@238a @##/ /rgya gar skad du/ bo d+hi pA tha pra dI paM/ bod skad
du/ byang chub lam gyi sgron ma/ byang chub sems dpa'

'jam dpal gzhon nur gyur pa la phyag 'tshal lo/ /dus gsum rgyal
ba thams cad dag dang de 'i chos dang/ /dge 'dun rnams la gus pa
chen pos phyag byas te/ /slob ma bzang po byang chub 'od kyis
bskul gyur pas/ /byang chub lam gyi sgron ma rab tu gsal bar
bya/ /chung ngu

@238b 'bring dang mchog gyur pas/ /skyes bu gsum du shes par
bya/ /de dag mtshan nyid rab gsal ba/ /so so'i dbye ba bri bar
bya/ /gang zhig thabs ni gang dag gis/ /'khor ba'i bde ba tsam
dag la/ /rang nyid don du gnyer byed pa/ /de ni skyes bu tha mar
shes/ /srid pa'i bde

la rgyab phyogs shing/ /sdig pa'i las las ldog bdag nyid/ /gang
zhig rang zhi tsam don gnyer/ /skyes bu de ni 'bring zhes bya/
/rang rgyud gtogs pa'i sdug bsngal gyis/ /gang zhig gzhan gyi
sdug bsngal kun/ /yang dag zad par kun nas 'dod/ /skyes bu de ni
mchog yin

no; /sems can dam ba byang chub mchog  /'dod par gyur ba de dag
la/ /bla ma rnams kyis bstan pa yi/ /yang dag thabs ni bshad par
bya/ /rdzogs sangs bris sku la sogs dang/ /mchod rten dam pa
mngon phyogs nas/ /me tog bdug@ spos@ dngos po dag  /ci 'byor pa
yi

mchod pa bya/ /kun bzang spyod las gsungs pa yi/ /mchod pa rnam
pa bdun dag kyang/ /byang chub snying po'i mthar thug par/ /mi
ldog pa yi sems dag gis/ /dkon mchog gsum la rab dad cing/ /pus@
mo lha nga sar btsugs nas/ /thal mo sbyar ba byas nas ni/ /dang
por

skyabs 'gro lan gsum bya/ /de nas sems can thams cad la/ /byams
pa'i sems ni sngon 'gro bas/ /ngan song gsum du skye sogs dang/
/'chi 'pho sogs kyis sdug bsngal ba'i/ /'gro ba sa lus la bltas
te/ /sdug bsngal gyis ni sdug bsngal ba/ /sdug bsngal

sdug bsngal rgyu mtshan las/ /'gro ba thar par 'dod pa yis/ /ldog
pa med par dam 'cha' ba'i/ /byang chub sems ni bskyed par bya/
/de ltar smon pa'i sems dag ni/ /bskyed pa'i yon tan gang yin
pa/ /de ni sdong po bkod pa yi/ /mdo las byams pas rab tu bshad/
/

de yi mdo klog pa'am bla ma la mnyan te/ /rdzogs pa'i byang chub
sems kyi yon tan mtha' med pa/ /rnam par shes par byas la de nas
rgyu mtshan du/ /de ltar yang dang yang du sems ni bskyed par
bya/ /dpa' sbyin gyis zhus mdo dag las/ /'di yi bsod nams rab
bstan pa/ /

@239a @#/ /gang de tshigs bcad gsum tsam du/ /mdor bsdus 'dir ni
bri par bya/ /byang chub sems kyi bsod nams gang/ /de la gal te
gzugs mchis na/ /nam mkha'i khams ni kun gang ste/ /de ni de bas
ltag par 'gyur/ /ganggA'i bye ba grangs snyed kyi/ /

sangs rgyas zhing rnams mi gang gis/ /rin chen dag gis kun bkang
ste/ /'jig rten mgon la phul ba bas/ /gang gis thal mo sbyar
bgyis te/ /byang chub tu ni sems btud na/ /mchod pa 'di ni khyad
par 'phags/ /de la mtha' ni ma mchis so/ /byang chub smon pa'i

sems dag bskyed nas ni/ /'bad pa mang pos kun du spel bya zhing/
/'di ni skye ba gzhan du 'ang dran don du/ /ji skad bshad pa'i
bslang ba'ang yongs su bsrung/ /'jug sems bdag nyid sdom pa ma
gtogs par/ /yang dag smon pa 'phel bar 'gyur ma yin/ /rdzogs
pa'i

byang chub smon pa 'phel 'dod pas/ /de phyir 'bad pas 'di ni
nges par blang/ /so sor thar pa rigs bdun gyi/ /rtag tu sdom
gzhan ldan pa dang/ /byang chub sems dpa'i sdom pa yi/ /skal pa
yod kyi gzhan du min/ /so sor thar pa ris bdun dang/ /de bzhin
gshegs pas

bshad pa la/ /tshangs spyod dpal ni mchog yin te/ /dge slong sdom
pa dag tu bzhed/ /byang chub sems dpa'i sa dag gi /tshul khrims
legs gsungs cho ga yis/ /yang dag mtshan nyid ldan pa yi/ /bla ma
bzang las sdom pa blang/ /sdom pa'i chog la ma las dang/ /bdag

nyid gang zhig sdom la gnas/ /sdom pa 'bogs bzod snying rjer
ldan/ /bla ma bzang por shes par bya/ /de la 'bad pas 'di 'dra
ba'i/ /gal te bla ma ma rnyed na/ /de las gzhan sdom nod pa yi/
/cho ga yang dag bshad par bya/ /de la sngon tshe 'jam pa'i dpal/
/a ba rA dzar gyur

pa yis; /ji ltar byang chub thugs bskyed pa/ /'jam dpal gyi ni
sangs rgyas zhing/ /rgyan gyi mdo las bshad pa ltar/ /de bzhin
'dir ni rab gsal bri/ /mgon po rnams kyi spyan snga ru/ /rdzogs
pa'i byang chub sems bskyed cing/ /'gro ba thams cad mgron@ du
gnyer/ /de

@239b dag 'khor ba las bsgral@ lo/ /gnod sems khro ba'i sems nyid
dang/ /ser sna dang ni phrag dog nyid/ /deng nas bzung nas byang
chub mchog /thob kyi bar du mi bya'o/ /tshangs par spyod pa spyad
bya zhing/ /sdig dang 'dod pa spang bar bya/ /tshul khrims sdom
pa la dga' bas/ /

sangs rgyas rjes su bslab par bya/ /bdag nyid myur ba'i tshul
gyis ni/ /byang chub thob par mi spro zhing/ /sems can gcig gi
rgyu yis ni; /phyi ma'i mu mthar gnas par bgyi/ /tshad med bsam
gyis mi khyab pa'i/ /zhing dag rnam par sbyang bar bya/ /ming
nas gzung ba byas

pa dang; /phyogs bcu dag tu rnam par gnas/ /bdag gi lus dang
ngag gi las/ /thams cad du ni dag par byas/ /yid kyi las kyang
dag bya ste/ /mi dge'i las rnams mi bya'o/ /rang gi lus ngag
sems ni rnam dag rgyu/ /'jug pa'i sems kyi bdag nyid sdom gnas
pa//

tshul khrims bslab pa gsum la legs bslabs pas/ /tshul khrims bslab
pa gsum la gus cher 'gyur/ /de bas rnam dag rdzogs byang chub/
/sems dpa'i sdom pa'i sdom dag ni/ /'bad par byas pas rdzogs
byang chub/ /tshogs ni yongs su rdzogs par 'gyur/

bsod nams ye shes rang bzhin gyi/ /tshogs ni yongs su rdzogs pa
yi/ /rgyu ni sangs rgyas thams cad dag  /mngon shes skyed pa
nyid du bzhed/ /ji ltar 'dab gshog ma skyes pa'i/ /bya ni mkha'
la 'phur mi nus/ /de bzhin mngon shes stobs bral bas/ /sems can

don byed nus pa min/ /mngon shes ldan pa'i nyin mtshan gyi/ /bsod
nams dag ni gang yin te/ /mngon shes dag dang bral gyur la/
/skye ba brgyar yang yod ma yin/ /myur du rdzogs pa'i byang chub
tshogs/ /yongs su rdzogs par 'dod gyur pa/ /des ni 'bad byas
mngon shes

dag /'grub par 'gyur gyi le los min/ /zhi gnas grub pa ma yin
pas/ /mngon shes 'byung bar mi 'gyur bas/ /de phyir zhi gnas
bsgrub pa'i phyir/ /yang dang yang du 'bad par bya/ /zhi gnas
yan lag rnam nyams pas/ /rab tu 'bad de bsgoms byas kyang/ /lo
na

 @240a @#/ /stong phrag dag gis kyang/ /ting 'dzin 'grub par mi
'gyur ro/ /de phyir ting 'dzin tshogs le'u las/ /gsungs pa'i yan
lag la legs gnas/ /dmigs pa gang rung gcig la yang/ /yid ni dge
la gzhag par bya/ /rnal 'byor zhi gnas grub gyur

na; /mngon shes dag kyang 'grub par 'gyur/ /shes rab pha rol
phyin sbyor dang/ /bral bas sgrib pa zad mi 'gyur/ /de phyir
nyon mongs shes bya yi/ /sgrib pa ma lus spang ba'i phyir/ /shes
rab pha rol phyin rnal 'byor/ /rtag tu thabs bcas bsgom par bya/
/thabs dang

bral ba'i shes rab dang/ /shes rab bral ba'i thabs dag kyang/
/gang phyir 'ching ba zhes gsungs pa/ /de phyir gnyis ka spang
mi bya/ /shes rab gang dang thabs gang zhes/ /the tshom dag ni
spang bya'i phyir/ /thabs rnams dang ni shes rab kyi/ /yang dag
dbye ba gsal bar bya/ /

shes rab pha rol phyin spangs pa'i/ /sbyin pa'i pha rol phyin la
sogs/ /dge ba'i tshogs rnams thams cad dag  /rgyal ba rnams kyi
thabs su bshad/ /thabs bsgoms dbang gis bdag nyid kyis/ /gang
zhig shes rab rnam bsgom pa/ /de ni byang chub myur du thob/
/bdag

med gcig pu bsgoms pas min/ /phung po khams dang skye mched
rnams/ /skye ba med par rtogs gyur pa'i/ /rang bzhin stong nyid
shes pa ni/ /shes rab ces ni yongs su bshad/ /yod pa skye ba
rigs min te/ /med pa'ang nam mkha'i me tog bzhin/ /nyes pa gnyis
kar

thal 'gyur phyir/ /gnyis ka dag kyang 'byung ba min/ /dngos po
rang las mi skye zhing/ /gzhan dang gnyis ka las kyang min/
/rgyu med las min de yi phyir/ /ngo bo nyid kyis rang bzhin med/
/yang na chos rnams thams cad dag  /gcig dang du mas rnam dpyad
na/ /ngo bo nyid ni mi

dmigs pas/ /rang bzhin med pa nyid du nges/ /stong nyid bdun
cu'i rigs pa dang/ /dbu ma rtsa ba sogs las kyang/ /dngos po
rnams kyi rang bzhin gyi/ /stong pa nyid ni grub bshad pa/ /gang
phyir gzhung ni mngas@ 'gyur bas/ /de phyir 'dir ni ma spros la/
/grub pa'i grub mtha'

@240b tsam zhig tu/ /bsgom pa'i phyir ni rab tu bshad/ /de bas
chos rnams ma lus pa'i/ /rang bzhin dag ni mi dmigs pas/ /bdag
med par ni bsgom gang yin/ /de nyid shes rab bsgom pa yin/ /shes
rab kyis ni chos rnams kun/ /gang gi rang bzhin ma mthong zhing/
/shes

rab de nyid rig bshad pa/ /rnam rtog med par de bsgom bya/ /rnam
rtog las byung srid pa 'di/ /rnam par rtog pa'i bdag nyid de/
/de phyir ma lus rtogs spangs pa/ /mya ngan 'das pa mchog yin
no/ /de ltar yang bcom ldan 'das kyis/ rnam rtog ma rig chen po
ste/ /'khor

ba'i rgya mtshor ltung bar byed/ /rtog med ting 'dzin la gnas pa/
/nam mkha' bzhin du rtog med gsal/ /zhes gsungs so/ /rnam par mi
rtog pa la 'jug pa'i gzungs las kyang/ dam chos 'di la rgyal
ba'i sras/ /rnam par mi rtog bsams gyur na/ /rnam rtog

bgrod dka' rnams 'das te/ /rim gyis mi rtog thob par 'gyur/
/zhes gsungs so/ /lung dang rigs pa dag gis ni/ /chos rnams
thams cad skye med pa'i/ /rang bzhin med pa nges byas nas/ /rnam
par rtog med bsgom par bya/ /de ltar de nyid bsgom byas nas/
/rim

gyis drod sogs thob byas nas/ /rab dga' la sogs thob 'gyur te/
/sangs rgyas byang chub yun mi ring/ /sngags mthu nyid las grub
pa yi/ /zhi dang rgyas sogs las rnams kyis/ /bum pa bzang grub
la sogs pa/ /grub chen brgyad sogs stobs kyis kyang/ /bde

ba yis ni byang chub tshogs/ /yongs su rdzogs par 'dod pa dang/
/bya ba spyod sogs rgyud gsungs pa'i/ /gal te gsang sngags spyod
'dod na/ /de tshe slob dpon dbang bskur phyir/ /bsnyen bkur rin
chen sogs sbyin dang/ /dka' sgrub la sogs thams cad kyis/ /bla

ma dam pa mnyes par bya/ /bla ma mnyes par gyur pa yis/ /yongs
rdzogs slob dpon dbang bskur bas/ /sdig kun rnam dag bdag nyid
ni/ /dngos grub sgrub pa'i skal ldan 'gyur/ /dang po sangs rgyas
rgyud chen las/ /rab tu 'bad pas bkag pa'i phyir/ /gsang ba

@241a @#/ /shes rab dbang bskur ni/ /tshangs par spyod pas blang
mi bya/ /gal te dbang bskur de 'dzin na/ /tshangs spyod dka' thub
la gnas pas/ /bkag pa spyad par 'gyur ba'i phyir/ /dka' thub
sdom pa de nyams te/ /brtul zhugs can de pham pa yi/ /

ltung ba dag ni 'byung 'gyur zhing/ /de ni ngan song nges lhung
bas/ /grub pa yang ni yod ma yin/ /rgyud kun nyan dang 'chad pa
dang/ /sbyin sreg mchod sbyin sogs byed pa/ /slob dpon dbang
bskur rnyed 'gyur zhing/ /de nyid rig la nyes pa med/ /gnas
brtan mar me mdzad dpal

gyis; /mdo sogs chos las bshad mthong ba/ /byang chub 'od kyis
gsol btab nas/ /byang chub lam bshad mdor bsdus byas/ /byang
chub lam gyi sgron ma slob dpon chen po dpal mar me mdzad ye
shes kyis mdzad pa rdzogs so// //rgya gar gyi mkhan po chen po

de nyid dang/ zhu chen gyi lo tsA ba dge ba'i blo gros kyis
bsgyur zhing gtan la phab pa/ chos 'di ni zhang zhung gi tho
ling gtsug lag khang du mdzad pa'o//