nge 'dzin de thob pa nas lam mtho dman gang du 'jog na/ ting nge 'dzin de grogs gzhan la ma ltos par rang gi ngo bo'i sgo nas ni phyi pa dang nang pa gnyis ka'i ting nge 'dzin mthun mong pa yin gyi/ theg pa mchog dman gang gi yang lam du bzhag par mi nus la/ 'di nyid bdag med pa phyin ci ma log bar rtogs pa'i lta ba dang/ srid pa mtha' dag gi skyon mthong nas thar pa don gnyer gyi nges 'byung gi bsam pas zin na thar pa'i lam du 'gyur la/ byang chub kyi sems kyis zin pa na theg pa chen po'i lam du 'gyur ba yin no/ /gsum pa 'jug tu ji ltar bya ba dang/ gnyis pa thun mtshams su ji ltar bya tshul ni go sla'o/ /gnyis pa shes rab kyi ngo bo lhag mthong la bslab tshul la gnyis/ thun gyi ngo bo la ji ltar bya ba dang/ thun mtshams su ji ltar bya ba'i tshul lo/ /dang po la sbyor dngos mjug gsum las/ dang po sbyor ba ni/ zhi gnas kyi skabs su @119a @#/ /bshad pa dang 'dra la/ zhes pa ni sngon 'gro'i rim pa sbyor ba'i chos drug dang/ sa bzang ba sogs lhag mthong gi rgyu tshogs bsten pa rnams zhi gnas kyi skabs nas 'byung ba ji lta ba bzhin te/ de yang skyes bu chung 'bring gi bsam pa sbyong ba med mi rung dang/ chen po'i lam byang chub kyi sems kyis stong pa nyid rtsis zin pa ni phun sum tshogs pa'i yan lag yin te/ dang por 'khor ba'i nyes skyon bsam pas yid sun te 'khor ba la 'dor 'dod skyes pa zhig dgos shing/ de yang rgyu mi log na 'bras bu mi ldog par mthong nas 'khor ba'i rtsa ba de gang yin snyam du rtsad bcad pa na 'jig lta'am ma rig pa nyid 'khor ba'i rtsa bar 'gro lugs la nges pa 'drongs nas de spong 'dod bcos min skyes pa na bdag med rtogs pa'i shes rab bskyed nas bdag de dgag dgos par mthong ste/ bdag de yod pa la gnod byed dang med pa'i sgrub byed lung rigs la brten nas nges pa rnyed pa zhig thar pa don du gnyer ba rnams la med pa'i thabs med la/ bdag dang bdag gi ba la rang bzhin cung zad kyang med par nges pa'i lta ba rnyed pa nas de'i don goms par byas pas bdag dang bdag gir 'dzin pa'i 'jig lta bzlog la/ de log na 'dod pa nye bar len pa sogs len pa bzhi ldog cing/ de log pa na len pa'i rkyen gyis srid pa 'byung ba med par 'gyur ro/ /des na skye shi 'khor ba @119b brgyud pa 'di ni las las skyes la/ nyon mongs can gyi sems dang ldan pa'i lus ngag yid gsum gyi 'du byed kho na 'khor ba 'grub pa'i las yin pas las ni nyon mongs las skye'o/ /chags sdang sogs 'jig lta'i rtsa ba can gyi nyon mongs de dag tshul bzhin ma yin pa'i rnam rtog las skye zhing/ rnam rtog de ni rang gzhan dang ka bum dang gzugs tshor la sogs pa 'di dang 'di bden no snyam pa'i bden 'dzin gyi spros pa las skye bas so/ /des na stong pa nyid kyis bden 'dzin gyi spros pa zhi ste spros pa dang bral zhing/ de la brten nas rnam rtog bzlog la de log pas nyon mongs bzlog pa dang/ las nyon log pas skye ba bzlog pa'i phyir stong pa nyid kyi lta ba srid pa'i rtsa ba gcod byed dang thar pa'i lam gyi srog dang 'dra bar nges pa brtan po rnyed dgos par gsungs so/ /rgyu mtshan de'i phyir dge ba'i bshes gnyen mkhas pa tshul bzhin du bsten pa las dri ma med pa'i gzhung lugs nyan te thos bsam gyi shes rab kyis stong pa nyid kyi lta ba skye dgos shing/ de la grub mtha'i dbye ba bye brag smra ba dang/ mdo sde pa dang/ sems tsam pa dang/ dbu ma pa dang/ phyi ma la yang dbu ma rang rgyud pa dang/ thal 'gyur ba gnyis su yod ba las ji 'dra ba zhig la brten zhe na yod med kyi mtha' thams cad dang bral ba'i zab mo'i don 'grel ba la mdo rgyud du ma nas lung bstan pa'i @120a @#/ /'phags pa klu sgrub kyi gzhung la brten nas 'tshol dgos la/ de yang klu sgrub kyi dbu ma rigs pa'i tshogs drug ni nges pa'i don yin cing/ de'i dgongs pa 'grel ba la 'phags pa lha ni klu sgrub dang 'dra bar 'phags yul gyi chen po rnams tshad mar mdzad pas yab sras gnyis ka'i gzhung ni dbu ma pa thams cad kyi bshad bya'i gzhung yin pas gzhung phyi mo'i dbu ma ba dang/ gzhan rnams phyogs 'dzin pa'i dbu ma pa zhes gsungs la/ slob dpon legs ldan 'byed kyis tha snyad du phyi don yod pa'i lugs bzhag pa dang/ slob dpon zhi ba 'tshos tha snyad du phyi rol med pa'i lugs mdzad pa'i dbu ma ba gnyis byung zhing/ dpal ldan zla ba grags pas tha snyad du phyi rol yod par bzhed kyang grub mtha' gzhan dang sgo mi bstun no/ /des na slob dpon zla ba grags pas slob dpon sangs rgyas bskyangs kyis 'phags pa'i dgongs pa legs par bkral bar gzigs nas de nyid gzhir bzhag cing slob dpon legs ldan 'byed kyi legs bshad mang po'ang blangs te 'phags pa'i dgongs pa gsal bar mdzad pas slob dpon 'di gnyis ni 'phags pa yab sras kyi gzhung 'chad pa la mchog tu 'gyur bas na slob dpon sangs rgyas bskyangs dang/ dpal ldan zla ba grags pa ste dbu ma thal 'gyur ba'i rjes su 'brangs nas rje @120b thams cad mkhyen pas 'phags pa'i dgongs pa gsal bar mdzad pas de bzhin du bya dgos la/ de la yang dge ba'i bshes gnyen mkhas pa tshul bzhin du bsten pa las lhag mthong gi gdams ngag nyan pa dang/ bla ma dang lhag pa'i lha rje btsun 'jam dbyangs dbyer med du byas nas gdung shugs drag pos gsol ba 'debs pa dang/ bsag sbyang la 'bad pa sogs gsum sgril du byed pa ni lta ba rtogs pa'i sngon 'gro med mi rung du gsungs te/ bla ma dang lhag pa'i lha dbyer med du gsol 'debs byed tshul sbyor ba'i skabs tshogs zhing bsdus nas spyi bor thub pa'i dbang po/ de'i thugs kar rje btsun 'jam dbyangs/ de'i thugs kar rje rin po che/ 'jam dbyangs kyi spyi bor rdo rje 'chang rigs bdag gi tshul du bzhugs par dmigs nas rim pa ltar bla ma rje rin po che/ lhag pa'i lha 'jam dbyangs/ thub dbang/ rdo rje 'chang la gsol 'debs shugs drag tu bya'o/ / gnyis pa dngos gzhi la gnyis/ gang zag gi bdag med gtan la phab nas bsgom pa'i tshul dang/ chos kyi bdag med gtan la phab nas bsgom pa'i tshul lo/ /dang po ni/ rgyal ba'i gsung rab rnams las zhes pa ni/ gsung nus pa can yin te/ bdag med gtan la 'bebs tshul rnams sangs rgyas kyi gsung min nam snyam pa'i log rtog dgag pa'i ched yin/ de la gcig du bral/ mu bzhi skye 'gog/ rten 'brel/ gtan tshigs/ @121a @#/ /rnam bdun gyi rigs pa sogs du ma yod pa las/ 'dir las dang po ba rnams la 'char sla ba'i phyir gcig du bral lam gnad bzhi'i sgo nas gtan la 'bebs tshul gsungs so/ /de yang gnad dang po dgag bya'i snang tshul nges pa'i gnad ni gal shin tu che ste/ spyir dgag bya 'dzin pa'i rtog pa la mtha' yas kyang nyes skyon thams cad kyi rtsa bar gyur ba'i phyin ci log gi rtog pa de legs par ngos zin nas de'i zhen yul sun dbyung bar bya ste/ 'dod chags la sogs pa gzhan gyi gnyen po ni phyogs re'i gnyen po yin la/ ma rig pa'i gnyen po ni nyon mongs thams cad kyi gnyen po yin pas phyi nang gi chos rnams rang rang gi mtshan nyid kyis grub par 'dzin pa'i rang bzhin sgro 'dogs pa'i blo ni gti mug gam ma rig pa'o/ /des na nga'am bdag med pa la med rgyu'i nga'am bdag legs par ngos ma zin par bkag kyang phyin ci log tu 'gro ba'i phyir/ de la dgag bya ha cang khyab ches na las 'bras kyi rten gzhi stor bas chad mthar ltung la/ ha cang khyab chung na dgag bya phra mo mi khegs pas dngos por zhen pa bskyed pas sring pa las mi grol ba'i phyir yod pa'i mthar ltung ngo/ /rang gi phung po lnga'am lus sems gnyis ni nga'i gdags gzhi yin gyi dmigs pa dang mtshan gzhi ma yin pas ming rkyang rtags yod tsam du nga 'jog shes na de las gzhan pa'i 'dzin @121b tshul ni med pa la bden par sgro btags nas mngon par zhen pa ni dgag bya'o/ /de na rang cag rnams la gnyid log pa'i gnas skabs tshun chad rgyun du blo la gang shar thams cad bdag 'dzin yin pas de las logs su dgag bya 'tshol rgyu med kyang/ de la mngon gyur dang lkog gyur gnyis su yod pas mngon gyur de 'char du bcug na ngos 'dzin sla bas rang gi nyes pa rkun ma lta bu ma byas pa la gzhan zhig gis khyed kyis 'di dang 'di brkus se zhes bsnyon btsugs pa na ngas rku snyam pa'ang med pa la bsnyon 'di 'dra ba 'dzugs pa dang snyam du snying gi dkyil du dam sgring sgring 'dzin pa'i ngar 'dzin lhan skyes mngon 'gyur du 'byung/ yang dbyar 'brug thag lang drag po thog rgyag pa lta bu byung ba'i tshe na'ang skrag pa chen po skye ba'i tshe ngar 'dzin mngon gyur du skye ba sogs bde sdug gzhan dang mi 'dra ba byung ba'i tshe ngar 'dzin lhan skyes kyi 'dzin tshul gsal bar yod pas/ de'i tshe shes pa byings nga nga snyam pa lta bu'i ngar 'dzin de'i ngo bor bred chags su rgyun 'thud nas blo'i zur zhig gis de lta bu'i nga de gang du bzung brtag par bya ste/ de la gnas gang du bzung brtag pa dang/ tshul ji ltar du bzung brtag pa gnyis/ de la gnas ni rang gi phung po lnga'am lus sems gnyis las don gzhan du ma yin zhing/ lus gzugs kyi phung po/ tshor ba bde sdug btang snyoms myong zhing tshor ba ni tshor ba'i @122a @#/ /phung po/ bzang ngan la sogs pa'i spu ris 'byed pa 'du shes kyi phung po/ tshor ba dang 'du shes ma gtogs pa'i sems byung thams cad ni ldan pa'i 'du byed de 'du byed kyi phung po/ rnam shes kyi phung po ste de re re ba'i steng du de lta bu'i nga de yod pa ma yin kyang/ phung po lnga tshogs tsam pa'am/ lus sems gnyis tshogs tsam pa'i spam me ba de'i steng du 'dogs byed kyi rtog pas phar btags pa tsam ma yin par nga kho rang gi ngo bo'i sgo nas yod par 'dzin pa ni ngar 'dzin lhan skyes kyi nga'i 'dzin tshul yin te ma rig pa des rang bzhin sgro 'dogs pa'i tshul ni gang zag gam chos gang rung gi yul rnams la blo'i dbang gis bzhag pa ma yin par dang po nas nga kho rang gi ngos nas gnas tshul lam sngod tshul grub grub pa zhig yod par 'dzin pa 'di yin la/ des ji ltar bzung ba'i zhe na yul chos rnams kyi rang rang gi sdod lugs de la bdag gam rang bzhin zhes gsungs pas tshul de nyid gzhan gyis bshad pa'i go ba tsam dang sgra ci'am tshig ci tsam ma yin par rang gi rgyud steng du gzhan gyi sgrib g.yogs med par brjen pa'am rjen cher gyis nges par bya ste de ni gnad dang po dgag bya'i snang tshul nges pa'i gnad do/ /gnyis pa khyab pa nges pa'i gnad ni/ de ltar nga'o snyam du snying gi dkyil du dam sgring sgring du 'zin pa'i blo des bzung ba'i nga de zhes sogs @122b te; chos gang dang gang yin kyang yang na gcig gi rnam pa dang yang na du ma'i rnam par yod dgos te/ gcig yang ma yin du ma yang ma yin pa'i phung gsum gtan mi srid snyam du thag bcad par bya ste cung go sla'o/ /gsum pa bden pa'i gcig bral nges pa'i gnad ni/ de ltar bzung ba'i nga de phung po lnga dang gcig tu yod do snyam na/ 'di la gnod byed drug gsungs te/ dang po bdag khas blangs pa don med du 'gyur ba ni bdag dang phung po gnyis rang bzhin gcig yin na bdag khas blangs pa don med de phung po'i rnam grangs tsam du 'gyur te zla ba dang ri bong can bzhin no/ /gnyis pa bdag mang por 'gyur ba ni/ gang zag gcig la gzugs phung sogs la yod la nga ni gcig las med pas yang na phung po lnga yod pa bzhin nga yang rgyud tha dang pa lnga yod par 'gyur ba dang/ yang na nga gcig yin pa bzhin phung po lnga yang cha med gcig tu 'gyur ro/ /gsum pa skye ba dran pa'i tshig gsungs pa mi 'thad pa ni/ gzhan yang phung po lnga skye 'jig byed pa bzhin du nga de yang skye 'jig byed pa 'gyur la/ nges na bdag rang gi ngo bos grub pa'i skye 'jig yin pas bdag snga phyi rnams rang gi mtshan nyid kyis so so bar 'gyur zhing/ de ltar na de'i dus na nga rgyal po nga las nu zhes bya bar gyur to zhes mi gsung bar du gyur te nga las nu'i bdag dang ston pa'i bdag gnyis rang gi mtshan nyid kyis grub pa'i @123a @#/ /so so ba yin pa'i phyir te/ dper na lhas byin gyis skye ba dran pa na nga mchod sbyin du gyur te snyam du mi dran pa bzhin no/ /gzhan yang skye 'jig byed pa'i nga de'i skad cig snga phyi rnams gcig tu grub na tshe snga phyi'i nga dang tshe 'di'i nga gsum cha med gcig tu 'gyur bas tshe snga ma ngan 'gro'i sdug bsngal myong ba de tshe 'dir yang myong dgos pa dang/ 'di'i bde ba snga ma'i dus su 'byung bar 'gyur ro/ /bzhi pa las byas pa chud za ba'i nyes pa ni/ skad cig snga phyi rnams tha dad du grub na spyir tha dad tsam la 'brel med tha dad yin mi dgos kyang/ rang bzhin gyis grub pa'i tha dad yin na 'brel ba gtan nas med pa'i tha dad yin dgos te bden pa yin na snang tshul dang gnas tshul mthun dgos pa'i phyir/ des na tshe snga phyi'i nga dang tshe 'di'i nga gsum 'brel ba gtan nas med pa'i tha dad du 'gyur bas/ tshe snga ma dge sdig bsags pa'i 'bras bu tshe phyi ma la bde sdug mi 'byung bas las byas pa chud za bar 'gyur ro/ /lnga pa las byas pa dang 'phrad pa'i nyes pa ni/ sngon gyi tshe rabs kyi dus kyi bdag dang da lta'i bdag gnyis rang gi ngo bos grub pa'i tha dad yin na rgyud gcig bar yang mi 'thad la bum pa grub pa'i tshe snam bu mi 'jig pa ltar bdag phyi ma skyes pa'i tshe snga ma mi 'jig cing/ snga ma ma shi bar 'dir skye bar 'gyur bas las ma byas pa dang 'phrad pa sogs @123b kyi nyes pa du ma yod pas de lta bu'i nga de'i skad cig snga phyi rnams tha dad ma yin pas nga de phung po lnga rang gcig tu ma grub bo/ /drug pa bya ba dang byed pa po gcig tu 'gyur ba'i nyes pa ni/ gzhan yang gcig tu grub na bden par grub pa'i gcig yin pas cha thams cad nas thams cad du gcig tu 'gyur la/ de ltar na nga'i phung po zhes pa lta bu'i nga'am bdag nyid phung po la nye bar len pa po dang/ ngas mi lus blangs so zhes pa lta bu'i phung po lnga nga'am bdag gis nye bar blang bya ma yin par 'gyur te rtsa shes las/ nye bar blang ba ji lta bur/ /nye bar len pa nyid du 'gyur/ /zhes gsungs pa'ang bdag phung po dang gcig tu 'dod pa la gnod byed chen por gsungs te; bdag gis lus 'di blangs so zhes tha snyad byas pas na phung po ni blang bya yin la/ bdag ni len pa po yin pas de gnyis gcig yin na bya ba'i las dang byed pa po gcig tu 'gyur bas rang gis rang blang bya len byed gnyis su mi rigs pa'i phyir/ nga de phung po lnga dang gcig pa'i phyogs la gnod byed kyi nges pa drangs te de ltar bsrung ba'i nga de phung po lnga dang gcig tu ma grub par bsam mo/ /bzhi pa bden pa'i du bral nges pa'i gnang ni; de ltar bzung ba'i nga de phung po lnga'i steng du gcig tu ma grub kyang de dang tha dad du grub snyam na/ gzugs phung sogs re re nas gsal ba'i 'og tu nga de 'di'o zhes tha dad du ngos 'dzin rgyu mi 'dug pas nga de phung po @124a @#/ /lnga dang tha dad du'ang ma grub pas nges shes drang bar bya/ de lta bu'i tshul gyis gnad bzhi'i dpyad pa byas pa na sngar ma brtag ma dpyad pa'i dus su rtog pas bzhag pa tsam ma yin pa'i nga zhig yod yod ltar bzung ba de lta bu med par nges pa na nges shes de nyid kyi rgyun bying rgod dang bral bar rtse gcig tu bskyang bar bya ste/ de yang nges shes de nyid shugs cung zad chung ngu song ba na las dang po ba rnams kyis sngar ltar gnad bzhi'i dpyad pa byas pa la brten nas bden med kyi nges shes 'dren la/ blo mtho ba rnams kyis ni ngar 'dzin lhan skyes la nga ji ltar snang ba ltar grub min dpyad pas gnad bzhi'i dpyad pa byas pa dang 'dra bar bden med kyi nges shes 'dren pas de'i tshe nges dor 'dzin stang nga rang bzhin med par nges pa'i nges shes dam sgring nge pa dang/ snang ngor dgag bya bden par grub pa'am rang bzhin gyis grub pa bkag tsam gyi stong sang de ba'i khyad par gnyis ldan du byas nas rtse gcig tu skyong ba ni mnyam gzhag nam mkha' lta bu'i skyong tshul te/ nam mkha' lta bu zhes pa yang nam mkha' la mtha' dbus med pa'i sgo nas dper bzhag pa ma yin par/ thogs bcas kyi rig bya bkag tsam la nam mkhar bzhag pa ltar 'dir yang rigs shes kyis bden grub bkag tsam gyi med dgag de'i ngang du 'jog pa'o/ /rjes thob tu nga la sogs pa'i chos thams @124b cad sgyu ma lta bu'i rnam rol du bsgom par bya ste sgyu ma'i don la don dam bden pa sgyu ma lta bur gsungs pa lta bu yod pa tsam du grub kyang bden pa khegs pa la byas pa dang/ gzugs sogs la sgyu mar gsungs pa rang gi rang bzhin gyis stong bzhin du gzugs sogs gyur ba'i snang ba sgyu ma lta bu gnyis las 'dir phyi ma ste/ 'di la snga ma'i sgyu ma'i don yang yod la snga ma la phyi ma 'di'i sgyu ma'i don yod pa'i nges pa med cing 'di'i 'grub lugs ni snang ba 'dzin pa dang stong pa nges pa'i blo gnyis la brten nas 'grub ste/ 'di la snang ba yod par rigs shes kyis mi 'grub la/ rang bzhin gyis stong pa na tha snyad pa'i tshad mas mi 'grub pas rang bzhin yod med 'tshol ba'i rigs pa'i shes pa dang gzugs sogs yod par 'dzin pa'i tha snyad pa'i blo gnyis dgos pa'i rgyu mtshan ni de yin par gsungs/ gzugs sogs sgyu ma bzhin du 'char ma 'dod na de dag 'dzin pa'i tha snyad pa'i blo ngang gis yod pas de bskyed mi dgos la/ de rnams la rang bzhin yod med dpyod pa'i rigs pas mang du dpyad nas rang bzhin khegs pa la nges pa drag po bskyed nas snang ba shar ba la bltas na sgyu ma lta bur 'char ba yin/ de yang dang po nas sgyu ma lta bur ma shar yang mnyam gzhag dang rjes thob kyi nyams len rnams mos pa yid byed tshun chad kyis 'bad nas bsgoms pas/ @125a @#/ /mnyam gzhag tu bden med kyi nges shes shugs drag po drangs pa la brten nas rjes thob tu tha snyad pa'i shes ngor mig sna sogs gang snang thams cad sgyu ma lta bu'i rnam rol du rang shugs kyis 'char ba ma byung gi bar du bslab par bya/ sgyu ma lta bur lta tshul ni/ sgyu ma mkhan gyis shing bu dang rde'u sogs rta glang du sprul ba na mi gzhan gyi shes ngor rta glang du'ang snang la snang ba ltar rta glang dngos yin snyam pa'i zhen pa'ang yod/ mkhan po rang nyid la rta glang du snang yang de la dngos yin snyam pa'i zhen pa ni med la/ 'on kyang des 'gro 'dug la sogs pa'i bya ba byed pa ni bsnyon med du snang ba ltar/ 'dir yang sgyu ma mkhan rang nyid la ji ltar snang ba de lta bu'i rgyu ma'i rnal 'byor la bslab par bya'o/ /rje rin po ches/ rigs pas dpyad pa na gang zag sogs la rang gi ngo bos grub pa'i yul steng du sdod tshul cung zad kyang mi 'dug go snyam pa dang/ de la brten nas snang ba ban bun du 'char ba tsam dka' ba min gyi/ de 'dra ba de dbu ma'i grub mtha' la mos shing rang bzhin med pa'i tshul ston pa'i chos than thun thus pa thams cad la 'ong yang/ dka' sa ni rang gi ngo bos grub pa'i rang bzhin ma lus par khegs pa dang rang bzhin med pa'i gang zag la sogs pa de nyid las gsog pa po dang 'bras bu myong ba po la sogs par 'jog pa la nges pa @125b gting nas 'drongs te/ de rnams su 'jog thub pa'i gnyis tshogs de srid mtha' tsam du song bas dbu ma'i lta ba shin tu rnyed par dka' ba yin gsung ba ltar ro/ /mdor na lta sgom spyod gsum thams cad rje rin po che'i bzhed srol 'di ches dka' ba yin te/ spyod pa ni nyan thos kyi tshul khrims gtsang ba dang/ sgom pa la phyir rtog pa med pas mi chog gi nang du bying ba phra mo tshun chad med pa dang/ lta ba ming tsam gyi steng du las rgyu 'bras 'jog shes pa'o/ /des na rang rgyud kyi ma rig pas rang bzhin ji ltar sgro btags pa rnams legs par bsam la dgag bya ngos zin par bya/ de nas rang bzhin de 'dra yod na gcig tha dad gang rung las mi 'da' ba'i tshul dang; de gnyis khas blangs pa la gnod byed yod lugs la nges pa drang te gang zag la rang bzhin cung zad kyang med do snyam pa'i stong phyogs la de 'dra mang du sbyang/ de nas gang zag gi tha snyad bsnyon du mi nus par snang ba rnams blo'i yul du byas te/ de nyid las gsog pa po dang 'bras bu myong ba por 'jog pa rten 'brel gyi blo sbyong ba yid la bya zhing/ rang bzhin med pa la rten 'brel 'thad pa'i thad lugs rnams la nges pa rnyed par bya/ de ltar bdag rang bzhin med par nges pa rnyed pa na/ bdag gi ba yang rang shugs kyis khegs par 'gyur te/ rtsa shes las/ bdag nyid yod pa ma yin na/ /bdag gi yod par ga la 'gyur/ /zhes gsungs @126a @#/ /pa ltar bdag rang bzhin yod med btsal bas ma rnyed pa na/ 'di ni bdag de'i mig rna la sgos pa'o zhes ji ltar rnyed par 'gyur/ de ltar na rnal 'byor pas bdag dang bdag gi ba'i rang bzhin 'gag yang ma dmigs pa na 'khor ba las grol bar gsungs te/ 'jug pa las/ gang phyir byed po med can las med pa/ /de phyir bdag gi bdag med par yod min/ /de phyir bdag dang bdag gi stong lta bas/ /rnal 'byor ba des rnam par grol bar 'gyur/ /zhes gsungs so/ /gnyis pa chos kyi bdag med gtan la phab nas bsgom tshul ni/ de ltar bdag lta bu gcig la ji ltar dpyad pas rang bzhin gyis stong pa dang rang bzhin med pa la bya byed 'thad pa'i bden pa gnyis kyi 'jog tshul shes pa na/ rigs pa de nyid chos thams cad la 'khyer nas bskyangs pas thams cad kyi rang bzhin med pa bde blag tu rtags par nus shing/ chos kyi skad dod d+ha rma zhes pa 'dzin pa la yang 'jug pas rang gi mtshan nyid 'dzin par byed pas na chos te/ gang zag tu gdags pa'i gzhi phung po lnga dang/ sa la sogs pa'i khams drug dang/ mig rna la sogs pa'i skye mched drug la sogs pa ni chos yin la/ de rnams rang gi ngo bos grub pa'i rang bzhin gyis stong pa ni chos de rnams kyi bdag med pa yin pas/ 'di la gnyis/ 'dus byas rang bzhin med par gtan la phab nas @126b bsgom tshul dang/ 'dus ma byas rang bzhin med par gtan la phab nas bsgom tshul lo/ /dang po la bem shes ldan min 'du byed gsum las/ dang po ni/ mig shes kyi yul du snang zhing gzugs can gzhan gyi go sa dgag pa ni bem po yin la/ de la skyes bu'i rgyud kyis bsdus ma bsdus kyi dbang gis phyi nang gnyis su yod pa las nang gi bem po gtan la 'bebs pa gnad che bas rang rgyud kyis bsdus pa'i lus lta bu la mtshon na/ de yang sha rus bdos bcas kyi yan lag lnga tshogs tsam gyi lus 'di'i steng du rtog pas btags pa tsam ma yin par dang po nas tshugs thub tu grub pa'i lhan skyes kyi lus yo re ba zhig yod par rang cag rnams la bsnyon med du 'char ba ni dgag bya'i snang tshul lo/ /de lta bu'i lus de gnas sha rus ba dos bcas kyi yan lag lnga tshogs tsam gyi lus 'di'i steng du tshul gcig tha dad gang du grub/ gcig tu grub na sha rus ba dos bcas kyi yan lag lnga tshogs tsam gyi lus 'di'i khu rus rkang gsum pha las dang/ sha khrag lpags gsum ma las thob pa'i phyir pha ma'i khu khrag las grub pa yin pas/ rnam shes 'jug pa'i gzhir gyur pa'i khu khrag gi thigs pa de yang sha rus bdos bcas kyi yan lag lnga tshogs tsam gyi lus su 'gyur ba dang/ yan lag lnga yod pa bzhin du lus kyang yan lag lnga tshogs @127a @#/ /pa'i lus lngar 'gyur la/ pha ma'i khu khrag gi thigs pa la bdag gi lus zhes bzung ba yin pas mi'i khu khrag la rang gi'o snyam du 'dzin pa don med par yang 'gyur ro/ /gal te tha dad du grub na mgo la sogs pa'i yan lag rnams bzhi ling gi tshul du bsal ba na lus de 'di'o zhes bstan rgyu dgos pa la de ltar mi 'dug pas de lta bu'i lus gtan nas med pa'i nges shes drang bar bya'o/ /gnyis pa shes pa'am rig pa po ste rang gi sems gtan la 'bebs pa yin cing/ gsal zhing rig pa shes pa'i mtshan nyid ces bya ba la dbye na mig gi rnam par shes pa sogs du ma yod kyang 'dir ni yid kyi rnam par shes pa/ yid shes la'ang dus gsum las nye ring mtshams pa de ring gi shes pa dper mdzad pas/ de ring gi snga dro'i shes pa dang de ring gi phyi dro'i shes pa gnyis kyi steng du rtog pas btags pa tsam ma yin par rang ngos nas grub pa'i de ring gi shes pa zhig yod par 'dzin pa ni dgag bya/ de nyid de ring gi snga dro'i shes pa dang de ring gi phyi dro'i shes pa gnyis dang gcig tha dad gang du grub/ gcig tu grub na de ring gi snga dro'i shes pa'i steng du de ring gi phyi dro'i shes pa yod par 'gyur bas phyi dro bsam pa de snga dro bsam dgos pa dang/ snga dro chos mi shes pa ltar phyi dro yang mi shes par 'gyur la/ tha dad du grub na snga phyi'i shes @127b pa gnyis re re nas bsal ba'i rjes su de lta bu'i shes pa de bstan rgyu mi 'dug pas de lta bu'i shes pa gtan nas med pa'i nges shes drang bar bya'o/ /gsum pa bem shes gnyis ma yin zhing 'dus byas yin pa'i 'du byed ces bya ste/ de la ldan pa'i 'du byed dang ldan min 'du byed gnyis so/ /ldan pa'i 'du byed ni/ tshor ba dang 'du shes med pa dang/ snyoms par 'jug pa dang/ srog dang/ rga ba dang/ gnas pa dang/ mi rtag pa dang/ ming dang/ tshig dang/ yi ge la sogs pa'o/ /ngo bo brjod pa ming ste ka ba zhes pa lta bu dang/ khyad par ston pa'i tshig ste tsan dan gyi ka ba zhes pa lta bu'o/ /ldan min 'du byed ni/ gang zag dang lo zla zhag dus sogs te/ lo lta bu la mtshon na/ de yang rab byung bcu bzhi pa'i sa byi lo la lo'i gdags gzhi zla ba bcu gnyis po'i steng du rtog pas btags pa tsam ma yin par rang ngos nas grub pa'i lo zhig yod par 'dzin pa dgag bya/ de lta bu'i lo de zla ba bcu gnyis po dang gcig tu grub na zla ba bcu gnyis yod pa bzhin du lo yang bcu gnyis su 'gyur la/ tha dad du grub na zla ba bcu gnyis po sngar bzhin re re nas bsal ba'i rjes su lo de 'di'o zhes bstan rgyu mi 'dug pas de lta bu'i lo gtan mi 'dug snyam du nges shes drangs shing/ de bzhin du zla ba gcig la gdags gzhi zhag sum cu dang/ zhag la chu tshod drug cu sogs skad cig ma'i bar du sngar @128a @#/ /ltar dpyad de bskyang bar bya'o/ /gnyis pa 'dus ma byas rang bzhin med pa gtan la phab nas bsgom tshul ni/ nam mkha' go sla zhing gong gi rigs pas gtan la 'bebs bsla bas rtog btags tsam min pa'i nam mkha' yod par 'dzin pa ni dgag bya dang/ gcig tu grub na phyogs dang phyogs mtshams kyi nam mkha'i cha du ma yod pas shar phyogs su char 'babs pa'i tshe nub phyogs su'ang 'babs par 'gyur ba sogs dang/ gling bzhi la nam mkha'i kha dog mi 'dra ba bzhi yod pas/ 'dzam bu gling gi nam mkha' sngon po ltar/ sgra mi snyan gyi nam mkha' yang sngon por 'byung rigs pa sogs kyi gnod byed la nges pa drang bar bya'o/ /don bsdu ni/ mdor na nga dang phung po dang zhes nang gi chos dang/ ri rab khang khyim la sogs pa zhes phyi'i chos kyi mtshan gzhi sogs 'khor 'das kyi chos thams cad ming tsam brda tsam rtog pas btags pa tsam ma yin par/ rang ngos nas grub pa rdul phra rab kyi cha shas tsam yang med par nges pa'i nges shes de nyid rtse gcig tu skyong ba mnyam gzhag nam mkha' lta bu'i skyong tshul dang/ rjes thob tu yul snang thams cad rgyu rkyen tshogs pa la brten nas byung bas bden med rdzun pa'i rang bzhin du shes pa'i rjes thob sgyu ma'i rnal 'byor gnyis legs par bskyangs pa la brten nas/ dpyad pa byas pa'i rang stobs kyis @128b gnas cha 'dren nus pa'i lus sems shin sbyangs gyi bde bas zin pa'i mnyam gzhag de nyin lhag mthong mtshan nyid par 'jog pa yin te zhi gnas grub nas lhag mthong ma thob pa'i skabs su dpyad bsgom gyi gnas cha brtan po 'dren nus pa med la/ so sor rtog pas mang du dpyad pa'i dpyad pa de nyid kyis gnas cha brtan po rnyed pa na ltag mthong thob pa'i zhi lhag zung 'brel du 'jog par gsungs la de'i phyir chu mi g.yo ba la nye'u chung 'khyug pa bzhin du zhi gnas kyi gnas cha tsam ma zhig pa'i ngang nas bdag med pa'i don la so sor dpyod pa'i gnyis tshogs tsam la zhi lhag zung 'brel du 'jog pa yin no/ /de yang sngar gyi zhi gnas kyi skabs su sems dmigs rten la rtse gcig tu bzhag pa'i stobs kyis shin sbyangs skye ba yin kyang/ 'dir ni dpyad pa rang stobs kyis gnas cha 'dren nus pas snga ma las kyang ches phul du byung bas ngo mtshar ba ni dper na lus sa la gnas bzhin du mnga' 'phog pa bas rta rgyug bzhin du 'phog pa ches ngo mtshar ba bzhin/ rje rin po ches/ rtse gcig goms pas bsam gtan 'grub pa ni/ /smos par ci 'tshal tshul bzhin dpyod pa yi/ /so sor rtog pa yis kyang yin lugs la/ /g.yo med shin tu brtan par gnas pa gces/ /ting 'dzin bskyed par mthong nas zhi lhag gnyis/ /zung 'brel sgrub la brtson rnams ya mtshan no/ /zhe @129a @#/ /gsungs so/ /de lta bu'i tshul gyis legs par bskyangs pas nyon mongs pa dang shes bya'i sgrib pa gnyis ka'i gnyen po ni gong du bshad pa'i stong pa nyid kyi lta ba yin kyang nyan rang rnams rang gi nyon mongs pa ma zad bar du sgom zhing/ nyon mongs pa zad pa na de tsam gyis chog par bzung nas dus ring por sgom par mi byed pas shes sgrib spong bar mi nus so/ /des na theg dman dgra bcom pa dang/ so brgyad pa'i byang sems la gnyis snang gi 'khrul pa'i bag chags gsar du 'jog byed zad pa yin gyi/ thog ma med pa nas rang bzhin yod par zhen pa'i dngos po la mngon par zhen pa'i sgo 'byed byed kyi sems rgyud la bag chags rgyun par bzhag pa'i gnyis snang gi bag chags sbyang rgyu du ma zhig yod pas de nas kyang ring du sbyangs te 'khrul pa'i bag chags ma lus pa ldog pa na 'tshang rgya bar gsungs te/ de yang lta brkyang pa bsgom pas mi chog par/ spyod phyogs kyi tshogs mtha' yas pas brgyan te ring du sbyang dgos so/ /de ltar na sangs rgyas lta zhog 'khor ba las grol ba tsam don du gnyer yang chos thams cad rang bzhin med par rtogs pa'i lta ba med pa'i thabs med pa dang/ theg pa che chung gi khyad par 'byed byed byang chub kyi sems rin po che dang byang sems kyi spyod pa rlabs po che rnams yin par @129b nges pa gting nas 'drongs pa ni rmad du byung ba'i khyad chos chen por gsungs so/ /gsum pa mjug tu ji ltar bya ba dang/ gnyis pa thun mtshams su yang lhag mthong gi rnam gzhag ston pa'i gsung rab dgongs 'grel spyi dang khyad par rje rin po che'i lhag mthong che chung sogs la blta bar bya'o/ /de ltar lam mthun mong bas rgyud sbyangs nas ni gdon mi za bar rdo rje theg pa la 'jug par bya dgos te/ theg pa chen po thams cad ni phar phyin drug la 'dus shing/ de yang bsdu na thabs shes gnyis su 'dus te/ phar phyin dang po lnga thabs dang/ tha ma ni shes rab ste/ de gnyis kyang rdo rje sems dpa'i thugs bde stong dbyer med pa'i ting nge 'dzin la 'dus pas thabs shes dbyer med/ bdzra ste mi phyed pa'o/ /de ltar thabs shes dbyer med de ni rdo rje yang yin la theg pa yang de yin pas/ theg pa ni bzhon pa ste rdo rje bzhon nas 'gro ba'o/ /bzhon pa de ni shin tu mgyogs pas phar phyin theg pa la bzhon na bskal chen grangs med gsum du sangs rgyas kyi sar bgrod dgos pa de rdo rje theg la bzhon pas snyigs dus kyi tshe thung gcig la bgrod nus pa'i phyir ro/ /theg pa de gnyis la stong phyogs bdag med pa'i shes rab la khyad par med kyang snang phyogs thabs kyi cha la khyad par shin tu che ba ste/ bsod nams kyi tshogs gsog pa la phar phyin theg par mchod pa 'bul rung mi rung gi dbye @130a @#/ /ba dang/ sal bo na chud zos pa sogs kyi tha snyad byed kyang/ rdo rje theg pa la ni de lta bu'i dbye ba sogs med par/ sa ni spyan ma/ chu mA ma ki/ me gos dkar mo/ rlung sgrol ma'i ngo bo yin pas/ mchod rdzas sa la bo na spyan ma mchod pa dang/ chu la skyur na mA ma kir mchod pa dang/ me la bsregs na gos dkar mo la mchod pa dang/ rlung la bskur na sgrol ma la mchod par 'gyur bas mtshon/ bsod nams kyi tshogs gsog pa phar phyin theg pa las chos rlabs che ba'i rgyu mtshan gyis lam myur ba yin no/ /de ltar rdo rje theg pa'i sgor 'jug pa la ni rgyu mtshan gnyis yod de/ phar phyin theg pa'i rang lam ma dgas bdun gyi skabs su nyon sgrib spong la/ dag pa sa gsum gyi skabs su shes sgrib spong kyang sa bcu ba'i mthar nges par rdo rje theg pa la brten dgos pa dang/ yang phar phyin theg pa'i lam la bskal pa grangs med mang por slob dgos pa la rang ngos nas skyo ba cung zad kyang med na'ang/ sems can gyi ngos nas skad cig re res kyang 'tshang rgya ba la shin tu ring bas nye lam rdo rje theg pa la 'jug dgos so/ /de lta min par rang ngos nas rgyal sras kyi spyod pa la bskal pa mang por slob mi nus pa rgyu mtshan du byas te rdo rje theg pa la 'jug na ni/ des 'jug sems la dngos su gnod cing/ smon sems la rgyud nas gnod pas 'tshang rgya ba la je ring du 'gro ba @130b las nye bar 'gyur ba min la/ rdo rje theg pa la 'jug pa'i sgo ni dbang kho na yin zhing/ dbang dus su khas blangs pa'i dam tshig dang sdom pa bsrung ba'i lam rim gnyis sgom pa las kyang ches gal che la/ dam tshig la gnas bzhin pa'i steng nas lam rim gnyis sgom pa la brtson par bya ste/ de yang sngags kyi lam gyi mthun mong ma yin pa'i spang bya ni/ phung khams skye mched la rang dga' bar zhen pa'i tha mal gyi rnam rtog 'di yin la/ de spong ba'ang gnas lus longs spyod rnams khyad par can gyi snang bar sgyur bar byed pa'i bskyed rim yin pa'i phyir ro/ /de nyid mthar phyin pa na rdzogs rim zab mo'i snod du rung ba yin pas de nas rdzogs pa'i rim pa la bslab par bya ste 'bras bu mngon du byed pa'i tshul lo/ /de lta bu'i lam gyi lus yongs su rdzogs pa la bslab par bya ste/ bshes gnyen bsten tshul nas zhi lhag gi bar rnams 'og ma 'og ma la myong ba thon pa na gong ma gong ma khrid pa yin kyang/ snyigs ma'i dus 'dir de lta bu'i 'chad nyan mdzad pa srid mthar snang zhing/ da lam myong 'khrid kyi gzugs brnyan tsam byung ba yang yul dus la ltos pa'i skal ba bzang ba yin pas nyin re bzhin thun bzhi dang ma mtha'i thun gcig tu byas te lam gyi rim pa rnams la rtsol bcas dang rtsol med kyi myong ba 'don par byed pa ni dal ba'i rten la snying po len pa'i thabs mchog @131a @#/ /tu gyur pa'o/ /de yang thog mar lam gyi rtsa ba bshes gnyen bsten tshul la thug pas de la gus pa chung na legs tshogs thams cad kyi rtsa ba 'chad pas bshes gnyen bsten tshul la 'bad/ dal 'byor la snying po len 'dod bcos ma min pa zhig skyes na nyin mtshan kun tu sgrub pa la nang nas bskul bas dal 'byor gyi skor rnams la sgom/ tshe 'di'i snang shas ma ldog na phyi ma don gnyer drag po mi 'byung bas mi rtag pa dang ngan 'gror 'khyams tshul rnams bsam la skyabs su 'gro zhing/ de'i bslab bya rnams dang las 'bras la yid ches kyi dad pa brtan pos dge mi dge'i 'jug ldog la 'bad/ de nas 'khor ba gang las 'byung ba'i rgyu las nyon ngos bzung nas de spong 'dod skyed cing/ de las grol ba'i thabs lam bslab pa gsum dang khyad par gang khas blangs pa'i so thar gyi bcas mtshams la 'bad/ de nas rang nyid 'khor ba spyi bye brag gi sdug bsngal myong ba ji lta bar skye bar drin gyis bskyangs pa'i ma rnams kyang de 'dra bar bsam la byams snying rje byang chub kyi sems ci skye la 'bad pa drag pos sbyangs la smon 'jug gi sdom pa cho gas bzung ste bslab bya rnams bsrung sdom la 'bad cing khyad par rtsa ltung la srog bsngos byas te bsrung/ rgya la nyes pas gos na bshags bsngams drag po la 'bad cing/ phar phyin @131b drug dang bsdu bzhi'i nyams len dang zhi gnas dang lhag mthong gi bar rnams kyi skyong tshul legs par shes par byas te tshul bzhin du bskyang bar bya'o/ /mnyam med bu ram shing pa'i dgongs pa'i don/ zhes pa ni lam 'di mdzad pa po thog ma ston pa sangs rgyas yin pas de'i che ba brjod pa dang/ dgongs pa'i don ni byang chub lam gyi rim pa 'di nyid do/ /dpal ldan mar me mdzad dpal yab sras dang/ zhes pa'i yab jo bo rje dang/ sras 'brom ston ba'i che ba/ blo bzang rgyal ba gnyis pas gsal mdzad pa/ zhes pa ni rje rin po che'i che ba brjod pa'o/ /mdor bsdus nyams len rim par bsgrigs pa 'di/ zhes pa ni chos kyi che ba ste lugs gzhan las khyad par du 'phags pa thar pa mchog la 'gro ba ni skal bzang ste rgyal ba'i sras yin la/ de'i cha rkyen du bsdebs pa'o/ /chos kyi rgyal mtshan rang nyid kyis mdzad pas na bsdebs zhes gsungs/ dge ba 'di yis bdag gzhan 'gro ba rnams/ /skyes bu gsum gyi nyams len mthar phyin shog /ces pa ni brtsams pa'i dge ba bsngo bar mdzad pa ste go sla'o/ /zhes gsungs/ 'dir smras pa/ 'chi med yul las 'bad bas drangs min la/ /dza ha nu yi lto bar ma bsgyings pa'i/ /rje btsun khyod gsung gangga'i klung rgyun gyis/ /bdag 'dra'i rmongs mun dri ma mtha' dag sbyangs/ /bung ba'i tshogs kyis padma'i bcud dwangs la/ / @132a @#/ /bdag gis khyod gsung 'dab brgya'i sbrang rtsi 'thung/ /chu skyes de ni gzugs can bem po'i chos/ /khyed kyi gsung ni yan lag drug bcu'i dbyangs/ /klu sgrub zhabs kyi kha chems rlung bskur gtam/ /blo bzang mes po'i ngag las cher bsgrags pas/ /pha rgan d+ha rma'i zhabs kyi shes rab mdas/ /bdag 'dzin dgra bo'i tsi tta dum bur byed/ /gang gi mkhyen pa mtha' bral 'chi med lam/ /thugs rje'i chu 'dzin stug pos yongs gang las/ /legs bshad dam chos bdud rtsi'i zegs ma tsam/ /thob pa'i bka' 'bangs bdag kyang skal ba bzang/ /tshul 'dir 'bad las thob pa'i dge ba'i tshogs/ /nya ba'i zla ltar dkar ba mchis pa gang/ /skye bar bshes gnyen dam pas rjes bzung ste/ /skyes bu gsum gyi nyams len mthar phyin shog /ces bdag cag rnams la bka' drin mtshungs pa med pa'i bshes gnyen dam pa rje btsun dngul chu ba chen po ? d+ha rma b+ha dra zhes mtshan yongs su grags pa'i mgon po gang gis skal ldan gyi gdul bya ser skya mang po zhig la byang chub lam gyi rim pa'i dmar 'khrid thams cad mkhyen par bgrod pa'i bde lam blo 'dzin dang 'brel ba'i zab khrid sa byi hor zla lnga pa'i tshes gnam gang nas dbu tshugs/ chos skor rer nyin zhag lnga re'i sar dpon slob tshang mas thun bzhi la sogs pa'i nyams bzhes kyis @132b rgyud thog tu bkar te/ zla ba bdun pa'i tshes nyer brgyad la chos thun dngos gzhi grol/ zla ba brgyad pa'i tshes gnyis res gza' phur bu'i nyin rgyal sras sems dpa' chen po'i snang brnyan rin po che'i drung du sna lnga'i mchod pa brgya phrag nyer gcig lhag tsam dang/ tshogs kyi 'khor lo zab cing rgya che ba la sogs pas bsnyen bkur te smon 'jug sems bskyed kyi sdom pa bcas bka' drin stsal ba'i tshe bka' 'bangs kyi char gtogs rje drung tshe ring ming can gyis rang nyid dran pa gso phyir brjed byang zin bris su bgyis pa dge legs 'phel/ ? lcags byi zla nang sbyor ba'i chos drug gi zab khrid stsal skabs 'di'i 'go'i rje btsun zhes pa'i skabs dang/ gsol 'debs lam mchog sgo 'byed kyi skabs sogs la nor pa mang po 'dug gsung ba dbyangs can grub pa'i rdo rjes phran bu bcos pa lags so/ /! oM swa sti/ rnam 'dren zas gtsang sras kyi zhal gyi lung/ mnyam med jo bo chen po'i thugs kyi bcud/ /yab rje rgyal ba gnyis pas gsal mdzad pa'i/ /che ba bzhi ldan byang chub lam rim don/ /blo bzang chos kyi rgyal mtshan 'dzin pa yis/ /gdul bya'i nyams len rim par bsgrigs pa'i gzhung/ /thams cad mkhyen par 'grod pa'i bde lam zhes/ /snyan brgyud rin chen tshar du dngar ba yi/ /rtsa ba zur du bzhag pa'i myag myog gi /bshad par 'khrid kyi sgro btags @133a @#/ /ma yin par/ tshig gi don dang yid la byed tshul dang/ /rgyud la skyed tshul gegs sel bogs 'don sogs/ /mig phug lung rgyud tshul du gsungs pa yi/ /thams cad mkhyen pa bla ma'i zhal gyi lung/ /thugs sras mchog gis zin bris mdzad pa 'di/ /yab sras zung gi slob bu'i char gtogs pa/ /dbyangs can grub pa'i rdo rjer 'bod pa yis/ /rab tshes na tshod ldan lor par brko'i las/ /mkhas pa'i phul phyin bkra shis grangs ldan pas/ /chos sbyin 'dzad med spel phyir par du bsgrubs/ /'dis mtshon dge bas mkha' mnyam yid can kun/ /mtshan ldan dge ba'i bshes kyis rjes bzung ste/ /tshang la ma nor lam bzang 'dir bslabs nas/ /sa lam bgrod pa ring min mthar phyin shog/ gnas skabs su yang bdag cag ltos bcas kyi/ /phyi nang gsang ba'i bar gcod kun zhi nas/ /tshe ring nad med chos 'byor bde skyid kyi/ /dpal la rol ba'i dge mtshan 'bar gyur cig /ces pa 'di yang dbyangs can grub pa'i rdo rjes bris pa shu b+ha ma stu sarb dza ga taM// //