@##/
/rgya gar skad du/ dznyA na sA ra sa

mu tstsha ya nA ma/ bod skad du/ ye shes snying po kun las
btus pa zhes bya ba/ sangs rgyas la phyag 'tshal lo/ /dpal mgon
bla ma la btud nas/ /byis rnams sdug bsngal zhi bya'i phyir/
/ye shes snying po kun las btus/ /'phags pa lha yis sbyar
ba'o/ /dngos dang

dngos med las grol zhing/ /dngos dang dngos med rab ldan pa/
/'gyur ba med par grol ba'i mchog /yid kyi rang bzhin grol
ba'i gnas/ /gang yin de la bsam gtan gyis/ /rtog sems 'khor lo
'dzin byed pa/ /'gro dang dngos po'i ngo bo rnams/ /rig pa'i
ming du de

brjod do/ /dngos med stong pa mkha' 'dra ba/ /yod pa rnam par
spangs pa ni/ /de nyid mchog de thar 'dod rnams/ /'khrul dang
rmongs chen gnas yin no/ /re zhig dngos gang yod na ni/ /rnam
par 'jig pa'i gnas la gnas/ /dngos po rnams ni med na yang/
/stong pa nyid

las skye bar 'gyur/ /de phyir phyogs ni gnyis po yang/ /skems
shing yongs su skems pa ni/ /mkhas pa'i go 'phang mchog phra
ba/ /bla ma'i zhal la gnas pa'o/ /gang yod de kun 'di rnams
'jig /gang med de yang 'bras bu med/ /des na gnyis kyi dbus mi
gnas/ /rab phra

mkhas pa gang gis rtogs/ /de kho na nyid rin chen mchog /dngos
po med pa nyi tshe la/ /rmongs pa rnams ni nye bar gnas/ /khong
myags dman pa'i gnas la ni/ /blun po de dag 'di na gnas/ /de
nyid dam pa mkha' 'dra la/ /gang dag sems ni rab rmongs pa/
/de dag chos

@27a @#/ /can nam mkha' la/ /mchog tu rmongs pa dag tu 'gyur/
/dngos po nyams su myong ba yang/ /zad gnas yin pas rten med
de/ /cung zad dus kyi bde thob kyi/ /rnam par grol bar mi
brjod do/ /de phyir dngos yod mi bya zhing/ /dngos po med pa'i
yid

kyang spangs/ /kun mkhyen go 'phang 'dod rnams kyis/ /de bzhin
bar du'ang gnas mi bya/ /dbang phyug la sogs yon tan 'dod/
/grangs can smra rnams yon tan med/ /changs pa 'dod pa bram ze
rnams/ /'di rnams de nyid rnam gsum gnas/ /ser skya rnams ni
stong pa'i

tshul; /dbang po thub rnams nam mkha'i tshul/ /zad byed rgyal
ba'i gzugs brnyan rnams/ /dad pas 'bad de gzhol ba'o/ /dbang
po lnga dang nyer ldan pa'i/ /bdag yod bram ze mchog rnams so/
/las med thar pa med kyang rung/ /gzhung ngan rgyang 'phen pa
yi gzhung/ /

dbang phyug pa yi bstan pa la/ /lho byang nub tu gnas pa ste/
/de yang nus can mnyam sbyor bar/ /byed cing mig ni 'dzums lta
ba'o/ /zla ba'i grub mtha' pa rtag tu/ /'phrog po la ni gus
gzhol ba/ /snying ga'i pad ma'i rlung gi ni/ /rnal 'byor ldan
pa'ang sgom par byed/ /rnal 'byor

ldan pa gzhan 'gas kyang/ /de kho na zhes rtogs shing gnas/
/bden pa gang yin de nyon zhes/ /sgrub bo slob ma la smra ste/
/dbugs rgyu ba dang rab rtog med/ /yid ni gar shi bden pa'o/
/de nyid mchog de'ang gsungs pa ni/ /bdag ni dngos la rjes
rmongs pa/ /gal te ye shes

mi shes na/ /ye shes shin tu thal bar 'gyur/ /bden dang ting
'dzin lam 'di ni/ /srid gang yin par slar 'ching ngo/ /sangs
rgyas chos ni rnam pa bzhir/ /yid 'dod rnams kyis sngon mthong
de/ /bye brag smra la sogs pa'i lam/ /bshad pas de nyid sgrub
pa'o/ /nam mkha'

'gog pa gnyis dag ste/ /'dus ma byas gsum po ni rtag /'dus
byas bdag gis kun stong la/ /byed pa po med skad cig ma/ /mig
las skye blo rnam med cing/ /mngon sum rig pa rdul gyi tshogs/
/blo ldan zhes bya kha che yi/ /bye brag smra ba'i gzhung du
bshad/ /mthong ba

@27b dbang po'i yul min te/ /shes pa rnam pa bcas pa skye/
/nam mkha' mo gsham bu 'dra la/ /'gog pa nam mkha' dang
'dra'o/ /'dus byas bems po yod min la/ /dus gsum dag kyang
khas mi len/ /bsags pa'i gzugs med min zhes pa/ /mdo sde pa ni

mkhas rnams so/ /cha shas can zhes bya med cing/ /phra rab
rdul rnams med pa dang/ /so sor snang ba dmigs med dang/
/nyams su myong ba rmi lam 'dra/ /gzung dang 'dzin pa las grol
ba'i/ /rnam shes dam pa'i don du yod/ /blo mtsho'i pha rol
phyin pa yi/ /rnal 'byor

spyod pa'i gzhung du bsgrags/ /rnam shes dam pa'i don ldan pa/
/de yang brten rnams mi 'dod de/ /gcig dang du ma'i rang bzhin
dang/ /bral phyir nam mkha'i padma bzhin/ /yod min med min yod
med min/ /gnyis ka'i bdag nyid kyang min pas/ /mtha' bzhi las
grol

dbu ma pa/ /mkhas pa rnams kyi de kho na'o/ /chos la 'bad pa
med na ni/ /gang phyir de nyid mi 'grub pa/ /de phyir mkhas
pas nan tan gyis/ /chos la legs par blta bar bya/ /'jig rten
mgon gyis gsungs pa yang/ /mchog tu brtsam bya min pa la/
/phyag byas

nas ni brtsams la 'jug /gang gang nyan pa gus pas so/ /bsregs
bcad bdar ba'i gser bzhin du/ /dge slong dag gam mkhas rnams
kyis/ /yongs su brtags la nga yi bka'/ /blang bar bya yi gus
phyir min/ /des na 'bad pas bla ma ni/ /yang dang yang du

mchod bya zhing/ /gang phyir sems ni brtan gyur ces/ /nye bar
bstan pa yongs su dri/ /gang tshe sems ni sems med pa/ /rtog pa
kun nas gsal byed pa/ /de tshe sems ni gar song dang/ /gar gnas
mthong bar mi 'gyur ro/ /sems ni yongs su shes pa las/ /'gro
ba

shes par 'gyur ba'ang yin/ /de phyir 'bad pa'i tshul rnams ni/
/sna tshogs pa yi sems goms bya/ /yid ni gang dang gar 'gro ba/
/de dag nyid du sbyar shes bya/ /gang du g.yo zhing 'gro byed
pa/ /thams cad de yi rang bzhin no/ /'di ni bag chags bcas pa
yis/ /

@28a @#/ /bag chags kyis ni khrid cing khyer/ /sems kyi 'jug pa
'gog pa yis/ /bag chags las ni bkri zhing bkyer/ /gang dang
gang gis mi rnams kyi/ /yid ni yang dag sbyor 'gyur ba/ /sna
tshogs gzugs can nor bu bzhin/ /rang bzhin de dang der

'gyur ro/ /gzhung 'di byas pas bsod nams gang/ /bzang po bdag
gis bskyed pa des/ /'jig rten ma lus sangs rgyas kyi/ /ye shes
la ni gzhol bar shog /ye shes snying po kun las btus pa zhis
bya ba/ slob dpon chen po 'phags pa lha'i zhal snga nas kyis

mdzad pa rdzogs so// //rgya gar gyi mkhan po kr-iShNa pa dang/
lo tsA ba dge slong chos kyi shes rab kyis bsgyur cing zhus
te gtan la phab pa'o//