@255a @#/ /byang chub lam gyi rim pa'i sngon 'gro sbyor ba'i chos drug gi khrid yig chen mo 'jam dbyangs bla ma'i dgongs rgyan zhes bya ba bzhugs so// @256a @##/ /thub dbang rdo rje 'chang dang ngo bo dbyer ma mchis pa'i dpal ldan bla ma dam pa rnams la dus thams cad du yan lag mchog gi phyag bgyi'o/ /tshe rabs kyi phreng ba kun tu rjes su gzung du gsol/ rmad byung byams dang snying rje'i chu klung 'bum/ /gcig tu 'khyil ba'i thugs bskyed rgya mtsho che/ /skye rgu'i dge legs 'dod 'jo'i gzhir gyur pa'i/ /'dren mchog thub dbang lhun po la phyag 'tshal/ /rgyal tshab sa bcu'i dbang phyug mi pham mgon/ /rgyal ba'i yab gcig gzhon nu'i sar gnas dang/ /rgyal pa'i lung bzhin shing rta'i srol chen po/ /'byed 'dzin 'gro ba'i re skong tshogs rnams rgyal/ /theg mchog lam gyi gter mdzod gser gling pa/ /zab rgyas gdams pa'i mdzod 'dzin phul byung zhabs/ /gangs ljongs 'gro mgon rgyal ba'i 'byung gnas sogs/ /'phags bod bstan pa'i sgron me rnams la 'dud/ /khyad par rgyal ba kun gyi blo gros che/ /mkhas btsun bzang po'i dpal du smin to zhes/ /grags dkar srid gsum khyon las yongs brgal ba'i/ /kun mkhyen tsong kha pa der snying nas dad/ /dpal stug thog ma'i mgon dang nyi ma'i gnyen/ /rnyog bral dwang ba'i yid mtsho'i grangs bzhin du/ /gcig dang du ma'i @257a @#/ /sgyu 'phrul rol gar gyis/ /bslu med lam ston drin can bla ma rnams/ /gtsug gi rgyan du mchod dang lhan cig tu/ /tshang la ma nor byang chub bgrod byed lam/ /sbyor dngos mjug gi thog ma gtsor byas pa'i/ /nyams len 'di ko bla ma'i gsung bzhin spel/ /de la 'dir byang chub lam gyi rim pa'i sngon 'gro nyams su len tshul spros te bshad pa la gnyis/ khungs bcun pa'i yid ches bskyed pa dang/ sbyor chos dngos bshad pa'o/ /dang po ni/ bla ma gser gling pa'i rnam thar sbyor ba'i chos drug ces bya ba/ jo bo nas brgyud pa'i man ngag 'di ni las dang po pa tsam gyi sngon 'gro'i chos rkyang pa min te/ sngon byon paN grub kun gyi thugs dam gyi mthil/ mdo sngags gnyis ka'i thun mong gi chos/ sangs rgya bar 'dod phyin las dang po pa'i dus nas 'go brtsams te bar ma chang par skad cig gnyis par sangs rgya ba la nye ba'i dus su yang nges par nyams su lan dgos pa zhig ste/ rdo rje gur las/ bla ma rdo rje can mchod cing/ /bdun po rnam par dag pa bya/ /byang chub tu ni sems bskyed de/ /zhes gsungs shing/ tshe gcig sangs rgyas 'grub pa'i rgyal po indra ba d+hi'i zhal nas kyang/ sems tsam rnam bden pa @258b dang/ rnam brdzun pa'i lta ba bsgom pas kyang myur du 'tshang mi rgya/ myur du 'tshang rgya bar 'dod pas chos spyod yan lag bdun pa la bslab par bya'o/ /zhes gsungs shing/ gzhan yang mdo sngags kyi gzhung chen mo mtha' dag dang/ dam pa gong ma rnams kyi man ngag las mgrin gcig tu gsungs shing/ bdag cag gi ston pa rin po ches kyang/ bya rgod phung rir sher phyin gyi mdo thog mar gsung skabs phyag g.yas pa brkyangs te sa gzhe rin po che'i rang bzhin du byin gyis brlab cing/ rgyan sna tshogs kyis mchod pa dang/ gdan bshams pa sogs mchod pa dang bkur bsti phun sum tshogs pa mdzad pa'i sngon byung ston pa'i rnam thar de dag rjes 'jug gdul bya'i nyams len 'di 'dra ba la nges par go dgos shing/ de bzhin du sems dpa' chen po rtag dus kyang/ chos 'phags mchod pa'i phyir nye 'dab kyis rdul mi lang ba'i phyir chag chag gi chu dpag tshad du mar dka' thub kyis btsal ba na bdud kyi byin brlabs kyis chu ma rnyad par rang gi rtsa las khrag gtar te chag chag mdzad pa sogs kyis sbyor chos kyi lag len 'di la nges shes bskyed pa ni 'brel che zhing skabs su babs te/ lam nyams su len pa ni shar phyin gyi sas don mngon par rtogs pa'i rim pa dang/ dngos bstan stong nyid kyi rim pa tshang la ma nor bar stan thog gcig tu bde blag tu nyams su blangs chog pa'i jo bo'i man ngag yin pas so/ /khyad par du yang sa lam gyi rtogs pa khyad par can ja bzhin skye mi skye ni sbyor chos kyi nyams len 'di je @259a @#/ /rgyas su song ma song la rig las pa ni/ dper na rang cag gis sbyor ba bsag sbyangs la nan tan med par lam gyi dmigs rnam 'ga' re la brtson pa bskyed kyang phal cher bar chad kyis 'khyer zhing/ cung zad rgyun 'thud thub pa rnams la'ang rtogs pa ji bzhin mi skye ba dang/ yo byad la dbang thob pa'i sems dpa' chen po sogs lam la bslab mkhas pa rnams kyis rjes thob tu lus dang yan lag 'bum phrag brgya stong la sogs par sprul te zhing thams cad du byon nas rgyal ba rnams la bskal pa du mar mchod pa sogs sbyor chos 'di la nan tan mdzad pas mnyam gzhag tu bar chad med par rnam grol lam sogs rang gi gong ma'i sa lam rnams kyang skad cig skad cig la mngon du mdzad pa bzhin no/ /nges na da lta chos 'di 'dra la thos bsam bsgom pa bod du byung ba la bla ma'i drin du bltas nas dga' dang mi 'gyur ba ma byas na/ deng sang chos par re bar phal cher sngon bsags bsod nams kyi bsags rgyab chung bas thog mar mjal ba'i slob dpon dang gdams ngag kyang nyon mongs rnams sangs rgya ba dang lam gyi grogs su dgos shing/ thos pa dar tshul khrims sogs spyod phyogs kyi nyams len rnams byed rgyu mang bar mthong nas nges par mi dgos pa'i myur lam khyad par can yod zer ba'i bslu brid mkhan gyi dbang du 'gro ba mang zhing/ de rigs ni gzhan der lo gsum phyogs gsum dang bug sgo 'dag sbyar sogs kyi dka' thub @260b la cung zad brten pas/ deng sang gi ser skya col chung rnams de la ngo mtshar can du mthong nas rang gi byed mus kyi dkon mchog gsum la brten pa'i dge rtsa khyad par can rnams kyang nyam chung du mthong nas med par byed pas 'gro ba gzhan la gnod/ de bzhin du sangs rgya ba la lam tshang la ma nor ba la thos bsam sgom gsum rim gyis dgos par ston pa'i gsung rab dgongs 'grel dang bcas pa rnams kyang tshe 'di'i rkyen sel rim gro tsam la dgos na ma gtogs sangs rgyas sgrub pa la dgos med du btang bas bstan pa la gnod tshab che/ rang nyid kyang rlung stobs kyis sems 'dzin tsam la phyag chen to sprod du go nas de 'dra'i gdams ngag zur pa re la snying rus bskyed pa tsam gyis 'khor ba las grol zhing myur du sangs rgyas thob par re nas ras rkyang sogs dka' thub byed pa ni phral dal ba che la phugs don chung bas rang nyid la yang gnod tshab che ste/ 'di ltar rgyal bas lung dang rgya bod kyi mkhas grub du mas gzhung dang man ngag du byas nas bka' stsal pa ni mkhyen pas gzigs shing brtse bas ma bzod par mdzad pa lags shing/ bdag lta bus ni brtse bas kun nas bslangs pa ma lags kyang/ chags sdang gis phyogs ris bgyis pa min pas drang po'i gtam yin tshul ni/ da lta rang gzhan gyi 'dod yon la zhan pa log pa'i phyogs na'ang med pa'i sbyor lam tsog bu la brten pa'i sems dmigs pa la yud tsam gnas pa'i ting nge 'dzin dang/ de'i nyams smad phran bu re lta zhog 'dod yon mtha' dag la yid log pa'i gzugs khams kyi bsam gtan dang/ bsam gtan las skyes pa'i rtog dpyod dga' bdes yid bskyod pa sogs bsam gtan la'ang skyon du mthong ba'i gzugs med kyi ting nge 'dzin mthar thug srid rtsi'i sems khyad par can dang/ bsam gtan gzugs med kyi 'bras bu'i yon tan mngon shes rdzu 'phrul mtshan nyid pa thob kyang/ mu stegs kyi ston pa lhag spyod sogs bzhin du 'khor ba'i rtsa ba bdag tu@261a @#/ /'dzin pa la ci yang ma gnod pas spyir 'khor ba'i rgyu dang khyad par du slar yang nyon mongs pa thams cad rab tu 'khrugs te dmyal ba mnar med kyi bar du skye bar 'gyur ba ni/ bdag cag thams cad kyi thun mong gi ston pa shAkya'i rgyal po de nyid kyis mdo sde las bka' stsal pa/ ji skad du/ 'jig rten dag na ting 'dzin bsgom byed kyang/ /de ni bdag tu 'du shes 'jigs mi byed/ /de ni nyon mongs phyir ni rab 'khrugs te/ /lhag spyod kyis ni ting 'dzin 'dir bsgom bzhin/ /gal te chos la bdag med so sor rtog /so sor de brtags gal te sgom pa ni/ /de ni mya ngan 'das thob 'bras bu'i rgyu/ /rgyu gzhan gang yin de ni zhir mi 'gyur/ /zhes gsungs so/ /des na rang gi bsam tshod la rang gi bla ma tshad ldan dang da lta jo bo rin po che lta bur phyag skor mchod pa sogs phul te rang dbang dor nas de'i dge ba 'bras bu dang bcas pa khyed kyis shes snyam pa lta bu zhig gi mthu la brten pa'i dge ba dmigs pas la 'ga' re ma gtogs/ nges 'byung byang sems yang dag pa'i lta ba gsum po gang rung gis ma zin pa'i dge ba phal cher thar pa dang thams cad mkhyen pa'i rgyur 'gro dka'/ des na 'khor ba las dngos su grol byed kyi lam ni stong nyid rtogs pa'i yang dag pa'i lta ba kho na yin zhing/ de smin byed kyi lam nges 'byung yan lag dang bcas pa tsam sgom na thar pa thob cing/ lam de tsam ma yin par byang chub kyi sems spyod pa dang bcas pa la bslab na sangs rgya bar 'gyur ba ni rang gi lugs so/ /lam gsum po de yang sbyor ba'i chos drug gi nyams len gyi khong nas 'thon pa zhig byung na lam ma nor ba rgyal ba'i bka' dang mthun cing dam pa gong ma'i thugs rgyud la 'khrungs pa 'dra ba'i khungs thub pa zhig 'ong/ chos mi byed na 'jig rten rgan po'i lugs rang bzung na rang gzhan la gnod tshab chung zhing/ chos pa dang sgom chen zhig byed phyin sbyor chos sogs lam bzang 'di kho na la @262b 'jug par rigs so/ /! gnyis pa sbyor chos dngos bshad pa la gnyis/ grangs dang go rim ngos bzung ba dang/ nyams len dngos bshad pa'o/ /dang po ni/ gnas khang byi dor byas la sku gsung thugs kyi rten dgram pa/ mchod pa g.yo med cing bkod pa mdzes par bshams pa/ stan bde ba la lus drang por bsrangs te skyil mo krung ngam/ skyil mo krung phyed du yang rung ba'i spyod lam gyis 'khod nas skyabs 'gro sems bskyed rgyud dang 'dres nges su bya ba/ mdun gyi nam mkhar tshogs zhing gsal gdab pa/ bsag spyang gi gnad bsdus pa'i yan lag bdun pas rgyud sbyang ba/ dmigs pa gsal bar byas te maNDal phul la don chen po gsum gyi gsol ba gdab pa ste drug go /'di ni lam rim chung ngu ltar bkod pa ste/ da lta chos mdzad rnams kyi zhal nas rlung ltar grags pa'i sbyor chos kyi grangs 'dren tshul ni bde lam gyi tshig dngos gzhir mi gsal yang dben sa snyan rgyud kyi man dwag snod min la gsang ba'i gsang sngags dang 'brel che ste/ dbang chen thob pa dang/ dam sdom la gnas na ma gtogs bde lam gyi thun mong ma yin pa'i bshad 'khrid mi gnang zhing dmigs skor mi skyong ba bla ma gong ma rnams kyi phyag bzhes yin 'dug cing/ de yang rang cag gi gal chung du rtsis pa ma gtogs spyid bdud rtsi 'bebs sbyangs dang/ sems bskyed 'bras bu lam byed kyi tshul du bsgom pa dang/ khyad par du gsol 'debs lam mchog sgo 'byed kyi dmigs skor gyi skabs dang/ byin rlabs dpung zhu'i dmigs skor dben sa'i zhal shes rnams ni byin rlabs kyi tshan ka che zhing dam tshig dang 'brel che bas shin tu bka' gnyan pa'o/ /'di'i skyabs 'gro'i skabs kyang skyabs 'gro'i rgyu gnyis tshang pa'i sgo nas skyabs 'gro gnad du gang 'gro byed pa las/ tshogs zhing ltar mdun du skyabs yul nges par gsal 'debs mi dgos/ de'i phyir lam rim che chung du yang skyabs yul gsal 'debs dngos su ma gsungs/ bdud rtsi 'bebs sbyangs sogs dang 'brel bas bde myur du gsal kha mdzad/ @263a @#/ /skabs 'di'i maNDal yang lam rim che chung du sbyor chos drug pa dang/ bde myur ltar na sbyor chos lnga par mdzad pa dang/ 'jam dpal zhal lung las sbyor chos kyi mchod pa'i sna 'dren du mdzad pa sogs cung mi 'dra ba dang/ khyad par du 'jam dpal zhal lung las bshes gnyen bsten tshul lam gyi sngon 'gro dang/ sbyor chos kyi skyabs sems bshes gnyen bsten tshul gyi yang sngon 'gror mdzad pa dang/ de dag gi skabs su yang gsang sngags kyi dmigs skor spros pa can mi byed gsung pa dang/ de'i skyabs sems kyi bar du don chen po'i gsol 'debs mdzad pa dang/ lam rim gyi sa bcad du skyong tshul mdor bsdus te bstan pa zhes pa bshes gnyen bsten tshul gyi sbyor ba'i nyams len dngos gzhi la ngos 'dzin mdzad nas sbyor chos rnams skabs der mdzad srol dang/ khyad par tshogs zhing skabs mdun gyi nam mkhar bla ma thub dbang rdo rje 'chang du bskyed pa/ pad sdong gi steng du tshogs zhing dkyil 'khor pa'i lha ltar bkod pa sogs sngags kyi shan shor bas skabs 'dir de ltar mi bya bar gnas g.yo byin gyis brlabs cing tshogs zhing rnams mgron thabs su spyan drangs nas sa gzhi'i steng du rin po che'i bang rim gyi dbyibs lta bur bzhugs par mdzad pa dang/ tshogs zhing du yang nyams len byin rlabs brgyud zur du ma mdzad kyang/ rje sgrub khang pas thub dbang gis byams pa dang 'jam dbyangs byin gyis brlab pa nas rtsa ba'i bla ma'i bar rang gi bla ma gong mas byin gyis brlab pa sogs/ mdor na chos brgyud ma nyams par bar ma chad du byon pa kun la nyams len byin rlabs brgyud du 'jog par gnang/ bde myur du yang brgyud pa 'di spyir gsang sngags kyi brgyud pa dang/ khyad par du thig le bcu drug gi brgyud rim yin pas de'i dbang tshad ldan ma thob na brgyud pa gsum ldan mi yong ba 'dra zhes bla ma gong ma rnams gsung ces bdag gi bla ma rin po ches bka' stsal zhing/ bde @264b myur skabs nyams len byin rlabs brgyud pa dang mdun gyi thub dbang gi bar stod du slob dpon Arya de ba sogs bla brgyud du mi gsal ba'i rgya bod kyi mkhas grub tshad ldan rnams bkod kyang chog gsungs/ tshogs zhing gsal 'debs tshul la yang tshogs tshogs pa ltar gdong gral sogs kyi rnam par 'khod pa dang/ sku 'dra bsgrigs pa ltar thams cad rang la zhal phyogs pa dang/ dkyil 'khor gyi lha tshogs ltar thams cad thub dbang la zhal phyogs par sgom tshul gsum ka rung yang zhal rang la phyogs pa cung zad 'char bde gsungs/ zhal lung du tshogs zhing spyan 'dren gyi mjug tu khrus khang bskyed nas khrus gsol mdzad pa sogs 'khrid tshul mthun pa dang/ 'ga' zhig mi 'dra ba phran bu re la snyad btags nas zhal lung gi 'khrid tshul de dag lam rim che chung dang mi mthun pa'i zur gyi khrid tshul du go nas mtha' gcig tu 'gog pa mi rigs te/ rje rin po ches/ gyer dka' bzhi ba la dngos su rten skal du gnang ba'i lam rim gyi zin bris zhig dang/ zhal lung 'di'i sngon du yer pa spos kha nas byung ba'i zin bris gcig dang/ sku zhabs grwa tshang rnying pa'i grwa rigs blo bzang 'jam dbyangs zer ba'i zin bris gcig dang/ 'jam dpal zhal lung 'di bzhi po zhu dag pher ba ltar 'dug pas khrid tshul 'di 'dra zhig rje rang gi sku dus nas yod chod 'dug ces phur lcog byams pa rin po che'i gsung zin bris su gsal ba dang bcas/ mdor na lam rim che ba las/ 'on kyang bshad pa thams cad nyams len du 'khyer shes pa srid mtha' ru gnang bas skyong rgyu nye bar bsdus pa re yang gud du bya'o zhes gsungs pa dang mthun pa'i bde myur dang zhal lung sogs 'khrid tshul khungs dag 'di lta bu la yang/ gtsang zhen dang dbus zhen lta bu'i ngang gi blo skyon gyis lam gyi grangs 'dren tshul dang/ gong 'og gi rim pa mi 'dra ba cung zad de la brten nas khrid rim de rnams nang phan tshun du 'gal zla lta bur mi bzung zhing/ 'on kyang de dag gi @265a @#/ /gdul bya la ltos pa'i 'khrid tshul gyi khyad par dang dgos pa rnams shes par byas nas/ rang gi 'khrid rim gang la byed pa de la blo gcig sgril gyis nyams su len pa gal che'o// /! gnyis pa nyams lan dngos bshad pa la/ sbyor chos dang po ni/ mdo sde'i rgyan las/ blo ldan gang du sgrub pa'i yal/ /legs par rnyed dang gnas bzang dang/ /sa bzang ba dang grogs bzang dang/ /rnal 'byor bde ba'i yo byad ldan/ /zhes gsungs pa ltar/ rang gi sgrub pa byed pa'i yul lam gnas che/ zas gos la sogs pa tshegs med par rnyed pas rnyed sla ba dang/ mi dang mi min gyi gnod pa med pas gnas bzang ba dang/ nad mi bskyed pa'i sa yin pas sa bzang ba dang/ tshul khrims dang lta ba mtshungs pa'i grogs dang ldan pas grogs bzang ba dang/ nyin mo skye bo mang po med cing mtshan mo sgra chung bas legs par ldan pa ste yon tan lnga ldan zhig shin tu gal che zhing/ de nas chos rnams sngon du yid 'gro zhing/ /zhes sogs ltar/ kun slong byang sems kyis zin na gad bdar byed pa'ang rgyal sras kyi spyod par 'gro la/ de min blo rang dga' bas byas na las tha mar 'gyur bas bdag gis gnas khang 'dir 'dug nas gzhung dang bla ma'i man ngag la brten nas las su bya ba gzhan spangs te gzhan don du rdzogs pa'i byang chub shig ci nas kyang sgrub par bya/ de'i phyir du gnas khang byi dor bya zhing/ de ltar byas na 'phags pa lam chung gi rtogs brjod ltar sdig sgrib sbyong ba'i mchog dang zhing sbyong du 'gyur zhing/ gzhan yang 'di phyi'i phan yon rang gzhan gyi sems dwang bar 'gyur ba sogs lung phran tshogs las gsungs pa lnga dang bcas phan yon rnams dran par byas te mi 'dod pa'i khral chos su ma song bar dga' bzhin gus pa'i spyod lam gyis thog mar rdul mi lang ba'i phyir chu gtsang mas chag chag gdab/ de nas rang gzhan gyi sdig sgrib nyag @266b nyil rnams phyags pa'i mos pa dang bcas byi dor bya/ de nas dri bzang ba'i phyir dri bzang gi chus chag chag 'debs pa sogs lcogs na sngon nas gra bsgrigs te nyin re bzhin de ltar bya/ de min yang gad bdar tsam ma chag par byas te rang gzhan gyi sdig sgrib mang po dag song snyam pa'i dga' ba yang bsgoms/ rang nyid rtogs pa mthe nyams kyis gad bdar sogs gtsang sbra la mi brtson pa ni mi rigs te/ rang gi sems grib kyis non nas nad mang ba dang/ dge ba'i dmigs pa mi gsal pa sogs 'byung zhing rang cag sgrub pa la gsar du re ba rnams mi dgos grub pa thob zin pa'i rnal 'byor pas kyang rang gi sgrub gnas lta zhog /gzhan du phyin pa'i gnas su yang sleb ma thag gad bdar sogs gtsang sbra mdzad srol ni jo bo dang gyer re gling gi grub thob rnal 'byor pa gnyis mjal ba'i lo rgyus kyis shes so/ /sku gsung thugs kyi rten dgram pa yang/ med du mi rung ba'i 'bral spang thub pa'i dbang po'i sku dang/ byams 'jam dbyangs sogs chos 'di'i bla brgyud du gsal ba dang/ tshogs zhing skyabs yul du 'os nges sogs ma gtogs lha dang 'dre nor nas dbang bsdud nor sgrub sogs kyi phyir yul lha gzhi bdag sogs yin zer ba'i 'dre ngan gyi gzugs 'chang zhing rten gsol mang na skyabs 'gro la yang gnod cing/ phral du de'i rang mdangs kyis da lta nyon mongs kyis sems rgyud 'khrug pa ma zhi ba'i steng du ches cher rab tu 'khrugs te lam sgom pa lta zhog /ya rabs kyi mi gral nas bud pa zhig yong nges pas de ltar mi bya/ yi dam chos skyong sogs kyang bla ma sangs rgyas kyi bya grub ye shes kyi rang mdangs yin pas blo thag chod na sku rten nges par btsal mi dgos/ rang gi mchod rten du phebs pa dang/ rang nyid de'i rnal 'byor la brtson pa 'dra yin rung yi dam gyi sku rnams dam nyams sogs kyis mi mthong sar mi mngon pa'i tshul gyis bzhugs/ sku gsung thugs rten rnams kyang 'chal nyams kyi lag nas @267a @#/ /dngos su byung ba sogs la 'dzem dgos pa ni dge bshes gtsang pas kyai rdor gyi phyag dpe g.yar nas phyir slog mdzad pa'i lo rgyus kyis shes so/ /mchod rten rab gnas can rnams kyang ston pa'i sku gzugs dbus bzhugs dang/ / de'i g.yas g.yon du byams 'jam dbyangs sogs sangs rgyas byang sems 'phags pa nyan rang rnams kyi sku bzhugs/ steng gi bang rim du jo 'brom/ rgyal ba tsong kha pa sogs chos 'di'i rtsa brgyud kyi bla ma rnams kyi sku dkram/ 'og tu skyes bu gsum gyi chos skyong ye shes mgon po dang/ rgyal chen rnam thos sras/ dam can chos rgyal sogs kyi sku rten yod na der bzhugs/ gzhan yang mtshams bcad dngos min yang phyogs bzhir mtho brtsigs nas rgyal chen bzhi bskyed dang/ de min yang sgo drung sogs gang 'os su mtho gcig la rgyal chen rnam sras bskyed nas rtag tu bzhugs par mos na bar chad chung zhing tshul khrims gtsang ba sogs 'byung bas de ltar bya/ lhag par bshes gnyen mdo sde la bcol ba'i dus yin pas/ rang gi gzhung gdams ngag tu go nas yod na gzhung dang gdams ngag tshad ldan spyi dang khyad par du dbang po mchog dman sus kyang/ so med kyang rnyil gyi 'drad 'drad zer ba'i dpe ltar rje'i lam rim che chung zhig 'bral spang ltar nyer nas nges par blta rtogs byed pa shin tu gal che/ gzhi nas sku gsung thugs kyi rten dgram zer ba'i don yod pa rnams kyi sku gsung thugs rten sku rgyu bzang ba dang/ bris legs pa rnams la zog gi 'du shes kyis nyo tshong 'bul rten byed pa/ sbas nas 'jog pa dang/ zhan pa rnams la rnyas pa'i 'du shes kyi mchod gral du yang mi tshud pa sogs ma gus pa spangs te sku gzugs shing las bgyis pa sogs mtha' dag la yang bsam sbyor dad gus kyis mchod yul du rgyun du legs par dgram zhes pa'i don yin/ byang btad glo bur 'gro 'dug gi gnas su stab ma 'grig na sgrub pa'i @268b maNDal zhes bya ba bshams te/ de yang stegs bu gang 'os kyi steng du 'bru dang rdo dkar sogs kyi tshom bu dgu'am lnga bkod/ des skyabs yul dang tshogs zhing rnams dran par byed pa yin sngags ltar na lha sogs la bskyed kyang rung ngo/ /! sbyor chos gnyis pa ni/ rang gi sgrub gnas su mchod pa gang 'byor dngos su bshams dgos te/ mchod pa med pa dad pa med pa'i rtags yin/ dad pa med pa chos med cing mi 'byung ba'i rtags yang dag yin pas blos lcogs na rang gi yo byad gsum gnyis mchod phyogs su dngos su gtong/ yo byad med pa dang yod kyang blo ma goms ring mchod pa chung ngu la yang ma brnyas par yon chab dang maNDal 'bul ba nas brtsams te/ yo byad gyi sum gcig chos phyogs su nges par 'gro bar byed dgos te/ phyag mchod sogs la mi re bar sgom dang 'bras bu la re ba ni rang dang rang gi bla ma gnyis ka chos rgyas chung bas nongs te/ lam rim chen mo las/ kho bo ni 'di lta bu la byang chub mi re zhes smra ba ni chos rgyus shin tu chung ba'i cal col lo zhes mdo sde dkon mchog sprin gyi lung dang bcas gsungs so/ /rang nyid zhing dang dngos po'i sgo nas stobs che ba dkon mchog mchod pa la shin tu yid spro zhing/ 'bul chas med na log 'tsho dang g.yo rgyus ma sbags par dad pa kho nas sbyin bdag 'byor ldan rnams la mchod pa'i phan yon brjod nas slong ba sogs thabs mkhas kyis btsal nas 'bul/ de yang skabs su ma babs pa dang/ sdom pa dang sgrub pa la gnod tshab che na nges par btsal mi dgos te chu dang me tog sogs bdag pos ma bzung ba dang/ yid kyi sprul zhing gzhan gyis dngos su phul ba la yi rang bgyis pa tsam gyis kyang chog cing yod bzhin du gtong mi nus pa ni rnam pa thams cad du mi rigs te/ mchod pa yang dngos po la ma thogs rang gi dad pa la thogs pa yin zhes sogs gsungs pa ltar ro/ /mdor na mchod pa'i rgyu sgrub pa dang dngos su 'bul ba'i dus dang/ phul nas dge ba @269a @#/ /bsngo ba'i dus sogs bsam sbyor gang la yang rang skyon g.yo thabs kyis mi mngon par byed pa'i g.yo dang/ yon tan med pa la yod pa ltar ston pa'i sgyu ste g.yo sgyu gnyis dang/ rang la rnyed pa 'dod nas gzhan la khang pa sogs byed pa'i kha gsag dang/ ja mar 'dod nas nga la ja mar med zer ba lta bu'i gzhog slong dang/ phar dngul byin nas tshur gser 'dod pa dang/ sne len ngo 'dzin cung zad kyis de las lhag re ba dang/ da lo sbyin du re nas na ning gi ja mar byin pa des phan thogs po thogs po byung zer ba lta bu rnyed pas rnyed pa 'tshol ba dang/ gzhan gyis mi ster bzhin du nan gyis slong ba/ nyung ngu dang ngan pa la khang zhing khro ba/ gzhan la 'bul grabs yod dus de la skyon brjod nas 'bul ba rang phyogs su bsgyur ba lta bu thobs kyis 'jal ba dang/ dus rgyun 'dul ba dang mi mthun yang gzhan ngor mthun mdog byed pa lta bu'i tshul 'chos te log 'tsho lngas ma sgrub cing/ lhag par dge sdig la blang dor gang shes byed pa'i lta ba ma nyams pas mchod pa byed pa gal che ste/ log 'tsho sogs kyi mchod pa la yang phan yon med pa min te phan yon de bas shin tu che ba'i nyes dmigs kyis rang nyams par byas pa la mchod yul rnams thugs rjes ma bzod par mnyes par mi 'gyur bas so/ /dge bshes sha ra bas kyang/ nga ni btang ba'i phan yon mi brjod kyi 'dzin pa'i nyes dmigs brjod pa yin gsung/ 'on kyang las dang po pa la bsam sbyor ngan pa de dag mi rgyu ba dka' yang/ shes bzhin gyi bya ra dang bcas te de ma thag gnyen po bsten pa'i 'bur 'joms byed pa'i dge bshes 'ban gyi mchod pa'i rnam thar ltar bya zhing/ de yang gang bzang ba dang dkon pa nas phul na bsod nams che/ mchod pa'i stegs bu ri mo tshun chad kyi rgyan gyis spras shing/ mtho dman 'tshams pa 'khod snyoms pa'i steng du ting la sogs pa'i mchod chas rnams kyang rung zhing gtsang @270b pa dwangs shing yid du 'ong ba/ bar dang thad ka dang zhal la snyoms pa sogs bkod pa khyad par du 'phags shing mdzes par bshams/ de yang rgyun par yon chab dang spos dang/ maNDal sogs lan gsum re tsam ma tha 'bul bshams byed gang thub dang/ dus bzang ngang dus chen gyi tshen mchod pa bzang po lhag tsam re 'bul zhing/ de dag gi nang nas yon chab sogs bzhes btung gi rigs dang/ bsil ba'i mchod rdzas rnams nyin mo dang/ snang gsal gyi sgron me'i rigs sogs mtshan mo 'bul ba gtso che ba'i phyag len kyang mdzad cing/ de thams cad kyang gus pa chen pos byed pa gal che'o/ /dngos su mchod pa 'bul bshams kyi skabs 'dir skyabs 'gro'i thun mong gi bslab bya/ gnyis pa bka' drin chen po rjes su dran pas dus rtag tu mchod pa la brtson zhing/ bza' ba dang bca' ba'i phud kyang dbul ba zhes gsungs pa'i skabs kyi lam rim chen mo'i gzhung bshad man ngag dang bcas pa spyi dang/ khyad par du mchod pa bcu po des dkon mchog gsum la mchod pa ni yongs su rdzogs pa'i mchod pa'o/ /de dag gi mchod pa'i tshe na dkon mchog gsum gang rung la chung ngu zhig byas kyang 'bras bu dpag tu med pa 'byung ba'i bsam pa ni drug ste/ zhes gsungs pa ltar gyi mchod pa bya ba bcu dang byed pa'i bsam pa drug bcas byad sa'i man ngag de rnams la 'dris par byed pa shin tu gal che zhing/ gzhan yang rang cag dad pa chung zhing mi brtan pas mchod pa la mi brtson pa'i dus shas che bas rgyun par lam rim che chung las/ dper na zhing sa shin tu gshin pa gcig la sa bon 'debs dus su ma btab par lus pa 'dra na de ltar 'jog mi phod pa ltar zhes sogs dang/ zhing gi mchog la tha mal pa'i zhing gi mthong tsam yang med pa 'di zhes pa nas/ zhing gi mthu la brten pa man ngag yin no zhes pa'i bar sogs 'jog mi phod pa'i gsung gi tshig zur 'di tsam re blo thog nas thon par byas te yang yang bsams @271a @#/ /pas yid bskul ba ni gnad che zhing/ de ltar gsung rab thams cad gdams ngag tu ma shar yang sbyor dngos mjug gsum/ gcig grogs su gcig 'gro ba'i tshul gyis skabs 'dir yang bshad ma thag pa'i lam rim che chung gi lung 'dren dang/ de dag la rtog dpyod kyis bshad pa phran bu zhu shes na go nges myong gsum la phan cha che yang mi shes pas tshod gzung/ cung zad shes kyang yi ge mang bas 'jigs shing lhag par 'jig rten zhor 'byung gi chos la re nas be'u bum lag mthil tsam la thugs gtod pa rnams mi dgyes pas 'jug sgo de tsam las ma bkod pa'o// ! sbyor chos gsum pa ni/ thog mar stan gyi 'og tu sa dkar gyi rdo rje rgya gram mam g.yung drung chos skor du 'bri zhing/ de'i steng du rtsa ku sha 'am dur ba ma 'dzings par rtse mo nang du bstan nas 'jog pa'i phyag srol ni sngon byung ston pa rnams kyis bdud bzhi btul nas byang chen mngon du mdzad pa'i gnas/ sa phal pas mi theg pas rdo rje'i gdan du byin gyis brlabs pa dang/ g.yung drung ni rdo rje'i mtshon don yin zhing/ ku shas ni gtsang zhing dge ba dang/ dur bas ni tshe dang sgrub pa yun ring ba sogs rten 'brel gyi khyad par dang/ bcom ldan 'das rang nyid kyis rtsa tshong gi khye'u bkra shis las rtsa bzhes te stan du bting ba'i rnam thar sogs la rjes su slob pa dang/ sbyangs pa'i yon tan bcu gnyis kyi nang nas gzhi ji bzhin pa la slob par 'gyur zhing/ gzhon nu ma bdun gyi rtogs brjod las 'byung ba bzhin rab byung rnams kyis rung zhing bde na stan la sogs pa yang rtsa sogs gang byung gis byed pa'i 'dod chung chog shes la sbyangs par 'gyur ro/ /dge tshul slong rnams la khri stan che mtho dang/ srin bal 'ba' zhig cha gnyis dang/ drug dang zhes pa'i stan las gyur ba'i ltung ba bzhi bskyed pa'i mi rung ba'i stan dang/ mig nad can la dom lpags sogs @272b dmigs bsal 'ga' re ma gtogs gcan gzan gdug can gyi pags rigs sogs gtan nas mi lding zhing/ rung ba'i mal stan yang che tshad srid du khru phyed lnga dang chung tshad khru phyed gsum/ de'i bar ni 'bring tshad dang/ bsam gtan gyi stan gru bzhi sogs tshad dang ldan pa/ stan de gnyis so so'am mal stan la bsam gtan gyi stan du byas kyang rung zhing/ gang ltar rgyab cung zad mtho bar byas la/ gding ba stan ma yin yang de'i steng du gdid ba bting/ de yang bdag cag gi ston pas stan gyi steng du bzhugs nas/ bskal mang rnyed dka'i byang chub ma thob par/ stan 'di las ni sgul skyod mi bya'o/ /zhes dam bca' brtan po mdzad cing/ rang cag snyigs dus kyi skye bo rnams snying stobs dang chos la skal ba zhan pas de ltar mi nus kyang/ man ngag las/ chos la yar bskyed brtan pa ma thob par/ bla ma grogs gnas 'di las 'da' mi bya/ /zhes pa ngag tu bton nas/ lam gyi rim pa'i rtogs pa brtan po zhig ma thob bar du mtshan ldan bla ma dang/ grogs dang/ gnas dang/ gnas khang 'di las 'da' bar mi bya'o snyam du dam bca' brtan po re stan la 'dug dus su nges par bya dgos pa ni/ rtsa ba'i bla ma rnams kyi zhal gdams yin no/ /de nas/ rkang pa lag pa sked pa gsum/ /so mchu lce rnams bsdoms pas bzhi/ /mgo mig phrag pa dbugs dang bzhi/ /rnam par snang mdzad chos brgyad yin/ / zhes pa ltar lam sgom pa la lus kyi spyod lam chos brgyad ldan 'di gal che/ de yang sgom rim bar tha las gsungs pa ltar/ rkang pa skyil krung dam skyil krung phyed pa bya/ mig gnyis ha cang gdang tsum min par sna rtser gtad pa/ lus ha cang rgyab mdun du mi dgye mi sgu bar drang por bsrangs la dran pa nang du gzhag ste 'dug par bya'o/ /phrag pa ni thad kar mnyam par gzhag la/ mgo ni mi mtho mi dma' zhing phyogs gcig tu ma yo bar sna nas lte bar thad bsrang ste drang por bzhag /so mchu rang lugs su @273a @#/ /tha mal par bzhag go /lce ni ya so'i drung du gzhar ro/ /dbugs ni phyi nang du rgyu ba sgra can dang/ rngam pa dang/ rgod bag can du mi btang gi ci nas kyang phar rgyu tshur rgyu mi tshor bar dal bu dal bus 'bad pa med par 'jug pa de ltar bya'o/ / zhes lam rim chen mo las gsungs shing/ gong gi tshigs bcad kyi lag pa'i spyod lam 'dir phrag pa dang skyed pa lus kyi spyod lam du 'du/ so mchu lce rnams gcig tu ma bgrangs par logs su byas shing/ dbugs bgrang ba dang bcas brgyad do/ /de ltar skyil krung bcas pa la nyan sa las rgyu mtshan lnga gsungs te/ shin sbyangs skye sla ba dang/ 'dug yun ring yang lus mi ngal ba dang/ sbyong lam de mu stegs dang/ phas kyi rgol ba dag dang thun mong ma yin pa dang/ gzhan gyis mthong na shin tu dang ba skye ba dang/ sangs rgyas kyis gnang zhing nyan thos rnams kyis bstan pa ste phan yon lnga'o/ lus drang por bsrang ba ni rmugs pa dang gnyid mi 'byung ba'i don du gsungs/ lag pa gnyis thun khyod na rab dang/ de min yang thun mgor lte 'og sar bzhi'i mtshams nas mnyam gzhag gi phyag rgya byas/ mthe bong gnyis kyi rtsa sbyor ba lte ba'i thad sor 'ong ba byed pa 'di ma 'ongs pa na rdzogs rim gyi smin byed du 'gro bar gsungs/ lce rtse ya rkan la sbyar bas so mchu bsgrigs tsum ran zhing de las rlung gi 'gro 'ong bde bar 'gyur ro/ /mgo cung zad gug tsam byas na rtsa rnams gyen du mi lang bas rgod pa dang 'khrugs pa zhi bar 'gyur ro/ /mig tsum na sems la mun pa bab pa'i nyams 'char/ ha cang gdangs na sems rgod pa'i rkyen byed kyang yid dge ba'i dmigs pa la rtsa gcig tu bsgrims na dbang po rang 'gags su 'gro ba tshad ma'i rigs lam las 'byung ba ltar yin pas mig ma tsum par sna shog phan tshun gnyis mthong tsam du blta/ 'di brgyad sangs rgyas rnam snang gi ting nge 'dzin gyi @274b bzhugs stangs ltar yin pas rnam snang gi chos brgyad du grags/ bdag gi mkhan rin po che khri chen rdo rje 'chang gi gsung las sngags ltar na da lta gzhi dus nas 'bras bu'i rnam pa dang mthun par spyod lam 'di ltar brten pas lus kyi skyon rnams sbyangs te/ gzugs phung rnam par dag pa'i 'bras dus kyi rnam snang 'grub par 'gyur bas rnam snang gi chos su btags pa yin zhes bka' stsal zhing/ lus gnad 'phyugs na rlung 'khrugs/ de la brten nas sems 'khrugs pas yun thung yang lus gnad bcos pa gal che'o/ /de nas khyad par du rlung cham la 'bebs pa 'di rnam snang gi ches brgyad kyi grangs su mi 'dren yang/ mngon pa mdzod nas nang pa'i sems 'dzin gyi man ngag tu gsungs pa dang/ mi la yab sras sogs bka' brgyud gong ma rnams kyi rigs pa'i dwangs snyigs 'byed pa'i man ngag zhes zab zab du grags pa 'di dang rlung ro dgu phrugs su bsal ba bcas yin zhing/ des na skabs 'dir rlung rang babs su bzhag mus nas/ dge sems shugs che bar 'dug na sna bug g.yon nas rlung nang du rngub pa dang dus mnyam du bla ma dkon mchog gi byin rlabs sems la zhugs par bsams/ de min tshe 'di'i snang shas sogs rnam rtog ngan pa shugs che bar 'dug na/ sna bug g.yas nas rlung phyir 'bud pa dang dus mtshungs su sngon bsags sdig sgrib dang nyon mongs bag chags kyis bslang pa'i rnam rtog ngan pa rnams sang ste dag song snyam du bsam zhing/ thog mar mgo 'dzugs lugs de ltar byas pa'i khug pa re re la grangs su rtsis te thog mar bdun tsam nas mthar nyer gcig tsam gyis dbugs kyi 'gro 'ong la rtse gcig tu dmigs te gsal ngar dang ldan pa'i sems bzung gang thub bya/ de ltar byas pa'i mthar dge mi dge'i rnam rtog gi 'og nas sems kyi rang bzhin lung ma bstan gsal rig de yar thon yong ba'i nyams 'char/ de ni dper na shel @275a @#/ /dkar dri med de tshen dmar seng sogs gang dang phrad pa na de'i mdangs ldan du rkyen gyis bsgyur sla ba de bzhin du/ gtso sems spyi de yang grogs sems byung gis sgyur sla bas skabs 'dir sems de gzhan don du rdzogs byang thob 'dod 'dun pa'i grogs kyis sgyur ba zhig nges par dgos pas/ de la sgom gyis thog ma nas ma 'phyugs pa zhig gal che bas/ paN chen blo bzang chos kyi rgyal mtshan gyi gsung las/ sgom rnams kun gye dang po'i mgo /rgya gar skad mtshungs rang rgyud la/ / legs par brtags pa yin no zhes/ /zla med bla ma mchog des bzhed/ /ces gsungs pa ltar rang rgyud la legs par brtags te kun slong bcos pa 'di sgom gyi thog ma yin/ khams kyi ston pa zhig gis chos kyi dbu nges ma zin pa'i lo rgyus kyang yod/ des na rang rgyud la brtags na sbyor ba dge sbyor sogs la 'bad kyang blo ngan 'dis rje btsun mi la sogs tshe gcig sangs rgyas sgrub pa'i grub chen gyi gras la yang snyegs tshad tshad/ res tsa na 'jig rten grong pa'i chos lugs kyang byas na snyam pa sogs 'byung bas/ mi gnyis lam du 'gro ba'i dpe ltar sems kyi zur gcig gis sems sbyis gang bsams nas byed kyin 'dug brtags nas/ kun slong ngan pa rnams bkag ste/ ma mtha' lung ma bstan gyi ngang nas 'di ltar bsams dgos te 'khor ba thog med nas da bar rang sems kyi dbang du song/ sems nyon mongs pa'i dbang du gyur/ nyon mongs kyis las bsags nas sdug bsngal thams cad myong dgos byung 'dug pas phyin chad nyon mongs sems dang bcas pa rang dbang du byas shing rang yang bla ma dang chos kyi dbang du btang nas/ sems nyon mongs las tshur 'chos pa'i chos rnam dag la 'dris pa'i sgom zhig bya/ de yang/ spyod 'jug las/ sdug bsngal 'dor 'dod blo yod kyang/ /sdug bsngal nyid la mngon par rgyug /bde ba 'dod kyang gti mug pas/ /rang gi bde ba @276b dgra ltar bcom/ /zhes gsungs pa ltar/ rang cag gis thog med nas sdug bsngal sel tshod bde ba sgrub tshod la dpags na da lta sdug bsngal gtan zad kyi bde ba zhig thob dgos tshod la/ de 'dra phar zhog rang gi phral gyi bde ba yang dgra ltar bcom nas sdug bsngal gyi steng du mngon par brgyugs nas 'gro ba 'di blang dor la rmongs pa'i gti mug ma rig pas sgreb cing/ tsha 'di'i snang shas la chags pa'i sred pas dam du bcings pa'i dbang gis blang dor gyi lag len thams cad go log tu byed pa'i rgyun gyi blo ngan 'di la thug 'dug pas na/ da res phyi'i rkyen lam stan dge ba'i bshas gnyen mtshan nyid tshang ba dang mngal/ nang gi rkyen blang dor gang shes sgrub nus kyi dal 'byor phyogs mthun tshang ba'i rten bzang lan cig tsam 'thob dus 'dir dud 'gro'i bsam spyod las khyad than pa'i chos rnam dag zhig ma byas na phyin chad 'di 'dra'i rten bzang rnyed dka' zhing/ da lta rnyed pa 'di yang yun du mi gnas par nam 'chi la nges pa med pas tshe 'di'i khag 'dogs mang pos chos sang bya gnang bya'i dbang du ma lus par da lta nas sgrub dgos/ chos de yang gnyen gyi ngo bzung longs spyod kyi gsog thabs phung po 'di'i bde thabs sum song bar phyi ma phan chad kyi don du gang 'gyur zhig byed pa shin tu gal che ste/ da lta nus pa yod tshad kyis tshe 'di'i don kho na sgrub sgrub nas 'grub rung ma 'grub rung rang nyid na rga 'chi bas bcom nas ci bya gtol med kyis ci drag la thug pa'i gal che dus gnyen dang longs spyod lus sogs kyis mi phan par ma zad de dag la sred pas 'jigs skrag dang sdug bsngal bskyed par byed cing/ rgyal blon chen po sogs yin kyang de'i tshe ming tsam yang rjes su mi 'brangs par rang gcig pu gnyis su med par 'gro ba las ma 'das/ 'gro yul gyi 'jig rten phyi ma yang rang dbang med pa'i las kyi gzhan dbang can yin zhing/ las kyang rang gi byas bsags kho na yin pas de la dpags na ngan song du @277a @#/ /skye ba las 'os ma 'das shing/ de 'dra'i phung po grub tsam nas thabs gang gis kyang ldog tu med par tsha grang bkres skom ngal dub dbang med kyi sdug bsngal shugs drag la rgyun ring ba sgo sna tshogs pa zhig bar ma chad par myong dgos pa/ da lta mi yul gyi sdug bsngal myong ba'i nyams la dpags nas bsams shes na bzod thabs rang mi 'dug pas nyin mtshan kun tu las su bya ba gzhan spangs nas 'jigs pa de las skyobs pa'i skyabs shig nges par 'tshol dgos par 'dug /de yang rang 'jigs pa las grol zhing gzhan 'jigs pa las sgrol ba'i mkhyen brtse nus pa mthar phyin pa zhig skyabs su 'os na de ni sangs rgyas kho na la yod cing gzhan la med pa'i khyad chos dang/ chos ni sangs rgyas bde bar gshegs pa'i lam dang 'gog pa'i rang bzhin can yin zhing/ dge 'dun yang lam des grol bar nges pa'i rang bzhin can yin pas na grol ba don gnyer gyi skyes bu'i skyabs ni dkon mchog gsum kho nar nges shing de las gzhan pa'i skyabs gnas mi 'dod pa'i blos sangs rgyas la skyabs ston pa po dang/ chos la skyabs dngos dang/ dge 'dun la skyabs sgrub pa'i zla grogs su bzung ba'i sgo nas skyabs su 'gro bar bya/ /skyabs su song nas so so'i bslab bya dang/ thun mong gi bslab bya rnams dang/ khyad par skyabs dngos las dang 'bras bu'i tshul phra zhing phra ba shin tu lkog tu gyur pa rnams kyang rgyal bas mngon sum du gzigs nas brtse bas 'doms par mdzad pa'i lung rnams tshad mar byas te yid ches dang ma bral bar thos byung gis shes par byas te/ mi dge bcu spong nas brtsams te las 'bras spyi dang bye brag tu bsams te blang dor ma 'phyugs pa'i lag len la ci nas 'bad par bya/ de ltar 'bad kyang nyon mongs mang ba dang bag med pas bka' 'gal ba rnams kyang stobs ba las dngos su grol shags sdom gyis rang rgyud rnam par d dag pa'i las su bya bas dus 'da' bar ba'o/ /de ltar sgrub pas lta mi'i go 'phang phun tshogs zhig thob par des kyang de la yid tshim pa'i chog shes byar mi rung ste/ de ni gsod par nges pa gsod sar rgyan btags nas ngal bso ba lta bu'i tshod yin/ rang gi ngo bo 'du byed kyi sdug bsngal las ma 'das pas/ des las nyon bskyed cing las nyon gyis kyang slar yang ngan song sogs kyi sdug bsngal gyi phung po bskyed pas mtha' ngan zhing zo chun gyi khyud mo ltar sdug bsngal gyi 'khor lo rgyun chad med par 'khor zhing/ de la'ang bde bar snang nas dga' ba'i sred pas rang sems bslad de ma rig pa'i phyogs bzung nas 'khor ba'i las kho na gsog pas sdug bsngal kun las thar thabs med pa ni/ dper na na ba'i steng du na bar mi shes pa'i smyo ba ltar gyur nas rang gis rang la gnod pa kho na byed pas/ sman dang sman pa sogs gang gis kyang phan thabs med par gyur pa las ya nga ba dang skyo bar bya ba'i gnas ci zhig yong snyam du bsams par bya ste/ dpe chos las zo chun khyud mo smyon pa 'dra/ /zhes gsungs pa ltar ro/ /de yang 'khor ba'i ngo bo las nyon gyis bcings pa'i phung po lnga gang rigs yin/ da lta rang steng du grub zin pa'i phung po da ltar ba 'di skad cig gnyis par mi sdod par rang 'gag tu 'gro ba ni gnyen po sgom pa sogs la mi ltos pa'i 'dus byas spyi'i chos nyid yin zhing/ de tsam gyis 'khor ba spangs pa'i phyogs na yang med pas da res gnyen po sgom stobs kyis las nyon zad de ma 'ongs pa'i phung po len mi dgos pa zhig ci nas kyang bya/ de yang 'khor ba la rang log mi 'byung bas de'i rgyun kun 'byung spong dgos pas las nyon gzhan gyi rtsa ba ma rig pa ngos bzung ba na de rang yul la phyin ci log tu zhugs par shes te 'khor ba spong nus mthong nas thar pa thob 'dod kyi blo bcos min skye zhing/ @279a @#/ /blo de'i bzhed don thar pa thob pa ni lam bslab pa gsum sgom pa kho na la rag las pas 'khor ba las dngos su grol byed shes rab kyi mig gis yul bdag med la blta ba la zhi gnas kyi lag pas bzung dgos/ de yang tshul khrims kyi phung po dang ma bral ba dgos pas/ khas ma blangs pa'i zhi lhag gi sngon du khas blangs pa'i tshul khrims kyi bslab pa la nyon mongs kyi nyes pas ma gos par tshul bzhin du bsrung ba ni skyes bu 'bring dang thun mong ba'i lag len dngos yin pas shin tu gal che la/ spyir phyi nang thun mong ba'i zhi lhag sogs kyang kun 'byung rang dga' bar ma seng bar thar pa'i rgyur 'gro mi 'gro yang nang pa'i thun mong ma yin pa'i lam gyi gtso bo gsum po gang rung gis zin ma zin la rag las so/ /de ltar bslab pa gsum la bslab na rang 'khor ba las grol ba'i thar pa tsam 'thob nus kyang rang gzhan gyi don gang yang ma rdzogs shing/ slar yang theg chen du nges par 'jug dgos na/ de bsad lta nas rang gzhan gyi legs tshogs kun gyi 'byung gnas rgud pa thams cad sel ba'i sman/ mkhas pa'i skye bo kun gyi bgrod pa'i lam chen po/ mthong thos dran reg tsam gyis kyang 'gro ba kun gyi gsos su 'gyur ba gzhan gyi don du zhugs pas rang don yongs rdzogs zhar la 'grub pa'i thabs mkhas chen po dang ldan pa'i theg pa chen po la 'jug tu yod pa ni/ kye ma'o bdag gi rnyed pa legs par rnyed do snyam du bsams la skyes bu'i rtsal ci yod kyis theg pa'i mchog 'dir 'jug par bya zhing/ 'jug sgo yang byang chub kyi sems gcig bu kho nar nges shing de'i rtsa ba snying rje dang gzhan rnams de'i rgyu 'bras su 'gro bas na/ sems de bskyed pa la thog mar sems can kun la dgra gnyen du bzung nas chags sdang gis ris su gcod pa mi rigs te/ dgra gnyen byed pa la nges pa med @280b cing sems can gyi ngos nas bde ba 'dod pa dang sdug bsngal mi 'dod par mtshungs shing/ rang ngos nas sems can thams cad bdag gi gnyen du gyur pa la khyad gang yang med pas dgra gnyen yin pa tsam rgyu mtshan du byas nas bdag gis 'ga' zhig la chags shing la lar sdang bar byas te/ phan gnod byed pa ni mi rigs so snyam du bsams nas btang snyoms sgom par bya zhing/ 'on kyang sems can rnams btang snyoms kyis yal bar 'dor ba'i gnas min par yid du 'ong zhing gces par 'dzin pa'i yul kho na ste/ dpe chos las/ 'dam bu gcig stong ral gri dgra/ zhes gsungs pa ltar/ dper na shing 'dam bu gcig khog stang yin pa ltar 'dam bu gzhan thams cad kyang khog stong yin/ de bzhin du tshe 'di'i ma dang 'dra bar sems can thams cad kyis kyang ma grangs mod byas par mtshungs/ ma byas res kyi shes tshad nus tshad kyis bdag la phan bde sgrub cing/ gnod pa las skyobs pas drin che bar nges/ de yang ral gri dgra la btab na dgra bas gnyen 'jigs/ chu gang gnyen la byas na gnyen pas dgra smon zer ba ltar dgra yang smon pa'i las gnyen la byams pa'i drin gzo zhig bya dgos te/ pha ma skyid grogs sdug grogs la gsungs pa bzhin du tshe 'di'i pha ma ltar 'khor ba'i nang du skyid sdug mnyam bsres kyi phan btags btags pa'i drin can gyi sems can rnams tshe 'dir skye shi 'phos pas ngo ma shes pa tsam gyis rtsis med du dor nas rang nyid 'khor ba las ci thar byas na khrel chung tha chad du 'gyur bas na bdag gi nus pa ci yod kyis phan lan zhig bya ste/ de yang 'khor ba'i bde ba tsam gyis ni gnod pas/ thar pa mchog gi bde ba la dgod par bya ste/ mar rgan sems can 'di rnams zag med kyi bde bas phongs shing/ zag bcas kyi bde bas bslus te sdug bsngal gsum gyis rtag tu mnar bas nyam thag par gyur na bdag gis 'di dag bde ba dang phrad pa dang/ sdug bsngal@281a @#/ /las thar pa zhig ci nas kyang bya'o snyam du byams snying rje lhag bsam bskyed de de lta bu'i gzhan don la rdzogs byang dgos par ma zad rang don la yang byang chub de kho na 'thob dgos par 'dug pas/ sku gsung thugs dang 'phrin las kyi yon tan bsam gyis mi khyab par rdzogs pa'i byang chub de bdag gi ci nas kyang 'thob par bya'o snyam du byang chub tu sems bskyed cing rdzogs byang de sgrub pa na yang rim gyis sgrub dgos shing/ rang grol ba'i rim pa yang ngan song nas brtsams te rim gyis grol dgos pas na/ bdag nyid da lta ngan song gi las gyi sgrib pas ngan song du skye ba mi dran zhing/ dran yang mi 'jigs pa'i snying rdo rje'i rang bzhin du gyur pa ma gtogs bdag gi rang bzhin ni dge ba'i stobs zhen/ sdig pa'i stobs kha ma bri bas rang dang ngan song gi bar na dbugs gyu gyu ba 'di las mi 'dug pas bsams shes na dmyal ba bris pa mthong thos sogs kyis kyang 'jigs par gyur na/ bdag nyid blo bur du mi yul gyi snang ba 'khor bcas 'di 'gags nas/ de dag tu skyes te bzod rlag med pa'i rnam smin nyams su myong dgos pas ci rang drag snyam du bsams te kun dga' bo'i tsha bo gnyis ltar bag med yid bder sdod pa'i go skabs dang bral ba zhig ci nas kyang bya zhing/ de yang da lta dud 'gro rnams la bltas nas bdag blo bur du 'di 'drar gyur na ci ma rung snyam du dud 'gro'i sdug bsngal la mi bzod pa'i nyams chung dus kyang dmyal sogs gzhan rnams la yid ches bskyed de bsgom par byas pas de dag tu skyes zin pa lta bu'i tshod kyi 'jigs pa byung na skyabs 'gro'i rgyu gcig dang/ de nas 'jigs rkyang du ma btang bar skyabs btsal nas skyabs yul gyi sku gsung thugs sogs yon tan spyi dang khyad par du 'phrin las lhun gyis grub pa dang rgyun mi 'chad pa gnyis kyis sems can thams cad la phan thogs mdzad pa la phyi shol dang/ @282b sgrib thogs dang snyel ba mi mnga' ba sogs kyi yon tan la yid ches bskyed pa'i phyir sangs rgyas sgrub byed kyi lung rigs khyad par ba spyi dang/ ma mtha' sangs rgyas kyis dus gsum mkhyen tshul lta bu la/ sngon gyi bu mo gser phreng can dang/ mgon med zas sbyin gyi bu mo mgo gtums ma dang/ yab sras mjal ba'i mdo las gsungs pa'i shAkya'i 'bras thum so so dang/ lhas sbyin gyis bgam pa'i dus su shing thams cad kyi thal ba bsres pa ma nor bar mkhyen pa sogs sngon gyi byung ba rnams kyis kyang yid ches par byas te rang ngos nas sangs rgyas rjes dran la rtag tu bslab pas dad gus mi chung bar byas na thub pas phun tshogs dang ma sprad pa dang/ rgud pa las ma drangs pa med pas bgyi bar 'os pa thams cad nges par mdzad par gsungs shing/ mdor na 'gro ba skyob pa la rgyu gnyis las/ phyi'i rgyu ma tshang ba med par ston pas sgrub zin kyang/ bu mo'i se 'dzugs spungs chung nyen/ /gsung ba ltar gyur nas/ nang gi blo bkal nas skyabs su 'dzin pa ma byung bas rang cag sdug bsngal bar gyur pa yin no/ /'o na sangs rgyas kyis smin grol mdzad pa la gdul bya rang ngos nas dkrir rung ba dgos na sangs rgyas kyi mdzad pa yang de tsam don mi che snyam na chos dang sangs rgyas med na rang cag grol ba'i re ba'i gnas med cing/ skal ldan du gyur pa yang chos dang sangs rgyas rang gis mdzad pas skyon med do snyam du bsams nas sgom pa'i bgegs sel yang shes par byed/ des na bdag gis nyin re bzhin kha nas sangs rgyas lan brgyar smras/ yid yul du mo ma rno shos kyi tshong tsam du yang mi 'dzin par sangs rgyas kyi yon tan rnams la ske skyog byed dgos pa 'di yi re mug /sangs rgyas kyis dngos kyi gdul bya la mdzad pa bstan pa rnams lta zhog /da lta bdag lta bu la yang gang 'tshams kyis bla ma sangs rgyas kyi sku bstan nas thabs mkhas dang thugs rje che nges kyis bskyangs @283a @#/ /pas/ tshe bstod la bong bu 'dra ba/ tshe smad la phyi nang mtshungs pa'i mi gral du tshud par mdzad pa mthong thos mang po 'dug pa la dpags na sangs rgyas kyi yon tan spyi dang sku gsung thugs kyi 'phrin las kyi nus pa'i yon tan mthar thug pa gzhan la med pa mtha' yas pa rnams ci'i phyir mi bden snyam du yang nas yang du nges shes drangs pa las rkyen gang dang phrad kyang skyabs gzhan mi 'tshol ba'i blo tshod du sleb pa na/ dkon mchog la 'jigs pa mtha' dag las skyob pa'i nus pa yod par yid ches par bya ba skyabs 'gro'i rgyu gnyis pa ste/ mdor na bdag nyid 'jigs pa dang/ dkon mchog skyob nus su yid ches pa de gnyis tshig tsam du song na skyabs 'gro yang de dang 'dra la/ de gnyis shugs drag la brtan pa zhig yod na skyabs 'gro yang yid khul pa cig yong bas rgyu gnyis la 'bad pa gal che ste/ paN chen thams cad mkhyen pas/ skyabs 'gro'i ngo bo i thi ba/ /bdag nyid lhag par 'jigs pa dang/ /dkon mchog skyob pa'i nus ldan du/ /shes las byung ba'i skyabs 'gro la/ /skyabs 'gro ba zhes brjod pa yin/ /zhes sogs gsungs pa ltar ro/ /de ltar rgyu gnyis la 'bad nas skyabs 'gro dngos bya ba la skyabs 'gro dang myang 'das kyi bsam pa brtan po bskyed pa la rten 'di las lhag pa med pas rigs drug gis sems can thams cad kyang rang gi mtha' skor du rang dang kha blta phyogs mthun par mi'i rnam pa can sha stag tu 'khod par sgom/ mdun du skyabs yul gyi rnam pa gsal btab rung ma btab rung skyabs yul rnams dngos su mjal na ci ma rung snyam pa'i 'dun pa'am mos pa drag po gtso bor byas na thub pa 'khor bcas mdun du bzhugs nas skyabs gnas mdzad pa la yid gnyis dang the tshom mi dgos pa ni/ rgyal po gsal rgyal gyi bu mo rdo rje ma'i byung ba'i skabs bzhin/ gang zhig @284b mos pa gtsor byed pa/ de yi mdun na thub pa bzhugs/ /zhes gsungs pa ltar ro/ /'on kyang skyabs yul gsal btab na las dang po pa la sgo sna tshogs nas phan cha che bas/ rang gi mdun gyi thad steng gi nam mkha'i dbus su seng chen brgyad kyis bteg pa'i rin po che'i khri'i steng du sna tshogs pad zla nyi ma'i dkyil 'khor gyi steng du ngo bo rang gi drin can rtsa ba'i bla ma nyid rnam pa rgyal ba shAkya thub pa sku mdog gser btso ma lta bu dbu'i gtsug tor bltar mi mngon pa/ zhal gyi dkyil 'khor zla rgyas sprin bral dang 'dra ba zhal mchu padma dngos dang dbyer mi phyed pa/ zhal gser mdog la tshem dkar mdzes pa ni gser gyi ri bseb la ston ka'i zla zer zhugs pa 'dra ba/ phyag ring 'khor lo'i mtshan gyis mdzes pas 'gro ba'i dbugs 'byin mdzad pa/ zhabs gnyis padma 'dra bas gshegs pa'i tshe sa gzhi bris pa ni padma can las kyang mdzes pa sogs mdor na sku mchog mtshan dpe gtso 'khor gyis spras pa mig gi bdud rtsir gyur pa ni ston gnam la skar tshogs kyis spras pa 'dra ba/ sku la chos gos gsum mdzes par gsol ba ni/ gser gyi ri rtse thun mtshams kyi sprin gyis dkris pa 'dra ba/ sku las skyes pa'i 'od zer gyi phung po'i dbus na zhabs gnyis rdo rje'i skyil krung gis bzhugs pa blta bas chog mi shes pa/ gsung dbyangs yan lag drug cu dang ldan cing gsung lan gcig gis dri ba kun lan 'debs nus pa/ sdug bsngal rgyu bcas mthar 'byin pa'i chos kyi 'khor lo'i rang bzhin can/ thugs mkhyen pas shes bya kun la khyab cing brtse bas 'gro ba kun la bu gcig ltar dgongs pa/ 'phrin las rnam par mi rtog bzhin du 'gro sgrol mdzad pa sogs yon tan gyi phung po'i bdag nyid can du sgom/ de'i mtha' skor du rtsa brgyud kyi bla ma yi dam sogs skyabs gnas ma lus pa bdag nyid la dgyes bzhin du bzhugs par bsams/ chos dkon mchog kyang ngo bo 'gog @285a @#/ /lam gyi rang bzhin yin pa la gdul bya rnams thos sogs kyi sgo nas 'dren pa'i phyir rnam pa sprul pa'i glegs bam gyi tshul du gdan khri phun tshogs kyi steng du 'khod pa/ sku gsung thams cad kyang bem chos ma yin par ye shes las grub pa'i dag pa'i snang ba can 'od kyi rang bzhin du bsams nas/ de nas bdag sogs sems can thams cad kyang bde bas phongs zhing sdug bsngal gyis nyam thag pas kyang 'jigs la/ skyabs rnyed pas kyang dga' ste/ dga' 'jigs gnyis ka tshang ba'i sgo nas dkon mchog gsum gyi yon tan dang khyad par shes pas de gsum rim pa bzhin mgon skyabs dpung gnyen du khas blangs pa de las gzhan du skyabs gnas yod par mi smra ba ste skyabs su song ba'i tshul bzhi dang/ gzhan yang rang gi nyes dmigs la 'jigs pa/ dkon mchog gi yon tan la dad pa/ rang 'dra'i 'gro ba la snying brtse ba gsum bcas yid la legs par gang 'grub byas nas/ rang gi thob bya'i 'bras skyabs gsum la mngon 'dod kyi dad pa dang/ rgyu skyabs gsum la dang ba'i dang pa dang bcas te mdor na skyabs 'gro'i rgyu gnyis tshang ba'i sgo nas skyabs yul la re ltas 'cha' ba'i sems byung de skyabs 'gro yin pas de dang ldan bzhin du bdag sogs sems can thams cad spyir 'khor ba dang khyad par ngan song gi 'jigs pa rgyu bcas dang/ tshe 'di'i chos sgrub pa'i phyi nang gi bar chad thams cad las skyob tu gsol snyam pa'i sgo nas rang gzhan thams cad thal mo sbyar ba'i spyod lam gyis skyabs 'gro bya bar mos te blo sgyun de ji gnas bar du skyabs 'gro bzhi skor brgya tshar ram nyer gcig tsam bya zhing/ 'di nas gzung byin rlabs dpung zhu'i bar gyi dmigs sker zhal shes rnams rang gi byed 'dod tsam dang dpe shes tsam min par brgyad ldan bla ma'i @286b gsung las bde lam gyi 'khrid thob par byas te byung na khrid rim gyi thog nas gang shes dang/ de min rag rim khrid dpe spyi dang sbyor chos thub bstan lhun po'i mdzes rgyan sogs las gsal ba bzhin rgyun du mdzad thub na byin rlabs kyi tshan kha che zhing gzhan dang ma 'dra ba 'byung/ thog ma nas kha med pa'i za 'dod ltar gyur na mi phan pas re zhig blo rgyun skyabs 'gror bsgyur thabs sogs kyi dmigs skor gong du bshad pa rnams la 'dris par byas nas de'i steng du zhal shes kyi dmigs pa rnams rim gyis bsnan gyin bsgoM na las dang po pas thog mar 'jug bde zhing yar bskyed che ba bcas de bzhin du bya/ de nas sangs rgyas chos tshogs ma'i tshig rkang dang po gnyis kyi skabs skyabs 'gro khyad par can la blo sbyang ba ni/ mar gyur sems can thams cad bde med sdug bsngal gyis nyam thag pas kyang 'jigs la/ rang gis sgrol bar ma nus pas kyang 'jigs te skyabs yul la de las skyob nus su yid ches pa rgyu kun slong gi khyad par/ yul sangs rgyas dang chos theg chen gyi 'gog pa gtso bor byas pa'i lam gyi bden pa dang/ dge 'dun phyir mi ldog pa'i byang sems 'phags pa bcas skyabs yul gyi khyad par/ dus da nas bzung ste snying po rdzogs byang ma thob kyi bar du sangs rgyas la long ba long khrid la re ba'i tshul dang/ chos la skom pa chu la re ba'i tshul dang/ dge 'dun la tshong pa lam grogs la re ba'i tshul gyis skyabs su 'gro zhing/ khyad par du bsam pa de dus thams cad du mi ldog par bya'o snyam pa dus kyi khyad par te/ khyad par gsum ldan gyi skyabs 'gro bya/ de nas tshig rkang tha ma gnyis kyi skabs gzhan don du sangs rgyas thob par bya'o snyam pa'i smon sems dang/ sems de byang chub ma thob bar du mi btang ngo snyam pa dang/ rdzogs byang de'i phyir du sbyin sogs la slob par bgyi'o snyam du byang chub mchog tu sems bskyed/ sems de sgrub pa'i rgyu'i gtso bo tshad med bzhi sgom pa @287a @#/ /ni lam rim che chung du dngos su mi gsal yang de ni sems bskyed kyi sngon du byams pa snying rje gnyis song bas de gnyis su tshad med gzhan gnyis 'dus te/ byams pa snying rje phyogs ris med pas btang snyoms tshang/ sems can bde ba dang phrad pa dang sdug bsngal dang bral ba la dga' bar ma zad/ de 'dra'i sems can mthong thos byung na yang dga' ba skye bas dga' ba tshad med tshang bas mdor na byang chub sems sbyongs las logs su med de/ be'u bum sngon po las/ lha cig nyid kyi zhal nas de gsung/ /tshad med bzhi po gzhan nas gsungs kyang/ byams dang snying rje bsgom pas gnyis 'dus/ /de gnyis phyogs cha med pas btang snyoms/ /dga' ba bde phrad sdug bsngal bral las/ /de ni bzhir gsungs gnyis kyi nang 'du/ /zhes gsungs pa ltar ro/ /'on kyang man ngag rnams las 'dir tshad med bzhi bsgom par gsungs pa ltar/ tshad med btang snyoms la sems can rnams nye ring chags sdang dang bral bar 'dod pa zhig dang rang nyid sems can rnams la chags sdang dang dral ba'i btang snyoms gnyis las/ gnyis pa ni rgyu 'bras bdun pa'i sngon du sgom par bya ba de yin/ dang po ni skabs 'dir bsgom par bya ba ste/ de yang sems can 'di rnams chags sdang gi sems ma snyoms pas/ bde bas phongs zhing sdug bsngal bar gyur pas/ 'di rnams chags sdang dang bral ba'i btang snyoms la gnas na ci ma rung snyam pa dang/ gnas par gyur cig snyam pa dang/ gnas pa zhig bdag gi bya'o snyam pa dang/ de bzhin du byams pa tshad med la'ang sems can rnams bde ba dang ldan na snyam pa sogs gsum dang/ snying rje tshad med skabs kyang sdug bsngal dang bral na snyam pa sogs gsum/ dga' ba tshad med la yang sems can rnams bde ba dam pa dang ma bral na snyam pa sogs gsum bcas tshad med re re la @288b yang 'dun pa tshad med/ smon pa tshad med/ lhag bsam tshad med gsum gsum tshang bar bya zhing/ gsum po re re'i mthar de ltar byed nus pa'i byin rlabs zhu pa'i gsol 'debs kyang bya/ de yang gzhan don gces par 'dzin pa nas thog mar 'dun pa skye/ de gong du 'phel nas gzhan la smon lam 'debs/ de nas bdag gis sgrub par dam bca' zhing byin rlabs zhu ba bcas 'byung bas 'dun pa sogs bzhi po yang rang gi blo gcig gong du 'phel ba'i rgyun las 'di dag sogs lam gong 'og rnams bsgom pa'i tshe/ phyi ma rnams snga ma'i shugs kyis thon pa'i nyams dgos kyi/ 'brel med so sor 'char na mi legs so/ /tshad med bzhi po 'di yang/ gzhung che ba las rnam pa brgyad kyi rnam gzhag gsungs te/ de yang ngo bo ni chags sdang la sogs pa dang bral ba'i brtse sems so/ mtshungs ldan ni mi dmigs pa'i ye shes so/ /dmigs pa ni sems can dang chos dang de bzhin nyid do/ /las ni sems can smin par byed pa la sogs pas 'gro ba rjes su 'dzin pa'o/ /rnam pa ni sems can la dmigs pa'i dbang du byas nas/ sems can bde 'dod dang/ sdug bsngal dang bral 'dod dang/ bde ba dang mi 'bral bar 'dod pa dang/ tshor ba gang la kun nas nyon mongs pa mang par 'dod pa'o/ /chos la dmigs pa ni/ mi rtag pas khyad par du byas nas 'jug pa'o/ /dmigs pa med pa ni bden med kyi khyad par du byas nas 'jug pa'o/ /rgyu ni de dag rnams goms pa'i bag chags so/ /'bras bu lnga ste/ rnam smin gyis ni gang 'dod par skye'o/ /bdag pos ni tshogs rgya chen po rdzogs par byed pa'o/ /skyes bu'i byed 'bras ni sems can smin par byed pa'o/ /rgyu mthun ni gnas skabs thams cad de dag nyid sgom pa dang mi 'bral ba'o/ /bral ba'i 'bras bu ni gnod sems la sogs pa las rnam par grol ba'o/ /goms pa'i rtags ni rang rang gi mi mthun phyogs kyi rkyen nye bar gnas kyang 'gyur ba med pa'o/ /gzhan @289a @#/ /yang tshad med bzhi bsgom pa la dgos pa gsum yod de/ rnam par 'tshe ba las skyob pa dang/ theg pa dman pa las bskyab pa dang/ byang chub kyi sems brtan par 'gyur ba'i dgos pa gsum mo/ /dang po ni/ 'phags pa bsdud pa las/ mi yi 'jig rten 'byung po'i gdon dang nad mang ba/ /phan dang snying brtser ldan pa'i bden pa'i byin gyis zhi/ /zhes pa ltar/ rang gzhan gyi phyi nang gi nyer 'tshe mtha' dag byams snying rje sgom pas nye bar zhi pa 'dra ba/ lha bsgom sngags bzlas sogs gzhan gyis mi nus/ phral cung zad zhi ba 'dra ba'ang slar mthu ru 'gro nyan yod/ gnyis pa ni/ bstan rim las/ dmyal 'gro bas kyang byang chub la/ /gtan gyi gegs byed ma yin gyis/ /nyan thos dang ni rang sangs rgyas/ /'di gnyis gtan gyi gegs byed de/ /zhes pa ltar blo chung nyan rang gi theg pa dman pa las byams snying rjes skyob par byed do/ /gsum pa ni/ yang bstan rim las/ phye ma leb dang 'dab chags dang/ /rgya mtsho ngag gis ri rab ltar/ /zhes pa bzhin/ phye ma leb lta bu rang gi nye du dang 'brel pa la gnod pa byung ba dang/ nam mkha' lding gi 'dab chags lta bu rang gi longs spyod la gnod pa byung ba dang/ rgya mtsho'i rlabs lta bu rang gi srog la gnod pa byung yang byang chub kyi sems la gnod par mi 'gyur ba dang/ bu gcig pa ni shi ba'i mas bu rtag tu mi brjed par dran pa ltar/ byang chub kyi sems rtag tu mi brjed pa gnyis ka yang tshad med bzhir byed do/ /de ltar skyabs sems tshad med dang bcas pa rnams kyang cho kha'i tshig rgyas bsdus dang/ sgom yun ring thung sog gang ltar yang rgyud dang 'dres des gal che/ spyir sgom gang la yang mi rtog sdug bsngal sogs yul bsgom na de'i rnam pa can du bskyed pa dang skyabs sems sogs yul can sgom pa na blo de'i ngo bor bskyed pa yin pas so/ /de bas na be'u bum sngon @290b po las/ g.yog gi dpon la dris pa'i gtam bzhin/ /byams dang snying rje byang sems spyongs na/ /tshig dang med kyang sems sbyong yin te/ /sems med tshig gis de ltar mi 'gyur/ /zhes gsung zhing/ de'i 'grel par/ sems med pa'i tshig rkyang pa khram pas kyang shes te/ des byang chub kyi sems sbyong ba'i go mi chod gsung/ sems gang sbyong yang ma mtha' gong du kun slong 'chos pa'i skabs su bshad pa ltar gyi rim pas bdas pas sbyong lugs de 'dra zhig gal che ste/ dper na byams snying rje ma brgyud par gzhan don du sangs rgyas 'thob par bya'o snyam du bsams pas sems bskyed kyi go mi chod/ lam rim chen mo las/ des na 'di dag gi phyogs dang yul tsam na yang med par sems can thams cad kyi don du sangs rgyas theb par bya/ de'i don bdag gi dge ba 'di bya'o snyam du bsam pa bskyed pa tsam la ches cher 'khrul nas ma thob pa la thob bo snyam pa'i mngon pa'i nga rgyal brtan par byas te/ zhes gsungs pa ltar ro/ /de ltar sbyangs pas lam gyi blo sna yud tsam las ma skyes kyang bsam med kyis phyag skor ngag 'don sems 'dzin sbyin gtong sogs dge rtsa gzhan 'ud che ba gang gis kyang bsgrun du med pas gnad che'o/ /de nas skyabs yul rnams sngar gdul bya'i mos pa'i dbang gis chos sku las gzugs skur bzhengs te/ 'gro ba skyob pa'i don mdzad nas slar yang chos sku'i ngang du gshegs par bsams pa'am/ yang na skyabs yul gzhan rnams gtso bo la thim zhing/ gtso bo yang 'od ser po'i rnam par rang gi smin mtshams nas thim pas byin gyis brlabs par bsam mo/ /sbyor chos bzhi pa ni/ rang nyid bde myur zhal lung sogs gang la khrid rim du byed par nges na sbyor chos kyang de nang bzhin byed pa gal che/ dngos gzhi'i khrid rim sgem pa dang ma 'brel bar sbyor chos rkyang pas bsag sbyangs la brtson skabs@291a @#/ /yin na gang 'char bde ba zhig byed du rung bas/ 'dir bde lam dang mthun par rang gi mdun gyi thad steng gi nam mkha'i dbus su seng ge chen po brgyad kyis bteg pa'i rin po che'i khri mthol rgya che ba'i rgyab la cung zad phyogs pa'i dbus su seng khri pad zla nyi ma'i dkyil 'khor gyi gdan la bla ma rgyal ba shAkya thub pa sku mdog gser btso ma lta bu sogs gong du skyabs yul gyi skabs bzhin gsal ba'i thugs ka nas 'od zer mdun phyogs su dngos kyi bla ma'i grangs mnyam 'phros pa'i dbus kyi sne mor seng khri pad zla nyi ma'i gdan la drin can rtsa ba'i bla ma sku mjal dus kyi rnam pa ji lta ba bzhin la thugs dgyes pa'i nyams dang ldan pa/ dbu la gser mdog paN zhwa sne ring mdzes par gsol ba/ phyag g.yas chos 'chad/ g.yon mnyam gzhag gi steng na lam rim gyi glegs bam zhal phye ba rang sgra sgrogs bzhin pa bsnams pa/ sku la chos gos gsum mdzes par gsol ba/ zhabs rdo rje'i skyil krung gis bzhugs pa chos ston pa'i rnam pa can la chos 'brel dngos thob kyi bla ma rnams kyis bskor ba/ 'od zer gyi sner pad zla'i steng du bzhugs pa/ thub dbang gi thugs ka nas 'od zer steng dang g.yas g.yon rnams su brgyud pa gsum gyi bla ma'i grangs mnyam 'phros pa'i rgyab kyi sne mor seng khri pad zla nyi ma'i gdan gyi steng du rgyal ba rdo rje 'chang la nyams len byin rlabs brgyud pa'i bla ma rnams kyis bskor ba 'od zer gyi sner pad zla'i steng du bzhugs pa/ g.yas g.yon gyi 'od zer gyi sner pad zla'i steng du rje btsun byams pa dang 'jam dbyangs la rgya chen spyod brgyud dang/ zab mo lta brgyud kyi bla ma rnams kyis bskor nas bzhugs pa/ de dag thams cad kyi mtha' skor du yi dam sangs rgyas byang sems 'phags pa nyan rang dpa' bo mkha' 'gro bstan bsrung ye shes pa'i tshogs dang bcas pa rnams kyis @292b bskor nas bzhugs pa/ de dag rang rang gi mdun na gdan khri phun sum tshogs pa la rang rang gis gsungs pa'i lung gi chos rnams dang/ de dag gi phyi rol tu mdzad pa bcu gnyis sogs gang la gang 'dul gyi sprul pa'i bkod pa phyogs bcur 'phros pa'i gtso 'khor thams cad kyi gnas lngar yi ge lngas mtshan pa/ de nas rnam dag chos dbyings ma dang/ ma lus sems can ma brjod pas/ bla ma thub pa'i dbang po'i thugs ka nas 'od zer 'phros pas ye shes pa rnams spyan drangs dam tshig pa so so la thim par bsams/ yang sa gzhi dang 'brel bar gsal 'debs na/ 'og gi sa gzhi baiDUrya sngon po'i rang bzhin 'khod snyoms pa/ tha gru rgya che ba 'og gzhi rdo rje rgya gram me long la sku'i gzugs brnyan shar ba ltar yod pa/ de'i steng du rtsa ba'i seng khri tshogs zhing dang bcas pa gong bzhin gsal btab kyang rung ba man ngag las 'byung bas gad mos bya/ yang na sa gzhi 'di lta bu yang res tsa na rin po che'i sa gzhir gyur/ res da lta'i sa rdo sogs su snang/ byams mgon zhing 'dir byon pa'i tshe zhing rnam dag tu 'grub cing rgya khyon yang cher 'gro ba sogs nang gi sems dag ma dag gi bdag nyid dam khyad par snod bzang ngan sogs rang gi ngo bos ma yin par rgyu rkyen gzhan tshogs pa la lhos pa'i rtog btags yin pa la dbu tshad kyi lung rig gis ma mtha' go ba rnam dag zhig ma btsal na/ skabs 'dir bdag gis zhing dang tshogs zhing sogs dag pa'i rang bzhin du sgom pa ma gtogs don la ma dag pa rang gi dbang shes la snang gzhin pa de la 'gyur ldog ga la srid snyam pa blo phugs su bcug na sgom la 'jug pa mi bde zhing zhugs pa don mi 'grub pas/ da lta zhing bkod dang tshogs zhing sogs yid ngor gsal ba la sbyangs pas sems dag tu song ba na snang ba je dag tu song ste mthar dbang shes la snang zhing gzung du rung bar 'gyur snyam du stong pa rten 'brel la nges pa drangs te/ dkon mchog gsum gyi bden pa @293a @#/ /dang/ zhes sogs zhal lung nas 'byung ba ltar gyi bden stobs brjod pas zhing 'di skad cig gnyis par dag zhing du gyur te rin po che'i sa gzhi lag mthil ltar khod snyom pa'i steng du phyogs bzhir khrus khang shar nub kyi mtha' mi mngon pa rin po che sna bdun las grub pa'i ljon shing dbyibs legs shing bkod pa mdzes pa/ gser gyi bye mas brgyan pa'i rdzing bu ljon shing la gnas pa'i yid kyi sprul ba'i bya sna tshogs kyis chos kyi sdom bzhi sogs skad snyan par sgrogs pa/ bar bar du rin po che'i khang bzang la gnas pa'i sangs rgyas dang byang sems mtha' yas pa'i 'gro don sna tshogs mdzad pa/ gzhan yang grub thob mnyam gzhag mdzad pa sogs snod bcud kyi yon tan phun sum tshogs pa bde ba can gyi zhing bkod ltar gyur pa de'i dbus su rin po che'i khang brtsegs mtho zhing gser gyi ka ba dang dngul gyi gzhu sogs gzhal yas khang ltar dang/ dbang thob na rta babs sogs kyang sgom rung zhing khang brtsegs kyi lcam sne'i me long gi nang du rgyal ba rnams kyis thugs bskyed pa nas mthar ches 'khor bskor ba'i bar gsal bar snang ba steng du gser gyi rgya phaib dang ldan pa/ dbyibs gru bzhi sgo bzhi pa zhig bsams/ de'i dbus su 'og gzhi sna tshogs rdo rje bltas na gsal zhing/ reg na 'bur skong sogs med pa/ de'i steng du dbang phyug brgyad mtshon pa'i seng ge chen po dbugs lhem lhem pa/ mig hrig hrig pa brgyad kyis bteg pa'i rin po che'i khri chen kun nas gru bzhi pa/ bang rim bzhi yod pa/ de'i dbus dang rgyab mdun gnyis su seng khri dang/ de gsum gyi g.yas g.yon du rin po che'i gdan khri dngos brgyud kyi bla ma'i grangs dang mnyam pa/ rgyab mdun mtha' skor rnams su rin po che'i rang bzhin las grub pa'i gdan tal mar btang ba ring thung dang mtho dma' sogs 'tshams pa'i bkod pa mdzes pa zhig gsal gdab/ de nas tshogs zhing @294b dngos mgron thabs kyi tshul du spyan 'dren pa ni/ tshul khrims rnam dag shes rab shin tu dag /dad ldan snying po nyan thos che rnams kyis/ /mgon med gyur pa bdag rjes bzung ba'i phyir/ /don mdzad thugs rjes gshegs par mdzad du gsol/ /zhes pa dang/ rnam dag chos dbyings ma dang/ ma lus sems can ma dang/ bcom ldan bskal pa ma dang/ de phyir chos dbyings ma bcas brjod nas spyan drangs pas/ bla ma thub pa'i dbang po la rtsa brgyud kyi bla ma rnams dang/ theg pa che chung gi slob pa dang mi slob pa'i dge 'dun rdzu 'phrul gyi stobs dang ldan pa rnams kyis bskor te/ ma ga d+ha bzang mo'i gtam brgyud las ji ltar byung ba bzhin byon nas so so'i stan bshams pa rnams la bzhugs par mos/ tshogs zhing tha ma 'di lar byas na ye shes pa gang la ldan pa'i sku dngos gnas pa zhing dang dus kyis bskal ba rnams rang gi dad mos stobs ches pas dngos su spyan drangs thub pa'i skabs yin pas ye shes pa dang ldan mi ldan gyi dogs gnas dang bral bas gnas lngar yi ge 'god pa dang/ ye shes pa bstam zhugs gnyis mi dgos shing/ spyir tshogs zhing gsal gdab pa tsam la sbyor chos gcig tu bya rin mi 'dug snyam du gal chung mi rung ste/ da lta zhing gi mthu la brten pa gal che ba'i dus yin zhing/ tshogs zhing rnams so so nas yid ngor gsal legs par thebs pa dang/ mos ngor de dang de dngos yin snyam du thag chod pa dang/ dad ngor yon tan gyi phung por mthong bas yon gnas phul du phyin par yid ches pa gsum 'dzom na tshogs zhing der brten nas bsag sbyangs la mi 'jug pa mi srid cing/ zhugs pa'ang rten dang dngos po dman yang zhing dang bsam pa'i stobs kyis mthu phul du phyin par 'gyur bas gal che'o zhes bdag gi bla ma gsung ngo/ /de nas sku khrus gsol ba ni/ sku dngos la brten pa'i sdig sgrib sbyong ba dang/ bkur bsti phyag g.yog gi nye rgyur 'gro ba dang/ rig pa dwangs pa sogs phan @295a @#/ /yon cha bas byed par spro na/ khrus kyi khang pa zhes sogs kyis khrus khang gong du bskyed yod na dran par bya zhing/ de min seng khri'i phyogs bzhir khrus khang rin chen sna tshogs las grub pa/ shel gyi sa gzhi gsal zhing 'tsher ba/ gser gyi ka ba dngul gyi gzhu sogs 'od 'bar ba phyi nang kun tu rgyan sna tshogs kyis brgyar pa/ gru bzhi sgo bzhi pa/ de'i nang du khrus kyi rdzing bu gru bzhi pa sogs gzhi gser gyi bye ma bdal ba dbus cung mtho ba chu yan lag brgyad ldan rtag tu 'bab pa/ them skas bzhi bzhi yod pa las gsum pa bab mtshams nas khrus chu len du yod pa/ khrus khang gi nye 'dab kun dang rdzing bu'i khang rnams su nad sel ba'i sman gyi me tog sna tshogs dang/ de dag gi dri bsung phyogs kun tu khyab pa sogs kyis yid du 'ong zhing mdzes pa gsal gdab/ yang skabs 'gar sa drug pa thob pa'i skabs kyi skabs su gsungs pa bzhin du/ them sras bzhi dang ldan pa'i rdzing gser gyi bye ma bdal ba dwangs shing rnyog pa med pa chu yan lag brgyad dang ldan pas yongs su gang ba/ me tog utpla dang/ ku mu da dang/ padma dkar pos brgyan pa gsal gdab/ rdzing ni sangs rgyas kyi bstan pa dang/ them skas bzhi ni da la 'jug pa'i grub mtha' bzhi/ gser gyi bye ma bdal ba ni gzhi/ dwangs shing rnyog pa med pa ni rang bzhin dang blo bur rnam dag /ji skad du/ bsil dang zhim dang yang dang 'jam/ /dwangs dang dri ma med pa dang/ /'thud na lto bar mi gnod dang/ /mgrin pa la ni mi gnod pa'o/ /zhes pa'i yan lag brgyad ldan gyi chus gang ba ni 'phags lam yan lag brgyad do/ /me tog rigs gsum gyis gang zag gsum mtshon te/ utpla la ni nyi mas kyang kha 'byed la gzhan gyi tshe yang 'byed srid pas gdul bya nyan thos dang/ ku mu da ni nyi mas zum pa dang zla bas 'byed par byed pas nyi ma lta bu'i sangs rgyas ma byon @296b pa'i tshe 'byung bas des rang rgyal dang/ padma dkar pos ni pad dkar lta bu'i byang sems mchog mchon pa yin no/ /der zhes pa dang mnyam du tshogs zhing rnams bya khyu phur ba ltar rang phyogs kyi khrus khang nang du byon/ rang lus dpag med du sprul nas tshogs zhing rnams kyi phyag g.yog byed pa/ na bza' rnying pa rnams rang la gnang bas za ma tog tu byin rtan gyi tshul du bzhag /sku gcer bu'i dbu dag nas mchod lha'am rang nyid kyis dri bzang gi chus bkang ba'i rin po che'i bum pa thogs te/ ji ltar bltams pa tsam gyis ni/ zhes sogs tshig bcad gang 'os brjod nas khrus gsol/ khrus chu rnams rdzing 'og nas 'thon te ljan ljin med par rigs drug so so'i gnas su song nas tsha dmyal gyi me thams cad zhi ba'i char dang/ grang dmyal gyi grang reg thams cad zhi ba'i nyi ma dang/ yi dwags kyi bkres skom thams cad zhi ba'i zas skom ro brgya pa dang/ dud 'gro'i bkol spyod rmongs mun sel ba'i sgron me dang/ lha ma yin gyi mda' char bsrung ba'i go cha dang/ lha'i 'chi 'pho ltung ba'i sdug bsngal gyi chu bo las sgrol ba'i rdzings dang/ mi'i skye rga na 'chi dang nyon mongs kyi nad kun sel ba'i sman dang sman par gyur pa sogs rigs drug spyi dang so so'i sdug bsngal sel zhing 'dod pa'i dngos por byed pa 'di ni spyir rgyal sras dam pa rnams kyi thugs sbyong dang phyag bzhes yin la/ rang cag lta bu la yang kun slong skyon med tsam yod na/ rang gzhan gyi rigs drug gnas spyong gi dmigs pa 'ud che ba gang gi kyang 'gran zla med pa'i rgyal ba'i bka' dang mthun pa'i man ngag chen po zhig go /de dag sku la mtshungs pa med pa'i gos/ /zhes pa'i skabs sku rnams phyis/ stong gsum kun tu zhes pa'i skabs dri bzang gi lde gus byug pa bya zhing/ sna tshogs dbang po'i zhes pa'i skabs gang la gang mtshams kyi na bza' 'bul zhing/ rgyal ba mtshan dpe'i zhes pa'i skabs gang 'os kyi rgyan rnams phul/ gzhan yang tshig bcad gang 'os @297a @#/ /kyi rdzas rtags sogs 'bul bar spro na bya zhing/ bdag dang 'gro la thugs brtse'i phyir/ /zhes pa'i skabs tshogs zhing rnams rdzu 'phrul gyis sngar bzhin so so'i gdan khri la brtan par bzhugs par bsams/ bde lam ltar na khrus khang mi dmigs par bsgom pa'am phyogs kyi seng khri la thim par bsams/ zhal lung skabs khrus khang ma bsdus kyang rung/ cung bsdus pa la spro na rang gi snying kha nas tshogs zhing re re'i mdun du mchod lha gsum re spros te/ khrus gsol ba dang/ gzeng zhal 'dzin pa/ 'dag rdzas sogs 'bul ba bcas gsum yin/ yang na me long la tshogs zhing ma lus pa'i sku gzugs gsal bar mos nas de la khrus gsol ba sogs rang gi dngos su byas kyang rung zhes bdag gi mkhan rin po che khri chen rdo rje 'chang gis gsung ngo/ /! sbyor chos lnga pa bsag sbyang gi gnad bsdus pa yan lag bdun pa bya ba ni/ thog mar 'di ltar bsams par bya ste/ da res rten bzang bas sangs rgyas man chad dmyal ba yan chad bde sdug dang skye gnas mtho dman gang du skye ba'i dbang ni bdag la yod/ de yang rang gi sems bcos legs ma legs kho na la rag las te/ mdo las/ bdag nyid bdag gi mgon yin te/ /gzhan ni su zhig mgon du 'gyur/ /bdag nyid legs par thul bas ni/ /mkhas pas mtho ris thob par 'gyur/ /zhes dang/ sems dul ba ni legs pa ste/ /sems dul ba ni bde ba 'dren/ /zhes dang/ bshes springs las kyang/ thar pa bdag la rag las 'di la ni/ /gzhan gyi grogs bgyir ci yang ma mchis pas/ /thos dang tshul khrims bsam btan ldan pa yis/ /bden pa rnam pa bzhi la 'bad par mdzod/ /ces gsungs pa ltar/ rang sems la bzo bcos legs nas dge ba la yang dag par zhugs na ni sangs rgyas man chad kyang 'grub la/ bzo bcos ma legs te mi dge ba la rtag tu zhugs @298b na ni dmyal bar lhung nas sdug bsngal mi bzad par myong dgos pas na/ bdag legs su 'dod cing gzhan la yang phan bde bya bar 'dod pas ni rtag tu rang gi sems legs par bcos shing sbyangs dgos la/ de yang lhan cig byed rkyen bsag sbyang gis rgyab skyor med na dge ba'i rtog pa skye ba lam du 'gro dka' ste/ lam rim las/ de nas lam rgyud la skye ba'i mthun rkyen tshogs bsags pa dang/ 'gal rkyen sgrib pa sbyong ba'i lhan cig byed rkyen med na nyer len gyi rgyu dmigs rnam skyong ba tsam la 'bad kyang lam shin tu skye dka' bas/ bsag sbyang gi gnad rnams bsdus pa'i yan lag bdun pas rgyud sbyang dgos so/ /zhes dang/ zhal gdams las kyang/ tshogs gsog med na brlan med sa bon 'dra/ /zhes gsung so/ /de yang blo sbyong gzhir byas nas de'i steng du yon tan rdzogs par byed pa la blo sbyong zer ba zhig dang/ yang de'i steng gi dri ma med par byed pa la yang blo sbyangs pa zer te/ sa'i yongs sbyong gi skabs kyi gser 'phreng las/ rnam pa gcig tu nas rnams sbyang gzhir byas nas yon skyon gnyis sbyang byar bya ste/ yon tan sbyong ba'i don ni khang bzang sbyong ba ltar rdzogs par byed pa yin la/ skyon sbyong ba'i don ni rin po che'i g.ya' sbyong ba ltar sel ba'o/ /zhes gsungs pa ltar gyi yon skyon sbyong ba'i gnad kyang yan lag bdun pa 'dir tshang zhing/ khyad par du sngon 'gro bsag sbyang chung 'bring chen po byas pa'i gnad kyis/ dngos gzhi skyes bu chung 'bring che gsum lam gyi rim pa rnams rgyud la skye bas 'dir theg pa chen po'i rtogs pa khyad par can skye ba'i ched du zhugs pa yin pas/ bsag sbyangs kyang rgya gang che la 'bad dgos shing/ de ltar 'bad na theg pa chen por sems ma bskyed pa'i snga rol nas kyang snying rje dang/ sbyin pa dang/ tshul khrims dang/ bzod pa sgom pa la dga' ba sogs rgya che ba'i chos la mos pa brtan po thog mar rnyed pa'i tshe theg pa chen po'i rigs la gnas pa zhes bya la/ gang zag de @299a @#/ /nyid la sems ma bskyed pa'i byang chub sems dpa' zhes kyang bshad do/ /zhes rnams bshad las gsungs shing/ de ltar na rigs can rnams kyi rigs sad pa'i thabs dang/ lam rnams kyi gegs sel bogs 'don dang sbyor chos kyi lag len dngos lta bu yang yan lag bdun pa 'di yin zhing/ byang sems rnams sangs rgyas kyi zhing gcig nas gcig tu phebs nas sangs rgyas rnams dang mjal mtshams su lag skyes lta bur yan lag bdun pa 'di phul nas rgyal ba rnams ni dgyes par mdzad de/ dgos pa dngos la 'jug pa ma gtogs de las gzhan bya rgyu gang yang med/ spyir 'di'i steng du dad pa skyabs sems bsnan nas yan lag bcur mdzad pa'ang 'dug cing/ 'dir ni bzang spyod smon lam gyi rjes su 'brangs te yan lag bdun pa bya ba la thog mar phyag 'tshal ba'i yan lag skabs/ rang 'khor ba dang ngan song gi sdug bsngal la 'jigs nas de las thar 'dod kyi nges 'byung dang/ rang 'dra'i 'gro ba rnams 'khor bar tshud pa la de las mi bzod pa'i byams snying rje byang chub kyi sems bskyed de bdag gi chos sgrub pa'i rten lan cig tsam thob pa 'dir/ rang gis 'bad phyin nyin re bzhin lus ngag yid gsum la dus gcig tu snying po len pa'i mchog phyag mchod sogs byed shes pa de ngo mtshar che ste/ da lta mthong tshod kyi ngad med log zhugs can gyi mi phal mo che dang/ dud 'gro 'di dag lta bur skyes nas sgo gsum ngal ba che la don chung bar gyur na ci rang drag ma rung snyam du bsams pa gal che zhing/ 'don cha ni rgyas par byed spro na lam rim gsol 'debs phyag 'tshal du bsgyur nas 'don pa dang/ de min bla ma sde lnga'i phyag 'tshal sogs sbyor chos thub bstan lhun mdzes ltar bya zhing/ 'dir 'jug pa bde ba'i phyir phyag 'tshal ba'i yan lag la sgo gsum sdom pa'i phyag ni/ ji snyed su dag ces pa'i tshig bcad gcig ste/ 'jig rten gyi khams phyogs re ba dang/ @300b dus re re'i sangs rgyas ma yin gyi phyogs bcu ga na bzhugs pa dang/ dus gsum gyi rgyal ba thams cad la dmigs nas gzhan gyi g.yam la rgyug pa ste lad mo lta bu min par bsam pa thag pa nas lus btud cing/ ngag gis bstod la yid gis dmigs te dus mnyam pa'i sgo gsum gus pas phyag 'tshal ba'o/ /ji snyed su dag ces pa ni sangs rgyas ma lus pa'i don no/ /ma lus pa gang zhe na/ phyogs bcu dus gsum gyi rgyal ba rnams gang yin pa'o/ /gshegs pa ni byon pa ste sngar byon zin pa dang/ ma 'ongs pa na 'byon par 'gyur ba dang/ da ltar byung ba'i don no/ /mi yi seng ge zhes pa ni/ de bzhin gshegs pa dga' ldan gyi gnas nas sems can gyi don du mi'i lus su bstan pa na/ dper na seng ges gcan gzan dang ri dwags thams cad zil gyis mnan nas bag chag med pa ltar/ de bzhin gshegs pas kyang bdud dang mu stegs can phyir rgol ba sogs lha dang mi thams cad zil gyis mnan te su la yang pag tsha pa'am bsnyengs pa mi mnga' ste/ mdor na mkhyen pa'i mthu'i yon tan gyis thams cad las khyad par du 'phags pa la bya'o/ / ji skad du rgya rol las/ seng ge'i nga ro thos par ma gyur pas/ /wa rnams 'jigs pa med par sgra sgrogs kyi/ /sangs rgyas sengge'i sgra rnams rab sgrogs te/ /mu stegs can gzhan wa rnams skrag par mdzad/ /ces par ltar ro/ /dang bas phyag bgyi'o/ /zhes pa ni chog tsam ma yin pa'o/ /de yang yon tan phun sum tshogs pa mnga' bas phyag byar 'os pa'i mchog sangs rgyas gcig la phyag 'tshal na'ang bsod nams dpag tu med pa thob na/ de 'dra mang po la phyag byas na bsod nams ches mang du 'thob pas de'i phyir gcig la phyag 'tshal ba'ang sems kyis lhag par mang du dmigs te de dag thams cad la phyag bya bar mos pa ni tshogs bde blag tu .rdzogs pa'i thabs mkhas chen po ste phyag mchod sogs thams cad la yang go bar bya'o/ /sgo gsum so so ba'i phyag la@ 301a @#/ /lus kyi phyag ni/ bzang po spyod pa zhes sogs tshigs bcad gcig ste rgyal ba phyogs dus kyis bsdus pa thams cad yid yul du mngon sum ba ltar dmigs la rang lus rgyal ba de dag gi zhing rnams kyi rdul phra rab dang grangs mnyam par sprul la phyag gi yul de bzhin gshegs pa la sogs pa rnams kyi bzang po'i spyod pa la rab tu dad cing smon pa'i stobs bskyed de des kun nas bslangs te ma gus pa sogs rnam par g.yeng ba spangs nas sems rtse gcig tu lus kyi phyag bya ba la 'jug pa'o/ /tshig rkang dang pos kun slong bstan te/ /'dir bzang po spyod pa'i smon lam na/ byang chub sems dpa' kun tu bzang pos gsungs pa'i smon lam mo/ /stobs ni man ngag ste smon lam 'di las 'byung ba'i man ngag go /yang na gong bzhin bzang po spyod pa la smon pa'i stobs kyi phyag bya bar bshad do/ /rgyal ba zhes pa ni sangs rgyas rang nyid kyis rang la mtshan gsol ba ste/ sngon byung bram ze nyer 'gros/ lam bar zhig tu bcom ldan 'das la khyed su zhig ces zhus pa dang/ de'i lan du bka' stsal pa/ sdig pa mi dge'i chos las nga rgyal te/ /de phyir nyer 'gro ba ni rgyal ba yin/ /zhes mtshan don dang mthun pa'o/ /thams cad ni ma lus pa ste rgyal ba thams cad dang rang lus dpag med sogs da lta dbang shes la mngon sum du mi snar yang/ ma 'ongs pa na snang rung gi nus pa zhig sems steng du yod pas de dang mthun par da lta nas yid kyi yul du mngon sum pa ltar yang yang gsal btab na de ltar blo sbyangs pa'i nyer len dang/ dri ma zad pas lhan cig byed rkyen byas te nus pa sad pas mngon sum du rgyal ba thams cad kyi drung du rang lus dpag med kyis phyag mchod sogs dge ba mthu chen sgrub pa'i sa la gnas pa'i rgyal sras chen po'i spyod pa la 'jug pa'i thabs mchog yin zhing/ gzugs sku gnyis snang ba yang gdul bya'i las dag pa la @302b rag las pa'i phyir te/ rgyud bla ma las/ ji ltar baiDUr sa gzhi gtsang ma la/ /lha dbang lus kyi gzugs brnyan snang ba ltar/ /de bzhin 'gro sems sa gzhi gtsang ma la/ /thub pa'i dbang po'i sku yi gzugs brnyan 'char/ /zhes gsungs so/ /lus mang pos phyag bya bar mos pas/ lus mngon sum pa gcig gi phyag las bsod nams che bar 'gyur ro/ /yid kyi phyag ni/ rdul gcig steng na zhes pa'i tshig bcad gcig ste/ rdul phra rab re re'i steng na'ang rdul thams cad kyi grangs dang mnyam pa'i sangs rgyas 'khor sa bcu pa'i mdo las gsungs pa ltar/ sa dang po rnyed pa yan chad dam/ de bzhin gshegs pa'i gdung rgyun mi 'chad par byed pa'i byang sems kyis bskor ba'i dbus na tha mal pa'i sku tshad kyis chos ston bzhin du bzhugs pa la/ de dag gi yon tan rjes su dran pa'i mos pa rgya chen po bskyed par bya'o/ /gal te rdul gcig gi steng na sangs rgyas 'khor dang bcas pa mang po de snyed shod bar ji ltar rigs na de ni sems kyis de ltar bsams shing/ de ltar mos pa bya ba'i chos yin te/ rnal 'byor pa'i sems de ltar snang ba yin gyi/ phyi rol gyi yul tsam nas de ltar du grub pa'i rdul snyed ni ma yin te/ zad par sa nas rnam par shes pa'i bar gang du mos na'ang de bzhin mthong ba dang 'dra ste/ chos gang yang yongs su grub pa'i rang bzhin ma yin pas ji ltar brtags pa de ltar snang ngo/ /rnal 'byor pa'i sems de ltar snang ba yang mnyam par ma bzhag pa'i sems snang ba de la ma goms pa la de ltar snang du mi rung gi /mnyam par bzhag pa la goms pa ni de lta bur mi rung ba med do/ bcom ldan 'das kyis bsam gyis mi khyab pa bzhi bka' stsal pa las rnal 'byor pa'i mthu bsam gyis mi khyab ces gsungs pa lta bu'o/ /de la dpe ci yod zhe na/ dper na snod chung ngu'i nang na chu blug na de'i nang du nyi zla gza' skar la sogs pa'i gzugs chen po mang po snang du rung ba dang/ yang sgyu ma mkhan gyis rde'u shing sogs rgyu rkyen @303a @#/ /chung ngu las kyang mi rta la sogs pa'i gzugs che ba mang po sprul te ston pa dang/ yang rmi lam na gnas chung ngu dog pa'i nang gzugs chen po snang ba 'byung ba dang 'dra ste mi rung ba med do/ /rdul phran gcig gi steng na'ang rgyal ba 'khor bcas mang po de ltar mos pas ci bya zhe na/ de bzhin gshegs pa'i mthu phun sum tshogs pa mang po la dmigs na/ dmigs pa'i sgo nas bsod nams mang du 'phel bas de ltar bya dgos so/ /rdul gcig gi steng na ji lta ba bzhin du rdul thams cad kyi steng du yang de dang 'dra bar bsams pa'i phyir de ltar chos kyi dbyings rnams zhes sogs tshig rkang tha ma gnyis byung zhing/ 'dir de ltar zhes pa ni rdul gcig la ji lta ba de ltar ro/ /chos kyi dbyings rnams zhes pa'i chos nyid de bzhin nyid la dbyings kyi sgras bstan pa ni/ dbyings zhes pa 'byung gnas la bya ste/ de bzhin nyid la dmigs na sangs rgyas kyi yon tan gyi chos rnams 'byung bas de ltar bshad do/ /ma lus pa zhes pa man chad tshig lhag mas ni nam mkha'i khams dang 'dra ba'i chos nyid kyis gang du khyab pa'i gnas ma lus par rdul phra rab re re'i steng na'ang rgyal ba 'khor dang bcas pa de snyed bzhugs par bsams shing mos pas sems sbyang bar byed pa'o/ /gzhan yang yid kyi phyag 'tshal gyi skabs 'dir mos pa gtso che bas blos lcogs na mdo sde phal po che las 'byung ba bzhin sangs rgyas de dag re re'i ba spu'i khung bu so so na yang rgyal ba rang rang gis dang por thugs bskyed pa nas/ bar du tshogs gsog pa'i dus kyi byang sems kyi mdzad pa rnams dang lhag par sangs rgyas nas gdul bya'i don du mdzad pa bcu gnyis kyi tshul bstan pa rnams ji bzhin du gsal btab na yon tan dang bka' drin gyi khyad par rnams rjes su dran pas dad mos skye sla zhing/ skyes pa'ang shin tu rgya che bar 'gyur ro/ /ngag gi phyag ni de dag bsngags pa zhes pa'i tshig bcad gcig ste/ mos shing phyag 'tshal @304b ba'i yul/ /rgyal ba de dag rnams kyi yon tan gyi bsngags pa mi zad pa'i tshul rgya mtsho ltar mang ba rnams lus re re la mgo bo dpag tu med pa dang/ mgo re re la kha dang lce dpag tu med par sprul bar phung po gsum pa'i mdo las/ de bzhin gshegs pa re re la lus 'thob pa'i 'gro ba thams cad kyis sems ji snyed kyis zhabs kyi 'og tu gtugs te phyag bya/ lus 'thob pa re re la'ang lce'i rtse mo phra rab mgo gang gis lam nges pa'i tshig de snyed du lhag par mos so zhes sogs gsungs pa ltar byas nas snyan pa'i dbyangs kyis brjod pa ste/ 'dir dbyangs ni bstod pa yin la/ de'i yan lag ni bstod dbyangs gang nas 'byung ba'i rgyu ste lce'o/ /rgya mtsho ni mang po'i tshig go zhes lam rim las gsungs pas/ 'dir mang po'i tshig ces pa mang ba'i grangs mtsho yas pa la bya ste/ gling bzhi bye ba phrag brgya la stong gsum gyi stong chen po'i 'jig rten gyi khams so/ /de gcig tu rtsis pa bye ba phrag brgya la 'jig rten gyi khams rab 'byams gcig go /de bye ba phrag brgya la mtsho yas gcig go zhes bya ba dang/ dper na/ rab 'byams rgya mtsho dpag med na/ zhes pa ltar ro/ /'jig rten gyi khams kyi go rim las kyang/ gcig bcu brgya stong khri 'bum sa ya bye ba dung phyur ther 'bum/ shu ngog /phyogs nyal/ kyang 'phyes/ bya ma/ nab nub/ mtsho yas zhes bya ba la sogs pa 'byung bas grangs kyi ming la bya ste sgra skad gang nas 'byung ba'i lce mang po mtsho yas snyad do/ /yang na rgya mtsho ni grangs dang mi sbyor gyi mtsho nyid la yang byar rung ste/ dper na rgya mtsho rgya che zhing gting zab pa ltar sgra skad 'byung ba'i lce yang mang ba la bya'o/ /des na lce mang po de dag las byung ba'i sgra skad bzang zhing 'thad pa thams cad kyis/ dus gsum gshegs pa'i rgyal ba nyid dang/ rdul phran re re'i steng na yang rdul ji snyed kyi grangs dang mnyam par bzhugs pa mos pas bskyed pa'i rgyal ba kun gyi yon tan zhes bya ba yang dang yang du brjod par bya ba dang/ @305a @#/ /nyams su blang bar bya bar 'os pa ste/ de yang byang chub kyi sems bskyed pa nas byang chub kyi spyod pa rlabs po che mi zad pa'i yon tan dang/ sangs rgyas su grub pa la mnga' ba'i yon tan dang/ tshul khrims dang/ ting nge 'dzin dang/ shes rab dang/ rnam par grol ba dang/ rnam par grol ba'i ye shes mthong ba'i phung po lnga dang/ gzhan yang stobs bcu la sogs pa'i yon tan rab tu brjod cing dad pa'i sgo nas bdag cag gi bcom ldan 'das bde bar gyur cing/ mtho ris kyi bde ba dang ldan pa gnod pa gtan nas mi mnga' zhing gnod pa mang pa'i chos dang ldan pas na bde bar gshegs pa'am/ bde bar snyed pa thams cad la bstod par bgyi'o/ /de yang sngar yid kyi phyag 'tshal skabs rgyal ba rnams kyi yon tan blo la gsal gang thebs kyi dad mos shugs drag la brtan pa byung na/ 'dir yon tan de rnams so sor spros nas sam/ bsdus nas rang gi ngag rang mtshan pas brjod pa dang yid ngor sprul pa'i lus zhing khams kun tu phyin pa rnams kyi ngag nas kyang brjod par mos pa rnams yon tan mthong nas mngon par dga' ba'i tshul gyis bstod bkur bsngags brjod la zhugs pa yin pas ngag snyan pa ngo bstod tsam gyi gcam bu'i tshig min par rgyal ba rnams kyi don gnas kyi yon tan ji lta ba bzhin du rtogs pa'i cha dang mthun par brjod pa'i bstod bkur bsngags pa mtshan nyid par 'gyur ro/ /spyir bstod bkur bsngags pa gsum 'dra yang mos pa sgom lam gyi phan yon skabs 'di gsum gyi khyad par gsungs pa ltar na/ mos pa sgom lam gsum re re la yang chung ngu'i chung ngu sogs dgu dgur phye bas dgu tshan dang po'i skabs snga ma snga ma las phyi ma phyi ma lhag pa'i tshul du yon tan rtogs cing brjod pa ni bstod pa dang/ de bzhin du gnyis pa la bkur ba/ gsum pa la bsngags pa rnams sbyar nas gsungs te/ rgyan las/ shes rab pha rol phyin pa la/ /mos pa'i @306b gnas skabs rnams la ni/ dgu tshan gsum gyis bstod pa dang/ /bkur ba dang ni bsngags par 'dod/ /ces gsungs so/ /mdor na de dang cha mthun par byed na bstod yul gyi yon tan chung ngu rtogs cing brjod pa ni bstod pa dang/ 'bring rtogs cing brjod pa ni bkur ba/ chen po rtogs cing brjod pa ni bsngags pa yin la/ des na bstod bkur bsngags gsum la/ bstod yul gyi yon tan ji bzhin du rtogs pa'i nang gi shes pa dang/ de bzhin du brjod pa'i phyi'i ngag tshig gnyis ka yod cing/ dang po yid kyi phyag 'tshal dang/ gnyis pa ngag gi phyag 'tshal lo/ /de'i phyir 'dir sangs rgyas kyi yon tan chen po rtogs cing brjod pa ni/ bsngags pa mi zad pa'i dbang du byas nas de dag bsngags pa mi zad ces bstod bkur las bsngags pa gtso bor bstan pa yin nam snyam mo/ /de ltar phyag 'tshal ba ni phan yon che ste/ las rnam 'byed kyi mdo las/ phyag 'tshal ba'i phan yon ni bcu ste/ bcu gang zhe na/ gzugs bzang zhing gser gyi mdog lta bur 'gyur ba dang/ mdzes shing mig tu sdug par 'gyur ba dang/ skad snyan zhing bzung ba'i tshig tu 'gyur ba dang/ bag tsha ba med par 'khor gyi nang du 'gro bar 'gyur ba dang/ lha dang mi rnams dga' bar 'gyur ba dang/ gzi brjid chen por 'gyur ba dang/ gzi brjid chen po'i gang zag 'di lta ste/ sangs rgyas bcom ldan 'das rnams dang/ byang chub sems dpa' rnams dang/ sangs rgyas kyi nyan thos rnams dang 'grogs par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ gzhan yang mdo las/ de bzhin gshegs pa'i skra dang se mo'i mchod rten la phyag byas pas rang gi lus kyi non sa nas dbang chen gser gyi sa gzhi la thug pa'i bar gyi rdul gyi grangs dang mnyam pa'i 'khor bsgyur stong 'gyur du skye bar gsungs shing/ phyag 'tshal ba'i thal mo sbyar ba sngon du btang na de'i phan yon rnams kyang 'thob cing/ de ni las @307a @#/ /rnam 'byed kyi mdo las/ bcom ldan 'das kyis bram ze'i khye'u ne tso la bka' stsal pa/ de bzhin gshegs pa'i mchod rten la thal mo sbyar ba'i phan yon ni bcu bo 'di dag ste/ bcu gang zhe na/ rgyal po chen po'i khyim du skye ba 'thob pa dang/ rgya che ba'i gzugs dang/ rgya che ba'i g.yog 'khor dang/ rgya che ba'i mchod pa dang/ bkur sti dang/ rgya che ba'i nor dang/ rgya che ba'i thos pa dang/ rgya che ba'i dad pa dang/ rgya che ba'i dran pa dang/ rgya che ba'i shes rab dang/ rgya che ba'i rtogs pa thab ste zhes gsungs so/ /gzhan yang thal mo spyi gtsug tu sbyar ba'i gtsug tor 'grub pa'i rgyu byed/ smin mtshams su sbyar bas mdzod spu 'grub pa'i rgyu byed/ mgrin par sbyar bas mgrin pa dri med dung 'dra 'grub cing/ gsung chos kyi gdang 'grub pa'i rgyu byed/ snying khang sbyar bas thugs thams cad mkhyen pa'i ye shes 'grub pa'i rgyu byed/ de yang thal mo car leb du sbyar ba ni mu stegs pa'i thal sbyar yin zhing/ des sangs rgyas med pa'i zhing stong par skye ba'i rgyu byed la de 'dra mi byed par thal mo kheng stong du sbyar ba ni nang pa'i thal sbyar du mtsho Tik las gsungs so/ /kun tu bzang po'i phyag mtshan nor bu 'dzin par mos pa byas kyang chog par bla ma'i man ngag las 'byung zhing/ spyir lus kyi phyag la 'dul ba nas bshad pa ltar skyid pa nas 'khyud pa'i phyag dang/ yan lag lnga sa la gtugs pa'i phyag da lta skum phyag tu grags pa dang/ lus thams cad sa la phab pa'i phyag da lta brkyang phyag tu grags pa mdo snga nas 'byung ba bcas yod pa las/ dang po gnyis lta bu 'dul ba'i las chog gi skabs su gsungs pa bzhin bya la/ lus mi bde ba sogs med na rgyun par ni brkyang phyag 'tshal ba la rem par bya ste/ de'i phyir byams mgon bla ma rin po ches phyag 'tshal ba'i phan yon la bsams na nged kyi lag pa 'di yang 'di las ring tsam yod na snyam du dgongs gsung/ bsod @308b nams shin tu rlabs che bas so/ /phyag 'tshal 'di rang re'i rje bla ma'i phyag srol dang mthun par byas na byin rlabs kyi tshan kha shin tu che bas bsag sbyang gnyis ka tshang zhing/ lta ba rgyud la skye ba'i nye rgyur yang 'gro bas lag len la ci theb bya'o/ /de ltar phyag 'tshal ba'i tshe na yang gus pa yongs rdzogs kyi rnam par rig byed tshul dang mthun par ma bgyis par/ mgo bo sa la mi gtugs pa dang/ thal mo mi sbyor ba dang/ nyal nas mi ldang ba dang/ lag pa rgyab tu bsnol ba sogs ma gus pa'i spyod lam bsten na nyes dmigs kyang che ste legs nyes kyi rgyu 'bras bstan pa'i mdo las/ tshe 'di la de bzhin gshegs pa'i sku gzugs la phyag byed na yang mgo bo sa la mi gtugs pa gang yin pa de ni shi 'phos nas mgo thur du dpyangs pa'i sems can dmyal bar ltung bar 'gyur te/ brgya lam na mi'i nang du skyes na yang gzhan dag gis mang du bslu bar 'gyur ro/ /tshe 'di la de bzhin gshegs pa'i sku gzugs la phyag byas pa na thal mo mi sbyor bar byed pa gang yin pa de ni/ shi 'phos nas yul mtha' 'khob dag tu skye bar yur zhing/ 'bad pa mang po btsal yang 'thob par mi 'gyur ro/ /tshe 'di la dril chen gyi sgra thos kyang mi ldang ba gang yin pa de ni/ shi 'phos nas sbrul lus chen po dag tu ltung bar 'gyur zhing/ lus ring la che bas srog chags phra mo mang po rnams kyi bza' bar 'gyur ro/ /tshe 'di la lag pa rgyab tu bstan te de bzhin gshegs pa la phyag byas pa gang yin pa de ni/ shi 'phos nas phying ga log tu bcings pa'i sems can dmyal bar ltung par 'gyur te/ gal te mir skyes par gyur na/ nyes pa med par gyong 'byung bar 'gyur ro/ /tshe 'di la thal mo sbyar nas yan lag lnga sa la gtugs te phyag byas pa gang yin pa de ni rtag par tshe rigs btsun par 'gyur zhing/ rgyun du bde ba myong bar 'gyur ro/ /zhes gsungs shing/ de dang mthun par las kyi rnam smin bstan pa'i @309a @#/ /mdo las kyang gsung ngo/ /de ltar gus pas phyag 'tshal ba ni nga rgyal gyi gnyen po yin zhing/ nga rgyal ni 'jigs lta la brten cing khengs pa'i gzhi gang rung la dmigs nas sems khengs pa'i rnam pa can gyi sems byung dang/ byed las kyang mi gus par byed pa dang/ dngos dang brgyud pas mi 'dod pa la sbyor ba yin par mngon pa kun btus las gsung zhing/ mdzod las kyang/ nga rgyal bdun nam dgu gsum mo/ /zhes gsungs pa ltar bsams shes na/ da lta rang re rnams yon tan gyi khur med pa la nga rgyal 'ong don med snyam yang nga rgyal gyi gong pur song nas yod pas/ de la ni yon tan khyad par can gsar du skye zhing 'phel ba'i gnas med de/ ston pa rin po che'i zhal nas/ nga rgyal gyi sgang bu la yon tan gyi chu mi 'brub gsung pa' spyan snga'i zhal nas sos kyi dus na ri'i rtse mo gang mtho ba nas sngo phyur gyis 'ong bar 'dug gam/ gshong bu gang dma' ba nas 'ong ltos gsung/ legs nyes kyi rgyu 'bras bstan pa'i mdo las kyang/ ya rabs mthon por gyur pa gang yin pa de ni gzhan dag la gus pas phyag byas pa las 'ongs pa yin no/ /ma rabs su gyur pa gang yin pa de ni nga rgyal byas pa las 'ongs pa yin no/ /zhes dang/ rin chen 'phreng ba'i dar TIk du drangs pa las kyang/ ngan 'gror nga rgyal gyis 'khrid cing/ /mi yi dga' ston bcom pa dang/ /gzhan gyi zan za'i bran dang ni/ /glen dang mi sdug can du 'gyur/ /zhes gsungs pa ltar ro/ /gnyis pa mchod pa'i yan lag ni/ mdo sde rgyan las/ rab dwangs sems dang ldan pa yis/ /tshogs gnyis rdzogs par bya ba'i phyir/ / sangs rgyas rnams la gos sogs kyis/ /mngon sum mngon sum min par mchod/ /ces gsungs pa ltar/ kun slong rab tu drang ba'i sems dang ldan pa/ ched du bya ba dgos pa rang gzhan gyi tshogs gnyis rdzogs par bya ba'i phyir du/ yul dam pa sangs @310b rgyas rnams la dngos po na bza' dam pa gos la sogs pas mchod yul rang gi dbang po la mngon sum du gyur pa dang mngon sum du ma gyur pa la yang mchod par gsungs shing/ byang sa las gsungs pa'i yongs su rdzogs pa'i mchod pa bcu'i grangs ni/ gro lung pa'i bstan rim las/ skuM dang mchod rten mngon sum mngon sum min/ /byas dang byed bcug rnyed bkur rgya chen dang/ /nyon mongs can min sgrub pa'i mchod pa bcu/ /zhes gsungs pa ltar gyi sku la mchod pa ni/ ye shes dang bcas pa'i gzugs sku dngos la mchod pa'o/ /mchod rten la mchod pa ni sangs rgyas dngos la mchod pa'i phyir du sangs rgyas kyi sku gdung ring bsrel snying po can gyi mchod rten dang/ de gang du bzhugs pa'i gtsang khang gru bzhi pa dang/ de gnyis ka'i snying po can gyi gtsang khang zlum po dang/ de gsum la mched bkur dang bral ba'i rnying pa dang/ de dang ma bral ba'i gnas skabs kyi gsar pa bcas la mchod pa byed pa'o/ /mngon sum du mchod pa ni/ mchod yul gyi sku dang mchod rten de nyid gang rung rang gi dbang po la mngon du gyur pa la mchod pa'o/ /sku dang mchod rten de gnyis gang rang la mchod pa na/ de dag gcig gi chos nyid ni thams cad kyi chos nyid do snyam du chos nyid gcig pa'i tshul dran te mngon du gyur pa'i mchod yul 'di la yang mchod la/ phyogs dus kyi mchod yul thams cad la yang mchod do snyam nas mchod pa ni mngon du gyur ma gyur spyi'i mchod pa ste 'di grangs 'dran gyi skabs su mngon sum du mchod pa'i khongs su bsdu/ 'dir chos nyid gcig pa'am dbyer med pa'i tshul ni stong pa nyid du mnyam pa tsam la mi zer gyi sangs rgyas thams cad tshogs dang chos sku dang 'phrin las thams cad kyi mnyam zhing tha dad med pa'i rang bzhin gcig pa'i don no/ mngon sum ma yin par mchod pa ni/ chos nyid dbyer med pa'i tshul sngar ltar go nas mchod yul thams cad la mchod pa'i phyir du rang gi dbang po la da lta mngon du ma gyur pa rnams@311a @#/ /dran nas de la mchod pa'o/ /sangs rgyas dngos mchod par 'dod kyang da lta thabs med pas de'i phyir du sku gzugs dang mchod rten sogs gsar bzhengs byed ba yang mngon sum ma yin pa'i mchod par gsungs so/ /de ltar mngon sum du mchod pa ni bsod nams rgya che la/ mngon sum ma yin par mchod pa ni de bas kyang ches rgya che ba dang/ /mngon du gyur ma gyur spyi'i mchod pa ni de bas kyang shin tu rgya che bar gsungs pas/ mchod yul rnam dag gcig la mchod pa na chos nyid dbyer med pa dran par byas nas mchod yul thams cad la mchod pa'i 'phen pa gtong ba ni mchod pa 'bul res kyi shin tu gal che'o/ /lnga pa rang gi bya ba'i mchod pa ni/ gzhan byed du mi 'jug par rang gi lag bdar nas byed pa'o/ /'di ni lus kyi mchod pa'o/ /drug pa gzhan byed du bcug pa'i mchod pa ni/ sems can sdug bsngal ba yo byad med pa dang/ yod kyang longs spyod dang lus ngag gis mchod par mi nus pa 'di dag gis mchod pa byas na bde bar 'gyur ro snyam nas rang gi yo byad las gzhan kho na mchod du 'jug ba'o/ /'di ni ngag gi mchod pa'o/ /de ltar rang gis kyang byed la gzhan yang ngag gis bskul nas byed pa ni gnyis kar byed pa'o/ /de gsum gyi bsod nams ni snga ma las phyi ma rim gyis che bas grogs la sogs pa dang lhan cig tu yod pa'i skabs su babs pa byung na gsum pa la 'jug gang thub bya'o/ /bdun pa rnyed pa dang bkur sti'i mchod pa ni phyi'i rnyed pa zas gos la sogs pa 'bul ba dang/ nang gi rim gro sku khrus gsol ba la sogs pa dang/ phyag dang thal mo sbyar ba la sogs pa bkur sti sna tshogs kyis mchod pa byed pa'o/ /brgyad pa rgya che ba'i mchod pa ni dngos po chung du yang dus kyi che ba yun ring du mchod pa dang/ lan cig tsam yin yang dngos po mang pos cha ba dang/ dngos po gcig kyang yid du 'ong ba dang rin che bas bzang bas che ba dang/ yul gyi che ba ni mngon sum @312b yin min dang/ sbyor bas che ba ni rang gzhan gyi byed pa dang/ bsam pas che ba ni dga' zhing mos pa drag pos mchod pa dang/ bsngo bas che ba ni de yang rdzogs byang du bsngo ba ste de ltar che ba bdun gyis mchod pa rgya che ba 'dun no/ /dgu pa kun nas nyon mongs can ma yin pa'i mchod pa ni/ bag med dang le los gzhan dag byed du mi 'jug gis lag bdar nas byed pa dang/ khyad gsod spangs nas gus par byed pa dang/ rnam g.yeng spangs nas sems ma g.yengs par byad pa dang/ rnyed bkur la blta ba sogs spangs nas nyon mongs pa can ma yin par byed pa dang/ sangs rgyas la dad pa'i rgyal po sogs las rnyed bkur dang/ grags pa thob tu re ba'i tshul 'chos kyis mi byed pa dang/ 'jig rten pas 'dod bya ma yin pa'i dngos po dman pa mi mthun pa bab la'i byug pa sogs dang/ gzhan yang yo byed rung ba ma yin pa sha chang la sogs pa dang bral bas rung mthun gyi dngos ngo sa mchod pa ste drug go /gzhan yang mchod pa la mkhas pas zang zing gi yo byad de dag ma 'byor yang mchod rdzas su 'os pa thams cad blos blangs shing dbul ba'am/ gzhan gyis phul ba la rjes su yi rang ba'i sgo nas dka' tshegs chung dus tshogs rgya chen po bsdud par byed pa'i mchod pa 'di la brtson par bya'o/ /bcu pa sgrub pa'i mchod pa ni/ dus thung du tha na ba 'jos tsam du yang tshad med bzhi dang/ chos kyi sdom bzhi dang/ skyabs gsum dang phar phyin rjes su dran pa dang/ zab mo stong pa nyid la mos shing mi rtog par gnas pa dang/ tshul khrims la sngom sems byed pa dang/ byang chub kyi phyogs dang/ phar phyin dang/ bsdu ba bzhi la sgom pa dang brtson par byed pa ste brgyad do/ /byams sogs sgrub pa'i mchod pa ni dus thung yang zang zing gi mchod pa gang gis kyang bsgrun du med pa'i che ba dang ldan te/ mchod yul rnams sgrub pa de tsam gyis dgyes pa 'dra ba zang zing gi mchod pa gang gi kyang mi dgyas pa'i phyir ro/ /de'i phyir rje btsun byams mgon gyis @313a @#/ /bstan pa ji skad bstan pa sgrub pa des/ /de yi sems ni yang dag mgu byar byed/ /ces gsungs so/ /rgya mtshos zhus pa las/ byams pa ni sangs rgyas thams cad kyis bsngags pa ste/ de'i rjes su 'jug pa ni tshe 'di dang phyi ma'i don thams cad thob pa'o/ /de ni sangs rgyas la mchod pa'i mchog yin te/ rdzas kyi mchod pa thams cad pas ches mchog tu gyur pa'o/ /zhes gsungs so/ /blo gros rgya mtsho'i mdo las/ rdzogs pa'i byang chub sems dang chos 'dzin dang/ /chos sgrub pa dang srog chags snying brtse ba/ /chos bzhi 'di dag yon tan mtha' med de/ /de dag mtha' ni rgyal ba mi gsung ngo/ /zhes so/ /'di mchod pa'i yang mchog tu 'gyur te/ mdo de nyid las/ mchod pa bla na med pa ni gsum ste/ sems bskyed pa dang/ chos 'dzin pa dang/ snying rje sgom pa'o/ /zhes gsungs so/ /mdo sde ting 'dzin rgyal po las/ bye ba khrag khrig bltams pa'i zhing rnams na/ /mchod pa rnam mang dpag med ci yod pa/ /skyes mchog rnams la nyin rer rtag mchod pas/ /byams pa'i sems la grangs dang char mi phod/ /ces dang/ thar pa phyogs su rgyas pa'i mdo las/ gang gis chos 'di 'jig pa'i tshe/ /rgyal ba'i drin lan slan 'dod pas/ /skad cig yud tsam sgom byed na/ /stong gsum gang ba'i sems can la/ /srog ni sbyin par byed pa bas/ /bsam gtan sgom pa bsod rnams che/ /zhes dang/ rtog pa chen po'i mod las/ la las chos 'di tha ma'i tshe/ /sangs rgyas bka' drin sgrub bsams te/ /thang gcig bsam gtan thun bsgoms na/ /khams gsum gnas pa'i sems can la/ /srog ni sbyin pas 'di don che/ /zhes gsungs so/ / de bzhin du mchod pa bcu po 'dis chos dang dge 'dun la yang mchod par bya ste/ de dag gi tshe na mchod pa chung yang 'bras bu dpag med 'byung ba'i gnas kyi bsam pa ni drug ste/ yon tan dang bsod nams kyi zhing gong na med pa yin snyam pa dang/ phan 'dogs pa'i @314b bka' drin gong na med do snyam pa dang/ rkang med rkang gnyis la sogs pa sems dang bcas pa thams cad kyi mchog go snyam pa dang/ u dum wa ra'i me tog ltar shin tu dkon no snyam pa dang/ 'jig rten na gcig kho na 'byung bas 'ba' zhig pa'o snyam pa dang/ 'jig rten las 'das ma 'das kyi phun tshogs thams cad kyi gzhi yin no snyam du bsams nas mchod pa ni gal che'o/ /mchod pa bcu po de gsum du 'du ste/ gang la mchod pa'i zhing dang/ gang mchod pa po rten dang/ gang dag gis mchod pa dngos po'i khyad par dang gsum mo/ /dang po la bzhi ste/ sku dngos dang/ mchod rten dang/ de gnyis mngon du gyur ma gyur dang bzhi'o/ /gnyis pa rten ni gnyis te rang gis byed pa dang gzhan byed du 'jug pa'o/ /gsum pa dngos po la yang bzhi ste/ rdzas la rten pa rnyed pa dang mi rten pa sgrub pa'i mchod pa'o/ / rdzas kyi bye brag la yang rgya che ba dang rnam par dag pa gnyis te bzhi'o/ /yang mchod pa bcu'i grangs 'dren man ngag las 'byung ba las ni sku dang mchod rten rang gi dbang po la mngon du gyur pa dang/ ma gyur pa la mchod pa gnyis dang/ de gnyis gang rung la mchod pa na de dag gcig gi chos nyid ni thams cad kyi chos nyid do/ /de'i phyir 'di la yang mchod la mchod yul gzhan thams cad la yang mchod do snyam nas mchod pa ni mngon du gyur ma gyur spyi'i mchod pa ste gsum dang/ rang dang gzhan dang gnyis kas byed pa ste gsum dang/ tha ma bzhi ste bcur gsungs so/ /gang ltar dkon mchog gsum la dmigs pa'i bsam pa drug bskyed de las su bya ba sku dang mchod rten rang la mngon du gyur ma gyur thams cad la rang gzhan gnyis kas rnyed bkur rgya che la nyon mongs can ma yin pas rtag tu mchod cing sgrub pa'i mchod pa la dus thung dus kyang 'jug pa gal che'o/ /de ltar dad pas sku dang mchod rten gsar du byed pa dang/ byas zin pa rnams la phyag dang mchod pa byi dor sogs byed pa ni shin tu phan yon che ste/ dgra chen po'i mdo dang rmad du byung ba'i @315a @#/ /chos kyi rnam grangs dag las/ khang bzang bkod pa dam pa dang ldan pa dag phyogs bzhi'i dge slong rgyun du zhugs pa nas rang sangs rgyas kyi bar la phul te ji srid 'tsho'i bar du bde ba'i yo byad thams cad kyis bsnyen bkur byas pa bas ni/ sangs rgyas kyi mchod rten bum pa skyu ru ra'i 'bras bu tsam la srog shing kha ba tsam btsugs te gdugs rgya shugs kyi lo ma tsam bkab pa ring bsrel yungs 'bru tsam gyi snying po can dang/ sku gzugs mtshon gang tsam byed pa'i bsod nams kyi char mi phod do/ /de dpe dang rgyur yang mi bzod do/ /de bzhin du gling chen po bzhi dang lha'i rnam par rgyal ba'i khang bzang rnams la yang sngar bzhin rigs 'gres bdas nas/ de ci'i phyir zhe na zhes rgyu mtshan dang bcas pa gsungs so/ /mar me 'bul ba'i mdo las/ sangs rgyas la dad pas thal mo sbyar na mchog tu byung ba brgyad 'thob ste/ gzugs mchog tu byung ba dang/ g.yog 'khor dang/ tshul khrims dang/ lha dang mir skye ba dang/ dad pa dang spobs pa mchog tu byung ba dang/ nyon mongs pa med pa'i 'phags pa'i lam dang/ byang chub mngon par 'tshang rgya'o zhes dang/ phyogs bcu'i mun pa sel ba las kyang/ phyogs bcur 'gro ba na sangs rgyas bcu la phyag 'tshal te rjes su dran par byas shing mngon du byas nas ma yengs par song na 'jig pa med cing don 'grub po zhes sogs dang/ de'i phyir gro lung pa chen pos/ rgyal la dad pas thal sbyar phyag 'tshal gang/ /gzugs sogs mchog tu byung ba rnam brgyad thob/ /zhes gsung zhing/ dam chos pad dkar las kyang/ khams gsum gyi sems can thams cad kyis bskal pa bye ba brgya stong mang por nyan rang dgra bcom bye ba mang por mchod pa bas/ mi gang zhig gis rdzogs pa'i sangs rgyas bzhugs pa'i tshe 'am yongs su mya ngan las 'das nas sangs rgyas la dmigs te thal mo gcig sbyar ba phan yon che bar gsungs pa dang/ 'phags pa spyan ras gzigs @316b kyi mdo las/ mi gang zhig gis sangs rgyas bye ba khrag khrig la bskal ba bye bar bsti stang byed pa bas gang zhig phyi ma'i dus tha ma la mchod rten dang sku gzugs la phyag gcig 'tshal ba bsod nams che bar gsung zhing/ mchod pa spyi'i phan yon ni/ snying rje pad dkar las kun dga' po nga 'dug pa la mngon sum du mchod pa byed pa lta zhog /ring bsrel yung 'bru tsam dang/ nga'i phyir mchod rten byas pa la mchod pa byed pa'ang lta zhog ste/ sangs rgyas la dmigs nas me tog gcig nam mkha' la 'dor ba de'i 'bras bu'ang mthar mya ngan las 'das par nga smra'o/ /de'i rnam par smin pa ni gal te la las bskal pa gcig tu 'khor bar kun tu rgyug kyang 'khor ba'i sngon gyi mtha' ma shes pa ltar de'i mtha'ang brgya byin nyid rnams kyis kyang rnyed par sla ba ma yin no/ /de ci'i phyir zhe na/ zhes rgyu mtshan dang bcas par gsungs shing/ gzhan yang snga ma de rnams lta'ang zhag ste mya ngan las 'da' ba'i skal ba med pa zhig gis sangs rgyas la dmigs nas tha na me tog gcig nam mkha' la 'dor ba de'i 'bras bu'ang mya ngan 'das pa mtha' gtugs par nga smra'o zhes so/ / mchod pa so so'i phan yon skabs/ mchod pa po gnas skabs 'khor bar rgyu ba na yang phan yon 'di ltar 'thob ste/ dri'i thig le la me tog 'grems pa'i phan yon ni/ byang chub sems dpa'i sde snod las/ do bzhin gshegs pa'i mchod rten la me tog 'grems sam/ spos ris 'bri na ma chang ba med pa brgyad 'thob ste/ gzugs dang longs spyod dang/ 'khor g.yog dang tshul khrims dang ting nge 'dzin dang thos pa dang/ shes rab dang smon lam mtshang ba med pa'o zhes dang/ me tog phul ba'i phan yon bcu ste/ bcu gang zhe na 'jig rten na me tog lta bur 'gyur ba dang/ de'i sna'i dbang po nam yang nyams par mi 'gyur ba dang/ lus kyi dri nga ba rnam par 'gyur ba dang/ dri zhim por 'gyur ba dang/ phyogs dang phyogs mtshams su de'i tshul khrims kyi dri ngad ldang bar 'gyur ba dang/ 'jig @317a @#/ /rten gyi don du 'gro bar bya bar 'gyur ba dang/ sdug pa'i chos rnams thob par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ /phreng ba phul ba'i phan yon bcu ste/ 'jig rten na phreng ba lta bur 'gyur ba dang/ lus kyi dri nga ba rnam par dag par 'gyur ba dang/ phyogs dang phyogs mtshams su tshul khrims kyi dri zhim po ldang ba dang/ rtag tu dri zhim par 'gyur ba dang/ brgyan par 'gyur ba dang/ g.yog 'khor mi phyed par 'gyur ba dang/ skyes pa dang bud med rnams kyi yid du 'ong bar 'gyur ba dang/ longs spyod che bar 'gyur bar dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ spos phul ba'i phan yon bcu ste/ bcu gang zhe na/ 'jig rten na spos lta bur 'gyur ba dang/ sna'i dbang po rnam par dag par 'gyur ba dang/ lus kyi dri zhim pa rnam par dag par 'gyur ba dang/ rtag tu dri zhim par 'gyur ba dang/ gzugs bzang bar 'gyur ba dang/ 'jig rten gyi mngon du 'gro bar bya bar 'gyur ba dang/ sdug ba'i chos rnams thob par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ mar me phul ba'i phan yon bcu ste/ bcu gang zhe na/ 'jig rten na mar me lta bur 'gyur ba dang/ de'i mig gi dbang po nam yang 'gag par mi 'gyur ba dang/ sha'i mig rnam par dag pa thob par 'gyur ba dang/ dge ba dang mi dge ba'i chos rnams la shes rab 'byung bar 'gyur ba dang/ ma rig pa dang gti mug gi mun pa sel ba dang/ shes rab kyi snang ba thob par 'gyur ba dang/ de 'khor ba na 'khor ba'i tshe nam du'ang mun pa na gnas par mi 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ spyan ras gzigs kyi mdo las/ rgyal ba'i @318b mchod rten spos byug phul byas na/ /bcom ldan 'das kyi bstan pa 'jig gyur tshe/ /'dzam bu'i gling du skye bar mi 'gyur zhing/ /de ni de tshe mtho ris bdag por 'gyur/ /rgyal ba'i mchod rten spos byug phul byas pa/ /dri mi zhim dang mi gtsang smad pa rnams/ /rtag tu spong zhing tshul khrims phung por gnas/ /de ni rtag tu tshang spyod mchog 'di spyod/ /'di nas shi 'phos mtho ris lha dbang 'gyur/ /ring por mi thogs don mthong rnams la rtog /lha rnams la ni rgya che don kyang byed/ /bcom ldan rgyal ba'i mchod rten bsal byas na/ /de ni mi khom brgyad po kun spong zhing/ /de ni dal 'gyur de bzhin khyad par 'phags/ /de ni sangs rgyas mtshungs med mchod par byed/ /bag yod blo gros brtan la dpa' bor 'gyur/ /'dod pa'i yon tan dag la dga' mi bskyed/ /mi dman sems kyis mngon par 'byung bar 'gyur/ /de ni nam yang byang chub sems mi 'dor/ /tshul khrims skyon med shin tu bsdoms par 'gyur/ /rnam dag 'dod chags bral ba'i chos kyang 'thob/ /de ni mdog ngan dus rnams kun tu spong/ /'chal ba'i shes rab ma lus rnam par spong/ /shes rab rgya cher 'gyur nas spyod la gnas/ /kha zas gtsang ma dag kyang rnyed 'gyur zhing/ /khyad 'phags kha dog ldan cing lta sdug la/ /reg dang ldan cing rab mdzes gos rnams 'thob/ /dad pa'i shugs bskyed bcom ldan mchod rten la/ /me tog skam po nyal nyil phyag byas nas/ /'dod pa dman pa sdug bsngal byed pa spong/ /stobs bcu mnga' ba'i ded dpon mnyes par byed/ /de ni mdzes shing rnam dag lus su 'gyur/ /skye bo mang pos mchod 'os la 'os 'gyur/ /de la rgyal po gnod pa sems mi 'gyur/ / ngan song sa yi lam ngan thams cad gcod/ /byang chub sems dpa'i tshul khrims phong por gnas/ /rnam dag lus dang rgyan gyis brgyan par 'gyur/ /zhes sogs dang/ rol mo sil snyan phul ba'i phan yon bcu ste/ bcu gang zhe na/ gzugs bzang zhing lta @319a @#/ /na sdug par 'gyur ba dang/ skad snyan par 'gyur ba dang/ yid du 'ong ba smra ba dang ldan par 'gyur ba dang/ grags pa dang ldan par 'gyur ba dang/ bzung ba'i tshig tu 'gyur ba dang/ rtag tu dga' bar 'gyur ba dang/ kun dga' ba'i sgra rgya chen po rtag tu thos par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ /de dag ni de bzhin gshegs pa'i rol mo sil snyan phul ba'i phan yon no/ /zhes dang/ 'di dag gi skabs su yongs su mya ngan 'da' ba zhes pa ni thar pa thob par 'gyur ba'i don no/ /zhes dang/ dril bu phul ba'i phan yon bcu ste/ bcu gang zhe na/ gzugs bzang bar 'gyur ba dang/ sgra snyan par 'gyur ba dang/ yid du 'ong ba smra ba dang ldan par 'gyur ba/ ka la ping ka'i sgra lta bur smra ba dang ldan par 'gyur ba dang/ bzung ba'i tshig tu 'gyur ba dang/ rab tu dga' bar 'gyur ba dang/ kun du dga' ba rgya chen po'i sgra thos pa dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ zhes dang/ gos phul ba'i phan yon bcu gnyis te/ bcu gnyis gang zhe na/ mdzes shing lta na sdug par 'gyur ba dang/ mthong na dga' bar 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste zhes dang/ gdugs phul ba'i phan yon bcu ste/ 'jig rten na gdugs lta bur 'gyur ba dang/ lus la gdung ba med par 'gyur ba dang/ sems la gdung ba med par 'gyur ba dang/ 'jig rten gyi rgyan du 'gyur ba dang/ bdag po'i las byed cing gsog pa dang/ 'khor los bsgyur ba'i rgyal srid yang dang yang du 'thob pa dang/ dbang che bar grags par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ste zhes dang/ ba dan phul ba'i phan yon bcu @320b ste/ bcu gang zhe na/ 'jig rten na rgyal mtshan lta bur 'gyur ba dang/ blon po dang nye du dang snag gi gnyen mtshams rnams kyis bsti stang du byed bla mar byed ri mor byed mchod par byed pa dang/ phyogs dang phyogs mtshams su de'i grags pa dang brjod pa dang sgra dang tshigs su bcad pa mngon du 'byung ba dang/ gzugs bzang zhing lta na sdug la mdzes par 'gyur ba dang/ skye ba gzhan rnams la tshe ring zhing ring du gnas par 'gyur ba dang/ dbang che bar grags par 'gyur ba dang/ rigs btsun par skye bar 'gyur ba dang/ longs spyod chen por 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ zhes dang/ gzhan yang mchod pa sna tshogs kyis mchod pas ting 'dzin mchog sogs thob pa ni/ ring 'dzin rgyal po las/ sangs rgyas gzugs ni shin tu mdzes pa dag /rin chen byi dor legs par byas pa yang/ /blta na sdug cing shin tu bzang po yis/ /ring por mi thogs ring nga 'dzin mchog sogs 'thob/ /de bzhin gser dag dang ni dngul dag dang/ tsan dan gyi ni sku gzugs bzang po dag /mdzes shing shin tu bsta na sdug byas na/ /ring por mi thogs ting 'dzin mchog sogs 'thob/ /'jim pa dang ni de bzhin rdo ba dang/ /shing dang ri mor bris pa'i sku gzugs dag /mdzes shing shin tu blta na sdug byas na/ /ring por mi thogs ting 'dzin mchog sogs 'thob/ /gdugs dang rgyal mtshan bla re ba dan mchog /phye ma byug pa mang po kun thogs te/ /rtag tu bde bar gshegs la mchod byas na/ /ring por mi thogs ting 'dzin mchog sogs 'thob/ /spos mchog phreng ba me tog sdu gu dang/ /rol mo sil snyan mang po rab thogs te/ /rgyal ba'i mchod rten dag la mchod byas na/ /ring por mi thogs ting 'dzin mchog sogs 'thob/ /glu gar mang po sna tshogs mang po dang/ /yid gtsang bzhad gad rol mo bzang po dang/ /lhag par mar me'i phreng sdug bzang po yis/ /mtshungs pa med la mchod@321a @#/ /bzang rab tu bya/ /'khar rnga dang ni sgra snyan rdza rnga brgya/ /rnga dang gling bu'i sgra mchog sna tshogs dang/ /sgra snyan rol mo'i yon tan sna tshogs kyi/ /dwang ba'i yid ldan 'dren pa mchod par bya/ /zhes so/ /gzhan yang dad pa dang ldan zhing g.yo rgyu med pas mchod pa byas na tshe 'di nyid la yang nges sems gsum dang/ 'chi tshe snang ba gsum dang mthong ba bzhi sogs 'byung ste/ mar me 'bul ba'i mdo las kyang dwang ba dang ldan pa sgyu med pa dag gis/ sangs rgyas kyi yon tan nges par sems pas dge ba'i bsam pas/ mar me chung ngu tha na mchod rten gyi them skas tsam mam/ bskor sa tsam mam smad dam tha na bar skabs gang rung ba zhig snang ba'i mar me de'ang rlung la sogs pas mod du shi ste glog byung nas nub myur du 'byung ba'i rjes su 'brang ba des mthong nas mig thibs ces byed pa de tsam 'bul ba'i bsod nams kyang dpag tu med de sangs rgyas nyid kyis mkhyen par zad do/ /chos bzhis ni dad pas rtogs par bya ba ste/ sangs rgyas kyi chos dpag tu med pa dang/ dge ba'i rtsa ba chung ngu'i rnam par smin pa dpag tu med pa dang/ dkon mchog gsum la dad pa'i las byed pa'i rnam par smin pa dang/ sems can gyi las kyi rnam par smin pa bsam gyis mi khyab pa'o/ /dad pas mar me phul na tshe 'di nyid la nges par sems pa gsum 'thob ste/ sangs rgyas la mchod pa byas pas snying po med pa'i lus dang longs spyod las snying po 'thob pa dang/ bsod nams kyi zhing bla na med pa yon gnas mchog la mchod pa byas pas ngan song gis 'jigs pa med cing/ mtho ris dang/ mig dang/ longs spyod dang/ byang chub ste 'gro ba bde ba lnga 'thob pa dang/ sbyin pa byas shing bsod nams byas la ser sna spangs pas dga' ba 'thob pa'o/ /yang des 'chi ba'i tshe snang ba gsum 'thob ste/ dge legs byas pas rjes su dran pa dang/ sangs rgyas mchod pa byas so zhes dga' bas sangs @322b rgyas rjes su dran pa yang skye ba dang/ phyis kyang dge ba bya'o zhes chos rjes su dran zhing sdug bsngal gyis kyang mi 'phrog pa'o/ /yang bzhi ste/ mdun na nyi ma 'char ba dang/ zla ba nya 'char ba dang/ lha'i 'khor gnas pa dang/ sangs rgyas byang chub kyi snying po la bzhugs te mngon par 'tshang rgya ba la rang dad pas thal mo sbyor bar mthong pa'o/ /yang mchod rten la mar me phul bas sum cu rtsa gsum du lha'i rnam par dag pa lnga 'thob ste/ lus dag pa dang/ lha'i mthu rgya chen po dang/ dran pa dang shes bzhin dag pa dang/ sgra snyan pa thob pa 'khor yid bde ba mang ba dang ldan par 'gyur ba'o zhes gsungs so/ /gzhan yang dad pas sangs rgyas kyi sku dang sku gzugs mthong zhing blta ba'i mchod pa byed pa yang don che ste/ dad pa'i stobs bskyed pa'i phyag rgya'i mdo las/ gang gis bskal ba gang gA'i klung gi bye ma snyed du 'jig rten thams cad kyi rdul snyed kyi rang sangs rgyas dag la nyin gcig bzhin du lha'i zhal zas ro brgya pa dang/ lha'i gos rnams byin pa bas/ gzhan zhig gis sangs rgyas ri mor bris pa'am gzugs su byas pa mthong ba 'di bsod nams ches grangs med pa bskyed na/ thal mo sbyor ba'am me tog la sogs pa 'bul ba lta ci smos zhes gsungs so/ gzhan yang rang cag gis da res chos la brtson pa'i dgos don ma 'ongs pa na myur du sangs rgyas dngos dang phrad nas gdul byar 'gyur nges zhig byed dgos te/ sdong po bkod pa las/ bskal ba bye ba phrag brgyar yang/ /sangs rgyas sgra ni rab dkon na/ /the tshom thams cad gcod pa'i mchog /mthong bar 'gyur ba smos ci dgos/ /rkang gnyis dam pa mthong na ni/ /sems rgya chen po skye 'gyur zhing/ /shes rab stobs ni 'od gsal ba/ /grangs med pa yang skye bar 'gyur/ /zhes sogs kyis ngan song gsum du bskal pa bye bar mes sregs pa ni sla yis/ ston pa sangs rgyas mi mthong ba ni de lta ma yin pa'i rgyu mtshan dang bcas par gsungs shing/ sangs rgyas dngos dang phrad @323a @#/ /pa'i rgyu'i gtso bo yang da lta bla ma sangs rgyas su bltas nas mchod pa dang/ tshogs zhing gsal btab nas rtag tu sangs rgyas rjes su dran te phyag mchod byed pa sogs yin la/ de ltar byas na ting 'dzin rgyal po las/ rtag tu yon tan tshogs las rgyal ba dran/ /gser mchog 'od 'dra shin tu 'od mdzad pa/ /mtshan mo nam mkha' skar mas gang ba ltar/ /thub pa'i sku ni mtshan gyis yongs su rgyas/ /'chag cing 'dug dang 'greng dang nyal ba na'ang/ /mi gang thub pa zla ba dran byed pa/ /de yi mdun na rtag tu ston pa bzhugs/ /de ni rgyal chen mya ngan 'das par 'gyur/ /zhes gsungs pa ltar 'byung zhing/ gzhan yang chos la rim gro dang mchod pa'i mchog ni rang gi blang dor shes nas mi 'gal bar spyod pa dang/ gzhan la yang de bzhin du ston pas dam chos 'dzin pa chung ngus kyang bdud sdig can la gnod pa chen por 'gyur zhing/ don dang phan yon shin tu che ste/ dpal phreng gi mdo las/ lha mo 'di lta ste/ skyes bu stobs po ches gnad du ma drag par bsnun yang gnod pa chen por 'gyur ba ltar dam pa'i chos yongs su 'dzin pa chung ngus kang bdud sdig can la gnod pas mya ngan chen po bskyed do/ /de lta bur bdud la gnod pa'i chos gzhan ni ngas gcig kyang ma mthong ngo/ /zhes dang/ blo gros rgya mtshos zhus pa las/ de bzhin gshegs pa'i dam pa'i chos 'dzin pa/ de lus sum cu rtsa gnyis mtshan ldan zhing/ mkhas pa yan lag snang pa med par 'gyur/ /de la blta bas ngom par yong mi 'gyur/ /zhes sogs gsung zhing/ dge 'dun la ni zas kyi mchod pa gtso bor bya zhing/ de la bsnyen bkur chung ngus kyang gnas skabs dang mthar thug gi don che bas/ skyes rab las/ bde bar gshegs la bkur bsti byas pa chung ngu yang/ /'bras bu 'byor ba chung ngu med ces sngon thos kyi/ /zan dron khengs pa rtsub pa lan tsha med pa yis/ /'bras bu 'byor pa chen po 'di ltar gyur @324b la ltos/ /shing rta dmag tshogs rta dang glang po 'gying ba dang/ /bdag gi dmag tshogs chen po 'di dang sa chen 'di/ /nor mang dpal yang rjes chags btsun mo rgya chen ldan/ /zan dron 'chang zhig 'bras bu bzang po 'grub pa ltos/ /dge slong bzhi zhig bsod snyoms phyir lhag mthong bar 'gyur/ /dbang po dul zhing dge slong dpal gyis rjes 'brang bzhin/ /dwang zhing byams pa'i yid kyis de la phyag byas nas/ /zan dron tsam zhig bdag gi khyim du gus par byin/ /de yi myu gu tsam zhig byung ba 'di yin te/ /rgyal po gzhan gyi gtsug gis nga yi zhabs la gtugs/ /nga yi de la bsams nas ni/ /lha mo khyod la smras pa yin/ /'jig rten pa ni sbyin pa'i 'bras bu thos nas ster/ /da bdag nyams su myongs na ci phyir sbyin mi bya/ /zhes gsungs pa ltar/ rgyal po rang gi da lta'i dpal 'byor gang yod rnams sku tshe sngon ma dbul po zhig tu gyur pa'i tshe dge slong bzhi sde la dad gus kyis zan dron rtsub pa lan tsha med pa zhig gis bsnyen bkur ba'i dge ba'i sa bon las skyes pa'i myu gu tsam zhig yin par gsungs pa tshun chad la yid ches byas nas da ltar rang la gang yod kyi/ lus dang longs spyod 'jig cing 'bral ba'i chos can rnams rang dbang yod dus dkon mchog gi phyogs su ma lus par gtong ba'i mos blo dang lag len gang zab la brtson par bya'o/ /mchod pa'i phan yon skabs/ byang sa las/ tshangs pa'i bsod nams 'dzin par gsungs pa ni/ tshangs par skye 'gyur gyi las tsam ma yin gyi/ bskal pa gcig tu mtho ris sha stag tu skye ba'i las gsog pa la byed/ mchod pa bla na med pa ni/ blo gros rgya mtshos zhus pa las/ gsum po 'di dag ni/ de bzhin gshegs pa la mchod pa dang rin kro bran med pa ste/ byang chub tu sems bskyed pa dang/ dam pa'i chos yongs su 'dzin pa dang/ sems can rnams la snying rje chen po bskyed pa'o/ /zhes gsungs shing gsang ba bsam gyis mi khyab pa las kyang/ gzhan snga ma dang 'dra ba la/ snying rje'i @325a @#/ /tshab tu ji ltar thob pa'i chos rnams sgrub pa'o/ /zhes gsungs pa ltar/ mchod pa 'di'i bsod nams ni mtshan dang mthun par bla na med pa'o/ /sha'i mig dag pa dang/ mig nad sogs nang gdon zhi ba la yang mar me sogs mchod pa la brtson pa bsngags te/ mar me 'bul pa'i mdo las/ mig med par ni nam yang mi 'gyur zhing/ de yi mig ni na bar 'gyur ma yin/ /mig cig ma yin khrog long mig ma yin/ /de yi mig la mi gsal med par 'gyur/ /mig ni ring zhing gnag la rnam par gsal/ /srid par de yi mig ni dag par 'gyur/ /nor bu 'od bzang ltar ni don zhib rtogs/ /bskal pa grangs med dag tu nams kyang de'i/ /sha yi mig ni nyams par mi 'gyur ro/ /de la mig nad gang yang mi 'byung ste/ /mar me phul ba'i rnam smin de yin no/ /zhes dang/ sman bla'i mdo las kyang/ des nad pa lus 'di na nyal yang sems gshin rjes 'khrid pa'ang ldog cing rmi lam dran te/ zhag bdun phrag gcig gam gsum mam lnga'am bdun na ldog go/ shi nas ji ltar ldog ce na zhes sogs rgyu mtshan dang bcas par gsungs so/ /chos dang chos smra ba'i ston pa mchod pa'i phyir lus dang longs spyod la mi blta bar bya ste/ 'das chen las/ 'jig rten gyi khams 'dir sangs rgyas shAkya thub pa zhes bya ba byung ba na ngas bla ma las shin tu rgyas pa'i mdo gsung ngo zhes thos pas/ shin tu dad pas mchod pa bya bar 'dod pa la dbul por gyur pas ci 'ang med do/ /lus btsongs pa'ang bsod nams chung bas nyo ba ma rnyed do/ /phyir log pa na mi zhig na re bdag la las shig yod de sus kyang mi nus na/ gal te khyod kyis nus na ngas nyo'o zhe'o/ /las ci yin dris pas/ nga la nang ma rungs pa zhig yod nas sman pa mkhas pa dag la bstan pas/ nyin re bzhin mi'i sha srang gsum gsum zos na 'tsho'i zhe'o/ /de ltar 'tsho nus na khyod la gser gyi dong rtse lnga sbyin no zhe'o/ /de thos pas @326b shin tu dga' ste dong rtse nga la byin la/ zhag bdun bshol cig /nga'i bya ba byas nas khyod ji ltar 'dod pa ltar bya'o zhes pa la/ zhag bdun mi rung ste 'o na zhag gcig khyod kyis don bsgrub tu gnang ngo zhe'o/ /das dong rtse blangs nas sangs rgyas de la ci bdog pa thams cad phul te sems thag pa nas shin tu rgyas pa'i mdo mnyan pa la/ dbang po brtul bas tshig bzhi pa'i le'u gcig las ma zin te/ de bzhin gshegs pa mya ngan 'da' ba ni/ /'khor ba thams cad yongs su bcad pa ste/ /gang gis rtse gcig sems kyis rab mnyan na/ /tshad med bde ba rtag tu 'thob par 'gyur zhes so/ /'di yid la byed cing nad pa de la nyin re sha srang gsum gsum byin pas na ba yang med par zla ba gcig na nang pa de bsos te/ nga'i lus la rma'ang med pas byang chub tu sems bskyed nas bdag kyang ma 'ongs pa na sangs rgyas shAkya thub par gyur cig ces smon lam btab par gsungs so/ /mdor na zang zing ci yod kyis dngos su mchod pa'i thabs la brten nas sgrub pa'i mchod pa la 'jug par rigs so/ /'dir mchod pa'i yan lag la/ bla na yod pa dang/ bla na med pa gnyis las/ dang po ni/ me tog dam pa zhes sogs tshigs bcad gnyis te/ lha dang mi'i yul la sogs pa'i me tog rung mthun kha dog dri ro'i sgo nas rmad du byung ba'i sil ma rnams so/ /phreng ba ni me tog sna tshogs dbyibs dang kha dog gi sgo nas mdzes par spel te srang bu la rgyus pa te/ de gnyis ka'ang me tog dngos dang ras la sogs pa las byas pa'i bcos ma thams cad do/ /yang na rin po che'i phreng ba'ang rung ngo/ /sil snyan ni rol mo la bya ste rgyud can dang/ 'bud brdung bkrol ba'i rigs thams cad do/ /de dag kyang snyan pa'i phul du phyin par sha stag go /byug pa ni spos zhim po'i lde gu'o/ /gdugs mchog ni gdugs rnams kyi mchog ste dper na/ dri med gser gyi rtsibs stong 'od 'bar ba/ /rin chen indra ni la'i tog gis mdzes/ /sna @327a @#/ /tshogs phra bkod mu tig chun 'phyang gis/ /'khor yug brgyan pa'i gdugs kyis mchod par bya/ /zhes pa lta bu'o/ /mar me ni spos mar la sogs pa dri zhim zhing 'od gsal ba dang/ rin che ba'i nor bu 'od gsal ba'o/ /bdug pa ni bdug spos dri legs par sbyar ba dang dri bzang sna gcig pa'o/ /na bza' dam pa ni gos thams cad kyi mchog panytsa li ka lta bu'o/ /dri mchog ni spos chu yon chab tu gsol ba zer te stong gsum du dri ngad ldang ba'i dris bsgos pa'i chu gtsang zhing bsil ba la sogs pa'o/ /de dag re re zhing dam pa dang mchog ces smos pa ni/ me tog lta bu re re yang lha dang mi'i yul na yod pa'i kha dog dang/ dbyibs dang/ dri dang/ rgyan phun sum tshogs pa mtha' yas shing rnam pa sna tshogs pa bsam gyi mi khyab pa 'bul ba bstan la/ phye ma phur ma ni spos zhim po'i phye mas gzhi la gtor zhing me la bdug tu rung ba ras gos kyi thum por byas pa'am yang na dkyil 'khor bris pa'i tshon phye kha dog sna tshogs spel ba'i rim pa rgya dang rngams ri rab dang mnyam pa'o/ /bkod pa khyad par du 'phags pa ni gong ma kun gyi mthar sbyor ba ste/ dper na/ me tog bkod pa khyad 'phags phyogs kun gyi/ /zhes pa ltar phreng sogs la yang sbyar zhing/ de yang phal che ba dang spras pa dang/ sna tshogs pa la bya'o zhes gsungs pa'i don ni/ mchod tshogs ji snyed yod pa tshang bas phal che ba dang/ de dag gis legs par brgyan pas na spras pa dang/ de dag re re'ang rnam grangs mang bas sna tshogs par gsungs so/ /de'i phyir mchod yon phal cher mchod yon bla re dang/ /mchod yon bkod pas 'od zer rab bkye zhing/ /mchod yon sna tshogs kun du bkram byas nas/ /bdag nyid chen po rgyal ba sras bcas mchod/ /ces gsungs so/ /dmigs pa bya ba ni/ rang gi snying kha nas mchod lha dpag med spros te dngos su bshams pa'i mchod pa rnams dang/ gzhan yang me tog sogs re re la yang/ me tog gi rang @328b bzhin 'ba' zhig las grub pa'i gdugs dang/ rgyal mtshan dang/ ba dan dang/ bla bre dang/ gzhal med khang dang/ khri stan dang/ lnga ldi la sogs pa'i dbyibs dang kha dog sna tshogs pa las 'od zer sna tshogs pa 'phro ba la sogs pa'i bkod legs kyi rnam pa du mar yid kyi sprul pa rnams dang/ 'dir tshig gis ma zin pa zhal zas dang/ gzims cha dang/ stan dang/ pho brang khang pa sna tshogs pa dang/ lha dang klu dang dri za dang/ /mi'am ci la sogs pa'i yul na yod pa'i longs spyod mchod par 'os pa thams cad mchod lha rnams kyi lag tu thogs te bla ma thub dbang rdo rje 'chang la sogs pa'i mchod yul rnams kyi dbu la me tog dang/ mgul la phreng ba dang/ snyan gyi bu gar sil snyan la sogs pa'i rol mo sna tshogs pa'i sgra dang/ sku gzugs la byug pa dang/ steng du gdugs dang/ spyan gyi mdun du mar me dang/ shang la bdug spos dang/ sku la na bza' dang/ zhal la mchod yon dang/ thugs ka la dri mchog dang/ ljags la zhal zas bcas phul nas zag med kyi bde bas dbang po rnams tshim zhing bdag nyid la thugs rtse gcig tu dgyes pa'i mos pa bya'o/ /yang na mchod lha ma spros par/ /rang gi lus dpag med spul nas mchod pa 'bul ba'am/ yang na tshogs zhing gi mdun du mchod rdzas rnams ma tshang ba med par blos bshams te/ sred zhen med par dad pas dbang med du phul bas tshogs zhing rnams kyis bdag gir bzhes te dus skabs dang mtshungs par 'dod rgur longs spyad pas dgyes shing tshim par bsams kyang rung ngo/ /gnyis pa mchod pa bla na med pa ni/ mchod pa gang rnams zhes pa'i tshigs bcad gcig ste/ rdzu 'phrul dang ting nge 'dzin gyi mthu shin tu che ba'i byang chub sems dpa' rnams kyis 'jig rten na med pa'i yo byad kyi khyad par bzang dgu du ma sprul pa'i mchod pa bla na med pa ste/ dper na/ bum pa bzang po dang/ dang ga bsam gyi shing dang/ yid bzhin gyi nor bu la sogs pa las bsam pa tsam gyis nye bar @329a @#/ /mkho ba'i yo byad mtha' yas pa dang chos kyi sgra dbyangs mtha' yas pa 'byung zhing/ sangs rgyas kyi zhing khams thams cad rgyas par gang ba'i mchod tshogs rgya che ba mdo sde las 'byung ba rnams thos shing mthong ba ltar/ rang gi sems kyis ci nus su gsal btab ste rang lus kyang dpag med du sprul nas de dag gis rgyal ba thams cad la yang dad mos shes rab dang ldan pa'i sems kyis mchod par bsams pa'o/ /yang na mchod pa bla na med pa'i yo byad ni 'phags pa de bzhin gshegs pa'i gsang ba bsam gyis mi khyab pa bstan pa'i mdo las byung ba sngar drangs pa ltar byang chub tu sems bskyed pa dang/ dam chos 'dzin pa dang/ thos don sgrub pa ste gsum la byas kyang chog par 'grel ba bzhi'i don bsdus las gsungs so/ /de bzhin gshegs pa dang byang chub sems dpa' kun tu bzang po'i spyod pa la dwang ba dang 'dod pa'i dad pa'i stobs kyis kun nas bslangs te phyag mchod de dag byed pa ni gnad che'o/ /'di ltar lam gyi rim pa'i spyod pa mthar thug phyin drug dang bsdu bzhi'i spyod pa gnyis kyi stobs 'phel te bla na med pa'i 'bras bu la sbyor ba'i rgyu gsum yang dkon mchog mchod pa dang/ dge bshes kyis zin pa dang/ sems can rjes su 'dzin pa gsum du mdo sde rgyan las gsungs shing/ de yang mchod pas tshogs rgyas pa la bar chad kyis mi tshugs pas dge ba'i bshes gnyen dang phrad nas rjes su bzung zhing/ de la tshad med bzhi la sogs pa'i sems can rjes su 'dzin pa'i bsam pa skye zhing de'i spyod pa rdzogs par 'grub te/ mdo sde rgyan las/ de ltar bcom ldan 'das la dang ba rab skyes shing/ /rdzas dang bkur sti chen pos shin tu rgyun mchod ldan/ /yon tan mang ldan phan byed bshes la rtag bsten pa/ /'gro la rjes su brtse ba grub pa kun thob 'gyur/ /zhes gsungs so/ /de ltar mchod pa ni don che bar ma zad ma @330b mchod na sdom pa gong ma gnyis dang ldan pa la ni dkon mchog gsum la gsum mi mchod ces dang/ mchod pa'i las ni ci nus bgyi/ /zhes gsungs pa dang 'gal ba'i nyes byas kyang 'byung bas nyin mtshan dus drug tu mchod pa la brtson par bya'o/ /gsum pa sdig pa bshags pa'i yan lag ni/ stobs bzhis sdig pa sbyong ba la gal che ba rgyun du las 'bras bsams nas 'dzems bag dang ldan pa'i lta ba mnyams pa zhig dgos te/ lam rim chen mo las/ des na rten 'brel las gnyis rgyu dang 'bras bur bcas pa la nges pa bskyed cing nyin mtshan kun tu sgo gsum la rtog pa gcig gis ngan 'gro gcod kyis/ thog mar rgyu 'bras kyi rnam dbye la mi mkhas shing cung zad shes kyang sgo gsum bag yangs su 'jig pa ni ngan 'gro'i sgo 'byed pa kho na ste/ rgya mtshos zhus pa las/ klu'i bdag po byang chub sems dpa' rnams kyis chos gcig gis ngan song ngan 'gro log par ltung bar skye ba yang dag par gcod do/ /chos gcig po gang zhe na/ 'di lta ste/ bdag ji ltar gyur cing nyin mtshan rnams 'da' zhing 'dug snyam du dge ba'i chos rnams la so sor rtog pa ste/ zhes gsungs pa'i phyir ro/ /de ltar rang gi sgo gsum la rtog dpyod byed pa na yang zhib tu ma rtags na thos pa rgya che ba tsam dang dben par 'dug tshugs pa tsam gyi yon tan sna re mngon mtho ba la brten nas byis pa nang phan tshun la mkhas btsun chen por sgrog pa'i bslu brid kyis rang yang 'khrul nas mkhas btsun du 'dzin cing/ don du yin lugs la chos dang bstun rtsa na ro khur ba ltar rgyab bsnol du song ba'i yngang la mi tshe 'da' ba mang bas/ de ltar ma song bar rang rgyud la legs par brtags nas gzhan la mi mngon pa'i rang skyon phra mo shes dka' ba rnams kyi 'bras bu dang bcas pa gtan la phab nas ngo tsha dang khrel yod chen po'i nan tan gyis nyes spyod phra mo yang ma lus par spang ba dang/ dge ba gang yin 'tshol ba'i yid drag pos@331a @#/ /thub pa'i brtul zhugs lan pa nas brtsams pa'i legs spyod thams cad la chung du nas rtsis po cher 'dzin pa'i nan tan gyis ci nus su bslab cing blang dor shes nas sgrub pa kho na lhur len pa la 'bad par bya ste/ de ltar ma 'bang na mi yi sha gzugs tsam du 'gyur zhing/ /chos bzhin smra ba mang bas dus 'das kyang rang gis ngos skal gyi dge sbyong gi chos mi thob pa'i phyir te/ 'das chen las/ bdag gnyen shes la sogs pa thams cad btang nas rab tu byung ste lam 'tshol bar byed pas dge ba'i rtog pa nyid bsgom gyi/ /ngan rtog sgom pa'i dus ma yin no/ /dper na rgya mtsho chen por song ste rin po che yang dag pa mi len par chu shel len pa dang/ rol mo dam pa spangs te lung khung du brtse ba dang/ rin po che'i bu mo spangs te bran mo dang lhan cig nyal pa dang/ gser snod bor te kham pher spyod pa dang/ bdud rtsi bor te dug 'thung ba dang/ sman pa mdza' bo dor te khon can ma rung pa bsten pa ltar/ ston pa chen po'i chos bdud rtsi dor te bdud kyi sngag pa'i rnam rtog sna tshogs 'thung ba'o// zhes dang/ yang bdag nyid ngo tsha ba dang/ gzhan la mthol ba'am/ mi la ngo tsha ba dang lha la ngo tsha ba ste/ de gnyis dang mi ldan pa ni byol song yin gyi/ mi ni ma yin pa'o zhes gsungs pa dang/ tshom las kyang/ gal te rigs bcas mang du smras kyang ni/ /bag med mi ngag da ltar byed mi 'gyur/ /dper na phyugs rdzis gzhan gyi phyugs bgrangs ltar/ /de dag dge sbyong skal ba 'thob ma yin/ /gal te rigs bcas nyung du smras byed kyang/ /chos kyi rjes su chos la spyod pa dang/ /'dod chags zhe sdang gti mug spong byed pa// de dag dge sbyong skal pa 'thob nga yin/ /zhes gsungs so/ /de yang las 'bras bsams nas lag tu lan pa na rang gzhan gyi bde thabs sna tshogs la khag btags nas sdig pa byed snyam pa med de/ da res thabs ma byung zer nas sdig pa la zhugs na phral @332b du bde ba ltar snang yang 'bras bu smin pa na sdug bsngal drag cing rgyun reng ba sgo sna tshogs nas nges par myong dgos te/ ye shes rgyas pa'i mdo las/ bdag gi phyir dang gzhan gyi ched dag tu/ /bde ba 'dod na sdig pa mi bya ste/ /byis pa bde 'dod gang zhig sdig byed na/ / de yi 'bras bu so sor myong bar 'gyur/ /zhes gsungs so/ /de ltar 'bras bu la 'jigs nas rgyu sdig pa'i kun slong rgyu ba nas bkag kyang bag med pa dang nyon mongs mang ba la sogs pa'i dbang gis nyes pa byung na btang snyoms su bzhag par mi bya ste/ sdig ltung phra mo yang rnam par 'phel nas sdug bsngal chen po la sbyor bas nyin re bzhin phyir bcos pa'i thabs la zhugs pa gal che zhing/ de yang ltung ba'i phyir bcos sdom pa so so'i skabs nas 'byung ba ltar la/ sdig pa phyir bcos pa dang/ chos spong sogs las sgrib sbyong ba'i thabs ni/ byams pa chos bzhi bstan pa'i mdo las gsungs pa ltar gyi stobs bzhi tshang nges kyi bya ste/ nges ni byas bsags tshang ba'i myong des kyi las kyang sbyong nus na ma nges pa gzhan rnams lta ci smos/ de la stobs bzhin ni rnam par sun 'byin pa'i stobs dang/ gnyen po kun tu spyod pa'i stobs dang/ nyes pa las slar ldog pa'i stobs dang/ /rten gyi stobs so/ /de la stobs dang po ni sngar byas kyi sdig pa'i 'bras bu gsum bsams nas dug khong du song ba lta bu'i 'gyod sems shugs drag cing mang ba'o// gnyis pa la drug las/ /mdo sde zab mo la bsten pa ni/ sher phyin la sogs pa'i mdo sde'i tshig len pa dang/ don 'dzin pa dang/ klog pa sogs so/ /de yang rdo rje gcod pa las/ gang dag 'di lta bu'i mdo sde'i tshig len pa dang/ 'dzin pa dang/ klog pa dang/ kun chub par byed pa de dag ni mnar bar 'gyur ro/ /shin tu mnar bar 'gyur ro/ /ci'i phyir zhe na/ sems can de dag ni mi dge ba'i las ngan song du skye bar 'gyur ba gang yin pa de dag tshe 'di la mnar bas byang bar 'gyur te/ sangs rgyas kyi byang chub kyang 'thob @333a @#/ /par 'gyur ro/ /zhes dang/ rtog ge 'bar bar drangs pa las/ ji skad du/ dam pa'i chos 'dzin par byed pa de'i myong bar nges pa'i sdig pa yang mthong ba'i chos la myong bar 'gyur ro zhes bya ba dang/ gzhan yang ngan 'gror 'gro ba'i las rnams de/ 'dis ni mgo bo tsha ba tsam du 'gyur/ /zhes sdig pa 'dag lugs kyi skabs su gsungs pa ltar ro/ /'dis ni las 'bras la rtsis po cher byas te bshags sdoms sogs chos kyi lag len ma nor ba la nan gyis 'bad pa na/ tshe 'dir nad sogs mi 'dod pa shas cher myong dgos pa rang gzhan gang la mthong thos ci byung yang chos la mi bden snyam pa dang/ yid gzhum pa sogs mi bya bar mdo 'di dag dran par byas nas ngan 'gro myong nges kyi las ngan dag pa'i rtags su go nas dga' bar bya'o/ /stong nyid la mos pa ni/ gang zag gi bdag med cing chos kun rang bzhin gyis 'od gsal bas chos nyid la 'jug cing/ de yang gdod ma nas dag par yid ches pa'o/ /de bzhin gshegs pa'i mdzod las/ gang gis pha'ang yin la rang sangs rgyas kyang yin pa gsod pa dang/ dkon mchog gsum gyi skor rku ba dang/ ma'ang yin la dgra bcom pa'ang yin pa la log par spyod pa dang/ sangs rgyas la bskur pa 'debs pa dang/ 'phags pa'i dge 'dun la mi snyan pa brjod pa/ 'phags pa rnams la gnod pa'i tshigs dang/ chos 'dod pa rnams g.yeng bar byed pa dang/ yang dag par song ba dag gi rnyed pa 'phrog pa'i sems dang/ mtshams med par byed pa gshoms pa dang/ lta bas gzings pa bcu ni srog gcod pa la sogs pa'i nang na ma rung pa ste mi dge ba bcu'i las kyi lam 'di dag ni kha na ma mtho ba chen po dang bcas pa'o/ /gal te sems can gcig gcig 'di rnams kun dang ldan par gyur la/ de'ang de bzhin gshegs pas rgyu dang rkyen du ldan pa'i chos bstan pa la 'jug ste/ 'di la bdag gam/ sems can @334b nam/ srog gam/ gang zag gam/ gang byed pa'am/ gang myong ba ni 'ga' yang med do snyam nas chos thams cad kyi byas pa med pa dang/ mngon par 'du bya ba med pa dang/ sgyu ma lta bu dang/ kun nas nyon mongs pa med pa dang rang bzhin gyis 'od gsal ba'i chos nyid la 'jug cing chos thams cad gdong ma nas dag par yid ches te mos na/ sems can de ngan song du 'gro bar nga mi smra'o zhes dang/ las kyi sgrib pa rnam par dag pa las kyang de ltar gsungs shing/ rmi lam bstan pa las kyang/ ma skyes dgra yis pha ni gsang gyur cing/ /de bzhin gshegs pa dkrongs pa'i sbyor byas kyang/ /de sems gcig gis ngan 'gro rnam grol na/ /gang zag dam pa gang yin smos ci dgos/ /sems kyis ching bar byed cing grol byed pas/ /lus bems 'di la nges pa ci yang med/ /lus kyi 'du 'dzi mthong nas gshe ma byed/ /pha rol dag la ma smra lus spyongs shig /ces gsungs pa ltar ro/ /bzlas pa la brten pa ni/ yi ge brgya pa sogs kyis gzungs khyad par can rnams kun rdzob dang don dam pa'i cho ga bzhin du zlos pa'o/ /'dir yi ge brgya pa ni de bzhin gshegs pa'i yi ge brgya pa ste/ de'i phan yon dang bcas pa ni/ dam tshig gsum gyi rgyal po las/ mig btsum la sangs rgyas dang byang chub sems dpa' la dmigs pa'i sems kyis yi ge brgya pa lan stong phrag brgyad bzlas brjod byas na/ mig btsum bzhin du sangs rgyas dang byang chub sems dpa' mthong bar 'gyur/ sdig pa thams cad bral bar 'gyur ro/ /yang na mchod rten la bskor ba byed cing stong phrag brgyad bzlas pa bya'o/ /sku gzugs dang dam pa'i chos kyi glegs bam gang yang rung ba zhig mdun du byas nas kyang cho ga ni 'di nyid do zhes dang/ 'di ni de bzhin gshegs pa thams cad kyi sku yin no/ /'di la gus pa bla na med par bya'o/ /'dis las dang po pa dag kyang sems can rnams la sangs rgyas kyi mdzad pa dang mnyam par 'gyur ro/ /'di nyid bdud la sogs @335a @#/ /pa dang ma rungs pa thams cad las bsrung bar byed pa'i mchog kyang yin no/ /zhes sogs gsungs shing/ snying po rgyan las/ sangs rgyas kun gyi sku gcig po/ /pad dkar zla ba'i dbus gnas shing/ /rdo rje dril bu rgyas spras pa'i/ rdo rje sems dpa' legs dmigs shing/ /yi ge brgya pa cho ga bzhin/ /nyi shu rtsa ni re re bzlas/ /ltung sogs byin gyis rlabs 'gyur bas/ /'phel ba ru ni mi 'gyur zhes/ /grub pa mchog rnams kyis bshad pas/ /thun mtshams su ni spyad par bya/ /'bum phrag tu ni bzlas gyur na/ /rnam par dag pa'i bdag nyid 'gyur zhes gsungs pa ltar/ rdor sems kyi snying po yi ge brgya pa yang cho ga bzhin du nyin re bzhin nyer gcig re ma chag na ltung ba'i 'phel kha chad la/ 'bum bzlas na rtsa ltung yang rnam par dag par 'gyur bar gsungs pas de bzhin du bya zhing/ de yang dpung bzang gis zhus pa las/ bzlas brjod me la tshul khrims rlung gis sbar/ /zhes dang/ yang tshul khrims nyi ma'i 'od zer bzlas brjod kyis/ /zhes gsungs pa ltar/ gong du bshad pa'i bzlas brjod kyi phan yon rnams ji bzhin 'byung ba la de'i grogs tshul khrims la gnas shing brtson 'grus chen po'i rgyun dang ldan pa dgos so/ /dus ji srid du bzla ba ni bskul byed kyi gzungs las gsungs pa'i sdig pa byang ba'i mtshan ma brtan po mthong mthong du bya'o/ /sku gzugs la brten pa ni/ sangs rgyas la dad pa rnyed nas sku gzugs byed pa ste/ de bzhin gshegs pa'i gzugs kyi le'u las/ dper na mi zhig ngan skyugs kyis reg pa las legs par bkrus te/ spos byug na dri nga ba dang bral ngar 'gyur ro/ /de bzhin du de bzhin gshegs pa la dad pa rnyed nas sku gzugs byed na mi dge ba bcu dang mtshams med pa lnga'i sdig pa yang byang ste mi mngon par 'gyur ro/ /bye brag tu ni byang chub kyi sems dang ldan pa dang/ khyim gyi gnas nas byung @336b nga tshul khrims dang ldan pa'i sdig pa byang bar 'gyur ro/ /zhes so/ /mchod pa la brten pa ni sangs rgyas dang de'i mchod rten la mchod pa rnam pa sna tshogs byed pa ste/ me tog brtsegs pa'i gzungs las/ gang gis sangs rgyas la lo brgya stong du bde ba'i yo byad thams cad kyis bsnyen bkur byas pa dang/ yang byang chub kyi sems dang ldan pa gang gis sangs rgyas mchod pa'i phyir de yongs su mya ngan las 'das pa'i mchod rten la me tog 'ga' 'bul lam/ chu snyim gang tsam 'thor ram/ byug pa'i thig le 'bri'am me tog nyal nyil 'chags sam/ byug spos dang mar me la sogs pa phul nas dga' ba'i sems kyis gom pa'i gar stabs 'ga' bor te sangs rgyas de la phyag 'tshal lo zhes brjod pa de dag ni bskal pa brgya phrag stong du yang ngan 'gror 'gro ba'i gnas med do zhes dang/ sman bla'i mdo las kyang/ gang dag bslab pa'i gzhi 'ga' zhig bzung ba de las nyams te ngan song gi 'jigs pa de dag sangs rgyas sman gyi bla baiDUrya'i 'od de la mchod pa sna tshogs byed na ngan song gsum gyi sdug bsngal med par shes par bya'o/ /zhes gsungs so/ /mtshan la brten pa ni/ sangs rgyas dang rgyal sras chen po rnams kyi mtshan thos shing bzung ba ste/ de yang mdo sde las/ sangs rgyas de'i mtshan su'i rna lam du grags pa de dag ngan song du 'gro ba ni gnas med de go skabs ma yin no/ / kun dga' bo sangs rgyas kyi spyod yul ni yid ches par dka'o/ /khyed dad cing yid ches pa ni sangs rgyas kyi mthu yin no/ /byang chub sems dpa' skye ba gcig gis thog pa rnams ma gtogs par 'di ni nyan thos dang rang sangs rgyas thams cad kyi sam yin no/ /yang dag bsnyan gnas la gnas te lo gcig gam zla ba gsum du bslab pa'i gzhi 'dzin cing bdag gi dge ba'i rtsa ba 'dis nub phyogs kyi sangs rgyas tshe dpag med kyi zhing bde ba can du skye bar shog shig ces smon lam btab pa des sangs rgyas 'di'i mtshan thos na de @337a @#/ /'chi ba'i tshe byang chub sems dpa' brgyad rdzu 'phrul gyis lhags nas lam bstan te der padma las skye'o zhes dang/ 'jam dpal zhing bkod las kyang/ ye shes bla ma 'od kyi tog/ de bzhin smon lam blo gros dang/ /dbang po zhi dang 'jam dbyangs la/ /bdag ni gus pas phyag 'tshal lo/ /su zhig byang chub sems dpa' 'di dag gi ming 'dzin pa de ni ngan song du mi 'gro'o/ /bud med du mi 'gyur ro zhes gsungs pa ltar ro/ /stobs gsum pa ni/ sdig pa phyin ched yang dag par sdom pa ste/ 'dis ni srog gcod sogs kyi sgo nas sgo gsum gyi las dang nyon mongs dang/ chos kyi sgrib pa byas pa byed du bcug pa/ rjes su yi rang ba sngon ci byas pa thams cad 'joms te zad par sa'i snying po las gsungs shing/ de la rigs mthun pa'i lha dang mi rnams dga' bar 'gyur ro/ /nad mang cing tshe ring bar 'gyur ro/ /zhes bya ba la sogs par yang mdo de nyid las gsungs so/ /stobs gzhan gsum po dag kyang/ 'dis brtan par byed pa ste/ 'di med na ni bshags pa la sogs pa'i dge sbyong gang yang tshig tsam snying por zad par 'gyur zhing de'i phyir sdom sems gal che la/ de yang phyin chad mi byed pa'i sdom sems dngos su 'dran nus kyi sdig pa sdar byas la zhe log pa'i 'gyod sems mang ba la rag las shing/ de ni sdig pas dus dang rnam pa kun tu lus sems la gnod pa'i sdug bsngal sgo sna tshogs nas bskyed tshul sangs rgyas dang de'i bka' kho na las 'byung ba la tshad mar byas te yang yang bsams pa kho na la rag las pas/ mdor na rtag tu las 'bras bsams nas sgo gsum mi dge ba'i rgyun las sdoms shing/ dge ba la gsar brtson bskyed pa las mi 'da' bar bya ste rgyu 'bras rten 'brel la rnam par blta ba 'di ni 'jig rten pa'i yang dag pa'i lta ba zhes ngan song spong ba'i rgyu gcig dang/ so skye rnams kyi chos kyi mthar thug pa dang/ @338b 'jig rten las 'das pa'i yang dag pa'i lta ba la 'jug pa'i rgyu mtshan chen po dang sgo gcig pur nges pas bsam sbyod gang gi dus su yang rang gzhan gyi bde lags kun gyi gzhi rtsa dang ma bral ba gal che'o/ /bzhi pa rten gyi stobs ni/ skyabs sems bsgoms pa ste/ 'di gnyis la brten nas steg pa stobs chen yang sbyong nus shing/ 'di gnyis la ma brten na sdig pa chung du las kyang ldang dka' bas rten gyi gtso bo dang/ 'di gnyis la rtag tu gnas na chos nyid kyis sdig pas mi rdzi bas gnas kyi gtso bo yang yin no/ phag gis rtogs brjod las/ gang dag gsum la skyabs dod pa/ /de dag ngan 'gror 'gro mi 'gyur/ /mi yi lus ni spangs nas su/ /de dag lha yi lus 'thob bo/ /zhes dang/ sdong po bkod pa las kyang/ byang chub kyi sems ni nyes par byas pa thams cad sreg pas bskal pa'i me lta bu'o/ /mi dge ba'i chos thams cad zad par byed pa'i sa'i 'og lta bu'o zhes gsungs pa dang/ spyod 'jug las kyang/ de ltas dge ba nyam chung nyid la rtag /sdig pa stobs chen shin tu mi bzad pa/ /de ni rdzogs pa'i byang chub sems min pa// dge gzhan gang gis zil gyis gnon par 'gyur/ /zhes gsung so/ /gzhan yang man ngag las/ sa la 'gyel ba sa gzhi de la brten nas ldang dgos pa ltar/ yul dkon mchog dang sems can la brten nas sdig pa byung ba rnams/ de nyid la brten nas skyabs sems byas te sbyangs dgos gsungs/ yang rang cag gis theg pa dman mchog gi sdom pa mtha' dag blangs nas tshul bzhin ma bsrungs pa'i sdig ltung rten gyi sgo nas stobs che ba rnams ni skyabs sems kyi sdom pa de dag la brten nas sbyangs dgos par yang gsungs so/ /de ltar sdig pa'i gnyen po yongs su rdzogs pa'i stobs bzhi tshang ba nyin re bzhin lag tu lan pa'i tshe ni sngar bshad pa'i phyag mchod yan sngon 'gror byas/ 'dir sdig ldan bdag la skabs su babs pa'i dngos gzhi'i dge sbyor ni @339a @#/ /bshags sdom la 'jug pa 'di yin te/ de yang so so thar pa las/ /sangs rgyas zhes bya'i sgra 'di yang/ /zhes sogs 'jig rten gyi khams nam mkha'i khyon ltar yangs pa la/ sangs rgyas 'byon pa'i 'jig rten re gnyis tsam yin/ de la yang stong bskal/ chags bskal/ 'jig bskal rnams la ni sangs rgyas mi 'byon/ gnas bskal gyi 'ang yar thog ring mo la ni mi 'byon/ mar 'grib kho na la 'byon zhing der yang chos gsung dka'/ gsungs kyang bstan pa yun du ni gnas dka'/ cung zad gnas kyang rang de dang kha thugs su skye dka'/ skyes kyang bstan pa dang mjal dka'/ mjal kyang bstan pa yongs rdzogs dge slong gi sdom pa dang/ khyad par du theg pa chen po'i mdo sngags zung 'brel gyi rje bla ma'i bstan pa tshang la ma nor pa dang mjal ba ni shin tu dka' ba la/ da res stabs legs kyis mir skyes nas dka' dka' thams cad tshang ba ltar gyur rung legs smon dang bsod nams dman pas/ rang bzhin gyi sdig pa rgya che ba'i thog /la la'i tshul khrims sdug bsngal yin gsung ba ltar sdom pa blangs pa rnams kyang nyon mongs dang sdig ltung gi rkyen du song zhing de la yang bshags pa dang sdom pa'i sems med par sdig ltung la 'byams klas shing skabs 'gar kha dkar gting mnag gi dkar nag 'dres ma'i chos ltar bcos pas rlom pa'am yang na btang snyoms su lus nas bde bar spyod pa 'di ni shin tu ma rungs pa zhig ste/ las ngan de dag re res kyang rnam smin gyi 'bras bu ngan song du skye zhing de las thar yang myong ba rgyu mthun gyi 'bras bu tshe 'thung ba dang nad mang ba sogs dang/ byed pa rgyu mthun gyi 'bras bu sdig pa la lhag par spyod pa dang/ bdag 'bras snod kyi 'jig rten ma rung bar gyur ba sogs sdug bsngal dpag tu med pa zhig bdag gcig pus yun ring du nyams su myong dgos par 'dug pas na da lta nyid du stobs bzhi'i @340b sgo nas sdig pa rnaMs dag nges su sbyangs dgos te/ be'u bum las/ nged cag dug la 'bags par gyur nas/ tshor ba bzhin du 'dug pa ci 'dra gsung pa ltar/ dper na mi gsum lhan cig tu sha dug zos pas/ gcig ni shi/ gcig ni na/ gcig pu nad ma langs tsam du yod na/ de'i sems la bzod pa'i thabs med pas sman pa mkhas pa bsten nas de la rang gi byas nyes na mi gsang bar brjod/ sman 'thung zhing ci zer la nyan/ phyin chad sha dug de 'dra za ba lta zhog de'i phyogs su 'khor ba yang mi nus pa'i tshod dang 'dra bar/ rang cag gis kyang thog med nas sdig grogs dang lhan cig tu sdig pa'i dug la longs spyad pa dran nas bzod thabs med pa'i 'gyod pa drag pos bdag nyid la smad de phyin chad mi byed pa'i sdom sems dang bcas te sman pa dang 'dra ba'i bla ma sangs rgyas kyi spyan sngar skyabs sems la brten nas sman dang 'dra ba mtshan brjod sogs gnyen po sna tshogs kyi sgo nas sdig pa mi gsang bar gsal por brjod pa'i mthol ba sngon du btang nas bshags par bya ste/ de'i cho ga ni gsum ste/ nye bar 'khor gyi zhus pa las 'byung ba'i phung po gsum pa'i mdo da lta byang chub ltung bshags du grags pa dang/ yongs su bsngo ba'i rgyal po las/ phyogs bcu'i 'jig rten gyi khams su 'dus pa sangs rgyas dang byang chub sems dpa' thams cad bdag la dgongs su gsol zhes sogs dang/ gser 'od dam pa las/ sangs rgyas rkang gnyis dam pa dag /thugs brtse thugs rje ldan pa'i thugs/ /gang dag phyogs bcu'i 'jig rten na/ bzhugs pa bdag la dgongs su gsol zhes sogs gang 'os kyis bya zhing/ 'dir ni ltung bshags kyi sgo nas bya ba la sangs rgyas so lnga sku mdog phyag mtshan sogs rje'i gzigs gnang ltar tshogs zhing du bzhugs pa la dmigs pa gtod pa'am/ yang na gtso bo'i thugs ka las 'od zer rnga g.yab ltar 'phros pa'i sne la mngon sum ltar gsal btab nas/ dang por rang dang mtha' bskor gyi sems can thams cad kyis@341a @#/ /thog med nas byas bsags kyi sdig pa rgyu 'bras la 'jigs pa'i blo dang/ dkon mchog gi yon tan la yid ches pa'i blo dang/ rang gis sems can thams cad skyobs 'dod kyi sems bcas bskyed nas bdag ming 'di zhes bgyi pa/ dag pa bla ma la skyabs su mchi'o zhes sogs kyis rten gyi stobs bskyed/ de nas sdig pa 'joms pa'i gnyen po stobs chen du mtshan byin gyis rlabs shing/ smon lam yongs su bzung ba'i bden mthu'i khyad par la yid ches bskyed nas/ lus ngag yid gsum gyi phyag 'tshal dang 'brel bar/ de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo zhes sogs brjod nas gnyen po'i stobs bskyed/ de nas thugs mi 'gyur bar dgongs su gsal snyam du rang gis thog med nas sdig pa'i las bgyis pa dang/ bgyid du stsal ba dang/ bgyid pa la rjes su yi rang ba'i sdig pa spyi dang khyad par du mchod rten dang/ dge 'dun gyi skor 'phrog pa sogs sdig pa lci ba rnams blos bsdus nas de dag gi rnam par smin pa sogs ni rab tu tsha ba la sogs pa 'di ltar 'gyur snyam du bsams te 'gyod pas rang gi sems dang sdig pa rnams sun phyung nas ye shes mi gsal bar byed pa'i las kyi sgrib pa gang gis sgribs nas dmyal sogs mi khom par skye 'gyur rnams sangs rgyas da dag gi mdun du dag gis mthol zhing/ yid kyis 'chags nas zhe la mi 'chab par/ /dngos su mi sbed pas sdig pa ma lus pa bshags par bya zhing/ de ltar bshags na dag par yang 'gyur ro snyam du bsams nas de dag la sogs pa phyogs bcu'i 'jig rten gyi khams thams cad na de bzhin gshegs pa zhes sogs brjod na sun 'byin pa'i stobs bskyed/ de nas sngon gyi sdig pa la 'gyod nas da lta ba yan bshags la phyin chad mi byed pa ni dam pa dang mkhas pa yin cing/ legs par sdom pa @342b des ni sdig pa rnams dag par yang 'gyur la/ bshags kyang byas na slar yang 'phel bar 'gyur bas na nad la gnod pas bza' btung mtshams gcod pa ltar nyes pa'i rgyun gcod cing sdoms par bya'o snyam du bsams nas/ /slan chad kyang gcod cing sdoms par bgyi lag so zhes brjod nas slar ldog pa'i stobs bskyed/ de nas stobs bzhi la sogs pa'i phyin drug gi dge rtsa so so ba rnams rdzogs byang gi rgyu'i dngos po gcig tu byas shing bsres te rang bzhin gyi med pas mi phyed par sdoms nas rdzogs pa'i byang chub kyi rgyur dus gsum gyi sangs rgyas rnams kyis bsngos pa ltar bdag gis kyang yongs su bsngo bar bgyi zhing/ slar yang phung po gsum pa dang mthun par/ bsngo smon dang skyabs su 'gro bar bgyi'o snyam du bsams nas/ sangs rgyas bcom ldan 'das de dag thams cad bdag la dgongs su gso pa zhes pa nas/ skyabs su nye bar mchi'o zhes pa'i bar brjod do/ /klu sgrub kyis 'grel par ni/ de bzhin gshegs pa'i mtshan brjod rnams sdig pa sun 'byin pa'i stobs su mdzad nas yongs su bsngo ba man chad la gnyen po kun spyod kyi stobs su mdzad pa'ang 'dug /de nas bla ma rdor 'dzin ma bton nas sdig ltung gi ming rigs ngos ma zin pas gos pa rnams kyang mthol zhing bshags na bde ba la reg par gnas par 'gyur zhing/ ma mthol ma bshags na de ltar mi 'gyur bar bsams nas 'gyod pas ltung ba spyi bshags par bya'o/ / de nas 'dod chags zhe sdang ma'i tshig bcad gcig po brjod de/ rgyu dug gsum la brten nas gzhi lus la sogs pa gsum gyis sdig pa rang gis bgyis pa dang/ gzhan byed du bcug pa dang/ gzhan gyis byas pa la yid rang ba sogs sdig pa ci mchis pa thams cad kyis nyes dmigs dran nas snga ma la 'gyod cing phyi ma la bsdams pa'i sems kyis snying thag pa nas yang yang bshags par bya ste/ de yang gong du phyag 'tshal gyi skabs nas 'byung ba bzhin du rgyal ba sras bcas mang po'i spyan sngar bdag gi lus dang lce mang @343a @#/ /pos/ skad cig re re la yang sdig pa ma lus pa mthol zhing bshags par bsams par bya'o/ /de ltar bshags pas sdig pa sngar byas 'phel ba chad cing byad la/ sdom sems kyis phyi ma rnams phro chad par byed kyang/ bshags pas chog snyam nas sdig pa la mi 'dzems pa ni blun po'i chos te/ byams pa seng ge sgra'i mdo las/ bcom ldan 'das kyis bka' stsal pa/ ngas ni sngon byas pa'i sdig pa'i las zad par bya ba'i phyir/ phung po gsum pa'i chos kyi rnam grangs bstan pa yin te/ de la mi blun po dag ni lhag par ltung ba mngon par 'du bya ba mngon par 'du byas nas nyes pa bshags shing sbyang ba tsam gyis dag par 'gyur bar sems shing/ phyin chad sdom par ni mi byed do zhes gsungs pas/ bshags pa la yang sdoms sems gal che'o/ /de ltar stobs dang pos sdig pa'i 'phel kha chad cing myong ba rgyu mthun gyi 'bras bu 'dag /stobs gnyis pas sdig pa rtsa ba nas 'don zhing rnam smin gyi 'bras bu 'dag /stobs gsum pas sdig pa'i rgyun gcod cing byed pa rgyu mthun gyi 'bras bu 'dag /stobs bzhi pas sdig pa nyams dma' bar byed cing bdag 'bras 'dag par bla ma'i man ngag las 'byung zhing stobs bzhi ni thun du ma zad thun mtshams su yang sdig ltung byung res kyis phral du nyams su len par bya ste/ mdo sde las kyi me long las/ mi dge byas pa thams cad la sun 'byin pa dang rten gyi stobs gnyen po nyes pa las ldog pa'i stobs bzhis phral du bshags par bya/ /zhes gsungs so/ /sdig pa 'dag lugs ni sbyong mkhan rang gi gnyen po stobs che chung dang/ stobs bzhi rdzogs ma rdzogs dang/ shugs drag zhan dang/ sbyong yun ring thung sogs kho na la ltos pas stong nyid sgoms pa sogs gnyen po stobs gang che'i sgo nas dus shin tu ring bar stobs bzhi tshang nges kyis bsam sbyor drag pos sbyangs na ni sngon chad bag med du gyur zin pas @344b tshe 'dir mtshams med bgyis pa la sogs pa rnams kyang/ phyin chad bag yod kyis tshul dang ldan pas zla ba sprin rum nas 'thon pa ltar lhag par mdzes shing ngan 'gro med par myur du grol bar 'gyur te/ bshes spring las/ gang zhig sngon chad bag med gyur pa las/ /phyis nas bag dang ldan par gyur de yang/ /zla ba sprin bral lta bur rnam mdzes te/ /dga' bo sor 'phreng mthong ldan bde byed bzhin/ /zhes dang/ ma skyes dgra'i bgyod bsal las/ mchog tu rgyas pa'i mdo las/ drang por 'dug la yang dag ltos/ /yang dag nyid la yang dag lta/ /yang dag mthong na rnam par grol/ /de ni bshags pa chen po yin/ /zhes gsungs pa ltar ro/ /'on kyang thog ma nas rnam smin yid du mi 'ong zhing dam pas smad pa'i las kha na ma mtho bas ma gos pa rang la 'bad pa gal che ste/ nyes pas ma gos pa'i dag pa dang/ bshags pas dag pa gnyis khyad par shin tu che tshul/ lam rim che chung las gsungs pa ltar bshags pa byas pas rnam smin sogs kyi myong cha ma lus pa dag kyang sa lam sogs dge ba'i rtog pa skye ba la ches ring du 'gro ba dang/ gzhan yang las de dag gis dgra bcom 'thob nas kyang lus sems la gnod pa 'babs tshul rnams mdo sde mdzad sa blun dang las brgya pa sogs bltas nas nges shes rnyed par byas te srog gi phyir yang sdig ltung phra mo tshun chad la yang shes bzhin du mi 'jug pa'i 'phags pa rnams kyi spyod pas dus 'da' bar bya'o/ /dngos su sdig pa sbyong ba'i tshe sdig pa stobs gang che dang/ rgyun du rang la 'byung gang nye'i sdig ltung rag pa rnams la ched dmigs kyi gnyen po bsten nas mthar phra mo yang ma lus par sbyongs tshul ni/ rgyan las/ sa dgu la ni chen po yi/ /zhes dang/ gos la btso lag mkhan bzhin du/ /las la rab tu sbyar bar bya zhes gsungs pa ltar/ /dri ma che rim nas dag cing/ gnyen po chung rim nas skye ba/ khrus mkhan gyis gos kyi dri ma bsal ba bzhin no/ /bzhi @345a @#/ /pa rjes su yi rang gi yan lag ni/ phyogs bcu'i rgyal bzhes sogs tshig bcad gcig ste/ phyogs bcu dus gsum gyi sangs rgyas dang/ sras byang chub sems dpa' dang/ rang rgyal dang/ slob mi slob kyi nyan thos dang/ se skye'i 'gro ba kun dang bcas gang zag lnga'i bsod nams gang la yang snying thag pa nas dga' ba sgom pa'o/ /de ltar byas na gzhan gyi dge ba la gnod pa dang bri ba yang med la/ bdag nyid kyis dngos su ma byas kyang/ byas pa las lhag pa'i bsod nams rgya chen gsog pa'i thabs mkhas chen po dang ldan zhing/ khyad par du rang gi dge ba byas bsags la yang rjes su yi rang ba yang yang bgyis na ni sngon gyi dge ba rnams spel zhing da lta gsog pa dang ma 'ongs pa la spro bar yang 'gyur bas/ 'bad rtsol chung ngus don chen po rlabs chen gyi tshogs bde blag tu rang rgyud la bsdud par byed de/ rje thams cad mkhyen pa'i rtog brjod las/ 'bad pa chung ngus rlabs chen tshogs bsdud la/ /dge la rjes su yi rang mchog tu gsungs/ /khyad par rang gis sngon byas dge ba la/ /rloms sems bral bas dga' ba cher bskyed na/ /sngon byas dge ba gong du 'phel lo zhes/ /rgyal bas gsungs pa'i don de bsgrub phyir dang/ /dgos pa gzhan yang mang du mthong bas na/ /sems khyod dga' ba 'di ltar bskyed na legs/ /zhes gsungs shing/ khyad par du rang cag gis byang chub sems dpa' rnams kyi dge rtsa la rjes su yi rang bgyis na skad cig de nyid la bsod nams tshad gzung mi nus pa 'thob ste/ rgyal ba'i yum las/ stong gsum gyi stong chen po'i 'jig rten gyi khams ni srang tshad kyis gzhal bar nus kyis/ /theg pa la dang por zhugs pa dang spyad pa spyod pa dang phyir mi ldog pa'i byang chub sems dpa' rnams kyi dge ba'i rtsa ba de dag la rjes su yi rang ba'i mod las skyes pa'i bsod nams ni tshad gzung bar mi nus so/ /zhes dang/ sdud pa las kyang/ mi ldog byang chub mchog la rab tu zhugs pa yi/ /sems bskyed @346b pa la bsam pa thag pas yi rang ba/ /stong gsum ri rab srang la gzhal bas tshad gzung rung/ /rjes su yi rang dge ba de ni de lta min/ /zhes gsungs so/ /gzhan yang rgyal po gsal rgyal gyis bcom ldan 'das 'khor bcas gdug tshod du spyan drangs pa na/ dbul po des pas gsal rgyal gyi dge rtsa la rjes su yi rang che cher sgoms pas rgyal po las kyang dbul po des pa dge ba che bar gyur te bcom ldan 'das kyis yon bshad mdzad pa na'ng/ dbul po des pa'i ming nas smos te mdzad pa ltar/ gsal rgyal gyi rloms sems dang bcas pa'i dge ba las/ des pas rloms sems med pas bsam pa thag pa nas yi rang gi dga' ba che bar gyur pa'i gnad kyis bsod nams che ba 'thob/ dga' ba'i bsam pa mnyam na bsod nams mnyam pa dang/ chung na bsod nams chung ngu 'thob te/ gser phreng las/ rjes su yi rang ba yid la byed pas ni yi rang sgom pa po rang dang/ dge ba sgrub pa po gzhan gyis bsod nams bya ba mnyam pa nyid 'thob ste/ phrag dog zad pa'i sgo nas gzhan gyi byas pa la/ rang gis byas pa ltar gyi dga' ba sgom pas so/ /de yang blo mnyam na mnyam po dang/ mi mnyam na yang de ltar 'thob ces 'chad do/ /zhes gsungs pa dang/ yang phrag dog med pa'i yi rang byas pa na byed pa po dang mtshungs par 'thob pa'i dge ba de nyid bsngo ba la btags sam snyam mo/ /zhes gsungs shing blo mnyam mi mnyam gyi don ni rgyud tshod mtho dman mnyam mi mnyam la yang 'chad do/ /de yang phyag 'tshal mchod 'bul gnyis ni/ kun dang thun mong ba'i chos yin pas khyim pas kyang 'jug la/ bshags sdom ni theg pa dman pa dang thun mong ba'i chos yin pas 'jig rten rang dga' bas 'jug dka'/ rang gzhan gyi dge rtsa mtha' dag gcig tu bsdus nas de la rjes su yi rang ba sogs yan lag bzhi ni theg pa chen po'i chos yin pas nyan rang rnams kyis kyang 'jug dka' zhing/ yan lag bdun po 'di snga ma snga ma las phyi ma rnams phan yon che bas skye dka' yang 'bad pas sgrub @347a @#/ /dgos/ de yang rang gi dge ba rnams la chog 'dzin dang rloms sems med par dga' ba'i yid bde skyed par bya zhing des khengs pa dang/ nga rgyal sogs dgyis na dge ba bcom pas ma bsrung par 'gyur te/ bslab btus kyi dge ba bsrung pa'i skabs las/ rang don smin byed sred spangs pas/ /dge ba zhes sogs/ lhag par du dam pa gong ma rnams kyi mdzad pa la yi rang gis sgrub 'dod dang/ rang dang mnyam pa dang dman pa rnams la lhag par snying brtse bas de dag gi dge ru byas pa mthong thos dran gsum ci byung yang 'gran sems dang phrag dog med par yid tshim pa'i dga' ba bskyed par bya ste/ dper na bus bde legs sgrub pa pha'i yid la babs pa ltar 'di dag gi don bdag gis sgrub par dam bcas shing sgrub dgos pa la sems can rang ngos nas dge ba la brtson pa shin tu legs snyam du yang yang blo sbyang bar bya'o/ /de yang mda' 'phen mig la sla zer ba'i dpe ltar/ 'di dag thos pa dang gzhan gyis byed pa mthong na sla sla ltar snang yang rang la bkar na skye dka' bar snang ngo/ /yan lag lnga pa chos 'khor bskor bar bskul ba ni/ gang rnams phyogs bcu'i zhes sogs tshig bcad gcig ste/ phyogs bcu'i zhing du byang chub tu rnam par sangs rgyas te chags thogs med pa'i mkhyen pa brnyes nas ring du ma lon pa rnams la rang lus kyang de snyed du sprul nas chos ston par bskul ma gdab po/ /'dir 'jig rten sgron ma zhes pa ni/ sku'i 'od zer gyis snod kyi 'jig rten gyi mun pa sel ba dang/ gsung gi 'od zer gyis sems can gyi mi shes pa'i mun nag sel ba ste/ mdor na snod bcud kyi 'jig rten gnyis ka la snang ba bskyed par mdzad pas sangs rgyas kyi mdzad pa bcu gnyis la sogs pa rnams la ni/ 'jig rten gyi sgron ma zhes bya'o/ /yang na 'jig rten gang zag dang chos la bdag tu lta ba'i mun pa stug po rnam par bsal bar mdzad pas/ de skad ces bya'o zhes slob dpon ye shes sdes gsung zhing/ mdo las kyang nyi ma'i 'od zer dag gis padmo kha 'byed ltar/ / @348b gsung gi 'od zer dag gis 'jig rten gsal bar mdzad/ /ston pa shAkya thub pa sgron me thugs rje can/ /zhes gsungs pa ltar ro/ /byang chub ni spang rtogs phun sum tshogs pa dang/ rim par sangs rgyas zhes pa la slob dpon ye shes sdes/ byang chub rnam par sangs ces bton nas bshad pa mdzad do zhes lam rim las gsungs shing/ de yang sa bcu dag las rnam par sangs rgyas pa ni/ byang chub tu mngon par rdzogs par sangs rgyas zhes pa ste/ don du dang po byang chub mchog tu thugs bskyed pa nas rgyal sras kyi spyod pa ma nyams par rim par bslabs nas sangs rgyas te/ mya ngan las 'das tshul ma bstan par mdzad pa mang po rim gyis mdzad nas byang chub kyi gter chen po brnyes shing/ de lta bu'i gter brnyes kyang/ so so skye bo ltar de la chags zhen mi mnga' bas ma chags brnyes zhes bshad do/ /gang la bskul ba'i yul sangs rgyas kyang 'das pa dang/ da ltar byon pa kha cig la ni gzhan gyis gsol ba btab zin pa'i dbang du byas nas 'dir sangs rgyas nas ring du ma lon pa rnams la zhes lam rim las gsungs shing/ bskul yul ma lus par bya ba'i phyir tshigs bcad kyi dpur gang rnams zhes smos so/ /gzhung bshad pa skabs su babs pa na de ltar yin zhing/ 'dir dmigs pa bya ba na sangs rgyas kyi zhing khams tshad med pa na sangs rgyas dpag tu med pa 'khor gyi dbus na bzhugs pa mngon sum dang 'dra bar dmigs nas lhag par dang ba'i yid ngor rang lus kyang de snyed du sprul zhing/ zhing khams thams cad du phyin nas sangs rgyas re re'i mdun du dbus btsugs thal sbyar gyi gus pa'i spyod lam brten nas bdag nyid kyang nyan sogs bya ba'i phyir dang/ gzhan la yang tshul des phan gdags pa'i phyir du chos ston par gsol ba gdab pa'am/ yang na rgyal ba thams cad rang gi mdun gyi tshogs zhing du bzhugs pa la rang nyid kyang tshangs pa gdong bzhi pa lag na gser gyi 'khor lo rtsibs stong dang ldan pa thogs pa dpag med du sprul nas sngon byung ston pa'i rnam @349a @#/ /thar ltar chos 'khor bskor bar bskul bas zhal gyis bzhes shing bden bzhi'i chos 'khor sogs rim gyis gsung bar mos pa bya/ de yang gang bskor ba'i chos 'khor ni/ mdzod las/ chos kyi 'khor lo mthong ba'i lam/ /myur bar 'gro sogs zhes bye smra rnams mthong lam kho na chos 'khor du 'dod pa dang/ yang rtsibs sogs phyir zhes/ btsun pa dbyangs sgrogs ni 'phags lam yan lag brgyad nyid chos 'khor du 'dod de/ de dag ni sgrub byed phyogs re ba la 'khrul bas rgya chung bar 'gyur zhing/ don du ston pa'i lung rtogs kyi chos thams cad chos 'khor du 'dod par bya ste/ dper na 'khor lo gcig nas gcig tu 'pho zhing 'gro ba ltar/ ston pas kun shes kau di Nya dang/ nges de'i gdul bya sogs gcig nas gcig tu brgyud de kun shes pa'i chos nyid dang mthun par bskor zhing chos kyi rang bzhin yin pas na lung rtogs gnyis la chos kyi 'khor lo zhes bya'o/ /zhes gser phreng las gsungs shing/ bla na med pa zhes pa ni 'dra ba'am gong na gzhan med pa'i don yang yin mod/ de dang cha mthun bar/ dgongs 'grel las/ bcom ldan 'das kyis chos kyi 'khor lo bskor ba 'di ni bla na ma mchis pa/ skabs ma mchis pa/ nges pa'i don lags te/ rtsod pa'i gzhi'i gnas su gyur pa ma lags so/ /zhes 'khor lo tha ma nges don du ston pa'i skabs ji ltar gsungs pa ltar ro/ /zhes bdag gi mkhan rin po che khri chen rdo rje 'chang gis bka' stsal to/ /bskor ba zhes pa ni gtso bo lung gi chos la byas te bshad pa'i ming do/ /bskul ba ni de ltar gsol ba btab pa'i don no/ /de yang nyan pa po'i sems la yang dag pa'i don go bar byas pa'o/ /des na lung gi chos gcig nas gcig tu brgyud pa las lam gyi rtogs pa thams cad kyang gdul bya'i rgyud la rim gyis 'jug pa'i phyir chos 'khor bskor bar bskul ba ni rang gzhan gyi phan bde sgrub pa'i thabs mchog ste/ byang sems kyi sbyor ba nyi shu'i nang tshan gzhan don gyi sbyor ba'i lag len du yang 'gro ste/ @350b gser 'phreng las/ skye bo la phan bde'i phyir du chos 'khor bskor zhing bskul ba'i gzhan don gyi sbyor ba ni bdag kyang chos kyi 'khor lo bskor la/ gzhan yang chos kyi 'khor lo bskor ba la yang dag par bskul lo/ /zhes gsungs so/ /yang sangs rgyas thams cad mkhyen cing thugs rje che bas bskul ci dgos zhe na/ rang gi phan bde sgrub pa la sangs rgyas las kyang chos btsan pa dang/ sangs rgyas kyis kyang gzhan don dngos mdzad pa la chos ston pa las thabs gzhan med pas chos la lhag par gus shing rag lus par go bar bya ba'i phyir nges par bskul dgos so/ /bskul ba po yang sngon byung la/ bcom ldan 'das kyis bdud rtsi'i chos brnyes nas re zhig gzhan la chos mi ston pa ltar bzhugs nas skabs su babs pa na tshangs pas bskul ma byas na snyam du 'jig rten pa'i thugs mngon du mdzad nas mdzod spu'i 'od zer gyis bskul bas de ma thag tshangs pa gtsug phud can gyis gsol ba btab pas bden bzhi'i chos 'khor sogs bskor ba ltar/ tshangs pas bskul dgos pa ni de'i tshe skye bo thams cad kyis tshangs pa la tshad mar byed pas tshangs pas bskul na skye bo kun kyang yid ches nas ngo mtshar chen pos chos la 'jug pa'i ched yin zhing de bzhin du chos mi gsung ba ltar bzhugs pa yang chos la dkon pa'i 'du shes kyis gus par bya ba dang/ yang yang bskul bas bsod nams rgya chen po spel ba dang/ chos rtogs dka' zhing gzhan gyis don ma rtogs na chos gsungs pa dgos pa med cing dka' dka' ltar mdzad pa ste/ rgya cher rol pa las/ 'jig rten kun la snying rje mtha' yas nga/ /gzhan gyis gsol ba btab la nga mi sdod/ /skye bo 'di dag tshangs la dad pa ste/ /de yis gsol ba btang la 'khor lo bskor/ /gal te tshangs pas nga yis rkang par gtugs/ /rnam pa bzang po 'tshal 'gyur sems can mchis/ /rdul bral gya nom chos shod gsol btab na/ /de ltas nga yi chos 'di bzung 'os 'gyur/ /zhes dang/ dge 'dun grub pa'i@351a @#/ /gsung mdzad bcu las kyang/ 'jig rten chos la gus pa bskyed pa dang/ /yang yang bskul rnams dge ba spel ba dang/ /chos kyang shin tu rtogs par dka' ba'i phyir/ /dam chos gsung ba re zhig btang snyoms mdzad/ /ces dang/ bskul ba'i dgos pa yang de'i tshe yul ma ga d+ha'i mi rnams sdig pa'i lta ba can dang/ chos ma dag pa dri ma dang bcas par smra ba rnams sel ba'i slad du ste/ rgya rol las/ ma ga d+ha ni sngon chos ma dag pa/ /dri ma bcas par sems pa'i smra ba byung/ /de slang thub pa bdud rtsi'i sgo dbye gsol/ /dri med sangs rgyas chos ni nyan cing mchis/ /zhes gsungs shing/ bskor yul gyi gdul bya yang/ de bzhin gshegs pas sangs rgyas kyi spyan gyis thams cad dang ldan pa'i 'jig rten la gzigs pa na sems can rnams ni phung po gsum du rnam par gnas pa dag gzigs nas 'di snyam du dgongs te ngas chos bstan kyang rung ma bstan kyang rung ste/ gang log pa nyid du nges pa'i phung po 'di ni chos 'di shes par mi 'gyur ro/ /de bzhin du gang yang dag par nyid du nges pa'i phung po 'di ni chos 'dis shes par 'gyur ro/ /ma nges pa'i phung po gang yin pa 'di ni gal te chos ston pa na shes par 'gyur la/ ji ste chos ma bstan na ni shes par mi 'gyur ro snyam du dgongs nas/ ma nges pa'i phung po rnam par gnas pa'i sems can rnams la chos ston par thugs bskyed de tshangs pas bskul ba dngos su zhal gyis bzhes pa ni/ ji skad du rgya rol las/ tshangs pa ma ga d+ha yi sems can gang/ /rna ba lhan zhing dad dang ldan gyur la/ /mi 'tshe 'du shes rtag tu chos nyan pas/ /de dag la ni bdud rtsi'i sgo dbye'o/ /zhes gsungs shing bskor ba'i gnas kyang byang chub shing drung gi lha chos sred dang/ chos 'dod dang/ chos kyi blo gros dang/ chos spyod pa dang bzhis/ gnas gang du chos 'khor bskor bar mdzad ces gsol ba dang/ de bzhin gshegs pas grong khyer wa ra nA sir drang srong lhung ba ri dwags kyi @352b gnas su'o zhes bska' stsal pa dang/ de dag gis slar yang wa ra nA si'i yul gyi skyon dang/ grong khyer chen po gzhan gyi yon tan brjod nas/ gzhan zhig tu chos kyi 'khor lo bskor bar gsol kyang/ de bzhin gshegs pas ni wa ra nA si'i gnas der rang gi chos sbyin rgya cher mdzad pa dang/ sangs rgyas mang por bsnyen bkur ba dang/ sngon gyi drang srong rnams kyi bsti gnas yin pa dang/ lha klu rnams kyis mngon par bstod cing chos ston par gsol ba'i gnas yin pa dang/ sngon sangs rgyas rnams kyis kyang chos 'khor bskor ba'i gnas yin pa dang/ zhi lhag khyad par can mngon du gyur pa sogs legs tshogs kyi rten 'brel tshang ba'i gnas der rtse gcig tu dgongs par mdzad de/ rgya rol las/ der ni nga yis chos sbyin stong phrag bye ba khrag khrig drug cu byas/ der ni sangs rgyas stong phrag bye ba khrag khrig drug cu de dag mchod/ /wa ra nA si dam pa de ni sngon gyi drang srong rnams kyis gnas/ sa steng lha dang klu yis mngon bstod rtag tu chos ni mngon na gsol/ /ngas ni sngon chad sangs rgyas bye ba stong phrag dgu bcu rtsa gcig dran/ de dag drang srong zhes bya gnas mchog der ni 'khor lo dam pa bskor/ /zhi zhing nyer zhi bsam gtan mngon gyur rtag tu ri dwags rnams kyis brten/ /de phyir drang srong zhes bya nags mchog der ni 'khor lo dam pa bskor/ /zhes dang/ bstod pa bdud dpung phye 'thag las/ /gang du nyid kyis mchod sbyin grangs med par/ /sangs rgyas bye ba khrag khrig bsnyen bkur zhing/ /sngon gyi sangs rgyas rnams kyis brten pa'i gnas/ /wa ra nA si zhes bya'i gnas der byon/ /zhes gsungs pa ltar ro/ /mdor na 'di dag sngon gyi byung ba lo rgyus tsam du mi gzung bar chos ston pa po ni chos 'khor bskor ba'i bdag rkyen rnam mkhyen dang ldan pa dang/ gang bskor ba'i chos kyang bden pa'i rnam pa can/ gdul byas thos bsam sgom gsum gyis nyams su blangs na gdul bya mi bslu bar byed pa dang/ de yang brgyud pa ma chad cing ma nyams pa/ @353a @#/ /ma gus pa la ni chos kyis kyang mi phan pas/ gus par bya ba'i phyir slob dpon gyis kyang ma bskul bar mi 'chad cing slob mas kyang ngo chen pos nan gyis bskul bar bya ba dang/ bskul nas chos bstan pa'i dgos pa yang rang gzhan gyi ma rtogs pa dang/ log par rtog pa dang/ the tshom gyi dri ma dang bcas pa sel ba'i yang dag pa'i shes rab bskyed par bya ba'i phyir dang/ gdul bya yang chos bstan pa na don shes par 'gyur zhing shes nas chos dang chos smra ba la mtho mtshams par mi 'gyur ba lnga sde lta bu dang/ chos ston pa'i gnas kyang dben pa'i sa phyogs wa ra nA si ltar dam pa mang pos dngos su byon nas chos sgrogs pa'i gnas su byin gyis rlabs pa sogs chos kyi thog ma nyan bshad lam du 'gro ba'i rten 'brel gyi gnad 'di rnams la go ba chags par byas nas skabs 'dir dmigs par 'os pa rnams gong du bshad pa ltar nyin re bzhin gsal btab na rang cag spong rgyu chos la byas pas skye ba kun tu chos kyis phongs pa rnams legs tshogs kyi rtsa ba theg pa chen po'i dge ba'i bshes gnyen gyis chos kyi sgo nas mnyes bzhin du rjes su 'dzin pa'i rgyu'i gtso bor 'gyur zhing/ thun mtshams sogs gang spyir yang legs par ma brtag na mi tshe chos kyis bskyal ba yin snyam yang 'khor ba spyi dang bye brag khad nye ba ngan song rgyu 'bras kyi 'jigs pas bskul ba'i phyogs su yang med par tshe 'dir gzhan las mgo gang mtho dang goms gang mgyogs kyi ched du thos bsam sgom gsum dang bshad sgrub ci byas kyang chos la rtsed mo dang/ ma gus pa chen por 'gro ste ma gus pa yin zer nas lag pas brdeg pa dang/ rkang pas 'phul ba ga la dgos de'i phyir nyan bshad sogs gnad du ma song ba'i skabs su/ sha ra ba'i zhal nas/ rang cag chos la rtsed mo cir yang byed pa 'dug ste/ chos dang chos smra ba la ma gus pa shes rab 'chal pa'i rgyu yin zhes dang/ lam rim che chung las @354b de ni gdams pa chen por snang ste/ 'di la nges pa ma rnyed cing blo sna ma 'gyur bas/ chos zab la rgya che ba ji tsam bshad kyang lha bdud du babs pa ltar gyur nas chos de nyid nyon mongs pa'i grogs su 'gro ba ches mang bar snang ngo/ /zhes gsungs shing des na phyis rabs kyi don du ston pa thugs rje can gyi mdzad pa de rnams rang re'i lag len du go nas slob dpon gyis chos 'chad pa'i dus dang/ rang gis nyan sogs kyis 'jug pa'i dus thams cad du dang gus chen po bskyed pa gal che'o/ /de ltar chos 'khor bskor bar bskul ba ni rang gzhan kyi don dang/ /'bras bu dang phan yon chen por 'gyur te/ rgya rol las/ khyed kyis chos bshad par bskul ba dge ba'i rtsa ba yang don chen po dang/ 'bras bu chen po dang phan yon chen por 'gyur ro zhes gsungs so/ /drug pa mya ngan las mi 'da' bar gsol ba 'debs pa'i yan lag ni/ mya ngan 'da' ston zhes sogs tshig bcad gcig te/ yang dag par na sangs rgyas mya ngan las mi 'da' mod kyi/ gzugs sku mi snang ba'i tshul gyis mya ngan las 'da' bar bstan pas 'dul 'os pa la phyogs bcu'i zhing du mya ngan las 'da' ba'i tshul ston par bzhed pa ste dgongs pa rnams la 'gro ba kun la phugs su phan pa rgyu dge ba dang/ gnas skabs su bde ba mngon mtho dang/ yun du bde ba nges legs bskyed pa'i phyir du zhing khams kyi rdul phra rab kyi grangs dang mnyam pa'i bskal par mya ngan mi 'da' par bzhugs par rang lus dpag tu med par byas te sangs rgyas re re'i spyan sngar pus btsugs thal sbyar gyis gsol ba gdab po/ /de yang dmigs pa bya ba na gong du bshad pa ltar/ rang lus dpag med du mos dor sprul te zhing khams thams cad du phyin nas rgyal ba sku gshegs par bzhed pa rnams la tsog pur thal mo sbyar te rang gzhan mtha' dag bde dges phongs zhing sdug bsngal gyis nyam thag pa'i 'gro ba'i ro gnas gcig tu nges pa ston pa sangs rgyas las gzhan med pa la de yang sku mi snang zhing gsung ma thos par ma gyur na ci ma rung snyam du @355a @#/ /kha zhe mtshungs pa'i gdung shugs drag po'i tshul gyis chos 'khor bskor phyir bskal brgyar mi g.yo bar bzhugs su gsol zhes gsol ba gdab pas zhal gyis bzhes nas chos ston pa sogs mdzad pas sku dngos kyi gdul byar gyur pa'i mos pa bya ba'am/ de ltar blo la mi gsal na mdun gyi tshogs zhing du bzhugs pa'i bla ma dang rgyal ba sras bcas rnams la rang gi snying kha nas sna tshogs rdo rje'i gdan dang bcas pa'i seng khri mang po spros te re re bzhin phul nas bskal brgyar mya ngan las mi 'da' bar gsol ba btab pas zhal gyis bzhes par bsams/ de ltar mos pa dang dngos su yang chos smra ba la chos kyi stan khri phul na phan yon 'di ltar 'thob te/ rgya rol las/ chos smra ba la chos kyi stan 'ding na stan bting ma thag tu de stan brgyad 'thob par shes par bya ste/ brgyad gang zhe na 'di lta ste/ tshong dpon gyi stan 'thob pa dang/ khyim bdag gi stan 'thob pa dang/ 'khor los bsgyur ba'i stan 'thob pa dang/ brgya byin gyi stan 'thob pa dang/ dbang sgyur gyi stan 'thob pa dang/ tshangs pa'i stan 'thob pa dang/ byang chub kyi snying po mchog dam par song pa'i byang chub sems dpar gyur par phyir mi ldog pa/ bdud phyir rgol ba bcom pa'i seng ge'i khri 'thob pa dang/ bla na med pa yang dag par rdzogs pa'i byang chub mngon par rdzogs par sangs rgyas nas kyang bla na med pa'i chos kyi 'khor lo bskor ba'i khri stan 'thob par shes par bya ste/ stan brgyad po de dag thob par shes par bya'o/ /zhes gsungs so/ /sangs rgyas rnams mya ngan las 'da' ba'i tshul ston par bzhed pa mang/ dper na 'o skol gyi ston pas tshe dang ldan pa kun dga' bo la gang rdzu 'phrul gyi rkang pa bzhi la bsten bsgoms mang du byas pa de 'dod na bskal pa'am bskal pa las lhag gi bar du yang 'dug go /de bzhin gshegs pas kyang rdzu 'phrul gyi rkang pa bzhi la bsten bsgoms mang du mdzad pas de bzhin gshegs pa bzhed na bskal pa'am bskal @356b pa las lhag gi bar du yang bzhugs so zhes lan gsum gyis gsol ba 'debs shig par bskul bar mdzad pa de lta bu rnams yin zhing de dag la gtso bor dmigs nas tshur bskul ba'i dus de las ma yol bar gsol ba 'debs dgos shing/ gsol 'debs kyi tshig ni phung po gsum pa dang/ bsam pa yongs rdzogs kyi bsngo ba'i mdo las gsungs so/ /gzhan yang sangs rgyas rnams chos kyi sku las ma g.yos bar dag pa'i gdul bya la ye shes de nyid longs skur bstan cing don mdzad/ longs sku de nyid kyis dag ma dag gi gdul bya sna tshogs pa'i don mnyam pa nyid du mdzad pa'i phyir du 'dzam gling bye ba phrag brgyar mchog gi sprul sku bye ba phrag brgyar sprul nas mdzad pa bcu gnyis kyis gdul bya sna tshogs pa'i don 'khor ba ji srid gnas kyi bar du mdzad pa yin te/ rgyud bla ma las/ thugs rje chen pos 'jig rten mkhyen/ /zhes pa nas/ srid pa ji srid gnas par ston zhes pa'i bar gsung zhing/ de'i phyir rang don chos sku rgyun mi 'chad pa'i gnad kyis gzhan don gzugs sku gnyis kyang rgyun mi 'chad pas/ dper na bdag cag gi ston pas zhing 'dir gdul bya thun mong ba'i snang ngor mya ngan las 'das pa'i tshul ston pa dang dus mnyam du zhing gzhan du sku bltams pa sogs mdzad pa thams cad ston pas na sku dang mdzad pa rgyun mi 'chad pa'i phyir/ don du sangs rgyas mya ngan las 'da' ba dang chos nub pa sogs mi srid kyang gdul bya 'ga' zhig la sku dngos kyi don du mi 'gyur bar mya ngan las 'das tshul bstan pas don du 'gyur ba dang/ gdul byas chos spong gi las stobs chen gsog pa la nye ba na las de mi 'byung bar byed pa'i ched du sangs rgyas kyi mya ngan las 'da' tshul dang chos kyang nub tshul ston pa yin te/ gser 'od las/ sangs rgyas mya ngan yongs mi 'da'/ /chos kyang nub par mi 'gyur te/ /gdul bya rnams ni 'dul ba'i phyir/ /yongs su mya ngan 'das pa ston zhes dang/ mdo myang 'das las kyang/ da ni bskal pa 'das pa nas zhi ba chen po'i phung po dang/ /khams dang skye mched @357a @#/ /med pa la zhugs te srid pa yongs su bcad nas rin po che rdo rje'i gter lta bu rtag pa dang/ bde ba dang/ bdag dang/ yongs su dag pa 'thob kyang/ ngas 'dir bsam gyis mi khyab pa'i thabs bstan pa'i phyir 'jig rten gyi chos dang mthun par mya ngan las 'da' bar bstan te/ de yang so so'i skye bo dag lus glog lta bur shes par bya zhing bcags pa'i sems bskyed pa'i phyir ro/ /'khor ba'i 'od pa 'babs pa ni shin tu drag cing myur la/ 'du byed rnams ni 'khor bar 'khor ro/ /chos nyid kyis de bzhin te de bzhin gshegs pa mya ngan las 'da' ba ni shin tu zab la bsam gyis mi khyab pas de ni sangs rgyas dang byang chub sems dpa' rnams kyi spyod yul yin gyi nyan thos dang rang sangs rgyas rnams kyis shes pa ma yin no/ /zhes gsungs so/ /spyir sprul sku la bzo bo sprul sku/ skye ba sprul sku/ byang chub chen po mchog gi sprul pa'i sku dang gsum yod cing/ dang po gnyis kyis gdul bya gang 'dul kyi mdzad pa sna tshogs ston/ mchog gi sprul skus ni gdul bya lam la khrid pa'i chos ston pa'i mdzad pa gtso bor mdzad cing gdul bya khrid tshul yang thog mar chos kyi sdom bzhi bstan nas sems can rnams srid pa gsum la skyo ba bskyed nas myang 'das la 'dun par mdzad pa dang/ theg dman du bzhugs pa rnams la/ dam chos pad dkar sogs las/ chos kyi de nyid yongs su dag pa'i gtam mthar thug pa gcig tu sgrub pa'i tshul bstan nas zhi brkyangs pas chog 'dzin bzlog ste theg chen du smin par byed pa dang/ de yang byang chub mchog tu lung bstan mdzad pa yin te/ mgon po byams pas/ mi rtag sdug bsngal bdag med dang/ /zhi ba'i dgra yis thabs mkhyen pas/ /sems can srid gsum skyo skyes nas/ /mya ngan 'das la rab 'jug mdzad/ /zhi ba'i lam la rab zhugs pa/ /mya ngan 'das thob 'du shes can/ /dam chos padma dkar la sogs/ /chos kyi de nyid bstan pa yin/ /de @358b dag sngar 'dzin las bzlog ste/ /thabs dang shes rab yongs bzung bas/ /theg pa mchog la smin mdzad de/ /byang chub mchog tu lung bstan no/ /zhes gsungs pa ltar ro/ /'di'i tshigs bcad dang pos skyes bu chung 'bring dang thun mong ba'i lam la khrid tshul bstan nas zhi ba'i lam la rab zhugs pa man chad kyis skyes bu chen po'i lam gyis khrid tshul bstan pas/ mdor na chos 'khor bskor ba'i don bsdus na yang da lta'i skyes bu gsum gyi lam gyi rim par ma tshang ba med par 'du bar gzhung 'dis bstan pa yin te/ 'di ni rje btsun byams pa mgon po'i man ngag mchog tu gyur pa'o/ /zhes lcang skya'i grub mtha' las gsungs so/ /de ltar chos 'khor bskor ba'i mthar sku gzhan du bsgyur ba'i mya ngan las 'da' tshul ston pa ni sprul sku'i khyad chos te/ sprul sku'i skad dod ni ra ma Na ka ya zhes pa nges par 'gyur ba la 'jug cing/ mya ngan 'da' ston gyi sprul sku 'di ni gdul bya ma lus pa rnam par grol bar byed pa'i thabs chen po zhig ste/ mdo sde rgyan las/ bzo dang skye dang byang chub che/ /mya ngan 'das pa rtag ston pas/ /sangs rgyas sprul pa'i sku 'di ni/ /rnam par grol ba'i thabs chen no/ /zhes gsungs so/ /de ltar na bla ma dang sangs rgyas rnams kyis mya ngan las 'da' tshul ston pa yang gdul bya'i don chen po zhig yin 'dug pas de tshun chad kyis bdag cag la don mdzad pas so snyam du bka' drin dran par yang bya zhing mya ngan las 'da' tshul ston mi ston dang/ chos gsung mi gsung sogs rang cag gdul bya la rag las par go nas bdag legs su 'dod pa rnams kyis rang gzhan gyi bde ba thams cad ni sngon song gi dge ba'i rtog pa zhig la rag las/ rtog pa de yang lung la rag las shing/ lung gi chos de thog mar 'byung ba'i gnas dang/ bar du mi nyams par gnas pa'i rten gcig pu ni bla ma sangs rgyas nyag gcig yin par shes par byas nas de la gces spras su byed pa'i blos da lta sangs rgyas kyi rgyal tshab bla ma tshad ldan rnams kyi sku la brten cing thugs @359a @#/ /dang bka' khyad du mi gsod par sgrub pas nyams su len pa don gyi zhabs brtan dang/ tha snyad la'ang zhabs brtan g pa'i la g brtan bzhugs 'bul ba sogs la rgyun du brtson na rang gi tshe sgrub kyi mchog tu 'gyur zhing sangs rgyas 'byung ba mnyes par mi bgyid pa'i las kyi sgrib pa dang/ bla ma'i thugs dkrugs pa'i las ngan sbyong ba la mthu phul du phyin par 'gyur bar gsungs so/ /bdun pa bsngo ba'i yan lag ni/ phyag 'tshal ba dang zhes pa'i tshigs bcad gcig ste/ gong gi yan lag drug gi dge bas tshon nas dge rtsa thams cad sems can thams cad dang 'bras bu thun mong du byas te rdzogs pa'i byang chub kyi rgyur 'dun pa drag pos bsngos pas nam yang mi 'dzad pa'o/ /de yang gal te dge rtsa rnams ma bsngos na de 'thob nas zad par 'gyur ro/ /'bras bu dman pa nyan thos dang rang sangs rgyas su bsngos na ni phung po lhag ma med pa'i mya ngan las 'das pa'i dbyings su zad par 'gyur ro/ /'o na ji ltar bsngo zhe na bla na med pa'i byang chub chen por bsngo ste/ des ni nam sangs rgyas su ma gyur gyi bar du yang mi'i bde skyid sogs zhor la 'thob cing/ sangs rgyas nas mi gnas pa'i mya ngan las 'das pa la bzhugs te/ mthar thug pa med par sems can gyi don lhun gyis grub par mdzad nas/ bsod nams kyi 'bras bu nam yang zad par mi 'gyur ro zhes slob dpon ye shes sdes gsungs shing dge ba cung zad ces pa ni yan lag drug gi dge ba de tsam gyis chog par mi 'dzin pa dang/ des rlom sems su mi byed pa dang/ dge ba gzhan bsdud pa'i mtshon byed tsam du bstan no/ /bdag gis ci bsags pa zhes pa ni yan lag drug po de dag sbyor bas bgyis pa tsam gyis byas pa'i las tsam ma yin par bsam pa thag pa nas brtsams pas bsags pa'i las su bstan no/ /tshig rkang tha mas ni rang gi dge rtsa gzhan thams cad kyang bsdus nas/ bdag dang sems can thams cad dge ba 'dis myur du sangs rgyas @360b par gyur cig ces bsngo zhing smon lam 'debs pa'o/ /de ni dge rtsa thams cad sems can thams cad dang thun mong du byed tshul kyang yin te/ dper na dge ba 'di yis skye bo kun/ /zhes sogs ltar ro/ /de ltar bsngos pas nam yang mi 'dzad pa'o zhes gsungs pa ni dge ba de'i nus pa nam yang mi zad pa ste rdzogs byang du bsngos pas de ma thob par lha mi'i lus dang longs spyod sogs 'thob nas 'bras bu mi zad pa ni bsngo ba rang gi nus pa dang/ rdzogs byang 'thob nas kyang mi zad pa ni 'bras bu de nyid kyi mthu yin zhing/ mi zad pa'i 'bras bu mchog de thob pa yang dge ba gang byed kyi sngon du byang chub kyi sems dang dge ba rang dus su mi dmigs pa'i tshul dang/ mjug tu thabs shes de gnyis kyis rdzogs byang du bsngo ba bcas gsum tshang ba'i lam shes kyi nyams len la rag las so/ /de ltar na dud 'gro la zan 'chang gcig sbyin pa lta bu dge ba chung ngu zhig yin yang rdzogs byang du ma bsngos na 'bras bu dman pa tsam bskyed nas myur du zad par 'gyur ba la de rgyal sras kyi bsngo smon rlabs po ches kha bsgyur na 'bras bu phul du phyin pa rdzogs byang 'thob cing/ de ma thob pa'i bar du yang 'bras bu bzang po rim gyis bskyed cing 'phel bas nam yang zad par mi 'gyur ba'i thabs mkhas kyi 'phrul chen po dang ldan pa'i phyir/ dge ba ci byas rdzogs byang du bsngo ba la shin tu brtson par bya ste/ bde mchog smon lam las/ dge ba cung zad tsam yang rgyal sras kyi/ âŒ/thabs mkhas smon lam mchog gis zin gyur na/ /'bras bu dman pa'ang phul du 'byung 'gyur zhing/ /myur du 'dzad pa'ang nam yang mi zad bar/ /gsung phyir dus gsum dge ba ci bsags pa/ /rlabs chen smon lam rnams kyis bsgyur ba la/ /mkhas pa su zhig rab tu brtson mi byed/ /de phyir thabs mkhas de ni 'dir bya'o/ /zhes gsungs so/ /dge sdig gang yang zad pa'i don ni rang rang gi 'bras bu bskyed pa'i nus pa zad pa la byed ro/ rang dus skad cig gnyis pa tsam ni 'dus byas spyi'i mtshan nyid yin zhing gnyen po la yang@361a @#/ /mi ltos la/ /nus pa zad pa'ang 'bras bu bskyed zin nas zad pa dang/ ma bskyed par rang rang gi gnyen pos bcom nas zad pa gnyis yod cing/ byang chub kyi sems kyis zin pa dang/ rdzogs byang du bsngos pa'i dge ba ni rang gi 'bras bu bskyed nas kyang mi zad par gzhung dang man ngag thams cad nas mthun par gsungs shing/ dge ba de rang gi gnyen po khong khro dang log lta lta bus kyang bcom mi nus pa ni bla ma rnams kyi man ngag las 'byung ngo/ /yang dge rtsa rnams bsngo smon gyis rdzogs byang sogs kyis rgyur bsgyur ba'i don ni/ dper na rgyan cha gang yang bzo 'os pa'i gser zhig /gser mgar mkhas pas bdag po'i 'dod pa dang bstun nas rna rgyan sogs su bsgyur ba ltar 'bras bu gang bskyed ma nges pa'i dge ba rnams bsngo bas rdzogs byang sogs su nges par byas pa la bsgyur ba zhes bya ste/ gser phreng las/ rgyur bsgyur ba'i dpe ni gser mgar gyis gser spram skyes bu'i rna rgyan sogs su bsgyur ba bzhin du'o zhes gsung zhing/ dkon brtsegs las/ chos rnams thams cad rkyen bzhin te/ /'dun pa'i rtsal rab tu gnas/ /gang gis smon lam ci btab pa/ /de 'drar 'bras bu 'thob par 'gyur/ /zhes gsungs so/ /de ltar phan yon bla na ma mchis pa bsngo ba'i rgyal po rdzogs byang du bsngo ba mtshan nyid tshang ba zhig 'byung ba la 'di drug shes par bya ste/ dang po gang du bsngo na bla med rdzogs byang du bsngo ste sher phyin gyi mdo las dge ba'i rtsa ba thams cad kyang rnam pa thams cad mkhyen pa nyid ma gtogs pa nyan thos dang rang sangs rgyas kyi sar yongs su bsngor mi 'jug pa'o zhes gsungs pa ltar ro/ /gnyis pa gang gi ched du bsngo na sems can gyi don du ste/ spyod 'jug las/ dngos sam yang na brgyud kyang rung/ /sems can don las gzhan mi spyad/ /sems can kho na'i don gyi phyir/ /thams cad byang chub phyir bsngo'o zhes pa ltar ro/ /gsum pa dgos pa gang gi don du bsngo na dge ba nam yang mi zad pa'i @362b don du ste/ blo gros rgya mtshos zhus pa las/ ji ltar chu thigs rgya mtsho che nang lhung/ /rgya mtsho ma skams bar du nge mi 'dzad/ /de bzhin byang chub yongs bsngos dge ba yang/ /byang chub ma thob bar du de mi 'dzad ces pa ltar ro/ /bzhi pa rnam pa gang gis bsngo na/ /bsngo ba'i 'khor gsum la bden par ma zhen pa'i shes rab dang/ sems can la lam ma nor bar ston pa'i rgyu snying rje ste thabs shes khyad par can zung 'brel du 'jug pa'i rnam pas so/ /lnga pa dngos po gang bsngo na spyir/ 'gro kun dge ba ji snyed yod pa dang/ /byas dang byed 'gyur de bzhin byed pa dag /bzang po ji bzhin de 'dra'i sa dag la/ /kun nas kun kyang bzang po red gyur cig /ces pa dang/ khyad par du skabs su gang babs pa'i dge ba rnams te mdor na dge ba thams cad do/ /drug pa bsngo ba'i ngo bo ni/ mdo sde rgyan las/ brtan pa rnams kyi smon lam ni/ /sems pa 'dun dang bcas pa ste/ /zhes pa ltar/ dge rtsa byang chub tu bsgyur bar byed pa'i sems dpa' dang/ mi zad par 'dod pa'i 'dun pa rnams ci rigs pa'o/ /des na dge ba gang yang mi zad pa'i don du thabs shes zung 'brel gyis gzhan don du rdzogs byang kho nar bsngo bar byas na de dag gi don 'dus so/ /bsngo ba'i byed las ni/ dge ba mi zad par byed pa dang 'bras bu dman pa phul du phyin par byed pa dang/ theg dman dang byis pa'i dge ba thams cad zil gyis mnon par byed pa dang/ mdor na rang gzhan gyi don rab tu sgrub par byed pa ste/ rgyan las/ rang bzhin don rab sgrub par byed/ /ces gsungs so/ /gang bsngo rgyu'i dge ba'i skabs su rang gzhan gyi 'jig rten las 'das ma 'das kyi dge ba thams cad bsngo bar mdo las gsungs shing/ 'di'i don 'chad pa na/ gser phreng las/ 'on kyang mdo las 'di dag dang por blos gcig tu bsdom zhing/ de nas rjes su yi rang bar byas nas/ de'i dge ba bsngo bar gsungs pas gzhan gyi dge rtsa bsngo bar gsungs pa'i don ni phrag dog med pa'i yi rang byas pa na byed pa po dang mtshungs par 'thob pa'i dge ba de nyid @363a @#/ /bsngo ba la brtags sam snyam mo zhes gsungs pa la dpags na gzhan gyi dge ba la rang gis yi rang nas rdzogs byang du bsngos na phan yon thob kyi/ don du de tsam gyi rdzogs byang gi rgyur bsgyur mi nus pa 'dra ba zhig 'dug pa la blo ldan rnams kyis rtog dpyod mdzad par zhu/ bsngo smon gnyis la ngo bo'i sgo nas khyad par cher med kyang 'dod bya'i 'bras bu don gnyer gyi 'dun pas khyad par du byas pa smon lam dang/ rgyu'i dge ba rnams 'bras bu de'i rgyur 'gyur ba'i 'dun pas khyad par du byas pa bsngo ba'o zhes spyod 'jug dar TIkka las gsungs pas/ bsngo ba la smon lam gyis khyab cing/ bsngo bya'i rdzas dge ba la 'di yis zhes pa lta bu dang ma 'brel ba'i smon lam rnams ni bsngo ba ma yin no/ /gzhan yang yan lag lnga sa la gtugs pa'i phyag 'tshal ba lta bu'i tshe dge rtsa'i khyad par rnams gzhan don du gtong ba'i bsngo ba 'di ltar bya ste/ phung po gsum pa las/ byang chub sems dpa' 'das pa dang ma 'ongs pa dang/ da ltar byung ba'i sangs rgyas rnams kyi chos mnyam pa nyid la 'jug cing yan lag lnga sa la gtugs par bya ste/ pus mo g.yas pa sa la 'dzugs pa'i tshe/ sems can thams cad g.yas phyogs kyi lam la gnas par gyur cig /ces brjod do/ /g.yon pa 'dzugs pa'i tshe sems can su dag g.yon phyogs kyi lam la gnas pa de thams cad 'phags pa'i lam la gnas shing yang dag pa'i lam la gnas par gyur cig /ces so/ /lag pa g.yas pa 'dzugs pa'i tshe ji ltar sangs rgyas byang chub kyi snying po mchog dam par bzhugs pa dge ba'i chos thams cad dang ldan pas/ dbu dang sku skyil mo krung la bzhugs te phyag g.yas pa sa la bsnun nas bdud dpung dang bcas pa btul zhing byang chub brnyes pa ltar sems can 'di dag gis kyang bdud phyir rgol ba choms par gyur cig /byang chub kyi snying po la 'dug cing sa la bsnun te sangs rgyas kyi ye shes thob par gyur cig /lag pa g.yon pa 'dzugs pa'i tshe sems can su dag byis pa'i @364b chos la gnas te g.yon phyogs su 'dzin pa/ gdul dka' ba de thams cad bsdu ba'i dngos po bzhis shin tu bsdud par gyur cig /gdong pa dang dpral ba sa la gtug pa'i tshe sems can thams cad nga rgyal ma mchis pas bla ma rnams la rim gro bgyid cing spyi gtsug ltar mi mthong ba dang/ dge ba'i chos thams cad kyis 'phags par gyur cig /de ltar bdag yan lag lngas phyag 'tshal ba 'dis/ sems can thams cad sgrib pa lnga sel bar gyur cig /dbang po lnga yongs su rdzogs par gyur cig /mig lnga yongs su dag par gyur cig /mngon par shes pa nyams pa med pa lnga thob par gyur cig /sems can 'gro lngar skyes pa rnams 'gro ba lnga las kyang khyad par 'phags pa dang/ tshul khrims khyad par du 'phags pa dang/ ting nge 'dzin khyad par du 'phags pa dang/ shes rab khyad par du 'phags pa dang/ rnam par grol ba khyad par du 'phags pa dang/ rnam par grol ba'i ye shes mthong ba khyad par du 'phags par gyur cig /ces gsungs pa ltar bya zhing/ de ni btang bsrung dag spel bzhi'i nang nas dge rtsa gtong ba yang yin no/ /de yang rang cag rnams thog med nas da bar rang don phal pa la gces 'dzin gyi sred pa drag po rgyun mi chad pas dam du bcings te ci byas thams cad rang gi bde thabs su byed pa ltar gzhan don la 'dris pa'i sems dpa' chen po rnams kyi dbang po drug gi spyod yul thams cad thugs rgyud rnam par dag pas gzhan don kho nar 'dun pa'i bsngo smon gyi khyad par mtha' yas pa rnams rdo rje rgyal mtshan gyi bsngo ba'i le'u dang/ phung po gsum pa dang/ spyod yul yongs su dag pa'i mdo sogs byang chub sems dpa'i sde snod las 'byung ba rnams kyi gnad bsdud pa bslab btus dang spyod 'jug smon lam sogs las gsungs pa ltar la blo bcos ma tshun chod kyis 'bad par bya zhing/ khyad par du bsngo ba'i rgyal po bzang po spyod pa la rdzogs byang don gnyer gyi mos pa dang ldan pas lan cig tsam dad pa skyes na yang bsod nams khyad par du 'phags pa mtha' dag yongs su @365a @#/ /bsdud par 'gyur te/ bzang spyod las/ gang yang phyogs bcu'i zhing rnams mtha' yas pa/ /rin chen brgyan te rgyal ba rnams la phul/ /lha dang mi yi bde ba mchog rnams kyang/ /zhing gi rdul rnyed bskal bar phul ba bas/ /gang gis bsngo ba'i rgyal po 'di thos nas/ /byang chub mchog gi rjes su rab mos shing/ /lan cig tsam yang dad ba skyes pa ni/ /bsod nams dam pa'i mchog tu 'di 'gyur ro/ /zhes gsungs shing/ de ltar bsod nams yongs su bsdus pa dang ngan song dang grogs ngan spangs te de bzhin gshegs pa mthong ba dang/ rnyed pa legs par rnyed cing byang chub sems dpa' dang skal mnyam 'thob pa dang/ las sgrib yongs su byang bar 'gyur ba dang bzhi ni/ tshe 'di'i mthong chos kyi phan yon dang/ tshe rabs phyi ma rnams su yang ye shes dang/ gzugs dang/ mtshan dang/ rigs dang/ kha dog phun sum tshogs pa dang ldan par 'gyur zhing/ bdud dang mu stegs kyis mi thub pa dang/ 'gro kun gyi mchod gnas su 'gyur ba bcas rgyus bsdus pa dang/ myur du byang chub kyi shing drung du 'dug ste bdud sde btul nas sangs rgyas te chos 'khor bskor ba sogs 'bras bus bsdus pa'i phan yon bla na ma mchis pa 'byung bas bzang spyod smon lam 'di'i don yid la bya zhing/ tshig tsam gton pa sogs la yang bsod nams mtha' yas pa thob par gsungs so/ /phan yon de rnams ji bzhin 'byung ba la byang chub mchog gi sgrub thabs smon lam 'di la sogs pa'i rgyal ba'i bka' la the tshom med pas las 'bras la yid ches pa sogs tshul khrims rnam par dag pa kho na gal che ste/ byang chub mchog la som nyi ma byed cig ces pa dang/ mdo las/ tshul khrims dang ldan pa'i smon lam grub po zhes gsungs so/ /de ltar 'bras bu rdzogs byang 'thob pa la gal che ba rgyu'i dus na rgyal sras rnams kyi smon lam chen po 'bum phrag grangs med pa bcu la sogs pa ganggA'i klung lta bu yod pa rnams rgyal ba'i dam chos 'dzin pa'i smon lam @366b gyi nang du 'du ste/ smon lam rgya mtsho lta bu rnams kyi bzhed don rang gzhan gyi don gnyis mtha' dag ni lung rtogs kyis bsdus pa'i rgyal ba'i dam chos kho na rag las pa'i phyir te/ rje bla ma thams cad mkhyen pa'i gsung las/ bstan pa kho na lhar bcas 'gro ba yi/ /bde legs kun gyi rtsa bar yid ches nas/ /lus srog yal bar gyur yang mi gtong ba'i/ /snying stobs chen pos dam chos 'dzin gyur cig /zhes gsungs pa dang/ yum dgongs 'grel dang bcas pa las kyang/ mos pa sgom lam gyi skabs su gzhung lam 'bras bu sher phyin gsum rang don dang gzhan den dang/ gnyis ka'i don gyi 'byung gnas su yid ches pa'i dad 'dun bsgom par gsungs pa dang/ bsdud pa las kyang/ rgyal bas brgya byin dri ba yongs dris lan gsol ba/ /gal te gangA'i bye snyed sangs rgyas zhing gyur la/ /de kun rgyal ba'i ring srel byur bur gtam gyur kyang/ /bdag ni shes rab pha rol phyin pa 'di nyid len/ /ci slad ce na sku gdung mi gus bdag ma lags/ /'on kyang shes rab yongs su bsgos pas mchod par bgyid/ ces dang/ mngon rtogs rgyan las/ mos pa rang gi don dang ni/ /rang gzhan don dang gzhan don dang/ / rnam gsum shes bya zhes gsungs so/ /de'i phyir lha mo dpal phreng gis zhus pa'i mdo las/ bcom ldan 'das byang chub sems dpa'i smon lam ganggA'i klung gi bye ma snyed gang lags pa de dag thams cad kyang/ 'di ltar dam pa'i chos yongs su bzung ba'i smon lam chen mo gcig gi khongs su chud de/ bcom ldan 'das rgyal po gsal rgyal gyi bu ma dam pa'i chos yongs su 'dzin pa ni de ltar yul chen po lags so/ /zhes gsungs shing/ de lta bu'i smon lam 'debs tshul yang/ mdo de nyid las/ smon lam chen po gsum gdabs te/ tshe rabs thams cad du dam pa'i chos rtogs pa 'thob par gyur cig /de thob nas kyang skyo ba dang dub pa med par gzhan la chos ston par gyur cig /bstan pa de yang lus dang srog la mi blta bar chos bsrung zhang yongs su 'dzin par gyur cig /ces gsungs shing/ smon @367a @#/ /lam 'di'i khongs su rgyal sras kyi smon lam gzhan thams cad 'du ba ni/ dper na gzugs sna tshogs pa thams cad ni nam mkha'i khongs su 'dus pa dang 'dra bar gsungs/ de ltar 'du bas yul che'o zhes gsungs pa'i don ni rgya che ba ste smon lam de'i phan yon dang bcas pa ni blo rang ga ba'i yul min par rgyas par sangs rgyas kyis bshad kyang mi rdzogs pa'i don no/ /chos gzung ba'i don du yan lag gsum po lus dang srog dang/ longs spyod gtong zhing/ lus gtong bas ni sangs rgyas kyi sku rtag par yon tan bsam gyis mi khyab pa thob bo/ /srog gtong bas ni chos rtag pa yon tan dpag tu med pa dang ldan pa 'thob bo/ /longs spyod gtong bas ni sems can thams cad kyis mchod pa rtag tu gnas pa yon tan bsam gyis mi khyab pa 'thob bo/ /dper na mi stobs po ches gnad du mi drag par bsnun yang lus la gnod cing/ sems la mi bde ba chen po bskyed do/ /de bzhin du dam chos 'dzin pa chung dus kyang bdud sdig can gyi lus la gnod cing/ sems la mya ngan bskyed de dag tu smre sngags 'don par byed par 'gyur ro/ /tshul 'dis bdud la gnod pa lta bu bdud la gnod byed gzhan med do/ /ba lang khyu mchog gi chu zhing gis ba lang thams cad zil gyis gnon pa ltar/ theg pa chen po'i chos 'dzin pa chung dus kyang nyan thos dang rang rgyal gyi dge ba'i chos thams cad zil gyis gnon to/ /ri rab che zhing mtho bas ri nag po thams cad zil gyis gnon pa ltar/ theg pa chen po pa lus srog la mi blta ba bdag dang bdag gir bzung ba med pa'i sems kyis dam chos 'dzin pa'i dge bas kyang theg chen la gsar du zhugs pa lus srog la blta ba dang bcas pa rnams kyis dge ba'i chos thams cad kyang zil gyis gnon na gzhan lta ci smos/ gzhan yang dper na 'jig rten 'chags pa'i dus kyi sprin chen po ni kha dog mtha' yas pa rin po che mtha' yas pa'i chu rgyun dang ldan pa ltar dam chos 'dzin pa'ang @368b tshogs gnyis kyi rin po che'i rgyun dpag med dang ldan no/ /dper na 'jig rten chags pa'i chu'i phung po rlung gis bsrubs pa las ni gling dang gling phran kha dog dang dbyibs sna tshogs can bye ba phrag mang po 'byung ba ltar/ dam pa'i chos 'dzin pa theg pa chen po'i 'byung khungs las kyang byang chub sems dpa'i rnam 'phrul thams cad dang/ chos snang ba'i sgo sna tshogs dang/ 'jig rten las 'das ma 'das kyi phun tshogs sngon ma myong ba thams cad 'byung ngo/ /sa chen po ni khur chen po bzhi'i rten yin te/ chu dang ri dang rtsi shing lo tog dang sems can thams cad kyi rten no/ /dam chos 'dzin pa yang/ lha dang mi dang nyan thos dang/ rang rgyal dang theg pa chen po'i phun tshogs bzhi la sbyor bas khur ches che ba 'khyer ba'o/ /yangs pa chen po 'dis rin po che rin thang med pa dang/ rin thang che ba dang/ chung ba dang/ de bas kyang chung ba bzhi'i 'byung khungs yin pa ltar dam chos 'dzin pa 'di'ang theg pa bzhi po de'i phun tshogs thams cad kyi 'byung gnas so/ /gzhan yang 'phags pa blo gros rgya mtshos zhus pa'i mdo las kyang/ de bzhin gshegs pa'i dam pa'i chos 'dzin pa/ /rgyal ba rnams kyis yongs su gzung bar 'gyur/ /lha dang klu dang mi 'am ci rnams dang/ /bsod nams ye shes kyis ni yongs bzung 'gyur/ /zhes sogs gsungs shing/ ma dros pas zhus pa las kyang/ chos smra ba theg pa chen po la zhugs pa bsrung zhing 'dzin pa ni chos 'dzin pa nyid de/ chos smra ba bzung bas chos bzung ba'o/ /chos 'dzin pa ni rnam pa bcu ste zhes sogs mtha' yas par gsung zhing/ 'di dag gi skabs kyi dam chos 'dzin pa ni theg pa chen po nyid la bya ste/ theg pa gzhan dang dge ba'i chos thams cad theg pa chen po la brten pas so/ /de yang chos theg pa chen po'i chos yin pas mi chog gang zag theg pa chen por tshud pa zhig dgos gsung pa dang/ yul spros bral yin pas mi chog blos spros bral du rtogs pa dgos gsung ba ltar/ rang cag rnams kyang thabs shes khyad par can bskyed nas theg pa chen po'i dam pa'i chos 'dzin pa la @369a @#/ /mos pa rgya che ba dang/ spobs pa mi zad par bskyed pa'i phyir gong gsal gyi mdo lung rnams drangs na tshig mang bar 'gyur bas don gyi cha rnams cung zad bsdus te brjod pa'o/ /sngon gyi bdag nyid chen po rnams kyi dam chos 'dzin pa'i smon lam phyag len du thebs par mdzad pa ni/ dper na rang cag gi rje bla ma'i rtogs brjod las kun kyang bstan pa rgyas pa'i ched du bsngos/ /zhes dang/ rgyal sras smon lam gang gA'i klung rnams ni/ /dam chos 'dzin pa'i smon lam nang 'dus par/ /gsung phyir dge rtsa ji snyed bsags pa ni/ /kun kyang thub bstan rgyas pa'i ched du bsngos/ /zhes gsungs pa ltar ro/ /spyir dam chos 'dzin tshul yang/ /chos rgyal rnams kyis/ chos min gyi phyogs tshar bcad nas chos phyogs tshul bzhin du skyong ba lta bu dbang gis stobs kyis 'dzin pa dang/ phyogs glang chos grags lta bus rigs pa'i sgo nas chos min go ba can rnams pham par byas te rgyal bstan dar bar mdzad pa lta bu rigs pa'i sgo nas 'dzin pas so/ /'di gnyis ni thabs gzhan gyis 'dzin pa yin zhing/ ngo bo'i sgo nas rgyal bstan 'dzin tshul ni rgyal ba'i bstan pa la thos bsam sgom gsum byed pa dang/ 'chad nyan byed pa sogs chos spyod bcu'i nyams len mtha' yas kyang/ /bsdu na bstan pa ji bzhin du smra ba dang ji bzhin du sgrub pa gnyis su 'du ste/ mdzod las/ ston pa'i dam chos rnam gnyis te/ /lung dang rtogs pa'i bdag nyid do/ /de 'dzin byed pa smra byed cing/ /sgrub par byed pa kho na'o/ /zhes gsungs so/ /de yang phyogs re tsam 'dzin pa rnams mang zhing/ mdo sngags kyis bsdus pa'i lung rtogs gnyis ka yongs su rdzogs par 'dzin tshul ni 'phags yul du mgon po klu sgrub yab sras dang/ gangs can 'dir rje bla ma yab sras kyis 'dzin tshul las ma 'das so/ /des na rang cag rnams kyi bya ba ngan pa thams cad zil gyis mnan te/ rgyal ba'i bstan pa la zhugs nas thos bsam sgom gsum gyis @370b bsgrub pa dang/ 'chang rtsod rtsom gsum gyis smra ba la brtson par byed pa ni mi lus 'thob pa las su bya ba gcig pu yin zhing/ 'gro ba'i sdug bsngal sel ba'i sman dang bde ba thams cad kyi 'byung gnas su bsams nas dge ba ci byas bstan pa rgyas pa'i phyir du bsngo bar bya zhing/ 'bras bu rdzogs byang dang rgyu dam chos 'dzin pa sogs kyang bla ma'i bka' drin kho na la rag las pas rang gzhan mtha' dag gnas skabs kun du theg pa chen po'i dge ba'i bshes gnyen gyi rjes su 'dzin pa'i bsngo smon yang rgyun du bya ste/ rje bla mas/ ston pa bla na med pa'i bstan pa dang/ /mjal ba 'di 'dra bla ma'i drin yin pas/ /dge ba 'di yang 'gro ba ma lus pa/ /bshes gnyen dam pas 'dzin pa'i rgyur bsngo'o/ /zhes gsungs pa ltar ro/ /de ltar dge ba rdzogs byang du bsngo ba sogs bsngo ba khyad par can rnams ni 'bras bu khyad par can med par blta ba'i log lta dang/ yod kyang rgyu la rag ma las par rgyu med du blta ba'i log lta dang/ rgyu la rag las kyang 'bras bu rgyu dang mi mthun pa/ blta ba'i log lta kun gyi gnyen por 'gro ste log lta can la bsngo ba 'byung ba'i gnas med pas so/ /log lta ni dge ba dang mi dge ba'i rgyu 'bras dang/ tshe snga ma nas 'dir 'ong ba dang/ 'di nas phyi mar 'gro ba sogs kyi byed pa dang/ dgra bcom pa sogs yod pa'i dngos po gang rung la dmigs nas med ces skur pa 'debs pa'am/ sgrub pa'i rnam pa can gyi log par rtog pa'i shes rab nyon mongs can no/ /byed las ni blang bya dang dor bya skyes zin pa la log par bsgrub pa dang/ dor bya dang blang bya 'byung 'gyur la phyin ci log 'dren par byed pa'o/ /zhes dang/ yang log lta ni phal cher skur 'debs dang/ dbang phyug 'gro ba'i rgyur 'dzin pa sogs sgro 'dogs pa'i rnam pa can yang yod do zhes kun btus dar TIka las gsungs shing/ de ltar na log lta ni sngar rgyu 'bras la yid ches pa'i dad pa sogs dge ba'i rtsa ba gcod cing phyis blang dor go log tu byed pas sdig pa'i rtsa ba ste/ 'o skol 'gro ba rnams shi ba na mi@371a @#/ /shi ba ltar gyur nas slar skye ba dag ga na 'ong snyam du bsams nas tshe 'di'i 'dod pa la ci thob byed pa ste/ mu stegs pa'i gtam las/ mdzes ma legs par gsos la zhim por zo/ /shi nas de yi spyod yul min/ /slar skye bdag ga la yod/ / me shi thal ba rlung khyer 'dra/ /mang thos de dag gang smra ba/ /de dag spyang ki'i rjes dang 'dra/ /zhes tshe phyi ma ni yod zer ba de brdzun yin zer ba ltar gyur na nyes dmigs che ste/ bshes spring las/ gal te mtho ris thar pa mngon bzhed na/ /yang dag lta la goms pa nyid du mdzad gang zag log par lta bas dge spyad kyang/ /thams cad rnam par smin pa mi bzad ldan/ /zhes dang/ skyes rabs las kyang/ med par lta ba tshe rab phyi ma la/ /gnas pa de ni mun nag rlung grang ldang/ /des ni rus pa'ang 'jig pa'i nad slong na/ /bdag la phan 'dod su zhig de ru 'jug /zhes dang/ kha cig me yi nang na lus 'bar zhing/ /rab tu tsha ba'i sdug bsngal yun ring myong/ /me 'bar nang na lcags bsregs 'dra 'gyur yang/ /rang gi las kyis bral par lhag mi 'gyur/ /zhes sogs tsha grang gi sdug bsngal mtha' yas pa myong bar gsungs pas/ bdag la phan 'dod rnams lta ngan can de 'dra la 'jug pa lta zhog sbyin gnas su yang mi bya ste/ skyes rabs las/ 'di la'ang re zhig nor ni 'byor par 'dod pa yis/ /bdag ni ngan pa dag la nor ni yongs mi gtong/ /brkam dang mi mkhas le lo can la'ang nor mi gtong/ / de dag la ni btang na de nyid zad pa'i mtha'/ /zhes gsungs so/ /des na mir gyur kyang rgyu 'bras sogs la rtog dpyod med pa'i 'jig rten rgan po'i lugs dang/ rtog dpyod yod kyang mdzod las/ med dang dman la mchog lta dang/ /rgyu min lam min der lta ba/ /zhes pa ltar/ slob dpon ngan pa dang phrad pa dang/ bstan bcos phal pa la chags pa dang/ rang gis bsams nyes pa sogs kyis las 'bras dang skye ba snga phyi med par lta ba dang/ yod par lta ba la yang lta ba dman pa la mchog tu 'dzin pa dang/ thar pa'i rgyu dang lam min pa la de dang @372b der lta ba sogs rang gzhan kun la 'byung nye zhing/ /lta ngan skyes na rang gzhan phung tshab che bas blo gros can rnams kyis ni/ rnam 'grel las/ skye ba yongs su len pa na/ /'byung rdub dbang po blo dag ni/ /rang gi rigs la ltos med can/ /lus nyid 'ba' zhig las skye min/ /zhes sogs dang/ goms las 'dod chags sogs gsal ba/ /zhes pa nas/ thams cad kun tshe skye bar 'gyur/ /zhes pa'i par sogs rigs lam phra mo la brten nas blo sbyangs na log rtog khegs pa tsam du ma zad/ rtog pa don mthun skye bas de ltar gal che zhing/ gzhan yang byis pa rnams bcas ma thag nas nu zho 'thung ba sogs srid pa'i spyod lam ngan pa rnams ma bslab par yang shes shing/ kha ton sogs chos spyod rnams bslab kyang mi shes pa ni tshe rabs gzhan la goms pa dang ma goms pa'i khyad par gyis yin pas tshe snga phyi yod nges snyam du bsams par bya ste/ /skyas rabs las/ blo yis mthu stobs gsal ba med pa dang/ /dbang po rnams kyang blun pa'i rang bzhin can/ /btsas ma thag tu sus kyang ma bstan par/ /nu zho 'thung bar rtsol bar byed pa dang/ /kha zas za bar rtsol ba byed pa yang/ /srid pa gzhan la goms par byas par mngon/ /de dang de yi las la bslab legs na/ /goms par byas pas mkhas par 'gyur bar 'grub/ /zhes gsungs so/ /de ltar blos lcogs na spros bshad rnams kyis nges pa drangs shing/ ma mtha'ang tshig bshad tsam nges par byas la ji snyed su dag ma nas phyir bsngo'o zhes pa'i bar 'don bzhin du yid gzhan du ma yengs par dal bus ji skad bstan pa bzhin du yang yang byas na rang rgyud rnam par dag pas bsod nams kyi phung po dpag med 'dzin to/ /bsag sbyang gi gnad bsdu lugs la/ gnyis su bsdu na yan lag gzhan drug tshogs gsog dang/ bshags pa ni sgrib sbyong yin la/ /gsum du bsdu na bsag sbyang gnyis dang spel zhing mi zad par byed pa'i bsngo ba dang gsum mo/ /bzhir bsdu na bsag sbyang gnyis dang yi rang gi phyogs gcig @373a @#/ /rang gi dge ba byas pa la dga' ba bsgoms pas rang gi dge ba spel ba dang/ bsag sbyang spel ba'i dge ba rnams spel zhing mi zad par byed pa'i bsngo ba dang bzhi'o/ don du de dag ni byang chub 'grub pa'i rgyu tshogs yin pas tshogs gcig tu 'du ste/ tshogs kyi skad dod samb+har zhes 'byung la/ sam ni yang dag par 'grub pa/ b+ha ni ngo bo/ ra ni 'dzin pa ste/ mdor na byang chen yang dag par 'grub par byed pa'i ngo bo yin pas so/ /zhes gser phreng las gsungs shing/ de bzhin du gnas lugs mthong ba'i ye shes gsal bar byed pas sgrib sbyong yang yin no/ /'on kyang chos sku'i lag rjes gtso bor 'jog pas stong nyid sgom pa sogs bshags pa ni ye shes kyi tshogs dang/ yan lag gzhan drug gis gtso bor gzugs sku'i lag rjes 'jog pas bsod nams kyi tshogs zhes bya ste/ rin chen phreng ba las/ sangs rgyas rnams kyi gzugs sku 'dir/ /bsod nams tshogs las byung ba ste/ /chos kyi sku de mdor bsdu na/ /rgyal po ye shes tshogs las byung/ /zhes gsungs pa ltar ro/ /de ltar yan lag bdun po ni bsag sbyang gi mchog tu gyur pas sangs rgyas sgrub pa'i rgyu'i gtso bo ste/ de'i phyir rgyal ba sras bcas kun gyi phyag len du bstar ba ni/ 'phags pa dkon brtsegs kyi byams pas zhus pa'i mdo las/ dper na/ 'phags pa kun dga' bos bcom ldan 'das la zhus pa/ 'o na bcom ldan 'das kyis ni/ bskal pa grangs med pa gsum la sogs par dka' ba'i spyod pa dpag tu med pa mdzad nas bzod mngon par rdzogs par sangs rgyas la/ 'phags pa byams pa 'dis dka' las ci yang ma byas par/ theg pa bde ba/ 'jug pa bde ba/ lam bde bas bla na med pa yang dag par rdzogs pa'i byang chub tu sangs rgyas pa'i rgyu gang lags/ zhes zhus pas/ bcom ldan 'das kyi zhal nas kun dga' bo/ 'di la byang chub sems dpa' sems dpa' chen po byams pas sngon byang chub sems dpa'i spyad pa spyod pa'i tshe/ nyin lan gsum/ mtshan lan gsum du @374b bla gos phrag pa gcig tu gzar nas thal mo sbyar te sangs rgyas thams cad mngon sum du byas nas tshig 'di skad ces smras so gsungs nas/ sangs rgyas kun la phyag 'tshal lo/ /drang srong lha mig ldan pa yi/ /byang chub sems dpa' rnams dang yang/ /nyan thos rnams la phyag 'tshal lo/ /zhes pa nas/ sa bcu spo la rab tu gnas/ /zhes pa'i bar bka' stsal nas/ 'phags pa byams pa/ theg pa bde ba dang 'jug pa bde ba dang/ lam bde bas bla na med par yang dag par rdzogs pa'i byang chub yang dag par bsgrub pa'i thabs la mkhas pa ni de yin no/ /zhes gsungs pa dang/ gzhan yang dge rtsa spel zhing mi zad par byed pa'i gnad kyis bslab btus su bsod nams spel ba'i thad kar/ bzang po spyod pa'i cho ga bzhin/ /phyag 'tshal la sogs gus par bya/ /zhes yan lag bdun pa bshad la/ phung po gsum pa las kyang sdig sgrib sbyong byed stobs bzhi ma tshang ba med par nyams su blangs pa'i men ngag tu yang yan lag bdun pa 'di gsungs shing/ des na rje thams cad mkhyen pas kyang sku tshe 'dir yang gdul bya thun mong pa'i snang dor cho ga 'di'i sgo nas bsag sbyang la ji ltar brtson pa mdzad tshul ni/ gsang ba'i rnam thar las/ yan lag bdun pa'i cho ga mdzad pa'i tshe/ /zhes sogs dang/ rin chen phreng bar yang/ sangs rgyas kyi stobs bcu la sogs pa'i yon tan tshang med pa ni/ /dper na phyogs dang phyogs mtshams kun gyi nam mkha' dang/ /sa chu me rlung tshad med pa de tsam zhig tu brjod par zad cing/ 'bras bu'i yon tan tshad med pa de'i rgyu mtshan du rgyu phyag la sogs pa bsod nams tshad med pa zhig dgos pas/ de'i phyir sangs rgyas kyi sku gzugs sogs/ tshogs zhing khyad par can gyi spyan sngar tshogs kyi ngo bo yan lag bdun par bsdus te bstan pas don gyis yan lag bdun pa'i bsod nams kyi grangs kyang nam mkha' dang/ sa chu me rlung gi rdul phra rabs ji snyed kyi grangs dang mnyam pa thob par 'gyur bas na yan lag bdun pa ni nyin re bzhin dus gsum du bya ste/ ji skad @375a @#/ /du/ rin phreng las/ de yi stobs ni re re yang/ /'gro ba kun bzhin dpag tu med/ /sangs rgyas rnams kyi tshad med nyid/ /phyogs mtshams kun gyi nam mkha' dang/ /sa chu me rlung ji lta ba/ /de tsam zhig tu brjod par bas/ /gal te rgyu ni de tsam du/ / tshad med nyid du ma mthong na/ /sangs rgyas rnams kyi tshad med pa/ /de la yid ches mi 'gyur bas/ /de phyir sku gzugs mchod rten gyi/ /spyan snga'am yang na gzhan du'ang rung/ /tshigs su bcad pa nyi shu 'di/ /nyin gcig cing yang dus gsum brjod/ /ces gsungs so/ /de yang theg pa thun mong pa'i lugs la rtag tu bya ba'i bsag sbyang gi ngo bo rgyud bshags gsum pa la byed pa dang/ de ni dge sbyong rnams kyis mtshan mo gang du 'dug pa na bya bar slob dpon shAkya 'od kyis gsungs shing/ spyir yan lag bdun pa tsam nyan rang la yang yod kyang/ bshad ma thag pa'i bzang spyod kyi cho ga bzhin du byas pa'i yan lag bdun pa ni theg pa chen po'i lugs yin pas/ de la bsam pa phun sum tshogs pa skyabs sems khyad par can dang ldan pa dang/ sbyor ba phun sum tshogs pa dam pa drug ldan dang/ phar phyin drug ldan gyi go cha'i brtson 'grus dang ldan pa dgos pas/ skyabs sems ni gong du bshad pa ltar dang/ dam pa drug ldan tu bya ba ni/ yan lag bdun po gang byed pa'i dus su/ /byang chub kyi sems la brten pas rten dam pa/ gang bya ba'i dngos po spyi bye brag la spyod pas dngos po dam pa/ sems can gyi don du spyod pas ched du bya ba dam pa/ rang bzhin med rtogs kyi shes rab kyis zin pas thabs la mkhas pa dam pa/ rdzogs byang du bsngos pas bsngo ba dam pa/ sgrib pa gnyis dag par byas pas dag pa dam pa ste dam pa drug ldan du bya zhing de ni theg bsdus las gsungs so/ /de dag phar phyin drug ldan du bya ba ni/ phyag sogs yan lag bdun po la rang nyid gnas nas gzhan de la 'god pa sbyin pa/ nyan rang gi yid byed sdoms pa tshul khrims/ theg chen gyi chos la mos shing dka' spyad kyang bzod @376b pa'i bzod pa/ dge ba gong 'phel gyi 'dun pa skyed pa'i brtson 'grus/ byang chub kyi sems rtse gcig pas dge ba bsngo ba'i bsam gtan dang/ 'khor gsum sgyu ma lta bur shes pa'i shes rab ste phyin drug tshang bar byas na shin tu stobs che'o/ /phar phyin drug ldan bya tshul 'di ni brgyad stong 'grel chen gyi dgongs pa lam rim chen mor gsungs pa bzhin bris kyang go bde bar byed na/ dper na phyag 'tshal ba lta bu'i tshe rang gi lus ngag yid gsum 'bul ba dang/ gzhan yang phyag 'tshal la 'god pa dang de'i dge rtsa sems can la gtong ba sogs ni phyag gi sbyin pa dang/ de'i tshe sgo gsum gyi skyon mtha' dag sdoms shing tshul mthun byed pa phyag gi tshul khrims/ de'i tshe phyi nang gi sdug bsngal dang gnod pa bzod pa phyag gi bzod pa dang/ de'i tshe phan yon shes nas dga' spro'i sems kyis byed pa phyag gi brtson 'grus dang/ de'i tshe rnam rtog gzhan gyis yid mi 'phrog par bsgrims te byed pa phyag gi bsam gtan dang/ de'i tshe stong pa rten 'brel sgyu ma lta bu'i rang bzhin shes nas byed pa phyag gi shes rab ste yan lag gzhan drug po rnams la yang de bzhin du rigs 'dre nyams su blang na tshogs bde blag tu rdzogs pa'i gegs sel bogs 'don gyi mchog tu 'gyur ro/ /de ltar yan lag bdun pa bya ba na phar phyin drug ldan du byed pa sogs ni bdag gis mkhas khyer dang spros pa la dga' ba tsam gyis 'dir bkod pa ma yin gyi/ bka' gdams kyi bstan rim khungs ma zhig las man ngag tu gsungs pa bzhin rang gzhan gyi tshogs gsog la nye bar 'kho bar bsams nas bris pa'o/ /gzhan yang rang cag la chos rnam dag mi 'byung ba'i lan 'gag ni tshe rabs kun tu sdig pa byas pa dang/ bsod nams ma byas pa dang/ chos kyi phongs pa'i las byas pa dang/ dge rtsa zad pa dang bzhi la thug cing/ dang po'i gnyen por phyag dang bshags pa/ gnyis pa'i gnyen por mchod pa dang yi rang/ gsum pa'i gnyen por bskul ba dang gsol gdab/ bzhi pa'i gnyen por bsngo ba bcas gsungs la/ des @377a @#/ /na da res chos 'dod pa na yang sngon du de dag gi gnyen po yan lag bdun pa la nan tan byed pa ni gal che'o/ /sbyor chos drug pa/ dmigs pa gsal bar byas nas maNDal phul te gsol ba gdab pa ni/ maNDal zhes pa dkyil 'khor la 'jug cing/ 'dir gling bzhi bye ba phrag brgya 'khor dang bcas pa'i 'jig rten snod bcud kyi dkyil 'khor blo la gsal bar byas nas 'bul ba yin la/ de yang mdo rgyud nas bka' stsal ba'i khungs ni/ maNDal gyi mdo las/ ba yi lci ba chu bcas sbyin pa ste/ /legs par nyug par byed pa tshul khrims so/ /spin dang grog spur bsal ba bzod pa yin/ /bya ba la ni nyer zhugs brtson 'grus te/ /de la skad cig sems ni gcig byed pa/ /bsam gtan shes rab ri mo gsal ba'o/ /zhes dang/ gser 'od las kyang/ gang tshe 'khor los bsgyur ba'i rgyal por gyur/ /de tshe rgya mtshor bcas pa'i sa rnams btang/ /gling bzhi rin chen gang bar byas pa yang/ /sngon gyi rgyal ba dag la ngas phul lo/ /zhes sogs gsungs pa ltar/ bcom ldan 'das rang nyid kyis kyang/ sngon bde bar gshegs pa rnams la maNDal gyi mchod pa mdzad cing/ gsang 'dus rtsa rgyud le'u brgyad pa las kyang/ zhing 'di rin chen sna bdun gyis/ /mkhas pa dag gis yongs bkang la/ /dngos grub 'dod pas sbyin pa'i phyir/ /nyin re shes rab can gyis dbul/ /zhes tshogs gsog la mkhas pa'i skyes bu ngag gis/ bla ma'i man ngag gis phyag rgya chen po'i dngos grub bsgrub par 'dod pa'i shes rab can gyis bsam pas zhing khams tshad med pa 'di rin po che sna bdun gyis yongs su bkang ste nyin re bzhin dus gsum du bla ma rdo rje 'chang la dbul bar gsung zhing/ bstan bcos bla ma la bcu pa las kyang/ mchog tu dad pas dus gsum du/ /dkyil 'khor me tog bcas thal mos/ /zhes bla ma la dus gsum du maNDal me tog gi tshom bu bkod pa dang bcas pa dbul ba sngon du btang nas phyag dang bsnyen bkur @378b sogs bya bar gsungs so/ /dngos su lag bdar nas 'bul ba'i maNDal gyi rgyu yang rang gi mdun gyi sa gzhi la byas kyang chog ste/ slob dpon klu'i dbang phyug gis/ sa gzhi legs dang rgyun la mkhas/ /yan lag mnyen dang yid bzor ldan/ de nyid shes dang tshad dang ldan/ /me tog tshom bu chur ldan pa/ /de bdun ldan pa'i gang zag la/ /dkyil 'khor mkhas zhes ngas bshad do/ /zhes so/ /de la dpags na deng sang maNDal 'bul tshul lta bu la shes na shes rin mi chog pa dang/ byed na byed rin mi chog par byed pa 'di chos mi sgrub pa dang/ bsgrub kyang gnad la mi mkhas pa'i rtags su mngon te/ rgya bod kyi mkhas grub sngon byon rnams kyi dngos grub kyi rtsa ba bla ma mnyes pa'i yan lag tu lus srog longs spyod la ltos pa med par maNDal phul ba'i rnam thar gcig pu la bltas na shes so/ /de yang dper na paN chen na ro pas/ grub chen te lo pa lo bcu gnyis bsten dka' chen mi 'dra ba bcu gnyis spyad pa'i tha ma la lung pa skam po chu med gcig tu khrid nas maNDal 'bul nus pa su 'dug gsungs/ der nA ro pas maNDal 'bul snyam nas chu btsal bas chu ma rnyed nas 'dug pa dang/ lus bdog pa min nam gsungs/ nA ro pa nyid kyis lus la khrag gtar nas mdun gyi sa gzhi la khrag gis chag chag btab/ rna mchog la sogs pa sha kham tshad tsam bcad tshom bur bkod nas maNDal phul ba'i dus su mchil lham phud nas nA ro pa'i smin mtshams su rgyab bas nA ro pa sa la 'gyel ba na/ nam mkha' las sgra grag pa/ bdag dang bdag gi bzhes nyer 'dzin pas/ /byis pa mtha' dag yang yang 'khrul ba'i gzhi/ /bla ma dgyes byed maNDal cho ga yis/ /gang la'ang ltos pa med par bdag 'bul lo/ / zhes sogs byung ste/ brgyal sangs tsa na nA ro pa rang gi rtogs pa ched du brjod pa 'di ltar gsungs te/ sa dang lhun po nyi zla la sogs kyi/ /rang bzhin maNDal maNDal mchog min te/ /lus kyi maNDal bla na med pa yis/ /mchod pa 'di ni dpe dang bral ba'o/ /zhes sogs @379a @#/ /gsungs te/ bde chen ye shes kyi don sogs rgyud sde'i tshig don mtha' dag thugs la gsal lo/ /rgyu gzhan yang sa rdo'am rin po che gang las byas kyang rung ba ni/ slob dpon kaM pa las mdzad pa'i maNDal gyi cho ga las/ sa bzang bye ma lci ba la/ /srog chags la sogs bsal ba la/ /'jim pa legs par grub par bya/ /zhes dang/ rim lnga gdan rdzogs kyi dmar khrid las/ sa'am rin po che la sogs pa'i maNDal zhes gsungs pas rang gi tshogs rdzogs pa'i rgyur bsams nas rang la gang yod kyi 'byor pa dang bstun pa'i rgyu gang bzang gis byed pa dang/ med na sa rdo shing lheb tshun chad kyis kyang maNDal bya rung ngo/ maNDal gyi tshad ni rgyu bzang ngan la ma ltos pa'i che tshad nges pa med cing/ chung tshad khru gang longs pa dgos par gsungs te/ dngos grub rnyed pa'i slob dpon kaM pa la'i maNDal gyi cho ga las/ zheng du khru gang yan chad tshad ces dang/ byang sems dgra las rnam rgyal gyis maNDal gyi cho ga las kyang/ dbyibs ci dga' ba'i maNDal ni/ /sa dag khru gang yan chad bar/ /zhes gsungs pas so/ /'o na kyang maNDal chung ngu phul ba la yang de'i tshod kyi phan yon thob cing/ khru gang yan chad tshad du dgos gsungs pa ni dam pa gong ma rnams bzhin du sku tshe de la rtogs pa khyad par can mngon du gyur pa'i yan lag tu dgos pa yin nam rtog dpyod mdzod/ gang ltar yang maNDal 'bul thengs re la maNDal de'i rgya ji tsam yod pa'i 'og dbang chen gser gyi sa gzhi la thug gi bar rdul phra rab ji snyed yod pa de'i grangs dang mnyam pa'i 'khor los bsgyur ba'i rgyal srid la longs spyod pa'i phan yon 'thob par gsungs pas/ maNDal grangs gsog byed pa dang/ rgyun du 'bul ba sogs kyi tshe rgyu bzang ba las kyang maNDal rgya che ba shin tu gal che'o/ /de la dgongs nas khams gsum chos kyi rgyal po tsong kha pa chen pos kyang/ 'ol kha chos lung du bsag sbyangs gtso bor mdzad skabs rtsa ba shin tu brtan pa'i rdo leb kyi maNDal khru @380b gang las kyang lhag pa phyogs re rer mtho che ba bzhi bzhi tsam yod pa la maNDal du mdzad pa dang/ rje rang nyid zhal bzhugs dus dge ldan gyi tshogs chos gsungs zhig tu sa rdo gtsigs pa'i maNDal sa 'byor ma khru gang las kyang shin tu che ba zhig yod pa de la/ rje'i dngos slob sems dpa' chen po gzhon nu rgyal mchog gi bzo bcos dang gzhal ba legs par mdzad de gser zho brgya tham pa btul nas legs par byugs/ dkra rtsi yang legs par btang bas gser brdung ma 'dra ba'i maNDal shin tu legs pa gcig byung bas/ rje rin po che shin tu dgyes pa lta bu'o/ /dmigs bsal sngon gyi mkhas grub mang pos rang gi bla ma la gser gyi maNDal phul nas zhes rnam thar las 'byung ba lta bu blos bcad kyis rtsa ba nas 'bul ba'i dus su ni rin thang che ba yang gal che'o/ /maNDal gyi dbyibs dang kha dog ni/ zhi ba'i las gtso bor sgrub na dbyibs zlum po dang/ kha dog dkar po/ rgyas pa gru bzhi dang ser po/ dbang la zla gam dang dmar po/ drag po gru gsum dang mthing nag byed pa sogs 'phrin las rnam bzhi'i sgrub tshul dang sbyar nas gsungs pa yod kyang/ rgyun du ci dgar byas pas chog ste/ slob dpon kamapa las/ dbyibs ni gru bzhi lham pa la/ /nang du zlum po bskor bar bya/ /kha dog kun ka sngo yang rung/ /yang na yid dang ci 'thad bya/ /yang na tshad dang kha dog dbyibs/ /'phrin las rnam bzhi'i tshul dang sbyar/ /zhes gsungs/ /rgyal ba yang dgon pa chen po'i ri chos su/ maNDal gyi dbyibs dbus mtho la mtha' dma' ba dgos par gsungs so/ /maNDal phul ba'i phan yon ni/ maNDal la ba byung lnga byugs pas sbyin pa'i phar phyin dang/ ba byung dang dri bzang sogs bsam sbyor gtsang mas legs par khong snyoms su nyug par byed pas tshul khrims kyi phar phyin dang/ maNDal la gnas pa'i srin bu dang grog sbur la sogs pa bsal bas bzod pa'i phar phyin dang/ maNDal gyi bya ba la nye bar zhugs pas brtson 'grus kyi phar phyin dang/ maNDal gyi dmigs pa la sems @381a @#/ /rtse gcig tu gtad pas bsam gtan gyi phar phyin dang/ maNDal gyi tshom bu bkra bar bkod pas shes rab gyi phar phyin 'thob par 'gyur pa dang/ ting nge 'dzin gyi dkyil 'khor gsal bar gyur nas ye shes rang snang las grub pa'i rang bzhin gyi dkyil 'khor mthong bar 'gyur ba dang/ sgrib gnyis byang zhing tshogs gnyis myur du rdzogs par 'gyur ba yin te/ maNDal gyi phan yon gyi mdo las/ ba yi lci ba chur bcas sbyin pa ste/ /zhes pa nas/ bsam gtan shes rab ri mo gsal ba'o/ /zhes pa'i bar gong bzhin gyi mjug tu/ thub pa'i maNDal byas pa yis/ /pha rol phyin pa 'di drug thob/ /ces dang/ grub chen kaM pa la'i maNDal gyi cho ga las/ de ltar phul ba'i phan yon ni/ /pha rol phyin bcu rdzogs ldan zhing/ /sgrib pa gnyis byang tshogs rdzogs te/ /ting 'dzin dkyil 'khor gsal gyur nas/ /rang bzhin dkyil 'khor mthong bar 'gyur/ /zhes so/ /de bzhin du tshe rabs thams cad lha dang mi'i nang du skyes bu dam par skye bar 'gyur ba dang/ lus gser gyi mdog can du 'gyur ba dang/ nad med par 'gyur ba dang/ zla ba ltar gsal zhing mdzes par 'gyur ba dang/ spyir nor dang khyar par gser la sogs pa'i rin po che'i 'byor pa rgya chen po dang ldan pa'i rgyal po'i rigs su skye bar 'gyur ba dang/ phyogs bcu'i sangs rgyas rnams kyis kyang bsngags par 'gyur ba yin te/ maNDal gyi phan yon gyi mdo las/ /gser gyi mdog tu 'gyur ba ste/ /nad rnams kun dang bral bar 'gyur/ /zla ba ltar mdzes gsal ba yis/ /lha dang mi ni dam par skye/ /nor dang gser ni 'byor pa yi/ /rgyal po'i rigs su skye bar 'gyur/ /zhes dang/ bde bar gshegs pa'i pho brang mchog maNDal gang zhig byed pa dang/ /sdig pa thams cad mi byed cing/ /dge ba phun sum tshogs pa dang/ /rang gi sems ni yongs 'dul ba/ /'di dag sangs rgyas rnams kyis bsngags/ /zhes gsungs so/ /gzhan yang maNDal ni rang gang du sangs rgyas pa'i sangs rgyas kyi zhing @382b khams bde 'byor phun sum tshogs pa dang ldan pa'i rgyur dmigs nas 'bul zhing/ phul nas kyang de 'dra'i smon lam btab na sangs rgyas kyi snod kyi zhing sbyongs su yang 'gyur zhes bdag gi mkhan rin po che khri chen rdo rje 'chang dang rje bla ma rin po che gnyis kas bka' stsal zhing/ de ni gser phreng las/ zhing sbyong ba ni rang gi sems sbyong ba yin te/ de yang zhing gi rgyur tshogs bsags nas smon lam 'debs pa'o/ /'di snod kyi zhing la bya ste/ bcud kyi ni sems can smin par byed pa yin pas so/ /zhes gsungs so/ /de'i phyir bde bar gshegs pa'i pho brang mchog /maNDal gang zhig byed pa dang/ /zhes gong du drangs pa dang/ de nyid a b+hya ka ras gzhung lam du drangs pa las/ bde gshegs pho brang dam pa 'dir/ /lus kyi las rnams byas pas ni/ /zhes maNDal bde bar gshegs pa'i pho brang du gsungs pa 'di zhing sbyong gi rgyur dgongs pa yin nam/ lha'i dkyil 'khor la dgongs pa yin pa 'grel bshad mdzad pa ma mthong bas dpyad dka'o/ /de ltar zhing sbyongs su 'gro ba'i ched du 'bul ba'i tshe yang dag zhing du mos nas 'bul ba bla ma 'ga' zhig gsung/ gzhan yang mdo rgyud kyi dgongs pa dang mthun pa'i maNDal la rtag tu brtson na skye bar ngan 'gro'i sgra yang mi grag pa dang/ rtag tu bde skyid dang ldan par 'gyur te/ kha che paN chen gyis/ ji srid snying po byang chub bar/ /de dag nam yang 'dren pa'i mthus/ /ngan 'gro'i sgra yang mi grag cing/ /rtag tu dga' skyid 'tsho bar byed/ /ces gsungs so/ /lhag par tshe 'dir chos gos sogs 'tsho ba'i mthun rkyen dkon pas chos sgrub pa la gnod pa byung na maNDal gyi tshogs gsog la gtso bor bya ste/ de ltar byas pas mi ring bar rmi lam du chu mig gsar pa don pa sogs rmis nas chos mthun gyi 'byor pas phyug par 'gyur ro/ /gzhan yang sgra chen po'i mdo las/ dkon mchog gi rten la maNDal gru bzhi phul bas byang sgra mi snyan gyi bdag po dang/ de bzhin du zlum pos nub/ zla gam gyis shar/ sog khas 'dzam @383a @#/ /gling la dbang ba'i bdag por skye zhing lha rnams su yang skye bar gsungs/ de ltar rang gi bla ma dang sangs rgyas sogs la dmigs te phul phyin 'bul yul mngon sum du med kyang bla ma dang sangs rgyas dngos la phul ba dang khyad med pa'i phan yon rnams 'thob par khang bu brtsegs pa'i mdo las gsungs pa dang/ a b+hya kA ras gzhung lam du lung drangs pa las kyang/ gang zhig bzhugs la mchod pa dang/ /gang zhig mya ngan 'das pa la/ /mnyam pa'i sems kyis rab dad na/ /bsod nams khyad par med pa yin zhes gsungs shing/ de ni mchod pa gzhan la yang rigs 'dre'o/ /de'i phyir jo bo chen pos/ dgun rlung bu shin tu che ba'i dus su phyag dar ser kha shig shig maNDal dang mchod pa 'bul ba la/ a ti sha 'o brgyal/ nged kyis bya yi zhus pas/ 'o na nga lto za ba'ang 'o brgyal byas nas khyed tshos za'am gsungs/ rje rin po ches kyang chos lung du phyag sor gyi rtse mo rnams ser khar song gi bar du maNDal 'bul bar mdzad pa sogs kyis phan yon la yid ches bskyed de/ /dad pa yod nges su byas nas 'byor pa med kyang sla yi/ rdo leb bam sa gzhi khru gang yan chad la byi dor legs par byas te maNDal 'bul ba la yang yang brtson par bya'o/ /maNDal ma phul ba'i nyes dmigs ni/ rdzogs rim gyi rtogs pa brtan po ma 'thob bar du maNDal mi 'bul bar khyad gsod kyis 'jog na mkha' 'gros gsod pa la sogs pa'i nyes dmigs 'byung ste/ grub chen ka pa las mdzad pa'i maNDal gyi cho ga las/ de ltar ma byas nyes dmigs ni/ /rdzogs la brtan pa ma thob bar/ /maNDal 'jog na mkha' 'gros gsod/ /de bas nan tan gus par bya/ /zhes dang/ sngags kyi sdom ldan gyis ni maNDal phul ba tsam gyis mi chog /rang gi rdo rje slob dpon la dmigs nas nyin re bzhin snga dro la sogs pa'i dus gsum du maNDal brjes te ma phul na dus re re la sbom po re 'byung bas nyes dmigs che 'o/ /gzhan yang zhi lhag zung 'brel @384b sogs ting nge 'dzin brtan po rnyed kyang nyin re bzhin maNDal 'bul ba la sogs pa'i theg pa chen po'i tshogs gsog gis rgyab ma skyor na bdud kyis 'khyer nyen che ste/ bka' gdams tshas 'byung las/ stan pas dgan pa ba la nyin gcig thugs dam skyal du byon tsa na maNDal rdul ching de 'dug pa la/ sgom pa dbang phyug rgyal mtshan/ mchod pa mi brje ba tsug yin gsungs pas/ bag re nang du bsams 'tshal bar gda' bas zhus pas/ khyed gcig pu la sgom yod snyam mam/ khyod pas a ti sha sgom bzang ste/ de yang mchod pa 'di dang 'di rnams mdzad pa yin/ de la yid ma ches na mdo sde ltos gsungs/ zhes gsungs pa ltar ro/ /maNDal 'bul tshul ni phul ba'i phan yon dang ma phul ba'i nyes dmigs rnams bsams nas/ rgyu gtsang ba las grub pa'i maNDal tshad khru gang yan chad dang ldan pa dbyibs dang kha dog mdzes pa zhig mdun du bshams/ de la thog mar dag byed kyi rdzas khyad par can ba byung ril bu dang/ bdud rtsi ril bu rgyud gzhung gi dgongs pa dang mthun par sbyar ba la tsan dan la sogs pa'i dri bzang gis chus sbags te legs par byugs pa srab 'thug ba rko tsam byung na rab de min gang lcogs byug par bya/ de'i steng du tshom bur dgod rgyu'i rdzas ni rab rin po che'i rigs dang/ 'bring sman dang dri bzang tha ma 'bru ma rmas pa la byas pas chog cing/ tshom bu'i grangs kyang mtha' gcig tu nges gzung med pas tshom bu rnams gling bzhi ri rab sogs kyi rnam par mos nas 'bul dgos pa'i nges pa yang med do/ sa gzhi legs par bstar ba spos kyis byugs pa der me tog sil ma bkram zhing/ gzhal med kyi pho brang nang na lha mo rnams kyis bstod dbyangs snyan par sgrog pa rin po che du ma'i rgyan dang ldan pa 'od 'bar ba dpag tu yas pas shin tu mdzes pa nam mkha'i rgyan du gyur pa de dag tshogs zhing la 'bul ba spyod 'jug sogs las gsungs pa'i lugs gcig dang/ yang me tog gi tshom bu bkod pa'i steng du paM las padma dang/ a las zla ba'i @385a @#/ /dkyil 'khor de'i steng du b+hruM las gzhal yas khang shin tu mdzes par bskyed de de'i nang du tshogs zhing spyan drangs te gzhal yas khang de nyid dang/ gzhan yang mchod pa'i sprin phung sna tshogs pa gtibs te yan lag bdun pa 'bul ba'i lugs gcig dang/ yang sa gzhi byi dor byas pa la ba byung dang dri bzang gis byug ste de nyid bla ma la sogs pa'i tshogs zhing gi bzhugs gnas su phul te/ de la tshogs gsog yan lag bcu pa byed pa'i lugs gcig dang/ yang tshom bu bkod nas de'i grangs mnyam gyi gling bzhi ri rab la sogs pa gsal btab te 'bul ba'i lugs bzhi yod pa las/ 'dir bzhi pa ltar dka' gdams gsar rnying gi dam pa gong ma rnams kyi phyag len da lta grags che ba 'gro mgon chos rgyal 'phags pas mdzad pa'i tshom bu so bdun ma'i lugs dang/ rgya gzhung tshad ldan gyi dgongs pa rang bzo'i 'khrul skyon dang ma 'dres par bkod pa byin rlabs kyi tshan kha che ba chos kyi rgyal po tsong kha pa chen pos mdzad pa'i tshom bu nyer gsum ma'i lugs gnyis gang rigs kyi rjes su 'brangs nas 'bul ba la/ thog mar so bdun ma'i 'bul tshul shes na nyer gsum ma sogs la yang rigs 'gre sbyor nus pas/ de la dang por gzhan don du rdzogs byang thob 'dod kyi smon pa'i sems dang/ gzhan don du rdzogs byang thob par bya/ de'i phyir du maNDal 'bul lo snyam pa 'jug sems dang/ 'khor sum mi dmigs par snang du rung pa'i sgyu ma lta bu'i sems bskyed/ de nas dri bzang gi chus lag pa g.yas pas maNDal la g.yas skor gyis khyab par byug cing/ de nyid oM bdzra b+hu mi AH hUM/ zhes brjod pas dbang chen gser gyi sa gzhir bsgom/ /de'i skabs su 'og gzhi rlung gi dkyil 'khor rngams su dpag tshad sa ya gcig dang drug 'bum/ rgyar dpag tshad grangs med yod pa gcig gi steng du/ chu dkyil dang dbang chen gser gyi sa dkyil nyis brtsegs su yod pa bye ba phrag brgya dang/ chu dkyil gyi rngams su dpag @386b tshad 'bum phrag bcu gcig dang stong phrag nyi shu yod pa las rlung gis bsrubs pas phyis ni chu rngams su 'bum phrag brgyad dang/ lhag ma dpag tshad sum 'bum nyi khri dag ni gser gyi sa gzhir gyur/ chu dang gser gyi dkyil 'khor gnyis kyi thad kar dpag tshad 'bum phrag bcu gnyis dang sum stong dang phyed dang lnga brgya yod cing khor yug tu ni zheng gi sum 'gyur 'bum phrag sum cu rtsa drug dang/ chig khri brgya phrag phyed dang bzhi yod pa ltar bsam mo/ /gung mdzub kyis dri bzang gi chus maNDal gyi mtha' khor yug tu bskor nas oM bdzra re She AH hUM/ zhes brjod pas gser gyi sa gzhi re re'i mtha' bskor du lcags ri re re dang/ de dag thams cad kyi 'og gzhi rlung dkyil gyi steng gi mtha' skor du phyi'i lcags ri gcig gis bskor par bsgoms/ gling bzhi so so'i mtha' skor gyi lcags ri rnams chu nang du dpag tshad brgyad khri dang/ chu mtshams yan chad kyi rgya 'phang gnyis ka'i tshad la/ dpag tshad sum brgya dang phyed bcu gsum yod pa ngo bo lcags las grub pa lcags ri'i phyi rol tu yang phyogs re rer chu dkyil gser dkyil gnyis dpag tshad stong dang nyis brgya dang brgyad cu rtsa phyed dang brgyad re lhag lus pa yod par mdzod 'grel rgyal sras ma'i dgongs par gsungs pa'ang 'dug /gling bzhi bye ba phrag brgya spyi khyab kyi mtha' bskor gyi phyi'i lcags ri de tshangs pa'i 'jig rten la thugs pa ngo bo rdo rje pha lam las grub par bsams/ chu dang gser gyi dkyil 'khor gyi steng du phyi'i rgya mtsho chags/ de'i khams rab rlung gis bsrubs pas ri rgyal chags/ khams 'bring rlung gis bsrubs pas gser ri bdun gru bzhir bskor ba'i tshul gyis chags/ khams tha ma rlung gis bsrubs pas gling rnams chags pa yin no/ /dri bzang dang bcas pa'i bdud rtsi lngas spags pa'i me tog gi tshom bu che ba gcig dbus su dgod cing/ dbus su ri'i rgyal po ri rab ces brjod pas ri rab dang lhan cig tu gser gyi ri mtsho bdun sgom/ ri rab dbyibs gru bzhi pa rin po che bzhi'i @387a @#/ /rang bzhin te/ shar dngul/ lho bai DU rya/ nub padma rA ga /byang gser las grub pa/ chu'i nang du dpag tshad brgyad khri dag nub cing/ chu mtshams yan la yang brgyad khri yod pa/ lhun po de'i rtse na sum cu rtsa gsum pa'i gnas yod cing/ de la sum cu rtsa gsum zhes brjod pa ni nor lha brgyad sogs lha'i gtso bo sum cu rtsa gsum yod pas sam yang na chos bzang lha'i mdun sa sogs lha'i gnas sum cu rtsa gsum yod pas de skad ces bya'o/ /lhun po'i rtse de'i ngos re re la dpag tshad brgyad khri/ mtha' bskor na gsum 'bum nyi khri'o/ /lhun po'i steng gi zur bzhi na khang brtsegs bzhi yod cing/ de'i ngos la dpag tshad brgya nyi shu rtsa lnga/ dpangs su dpag tshad lnga brgya yod pa/ de la gnod sbyin lag na rdo rje lha rnams bag med pa'i gnas las bsrung ba'i phyir du gnas pa yin la/ sum cu rtsa gsum gyi dbus na grong khyer lta na sdug ces pa ngos re re la dpag tshad nyis stong lnga brgya pa/ mtha' bskor na khri yod pa/ 'phang du dpag tshad phyed dang gnyis yod pa/ rgyu gser gyi rang bzhin las grub pa/ 'og gi sa gzhi mtshon sna brgya rtsa gcig gis bkra bar byas pa/ mnan na nem byed pa/ bteg na 'phar byed pa'i 'jam zhing mnyen pa yod cing/ de la sgo stong du gcig gis ma tshang pa yod pas/ sgo re re la lha bsrung go mtshon can lnga brgya lnga brgya yod pa/ grong khyer lta na sdug de'i dbus na lha'i dbang po brgya byin gyi bzhugs gnas rnam par rgyal byed kyi khang bzang ngos re re la dpag tshad nyis brgya lnga bcu pa/ mtha' skor na stong/ dpangs su dpag tshad phyed dang drug dang gcig gi bco brgyad kyi cha gcig yod par gsungs pas/ grong khyer lta na sdug las kyang gyen du dpag tshad phyed dang lnga ma zin tsam 'phags pa/ de dag ni sum cu rtsa gsum gyi gnas kyi khyad par rags rim mo/ /grong khyer lta na sdug de'i phyi rol dpag tshang nyi shur phyin pa na/ shar du shing rta sna tshogs kyi tshal/ lho na shes rgyud rtsub par 'gyur ba'i tshal/ nub na lha'i pho mo @388b 'dris shing brtse ba'i tshal/ byang na dga' bar byed pa'i tshal dang bzhi yod cing/ de ni lha'i tshal gyi khyad par ro/ /tshal de dag gi phyogs bzhi na dpag tshad nyi shus bcad pa na tshal bzhi dang ming mtshungs shing tshal de dag la 'gran nus pa'i sa gzhi bzang po bzhi yod do/ /de ni sa gzhi'i khyad par ro/ /grong khyer lta na sdug de'i byang shar mtshams na/ shing yongs 'dus brtol zhes bya ba thur du dpag tshad lnga bcu zug pa dpag tshad brgya gyen du phyogs pa/ yal ga lo 'dab kyis dpag tshad lnga bcur khyab pa/ dris rdzi phyogs su dpag tshad brgyar khyab cing/ mi'i yul gyi me tog dang mi 'dra bar rdzi phyogs min par yang dpag tshad lnga bcur khyab pa yod do/ /de ni lha rnams dga' ba nyams su myong ba'i gnas yin no/ /de ni shing gi khyad par ro/ /grong khyer lta na sdug de'i lho nub mtshams dpag tshad bcu gnyis kyis chod pa na chos bzang lha'i mdun sa/ thad kar dpag tshad sum brgya/ mtha' bskor na dgu brgya pa grong khyer lta na sdug las dpag tshad phyed dang bzhi gyen du 'phags pa yod cing/ 'og gzhi dang yang dog dang ka ba dang skyi 'dus kyi gdung la sogs pa thams cad shel las grub pa dbus na bai DU rya'i ka ba zur brgyad pa/ spyi 'dus kyi gdung la skra'i rtse mo tsam zhig ma reg pa/ de na lha dbang dang nye dbang rnams kyi khri yod pa der lha rnams 'dus nas lha dang mi rnams kyi don dang chos sems par byed cing/ dbang po dang nye dbang rnams kyi mdzad pa ni/ tshes brgyad dang bco lnga'i dus su rgyal chen bzhi'i lha dang bcas nas 'dzam bu'i gling gi sems can gyis chos dang chos min gang byed lta nyul mdzad pa yin no/ /de ni 'dun pa'i khyad par ro/ /sum cu rtsa gsum nas yang dpag tshad brgyad khri 'das pa na 'thab bral dang/ de nas steng du chig 'bum drug khri 'das pa na dga' ldan dang/ de bzhin du 'og ma 'og ma'i bar gyi dpag tshad nyis 'gyur nyis 'gyur 'das pa na gong ma gong ma'i gnas 'og min gyi bar yod cing/ 'thab bral yan chod ni sa dang ma 'brel ba'i gnas yin pas de dag gang la brten pa'i gzhi ni dge @389a @#/ /rgyas man chad rlung dang sprin gyi phung po la brten cing/ sprin med yan chad ni rlung gi phung po la brten no/ /sum cu rtsa gsum man chad ni sa dang 'brel ba'i gnas yin pas maNDal gyi skabs 'dir de dag gtso bor bya'o/ /ri rab kyi chu mtshams yan chad la bang rim bzhi yod pa'i bar gyi thag ni dpag tshad khri phrag re re yod cing/ bang rim de dag ri rab las phyir 'phags tshul ni bang rim dang po 'og ma ni ri rab las phyir dpag tshad stong phrag bcu drug dang/ gnyis pa stong phrag brgyad dang/ gsum pa stong phrag bzhi dang/ bzhi pa stong phrag gnyis phyir 'phags pa yin no/ /bang rim dang po 'og ma la gnod sbyin lag na rin po che'i gzhongs pa bdud rtsis gang ba thogs pa dang/ gnyis pa na gnod sbyin lag na rin po che'i me tog gi phreng ba thogs pa dang/ gsum pa na rgun chang gis rtag tu myos pa dang/ bzhi ba'i shar phyogs kyi steng na yul 'khor bsrung dang/ lto na 'phags skyes po dang/ nub na spyan mi bzang gi pho brang sna tshogs gzugs dang/ byang na rnam thos sras kyi pho brang lcang lo can yod cing/ gser ri bdun la yang rgyal chen bzhi'i rigs kyi lha rnams gnas so/ /ri rab kyi mtha' bskong na gser gyi ri bdun dang/ rol ba'i mtsho bdun spal nas yod pas/ gser ri bdun po chu nang du dpag tshad brgyad khri nub cing/ gser ri dang po gnya' shing 'dzin gyi chu mtshams yan chad kyi dpangs la dpag chad bzhi khri/ ri gnyis pa gshol mda' 'dzin gyi dpangs la dpag tshad nyi khri/ ri gsum pa seng ldeng can gyi dpangs la dpag tshad chig khri/ ri bzhi pa blta na sdug ri'i dpangs la dpag tshad lnga stong/ ri lnga pa rta rna'i dpangs la dpag tshad nyis stong lnga brgya/ ri drug pa rnams 'dud kyi dpangs la dpag tshad chig stong phyed dang sum brgya/ ri bdun pa mu khyud 'dzin ri'i dpangs la dpag tshad drug brgya dang nyi shu rtsa lnga yod cing/ ri da dag gi zheng tshad kyang chu mtshams yan chad kyi so so'i dpangs tshad dang mnyam pas ri nang ma nang ma mtho zhing stug pa/ @390b gnya' shing 'dzin ri'i phyogs bzhi'i phyi'i ngos gcig gi zur nas zur du dpag tshad sum 'bum nyi khri dang/ mtha' skor la ngos re'i bzhi 'gyur sa ya gcig dang nyis 'bum brgyad khri yod pa'o/ /gshol mda' 'dzin gyi phyi'i ngos re'i dkyus tshad la bzhi 'bum bzhi khri re dang mtha' bskor du sa ya gcig dang bdun 'bum drug khri yod pa'o/ /seng ldeng can gyi phyi'i ngos re'i dkyus tshad la lnga 'bum re dang/ mtha' skor du sa ya gnyis yod pa'o/ /lta na sdug ri'i phyi'i ngos re'i dkyus tshad la lnga 'bum sum khri re dang/ mtho' bskor du sa ya gnyis dang chig 'bum nyi khri yod pa'o/ /rta rna'i phyi'i ngos re'i dkyus tshad la lnga 'bum bzhi khri lnga stong re dang/ mtha' bskor du sa ya gnyis dang chig 'bum brgyad khri yod pa'o/ /rnam 'dud kyi phyi'i ngos re'i dkyus tshad la lnga 'bum lnga khri nyis stong lnga brgya re dang/ mtha' bskor du sa ya gnyis dang nyis 'bum chig khri yod pa'o/ /mu khyud 'dzin gyi phyi'i ngos re'i dkyus tshad la lnga 'bum lnga khri drug stong phyed dang sum brgya re dang/ mtha' skor du sa ya gnyis dang nyis 'bum nyi khri lnga stod yod pa'o/ /ri bdun po de ngo bo gser las grub cing/ so so'i ming mthun gyi sgra bshad kyi skabs nas 'byung ba ltar shin tu mdzes par bsam/ ri rgyal dang gnya' shing 'dzin gyi bar gyi rol mtsho dang po'i zhing tshad la dpag tshad stong phrag brgyad cu ste brgyad khri yod pa/ de ni mtsho brgyad kyi nang ma yin pas nang gi rgya mtsho zhes bya/ de'i ngos de'i tshad la zhing gi sum 'gyur dpag tshad nyis 'bum bzhi khri re dang/ de'i mtha' bskor gyi dkyus tshad la ngos re'i bzhi 'gyur dpag tshad dgu 'bum drug khri yod pa'o/ /rol mtsho gzhan drug gi kha zheng ni snga ma las phyi ma phyed phyed kyis bri ba yin te rim bzhin bzhi khri dang/ nyi khri dang/ chig khri dang/ lnga stong dang/ phyed dang sum stong dang/ chig stong nyis brgya lnga bcu yod pa'o/ /rol mtsho gnyis pa'i ngos rer dpag tshad bzhi 'bum re dang/ mtha' bskor du sa ya gcig dang drug 'bum/ gsum pa'i ngos rer bzhi 'bum brgyad khri re dang/ mtha fsfs@391a @#/ /bskor du sa ya gcig dang dgu 'bum nyi khri/ bzhi pa'i ngos rer lnga 'bum nyi khri dang/ mtha' bskor du sa ya gnyis dang brgyad khri/ lnga pa'i ngos rer lnga 'bum bzhi khri re dang/ mtha' bskor du sa ya gnyis dang chig 'bum drug khri/ drug pa'i ngos rer lnga 'bum lnga khri re dang mtha' bskor du sa ya gnyis dang nyis 'bum/ bdun pa'i ngos rer lnga 'bum lnga khri lnga stong re dang/ mtha' bskor du sa ya gnyis dang nyis 'bum nyi khri yod pa'o/ /mtsho bdun po de dag ni yan lag brgyad ldan gyis chus gang zhing dga' bo dang nye dga' sogs klu'i rgyal po rnams rtse zhing rol bas na rol mtsho zhes bya'o/ /mu khyud 'dzin dang khor yug gi bar gyi mtsho ni phyi'i rgya mtsho chen po yin la/ de'i zheng tshad ni dpag tshad 'bum phrag gsum dang stong phrag nyi shu rtsa gnyis yod par bsam/ de nas shar la sogs par me tog gi tshom bu rim bzhin bgod de/ shar lus 'phags po zhes sogs rkang pa bzhi'i skabs su phyi lcags ri dang mu khyud 'dzin ri'i bar gyi rgya mtsho chen po'i dbus su gling bzhi gling phran dang bcas pa yod cing de dag gsal 'debs tshul ni/ 'dzam bu gling la ltos pa'i ri rab kyi shar na yod cing de'i mi rnams 'dzam bu gling pa las lus nyis 'gyur gyis 'phags pas lus 'phags po ste/ kha dog dkar po dbyibs zla gam 'dra ba ngos gzhan gsum la dpag tshad stong phrag gnyis gnyis dang/ lcags ri phyogs kyi ngos la dpag tshad sum brgya lnga bcu yod pa zhig go /ri rab kyi lho na yod cing shing 'dzam bu'i 'bras bu mtsho'i nang du lhungs pa'i sgras 'dzam bu zhes skad 'byin pas na 'dzam bu dang/ mtha' chus 'khor ba'i gling yin pas na lho 'dzam bu gling ste kha dog sngon po/ dbyibs shing rta 'dra ba ngos gzhan gsum la dpag tshad stong phrag gnyis gnyis dang/ lcags ri phyogs kyi ngos la dpag tshad phyed dang bzhi yod pa zhig ste/ 'dzam bu gling gi dbus rgya gar rdo rje @392b gdan nas byang du ri nag po dgu 'das pa na gangs ri dpal dang ldan pa yod/ de nas byang na ri spos ngad ldang ba yod/ de nas dpag tshad bcu'i tshu rol na klu'i rgyal po ma dros pa gnas pa'i mtsho ma dros pa zhes bya ba yan lag brgyad ldan gyi chus gang ba/ utpla la sogs pa'i me tog sna tshogs pas khebs pa/ mchu zhing la dpag tshad lnga bcu lnga bcu yod pa'i mtsho gru bzhi pa/ mtha' nyis brgyas 'khor ba/ de'i shar phyogs glang po che'i kha 'dra ba nas chu bo gang gA dang/ lho khyu mchog gi kha 'dra ba nas sind+hu dang/ nub rta'i kha 'dra ba nas puk+Shu dang/ byang seng ge'i kha 'dra ba nas chu bo si ta zhes bya ba 'bab cing/ mtsho ma dros pa la g.yas phyogs su lan bdun bskor te de re re lang chu klung lnga brgya dang lhan cig 'grogs nas phyogs so so'i phyi'i rgya mtsho chen por 'bab po/ /spos ngad ldang nas byang phyogs dpag tshad nyi shu na brag gser gyi bya skyibs lha ma yin gyi ngos zhes bya ba gru bzhi pa ngos re re la dpag tshad lnga bcu/ mtha' nyis brgyas 'khor ba/ 'phang du dpag tshad phyed dang bzhi pa mdzes shing lta na sdug pa/ 'khor yug na gser gyi brag bya skyibs brgya stong dang bcas pa zhig yod do/ /de nas byang du dpag tshad nyi shu na shing sA la'i rgyal po rab brtan zhes bya ba rtsa ba 'dom bzhi bcu thur du zug pa/ sA la'i phreng ba rim pa bdun gyis bskor ba/ chen gyen du 'phags pa'i yal ga lo 'dab kyis rim par non pas nam mkha' khyab pa ltar gnas so/ / de nas shar phyogs dpag tshad nyi shu na rdzing bu dal gyis 'bab ces bya ba mtsho ma gros pa'i rgya khyon ji lta ba bzhin yod do/ /khor yug na rdzing bu brgya stong yod cing/ de na brgya byin gyi g.yul ngor spyod pa'i glang po che rab brtan lus dkar zhing mgo bo sngon po'i dbus dmar ba/ mche ba drug dang ldan pa/ srid du dpag tshad phyed dang gsum/ zheng du gcig /phang du phyed dang gnyis/ mtha' bdun gyis 'khor ba/ 'khor glang po che rgya stong dang bcas pa dgun dang/ dpyid dang/ dbyar zla ba bzhi bzhir rim pa bzhin gnas so/ /'dzam bu gling gi @393a @#/ /dbus na bskal pa 'jigs dus kyang mi 'jig pa'i rdo rje gdan/ shar na 'phags pa 'jam dpal gyi gnas ri bo rtse lnga/ lho na 'phags pa spyan ras gzigs kyi gnas ri bo po ta la/ nub na o rgyan mkha' 'gro'i gsang mdzod/ byang na chos rgyal rigs ldan gyi gnas pho brang shamb+ha la rnams yod par bsam/ gling 'dir ltos pa'i ri rab kyi nub na yod cing/ ba lang dang nor bu la longs spyod pas na nub ba lang spyod de/ kha dog dmar po dbyibs zlum po/ mtha' kun nas bskor na dpag tshad stong phrag phyed dang brgyad kyis 'khor ba/ de'i dbus drang po nas gzhal na dpag tshad stong phrag phyed dang gsum yod pa zhig bsam/ 'dzam gling la ltos pa'i ri rab kyi byang na yod cing 'chi ba'i tshe zhag bdun gyi gong du sgra mi snyan pa 'byung bas na byang sgra mi snyan te kha dog ser po mtha' kun nas bskor na dpag tshad stong phrag brgyad kyis 'khor ba/ dbyibs gru bzhi phyogs re re la dpag tshad stong phrag gnyis gnyis pa zhig bsam/ de nas gling so so'i g.yas g.yon du chom bu dgod cing lus dang lus 'phags zhes sogs kyi skabs dmigs pa ni/ shar lus 'phags po'i g.yas su lus dang g.yon du lus 'phags/ de bzhin du 'dzam bu gling gi g.yas dang g.yon du rnga yab dang rnga yab gzhan/ ba lang spyod kyi g.yas dang g.yon du g.yo ldan dang lam mchig 'gro/ sgra mi snyan gyi g.yas dang g.yon du sgra mi snyan dang sgra mi snyan gyi zla ste gling phran brgyad po gling rang rang dang mdog dbyibs mtshungs shing/ rgya khyon dus 'khor las gtso gling gi phyed phyed du gsungs pas rang gling las chung ba re bsam/ rnga yab na yang srin po gnas pas thams cad na mi gnas shing/ mi de rnams las 'dzam bu gling pa'i mi rnams kyi lus tshad ni che ba rnams khru bzhi pa dang/ chung ba rnams phyed dang bzhi pa yin la/ shar lus 'phags po dang/ ba lang spyod pa dang/ sgra mi snyan pa rnams ni rim pa ltar nyis 'gyur gyis bskyed pa'i khru brgyad @394b dang/ bcu drug dang/ sum cu rtsa gnyis pa yin no/ /gling phran gyi mi rnams ni rang rang gi gtso gling gyi mi'i lus phyed phyed dang ldan par bshad cing 'di'i khru ni rdul khru la bya'o/ /de nas gling so so'i nang du tshom bu rim gyis 'god de/ rin po che'i ri bo zhes sogs rkang pa bzhi'i skabs su dmigs pa ni/ shar gling gi dbus su de'i longs spyod kyi gtso bo padma rA ga /indra ni la/ baiDUrya/ ma rgad/ rdo rje pha lam/ mu tig /byu ru sogs rin po che sna tshogs spungs pa'i ri bo rgya che zhing dpangs shin tu mtho ba/ lho gling gi dbus su de'i longs spyod kyi gtso bo dpag bsam shing gi sdong po shin tu che ba rtsa ba gsar/ sdong po dngul/ yal ga baiDUrya/ lo ma shel/ 'dab ma spub/ me tog mu tig dmar po/ 'bras bu rdo'i snying po rin po che sna bdun las grub pa phun sum tshogs pa dgos 'dod thams cad yid bzhin du 'byung ba/ nub gling gi dpus su de'i longs spyod kyi gtso bo 'dod 'jo'i ba rwa co rdo rje pha lam dang/ rmig pa indra ni la dang/ rnga ma dpag bsam gyi ljon pa las grub pa 'dra ba/ nog dang lkog shal phun sum tshogs pa kha dog dmar ser gzugs bzang zhing lta na sdug pa/ 'o ma la sogs pa'i dgos 'dod thams cad zad pa med par 'byung ba/ byang gling gi dbus su de'i longs spyod kyi gtso bo ma rmos pa'i lo tog ma rmos ma btab par skye ba'i 'bras sa lu'i lo tog yangs shing rgya che ba/ rtsa ba sor bzhi pa/ shun pa dang phub ma med pa/ nang brngas pa nub mi mngon/ nub brngas pa nang mi mngon pa/ kha dog ro bcud phun sum tshogs pa'i tshal yangs shing rgya che ba yod par bsam/ de nas gling so so'i longs spyod kyi gtso bo'i nang ngos dang/ mtshams bzhir tshom bu rim bzhin dgod de/ 'khor lo rin po che zhes sogs rkang pa brgyad kyi skabs su dmigs pa ni/ rin po che'i ri ba'i nang ngos kyi bar snang la/ 'khor lo rin po che gzhan gyis ma byas par 'khor bsgyur gyi bsod nams kyi mthus rgyu 'dzam bu chu bo'i gser las byas shing/ @395a @#/ /rtsib stong dang ldan pa'i tshad dpag tshad lnga brgya yod pa/ 'jig rten na nyi ma gnyis pa lta bur mdzes pa'i yon tan dang/ nam mkhar 'phags te dpag tshad 'bum gyi lam nyi ma gcig gis thogs pa med par 'gro ba'i yon tan dang/ 'khor lo rin po che de'i mthus nam mkha'i lam nas/ glang po dang/ rta dang/ shing rta dang/ rkang thang gi dpung tshogs yan lag bzhi dang lhan cig tu gling bzhi dang rgyal chen bzhi'i lha'i gnas sogs gang du 'gro bar 'dod pa der des bgros par byed pa'i yon tan dang/ 'khor los bsgyur ba'i rgyal po gang mi thos pa de 'khor lo rin po che des grogs byas te thos par byed pa'i yon tan dang/ sngo ba gang yang med de/ chos dang ldan pa'i chos kyi rjes su 'jug pa'i rgyal po la rgyal po'am blon po'i chos kyi grogs pos mthong ma thag tu de dag thams cad 'bul bar byed pa'i yon tan te lnga dang ldan pa zhig yod par bsam/ dpag bsam shing gi nad ngos kyi bar snang la baiDUrya'i rang bzhin can gyi nor bu rin po che mtshan mo'ang dpag tshad brgya tshun chad kyi mun pa sel zhing/ nyin par 'od kyi tsha gdung sel par byed pa'i yon tan dang/ skoms pas gdung pa rnams la de las yan lag brgyad ldan gyi chu byung ste skoms pa sel bar byed pa'i yon tan/ rgyal pos gang bsam pa phal cher de las byung ba'i yon tan/ zur brgyad las kha dog sna tshogs pa'i 'od 'byung ba'i yon tan/ dpag tshad brgya tshun chad kyi 'gro ba'i rims dang nad sel zhing yid mnyam bar bzhag pa dang/ 'dod don thams cad 'grub par 'gyur ba'i yon tan dang/ rlung ngan pas char ma bzad par mngon par 'bab par mi nus pa'i yon tan/ mya ngan dang g.yang sa sogs mi dge ba'i bdag 'bras kyi gdungs ba rnams la/ shing ljon pa dang/ ni'u gsing/ mtshe'u sogs dga' @396b tshal phun sum tshogs pa 'byung ba'i yon tan/ dud 'gror mi skye zhing de dag gi mi gnod pa dang dus min 'chi ba 'joms ba'i yon tan te yon tan brgyad dang ldan pa zhig yong par bsam/ 'dod 'jo'i ba'i nang ngos kyi bar snang la/ btsun mo rin po che yid du 'ong zhing lta na sdug pa/ lus las tsan dan dang spos dang/ khams utpa la'i dri zhim po 'byung zhing bya ka lingka ltar gang gis reg na bde ba'i mchog ster ba/ ka lingka ni rgya mtsho'i gling na gnas pa'i bya yin no/ /gling der gnas pa'i skye bo rnams kyi bkres pa dang/ skom pa dang/ mya ngan rnams sel bar byed cing/ bud med kyi skyon skyes pa gzhan la sems pa dang/ ser sna dang/ mi rigs par chags pa dang/ mi rigs pa'i gnas la rjes su dga' ba dang/ khyim thabs kyi srog gcod par 'dod pa lnga spangs shing/ yon tan ni bsam pa mthun par 'gyur ba dang/ bu mang po btsa' bar 'gyur ba dang/ rigs mthun par 'gyur ba dang/ srid mtho bar 'gyur ba dang/ khyim thab dang bud med gzhan la phrag dog mi byed pa ste lnga'i steng du/ gzhan yang bud med rin po che'i yon tan tshig cal col med par 'gyur ba dang/ log par lta ba med par 'gyur ba dang/ khyim thab med kyang sgra dang dri dang ro dang reg bya dag gi dbang du mi 'gyur ba ste/ yon tan brgyad dang ldan pa zhig yod par bsam/ ma rmos pa'i lo tog gi nang ngos kyi bar snang la/ /blon po rin po che/ rdo rje dang/ rin po che mthon kha dang/ ma rgad dang/ spug la sogs pa'i rin po che sna tshogs kyi sa phyogs rab tu 'geng zhing 'byor pa shin tu che ba nam yang mi nyams par gnas pa/ g.yo sgyu med cing gzhan la gnod 'tshe mi byed pa/ skye bo thams cad kyi pha lta bur 'dzin cing/ mthong ba tsam gyis yid dga' bar gyur pa'i yon tan dang ldan pa zhig yod par bsam/ shar lho'i bar snang la glang po rin po che/ rkang lag bzhi/ sna/ rlig pa/ 'jug ma ma zeg pa ste yan @397a @#/ /lag bdun sa la gnas pa/ mdog gangs ri ltar dkar ba/ stobs glang po phal pa stong gi stobs dang ldan pa/ glang po gzhan gyis de'i rdzi tshor ba tsam gyis kyang mdun du 'dug par mi nus pa/ chu dang/ skam sa dang/ bar snang ste gnas gsum la g.yul 'gyed par 'gyur ba/ shugs nyin gcig la 'dzam bu gling lan gsum skor bar nus pa/ cang shes skud pas kyang bkri bar rung zhing/ khyad par rgyal pos zhon pa'i tshe ma bskul kyang rgyal po'i bsam pa bzhin 'jug par 'gyur ba dang/ zhon pa po'i lus mi 'khrug cing srog chags gzhan la mi gnod par dal gyis 'gro zhing 'gying bag dang ldan pa/ byis pa rnams la 'jigs par mi byed pa/ mchog tu bka' mnyan cing pha rol gyi sde las rgyal bar byed pa'i yon tan dang ldan pa zhig yod par bsam/ lho nub kyi bar snang la rta mchog rin po che/ mdog me tog ku mu ta ltor dkar ba/ lha'i nor bu'i gtsug rgyan dang sga srab sogs rgyan dpag tu med pa dang/ bkra shis pa'i ri mo du mas brgyan pa/ mdog dang dbyibs dang bod tshod phun sum tshogs pa/ rgyal pos 'dzam gling lan gsum skor cig ces bsgo na nyin gcig la ngal ba med par bskor ba byed pa/ lus la nad sogs kyi skyon med cing gzi brjid dang ldan pa/ zhon pa po'i lus mi 'khrug cing/ kun gyi yid du 'ong ba'i yon tan dang ldan pa zhig yod par bsam/ nub byang gi bar snang la dmag dpon rin po che/ skye bo gzhan la gnod 'tshe med cing/ chos ma yin pa'i spyod pa thams cad spangs pa/ 'jig rten gyi bya ba mtha' dag la mkhas shing yang dag pa'i tha snyad dang ldan pa'i las sgrub pa la lus sems skyo ngal med pa/ rgyal po'i yid la gang bsam pa thams cad smra mi dgos par shes nas sgrub par byed pa/ bstan 'gro la 'tshe ba'i pha @398b rol rgol ba 'joms pa'i dpung tshogs yan lag bzhi pha rol gyi dgra sde'i phyogs su 'gro ba dang/ sgar phab te gnas pa dang/ tshur ldog pa'i g.yul gyi bya ba thams cad la mkhas shing dbang bsgyur ba la sogs pa rgyal po'i bya ba thams cad byed pa'i yon tan dang ldan pa zhig yod par bsam/ 'dir blon po dang dmag dpon gnyis mngon 'byung gi mdo las gsungs pa ltar so sor bya dgos shing/ dran pa nyer bzhag gi skabs de gnyis gcig tu 'dren pa'i dbang du byas pas mi 'dra la/ des na 'di'i skabs kyi blon po dran pa nyer bzhag nas bshad pa'i khyim bdag dang/ 'di'i dmag dpon mdo de nyid nas bshad pa'i blon po la byas chog gam snyam pas dpyad par mdzod/ byang shar gyi bar snang la/ gter chen po'i bum pa rgyu gser las grub pa/ lto ba che ba/ mgrin pa ring ba/ mchu 'phyad pa/ zhabs zhum pa/ yal ga dang 'dab ma shin tu rgyas shing 'bras bus brgyan pa'i dpag bsam gyi shing gi kha rgyan cing rin po che sna tshogs kyis rgyan dpag tu med pas spras par/ lha rdzas kyi dar bzang pos mgul pa bcing zhing/ nang 'dod rgu'i gter gyi yongs su gang ba 'gro ba kun la dgos 'dod thams cad yid bzhin du 'byung ba'i yon tan dang ldan pa zhig yod par bsam/ de nas 'khor lo sogs tshom bu snga ma rnams kyi nang du phyogs bzhi dang 'tshams bzhing tshom bu rim bzhin dgod de/ sgeg ma zhes sogs rkang pa brgyad kyi skabs su dmigs pa ni/ 'khor lo rin po che'i nang ngos kyi bar snang la/ sgeg mo dkar mo phyag gnyis kyi khro bo'i khu tshur gyis rdo rje rtse lnga pa re re dgu g.yas g.yon du snyems pa'i tshul gyis 'dzin cing/ mgo g.yon du cung zad dud cing 'gyid ba'i tshul dang/ nor bu rin po che'i nang ngos kyi bar snang la/ phreng ba ma ser mo phyag gnyis kyi khro bo'i khu tshur gyis rdo rje rin po che phreng ba dpung ba'i thang du phyar nas mchod yul @399a @#/ /rnams la dbang bskur bar mdzad pa'i tshul dang/ btsun mo rin po che'i nang ngos kyi bar snang la/ glu ma dmar skya phyag gnyis rdo rjes mtshan pa'i pi wang ser po brdung ba la brtson pa'i tshul dang/ blon po'i nang ngos kyi bar snang la/ gar ma zhal dang zhabs gnyis dkar po/ mgul dang ro stod dmar skya/ rked pa dang phyag gnyis sngo skya/ brla gnyis se ra skya/ lhag ma sngo ba'i sna tshogs mdog /phyag gnyis kyis rdo rje rtse gsum pa gnyis g.yas spyi bo dang/ g.yon dkur bsnams nas gar sna tshogs bsgyur ba'i tshul dang/ glang po'i nang ngos kyi bar snang la/ me tog ma ser mo/ g.yon rdo rjes mtshan pa'i me tog gi snod 'dzin cing/ g.yas me tog gi char 'bebs pa'i tshul dang/ rta mchog rin po che'i nang ngos kyi bar snang la/ bdug spos ma dkar mo g.yas rdo rjes mtshan pa'i spos snod bsnams nas mchod yul rnams tshim par mdzad cing/ g.yon khro bo'i khu tshur gyi sdig mdzub bsgreng ba'i tshul dang/ dmag dpon rin po che'i nang ngos kyi bar snang la/ snang gsal ma dmar skya/ g.yas rdo rje'i khu tshur gyis mar me'i sdong bu phrag pa g.yon par bsnams te mchod par mdzad cing/ g.yon thugs kar khu tshur mdzad pa'i tshul dang/ gter chen po'i bum pa'i nang ngos kyi bar snang la/ dri chab ma sna tshogs mdog g.yon rdo rjes mtshan pa'i dri'i dung mchod thugs kar bsnams shing/ g.yas kyi dpung pa'i thad nas dri byug tshul gyis mchod par mdzad pa'i tshul gyi bzhugs pa rnams bsam/ sgeg sogs lha mo bzhi'i nang ngos kyi shar nub dang/ byang dang lho rnams su tshom bu rim bzhin bkod de/ nyi ma zhes sogs rkang pa bzhi'i skabs su/ sgeg mo ma'i nang ngos chu mtshams yan chad kyi dpag tshad bzhi khri'i thad kyi bar snang la/ nyi ma'i dkyil 'khor rgyu me shel las grub pa/ dbyibs @400b zlum po/ rgyar dpag tshad lnga bcu rtsa gcig dang bcas pa/ mtha' skor la sum 'gyur dang/ rngams su dpag tshad phyed dang drug dang gcig gi bco brgyad kyi cha gcig yod pa/ tsha ba'i 'od zer gyis gling gi mun pa phra rags thams cad sel ba/ de'i steng du gser gyi ra ba 'phang du dpag tshad phyed pas bskor ba/ rin po che'i them skas dang/ pha gu dang/ glu gar dang rol mo rtse ba'i lha'i bu bu mo sogs snod bcud kyi khyad par sna tshogs dang bcas pa yod par bsam/ glu ma'i nang ngos chu mtshams yan chad kyi dpag tshad bzhi khri'i bar snang la zla ba'i dkyil 'khor rgyu chu shel las grub pa/ dbyibs zlum po/ rgyar dpag tshad lnga bcu dpangs su dpag tshad phyed dang drug dang gcig gi bco brgyad kyi cha gcig yod pa/ bsil ba'i 'od zer gyis gling gi mun pa rags pa sel ba/ de'i steng du gser gyi ra ba 'phang du dpag tshad phyed pas bskor ba/ rin po che'i them skas dang/ pha gu dang/ glu gar dang rol mo rtse ba'i lha'i bu bu mo sogs snod bcud kyi khyad par sna tshogs yod par bsam/ maNDal gyi skabs su nyi zla gnyis ri rab la nye ba'i char sgom dgos kyang dngos po'i gnad tshod la de ltar min par gsungs so/ /phreng ba ma'i nang ngos kyi bar snang la/ lha rdzas bzang po las grub pa'i gdugs dkar po/ yu ba nor bu rin po che las byas pa/ 'dzam bu chu bo'i gser gyi rtsibs stong dang ldan pa/ indra ni la'i tog gis rab tu mdzes shing/ rin po che'i sna tshogs pas phra bkod phun sum tshogs pa/ mu tig chun 'phyang gi khor yug rab tu rgyan cing shin tu mdzes pa'i yon tan dang ldan pa zhig yod par bsam/ gar ma'i nang ngos kyi bar snang la/ shin tu drangs shing ldem pa'i rin po che'i yu ba'i rtse mor zla phyed rdo rje rin po che'i tog gis spras shing/ lha rdzas kyi dar bzang po las grub pa'i dar lce sum khug gi 'gying ldang dang ldan pa/ gser gyi dril chung du mas brgyan cing/ rlung gis bskyod pa na@401a @#/ /sil sil gyi sgra snyan par sgrogs pa/ chu srin ma ka ra dang/ nya spu skyes dang/ seng ge rkang pa brgyad pa sogs srog chags kyi mtshan mas mdzes par byas pa'i mi mthun pa'i phyogs thams cad las rnam par rgyal ba'i rgyal mtshan shin tu mdzes pa'i yon tan dang ldan pa zhig bsam/ de yang tshom bu snga ma snga ma'i nang du phyi ma phyi ma dgong cing/ sgom don la rin chen bdun dang gter bum lcags ri nas mu khyud 'dzin ri'i bar gyi mtsho gling gi steng dang/ sgeg sogs lha mo brgyad ri mtsho bar ma drug gi steng dang/ nyi zla gdugs rgyal mtshan bzhi gnya' shing 'dzin ri dang rol mtsho dang po'i steng gi bar snang khyab pa'i tshul du yod par mos pa yin zhes bla ma rnams gsung ngo/ /de nas lha dang mi'i zhes sogs kyi skabs tshom bu zhing khams gang bar bkod la dmigs pa ni/ lha mi'i longs spyod kyi gtso bo sogs dpal 'byor phun sum tshogs pa ji snyed yod pa thams cad ma tshang ba med par zhing khams de nyid kyi steng du spungs nas khrig mer gyis gang zhing shin tu yid du 'ong ba zhig bsam/ de lta bu'i zhing khams rgya mtsho'i bkod pa tshogs zhing rnams la 'bul ba'i tshul ni/ zhing khams bye ba phrag brgya dpag tu med par sprul la de dag las 'od zer nam mkha'i khams gang ba 'phros pa re re'i sne mo dang de dag gi rdul phra rab re re'i steng du yang sngar ltar maNDal gyi bkod pa yongs su rdzogs pa gsal btab la/ skad cig gnyis par snod bcud phun sum tshogs pa'i yon tan dang ldan pa'i dag pa'i zhing du gyur nas tshogs zhing rnams la phul bas dgyes bzhin du bdag gir mdzad par bsam mo/ /zhing gi yon tan ma tshang ba med pa dang bcud thams cad kyang dam pa'i chos kyis rgyud smin pa sangs rgyas kyi gsung thos ma thag grol bar 'gyur ba sogs snod bcud kyi yon tan phun sum tshogs pa dang ldan @402b par mos nas phul bas tshogs zhing rnams kyis bdag gir bzhes par bsam pa yin no/ /yang slob dpon a b+hya ka ra dang/ rje bdag nyid chen po sogs rgya bod kyi mkhas grub du ma'i bzhed pa maNDal tshom bu nyer gsum ma 'bul ba'i tshul ni/ de yang lag pa gnyis kar tshom bu dang bcas te maNDal bzung la/ g.yas pa'i lag ngar gyis byi dor bya dgos te de la mngon shes kyi rtsa yod pas mngon shes myur du thob pa'i dgos pa yod/ tshom bu yang dri bzang gi chus sbags dgos de ni rang sems byang chub kyi sems kyi rlan dang ma bral ba'i dgos pa yod pas de ltar bya/ de nas oM bdzra b+hu'u mi AH hUM zhes tshom bu bkram la dbang chen gser gyi sa gzhi/ oM bdzra re She AH hUM zhes tshom bu mtha' skor du dgod cing/ lcags ri mu khyud me tog gi tshom bu dbus su dgod cing/ dbus su ri rab de bzhin du shar la sogs par me tog gi tshom bu dgod cing/ shar lus 'phags po/ lho 'dzam bu gling/ nub ba lang spyod/ byang sgra mi snyan/ shar gyi g.yas g.yon gnyis su me tog dgod cing/ lus dang lus 'phags/ lho'i g.yas g.yon gnyi su dgod cing/ rnga yab dang rnga yab gzhan/ nub kyi g.yas g.yon gnyis su dgod cing/ g.yo ldan dang lam mchog 'gro /byang gi g.yas g.yon gnyis su dgod cing/ sgra mi snyan dang sgra mi snyan gyi zla/ de nas gling gi nang gi shar du dgod cing glang po rin po che/ lhor dgod cing/ khyim bdag rin po che/ nub tu dgod cing/ rta rin po che/ byang du dgod cing/ btsun mo rin po che/ shar lhor dgod cing/ dmag dpon rin po che/ lho nub tu dgod cing/ 'khor lo rin po che/ nub byang du dgod cing/ nor bu rin po che/ byang shar du dgod cing/ gter chen po/ nang gi shar du 'god cing/ nyi ma/ nang gi nub tu dgod cing/ zla ba rnams gong du bshad pa ltar gsal gdab la/ khyad par du rang gzhan skye 'phags thams cad kyi lus ngag yid @403a @#/ /gsum dang dus gsum du bsags pa'i dge tshogs dang bcas pa thams cad bkra shis rtags brgyad sogs rnam pa sna tshogs pa'i mchod pa dngos po dpag tu med pa dang/ rin chen bdun dang nye ba'i rin chen bdun la sogs pa lha mi'i longs spyod phun sum tshogs pa rnams kyis rin chen maNDal bzang po byur bur gtams shing/ der ma zad ri rab sogs tshom bu re re'i steng du padma'i sdong po nyi shu rtsa lnga rab tu rgyas pa'i lte ba dang bcas pa re re/ padma re re'i lte ba na kun bzang phyag gnyis thal mo sbyar ba'i bar na yid bzhin gyi nor bu bsnams pa re re/ kun bzang de re re'i lte ba nas sngar ltar gyi padma'i sdong po re re/ de re re'i lte ba na sngar ltar kun bzang re re/ de re re'i lte ba na gong ltar rgya je che je cher spros nas nam mkha'i khyon kun yongs su gang ba'i kun bzang mchod pa'i tshogs dang bcas pa blos blangs nas tshogs zhing re re'i phyag tu phul la bdag gi rgyud byin gyis brlab tu gsol zhes gsol ba btab pas dgyes bzhin du bdag gir bzhes par bsam/ de la rin chen bdun ni/ padma rA ga dang/ indra ni la dang/ baiDUrya dang/ ma rgad dang/ rdo rje dang/ mu tig dang/ byu ru rnams yin la/ nye ba'i rin chen bdun ni/ rgyal srid sna bdun gyi yon tan de dag dang rjes su mthun pa'i nye ba'i yon tan de la ral gri rin po che ni/ 'khor los bsgyur ba'i rgyal po la pha rol gyis rgol ba ci byung yang ral gri de btang ba na sems can su la yang gnod 'tshe bya mi dgos par ral gri de mthong ba tsam gyis thams cad dbang du 'du ba zhig go /phags pa rin po che ni/ rgya mtsho'i klu chen po zhig gi pags pa ste zhing du pags tshad lnga/ mchur dpag tshad bcu yod pa/ mes mi tshig pa/ char gyis brlan mi nus/ grang ba'i dus su dro bar byed/ tsha ba'i dus su bsil bar byed pa/ de lus la bgos pa tsam gyis @404b bde ba mchog dang ldan pa dang/ nyi zla'i 'od ltar 'od kyi snang ba chen po dang ldan pa zhig go /mal cha rin po che ni/ shin tu 'jam zhing mnan na ne ma byed pa/ bteg na phar byed pa/ mal cha de'i steng du bsam pa na bsam gtan myur du thob cing blo gros shin tu gsal bar byed pa/ 'dod chags la sogs pa nyon mongs pa gang byung yang mal cha de'i steng du bsdad pa tsam gyis nyon mongs zhi bar byed pa zhig go /tshal rin po che ni/ 'khor los sgyur rgyal tshal der phyin pa na lha'i longs spyod thams cad tshal der 'byung zhing/ lha'i bu mo mang po sil snyan sna tshogs dkrol bar byed pa/ tshal der dge ba'i las kho na la spyod pa zhig go /khyim rim po che ni/ 'khor los sgyur ba'i rgyal po khyim der gnas pa na mtshan mo'ang nyin mo bzhin du 'od 'phro ba/ phyi nas bltas na nang gsal ba/ nang nas bltas na phyi gsal ba/ nor bu rin po che sna tshogs kyis brgyan pa/ lha'i bu dang bu mo mang pos mchod pa byed pa/ mya ngan dang yid mi bde ba sogs kyis gnod pa gang yang med pa/ mchog tu dga' ba rgya chen po dang ldan pa'i gnas khyad par du 'phags pa zhig go /lham rin po che ni/ 'khor los bsgyur rgyal gyi bsod nams las grub pa'i rin po che'i lham zhig ste/ de rkang pa la gyon nas chu'i steng du song yang mi byid pa dang/ 'gro bar 'dod na dpag tshad brgyar yang myur du bgrod nus shing/ de'i tshe lus la ngal ba gang yang mi 'byung ba'o/ /de lta bu'i rin po che rnams maNDal gyi steng du gsal btab nas bla ma lha tshogs rnams la 'bul ba ni/ tshogs rlabs po che rdzogs pa'i thabs khyad par can no/ /gzhan yang tshe ring bar 'dod na indra ni la'i bum pa 'chi med tshe'i bdud rtsis gang bas bar mtshams med par bkang ste 'bul ba dang/ mdor na rang la gang 'dod thams cad maNDal gyi bar stong rnams bkang ste phul bas rgyu mthun pa'i 'bras bu 'byung ba bla ma dam pa'i @405a @#/ /man ngag go /maNDal la phyi'i maNDal/ nang gi maNDal/ gsang ba'i maNDal/ de kho na nyid kyi maNDal bcas yod pa las/ de ni phyi'i maNDal yin la/ nang gi maNDal sogs ni/ bla ma mchod pa dad pa'i ljon shing du brjod zin pa ltar ro/ /de ltar gong du bshad pa'i maNDal phul ba'i phan yon/ ma phul ba'i nyes dmigs/ 'bul dgos pa'i rgyu mtshan/ 'bul tshul sogs legs par shes par byas nas/ rang dang mtha' skor gyi sems can thams cad kyi lus rdul phra rab dang mnyam par sprul nas yod pa rnams maNDal 'bul ba'i tshe tshangs pa gdong bzhi par gyur pa'i mos pa bya dgos shing/ maNDal kyang tshogs zhing gi lha'i grangs dang mnyam pa mos nas tshogs zhing gi lha re re la 'bul dgos pa yin no/ /de nas gsol ba 'debs pa man ngag bzhin rgyud dang 'dres nges su bya ba la/ don chen po gsum gyi sgo nas gsol ba 'debs pa ni/ dper na rgyal po chen po zhig gi mdun du zhu don rgyag rgyu yod na/ de'i mdun du phyin la 'bul ba rgya chen po phul nas zhu don gang yin pa de zhu ba de bzhin du/ bla ma dkon mchog la zhu rten du maNDal phul nas/ bshes gnyen la ma gus pa nas bzung bdag gnyis su mtshan mar 'dzin pa'i bar gyi phyin ci log gi blo sna mtha' dag myur du rgyud la 'gag par byin gyis brlab tu gsol/ bshes gnyen la gus pa nas bzung bdag med pa'i de kho na nyid mngon sum du rtogs pa'i bar gyi phyin ci ma log pa'i blo sna mtha' dag myur du rgyud la skye bar byin gyis brlab tu gsol/ rkyen phyi nang gi bar chad thams cad nye bar zhi bar byin gyis brlab tu gsol/ zhes don dran bzhin du gdung shugs drag pos gsol ba btab/ de nas lam mchog sgo 'byed kyi gsol 'debs bya tshul ni/ tshogs zhing rnams @406b kyi yon tan la dad pa lhang lhang ba'i sgo nas thub dbang gi mdun gyi rtsa ba'i bla ma la dmigs te rang dang sems can thams cad kyi mgrin gcig tu/ dpal ldan rtsa ba'i bla ma rin po che/ /bdag gi spyi bor pad zla'i gdan bzhugs la/ /bka' drin chen po'i sgo nas rjes bzung ste/ /sku gsung thugs kyi dngos grub stsal du gsol/ /zhes gdung shugs drag pos gsol ba rtse gcig tu btab pas/ mdun gyi drin can rtsa ba'i bla ma las rang 'dra gnyis pa zhig chad nas/ rang gi spyi bor sna tshogs pad zla'i gdan zhig thol gyis byung ba'i khar/ /zhal gzigs phyogs rang dang mthun par bzhugs/ de dang dus mnyam du tshogs zhing gzhan rnams kyi sku las bdud rtsi 'od zer dang bcas pa'i rgyun dpag tu med pa babs/ spyi bo'i drin can rtsa ba'i bla ma la thim pas dbyer med du 'dres par bsam/ slar yang sku gsung thugs kyi dngos grub stsal du gsol zhes gdung shugs drag pos gsol ba bskyar nas btab pas spyi bo'i drin can rtsa ba'i bla ma'i sku las bdud rtsi sna lnga 'od zer dang bcas pa'i rgyun babs/ rang dang rang gi mtha' skor gyi ma rnams kyi lus ngag yid gsum la zhugs pas/ thog med nas bsags pa'i sdig sgrib thams cad dang/ khyad par du'ang zab mo lta ba dang/ rgya chen spyod pa'i lam gyi snying po'i rtogs pa khyad par can rgyud la skye ba'i 'gal rkyen gegs byed thams cad sbyangs/ las ngan pa de dag gsog pa'i lus rten sha rus rdos bcas 'di yang byang zhing dag nas lus dwangs gsal 'od kyi rang bzhin can du gyur/ mthun rkyen tshe dang bsod nams la sogs pa'i lung rtogs kyi yon tan thams cad 'phel zhing rgyas te/ zab mo lta ba dang rgya chen spyod pa'i lam gyi snying po'i rtogs pa khyad par can rang gzhan gyi rgyud la skyes par bsam/ de nas 'dren pa mnyam med ston pa bcom ldan 'das zhes pa'i tshe thub pa'i dbang po dang/ rgyal tshab dam pa @407a @#/ /zhes pa'i tshe rje btsun byams mgon dang/ rgyal ba'i lung bstan zhes pa'i tshe 'phags pa thogs med kyi sku'i don spyi yid la wal gyis bsam nas/ gsum ka la dmigs te/ sangs rgyas byang sems gsum la gsol ba 'debs/ /zhes gdung shugs drag pos gsol ba rtse gcig tu btab pas/ tshogs zhing spyi dang khyad par de gsum gyi sku'i cha las sku gsung thugs kyi byin brlab thams cad bdud rtsi sna lnga 'od zer dang bcas pa dpag tu med pa'i rnam par babs/ rang dang rang gi mtha' bskor gyi ma sems can thams cad kyi lus ngag yid gsum la zhugs pas/ thogs med nas bsags pa'i sdig sgrib thams cad dang/ khyad par du'ang rgya tshen spyod pa'i lam gyi snying po'i rtogs pa khyad par can rgyud la skye ba'i 'gal rkyen gegs byed thams cad sbyangs/ lus dwangs gsal 'od kyi rang bzhin can du gyur par bsam/ slar yang/ sangs rgyas byang sems gsum la gsol ba 'debs/ zhes gdung shugs drag pos gsol ba bskyar nas btab pas/ de gsum las rang 'dra gnyis pa re byon te rang gzhan thams cad la thim pas mthun rkyen tshe dang bsod nams la sogs pa'i lung rtogs kyi yon tan thams cad 'phel zhing rgyas te/ rgya chen spyod pa'i lam gyi rim pa spyi dang/ lam de'i snying po byams snying rje byang chub kyi sems kyis drangs pa'i gzugs sku rnam pa gnyis rang dang ma rnams kyis bde blag tu thob byung snyam du bsam mo/ /de nas dmigs pa skyong tshul sogs de bzhin du byas nas/ rtsa ba'i bla ma'i bar gyi rgya chen spyod pa'i brgyud kyi bla ma gzhan rnams la'ang gdung shugs drag pos gsol ba rtse gcig tu gdab cing/ drin can rtsa ba'i bla ma la gsol ba gdab pa'i tshe/ mdun dang spyi bo'i drin can rtsa ba'i bla ma gnyis ka la dmigs pa @408b dang bdud rtsi 'bebs sbyangs sogs byed pa yin no/ /de nas smra ba zla med zhes pa'i tshe thub pa'i dbang po dang/ rgyal ba'i mkhyen rab zhes pa'i tshe/ rje btsun 'jam dbyangs dang/ zab mo'i don gzigs zhes pa'i tshe 'phags pa klu sgrub kyi sku'i rnam pa wal gyis gsal btab nas/ gsum ka la dmigs te/ smra ba'i gtsug rgyan gsum la gsol ba 'debs/ /zhes gdung shugs drag pos gsol ba rtse gcig tu gdab pas/ tshogs zhing spyi dang khyad par de gsum gyi sku'i cha thams cad dang gnas gsum las sku gsung thugs kyi byin rlabs thams cad bdud rtsi sna lnga 'od zer dang bcas pa dpag tu med pa'i rnam par babs/ rang dang rang gi mtha' skor gyi ma sems can thams cad kyi lus ngag yid gsum la zhugs pas/ thogs med nas bsags pa'i sdig sgrib thams cad dang khyad par du'ang zab mo'i lam gyi snying po'i rtogs pa khyad par can rgyud la skye ba'i 'gal rkyen gegs byed thams cad sbyangs/ lus dwangs gsal 'od kyi rang bzhin can du gyur par bsam/ slar yang/ smra ba'i gtsug rgyan gsum la gsol ba 'debs/ /zhes gdung shugs drag pos gsol ba bskyar nas btab pas/ de gsum las rang 'dra gnyis pa re byon te rang gzhan thams cad la thim pas mthun rkyen tshe dang bsod nams la sogs pa'i lung rtogs kyi yon tan thams cad 'phel zhing rgyas te zab mo'i lam gyis rim pa spyi dang/ lam de'i snying po bdag med rnam pa gnyis rtogs pa'i shes rab khyad par can gyis drangs pa'i ji lta ji snyed mkhyen pa'i ye shes chos kyi sku gnyis rang dang ma rnams kyis bde blag tu thob par bsam/ de bzhin du rtsa ba'i bla ma'i bar gyi zab mo lta rgyud kyi bla ma gzhan rnams la'ang man ngag bzhin gdung shugs drag pos gsol ba rtse gcig tu gdab par bya'o/ /de nas byin rlabs dpung zhus ni/ tshogs zhing rnams kyi sku'i rnam pa gsal bzhin pa'i ngang nas/ yon tan kun gyi gzhir gyur @409a @#/ /drin can rje x x gus pa chen pos bsten par byin gyis rlobs/ /zhes gdung shugs drag pos gsol ba rtse gcig tu btab pas tshogs zhing rnams kyi sku'i cha las/ sku gsung thugs kyi byin rlabs thams cad bdud rtsi sna lnga 'od zer dang bcas pa dpag tu med pa'i rnam par babs/ rang dang ma rnams kyi lus ngag yid gsum la zhugs pas/ thog med nas bsags pa'i sdig sgrib thams cad dang/ khyad par du'ang lam gyi rtsa ba dge ba'i bshes gnyen bsam sbyor gnyis kyis tshul bzhin du bsten pa'i chos bskor gyi snying po'i rtogs pa khyad par can rgyud la skye ba'i 'gal rkyen gegs byed thams cad sbyangs/ lus dwangs gsal 'od kyi rang bzhin can du gyur par bsam/ slar yang/ gus pa chen pos bsten par byin gyis rlobs/ /zhes gdung shugs drag pos gsol ba bskyar nas btab pas/ tshogs zhing rnams las rang 'dra gnyis pa re chad de rang gzhan thams cad la thim pas mthun rkyen tshe dang bsod nams la sogs pa'i lung rtogs kyi yon tan thams cad 'phel zhing rgyas/ khyad par du lam gyi rtsa ba bla ma sangs rgyas su dran pa'i bsam sbyor gnyis kyi sgo nas tshul bzhin du bsten nus pa'i snying po'i rtogs pa khyad par can rang gzhan gyi rgyud la skyes par bsam mo/ de nas/ lan cig rnyed pa'i dal ba'i rten bzang 'di x x rgyun chad med par skye bar byin gyis rlobs/ /zhes pa'i tshe tshogs zhing rnams las bdud rtsi'i rgyun byung rang gzhan la thim pas sdig sgrib spyi dang khyad par du'ang dal 'byor don che rnyed dka'i rtogs pa khyad par can rgyud la skye ba'i 'gal rkyen sbyong ba sogs sngar bzhin byed/ slar yang/ rgyun chad med par skye bar byin gyis rlobs/ /zhes pa'i skabs su tshogs zhing rnams las rang 'dra gnyis par chad @410b de rang gzhan la thim pas yon tan rnams 'phel zhing rgyas khyad par du shin tu rnyed dka' zhing rnyed na don che ba'i dal 'byor gyi rten la snying po len 'dod kyi rtogs pa khyad par can rang gzhan gyi rgyud la skyes par bsam mo/ /de nas lus srog g.yo ba chu yi chu bur bzhin x x x x x x rtag tu bag dang ldan par byin gyis rlobs/ /zhes pa'i tshe tshogs zhing rnams las bdud rtsi'i rgyun byung/ rang gzhan la thim pas sdig sgrib spyi dang khyad par du'ang skyes bu chung ngu dang thun mong ba'i lam gyi snying po'i rtogs pa khyad par can rgyud la skye ba'i 'gal rkyen sbyang ba sogs sngar bzhin byed/ slar yang/ rtag tu bag dang ldan par byin gyis rlobs/ /zhes pa'i skabs su tshogs zhing rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du tshe 'dir yun ring du mi gnas par nges par 'chi/ nam 'chi la yang nges pa med cing shi ba'i tshe chos ma gtogs gang gis kyang mi phan pa'i tshul dran nas/ sdig spong dge ba sgrub pa sogs kyi snying po'i rtogs pa khyad par can rang gzhan gyi rgyud la skyes par bsam mo/ /de nas/ spyad pas mi ngoms sdug bsngal kun gyi sgo x x don gnyer chen po skye bar byin gyis rlobs/ /zhes pa'i tshe tshogs zhing rnams las bdud rtsi'i rgyun byung/ rang gzhan la thim pas sdig sgrib spyi dang khyad par du'ang skyes bu 'bring dang thun mong ba'i lam gyi snying po'i rtogs pa khyad par can rgyud la skye ba'i 'gal rkyen sbyang ba sogs sngar bzhin byed/ slar yang/ don gnyer chen po skye bar byin gyis rlobs/ /zhes pa'i skabs tshogs zhing rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du rang dang ma rnams kyi rgyud kyi 'khor ba mtha' dag yun ring la shugs drag pa'i sdug bsngal bzod glags med pa sna tshogs kyi 'byung@411a @#/ /gnas su shes nas de las myur ba myur bar thar 'dod kyi blo shugs drag rang gzhan gyi rgyud la skyes par bsam mo/ /de nas/ rnam dag bsam pa de yi drangs pa yi x x sgrub pa snying por byed par byin gyis rlobs/ zhes pa'i tshe tshogs zhing rnams las bdud rtsi'i rgyun byung rang gzhan la thim pas sdig sgrib spyi dang khyad par du'ang lam bslab pa gsum gyi snying po'i rtogs pa khyad par can rgyud la skye ba'i 'gal rkyen sbyang ba sogs sngar bzhin byed/ slar yang/ sgrub pa snying por byed par byin gyis rlobs/ /zhes pa'i skabs tshogs zhing rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du nges 'byung gi bsam pa rnam par dag pas kun nas bslangs pa'i bcas pa dang rang bzhin gyi nyes ltung phra mos kyang ma gos pa'i lhag pa tshul khrims kyi bslab pa dang/ sems dge ba'i dmigs pa gang yang rung bzhig la ji ltar 'dod kyi bar rtse gcig tu mnyam par 'jog nus pa'i lhag pa ting nge 'dzin gyi bslab pa dang/ sgrib gnyis kyi 'ching ba brtsad nas 'phyin par nus pa'i lhag pa shes rab kyi bslab pa ste/ lam bslab pa gsum gyi snying po'i rtogs pa khyad par can rang gzhan gyi rgyud la skyes par bsam mo/ /de nas rang nyid srid mtshor lhung ba ji bzhin du x x byang chub sems mchog 'byongs par byin gyis rlobs/ /zhes pa'i tshe chogs zhi spyi dang/ khyad par rgya chen spyod brgyud kyi bla ma rnams las bdud rtsi'i rgyun byung rang gzhan la thim pas sdig sgrib spyi dang khyad par du'ang byams snying rje byang chub kyi sems kyi rtogs pa khyad par can rgyud la skye ba dang/ tshe 'dir lus sems bde bar 'tsho zhing yun rang du gnas pa'i 'gal rkyen rnams spyang ba sogs sngar bzhin byed/ slar yang/ byang chub sems mchog @412b 'byongs pa byin gyis rlobs/ /zhes pa'i skabs tshogs zhing spyi dang/ khyad par rgya chen spyod brgyud kyi bla ma rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du ma sems can thams cad rang gis rang ma rig pas gnas skabs dang mthar thug gi bde bas 'phongs shing/ yun ring la shugs drag pa'i sdug bsngal sna tshogs kyis thog mtha' bar gsum du mnar ba la bzod glags med pa'i bsam pas rang nyid yal bar dor nas gnas skabs dang mthar thug gi bde bas 'phongs pa'i ma rnams thabs tshul sna tshogs kyis myur ba myur bar gnas skabs dang/ mthar thug gi bde ba la 'god 'dod kyi byams pa dang/ thabs tshul sna tshogs kyis myur ba myur bar sdug bsngal rgyu bcas las skyob 'dod kyi snying rje dang/ ma sems can thams cad kyi don du myur ba myur bar rdzogs pa'i sangs rgyas kyi go 'phang thob 'dod kyi byang chub kyi sems khyad par can rang gzhan gyi rgyud la skye bar bsam la dga' ba bsgom par bya'o/ /de nas/ sems tsam bskyes kyang tshul khrims rnam gsum la x x brtson pa drag pos slob par byin gyis rlobs/ /zhes pa'i tshe tshogs zhing spyi dang khyad par rgya chen spyod brgyud kyi bla ma rnams las bdud rtsi'i rgyun byung rang gzhan la thim pas sdig sgrib spyi dang/ khyad par du phyin drug sogs rgyal sras kyi spyod pa rlabs po che rnams la slob nus kyi rtogs pa khyad par can rgyud la skye ba'i 'gal rkyen sbyong ba sogs sngar bzhin byed/ slar yang/ brtson pa drag pos slob par byin gyis rlobs/ /zhes pa'i skabs tshogs zhing spyi dang/ khyad par rgya chen spyod brgyud kyi bla ma rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du'ang rgyal sras kyi sdom pa khyad par can thob nas/ spyod pa pha rol tu phyin pa drug dang/ bsdu bzhi'i nyams len la slob pa'i snying @413a @#/ /po'i rtogs pa khyad par can rang gzhan gyi rgyud la skyes par bsam mo/ /de nas/ log pa'i yul la g.yeng ba zhi byed cing x x myur du rgyud la skye bar byin gyis rlobs/ /zhes pa'i tshe tshogs zhing spyi dang/ khyad par zab mo lta brgyud kyi bla ma rnams las bdud rtsi'i rgyun byung/ rang gzhan la thim pas sdig sgrib spyi dang khyad par du'ang zhi gnas dang lhag mthong khyad par can gyi snying po'i rtogs pa rgyud la skye ba'i 'gal rkyen sbyang ba sogs sngar bzhin byed/ slar yang/ myur du rgyud la skye bar byin gyis rlobs/ /zhes pa'i skabs tshogs zhing spyi dang/ khyad par zab mo lta brgyud kyi bla ma rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du sems dge ba'i dmigs pa gang yang rung ba gcig la rtse gcig tu mnyam par bzhag pas/ lus sems shin sbyangs kyi bde ba 'dren par byed pa'i zhi gnas khyad par can dang/ de'i ngang nas de kho na nyid kyi don la so sor rtogs pa'i dpyad pa byas stobs kyis drangs pa'i shin sbyangs khyad par can gyis zin pa'i lhag mthong khyad par can dang/ de gnyis zung 'brel gyi ring nge 'dzin gyi rtogs pa khyad par can rang gzhan gyi rgyud la skyes par bsam mo/ /de nas/ thun mong lam sbyangs snod du gyur pa na x x /bde blag nyid du 'jug par byin gyis rlobs/ / zhes pa'i tshe tshogs zhing spyi dang/ khyad par nyams len byin rlabs brgyud pa'i bla ma rnams las bdud rtsi'i rgyun byung rang gzhan la thim pas sdig sgrib spyi dang/ khyad par du myur lam zab mo rdo rje theg pa la 'jug pa'i 'gal rkyen sbyong ba sogs sngar bzhin byed/ slar yang/ bde blag nyid du 'jug par byin gyis rlobs/ /zhes pa'i skabs tshogs zhing spyi dang/ khyad par nyams len byin rlabs brgyud pa'i bla ma rnams las rang 'dra gnyis pa re chad de thim pas yon tan rnams 'phel zhing rgyas/ khyad @414b bar du skal ldan gyi skyes bu rnams kyi 'jug ngogs dam pa theg pa kun las ches mchog tu gyur pa'i rdo rje theg pa'i dbang gi snod rung du gyur te/ sngags bla med kyi lam la 'jug nus pa'i rtogs pa khyad par can rang gzhan gyi rgyud la skyes par bsam mo/ / rang nyid bla med kyi dbang chen thob pa yin na 'di'i skabs su ting nge 'dzin gyi dbang bzhi byin rlabs kyi tshul du len pa yin pas de nyid bla ma'i zhal las shes par bya'o/ /de nas/ de tshe dngos grub rnam gnyis 'grub pa'i gzhi x x srog dang bsngos te bsrung bar byin gyis rlobs/ /zhes pa'i tshe tshogs zhing spyi dang/ khyad par byin rlabs brgyud pa'i bla ma rnams las bdud rtsi'i rgyun byung rang gzhan la thim pas sdig sgrib spyi dang khyad par du'ang rdo rje theg pa'i rtsa ba dang yan lag gi dam tshig dang sdom pa tshul bzhin du bsrung ba'i 'gal rkyen sbyang ba sogs sngar bzhin byed/ slar yang/ srog dang bsngos te bsrung bar byin gyis rlobs/ /zhes pa'i skabs tshogs zhing spyi dang/ khyad par byin rlabs brgyud pa'i bla ma rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du rdo rje theg pa'i rtsa ba dang yan lag gi dam tshig dang sdom pa rnams dngos grub rnam gnyis kyi rtsa ba mthong nas/ srog dang bsngos te tshul bzhin du bsrung nus pa'i snying po'i rtogs pa khyad par can rang gzhan gyi rgyud la skyes par bsam mo/ /de rjes/ de nas rgyud sde'i snying po rim gnyis kyis x x dam pa'i gsung bzhin sgrub par byin gyis rlobs/ /zhes pa'i tshe tshogs zhing spyi dang khyad par byin rlabs brgyud pa'i bla ma rnams las bdud rtsi'i rgyun byung rang gzhan la thim pas sdig sgrib spyi dang khyad par du'ang rim gnyis kyi snying po'i rtogs pa khyad par can rgyud la skye ba'i 'gal rkyen sbyang ba sogs sngar bzhin byed/ slar yang/ dam pa'i gsung bzhin bsgrub par byin gyis rlobs/ /zhes pa'i skabs tshogs zhing spyi dang/ khyad @415a @#/ /bar byin rlabs brgyud pa'i bla rnams las rang 'dra gnyis pa re chad de rang gzhan la thim pas yon tan rnams 'phel zhing rgyas/ khyad par du snod kyi snang ba gang shar thams cad gzhal yas khang dang/ bcud kyi snang ba gang shar thams cad bla ma lha'i rnam rol tu 'char ba'i rim pa dang po'i rtogs pa khyad par can dang/ las rlung d+hU tIr thim pa las byung ba'i thams cad stong pa 'od gsal lhan cig skyes pa'i ye shes dang/ de'i mthus gang shar bde stong gi rnam rol du 'char ba'i rim pa gnyis pa'i snying po'i rtogs pa khyad par can rang gzhan gyi rgyud la skyes par bsam/ de nas/ de ltar lam bzang ston pa'i bshes gnyen dang x x nye bar zhi bar byin gyis rlabs tu gsol/ /zhes gdung shugs drag pos gsol ba rtse gcig tu btab pas tshogs zhing spyi dang/ khyad par mkha' 'gro chos skyong rnams kyi sku'i cha las/ sku gsung thugs kyi byin rlabs thams cad bdud rtsi sna lnga 'od zer dang bcas pa dpag tu med pa'i rnam par babs/ rang dang ma rnams kyi lus ngag yid gsum la zhugs pas thog med nas bsags pa'i sdig sgrib thams cad dang/ khyad par du'ang mdo sngags kyi lam gyi snying po nyams su len pa'i 'gal rkyen gegs byed thams cad sbyangs/ lus dwangs gsal 'od kyi rang bzhin can du gyur par bsam/ slar yang/ nye bar zhi bar byin gyis brlab tu gsol/ /zhes gdung shugs drag pos gsol ba bskyar nas btab pas/ tshogs zhing spyi dang/ khyad par mkha' 'gro chos skyong rnams kyi sku las rang 'dra gnyis pa re chad de rang gzhan la thim pas mthun rkyen tshe dang bsod nams la sogs pa'i lung rtogs kyi yon tan thams cad 'phel zhing rgyas/ khyad par rang la mdo sngags kyi lam bzang po phyin ci ma log par ston pa'i dge ba'i bshes gnyen sogs @416b dang/ lam de nyid tshul bzhin du nyams su len pa'i chos ldan gyi grogs sogs skyes bu dam pa rnams kyi sku tshe yun ring du gnas pa sogs/ phyi nang gi mthun rkyen thams cad rang dang ma rnams la bde blag tu rgyas par byin gyis brlabs par bsams/ de nas tshogs zhing gsal btab cing yan lag bdun gyi sgo nas bsags sbyang spel gsum sogs gong du bsgrub pa de rnams kyi dge ba'i rtsa ba la brten nas/ bdag dang ma rnams tshe 'di nyid la rdzogs pa'i sangs rgyas kyi go 'phang thob par shog cig snyam pa dang/ gal te tshe 'di nyid la ma thob na/ bla ma thub dbang rdo rje 'chang dang/ dngos brgyud kyi bla ma rnams kyis 'bral ba med par rjes su bzung nas skye ba phyi ma dang/ ji ltar bu la yang skye ba bcu drug tshun la bla ma thub dbang rdo rje 'chang gi go 'phang thob nas/ ma sems can thams cad kyang go 'phang de nyid la bdag gcig pus 'god par shog cig snyam pa'i sgo nas/ skye ba kun tu yang dag bla ma dang x x rdo rje 'chang gi go 'phang myur thob shog /ces gdung shugs drag pos gsol ba dang smon lam rtse gcig tu gdab par bya'o/ /de nas tshogs zhing gi gtso bo bla ma thub dbang rdo rje 'chang gi thugs ka'i hUM las 'od zer dpag tu med pa 'phros/ mtha' bskor na bzhugs pa'i zhi khro rab 'byams thams cad la 'phog pas/ mtha' nas rim pa bzhin du bstan bsrung ye shes pa'i tshogs thams cad 'od du zhu nas nyan rang rnams la thim/ nyan rang rnams 'od du zhu nas byang sems rnams la thim/ byang sems rnams 'od du zhu nas phyogs bcu dus gsum gyi sangs rgyas rnams la thim/ de rnams 'od du zhu nas yi dam dkyil 'khor gyi lha tshogs rnams la thim/ de rnams 'od du zhu nas rgya chen spyod brgyud dang/ zab mo lta brgyud kyi bla ma rnams la thim/ de rnams kyang 'og ma 'og ma nas 'od du zhu ba/ gong ma gong ma la thim pa'i tshul gyis mthar byams 'jam dbyangs gnyis la thim/ @417a @#/ /tshul de nyid kyis chos 'brel dngos thob kyi bla ma rnams kyang 'od du zhu nas drin can rtsa ba'i bla ma la thim/ nyams len byin rlabs brgyud pa'i bla ma rnams kyang 'od du zhu nas rgyal ba rdo rje 'chang la thim ste/ re zhig bla ma thub dbang rdo rje 'chang/ byams 'jam dbyangs/ rgyal ba rdo rje 'chang/ drin can rtsa ba'i bla ma dang lnga la dmigs te gsal snang 'don/ de nas byams 'jam dbyangs gnyis 'od du zhu nas/ gtso bo la thim zhing drin can rtsa ba'i bla ma rnam pa de ka'i dang nas gtso bo'i thugs kar sib ti thim/ rgyal ba rdo rje 'chang de nyid gtso bo'i spyi bo nas byon nas thugs ka'i rdo rje 'chang la thim/ gdan pad zla rnams kyang 'od du zhu nas rin po che'i khri chen la thim/ de yang 'od du zhu nas thub pa'i seng khri la thim ste/ re zhig bla ma thub dbang rdo rje 'chang la sems rtse gcig tu gtad nas gsal snang bsgrubs pa'i mthar/ de nyid kyang 'od du zhu nas spyi bo'i drin can rtsa ba'i bla ma la thim zhing/ seng khri pad nyi zla ba'i gdan dang bcas pa yang 'od du zhu nas spyi bo'i bla ma'i pad zla la thim/ de rnams yongs su gyur pa las rang gi spyi bor seng khri pad zla nyi ma'i dkyil 'khor gyi gdan la/ ngo bo rang gi drin can rtsa ba'i bla ma yin pa la/ rnam pa rgyal ba shAkya thub pa zhes pa nas rdo rje skyil krung gi bzhugs pa gsal legs par btab la/ de nyid la dmigs nas/ phun tshogs dge legs bye bas bskrun pa'i sku x x shAkya'i gtso bo de la mgos phyag 'tshal/ /dngos bshams yid sprul mchod pa ma lus 'bul/ /zhes pa nas/ bdag gzhan dge rnams byang chub chen por bsngo/ /gling bzhi nyi zla ri rab rin chen bdun/ /rin chen maNDal kun bzang mchod pa'i tshogs/ /bla ma yi dam dkon mchog gsum la 'bul/ /thugs rjes bzhes nas byin gyis brlab tu gsol/ /zhes yan lag bdun pa maNDal @418b dang bcas pa mdor bsdus phul nas phur tshugs su gsol ba 'debs pa ni/ sku bzhi'i bdag nyid bla ma lhag pa'i lha/ /thub dbang rdo rje 'chang la gsol ba 'debs/ /sgrib bral chos sku'i bdag nyid bla ma lha/ /thub dbang rdo rje 'chang la gsol ba 'debs/ /bde chen longs sku'i bdag nyid bla ma lha/ /thub dbang rdo rje 'chang la gsol ba 'debs/ /sna tshogs sprul sku'i bdag nyid bla ma lha/ /thub dbang rdo rje 'chang la gsol ba 'debs/ /bla ma kun 'dus bla ma lhag pa'i lha/ /thub dbang rdo rje 'chang la gsol ba 'debs/ /yi dam kun 'dus bla ma lhag pa'i lha/ /thub dbang rdo rje 'chang la + sangs rgyas kun 'dus bla ma lhag pa'i lha/ /thub dbang rdo rje 'chang la x dam chos kun 'dus bla ma lhag pa'i lha/ /thub dbang rdo rje 'chang la x dge 'dun kun 'dus bla ma lhag pa'i lha/ /thub dbang rdo rje 'chang la x mkha' 'gro kun 'dus bla ma lhag pa'i/ /thub dbang rdo rje 'chang la x chos skyong kun 'dus bla ma lhag pa'i lha/ /thub dbang rdo rje 'chang la x khyad par skyabs gnas kun 'dus bla ma lhag pa'i lha/ /thub dbang rdo rje 'chang la gsol ba 'debs/ /da bdag dang ma sems can thams cad 'khor bar skyes nas yun ring la shugs drag pa'i sdug bsngal sna tshogs pa zhig myong ba 'di/ /dge ba'i bshes gnyen bsam sbyor gnyis kyi sgo nas tshul bzhin du ma bsten pas lan par 'dug pas/ de bdag dang ma sems can thams cad kyis dge ba'i bshes gnyen bsam sbyor gnyis kyi sgo nas tshul bzhin du bsten nus par bla ma lhas byin gyis brlab tu gsol/ zhes gsol ba btab pas spyi bo'i bla ma lha'i sku'i cha las bdud rtsi sna lnga 'od zer dang bcas pa'i rgyun babs/ rang gzhan sems can thams cad kyi lus sems la zhugs pas/ thog med nas bsags pa'i sdig sgrib thams cad dang/ khyad par dge ba'i bshes gnyen bsam sbyor gnyis kyis tshul bzhin du sten pa la gegs byed kyi sdig sgrib nad @419a @#/ /gdon dang bcas pa thams cad sbyangs/ lus dwangs gsal 'od kyi rang bzhin can du gyur/ tshe dang bsod nams la sogs pa'i yon tan thams cad 'phel zhing rgyas/ khyad par dge ba'i bshes gnyen bsam sbyor gnyis kyis tshul bzhin du bsten nus pa'i rtogs pa khyad par can rang gzhan gyi rgyud la skyes par bsam mo/ /de nas dngos gzhi'i nyams len la 'jug pa yin pas/ de'i tshul ni/ spyi bor bla ma lha sgom bzhin pa'i ngang nas dge ba'i bshes gnyen tshul bzhin du bsten pa'i phan yon dang/ ma bsten pa'i nyes dmigs rnams snying thag pa nas bsam la/ bla ma thub pa'i dbang po'i thags ka nas chos 'brel dngos thob kyi bla ma rnams spros te/ mdun gyi nam mkhar bzhugs pa la dmigs nas de rnams sangs rgyas dngos yin pa'i rgyu mtshan dang/ de rnams la skyon rtog gi blo skyes pa rnams rang skyon 'ba' zhig yin pa'i tshul dang/ de rnams rang nyid la dus gsum gyi sangs rgyas las kyang bka' drin che tshul sogs lam rim che chung nas gsungs pa rnams zhib rgyas su bsam ste/ des na bla ma sangs rgyas su mthong ba dang/ skyon rtog gi blo skad cig kyang mi skye zhing ci mdzad yon tan du mthong ba'i dad pa dang bka' drin rjes su dran pa'i gus pa chen po bde blag tu skye ba dang/ rnyed pa zang zing 'bul ba dang/ bkur sti phyag g.yog byed pa dang/ bka' bzhin sgrub pa sogs dge ba'i bshes gnyen bsam sbyor gnyis kyi sgo nas tshul bzhin du bsten nus pa bla ma lhas byin gyis rlabs tu gsol/ zhes gsol ba shugs drag tu btab pa'i spyi bo'i bla ma lha'i sku las bdud rtsi sna lnga 'od zer dang bcas pa'i rgyun babs rang gzhan sems can thams cad kyi lus sems la zhugs pas/ thog med nas bsags pa'i sdig sgrib thams cad dang/ khyad par du'ang dge ba'i bshes gnyen bsam sbyor @420b gnyis kyi sgo nas tshul bzhin du bsten pa'i snying po'i rtogs pa khyad par can rgyud la skye ba'i 'gal rkyen sbyangs lus dwangs gsal 'od kyi rang bzhin can du gyur/ tshe dang bsod nams la sogs pa'i lung rtogs kyi yon tan thams cad 'phel zhing rgyas/ khyad par du dge ba'i bshes gnyen bsam sbyor gnyis kyi sgo nas tshul bzhin du bstan nus pa'i rtogs pa khyad par can rang gzhan gyi rgyud la skyes par bsam mo/ /de nas mjug tu ji ltar bya ba'i tshul ni spyi bo'i bla ma lha la dmigs nas/ bla ma rgyal ba shAkya thub pa la phyag 'tshal lo/ /mchod do skyabs su 'chi'o zhes nyer gcig sogs lan mang du gsol ba btab pas bla ma thub pa'i dbang po las rang 'dra gnyis pa zhig chad nas rang nyid la thim pas rang nyid thub pa'i dbang po'i skur lam gyis gyur/ rang thub pa'i dbang por gsal ba'i sku las 'od zer 'phros/ mtha' bskor na yod pa'i sems can thams cad la phog pas sems can thams cad kyang thub pa'i dbang po'i go 'phang la bkod nas/ rang dang sems can thams cad thub pa'i dbang por gsal ba'i thugs kar zla ba'i dkyil 'khor gyi steng du a dkar po hUM ser pos mtshan pa'i mtha' bskor du/ oM mu ni mu ni mhA mu ni ye swAhA/ zhes pas bskor ba le dmigs nas bzlas pa ci mang bya/ mjug tu dge ba 'di yi myur du bdag /bla ma sangs rgyas 'grub gyur nas/ /'gro ba gcig kyang ma lus pa/ /de yi sa la 'god par shog /ces smon lam gdab cing/ gzhan yang de las byung ba'i dge rtsa rnams bzang po spyod pa dang/ smon lam bdun cu pa la sogs pas rang gzhan gyi gnas skabs dang/ mthar thug gi smon gnas rnams su 'dun po drag pos bsngo bar bya'o/ /de nas thun mtshams su yang bshes gnyen bsten tshul gyi chos bskor ston pa'i gsung rab dgongs 'grel dang bcas pa lta ba dang/ dran shes dang ldan pa'i sgo nas dbang po'i sgo sdom pa sogs thun mtshams kyi@421a @#/ /bya ba rnams la 'jug go /de bzhin du lam lhag ma rnams kyi skabs su'ang/ bshes gnyen bsten tshul gyi dmigs bskor dang lam rang rang gi dmigs rnam brje ba tsam las thun mtshams kyi nyams len gong bzhin bya'o/ /de yang bshes gnyen bsten tshul la myong ba legs par thon pa na dal 'byor la rtsal du ston nas blo sbyong ba sogs go rim ma phyug pa gnad che'o/ /'dir ni dngos gzhi dang mjug dang/ thun mtshams su ji ltar bya ba'i tshul rnams mgo smos pa tsam yin gyi zhib par 'jam mgon bla ma'i lam rim che chung las shes par bya'o/ /de ltar sbyor dngos mjug gsum tshang ba'i sgo nas bshes gnyen bsten tshul nas zung 'jug gi bar gyi lam gyi rim pa rnams myong khrid du byas te nyin re bzhin thun bzhi'am/ gsum mam/ gnyis sam/ ma mtha' yang thun gcig tsam re ma chag par thugs dam gyi mthil du mdzad na/ dal 'byor gyi rten la snying po lon pa rang yin pas thar 'dod kyi skyes bu rnams kyis brtson 'grus chen po'i sgo nas 'bad par mdzod cing/ /smras pa/ dI paM ka ra'i gdams ngag bdud rtsi'i rgyun/ /mtshungs med drin can bshes gnyen mchog rnams kyi/ /thugs kyi bum par chags shing lung pa las/ /dman blo'i skal bar thob pa'i man dgu 'di/ /skal bar don gnyer yod na myur longs la/ /dal 'byor rten bzang don med mi gtong bar/ /lus srog rtswa rtse'i zil pa ltar dgongs te/ /'du 'dzis dben pa'i gnas su don sems mdzod/ /mi yi lus 'di shin tu rnyed dka' zhing/ /rnyed kyang chos 'byor yul du gnas pa dkon/ / gnas kyang bsnyan dang mjal ba srid mtha' tsam/ /srid kyang log pa'i lam du phyogs pa mang/ /de phyir tshang la ma nor gdams ngag gi /rin chen 'di 'dra ci dgar thob dus 'dir/ /thos bsam sgom la brtson pa'i lcags kyu yis/ /rang rgyud glang @422b smyon thul ba lhur len mdzod/ /skye 'gro'i bde sdug shing rta'i 'phang lo'i zla/ /dgra gnyen glog gi 'du byed la 'gran zhing/ /longs spyod g.yo ba ston ka'i sprin bzhin dang/ /tshe srog rlung nang mar me'i rjes 'gro na/ /ka ye grogs dag mi bzang 'khor ba 'dir/ /yid brtan rung ba rdul tsam ma mchis pas/ /srid las nges par 'byung ba'i skyo shas kyis/ /gtan gyi mdun ma tshags su chung par mdzod/ /de yang 'khor bar 'ching tshul mi shes par/ /mi tshe hril por rtse gcig sgom gyur kyang/ /legs legs thar pa'i sgor tshud mi srid pas bden bzhi'i blang dor gnad la dpyad sgom mdzod/ /khyad par sgo gsum dge ba'i skyid tshal du/ /sems bskyed bsgo ba'i 'bras bu g.yur za bas/ /pha ma'i 'gro rnams mgron du nyer bkugs pa'i/ /theg mchog chos kyi dga' ston spel bar mdzod/ /sngon goms ma rig 'khrul pas nyer bslad phyer/ /da lta'i sems 'di 'khrul pa'i rang bzhin te/ /chos kun 'khrul pa'i blo 'dis bcos tsam las/ /gdod nas rang bzhin dben tshul mkhyen par mdzod/ /sngags spyod bzhed na sngags kyi rtsa ltung sogs/ /dam sdom tshul bzhin shes byas srog ltar srungs/ /gang snang bde stong lha yi dkyil 'khor du/ /mngon sum mos la tha mal blo sbyong mdzod/ /gcig tu dge ba'i lam la sbyor byed pa'i/ /gdams pa 'di yi dag bas 'gro kun gyi/ /sems kyi ri dgas srid zhi'i 'ching ba las/ /grol te sku bzhi'i nags su rtsen par shog /ces byang chub lam gyi rim pa'i sngon 'gro sbyor ba'i chos drug gi khrid yig 'jam dbyangs bla ma'i dgongs rgyan zhes bya ba 'di ni ring mo zhig nas ngos rang 'di lta bu'i lam mchog tshang la ma nor ba la bag chags 'jog cing rgyun du nyams len du khyed chog ba'i khrid yig zhig byung na snyam pa'i yid 'dun che ba'i thog /nye char sdom brtson sde snod 'dzin pa mnga' grwa'i dge bshes ljang phreng ri khrod pa thogs med don grub nas kyang nan gyis bskul zhing/ 'di kha'i sgrub sdi'i dge 'dun pa sogs dang skal mnyam gzhan la'ang phan na snyam ste dus gsum rgyal ba'i mkhyen @423a @#/ /brtse nus gsum yon tan 'phrin las dang bcas pa'i ngo bo skyabs gcig bka' drin mtshungs zla ma mchis pa rje bla ma srid zhi'i gtsug rgyan yongs rdzogs bstan pa'i mnga' bdag don gyi slad du mtshan nas smos te bdag gi mkhan rin po che rigs kun khyab bdag rdo rje 'chang dngos rje btsun blo bzang ye shes bstan pa rab rgyas dpal bzang po dang/ rje btsun rtsa ba'i bla ma blo bzang rnam grol dpal bzang po gnyis kyis zhabs rdul yun ring po nas spyi bos blangs shing bla ma dang lhan cig gnas pas lam 'di'i man ngag mtha' dag legs par ma nos pa sogs thugs rje dang bka' drin kho nas 'tsho ba'i ke'u tshang sprul ming 'dzin pa blo bzang 'jam dbyangs smon lam kyis bla ma dam pa'i man ngag gis brgyan te dben gnas ke'u tshang ri khrod du dang bas sbyar ba'i yi ge pa ni rang gi slob ma dben sa pa dge slong rnam rgyal bkra shis kyis bgyis pa'o// //bkra shis/ @424b