@#/ /bstan bcos mngon par rtogs pa'i rgyan 'grel pa dang bcas
pa'i rnam bshad rnam pa gnyis kyi dka' ba'i gnad gsal bar byed
pa legs bshad skal bzang klu dbang gi rol mtsho zhes bya ba las
skabs bdun pa'i spyi don bzhugs so/

@01@##/ /gnyis pa brtan pa'i 'bras bu skad cig sbyor bshad pa la/
'brel brjod pas mtshams sbyar ba dang/ skad cig ma mtshon byed kyi
chos rgyas par bshad pa/ skabs bsdu ba dang gsum las/ dang po
ni/

lus rnam gzhag tu/ mthar gyis pa/ skad cig gcig mngon rdzogs
byang chub/ /ces 'chad na/ mthar gyis sbyor gyi rjes su skad cig
sbyor bshad pa'i rgyu mtshan gang zhe na/ de'i rgyu mtshan yod de/
mkhyen gsum gyi rnam pa sgom

pa'i mthar gyis sbyor nyams su blangs pas/ mkhyen gsum gyi rnam
pa sgom pa la brtan pa thob pa'i skad cig sbyor 'byung ba'i rgyu
mtshan gyis de ltar bshad pa'i phyir/ zhes 'chad pa la/ mthar
gyis pa'i mngon par rtogs

pa rnam par sgom pa ni shin tu goms par bya ba'i phyir de dag
nyid skad cig ma gcig gis sgom pas skad cig ma gcig pa'i mngon
par rdzogs par byang chub pa yin te/ zhes gsungs/ gnyis pa la/
'o na skad cig

sbyor mtshon byed kyi chos la du yod ce na/ de la yang bzhir yod
de/ mtshan nyid kyis te ldog pas phye ba bzhir yod pa'i phyir/
zhes 'chad pa la/ de yang mtshan nyid kyis rnam pa bzhi yod pas/
zhes gsungs/ 'o na bzhi po de

gang zhe na/ 'di la yang yon tan mngon du byed pa'i skad cig ma
dang/ yul gyi rang bzhin rtogs tshul gyi dbang du byas pa'i skad
cig sbyor gnyis las/ dang po la/ rnam par smin pa ma yin pa'i
skad cig sbyor dang/ rnam par

@02a @#/ /smin pa'i skad cig sbyor gnyis las/ dang po la/ mdo las
gsungs tshul dang/ bstan bcos kyis 'grel tshul gnyis las/ dang po
ni/ mthar gyis sbyor bcu gsum pa'i skabs su byang chen sher
phyin la

spyod pa'i tshe phyin drug mi dmigs par bsgoms par gsungs pa las
'phros nas/ de skad ces bka' stsal pa dang/ tshe dang ldan pa rab
'byor gyis bcom ldan 'das la 'di skad ces gsol to/ /bcom ldan
'das

byang chen pha rol tu phyin pa la spyod pa'i tshe ji ltar sems
bskyed pa gcig gis phar phyin drug po yongs su 'dzin pa lags/
zhes pa nas/ ji ltar dpe byad bzang po brgyad cu yongs su 'dzin
pa lags/ zhes pa'i bar

gyis skad cig sbyor spyir bstan nas/ bcom ldan 'das kyis bka'
stsal pa/ rab 'byor 'di la byang chen sbyin pa gang yongs su
gtong ba de shes rab kyi pha rol tu phyin pas yongs su bzung ba
las gzhan du ma yin no/ /

zhes pa nas/ chos thams cad mtshan ma med pa la mtshan ma dang
bral pa'i sems kyi ting nge 'dzin gyis phar phyin drug po yongs
su rdzogs par byed do/ /zhes pa'i bar gyis dang po de bstan nas/
gnyis pa la/ mtshams

sbyar; don bshad pa gnyis las/ dang po ni/ skad cig sbyor bzhi'i
nang nas dang por rnam par smin pa ma yin pa'i zag med kyi chos
thams cad skad cig ma gcig pa'i mtshan nyid kyi sgo nas rtogs
pa'i skad cig ma gcig

@02b pa'i mngon par rdzogs par byang chub pa'i skad cig sbyor
'chad do/ /zhes mtshams sbyor ba la/ dang po rnam par smin pa ma
yin pa zag pa med pa'i chos thams cad skad cig ma gcig pa'i
mtshan nyid kyis skad cig ma gcig

pa'i mngon par rdzogs par byang chub pa/ zhes gsungs/ gnyis pa
la/ dngos kyi don dang/ de mtshon pa'i dpe bshad pa'o/ /dang po
la/ rtsa ba/ 'grel pa gnyis las/ dang po ni/ mdo de'i don 'chad
pa'i sgo nas rnam

par smin pa ma yin pa'i skad cig sbyor de ston pa la/ sbyin pa
la sogs re res kyang/ /zhes sogs gsungs/ gnyis pa ni/ de nyid
tshig don gyi sgo nas 'chad pa la/ lugs las/ chos kyi dbyings kyi
rang gi ngo bo nyid/ /

dngos gcig dngos po kun gyi ngo bo nyid/ /dngos kun dngos po
gcig gi ngo bo nyid/ /gang gis dngos gcig de bzhin nyid mthong
pa/ /de yis dngos kun de bzhin nyid du mthong/ /zhes 'byung ba'i
phyir/ mang pos

gcig bsdus pa 'ba' zhig tu ma zad kyi/ 'on kyang sbyin pa la
sogs pa'i ye shes kyi dmigs par bya ba'i skad cig ma gcig po
dngos po so sor nges par 'dzin pa'i phyin ci log dang bral ba'i
ngo bos sbyin pa la

sogs pa nas dpe byad bzang po brgyad cu'i bar gyi mtshan nyid kyi
chos rnams bsdus pa'i phyir thub pa byang chub sems dpa'i rtogs
pa ni skad cig ma gcig pa'i mngon par rdzogs par byang chub
pa'o/ /zhes bya bar

@03a @#/ /shes par bya'o/ /zhes gsungs/ gnyis pa la mtshams sbyar
ba/ rtsa ba/ 'grel pa gsum las/ dang po ni/ ji ltar na zag med
kyi ye shes gcig dmigs pa na de dang rigs mthun pa'i zag med

thams cad yul du bsdus pa yin zhe na/ de ltar du 'jig rten la
grags pa'i dpes ston no/ /zhes 'chad pa la/ yang ji ltar na zag
pa med pa'i ye shes gcig dmigs na zag pa med pa thams cad bsdus
pa yin

zhe na/ 'jig rten pa'i dpes/ zhes gsungs/ gnyis pa dpe dngos
ston pa la/ ji ltar skyes bus zo chun rgyud/ /ces sogs gsungs/
gsum pa de nyid tshig don gyi sgo nas 'chad pa la/ dper na skyes
bus rdog thabs

gcig gis bskyod na bzo bo mkhas pas sngon bzo legs par byas pa'i
mthus zo chun gyi rgyud thams cad cig car dus gcig tu 'gul ba de
bzhin du/ sngon gyi smon lam gyi 'phen pa dang/ chos kyi dbyings
kyi mthus

skad cig ma gcig kho na la zag pa med pa'i ye shes gcig dmigs na
rigs mthun pa thams cad mngon du byed pa yin no/ /zhes gsungs/
gnyis pa la/ mdo las gsungs tshul dang/ bstan bcos kyis 'grel
tshul gnyis

las; dang po ni/ rab 'byor gyis gsol pa/ bcom ldan 'das ji ltar
byang chen sher phyin la spyod pa'i tshe mtshan ma med pa'i chos
la gnas nas sher phyin yongs su rdzogs par 'gyur pa lags/ bcom
ldan 'das kyis

@03b bka' stsal pa/ rab 'byor 'di la byang chen sher phyin la
spyod pa'i tshe yang dag pa'am yongs su grub pa'i chos gang yang
dag par rjes su mthong pa med do/ /gzugs yang dag pa'am yongs su
grub pa yang dag par rjes su mi mthong ngo/ /zhes pa nas/ sangs

rgyas kyi chos ma 'dres pa bco brgyad kyi bar du yongs su rdzogs
par 'gyur ro/ /zhes gsungs/ gnyis pa la/ mtshams sbyar/ rtsa ba/
'grel pa gsum las/ dang po ni/ de ltar skad cig sbyor dang po
bstan nas gnyis pa rnam par smin pa'i chos nyid kyi gnas skabs

kyi zag med kyi chos thams skad cig cad ma gcig pa'i mtshan nyid
kyi sgo nas rtogs pa'i skad cig ma gcig pa'i mngon par rdzogs
par byang chub pa'i sbyor ba 'chad do/ /zhes 'chad pa la/ de
ltar dang po bstan nas gnyis pa rnam par smin pa'i chos nyid kyi

gnas skabs kyi zag pa med par chos thams cad skad cig ma gcig
pa'i mtshan nyid kyi skad cig ma gcig pa'i mngon par rdzogs par
byang chub pa/ zhes gsungs/ gnyis pa ni/ mdo de'i don 'chad pa
la/ gang tshe chos dkar thams cad kyi/ /zhes sogs gsungs/

gsum pa ni/ de nyid tshig don gyi sgo nas 'chad pa la/ gang gi
tshe byang chub sems dpas gnyen po bsgoms pas mi mthun pa'i
phyogs thams cad dang bral bas na rnam par byang ba'i phyogs
rnam par smin pa'i chos nyid kyi gnas skabs dri ma thams cad
dang bral

bas ston ga'i zla ba'i 'od bzhin du dkar pa'i ngo bo nyid skyes
pa de'i tshe skad cig ma gcig kho na la rnam par smin pa'i gnas
skabs su gyur pa'i zag pa med pa rnams rtogs pa'i ye shes ni
shes rab kyi pha rol tu phyin pa'i skad cig ma gcig pa'i mngon
par rdzogs

par byang chub pa yin no/ /zhes gsungs/ gnyis pa la/ mtshan nyid
med pa'i skad cig sbyor dang/ gnyis su med pa'i skad cig sbyor
gnyis las/ dang po la/ mdo las gsungs tshul dang/ bstan bcos kyis
'grel tshul gnyis las/ dang po ni/ de nas tshe dang ldan pa rab

@04a @#/ /'byor gyis bcom ldan 'das la 'di skad ces gsol to/
/bcom ldan 'das de ltar chos thams cad dbyer ma mchis shing
mtshan ma ma mchis la rang gi mtshan nyid kyis stong pa nyid lags
na ji ltar pha rol tu phyin pa drug po sbyin pa'i pha rol tu

phyin pa dang/ tshul khrims kyi pha rol tu phyin pa dang/ bzod
pa'i pha rol tu phyin pa dang/ brtson 'grus kyi pha rol tu phyin
pa dang/ bsam gtan gyi pha rol tu phyin pa dang/ shes rab kyi
pha rol tu phyin pa sgom pa yongs su rdzogs par 'gyur/ bcom ldan
'das kyis bka'

stsal pa/ rab 'byor byang chen sher phyin la spyod pa'i tshe rmi
lam lta bu'i nye bar len pa'i phung po lnga la gnas shing sbyin
pa yongs su gtong ngo/ /tshul khrims srung ngo/ /bzod pa sgom mo/
/brtson 'grus rtsom mo/ /ting nge 'dzin sgom mo/ /shes rab sgom
mo/ /zhes pa

nas; chos thams cad sgra brnyan lta bu dang/ mig yor lta bu
dang/ smig rgyu lta bu dang/ sgyu ma lta bu dang/ sprul pa lta
bur yongs su shes so/ /zhes gsungs/ gnyis pa la mtshams sbyar ba/
rtsa ba/ 'grel pa gsum las/ dang po ni/ de ltar skad cig sbyor
gnyis pa

bstan nas skad cig sbyor gsum pa mtshan nyid med pa'i chos thams
cad skad cig ma gcig pa'i mtshan nyid kyi sgo nas rtogs pa'i skad
cig ma gcig pa'i mngon par rdzogs par byang chub pa'i sbyor ba
'chad do/ /zhes 'chad pa la/ de ltar gnyis pa bstan nas

gsum pa mtshan nyid med par chos thams cad skad cig ma gcig pa'i
mtshan nyid kyi skad cig ma gcig pa'i mngon par rdzogs par byang
chub pa/ zhes gsungs/ gnyis pa mdo de'i don 'chad pa'i sgo nas
mtshan nyid med pa'i skad cig sbyor ston pa la/ sbyin

pa la sogs spyod pa yis/ /zhes sogs gsungs/ gsum pa de nyid tshig
don gyi sgo nas 'chad pa la/ sngon chos thams cad rmi lam lta
bur goms pas tshogs gnyis nyams su myong bar byas nas rtogs pa'i
gnas skabs na nye bar len pa'i phung po la sogs pa

@04b rmi lam gyi ngo bo nyid kyi chos thams cad la/ /sbyin pa la
sogs pa'i phar phyin drug bsgrub pas gnas te/ sbyin pa la sogs
pa'i ngo bo nyid nges par rtogs pa'i rnam pa can/ skad cig ma
gcig kho nas chos thams cad ni mtshan nyid med pa'o zhes kun nas
nyon mongs

pa dang rnam par byang ba'i ngo bo'i chos rnams mtshan nyid med
pa nyid du shes pas na/ skad cig ma gcig pa'i mngon par rdzogs
par byang chub pa yin no/ /zhes gsungs/ gnyis pa la/ mdo dang/
bstan bcos gnyis las/ dang po ni/ de nas tshe dang ldan pa

rab 'byor gyis bcom ldan 'das la 'di skad ces gsol to/ /bcom
ldan 'das byang chen sher phyin la spyod pa'i tshe ji ltar na
chos thams cad rmi lam lta bur yang dag pa ji lta ba bzhin yongs
su btsal ba lags/ bcom ldan 'das kyis bka' stsal pa/

rab 'byor byang chen sher phyin la spyod pa'i tshe rmi lam mi
mthong/ rmi lam mthong ba yang mi mthong/ zhes pa nas/ rab 'byor
de ltar byang chen mtshan ma med pa'i tshul gyis sher phyin la
bslab par bya'o/ /zhes gsungs/ gnyis pa la/ mtshams sbyar ba/
rtsa ba/

'grel pa gsum las/ dang po ni/ de ltar skad cig sbyor gsum pa
bstan nas bzhi pa gnyis su med pa'i mtshan nyid du chos thams cad
skad cig ma gcig pa'i mtshan nyid kyi sgo nas rtogs pa'i mngon
par rdzogs par byang chub pa'i skad cig sbyor 'chad

do; /zhes mtshams sbyor ba la/ de ltar gsum pa bstan nas bzhi pa
gnyis su med pa'i mtshan nyid du chos thams cad skad ma gcig pa'i
mtshan nyid kyi mngon par rdzogs par byang chub pa/ zhes gsungs/
gnyis pa la/ mdo de'i don 'chad par/ rmi lam

dang ni de mthong nyid/ /ces sogs gsungs/ gsum pa de nyid tshig
don gyi sgo nas 'chad pa la/ yun ring mo zhig nas bar chad med
par gnyis su snang ba spong ba la goms pa ngang du gyur pas
gnyis su snang ba'i bag chags drung phyung ba'i byang chub sems
dpa'

@05a @#/ /gang gi tshe gzung ba dang 'dzin pa'i tshul du rmi lam la
gzung ba dang rmi lam mthong ba la 'dzin par mi mthong ba de'i
tshe chos thams cad kyang de lta bu'i chos nyid yin no zhes chos
rnams kyi de kho na nyid gnyis su med pa skad cig ma gcig

kho nas rtogs pas na skad cig ma gcig pa'i mngon par rdzogs par
byang chub pa yin no/ /zhes gsungs/ gzhung don ni/ skad cig
sbyor chos can/ khyod la du mar yod de/ khyod la rnam par smin
pa ma yin pa'i skad cig sbyor dang/ rnam par smin pa'i skad cig

sbyor dang/ mtshan nyid med pa'i skad cig sbyor dang/ gnyis su
med pa'i skad cig sbyor rnams su yod pa'i phyir/ kha cig /zag
med rnam par smin pa ma yin pa'i yon tan gyi rigs rnams bya
rdzogs kyi skad cig ma gcig la mngon du byed nus pa'i sems dpa'i

rnal 'byor de/ rnam par smin pa ma yin pa'i skad cig sbyor gyi
mtshan nyid/ zag med rnam par smin pa'i yon tan gyi rigs rnams
bya rdzogs kyi skad cig ma gcig la mngon du byed nus pa'i sems
dpa'i rnal 'byor de/ rnam par smin pa'i skad cig sbyor gyi mtshan

nyid; stong nyid mngon sum du rtogs pa'i shes rab kyis zin pa'i
sems dpa'i rnal 'byor de/ mtshan nyid med pa'i skad cig sbyor gyi
mtshan nyid/ gnyis stong mngon sum du rtogs pa'i shes rab kyis
zin pa'i sems dpa'i rnal 'byor de/ gnyis su med pa'i

skad cig sbyor gyi mtshan nyid zer ba rnams mi 'thad de/ de
'dra'i mthar gyis sbyor ba yod pa'i phyir/ des na/ mkhyen gsum
gyi rnam pa la brtan pa thob pa'i sems dpa'i rnal 'byor mthar
thug de/ skad cig sbyor gyi mtshan nyid/ dbye na/ rnam par smin
pa ma yin

pa'i skad cig sbyor dang/ rnam par smin pa'i skad cig sbyor
dang/ mtshan nyid med pa'i skad cig sbyor dang/ gnyis su med pa'i
skad cig sbyor dang bzhi yod/ bya rdzogs kyi skad cig ma'i thung
mtha' gcig la zag med rnam par smin pa ma yin pa'i chos gcig
mngon du

@05b byas pa na de dang rigs mthun pa'i chos thams cad mngon du
byed nus pa'i nus pa thob pa'i sgo nas shes sgrib kyi dngos
gnyen byed pa'i rigs su gnas pa'i sems dpa'i rnal 'byor mthar
thug de/ dang po'i mtshan nyid/ bya rdzogs kyi skad cig ma'i
thung mtha'

gcig la zag med rnam par smin pa'i chos gcig mngon du byas pa na
de dang rigs mthun pa'i chos thams cad mngon du byed nus pa'i
nus pa thob pa'i sgo nas shes sgrib kyi dngos gnyen byed pa'i
rigs su gnas pa'i sems dpa'i rnal 'byor mthar

thug de/ gnyis pa'i mtshan nyid/ stong nyid mngon sum du rtogs
pa'i shes rab kyis zin pa'i sgo nas shes sgrib kyi dngos gnyen
byed pa'i rigs su gnas pa'i sems dpa'i rnal 'byor mthar thug de/
gsum pa'i mtshan nyid/ gzung 'dzin rdzas gzhan

gyis stong par mngon sum du rtogs pa'i shes rab kyis zin pa'i
sgo nas shes sgrib gyi dngos gnyen byed pa'i rigs su gnas pa'i
sems dpa'i rnal 'byor mthar thug de/ bzhi pa'i mtshan nyid/ rgyun
mtha'i bar chad med lam chos can/ rnam par smin pa ma yin pa'i

skad cig sbyor yin te/ sbyin pa la sogs pa'i ngo bor gyur pa'i
ye shes dmigs par bya ba'i skad cig ma gcig po ste/ re re'i ngo
bo yul du byas pas kyang sbyin sogs nas dpe byad brgyad cu'i bar
gyi mtshan nyid kyi zag med kyi chos rnams bya rdzogs kyi skad

cig ma gcig la yul du byed pa'i shes rab kyis zin pa'i sems
dpa'i rnal 'byor mthar thug yin pa'i phyir/ de chos can/ bya
rdzogs kyi skad cig ma gcig pa'i thung mtha' gcig la zag med
rnam par smin pa ma yin pa'i chos gcig mngon du byas pa na de
dang rigs

mthun pa'i zag med kyi chos thams cad mngon du byed nus pa'i
rgyu mtshan yod de/ sngon bya rdzogs kyi skad cig ma dang ldan
pa'i shes rab kyis chos thams cad rtogs par gyur cig ces smon
lam btab pa'i smon lam gyi don grub cing chos thams cad chos
dbyings su

@06a @#/ /tha mi dad pa'i phyir/ dper na sngon bzo bo mkhas pas
zo chun gyi 'khor lo legs par bcos pa de skyes bu'i rtsol bas
rdog thabs kyis bskyod pa na thams cad 'bad med du 'khor ba ltar
yin pa'i phyir/ rgyun mtha'i bar chad med lam

chos can/ rnam par smin pa'i skad cig sbyor yin te/ bya rdzogs
kyi skad cig ma gcig kho na la rang rgyud la rnam par smin pa'i
gnas skabs su gyur pa'i zag pa med pa'i chos rnams rtogs pa'i
sems dpa'i rnal 'byor mthar thug yin pa'i phyir/ de chos can/

mtshan nyid med pa'i skad cig sbyor yin te/ byang rdzogs kyi skad
cig ma gcig la kun byang gi chos thams cad don dam par mtshan
nyid med par mngon sum du rtogs pa'i sems dpa'i rnal 'byor mthar
thug yin pa'i phyir/ de chos can/ gnyis su med pa'i

skad cig sbyor yin te/ gzung 'dzin rdzas gzhan gyis stong par
mngon sum du rtogs pa'i shes rab kyis zin pa'i sems dpa'i rnal
'byor mthar thug yin pa'i phyir/ 'di'i rnam par smin pa ma yin
pa dang yin pa'i don gang zhe na/ tshig gsal las/ rnam

par smin pa ni gsum ste/ sa dang po la 'jig rten las 'das pa
dang/ sa brgyad pa la mtshan ma med pa dang/ sangs rgyas kyis la
bsam gyis mi khyab cing lhun gyis grub par rnam par smin pa'o/
/rnam par smin pa ma yin pa ni mthong lam ma skyes pa'i rgyud
kyi

gzung 'dzin gyis bsdus pa'i chos ji snyed pa'o/ /zag med ni de
dag zag med ma yin kyang/ de dag gi rang bzhin ni zag med yin
te/ byis pas byang chub mi shes kyang/ /de nyid de la rab tu
gnas/ /zhes pa ltar ro/ /zhes 'chad/ rtogs dkar/ phyi rol gyi
rgyu rkyen

gyis mngon par 'du ma byas pa rnam par smin pa ma yin pa dang/
'tshang rgya ba'i 'bras bu ster ba la mngon du phyogs shing rab
tu gyur pa ni rnam par smin pa'i don du bshad/ mkhas pa snga ma
rnams sa dang po nas bdun pa'i bar 'bad rtsol la ltos pas rnam

@06b par ma smin pa dang/ sa brgyad pa yan chad ni de la mi ltos
par 'byung bas rnam par smin pa'o/ /zhes 'chad/ re zhig lugs
dang po mi 'thad de/ chos nyid la byed na chos nyid la dbyer med
pas sa dang po bzhag dgos la/ chos can la byed na rnam par

ma smin pa la zag med mi 'thad pa'i phyir zhes gser phreng las
bshad/ lugs gnyis pa yang mi 'thad de/ de ltar na dang po'i zag
med rnams la rnam par smin pa'i don med pa'i rgyu mtshan smra
dgos pa'i phyir/ gsum pa ltar na yang mi 'thad de/

mdo 'grel rnams su mtshan dpe dang stobs dang ma 'dres pa rnams
'chad pas/ sa bdun pa man chad la mi 'grig pa'i phyir/ des na
skad cig sbyor 'di bzhi ldog pa tha dad pa tsam yin pas/ yul can
rnam par smin pa yin min mi rung bas yul la bya

zhing; de yang gcig gi yul gnyis ka'i yul yin pas mdo bstan bcos
nas bstan chod kyi yul la rnam par smin pa dang/ rnam par smin
pa ma yin pa gnyis su dbye ste/ dang po'i yul ni rang gi rgyud
la nus pa mthar thug pa ma smin pa dang phyi ma'i

yul ni rang gi rgyud la de ltar skyes pa'i gnas skabs kyi dbang
du byas nas bzhag pa'i phyir/ zhes legs par bshad pa gser gyi
phreng ba las bshad pa'i phyir/ kha cig /rgyun mtha'i sbyor ba'i
lam de skad cig sbyor min zhes zer na/ de de yin par thal/

mkhyen gsum gyi rnam pa brgya dang bdun cu rtsa gsum sgom par
byed pa'i skad cig sbyor yod pa'i phyir/ khyab ste/ snying po'i
rgyan las/ de yang rgyun mtha'i sbyor ba'i tshe yin gyi rgyun gyi
mtha' ma'i tshe chos nyid la gnyis snang nub pa'o/ /de la/ ji
ltar skyes

bus zo chun rgyud/ /ces sogs gsungs pa'i phyir/ gsum pa skabs
bsdu ba ni/ shes rab kyi pha rol tu phyin pa'i man ngag gi bstan
bcos mngon par rtogs pa'i rgyan 'grel pa dang bcas pa'i rnam
bshad rnam pa gnyis kyi dka' ba'i gnad gsal

@07a @#/ /bar byed pa legs bshad skal bzang klu dbang gi rol mtsho
zhes bya ba las skabs bdun pa'i legs par bshad pa'o// //smras
pa/ bslab pa yongs su rdzogs pa'i le'u yi/ /mdo yi spas don skad
cig sbyor ba ni/

mtshon byed chos bzhi gsal bar byed pa yi/ /rgyan gyi skabs kyi
don rnams ches gsal bar/ /ji bzhin 'grel pa 'grel pa'i gnad don
rnams/ /legs par bshad pa'i rnam bshad rnam gnyis kyi/ /dgongs
pa ji bzhin rje btsun bla ma yi/ /zhal gyi bum

bzang las 'ongs bdud rtsi'i rgyun/ /yongs 'dzin dam pa'i gsung
bzhin yi ger bkod/ /dge bas bdag dang mtha' yas sems can rnams/
/kun mkhyen rgyal ba'i go 'phang myur thob nas/ /sa gsum 'gro ba
'dren pa'i dpal gyur cig/ //sher

phyin sbas don rin chen gsal ba'i gter/ /mdo rgyan 'grel gsum
sbyar ba'i legs bshad che/ /klu dbang rol mtsho rgyas byed sbyor
brtson dges/ /rmad byung bshad sgrub dga' ston rgyas gyur cig/
//dge legs 'phel// //