@419a @#/ /'a @#/ /rgya bod du bstan pa'i sbyin bdag rgyal blon ji ltar byung tshul gyi mtshan tho bzhugs so// // @420b @421a @#/ /'dul ba lung las/ rgyal po rnams ni tshig gis 'grub/ /lha rnams bsam pas 'grub 'gyur zhing/ /tshul khrims ldan pa smon pas 'grub/ /de bzhin bsam gtan pa rnams kyis/ /sems bskyed pas ni thams cad 'grub/ /ces dang/ sbyin sreg mchod sbyin rnams kyi mchog /sdeb sbyor mchog ni nyi ma'i lha/ /mi yi mchog ni rgyal po ste/ /rgya mtsho chu bo rnams kyi mchog /zla ba rgyu skar rnams kyi mchog /nyi ma snang byed rnams kyi mchog /steng dang 'og dang thad kar dang/ /'gro ba'i 'gro ba ji snyed pa/ /lha dang bcas pa'i 'jig rten na/ /smra ba'i mchog ni rdzogs sangs rgyas/ /zhes gsungs pa ltar/ las dge sdig gang la yang tshig tsam gyis 'grub pa mi yi mchog rgyal po rnams rgya gar dang bod du byung tshul mdor bsdus bshad na/ bskal pa dang po chags pa'i mjug gnas pa'i 'go brtsams pa skye rgu'i tshe lo brgyad khri thub pa'i tshe/ mang bkur rgyal po byung zhing/ de nas/ ston pa shAkya thub pa'i yab rgyal po zas gtsang gi bar du/ 'jig rten gdags pa ltar na/ rgyal po 'bum phrag gcig lnga khri lnga stong chig brgya zhe dgu song zhing/ sa skya pa rje btsun grags pa rgyal mtshan gyi gsung ltar na/ rgyal rabs sa ya phrag gcig khri phrag bdun/ stong phrag bzhi/ brgya phrag lnga dang brgyad song/ 'gos lo'i deb ther ltar na/ rgyal po sa ya chig 'bum nyi khri @422b chig stong lnga brgya bcu bzhi song/ baiDUrya dkar po ltar na/ rgyal po 'bum tsho dgu/ khri phrag gsum/ stong phrag bdun/ lnga brgya/ so gnyis song zhing/ gang ltar yang rgyal po de dag gi sku ring la/ dang po mi rigs lnga byung ste/ rtsod ldan gyi dus su/ 'khor bas skyo ste nags su song/ /bsam gtan thob ste mngon shes 'char/ /de la mi yi drang srong zer/ /bsam gtan ma thob grong du babs/ /snyan ngag sogs 'tsho bram ze'i rigs/ / dpya khral la dbang rgyal po'i rigs/ /tshong dpon la sogs rje 'u rigs/ /zhing las kyis 'tsho dmangs rigs te/ /srog gcod la sogs ngan las kyis/ /'tsho ba gdol pa'i rigs yin no/ /zhes pa ltar byung ngo/ /de nas/ rgyal po nga las nu'am/ spyi bo skyes sogs gser dngul zangs lcags bzhi yi 'khor lo bsgyur rgyal sogs kyis gling bzhi/ gling gsum/ gling gnyis/ gling gcig la dbang ba rnams byung ngo/ / de nas skye rgu'i tshe lo brgyad khri thub pa'i skabs su/ bskal bzang gi sangs rgyas stong gi thog mar/ sangs rgyas 'khor ba 'jig byon/ bzhi khri'i skabs su gser thub/ nyi khri'i skabs su 'od srung/ tshe lo brgya pa'i dus su bdag cag gi ston pa shAkya thub pa phebs pa'o/ /yab rgyal po zas gtsang la sku mched bzhi yod do/ /zas dkar zas/ bra'o zas/ bdud rtsi zas/ zas gtsang dang bzhi/ bdud rtsi zas la tshad med zas kyang zer/ zas dkar zas kyi bu rgyal ba dang/ bzang ldan/ bu mo dkar mo dang gsum/ bra'o zas kyi bu shAkya'i ming can dang/ 'phags pa ma 'gag pa/ bu mo bra'o ma dang gsum/ bdud rtsi zas kyi bu/ nyan @423a @#/ /thos kun dga' bo dang/ dge slong lhas byin/ bu mo bdud rtsi ma dang gsum/ zas gtsang ma/ grong khyer lhas bstan gyi shAkya legs pa rab sad kyi bu mo spun gnyis btsun mor blangs pas/ btsun mo che ba skye rgu'i bdag mo la nyan thos mdzes dga' 'khrungs/ btsun mo chung ba sgyu 'phrul lha mo la/ bdag cag gi ston pa mnyam med shAkya'i rgyal po 'khrungs/ yang zas gtsang la bu mo gtsang ma zer ba yod pas/ bu mo gtsang ma'i sras legs pa rab sad/ bu mo dkar mo'i sras 'phreng ba can/ bu mo bre mo'i sras bzang len/ bu mo bdud rtsi ma'i sras dge 'phel te/ rgyal bu gzhon nu don grub kyi tsha bo bzhi'o/ /mnyam med shAkya'i rgyal po de/ dgung lo nyer dgu'i bar rgyal srid bzung ste/ btsun mo sa 'tsho mas gtsos nyi khri/ btsun mo grags 'dzin mas gtsos nyi khri/ btsun mo ri dwags skyes kyis gtsos nyi khri ste/ btsun mo drug khri khab tu bzhes pas/ btsun mo grags 'dzin ma la sras gnas brtan sgra gcan 'dzin byung/ de nas mang bkur rgyal po'i rgyal rabs rdzogs/ zhes gsungs kyang dkar po rnam gsum gyi nang tshan rje btsun grags rgyan pa'i bzhed pa ltar na bskal bzang gi sangs rgyas stong gi nang na rgyal rigs su byon pa thams cad 'khor los bsgyur rgyal gyi rgyal rigs su gsungs pas/ 'khor los bsgyur ba'i rgyal rigs yin tshad/ mang bkur rgyal po'i rgyal rigs las ma 'das pas/ bskal pa 'di la mang bkur rgyal rigs mi rdzogs so/ /'o na mngon par 'byung ba'i mdo las sgra gcan 'dzin nas mang bkur rgyal po'i rgyal rabs rdzogs gsungs pa ji @424b ltar drangs snyam na/ de ni shAkya'i rigs sam/ yang na shAkya'i rigs sogs mnga' thang che ba/ bskal pa ya thog 'dir de yis rdzogs pa la dgongs so zhes gsungs/ ston pa shAkya'i rgyal po grong khyer ser skya'i rgyal po'i pho brang du sa ga zla ba'i bco lngar lhums su zhugs te/ lo phyi ma'i dbo zla'i tshes bcur grong khyer ser skya'i lum bi'i skyed tshal du/ rgyal po zas gtsang gi btsun mo chung ba/ sgyu 'phrul lha mo'i mchan khung g.yas nas sku bltams pa'i tshe/ de dang dus mnyam du/ gter kha lnga brgya/ rte'u lnga brgya/ khyu mchog lnga brgya/ shAkya'i bu lnga brgya/ rgyal po chen po bzhi la sras bzhi 'khrungs te/ yul dbus ma ga d+ha na rgyal po gzugs can snying po/ mnyan yod ko sa la na rgyal po gsal rgyal/ grong khyer 'phags rgyal na rgyal po gtum po rab snang/ ko'u sham b+hi na pad sa la'i rgyal po 'char byed dam shar pa bzhi 'khrungs so/ /rgyal po shar pa'i rgyal rabs lnga na bu mtshan ltas gzhan dang mi 'dra ba zhig byung ba/ las kyi dbang gis mtshan ltas legs par ma mthong nas sgrom du bcug nas chur skyur btang bas/ chu 'gram zhig tu rgya gar ba'i zhing pa kha shas kyis rnyed de/ kha phye bas byung/ rgyal bu yab rgyal po'i mdzad spyod la skyo ste/ rang gi khyim du ma song bar 'khyams te lo mang du song ba'i mthar bod du phyin te/ rtsed thang gi nye skor lha ri yol po 'am rol pa'i ri la slebs pa na/ phyugs rdzi rnams kyis rnyed nas blta bas mi ngoms pa'i gzugs la shin tu ya mtshan te/ gnya' ba la khri btegs byas nas khyim du gdan drangs te/ rgyal por bskos pas/ bod chos rgyal @425a @#/ /gdung rgyud thog ma gnya' khri btsan po yin/ de dus su bon po shin tu mang bas bon gyi lhas gnang ste nam mkha' las babs pa yin zer ba sogs mang yang dag pa ni sngar bshad pa de yin/ bod chos rgyal gdung rgyud gnya' khri nas/ glang dar rgyal po'i bar bzhi bcu rim byon dang/ khyad par du yang chos rgyal srong btsan/ khri srong lde btsan/ mnga' bdag khri ral te/ rim bzhin rigs gsum mgon po'i sprul par grags pa'i mes dbon rnam gsum gyis kha lo bsgyur/ bod gangs can gyi ljongs de rgya khyon ji tsam yod ce na/ spyir 'dzam bu gling de rma bya chen mo'i mdo las/ yul 'khor lnga brgya/ yul ljongs chen po bcu drug yul phran stong/ mi rigs mi gcig pa sum brgya drug cu/ skad rigs mi gcig pa bdun brgya nyi shu'o/ /zhes gsungs shing/ de la chos dar ba dang ma dar ba'i phyogs ji tsam zhe na/ 'dzam gling sog kha lta bu'i mtha' bskor thams cad chos ma dar ba ste/ de gang zhe na/ klo dang/ rdo dang/ kha phra dang/ kha sog dang/ ga zha dang/ kha su ra dang/ dmar dang/ rtsa phung dang/ rdo bo ra dang/ bram tsa dang/ hu thug dang/ cha gling dang/ sprel slag dang/ khyi khyo dang/ dar slog dang/ zhwang tsha dang/ tsu ta'i gling sogs mang ngo/ /chos dar ba'i yul ni/ rgya gar dang kha che'i phyogs gcig dang/ sing ga gling dang/ o rgyan dang/ za hor dang/ gser gling dang/ sham b+ha la dang/ sing ga'i gling dang/ zangs gling dang/ li yul dang/ rgya nag gi yul dang/ bal yul dang/ bod yul rnams so/ /chos dar ba'i yul bcu gcig gi nang @426b tshan/ bod yul gcig po ngos 'dzin ni/ rgyal ba 'brom ston pas mngon shes kyis brtags te bka' bstsal pa ni/ om swa sti/ mtho lding gser gyi lha khang du/ /rgyal po sa yi sang ga yis/ /'brom ston rgyal ba'i 'byung gnas la/ /bod kyi gnas tshul 'di zhus so/ /bod kyi skyabs gnas sa yi bdag /thogs med ldan pa'i blo gros can/ /'brom rje dam pa tshur gson dang/ /rgyal po sa yi sang ga nga/ /rgya gar ri thang yangs po nas/ /bod yul ri sul chen po 'dir/ /a ti sha yi rjes 'brangs nas/ /bdag gi yul la mkhas na yang/ /rgyus med yul 'dir mgo bo 'thom/ /de phyir bod kyi yul 'di na/ /yul gyi sa dpyad du ru srid/ /de la 'brom gyis lan gsungs pa/ /sa bdag rgyal po nga la nyon/ /spyi ming kha ba can ljongs na/ /sgos ming dbus gtsang khams gsum zer/ /dwags kong long po nyang dang bzhi/ /mtha' 'khob byang thang 'brog dang lnga/ /yul gyi sa dpyad brgyad du gnas/ /mnga' ris la yang rnam pa gsum/ /gtsang la g.yas ru g.yon ru gnyis/ /zad dang 'bri tshal lho mon gsum/ /srad dang ru mtshams 'u yug shangs/ /la phran lung phran nyis brgya gsum/ /dbus na dbu ru g.yu ru gnyis/ /dbu ru la yang lho byang gnyis/ /lho na 'phan yul stod lung gnyis/ /byang na zho dang mal gro gnyis/ /lung phran chen po nyis brgya gsum/ /stod smad cha la stong phrag bzhi/ /khams kyi cha la nyis brgya bcu/ /mdor na gangs ri'i khrod 'di na/ /lung chen stong dang lnga brgya yod/ /lung sul khri dang nyis stong yod/ /ri bo khri phrag @427a @#/ /bcu bzhi yod/ /ri phran 'bum tsho nyi shu lnga/ /thang chen stong dang drug cu bdun/ /thang phran 'bum phrag bcu bdun yod/ /chu bo chen po bzhi ru gnas/ /chu phran 'bum tsho sum cu lnga/ /chu mig 'bum phrag bzhi bcu drug /brag ri khri phrag dgu ru gnas/ /lam 'phrang khri phrag bcu dgu ste/ /bod yul khyon ni de tsam zhig /sa yi sang ga ches mtshar nas/ /'brom la slar yang 'di zhus pa/ /bod la shing sgo du zhig yod/ /'brog na sbra khyim du zhig gnas/ /sde dgon lha khang grangs la du/ /mig can khyod kyis bstan du gsol/ /'brom rjes de la lan gsungs pa/ /shing sgo 'bum tsho lnga stong yod/ /sbra khyim 'bum phrag nyi shu bzhi/ /sde dgon lnga bcu rtsa lnga yod/ /sa yi sang ga ya mtshan nas/ /slar yang zhib tu 'di zhus so/ /bod la mi la skyes pa du/ /za ma bud med ji tsam zhig /de dag kun la chos mdzad du/ / chos byed kun la yar 'gro du/ /'gros rjes de la lan gsungs pa/ /bod na skyes pa bye ba gsum/ /za ma bud med bye ba bzhi/ /chos la spyod pa khri phrag bzhi/ /yar 'gro'i chos pa bzhi brgya ste/ /sa yi bdag po tshur gson dang/ /ngo bo'i las kyi me long la/ /las kyi gzugs brnyan sna tshogs 'char/ /'khrul ba mnga' ba rje la bshags/ /sa bdag thugs dgongs rdzogs par mdzod/ /ces bod kyi rnam gzhag gsungs so/ /rgyal ba 'brom gyis de skad gsungs pas/ da lta bod dang bod chen po zer zhing/ bod chen po la mdo stod mdo smad gnyis su phye nas mdo stod ni bar khams pa rnams dang/ mdo smad ni @428b a mdo'i yul la byed do/ bod ni dbus gtsang ru bzhi la zer ro/ dbus kyi ru gnyis ni dbu ru skyid shod phyogs dang/ g.yo ru ngam shod lho kha'i phyogs la byed do/ /gtsang gi ru gnyis ni ru lag shab 'gyed kyi phyogs dang/ g.yas ru nyang chu gzhung la zer ro/ /yang stod mnga' ris skor gsum/ bar dbus gtsang ru bzhi/ smad mdo khams sgang drug dang yang na gsum zer zhing/ de ni rma chu/ gtsang chu/ nyang chu/ 'bri chu/ ngom chu/ gtsang dbus gnyis kyi chu 'dres pa lo hi ta'am chu bo si ta yang zer ba'i gtsang chu ste/ chu re'i bar la sgang re zer ro/ mdo khams la sma khams btags pa khams gcig mdo smad la g.yar mo thang du btags pa khams gcig tsong kha la gyi thang btags pa khams gcig ste smad mdo khams sgang gsum zer ro/ /yang dbus gtsang ru bzhi la khri skor bcu gsum ni/ gtsang gi phyogs la/ la stod lho pa'i dud kyi grangs/ /stong dang dgu brgya dgu bcu yin/ /la stod byang pa nyis stong dang/ /nyis brgya lnga bcu tham pa'o/ /chu mig khri skor hor du grangs/ /sum stong nyag gsum byed pa yod/ / zha lu khri skor sum stong dang/ /brgyad brgya dgu bcu rtsa gnyis yod/ /byang 'brog khri skor khyad chos dang/ /yar 'brog khri skor khyad chos la/ /lan ni bcu drug zer ba yod/ /hor dud phyed dang brgyad brgya 'o/ / dbus kyi phyogs la/ 'bri dang bod 'brog gnyis po la/ /sum stong sum brgya drug brgya yod/ /tshal par sum stong bdun brgya yin/ /phag mo gru par nyis stong dang/ /bzhi brgya sum cu rtsa brgyad do/ / @429a @#/ /g.ya' bzang ba la sum stong dang/ /rgya ma ba dang bya yul ba/ /lnga stong dgu brgya phyed phyed yin/ /stag lung pa la lnga brgya dang/ /de rting lha 'brug la sogs pa'i/ /kha thor stong dang bzhi brgya yod/ /ces sogs 'byung/ de 'dra'i yul gru la dbang ba/ bod chos rgyal gyi thog mar rgya gar shAkya li tsa byi'i rigs rgyal po shar pa'i bu nas bzung/ gnam gyi khri bdun/ stod kyi steng gnyis/ bar du legs drug sa la lde brgyad/ 'og gi btsan gsum ste gnya' khri dang por byas pa'i rgyal rabs nyer bdun song ba na/ skyid shod dbus stod rgya ma pho brang byams pa mi 'gyur du/ yab gnam ri srong btsan/ yum 'bri bza' thod dkar gyi sras su 'phags mchog spyan ras gzigs dngos su rgyal po srong btsan sgam por mtshan gsol ba de 'khrungs/ dgung lo bcu gsum la yab rgyal po gnam ri srong btsan gyi khri la mnga' gsol/ da lta'i dga' ldan 'di yi dbang bskur ri la lha yi chus chos rgyal chen por dbang bskur ba yin/ de yi btsun mo bal yul nas bal bza'/ rgya nag yul nas rgya bza' kong jo/ stod mnga' ris skor gsum nas zhang zhung bza' li thig sman/ smad mdo khams sgang drug nas mi nyag ru yong bza'/ bar dbus gtsang ru bzhi nas stod lung mang bza' khri lcam ste btsun mo lnga khab tu blangs/ mang bza' khri lcam la sras gung ri gung btsan 'khrungs/ btsun mo gzhan bzhi la sras med zer/ sras gung ri gung btsan dgung lo bcu gsum dus su khri la phebs nas/ de nas sras mang srong mang btsan 'khrungs kyang/ sras gung ri gung btsan @430b dgung lo bco brgyad lon tshe gshegs pas/ slar yang rgyal po srong btsan rang gis rgyal srid bzung nas lo brgyad cu bar du bzhugs so/ /rgyal pos sprul pa'i bkod pa sna tshogs kyis mtha' 'dul gyi lha khang bzhi/ yang 'dul gyi lha khang bzhi/ ru gnon gyi lha khang bzhi ste/ bcu gnyis bzhengs/ bal bzas lha ldan gyi lha khang/ rgya bzas ra mo che yi lha khang/ zhang zhung bza' yis them bu kog pa'i lha khang/ ru yong bza' yis brag lha klu sgug lha khang/ mang bza' khri lcam gyis brag yer pa'i lha khang bzhengs/ lha mo khro gnyer can gyi sprul pa bal po ye rang rgyal po'i sras mo lcags sprel lo ma bal bzas da lta ra mo che'i jo bo mi bskyod rdo rje bdag cag gi ston pa dgung lo brgyad pa'i tshad/ rgyal ba rang nyid kyis rab gnas mdzad pa dang/ sangs rgyas 'od srung gi dus su rgyal po kri kri'i thugs dam rten rgyal ba byams pa chos 'khor/ sgrol ma rnams bal yul nas gdan drangs/ de bsu ba la 'jam dbyangs sprul pa thon mi phebs pa yin/ 'phags pa'i gnas brtan bcu drug dngos su gdan drangs pa'i sbyin bdag rgya nag rgyal po thal ju'i sras mo sgrol ma'i sprul pa sa phag lo ma rgya nag gi skad du wan ching kong jo/ bod skad du bsgyur na chu nang gi padma zhes mtshan gsol ba des/ da lta lha sa'i jo bo shAkya mu ne bdag cag gi ston pa dgung lo bcu gnyis pa'i sku tshad rgyal ba rang nyid bzhugs pa dang khyad par med pa'i jo bo rin po che gdan drangs pa'o/ /de bsu ba la blon po mgar mi phebs pa yin/ bal bzas lha ldan dang/ rgya bzas ra mo che bzhengs pa yin yang jo@431a @#/ /bo gnyis po phyis su bzhugs yul bsgyur ba'o/ /lha sa la lha ldan zer ba ni skad zur chag pa ste/ rang byon lnga ldan gyi gtsug lag khang der yod pas de skad zer ro/ /rang byon lnga ldan ni jo bo bcu gcig zhal gyi srog shing tsan dan sbrul gyi snying po la rang byon 'phags pa'i sku dang po/ sku stod bzhengs ma dgos par rang byon du byung ba gnyis pa/ rgya bza' nu ma g.yas/ bal bza' nu ma g.yon/ rgyal po srong btsan sgam po rang nyid thugs khar thim zhing sprul pa'i sku yi bkod pa sdud pa gsum ste lnga la zer ro/ bod yul 'di srin mo gan rgyal du 'gyel ba 'dra ba'i sa dgra gnon phyir/ rgyal pos bzhengs pa'i lha khang bcu gnyis ni/ gru mo g.yas kong po bu chu lha khang/ gru mo g.yon lho brag mkho mthing lha khang/ pus mo g.yas mon 'bum thang lha khang/ pus mo g.yon byang bra dum lha khang ste mtha' 'dul gyi lha khang bzhi'o/ / lag mthil g.yas mdo khams ldan chos 'khor gyi 'gram gyi glong thang sgrol ma lha khang/ lag mthil g.yon snye thang chos rdzong gi 'gram gyi tshangs pa rlung gnon lha khang/ rkang pa g.yas mang yul byams sprin gyi gtsug lag khang/ rkang pa g.yon mon spa gro gyer chu'i lha khang ste yang 'dul gyi lha khang bzhi'o/ /dpung pa g.yas yar klung khra 'brug gi gtsug lag khang/ de la khra 'brug ces brjod pa'i rgyu mtshan ni/ der klu gdug pa can zhig gnas pas der lha khang bzhengs skabs de phyogs kyi sngags pa zhig gis khyung bsgrubs te bya khra ru sprul nas skad 'brug ltar sgrog te klu btul bas de skad ces brjod/ dpung pa g.yon par dbus @432b stod me gro ka tshal gyi jo bo lha khang/ dpyi g.yas par gtsang thob rgyal gyi thad kyi pha ri gtsang chu'i 'gram du gtsang 'gram bye ma'i lha khang/ dpyi g.yon par gtsang lha rtse'i nye skor gyi ru lag grom pa rgyang gi lha khang ste ru gnon gyi gtsug lag khang bzhi'o/ /rgyal po srong btsan gyis mi chos gtsang ma bcu drug gi khrims bca' ba'i bcu drug ni gang zhe na/ srog gcod/ ma byin len/ log g.yem/ rdzun smra ste rtsa ba bzhi spang pa dang po/ mchog gsum la dad cing dam pa'i chos sgrub pa gnyis pa/ pha ma la drin lan log gzhal mi byed pa gsum pa/ yon tan can rigs mtho ba rgan pa rnams la bkur sti byed pa bzhi pa/ nye du mdza' bshes la gzhung bzang ba lnga pa/ yul mi khyim mtshes la phan gdags pa drug pa/ rgyu drang zhing sems chung ba bdun pa/ ya rabs kyi rjes snyegs shing phyi thag ring ba brgyad pa/ zas nor la tshod zin pa dgu pa/ sngar 'dris kyi mi yi zhe mi gcod pa bcu pa/ bu lon dus su 'jal ba bcu gcig pa/ bre srang la g.yo sgyu med pa bcu gnyis pa/ kun la snyoms shing phrag dog med pa bcu gsum pa/ grogs ngan gyi ngag la mi nyan cing rang tshugs zin pa bcu bzhi pa/ ngag 'jam la bden par smra ba bco lnga pa/ khyag pa'am theg pa che zhing blo khog yangs pa dang bcu drug go/ /de ltar khrims kyi zol gyis dam pa'i chos dge bcu tshang bar mdzad pas ngan song gsum gyi sgo bcad/ mtho ris dang thar pa'i lam yangs por byas so/ /smras pa/ spyan ras gzigs dbang srong btsan sgam por sprul/ sgrol ma khro gnyer can gnyis btsun @433a @#/ /mo'i tshul/ /'jam dpal dbyangs dngos thon mi mgar mir brdzus/ bsam bzhin gangs can yul gru'i dpal du shar/ /de 'dra'i rgyal po yum sras blon 'bangs la/ /snying nas mi phyed dad pa brtan thob ste/ /mi mnyes skad cig tsam yang mi byed cing/ /chos kyi dga' bdes go 'phang mchog thob shog /chos rgyal srong btsan sgam po de yi sras gung ri gung btsan/ mang srong mang btsan/ 'dus srong mang rje/ mes ag tshom/ khri srong lde btsan/ sad na legs mjing yon/ rgyal po glang dar ma/ gnam lde 'od srung/ skyid lde nyi ma mgon/ lde gtsug mgon/ mnga' bdag kho re/ mnga' bdag 'od lde/ de yi sras lha btsun byang chub 'od kyis jo bo dpal ldan a ti sha bod du spyan drangs pa yin no/ /rkyang ded kyis rabs de ltar yin kyang rgyas par bshad na/ rgyal po srong btsan nas rgyal rabs gsum pa khri lde gtsug brtan mes ag tshom gyi sras 'jang tsha lha dbon la/ rgya nag nas rgya bza' kyim shing kong jo btsun mor blangs kyang/ rgya nas bod du mi ma slebs bar du sras 'jang tsha lha dbon sku gshegs pas/ mes ag tshom gyis rgya bza' kyim shing kong jo mar log shig pa'i bka' gnang yang/ ma log par bod la phebs nas jo bo shAkya mu ne lho sgo me long can du bzhugs pa bod kyis ma shes pa/ nga yi a Ni'i thugs dam rten 'di ru bzhugs so zer nas sngar gyi khri la bzhugs su gsol/ bod du lo sum cu bzhugs pas/ phyis su rgyal po khri lde gtsug brtan mes ag tshom gyi btsun mor bzhes pa la/ chos rgyal khri @434b srong lde btsan 'khrungs/ rgyal po 'di 'jam dbyangs kyi sprul par grags shing/ dgung lo drug cu re dgu bzhugs/ gangs can yul gru'i rgyan gcig bsam yas zan yangs mi 'gyur lhun gyis grub pa'i gtsug lag khang bzhengs/ sa steng na 'gran zla bral ba'i mkhas mchog zhi ba 'tsho yab sras gnyis te mkhan po bo d+hi satwa/ ka ma la shI la gnyis rim bzhin gdan drangs/ grub pa'i dbang phyug chen po slob dpon padma samb+ha was sa 'dul mdzad/ rgyal por kun rig ngang bla med kyi dbang chen bskur bar mdzad cing/ phyis rnga yab gling du gshegs/ dge 'dun gyi sde sad mi mi bdun sogs thog mar chos rgyal 'di yi dus su tshugs pa yin/ rgyas 'bring bsdus gsum gyi gzhung 'grel gnod 'joms dang/ 'bum rkyang pa'i gzhung 'grel gnod 'joms gnyis yod pas phyi ma 'bum gyi 'grel pa khyad du 'phags pa 'gyur byang med pa 'di chos rgyal khri srong lde btsan 'di yis mdzad/ ces chos kyi rgyal po tsong kha pa chen po blo bzang grags pa'i dpal gyis bzhed do/ /'bum gyi 'grel pa mdzad mkhan gyi rgyal po ni 'di ma gtogs rgya bod gnyis ka la med do/ /rgyal po khri srong lde btsan 'di la/ btsun mo lnga yod de/ 'brom bzas dge rgyas bye ma gling/ pho yong bza' rgyal mo btsun gyis bu tshal gser khang gling/ tshe spong bzas khams gsum zangs khang gling bzhengs/ mchims bzas chos la dad pas phyis sgrub pa mdzad/ mkhar chen bza' ye shes mtsho rgyal slob dpon pa padma 'byung gnas la dbang zhus pa'i yon du phul/ kha cig mkhar chen bza' slob dpon gyis sprul pa'i sprul pa zhig @435a @#/ /khri srong lde btsan gyi btsun mor yod pa phul ba'i tshul ston pa yin yang zer/ btsun mo gzhan bzhi la sras med cing/ tshe spong bza' me tog sgron la/ mu khri btsan po/ mu rug btsan po/ mu tig btsan po'am/ sad na legs mjing yon dang gsum 'khrungs pa'o/ /sras 'di gsum phyis su 'ga' zhig gis mang nyung sna tshogs su smra yang bden par ma mthong ngo/ /kun bzang rnam 'phrul tho ri snyan shal gyi dus dam pa'i chos kyi dbu brnyes/ spyan ras gzigs dbang srong btsan sgam po'i dus su dam pa'i chos kyi srol gtod/ 'jam dbyangs khri srong lde btsan gyi dus su dam chos rgyas shing dar bar gyur pa yin no/ /sad na legs mjing yon gyi sras la mnga' bdag khri ral pa can dang/ glang dar ma 'u dum btsan gnyis byung/ mnga' bdag khri ral gyis skyid shod smad du 'u shang rdo yi lha khang bkra shis dpe med dge mtshan gyi gtsug lag khang bzhengs/ bka' thams cad la skad gsar bcad kyis 'gyur bcos mdzad/ dge 'dun re la mi khyim bdun re bsnyen bkur bya phyir phul/ de yi sku mched rgyal po glang dar ma'i sras gnam lde 'od srung/ de yi sras dpal 'khor btsan/ de yi sras bkra shis brtsegs dang/ skyid bde nyi ma mgon gnyis/ skyid bde nyi ma mgon 'di mnga' ris su phebs rgyal srid bzung bas sras gsum byung/ sras gsum gyi chung ba lde tsug mgon gyi sras srong nge dang/ kho re gnyis 'khrungs/ dang por srong nges rgyal srid bzung bas/ de yi sras lha btsun nA ga rA dza dang/ lha btsun de wa rA dza gnyis byung/ sku tshe'i smad du yab sras gsum ka rab byung mdzad pas @436b yab srong nge lha bla ma ye shes 'od ces yongs su grags pa de byung/ de ni 'jam dpal rtsa rgyud las lung bstan pa'i rgyal po yin te/ byang phyogs kha ba can gyi yul/ /rgyal po lha zhes bya ba 'byung/ /blon po nor gyi mtha' can 'byung/ /zhes gsungs pa de yin/ de yi blon po mig gi mngon shes kyis sa 'og gi gter mthong bas gser ling gcig la shing srang bcu drug yod pas jo bo bod du gdan drang phyir bskur ba sogs nor zad mi shes pa byung/ jo bo bod du spyan 'dren pa'i slad du/ gar log gi rgyal po la sku lus btang bas chos phyir srog kyang btang ba'i rgyal po yin/ khye'u blo rno ba nyer gcig rgya gar du brdzangs pas/ de yi nang nas khyad du 'phags pa/ lo chen rin chen bzang po/ lo chung shes rab grags 'byor sogs byung/ mnga' ris tho lding dpal gyi lha khang bzhengs/ der lo chen rin chen bzang po bzhugs so/ /srong nge 'am lha bla ma ye shes 'od kyi sku mched kho re'i sras mnga' bdag lha sde zhes bya ba byung/ de yi sras 'od sde dang/ pho brang zhi ba 'od/ lha btsun pa byang chub 'od dang gsum byung/ sras 'od ldes rgyal srid bzung/ phyi ma gnyis ka rab tu byung/ lha btsun byang chub 'od 'dis dka' tshegs chen po'i sgo nas/ lo tsA ba rgya brtson seng/ nag tsho lo tsA ba tshul khrims rgyal ba gnyis rim bzhin rgya gar du brdzangs te/ mnyam med jo bo rje dpal ldan a ti sha bod du spyan drangs nas byang chub lam sgron zhus/ mnga' ris su lo gsum/ dbus gtsang gzhan du lo lnga/ skyid shod snye thang du lo dgu ste/ bsdoms pas bod du lo bcu @437a @#/ /bdun bzhugs/ 'brom ston rgyal ba'i 'byung gnas sogs la brten nas bka' gdams kyi bstan pa'i snying po/ byang chub lam gyi sgron me sogs kyi man ngag la brten te/ yum rgyas 'bring bsdus gsum nyams su len pa'i byang chub sems dpa' gangs can gyi yul 'di nyid til gyi gang bu bzhin du yongs su 'gengs par byas so/ /gong gi chos rgyal gdung rgyud kho re'i sras lha lde/ de yi sras 'od lde/ de yi sras chos rgyal brtse lde'i dus su/ rngog lo blo ldan shes rab/ dpyal lo/ 'bro lo tsA ba/ rong pa rga lo/ mkhas grub khyung po/ mar pa chos kyi blo gros/ mar pa do ba chos kyi dbang phyug /mi la bzhad pa'i rdo rje/ dwags po zla 'od gzhon nu/ gsang bdag sgro phug pa/ glang shar gnyis/ rgya ma ba/ 'dul 'dzin mtsho sna ba sogs skyes bu dam pas sa steng yongs su khyab pa byung/ chos rgyal gdung rgyud mnga' thang che ba ni/ paN chen blo bzang ye shes bar du bzhugs/ mnga' thang chung ba ni da lta dpal ldan ye shes skabs su mnga' ris su bzhugs/ chos rgyal gdung rgyud e lha rgya ri ba yang rgyal ba lnga pa'i deb ther las yin gsungs/ bka' blon thon pa rgyal po srong btsan gyi blon po bod kyi yig mkhan thon mi sam b+ho Ta'i rigs rgyud yin par paN chen blo bzang chos kyi rgyal mtshan gyis gsungs/ rgyal ba lnga pas dpyad gzhi mdzad kyang sngar gyi lo rgyus la gsal bar bzhugs/ shar phyogs rgya nag rgyal po dang/ bod gnyis 'brel yod tshul ni/ 'dzam bu gling gi shar phyogs rgya nag ma ha tsi Na'i yul 'phags pa 'jam dpal dbyangs kyi 'dul zhing ri bo rtse @438b lnga dang nye ba rgya nag rgyal po dang bod 'brel yod tshul/ rgya nag rgyal po ci'u dbang gi dus su nub phyogs 'od kyi phung po'i mtshan ma sogs la brten rgya gar na sangs rgyas shAkya thub pa 'khrungs/ de yi sras lta bu dbang rta brgyad kyis btegs pa'i shing rta'i rdzu 'phrul la brten bod kyi mtsho ma pham gyi mdun du mkha' 'gro ma nyi zla dbang mo chen la zla ba sgron ma'i mdo zhus/ gzhan yang gsang sngags kyi chos mang du gsan te lo gcig bzhugs nas slar rgya nag tu phebs/ sangs rgyas 'khrungs nas lo nyis stong lnga brgya nyi shu rtsa brgyad song ba na rgya nag ri bo rtse lnga aShTi shing gi sba ba las 'jam dpal dbyangs dngos su byon te rtsis la sogs pa'i rig gnas gsungs/ de nas yun ring po song tshe rgya bod gnyis 'khrugs pa byung ba phyis 'dum dus su gnyen sbrel nas rgya nag thang gi rgyal rabs nyi shu pa rgyal sa lo nyis brgya gya dgu bzung ba/ rgyal rabs gnyis par hwa shang btang nas 'phags pa'i gnas brtan bcu drug dngos su gdan 'dren nus pa thang thi tsung rgyal po'i bu mo zwan ching zhes pa rgya bza' kun cu spyan ras gzigs dbang srong btsan sgam po'i btsun mor bod du byon/ thang gi rgyal rabs gsum pa/ rgyal po'i bu mo kyim shing kung cu 'jang tsha lha dbon gyi btsun mor blangs kyang rgyal po'i sras gshegs pas yab mes ag tshom gyi rje mor gyur nas de la bsam yas mnga' bdag rgyal po khri srong lde btsan 'khrungs te de nyid rgyal por gyur nas/ rnal 'byor spyod pa'i rang rgyud pa'i shing rta'i srol 'byed mkhan po zhi ba 'tsho yab sras/ padma samb+ha wa sogs rgya @439a @#/ /gar nas spyan drangs bod du rab byung gi sde 'dzugs pa sogs mdzad/ de gsum la mkhan slob chos gsum du grags/ khri srong lde btsan gyi rgyal rgyud mnga' ris su byung pa bla ma ye shes 'od dang byang chub 'od sogs kyis jo bo rje dpal lha gcig dI paM ka ra bod du spyan drangs/ sher phyogs mdo sde'i nyams len de yi slob ma 'brom rgyal ba'i 'byung gnas sogs kyis rgyas par mdzad/ shAkya thub pa'i bstan pa brgya phrag lnga bcu'i skar rtsis pa ltar brgya phrag nyer drug pa rdzogs nas nyer bdun nang gi 'dzam gling shar phyogs rgya nag rgyal po 'di ni chen po hor rgyal rabs yin la de byung tshul hor rgyal rabs dgu pa 'das nas btsun mo e lan la nam mkha' nas 'od zer zhig lus la zhugs pas sras hor rgyal po po ton 'khrungs/ de nas rgyal rabs dgu pa la hor rgyal po ching gi si 'khrungs/ 'di la bod kyis 'jing 'di rgyal po yang zer/ de yi sras go dan rgyal pos gnas lnga mkhyen pa'i sa skya paNDi ta kun dga' rgyal mtshan gdan drangs/ hor rgyal po ho pi li si chen gyis srid zhi'i mdzes rgyan sa paN gyi sku tsha 'gro mgon chos rgyal 'phags pa gdan drangs/ hor ching gi rgyal po khu lugs kyis sog yig thog mar bcos mkhan tshas spyod dge bsnyen kun mkhyen chos sku 'od zer gdan drangs/ hor ching gi rgyal po bu yan thus mchims mdzod mdzad mkhan chos rje snar thang mchims 'jam dbyangs gdan drangs/ 'dis mthun rkyen sbyar te bod kyi bstan 'gyur phyogs gcig tu snar thang du bcom ldan rig pa'i ral gris bsgrigs par mdzad/ karma pa gnyis pa @440b pak+Shi yang se chen gyis gdan drangs/ karma rang byung rdo rje rgya nag tho'u kan gyis gdan drangs/ karma pa rol pa'i rdo rje tho'u kan thi mur gyis gdan drangs/ karma pa de bzhin gshegs pa rgya nag tA ming khang gnyer gyis gdan drangs/ karma pa phyi ma 'di gsum gdan 'dren mkhan hor ching gi rgyal po min te/ zha lu bu ston dgung lo bcu skor bzhes pa'i dus kyi tshe rgya nag rgyal po tA ming gi rgyal sa 'dzin nas/ karma pa rang byung rdo rje/ rol pa'i rdo rje/ karma pa de bzhin gshegs pa rnams gdan drangs pa yin/ de'i rjes su rgyal ba tsong kha pa chen por chab shog phul nas gdan 'dren zhus pas sku tshab tu lha sa tshal gung thang rje yi gsol dpon byams chen chos rje shAkya ye shes tA ming g.yung lo rgyal pos gdan drangs/ yang lan gcig byams chen shAkya ye shes bod du phebs kyang yang de yi sras zon te rgyal pos gdan drangs/ de yi rgyun byas nas rim bzhin tsong kha pa chen po'i slob rgyud byang dar ma bsod nams/ stag phu gu shrI dpal ldan don grub sogs gdan drangs/ yang phyis su hor rgyal po dang ri bo dge lugs mchod yon byung tshul hor rgyal po thu med am than rgyal pos thams cad mkhyen pa bsod nams rgya mtsho gdan drangs/ hor rgyal po pog to mug tan gyi sar bzhugs/ mtha' 'khob mun gling dam pa'i chos kyis dkar 'jam du mdzad/ de rjes tsam nas paN chen blo bzang chos kyi rgyal mtshan dang rgyal ba lnga pa rnam gnyis gros mthun nas se chen chos rje zhu yig 'bul bar mngags pas rgyal po shin tu dgyes so/ /de yi sras rgya nag rgyal po shi tsu@441a @#/ /shun Ti hang thas rgya nag hor sog po bod gangs can gyi ljongs thams cad dbang du bsdus/ rgyal ba lnga pa chen po pho brang du spyan drangs/ nub phyogs kyi sangs rgyas kyi bstan pa'i bdag por mnga' gsol gser tham sogs 'gro mgon chos rgyal gyi dus bzhin 'phul/ de yi sras rgya nag shing tsu khang zhi rgyal po 'am bde skyid rgyal pos rgyal ba bskal bzang rgya mtsho bod yul po ta lar khri la mnga' gsol/ rgyal po dgung lo drug cu re gnyis bzhugs/ de yi sras rgya nag rgyal po yong hring ngam chan lung rgyal pos dngul srang khri phrag bcu drug gis mdo khams me nyag sgang 'ga' thang du dgon pa brgyab nas der rgyal ba bskal bzang rgya mtsho gdan 'dren zhus/ der lo bdun bar du rgyal ba bzhugs/ rgyal po dgung lo mthar son bzhugs/ de yi sras rgya nag rgyal po lha skyong ngam gnam skyong gis rgyal ba bskal bzang rgya mtsho la lo re bzhin dngul stong phrag lnga re phul/ rgyal ba phyag na padmo 'jam dpal rgya mtsho bod yul dbus kyi po ta la'i pho brang chen po'i gser khrir mnga' gsol/ gser yig gser tham rnams rgyal ba bskal bzang rgya mtsho sku gong ma'i dus bzhin du rgya nag lha skyong rgyal pos phul/ lcags byi lo rgyal po dgung lo bdun cu tham pa'o/ /khrir phebs nas lcags byi la lo zhe lnga song/ paN chen sku 'phreng bzhi pa dpal ldan ye shes gdan drangs/ lcags byi lor rgya nag ye hor gyi po ta lar zhal 'dzoms/ paN chen dpal ldan ye shes dgung lo zhe gsum lon pa pho brang pe cing du gdan drangs/ rab byung bcu gsum pa'i lcags byi zla ba bcu pa'i tshes gcig la rdo rje @442b tsher mas bsnyung tshul bstan nas sku'i me tog 'thor/ de dang mthun pa 'dus byas mi rtag pa'i ngang tshul dkyus gcig tu brjod na/ paN chen dpal ldan ye shes sku gong ma paN chen blo bzang ye shes ni dgung lo don lnga bzhes pa rab byung bcu gnyis pa'i me mo sbrul lo hor zla bdun pa'i tshes lnga yi nyin mo nyi dros la sku'i me tog 'thor/ paN chen dpal ldan ye shes kyi bla ma rje btsun phyag na padmo rgyal ba bskal bzang rgya mtsho ni rab byung bcu gnyis pa me byi hor zla bdun pa'i tshes bcu dgu la mdo khams li thang du sku 'khrungs dgung lo bcu drug bzhes pa na a ma blo bzang chos mtsho sku gshegs/ rgyal ba nyer drug bzhes pa dang lcam sring bskal bzang sgrol ma gshegs/ dgung lo so gsum bzhes pa na chung ngu'i dus kyi ma ma lta bu bsam gtan rgyal mtshan dang/ ma yi spun zla sru bskal bzang gshegs/ rgyal ba so bdun bzhes pa shing byi lor rgyal ba'i yab bsod nams dar rgyas gshegs/ dgung lo bzhi bcu bzhes pa lcags lug lor rgyal ba rang nyid kyi bla ma dgung lo bdun cu don lnga bzhes pa khri chen ngag dbang mchog ldan byang rwa sgreng du sku gshegs/ rgyal ba rang nyid dgung lo lnga bcu bzhes pa me glang lo hor zla gnyis pa'i tshes gnyis la sku'i me tog 'thor/ bod kyi bla chen gong ma dag la gus 'dud lhur byed pa'i sa skyong de dag gis legs spyod rnam dkar mdzad pa'i tshul rnams 'og tu gsal zhing nyes spyod mi rtag pa'i ngang tshul ni/ sde srid sangs rgyas rgya mtsho lha bzang gis/ lha bzang jun gar gyis/ sde srid stag rtse ba lha rgyal @443a @#/ /rab brtan rgya nag gi khrims kyis/ dA ching pA dur bka' blon gsum gyis/ bka' blon gsum pho lha bas/ da las pA dur rgya nag gi khrims kyis rim bzhin ya nga ba ma spangs par mtshon gyis bkum pa ni gling gzhan gsum la med pa'i 'dzam bu gling pa'i khyad chos las kyis pa tshe stod la byas pa'i srog gcod kyi las rnams tshe smad la smin pa mthong chos myong 'gyur gyi las smin pa mngon sum du grub/ bod la dbang bsgyur ba'i dga' ldan pho brang ba yang snyigs dus la song gshis sos bde rang dbang 'dus pa zhig ma byung zhing/ mtha' dbus kyi rgyal po dang drag btsan gyi ngo 'dzin 'bul sgrub chas sprod dgos pa khur lci ba'i ri bos rgyun du non pa zhig tu gyur/ bka' gdams pa'i spyan ltos kyis dge lugs phyogs la tshur rgol ba ma byung phyin grub mtha' gzhan la sdang shugs chung/ khyad par du sa skya dang dge lugs gnyis mkhas pa'i bya ba chos grub mtha'i dgag sgrub snga phyi mang du byed kyang phan tshun g.yul 'khrugs che ba chos 'byung deb ther kun la gzigs kyang byas skad mi 'dug dpal ldan sa skya pas bod la dbang bsgyur tshul ni 'jam dbyangs 'khon gyi gdung 'khon dkon mchog rgyal po'i sras/ bod kyi grub thob bla na med pa sa chen kun dga' snying po la sras bzhi yod pa'i sras che ba kun dga' 'bar rgya gar la song/ gnyis pa slob dpon bsod nams rtse mo 'di lo zhe gcig bzhugs/ gsum pa rje btsun grags pa rgyal mtshan 'di lo bdun cu bzhugs/ bzhi pa dpal chen 'od po che 'di yi sras su chos rje sa skya paN chen dang zangs tsha gnyis 'khrungs/ rje @444b sa paN 'di nyid mkhas grags shin tu che bas hor o kos do rgyal po'am 'jing gir rgyal po'i bla mar gdan drangs/ rgya nag tu yun ring por ma bzhugs dgung lo re gsum la gshegs/ sku mched zangs tsha'i sras 'gro mgon chos rgyal 'phags pa 'khrungs/ zangs tsha'i sras ye shes 'byung gnas/ de yi sras bla ma dam pa bsod nams rgyal mtshan yin/ de nas sa 'bri gnyis stobs je rgyas su song nas/ sa skya ba dang thugs ma mthun te/ 'bri gung pas stod hor gyi dmag bod du bos nas sa skya bcom/ sa yi sna thag rgya dmag bod du yong/ zhes gsungs pa ltar/ sa skyas de yi lan du du ru ka'i dmag bod du bos nas/ bu ston 'khrungs lo der 'bri gung pa la gling log chen po byung/ phyis su dga' ldan pho brang pas gu shri sog po'i dmag bod du bos nas sde pa gtsang pa dang dkar brgyud rnam rgyal bcom pa 'di rnams dbyibs mtshungs/ zhar la sngar 'bri gung gling log chen po byung skabs/ bka' gdams pa'i gdan sa rwa sgreng dang/ 'phan yul rgyal lha khang/ brag rgyab sogs la gnod pa che bar byung/ de'i skabs su bod chos rgyal gdung rabs rnams thugs gshis bzang bas sku dbang med par/ bod dang bod chen po'i rgyal khams yongs su rdzogs pa rgya nag gong ma'i phyag tu bod rnams rang dbang med pa phul/ 'jam dbyangs gong ma'i dmag dpon hor dor rta nag pos bod mtha' 'khob kyi rgyal khams na/ dge 'dun gyi sde bka' gdams pa che/ ngo srung stag lung pa mkhas/ gzi brjid 'bri gung pa che/ chos ni sa skya paNDi ta mkhas zhes rgya nag la @445a @#/ /zhus pas/ sa paN gdan drangs/ de nas sngar bshad pa ltar gyi/ 'gro mgon chos rgyal 'phags pa de nyid sa paN gyi sku tsha la song gshis spang rtogs yon tan dang ldan pas shar phyogs rgya nag rgyal po se chen gyis gdan drangs te/ mar lam byang brgyud nas phebs/ rgya nag pho brang du yang rdzu 'phrul bstan pa sogs rgyal po 'dun par byas/ rgyal pos kyang sa paN bla mar khur ba ltar/ bla mar 'dzin cing kyai rdor gyi dbang zhus/ yar bod du phebs bskyod gnang skabs su dril bu sgam nang ma sogs 'bul ba rgya chen po dang bod khri skor bcu gsum ste dbus gtsang gnyis dam pa chos kyi chol kha/ mdo stod mi yi chol kha/ mdo smad rta yi chol kha ste chol kha gsum phul cing/ bod shing sgo can thams cad kyi dpon dang bla ma zung 'brel du bskos/ yar bod du phebs skabs su mdo khams brgyud de bod kyi sde rnams rtsis bzhes mdzad cing/ brgya dpon dang stong dpon khri dpon sogs bskos/ chibs kha ba bu chung lus bde ba zhig la sde dum zhig byin pas/ da lta khams sde dger grags/ de'i dus su dbus kyi tshal pa khri dpon/ rgya ma khri dpon/ g.ya' bzang khri dpon sogs bskos/ dpon chen shAkya bzang po bod khri skor bcu gsum gyi dpon du bskos pa nas/ dpon chen dbang phyug brtson 'grus bar dpon chen nyi shu dang lo bdun cu don lnga/ dpal ldan sa skya pa bod dang bod chen po yongs kyi rje bor gyur/ dpon chen shAkya bzang pos bod khri skor bcu gsum bskul te skyid shod ge ra lha sa'i lha khang la dpe byas nas/ sa skya lha khang chen mo bzhengs pa sogs mdzad/ @446b rgyal ba lnga pa'i deb ther las/ sa nang grums pas phag gis sa rlog 'jig /gsungs pa ltar/ dpon chen tha ma dbang brtson gyis rang gi mnga' 'og tu yod du chug kyang gong du shor nyen gyi phrag dog langs te/ sne gding pa byang chub rgyal mtshan la mi 'tshams pa mang du mdzad pas/ zhabs phyi gzhon nu bzang pos dmag gis sa skya bcom/ bod khri skor bcu gsum 'phrog nang rten dang mchod cha khal rgyab bdun cu mar drangs pa sogs byung/ de yi nang rten la seng ge'i pags pa sder mo ma nyams pa yod pa rgya nag 'jam dbyangs gong ma la phul bas/ sa skya pa bla ma 'phags pa'i dus kyi skabs bzhin du rlangs lha gzigs gdung rgyud/ sde srid phag mo grub pa byang chub rgyal mtshan la gser yig gser tham byung/ phyis su rgyal ba lnga pa dgung lo so bdun ma bzhes bar du yod/ de nas tA la'i bla ma rgyal ba'i phyag tu 'byor ba'o/ / chos rgyal sne gdong pa ji ltar byung tshul ni/ lho kha rtsed thang gi nye 'dabs su rlangs lha gzigs gdung rgyud chos rgyal sne gdong pa bod khams yongs kyi dbang phyug lha btsun dang mi rje'i rigs ni/ lha btsun si tu byang chub rgyal mtshan/ lha btsun gu shrI shAkya rgyal mtshan/ lha btsun spyan snga grags pa byang chub/ lha btsun spyan snga bsod nams grags pa/ lha btsun gu shrI grags pa rgyal mtshan/ lha btsun spyan snga grags pa 'byung gnas/ lha btsun spyan snga ngag gi dbang po/ lha btsun spyan snga chos kyi grags pa/ mi rje bkra shis grags pa/ mi rje 'gro ba'i mgon po/ mi rje dbang grags pa rgyal mtshan/ mi rje dkar brgyud rnam rgyal/ @447a @#/ /mi rje bsod nams dbang phyug sogs dbang thang che ba bcu gsum dang/ gdung rgyud srid 'dzin ni/ dpon bsod nams bzang po/ rin chen rdo rje/ shAkya rin chen sangs rgyas rgyal mtshan/ kun dga' legs pa/ dbang gi rgyal po/ ngag gi dbang po/ bkra shis grags pa/ 'gro ba'i mgon po/ ngag dbang grags pa/ dkar brgyud rnam rgyal/ bsod nams dbang phyug sogs rgyal ba lnga pa chen po'i bar du byung ngo/ /de dag gi nang blon 'phyongs rgyas sde pa za hor rgyal rigs gtsug lag 'dzin nas rgyal ba lnga pa'i yab bdud 'dul rab brtan bar mi rabs nyi shu rtsa gsum byung ba'i bcu bdun pa nas bzung chos rgyal sne gdong pa la gus 'dud zhabs 'degs mdzad pa ni lnga pa rang nyid kyis gsungs so/ /sne gdong mi dbang grags pa rgyal mtshan pa'i dus/ khams gsum chos kyi rgyal po shar tsong kha pa blo bzang grags pa phebs shing/ lha sa smon lam 'dzugs pa sogs kyi sbyin bdag gi gtso bo mdzad/ snga phyi kun tu/ bu ston thams cad mkhyen pa/ bla ma dam pa bsod nams rgyal mtshan/ rgyal ba dge 'dun rgya mtsho/ bsod nams rgya mtsho sogs skyes chen dam pa brgya phrag mang po la gus 'dud dang dad 'bul rgya cher mdzad do/ /nang pa sangs rgyas pa'i grub mtha' kun phyogs ris sdang shugs med pa'i dpang por 'os pa/ dpon g.yog nang 'khrugs med cing thugs nang shis pa bod kyi rje bo thams cad kyi nang nas rlangs lha gzigs kyi gdung rabs 'di drag pa byung/ zhes mkhas pa kun gyis gleng/ chos rgyal sne gdong dpon rabs kyi sku ring rang dang rang gi bka' @448b yi gung blon sogs kyis bod dbus gtsang gnyis la mkhar rdzong brtsigs pa ni/ rtsed thang sne gdong rdzong/ 'phyongs rgyas phying bar stag rtse'i rdzong/ 'ol dga' stag rtse'i rdzong/ dbus stod byi ru stag rtse'i rdzong brag dkar gsang sngags bde chen rdzong/ 'phan yul lhun grub rdzong/ gzhis kha sne'u rdzong/ skyid shod smad yar rgyab gong dkar rdzong/ chu shur rdzong/ yar 'brog dpal di'i rdzong/ rong rin spungs rdzong/ nyang stod rgyal mkhar stag rtse'i rdzong/ nyang stod pa nam lhun grub rdzong ste mkhar rdzong bcu gsum brtsigs pa byung/ gtsang pa sde pas bsam grub rtse'i rdzong/ gtsang stod lha rtse'i rdzong/ skyid shod rdo mkhar rdzong/ chos rgyal srong btsan sgam po'i pho brang dmar po ri'am po ta la zhig gsos mdzad do/ /'bras spungs thad gtsang po pha ri la gzhis kha sne'u rdzong la rlangs lha gzigs kyi gdung chos rgyal sne gdong pa'am sde srid phag mo grub pa'i sku mched rin chen bzang po/ drung grags pa/ drung nam mkha' bzang pos/ lha sa smon lam gyi sbyin bdag mdzad/ drung nam mkha' dpal 'byor/ drung grags pa dpal bzang/ drung dpal 'byor rgyal po/ de yi sras drung ngag dbang bsod nams rgyal po/ ngag dbang bsod nams lhun grub gnyis kyi dus/ gtsang rin spungs pa sde pa don yod kyis sne'u rdzong dang dpal 'byor lhun po bcas bcom zhing/ sku mched gnyis kyis stag lung pa la srog skyabs zhus pas/ sne gdong chos rgyal gyi sku rus yin gshis 'phan yul nas gzhis ka legs pa zhig gnang ba'i mi rigs nyan po phyug po yin/ sne'u gdong drung grags pa'i @449a @#/ /dpon mo bu khrid dpal 'dzoms dang/ drung nam mkha' dpal 'byor gyi dpon mo sangs rgyas gnyis po ta la yi rgyab phyogs dpal 'byor lhun por bzhugs te/ dge ldan rgyal tshab dar ma rin chen gyi gsung 'bum phal cher par du bkod pa sogs gus 'dud mdzad do/ /gtsang rong rin spungs sde pa nam mkha' rgyal mtshan/ nam mkha' rgyal po/ nor bu bzang po/ kun bzang/ don yod rdo rje/ ngag dbang rnam rgyal/ snyan ngag mkhan ngag dbang 'jig rten dbang phyug grags pa ste dpon bdun byung zhing/ bka' gdams pa'i bla ma sems dpa' chen po gzhon nu rgyal mchog gis rong byams chen bzhengs pa'i sbyin bdag mthil len rin spungs nor bu bzang pos byas pa yin/ de yi tsha bo rin spungs don yod sogs kyis sne gdong zhang tsha'i nye rigs yin pas dang por mthun zhing/ phyis su sne gdong par rtsis 'jog che ba ma byas pas dbang thang rgud de rin spungs sde pa snyan ngag mkhan ngag dbang 'jig rten dbang phyug grags pa ha cang thugs rgyud 'jam pas bran gyis tshod lon te 'bangs gyen log byas nas bran gyi zhabs su skyabs 'chol nas sdod dgos pa byung ngo/ /gzhung dga' ldan pho brang ji ltar byung tshul ni/ rgyal ba lnga pa'i deb ther du/ 'bri yi rwa co phag gi mjug ma can/ /zhes gsungs pa bzhin 'bri gung rwa tsam phag gru mjug ma tsam gyi bstan pa la song tshe/ bdzra pa Ni'i sprul pa'i rgyal po 'byung gsungs pa ltar/ gushrI rgyal po byung la/ de yang sngon tshe mtsho sngon rgyal po'i sras rgyal ba yon tan rgya @450b mtsho 'khrungs pa yin gshis/ de yi sku skye lnga pa chen po yin pas 'brel dang/ bar khams su be re don yod kyis bstan pa la gnod tshabs che/ kar sog khal kha chog thu'am rta khra can gnod tshabs che bas/ gu shrI rgyal pos thams cad bcom zhing grags che bas/ rgyal ba lnga pa'i phyag mdzod bsod nams chos 'phel gyis bod la phebs dgos zhus pa ltar phebs te gtsang bkra shis lhun po'i gzhis ka rtse'am/ pho brang bsam grub rtse la rin spungs sde pa snyan ngag mkhan ngag dbang 'jig rten dbang phyug grags pa'i 'bangs karma tshe brtan/ de yi sras phun tshogs rnam rgyal/ de yi sras karma bstan skyong ste sde pa gtsang pa mi rabs gsum byung ba'i tha ma dang gu shrI rgyal pos g.yul 'khrugs zla ba bdun du byas nas dpung shed kyis bod thams cad blangs te kun gzigs lnga pa chen por gu shrI bstan 'dzin chos rgyal gyis phul/ de yi rgyab rten lta bur gu shrI rang lo bcu gnyis/ rgyal po lag dmar ram bstan 'dzin dA yan/ de yi sras rgyal po lha bzang han bod du bzhugs/ rgyal ba lnga pa rang gi phyag mdzod dge tshul bsod nams chos 'phel sde srid du bskos nas lo bco brgyad/ nyang bran sde pa 'phrin las rgya mtshos lo brgyad/ lnga pa rang gis 'gan khur lo gcig sde srid zangs ri ba blo bzang mthu stobs kyis lo ngo drug po ta la'i grwa tshang sde pa blo bzang sbyin pas lo gsum/ nyang bran sde pa 'phrin las rgya mtsho sras sde srid sangs rgyas mtshos rgyal ba lnga pa bzhugs ring lo bdun/ rgyal ba tshangs dbyangs rgya mtsho bzhugs skabs lo nyer bzhi ste mi 'brug nas me khyi bar lo sum cu so@451a @#/ /gcig pad dkar 'dzin pa ngag dbang ye shes rgya mtsho/ mtsho sngon rgyal po lha bzang mchod yon 'brel te me khyi nas sa khyi bar lo ngo bcu gsum/ hung thas jis mngags pa'i o rod jun gar dang/ sde pa stag rtse lha rgyal rab brtan bcas lo ngo gsum/ rgya nag ching gi si yi rgyal rabs gnyis pa khang zhi bde skyid rgyal po'i dpung dang bcas pas rgyal ba bskal bzang rgya mtsho bod yul dbus po ta lar khri la mnga' gsol/ gtsang khang chen nas dA ching pA dur jun gar gyi dpung la dpa' ba'i bdag rkyen du dpon du bskos pa lcags byi nas me rta bar lo ngo bdun/ bka' blon lum pa ba/ bka' blon kong po nga phod pa/ bka' blon sbyar ra ba bcas kyis me rta nas sa sprel zla ba drug pa'i bar lo ngo gsum/ sa sprel nas shing glang zla ba gnyis pa'i bar gtsang sbrum pho lha ba bsod nams stobs rgyal kyis lo bco brgyad/ de yi sras dA las pA dur 'gyur med rnam rgyal gyis shing glang nas lcags rta zla ba bcu pa'i bar lo ngo drug de skabs rgya nag ching gi si yi rgyal rabs bzhi pa lha skyong rgyal po'i bka' yis/ dA ching pA dur gyi tsha bo bka' blon gung dga' bzhi no yon/ bka' blon g.yag rong pa tshe ring dbang rgyal/ bka' blon thon pa/ bka' blon po ta la yi rtse drung re bcas bzhi sbrel nas lcags lug zla ba dang po nas bskos pa'i me bya bar lo nyer bdun song/ rgyal ba tsong kha pa 'khrungs pa'i rab byung drug sa'i me bya lo nas/ rab byung bcu gsum pa'i me bya lo rgan drug cu skor bdun song ba/ rgyal ba tsong kha pa 'khrungs pa nas rgyal ba 'jam dpal rgya mtsho dgung lo nyi shu @452b phebs pa me bya lor lo bzhi brgya dang nyi shu song/ rgya nag 'jam dbyangs gong ma bdag po chen po lha skyong rgyal po dgung lo lnga bcu nga gnyis pa/ khrir phebs nas lo nyer bdun pa'i chu rta la rgyal ba bskal bzang rgya mtsho'i sku skye blo bzang bstan pa'i dbang phyug rgyal ba 'jam dpal rgya mtsho dgung lo lnga bzhes dus bod yul dbus pho brang chen po po ta la'i gser khri la mnga' gsol nas rab byung bcu gsum pa'i me bya bar lo bcu drug go/ / bod khams la dbang bsgyur ba'i dpon rabs dga' ldan pho brang pa de dag gis rnam dkar gyi bya ba 'du byas pa yin/ sde srid dpon bsod nams chos 'phel gyis/ lha sa jo khang khyams ra dang bcas pa/ rwa sgreng gi 'du khang chen po dbu rtse dang bcas pa/ dge ldan yangs pa can/ 'ol kha rdzing phyi lha khang dang/ 'bras spungs dang/ se ra gnyis kyi tshogs khang rnying pa/ po ta la'i tshoms chen sogs la zhig gsos mdzad/ spyir gyi po ta la 'di sde srid gtsang pa'i skabs su yang gsar brgyab lta bu mdzad pa ni pho brang lte ba dkar po 'di yin/ sde srid zangs ri ba blo bzang mthu stobs kyis ra mo che'i jo khang ra ba dang gsar bzhengs dang/ bka' 'gyur yang khyad 'phags bzhengs so/ /sde srid sangs rgyas rgya mtsho ni/ rig gnas lnga la mkhyen pa rgyas shing/ sman dang rtsis kyis mtshon pa'i bstan chos mang du rtsom pa mdzad cing/ khyad par du po ta la'i zhabs brtan lha khang tshoms chen gsar pa gser gdung rin po che 'dzam gling rgyan gcig ngo mtshar can dang sku gsung thugs rten bsam mi khyab pa phyi skor gyi rdo ring rdo skas dang bcas pa bzhengs/ rgyal @453a @#/ /ba lnga pa'i dgongs rdzogs su tshogs mchod/ tshogs mchod gser sbreng dang/ gzhung gi bzhes sgo dpya khral gyi srol 'dzugs dang/ se 'bras dge gsum la rgyun ja re dang/ dge ldan dngul gdung rin po che la nyin re bzhin brgya mchod sogs 'dzugs pa gnang ngo/ /rgyal po lha bzang gis ni/ se ra theg chen gling gi 'du khang rgya phibs byams chen dang bcas pa khyad du 'phags pa bzhengs/ 'bras spungs spyi sor 'phan yul ram dang bod 'brog bkra shis sgo mang par stod lung phu nas gzhis ka/ bkra shis lhun po'i rta nag rin chen rtse/ 'brog sde sle phu/ bod 'brog bcas phogs thebs la sbyar/ dge ldan pa la bde chen rdzong dang/ se ra ba la sde pa grong smad pa'i gzhis kha sogs phogs thebs la sbyar bar mdzad/ rgyal ba tshangs dbyangs pas dpon tshul gnang skabs su/ lha sa khrom gzigs khang dang lha klu dga' tshal/ jo bo'i lha khang gi mda' yab sogs kyis mtshon pa'i rten bzhengs pa dang bka' 'gyur par glegs bam nyer bzhi tsam brko bar mdzad/ khang chen nas dA ching pA dur gyi skabs su/ dpal ldan rgyud smad pa'i lha sa'i chos rwa rgyud khang/ tsong kha brgyad cu'i zhal thang khyad 'phags dang se 'bras dge gsum la bkur sti che bar mdzad/ dpon pho lha ba jun wang yab sras kyis/ bka' 'gyur dang bstan 'gyur dang/ se 'bras kyi mtshan nyid yig cha rnams par du brko bar mdzad cing/ rje don yod mkhas grub pa/ rje byams pa'i mtshan can dang/ rje 'jam dbyangs bde ba'i rdo rje/ khri chen nam mkha' bzang po sogs la gus 'dud @454b mchog tu byed cing/ dpal ldan 'bras spungs 'du khang chen mo/ rje btsun tsong kha pa chen po'i sku brnyan mchod rdzas dang bcas pa bzhengs par mdzad/ bkra shis sgo mang gi grwa khang chen mo/ 'bras spungs sngags pa'i grwa khang/ har gdong rgyud khang/ se ra theg chen gling gi byes kyi grwa khang/ har gdong spyi khang/ bsam lho chos mdzod gling/ dge ldan 'du khang chen por gser gyi rgya phibs dang bcas pa/ nyag rong grwa khang/ gser 'gyur de yi steng du rgya phibs/ thub pa tshul khrims ma'i bzhugs khang gser zangs/ a mdo sku 'bum byams pa gling gi sku 'bum thog gi rgya phibs/ li thang sde pas zhus ngor lha sa jo khang gi sgo khang thog la rgya phibs/ rgyud smad gsang sngags mkhar gyi grwa khang/ rgyud stod dbus stod chu mda'i grwa khang/ ra mo che'i chos rwa/ dpag bsam 'khri shing gi thang sku'i par/ tsong kha brgyad cu'i thang sku'i par/ cho 'phrul smon lam chen mo'i skor lam gyi bco lnga mchod pa/ rgyun ltar nya stong brgyad gsum la stong mchod re re/ lha ldan smon lam la ja tshul dang 'gyed gsar 'dzugs/ se 'bras dge gsum lha sa smon lam bcas kyi tshogs khro spus legs gsar bsgrubs dang/ rgyun par ja tshul gya nom pa gnang ba sogs rnam dkar gyi bya ba la 'bad par mdzad do/ /rgyal ba'i yab rje bsod nams dar rgyas kyis kyang/ bsam yas dbu rtse'i thog rgya phibs dang mda' yab/ jo shaka rnam gsum la gser gyi dbu gdugs re re 'bul ba gnang/ wang dA las pA dur 'gyur med rnam rgyal gyis/ gsang phu ne'u thog gi 'du khang/ la mo byang chub @455a @#/ /lcog gi khang pa rgya phibs dang bcas pa/ bsam grub khang gsar/ dga' ldan khang gsar sogs bsgrubs kyang de yi nang du zhag bcu skor tsam yang sdod long ma byung zhing/ sems gdon gyis bskyod pas ma brtag pa'i spyod pa sna tshogs shig byed pa byung/ rgyal ba thams cad mkhyen pa bskal bzang rgya mtsho zhing gshegs khar lo bdun bka' blon bzhi la bka' bkod gnang ba nyan pa byung bas de skabs su gser dang dngul dang rgya mtshos bcas pa'i bka' 'gyur tshar gsum dang/ se 'bras dge gsum rgyud stod smad dang bcas pa'i bzhugs gdan gsar bzos dang/ ja bra dang/ phogs khal 'bo re/ dngul bal TaM re gsar 'dzugs gnang/ bka' blon bzhis kyang/ rgyal ba bskal bzang rgya mtsho zhing la phebs pa'i dgongs rdzogs su/ po ta lar gser gdung rin po che dang steng gi rgya phibs dang bcas pa bzhengs shing/ lo ltar 'das mchod dang smon lam zhag gnyis 'phar/ se 'bras dge gsum la dgongs rdzogs su dmigs nas/ 'jam dbyangs/ byams pa/ rje blo bzang grags pa'i gser sku chen mo dang bcas pa gsar bzhengs gnang/ rtse drung bka' blon thog ma 'phyongs rgyas pa nyi ma rgyal mtshan gyis gser gyi bka' 'gyur spus legs bzhengs te rgyal ba'i sku gdung gi mdun du phul/ de rjes su rgyal ba'i gsol dpon 'phyongs rgyas bka' blon dza sag bla ma yun ring mdzad/ skya ser thams cad kyis brtsi 'jog che ba rang don gtso bor mi byed gzhung bsam che ba byung/ bka' blon g.yag rong tshe ring dbang rgyal gyis bka' 'gyur rgya tshos dang bcas @456b pa'i rten mang du bzhengs/ sgra dang snyan ngag la mkhas shing/ thub dbang gi rtogs brjod lnga brgya nga brgyad pa/ skad gnyis shan sbyar sogs brtsams shing/ rdo rje 'jigs byed sogs la rnal 'byor byed pa'o/ /kong po de mo ba rgyal tshab ngag dbang 'jam dpal gyis lo nyi shu rtsa gcig tu bla dpon zung 'brel du mdzad cing/ se 'bras dge gsum la sogs pa'i 'dus sde mtha' dag la 'dul ba dang 'gal ba'i tha mi kha gcod pa dang/ lha sa gsang sngags dga' tshal rten dang bcas pa dang/ bsam yas zhig gsos rgya cher gnang zhing/ gzhan yang gnas rnying sogs la zhig gsos mang du mdzad/ se ra smad me yis 'jig pa slar gsar skrun sogs legs par gnang/ bka' blon dga' bzhi gung paNDi ta no yon de'i sras bcas nas gser dngul gyi bka' 'gyur dang bstan 'gyur tshar lnga bzhengs shing/ dngul rkyang gi sku spyan ras gzigs dang byams mgon thog tshad ma/ gser zangs las grub pa'i sangs rgyas stong sku dang/ khyad par jo bo shAkya mu ne sogs la phyag dang skor ba mchod pa gtso bor mdzad/ rang gi gtan gyi skyabs gnas bla ma rnams la gus pa/ dge 'dun la bsnyen bskur yun ring gnang bas/ tshe ring ba dang/ 'jig rten pa'i lha ma brten pas dpon g.yog nang kha gshin pa byung zhing dar rgud chung bas chags brtan pa byung ngo/ /da lta ni rgya nag gong ma'i lung gis dga' ldan khri pa drug cu re gcig pa a mdo co ne ser smad ngag dbang tshul khrims bla dpon zung 'brel mdzad @457a @#/ /skabs su bzhugs/ sangs rgyas kyi bstan pa lo lnga stong gnas pa la/ lnga brgya phrag bcur 'gyur te/ lnga brgya dang po la dgra bcom thob pa mang bas dgra bcom le'u/ gnyis pa la phyir mi 'ong thob pa mang bas phyir mi 'ong gi le'u/ gsum pa rgyun zhugs thob pa mang bas rgyun zhugs le'u ste/ 'bras bu'i dus gsum mo/ /lnga brgya phrag bzhi pa lhag mthong sgom pa mang bas shes rab kyi bslab pa'i le'u/ lnga brgya phrag lnga pa zhi gnas sgom pa mang bas ting nge 'dzin gyi bslab pa'i le'u/ lnga brgya phrag drug pa so thar gyi sdom khrims la gnas pa mang bas tshul khrims kyi bslab pa'i le'u ste/ sgrub pa'i le'u gsum mo/ /lnga brgya phrag bdun pa chos mngon pa la thos bsam byed pa mang bas mngon pa'i sde snod kyi le'u/ lnga brgya phrag brgyad pa mdo sde la thos bsam byed pa mang bas mdo sde'i sde snod kyi le'u/ lnga brgya phrag dgu pa 'dul ba la thos bsam byed pa mang bas 'dul ba'i sde snod kyi le'u ste/ lung dus gsum mo/ lnga brgya phrag bcu pa rab tu byung ba'i rtags cha lugs tsam 'dzin pa ma gtogs mi 'byung bas rtags tsam 'dzin pa'i le'u ste 'di la lnga brgya tha ma zhes pa yin par/ bu ston rin chen grub kyis gsungs/ rgyal ba 'jam dpal rgya mtsho dgung lo so gcig bzhes dus/ sangs rgyas kyi bstan pa lo brgya phrag lnga bcu yod pa'i brgya phrag bzhi bcu'i nang na yod ces rje byams pas gsungs/ 'dul ba dang mdzod kyi lugs so/ /skar rtsis pas sangs rgyas kyi bstan pa la lnga stong yod pa 'dra dang/ rgyal ba @458b 'jam dpal rgya mtsho dgung lo so gcig bzhes dus/ lo brgya phrag nyer drug drug cu re drug phur bu zhes pa sa spre lo song zhes brjod do/ /rgyal ba 'jam dpal rgya mtsho dgung lo sum cu bzhes dus me lug lo/ byang sham b+ha la'i rigs ldan rgyal po nyi shu rtsa lnga'i bcu dgu pa rigs ldan rgyal po rnam gnon me lug la khrir phebs nas yang me lug la re gcig song/ rgyal po de lo sum cu khrir bzhugs lo brgya lon pa nas/ de'i sras stobs po che lo brgya/ de'i sras ma 'gag pa lo brgya/ de'i sras mi'i seng ge lo brgya/ de'i sras dbang phyug chen po lo brgya/ de'i sras mtha' yas rnam rgyal lo brgya/ de'i sras rigs ldan rgyal po nyer lnga pa drag po 'khor lo can lo brgya khrir bzhugs pas bu ston dang gtsang gi paN chen sogs kyis drag po 'khor lo can lnga bcu bzhes dus dmag dpung rgya gar nas yong/ phug lugs bai dkar rjes 'brangs bcas pas drag po 'khor lo can lo go bdun lon pa na dmag dpung yong zer/ de gnyis gang ltar yang rgya gar rdo rje gdan gyi kla klo bcom/ nub ba glang spyod/ byang sgra mi snyan/ shar lus 'phags po/ lho 'dzam bu gling pa la sangs rgyas kyi bstan pa dus bzhi phyi ma gsar du 'dzugs/ drag po 'khor lo can lo brgya lon/ 'phags pa klu sgrub sku rdo la 'gyur ba gsos/ 'phags pa klu sgrub dang/ rgyal ba tsong kha pa'i sku gdung rin chen chos rgyal gyis gsos te rgyal ba tsong kha pa gnyis dngos su phebs chos bstan/ drag po 'khor lo can gyi sras gzhon pa lha dbang rgya gar na rgyal por bskos/ sras rgan pa tshangs dbang byang sham b+ha @459a @#/ /lar rgyal por bskos/ de nas sras 'od srung sogs rgyal rgyud dgu yong/ de dgu rdzogs pa dang/ shAkya thub pa'i bstan pa lo brgya phrag lnga bcu rdzogs pa dus mnyam pa'o/ /da lta sangs rgyas kyi bstan pa ji tsam song zhe na/ rab byung bcu gsum pa'i me bya la tshul khrims le'u lnga brgya phrag gcig yod pa'i brgya phrag gcig dang nga brgyad song/ phug lugs yin/ bu ston dang/ mkhas grub ltar na/ brgya phrag gnyis tham pa song/ byang sham b+ha lar rigs ldan rgyal po nyer lnga 'byung ba sangs rgyas shAkya thub pas lung bstan pa'i rgyal po bcu dgu pa rnam gnon rgyal po'i khri la phebs nas rab byung bcu gsum pa me bya la lo lnga bcu nga gcig song/ phug lugs de ltar yin/ mkhas grub dge legs dpal bzang dang/ bu ston ltar na/ rigs ldan bcu dgu pa rnam gnon khri la phebs nas rab byung bcu gsum pa'i me bya lor dgu bcu go gnyis song/ /zhes pa 'di yang klong rdol bla ma ngag dbang blo bzang gis bsgrigs pa'o// // @460b