@767a @#/ /tshad ma'i lam bsgrigs chos kyi rgyal po tsong kha pa chen pas mdzad pa bzhugs so/ / @768a @#/ /oM swa sti/ rje btsun bla ma rnams la phyag 'tshal lo/ /de la 'dir rigs pa'i bstan bcos kyi de kho na nyid gtan la 'bebs par byed pa la/ tshad ma'i mtshan nyid ston pa'i bstan bcos brtsams pa'i dgos pa/ dgos pa de bstan bcos la rag las tshul/ dgos pa de ldan gyi bstan bcos la gces par bzung ba/ bstan bcos de'i brjod bya'i lus gtan la dbab pa'o/ /dang po la gnyis/ dgos pa la log rtog dgag pa dang/ yang dag pa'i dgos pa bstan pa'o/ /dang po la gsum/ grol ba don gnyer la ltos te dgos med kyi log rtog dgag /yul gyi khyad par la ltos te dgos med kyi log rtog dgag /dgos pa yod kyang dman par 'dod pa dgag pa'o/ /dang po la gnyis/ rtog ge'i bstan bcos su bshad pa la 'khrul pa'i log rtog dgag /nang rig pa'i bstan bcos las logs su bshad pa la 'khrul pa'i log rtog dgag pa'o/ /dang po ni/ kha cig na re/ tshad ma'i bstan bcos 'di dag ni phyi'i spros pa tsam gcod pa'i rtog gi tsam yin pas grol ba don gnyer la nye bar mkho ba med do snyam pa ni log rtog chen po yin no/ /de la rtog ge la gnyis te/ chos 'di las phyi rol tu gyur pa rnams kyi 'khor ba las grol bar byed pa'i lam ston par byed pa'i ston pa drang srong gling skyes la sogs pa rnams kyis dngos po'i de kho na nyid khong du @769a @#/ /ma chud par rtog pas btags pa tsam gyis grol lam rnam par bzhag pa la rtog ger byas pa dang/ yang mdo sde rgyan du/ rtog ge brten cing ma nges la/ /ma khyab kun rdzob skyo ba can/ /byis pa la ni brten par 'dod/ /ces de kho na nyid sgra dang rtags la brten nas rtogs pa dang/ rtogs su zin kyang gzhan du 'gyur bas ma nges pa dang/ ji lta ba dang ji snyed pa mtha' dag la blo mi 'jug bsam khyab pa dang/ de kho na nyid mngon du ma gyur par rags pa tsam yul du byed pas kun rdzob pa'i yul can dang/ spobs pa gtugs par 'gyur bas skyo ba can te mtshan nyid lnga dang ldan pa de kho na nyid rtog dpyod tsam gyis yul du byed pa la rtog ger bzhag pa gnyis las/ dang po yin pa'i phyir grol ba don gnyer la nye bar mkho ba med do zhes zer na/ rtags ma grub pa yin te/ ston pa bcom ldan 'das kyis shes bya ji lta ba dang/ ji snyed pa ma lus pa mngon sum du thugs su chud nas bstan pa'i gsung rab kyi de kho na nyid phyin ci ma log par rigs pa'i bstan bcos 'dir gtan la 'bebs pa yin pa'i phyir ro/ /phyi ma yin pa'i phyir grol ba don gnyer la nye bar mkho ba med do zhes zer na/ khyab pa ma grub ba yin te/ de ltar na/ sbyor lam chos mchog la sogs pa rnams kyang de kho na nyid rtog dpyod tsam gyis yul du byed dgos pa'i phyir/ @770b grol ba don gnyer la nyer mkho med par 'gyur la/ de ltar na mthong lam yan chad rgyu med du skye bar 'gyur ba dang/ de ltar dam bca' ba'i blo yang grol ba don gnyer la mi mkho bar 'gyur te/ rtog dpyod tsam yin pa'i phyir ro/ /gnyis pa ni/ kha cig na re/ sde bdun po 'di dag na gtan tshigs rig pa yin gyi nang rig pa min pas grol ba don gnyer la nye bar mkho ba med do zhes zer ba yang thar lam gyi rtsa ba gcod par byed pa yin te/ gtan tshigs rig pa ni/ rang phyogs sgrub par byed pa'i sgrub byed 'god lugs sogs dang/ gzha phyogs sun 'byin tshul sogs brda sprod pa dang thun mong ba la grags pa rnams kyang yin mod/ nang rig ni nang gi sems rgyud 'di'i steng gi mi 'dod pa'i phyogs kyi rgyu 'bras bu dang bcas pa dang/ da 'gog par byed pa'i rgyu 'bras bu dang bcas pa sde snod dam/ bstan bcos gang gis rig par byed pa rnams yin la/ de la 'dir ni lhag pa shes rab kyi bslab pa gtso bor gtan la 'bebs par byed pas mngon pa'i bstan bcos yin zhing/ rang gi phyogs sgrub par byed pa yang/ mi rtag bdag med sogs gtan tshigs yang dag gi sgo nas gtan la 'bebs par byed pas na/ nang rig dang gtan tshigs rig pa la 'gal ba ga la yod/ des na nang rig kho na yin pa 'dul ba mdo rtsa ba lta bu/ gnyis ka yin bsde bdun lta bu/ gtan tshigs rig pa rkyang pa yin pa brda sprod la grags pa phyir rgol gyi rtsod tshul tsam ston pa rnams so/ /gnyis pa yul gyi khyad par la ltos te log rtog dgag pa ni/ kha cig na re/ phyi rol pa yod pa'i yul du bstan pa la log par rtog pa tshar gcod dgos pas/ tshad ma'i bstan bcos nye bar mkho ba yin gyi/ bod lta bu la de lta bu'i bstan bcos dgos pa med do zhes zer ba ni mi rigs te/ de yang phyi rol pa rnams kyis phung po la bdag tu yod pa sgro btags nas grol ba don du gnyer ba rnams la slu ba med na bstan pa bsrung ba'i phyir yang dgos pa med par 'gyur la/ 'dir yang sems can rnams kyi rgyud la phung po gtsang bde@771a @#/ /rtag bdag tu sgro 'dogs pa'i 'khor bar 'ching byed yod na tshang ma'i bstan bcos shin tu dgos pa dang bcas par 'gyur te/ de dag gi zhen yul rigs pas legs par sun phyung nas/ thar pa bla na med pa'i lam phyin ci ma log sar gtan la 'bebs par byed pa yin pas/ grol ba don gnyer la nye bar mkho ba'i 'jug ngogs dam par 'gyur ro/ /gsum pa dgos pa yod kyang dman par 'dod pa dgag pa ni/ kha cig na re ! dgos pa med pa min te/ 'gal 'brel chod nas lam gzhan la dmigs phyed pa'i grogs tsam du 'gyur bas/ tshwa dang 'dra ba yin no zhes zer ba yang mi rigs te/ 'dir ni mngon par mtho ba dang nges par legs pa'i lam phyin ci ma log par gtan la 'bebs par byed pa yin pas/ gang gton la dbab par bya ba'i gzhi 'di las mchog tu gyur pa gzhan zhig yod pa yang bstan dgos so/ /gnyis pa yang dag pa'i dgos pa bstan pa ni/ thub pa nyag gcig grol ba don gnyer la slu med kyi tshang ma'i skyes bur bsgrub par bya ba'i phyir du yin la/ de yang ston pa de'i bstan pa skyon med par bsgrubs pa'i sgo nas sgrub par byed pa yin no/ /bstan pa la lung gi bstan pa ni/ 'brel pa dang ni rjes mthun thabs/ /skyes bu'i don ni brjod byed dag /yongs brtags dbang du byas yin gyi/ /de las gzhan pa'i dbang byas min/ zhes 'chad pa ltar/ grol ba don gnyer gyi 'dod bya'i don dang/ dgos pa de bsgrub nus pa'i rjes mthun gyi thabs dam pa dang/ de yang 'brel chags su ston par byed pa'i ngag khyad par gsum ldan tshad ma'i sgo nas dpyad pa gsum gyis yongs su dag pa zhig yin la/ de'i don brjod par bya ba'i don yang/ gnas skabs kyi 'dod bya mngon mtho dang/ mthar thug gi thob bya nges legs thabs dang bcas pa rnams su 'dus shing/ de yang skye ba'i rim pa la dang por mngon mtho 'byung yang/ tshad mas 'grub pa'i rim pa la/ dang por nges legs bsgrubs nas/ de'i rjes su mngon mtho sgrub dgos pa yin te/ gtso bo'i don la mi slu'i phyir/ /gzhan la'ang rjes su @772b dpag pa yin/ zhes 'chad pa ltar ro/ /de la spyir rigs pa'i bstan bcos kyi dgos pa ni/ mngon par 'dod pa'i don dam bcar byas nas/ tha snyad pa'i tshad mas bsnyon mi nus pa rnams la ma thug gi bar legs par sgrub pa'i tshul 'chad pa yin no/ /'dir yang tshu rol mthong ba rnams la/ lkog tu gyur pa'i nges legs dang/ shin tu lkog tu gyur pa'i mngon mtho bsgrub byar byas nas/ de'i sgrub byed bar ma chad pa'i phyir lhan skyes kyi tshad ma la mthar thug par sgrub par byed pa yin no/ /mdor na ston pa dang/ de'i bstan pa dang/ de bsgrub pa'i grogs dge 'dun dkon mchog gsum la mtha' gzhan du srid pa'i dogs pa bcad nas/ tshad ma'i sgo nas skyabs gnas la nges pa brtan po skyad par byed pa yin no/ /'di las gzhan du 'chad na/ sdu ba'i rdog po la rkang pa'i rten 'cha' ba yin no/ /gnyis pa dgos pa de bstan bcos la rag las pa'i tshul ni/ des na sngar bshad pa'i mngon mtho nges legs ni rtags yang dag gi sgo nas sgrub dgos shing/ /de yang rtags kyi tshul mthar thug pa mngon sum gyis grub dgos la/ de lta bu de bar ma chad par rigs pa yang dag gi sgo nas/ rtog ldan 'jug pa'i yan lag tu 'gyur ba ni/ rigs pa'i bstan bcos 'di lta bu kho na yod med kyi rjes su 'gro sdog byed pa yin no/ /gsum pa dgos pa de ldan gyi bstan bcos la gces par bzung ba ni/ 'khor ba las thar pa don du gnyer ba rnams kyis ni/ 'khor ba'i rtsa ba gcod byed phyin ci ma log pa ston pa'i bstan bcos 'di lta bu la thos pa dang/ bsam pas gces spras su bzung bar rigs so/ /bzhi pa bstan bcos kyi brjod bya'i lus gtan la dbab pa la/ spyir bshad pa dang/ so sor bshad pa gnyis las/ dang po ni/ rigs pa'i sgor/ mngon sum dang ni rjes su dpag /ltar snang bcas pa bdag rig phyir/ /sgrub pa dang ni sun 'byin dag /ltar snang bcas pa gzhan rtogs phyir/ /zhes bshad pa ltar/ spyir bstan bcos phal mo che rang nyid kyis gzhal bya nges pa'i thabs dang/ gzhan la rtogs pa bskyed pa'i thabs gnyis kyi sgo nas 'chad cing/ de bzhin du 'dir yang rtog ge'i lus yongs su rdzogs pa de yang gnyis su 'dus te/ tshig don brgyad kyi mngon rjes yang dag ltar snang @773a @#/ /bzhi po rang nyid kyis gzhal bya nges pa'i thabs su 'dus la/ sgrub pa dang sun 'byin yang dag ltar snang bzhi po gzhan la rtogs pa bskyed pa'i thabs su 'dus so/ /des na le'u yang gsum du 'dus te/ mngon sum dang/ rang don dang/ gzhan don no/ /kun btus la le'u drug yod pa dang/ rnam 'grel la le'u bzhi yod pa la 'gal bar mi bsam ste/ dpe brtag pa dang sel ba brtag pa gnyis rang don le'ur 'dus shing/ ltag chod brtag pa gzhan don du 'dus la/ rnam 'grel le'u gnyis pa don dam pa'i tshad ma rnal 'byor mngon sum bye brag tu gtan la 'bebs pa yin pas mngon sum du 'du'o/ /de yang shes bya'i gnas tshol ban dang por gtan la 'bebs byed kyi tshad ma yongs su dag pa la rag las la/ nges nges par bya ba'i skyes bu'i don gyi gtso bo yang dngos su rjes dpag gis nges shing/ de yang mngon sum la rag las pas mngon rjes ltar snang gi rjes su 'brangs na skyes bu slu bar 'gyur bas/ de lta bu'i gol sa legs par bcad nas skyes bu mi slu ba'i mtshan nyid yang dag nges par bya dgos so/ /tshad ma gtan la phab pa yang phongs nas byed pa min gyi rnam nges las/ phan pa dang mi phan pa thob pa dang spong ba ni yang dag pa'i shes pa sngon du 'gro ba can yin pas na de mi mkhas pa rnams la bstan pa'i don du 'di brtsam mo/ /zhes bshad pa ltar gnas skabs dang mthar thug gi phan pa mtha' dag sgrub cing nyes tshogs mtha' dag ldog pa'i phyir du yin la/ de yang nyes tshogs kyi rtsa ba 'di'i zhen yul tshad mas med par nges pa dang/ legs tshogs kyi rtsa ba yang tshang mas grub pa la nges par ltos dgos pa yin no/ /gnyis pa la/ rang nyid kyis gzhal bya nges pa'i thabs dang/ gzhan la rtogs pa bskyed pa'i thabs gnyis so/ /dang po la/ nges par bya ba'i yul ngos bzung ba dang/ de nges par byed pa'i thabs gnyis so/ /dang po ni/ thub pa bcom ldan 'das grol ba don gnyer la mi slu ba'i chad mar sgrub par byed pa yin la/ de yang de'i bstan pa skyon med par sgrubs pa'i sgo nas shes par byed pa yin na/ /de ltar yang kun btus su/ tshad mar gyur pa 'gro la phan bzhed pa/ / @774b ston pa bde gshegs skyob la phyag 'tshal te/ /zhes pa'i don lugs las 'byung ba dang lugs las bzlog pa'i sgrub tshul gnyis su rig par bya'o/ /de la lugs 'byung gis ni/ ston pa lam gang nas gshegs pa'i lam de nyid ston par byed pa yin la/ de ltar gshegs pa cis shes snyam na/ lugs las bzlog pa'i tshul gyis de ltar byon pa'i shes byed ston pa yin no/ /de yang ston pa ni bde gshegs dang skyob pa ste don gnyis phun sum tshogs pa'i bdag nyid can yin la/ de yang phyi rol pas 'dod pa ltar rtag pa rang byung gi tshad ma ma yin gyi/ rgyu rkyen gyis gsar du bsgrubs pa yin pas de'i go 'phang sngar ma thob pa rnams kyis kyang thob par byar yod do zhes shes pa'i phyir du tshad mar gyur pa zhes smos so/ /de'i rgyu mtshan de yang gang yin zhe na/ bsam pa phun sum tshogs pa 'gro ba mtha' dag la phan par bzhed pa dang/ sbyor ba phun sum tshogs pa bdag med rtogs pa'i shes rab gnyis so/ /de la dang por ston pas 'gro ba mtha' dag sdug bsngal dang ldan pa dang/ bde ba dang bral ba shas ma bzod nas 'gro ba mtha' dag sgrol bar dam bcas shing de yang las dang po pa'i gnas skabs de lta bus sgrub mi nus pas de nus pa'i go 'phang sgrub dgos la/ de yang rgyu med na mi 'byung bas bdag med rtogs pa'i shes rab la rag las par mthong ba yin no/ /thob bya mi gnas pa'i mya ngan las 'das pa de yang lam gyi gnas skabs su zhi ba'i mtha' 'gog byed phan bzhed pa dang/ srid pa'i mtha' 'gog byed bdag med rtogs pa'i shes rab gnyis goms pa la rag las pa yin no/ /'dir gang zag gi bdag med tsam zhig bstan gyi /chos kyi bdag med ma bstan pa ni le'u gsum par 'chad pa'i rgyu mtshan gyis min gyi / grol ba don gnyer la ltos te 'khor ba'i 'jug ldog ma lus pa mkhyen pa'i ston pa tsam gyis chog pas de'i dbang du byas pa yin no/ /'on snying rje chen po yang mi ston par 'gyur ro zhe na/ skyon med de/ de med na grol ba tsam don gnyer la nye bar mkho ba'i ston pa yang mi 'byung bas so/ /des na 'dir bstan pa'i shes sgrib yang bden bzhi'i gnas lugs la rmongs pa'i nyon mongs can ma @775a @#/ /yin pa'i mi shes pa la bya'o/ /thub pa gang la tshud mar gyur pa'i tshul la/ rtags dgod/ phyir rgol ngos bzung/ don gang la mi slab ri tshal lo/ /dang po ni/ thub pa sangs rgyas bcom ldan 'das chos can/ grol ba don gnyer la tshad ma'i skyes bu yin te/ grol ba don gnyer la ltas te mi slu ba dang ma shes don gsal gnyis dang ldan pa'i skyes bu yin pa'i phyir/ gnyis pa ni/ gzhan snga yin gyi rang sde min te/ de dag la grub zin pa'i phyir/ de yang lung drangs pas sgrub mi nus pas/ dngos po stobs zhugs gyi rigs pas bsgrub par bya ba yin no/ /gsum pa ni/ gang la mi slu ba ni/ grol ba don gnyer gyi 'dod bya mya ngan las 'das pa thabs dang bcas pa dang/ spang bya sdug bsngal rgyu dang bcas pa yin la/ de la ston pa gzhan tshad ma yin pa dgag pa dang/ ston pa sangs rgyas nyag gcig mi slu bar sgrub pa dang/ sbyor ba skor gcig po de'i tshul bsgrub pas skyes bu gsum gyi lam gyi rim pa ji ltar 'phel ba'i tshul lo/ /dang po ni phyir rol pa rnams la 'gal 'du'i dbye ba mtha' yas kyang gtso bo ni gnyis te/ kun nas nyon mongs la brtan pa dang/ rnam byang la brtan pa'o/ /dang po ni/ rgyang 'phen dang/ dpyod pa ba ma gtogs phyi rol pa rnams kyis kyang thar pa khas len la/ de yang 'khor bar skye ba'i rgyun chad par 'dod pa dang/ de dag thams cad kyi rgyu'i rtsa ba gtso bo dang dbang phyug sogs rtag pa la 'dod pa 'gal te/ rtag la ldog pa med pa'i phyir/ /nus ba nyid kyang rtogs par dka'/ /zhes bshad pa ltar rgyu rtag na 'bras bu ldog par 'dod kyang mi rung ste/ rgyu ldog pa med pa'i phyir ro/ /rgyu 'bras nges byed kyi tshad ma yang med de/ dang por me du gnyis ka dmigs su rung ba mi dmigs pa las/ de'i rjes su mi dmigs/ de'i rjes su du ba dmigs/ de rjes me ma dmigs/ de rjes du ba ma dmigs pa ltar rtag pa la gsar skyes dang gsar du ldog pa mi rung ba'i phyir te/ rtag dngos kyis mnon pa'i yul dang dus dang rang bzhin khegs su chug kyang dngos po ras 'ga' bar 'gyur ba'i phyir ro/ /rnam byang la brten pa'i 'gal ba ni/ sdug bsngal dang bral ba thob par 'dod pa dang/ bdag yod par rigs @776b pas sgrub pa gnyis 'gal te/ bdag tu 'dzin pa ni sdug bsngal kun gyi rtsa ba yin pa'i phyir/ de yang/ gang zhig bdag mthong de la ni/ zhes sogs bshad pa ltar/ bdag tu 'dzin pa yod na/ bdag la chags pa'i sred pa dang gis sel/ de las bdag gyi bde ba la sred pa dang/ de yang gzhan gang la yang ltos med du sgrub mi nus par mthong nas/ bdag gi bde ba'i sgrub byed dbang sogs bdag gi ba la sred pa dang/ de la sa de sgrub pa'i phyir du sgo gsum gyi las mngon par 'du byed de/ las de dag gis bde 'gro dang ngan 'gror skye bar byed pas/ des na bdag la mngon chags pa/ /de srid de ni 'khor bar 'gyur/ /zhes so/ /gnyis pa de la thub pa nyag gcig mi slu bar sgrub pa ni/ skom pas gdungs pa chu la don gnyer skye ba ltar 'khor ba'i nyes dmigs bsams nas 'khor ba'i sdug bsngal gyis gdungs pa mthong ba na/ sdug bsngal zhi ba la thob 'dod skye ba yin no/ /de lta bu'i grol 'don gter la ston pas bden bzhi bka' stsal te/ sdug bsngal dang kun 'byung dang 'gog pa dang lam mo/ /de yang skye ba'i rim la kun 'byung dang lam dang por skye zhing sdug bsngal dang 'gog pa phyis 'byung yang/ tshad mas rtogs pa'i rim pa ni/ sdug bsngal dang por rtogs shing lam sgom par mthar rtogs so/ /de la dang por sdug bsngal gyi rang spyi'i mtshan nyid bsams pas de bral byar rtogs par 'gyur zhing/ sdug bsngal rgyu dang de mi rtog /la sogs rang bzhin rtog par mdzad/ /ces bshad pa ltar ro/ /sdug bsngal rang log mi nus shing de'i rgyu log ba'i stobs kyis ldag dgos par mthong nas/ 'di'i rgyu ci yin zhes brtag pa na las nyon gnyis kun 'byung du khong du chud par 'gyur ro/ /de yang dgag nus mi nus brtags pa na/ rgyu yi ngo bo rtogs pa'i phyir/ /de mi mthun phyogs kyang nges 'gyur/ /zhes bshad pa ltar bdag med pa nges pa'i sgo nas rgyu kun 'byung spang nas su mthong zhing de ltar na/ de ni gtan du nga min ste/ /rgyu la gegs sogs srid phyir ro/ /zhes bshad pa ltar 'bras bu sdug bsngal 'gog pa dang/ 'gog pa de mngon du byed nus par mthong ba yin no/ /dad par sdug bsngal gyi mtshan nyid shes pa'i dus nas @777a @#/ /mi rtag sdug bsngal stong bdag med bzhi khong du chud pa'i phyir/ bdag 'dzin 'gog nus par mthong bas kun 'byung spang byar dus gnyis par ston pa mi rigs so zhe na/ skyon med de/ kun 'byung spong dgos pa dang spangs nus pa gnyis dang por mthong nas da ni gdon mi za bar kun 'byung spang bar bya ste/ de ltar dgos shing nus pa'i phyir snyam du bsams nas dus gnyis par dam bca' ba yin no/ /sdug bsngal bral byar dang po mthong ba na/ de dang bral ba mngon du bya dgos par shes pa de ma thag skye bas 'gog pa dus gnyis par ston par rigs so zhe na/ mngon du bya dgos par shes kyang mngon du byed nus par tshad mas mthong ba ni dus gsum pa la nges par ltos pa yin no/ /de mngon du byed pa yang lam goms par byed pa la ltos pas de'i rjes su lam sgom par byed pa yin no/ /de la lam ni yan lag brgyad du 'dus shin de yang bslab pa gsum du nges pa yin te/ yang dag pa'i lta ba dang/ rtog pa dang/ rtsol ba dang/ dran pa bzhi shes rab kyi bslab pa dang/ ting nge 'dzin ni sems kyi bslab pa dang/ yang dag pa'i ngag /las kyi mtha'/ 'tsho ba gsum tshul khrims kyi bslab par nges so/ /srid pa'i rtsa ba gcod byed ni bdag med stogs pa'i shes rab nyid yin la/ de yang sems rtse gcig pa'i zhi gnas la nges par ltos te/ thos bsam rgyang pas de kho na nyid ji lta ba bzhin phigs par dka' ba'i phyir ro/ /zhi gnas khyad par can la brten nas bdag med bsgom pa na/ bdag med nges pa de nyid yul bdag med la zug pa lta bur dang por skyes pa na/ bdag med rtogs pa'i shes rab lhag mthong gis bsdus pa'i sgom byung dang sbyor lam drod skyes pa zhes bya'o/ /thos bsam rkyang pa'i dus na nges pa de nyid dang rgyangs chad pa'i tshul du so sor snang ba yin no/ /zhi gnas khyad par can de yang lhag pa tshul khrims kyi bslab pa sngon du 'gro ba la ltos te/ ston pas 'jug ldog gi tshul khrims gnyis su bcas pa la dran pas ma yengs par byas nas nam yang mi 'da' zhing/ brgya la 'das na yang shes bzhin gyis ngos bzung nas phyir 'chos par byed pas/ dran shes stobs ldan bskyed la/ de gnyis @778b bying rgod kyi gnyen por kha spos pa tsam mo gyis zhi gnas khyad par can skyed pa yin no/ /'phags lam yan lag brgyad po de 'khor lo dang chos mtshungs te/ shes rab kyis bsdus pa ni gcod par byed pas rtsibs dang chos mtshungs la/ ting nge 'dzin ni dmigs pa la sems 'dzin pas mu khyud dang chos mthun no/ /tshul khrims ni lte ba dang mtshungs so/ /de lta bu'i lam bslab pa gsum 'byung ba'i rgyu mtshan yang/ spang bya nyon mongs la mngon gyur dang sa bon gnyis/ dang po la/ nyes spyod dngos su kun nas slang nus pa dang mi nus pa gnyis te/ de dag rim pa bzhin du bslab pa gsum gyis spong ba yin no/ /gsum pa sbyor ba skor gcig po de'i tshul bsgrub pas skyes bu gsum gyi lam gyi rim pa ji ltar 'phen pa'i tshul ni/ sdug bsngal la/ ngan 'gror nyid mtshams sbyor ba dang/ bde 'gror nyid mtshams sbyar ba gnyis yod la/ de'i rgyu kun 'byung la yang ngan 'gro bskyed pa dang/ bde 'gro bskyed pa gnyis so/ /des na 'gog pa dang lam la yang gnyis gnyis su 'gyur ba yin no/ /de ltar na ngan 'gro'i rgyu 'bras gnyis dang/ de spong ba'i lam dang/ de 'gags pa'i 'gog ba bzhi la mi slu par bsgrub pas skyes bu chung su'i lam gyi rim pa 'byung la/ bde 'gro'i de rnams la mi slu bar bsgrub pas skyes bu 'bring gi lam dang/ chos can bsgrub pas skyes bu chen po'i lam gyi rim pa 'byung ba yin no/ / gnyis pa de nges par byed pa'i thabs la/ lkog gyur nges pa'i thabs dang/ mngon gyur nges pa'i thabs gnyis so/ /dang po ni/ thog mar sdug bsngal gyi mtshan nyid bzhi bo shes pa'i sgo nas nges dgos pas/ de la mi rtag pa dang sdug bsngal rtogs pa'i lag rjes dang/ yid 'byung mtshan nyid rdzogs pa bskyed pa la stong pa dang bdag med rtogs dgos pa'i rgyu mtshan dang/ sdug bsngal bden pa rang nyid kyi steng nas bden bzhi'i rnam gzhag dpyad pa nang/ bdag med sgrub tshul lo/ /dang po ni mi rtag pa rtogs pas ni yid brtan du mi rung par rtogs la/ sdug bsngal ma rtogs pas ni 'bral 'dod skyed par byed pa yin no/ /'on lam gyi bden pa la yang yid brtan da mi rung bar 'gyur ro zhe na/ rang don gyi mtha' thug pa'i thob bya'i lag rjes kyi dbang du byas pa yin pas 'dod pa nyid de/ mya ngan las 'das pa'i dbyings su chos rnams nyid kyang spang bar bya na chos ma yin pa rnams lta smos kyang ci dgos gsungs pa'i phyir ro/ /des na de dag la rtag pa yin dgos so/ /gnyis pa ni/ @779a @#/ /stong pa dang bdag med ma rtogs na/ gang zhig bdag mthong de la ni/ /zhes sogs kyi don sngar bshad pa ltar/ bdag 'dzin nges yod leg gi gegs kyi gtso bo sred pa rang stobs kyis 'dren pa'i phyir dang/ tsher ma zug pa'i rkang pa la yid 'byung skye yang/ de med pa'i rkang pa la don gnyer skye ba ltar/ sdug bsngal gyi sdug bsngal la yid 'byung skye yang/ 'du byed kyi sdug bsngal gyi khyad par 'ga' zhig la thar par 'khrul nas bdag gi thob byar 'dzin pa'i phyir ro/ /gsum pa ni/ mtshan nyid bzhi ldan gyi zag bcas de sdug bsngal gyi bden pa/ de la gtsang sogs su sgro 'dogs pa de de'i kun de'i zhen yul sun phyung nas mi rtag sogs su rtogs pa de de'i lam/ de bsgoms pa'i stobs kyis phyin ci log bzhi dang bral ba de de'i 'gog pa'o/ /dal spyir srid pa bcu drug yod de/ dang por sdug bsngal gyi bzhi ni/ bdag la srid pa dang/ bdag gi 'dod bya'i don dang/ de sgrub pa'i thabs dang/ thabs dang mi 'bral ba dang ma thob pa thob par sred pa bzhi'o/ /de dag ni sdug bsngal rang gi ngo bo la log par rtog pa'o/ /de'i rgyu kun 'byung ma log rtog ni/ rgyu med du 'dzin pa dang/ mi mthun pa rgyud 'dzin pa'o/ /phyi ma la gsum ste/ rgyu gcig kho nas byas par 'dzin pa dang/ sngar yong rkyen gyis 'gyur bar smra ba dang/ dbang phyug lta bu'i blo sngon du btang nas byas par 'dzin pa'o/ /'gog pa la yang log par rtog pa bzhi ste/ thar pa gtan med dang/ yod kyang zag bcas ma zhi ba dang/ 'dod bya gya nom min pa dang/ yin yang gtan du thar pa min par 'dzin pa'o/ /lam la yang log rtog bzhi ste/ thar lam gtan mang dang/ bdag med rtogs pa'i shes rab thar lam ngan pa yin pa dang/ des yul gyi gnas lugs phyin ci ma log par rtogs mi nus pa dang/ gtan du thar byed ma yin pa'o snyam du 'dzin pa'o/ /bzhi pa la dgag bya bdag ngos bzung ba dang/ de 'gog byed kyi gtan tshigs so/ /dang po ni/ gang zag tsam dgag par bya ba ma yin te/ da ltar na las gsog pa po dang rnam smin med pa po rnams kyang khegs pas 'gog byed de nyid kyang med par 'gyur ba'i phyir ro/ /des na phung po'i tshogs pa dang rgyun gang la yang btags pa tsam ma yin pa'i gang zag rang rkya ba'o/ /gnyis pa la/ rtags dgos tshul sgrub/ gzhan @780b sel ba'i rnam gzhag gtan la dbab pa'o/ /dang po ni/ de 'dra ba'i gang zag rang rkya ba chos can/ rang bzhin med de/ phung po lnga dang rang bzhin gcig dang tha dad gang du yang med pa'i phyir/ /dper na ri bong gi rwa bzhin no/ /gnyis pa la/ khyab pa sgrub pa ni/ bum snam gyi steng du du mar yongs gcod la grub na/ gcig yin pa rnam bcad la khegs pas gnyis ka yin pa'i sgrub phyogs kyi phung gsum sel la/ gcig yin pa rnam bcad la khegs pa na du ma yin pa yongs gcod la grub pas gnyis ka min pa'i dgag phyogs kyi phung gsum sel lo/ /des bdag dang phung po'i steng du yang rang bzhin gcig dang tha dang khegs pa na rang bzhin tsam du 'dzin pa'i sgro 'dogs sel ba yin no/ /phyogs chos sgrub pa ni/ phung po lnga chos can/ gang zag rang rkya ba dang rang bzhin gzhan du med de/ yod nas sor dmigs dgos pa las ma dmigs pa'i phyir/ gang zag rang rkya ba dang rang gzhan gcig tu med de/ mi rtag du ma gzhan dbang can yin pa'i phyir/ de la rang bzhin gcig khegs pas sdug bsngal gyi khyad chos bzhi'i bdag med 'grub la/ rang bzhin tha dad khegs pas khyad chos bzhi'i stong pa 'grub pa yin no/ /de rtags su bkod nas 'jig lta lhan skyes kyi zhen yul du gyur pa'i bdag med sgrub pa yin no/ /gang zag rang rkya ba med na rtags yang dag gi chos can du mi rigs la/ yod na dgag mi nus par 'gyur ro zhe na/ skyon med do/ chos can du bzhag na yon tan dang/ rang rten la'i don bstan pa'o/ /yon tan ni/ de chos can du bzung nas bkag pa nyid kyis/ skabs kyi bsgrub bya 'grub pa'i grogs su 'gyur ba'i phyir dang/ de rang bzhin gcig dang tha dad kyis stong par nges pas phyogs chos 'grub cing/ der nges na gang zag rang rkya ba de rang bzhin yin par 'gal bas 'gog kyang nus pa yin no/ /rang rtan la zhes pa yang rtags dang sgrub bya'i chos rang gi rten bkag na skyon du 'gyur bar bshad kyi/ chos can 'ba' zhig pa bkag pas gnod pa ci yang med par ston pa yin no/ /nges na rtags yang dag yin na/ shes 'dod chos can grub pas khyab kyang rtags yang dag gi chos can yin na grub @781a @#/ /mi dgos pa yin no/ /'o na bkag na skyon du 'gyur ba'i rang gi rten de gang yin zhe na/ rtags rnam bcad tsam des grub pa'i sgra don no/ /byas pa sogs rtags su bkod pa la mi mtshungs te/ sgra'i sgra don byas par mi rung ba'i phyig 'di la 'khrul nas rtags 'god pa na gtso bo la sogs pa'i sgra don ngag gis zin par chos can du 'dod pa shin tu mang ngo/ /'o na/ thog med bag chags las byung ba'i/ /zhes sogs ji ltar 'chad ce na/ de ni gtso bo zhes pa'i sgra'i brjod bya sgra don yin pas gtso bo med kyang/ gtso bo zhes pa'i sgra sbyor ba mi 'gal bar ston pa yin gyi gtso bo'i sgra don dngos su chos can du bzung dgos par ston pa ma yin no/ /da ni dkyus kyi don bshad par bya ste/ phung po lnga po chos can/ gzhan dbang can yin te/ las nyon gyis 'dus byas pa'i phyir/ mi rtag par sgrub pa la/ rtags dgod pa dang/ tshul sgrub pa gnyis las/ dang po ni/ phung po lnga chos can/ mi rtag ste/ byas pa'i phyir/ gnyis pa ni/ phyogs chos dbang po rnon po'i mngon sum gyis 'grub ste/ sgra rgyu rkyen las skyes pa mngon sum gyis grub pa na byas par yang grub bo/ /dbang po rtul po la tha snyad sgrub kyi rjes dpag dgos so/ /khyab pa la dpe dgos pa'i rgyu mtshan ni/ byas pa la mi rtag pas khyab pa de des pa'i gzhi med par mi rung ste/ gzhi dang ma 'brel pa tshad ma'i gzhal byar mi rung ba'i phyir ro/ /rtsod gzhi yang der mi rung ste/ khyab pa grub pa na bsgrub bya grub par thal ba'i phyir/ des na gzhi gzhan zhig dgos la gzhi gzhan de la dpe zhes bya'o/ /ldog khyab sgrub pa la/ dogs pa skye ba'i gzhi ni/ slob dpon dbang phyug sde na re/ byas pa rtag pa'i gsal ba'i dbye ba re re nas med par nges mi nus te/ rtag pa'i gsal ba re re nas byas par yod kyang phyir rgol la snang du mi rung ba'i phyir/ des na byas pa dang rtag pa'i gzhi mthun srid par ma mthong ba tsam gyis ldog pa'i khyab pa nges pa yin no zhes zer/ rang lugs ni/ gzhi mthun mi srid pa mthong dgos kyi srid par ma mthong btsam gyis mi 'grub ste/ de tsam gyis the tshom dgag mi nus pa'i phyir/ de la kho na re/ rtag pa la byas pa med par nges pa'i blo des rtag pa'i gsal ba'i dbye ba mtha' @782b dag la byas pa med par nges sam ma nges/ phyi ma ltar na mi mthun phyogs mtha' dag las ldog par nges mi nus par 'gyur la/ dang po ltar na/ byas pa la 'jig pa'i khyab pa nges pa'i blo des kyang/ byas pa'i gsal ba'i dbye ba mtha' dag la 'jig nges kyi khyab pa des par 'gyur la/ de ltar na sgra'i byas pa la yang 'jig pa'i khyab pa nges pas/ khyab pa grub pa'i dus ni sgra la 'jig pa grub par 'gyur ro/ /sgra'i byas pa 'jig par grub kyang sgra 'jig par ma grub pa zhe na/ 'o na rtsol byung la 'jig pa'i khyab pa nges pa'i tshad ma des kyang sgra 'jig par ma grub kyang rtsol ba las byung ba'i sgra 'jig pa grub dgos la/ de ltar na khyab pa grub pa na bsgrub bya grub par 'gyur ro zhe na/ de dag gi lan bshad par bya ste/ gnod pa can gyi rtags la brten pa'i rjes dpag des/ byas pa rtag pa'i gsal ba'i dbye ba mtha' dag la srid pa'i sgro 'dogs chod pa yin gyi mi srid par des pa ma yin no/ /'o na rtsol byung la 'jig pa'i khyab pa nges pa'i tshad ma des kyang rtsol sgra la rtag 'dzin gyi sgro 'dogs chod pa yin gyi/ rtsol sgra rtag pas stong par ma nges par khas len rigs par 'gyur ro zhe na/ de ni 'dod pa nyid do/ /de ltar na rtags der brten gyis rjes dpag dpyad shes su 'gyur te/ sgro 'dogs bcad zin gyi don gcod pa'i phyir ro zhe na/ rtogs zin gyi don la 'jug pa dpyad shes kyi don yin gyi gcad zin gyi don gcod pa de'i don ma yin no/ /da ni khyab pa gnyis kyi sgrub tshul bshad par bya ste/ rjes khyab sgrub byed ltos med kyi rtags dang/ ldog khyab sgrub byed gnod pa can gyi gtan tshigs so/ /dang po la/ rtags dgod pa dang/ tshul sgrub pa gnyis las/ dang po ni/ gang zhig gang gi ngor grub pa gzhan la ltos pa med par de'i ngo bor zung pa de la ni/ grub tsam nas de'i ngo bor nges pas khyab ste/ dper na rgyu tshogs tha mas 'bras bu bskyed pa bzhin/ bum pa de grub tsam nas 'jig par 'gyur ba phyis 'byung gi rgyu gzhan la ltos med du 'jig pa'i ngo bor gyur pa yin no zhes bya ba'o/ /gtan tshigs 'di'i rjes 'gro'i khyab pa ni mngon sum gyis grub pas/ des bum pa'i steng du 'jig pa'i khyab pa mngon sum gyis grub pa na/ / @783a @#/ /'phags par thal ba dang/ rjes dpag gis grub na thug med du thal ba'i skyon bsal pa yin no/ /gnyis pa phyogs chos sgrub pa ni/ bum pa la dus phyis byung ba'i rgyu tsam chos can/ bum pa'i 'jig pa mi byed de/ bum pa'i 'jig pa bum pa dang rdzas gcig dang tha dad gang yang mi byed pa'i phyir/ rdzas gcig byed na/ grub tsam nas 'jig pa'i ngo bor skyes zin pas phyis 'byung gis byed par 'gal lo/ /rdzas gzhan mi byed de/ bum pa mthar 'jig pa'i phyir/ khyab pa yod de/ ngo bor gyur pa'i 'jig pa mi skyed na rgyu las mi 'jig pa'i ngo bor skyed dgos pas mthar yang 'jig pa mi 'thad do/ /yang na 'di ltar sbyar te/ byas pa chos can/ khyod la 'jig pas khyab pa des te/ khyod skyed pa'i rigs kyi rgyu nus pa thogs med de/ mi rtag pa skyed pa'i rigs kyi rgyu nus pa thogs med yin gyi rigs kyi rgyu gzhan med pa'i phyir ro/ /des don med par thal ba'i skyen yang med de/ byas mi rtag gnyis thun mong min pa'i rgyu gcig yin par dpe bum pa sogs kyi steng du grub pa'i phyir/ ji ltar grub ce na/ bum pa'i steng gi mi rtag pa de dngos med las skyes pa mi 'thad de/ dngos med rgyur mi rung ba'i phyir/ byas pa la yang spyi dang bye brag gnyis las/ bye brag gi rgyu de mi rtag pa'i thun mong ma yin pa'i rgyur mi 'thad de/ yul ma ga d+ha lta bu'i byas pa'i rgyu de mi rtag pa'i thun mong ma yin pa'i rgyu yin na/ bod kyi bum pa la mi rtag pa bskyed pa'i rgyu med par 'gyur ro/ /snga dro'i dus kyis khyad par du byas pa rgyur dgos na phyi dro'i bum pa mi 'jig par 'gyur ro/ /rang bzhin gyi khyad par zangs bum gyis byas pa'i rgyu la ltos na rdza'i bum pa 'jig pa'i rgyu med par 'gyur la/ yul dus rang bzhin gsum las ma gtogs pa'i bye brag gzhan yang med do/ /des na spyir rgyus bskyed cing ma byas pa'i rgyu la ltos pa bkag pas byas pa'i rgyu la ltos par grub/ bye brag gi rgyu la ltos par bkag pas byas pa spyi'i thun mong min pa'i rgyu de mi rtag pa'i thun mong min pa'i rgyu ru grub bo/ /gnyis pa la/ rtags dgod pa dang/ tshul sgrub pa gnyis/ dang po ni/ @784b rtag pa chos can/ byas pa'am dngos pos stong ste/ don byed nus pas stong pa'i phyir/ des stong ste/ don byed pa gnyis kyis stong pa'i phyir ro/ /gcig car don byed na 'bras bu chos can/ rim gyis mi 'byung bar thal lo/ /'dod na/ mngon sum gyis bsal lo/ /rim gyis don byed na/ 'bras bu phyi ma de bskyed pa'i nus pa dang po nas med na rtag par 'gal/ yod na dang po'i dus nas bskyed dgos so/ /lhan cig byed rkyen la ltos pa yang mi 'thad de/ rtag pa la rkyen gyis khyad par byar med pa'i phyir/ des na gnod pa can gyi rtags 'di nyid 'brel ba'i don ldog dngos su bsgrub pa'i sgo nas rjes su 'gro ldog la des pa bskyed pa yin gyi/ ldog khyab 'grub pa 'brel pa la ltos/ de 'grub pa bkag na khegs pa 'grub pa la ltos na phan tshun rten par 'gyur ro/ /dpe 'dus ma byas kyi nam mkha' ni reg bya tsam bkag pa ni ma yin te/ dag 'dzin mngon sum gyis mi 'grub par 'gyur ba'i phyir/ des na thogs pa'i reg bya gcad pa tsam yin la/ de ni reg bya'i khyad par rlung gis bsdus pa'i reg bya btang snyoms pa bar snang du lag pa dbyugs pa na lus shes kyis bzung ba'i stobs kyis shugs la 'grub pa yin no/ /slob dpon dbang phyug sdes byas pa dang rtag pa'i gzhi mthun ma mthong bas chog gi mi srid par mi 'grub par thal/ byas pa rtag pa'i gsal ba'i dbye ba mtha' dag la med nges su mi 'grub pa'i phyir/ der thal/ rtag pa'i gsal ba'i dbye ba mtha' dag yod kyang snod du mi rung ba'i phyir/ zhes zer ba ni/ snga ma'i rtags dang phyi ma'i khyab pa mi 'grub pa yin no/ /de ltar phung po mi rtag par bsgrubs nas da ni sdug bsngal du bsgrub par bya ste/ nyer len gyi phung po lnga po 'di chos can/ sdug bsngal ba yin te/ las nyon gyis 'dus byas pa'i phyir/ zhes pa ni rang bzhin gyi rtags so/ /de'i phyogs chos sgrub pa ni/ mi'i lus 'di chos can/ nyer len gyi rgyu bzang po sngon du song ste/ 'dod par bya ba'i 'bras bu yin pa'i phyir/ yang na/ 'phen byed kyi las bzang po sngon du song ste/ rnam smin yid du 'ong ba yin pa'i phyir/ las bzang ngan sna tshogs sngon du song ste/ 'bras bu 'dod mi 'dod sna tshogs dang ldan pa'i phyir/ dud 'gro'i lus 'di @785a @#/ /chos can/ 'phen byed kyi las ngan pa sngon du song ste/ rnam smin yid du mi 'ong ba dang ldan pa'i phyir/ zhes bkod pa'i rtags 'di ngag la brten nas grub zin gyi rnam smin 'dod mi 'dod 'di dag la las bzang ngan sngon du song bar dngos stobs kyis 'grub kyang/ de ring sbyin pa btang ba dang tshul khrims bsrungs pa'i las la ma 'ongs pa na 'bras bu bde ba 'byung ba ni shin tu skog gyur yin te/ phyi dro'i lus kyi khyad par phyag 'tshal ba sogs snga dro'i lus sngon du song bar grab kyang/ snga dro'i dus na gang zag des phyi dro'i lus kyi khyad par de lta bu mi 'grub pa bzhin no/ /las gsog pa yang sred pa sngon du 'gro dgos pas nyer len gyi phung po 'di chos can/ yul thob 'dod kyi sred pa sngon du song ste/ dbang phyug sogs kyis dbang med du bskul ba ma yin par mi gtsang ba'i gnas mngal du skye ba blangs pa'i phyir/ dbang phyug skul byed min par dbang phyug 'gog byed kyi rigs pas 'grub bo/ /de lta bu'i las nyon de chos can/ sdug bsngal gyi rgyu yin te/ de la phan 'dogs byed yin pa'i phyir/ kun 'byung yin te/ de yang dang yang bskyed pa'i phyir/ rab skye yin te/ de stobs ldan skyed pa'i phyir/ rkyen yin te/ de'i rten byed cing skye ba rgyud mar skyed pa'i phyir/ skye ba rgyud pa yod par ni skye ba snga phyi sgrub byed kyi rtags las shes te/ de yang skyes ma thag pa'i rig pa chos can/ nyer len gyi rig pa snga ma sngon du song ste/ rig pa yin pa'i phyir/ dper na da ltar sdug par sgro btags pa las 'dod chags skye ba bzhin/ de la kho na re/ ldog pa med de/ rig pa yin kyang rig pa snga ma her len du mi dgos so zhe na/ de la rgyu yod dam med/ phyi ma mi rags te/ de ltar na rig pa de rtag tu yod par 'gyur te/ rgyu log stobs kyis mi ldog pa'i dngos po yod pa'i phyir/ yang na rtag tu dngos po med par 'gyur te/ rgyu yod na yod pa'i rjes su mi byed pa'i phyir/ des na rgyu dang bcas pa yin te/ res 'ga' skye bar dmigs pa'i phyir/ rgyu yod na rtag pa dang mi rtag pa las ma 'das la/ rtag pa rgyur mi rung bar sngar bshad zin to/ / @786b mi rtag pa la bem rig gnyis su kha tshon chod pas bem po yin na/ dbang po dang bcas pa'i lus nyer len yin nam/ dbang po med pa'i lus nyer len yin/ dang po ltar na/ re re ba yin nam/ kun tshogs pa rgyur dgos/ dang po mi 'bad de/ mig shes bzhin du gzugs gsal bar 'dzin/ par 'gyur ba'i phyir/ phyi ma mi rigs te/ dbang po rnams yul mi 'dra bar 'dzin pa'i shes pa bskyed pa'i nus pa so sor nges pa'i phyir/ dbang po med pa'i lus her len yin na/ rdul phren nam yan lag gi rdzas yin/ dang po ltar na/ rdul phran re re bas chog gam/ kun tshogs pa rgyur dgos/ dang po ltar na/ yid rtog du ma gcig car skye bar 'gyur la/ gnyis pa ltar na/ sor mo'i rdul lta bu ma tshang na yang mi skye bar 'gyur ro/ /yan lag gi rdzas nyer len yin pa'i mi rigs te/ de mi srid pa'i phyir/ de yang bya ba la brten pa dang/ mthong ba la brtan pa dang/ yon tan la brten pa'i 'gal 'du rnam pa gsum ste/ de la lag pa g.yo/ lus gzhan mi g.yo ba'i tshe lus gzhan gyi steng na yin pa'i yan lag de mi g.yo bar mngon sum gyis grub pas g.yo mi g.yo'i cha gnyis med par 'gal lo/ /g.yo mi g.yo de dag yan lag la yod pa yin gyi/ yan lag can la med do zhe na/ de lta na lag pa'i steng du g.yo ba'i yan lag gi rdul gyis bsdus pa mngon sum gyis grub pa 'di dang/ mi g.yo bar gnas pa'i yan lag gnyis dus gcig so sor grub dgos par 'gyur ro/ /de bzhin du lhag ma gnyis la yang sbyor/ shes pa nyer len yin na/ rang rgyud kyis bsdus pa dang/ gzhan rgyud kyis bsdus pa gnyis su nges pas gzhan gyi shes pa nyer len yin na/ pha ma'i shes pa nyer len du bya dgos pas pha ma bzo mkhas pa la/ bu bzo mkhas pa sogs su gden mi za bar 'gyur bar khas blangs dgos pas so/ /des na rang rgyud kyi rig pa snga mas nyer len byas par gdon mi za bar grub bo/ /de bzhin du skye ba phyi ma sgrub pa la yang sbyar ro/ /skye ba snga ma yod de/ zhes khyad par sbyar na dpe rnyed par mi rung ngo/ /de ltar kun 'byung de sdug bsngal skyed byed dang bdag 'dzin rigs pas sun 'byung bar nus par mthong ba @787a @#/ /na/ sdug bsngal 'gog nus su mthong la/ de lta bu'i mnyen po bsgoms pa'i stobs kyis sdug bsngal 'gags pa de chos can/ dgos pa yin te/ sdug bsngal spangs pa'i bral ba yin pa'i phyir/ zhi ba yin te/ nyon mongs pa spangs pa'i bral ba yin pa'i phyir/ gya nom pa yin te/ 'dod bya mchog tu gyur pa'i bral ba yin pa'i phyir/ nges 'byung yin te/ slar mi ldog pa'i chos can gyi bral ba yin pa'i phyir/ de mngon du byed pa'i thabs ni lam yin la/ de yang bdag med rtogs pa'i shes rab de nyid kyis don skyi tsam yul du byed pa la lhag par mos pa brtan mi brtan dang/ mngon sum gyis gsang rtogs dang/ rtogs zin goms pa dang/ goms pa mthar thug pa rnams kyang dngos stabs kyis 'grub pas/ /lam lnga dngos stobs kyis 'grub pa yin no/ /goms pa mthar thug par sgrub tshul ni/ sngar thub pa tshad mar sgrub pa'i chos can sgrub byed 'og tu ston pas de'i skabs su 'chad par 'gyur ro/ /rnam 'grel le'u gnyis par/ 'khor ba las grol ba'i lam gyi mi mthun phyogs bzhi bkod nas dgag pa mdzad de/ dbang sogs bdag gi ba sdug bsngal du bsgom pa dang/ chags yul dang skyes bu tha dang du bsgom pa dang/ bka' lung grol byed du bsgom pa dang/ dka' thub kyis gdung bar byed pa rnams so/ /des na de dag brjod bya'i gtso bor ston pa'i bstan bcos rnams chos can/ grol ba don gnyer la nye bar mkho ba'i grol lam phyin ci ma log par bstan pa min te/ bdag med pa gtan la ma phab pa'i phyir/ sngar bshad pa'i chos can du bzung bya thub pa bcom ldan 'das sgrub pa'i tshul ni/ gzugs sogs zag bcas kyi phung po lnga chos can/ gnyen po sgom pa'i stobs kyis khyod kyi rgyun zad ba yod de/ khyod kyi rgyu la gnod byed stobs ldan yod pa'i phyir/ de'i phyogs chos sngar bdag med sgrub pa nyid kyis 'grub la/ khyab pa ni/ grang 'bras spu long byed zad par mthong ba'i steng du mngon sum gyis 'grub bo/ /sngar le'u gnyis par ston pa sangs rgyas kyi khyad par du bstan pa'i spangs pa ni 'di nyid yin la/ le'u @788b gsum par bshad pa'i chos kyi bdag med goms pas shes sgrib spangs pa'i spangs pa sgrub pa ni/ gzung 'dzin rag gsum rdzas tha dad du 'dzin pa'i rtog pa chos can/ gnyen po'i stobs kyis khyed kyi rgyun zad pa yod de/ khyod gnod byed stobs ldan dang bcas pa yin pa'i phyir ro/ /de'i phyogs chos lhan cig dmigs des kyi rtags kyis grub cang khyab pa sngar dang 'dra/ rtogs pa mthar thug sgrub pa ni/ bdag med rtogs pa'i tshad ma chos can/ khyod rang gi goms pa'i don la goms pa mthar thug pa yod de/ khyed rang gi goms bya'i don rtogs pa'i tshad ma gang zhig /goms bya'i don la sgrib pa zad pa yod pa'i phyir/ de 'dra ba'i spangs rtogs mthar thug dang ldan pa'i skyes bu de sngar bshad pa'i bcom ldan 'das yin la/ de chos can/ khyod rgyu med dang mi mthun pa'i rgyu las byung ba ma yin te/ khyod bsam pa dang sbyor ba phun tshogs goms pa rab kyi mthar thug pa yin pa'i phyir/ de'i phyogs chos lugs 'byung gi skabs su ston pa lam gang nas byon pa'i lam sgrub pa nyid kyis 'grub pa yin no/ /de ltar gtso bo'i don bden bzhi'i gnas lugs la mi slu bar bsgrub nas/ da ni mngon mtho la mi slu bar sgrub pa'i tshul bshad par bya ste/ de la rtags dgod/ tshul sgrub/ rtsod pa spang ba'o/ /dang po ni/ sbyin pas longs spyod khrims kyis bde/ zhes pa'i lung chos can/ khyod rang gi bstan bya la mi slu ste/ dpyad pa gsum gyis dag pa'i lung yin pa'i phyir/ dper na 'dus byas mi rtag par ston pa'i skabs bzhin/ 'jug pa bde ba'i phyir du sbyor ba 'di ltar bkod pa yin gyi/ don steng du 'brel pa mi ston pa dang/ dam bca' brjod par mi rigs so/ /gnyis pa la khyab pa sgrub pa dang/ phyogs chos sgrub pa'o/ /dang po ni/ dpe'i steng du khyad pa rjes dpag gis 'grub ste/ 'dus byas mi rtag par rjes dpag gis rtogs nas ngag smras shing rjes dpag de'i bstan bya la mi slu bar grub pa na de dag de rang gi bstan bya la mi slu bar grub pa yin no/ /gnyis pa la/ khas blang bar bya ba'i lung gi mtshan gzhi ngos bzung ba dang/ de mi slu pa'i rgyu mtshan dang/ de ji ltar sgrub pa'i tshul lo/ /dang po ni/ 'brel pa dang ni rjes mthun @789a @#/ /thabs/ /zhes pa'i shlau ka gcig gis bsten no/ /gnyis pa ni/ mthong dang ma mthong dngos po yi/ /zhes pa nas/ gnod med ces pa'i bar gyis bstan la/ 'di yi mi slu ba zhes pas bsgrub bya'i chos bstan no/ /gsum pa ni/ mngon gyur ston pa'i brjod bya mngon sum gyis grub cing/ gzhan dag mngon gyur du 'dod pa'i yan lag gi rdzas lta bu bkag pa la mngon sum gyis gnod pa med/ lkog gyur ston pa'i brjod bya rjes dpag gis grub cing/ gzhan dag lkag gyur du 'dod pa'i gtso bo lta bu bkag pa la rjes dpag gis gnod pa med/ shin tu lkog gyur ston pa'i lung gi brjod bya la snga phyi 'gal ba dang/ dngos shugs 'gal ba'i sgo nas gnod pa med pa 'ong/ de la dkar chos spyad pa las bde ba 'byin pa dang sdug bsngal 'byin pa gnyis lung las snga phyi rang lugs su bstan na/ de la nang 'gal yod par dngos stobs kyis 'grub mi srid de/ ya gyal dkar chos la bde ba 'byin pa dang sdug bsngal dbyin pa gnyis ka dngos stobs kyis mi 'grub pa'i phyir/ yid ches pa'i rjes dpag gis kyang 'gal bar mi 'grub ste/ yid ches pa'i rtags kyi phyogs chos sgrub pa'i skabs su dogs pa de chod dgos pa'i phyir/ des na de 'dra ba'i snga phyi 'gal ba dang dngos shugs 'gal ba med par bcom ldan 'das kyi bka' yang chod mas 'grub pa mi 'thad de zhe na skyon med de/ gzhi sngon po'i steng du bde ba 'byin mi 'byin gnyis dngos 'gal du dngos stobs kyis nges pa na/ dkar chos gyi steng du yang de gnyis gzhi mthun du 'du srid pa'i dogs pa chod cing/ dkar chos kyi steng du de gnyis gzhi mthun du yod med blo kha phyogs pa ni/ tshad ma snga ma'i stobs kyis mi srid par nges nus kyi/ /de gnyis gzhi de'i steng du 'gal bar dngos stobs kyis ngos mi nus so/ /de ltar na khrus kyis sdig pa dag pa dang/ chags sogs sdig pa'i rtsa bar bshad pa la yang na 'gal bstan mi nus par 'gyur ro zhe na/ skyon med de/ khrus byas pas sdig pa'i rgyur gyur pa'i rang rgyud kyi chags sogs chung du mi 'gro bar mngon sum gyis grub pa'i phyir/ @790b rtags su bkod pa'i dpyad gsum gyis dge ba'i lung yang gzhi mthun sdom pa min gyi/ dpyad gsum gyis dag pa'i lung gi phyogs gcig yin pas/ da'i lung ngo zhes rnam par bzhag pa yin pas/ sbyin pas longs spyod khrims kyis bde/ /zhes pa'i lung des gnas gsum ston par thal ba'i skyon med do/ /gsum pa ni/ lung rang gi bstan bya la mi slu ba yin min de'i sgrub byed dang/ log phyogs la gnod byed du khas blangs dgos pas gtan chags bkod pa thams cad don med du 'gyur ro zhe na/ de'i lan la/ yang chos kyi gtan tshigs mi srid par 'dod pa dgag /'dod kyang sbyor ba gzhan du 'dod pa dgag /lung gnod byed dang gegs byed du gyur pa'i khyad par bstan pa dang/ tshul gsum dngos stobs kyis grub na yid chos kyi rtags su mi rung ba'i rtsod pa spangs po/ /dang po ni/ yid chos tshad mar mi rung na/ shin tu lkog gyur gyi don yod pa/ rtog ldan gyis dam bca' mi rigs par thal lo/ /tshad mas ma grub kyang dam bca' na rtog ldan du mi 'gyur te/ de min par ni dngos po dang/ /dngos med rnam gzhag gang gis nus/ /zhes bshad pa ltar ro/ /gang phyir 'jig rten don gnyer ni/ /the tshom las kyang 'jug phyir ro/ /zhes bshad pa ltar the tshom yang 'jig pa'i yan lag tu 'gyur bas/ rtog ldan 'jug pa'i yan lag tu tshad mas grub pa mi dgos zhe na/ de'i don ni/ yod pa srid mtha' tsam du song ba tshad mas 'gag nus shing/ med pa srid mtha' tsam du song ba'i don 'gyur gyi the tshom 'dren pa'i tha snyad pa'i tshad ma rang dga' ba'i dbang du byas kyi/ de la min na/ /bsam gtan gzugs med sogs yod dam med dris pa na/ the tshom za zhes lan 'debs rigs par 'gyur ro/ /gnyis pa ni/ sbyin sogs dkar chos chos can/ khyod spyad pa las bde ba 'byung ste/ de ltar bcom ldan 'das kyis lung rnam dag las gsungs pa'i phyir zhes pa rtags su 'dod pa yang mi rigs te/ chos can grub pa'i dus na bsgrub bya grub zin pa'i phyir dang/ sgra mi rtag ste/ de ltar ngas slus pa'i phyir zhes pa yang/ rtags yang dag tu 'dod dgos par 'gyur ro/ /de na 'thun du gsungs pa rtags su 'god pa yang mi rigs te/ de nges pa na bsgrub bya nges@791a @#/ /pa'i phyir/ de ltar na khyed la 'dus byas mi rtag par ston pa'i lung shes 'dod du bzung ba'i sngar gyi rtags yang dag de lta bu khas len dgos par 'gyur ro/ /zhe na/ de lta bu mi srid de/ dbyar pa gsum gyis dag par nges pa'i dus na 'dus byas mi rtag par ston pa'i lung bstan pa la mi slu bar grub zin pa'i phyir ro/ /de ltar na lugs de gnyis ka yang skyon dang bcas pa yin te/ tshad mar 'dod pa'i dpyad gsum gyis dag pa'i lung/ gzhi 'gar bstan bya la mi slu ba'i sgrub byed dang/ log phyogs la gnod byed du bstan pa na/ / dpyad gsum gyis dag pa'i lung yin na/ de lta bu'i khyab pa bston pa 'khrul blo yin te/ byas pa sgra mi rtag pa'i sgrub byed du bstan pa na/ byas pa yin na des khyab par 'khrul ba lta bu'o/ /tshang mar mi 'dod pas ni/ dpyad gsum gyis dag pa'i lung gi gsal ba rnams rang gi brjod bya'i sgrub byed dang/ log phyogs la gegs byed du bston pa na/ dpyad gsum gyis dag pa'i lung yin na nges khyab par 'khrul pa yin te/ byas pa'i gsal ba rnams sgra mi rtag pa'i sgrub byed du mi rung bar bstan pa na/ byas pa yin na nges khyab par bzung ba lta bu'o/ /gsum pa ni/ lung rnams rang gi brjod bya'i don gyi sgrub byed dang/ log phyogs la gnod byed du 'dod pa gnod byed pa'i lugs dang/ log phyogs la gegs byed du 'dod na gegs byed pa'i lugs yin gyi/ dpyad gsum gyis dag pa'i lung de sngar gyi dam bca'i log phyogs la gnod byed du gegs byed pa'i phyogs kyis kyang 'dod pa yin na/ /de ltar na/ dpyad gsum gyis dag pa'i lung yin na/ bstan bya la mi slu ba'i tshad ma yin pas kyang ma khyab par 'gyur ro zhe na/ skyon med de/ de ni 'brel pa la mi slu ba'i don du byas pa yin pas mi slu bas khyab kyang mi slu ba'i sgrub byed yin pas khyab pa khas blangs mi dgos so/ /bzhi pa ni/ tshul gsum dngos stobs kyi tshad mas grub na/ yid ches pa'i rtags su mi rung ngo zhe na/ rtags thams cad bsgrub bya'i ngos nas mi 'dra bar rnam par bzhag pa yin gyi/ sgrub byed tshad ma'i ngos nas min te/ thams cad mthar mngon sum la thug dgos par bsgrubs @792b zin pa'i phyir/ de ltar min na/ rjes dpag 'ba' zhig dgos pas thug med du 'gyur ba dang/ dgag rtags sgrub rtags sogs kyang rtags su bkod pa de dgag sgrub gang rung gi sgo nas 'byed dgos pas/ 'gal khyab dmigs pa'i dgag rtags mi srid par 'gyur ro/ /de la tshad ma'i gnod pa bzhir nges pa'i rgyu mtshan ni/ myong ba'i stobs kyis rtogs par bya ba dang/ myong stobs min pas rtogs par bya ba gnyis su nges shing/ phyi ma la lung gnod byed du 'gyur ba la nges par ltas pa dang mi ltos pa gnyis su 'dus la/ mi ltos pa la/ 'dod pa tsam gyis 'jog nus pa dang mi nus pa gnyis so/ /'dod pa tsam gyis bzhag na/ tshang ma'i dgag byar 'gal lo zhe na/ mi 'gal te/ spyir rtog pas brtags pa la tshad mas ma grub pa thag khra la sbrul du btags pa lta bu dang/ tshad mas grub pa gnyis su yod la/ phyi ma la yang 'dod pa tsam gyis bzhag mi nus pa byas mi rtag gi tha dad lta bu dang/ bzhag nus pa ri bong can zla ba'i sgras brjod rung lta bu gnyis su yong/ 'dod pa tsam gyis 'jog nus pa'i rgyu mtshan yang/ gang na 'dod pa yod pa der brda yod la/ brda sbyar ba der sgras brjod du rung la/ 'dod pa yang yul kun la rang dgar 'jug pa'i phyir/ des ni ri bong can la zla ba'i sgra 'dod pas sbyar ba yin gyi yul gyi ngos nas tshur grub pa ma yin te/ de ltar min na/ zla ba gang na yod pa der zla ba zhes pa'i sgra 'ur 'ur ba rgyun ma chad pa 'byung dgos so/ /kho na re/ zla ba zhes pa'i sgra de ri bong can la sel 'jug min par 'gyur te/ ri bong can min pa gcod mi nus pa'i phyir te/ shes bya mtha' dag la 'jug tu rung ba'i phyir zhe na/ skyon med de/ ri bong can la zla ba'i sgra sbyar ba na/ ri bong can zla ba min pa gcod kyi/ zla ba min pa'i gsal ba mtha' dag mi gcod do/ /zla ba min pa gcod du chug kyang zla ba min na des gcod mi dgos so/ /des na grags pa dang yid ches kyi tshad ma yang yul gyi khyad par bstan pa'i sgo nas nang phan tshun dang/ dngos stobs kyi khyad par dbye dgos gyi/ tshul gsum sgrub byed kyi tshad mas dbyer mi rung ngo/ /gsum pa gzhan sel ba'i rnam gzhag gtan la dbab pa la/ bden pa gnyis kyi rnam gzhag dang/ sgra rtog gi 'jug tshul dang/ sel ba ngos bzung ba'o/ /dang po la/ bden gnyis kyi mtshan @793a @#/ /nyid/ mtshan gzhi'i dbye ba/ nges byed kyi tshad ma bshad pa'o/ /dang po la/ kun rdzob bden pa'i mtshan nyid ni/ rtog pas btags pa tsam du grub pa'i chos dang/ don dam bden pa'i mtshan nyid ni/ rtog pas btags pa tsam min par grub pa'i chos so/ /gnyis pa ni/ kun rdzob kyi sgra bshad pa'i gzhi ni/ spyi 'dzin gyi rnam par rtog pa yin gyi/ spyi mtshan gzung yul du byas pas di kho na nyid mthong ba la sgrib pa zhes bya la/ kun rje ba kyi sgra 'jug pa min no/ /des na rtog pa'i gzung yul thams cad ni kun rdzob kyi bden pa dang/ rang mtshan thams cad don dam pa'i bden pa yin no/ /gsum pa ni/ spyi mtshan rtog pas btags pa tsam du nges pa ni/ rjes su grub pa khegs pa sngon du song ba la ltos pas de sgrub pa la/ gzhan gyi lugs dgag pa dang/ rang gi lugs bzhag pa'o/ /dang po ni/ kha cig /spyi mtshan dngos po yin pa bkag pa na/ de 'gog byed kyi rigs pa de nyid byas mi rtag sogs la yang mtshungs par mthong nas de dag kyang dngos po min zhing/ sgra mi rtag par yang rang lugs la dam bca' mi nus par rtog ngo tsam du yod par khas len pa ni/ mngon sum tshad ma yang rang lugs la sgrub mi nus pa'i phyir/ dam bca' gang yang yang dag tu sgrub mi nus par 'gyur te/ rgol phyir rgol gnyis ka la bsnyon mi nus pa'i tshad ma bstan rgyu mi 'dug pa'i phyir ro/ /des na de dag gis rang mtshan gyi 'jog byed yul dus dang bzhin ma 'dres par gnas pa'i don mi shes shing/ spyi mtshan dngos po yin pa 'gog pa'i rigs pa ma shes pas 'khrul ba yin te/ des na dus 'dres par 'dzin pa'i rtog pas snga dro'i dus na yong pa phyi dro'i dus na yod pa dang/ rang bzhin 'dres par 'dzin pa'i rtog pas khra bo la yod pa ser skya la yod pa dang/ yul 'dres par 'dzin pa'i rtog pas shar na yod pa de nyid nub na yod par bzung ba yin pas/ ma 'dres pa'i don yang snga dro yod pa phyi dro med pa dang/ khra bo la yod pa ser skya la med pa sogs kyi don yin gyi/ khra bo la yod na ser skya la yod par 'gal ba'i don ma yin te/ de ltar na gzugs yod na sgra yod par 'gal bar khas blangs dgos shing/ khra bo yi ni ngo bo @794b gang/ /zhes pa nas/ gnyis ka la yang yod pa min/ /zhes pa'i bar gyi gzhung snga phyi nang 'gal smras par 'gyur ro/ /gnyis pa ni/ spyi mtshan rnam par rtog pa'i gzung yul chos can/ dngos por med de/ shing dang rdzas gcig dang tha dad gang du yang med pa'i phyir/ rdzas gzhan du med de/ de ltar du yod na dmigs dgos pa las ma dmigs pa'i phyir/ khyod de dang rdzas gcig tu med de/ de ltar yod na shing gsal rang mtshan rnams rdzas gcig tu 'dre dgos pa las de ltar 'dre ba med pa'i phyir/ de ltar na shing de sha shug dang rdzas gcig na yang sha shug gnyis ka rdzas gcig tu 'dre dgos pas shing tsam dngos po min pa kho bo cag gi 'dod pa grub bo zhe na/ de gnyis kyi khyad par ma byed pas nongs pa yin pas rnam pa kun tu mi mtshungs pa nyid legs par nyon cig /shing de sha ba dang shug pa la rjes su 'gro bar snang ba'i spyi 'dzin gyi gzung yul dngos po yin na/ blo de rtog med ma 'khrul bar 'gyur dgos la/ de ltar na de'i gzung ngor cha bcas 'char ba mi srid de/ de'i rgyu mtshan de snang ba na cha dang cha can rnams mi 'dra bar snang dgos la/ de ltar na/ cha dang cha can chos can/ rdzas tha dad du thal/ blo ma 'khrul ba'i ngor tha dad yin pa'i phyir/ des na blo ma 'khrul ba'i ngor shing de rang gi gsal ba la rjes su 'gro ba snang na zla ba dang skar ma lta bu'am/ ka ba du ma la thog cig bkab pa lta bu sogs su snang ba mi srid cing/ cha bcas snang ba'ang mi srid pas shing tsam de sha pa dang yang cha shas kyis dben pa'i rdzas gcig tu snang dgos la/ shug pa dang yang der snang dgos pas sha shug gnyis rdzas gcig tu 'phen nus pa yin gyi shing de sha shug dang rdzas gcig pas/ de gnyis nang phan tshun yang rdzas gcig tu khas blangs mi dgos te/ de gsum po rags pa yin pa'i phyir/ rags pa la dngos med kyis khyab pa khas blangs pa ni/ rags pa dang rags pa cha med gcig tu 'khrul zhing cha med kyi gcig dang gcig so sor ma phyed pa yin no/ /'di lta bu'i khyad par legs par mi shes na spyi mtshan dngos po yin pa 'gog lo byas kyang/ mthar mngon sum la yang mtshungs pa spang mi nus pa rang lugs la rdzas gzhan dang rdzas gcig tu bsgrub nus pa'i don me sham gyi bu dang mtshungs par khas len dgos par @795a @#/ /'gyur ro/ /yang dngos po'i mtshan gzhi 'jog lo byas pas na spyi mtshan rnams dang mtshungs pa spang mi nus par bdag 'dzin yang gzung yul la mi 'khrul bar khas len dgos pas/ 'bad kyang 'khor ba las mi grol bar khas len dgos par 'gyur ro/ /des na spyi mtshan dngos por grub pa legs par khegs shing byas mi rtag sogs dngos por khas blangs pas chog pa'i gnyis tshogs la mkhas par bya'o/ /gnyis pa sgra rtog sel bas 'jug par sgrub pa la/ rtsod pa ni/ sgra rang gi gnas tshod la sgra byas mi rtag pa gsum grub dus so sor med cing don gcig tu yod pas/ rtags su bkod pa yang bsgrub bya'i chos de nyid rtogs su bkod pas dam bca'i phyogs gcig rtags su bkod pa'i ma grub par 'gyur la/ bla rim can du nges pa yang don dang mi mthun par zhugs pas phyin ci log 'ba' zhig yin no zhe na/ lan la/ blo ji ltar snang ba'i tshul dang/ don la ji ltar gnas pa'i tshul dang/ de ji ltar rtogs pa'i tshul lo/ /dang po ni/ sgra byas mi rtag gsum po rtogs pa la sngo ser ltar so sor snang zhing/ de yang rim can kho nar snang la/ snang ba de yang 'khrul ba yin te/ snang ba ltar ma grub pa'i phyir/ de'i rgyu mtshan/ snang ba ltar grub na/ sgra grub dus na rtag par 'gyur ba dang/ de gsum rdzas tha dang pas byas pa rtag par thal ba dang/ mi rtag pa ma byas par 'gyur dgos so/ /gnyis pa ni/ de gsum rang gi mtshan nyid gcig kho nar gnas shing/ tha dad pa ni rtog pas btags pa tsam yin no/ /tha dad du rtogs pas btags pa tsam yin kyang tha dad mtshan nyid par khas blang bar bya ste/ de bkag na 'gog byed de nyid la gnod pa'i phyir ro/ /des na chos dang chos nyid tha dad ni blos kun gtags pa yin gyi don yang ni min te zhes bshad pa ltar/ sgra byas mi rtag pa gsum dngos po yin yang de gsum shes 'dod chos can dang/ bsgrub bya'i chos dang/ gtan tshigs yin pa ni rtog pas btags pa tsam yin no/ /de lta min na sbrul mgo'i gdengs ka ltar mthong ba'i mngon sum skye dgos so/ /des na rtags chos don gsum dang byas mi rtag tha dad kyi cha rnams med do zhes spong yang mngon sum kyis @796b gnod pa mi 'bab ste/ yod kyang mngon sum la snang du mi rung ba'i phyir/ med ces spong na spyir tshad ma la gnod pa yin te/ rjes dpag gis grub pa'i phyir/ mngon sum gyis ma mthong na med dgos so zhe na/ skyon med te/ rtog pas btags tsam yin gyi rang gi mtshan nyid kyis grub par mi 'dod do/ / rtog pas btags pa tsam dang/ don byed nus pa 'gal bar khas blangs nas dbu ma pa'i lugs sun dbyung bar 'gyur ba bzhin du/ 'dir ni tshad mas grub pa dang 'gal ba de khas blangs na rnam gzhag thams cad 'chol bar 'gyur ro/ /gsum pa ni/ sgra byas mi rtag gsum rtogs pa'i blo rim can kho nar skye ba yin gyi/ yul gsum rim can kho nar grub pa min no/ /de ltar na yul gsum dus gcig tu ma grub par 'gyur te/ dus gcig tu bsgrub pa'i sgrub byed kyi tshad ma med pa'i phyir zhe na/ rtags ma grub bo/ /de yang yod pa'i sgra rtog kho na sgrub pas 'jug par dogs pa skye ba'i rgyu mtshan dang/ sel ba la 'jug par sgrub pa dang/ dngos med la dngos su 'jug pa'i sgra rtog la dogs pa de skye bar mi rigs pa dang gsum gyis rig par bya'o/ /dang po ni/ bum pa'o snyam du 'dzin pa'i rtog pa'i ngor sgrub pa kho na'i rnam pa shar gyi/ dgag pa'i rnam pa ma shar bas 'khrul ba yin no/ /gnyis pa ni/ sgra nges pa'i blo des sgra min du 'dzin pa'i log rtog ma bsal na/ sgrar des kyang sgra min par dogs pa skye bar 'gyur bas de bcad dgos la/ de yang sgro 'dogs kyi zhen yul rnam par bcad par ma nges na/ sgrar mi go bar 'gyur te/ sgra ma yin pa las log par mi go ba'i phyir/ des na sgra 'dogs kyi zhen yul rnam par bcad pa nges shing sgra'i steng gi rtag pa rnam par bcad pa ma nges pas rnam bcad kyi yul can du grub bo/ /nges na phyi rol pa rnams kyis sgra nges pa'i blo des sgra min pa'i sgro 'dogs bcad kyang/ sgra min bcad mi dgos par 'dod pa 'gal ba yin no/ /sgro 'dogs gcod pa yul sun phyung ba'i sgo nas yin gyi/ phyi rol tsher ma 'don pa'i tshul gyis min no/ /de ltar na sgro 'dogs gcig bcad na/ kun gcod pa dang/ ma bcad na gcig kyang mi gcod par 'gyur ro/ /des na mngon sum dang/ rtog @797a @#/ /pa gnyis yul sel ba la 'jug par 'dra yang 'jug tshul mi 'dra ste/ mngon sum sgrub pa'i sgo nas 'jug la/ rtog pa ni sel ba'i sgo nas 'jug pa yin no/ /de yang yul gyi stobs kyis tshur mngon sum la snang ba bskyed pa yin la/ yul sngon po lta bu'i rdzas rnams kyang so sor med pas cha shas su ma phye bar 'dzin pa yin no/ /des na mngon sum ni sgro 'dogs dang mi 'gal bar 'jug pa yin te/ rtag par sgro 'dogs pa'i dus na yang mi rtag par mthong ba'i phyir/ de lta min na sgro 'dogs thams cad gcig car chod dgos par 'gyur ro/ /mngon sum gyis bzhag pa'i bag chags kyis nges shes bskyed cing/ de yang sgro 'dogs dang 'gal bar 'jug dgos la/ sgro 'dogs kyis kyang yul la log par zhugs pas de sel ba na de'i yul bcad dgos pa yin no/ /gsum pa ni/ bum pa med de zhes brjod pa'i sgra des dgag bya rnam par bcad pa'i rnam bcad yul du byas sam/ sgrub pa rang dbang ba kho na yul du byas snyam du rtog ldan gyis dpyad par bya ba min te/ sgra brjod tsam nas dgag bya'i don tshig gis zin par dngos su bcad pa'i phyir ro/ /gsum pa gzhan sel ngos bzung ba la/ gzhan sel gyi mtshan nyid/ dbye ba/ brda sbyor ba'i yul gtan la dbab pa'o/ /dang po ni/ bsal bya tshig gis zin par dngos su bcad pa'i sgo nas rtogs par bya ba'i chos so/ /gnyis pa la/ med dgag dang/ ma yin dgag gi sel ba gnyis las/ phyi ma la'ang/ blo'i sel ba dang don gyis sel ba gnyis so/ / dper brjod na/ bum pa'i steng du bum pa min pa rnam par bcod pa tsam ni min dgag gi sel ba dang/ bum pa min pa las log par rtog ngor snang ba blo'i sel ba dang/ bum pa ma yin pa las log pa de don gyi sel ba yin no/ /bum 'dzin rtog pa'i ngor bum pa'i don spyi de bum pa ma yin pa las leg par snang na dgag pa'i rnam pa can du 'gyur dgos zhe na/ de lta na mngon sum rnams kyang dgag pa'i rnam pa can kho nar 'gyur te/ yul rnams rigs mi mthun pa las log par snang ba'i phyir/ der thal/ ma 'dres pa kho nar snang ba'i phyir/ des na de min las log par @798b snang yang dgag pa'i rnam pa can du mi 'gyur te/ sgrub rtog la yang de ltar snang ba'i phyir/ de ltar yang/ de la ngo bo phyi rol dang/ gcig lta gzhan las log lta bur/ /zhes bshad pa ltar ro/ /gsum pa ni/ dkar zal la ba lang gi brda' sbyar ba na nag sgur la yang ba lang du go nus par phyi nang gnyis ka 'dod kyang de ltar go ba'i rgyu mtshan la mi 'dra ste/ phyi rol pa ni spyi la brda sbyor zhing spyi de yang cha med gcig yin pas/ gcig la sbyar bas kun la go zhing de lta min na/ dkar zal dang nang sgrub gnyis kyi steng na thun mong min pa'i khyad par mthun snang ba med na/ dkar zal de nag sgur dang rta gnyis la ltos nas 'dra mi 'dra'i khyad par med pas/ nag sgur ba lang du go la/ der mi go ba mi 'thad do zhes zer ro/ /rang lugs ni dkar zal gyi steng du ba lang ma yin pa las log pa'i gzhan sel la brda sbyar zhing/ gzhan sel de yang ba lang gi gsal ba kun la rjes su 'gro ba khyad par med pa'i phyir gcig la sbyar bas kun la go ba yang gzhan sel khas blangs pa na spyi khas blangs kyang sgra rtog mi 'jug par bsgrub zin la/ khas len na/ gzhan sel nyid kyis brda'i dgos pa 'grub pas de las gzhan pa'i spyi khas len pa don med do/ /des na brda'i zhen yul ni/ dkar zal dang ba lang ma yin pa las log pa'i tshogs don yin no/ /rtog pa phan tshun brten pa'i skyon yang med de/ brda sbyor ba'i brda sbyar dgos kyis gang zag rang nyid kyis ba yang dang ba lang min pa'i don gnyis mngon sum gyi stobs kyis so sor nges zin pa'i phyir ro/ /gnyis pa gzhal bya mngon gyur nges pa'i thabs la/ tshad ma gnyis su nges pa'i rgyu mtshan dang/ tshad 'bras gtan la dbab pa'o/ /dang po ni/ yul la sgro 'dogs gsar du gcod pa na/ spyi mtshan gzung yul du byas pa dang rang mtshan gzung yul du byas pa gnyis mthong zhing/ gnyis las gzhan yod pa khegs pas/ 'jal tshul gnyis su nges pa'i phyir/ tshad ma gnyis su nges pa yin gyi/ rjes dpag gis spyi mtshan dang mngon sum gyis rang mtshan 'jal ba'i sgo nas gnyis su sgrub pa min te/ de lta na rang mtshan yin na/ lkog gyur yin pa 'gal ba'i phyir ro/ /des na don byed nus pa dang @799a @#/ /mi nus pa gnyis su nges pa yang gzung tshul la gnyis 'dug pas tshad ma gnyis su nges par bsgrub pa yin no/ /gnyis pa la/ 'bras rtog dang po'i rnam gzhag dang/ gnyis pa dang/ gsum pa'i rnam gzhag dang/ blo tshul gnyis su sgrub pa'o/ /dang po ni/ sngon po gzhal bya/ sngon po'i rnam pa shar nas sngon po la gsar du mi slu ba'i rig pa tshad ma/ sngon po rtogs pa'i tshad ma 'bras bu/ 'di ni mdo sems gnyis kas kyang thun mong du khas len pa yin gyi/ mdo sde pas kyang sngon po mngon sum gyis gzhal kyang sngon po phyi don yin pa rtags kyis sgrub par 'dod pa yin no/ /de lta min na/ sgra 'dzin mngon sum tshad mas sgra'i mi rtag pa la rang stobs kyis nges pa 'dren no zhes zer na mdo sde pas ji ltar lan 'debs/ de ltar na sgra rtsod gzhir bzung nas rtag mi rtag rtsod par mi rigs par 'gyur ro zhe na/ de ltar na sngon po rtsod gzhir byas nas phyi don yin min rtsod pa yang mi rigs par 'gyur bas mdo sde pas 'di lta bu'i rags pa la 'khrul mi srid cing/ 'bras bu rnams sdog pa'i rtags las phyi don yod par yang bsgrubs so/ /gnyis pa 'bras rtog gnyis pa ni/ gzung rnam gzhal bya/ 'dzin rnam tshang ma/ rang rig 'bras bu/ gsum pa 'bras rtog gsum pa'i rnam gzhag la/ rnam gzhag ngos bzung ba dang/ 'gal ba sbang ba'o/ /dang po ni/ sngon po gzhal bya/ sngon po'i rnam pa shar nas sngon po la gsar du mi sgru ba'i rig pa tshad ma/ rang gi gzhal bya sngon po la ltos nas rang gi bdag nyid du gyur pa'i sngon po rig tshad ma 'bras bu'o/ /de la phyi don brtag pa mtha' bzung du byas nas phyi rol gyi don med mod/ yod na yang rang rig 'bras bu zhes 'dod pa danbg phyi don gzhal byar rang lugs su 'jog pa ni mdo sems gang gi yang lugs su mi rigs te/ gnyis ga'i lugs la phyi don mngon sum gyi gzhal bar mi 'thad pa'i phyir/ kha cig /phyi don tha snyad du yod cing rigs pas dpyad pa na khegs par 'dod pa ni bden gnyis kyi rnam dbye la mi mkhas pa yin te/ kun rdzob 'jal byed kyi tshad ma'i yul don dam dpyod byed kyi rigs pas 'gog @800b par 'dod pa'i phyir/ bden pa gnyis thabs dang thabs byung du mi 'dod par tsha grang bzhin du gnod bya gnod byed du khas len dgos par 'gyur ro/ /de ltar na grub mtha' smra ba su mkhas kyang rang lugs kyi bden gnyis 'jog pa na nang 'gal du khas len dgos so zhes smra dgos par 'gyur ro/ /rigs pa'i dbang phyug rnams kyis ni tha snyad pa'i tshad ma'i gzhal bya lta bu la rigs pas gnod pa 'bab na kun mkhyen gyi mnyam gzhag gi yul la yang gnod pa 'bab par gsungs so/ /des na 'bras rtog gsum pa'i skabs su yang sngon po lta bu gzhal byar bzhag nas 'jal byed de la ltos nas rang gi bdag nyid du gyur pa rig par mdo sde pa'i blo ngor rnam rig pas sgrub pa yin no/ /mdo sde pas de lta na rang rig 'bras bur 'dod dgos pas ha cang thal bar 'gyur snyam du bsam nas rtsod pa yin no/ /phyi rol don ni yod na yang/ /zhes pa ni/ mdo sde pas phyi rol don gyi gzhi ldog tu 'dod pa'i sngon po lta bu gzhal byar byas pa'i tshe yang sngon po rang las don gzhan min par sgrub pa yin no/ /kha cig /rnam rig pa'i lugs la sngon po mi srid cing des na dbang po'i mngon sum yang mi srid do zhes zer ba ni grub mtha' de'i lugs la blo kha ma phyogs pa ste/ rnam rig tsam gyi lugs gzhir bzhag nas thar pa dang thams cad mkhyen pa dngos stobs kyi rigs pas sgrub dgos shing/ de'i sgrub byed kyang dbang po'i mngon sum dang rang rig pa'i mngon sum la thug dgos pa yin no/ /phyi rol gyi don 'jog pa'i thun mong min pa'i gzhung tshig de tsam ma gtogs/ gzhung gong 'og kun tu rnam rig pa'i lugs la yang legs par sbyar du rung ba de rtogs par gyis shig /mngon sum gyi mtshan nyid 'khrul rgyu bzhis ma bskyed pas ma 'khrul ba dang sgra don 'dres rung du 'dzin pa'i rtog pa dang gral bas rtog bral ma 'khrul ba'i shes pa ni rnam rig pas kyang sngor snang dbang shes la zhugs par khas len par yin no/ /de lta min na phung po lnga'i rnam gzhag mi 'thad pa dang/ mdo sde pa'i ngor chos kyi bdag med gsar du sgrub mi nus pa sogs nyes pa du mar 'gyur ro/ /spyir slob dpon gyis gyi rol don gyi rnam gzhag mdzad pa'i dgos pa ni/ nyan thos kyi rigs can @801a @#/ /'khor ba las grol ba'i thabs bstan pa'i phyir yin no/ /de'i ngor phyi don bkag na chos kyi bdag med bstan par 'gyur zhing/ de'i snod du re zhig mi rung ba'i gdul bya la don gyi rnam gzhag bcom ldan 'das kyi bka' dang por bstan par mdzad pas de'i dgongs pa 'grel ba'i phyir du don gyi rnam gzhag mdzad pa yin no/ /'o na slob dpon gyis rang lugs kyi phyi don khegs pas tshad ma min pa'i don sgom pa las 'khor ba las grol bar las blangs dgos par 'gyur ro zhe na/ skyon med de/ phyi rol gyi don mi srid cing nyan thos la chos kyi bdag med rtogs pa med kyang nyan thos dgra bcom pa'i rtogs pa thob nus par bzhed pa'i phyir/ de'i lan sngar sngo 'dzin dbang shes gang la tshang mar song dpyad pa'i skabs su bshad zin to/ /gnyis pa la/ rigs pa dang 'gal ba dang/ lung dang 'gal ba spang ba'o/ /dang po ni/ mdo sde pa na re/ sngor snang dbang shes de sngon po la ltos te rang gi bdag nyid du gyur pa rig pa yin na rang rig 'bras bur 'gyur bas 'dzin rnam tshang mar 'gyur la/ gzung rnam tshang ma yin na tshad 'bras yul rdzas tha dad par 'gyur te/ tshad mar 'dod pa'i gzung ba'i rnam pa sngor snang dbang po'i shes pa des gzhal bya gang 'jal bris pa na/ sngon po 'jal lo zhes zer zhing de ltar gzhal ba'i dgos pa'am 'bras bu gang yin dris pa na/ sngor snang dbang shes rab nyid rang rig cing sgro 'dogs chod par khas blangs pa'i phyir/ /dper na sta ris gang gcod dris pa na shing gcod zer zhing 'bras bu la sta re rang nyid dum bur song zhes zer ba dang 'dra'o/ /zhes zer ro/ /de spang pa ni/ shes bya chos can/ sngor snang dbang shes de sngon po la ltos nas rang gi bdag nyid du gyur pa'i gzhal bya rig pa 'bras bu yin na sngon po gzhal byar byas pa'i tshe 'dzin rnam tshad mar 'gyur mi dgos par thal 'dzin pa'i rnam pa la yul phyi rol lta bu snang ba mi srid cing/ sngon po sngor snang shes pa rang gi bdag nyid yin pa'i phyir/ de'i tshe gzung ba'i rnam pa tshad mar rigs par thal/ dbang po'i shes pa la sngo ser dang yid du 'ong mi 'ong sogs gsal bar nyams su myong zhing myong ba ltar tshad mas @802b gnod med du nges pa'i don de dag la sngo ser sogs su 'jog rigs pa'i phyir/ dag don bsdu na/ sngon po sngor snang shes pa'i bdag nyid yin yang 'dzin rnam de 'jal byed kyi tshad mar 'gyur mi dgos so/ /'dzin rnam kha phyir phyogs pa mi srid cing/ sngon po rang gi bdag nyid du gyur pa'i sngor snang dbang po'i shes pas 'jal dgos pa'i phyir de ltar yang/ de tshe don snang 'di nyid ni/ /tshad yin zhes sogs kyis bstan no/ /sngon po shes pa'i bdag nyid yin na sngon po rig go zhes 'jog pa mi 'thad de/ phyi don med pa'i phyir zhe na/ sngor snang dbang shes chos can/ sngon po la ltos te rang gi bdag nyid du gyur pa'i gzhal bya rig pa yin yang/ khyod kyis sngon po rig par 'jog pa la 'gal ba med de/ /khyod rang gi stobs kyis drangs pa'i dpyad shes des sngon po rig par bzhag pa ltar khyod kyis sngon po rig par 'jog nus shing/ rig bya sngon po de khyod rang gi bdag nyid yin pa'i phyir/ rang rig yin yang don rig 'dod/ /ces pa'i don no/ /phyi rol don ni yod na yang/ /zhes pa dang/ don rig 'dod ces pa rnams mdo sde pas phyi rol don gyi mtshan gzhir 'dod pa'i sngo sogs rtogs sla ba'i phyir dang/ tshigs bcad sbyar bde ba'i phyir de ltar mdzad kyi/ phyi don mngon sum gyi gzhal byar mi rung ba lan cig min par bshad zin to/ /shes bya chos can/ tshad 'bras yul rdzas tha dad pa'i skyon med par thal/ sngor snang dbang po'i shes pa de sngon po la ltos te/ tshad ma yin zhing/ rang gi bdag nyid du gyur pa'i sngon po rig pa 'bras bu yin pa'i phyi pa des na sngon po la tshad med song zhing sngon po rig pa 'bras bu yin pas yul rdzas tha dad pa'i skyon med do/ /gnyis pa ni/ 'o na sngar rang rig 'bras bur bshad pa dang 'gal zhe na/ sngon po gzhal byar bzhag pa'i tshe rang rig 'bras bu yin par skabs gang du yang bzhag pa med la/ de'i phyir rol gzhal bya la'ang/ rang nyid nyams myong 'bras yin rigs/ /zhes pa'i don yang rang rig 'bras bur 'jog pa'i rig bya de yang rang gi bdag nyid du gyur pa nyams su myong bar rigs so/ /zhes rang bzhin sems pa'i tshad ma la ltos nas sgrub par byed pa yin gyi rang rig 'bras bur ston pa ma yin no/ /sngon po gzhal @803a @#/ /byed byas pa'i tshad ma mdo sems gnyis ka thun mong du 'dod cing phyi don mngon sum gyi gzhal byar mdo sde bas kyang mi 'dod la/ sngon po gzhal byar byas pa'i 'bras rtog dang po'i tshad 'bras kyi rnam gzhag rnam rig pa dang thun mong du 'gyur bas deng sngon po rig pa 'bras bur byas pa dang/ 'dir/ rang nyid nyams myong 'bras yin rigs/ /zhes bshad pa dang 'gal bar mi bsam mo/ /de ltar na 'bras rtog dang po dang gsum pa khyad par med par 'gyur zhe na/ skyon med de/ 'bras rtog gnyis pa'i skabs su gzhal byar bzhag pa'i gzung rnam de tshad ma las don gzhan min par ma zad 'bras rtog dang po'i skabs su gzhal byar bzhag pa'i sngon po de yang 'jal byed tshan ma'i bdag nyid yin par skabs 'dir rigs pas sgrub par byed pa yin pas/ tshad ma rang gi gzhal bya la ltos nas rang gi bdag nyid du gyur pa'i sngon po lta bu rig pa 'bras bu zhes bzhag de rung gi /rang rig 'bras bu zhes mi rung bas 'bras bu'i khyad par dang tshad 'bras kyi dgos pa mi 'dra'o/ /rig bya de rang gi bdag nyid du gyur pa yin par ni sngon po de shes pa'i bdag nyid yin nam/ shes pa las rdzas gzhan yin snyam du dpyad pa na/ rdzos tha dad yin pa don dam dpyod byed kyi rigs pas khegs pa la brten nas nges pas/ sngor snang shes pa de sngon po la ltos nas rang gi bdag nyid du gyur pa'i sngon po rig pa 'bras bu yin par grub pas/ rang gi ngo bo 'byod pa na/ rang rig 'bras bu yin par bshad/ /ces gsungs kyi tha snyad pa'i tshad ma rang dga' bas ni de ltar mi rtogs so/ /'jig rten kun la grags pa'i sngor snang shes pa sngon po la nges pa 'dren nus kyi sngon po don gzhan min par nges pa 'dren mi nus pas ma brtags ma dpyad pa dang/ rjes kyi dran shes la ltos nas sngon po rig pa 'bras bu yin zhes pa'i don no/ /don dam dpyod byed kyi rig pas sngon po don gzhan yin pa khegs pa la bsams nas brtags shing dpyad pa na rang gi bdag nyid du gyur pa'i sngon po rig pa 'bras bu'o zhes rnam par bzhag pa yin gyi/ dpyad ma dpyad kyi tha snyad du phyi don khas blangs nas don dam @804b dpyod byed kyi rigs pas de 'gog par 'dod pa ni rnam pa thams cad du mi rung bar bshad zin to/ /rnam rig pas kyang 'bras rtog dang po'i rnam gzhag de khas mi len na/ de dang 'dir bzhag pa'i 'bras bu gnyis 'gal ba spong ba'i don med cing/ 'bras rtog 'di mdo sde pa la sbyor ba ni slob dpon gyi dgongs pa dang rgya mtsho'i pha rol tshu rol bzhin du gyur pa yin na/ /bzhi pa blo tshul gnyis su sgrub pa la/ tshul gnyis ngos bzung ba dang/ shes pa thams cad tshul gnyis pa can du sgrub pa'o/ /dang po ni/ gzung rnam dang 'dzin rnam gnyis yin te/ de la 'dzin rnam ni shel dkar po dwangs pa lta bu yul gyi rnam pa ma shar ba'i shes pa nang na gnas pa lta bur snang zhing bdag tu 'dzin pa'i gzhir gyur pa 'di nyid yin la/ gzung rnam ni/ shel tshon gyis kha bsgyur ba ltar phyi na gnas pa lta bu snang ba 'di yin no/ /kha phyi lta'i shes pa yin na gzung ba'i rnam pa yin pas khyab cing 'dzin rnam des mngon sum du 'jal bar byed pa len no/ /kha cig /dbang shes lta bu kha phyir lta la gzhan rig dang nang lta la rang rig mngon sum du 'dod pa mi 'thad do/ /de ltar na rtog pa rnams kyang gzhi 'ga' zhig la ltos nas mngon sum du khas blangs dgos na rtog pa mngon sum du 'gyur ba'i skabs ni nam yang mi srid do/ /de ltar na/ rang gi ngo bo sgra don min/ /de phyir de la kun mngon sum/ /zhes pa dang 'gal lo zhe na/ de ni yul la yul can gyi ming gis btags nas/ shes pa kun 'dzin rnam la ltos nas mngon gyur yin zhes pa'i don nam/ yang na shes pa de la de'i steng na yod pa'i 'dzin rnam kun mngon sum yin zhes pa'i don to/ /gnyis pa ni/ yul shes de yi shes pa yi/ /bye brag las ni tshul gnyis nyid/ /ces bshad pa ltar sngor snang dbang po'i shes pa rang nyid gzung rnam dang 'dzin rnam gyi tshul gnyis pa can yin te/ yul shes pa ste rang nyid dang/ de shes pa dran shes gnyis so/ /yul gyi sgo nas bye brag so sor 'byed nus pa'i phyir/ de la gnod pa can gyi tshad ma ston pa ni/ sngor snang dbang shes dang de dran pa'i dran shes gnyis chos can/ blo mi 'dra ba so sor dbyer mi nus pa @805a @#/ /thal/ gzung rnam mi 'dra ba med cing shes pa kun gyi 'dzin rnam la khyad par mi 'dra ba dbye mi nus pa'i phyir/ rtags snga ma khas blangs so/ /gzhan yang/ gzung rnam gyis dben pa'i 'dzin rnam rkyang pa can du mtshungs na tshon gyis kha dag ma bskyur ba'i shel dkar po dbus su bzhag /tshon sngo ser g.yas g.yon du bzhag pa na/ shel de sngon po dang 'dra la ser po dang mi 'dra ba'i khyad par dbye mi nus pa bzhin du/ sngon 'dzin dbang shes chos can/ sngon po rig la ser po ma rig pa'i khyad par med par thal/ sngon po dang 'dra la ser po dang mi 'dra ba'i khyad par med pa'i phyir/ rtags ma grub na/ gzung rnam med par 'dod pa nyams so/ /kho na re/ sngon 'dzin myong ba'i 'dzin rnam chos can/ sngon 'dzin rig la ser 'dzin ma rig pa'i khyad par med par thal/ sngon 'dzin dang 'dra la ser 'dzin dang mi 'dra ba'i khyad par med pa'i phyir/ rtags ma grub na/ sngon 'dzin gyi rnam pa shar bar thal lo zhe na/ 'dod pa nyid de/ sngon 'dzin dngos su rtogs pa'i phyir/ sngon 'dzin gyi rnam pa ji lta bu shar zhe na/ sngon 'dzin gyi 'dzin rnam mo/ /'o na 'dzin rnam la 'dzin rnam shar zhes par 'gyur ro zhe na/ skyon med de/ sngor snang dbang shes sngon po'i rnam par gyur pa na/ de la sngon po'i rnam pa shar ba zhes pa ltar 'dzin rnam de nyid sngo 'dzin gyi rnam par gyur pa na de'i rnam pa shar zhes bya zhing/ de'i rnam pa ni blo'i rnam pa yin gyi yul gyi rnam pa min pas rang rig mngon sum la yul gyi rnam pa snang bar yang mi 'gyur ro/ /sngon 'dzin gyi 'dzin rnam nges sngon 'dzin rig la ser 'dzin ma rig na shes pa kun gyi 'dzin rnam la khyad par med pa nyams so/ /zhe na/ skyon med de/ sngor 'dzin dang ser 'dzin yul gyi rnam pa'i sgo nas mi 'dra ba so sor dbye nus shing de'i sgo nas 'dzin pa'i rnam pa thad kar bzhag pa tsam yin gyi yul can gyi rnam pa mi 'dra ba'i sgo nas so sor bzhag tu med do/ /gzung rnam khas mi len na 'dzin rnam nyid kyang mi 'grub bo/ /gnyis pa gzhan la rtogs pa bskyed pa'i thabs la/ mtha' gcig tu 'dzin pa'i sgro 'dogs gcod pa'i tshul dang/ mtha' gnyis su dogs pa'i the tshom gcod pa'i tshul lo/ /dang po ni/ sun 'byin yin te/ des phyir @806b rgol gyi ngor mi 'dod pa 'phangs nas blo the tshom can du byed pa yin no/ /dper na sgra rtag par 'dod pa na sgra rtag pa'i phyir ma byas par thal ba 'phen pa lta bu'o/ /de yang sun 'byin ltar snang gis sun 'byin mi nus so zhes gol sa bcad nas sun 'byin yang dag gis sun 'byin par byed dgos so zhes shes pa'i phyir du yang dag dang ltar snang gnyis smos so/ /gal te sgrub pa'i thal 'gyur des kyang rjes dpag bskyed nus te/ khyab pa tshad mas grub cing/ dam bca' la tshad mas bsal ba yod pas rang rgyud kyi phyogs chos grub pa'i phyir/ chos mi mthun sbyor gyi sgrub dag dang khyad par med par 'gyur ro zhe na/ skyon med de/ thal 'gyur gyi gtan tshigs dang/ rang rgyud kyi gtan tshigs gnyis don mi gcig cing/ gtan tshigs gnyis po blo yul du song ba'i dngos kyi 'bras bu yang mi gcig ste/ thal 'gyur gyi rtags su rtag pa bkod la/ rang rgyud la byas pa bkod pas so/ /thal 'gyur gyi khyab pa tshad mas grub cing/ rtags khas blangs/ blo'i yul du song ba na phyi rgol gyi ngor mi 'dod pa'i don khas blangs dgos par 'dug go snyam pa skye ba ni/ mi 'dod pa 'phen pa zhes bya la/ rang rgyud kyi rtags las rgol ba'i 'dod pa la dmigs pa'i tshad ma phyi rgol gyi ngor skye bas rang 'dod sgrub pa zhes bya'o/ /gnyis pa la/ sgrub ngag yang dag gi mtshan nyid dang/ de'i brjod bya ngos bzung ba'o/ /dang po ni/ rgol ba rang gis grub pa'i tshul gsum gzhan la gsal bar ston pa'i yan lag gnyis dang ldan pa'i ngag rnam dag go /kha cig /sgrub ngag yang dag la phyogs chos rkyang pa brjod pa dang/ khyab pa rkyang pa brjod pa dang/ gnyis ka brjod pa yod de/ gtan tshigs 'ba' zhig brjod par zad/ zhes bshad pa ltar ro zhe na/ de ltar na phyogs chos rkyang pa can gyi rtags ci'i phyir las mi len/ bsgrub bya la rtogs pa bskyed pa la tshul gsum ga phyi rgol gyis nges dgos shing de lta min na ma nges pa'i rtags kyang rtags yang dag tu 'gyur ro snyam na/ 'o na phyi rgol gyi ngor rjes dpag bskyed pa la tshul gnyis ka brjod dgos shing de lta min na/ sgra yang gzhal bya yin no zhes pa'i dag kyang sgra mi rtag par sgrub pa'i sgrub dag yang dag tu 'gyur ro/ /de lta bu'i rtags de brjod kyang mi mthun phyogs la 'jug pa'i dogs pa gcod mi nus pa'i phyir/ de brjod pa'i @807a @#/ /ngag kyang sgrub ngag yang dag tu mi 'gyur ro snyam na/ 'o na rtags kyi phyogs chos rkyang pa brjod pas kyang mi mthun phyogs las ldog pa ma bstan pa'i phyir/ sgrub ngag yang dag tu mi rigs so/ /khyab pa ma bstan kyang phyogs chos rkyang pa brjod pas sgrub ngag yang dag tu 'gyur ro/ /sngar 'brel pa shes zin ma brjed pa'i ngor de tsam brjod pas rjes dpag bskyed nus pa'i phyir zhe na/ de ltar na sngar nas khyab pa shes zin ma brjed pa'i ngor da lta phyogs chos sgrubs pas kyang rjes dpag bskyed nus pa'i phyir/ phyogs chos rkyang pa can gyi rtags kyang ci'i phyir las mi len/ de ltar phyogs chos rkyang pa bsgrub kyang sngar grub zin pa'i khyab pa de yang da lta ma brjed par yod pa'i phyir/ tshul sum ga ldan pa rtags su song gi phyogs chos rkyang pa can gyi rtags yod par mi 'gyur zhe na/ 'o na da lta phyogs chos rkyang pa brjod kyang sngar 'brel pa nges par byed pa'i dus na 'brel pa brjod dgos la brjod pa de nyid kyi byed pa da lta yang mnyams par yod pa'i phyir sgrub dag yon lag gnyis ldan du 'gyur gyi yan lag gcig ldan kho na'i sgrub ngag yang dag yong par yang mi 'gyur ro/ /ngag snga phyi gnyis kyi bar du dus ring pos chod pa'i phyir sgrub ngag gcig gi yan lag tu mi rigs she na/ de lta na yan lag gnyis ldan 'dod pa'i phyogs khyab brjod pa gnyis kyang dus mi mtshungs pa'i phyir sgrub dag gcig gi yan lag tu mi rigs so/ /des na sgrub ngag yang dag la yan lag gnyis ldan gyis khyab cing sngar gyi gzhung gi dgongs pa ni sngar khyad pa'i yan lag brjod nas de'i byed pa ma nyams pa yod na da lta phyogs chos rkyang pa brjod pas rkyang rjes dpag bskyed nus par ston phyi de gcig pus sgrub ngag yang dag tu ston pa ma yin no/ /de bzhin du khyab pa brjod pa'ang shes par bya'o/ /gnyis pa la shugs bstan phyogs yang dag gi mtshan nyid/ dngos bstan rtags kyi rab dbye'o/ /dang po ni/ ngo bo'i don sogs chos lnga tshang ba yin no/ /de lta na mig sogs bdag don byed pa yang phyi rgol gyi ngor grub bsal ma zhugs pa sogs chos lnga tshang ba'i phyir phyogs yang dag tu 'gyur la/ de ltar na dam bca' yang dag yin min ni sgrub byed tshad ma yod med kyi sgo nas 'jog dgos @808b pas mig sogs bdag don byed pa de yang tshad mas grub par 'gyur ro zhe na/ phyi rgol gyi ngor tshad mas ma bsal ba yod kyang spyir tshad mas ma bsal ba mtshan nyid du dgos pas de phyogs yang dag tu mi 'gyur ro/ /'o na ngo bo zhes pas spyir tshad mas ma grub pa dgos kyi phyi rgol gyi ngor tshad mas ma grub pa tsam gyis phyogs su mi 'gyur ro zhe na/ de ltar na rtags yang dag gi bsgrub bya yin na tshad mas grub par 'gal dgos par 'gyur ro/ /rtags yang dag gi bsgrub bya yin na tshad mas bsal bar 'gal ba ni 'dod pa nyid do/ /phyogs kyi rigs mi mthun la rgol bas phyogs su bzung ba dang ma bzung ba gnyis phyi ma 'dod pas sel zhing/ snga ma la grub bsal gnyis yod pas de gnyis ngo bo dang ma bsal bas sel lo/ /tshig phrad dang 'dod pa gnyis kyis log rtog sel bar byed do/ /gnyis pa ni/ phyogs chos can dgu'i dbye ba yin te/ de smos pa'i dgos pa ni rtags yang dag gi mtshan gzhi 'bras rang ma dmigs pa gsum du nges pa dang/ mtshan nyid tshul gsum du grangs nges pa dang/ nus yul rtsod gzhi'i steng du mi mthun phyogs mtha' dag rnam par bcad pa yin par shes pa'i don du phyogs chos can dgur smos so/ /de la mtshan gzhi gsum du nges par sgrub pa'i don du gtan tshigs yang dag gnyis dang bzlog pa gnyis te bzhir smos pa yin te/ de yang rang bzhin dang 'bras bu'i rtags kyis khyab byed du go bar byed pa ni 'dod pa tsam gyis ldog pa min no zhes bstan pa'i don du rtags yang dag gnyis bkod de/ 'dod pa tsam gyis bzlog na de gnyis 'gal rtags su yang byed nus par 'gyur ba'i phyir/ go byed kyi nus pa de 'dra ba de 'dod pa tsam gyis 'jug pa min no zhes pa'i don du 'gal rtags gnyis smos te/ 'dod pas 'jug na de gnyis rtags yang dag tu yang 'gyur ro/ /de ltar dngos po'i dbang gis rgyu dang khyab byed log stobs kyis 'bras bu dang khyad bya ldog par bstan pa na rgyu dang khyab byed ma dmigs pa'i dgag rtags shugs la 'phangs pa yin no/ /de ltar na rtags yang dag gi mtshan gzhi gsum du nges par grub bo/ /mtshan nyid tshul gsum du nges par bya ba'i don du phyogs chos can gnyis ston pa ni/ rtsod phyir khyad par spyi dag ste/ /zhes ba'o/ /de yang phyogs chos kyi rab dbye ston pa'i skabs yin pa nyid kyis phyogs chos mtshan nyid pa yin pa la rtsod pa med do/ /kha cig rjes 'gro yang mi dgos te @809a @#/ /phyogs chos dang ldog pa tsam gyis rtags yang dag tu 'gyur te/ dper na thun mong min pa bzhin zhes pa'i rtsod pa spangs pa'i don du ldog pa rjes 'brel mi 'khrul bar bsgrub nas rjes 'gro'i tshul mtshan nyid du dgos par bstan pa yin no/ /kha cig /phyogs chos dang rjes 'gro tsam rtags yang dag tu 'gyur te/ gzhal byas sgra mi rtag par bsgrub par zhin no zhes pa'i rtsod pa spangs pa'i don du rjes 'gro ldog pa la mi 'khrul bar bsgrub nas ldog pa yang mtshan nyid du bstan pa yin no/ rtags yang dag yin na mi mthun phyogs la med par nges pa'i sgo nas/ rtags kyi nus yul nges pa bsgrub pa'i don du phyogs chos can gsum bstan pa ni/ lhag ma ldog pa'i sgrub byed yin zhes pa'o/ /de yang dang por ldog khyab gtso bor bsgrub nas rtsod gzhi'i steng du mi mthun phyogs tsam bcad pa nus yul du nges par byed pa yin no/ /de la rjes 'gro grub tsam gyis rtags su 'gyur na/ mi rtag pa rtsol ma byung gi rtags su 'gyur la/ 'gro ldog cha mnyam pas rtags su 'gyur na/ reg bya can min ba de yang mi rtag pa sgrub pa'i rtags su 'gyur ro/ /rjes 'gro stobs dang ldan zhing ldog pa stobs chung ba yin na/ mi rtag pa rtsol byung sgrub pa'i rtags su 'gyur ro/ /des na ldog khyab gtso bor grub pa dgos so/ /'di ni chos kyi rgyal po tsong kha pa chen pos mdzad pa'i tshad ma'i lam rim yod do zhes zer ba de nyid 'khrul med yin mod kyi/ rje nyid kyis mdzad pa'i mdzad byang mi snang zhing/ 'on kyang rje'i gsung yin par gor ma chag pas yid ma ches par mi bya'o/ /smas pa/ rigs gzhung rin chen gter la dbang bsgyur ba'i/ /rigs pa'i dbang phyug dgongs don gtsug gi nor/ don yod tshig 'phreng rlabs kyis ma skyong bar/ /ded dpon blo bzang grags pas ma nor rnyed/ /tshig nyung don rgyas spel legs rgyal mtshan rtser/ gsal bar bkod nas kun la snyom par brim/ de lta mod kyi phal cher phal la tshig /phrag dog shes rab med pas 'di ma thob/ /kho bo'i bsod nams lag rtser son ma thag mi mngon yid kyi yol gor spa 'os kyang/ skal bzang kun dga'i dga' ston spel ba'i ched/ chos sbyin mdzad med spar gyi 'du byed bskrun/ gang dag tshig gi khur po nga rgyal dang/ /lhan cig lhun po'i po la 'gran bzod kyang/ /don gyi rin thang rdul phran skyed byed pa/ /de dag rnams kyang 'di la brten na legs/ /dge 'dis rgyal ba gnyis pa tsong kha pa'i/ /bka' srol rig lam 'phel zhing rgyas pa dang/ /'gro kun rtag tu dge ba'i lugs bzang 'dir/ /zhugs nas kun mkhyen bde blag thob par shog ces tshad ma'i lam bsgrigs par gsar skrun ba kyis skabs spang byang smon tshig tu ke'u tshang sprul ming pas sbyar ba'o// // spar 'di ke'u tshang bla brang du bzhugs/ @810b ! oM swa sti/ sa gsum 'gro ba'i sman gcig rgyal ba'i bstan/ /thub dgong ji bzhin 'dzin skyobs spal mkhas pas/ /rgya bod mkhas grub yongs kyi dgongs pa'i gnad/ /snying por sgril ba'i glegs bam 'di rmad byung/ /gang gi 'phrul chen par du bskrun pa yis/ / thabs tshul lhur len blo bzang yar 'phel dang/ /karma dgra 'dul bsod nams rdo rje sogs/ /bsam sbyor dag pa'i 'brel thog rnams kyis mtshon/ /'gro kun dge ba'i bshes kyi rjes bzung nas/ /ring min sku bzhi'i rgyal sa zin pa dang/ /legs bshad mchog 'di deng nas srid mtha'i bar/ /rab rgyas bstan 'gro'i don chen 'grub gyur cig // //