@#/ /mnyan bya'i dbang po'i zur bkol gzhan las phul tu phyin pa 'di mkhas grub bstan pa'i nyi ma rje btsun chos kyi rgyal mtshan dpal bzang pos jo bo rin po che'i cha 'dab chos grwa chen po se ra theg chen gling du sbyar ba'o/ / @01a @##/ /ma grub sbyar ba brjod bya min/ /zhes sogs kyi skabs su/ mdo rang 'grel las/ phyogs kyi chos ni rgol ba dang/ /phyir rgol ba gnyis ka la nges par bzung ngo/ /de bzhin du mthun pa'i phyogs la yod pa dang/ med pa la sogs pa dag la yang ci rigs par brjod par bya'o/ /zhes gsungs/ lung 'di yi don bshad pa la/ rang lugs bzhag pa dang/ zhar la gzhan gyi lung don 'chad tshul dgag pa gnyis/ dang po ni/ thar lam gsal byed las/ don 'di ltar yin te/ zhes sogs kyis 'chad la/ de rnams kyi don bsdus nas bshad na/ ci rigs pa zhes smos pa'i don gang yin zhe na/ de'i don yod de/ gzhan don skabs kyi sgrub rtags kyi phyogs chos rgol phyi rgol gnyis ka la ma grub pa dang/ gang rung la ma grub pa dang/ phyogs chos la the tshom za ba dang/ gzhi ma grub chos can du bzung ba dpe bzhi dang/ mthun phyogs la khyab byed du yod pa dang khyab byed du med pa dang/ rnam gnyis su 'jug pa'i phyogs chos can dgu'i rjes su 'gro ldog gi khyab pa rgol phyi rgol gnyis ka la ma grub pa dang/ gang rung la ma grub pa dang/ rjes su 'gro ldog gi khyab pa la the tshom za ba dang/ gzhi ma grub dper bzung ba ci rigs par dpe don du @02a @#/ /sbyar te/ dang po gsum dpe don du sbyor/ phyi ma gnyis dpe don du mi sbyor ba lung de'i don yin pa'i phyir/ dpe don sbyor tshul ni/ gzhan don skabs kyi sgrub rtags yang dag gi phyogs chos rgol phyi rgol gnyis ka la ma grub na/ phyogs chos mi 'grub pa dang/ phyogs chos can dgu'i 'gal rtags gnyis kyi rjes su 'gro ldog gi khyab pa rgol phyi rgol gnyis ka la ma grub pas 'gal rtags gnyis kyi rjes su 'gro ldog gi khyab pa mi 'grub ces dpe don du sbyor/ de bzhin du/ gzhan don skabs kyi sgrub rtags kyi phyogs chos rgol phyi rgol gang rung la ma grub na/ de'i phyogs chos mi 'grub pa dang/ phyogs chos can dgu'i nang gi thun mong ba'i ma nges pa'i rtags bzhi po'i rjes su 'gro ldog gi khyab pa rgol phyi rgol gang rung la ma grub pas/ de bzhi yi rjes su 'gro ldog gi khyab pa mi 'grub pa/ dpe don du sbyor ba dang gzhan don skabs kyi sgrub rtags kyi phyogs chos la the tshom za na/ de'i phyogs chos mi 'grub pa dang/ phyogs chos can dgu'i nang gi thun mong ma yin pa'i ma nges pa'i rtags kyi khyab pa la the tshom za bas/ de yi rjes su 'gro ldog gi khyab pa mi 'grub pa dpe don du sbyor/ gzhi ma grub chos can @02b du bzung na/ phyogs chos mi 'grub pa dang/ gzhi ma grub mi mthun dper bzung bas ldog khyab mi 'grub pa dpe don du mi sbyor te/ sgrub rtags la gzhi ma grub chos can du bzung na/ phyogs chos mi 'grub pa 'thad kyang/ gzhi ma grub mi mthun dpe yang dag tu bzung bas ldog khyab 'grub pa la mi gnod pa'i phyir/ rtags gnyis pa grub ste/ mi rtag pa ma yin na/ byas pa ma yin pas khyab/ dper na/ dngos gyur gyi nam mkha' bzhin/ sgra ni byas zhes pa'i sgrub ngag 'di/ byas pa'i rtags kyis sgra mi rtag par sgrub pa'i chos mi mthun sbyor gyi sgrub ngag yang dag yin pa'i phyir dang/ gang yod pa ma yin na/ tshad mas ma dmigs pas khyab/ dper na/ ri bong gi rwa bzhin/ sgra ni tshad mas dmigs pa yin no/ /zhes pa'i sgrub ngag 'di yang sgrub ngag yang dag yin pa'i phyir dang/ de ltar yang thar lam gsal byed las/ chos can ma grub pa'i phyogs chos ma grub pa de dang/ dgu'i nang gi rtags yang dag gnyis po la gzhi ma grub mi mthun dper bzung na/ ldog khyab mi 'grub pa dpe don du mi sbyor ba'i don no/ /zhes gsungs/ gzhan yang/ de sgrub kyi sgrub rtags yang dag gi mi mthun dpe bzhi ma grub pas/ de sgrub kyi sgrub rtags yang dag gi ldog khyab 'grub pa la mi gnod de/ blo'i yul du byar rung gi rtags kyis/ bum pa shes byar sgrub pa'i mi mthun dpe yang dag gzhi ma grub kyang/ de sgrub kyi ldog khyab 'grub pa'i phyir/ 'grel bshad gnyis ltar na/ de sgrub kyi mthun dpe yang dag yin na/ gzhi grub pas khyab pa min te/ gang zag gi bdag tshad @03a @#/ /mas ma dmigs na/ gang zag gi bdag med pas khyab/ dper na/ ri bong rwa bzhin/ sgra ni gang zag gi bdag tshad mas ma dmigs pa yin no/ /zhes pa'i sgrub ngag 'di sgrub ngag yang dag yin pa'i phyir te/ mi rtag pa ma yin na/ byas pa ma yin pas khyab/ dper na/ dngos gyur gyi nam mkha' bzhin/ sgra ni byas zhes pa'i sgrub ngag 'di sgrub ngag yang dag yin pa'i phyir te/ mdo rang 'grel las/ 'di ltar bshad pa rnams/ gzhan don skabs kyi rtags yang dag gi dbang du byas pa yin gyi/ rtags yang dag thams cad kyi dbang du byas pa min te/ phyogs chos dang rjes su 'gro ldog gi khyab pa rgol phyi rgol gnyis kas ma grub kyang/ rtags yang dag du gyur pa'i rang don skabs kyi rtags yang dag yod pa'i phyir/ gzhan don skabs kyi rtags yang dag gi nang nas kyang sgrub rtags yang dag gi dbang du byas pa yin gyi/ gzhan don skabs kyi rtags yang dag thams cad kyi dbang du byas pa min te/ gzhi ma grub chos can du bzung ba'i gzhan don skabs kyi rtags yang dag yod de/ cha bcas kyi dngos po min pa de/ ba glang gi spyi rtag dngos rang gi gsal ba du ma la don dam par 'phrod 'du ma 'brel bar sgrub pa'i gzhan don skabs kyi rtags yang dag yin pa'i phyir te/ de ltar yang thar lam gsal byed las/ 'di dag kyang sgrub rtags dang/ de yang gzhan don skabs kyi dbang du byas par bsam ste/ zhes sogs gsungs/ gzhi ma grub chos can du bzung ba'i rtags yang dag yod kyang/ shes 'dod chos can gzhi ma grub pa'i rtags yang dag med de/ @03b de sgrub kyi rten shes 'dod chos can la tshad mas gnod na/ de sgrub kyi bsgrub bya la tshad mas gnod pas khyab pa'i phyir/ kun tu rgol ba bdag nyid kyi/ /zhes sogs gsungs/ mkhas pa kha cig /gzhi ma grub chos can du bzung ba'i rtags yang dag yod de/ skyes bu 'di chos can/ sdug bsngal ba yin te/ ri bong gi rwas phug pa yin pa'i phyir/ zhes bkod pa'i tshe/ ri bong gi rwas phug pa chos can/ skyes bu sdug bsngal bar sgrub pa'i rtags ltar snang yin te/ de sgrub kyi rtags su bkod pa gang zhig /de sgrub kyi phyogs chos ma yin pa'i phyir zhes bkod pa'i tshe na/ de sgrub kyi rtags su bkod nas/ de sgrub kyi phyogs chos min pa/ ri bong gi rwas phug pa/ skyes bu sdug bsngal bar sgrub pa'i rtags ltar snang du sgrub pa'i sgrub rtags yang dag yin pa'i phyir/ zhes gsungs pa mi 'thad de/ thar lam gsal byed las/ de'i rgyu mtshan sgrub rtags la/ gzhi ma grub chos can du byas na/ phyogs chos mi 'grub la/ gzhi ma grub mi mthun dper bzung na/ ldog khyab grub ba la mi gnod pa'i phyir/ zhes gsungs pa dang 'gal ba'i phyir dang/ ri bong gi rwas phug pa de sgrub kyi rtags ltar snang du sgrub pa'i rtags yang dag yod na/ gang zag gi bdag med par sgrub pa'i rtags yang dag yod dgos pas/ tshad mas ma dmigs pa de/ gang zag gi bdag med par sgrub pa'i rtags yang dag du 'gyur ba'i skyon yod pa'i phyir/ kha cig /tshad mas dmigs pa'i rtags kyis sgra yod par sgrub pa'i phyir rgol yang dag gis de'i rtags kyis de sgrub kyi phyogs chos tshad mas ma nges zhes zer ba mi 'thad de/ phyogs kyi chos ni rgol ba dang/ /phyi rgol ba gnyis ka la nges bar bzung ngo/ /zhes sogs kyi tshig don dang 'gal/ kho na re/ skyon med de/ lung de'i don ni/ gzhan don skabs kyi rtags yang dag gi phyogs chos rgol phyi rgol gnyis ka la ma grub na/ de'i phyogs chos ma grub dgos ba lung de'i don yin no/ /zhes rdzas spyi smra ba la 'chad pa nang 'gal te/ tshad mas dmigs pa'i rtags kyis sgra yod par sgrub pa'i gzhan don skabs kyi rtags la sbyar nas bzhag na 'khor gsum dngos 'gal du @04a @#/ /'gyur ba'i phyir/ gnyis pa/ zhar la gzhan gyi lung don 'chad tshul dgag pa ni/ thar lam gsal byed las/ 'di dgag sgrub kyi rtags spyi yi dbang du byas pa dang rjes su 'gro ldog gi khyab pa yang phyogs snga mar bkod pa ltar/ 'dod pa 'gal ba yin te/ 'bras rtags kyi mthun dpe gzhi ma grub na/ khyod rang 'dod pa ltar gyi rjes khyab gzhi ma grub pas khyab na rgyu ma dmigs pa'i rtags kyis mi mthun dpe gzhi ma grub na/ khyod rang 'dod pa ltar gyi de'i ldog khyab ma grub pas ma khyab pa nyams so/ /zhes pas 'chad/ lung de'i don ni/ kho na re/ skabs 'dir/ shes 'dod chos can gzhi ma grub na/ phyogs chos ma grub dgos pa dang/ mi mthun dpe gzhi ma grub na/ ldog khyab mi 'grub pa/ dpe don du mi sbyor bar gsungs pa/ dgag sgrub kyi rtags spyi'i dbang du byas zhes zer ba dang/ byas na mi rtag pas khyab pa byas pa'i rtags kyis sgra mi rtag par sgrub pa'i rjes khyab dang/ rtag na ma byas pas khyab pa/ byas pa'i rtags kyis de sgrub kyi ldog khyab yin zer ba nang 'gal te/ me med pa'i rtags kyis me med pa'i mtshan mo'i rgya mtshor du ba med par sgrub pa'i mi mthun dpe gzhi ma grub na/ du ba'i rtags kyis du ldan la la me yod par sgrub pa'i mthun dpe yang dag /gzhi ma grub dgos/ du ba'i rtags kyis de sgrub kyi mthun dpe yang dag med na/ du ba'i rtags kyis de sgrub kyi rjes khyab ma grub dgos/ du ba'i rtags kyis de sgrub kyi rjes khyab ma grub na/ me med pa'i rtags kyis me med mtshan mo'i rgya mtshor du ba med par sgrub pa'i ldog khyab ma grub dgos pa'i phyir/ rtags phyi ma song/ der thal/ du ba'i rtags kyis de sgrub kyi rjes khyab yin na/ me med pa'i rtags kyis de sgrub kyi ldog khyab yin dgos so/ /me med pa'i rtags kyis de sgrub kyi ldog khyab yin na/ du ba'i rtags kyis de sgrub kyi rjes khyab yin dgos pa'i phyir/ rtags gnyis ka song/ der thal/ du ba yod na me yod pas khyab pa/ du ba'i rtags kyis de sgrub kyi rjes khyab @04b dang/ me med pa'i rtags kyis ldog khyab yin pa'i phyir/ me med na/ du ba me pas khyab pa de/ me med pa'i rtags kyis de sgrub kyi rjes khyab dang/ du ba'i rtags kyis de sgrub kyi ldog khyab yin pa'i phyir/ rtags rnams khas/ rtsa bar 'dod mi nus te/ mi mthun dpe gzhi ma grub kyang/ ldog khyab 'grub par gsungs pa/ dgag sgrub kyi rtags spyi'i dbang du byas pa ma yin par thal/ 'dod pa'i phyir/ ! khyad par rnam par gcod pa yi/ /zhes sogs kyi skabs su mtha' dpyad pa la/ rang lugs bzhag pa dang/ rtsod pa spang ba'o/ dang po ni/ mnyan bya chos can/ sgra rtag mi rtag gnyis kar sgrub pa'i rtags yang dag yin par thal/ khyod de sgrub kyi phyogs chos gang zhig /khyod de sgrub kyi ldog khyab yin pa'i phyir/ rtags phyi ma song/ der thal/ khyod de sgrub la phyogs chos can du song ba'i gang zag des/ mnyan bya rtag mi rtag gang rung min pa la tshad mas ma mthong ba'i phyir/ khyab pa khas/ rtsa bar 'dod na/ mdo rang 'grel las/ khyad par ni rnam par gcod pa'i gtan tshigs ma yin no/ /zhes gsungs pa dang 'gal/ yang na/ gzhung 'di yi don ni/ mnyan bya chos can/ khyod sgra rtag pa ma yin par sgrub pa'i rtags yang dag yin par thal/ khyod de sgrub kyi phyogs chos gang zhig /khyod de sgrub kyi ldog khyab yin pa'i phyir/ rtags phyi ma song/ der thal/ mnyan bya de bsgrub pa la phyogs chos can du song ba'i gang zag des/ mnyan bya rtag pa yin pa la tshad mas ma mthong ba'i phyir/ khyab pa khas/ de bzhin du mnyan bya chos can/ khyod sgra mi rtag pa ma yin par sgrub pa'i rtags yang dag yin par thal/ khyod de sgrub kyi phyogs chos gang zhig /khyod de sgrub kyi ldog khyab yin pa'i phyir/ rtags phyi ma song/ der thal/ mnyan bya sgra mi rtag pa ma yin par sgrub la phyogs chos can du song ba'i gang zag des/ mnyan bya mi rtag par tshad mas ma rtogs pa'i phyir/ khyab pa khas/ thal 'gyur de gnyis ka'i rtsa bar 'dod na/ mdo rang 'grel las/ khyad par ni rnam par @05a @#/ /gcod pa'i gtan tshigs ma yin no/ /zhes gsungs pa mi 'thad par thal/ mnyan bya sgra la rtag mi rtag gnyis ka rnam par gcod pa'i rtags yang dag yin pa'i phyir/ rtags khas/ gnyis pa ni/ thar lam gsal byed las/ mnyan bya sgra mi rtag sgrub pa'i ldog khyab grub par thal/ mnyan bya mi rtag pa kho na la gnas kyi/ rtag pa la nam yang med pa'i phyir/ zhes sogs kyis 'chad/ de rnams kyi don ni/ kho na re/ mnyan bya sgra mi rtag par sgrub pa'i rtags yang dag yin par thal/ mnyan bya'i rtags kyis sgra mi rtag par sgrub pa'i phyogs chos grub pa gang zhig /de'i rtags kyis de sgrub kyi rjes su 'gro ldog gis khyab pa tshad mas grub pa'i phyir/ dang po sla/ gnyis pa ma grub na/ mnyan bya'i rtags kyis de sgrub kyi rjes khyab grub par thal/ mnyan bya yin na/ mi rtag pa yin pas khyab pa/ mnyan bya'i rtags kyis de sgrub kyi rjes khyab yin pa'i phyir te/ mnyan bya'i rtags kyis sgra mi rtag par sgrub pa'i khyab pa rnal mar nges pa'i phyir te/ mnyan bya mi rtag pa kho na la yod pa'i phyir/ ma grub na/ sgra mi rtag pa kho na la med par thal/ ma grub pa de'i phyir/ de bzhin du mnyan bya'i rtags kyis sgra mi rtag par sgrub pa'i ldog khyab tshad mas nges par thal/ rtag na mnyan bya ma yin pas khyab pa/ mnyan bya'i rtags kyis sgra mi rtag par sgrub pa'i ldog khyab yin pa'i phyir dang/ ldog khyab tshad mas grub pa'i phyir te/ mnyan bya rtag pa la med par tshad mas nges pa'i phyir te/ mnyan bya mi rtag pa kho na la yod pa'i phyir zer na/ 'o na/ gtan tshigs mar me bzhin du/ blo yul du song ba tsam gyis go byed du 'gyur ram/ dpe la 'brel ba nges pa la ltos/ /dang po ltar na/ byas pa blo yul du song ba tsam gyis/ sgra mi rtag pa dang/ gang zag mi rtag par go nus par thal/ yul rung bar mar me blo yul du song ba tsam gyis gzugs gsal bar byed pa dang/ go byed kyi tshul mtshungs pa'i phyir/ 'dod na/ byas pa blo yul du song @05b ba tsam gyis gang zag rtag stong du go nus par thal/ 'dod pa'i phyir/ 'dod na/ byas pa der song ba tsam gyis gang zag rtag gcig rang dbang can gyi bdag gis stong ba go nus par thal/ 'dod pa'i phyir/ 'dod na/ 'gro ba 'ga' yang/ bdag med pa la rmongs pa mi srid par thal/ 'dod pa'i phyir/ 'dod na/ sems can thams cad 'bad med du grol bar thal/ 'dod pa'i phyir/ gnyis pa ltar na/ mnyan bya'i rtags kyis sgra mi rtag par sgrub pa'i tshul gsum ma grub par thal/ sgra mi rtag par ma grub pa'i sngar mnyan bya dang/ sgra'i ming don gyi 'brel pa dpe'i steng du nges pa'i phyir/ mnyan bya sgra mi rtag par sgrub pa la phyogs chos can du song ba'i rgol pa med pa'i phyir/ 'di la mkhas grub shanti pa na re/ rmongs pa la 'brel ba ston pa dpe la ltos ba yin gyi/ mkhas pas ni/ dpe med par yang/ sngar mnyan bya la mi rtag pas khyab pa mngon sum gyis grub nas/ sgra mnyan byar nges ma thag sngar gyi khyab pa la/ tshad mas nges pa dran nas/ de'i rjes de ma thag tu/ sgra la mi rtag pas khyab pa go nus pa'i phyir/ shanti pas nang gi khyad par bshad do/ /mnyan bya sgra mi rtag par sgrub pa'i rtags yang dag tu song ba'i skabs yod med rtogs dka' bas/ mkhas ba rnams la bzhed pa mi 'dra ba mang du byung ste/ rgya gar du mkhas grub shanti pa dang/ mkhas pa rgyal dbang blo sogs/ mnyan bya sgra mi rtag par sgrub pa'i rtags yang dag tu bzhed cing/ bod du nya dpon dang/ bdag gis bla ma mkhas pa'i dbang po kha cig bzhed cing/ rnam nges dar Tik du mnyan bya sgra mi rtag par sgrub pa'i rtags yang dag tu song ba'i rgol ba yod par bshad pa 'thad ldan gyi dgongs par byas/ thar lam gsal byed las/ mnyan bya sgra mi rtag par sgrub pa'i rtags yang dag du song ba'i rgol ba med par bshad pa'i phyir/ de ltar yang nya Tik las/ chos bram gnyis kyis mnyan bya sgra mi rtag par sgrub pa'i rtags yang dag ma yin par bshad/ rgyal dbang blo dang shanti pas rtags @06a @#/ /yang dag tu bzhed do/ /zhes pa dang/ yang nya Tik las/ mkhas grub shanti pa yang/ rmongs pa la dpe dgos pas/ mnyan bya sgra mi rtag par sgrub pa'i rtags yang dag yin pa'i phyir/ mkhas pa rnams la ni/ gtan tshigs 'ba' zhig brjod par zad/ /ces pas bstan/ zhes nang gi khyad par bshad de/ legs sam snyam mo/ /zhes bshad/ shanti pas lugs de 'gog tshul ni/ mnyan bya sgra mi rtag par sgrub pa'i rtags dag ma yin par thal/ mnyan bya mi rtag pa tshad mas nges pa'i rjes su mnyan bya dang/ sgra'i ming don gyi 'brel ba tshad mas nges pa'i gang zag yin na/ sgra mi rtag par tshad mas nges pa'i gang zag yin dgos pa'i phyir/ kho na re/ mnyan bya sgra'i mtshan nyid ma yin par thal/ mnyan bya tshad mas nges pa'i gang zag yin na/ sgra tshad mas nges pa'i gang zag yin dgos ba'i phyir te/ mnyan bya mi rtag par tshad mas nges pa'i gang zag yin na/ sgra mi rtag par tshad mas nges pa'i gang zag yin dgos pa'i phyir te/ mnyan bya mi rtag par tshad mas nges shing/ mnyan bya dang sgra'i ming don gyi 'brel ba tshad mas nges pa'i gang zag yin na/ sgra mi rtag par tshad mas nges pa'i gang zag yin dgos pa'i phyir na ma khyab ste/ mnyan bya dang sgra'i ming don gyi 'brel ba tshad mas nges shing/ mnyan bya mi rtag par tshad mas nges pa'i gang zag yin na/ sgra mi rtag par tshad mas nges pa'i gang zag yin dgos par thal/ mnyan bya la mi rtag pas khyab pa tshad mas nges zhing/ mnyan bya dang sgra'i ming don gyi 'brel ba tshad mas nges nas/ sgra mi rtag par tshad mas ma nges pa'i gang zag med pa'i phyir te/ mnyan bya la mi rtag pas khyab pa tshad mas nges shing/ mnyan bya dang sgra'i ming don gyi 'brel ba tshad mas nges nas/ sgra mi rtag par rtogs dgos kyi gang zag med pa'i phyir te/ mnyan bya sgra'i mtshan nyid yin pa'i phyir/ 'di yi 'thad kyi thar lam gsal byed las/ dang por/ mnyan bya la mi rtag pas khyab pa nges/ de yi rjes su mnyan bya @06b sgra mi rtag par sgrub pa la phyogs chos can du song ba'i gang zag med par bstan no/ /gang dag mtshon bya la tha snyad byar rung nges par sbyar dgos par smra ba de dag ces sogs kyi don ni/ nya dpon sogs kha cig na re/ /shanti pa'i lugs de legs shing/ mtshon bya la tha snyad byar rung nges par sbyar dgos zer/ mnyan bya'i rtags kyis sgra'i tha snyad byar rung mi rtag par sgrub pa'i rtags yang dag yin par thal/ mnyan bya'i rtags kyis de sgrub kyi phyogs chos dang/ rjes khyab sngar nges/ de yang rjes khyab sngar nges zin ma brjed pa'i ngang nas/ mnyan bya sgra'i tha snyad byar rung mi rtag par sgrub pa'i bsgrub bya la dmigs pa'i the tshom can gyi phyogs chos rjes nas nges par byar rung ba'i phyir/ ma grub na song/ der thal/ mnyan bya'i rtags kyis sgra'i tha snyad byar rung/ mi rtag par sgrub pa'i phyogs chos tshad mas grub pa gang zhig /de'i rtags kyis de sgrub kyi rjes khyab tshad mas grub pa'i phyir/ dang po ma grub na/ sgra'i tha snyad byar rung chos can mnyan bya'i rtags kyis/ khyod mi rtag par sgrub pa'i phyogs chos tshad mas grub par thal/ khyod mnyan bya'i mtshon bya yin pa'i phyir/ yang na/ nya dpon gyis shanti pa'i lugs legs par bzhed pa dang/ mtshon bya la tha snyad byar rung nges par sbyar dgos/ zhes gsungs pa mi rigs te/ sgra'i tha snyad byar rung chos can/ mnyan bya khyod mi rtag par sgrub pa'i rtags yang dag yin par thal/ khyod mnyan bya'i mtshon bya yin pa'i phyir/ rtags khas/ ma khyab na/ mnyan bya sgra mi rtag par sgrub pa'i rtags yang dag yin par bud/ mang du thos pa'i shakya'i dge slong rje btsun chos kyi rgyal mtshan gyi gsung rgyun bzhugs so/ / ! bla ma dang rje btsun mkhyen pa'i gter gyi zhabs la gus pas 'dud do/ / thub bstan phyogs bcur dar ba'i 'phrin las kyis/ /ma lus 'gro ba'i dge legs spel ba la/ /mkhas khyod rin chen dbang gi rgyal po bzhin/ /rgyal tshab dam pa dar ma'i zhabs la 'dud/ /theg gsum lam la nges pa rab bskyed cing/ /skyabs gsum rigs pas sgrub byed @07a @#/ /thabs kyi mchog /tshul gsum gtan tshigs rnam gzhag rtogs dka' ba/ /rgyal tshab lugs bzhin bdag gis 'dir bshad bya/ /! gtan tshigs kyi ni tshul gsum la'ang zhes sogs kyi skabs su mtha' dpyad pa la gnyis las/ rjes su 'gro ldog gi khyab pa grub pa 'brel ba la ltos pa'i don bshad pa dang/ tshul gsum ngo bo gcig dang tha dad gang yin dpyad pa'o/ /dang po la dgag bzhag spong gsum las/ dang po ni/ kha cig thar lam gsal byed kyi dgongs par bsam nas/ byas pa mi rtag pa kho na la yod par tshad mas nges pa la/ rtag mi rtag dngos 'gal du nges pa'i tshad ma/ mtshan gzhi byas pa nges byed kyi tshad ma/ rtag pa la byas pa 'gog pa'i tshad ma gsum sngon du 'gro dgos zer na mi 'thad de/ byas na mi rtag pas khyab pa tshad mas nges pa la/ rtag na ma byas pas khyab pa tshad mas nges pa sngon du 'gro dgos par thal/ dam bca' 'thad pa'i phyir/ 'dod na/ byas na mi rtag pas khyab pa tshad mas nges pa'i gang zag yin na/ gcig shos tshad mas nges pa'i gang zag yin dgos par thal/ 'dod pa'i phyir/ 'dod na/ byas na rtag pa ma yin pas khyab pa tshad mas nges pa'i gang zag yin na/ gcig shos tshad mas nges pa'i gang zag yin dgos par thal/ 'dod pa'i phyir/ 'dod na/ rtag pa nam mkha'i rtag pa ma byas par sgrub pa'i rtags yang dag du thal/ rtag pa nam mkha' ma byas par sgrub pa'i rtags yang dag gang zhig /byas pa sgra'i byas pa mi rtag par sgrub pa'i rtags yang dag yin pa'i phyir/ dang po ma grub na/ nam mkha' rtag par tshad mas nges pa'i gang zag yin na/ de ma byas par tshad mas nges pa'i gang zag yin dgos par thal/ ma grub pa de'i phyir/ 'dod na/ chos de rtag par tshad mas nges pa'i gang zag yin na/ de ma byas par tshad mas nges pa'i gang zag yin dgos par thal/ 'dod pa'i phyir/ 'dod na/ don @07b byed nus stong gi rtags kyis rtag pa byas stong du sgrub pa'i phyir rgol yang dag chos can/ rtag pa ma byas par tshad mas grub pa'i gang zag du thal/ de rtag par tshad mas grub pa'i gang zag yin pa'i phyir rtags song/ rtag pa'i rtags kyis nam mkha'i rtag pa ma byas par sgrub pa'i phyir rgol yang dag chos can/ nam mkha' rtag pa yin na/ ma byas pa yin pas khyab pa tshad mas grub pa'i gang zag du thal/ byas pa yin na/ nam mkha'i rtag pa ma yin pas khyab pa tshad mas grub pa'i gang zag yin dgos pa'i phyir/ ma khyab na song/ khyab par thal/ byas na rtag pa ma yin pas khyab pa tshad mas grub pa'i gang zag yin na/ rtag na ma byas pas khyab pa tshad mas nges pa'i gang zag yin dgos pa'i phyir/ ma khyab na/ 'di la khyab pa yod pa ni/ tshul gsum ngo bo tha dad du 'dod pa'i lugs 'gog pa'i tshe/ Tikka las/ dngos po'i rtags kyis mnyan bya'i dngos po mi rtag par sgrub pa'i rjes khyab nges pa'i blo yin na/ bsgrub bya nges pa'i blo yin dgos par thal/ dngos po yin na mi rtag pa yin pas khyab pa nges pa'i blo yin na/ rtag na dngos med yin pas khyab pa nges pa'i blo yin dgos/ de yin na/ rtag na mnyan bya'i dngos po ma yin pas khyab pa nges pa'i blo yin dgos/ de yin na/ mnyan bya'i dngos po yin na/ mi rtag pa yin pas khyab pa nges pa'i blo yin dgos pa'i phyir/ zhes pa'i thal 'gyur 'dir brtag na shes par 'gyur ro/ /Tikkar/ thal 'gyur 'di 'phangs nas/ rtags snga phyi gnyis khas blangs dgos te/ zhes rtags dang po 'gro mtshams mdzad pa la yang legs par rtogs shig /gang gi blo gros lha lam rab yangs par/ /rigs lam rgyu skar bdag po 'di shar tshe/ /rgyal tshab dar ma'i bzhed gzhung kun da'i tshal/ /dogs pa'i 'dzum dkar ze'u 'bru bgod par mdzad/ /rtsa ba'i dam bca' la/ skad cig ma mi rtag pa kho na la yod par tshad mas nges pa la rtag mi rtag dngos 'gal du nges pa'i tshad ma/ skad cig ma nges byed @08a @#/ /kyi tshad ma rtag pa la skad cig ma 'gog byed kyi tshad ma gsum sngon du 'gro dgos par thal/ dam bca' 'thad pa'i phyir/ 'dod mi nus te/ rtag mi rtag dngos 'gal du tshad mas nges pa'i gang zag yin na/ mi rtag pa tshad mas nges pa'i gang zag yin dgos par thal/ de yin na skad cig ma mi rtag par tshad mas nges pa'i gang zag yin dgos/ de yin na/ skad cig ma mi rtag pa kho na la yod par tshad mas nges pa'i gang zag yin dgos pa'i phyir/ kho na re/ rtsa bar ma khyab ste/ skad cig ma'i rtags kyis sgra mi rtag par sgrub pa'i ldog khyab sgrub byed kyi rtags yang dag yod par thal/ byas pa'i rtags kyis de yod pa'i phyir/ khyab pa song/ 'dod mi nus te/ rtag pa skad cig ma ma yin par sgrub pa'i rtags yod pa'i phyir zer na rtsa bar ma khyab bo/ /yang kho na re/ skad cig ma mi rtag pa kho na la yod par tshad mas nges pa la/ tshad ma gsum sngon du 'gro dgos par d+hal/ de la rtag pa la skad cig ma 'gog pa'i tshad ma sngon du 'gro dgos pa'i phyir/ skad cig ma mi rtag pa kho na la yod par tshad mas nges pa'i gang zag yin na/ rtag pa skad cig ma ma yin par tshad mas nges pa'i gang zag yin dgos pa'i phyir na/ ma khyab bo/ /ma grub na der thal/ de yin na/ rtag pa tshad mas nges pa'i gang zag yin dgos/ de yin na/ rtag pa rtag par tshad mas nges pa'i gang zag yin dgos/ de yin na/ rtag pa chos dang skad cig ma ma yin pa'i gzhi mthun du tshad mas nges pa'i gang zag yin dgos pa'i phyir/ zer na/ skad cig ma mi rtag pa kho na la yod par tshad mas nges pa la/ mi rtag pa nges byed kyi tshad ma sngon du 'gro dgos par thal/ de de la yod par tshad mas nges pa'i gang zag yin na/ mi rtag pa tshad mas nges pa'i gang zag yin dgos pa'i phyir/ khyab pa ma khyab mtshams la song/ /'dod na bkag zin/ kho na re/ byas na mi rtag pas khyab pa tshad mas nges pa'i gang zag yin na/ rtag na ma byas pas khyab pa tshad mas nges pa'i gang zag yin dgos par @08b thal/ byas pa mi rtag pa kho na la yod par tshad mas nges pa'i gang zag yin na/ rtag pa byas stong du tshad mas grub pa'i gang zag yin dgos pa'i phyir/ der thal/ thar lam gsal byed las/ rtag pa byas stong du ma nges par byas pa mi rtag pa kho na la yod par mi nges pa ltar/ ltar snang tshul gsum dang mi ldan par ma nges par/ tshul gsum yang dag kho na la yod par mi nges so/ /zhes gsungs pa'i phyir/ zer na ma khyab ste/ byas pa rtag pa la med par ma nges par byas pa mi rtag pa kho na la yod par mi nges pa bzhin du/ tshul gsum ltar snang la med par ma nges par/ tshul gsum yang dag kho na la yod par mi nges zhes pa de'i don yin pa'i phyir/ gzhan yang/ tshul gsum rtags yang dag kho na la yod par tshad mas nges pa la/ tshul gsum nges byed kyi tshad ma/ rtags yang dag dang ltar snang dngos 'gal du nges byed kyi tshad ma/ rtags ltar snang la tshul gsum 'gog byed kyi tshad ma gsum sngon du 'gro dgos par thal/ rtsa ba'i dam bca' 'thad pa'i phyir/ 'dod mi nus te/ de gnyis dngos 'gal du tshad mas nges pa'i gang zag yin na/ rtags yang dag tshad mas nges pa'i gang zag yin dgos/ de yin na/ tshul gsum rtags yang dag tu tshad mas nges pa'i gang zag yin dgos/ de yin na/ rtags yang dag kho na la yod par tshad mas nges pa'i gang zag yin dgos pa'i phyir/ rtags rnams 'bud/ kho na re/ rtsa ba'i dam bca' 'thad par thal/ de nyid las/ byas pa mi rtag pa kho na la yod par nges pa la tshad ma gsum po de las mang mi dgos te/ zhes pa nas/ rtag pa la byas pa 'gog pa'i tshad ma'o/ /zhes gsungs pa'i phyir/ zer na ma khyab ste/ byas pa'i rtags kyis sgra mi rtag par sgrub pa'i rjes khyab tshad mas nges pa la tshad ma gsum sngon du 'gro dgos pa de'i don yin pa'i phyir/ /de nyid las/ sngar rjes khyab 'grub pa la tshad ma gsum @09a @#/ /dgos par bshad pa'i tha ma'o/ /zhes gsungs pa'i phyir/ yang kho na re/ byas pa de ltar nges pa la/ rtag pa byas stong du tshad mas nges pa sngon du 'gro dgos par thal/ byas pa de ltar nges pa'i gang zag yin na/ byas pa mi rtag pa la 'brel par tshad mas nges pa'i gang zag yin dgos/ byas pa mi rtag pa la 'brel par tshad mas nges pa la/ rtag pa byas stong du tshad mas nges pa sngon du 'gro dgos pa'i phyir/ dang po grub ste/ byas pa rang grub tsam nas 'jig nges su tshad mas nges pa'i gang zag yin na/ byas pa de ltar 'brel par tshad mas nges pa'i gang zag yin dgos pa'i phyir te/ byas pa chos can/ rang grub tsam nas 'jig nges yin te/ rang las phyis 'byung ba'i rang gi 'jig rgyu don gzhan la ltos med kyi dngos po yin pa'i phyir/ zhes pa'i sbyor ba de/ byas mi rtag gi 'brel ba'i rang ldog sgrub byed kyi rtags sbyor rnam dag yin pa'i phyir/ zer na ma khyab ste/ rtag pa byas stong du tshad mas nges pa'i gang zag yin na/ byas rtags kyis sgra mi rtag par sgrub pa'i ldog khyab tshad mas nges pa'i gang zag yin dgos par thal/ rtag pa chos can/ byas pas stong ste/ don byed nus pas stong pa'i phyir zhes pa'i sbyor ba 'di/ byas rtags kyis sgra mi rtag par sgrub pa'i ldog khyab sgrub byed kyi rtags sbyor rnam dag yin pa'i phyir/ 'khor gsum/ de bzhin du/ rjes khyab sgrub byed ltos med kyi rtags sogs la rigs 'gre nas/ 'khor gsum bya'o/ /gzhan yang/ rtag pa ma byas par tshad mas nges pa'i gang zag yin na/ rtag pa ma byas pa la 'brel bar tshad mas nges pa'i gang zag yin dgos par thal/ byas pa mi rtag par tshad mas nges pa'i gang zag yin na/ byas pa de la 'brel bar tshad mas nges pa'i gang zag yin dgos pa'i phyir/ rtags khas 'dod na/ ma byas pa ldog pa'i gzhi la/ rtag pa ldog par tshad mas nges nas/ rtag pa ma byas pa la 'brel bar tshad mas ma nges pa'i gang @09b zag chos can/ der thal/ de'i phyir/ ma grub na der thal/ byas pa mi rtag pa kho na la yod par tshad mas nges pa'i gang zag yin pa'i phyir/ khyab pa khas/ ma grub na/ der thal/ ma byas pa ldog pa'i gzhi las rtag pa ldog par tshad mas nges pa'i gang zag yin pa'i phyir/ rtsa ba'i dam bca' 'jog pa la/ kho na re/ byas pa de ltar yod par tshad mas nges pa la sngar bshad pa'i tshad ma gsum sngon du 'gro dgos/ rtag pa byas stong du rtogs pa'i rjes dpag gis byas pa mi rtag pa kho na la yod par rtogs zhes zer ba mi 'thad de/ Tikka las/ tshad ma'i 'jug tshul dang/ sgra'i brjod tshul mi 'dra ste/ sgras ni byas pa dngos su brjod nas rtag pa la de med par brjod pa nyid kyis de nyid rtag pa la med par rtogs par byed do/ /zhes rtag na ma byas pas khyab ces pa'i sgra des/ byas na mi rtag pas khyab pa brjod kyang/ rtag na ma byas pas khyab pa 'jal khyed kyi tshad ma des/ byas na mi rtag pas khyab pa ma rtogs par bshad pa'i phyir dang/ rnam nges dar Tik las/ rtag pa la byas pa med par ston pa'i sgra des/ byas pa rtag pa la med par ston yang rtag pa byas stong du rtogs pa'i tshad ma des/ byas pa rtag pa la med par rtogs nus pa ma yin pas/ gzhi byas pa dang tshogs nus pa yin no/ /zhes dang/ gnod pa can gyi rtags la brten pa'i rjes dpag 'dis/ sngar bshad pa'i 'brel ba'i don ldog gi phyogs gcig nges pa yin yang/ byas pa gzhir bzung nas rtag pa la med nges su rtogs pa ma yin te/ de'i rten gtan tshigs de byas pa la 'god tshul ltar ma grub pa'i phyir/ zhes bshad pa'i phyir/ kho na re/ rtag pa byas stong du rtogs pa'i rjes dpag des/ byas pa mi rtag par rtogs par thal/ des byas pa rtag pa ma yin par rtogs pa'i phyir te/ des byas pa dang rtag pa'i gzhi mthun mi srid par rtogs pa'i phyir/ des rtag pa dang byas pa'i gzhi mthun mi srid par rtogs pa'i phyir na ma khyab/ kha cig /byas pa mi @10a @#/ /rtag pa la 'jug par tshad mas nges pa la sngar bshad pa'i tshad ma gsum po sngon du 'gro dgos/ byas na mi rtag pas khyab pa tshad mas nges pa la/ rtag na ma byas pas khyab pa tshad mas nges pa sngon du 'gro mi dgos zer na/ de mi 'thad de/ phyi ma de dgos par thal/ byas na mi rtag pas khyab pa tshad mas grub pa'i gang zag yin na/ byas pa mi rtag pa kho na la 'jug par tshad mas nges pa'i gang zag yin dgos pa gang zhig /dam bca' 'thad pa'i phyir/ dang po ma grub na/ der thal/ de yin na/ byas pa mi rtag pa kho na la yod par tshad mas nges pa'i gang zag yin dgos pa'i phyir te/ de yin na/ byas pa mi rtag pa kho na yin par tshad mas nges pa'i gang zag yin dgos pa'i phyir/ de yin na/ de mi rtag par tshad mas nges pa'i gang zag yin dgos pa'i phyir/ kho na re/ byas na mi rtag pas khyab pa tshad mas nges pa'i gang zag yin na/ byas pa dang mi rtag pa'i gzhi mthun yod par tshad mas nges pa'i gang zag yin dgos par thal/ de yin na/ byas pa mi rtag pa kho na la yod par tshad mas nges pa'i gang zag yin dgos pa'i phyir/ rtags khas/ 'dod na/ byas pa dang mi rtag pa'i gzhi mthun yod par sgrub pa'i phyir rgol yang dag chos can/ der thal/ de'i phyir zer na/ mi 'thad de/ de 'dra ba'i phyi rgol yang dag chos can/ byas pa dang mi rtag pa'i gzhi mthun yod par tshad mas grub pa'i gang zag yin par thal/ byas pa dang rtag pa'i gzhi mthun med par tshad mas grub pa'i gang zag yin pa'i phyir/ ma grub na song/ der thal/ byas pa rtag pa ma yin par tshad mas grub pa'i gang zag yin pa'i phyir zer na/ rtsa bar ma khyab/ de chos can/ byas pa mi rtag pa kho na la yod par tshad mas grub pa'i gang zag du thal/ byas pa sgra mi rtag par sgrub pa'i mthun phyogs kho na la yod par tshad mas nges pa'i gang @10b zag yin pa'i phyir/ ma grub na/ der thal/ de byas pa sgra mi rtag par sgrub pa'i mi mthun phyogs la med pa kho nar tshad mas grub pa'i gang zag yin pa'i phyir te/ de byas pa rtag pa la med par tshad mas nges pa'i phyir te/ byas pa rtag pa la med par tshad mas nges pa'i gang zag yin pa'i phyir/ de thams cad kyi chos can khas blangs so/ rtsa bar 'dod na/ don gyi dngos 'gal lo/ gzhan yang/ byas rtags kyis sgra mi rtag par sgrub pa'i rjes khyab yod par sgrub pa'i rtags yang dag yod par thal/ byas pa mi rtag pa la yod par sgrub pa'i rtags yang dag yod pa'i phyir/ rtags song/ 'dod mi nus te/ de tshad mas grub pa'i gang zag yin na/ de yod par tshad mas grub pa'i gang zag yin dgos pa'i phyir te/ de tshad mas grub pa'i gang zag yin na/ de yin na yod pas khyab pa tshad mas grub pa'i gang zag yin dgos pa'i phyir te/ de yin na/ de byas rtags kyis sgra mi rtag par sgrub pa'i mthun phyogs kho na la yod par tshad mas nges pa'i gang zag yin dgos pa'i phyir te/ byas rtags kyis sgra mi rtag par sgrub pa'i mthun phyogs kho na la yod pa de/ byas rtags kyis sgra mi rtag par sgrub pa'i rjes khyab kyi mtshan nyid kyi zur gcig yin pa'i phyir/ gzhan yang/ byas na mi rtag pas khyab pa yod par sgrub pa'i rtags yang dag yod par thal/ byas rtags kyis sgra mi rtag par sgrub pa'i rjes khyab yod par sgrub pa'i rtags yang dag yod pa'i phyir/ rtags khas/ 'dod na/ byas na mi rtag pas khyab pa khas len pa'i gang zag des/ sgra chos can/ mi rtag par thal byas pa'i phyir zhes pa'i thal 'gyur la khyab med kyi lan btab pas/ dngos 'gal la mi 'gro bar thal/ byas na mi rtag pas khyab pa khas len pa'i gang zag yin na/ de 'dra'i thal 'gyur la khyab pa yod par khas len pa'i gang zag yin pas ma khyab pa'i phyir/ ma grub na song/ byas na mi rtag pas khyab pa yod par sgrub pa'i rtags yang dag med par thal/ byas na mi rtag pas @11a @#/ /khyab pa tshad mas nges pa'i gang zag yin na/ de yod par tshad mas nges pa'i gang zag yin dgos pa'i phyir/ ma grub na der thal/ de khas len pa'i gang zag yin na/ de yod par khas len pa'i gang zag yin dgos pa'i phyir te/ de yin na de 'dra'i thal 'gyur la khyab pa yod par khas len pa'i gang zag yin dgos pa'i phyir/ rtags khas/ gzhan yang/ tshad mas dmigs pa sgra mi rtag par sgrub pa'i rjes khyab yod par sgrub pa'i rtags yin par thal/ de yod par sgrub pa'i rtags yang dag yod pa'i phyir/ 'dod na/ sgra mi rtag par sgrub pa'i rtags yang dag de byas pa yod par sgrub pa'i rtags yang dag du thal/ 'dod pa'i phyir/ 'dod na/ de ma yin par thal/ byas pa sgra mi rtag par sgrub pa'i rtags yang dag du tshad mas grub pa'i gang zag yin na/ byas pa yod par tshad mas grub pa'i gang zag yin dgos pa'i phyir te/ de yin na/ des sgra'i steng du 'god tshul dang mthun par yod par tshad mas nges pa'i gang zag yin dgos/ de yin na/ byas pa yod par tshad mas nges pa'i gang zag yin dgos pa'i phyir/ ma grub na/ khas blangs/ sgra'i steng du 'god tshul dang mthun par yod par tshad mas nges pa'i gang zag yin na/ sgra'i steng du yod pa tshad mas nges pa'i gang zag yin dgos pa'i phyir/ rtags grub mtha' la khegs/ rtsa shes Tik chen las/ rang bzhin med pa yod par sgrub pa'i rtags yang dag med par gsungs pa bzhin du/ 'dir yang gang zag gi bdag med yod par sgrub pa'i rtags yang dag med par khas len dgos la/ de ltar na/ gang zag rtag cig rang dbang can gyis stong pa yod par sgrub pa'i rtags yang dag med dgos pas/ gang zag mi rtag pa yod par sgrub pa'i rtags yang dag dang/ byas pa mi rtag pa yod par sgrub pa'i rtags yang dag med ba'o/ /kho na re/ gang zag gi bdag med yod par sgrub pa'i rtags yang dag yod par thal/ gang zag gi @11b bdag 'dzin spangs pa'i spangs pa yod par sgrub pa'i rtags yang dag yod pa'i phyir/ thar pa yod par sgrub pa'i rtags yang dag yod pa'i phyir/ thams cad mkhyen pa yod par sgrub pa'i rtags yang dag yod pa'i phyir zer/ skyon med de/ thar pa sgrub byed kyi rtags yang dag dang/ thams cad mkhyen pa sgrub byed kyi rtags yang dag yod kyang/ thar pa dang thams cad mkhyen pa yod par sgrub pa'i rtags yang dag sogs khas mi len pa'i phyir/ de bzhin du/ skye ba snga phyi sgrub pa'i rtags yang dag yod kyang/ skye ba snga phyi yod par sgrub pa'i rtags yang dag med pa'i phyir te/ skye ba snga phyi tshad mas nges pa'i gang zag yin na/ de yod par tshad mas nges pa'i gang zag yin dgos pa'i phyir/ yang kho na re/ byas pa mi rtag pa kho na la tshad mas dmigs par tshad mas nges nas/ byas pa mi rtag pa kho na la yod par tshad mas ma nges pa'i gang zag chos can/ byas pa mi rtag pa kho na la yod par tshad mas nges pa'i gang zag du thal/ byas na mi rtag pas khyab pa tshad mas nges pa'i gang zag yin pa'i phyir/ khyab pa khas/ rtags grub ste/ de 'dra ba'i gang zag yod pa'i phyir te/ mi rtag pa kho na la yod par tshad mas dmigs pa de/ mi rtag pa kho na la yod pa'i mtshan nyid yin pa'i phyir te/ tshad mas dmigs pa yod pa'i mtshan nyid yin pa'i phyir zer na/ ma khyab ste/ tshad ma gsar du mi bslu ba'i rig pa yin pa tshad ma tshad ma yin pa'i mtshan nyid yin par thal/ gsar du mi bslu ba'i rig pa tshad ma'i mtshan nyid yin pa'i phyir khyab pa khas/ des mtshon nas/ rtags yang dag tshad mas dmigs pa rtags yang dag yod pa'i mtshan nyid sogs su khas mi len no/ /gzhan yang/ snga phyi gnyis ka la/ rtag pa ma byas pa kho na la 'jug pa tshad mas nges pa la/ byas pa la rtag pa 'gog pa'i tshad ma sngon du 'gro dgos par thal/ rtag pa nam mkha' ma byas par sgrub pa'i rtags yang dag gang zhig /byas pa mi rtag pa kho na la 'jug par tshad mas nges pa la/ rtag @12a @#/ /pa la byas pa 'gog byed kyi tshad ma sngon du 'gro dgos pa'i phyir/ rtag na ma byas pas khyab pa dang/ byas na mi rtag pas khyab pa gnyis rtogs pa phan tshun brten par thal ba'i skyon yod par thal/ 'dod pa gang zhig /byas pa mi rtag pa kho na la 'jug par tshad mas nges pa la/ rtag pa la byas pa 'gog byed kyi tshad ma sngon du 'gro dgos pa'i phyir/ rang lugs ni/ byas rtags kyis sgra mi rtag par sgrub pa'i rjes khyab tshad mas nges pa la tshad ma gsum sngon du 'gro dgos te/ rtag mi rtag dngos 'gal du nges pa'i tshad ma/ byas pa nges byed kyi tshad ma/ rtag pa la byas pa 'gog byed kyi tshad ma gsum sngon du 'gro dgos pa'i phyir/ kho na re/ de la byas pa tshad mas nges pa sngon du 'gro mi dgos te/ de tshad mas nges pa dang byas pa tshad mas nges pa dus mnyam yin pa'i phyir te/ de tshad mas dmigs pa dang byas pa tshad mas dmigs pa dus mnyam yin pa'i phyir/ de yod pa dang byas pa yod pa dus mnyam yin pa'i phyir/ khyab ste/ byas rtags kyis sgra mi rtag par sgrub pa'i rjes khyab yod pa dang/ de tshad mas dmigs pa dus mnyam/ byas pa yod pa dang byas pa tshad mas dmigs pa dus mnyam pa'i phyir/ zhes zer/ du ldan la la du ba tshad mas nges pa'i gang zag yin na/ du ldan la la me tshad mas nges pa'i gang zag yin dgos par thal/ du ba tshad mas nges pa'i gang zag yin na/ me tshad mas nges pa'i gang zag yin dgos pa'i phyir/ der thal/ du ba tshad mas nges pa la/ me tshad mas nges pa sngon du 'gro dgos pa'i phyir/ ma grub na song/ der thal/ du ba yod pa la me yod pa sngon du 'gro dgos pa'i phyir/ khyab pa khas/ ma grub na/ der thal/ du ba grub pa la me grub pa sngon du 'gro dgos pa'i phyir te/ du ba me'i 'bras bu yin pa'i phyir/ gzhan yang/ dus gsum gcig car du yod pa srid par thal/ dus gsum gcig car du tshad mas rtogs pa srid pa'i phyir/ khyab pa khas/ ma grub na/ der thal/ @12b sangs rgyas 'phags pas dus gsum gcig car du tshad mas rtogs pa'i phyir/ rtsa bar 'dod na/ me du gnyis gcig car du yod pa srid par thal/ me tshad mas nges pa la du ba tshad mas nges pa sngon du 'gro dgos pa'i phyir/ zer na/ me rnam mkhyen gyi rtogs pa la/ du ba rnam mkhyen gyis rtogs pa sngon du 'gro dgos par thal/ me tshad mas rtogs pa la/ du ba tshad mas rtogs pa sngon du 'gro dgos pa'i phyir/ rtags khas 'dod na/ me du gnyis rnam mkhyen gyis gcig car du ma rtogs par thal/ 'dod pa'i phyir/ kho na re/ me du gnyis rnam mkhyen gyis gcig car du rtogs par thal/ me du gnyis rnam mkhyen gyis gcig car du tshad mas rtogs pa'i phyir/ 'dod na/ de gnyis gcig car du tshad mas rtogs par thal/ 'dod pa'i phyir/ 'dod na/ de gnyis gcig car du yod par thal/ 'dod pa'i phyir/ zer na/ rtsa bar ma khyab/ kho na re/ me du gnyis gcig car du tshad mas rtogs par thal/ de gnyis gcig car du tshad mas rtogs pa yod pa'i phyir zer na ma khyab ste/ yang rtag mi rtag rnam bcad yongs gcod kyi sgo nas 'gal bar thal/ de gnyis dngos 'gal yin pa'i phyir/ rtags khas 'dod na/ chos de rtag pa yin pa rnam bcad la khegs pa'i tshad ma yin na/ chos de mi rtag pa yin pa yongs gcod la grub pa'i tshad ma yin dgos par thal/ 'dod pa'i phyir/ 'dod na/ tshad ma chos can/ ri bong rwa mi rtag pa yin pa yongs gcod la grub pa'i tshad ma yin par thal/ de rtag pa yin pa rnam bcad la khegs pa'i tshad ma yin pa'i phyir/ khyab pa khas zer na/ chos de mi rtag pa yin pa yongs gcod la grub pa'i tshad ma yin na/ chos de mi rtag pa ma yin pa rnam bcad la khegs pa'i tshad ma yin dgos par thal/ mi rtag pa dang mi rtag pa ma yin pa gnyis rnam bcad yongs gcod kyi sgo nas 'gal ba yin pa'i phyir/ 'dod na/ tshad ma bum pa dang bum med la sbyar nas 'khor gsum bya'o/ /kha cig /byas rtags kyis sgra mi @13a @#/ /rtag par sgrub pa'i rjes khyab tshad mas nges pa la byas rtags kyis de sgrub kyi dgag bya'i chos dang/ bsgrub bya'i chos dngos 'gal du nges pa'i tshad ma/ byas rtags kyis de sgrub kyi rtags kyi mtshan gzhi nges pa'i tshad ma/ byas rtags kyis de sgrub kyi rtags dang/ dgag bya'i chos kyi gzhi mthun 'gog byed kyi tshad ma gsum sngon du 'gro dgos zer na/ mi 'thad de/ yod na de'i dgag chos dang sgrub chos gang rung yin dgos pa'i phyir/ kha cig byas pa mi rtag pa kho na la yod par tshad mas nges pa la/ rtag mi rtag dngos 'gal du nges pa'i tshad ma byas pa nges byed kyi tshad ma/ byas pa la rtag pa 'gog byed kyi tshad ma gsum sngon du 'gro dgos zer na/ mi 'thad de/ byas pa rtag pa ma yin par tshad mas nges pa'i gang zag yin na/ byas pa mi rtag pa kho na la yod par tshad mas nges pa'i gang zag yin dgos pa'i phyir/ gnyis pa ni/ rtags yang dag gi rjes su 'gro ldog gi khyab pa tshad mas nges pa la/ rtags chos med na mi 'byung ba'i 'brel pa tshad mas nges pa la rag las te/ rang 'grel las/ 'brel ba med par ni rjes su 'gro ba dang ldog pa nges pa med de/ zhes gsungs pa'i phyir/ 'dod na/ rjes su 'gro ldog gi khyab pa'i don gang zhe na/ thar lam gsal byed las/ rjes su 'gro ldog gi khyab pa ni/ rtags kyi mtshan gzhi byas pa lta bu gzhir bzung nas/ de nyid mthun phyogs kho na la yod par nges pa dang/ mi mthun phyogs la med pa kho nar nges pa yin la zhes gsungs pa'i phyir/ 'di'i don ni/ sgra mi rtag par sgrub pa'i mthun phyogs kho na la yod par tshad mas nges pa'i sgra mi rtag par sgrub pa'i khyab pa'i tshul/ sgra mi rtag par sgrub pa'i rjes khyab kyi mtshan nyid/ de sgrub kyi mi mthun phyogs la rang nyid med par kho nar tshad mas nges pa'i de sgrub kyi khyab pa'i tshul/ de sgrub kyi ldog khyab kyi mtshan nyid/ byas rtags kyis de sgrub kyi rjes khyab tshad mas nges pa la/ rtag pa la byas pa 'gog pa'i tshad ma sngon du 'gro dgos te/ de @13b la byas mi rtag gi 'brel pa tshad mas nges pa sngon du 'gro dgos pa gang zhig /byas mi rtag gi 'brel ba tshad mas nges pa la/ rtag pa la byas pa 'gog pa'i tshad ma sngon du 'gro dgos pa'i phyir/ kho na re/ byas rtags kyis de tshad mas nges pa la/ de sngon du 'gro mi dgos par thal/ rtag pa byas stong du tshad mas nges pa'i gang zag yin na/ byas rtags kyis de sgrub kyi rjes khyab tshad mas nges pa'i gang zag yin dgos pa'i phyir te/ de yin na/ byas pa rtag stong du tshad mas nges pa'i gang zag yin dgos pa'i phyir zer na/ don byed nus stong chos can/ byas pa rtag stong du sgrub pa'i rtags yang dag yin par thal/ rtag pa byas stong du sgrub pa'i rtags yang dag yin pa'i phyir/ khyab pa song/ rtags sla/ 'di'i skabs kyi Tika'i don la/ kha cig /rtag pa byas stong du sgrub pa'i rtags yang dag yin na/ byas pa rtag stong du sgrub pa'i rtags yang dag yin dgos par thal/ rtag pa byas stong du rtogs pa'i rjes dpag yin na/ byas pa rtag stong du rtogs pa'i rjes dpag yin dgos pa'i phyir/ rtags song/ 'dod na/ don bye nus stong gi rtags kyis rtag pa byas stong du rtogs pa'i rjes dpag chos can/ der thal/ de'i phyir/ 'dod na/ de chos can/ khyod kyi rten du gyur pa'i byas pa rtag stong du sgrub pa'i rtags yang dag yod par thal/ 'dod pa'i phyir/ 'dod na/ don byed nus stong de byas pa rtag stong du sgrub pa'i rtags yang dag yin par thal/ 'dod pa'i phyir/ zhes gsungs shing/ kho rang gi lugs la byas pa mi rtag pa kho na la 'jug par tshad mas nges pa la/ rtag pa la byas pa 'gog pa'i tshad ma sngon du 'gro dgos zer ba dang/ kha cig /byas na mi rtag pas khyab pa tshad mas nges pa'i gang zag yin na/ rtag na ma byas pas khyab pa tshad mas nges pa'i gang zag yin dgos/ zhes khas blangs nas/ thal 'gyur de ltar 'phen pa mi 'thad de/ byas pa mi rtag pa kho na la 'jug pa sgrub pa'i rjes dpag yin na/ rtag @14a @#/ /pa byas stong du sgrub pa'i rjes dpag yin dgos par thal/ byas pa mi rtag pa kho na la 'jug pa rtogs pa'i rjes dpag yin na/ rtag pa byas stong du rtogs pa'i rjes dpag yin dgos pa'i phyir/ rtags khyab khas 'dod na/ byas pa mi rtag pa kho na la 'jug par rtogs pa'i rjes dpag chos can/ der thal/ de'i phyir/ 'dod na de chos can/ khyod kyi rten du gyur pa'i rtag pa byas stong du sgrub pa'i rtags yang dag yod par thal/ 'dod pa'i phyir/ 'dod na/ don byed nus stong de/ rtag pa byas stong du sgrub pa'i rtags yang dag yin par thal/ 'dod pa'i phyir/ 'khor gsum/ kha cig /rim dang cig car gyi don byed nus pas stong pa de/ rtag pa byas stong du sgrub pa'i rtags yang dag yin no zer na/ bum pa chos can/ byas pas stong par thal/ rim dang cig car gyi don byed nus pas stong pa'i phyir/ khyab pa khas/ der thal/ rim dang cig car gyi don byed nus pa ma yin pa'i phyir/ ma grub na/ de chos can/ cig car gyi don byed nus pa ma yin par thal/ rim can gyi don byed nus pa yin pa'i phyir/ rtags gsal khas/ rjes khyab sgrub byed ltos med kyi gtan tshigs la/ kha cig /byas pa chos can/ rang grub tsam nas 'jig nges yin te/ 'jig pa phyis 'byung gi rgyu don gzhan la ltos med yin pa'i phyir/ zhes pa lta bu'o zer na/ ri bong rwas gshags/ byas pa chos can/ rang grub tsam nas 'jig nges yin te/ phyis 'byung gi rgyu don gzhan la ltos med du 'jig pa'i phyir zer na/ de sgrub kyi rtags yang dag ma yin par thal/ byas pa 'jig par tshad mas nges pa'i gang zag yin na/ de rang grub tsam nas 'jig nges su tshad mas nges pa'i gang zag yin dgos pa'i phyir/ kha cig /byas pa chos can/ rang grub tsam nas 'jig pa dang/ rang chas su rjes su 'brel ba yin te/ skyes pa gang zhig rang bskyed byed las gzhan pa'i rgyus 'jig par mi bskyed pa'i phyir/ zhes zer/ 'jig pa chos can/ der thal/ de'i phyir/ @14b 'dod na/ 'jig pa dang 'brel bar thal/ 'dod pa'i phyir/ kha cig /byas pa chos can/ rang grub tsam nas 'jig pa'i ngo bor skyes pa yin te/ skyes pa gang zhig /rang bskyed byed las gzhan pa'i rgyus 'jig par mi bskyed pa'i phyir/ zhes zer na/ 'jig pa'i rgyu chos can/ der thal/ de'i phyir/ 'dod na/ 'jig pa dang ngo bo gcig yin par thal/ 'dod pa'i phyir/ yang mkhas pa kha cig /byas pa chos can/ rang grub tsam nas 'jig nges yin te/ skyes pa gang zhi /rang bskyed byed las gzhan pa'i rgyus 'jig par mi bskyed pa'i phyir/ zhes gsungs/ skyes pa de/ byas pa rang grub tsam nas 'jig nges su sgrub pa'i rtags yang dag yin par thal/ ltos med gyi sbyor ba de 'thad pa'i phyir/ 'dod na/ mnyan bya sgra mi rtag par sgrub pa'i rtags yang dag yin par thal/ 'dod pa'i phyir/ rtag pa chos can/ byas pas stong ste/ don byed nus pas stong pa'i phyir zhes pa'i sbyor ba de/ byas rtags kyis sgra mi rtag par sgrub pa'i ldog khyab sgrub byed kyi rtags sbyor rnam dag dang/ byas pa chos can/ rang grub tsam nas 'jig nges yin te/ rang las phyis 'byung ba'i rang gi 'jig rgyu don gzhan ltos med kyi dngos po yin pa'i phyir/ zhes pa'i rtags sbyor de/ byas rtags kyis sgra mi rtag par sgrub pa'i sgrub byed ltos med kyi rtags sbyor rnam dag yin/ byas pa la kha cig /rtag pa byas stong du rtogs pa'i rjes dpag des byas rtags kyis sgra mi rtag par sgrub pa'i ldog khyab rtogs par thal/ dam bca' dang po 'thad pa'i phyir/ 'dod mi nus te/ byas rtags kyis sgra mi rtag par sgrub pa'i ldog khyab rtogs pa la rtag pa byas stong du rtogs pa sngon du 'gro dgos pa'i phyir zer na/ ma khyab ste/ sgra mi rtag par rtogs pa'i rjes dpag des/ byas rtags kyis de sgrub kyi bsgrub bya yang dag rtogs par thal/ sgra chos can/ mi rtag ste/ byas pa'i phyir zhes pa'i sbyor ba de/ byas rtags kyis de sgrub kyi bsgrub bya sgrub byed kyi rtags sbyor rnam dag yin pa'i phyir/ rtags grub ste/ byas rtags kyis de sgrub kyi bsgrub bya sgrub byed kyi rtags sbyor rnam dag yod pa'i phyir/ rtsa bar 'dod @15a @#/ /na/ des de ma rtogs par thal/ sgra mi rtag par sgrub pa'i bsgrub bya rtogs pa la/ sgra mi rtag par tshad mas rtogs ba sngon du 'gro dgos pa'i phyir/ ma grub na/ sgra mi rtag par tshad mas nges pa'i gang zag yin na/ sgra mi rtag par sgrub pa'i sgrub bya yang dag tshad mas nges pa'i gang zag yin dgos par thal/ ma grub pa de'i phyir/ 'dod na/ 'og du 'gog go /kho na re/ sgra mi rtag par tshad mas nges nas/ de sgrub kyi bsgrub bya yang dag sgrub pa'i rtags yang dag 'god dgos kyi phyi rgol yang dag yod par thal/ sgra mi rtag par tshad mas rtogs pa'i gang zag yin na/ de sgrub kyi bsgrub bya yang dag tshad mas nges pa'i gang zag yin mi dgos pa'i phyir/ 'dod na/ sgra chos can/ mi rtag ste/ byas pa'i phyir zhes pa'i rtags sbyor rnam dag 'god dgos kyi phyi rgol yang dag yod par thal/ 'dod pa'i phyir zer na/ rtsa bar ma khyab bo/ /yang kha cig /rtag pa byas stong du sgrub pa'i rtags yang dag med par thal/ de tshad mas nges pa'i gang zag yin na/ de byas stong du tshad mas nges pa'i gang zag yin dgos pa'i phyir/ de yin na/ rtag pa rtag par tshad mas nges pa'i gang zag yin dgos/ de yin na de byas stong du tshad mas nges pa'i gang zag yin dgos pa'i phyir/ rtags khas 'dod na/ dngos po'i rtags kyis byas pa mi rtag par sgrub pa'i phyir rgol yang dag chos can/ mi rtag pa mi rtag par tshad mas nges pa'i gang zag yin par thal/ mi rtag pa tshad mas nges pa'i gang zag yin pa'i phyir/ 'dod na song/ de chos can/ byas pa mi rtag par tshad mas nges pa'i gang zag yin par thal/ byas pa dang mi rtag pa'i tshogs don tshad mas nges pa'i gang zag yin pa'i phyir der thal/ mi rtag pa dang byas pa'i tshogs don tshad mas nges pa'i gang zag yin pa'i phyir/ der thal/ mi rtag pa byas par tshad mas nges pa'i gang zag yin pa'i phyir/ der thal/ mi rtag pa mi rtag par tshad mas nges pa'i gang zag yin pa'i phyir/ 'khor @15b gsum/ de bzhin du/ dngos po'i rtags kyi byas pa mi rtag par sgrub pa'i phyi rgol yang dag chos can/ byas pa mi rtag par tshad mas nges pa'i gang zag tu thal/ byas rtags kyis sgra mi rtag par sgrub pa'i rjes khyab tshad mas nges pa'i gang zag yin pa'i phyir/ ma grub na song/ der thal/ byas rtags kyis de sgrub kyi ldog khyab tshad mas nges pa'i gang zag yin pa'i phyir te/ rtag pa la ma byas pas khyab pa tshad mas nges pa'i gang zag yin pa'i phyir te/ /rtag pa byas stong du tshad mas nges pa'i gang zag yin pa'i phyir te/ rtag pa tshad mas nges pa'i gang zag yin pa'i phyir/ khyab pa khas/ gzhan yang/ mi rtag pa ldog stobs kyis byas pa ldog par tshad mas nges nas/ byas pa mi rtag pa la 'brel bar tshad mas ma nges pa'i gang zag chos can/ byas pa de la 'brel bar tshad mas nges pa'i gang zag du thal/ byas rtags kyis de sgrub kyi rjes khyab tshad mas nges pa'i gang zag yin pa'i phyir/ ma grub na der thal/ byas pa'i rtags kyis de sgrub kyi ldog khyab tshad mas nges pa'i gang zag yin pa'i phyir/ rtag na ma byas pas khyab pa tshad mas nges pa'i gang zag yin pa'i phyir/ khyab pa khas ma grub na/ der thal/ mi rtag pa ldog stobs kyis byas pa ldog par tshad mas nges pa'i gang zag yin pa'i phyir/ gzhan yang/ rtag na ma byas pas khyab pa tshad mas nges pa'i gang zag yin na/ byas na mi rtag pas khyab pa tshad mas nges pa'i gang zag yin dgos par thal/ de yin na byas rtags kyis de sgrub kyi ldog khyab tshad mas nges pa'i gang zag yin dgos/ de yin na/ byas rtags kyis de sgrub kyi rjes khyab tshad mas nges pa'i gang zag yin dgos/ de yin na/ byas na mi rtag pas khyab pa tshad mas nges pa'i gang zag yin dgos pa'i phyir/ dang po khas/ 'dod na/ byas pa'i rtags kyis sgra'i byas pa mi rtag par sgrub pa'i phyi rgol yang dag chos can/ sgra'i byas pa yin na/ mi rtag pa yin pas khyab pa tshad mas nges pa'i gang zag yin par thal/ rtag na sgra'i @16a @#/ /byas pa ma yin pas khyab pa tshad mas nges pa'i gang zag yin pa'i phyir/ khyab pa song/ de rnams kyi lan la/ kha cig /byas rtags kyis sgra mi rtag par sgrub pa'i ldog khyab tshad mas grub pa'i gang zag yin na/ byas rtags kyis de sgrub kyi rjes khyab tshad mas grub pa'i gang zag yin mi dgos/ zhes zer ba mi 'thad de/ de tshad mas nges nas/ gcig shos tshad mas ma nges pa'i gang zag chos can/ khyod byas pa de sgrub kyi mi mthun phyogs la med pa kho nar tshad mas nges pa'i gang zag yin par thal/ byas rtags kyis de sgrub kyi ldog khyab tshad mas nges pa'i gang zag yin pa'i phyir/ rtags chos can dang bcas pa khas blangs/ 'dod na/ de chos can/ byas pa rtag pa la med par tshad mas nges pa'i gang zag yin par thal lo/ /'dod na/ byas na rtag pa ma yin pas khyab pa tshad mas nges pa'i gang zag du thal lo/ 'dod na/ byas na mi rtag pas khyab pa tshad mas nges pa'i gang zag yin par thal lo/ /'dod na byas rtags kyis de sgrub kyi rjes khyab tshad mas nges pa'i gang zag yin par thal/ 'dod pa'i phyir/ 'khor gsum/ smra rgyus phongs pa kha cig /byas rtags kyis de sgrub kyi rjes khyab tshad mas grub pa'i gang zag yin na/ byas mi rtag gi 'brel pa tshad mas nges pa'i gang zag yin mi dgos zer ba mi 'thad de/ rang 'grel las/ 'brel ba med par ni/ zhes sogs gsung ba dang dngos su 'gal ba'i phyir/ kho na re/ byas pa byas rtags kyis sgra mi rtag par sgrub pa'i rjes khyab du tshad mas nges pa la/ byas mi rtag pa'i 'brel ba nges dgos pa de/ lung de'i don yin zer ba mi 'thad de/ byas rtags kyis sgra mi rtag par sgrub pa'i ldog khyab tshad mas des nas/ byas pa byas rtags kyis de sgrub kyi ldog khyab du tshad mas ma nges pa'i gang zag chos can/ byas pa dang gcig du gyur pa'i byas rtags kyis sgra mi rtag par sgrub pa'i ldog khyab tshad mas nges pa'i gang zag du thal/ byas rtags kyis de sgrub kyi ldog @16b khyab tshad mas nges pa'i gang zag yin pa'i phyir/ khyab ste/ byas rtags kyis de sgrub kyi ldog khyab yin na/ byas pa dang gcig yin dgos pa'i phyir/ 'dod na/ de chos can/ byas pa dang gcig yang yin/ byas rtags kyis de sgrub kyi ldog khyab yang yin pa'i gzhi mthun rtogs pa'i gang zag du thal/ 'dod pa'i phyir/ 'dod na/ de chos can/ byas pa byas rtags kyis de sgrub kyi ldog khyab du rtogs pa'i gang zag du thal/ 'dod pa'i phyir/ gzhan yang/ de chos can/ der thal/ byas rtags kyis de sgrub kyi ldog khyab rtogs pa'i gang zag gang zhig /khyod byas pa byas rtags kyis de sgrub kyi mi mthun phyogs mtha' dag la med par tshad mas nges pa'i gang zag yin pa'i phyir/ phyi ma der thal/ byas rtags kyis de sgrub kyi ldog khyab tshad mas grub pa'i gang zag yin pa'i phyir/ ma khyab na/ byas rtags kyis de sgrub kyi ldog khyab tshad mas nges pa la/ byas pa de sgrub kyi mi mthun phyogs mtha' dag la med par nges pa la mi ltos par thal/ ma khyab pa de'i phyir/ 'dod na/ rtags mi mthun phyogs la ma mthong tsam gyi ldog khyab 'grub par 'dod pa'i gzhung tshugs rigs par thal lo/ /gzhan yang/ de 'dra'i gang zag chos can/ khyod byas pa'i steng du byas rtags kyis sgra mi rtag par sgrub pa'i ldog khyab tshad mas nges pa'i gang zag du thal/ khyod de'i steng du rtag na ma byas pas khyab pa tshad mas nges pa'i gang zag yin pa'i phyir ma khyab na/ byas pa byas rtags kyis de sgrub kyi ldog khyab gtan la 'bebs pa'i gzhi yin par thal/ rtag na ma byas pas khyab pa tshad mas nges pa'i gang zag yin na/ de'i rtags kyis de sgrub kyi ldog khyab tshad mas nges pa'i gang zag yin dgos/ byas pa'i steng du de tshad mas nges pa'i gang zag yin na/ de'i steng du de'i rtags kyis de sgrub kyi ldog khyab tshad mas nges pa'i gang zag yin pas ma khyab pa'i phyir/ rtags rnams rim bzhin khas/ rtsa ba'i dam bca' la skyon gzhan yang/ mdo rtsa bar/ rjes dpag bya dang de mtshungs @17a @#/ /la/ /yod dang med nyid la med pa zhes gsungs pa mi 'thad par thal/ sgra mi rtag par sgrub pa'i phyogs chos kyi mtshan nyid 'chad pa'i tshig zur du/ sgra'i steng du 'god tshul dang mthun par yod pa nyid du tshad mas nges pa zhes smos mi rigs pa'i phyir/ ma grub na/ der thal/ sgra'i steng du 'god tshul dang mthun par yod pa nyid du tshad mas nges pa'i gang zag yin na/ de sgrub kyi phyogs chos tshad mas nges pa'i gang zag yin dgos pa'i phyir te/ sgra tshad mas nges pa'i gang zag yin na/ sgra mnyan byar tshad mas nges pa'i gang zag yin dgos/ de yin na sgra mi rtag par sgrub pa'i phyogs chos tshad mas nges pa'i gang zag yin dgos pa'i phyir/ de yin na/ sgra mnyan byar tshad mas nges pa'i gang zag yin dgos/ de yin na/ de sgrub kyi phyogs chos tshad mas nges pa'i gang zag yin dgos pa'i phyir/ phyi ma ma grub na song/ der thal/ de yin na/ mnyan bya'i rtags kyis de sgrub kyi phyogs chos tshad mas nges pa'i gang zag yin dgos pa'i phyir/ sgra byas par tshad mas nges pa'i gang zag yin na/ byas rtags kyis sgra mi rtag par sgrub pa'i phyogs chos tshad mas nges pa'i gang zag yin dgos pa'i phyir/ rtags khas/ Tik las/ rtag pa byas stong du rtogs pa'i gnod pa can gyi rjes dpag des/ rtag pa'i bsal ba'i dbye ba mtha' dag la byas stong gi khyab pa nges sam ma nges/ zhes sogs kyi don la/ kha cig /byas rtags kyis sgra mi rtag par sgrub pa'i phyir rgol yang dag des/ rtag pa'i bsal ba'i dbye ba mtha' dag la byas stong gi khyab pa ma nges zhes zer zhing/ de bzhin nu/ des byas pa thams cad mi rtag par ma nges zer/ de 'dra'i gang zag de/ byas pa'i khyad par 'ga' zhig dang rtag pa'i gzhi mthun yod par dogs pa'i gang zag yin par thal/ des byas pa thams cad mi rtag par ma nges pa'i phyir/ 'dod na/ @17b de chos can/ byas pa dang rtag pa'i gzhi mthun yod par dogs pa'i gang zag yin par thal/ 'dod pa'i phyir/ 'dod mi nus te/ de 'dra'i gzhi mthun med par tshad mas nges pa'i gang zag yin pa'i phyir/ kho na re/ de chos can/ byas pa'i khyad par 'ga' zhig dang rtag pa'i gzhi mthun yod par dogs pa'i gang zag yin par thal/ sgra'i byas pa dang rtag pa'i gzhi mthun yod par dogs pa'i gang zag yin pa'i phyir/ zer na ma khyab/ gzhan yang/ de 'dra'i gang zag des/ byas pa thams cad mi rtag par tshad mas nges par thal/ byas pa thams cad ni mi rtag ste/ dper na bum pa bzhin/ sgra yang byas zhes pa'i sgrub ngag des/ byas rtags kyis sgra mi rtag par sgrub pa'i sgrub ngag yang dag yin pa'i phyir te/ gang skye 'jig can thams cad ni mi rtag ste/ dper na bum pa bzhin/ sgra yang skye 'jig can yin no zhes sgrub ngag des/ skye ba can gyi rtags kyis de sgrub kyi sgrub ngag yang dag yin pa'i phyir te/ cung zad skye ba bdag nyid can/ /gang de thams cad 'gag chos can/ /zhes sogs rnam pa du mar ni/ 'di'i sbyor ba'ang mthong phyir dang/ /zhes gsungs pa'i phyir/ kho na re/ byas pa thams cad sgra mi rtag par sgrub pa'i rtags yang dag yin par thal/ de 'dra'i sgrub ngag de sgrub ngag yang dag yin pa'i phyir/ zer na/ ma khyab/ 'di'i lan la mkhas pa kha cig /'dod de sgra de byas pa thams cad yin pa'i phyir te; de shes bya thams cad yin pa'i phyir/ shes bya thams cad sgra'i spyi yin pa'i phyir te/ spyi ni khyad par mi spong phyir/ /zhes gsungs pa'i phyir na mi 'thad de/ gzhung des/ thams cad kyi khongs su 'dus pa sgri'i spyi'i yin par bstan pa yin/ bo na re/ de 'dra'i phyir rgol yang dag chos can/ sgra'i byas pa mi rtag par tshad mas nges pa'i gang zag yin par thal/ byas pa thams cad mi rtag par tshad mas nges pa'i gang zag yin pa'i phyir/ khyab ste/ rtag pa byas pa thams cad kyi stong pa rtogs pa'i gang zag yin @18a @#/ /na/ rtag pa sgra'i byas pas stong par tshad mas nges pa'i gang zag yin dgos pa'i phyir/ zer na ma grub bo/ /Tikka las/ rjes khyab 'jal ba'i tshad mas sgrub bya la sgro 'dogs chod par 'gyur ro zhe na/ 'dod pa kho na'o/ /zhes gsungs pa'i don la kha cig /byas na mi rtag pas khyab pa 'jal ba'i tshad mas sgra rtag 'dzin gyi sgro 'dogs chod/ zer na/ byas na mi rtag pas khyab pa tshad mas nges pa'i gang zag yin na/ sgra rtag 'dzin gyi sgro 'dogs chod pa'i gang zag yin dgos par thal/ dam bca' 'thad pa'i phyir/ 'dod na/ sgra chos can/ ma byas par thal/ rtag pa'i phyir zhes pa'i thal 'gyur sgrub byed 'phen pa'i thal 'gyur yang dag du song ba'i rgol ba chos can/ der thal/ de'i phyir/ rtags ma grub na/ mdo'i rang 'grel las/ brjod pa gang zhig gnyis ka la nges pa kho na sgrub pa'am sun 'byin pa yin gyi/ gang yang rung ba la ma grub pa dang the tshom za ba ni ma yin te/ zhes gsungs pa'i phyir/ 'dod mi nus te/ sgra rtag par bden zhen gyi 'dod pa'i gang zag yin pa'i phyir/ de bzhin du/ kha cig /byas rtags kyis de sgrub kyi rjes khyab 'jal ba'i tshad mas sgra la rtag 'dzin gyi sgro 'dogs chod zer na/ sngar bshad pa'i rigs pas mtshon/ rang lugs lung de'i don ni/ byas rtags kyis de sgrub kyi phyir rgol yang dag gi rgyud kyi byas rtags kyis de sgrub kyi rjes khyab 'jal ba'i tshad mas sgra la rtag 'dzin kyi sgro 'dogs chod pa yin byas pa la kho na re/ byas rtags kyis sgra mi rtag rtogs kyi rjes dpag des sgra rtag 'dzin gyi sgro 'dogs gsar du mi chod par thal/ dam bca' 'thad pa'i phyir/ 'dod na/ de sgra rtag pa ma yin pa la gsar du mi bslu ba'i rig pa ma yin par thal/ 'dod pa'i phyir/ zer na/ 'dir ma khyab ste/ byas rtags kyis de sgrub kyi phyir rgol yang dag gi rgyud kyi de 'dra'i tshad mas de 'dra'i sgro 'dogs chod par thal de 'dra'i phyir rgol yang dag des/ de 'dra'i sgro 'dogs chod pa'i phyir/ ma grub na/ de chos can/ @18b der thal/ khyod kyi de kun btags chod pa gang zhig /de kun btags chod pa'i so skyes yod pa'i phyir/ dang po ma grub na/ der thal/ sgra chos can/ ma byas par thal/ rtag pa'i phyir zhes pa'i thal 'gyur 'phangs pa'i byed las rang rgyud la rdzogs par grub pa'i gang zag yin pa'i phyir/ kho na re/ sgra la de 'dra'i sgro 'dogs chod na/ de la de 'dra'i lhan skyes chod dgos par thal/ sgra mi rtag rtogs kyis rjes dpag rgyud ldan gyi tshur mthong des/ de la de 'dra'i sgro 'dogs ma chod pa'i phyir/ ma grub na/ de chos can/ khyod kyi rgyud la de med par thal/ khyod kyi rgyud la de chod pa'i phyir zhes zer na ma khyab/ 'dod mi nus te/ khyod kyi rgyud la sgra rtag 'dzin gyi sgro 'dogs lhan skyes yod pa'i phyir te/ chos can de dang gcig yin pa'i phyir/ zer na/ sgra rtag 'dzin gyi sgro 'dogs la gnod byed yin na/ de lhan skyes la gnod byed yin dgos par thal/ de 'dra'i sgro 'dogs chod na/ de lhan skyes chod dgos pa'i phyir/ rtags khas/ 'dod na/ sgra mi rtag rtogs kyi rjes dpag chos can/ der thal/ de'i phyir/ rtags grub ste/ gang zag gi bdag med rtogs pa'i shes rab kyi gang zag gi bdag 'dzin la gnod pa'i phyir te/ de'i gnod byed ni/ bdag med mthong bas 'gal ba yin/ zhes gsungs pa'i phyir/ 'dod na/ snying po brgyan las/ dper na sgra mi rtag rtogs pa'i rjes dpag tshad mas sgra rtag 'dzin lhan skyes kyi zhen yul med par rtogs kyang/ kun btags mngon gyur la gnod kyi lhan skyer mi gnod pa bzhin no zhes dang Tikka las/ rjes dpag gis sgra rtag 'dzin lhan skyes kyi zhen yul rnam par bcad pa des kyang/ lhan skyes mngon gyur pa 'joms mi nus kyi/ byed pa'i 'du byed ma nyams na kun btags mngon gyur skye ba'i go skabs bcom pas/ de la dngos su gnod pa yin no/ /zhes gsungs pa mi 'thad par thal/ 'dod pa de'i phyir/ kha cig /sgra mi rtag rtogs kyis rjes dpag tshad mas byed pa ma nyams par yod pa'i gang zag gi rgyud la sgra rtag 'dzin gyi sgro @19a @#/ /'dogs mngon gyur du skye ba mi srid par thal/ sgra mi rtag rtogs gyi rjes dpag des sgra rtag 'dzin gyi sgro 'dogs la gnod pa'i phyir/ khyab ste/ Tikka las/ gnod bya gnod byed 'gyur ba'i tshul ni/ tshad ma de'i byed pa ma nyams kyi bar la dngos kyi gnod bya sgro 'dogs mngon gyur skye ba'i go skabs bcom pa yin gyi zhes gsungs pa'i phyir/ zer na/ ma khyab ste/ sgra mi rtag rtogs kyis rjes dpag tshad ma'i byed pa ma nyams par yod na sgra rtag 'dzin gyi sgro 'dogs kun btags mngon gyur ba skye ba'i go skabs bcom pa sgra mi rtag rtogs kyi rjes dpag gis sgra rtag 'dzin gyi sgro 'dogs la gnod pa'i don yin pa/ lung de'i don yin pa'i phyir/ yang Tikka las/ byas rtags kyis sgra mi rtag par sgrub pa'i phyir rgol yang dag gi rgyud kyi byas rtags kyis sgra mi rtag par sgrub pa'i rjes khyab 'jal ba'i tshad mas sgra la rtag 'dzin gyi sgro 'dogs chod par bshad kyang/ rtsa shes Tikka chen dang/ snying po brgyan las de'i rgyud kyi de skor gyi rjes khyab 'jal ba'i tshad mas de la gtan tshigs kyis sgro 'dogs mchod par bshad pa yin te/ rtsa she'i Tik chen las/ 'di dper brjod na/ sgra mi rtag par sgrub pa'i tshul gsum 'jal ba'i tshad ma skyes pa na bar du tshad ma gzhan rgyud la mi ltos par sgra rtag 'dzin gyi sgro 'dogs dang/ 'dzin stangs dngos su 'gal ba'i blo skyed nus kyang/ sgra mi rtag pa tshad ma snga ma'i shugs la grub pa dang/ sgra rtag 'dzin gyi sgro 'dogs tshad ma snga mas bcad pa min pa bzhin/ zhes dang/ snying po brgyan las/ rigs pa'i rnam bzhag la ma byang ba kha cig /yod na gcig dang du ma gang rung du yod par nges pa'i tshad ma des/ bden par yod na bden pa'i gcig dang bden pa'i du ma gang rung gis ma khyab par 'dzin pa'i sgro 'dogs chod pa yin no zhes zer na/ de ltar na byas na mi rtag pas khyab pa nges pa'i tshad ma des/ sgra byas na sgra mi rtag pas ma khyab par 'dzin pa'i sgro 'dogs gcod dgos pas/ @19b rtags de la rten pa'i rjes dpag gis sgro 'dogs gsar du mi gcod par 'gyur ro/ /zhes gsungs/ rang lugs re zhig thar lam gsal byed kyi rjes su 'brang ngo/ /kho na re sgra mi rtag rtogs kyi rjes dpag chos can/ bcad shes yin par thal/ rang 'dren byed kyi tshad ma snga mas sgro 'dogs bcad zin ma nyams pa'i don de la sgro 'dogs bcad pa'i shes pa yin pa'i phyir/ zer na ma khyab ste/ rang gi gzhal bya rtogs zen rtogs pa'i blo yin na/ bcad shes su 'gyur gyi rang gi gzhal bya la sgro 'dogs bcad yin gyi don bcod pa'i shes pa tsam yin pas/ bcad shes su mi 'gyur ro/ /kho na re/ byas rtags kyis sgra mi rtag par sgrub pa'i phyir rgol yang dag gi rgyud kyi byas rtags kyis sgra mi rtag par sgrub pa'i tshul gsum 'jal ba'i tshad ma des/ sgra rtag stong du rtogs par thal/ de sgra la blo kha phyogs/ des sgra rtag 'dzin gyi sgro 'dogs chod pa'i phyir/ phyi ma khas/ dang po grub ste/ de'i rgyud kyi de skor gyi phyogs chos 'jal ba'i tshad ma sgra la blo kha phyogs pa'i phyir zer na/ rtsa bar ma khyab/ sgra rtag stong du rtogs pa la sgra de rtag pas stong pa'i khyad par gyi gzhi chos can gyi tshul gyi blo kha phyogs dgos pa gang zhig /de'i rgyud kyi byas rtags kyis de sgrub kyi tshul gsum 'jal ba'i tshad ma des/ sgra de rtag pas stong ba'i khyad par gyi gzhi chos can tshul gyi blo kha phyogs pa ma yin pa'i phyir/ kho na re/ Tikka las/ yang sgro 'dogs chos pa yin gyi rjes dpag ma skyes so zhes khas len dgos par 'gyur ro/ /lugs de la rjes dpag gis 'dzin stangs cung zad kyang ma rnyed pa'i phyir zhes gsungs pa mi 'thad de/ blo des sgra la rtag 'dzin gyi sgro 'dogs chod na blo des sgra mi rtag par rtogs mi dgos pa'i phyir/ zer na/ ma khyab ste/ blo des sgra de rtag stong gi khyad gzhi'i tshul du blo kha phyogs pa'i sgo nas sgra rtag 'dzin gyi sgo 'dogs chod na/ des sgra mi rtag par rtogs dgos pa de'i don yin pa'i phyir/ yang rtag pa byas stong du rtogs pa'i tshad mas nges su 'grol ldog gi khyab pa ji ltar nges @20a @#/ /soms shig /zhes pa'i don la kha cig /byas pa rtag stong du rtogs pa'i rjes dpag gis byas rtags kyis sgra mi rtag par sgrub pa'i ldog khyab rtogs zer ba dang/ kha cig /byas rtags kyis sgra mi rtag par sgrub pa'i phyir rgol yang dag gi rgyud kyi rtag pas byas stong du rtogs pa'i rjes dpag gis byas rtags kyis sgra mi rtag par sgrub pa'i ldog khyab rtogs zer ba gnyis ka mi 'thad de/ de'i rgyud kyi de 'dra'i rjes dpag des byas pa rtag stong du rtogs par thal/ dam bca' phyi ma 'thad pa'i phyir/ 'dod na/ de'i rgyud kyi rtag pa byas stong du rtogs pa'i rjes dpag des/ sgra'i byas pa rtag stong du rtogs par thal/ 'dod pa'i phyir/ 'di la khyab pa yod pa ni/ Tikka'i dgongs pa'o/ /'dod na/ de 'dra'i phyir rgol yang dag des sgra'i byas pa rtag stong du rtogs par thal/ 'dod pa'i phyir/ 'dis dam bca' snga ma yang khegs so/ /kho na re/ des byas rtags kyis sgra mi rtag par sgrub pa'i ldog khyab rtogs par thal/ de byas rtags kyis sgra mi rtag par sgrub pa'i ldog khyab 'jal ba'i rtags 'dzin sems yin pa'i phyir/ 'thad ldan las/ rtags mi 'khrul par 'dzin pa ni rnam pa gnyis te/ gcig ni rtsod gzhi la mi rtag pas khyab pa spyir sun 'byin pa yin la zhes gsungs pa'i phyir/ zer na ma khyab/ kha cig na re/ rtag pa byas stong du tshad mas nges pa'i gang zag yin na/ rtag pa byas pa'i gsal ba'i dbye ba mtha' dag gis stong par tshad mas nges pa'i gang zag yin pas khyab zer na/ de khyab par thal/ byas pa rtag stong du tshad mas nges pa'i gang zag yin na/ byas pa rtag pa'i gsal ba'i dbye ba mtha' dag gis stong par tshad mas nges pa'i gang zag yin dgos pa'i phyir/ ma grub na/ der thal/ byas rtags kyis sgra mi rtag par sgrub pa'i phyir rgol yang dag des/ byas pa rtag pa'i gsal ba'i dbye ba mtha' dag gis stong par rtogs pa'i phyir/ ma grub na/ de 'dra'i phyi rgol yang dag de/ rtag pa'i gsal @20b pa'i dbye ba 'ga' zhig byas pa la 'jug par dogs pa'i gang zag yin par thal/ ma grub pa de'i phyir/ 'dod na/ des rtag pa dang byas pa'i gzhi mthun yod par dogs par thal lo/ /'dod mi nus te/ de rtag pa dang byas pa'i gzhi mthun med par tshad mas nges pa'i phyir/ kho na re/ de 'dra'i phyi rgol chos can/ khyod byas pa sgra'i rtag stong du tshad mas nges pa'i gang zag yin par thal/ byas pa rtag pa'i gsal ba'i dbye ba mtha' dag gi stong par tshad mas nges pa'i gang zag yin pa'i phyir/ 'dod na/ sgra'i rtag stong tshad mas nges pa'i gang zag yin par thal/ 'dod pa'i phyir zer na ma khyab ste/ de 'dra'i gang zag des byas pa'i steng du sgra'i rtag ston tshad mas nges kyang/ sgra khyad gzhir bzung ba'i rtag stong tshad mas ma nges so/ /gzhan yang sgra rtag pa thams cad kyis stong bar tshad mas nges pa'i gang zag yin na/ rtag pa thams cad tshad mas nges pa'i gang zag yin dgos par thal/ byas pa rtag stong du tshad mas nges pa'i gang zag yin na/ de rtag pa thams cad kyis stong par tshad mas nges pa'i gang zag yin mi dgos pa'i phyir/ rtags khas/ 'dod na/ byas pa sgra mi rtag par sgrub pa'i mi mthun phyogs mtha' dag la med par tshad mas nges pa'i gang zag yin na/ de sgrub kyi mi mthun phyogs mtha' dag tshad mas nges pa'i gang zag yin dgos par thal/ 'dod pa'i phyir/ 'dod na/ rtag mi mthun phyogs la ma mthong tsam gyi ldog khyab sgrub par 'dod pa'i gzhung 'dzugs rigs par thal/ 'dod pa'i phyir/ gzhan yang/ shing du gyur pa'i sha ba de/ sha sgur skyug po shing du sgrub pa'i rtags yang dag du khas blangs pa la nyes pa ci yod byas pas/ gzhi de shing du gyur pa'i sha bar tshad mas nges pa'i gang zag yin na/ gzhi de shing du tshad mas nges pa'i gang zag yin dgos pa'i phyir/ zer na/ gzhi de shing med du tshad mas nges pa'i gang zag yin na/ gzhi de shing sha ba med par tshad mas nges pa'i gang zag yin dgos par @21a @#/ /thal/ gzhi de shing du gyur pa'i sha bar tshad mas nges pa'i gang zag yin na/ gzhi de shing du tshad mas nges pa'i gang zag yin dgos pa'i phyir/ kho rang gi gnod byed de 'thad pa'i phyir/ 'dod na/ sgra yang yin/ rtag pa yang yin pa'i gzhi mthun mi srid par tshad mas nges pa'i gang zag yin na/ sgra yang yin/ shar na yod pa'i rtag pa yang yin pa'i gzhi mthun mi srid par tshad mas nges pa'i gang zag yin dgos par thal/ 'dod pa'i phyir/ 'dod na/ sgra rtag stong du tshad mas nges pa'i gang zag yin na/ sgra shar na yod pa'i rtag stong du tshad mas nges pa'i gang zag yin dgos par thal/ 'dod pa'i phyir/ 'dod na/ byas pa rtag stong du tshad mas nges pa'i gang zag yin na/ byas pa rtag pa thams cad kyis stong par tshad mas nges pa'i gang zag yin dgos par thal/ 'dod pa'i phyir/ des na/ gzhi de spyi des stong par tshad mas nges pa'i gang zag yin na/ gzhi de des khyad par du byas pa'i bsal ba'i dbye ba mtha' dag gis stong par tshad mas nges pa'i gang zag yin dgos pa'i phyir/ byas pa la kho na re/ rtag na ma byas pas khyab pa tshad mas nges pa'i gang zag yin na/ byas na mi rtag pas khyab pa tshad mas nges pa'i gang zag yin dgos par thal/ nam mkha' rtag par tshad mas nges pa'i gang zag yin na/ de ma byas par tshad mas nges pa'i gang zag yin dgos pa' phyir te/ sgra byas par tshad mas nges pa'i gang zag yin na/ sgra mi rtag par tshad mas nges pa'i gang zag yin dgos pa'i phyir/ der thal/ gzhi de shing du gyur pa'i sha bar tshad mas nges pa'i gang zag yin na/ de shing du tshad mas nges pa'i gang zag yin dgos te/ gzhi der shing med par tshad mas nges pa'i gang zag yin na/ gzhi der shing sha ba med par tshad mas nges pa'i gang zag yin dgos pa'i phyir zer na/ rtsa bar ma khyab ste/ nam mkha' rtag par tshad mas nges pa'i gang zag yin na/ de ma byas par tshad @21b mas nges pa'i gang zag yin dgos/ de ma byas par tshad mas nges pa'i gang zag yin na/ sgra byas par tshad mas nges pa'i gang zag yin dgos/ de yin na/ de mi rtag par tshad mas nges pa'i gang zag yin pas khyab par 'dod kyi/ rtag na ma byas pas khyab pa tshad mas nges pa'i gang zag yin na/ byas na mi rtag pas khyab pa tshad mas nges pa'i gang zag yin pas khyab par mi 'dod pa'i phyir/ kha cig rtag pa byas stong du sgrub pa'i rtags yang dag yod kyang/ mi rtag pa byas par sgrub pa'i rtags yang dag med de/ mi rtag pa sgra byas par sgrub pa'i rtags yang dag ma yin pa'i phyir/ der thal/ sgra mi rtag par tshad mas nges pa'i gang zag yin na/ sgra rang rgyu las sngar med gsar skyes su tshad mas grub pa'i gang zag yin dgos pa'i phyir/ zer na/ ma khyab ste/ dngos po'i rtags kyis byas pa rang grub tsam nas 'jig nges su sgrub pa'i phyir rgol yang dag chos can/ mi rtag pa tshad mas grub pa'i gang zag yin par thal/ byas pa rang grub tsam nas 'jig nges su tshad mas grub pa'i gang zag yin pa'i phyir/ 'dod na/ de der tshad mas grub pa'i gang zag yin par thal/ 'dod pa'i phyir/ 'dod na/ de byas par tshad mas grub pa'i gang zag yin par thal/ 'dod pa'i phyir/ ma khyab na 'khor gsum yod/ 'dod na/ de chos can mi rtag pa dang byas pa'i tshogs don tshad mas grub pa'i gang zag yin par thal/ 'dod pa'i phyir/ 'dod na/ byas pa dang mi rtag pa'i tshogs don tshad mas grub pa'i gang zag yin par thal/ 'dod pa'i phyir/ khyab ste/ sgra dang mi rtag pa'i tshogs don tshad mas grub pa'i gang zag yin na/ mi rtag pa dang sgra'i tshogs don tshad mas grub pa'i gang zag yin dgos pa'i phyir/ 'dod na/ byas pa mi rtag par tshad mas grub pa'i gang zag yin par thal/ 'dod pa'i phyir/ 'dod na/ byas pa rang grub tsam nas 'jig des su tshad mas grub pa'i gang zag yin par thal/ 'dod pa'i phyir/ kho na re/ sgra'i steng du mi rtag pa nges sla byas pa nges dka' bar @22a @#/ /thal/ mi rtag pa sgra byas par sgrub pa'i rtags yang dag yin pa'i phyir/ 'dod na/ sgra'i steng du byas pa nges sla mi rtag pa nges dka' bar thal/ byas pa sgra mi rtag par sgrub pa'i rtags yang dag yin pa'i phyir zer na/ dung sgra'i steng du mi rtag pa nges sla/ rtsol byung nges dka' bar thal/ mi rtag pa dung sgra rtsol byung du sgrub pa'i phyogs chos yin pa'i phyir/ khyab pa khas/ rtags grub ste/ shes bya dang gcig gang zhig /mi rtag rtsol byung reg min pa/ /zhes gsungs pa'i phyir/ 'dod na/ dung sgra'i steng du rtsol byung nges sla/ mi rtag pa nges dka' bar thal/ rtsol byung dung sgra'i mi rtag par sgrub pa'i phyogs chos yin pa'i phyir/ khyab pa khas/ bsal ba phyi ma yang khas/ de bzhin du/ bsal ba rang mtshan dang rdzas gcig dang rdzas tha dad gang rung du ma grub pa de/ spyi mtshan dngos med du sgrub pa'i rtags yang dag ma yin par thal/ dngos med spyi mtshan bsal ba rang mtshan dang rdzas gcig dang rdzas tha dad gang rung du med par sgrub pa'i rtags yang dag yin pa'i phyir/ rtags grub ste/ ngo bo med pa brjod ma yin/ /zhes gsungs pa'i phyir/ 'dod mi nus te/ de ni rang bzhin med par grub/ /zhes gsungs pa'i phyir/ rtsa bar ma khyab na nang 'gal yod/ de bzhin du/ rang grub tsam nas 'jig nges des byas pa rang las phyis 'byung ba'i 'jig rgyu don gzhan la ltos med kyi dngos por sgrub pa'i rtags yang dag ma yin par thal/ rang las phyis 'byung ba'i rang gi 'jig rgyu don gzhan la ltos med kyi dngos po de/ byas pa rang grub tsam nas 'jig nges su sgrub pa'i rtags yang dag yin pa'i phyir/ ma khyab na/ 'khor gsum yod/ rtags grub ste/ rgyu med phyir na 'jig pa ni/ /zhes gsungs pa'i phyir/ 'dod na/ nges pas ltos pa 'gog pa'i rtags yang dag med par thal lo/ /'dod na/ Tikka las/ gzhi de spyi des stong par tshad mas nges @22b pa'i gang zag yin na/ gzhi de spyi des khyad par du byas ba'i bsal ba'i dbye ba mtha' dag gis stong par tshad mas nges pa'i gang zag yin pas khyab/ zhes bshad pa la/ kha cig /de mi 'thad de/ gang zag gi bdag tshad mas ma dmigs pa'i rtags kyis nyer len gyi phung po gang zag gi bdag med du sgrub pa'i phyi rgol yang dag chos can/ gang zag gi bdag de nyer len gyi phung po'i steng du yod pa'i stong par tshad mas nges pa'i gang zag du thal/ gang zag gi bdag de yod pas stong par tshad mas nges pa'i gang zag yin pa'i phyir/ khyab pa khas/ du ldan la la med yod par sgrub pa'i phyi rgol yang dag chos can/ du ba du ldan la la'i me med kyis stong par tshad mas nges pa'i gang zag yin par thal/ du ba me med kyis stong par tshad mas nges pa'i gang zag yin pa'i phyir/ yang mdo rtsa bar/ chos sgrub bya na chos mthun med/ /zhes gsungs pa mi 'thad par thal/ byas rtags kyis sgra mi rtag par sgrub pa'i sgrub bya yang dag yin na/ byas rtags kyis sgra mi rtag par sgrub pa'i phyi rgol yang dag de/ bum pa khyod du tshad mas nges pa'i phyir te/ byas rtags kyis sgra rtag pa ma yin par sgrub pa'i sgrub bya yang dag yin na/ de sgrub kyi phyi rgol yang dag des bum pa khyod du tshad mas nges pa'i phyir/ ma grub na/ sgra rtag pa ma yin pa chos can/ der thal/ de'i phyir/ 'dod na/ de 'dra'i phyi rgol yang dag chos can/ khyod sgra rtag pa ma yin par tshad mas nges pa'i gang zag yin par thal/ khyod bum pa sgra rtag pas stong par tshad mas nges pa'i gang zag yin pa'i phyir te/ bum pa rtag pas stong par tshad mas nges pa'i phyir/ khyab pa rtsa bas dam bca' la 'gro yod zer ba rnams mi 'thad de/ thal 'gyur dang po la 'brel med/ gzhi de spyi des stong par nges na/ gzhi de spyi des khyad par du byas pa'i bsal ba'i dbye ba mtha' dag gis stong par nges dgos zhes pa/ stong gzhi dang/ stong chos gnyis ka gzhi mthun gyi dbang du byas nas gsungs @23a @#/ /pas/ de 'brel med yin pa'i phyir dang/ de 'dra'i phyi rgol chos can/ gang zag gi bdag de nyer len gyi phung po'i steng du yod pas stong par tshad mas grub pa'i gang zag yin par thal/ de yod pas stong par tshad mas grub pa'i gang zag yin pa'i phyir zer na/ khyab pa phyogs mthong tsam yin kyang/ 'dod lan thebs pa'i phyir dang/ thal 'gyur de sgra ji bzhin pa la khyab pa mi 'gro ste/ nyer len gyi phung po'i steng du yod pa dang yod pa gnyis spyi bye brag ma yin pa'i phyir/ thal 'gyur de bzhin de 'dra'i phyi rgol chos can/ gang zag gi bdag nyer len gyi phung po'i steng du med par tshad mas nges pa'i gang zag yin par thal/ gang zag gi bdag de med par tshad mas grub pa'i gang zag yin pa'i phyir/ zhes pa dang khyad par med pa'i phyir/ thal 'gyur gnyis pa la'ang 'brel med de/ du ldan la la'i me med de/ me med kyi bye brag ma yin pa'i phyir/ me med log stobs kyis du ldan la la'i me med mi ldog pa'i phyir/ ! bzhi pa tshul gsum ngo bo gcig dang tha dad gang yin la dpyad pa dang/ gzhan lugs dgag pa dang; 'thad pa'i phyogs rnam par bzhag pa'o/ /dang po la mtshan gzhi dgag pa/ mtshan nyid dgag pa'o/ /dang po ni/ kha cig /byas na mi rtag pas khyab pa/ byas rtags kyis sgra mi rtag par sgrub pa'i mthun dpe yang dag kho na'i steng du grub pa/ byas rtags kyis/ sgra mi rtag par sgrub pa'i rjes khyab kyi mtshan gzhi/ rtag na ma byas pas khyab pa/ byas rtags kyis de sgrub kyi mi mthun dpe kho na'i steng du grub pa ldog khyab kyi mtshan gzhi zer na/ rtag na ma byas pas khyab pa tshad mas nges pa'i gang zag yin na/ byas rtags kyis de sgrub kyi ldog khyab tshad mas nges pa'i gang zag yin dgos/ de bzhin du rjes khyab la yang rigs 'dra zer na/ dngos po'i rtags kyis mnyan bya'i dngos po mi rtag par sgrub pa'i rjes khyab tshad mas grub pa'i gang zag yin na/ sbyor ba de sgrub kyi sgrub bya tshad mas nges pa'i gang @23b zag yin dgos par thal/ dngos po yin na/ mi rtag pa yin pas khyab pa tshad mas nges pa'i gang zag yin na/ rtag na dngos po ma yin pas khyab pa tshad mas grub pa'i gang zag yin dgos/ de yin na rtag na mnyan bya'i dngos po ma yin pas khyab pa tshad mas nges pa'i gang zag yin dgos/ de yin na/ mnyan bya'i dngos po yin na/ mi rtag pa yin pas khyab pa tshad mas grub pa'i gang zag yin dgos pa'i phyir/ rtags dang po song/ der thal/ de yin na/ dngos po'i rtags kyi mnyan bya'i dngos po mi rtag par sgrub pa'i rjes khyab tshad mas grub pa'i gang zag yin dgos/ de yin na/ sbyor ba skor gcig pa'i ldog khyab tshad mas grub pa'i gang zag yin dgos pa'i phyir/ de yin na rtag na dngos po ma yin pas khyab pa tshad mas grub pa'i gang zag yin dgos pa'i phyir/ dang po khas/ phyi ma 'bud/ rtsa rtags gnyis pa der thal/ rtag pa dngos pos stong par tshad mas nges pa'i gang zag yin na/ rtag pa mnyan bya'i dngos pos stong par tshad mas nges pa'i gang zag yin dgos pa'i phyir/ rtags dang po gong du grub zin/ rtsa rtags gsum pa der thal/ rtag na ma byas pas khyab pa tshad mas grub pa'i gang zag yin na/ byas na mi rtag pas khyab pa tshad mas grub pa'i gang zag yin dgos pa'i phyir/ ma grub na song/ der thal/ de yin na/ byas rtags kyis de sgrub kyi ldog khyab tshad mas grub pa'i gang zag yin dgos/ de yin na/ byas na mi rtag pas khyab pa tshad mas grub pa'i gang zag yin dgos pa'i phyir/ kha cig /thal 'gyur 'di'i rtsa ba'i khyab 'brerl gyi don du bsam nas/ mnyan bya'i dngos po mi rtag par tshad mas grub pa'i gang zag yin na/ dngos po'i rtags kyis mnyan bya'i dngos po mi rtag par sgrub pa'i sgrub bya tshad mas grub pa'i gang zag yin dgos zhes zer na/ sgra mi rtag par tshad mas grub pa'i gang zag yin na/ byas rtags kyis sgra mi rtag par sgrub pa'i sgrub bya tshad mas nges pa'i gang zag yin dgos par thal/ @24a @#/ /dam bca' 'thad pa'i phyir/ 'dod na/ de yin na/ byas rtags kyis de sgrub kyi rtags yang dag tshad mas nges pa'i gang zag yin dgos par thal lo/ /'dod na/ de yin na/ byas rtags kyis de sgrub kyi tshul gsum tshad mas grub pa'i gang zag yin dgos par thal/ 'dod pa'i phyir/ dod na/ mi rtag pa'i rtags kyis sgra byas par sgrub pa'i phyir rgol yang dag chos can/ der thal/ de'i phyir/ rtags chos can gyi grub/ 'dod na/ de chos can/ byas rtags kyis de sgrub kyi phyogs chos tshad mas grub pa'i gang zag du thal/ 'dod pa'i phyir/ 'dod na/ sgra byas par tshad mas nges pa'i gang zag du thal lo/ /gzhan yang/ bum pa mi rtag par tshad mas grub pa'i gang zag yin na/ byas rtags kyis bum pa mi rtag par sgrub pa'i sgrub bya tshad mas nges pa'i gang zag yin dgos par thal/ rtsa bar 'dod pa de'i phyir/ 'dod na/ dngos po'i rtags kyis byas pa mi rtag par sgrub pa'i mthun dpe yang dag med par thal/ shes bya dang gcig gang zhig /bum pa de ma yin pa'i phyir ma grub na/ dngos po'i rtags kyis byas pa mi rtag par sgrub pa'i phyir rgol yang dag des/ bum pa mi rtag par tshad mas nges par thal/ ma grub pa de'i phyir/ 'dod na/ de chos can/ byas pa mi rtag par tshad mas grub pa'i gang zag yin par thal/ byas rtags kyis bum pa mi rtag par sgrub pa'i rjes khyab tshad mas nges pa'i gang zag yin pa'i phyir/ de'i rtags kyis de sgrub kyi tshul gsum tshad mas nges pa'i gang zag yin pa'i phyir te/ de'i rtags kyis de sgrub kyi rtags yang dag tshad mas nges pa'i gang zag yin pa'i phyir/ de'i rtags kyis de sgrub kyi sgrub bya yang dag tshad mas grub pa'i gang zag yin pa'i phyir te; bum pa mi rtag par tshad mas grub pa'i gang zag yin pa'i phyir/ 'khor gsum/ gzhan yang/ sgra mi rtag pa mtshan gzhi/ byas rtags kyis sgra mi rtag par sgrub pa'i gzhan don sgrub bya yang dag du mtshon/ sbyor ba skor gcig gi ngo bo'i don sogs chos @24b lnga tshad ba yin pa zhes pa'i mtshon sbyor rnam dag du song pa'i gang zag chos can/ byas rtags kyis sgra mi rtag par sgrub pa'i sgrub bya yang dag tshad mas nges pa'i gang zag du thal/ sgra mi rtag par tshad mas nges pa'i gang zag yin pa'i phyir/ 'dod mi nus te/ sbyor ba skor gcig gi ngo bo'i don sogs chos lnga tshang ba la/ sbyor ba skor gcig gis gzhan don sgrub bya yang dag gi brda sbyor dgos kyi gang zag yin pa'i phyir te/ chos can de yin pa'i phyir/ rtsa ba'i dam bca' la/ byas rtags kyis de sgrub kyi ldog khyab yin na; sbyor ba skor gcig gi mi mthun phyogs kho na'i steng du grub pas ma khyab par thal/ de'i don ldog yin na/ sbyor ba skor gcig gi mi mthun phyogs kho na'i steng du grub pas ma khyab pa'i phyir/ 'dod na khyab par thal/ rtag na ma byas pas khyab pa de/ byas rtags kyis de sgrub kyi ldog khyab gang zhig /de byas rtags kyis de sgrub kyi mi mthun dpe kho na'i steng du grub pa'i phyir/ rtags khas/ Tikka las/ ldog khyab kyi mtshan gzhi ldog pa de kho nar zad pa nyams so/ /zhes pa'i don de ltar dgos kyi/ rtag na ma byas pas khyab pa byas rtags kyis de sgrub kyi mi mthun phyogs kho na'i steng du grub pa Ti ka'i don min te/ de la 'og nas dgag pa 'byung ba'i phyir/ rtsa rtags ma grub na/ byas pa sgra mi rtag par sgrub pa'i ma nges pa'i gtan tshigs yin pa bcad pa'i phyir du/ byas rtags kyis sgra mi rtag par sgrub pa'i chos mi mthun sbyor gyi sgrub ngag smos pa don med par thal/ byas rtags kyis sgra mi rtag par sgrub pa'i don ldog yin na/ byas pa'i steng du grub dgos pa'i phyir/ rtags song/ 'di'i don la kha cig /thal 'gyur de la 'dod lan 'debs rigs te/ yang dag ltar snang yin pa bcad pa'i phyir du tshul gsum de so so'i mtshan nyid kyi zur du nges pa smos pa mi 'thad par thal/ 'gal ma nges/ ma grub pa'i gtan tshigs gsum rtags yang dag yin pa ldog pa'i phyir du tshul gsum so so'i mtshan nyid 'chad pa'i tshig zur @25a @#/ /du nges pa smos pa yin pa'i phyir/ zer na/ 'di 'gog pa la/ Tikka las/ 'gal ma nges ma grub pa'i gtan tshigs gsum rtags yang dag yin pa ldog pa'i phyir du/ tshul gsum so so'i mtshan nyid kyi zur du nges pa smos pa ni rnam par 'khyams te/ zhes sogs gsungs/ de'i don ni/ mig shes kyi bzung bya chos can/ sgra mi rtag par sgrub pa'i phyogs chos min te/ sgra'i steng du 'god tshul dang mthun par ma grub pa'i phyir/ zhes pa'i sbyor pa de rjes dpag bya dang de mtshungs la/ /yod dang med la med par ni/ /zhes pa'i lung gi nang tshan du gyur pa'i rjes dpag bya dang de mtshungs la/ zhes pa'i gzhung gi don sbyor rnam dag yin par thal/ de yin pa'am byas pa chos can/ sgra mi rtag par sgrub pa'i ma grub pa'i gtan tshigs yin te/ sgra'i steng du 'god tshul dang mthun par yod par nyid du nges pa'i sgra mi rtag par sgrub pa'i tshul gsum ma yin pa'i phyir/ zhes pa'i sbyor ba de/ gzhung de'i don sbyor rnam dag ma yin pa gang zhig /phyi ma ma yin pa'i phyir/ ma grub na/ byas pa de sgrub kyi ma grub pa'i gtan tshigs yin pa bcad pa'i phyir du/ de sgrub kyi phyogs chos kyi mtshan nyid 'chad pa'i tshig zur du nges pa smos par thal/ ma grub pa de'i phyir/ 'dod na song/ rtsa bar 'dod na/ sgra'i steng du 'god tshul dang mthun par yod pa de/ mig shes kyi bzung bya sgra mi rtag par sgrub pa'i phyogs chos min par sgrub pa'i rtags yang dag yin par thal/ 'dod pa'i phyir/ 'dod na/ byas pa 'dus ma byas kyi nam mkha' bum pa ma yin par sgrub pa'i rtags yang dag du thal lo/ /des na/ Tika'i don ni yang dag ltar snang yin pa bcad pa'i phyir du nges pa ma smos par/ 'gal ma nges ma grub pa'i gtan tshigs gsum rtags yang dag yin pa bcad pa'i phyir du tshul gsum so so'i mtshan nyid 'chad pa'i tshig zur du nges pa smos na/ byas pa 'dus ma byas kyi nam mkha'i steng @25b du bum pa 'gog pa'i rtags yang dag du 'gyur zhes pa'i don yin gyi 'gal ma nges ma grub pa'i gtan tshigs rtags yang dag yin pa ldog pa'i phyir/ tshul gsum so so'i mtshan nyid 'chad pa'i tshig zur du nges pa smos pa Ti ka'i dgongs pa min te/ de gsum rtags yang dag yin pa bcad pa'i phyir du nges pa smos par thal/ phyir rgol ba'i khas ma blangs pa'i bstan bcos mkhan po'i 'dod pa thams cad gzhan don sgrub bya yang dag yin pa bcad pa'i phyir du gzhan don sgrub bya yang dag gi mtshan nyid 'chad pa'i tshig zur du rang nyid zhes pa'i tshig smas/ sgrub byed du bgod pa'i dpe rtags ma grub pa gzhan don sgrub ngag yang dag yin pa bcad pa'i phyir du de'i mtshan nyid 'chad pa'i tshig zur du kho na zhes pa'i tshig smos pa'i phyir/ dang po ma grub ste/ log par rtog pa gsal ba'i phyir du de'i zur du 'dir ni rang nyid tshig smra brjod/ zhes gsungs pa'i phyir dang byed pa'i mtha' dang 'brel ba'i phyir/ dus gzhan bcad phyir bshad pa yin/ /zhes gsungs pa'i phyir/ de gsum rtags yang dag yin pa bcad pa'i phyir du der thal/ blo skyon can gyi sgrub ngag rnams sgrub ngag yang dag yin bcad pa'i phyir du gzhan don sgrub ngag yang dag gi mtshan nyid 'chad pa'i tshig zur du mthong ba zhes pa'i tshigs smos/ don skyon can gyi sgrub ngag rnams sgrub ngag yang dag yin pa bcad pa'i phyir du de'i tshigs zur du don zhes pa'i tshigs smos pa yin pa'i phyir/ dang po grub ste/ de spangs phyir bdag mthong ba'i tshig /zhes gsungs pa'i phyir/ gnyis pa grub ste/ don smras de ni sgra dag dang/ /zhes sogs kyi rkang pa bzhi gsungs pa'i phyir/ kha cig skabs 'di'i rnam bshad tshig don 'gog /la la 'brel med bshad pa'i dgongs pa 'chad/ gzhan dag rab rib dag gis gsung 'di dor/ /rgyal tshab dgongs pa ji bzhin kho bos bshad/ /gzhan yang/ byas na mi rtag pas khyab pa tshad mas nges pa'i gang zag yin na/ byas rtags kyis de sgrub kyi rjes khyab tshad mas nges pa'i gang zag yin mi dgos par thal/ @26a @#/ /byas mi rtag pa'i 'brel ba tshad mas nges pa'i gang zag yin na/ de sgrub kyi rjes khyab tshad mas nges pa'i gang zag yin dgos pa'i phyir te/ de dran pa'i dran shes rgyud ldan gyi gang zag yin na/ de skor gyi rjes khyab dran pa'i dran shes rgyud ldan gyi gang zag yin dgos pa'i phyir te/ byas mi rtag pa'i 'brel ba tshad mas shes zin ma rjed pa'i rtags yang dag 'god pa skabs su bab pa'i phyi rgol yang dag gi ngo bor de skor gyi rjes su 'gro ldog gi khyab pa dran pa'i phyir du de skor gyi sgrub ngag 'god dgos pa'i phyir te/ de nyid kyi phyir 'brel shes na/ zhes sogs kyi don grub pa'i phyir/ byas na mi rtag pas khyab pa chos can/ khyod sgra mi rtag par sgrub pa'i mthun phyogs kho na la yod par thal/ khyod de sgrub kyi rjes khyab yin pa'i phyir/ ma khyab na/ rjes dpag bya dang de mtshungs la/ /yod dang med nyid la med bzhes pa'i lung gi nang tshan du gyur pa'i de mtshungs la yod zhes pa'i bstan don ma grub par thal/ ma khyab pa de'i phyir/ rtsa bar 'dod na/ ri bong rwas bshag /de bzhin du/ du ba yod na me yod pas khyab pa chos can/ me la 'brel bar thal/ du ldan la la me yod par sgrub pa'i rjes khyab yin pa'i phyir/ khyab ste/ rang 'grel las/ 'brel ba med par ni/ zhes gsungs pa'i phyir/ dgag gzhi rtsi lugs gang byed kyang bshag go /gzhi der me med bzhin/ der du ba yod na me yod pas khyab pa med dgos par thal/ 'dod pa'i phyir/ gnyis pa mtshan nyid dgag pa ni/ kha cig /de sgrub kyi khyab pa'i tshul gang zhig /de sgrub kyi dpe gnyis kyi nang nas de sgrub kyi mthun dpe yang dag kho na'i steng du grub pa de/ de sgrub kyi rjes khyab kyi mtshan nyid/ gzhan 'dra ba la mi mthun dpe yang dag kho na'i steng du grub pa de sgrub kyi ldog khyab kyi mtshan nyid zer na/ blo'i yul du bya rung gi rtags kyis bum pa shes byar sgrub pa'i ldog khyab ma grub par thal/ de'i rtags kyi dpe gnyis kyi nang nas mi mthun dpe kho @26b na'i steng du ma grub pa'i phyir/ khyab pa khas/ sgra mi rtag par sgrub pa'i rtags kyi mtshan nyid gang byas pas de sgrub kyi tshul gsum tshang pa'i gtan tshigs/ de'i mtshan nyid yin no zer/ byas pa'i steng du sgra mi rtag par sgrub pa'i tshul gsum tshang ba ma grub par thal/ de'i steng du de'i tshul gsum ma grub pa'i phyir/ ma grub na song der thal/ de'i steng du de sgrub kyi ldog khyab ma grub pa'i phyir/ ma grub na song/ byas rtags kyis sgra mi rtag par sgrub pa'i ldog khyab de/ de'i rtags kyis de sgrub kyi mi mthun dpe kho na'i steng du ma grub par thal/ ma grub pa de'i phyir/ rtsa bar 'dod na/ byas pa de sgrub kyi tshul gsum tshang ba ma yin par thal/ 'dod pa'i phyir/ 'dod na/ nang 'gal lo/ /gzhan yang bum pa'i steng du rtag na ma byas pas khyab pa ma grub par thal/ rtag na ma byas pas khyab pa de/ de sgrub kyi mi mthun dpe kho na'i steng du grub pa'i phyir/ ma grub na song/ de chos can/ der thal/ de sgrub kyi ldog khyab yin pa'i phyir/ rtsa bar 'dod na/ 'bud do/ /kha cig ma khyab ste/ rtag na ma byas pas khyab pa mi mthun dpe kho na la grub pa ldog khyab kyi mtshan nyid yin no zer/ mi mthun dpe nam mkha'i steng du rtag pa la ma byas pas khyab pa 'jal ba'i tshad ma chos can/ nam mkha'i steng du byas rtags kyis de sgrub kyi rjes khyab dngos shugs gang rung la 'jal bar thal/ de'i steng du byas rtags kyis de sgrub kyi ldog khyab dngos su 'jal ba'i phyir/ khyab ste/ de nyid kyi phyir 'brel shes na/ zhes pa rkang pa bzhi pa'i don grub pa'i phyir/ nam mkha'i steng du byas rtags kyis de sgrub kyi rjes khyab yod par thal/ 'dod pa'i phyir/ 'dod na/ byas rtags kyis de sgrub kyi rjes khyab mthun dpe yang dag kho na'i steng du ma grub par thal/ 'dod pa'i phyir/ bsal pa khas/ kho na re lung de'i don/ ldog khyab mi mthun dpe yang dag la yod par dngos su 'jal ba'i tshad mas rjes khyab mthun dpe la yod par shugs la grub pa'i don yin no zhe na/ lho kha na stag yod par 'jal ba'i tshad ma yin na/ byang kha na 'brod yod par 'dzin pa'i @27a @#/ /tshad ma yin dgos par thal/ lung de'i don 'thad pa'i phyir/ kho na re/ tshad ma gcig gis 'jal ba ma yin gyi/ ldog khyab 'jal ba'i tshad mas ldog khyab mi mthun dpe'i steng du gzhal ba na/ rjes khyab 'jal ba'i tshad mas rjes khyab mthun dpe steng du nges pa'i don yin no/ /zhe na bum 'dzin mngon sum kyis bum pa gzhal ba/ snam bu 'jal ba'i tshad mas shugs rtogs du thal/ dam bca' de'i phyir/ mkhas pa kha cig /rtag na ma byas pas khyab/ dper na nam mkha' bzhin/ sgra ni byas zhes pa'i sgrub ngag chos can/ nam mkha'i steng du byas rtags kyis sgra mi rtag par sgrub pa'i rjes khyab dngos shugs gang rung la brjod par thal/ de'i steng du byas rtags kyis de sgrub kyi ldog khyab dngos su brjod pa'i phyir/ ma khyab na rtsa ba'i thal 'gyur la khyab pa yod pa 'bud/ zhes gsungs/ de 'dra'i sgrub ngag gis nam mkha'i steng du byas rtags kyis sgra mi rtag par sgrub pa'i ldog khyab ma brjod de/ de'i steng du byas rtags kyis de sgrub kyi ldog khyab ma grub pa'i phyir te/ de'i rtags kyis de sgrub kyi rjes khyab ma grub pa'i phyir te/ de'i steng du byas mi rtag pa'i 'brel ba ma grub pa'i phyir te/ de'i steng du mi rtag pa ma grub pa'i phyir/ kho na re/ de ltar na/ byas rtags kyis de sgrub kyi rjes khyab dang/ ldog khyab kyi mtshan gzhi gang yin zhe na/ rang re'i byas pa de gnyis ka'i mtshan gzhi yin byas pa la kho na re/ byas pa chos can/ khyod dngos su rtogs na/ byas pa shugs la rtogs dgos par thal/ khyod sgra mi rtag par sgrub pa'i rjes khyab dang/ byas pa de skor ldog khyab yin pa'i phyir/ 'dod mi nus te/ ldog pa gcig dngos shugs la 'gal bas so zhe na/ 'di'i lan Tikka las/ sgrub ngag gnyis kyis dngos su bstan pa'i khyab pa gnyis dngos shugs kyi rtogs bya rtogs byed yin gyi/ tshul gnyis yin na/ de yin pa'i khyab pa min no/ /zhes gsungs/ 'di'i don la/ kha cig /byas na mi rtag pas khyab pa byas rtags kyis sgra mi rtag par sgrub pa'i chos mthun sbyor gyi sgrub ngag yang @27b dag gi dngos su bstan pa'i rjes khyab/ rtag na ma byas pas khyab pa sbyor pa sbyor bskor cig gi chos mi mthun sbyor gyi sgrub ngag yang dag gis dngos su bstan pa'i ldog khyab kyi mtshan gzhi dang/ khyab pa de gnyis ka'i dngos shugs kyi rtogs bya rtogs byed yin pa/ lung de'i don yin zer na rtag na ma byas pas khyab pa tshad mas nges pa'i gang zag yin na/ byas na mi rtag pas khyab pa tshad mas nges pa'i gang zag yin dgos par thal/ khyab pa de gnyis dngos shugs kyi rtogs bya rtogs byed yin pa'i phyir/ rtags khas/ 'dod na bkag zin/ rtag na ma byas pas khyab pa chos can/ khyod dngos su rtogs na/ byas na mi rtag pas khyab pa shugs la rtogs dgos par thal/ khyod byas rtags kyis de sgrub kyi ldog khyab byas na mi rtag pas khyab pa de/ sbyor ba skor gcig gi rjes khyab yin pa'i phyir/ rtags khyab khas blangs/ 'dod na/ tshad ma chos can/ der thal/ de yin pa'i phyir/ byas pa de sgrub kyi mthun phyogs kho na la yod pa de/ byas rtags kyis sgra mi rtag par sgrub pa'i chos mthun sbyor gyi sgrub ngag yang dag gis dngos bstan gyi rjes khyab/ de sgrub kyi mi mthun phyogs la med pa kho nar nges pa de/ de'i rtags kyis de sgrub kyi chos mi mthun sbyor kyi sgrub ngag yang dag gi dngos bstan ldog khyab yin zer ba mi 'thad de/ de sgrub kyi mthun phyogs kho na la yod zhes pa'i ngag gis/ de'i rtags kyis de sgrub kyi chos mthun sbyor gyi sgrub ngag yang dag dngos bstan gyi rjes khyab brjod pa rdzogs pa ma yin pa'i phyir te/ sgrub ngag des dngos su bstan pa'i rjes khyab yod par brjod na/ byas rtags kyis sgra mi rtag par sgrub pa'i phyogs chos brjod dgos pa'i phyir te/ Tikka las/ de tsam gyis sgrub ngag dngos su bstan pa'i khyab pa rdzogs pa ma yin te/ de brjod pa rtags kyi mtshan gzhi brjod pa la nges par ltos dgos te zhes gsungs pa'i phyir/ 'di'i don la byas na mi rtag pas khyab pa zhes pa'i ngag gis/ byas rtags kyis de sgrub kyi rjes @28a @#/ /khyab kyi brjod pa ma rdzogs pa dang/ rtag na ma byas pas khyab pa zhes pa'i ngag gis/ sbyor ba skor gcig gi ldog khyab kyis brjod pa ma rdzogs pa lung de'i don yin gyi byas na mi rtag pas khyab pa zhes pa'i ngag gis byas rtags kyis sgra mi rtag par sgrub pa'i rjes khyab brjod pa yin te/ byas na mi rtag pas khyab/ dper na/ bum pa bzhin zhes pa'i ngag gis/ sbyor ba skor gcig gi rjes khyab brjod pa'i phyir/ byas rtags kyis de sgrub kyi rjes khyab rkyang pa brjod pa'i byas rtags kyis de sgrub kyi sgrub ngag yod pa'i phyir te/ byas rtags kyis de sgrub kyi yan lag gcig ldan gyi sgrub ngag yod pa'i phyir byas rtags kyis de sgrub kyi sgrub ngag ma tshang ba'i skyon can yod pa'i phyir/ zer na ma khyab de/ byas na mi rtag pas khyab/ dper na bum pa bzhin zhes pa'i ngag chos can/ khyod byas rtags kyis de sgrub kyi rjes khyab brjod par thal/ khyod de rkyang pa brjod pa'i sgrub ngag yin pa'i phyir/ rtags khas khyab ste/ de sgrub kyi rjes 'gro rkyang pa can gyi gtan tshigs yin na/ de sgrub kyi ldog khyab ma yin dgos pa la 'brel yod pa'i phyir/ rtsa bar 'dod mi nus te/ de'i rtags kyis de sgrub kyi rjes khyab brjod pa'i phyir/ gzhan yang/ byas na mi rtag pas khyab/ dper na bum pa bzhin zhes pa'i sgrub ngag chos can/ khyod kyis sgra mi rtag pa dngos shugs gang rung la brjod par thal/ khyod byas rtags kyis de sgrub kyi sgrub ngag yin pa'i phyir/ rtags khas 'dod mi nus te/ de 'dra'i ngag de sel 'jug yin pa'i phyir/ kho na re/ byas na mi rtag pas khyab dper na bum pa bzhin zhes pa'i ngag des/ byas rtags kyis de sgrub kyi rjes khyab brjod par thal/ de 'dra'i sgrub ngag de khyab pa sngon 'gro can gyi sgrub ngag yin pa'i phyir zer na/ ma khyab ste/ sgra byas zhes pa'i ngag de/ byas rtags kyis sgra mi rtag par sgrub pa'i phyogs chos rkyang pa can gyi sgrub ngag yin par thal/ byas na mi rtag pas khyab/ dper na bum pa bzhin zhes pa'i ngag de/ byas rtags kyis sgra mi rtag par sgrub pa'i rjes khyab @28b rkyang pa brjod pa'i sgrub ngag yin pa'i phyir/ rtags khas/ 'dod na/ sgra byas zhes pa'i ngag chos can/ sgrub ngag yin par thal/ 'dod pa'i phyir/ 'dod na/ sgra mi rtag zhes pa'i ngag sgrub ngag yin par thal/ 'dod pa'i phyir/ 'dod na/ dam bca' yin na sgrub ngag yin dgos par thal/ 'dod pa'i phyir/ de rnams la skyon 'phen pa kha cig /rtag na ma byas pas khyab pa zhes pa'i ngag chos can/ khyod kyis byas rtags kyis sgra mi rtag par sgrub pa'i ldog khyab ma brjod par thal/ khyod kyis byas pa ma brjod pa'i phyir/ ma grub na/ byas pa min zhes pa'i ngag gis byas pa brjod par thal lo/ /gzhan don sgrub ngag yang dag 'god yul gyi rgol ba ngos bzung ba la/ gzhan don sgrub ngag yang dag de tshul gsum brjod pa'i gang zag gcig la 'god dam/ ma brjed pa'i gang zag gcig la 'god zhe na/ 'grel bshad shAkya blo ltar na/ de brjed pa'i gang zag gcig la 'god pa yin te/ shAkya blo las/ 'on kyang phyir rgol ba bzung ba rnam par brjed pa la yang tshig gis dran pa'i yul nyid du 'jug par 'gyur/ bzung ba rnam par ma brjed pa de'i tshe gsal bar byed pa nyid dgos pa med pa can yin no/ /zhes gsungs pa'i phyir/ thar lam gsal byed ltar na/ ma brjed pa'i gang zag gcig la 'god de/ thar lam gsal byed las brjed na shes par 'gal lo/ /zhes gsungs/ des na/ gzhan don sgrub ngag 'god pa skabs su babs pa'i gang zag yod de/ sgra mi rtag par sgrub pa'i tshul gsum tshad mas shes/ de sgrub kyi tshul gsum phyogs gcig tu dran pa'i dran shes skye dgos kyi gang zag de la/ de 'god pa skabs su babs pa yin te/ thar lam gsal byed las/ gzhan don le'u'i bstan bya'i gtso bor sgrub ngag yin la/ de blo yul du song ba'i dngos kyi 'bras bu la tshul gsum la go ba bskyed pa'o/ /zhes pa dang/ lha dbang blo las/ tshul gsum sngar shes nas dran rung du yod pa ni sgrub ngag 'god yul gyi gtso bo yin la zhes gsungs pa'i phyir/ 'o na/ @29a @#/ /sgrub ngag yang dag 'god pa skabs su babs pa'i rgol ba dang/ rtags yang dag 'god pa skabs su babs pa'i rgol ba gnyis/ don gcig gam 'gal zhe na/ de gnyis don yang mi gcig ste/ byas na mi rtag pas khyab/ dper na bum pa bzhin/ sgra yang byas zhes pa'i sgrub ngag yang dag 'di bkod pa la rten nas tshul gsum phyogs gcig tu dran pa'i dran shes skyes pa'i rjes su sgra mi rtag par rtogs pa'i phyir du sgra chos can/ mi rtag ste/ byas pa'i phyir zhes pa'i rtags sbyor 'god pa skabs su babs pa'i rgol ba yang dag yod pa'i phyir te/ thar lam gsal byed las/ rang don le'u'i bstan bya'i gtso bor tshul gsum pa'i rtags yin la/ de blo yul du song ba'i dngos kyi 'bras bu la rtag can sgrub bya nges par byed pa yin no/ /zhes gsungs pa'i phyir/ de gnyis mi 'gal te/ sgrub ngag yang dag 'god pa skabs su babs pa'i gang zag yin na/ rtags yang dag 'god pa skabs su babs pa'i gang zag yin dgos pa'i phyir te/ sgrub ngag yang dag yin na/ rtags sbyor yang dag yin dgos pa'i phyir te/ 'grel ba du ma las/ byas na mi rtag pas khyab dper na bum pa bzhin/ sgra yang byas zhes pa ni rang bzhin gyi gtan tshigs so/ /zhes pa dang/ gang na du ba yod na me yod pas khyab/ dper na tshang mang bzhin/ du ldan gyi la la yang du ba yod do/ /zhes pa ni 'bras bu'i gtan tshigs so/ /zhes gsungs pa'i phyir/ chos mthun sbyor gyi sgrub ngag yang dag dang/ chos mi mthun sbyor gyi sgrub ngag yang dag gnyis ka 'god pa skabs su babs pa'i gang zag ni med de/ sgra mi rtag par sgrub pa'i sgrub ngag yang dag 'god pa skabs su babs pa'i gang zag de la/ de gnyis gang rung gcig bkod pa la rten nas de sgrub kyi tshul gsum dran pa'i dran shes skye nus pa'i phyir te/ de nyid kyi phyir 'brel shes na/ /gnyis las gang yang rung smras pas/ /don gyi go bas gcig shos la/ /dran pa yang dag skye bar 'gyur/ /zhes gsungs pa'i phyir/ 'o na rigs sgo las/ re zhig 'gal ba dang ma nges pa'i @29b gnyen por gnyis ka brjod pa gang yin pa de rigs so/ /zhes pa dang/ rnam nges Tik chen las/ sgrub ngag gnyis la/ rtags 'gal bar dogs pa shas che ba la chos mthun sbyor dang/ ma nges pa'i dogs pa shas che ba la chos mi mthun sbyor dang/ phyir rgol shin tu rmongs pa dag la ni gnyis ka 'god dgos pa dag kyang srid par shes par bya'o/ /zhes pa rnams dang 'gal zhe na/ mi 'gal te/ lung dang po'i don ni/ byas pa sgra mi rtag par sgrub pa'i 'gal rtags yin pa bcad pa'i phyir du chos mthun sbyor gyi sgrub ngag 'god/ ma nges pa'i gtan tshigs yin pa bcad pa'i phyir du chos mi mthun pa'i sgrub ngag 'god zhes pa'i don yin gyi/ gang zag gcig la sgrub ngag gnyis ka 'god dgos pa de de'i don ma yin pa'i phyir/ lung phyi ma'i don ni/ chos mthun sbyor gyi sgrub ngag bkod pa la rten nas tshul gsum dran pa'i dran shes skye mi nus par/ mi mthun sbyor gyi sgrub ngag 'god dgos kyi phyi rgol tsam yod par bstan pa yin pa'i phyir ro/ /gzhan gyis brtag pa yis/ thal bsgrub pa gnyis 'brel phyir zhes pa'i skabs su/ rang res gong du/ gzhan don rjes dpag yin na/ rang gi bstan byar gyur pa'i tshul gsum rang 'god mkhan gyi snga rgol gyi tshad mas grub dgos par bstan pa la/ kho na re 'o na/ slob dpon phyogs kyi glang pos phyi rgol bye brag pa'i ngo bor 'phangs pa'i ba glang gi spyi rtags dngos chos can/ cha dang bcas pa'i dngos po yin par thal/ rang gis gsal ba du ma la don dam par 'phro 'du 'brel ba'i phyir/ zhes pa'i thal 'gyur chos can/ khyod kyi 'khor gsum slob dpon phyogs glang gis tshad mas grub par thal/ khyod gzhan don skabs kyi sgrub byed 'phen pa'i thal 'gyur yang dag yin pa'i phyir/ zhes zer/ de'i lan ston pa la/ gzhung 'di byung/ ngag don de gnyis mi mtshungs te/ gzhan don sgrub ngag yang dag yin na/ rang rgyud kyi sgrub bya sgrub pa'i phyir du bkod pa'i ngag yin pas khyab/ slob dpon phyogs glang @30a @#/ /gis bye brag pa'i ngo bor de ltar 'phangs pa'i thal 'gyur de/ gzhan gyi khas blangs ngan pa rtags su bkod/ mi 'dod pa thal ba 'phangs pa'i thal ngag yin pa'i phyir/ slob dpon phyogs glang gis de ltar 'phangs pa la dgos pa ci yod zhe na; de la dgos pa yod de/ gcig cha dang bcas pa'i dngos po med na/ gzhan bsal pa du ma la khyab pa'i dngos po de med dgos par rtogs par bya ba'i dgos pa yod pa'i phyir/ gcig cha dang bcas pa'i dngos po med na gzhan bsal ba du ma la khyab pa'i dngos po de med dgos te/ bsal ba du ma la khyab pa'i dngos po de/ cha dang bcas pa'i dngos po la bdag nyid gcig gi sgo nas 'brel ba'i phyir/ des na 'di'i skabs su/ thal 'gyur gyi rnam bzhag spyir bstan pa dang thal 'gyur yang dag gi rnam bzhag bye brag tu bshad pa gnyis/ dang po la/ cha rtsang gi lugs brjod pa/ de la rigs gter pas skyon brjod tshul/ skyon de 'jug mi 'jug dpyad pa/ thal 'gyur gyi dbye ba gzhan bstan pa dang bzhi/ dang po la/ thal 'gyur du bkod tshod kyi dbye ba/ de la yang dag dang ltar snang gnyis su 'byed tshul/ yang dag bdun la sgrub byed 'phen mi 'phen 'byed tshul dang gsum/ dang po la/ thal 'gyur la rtsa ba'i sgo nas dbye na bzhi yod de/ rtags khyab gnyis ka ma grub pa'i thal 'gyur rtags kho na ma grub pa'i thal 'gyur/ khyab pa kho na ma grub pa'i thal 'gyur rtags khyab gnyis ka grub pa'i thal 'gyur dang bzhir yod pa'i phyir/ thal 'gyur dang po'i mtshan gzhi ni/ sangs rgyas pa la gzhan dag gis 'phangs pa'i sgra chos can/ gzhal bya ma yin par thal/ rtag pa'i phyir/ zhes pa lta bu/ gnyis pa ni/ sangs rgyas pa la/ gzhan dag gis/ sgra chos can/ ma byas par thal/ rtag pa'i phyir/ zhes pa lta bu/ gsum pa ni/ sangs rgyas pa la gzhan dag gis sgra chos can/ rtag par thal gzhal bya yin pa'i phyir zhes dang/ bzhi pa ni/ sgra chos can/ byas pa yin par thal/ mi rtag pa yin pa'i phyir/ zhes @30b pa lta bu'o/ /rtags khyab gnyis ka grub pa'i thal 'gyur de la yang dbye na/ rtags khyab gnyis ka tshad mas grub pa'i de/ de gnyis ka khas blang gis grub pa'i de/ khyab pa khas blangs pa dang/ rtags tshad mas grub pa'i de/ rtags khas blangs pa dang/ khyab pa tshad mas grub pa'i de dang bzhi/ dang po ni/ sgra chos can/ mi rtag pa yin par thal/ byas pa yin pa'i phyir zhes pa lta bu/ de gang la 'phangs yul gyi rgol bas/ sgra rtag par khas blangs na/ rtags khyab gnyis ka tshad mas grub kyang/ dam bca' la khas blangs kyis bsal ba 'bab pa'i thal 'gyur yang dag du 'gyur/ de 'phangs yul gyi rgol bas/ sgra rtag par khas ma blangs na/ rtags khyab gnyis ka tshad mas grub cing/ dam bca' la bsal ba bstan du med pa'i thal 'gyur ltar snang du 'gyur ro/ /rtags khyab gnyis khas blangs kyis grub pa'i thal 'gyur ni/ sgra mig shes gyi bzung byar khas len kyang/ mig shes kyi bzung bya la rtag pas khyab pa khas len pa'i gang zag la 'phangs pa'i/ sgra chos can/ rtag par thal/ mig shes kyi bzung bya yin pa'i phyir zhes pa lta bu/ thal 'gyur de gang la 'phangs yul gyi rgol bas/ sgra mi rtag par tshad mas grub na/ rtags khyab gnyis ka khas blangs kyis grub kyang/ dam bca' la tshad bsal 'bab pa'i thal 'gyur yang dag du 'gyur ro/ /des sgra mi rtag par khas blangs na rtags khyab khas blangs kyis grub kyang/ dam bca' la khas blangs kyi bsal ba 'bab pa'i thal 'gyur yang dag du 'gyur/ des sgra mi rtag par khas kyang ma blangs/ tshad mas kyang ma grub na rtags khyab gnyis ka khas blangs kyis grub kyang/ dam bca' la gsal ba bstan du med pa'i thal 'gyur ltar snang du 'gyur/ rtags tshad ma dang khyab pa khas blangs kyis grub pa'i thal 'gyur ni byas na mi rtag pas khyab pa; khas len pa'i gang zag la 'phangs pa'i sgra chos can/ rtag par thal/ byas pa'i phyir zhes pa'i thal 'gyur lta bu/ thal 'gyur de gang la 'phangs yul gyi rgol ba des/ sgra mi rtag par tshad mas grub na/ rtags tshad ma dang/ khyab pa khas blangs kyis grub kyang/ dam bca' la @31a @#/ /tshad bsal 'bab pa'i thal 'gyur yang dag dang rgol ba des sgra mi rtag par khas blangs na/ rtags tshad ma dang khyab pa khas blangs kyis grub cing/ dam bca' khas blangs kyis gsal ba 'bab pa'i thal 'gyur yang dag du gyur/ rgol ba des sgra mi rtag par tshad mas kyi ma grub/ khas kyang ma blangs na/ rtags tshad ma dang khyab pa khas blangs kyis grub kyang/ dam bca' la bsal ba bstan du med pa'i thal 'gyur ltar snang du 'gyur ro/ /rtags khas blangs pa dang/ khyab pa tshad mas grub pa'i thal 'gyur ni/ sgra rtag par khas len gyi rgol ba la 'phangs pa'i/ sgra chos can/ ma byas par thal/ rtag pa'i phyir zhes pa'i thal 'gyur lta bu/ des gang la 'phangs yul gyi rgol ba des sgra byas par tshad mas grub na/ rtags khas blangs pa dang/ khyab pa tshad mas grub kyang/ dam bca' la bsal ba 'bab pa'i thal 'gyur du 'gyur/ rgol ba des sgra byas par khas blangs na/ rtags khas blangs pa dang/ khyab pa tshad mas grub kyang/ dam bca' la khas blangs kyis bsal ba 'bab pa'i thal 'gyur yang dag du 'gyur ro/ /rgol ba des sgra byas par tshad mas kyang ma grub/ khas kyang ma blangs na/ rtags khas blangs pa dang/ khyab pa tshad mas grub cing/ dam bca' la bsal ba bstan du med pa'i thal 'gyur ltar snang du 'gyur ro/ /des na thal 'gyur la yan lag gi sgo nas dbye na bcu bzhi yod de/ rtags khyab gnyis ka ma grub pa'i thal 'gyur/ rtags kho na ma grub pa'i thal 'gyur/ khyab pa kho na ma grub pa'i thal 'gyur/ rtags khyab gnyis ka tshad mas grub cing/ dam bca' la khas blangs kyis bsal ba 'bab pa'i de/ dam bca' la bsal ba bstan nas med pa'i de/ rtags khyab gnyis ka khas blangs kyis grub cing/ dam bca' la tshad mas gsal ba 'bab pa'i de/ rtags khyab gnyis ka de ltar la dam bca' la khas blangs kyis bsal ba 'bab pa'i de/ rtags khyab gnyis @31b ka de ltar la dam bca' la bsal ba bstan du med pa'i de/ rtags tshad ma dang/ khyab pa khas blangs kyis grub cing/ dam bca' la khas len gyis bsal ba 'bab pa'i de/ rtags tshad ma dang khyab pa khas blangs kyis grub cing/ dam bca' la tshad mas bsal ba 'bab pa'i de/ rtags khyab de ltar la dam bca' la bsal ba bstan med pa'i de/ khyab pa tshad ma dang/ rtags khas blangs kyis grub cing/ dam bca' la tshad mas bsal ba 'bab pa'i de/ rtags khyab gnyis ka de ltar la/ dam bca' la khas blangs kyis bsal ba 'bab pa'i de/ rtags khyab gnyis ka de ltar la dam bca' la bsal ba bstan du med pa'i thal 'gyur dang bcu bzhir yod pa'i phyir/ gnyis pa de la yang dag dang ltar snang gnyis su 'byed tshul ni/ thal 'gyur bcu bzhi po de la/ yang dag bdun dang/ ltar snang bdun yod/ rtags khyab gnyis ka ma grub pa'i thal 'gyur/ rtags kho na ma grub pa'i de/ khyab pa kho na ma grub pa'i de/ rtags khyab gnyis ka tshad mas grub cing/ dam bca' la bsal ba bstan med kyi de/ rtags khyab gnyis ka khas blangs kyis grub cing/ dam bca' la bsal ba bstan med kyi de/ rtags tshad ma dang/ khyab pa khas blangs kyis grub cing/ dam bca' la bsal ba bstan med kyi thal 'gyur/ khyab pa tshad ma dang/ rtags khas blangs kyis grub cing/ dam bca' la bsal ba bstan med kyi thal 'gyur rnams ni/ ltar snang bdun dang/ de las gzhan pa'i thal 'gyur rnams ni yang dag bdun yin pa'i phyir/ gsum pa yang dag bdun la sgrub byed 'phen mi 'phen 'byed tshul ni/ thal 'gyur yang dag bdun po de'i nang nas sgrub byed 'phen pa'i thal 'gyur ni yod de/ rtags khas blangs pa dang/ khyab pa tshad mas grub cing/ dam bca' la bsal ba 'bab pa'i thal 'gyur des sgrub byed 'phen pa'i phyir/ de yin na/ sgrub bye 'phen pas ma khyab ste/ sgra chos can rtag par thal/ sgra'i ldog pa yin pa'i phyir/ zhes pa lta bu sgrub byed mi 'phen @32a @#/ /pa'i phyir/ de ni bdun pa'i phyed kyis 'phen pa'i go don yin no/ /gnyis pa rigs gter pas skyon brjod tshul ni/ rigs gter las/ thal 'gyur bzhi la bcu bzhi zhes/ /kha ba can pa de ltar 'dod/ ldog par nus dang mi nus la/ yang dag ltar snang bdun bdun yin/ /drug dang phyed kyis mi 'phen la/ /bdun pa'i phyed kyis 'phen zhes zer/ /zhes phyogs snga ma brjod nas/ de 'gog pa la/ rang rgyud la yang mtshungs phyir dang/ /rtags med khyab pa 'gal phyir dang/ /rtags brjod nges pa mi rung phyir/ /thal 'gyur bzhir dbyer mi 'thad do/ /ma grub gnyis su dbye bas lhag /'gal ba'i thal 'gyur ltar snang chad/ /rtags med khyab pa sgrub pa 'khrul/ /de na thal 'gyur bcu bzhi min/ /zhes bshad/ de'i don ni/ gzhan rnams sla zhing/ drug dang phyed kyis mi 'phen zhing/ /bdun pa'i phyed kyis 'phen zhes zer/ /zhes pa ni/ thal 'gyur bcu bzhi po la yang dag bdun dang ltar snang bdun du phye ba'i yang dag dang po drug dang/ phyed zhes bcu bzhi po'i phyed ltar snang bdun dang/ bdun pa'i phyed thal 'gyur yang dag bdun po de'i chos can gzhi ma grub bzung ba rnams kyis sgrub byed mi 'phen la/ thal 'gyur yang dag bdun po de'i phyed chos can gzhi grub bzung ba rnams kyis sgrub byed 'phen zhes pa'i don yin zhes zer ro/ /skyon 'jug tshul ston pa la/ rang rgyud la ni mtshungs phyir dang/ /zhes pa man chad kyi don ni/ thal 'gyur la rtsa ba'i sgo nas dbye na bzhi mi 'thad pa dang/ yan lag gi sgo nas dbye ba bcu bzhi mi 'thad pa dang gnyis/ dang po rtsa ba'i sgo nas dbye ba bzhi mi 'thad de/ de ltar na rang rgyud kyi rtags sbyor la yang rtags khyab gnyis ka ma grub pa/ rtags kho na ma grub pa dang/ khyab pa kho na ma grub pa sogs bzhir 'byed rigs par thal/ thal 'gyur la de ltar 'byed rigs pa'i phyir/ gzhan yang/ de ltar mi rigs te/ @32b rtags med pa la khyab pa grub ma grub brjod pa ni/ dper na/ srog gi dbang po 'gag nas dbang po gzhan yod med dpyod pa ltar 'gal ba'i phyir dang/ sde bdun nas ma bshad pa'i thal 'gyur gyi dbye ba rnams mu stegs pas gtags pa'i rtags chos kyi 'brel ba ltar ha cang thal ba'i phyir/ gnyis pa thal 'gyur la yan lag gi sgo nas bcu bzhir dbye ba mi 'thad de/ ma grub pa'i thal 'gyur la/ rtags kho na ma grub pa'i thal 'gyur dang/ khyab pa kho na ma grub pa'i thal 'gyur gnyis su phye bas lhag /sgra chos can/ rtag par thal/ byas pa yin pa'i phyir/ zhes pa lta bu 'gal ba'i thal 'gyur ltar snang chad pa'i phyir dang/ rtags med pas khyab pa 'khrul pa'i phyir zhes zer/ gsum pa/ skyon de 'jug mi 'jug dpyad pa la/ rigs gter pa'i skyon de rnams cha rtsang la mi 'jug ste/ dang por phyogs snga'i don/ bdun pa'i phyed kyis 'phen zhes zer/ /zhes pa'i don la/ thal 'gyur yang dag bdun po de'i phyed chos can gzhi grub pa rnams kyis sgrub byed 'phen pa mi 'thad pa'i phyir/ chos can gzhi grub pa'i sgrub byed mi 'phen pa du ma yod pa'i phyir te/ sgra chos can/ rtag par thal/ sgra'i ldog pa yin pa'i phyir zhes pa lta bu sgrub byed mi 'phen pa'i phyir dang/ rang rgyud kyi rtags sbyor la de ltar 'byed rigs par 'dod pa'i phyir/ gzhan yang gzhan skyon de rnams mi 'jug ste/ rtags med kyang/ khyab pa grub pa mtha' yas pa yod pa'i phyir te/ sgra chos can/ ma byas par thal/ rtag pa'i phyir/ zhes pa lta bu dang/ sgra chos can/ med par thal/ rtag dngos yin pa'i phyir/ zhes pa lta bu'i rtags ma grub kyang/ khyab pa grub pa'i phyir dang/ rigs gter rang lugs la/ sgra chos can/ ma byas par thal/ rtag pa'i phyir zhes pa'i thal 'gyur gyi rtags ma grub cing/ rtag pa'i rtags kyis sgra ma byas par sgrub @33a @#/ /pa'i gtan tshigs grub par 'dod pa dang/ 'gal ba'i phyir/ gzhan yang 'gal ba'i thal 'gyur ni ma 'chad de/ de rtags dang khyab pa khas blangs kyis grub kyang/ dam bca' la bsal ba 'bab pa'i thal 'gyur gyi nang du 'du ba'i phyir/ bzhi pa thal 'gyur gyi dbye ba gzhan bstan pa la/ yang thal 'gyur la dbye na bzhi yod de/ rma bya dug 'joms kyi thal 'gyur/ dpa' po lag rdum gyi thal 'gyur/ mtshon cha khri skyogs kyi thal 'gyur/ gnam lcags 'bar ba'i thal 'gyur rnams su yod pa'i phyir/ dang po ni/ sngar bshad pa'i thal 'gyur bcu bzhi po'i nang nas/ bsal ba bstan du med pa'i thal 'gyur rnams la bya ba yin te/ thal 'gyur de dag la gang zag pha rol pos 'dod lan btab pas/ rma byas dug zos par ltar/ gang zag de la gnod par mi nus pas de ltar brjod pa'i phyir/ gnyis pa ni/ thal 'gyur bcu bzhi po'i nang nas/ rtags ma grub pa'i thal 'gyur rnams la bya ba yin te/ dpa' bo lag rdum des gang zag pha rol po pham par byed mi nus pa ltar/ thal 'gyur des kyang gang zag pha rol po pham par byed mi nus pas/ de la de ltar brjod pa'i phyir/ gsum pa ni thal 'gyur bcu bzhi po'i nang nas/ khyab pa grub pa'i thal 'gyur rnams la bya ste/ mtshon cha khri skyogs la brten nas pha rol po dang rtsod pa 'phel ba ltar thal 'gyur de rnams la yang gang zag pha rol pos dngos skyon brjod pa'i sgo nas rtsod pa 'phel bar 'gyur bas/ de la de ltar brjod pa'i phyir/ bzhi pa ni thal 'gyur bcu bzhi po'i nang nas/ 'khor gsum tshang ba'i thal 'gyur rnams la bya ste/ gnam lcags 'bar ba de ldog par dka' ba ltar/ 'khor gsum tshang ba'i thal 'gyur de rnams kyang gang zag pha rol pos lan gyis ldog par dka' bas/ de rnams la de ltar brjod pa'i phyir/ gnyis pa thal 'gyur yang dag gi khyad @33b par bye brag tu bshad pa la/ thal 'gyur yang dag la mtshan nyid/ dbye ba/ zhar la thal 'gyur gyi lan 'debs tshul bstan pa dang gsum/ dang po ni/ rtags dang khyab pa gang zag pha rol pos blo ngo bor grub cing/ dam bca' la bsal ba 'bab pa'i thal ngag rnam dag /thal 'gyur yang dag gi mtshan nyid/ gnyis pa/ de la dbye na/ sgrub byed mi 'phen pa'i thal 'gyur yang dag dang de 'phen pa'i thal 'gyur yang dag gnyis/ dang po ni/ thal 'gyur yang dag gang zhig rang gi dngos bstan ldog na/ tshul gsum 'phen par mi nus pa'i thal ngag rnam dag de/ dang po'i mtshan nyid/ mtshan gzhi ni sgra mi rtag par khas len pa'i gang zag gi ngo bor 'phangs pa'i sgra chos can/ mi rtag par thal/ byas pa'i phyir/ zhes pa lta bu/ khyad chos gsum dang ldan pa'i thal 'gyur yang dag gang zhig /rang gis dngos bstan ldog na/ tshul gsum 'phen par nus pa'i thal ngag rnam dag de/ gnyis pa'i mtshan nyid/ de la dbye na/ ldog pa rang rigs 'phen pa'i thal 'gyur dang/ /ldog pa gzhan rigs 'phen pa'i thal 'gyur gnyis/ /sgrub byed 'phen pa'i thal 'gyur yang dag yin pa gang zhig /ldog pa rang rgyud rang dang/ ming rigs gcig par 'phen pa'i thal ngag rnam dag de dang po'i mtshan nyid/ de la dbye na gsum/ rang bzhin dang 'gal ba'i rang bzhin dmigs pa'i rtags yang dag 'phen pa'i rang bzhin dang 'gal ba'i rang bzhin dmigs pa'i thal 'gyur dang/ rgyu dang 'gal ba'i 'bras bu dmigs pa'i rtags yang dag 'phen pa'i rgyu dang 'gal ba'i 'bras bu dmigs pa'i thal 'gyur dang/ 'gal ba'i khyab bya dmigs pa'i rtags yang dag 'phen pa'i 'gal ba'i khyab bya dmigs pa'i thal 'gyur ro/ /dang po'i mtshan gzhi ni/ me stobs chen pos khyab par gnon pa'i shar gzhi chos can/ me stobs @34a @#/ /chen pos khyab par gnon pa ma yin par thal/ grang regs stobs chen yun ring du gnas pa'i phyir/ zhes pa lta bu/ gnyis pa ni/ du ba drag phyur bas khyab par gnon pa'i dngos po chos can/ du ba drag phyur pa'i khyad par gnon pa ma yin par thal/ grang 'bras spu long byed stobs chen rgyun chags yun ring du gnas pa'i phyir/ zhes pa lta bu/ gsum pa ni bum pa chos can/ rang grub tsam nas 'jig nges ma yin par thal/ rang nyid 'jig pa rang las phyis 'byung ba'i 'jig rgyu don gzhan la ltos pa'i dngos po yin pa'i phyir zhes pa lta bu'o/ /kho na re/ rang grub tsam nas 'jig nges min pa de/ rang nyid 'jig pa rang las phyis 'byung ba'i 'jig rgyu don gzhan la ltos pa'i dngos pos khyab bya yin par thal/ thal 'gyur de 'gal ba'i khyab bya dmigs pa'i rtags yang dag 'phen pa'i 'gal ba'i khyab bya dmigs pa'i thal 'gyur yin pa'i phyir/ rtags khas blangs 'dod mi nus te/ rang nyid 'jig pa rang las phyis 'byung ba'i 'jig rgyu don gzhan la ltos pa'i dngos po med pa'i phyir/ gzhan yang de mi 'thad de/ rang grub tsam nas 'jig nges yin pa de/ bum pa rang nyid 'jig pa rang las phyis 'byung ba'i 'jig rgyu don gzhan la ltos pa'i dngos po ma yin par sgrub pa'i rtags yang dag ma yin pa'i phyir te/ bum pa rang grub tsam nas 'jig nges su tshad mas nges pa'i gang zag yin na/ de rang nyid 'jig pa rang las phyis 'byung ba'i 'jig rgyu don gzhan la ltos pa'i dngos po ma yin par tshad mas nges pa'i gang zag yin dgos pa'i phyir/ zhes zer/ thal 'gyur dang po la khyab pa rtsa ba nas ma byung zhing/ gnyis pa mi 'thad de/ de ltar na/ bum pa ni/ rang grub tsam nas 'jig nges yin te/ rang nyid 'jig pa rang las phyis 'byung ba'i 'jig rgyu don gzhan la ltos med kyi dngos po ma yin pa'i phyir/ zhes pa'i rtags sbyor @34b 'di nges pa'i ltos pa 'gog pa'i rtags yang dag gi rtags sbyor ma yin dgos de ltar na nges pas ltos pa 'gog pa'i rtags yang dag med dgos de ltar na/ ltos pa'i nges pa 'gog pa'i rtags yang dag med par 'gyur ba'i phyir/ gzhan yang thal 'gyur de 'gal khyab dmigs pa'i rtags yang dag 'phen pa'i 'gal khyab dmigs pa'i thal 'gyur ma yin na/ rnam nges las/ 'gal ba'i khyab ba dmigs pa ni/ dper na/ dngos po byung ba yang 'jig par 'gyur ba'i nges pa med de/ rgyu gzhan la ltos pa'i phyir/ zhes pa lta bu'o/ /zhes gsungs pa'i don gang yin soms shig /yang rig gter ba'i rjes 'brang kha cig /ldog pa rang rigs 'phen pa'i thal 'gyur la lnga yod de/ sngar bshad pa gsum po de'i steng du rang bzhin dang 'gal ba'i khyab bya dmigs pa'i rtags yang dag 'phen pa'i rang bzhin dang 'gal ba'i khyab bya dmigs pa'i thal 'gyur/ khyab byed 'gal dmigs kyi rtags yang dag 'phen pa'i khyab byed dgal dmigs kyi thal 'gyur dang lnga yod de/ mtshan gzhi ni/ dang po gsum sngar bzhin/ bzhi pa ni/ tsan dan gyi me stobs chen pos khyab par gnon pa'i shar gzhi chos can tsan dan gyi me stobs chen pos khyab par gnon pa ma yin par thal/ kha ba'i reg pa yod pa'i phyir/ gnyis pa ni/ rtsod gzhi dang/ gsal ba sngar bzhin la/ grang reg yod pa'i phyir zhes zer/ snga ma mi 'thad de/ tsan dan gyi me stobs chen po de/ tsan dan gyi me stobs chen pos khyab par gnon pa'i shar gzhir kha ba'i reg pa 'gog pa'i rtags yang dag ma yin pa'i phyir te/ de der grang reg 'gog pa'i rtags yang dag ma yin pa'i phyir te/ de der grang reg 'gog pa'i rtags yang dag yin na/ tsan dan gyi du ba de/ tsan dan gyi du ba dang ldan pa'i la la me yod par sgrub pa'i rtags yin dgos pa las/ de ltar ma yin pa'i phyir te/ tsan dan gyi me lkog du gyur pa na tsan dan gyi du pa'i spu ris mi zin pa'i phyir/ gzhan yang/ de mi rigs te/ tsan dan gyi me de de stobs chen pos khyab par gnon pa'i shar gzhir grang @35a @#/ /reg 'gog pa'i rtags yang dag yin zhing /thal 'gyur de rang bzhin dang 'gal ba'i khyab bya dmigs pa yin pa'i phyir/ yang rig gter pa'i rjes 'brang gi mkhas pa kha cig /ldog pa rang rigs 'phen pa'i thal 'gyur snga ma bzhi'i steng du 'bras bu dang 'gal ba'i rgyu dmigs pa'i rtags yang dag 'phen pa'i 'bras bu dang 'gal ba'i rgyu dmigs pa'i thal 'gyur dang lnga/ mtshan gzhi ni/ me rgyu nus pa stobs chen pos khyab par gnon pa'i shar gzhi chos can/ me rgyu nus pa thogs med med par thal/ grang rgyu nus pa thogs med yod pa'i phyir/ zhes pa lta bu zer/ de ni mi rigs te/ de ni rigs gter las/ nus pa thogs med med min zhing/ /rgyu med phyir na 'gog mi nus/ /zhes bya ba dang 'gal ba'i phyir/ /sgrub byed 'phen pa'i thal 'gyur yang dag yin pa gang zhig /ldog pa rang rgyud rang dang ming rigs mi gcig pa 'phen pa'i thal ngag rnam dag de/ ldog pa gzhan rigs 'phen pa'i thal 'gyur yang dag gi mtshan nyid/ de la dbye na brgyad yod de/ lhan cig mi gnas 'gal la rten pa 'di bzhi/ lhan cig mi gnas 'gal la rten pa ma yin pa'i de bzhi dang brgyad yod pa'i phyir/ dang po ni/ rgyu dang 'gal ba'i rang bzhin dmigs pa'i rtags yang dag 'phen pa'i rang bzhin dang 'gal ba'i 'bras bu dmigs pa'i thal 'gyur/ khyab byed dang 'gal pa'i rang bzhin dmigs pa'i rtags yang dag 'phen pa'i rang bzhin dang 'gal ba'i khyab bya dmigs pa'i thal 'gyur/ rang bzhin dang 'gal ba'i 'bras bu dmigs pa'i rtags yang dag 'phen pa'i rgyu dang 'gal ba'i rang bzhin dmigs pa'i thal 'gyur/ 'bras bu dang 'gal ba'i rang bzhin dmigs pa'i rtags yang dag 'phen pa'i rang bzhin dang 'gal ba'i rgyu dmigs pa'i thal 'gyur dang bzhi/ dang po'i mtshan gzhi ni/ me stobs chen pos khyab par gnon pa'i shar gzhi chos can/ me stobs chen pos khyab par gnon pa'i dngos po ma yin par thal/ grang 'bras spu long byed yod @35b pa'i phyir/ gnyis pa ni de chos can/ bsal ba sngar bzhin la/ kha ba'i reg pa yod pa'i phyir/ gsum pa ni/ du ba drag phyur bas khyab par gnon pa'i shar gzhi chos can/ des khyad par gnon pa ma yin par thal/ grang reg yod pa'i phyir/ bzhi pa ni/ me stobs chen pos khyab par gnon pa'i shar gzhi chos can/ me stobs chen pos khyab par gnon pa'i dngos po ma yin par thal/ grang rgyu nus pa thogs med yod pa'i phyir/ zhes pa'o/ /gnyis pa lhan cig mi gnas 'gal la rten pa ma yin pa'i ldog pa gzhan rigs 'phen pa'i thal 'gyur bzhi ni/ rgyu ma dmigs pa'i rtags yang dag 'phen pa'i 'bras bu dmigs pa'i thal 'gyur/ khyab byed ma dmigs pa'i rtags yang dag 'phen pa'i khyab bya dmigs pa'i de/ 'bras bu dmigs pa'i rtags yang dag 'phen pa'i rgyu ma dmigs pa'i thal 'gyur/ khyab bya dmigs pa'i rtags yang dag 'phen pa'i rang bzhin ma dmigs pa'i thal 'gyur/ dang po'i mtshan gzhi/ me med mtshan mo'i rgya mtshor chos can/ me yod par thal/ du ba yod pa'i phyir/ gnyis pa'i mtshan gzhi ni/ shing tshad mas ma dmigs pa'i brag rdzong na chos can/ shing yod par thal sha ba yod pa'i phyir/ gsum pa ni/ du ldan la chos can/ du ba med par thal/ me med pa'i phyir/ bzhi pa ni sha ba sgur skyog po chos can/ sha ba ma yin par thal/ shing ma yin pa'i phyir/ zhes pa lta bu rnams yin/ gsum pa zhar la thal 'gyur gyi lan 'debs tshul bshad pa la/ gzhan lugs brjod pa dang/ rang lugs gnyis dang po la/ cha rtsang pa'i lugs dang/ rigs gter ba'i lugs gnyis/ dang po ni/ thal 'gyur gyi lan 'debs tshul gsum du grangs nges te/ 'dod/ rtags ma grub/ khyab pa med dang gsum du nges pa'i phyir/ zhes zer/ de la rigs gter ba na re/ khyab pa 'gal ba'i thal 'gyur dang/ khyab pa ma nges pa'i thal 'gyur gnyis la/ khyab pa ma grub zhes pa'i lan 'debs rigs par thal/ dam bca' de'i phyir/ 'dod na/ thal 'gyur @36a @#/ /ltar snang thams cad khyab pa 'gal ba'i thal 'gyur dang/ khyab pa ma grub pa'i thal 'gyur gnyis su 'du bar thal/ 'dod pa de'i phyir/ 'dod na/ thal 'gyur ltar snang thams cad rtags ma grub pa'i thal 'gyur dang/ khyab pa ma grub pa'i thal 'gyur gnyis su 'du bar thal/ 'dod pa de'i phyir/ gzhan yang thal 'gyur gyi lan 'debs tshul de mi 'thad de/ sgra chos can/ rtag par thal/ byas pa'i phyir/ zhes pa'i thal 'gyur la khyab pa 'gal ba'i lan ma btab par/ khyab pa ma grub pa'i lan btab na byas pa dang/ rtag pa'i gzhi mthun khas blangs par 'gyur ba lan 'debs tshul de 'khrul bar 'gyur ba'i phyir/ zhes zer/ de skad du yang rigs gter las/ thal 'gyur la ni gum gsum zhes/ /kha ba can pa de skad smra/ /'gal dang ma nges gcig tu 'khrul/ /yang na 'gal la de 'khrul yin/ /zhes gsungs pa'i phyir/ gnyis pa ni/ rig gter ba na re/ thal 'gyur gyi lan la/ 'dod/ rtags ma grub/ khyab pa 'gal/ khyab pa ma nges zhes pa dang/ bzhir grangs nges so zhes zer/ de skad du yang rig gter las/ des na mkhas pa'i thal 'gyur lan/ /rnam par thar ba'i sgo bzhi btab/ lan gyi ldog par mi nus na/ /de'i rjes 'brang dam pa'i lugs/ /zhes gsungs pa'i phyir/ gnyis pa rang lugs la/ de gnyis ka mi 'thad de/ thal 'gyur gyi lan la 'dod/ rtags ma grub/ khyib pa med/ rtags la the tshom za/ bsal ba la the tshom za/ chos can skyon can yin/ bshog lugs skyon can yin pa la sogs pa mtha' yas ba cig yod pa'i phyir/ 'di'i skabs su brjod bya don gyi rang bzhin bshad pa la/ shugs bstan sgrub bya'i rang bzhin bshad pa dang/ dngos bstan gtan tshigs kyi rab dbye bshad pa gnyis/ dang po la/ rang lugs kyi dam bca'i mtshan nyid bshad pa/ gzhan lugs kyi dam bca'i mtshan nyid dgag pa/ gzhan gyi dam bca' ltar snang gi dpe dgag pa dang gsum/ dang po la tshad ma mdo las gsungs tshul/ de bstan bcos rnam 'grel gyis 'grel tshul dang gnyis/ dang po la @36b bshad bya'i lung 'god pa dang/ lung gi don bshad pa gnyis/ dang po ni/ mdo 'gyur rnying du/ ngo bo kho na bstan bya ba/ /rang nyid 'dod gyur ma gsal ba/ /mngon sum don dang rjes dpag dang/ /yid ches grags pa'i rang rtan la'o/ /zhes dang/ mdo 'gyur gsar las/ rang gi ngo bo kho na bstan/ /bdag 'dod rang gi chos can la'o/ /mngon sum don dang rjes dpag dang/ /yid ches grags pa'i ma gsal ba'o/ /zhes gsungs pa'i phyir/ de'i rang 'grel 'gyur gsar las/ /rang gi ngo bo kho na bstan/ /bdag 'dod/ rang gi ngo bo zhes bya ba ni/ sgrub bya'i ngo bo yin gyi/ sgrub byed ma grub pa'i ngo bo ni min no/ /de ltar na gtan tshigs ma grub pa dang dpe ltar snang ba dag brjod pa yongs su spangs pa yin no/ /de dag sgrub par bya ba nyid du bstan pa min no/ /bdag nyid kyi 'dod pa zhes bya ba 'di ni bstan bcos la ma brten pa'i khas blangs pa dag fbstan pa yin no/ /de yang rang gi chos can la'o/ /mngon sum don dang rjes dpag dang/ /yid ches grags pa'i ma gsal pa'o/ /chos can gang gis chos kyi khyad par sgrub par 'dod pa de la gal te sgrub bya'i chos dang 'gal ba mngon sum dang/ rjes su dpag pa dang/ lung dang grags pa'i chos gzhan gyi ma gsal ba'o/ /de ltar na/ sgrub bya bstan pa kha na ma thob pa med pa yin no/ /gzhan du na/ sgra ni nyan par bya ba ma yin pa'i phyir/ bum pa rtag gzhal bya'i don sgrub par byed pa'i tshad ma bdag med do zhes bya ba ni/ dam bcas pa tsam gyis fder snang ba yin no/ /gang la thun mong ma yin pa'i phyir/ rjes su dpag pa med pa la yang sgra grags pa'i sgo nas sel bar byed de/ dper na ri bong can ni zla ba min te/ yod pa'i phyir zhes pa lta bu'o/ /'dir yang chos kyi rang gi ngo bo dang 'gal ba gsal ba'i sgo tsam zhig bstan pa yin la/ phyogs 'dis ni chos dang chos can gyi khyad par rang gi ngo bo sel bar byed pa rig par bya ba ste/ dper na/ yan lag rnams ni yan lag can las gzhan min te/ srang dma' ba'i khyad par 'dzin pa med pa'i phyir/ yan lag can @37a @#/ /ni yan lag rnams las gzhan min te/ mngon sum min pa nyid du thal ba'i phyir/ rdzas ni yod pa min te/ yon tan dang rdzas dag rdzas dang rdzas min ba nyid du thal ba'i phyir/ de bzhin du ngag thams cad rdzun pa'i don can yin no/ /zhes bya ba 'di ni ngag dang ngag gi bdag nyid rdzun pa'i bdag nyid can nyid du ngag yod pa gang yin pa de ni rdzun ba nyid yin na/ gal te ngag dang rdzun bdag thams cad sel bar byed pa de ltar gnyis ka'i rang gi ngo bo sel bar byed pa yin no/ /ci ste ngag gi bdag nyid rdzun pa nyid kyis sel par fbyed pa de ltar na/ gnyis ka'i khyad par sel bar byed pa yin no/ /zhes gsungs pa'i phyir/ gnyis pa lung gi don bshad pa la/ ngo bo kho na bstan bya ba/ rang nyid 'dod gyur ma gsal ba/ /zhes sogs kyis/ gzhan don sgrub bya yang dag yin na/ sgrub bya kho na bstan par bya bar sngar rgol rang nyid kyis 'dod cing/ tshad mas ma gsal ba gcig dgos par bstan/ de yang ngo bo zhes pas rnam bcad la sgra nyan bya yin pa lta bu gzhan don sgrub bya yang dag yin pa bcad nas/ yongs gcod la sbyor ba skor cig gi gzhan don sgrub bya yin na/ sbyor ba skor cig gi phyi rgol yang dag gis tshad mas ma grub pa gcig dgos par bstan/ kho na zhes pas rnam bcad la/ sgra chos can rtag ste/ mig shes kyi bzung bya yin pa'i phyir/ dper na/ blo bzhin/ zhes bkod pa na/ sgra mig shes kyi bzung bya yin pa lta bu gzhan don sgrub bya yang dag yin pa bcad nas/ yongs gcod la sbyor ba skor cig gi gzhan don sgrub bya yang dag yin na/ sgrub byed du bkod bzhin pa ma yin pa cig dgos par bstan/ rang nyid zhes pas rnam bcad la sgra rtag pa nam mkha'i yon tan lta bu/ gzhan don sgrub bya yang dag yin pa bcad nas/ yongs gcod la sbyor ba skor cig gi gzhan don sgrub bya yang dag yin na/ snga rgol rang nyid kyis sgrub byar khas blangs pa cig dgos par bstan/ 'dod pa zhes pas rnam bcad la/ /gzhan don sgrub bya yang dag yin na/ / @37b gzhan don sgrub ngag yang dag gis dngos su brjod dgos pa nge bcad nas yongs bcod la/ byas rtags kyis sgra mi rtag par sgrub pa'i sgrub ngag yang dag gis dngos su ma brjod kyang/ byas rtags kyis sgrub bya yang dag du 'gyur ba cig yod par bstan/ ma bsal ba zhes pas/ rnam bcad la tshad mas bsal ba rnams gzhan don sgrub bya yang dag yin pa bcad nas/ yongs gcod la sbyor ba skor cig gi gzhan don sgrub bya yang dag yin na/ tshad mas ma bsal ba cig dgos par bstan/ 'o na/ tshad ma gang gis ma bsal ba cig dgos par bstan zhe na/ sel byed kyi tshad ma bzhis ma gsal ba gcig dgos zhes bstan par byed pa la/ mngon sum don dang rjes dpag dang/ /yid ches grags pa'i zhes byung rten gang gis steng du ma bsal ba cig dgos zhe na/ rtags yang dag gi sgrub bya'i chos kyi rten gzhir gyur pa'i rten shes 'dod chos can gyi steng du ma bsal ba cig dgos zhes ston par byed pa la/ mdo 'gyur rnying du/ rang rten la'o zhes pa dang/ 'gyur gsar du/ rang gi chos can la'o/ /zhes gsungs pa'i phyir/ de skad du yang/ 'grel bshad rgyal dbang blo las/ de ltar na ngo bo zhes pas ma grub pa bzung ngo/ /de'i rnam par bcad pa ni/ ma grub pa ste/ sgra nyan par bya'o zhes pa lta bu'o/ /ngo bo kho na zhes pa'i tshig slad kyis ni sgrub par bya ba yin par bzung ngo/ /de'i rnam par bcad pa ni ma grub kyang sgrub par bya ba nyid du 'dod pa ste/ dper na; ma grub pa'i rtags dang dpe rtag ste/ mig shes kyi bzung bya yin pa'i phyir/ blo bzhin zhes pa 'di lta bu'i ngo bo nyid dag go /zhes gsungs pa'i phyir/ 'o na log phyogs dam bca' ltar snang gi ngo bo de gang zhe na/ de ngos 'dzin par byed pa la/ gzhan du na sgra ni nyan par bya ba min te/ zhes pa nas/ gnyis ka'i khyad par gsal bar byed pa yin no/ /zhes pa'i bar byung/ de yang chos can gyi ngo bo la mngon sum gyis gnod pa'i/ dam bca' ltar snang gi dpe ngos 'dzin par byed pa la/ @38a @#/ /gzhan dun skra ni nyan par bya ba min te/ zhes pa byung/ chos can gyi ngo bo la dngos stobs rjes dpag gis gnod pa'i dam bca' ltar snang gi ngo bo ngos 'dzin par byed pa la thun mong ma yin pa'i phyir/ zhes pa nas/ yod pa'i phyir/ zhes pa'i bar byung/ chos kyi ngo bo la tshad mas gnod pa'i dam bca' ltar snang gi dpe dang ngo bo de dag ngos bzung ba la/ bum pa rtag zhes pa 'di byung/ chos can gyi ngo bo la rang gi dngos shugs 'gal bas gnod pa'i dam bca' ltar snang gi ngo bo ngos 'dzin par byed pa la/ gzhal bya'i don 'grub par byed pa'i zhes pa nas der snang ba yin no/ /zhes pa'i bar byung/ chos can gyi ngo bo la grags pa'i rjes dpag gis gnod pa'i dam bca' ltar snang gi ngo bo ngos 'dzin par byed pa la/ gang la thun mong ma yin par/ /zhes pa nas/ yod pa'i phyir zhes pa'i bar byung/ chos kyi ngo bo la tshad mas gnod pa'i dam bca' ltar snang gi dpe dang ngo bo de dag ngos bzung ba la brten nas/ chos kyi khyad pa dang/ chos can gyi khyad par dang/ chos can gyi ngo bo la tshad mas gnod ba'i dam bca' ltar snang gi dpe lnga rtogs nus zhes ston bar byed pa la/ 'di yang chos kyi rang gi ngo bo dang 'gal ba bsal ba'i sgo tsam zhig bstan pa yin la/ zhes pa nas/ gnyis ka'i khyad par sel bar byed pa yin no/ /zhes pa'i bar byung/ gnyis pa de nyid bstan bcos rnam 'grel du 'grel tshul la/ sngar bshad pa'i mdo rtsa 'grel de dag gi don 'grel bar byed pa la/ sgrub brjod rtogs pa'i don chen nyid/ /yin yang rmongs med phyir mtshan nyid/ /zhes pa nas/ dper brjod gzhan yang rtogs par bya/ /zhes pa'i bar byung/ des na sgrub bya'i gzhung 'di gang las 'phros na/ gong du rang res khyab sngon can la de med kyang/ zhes sogs kyi skabs su phyogs tshig sgrub ngag yang dag gi yan lag yin pa bkag pa la/ kho na re/ 'o na/ bstan bcos su sgrub ngag gi mtshan nyid 'chad pa'i skabs su phyogs kyi mtshan nyid bstan pa la dgos pa med par thal/ phyogs tshig @38b sgrub ngag yang dag gi yan lag ma yin pa'i phyir zhes zer/ de la khyab pa med kyi lan ston par byed pa la/ sgrub brjod rtogs pa'i don can nyid/ /zhes sogs rkang pa gnyis gsungs/ de'i don ni/ phyogs tshig sgrub ngag yang dag gi yan lag min kyang/ bstan bcos su sgrub ngag gi mtshan nyid 'chad pa'i skabs su phyogs kyi mtshan nyid bstan pa la dgos pa yod de/ phyogs kyi mtshan nyid la rmongs pa ldog pa'i ched yin pa'i phyir/ 'o na bstan bcos su de ltar bstan pa de phyogs kyi mtshan nyid la rmongs pa ldog pa'i phyir du yin na/ de gzhung gang gis bstan zhe na/ tshad ma mdor/ ngo bo kho na bstan bya ba/ /rang nyid 'dod gyur ma bsal ba/ /zhes pa/ de'i don mdor bstan gyis 'grel par byed pa la/ 'dir ngo bo tshig phrad bdag nyid 'dod zhes pa nas/ rgol bas khas blangs pa bzung ngo zhes pa'i par byung/ mdo tshig rkang pa gnyis po de'i don rgyas par 'chad par byed pa la/ ma brjod na yang 'dod pas khyab zhes pa nas/ dper brjod gzhan yang rtogs par bya/ /zhes pa'i bar byung/ 'o na/ ngo bo tshig phrad bdag nyid 'dod/ /zhes sogs kyis tshad ma mdo'i gzhung tshig gnyis po de'i don mdor bstan gyis 'chad tshul ji lta bu zhe na/ de ni yod de/ tshad ma mdo'i ngo bo zhes pa'i tshig don mdor bstan gyis 'chad par byed pa la/ 'dir ngo bo ma grub zhes byung/ mdo'i kho na zhes pa'i don mdor bstan gyi sgo nas 'grel bar byed pa la/ 'dir tshig phrad sgrub byed min/ /zhes byung/ mdo'i 'dod pa zhes pa'i don 'grel bar byed pa la/ 'dir 'dod don brjod zhes byung/ mdo'i rang nyid zhes pa'i tshig don 'grel bar byed pa la/ 'dir bdag nyid rgol bas khas blangs pa bzung ngo/ /zhes byung/ mdo'i ma bsal ba'i don de/ 'dir ngo bo'i tshig phrad bdag nyid 'dod/ /zhes sogs kyi tshigs bcad 'dis shugs la 'grel bar byed/ 'o na/ ma brjod na yang 'dod pas khyab zhes sogs kyis mdo tshig rkang pa gnyis po de'i don rgyas par 'chad tshul ji lta bu snyam @39a @#/ /na; 'di la 'dod pa rgyas par bshad pa dang/ rang nyid rgyas par bshad pa dang/ ma bsal ba rgyas par bshad pa'o/ /dang po ni/ ma brjod na yang zhes pa nas/ 'dir chos 'ba' zhig sgrub bya yin zhes pa'i bar byung/ gnyis pa ni/ chos can gcig la bstan bcos las/ /zhes pa nas/ phyogs de gtan tshigs skyon de nyid/ /zhes pa'i bar gyis 'chad/ gsum pa ni/ khas blangs de yang tshad ma ni zhes pa nas/ mnyan bya'i dbang po spyod yul bshad/ /zhes pa'i bar gyis 'chad/ der ma zad/ mdo 'gyur rnying du rang rten la'o zhes dang/ 'gyur gsar du rang gi chos can la'o/ /zhes gsungs pa'i phyir/ don de 'dir/ kun du rgol ba bdag nyid kyi zhes pa nas/ rten sogs ma grub phyogs skyon min zhes pa'i bar gyis 'chad par byed/ mdo rang 'grel las/ 'dir yang chos kyi rang gi ngo bo dang 'gal ba sel ba'i sgo tsam zhig bstan pa yin la zhes pa'i don 'dir/ 'di sgrub yan lag gyur ba yi zhes pa nas/ dper brjod gzhan yang rtogs par bya zhes pa'i bar gyis 'chad par byed do/ /'o na 'dod pa dang rang nyid dang ma bsal ba gsum la rgyas par byed nas ngo bo dang kho na gnyis la rgyas par mi byed pa'i rgyu mtshan/ gang yin zhe na/ de'i rgyu mtshan yod de/ 'dod pa dang/ rang nyid dang ma bsal ba gsum brjod bya rgya che zhing/ ngo bo dang kho na gnyis/ snga ma gsum las brjod bya rgya chung bas na/ de gnyis la rgyas par ma mdzad pa yin pa'i phyir/ de skad du yang lta dbang blo'i 'grel ba las/ snga ma gnyis don la ma reg par brjod par bya ba mang ba nyid kyis phyir/ /don gyi brjod pa zhes bya ba la sogs pas phyi ma gnyis kyi don 'chad bar byed pa la/ zhes gsungs pa'i phyir/ 'o na mdor bstan du/ rang nyid dang 'dod pa gnyis kyi nang nas/ rang nyid dang bor bstan nas/ rgyas bshad kyi skabs su 'dod pa la rgyas bshad dang por byas nas/ de'i rjes su rang nyid rgyas bshad byed pa dang/ mdor @39b bstan du dgos pa byed pa na yang 'dod pa dang por bshad/ de'i rjes su/ bdag nyid rgol bas khas blangs pa bzung ngo/ /zhes rang nyid rgyas par byed pa'i rgyu mtshan gang zhe na/ de'i rgyu mtshan yod de/ mkhas grub Tik chen ltar na/ rang nyid ces pa'i tshig de kho na zhes ba'i tshig dang/ lhan cig tu bstan pa'i ched yin pa'i phyir/ der bstan pa la dgos pa yod de/ rang nyid ces pa'i tshig gis/ snga rgol gyis khas ma blangs pa rnams gzhan don sgrub bya yang dag yin pa gcod par byed pa yin la/ de yang kho na zhes pa dang/ lhan cig tu bstan pa la ltos pa'i phyir/ de yang ltos pa yin te/ rang nyid ces pa kho na'i tshig dang phrad pa sgrub bya yang dag yin na snga rgol rang nyid kho na'i gzhan don sgrub bya yang dag dag tu khas blangs pa zhes par 'gyur ba'i phyir/ de ltar na yang rgyas bshad du 'dod pa rgyas bshad dang por byas nas/ de'i rjes rang nyid rgyas bshad byed pa'i rgyu mtshan yod de/ 'dod pa zhes pas snga rgol gyi 'dod pa dpag 'dod kyi yul du ma byas pa rnams gzhan don sgrub bya yang dag yin pa gcod par byed la/ rang nyid ces pas snga rgol gyi dpag 'dod kyi yul du ma byas pa'i bstan bcos mkhan po'i 'dod pa rnams gzhan don sgrub bya yang dag yin pa gcod par byed pas/ khyab byed snga rgol gyi dpag 'dod kyi yul du ma byas pa rnams gzhan don sgrub bya yang dag yin par khegs na/ khyab bya snga rgol gyi dpag 'dod kyi yul du ma byas pa'i bstan bcos mkhan po'i 'dod pa gzhan don sgrub bya yang dag yin pa dgag sla ba la dgongs nas de ltar mdzad pa yin pa'i phyir/ ma brjod na yang 'dod pas khyab/ /ces pa nas/ 'ba' zhig sgrub bya yin zhes pa'i bar gyis/ 'dod pa rgyas bshad 'chad tshul ji lta bu snyam na/ 'di la yang/ yongs gcod kyi dgos pa bshad pa dang/ rnam bcad kyi dgos pa bshad pa gnyis dang po ni/ ma brjod na yang 'dod pas khyab zhes pa nas/ mi 'dod pa'am 'bras med 'gyur/ /zhes pa'i bar gyis 'chad/ gnyis pa ni/ / @40a @#/ /'dis ni gnyis bcas sbyor ba la/ /zhes pa nas/ 'ba' zhig sgrub bya yin zhes pa'i bar gyis 'chad do/ /yongs gcod kyi dgos pa bshad pa la/ dgos pa bshad pa dang/ sgrub byed bshad pa gnyis/ dang po ni/ ma brjod na yang zhes pa nas/ chos can khyad par yin par brjod/ /zhes pa'i bar gyis 'chad/ gnyis pa ni/ ma brjod na yang 'dod pa ni/ /zhes pa nas 'bras med 'gyur/ zhes pa'i bar gyis 'chad/ dang po dgos pa bshad pa la/ dgos pa dngos dang/ dgos pa de la rtsod pa spong pa gnyis/ dang po ni/ ma brjod na yang zhes pa rkang pa gnyis kyis 'chad/ gnyis pa la/ lung dang 'gal ba'i rtsod pa spangs ba/ rigs pa dang 'gal ba'i rtsod pa spangs pa gnyis/ dang po ni/ gzhan 'dod thams cad ldog na yang/ /zhes pa'i rkang pa bzhis 'chad/ gnyis pa ni/ de ni ltos nas chos dag dang/ /chos can khyad par yin pa brjod/ /zhes pas 'chad/ gnyis pa sgrub byed bshad pa la yang/ rgol ba 'dod yul gyi chos dang chos can gyi tshogs don sgrub bya yang dag yin pa'i sgrub byed dang/ min pa la gnod byed bstan pa gnyis/ dang po ni/ ma brjod na yang 'dod pa zhes sogs rkang pa drug gis 'chad/ gnyis pa ni/ gal te gang la rtsod pa yis zhes sogs rkang pa bzhis 'chad/ gnyis pa rnam bcad kyi dgos pa bshad pa la yang/ gang rung gis spyi'i don gzhan shes 'dod kyi sgrub bya yang dag yin par 'dod pa khegs pa dang/ mi 'dod pa'i tshogs spyi don gzhan bkag pas 'dod pa'i sgrub bya la gnod par 'dod pa khegs pa dang gnyis/ dang po ni/ 'dis ni gnyis bcas sbyor ba la zhes pa nas/ rjes 'gro med pa'i skyon ldan min/ /zhes pa'i bar gyis 'chad/ gnyis pa ni/ 'dis ni chos can chos dag gis/ /zhes pa nas/ 'dir chos 'ba' zhig sgrub bya yin zhes pa'i bar gyis 'chad/ des na sgrub bya'i rang bzhin gtan la phab pa @40b la; sgrub bya yang dag la mtshan nyid dbye ba/ mtshon bya'i sgra don bshad pa dang gsum/ dang po ni/ chos dang chos can gyi tshogs don gang zhig /rtags yang dag la brten nas dpag bar bya ba sgrub bya yang dag gi mtshan nyid/ gnyis pa ni/ rang don sgrub bya yang dag dang/ /gzhan don sgrub bya yang dag gnyis/ /chos dang chos can gyi tshogs don gang zhig /rang don skabs kyi rtags yang dag la brten nas dpag par bya ba/ rang don sgrub bya yang dag gi mtshan nyid/ gnyis pa la/ tshad ma mdo las gsungs tshul/ rigs sgo las gsungs tshul gnyis/ dang po ni tshad ma mdo las/ ngo bo kho na bstan bya ba/ /zhes sogs rkang pa gnyis kyis gzhan don phyogs yang dag gi mtshan nyid 'chad pa'i tshig zur du ngo bo la sogs pa'i tshig lnga smos dgos par bstan ba yin la/ de yang gzhan don phyogs yang dag gi mtshan nyid la/ rigs mi mthun sel ba'i dbang du byas pa dang/ log rtog sel ba'i dbang du byas pa gnyis las/ dang po'i dbang du byas na/ ngo bo dang/ 'dod pa dang/ ma bsal ba gsum smos/ phyi ma'i dbang du byas na/ kho na dang/ rang nyid gnyis smos pa yin/ de yang rigs mi mthun sel ba'i dbang du byas nas dang po gsum smos pa yin te/ gzhan don sgrub bya yang dag gi rigs mi mthun de la/ phyir rgol la ltos pa'i rigs mi mthun/ snga rgol la ltos pa'i rigs mi mthun rgol phyi rgol gnyis ka la ltos pa'i rigs mi mthun gsum yod pa las/ phyir rgol la ltos pa'i rigs mi mthun sel ba la/ ngo bo zhes pa'i tshig smos/ snga rgol la ltos pa'i rigs mi mthun sel ba la/ 'dod zhes pa'i tshig smos/ rgol phyi rgol gnyis ka la ltos pa'i rigs mi mthun sel ba la/ ma bsal ba zhes pa'i tshig smos pa yin pa'i phyir/ dang po grub ste/ rang nyid gang la sgrub bya yang dag du song ba'i phyir rgol gyi tshad mas grub zin pa phyir rgol la ltos pa'i rigs mi mthun yin la/ de sel ba la ngo bo zhes pa'i tshig smos pa @41a @#/ /yin pa'i phyir/ gnyis pa grub ste/ snga rgol yang dag gi dpag 'dod kyi yul du ma byas pa rnams snga rgol la ltos pa'i rigs mi mthun yin la/ de 'dod pa zhes pas sel bar byed pa'i phyir/ gsum pa grub ste/ tshad mas bsal ba zhugs pa rnams rgol phyir rgol gnyis ka la ltos pa'i rigs mi mthun yin la/ de ma bsal ba zhes pa'i tshig gis sel bar byed pa'i phyir/ de yang/ rang nyid gang la bsgrub bya yang dag tu song ba'i phyir rgol yang dag gi tshad mas grub zin rnams/ phyir rgol la ltos pa'i rigs mi mthun yin te/ rang nyid phyir rgol de'i tshad mas grub zin na/ phyir rgol des rang nyid la shes 'dod mi 'jug pa'i phyir/ snga rgol gyi dpag 'dod yul du ma byas pa rnams snga rgol la ltos pa'i rigs mi mthun yin te/ snga rgol gyi rang nyid dpag 'dod kyi yul du ma byas na/ snga rgol rang nyid sgrub pa'i phyir du rtags yang dag 'god pa la mi 'jug pa'i phyir/ tshad mas bsal ba zhugs pa rnams rgol phyir rgol gnyis ka la ltos pa'i rigs mi mthun yin te/ snga rgol gyi tshad mas bsal ba zhugs na/ snga rgol la dpag 'dod kyi blo mi skye/ phyir rgol gyi tshad mas bsal ba zhugs na phyir rgol de la shes 'dod mi 'jug pa'i phyir ro/ /log rtog sel ba'i dbang du byas nas kho na dang/ rang nyid ces pa'i tshig gnyis smos pa yin te/ ma 'ongs pa na bsgrub byar 'gyur rung dang/ da ltar sgrub byed du bkod bzhin pa rnams bsgrub bya yang dag yin nam snyam pa'i log rtog de kho na zhes pas sel bar byed/ snga rgol la mi ltos pa'i bstan bcos mkhan po'i 'dod pa rnams bsgrub bya yang dag yin nam snyam pa'i log rtog de/ rang nyid ces pas sel bar byed pa'i phyir/ gnyis pa rigs sgo las gsungs tshul ni/ bsgrub par bya ba nyid du 'dod par gyur ba 'gal ba'i don gyi ma bsal ba de yang phyogs yin no/ /zhes gsungs pa'i phyir/ de'i don ni/ tshad mas ma bsal zhing/ rgol ba stobs ldan gyi gzhan don bsgrub bya yang dag tu khas blangs pa de/ gzhan don bsgrub @41b bya yang dag gi mtshan nyid yin zhes pa'i don yin/ gsum pa mtshon bya'i sgra don bshad pa ni/ bsgrub bya yang dag la phyogs zhes bya ba ni rgol bas phyogs su khas blangs pas na phyogs/ rtags yang dag la brten nas dpag par bya ba yin pas na/ bsgrub bya yang dag sgrub byed tshul gsum sel pa'i rjes su dpag par bya ba yin pas na/ rjes su dpag bya/ rgol bas dam bcas pas na dam bca' yang dag ces kyang bya'o/ /yang na log rtog sel tshul ni/ kho na dang/ rang nyid ces pa'i tshig gis log rtog sel la/ de'i sel tshul ni/ kho na zhes pa'i tshig gis ma 'ongs pa na/ bsgrub byar 'gyur rung gi dpe rtags ma grub pa/ de ltar bsgrub bya yang dag yin nam snyam pa'i log rtog sel/ de lta bu'i log rtog ji ltar 'byung snyan na/ ngo bo kho na bstan bya ba/ /rang nyid 'dod gyur ma bsal ba/ /zhes rang nyid 'dod ces pa'i tshig de/ bstan bya ba dang khyad gzhi khyad chos su 'brel la/ bstan bya zhes pa'i tshig de yang/ dus gsum ka la 'jug pa'i yul can yin pas/ dpe rtags ma grub pa yang/ ma 'ongs pa na bsgrub byar 'gyur bas/ de gzhan don bsgrub bya yang dag yin nam snyam pa'i log rtog 'byung ngo/ kho na zhes pa'i tshig la brten nas snga rgol gyis khas ma blangs/ bstan bcos mkhan po'i 'dod pa gzhan don bsgrub bya yang dag yin nam snyam pa'i log rtog sel ba yin te/ bstan bcos mkhan po'i 'dod pa rnams snga rgol gyis bsgrub byar khas ma blangs pa'i phyir/ zhes pa yang 'go mtshams sgrig nas skabs dang sbyar ro// // ! na mo gu ru mnydzu g+ho Sha ya/ rab 'byams rgyal ba'i yab gcig 'jam pa'i dbyangs/ /rab mang 'gro la brtse bas nyer dgongs nas/ /rab mdzes ngur smrig 'dzin pa kun gyi gtso/ /rab skyabs 'jam mgon bla mas dge legs stsol/ /gang gi sgyu 'phrul gang la gang 'dul skyabs/ /skyabs mchog ngag gi dbang phyug mtshan snyan gtam/ /gtam snyan snyan grags srid gsum yongs la khyab/ /khyab bdag 'jam dpal dpa' bo gtsug tu mchod/ /'khor 'das kun gyi gzhi rtsa zla med pa/ /kun gzhi'i rnam rig dag pa gser @42a @#/ /gyi gdugs/ /'khor ba'i tsha gdung sel ba'i skyabs kyi phul/ /phul byung grib bsil 'dzam gling yongs la khyab/ /sangs rgyas rjes su dran pa'i thabs kyi gtso/ /gtso bo gsung du nges pa'i tshul dran te/ /de nyid thos bsam sgom pa'i 'od snang gis/ /rmongs mun ma lus sel bar dran pa'i rigs/ /rgyu mtshan de'i phyir rig pa'i gnam lcags kyis/ /rgol ngan brag ri shig la thogs med pa'i/ /thabs tshul bsam ste tshad ma rnam 'grel la/ /thos bsam sgom brtson 'dun ma'i yang rtser son/ /de'i phyir rigs pa'i gzhung lugs ma lus pa'i/ /gtso bo snge bdun rigs lam bzang po yis/ /chen mo tshad ma rnam 'grel yin pa la/ /nges pa rnyed pa'i gtam 'di ngo mtshar rmad/ /mi shes rmongs pa'i dri ma kun bcom nas/ /rigs pa'i rgyal po rgyud la skye ba'i phyir/ /rig gzhung tshad ma'i 'grel don rab rdzogs pa'i/ tshul de par du bkod pa'i lhag bsam mchog /rnam dag rigs pa'i mche sder rnon po yis/ /rgol ngan gnyis 'thung myos bum phye ma brgyar/ /rlag byed mkhas grub gdong lnga'i dbang po yis/ /yon tan rtsal rdzogs thabs la 'bad 'di mtshar/ /rig gzhung par du bkod pa'i 'du byed kyis/ /ral gri rnon pos srid pa'i dra ba kun/ /dum bur bcad de thar pa'i khang bzang du/ /myur bar bgrod thabs 'dun ma'i yang rtser son/ /rgyu sbyor mdzod pa blo bzang legs bshad dang/ /de grogs dge slong kun bzang rgyal mtshan zung/ /dam pa'i mgon gyi 'bral med rjes 'dzin cing/ /gsung bzang bdud rtsi'i dpal la spyod par shog /de yi mthu las sa lam bgrod pa kun/ /rab rdzogs sku bzhi'i go 'phang mngon gyur te/ /mtha' @42b dag 'gro 'di go 'phang de nyid la/ /'god pa'i rnam 'dren dpa' bor 'gyur bar shog /rgyal ba sras bcas thugs rje'i byin rlabs dang/ /rgyu 'bras rten 'brel bslu med bden pa'i mthus/ /yid la bsam pa'i re ba ma lus pa/ /lhun grub bkra shis rgya mtsho rgyas gyur cig /ces tshad ma'i gzhung lugs par du bkod pa'i dge bsngo'i smon tshig 'di lta bu zhig dgos zhes/ mdzod pa blo bzang legs bshad dang/ zhabs gras dge slong kun bzang rgyal mtshan gnyis nas bskul ngor shAkya'i dge slong blo bzang dpal ldan bstan pa'i nyi ma phyogs las rnam rgyal dpal bzang pos sbyar ba'o// //! zhes rgyas pa'i bstan bcos tshad ma rnam 'grel rje btsun chos kyi rgyal mtshan dpal bzang po'i gsung rgyun legs bshad phul du byung ba 'di nyid sngon chad zur rgyan sogs le tshan bzhi par du 'khod pa zhig mi 'dug par brten dus gsum rgyal ba kun gyi spyi gzugs rigs dang/ dkyil 'khor kun gyi khyab bdag rdo rje 'chang chen po yongs rdzogs bstan pa'i bdag po bka' drin gsum ldan mtshan brjod par dka' ba yongs 'dzin 'khri chen ngag dbang snyan grags dpal bzang po de nyid kyi 'di lta bu zhig par du sgrub na bstan rgyun la shin tu phan par dgongs pa ltar/ mdzod pa blo bzang legs bshad kyis dam pa de nyid kyi thugs dgongs rdzogs phyir dang chos spyin 'dzad pa med pa rgya cher spel slad du/ ser byes dge bshes bdun tsam gyi dam pa de nyid kyi phyag dpe dang/ dpe dag pa kha shas go bsdur dpyad zhus nan tan yang yang bgyis te/ zhus dag bris brkos sogs nas lhag chad nor 'khrul gyi dri mas ma slad pa'o// // @43a @##/ /oM swa sti/ /rnam grol zhi ba'i rgya mtshor ro gcig tu/ /gzhol ba'i mtha' yas chos tshul dal 'bab klung/ /tshig gi gthegs ma res kyang dug gsum gyi/ /dri ma yongs 'khrud legs bshad bdud rtsi 'di// dpar du bskrun pa'i rnam dkar phung po'i mthus/ /yang dag chos kyi sgo mo stong phrag brgya/ /gdangs ste rgyud lnga'i 'gro ba ma lus pa/ /nges legs nor bu'i mdzod la dbang 'byor shog/ //ces 'dzam gling yangs pa'i khyon la 'tshe med zhi ba'i lam ston rnam 'dren shAkya sengge'i ring lugs sgo kun nas rgyas pa sogs 'phral yun legs tshogs du ma'i ched du dmigs/ /nang bstan grub mtha' ris med kyi gsung rab dag dpar du bskrun dang bskrun 'gyur gang la'ang sbyar chog pa'i dge bsngo'i smon tshig tu shAkya'i dge sbyong chos smra ba ngag dbang blo bzang bstan 'dzin rgya mtshos sbyar ba'o// //par 'di ser byes grwa tshang du bzhugs// //